រាជធានីភ្នំពេញ ៖ រដ្ឋសភាជាតិ នៅថ្ងៃទី១២ខែតុលា ឆ្នាំ២០១៧ នេះ នឹងបើកសម័យប្រជុំពេញអង្គលើកទី៩ នីតិកាលទី៥ ដើម្បីពិភាក្សាលើរបៀបវារៈសំខាន់ៗចំនួន៦ ក្រោមអធិបតីភាពសម្តេច មហាពញាចក្រី ហេង សំរិន ប្រធានរដ្ឋសភា ។
បើតាមសេចក្តីជូនដំណឹង បានលើកឡើងថា គណៈកម្មាធិការអចិន្ត្រៃយ៍រដ្ឋសភា បើកកិច្ចប្រជុំក្រោមអធិបតីភាពដ៏ខ្ពង់ខ្ពស់សម្ដេចអគ្គមហាពញាចក្រី ហេង សំរិន ប្រធាន រដ្ឋសភា កាលពីថ្ងៃព្រហស្បតិ៍ ទី៥ ខែតុលា ឆ្នាំ២០១៧ កន្លងមកនេះ បានអនុម័តលើកាលបរិច្ឆេទបើកសម័យប្រជុំសភាពេញអង្គលើកទី៩ ដើម្បីពិនិត្យអនុម័តរបៀបវារៈចំនួន៦ រួមមាន៖
១ ព្រះរាជសារព្រះករុណាព្រះបាទសម្តេច ព្រះបរមនាថ នរោត្តមសីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំរដ្ឋសភាលើកទី៩ នីតិកាលទី៥។
២ របាយការណ៍ស្តីពីសកម្មភាពរបស់រដ្ឋសភា ចន្លោះសម័យប្រជុំរដ្ឋសភាលើកទី៨ និងលើកទី៩នីតិកាលទី៥។
៣ ការពិភាក្សា និងអនុម័តសេចក្តីព្រាងច្បាប់ ស្តីពីឧបាស្រ័យពាណិជ្ជកម្ម។
៤ ការពិភាក្សា និងអនុម័តសេចក្តីព្រាងច្បាប់ ស្តីពីការអនុម័តយល់ព្រមលើពិធីសារ ធ្វើវិសោធនកម្មកិច្ចព្រមព្រៀងក្របខ័ណ្ឌ ស្តីពីកិច្ចសហប្រតិបត្តិការ សេដ្ឋកិច្ចទូលំទូលាយ និងកិច្ចព្រម ព្រៀងមួយចំនួនទៀត ក្រោមកិច្ចព្រមព្រៀងក្របខណ្ឌនេះ រវាងសមាគមប្រជាជាតិអាស៊ី អាគ្នេយ៍(ហៅកាត់ថា អាស៊ាន) និងប្រទេសចិន។
៥ ការពិភាក្សា និងអនុម័តសេចក្តីព្រាងច្បាប់ ស្តីពីការអនុម័តយល់ព្រម ស្តីពីការទទួល បានសុពលភាព នៃប្រកាសនីយបត្រ តក្កកម្ម អឺរ៉ុប រវាងរាជរដ្ឋាភិបាលកម្ពុជា និងស្ថាប័នប្រកាស នីយបត្រ តក្កកម្ម អឺរ៉ុប។
៦ ការពិភាក្សា និងអនុម័តសេចក្តីព្រាងច្បាប់ ស្តីពីវិសោធនកម្មមាត្រា៣៧ មាត្រា ៣៨ មាត្រា១០៩ និងមាត្រា១៣៦ នៃច្បាប់ ស្តីពីប្រកាសនីយបត្រ តក្កកម្ម អឺរ៉ុប ដែលមានប្រយោជន៍ និងគំនូរឧស្សាហកម្ម ដែលត្រូវប្រកាសឲ្យប្រើ កាលពីថ្ងៃទី២២ ខែមករា ឆ្នាំ២០០៣។
សូមបញ្ជាក់ថា គណៈកម្មាធិការអចិន្ត្រៃយ៍រដ្ឋសភា ក៏បានអនុម័តសមាសភាព លេខាធិការសម្រាប់សម័យប្រជុំរដ្ឋសភាលើកទី៩ នីតិកាលទី៥ ចំនួនបីរូបផងដែរ រួមមាន៖ លោកស្រី ពៅ សាវឿន លោក សត្យា វុធ និងលោក ឡុង រី៕
ភ្នំពេញ ៖ បុរសជនជាតិវៀតណាមម្នាក់ជិះទូកចុះបេះត្រកួនត្រូវបានលង់ទឹកស្លាប់ ដែលហេតុការណ៏ភ្ញាក់ផ្អើលខាងលើនេះបានកើតឡើងកាលពីវេលាម៉ោង៨ និង៣០នាទីព្រឹកថ្ងៃទី១១ ខែតុលា ឆ្នាំ២០១៧ស្ថិតនៅផ្លូវលំខាងក្រោយសាលាកសិកម្មភូមិខ្វាសង្កាត់ដង្កោ ខណ្ឌដង្កោ។
ប្រភពព័ត៌មានពីប្រពន្ធជនរងគ្រោះខាងលើបានអោយដឹងថានៅវេលាម៉ោង៣ទៀបភ្លឺប្តីរបស់គាត់បានជិះទូកចុះទៅបេះត្រកួនក្នុងបឹងក្រោយផ្ទះតែម្នាក់ឯងដូចសព្វដងលុះព្រឹកឡើងមិនឃើញត្រលប់មកផ្ទះវិញហើយអ្នកដែលជិះទូកទៅបេះត្រកួនដូចគ្នាឃើញតែទូកនឹងត្រកួនពុំឃើញគាត់ក៏មានការឆោឡោនាំគ្នាចេញទូកជួយរាវហើយក៏បានស្រង់ជនរងគ្រោះដាក់លើទូកត្រលប់មកផ្ទះរបស់គាត់វិញតែជាអកុសលបុរសជនជាតិវៀតណាមខាងលើនេះបានឈ្លក់ទឹកស្លាប់បាត់បង់ជិវិតបាត់ទៅហើយ។
សមត្ថកិច្ចបានអោយដឹងថាជនរងគ្រោះខាងលើមានឈ្មោះលើនទិតអាយុ៤៨ឆ្នាំមុខរបរដាំត្រកួននិងបេះត្រកួនប្រពន្ធឈ្មោះងៀងវ៉ាអាយុ៣៧ឆ្នាំ បានមកស្នាក់នៅកម្ពុជារយះពេល១០ឆ្នាំមកហើយ។
ក្រោយពេលកើតហេតុសមត្ថកិច្ចមូលដ្ឋានសហការណ៏ជាមួយនគរបាលជំនាញបានចុះមកដលើកន្លែងកើតហេតុធ្វើការពិនិត្យសាកសពក្រោយពីពិនិត្យសាកសពរួចសមត្ថកិច្ចបានអោយដឹងថាសពបុរសខាងលើនេះពិតជាស្លាប់ដោយសារលង់ទឹកឈ្លក់ស្លាប់ពិតប្រាកដមែនហើយសពត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕
រាជធានីភ្នំពេញ ៖ ក្រុមអ្នកតំណាងរាស្ត្រគណបក្សសង្គ្រោះជាតិ បានចេញនូវសេចក្តីប្រកាស ព័ត៌មានខ្លីមួយកាលពីថ្ងៃទី១០ ខែតុលា ឆ្នាំ២០១៧ ដោយបញ្ជាក់ថា ក្រុមសមាជិកសភាគណបក្សសង្គ្រោះជាតិមិនចូលរួមប្រជុំសម័យប្រជុំរដ្ឋសភាលើកទី៩ និតិកាលទី៨ នៅថ្ងៃព្រហស្បតិ៍ ទី១២ ខែតុលា ឆ្នាំ២០១៧នោះទេ៕
វ៉ាស៊ីនតោន ៖ ទីភ្នាក់ងារព័ត៌មានចិន ស៊ីនហួរ ចេញផ្សាយនៅព្រឹកថ្ងៃពុធនេះថា មកទល់ពេលនេះ មនុស្ស១៥នាក់ហើយបានបាត់បង់ជីវិត និងច្រើនជាង១៥០នាក់ កំពុងបាត់ខ្លួន ខណៈដែលភ្លើងឆេះព្រៃយ៉ាងសន្ធោសន្ធៅបានរីករាលដាលពាសពេញភាគខាងជើងរដ្ឋកាលីហ្វរញ៉ ដែលស្ថិតនៅភាគខាងលិចសហរដ្ឋអាមេរិក។
អាជ្ញាធរអាមេរិក ករណីមនុស្សស្លាប់ខាងលើបានកើតមានឡើងនៅក្នុងតំបន់ សូណាម៉ា (Sonama) ០៩នាក់, តំបន់ ណាប៉ា (Napa) ០២នាក់, តំបន់ មិនដូស៊ីណូ (Mendocino) ០៣នាក់, និង តំបន់ យូបាន (Yuba) ម្នាក់ ខណៈមនុស្សលើសពី១៥០នាក់ផ្សេងទៀត បាននិងកំពុងតែបន្តបាត់ខ្លួននៅក្នុងតំបន់ Sonoma។ ជាមួយគ្នានេះមនុស្សជាង៣,០០០នាក់ កំពុងបន្តស្ថិតក្នុងទីជម្រកសុវត្ថិភាពដដែល ខណៈភ្លើងឆេះព្រៃចំនួន ១៧កន្លែង ដាច់ដោយឡែកពីគ្នា បានឆាបឆេះនៅលើផ្ទៃដីប្រមាណ ៤៦,៥០០ហិកតា ទូទាំងរដ្ឋកាលីហ្វរញ៉ា ហើយសំណង់នានា រួមមានទាំង ហាង, មន្ទីរពេទ្យ, និងលំនៅឋានយ៉ាងតិច ២,០០០ខ្នង ត្រូវបានបំផ្លិចបំផ្លាញផងដែរ៕
រាជធានីភ្នំពេញ ៖ ទន្ទឹមនឹងការកត់សម្គាល់ថា ក្នុងរយៈពេលចុងក្រោយនេះ បញ្ហាបាតុកម្ម-កូដកម្ម នៅតាមបណ្តារោងចក្រនានាមានការធ្លាក់ចុះយ៉ាងគំហុកនោះ សម្តេច ហ៊ុន សែន បានថ្លែង នូវការរម្លឹកឲ្យស្វែងរកមេខ្លោងដែលនាំធ្វើបាតុកម្មនៅផ្លូវវេងស្រេង ហើយចាប់ពួកគេយកមកសួរចម្លើយឲ្យបាន ដោយសារតែបាតុកម្មនេះជារូបភាពនៃបដិវត្តន៍ពណ៌ ។
សម្តេច ហ៊ុន សែន បានថ្លែងដូច្នេះនៅក្នុងពិធីសំណេះសំណាល ជាមួយកម្មករ-កម្មការិនី ជាង១ម៉ឺននាក់ នៅរោងចក្រតំបន់ ផ្លូវវេងស្រេងនៅព្រឹកថ្ងៃទី១១ ខែតុលា ឆ្នាំ២០១៧នេះ ។ សម្តេចបានហៅការធ្លាក់ចុះបាតុកម្មយ៉ាងគំហុកនោះ ដោយសារមានការយក ចិត្តទុកដាក់ពីថៅកែរោងចក្រ និងរដ្ឋបាលរោងចក្រ ។ សម្តេចថា ទាំងថៅកែ និងកម្មករត្រូវ ចាត់ទុករោងចក្រ ជាគ្រួសារ តែមួយ បើគ្មានថៅកែក៏គ្មានកម្មករ បើគ្មានកម្មករក៏គ្មានថៅកែដែរ។
យ៉ាងណាក៏ដោយ សម្តេចបានថ្លែងនូវការរំលឹកឲ្យរកមេខ្លោង ដែលបានបំផុស នូវបដិវត្តន៍ កាលពីអំឡុង មហាបាតុកម្ម នៅចុងឆ្នាំ២០១៣និងដើមឆ្នាំ២០១៤ ដែលធ្វើឡើងនៅតាម បណ្តោយ ផ្លូវវ៉េងស្រេង ហើយត្រូវចាប់ខ្លួនពួកអ្នកធ្វើបាតុកម្ម មកសួរចំលើយឲ្យបាន ៕
តេហេរ៉ង់ ៖ ជាឆ្លើយតបនឹងការគំរាមកំហែងប្រឆាំងនឹង ទីក្រុងតេហេរ៉ង់ អ្នកនាំពាក្យកងកម្លាំងប្រដាប់អាវុធអ៊ីរ៉ង់ លោក Masoud Jazayeri បានព្រមានប្រធានាធិបតីអាមេរិក លោក ដូណាល់ ត្រាំ ថា កងកម្លាំងអ៊ីរ៉ង់នឹងផ្ដល់មេរៀនថ្មីមួយដល់សហរដ្ឋអាមេរិក។ នេះបើតាមទីភ្នាក់ងារសារព័ត៌មាន Reuters។
លោក Masoud Jazayeri ដែលជាមេញ្ជាការកងកម្លាំង ឆ្មាំបដិវត្តន៍អ៊ីរ៉ង់ផងនោះបានបញ្ជាក់ដូច្នេះថា «មើលទៅវាហាក់ដូចជារដ្ឋបាលដូណាល់ ត្រាំ ចេះតែពាក្យសន្យានឹងមាត់តែប៉ុណ្ណោះ ដូច្នេះពួកគេគួរតែទទួលរងវិបត្តិខ្លះដើម្បីយល់ពី អត្ថន័យនៃអំណាចថ្មីនៅលើពិភពលោក…ហើយវាដល់ពេលដែលយើងត្រូវបង្រៀនពីមេរៀនថ្មីដល់សហរដ្ឋអាមេរិក»។
ការថ្លែងបែបនេះរបស់លោក Masoud Jazayeri ធ្វើឡើងបន្ទាប់ពីប្រព័ន្ធផ្សព្វផ្សាយអាមេរិក នាំគ្នាចុះផ្សាយថាលោក ដូណាល់ ត្រាំ ទំនងជាអាចនឹងប្រកាសបោះបង់ចោលកិច្ចព្រមព្រៀង នុយក្លេអ៊ែរនៅព្រហស្បតិ៍សប្ដាហ៍នេះតាមអ្វីដែលលោកធា្លប់បានសន្យានៅអំឡុងយុទ្ធនាការឃោសនាបោះឆ្នោតកាលពីឆ្នាំ២០១៥។
បើតាមប្រព័ន្ធផ្សព្វផ្សាយអាមេរិក លោក ដូណាល់ ត្រាំ ត្រូវបានគេរំពឹងថា នឹងដាក់បញ្ចូលកងកម្លាំងឆ្មាំបដិវត្តន៍អ៊ីរ៉ង់ IRGC ទៅក្នុងបញ្ជីខ្មៅនៃរដ្ឋគាំទ្រភេរវករ។ ក៏ប៉ុន្តែ គេក៏រំពឹង ដែរថាទណ្ឌកម្មរបស់ទីក្រុងវ៉ាស៊ីនតោនអាចនឹងជះឥទ្ធិពលដល់ជម្លោះនៅអ៊ីរ៉ាក់ និងស៊ីរី ជាទីដែលទីក្រុងវ៉ាស៊ីនតោន និងទីក្រុងតេហេរ៉ង់ គាំទ្រភាគីជម្លោះរៀងៗខ្លួន ខណៈអ៊ីរ៉ង់បានព្រមានថា នឹងប្រើប្រាស់គ្រប់មធ្យោបាយទាំងអស់រួមមានទាំងកម្លាំងយោធា បើសិនជាសហរដ្ឋអាមេរិកដាក់ទណ្ឌកម្មនេះមែននោះ៕
ខេត្តរតនគិរី ៖ រថយន្តបាឡែន១គ្រឿង ដែលបង្កប់ឈើប្រណីតប្រភេទធ្នង់បម្រុងឆ្លងដែនចេញទៅប្រទេសវៀតណាម តាមបណ្តោយផ្លូវជាតិលេខ៧៨ត្រូវកម្លាំងយោធា១០២ បង្ក្រាបបាននៅក្បែរវរៈការពារព្រំដែនគោកលេខ៦២៣។ ការបង្ក្រាបខាងលើនេះធ្វើឡើងនៅវេលាម៉ោង៦ និង៣០នាទីព្រលប់ ថ្ងៃទី១០ ខែតុលា ឆ្នាំ២០១៧ ស្ថិតនៅក្នុងភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។
តាមសមត្ថកិច្ចបានដឹងថា រថយន្តដែលសមត្ថកិច្ចបង្ក្រាបបាននេះ ម៉ាកកាមរីបាឡែន ពណ៌ស្ករ ពាក់ស្លាកលេខ ភ្នំពេញ 2l-8827 ផ្ទុកឈើប្រណីតប្រភេទធ្នង់ពេញមួយរថយន្ត និងឆែកនៅក្នុងរថយន្តរកឃើញស្លាកលេខ១គូរថែមទៀតផង។ ដោយឡែកម្ចាស់រថយន្តដែលបង្ក្រាបបាននេះ ត្រូវគេស្គាល់ថា ជាមន្ត្រីសមត្ថកិច្ច១រូបនៅក្នុងស្រុកអូរយ៉ាដាវ។
បច្ចុប្បន្នវត្ថុតាង និងរថយន្ត ត្រូវបានកម្លាំងយោធាប្រគល់ទៅឲ្យជំនាញផ្នែករដ្ឋបាលព្រៃឈើបកែវ ដើម្បីចាត់ការបន្តតាមនីតិវិធី ចំណែកឈើមិនទាន់បានធ្វើការវាស់វែងនៅឡើយទេ៕
អាមេរិក ៖ អភិបាលរដ្ឋកាលីហ្វរញ៉ាលោក ចឺរី ប្រោន (Jerry Brown) បាននិយាយថា មនុស្ស១១នាក់ហើយបានបាត់បង់ជីវិត ក្នុងគ្រោះអគ្គិភ័យភ្លើងឆេះព្រៃដ៏សន្ធោសន្ធៅមួយដែលបាននិងកំពុងតែវាយប្រហារតំបន់ភាគខាងជើង នៃរដ្ឋកាលីហ្វរញ៉ា និងបំផ្លិចបំផ្លាញផ្ទះសម្បែងក៏ដូចជាអគារពាណិជ្ជកម្ម១,៥០០ពាន់ខ្នង ខណៈដែលមនុស្សប្រមាណ២០,០០០នាក់ត្រូវបង្ខំជម្លៀសខ្លួនចេញពីកន្លែងជ្រកកោណរបស់ពួកគេថែមទៀតផង។ នេះបើតាមសារព័ត៌មាន BBC។
លោកអភិបាលបន្តថា លោកបានសម្រេចប្រកាសអាសន្ននៅក្នុងតំបន់ Napa, Soma, និង Yuba ខណៈដែលអណ្តាតភ្លើងបានបន្តរីករាលដាលទៅកាន់ទិស ខាងត្បូងរកតំបន់ San Francisco Bay។ ទន្ទឹមនោះលោក Brown ក៏បានពង្រីកសេចក្តីប្រកាសអាសន្ននេះទៅដល់តំបន់ចំនួន០៤ទៀត នៅភាគខាងជើងរដ្ឋ រួមជាមួយនិងតំបន់ Orange នៅភាគខាងត្បូង។
គួរបញ្ជាក់ថា ភ្លើងឆេះ ព្រៃចំនួន១៥ដាច់ដោយឡែកពីគ្នា នៅលើផ្ទៃដីប្រមាណជិត០៣ម៉ឺនហិកតា ក្នុងភាគខាងជើងរដ្ឋកាលីហ្វរញ៉ា ចាប់តាំងតែពីយប់ថ្ងៃអាទិត្យកន្លងទៅ (ពេលវេលានៅភាគខាងលិចអាមេរិក)៕
រាជធានីភ្នំពេញ ៖ រឿងជួញដូរគ្រឿងញៀនជាង១៤គីឡូក្រាម នៅរសៀលថ្ងៃទី១០ ខែតុលា ឆ្នាំ២០១៧នេះ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោស ជនជាប់ចោទឈ្មោះ IHEONU GRABRIEL ភេទប្រុស អាយុ៤២ឆ្នាំ ជនជាតិនីហ្សេរីយ៉ា ដាក់ពន្ធនាគារអស់មួយជីវិត និងពិន័យជាប្រាក់ ៨០លានរៀលចូលជាថវិការដ្ឋ ពីបទរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀនចំនួន ១៤,៤៦៨.៥០ក្រាម ប្រព្រឹត្តកាលពីថ្ងៃទី១០ ខែមិថុនា ឆ្នាំ២០១៦ នៅចំណុចច្រកទ្វាព្រំដែន អន្តរជាតិកម្ពុជា-វៀតណាម ស្មាច់ (ត្រពាំងថ្លុង) ខេត្តត្បូងឃ្មុំ ៕
រាជធានីភ្នំពេញ ៖ បន្ទាប់ពីប្រតិភូសហភាពអឺរ៉ុបបានចេញនូវសេចក្តីថ្លែងការណ៍មួយ ដោយចាត់ទុកការរំលាយបក្សប្រឆាំងអាចនឹងធ្វើឲ្យបាត់បង់កិត្យានុភាពនៃដំណើរការបោះឆ្នោតនោះ អ្នកនាំពាក្យក្រសួងមហាផ្ទៃ លោកឧត្តមសេនីយ៍ ខៀវ សុភ័គ ត្រូវបានដកស្រង់សំដីដោយ VOD ដោយចាត់ទុកសេចក្តីថ្លែងការណ៍របស់ប្រតិភូសហភាពអឺរ៉ុបធ្វើឡើងតាមខ្លួននឹកឃើញតែប៉ុណ្ណោះ ។
លោក ខៀវ សុភ័គ បានបញ្ជាក់ថា កម្ពុជាជាប្រទេសគោរពរដ្ឋធម្មនុញ្ញ និងលទ្ធិប្រជាធិបតេយ្យ សេរីពហុបក្ស ហើយបើទោះជាគ្មានគណបក្សសង្គ្រោះជាតិ ចូលរួមបោះឆ្នោតនៅឆ្នាំ២០១៨ ក៏មានគណបក្សផ្សេងទៀតចូលរួម សម្រាប់ការបោះឆ្នោតដែរ ។
VOD បានដកស្រង់សំដីលោក ខៀវ សុភ័គ ផ្សាយថា ជាការពិតណាស់ កាលហ្នឹង (ការបោះឆ្នោតឃុំសង្កាត់ ឆ្នាំ២០១៧) ប្រជាពលរដ្ឋអត់បានដឹងថា បក្សសង្គ្រោះជាតិ ត្រូវបានដឹកនាំដោយបុគ្គលឈ្មោះ កឹម សុខា ដែលជាជនក្បត់ជាតិ។ ទើបតែនៅពេលនេះលោកដឹងហើយថា អ្វីដែលលោក កឹម សុខា បានធ្វើគឺជាការធ្វើឡើង ដោយតាមការណែនាំរបស់បរទេសដែលចង់នាំឲ្យប្រទេសកម្ពុជាឆ្ពោះទៅកាន់ប្រទេស ដូចជាស៊ីរី ឬលីប៊ី ជាដើម។ ដូច្នេះ ប្រជាពលរដ្ឋកម្ពុជា គាត់បានដកឃ្លា មកពិចារណាអំពីសន្លឹកឆ្នោតរបស់ខ្លួនហើយ នៅឆ្នាំ២០១៨ ។ លោកបញ្ជាក់បន្ថែមថា ជំហររបស់រដ្ឋាភិបាល មិនអាចថយក្រោយនោះទេ តែថា ការសម្រេចរំលាយ ឬមិនរំលាយយ៉ាងណានោះ គឺស្ថិតទៅលើការសម្រេចតុលាការកំពូល ៕
ភ្នំពេញ ៖ មន្ដ្រីជាន់ខ្ពស់ក្រសួងព័ត៌មាន បានជំរុញឱ្យស្ថាប័នផ្សព្វផ្សាយរបស់រដ្ឋទាំងអស់បង្កើនការផ្សព្វផ្សាយអំពីការទប់ស្កាត់ជំងឺអេដស៍ក្នុងឱកាសព្រះរាជពិធីបុណ្យអុំទូកខាងមុខនេះ ដើម្បីផ្តល់ជាសារជូនដល់ប្រជាពលរដ្ឋមានការយល់ដឹង និងមានការប្រុងប្រយ័ត្ននៃការឆ្លងមេរោគអេដស៍បន្ថែមទៀត។
ថ្លែងក្នុងកិច្ចប្រជុំក្រុមការងារប្រយុទ្ធប្រឆាំងជំងឺអេដស៍របស់ក្រសួង កាលពីព្រឹកថ្ងៃទី១០ តុលានេះនៅទីស្តីការក្រសួងលោក មាស សោភ័ណ្ឌ អនុរដ្ឋលេខាធិការក្រសួងព័ត៌មានមានប្រសាសន៍ថាគណៈកម្មការប្រយុទ្ធប្រឆាំងនឹងជំងឺអេដស៍របស់ក្រសួងព័ត៌មាននឹងរៀបចំ យុទ្ធនាការផ្សព្វផ្សាយសារមួយចំនួនពាក់ព័ន្ធទៅនឹងការប្រយុទ្ធប្រឆាំងជំងឺអេដស៍ ទៅដល់ប្រជាពលរដ្ឋទូទៅក្នុងឱកាសនៃព្រះរាជពិធីបុណ្យអុំទូក អកអំបុក និងសំពះព្រះខែខាងមុខនេះដែលជាពិធីបុណ្យដែលមានប្រជាលរដ្ឋមកលេងកម្សាន្តច្រើននៅភ្នំពេញ។
ឯកឧត្ដមអនុរដ្ឋលេខាធិការបញ្ជាក់ថា បញ្ហាអេដស៍បច្ចុប្បន្ននេះ នៅតែជាបញ្ហាប្រឈម បើទោះបីជាជំងឺអេដស៍នៅកម្ពុជាមានការថយចុះក៏ដោយ តែយើងត្រូវមានការប្រុងប្រយ័ត្ន ហើយត្រូវរួមគ្នាទប់ស្កាត់ជំងឺអេដស៍នេះដើម្បីលប់បំបាត់ជម្ងឺអេដស៍នេះឱ្យបានតាមគោលដៅនៅឆ្នាំ២០២០ខាងមុខ ហើយថា ដើម្បីសម្រេចគោលដៅនេះប្រព័ន្ធផ្សព្វផ្សាយរដ្ឋ និងឯកជន ត្រូវបន្តផ្សព្វផ្សាយអោយបានខ្លាំងក្លាតាមរយៈជាសារអប់រំ តាមកាសែត វិទ្យុ និងការរត់អក្សរតាមកញ្ចក់ទូរទស្សន៍ដែលពាក់ព័ន្ធនឹងជំងឺអេដស៍អោយបានកាន់ច្រើនបន្ថែមទៀត ដើម្បីជា ប្រយោជន៍ដល់សាធារណជនបានយល់ដឹងអំពីផលប៉ះពាល់ និងផលវិបាកដែលបង្ករឡើងដោយជំងឺអេដស៍។ ជាមួយគ្នានេះឯកឧត្ដមបានអំពាវនាវអោយប្រជាពលរដ្ឋដែលគ្រោងមកកំសាន្ដក្នុងព្រះរាជពិធីបុណ្យអុំទូក សូមការពារខ្លួន និងបង្កើនការប្រុងប្រយ័ត្នកុំអោយឆ្លងមេរោគអេដស៍ឱ្យសោះ ពោលគឺសូមកុំនាំអេដស៍ចូលផ្ទះ៕
រាជធានីភ្នំពេញ ៖ រយៈពេល៣៨ថ្ងៃ នៃដំណើរការបើកឲ្យចុះឈ្មោះបោះឆ្នោត គឺចាប់ពីថ្ងៃទី០១ ខែកញ្ញា ដល់ថ្ងៃទី០៨ ខែតុលា ឆ្នាំ២០១៧ មានប្រជាពលរដ្ឋខ្មែរចំនួន ៣៣៨,០១៨នាក់ហើយបានទៅចុះឈ្មោះបោះឆ្នោត ខណៈដែលអ្នកត្រូវលុបឈ្មោះចេញមានចំនួន ៣,៤០៧នាក់ និងអ្នកខុសកែតម្រូវមានចំនួន ៣,០៤៩នាក់។ នេះបើយោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប)។
គ.ជ.ប បានឲ្យដឹងថា តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង១.៦លាននាក់ ខណៈប្រជាពលរដ្ឋខ្មែរដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩.៨លាននាក់៕
ម៉ាឡេស៊ី ៖ មនុស្សចំនួន៨នាក់ត្រូវបានប៉ូលិសម៉ាឡេស៊ីចាប់ខ្លួនដោយសង្ស័យថា មានការពាក់ព័ន្ធនឹងសកម្មភាពភេរវកម្មថ្មីៗនេះពីព្រោះគេមានភស្តុតាងមួយចំនួនបង្ហាញថា សកម្មភាពរបស់ក្រុមជនសង្ស័យទាំងនេះបានបង្កការព្រួយបារម្ភនៅប្រទេសម៉ាឡេស៊ីដែលមានប្រជាពលរដ្ឋពហុជាតិសាសន៍និងពហុសាសនា។
ឧបនាយករដ្ឋមន្ត្រីលោក អះម៉ាដ ហ្សាហ៊ីដ ហាមីឌី បាននិយាយថា គោលបំណងសំខាន់របស់ក្រុមជ្រុលនិយមនេះគឺចង់បង្ហាញឲ្យសាធារណជនចាប់អារម្មណ៍ថា ប្រទេសម៉ាឡេស៊ីមិនមានសិទ្ធិសេរីភាពផ្នែកសាសនានោះទេ។ លោកបានបញ្ជាក់ថា ការចាប់ខ្លួនក្រុមជនសង្ស័យនេះត្រូវបានធ្វើឡើងដោយក្រុមប្រឆាំងភេរវកម្មពិសេសនៅប្រទេសម៉ាឡេស៊ីដើម្បីប្រយុទ្ធប្រឆាំងនឹងការវាយប្រហារភេរវកម្មនៅប្រទេសនេះ។
គួរបញ្ជាក់ថា ចាប់ពីថ្ងៃទី២៧ខែកញ្ញាដល់ថ្ងៃទី៦ខែតុលា មនុស្សចំនួន៨នាក់ត្រូវបានចាប់ខ្លួននៅតាមតំបន់មួយចំនួននៅប្រទេសម៉ាឡេស៊ីដោយសង្ស័យថា រៀបចំសកម្មភាពភេរវកម្ម កេណ្ឌអ្នកទោសឲ្យចូលរួមក្រុមភេរវករ និងផែនការវាយប្រហារលំនៅឋានពលរដ្ឋគោរពសាសនាអ៊ីស្លាម គ្រឹស្តសាសនា និងសាសនាហិណ្ឌូដើម្បីបង្កើតជម្លោះនៅប្រទេសនេះ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
