វ៉ាស៊ីនតោន ៖ ក្រុមអ្នកវិភាគបានលើកឡើងថា ការសម្រេចចិត្តរបស់រដ្ឋបាលប្រធានាធិបតី ដូណាល់ ត្រាំ ក្នុងការដកខ្លួនសហរដ្ឋអាមេរិក ចេញពីអង្គការ UNESCO គឺជាសញ្ញាថ្មីចុងក្រោយបំផុតមួយ ដែលបង្ហាញពីការកើនឡើង នៃភាពឃ្លាតដាច់ឆ្ងាយដោយឡែកពីគេរបស់អាមេរិក ព្រមទាំងដាក់សម្ពាធគាបសង្កត់របស់ទីក្រុងវ៉ាស៊ីនតោន មកលើអង្គការសហប្រជាតិ។ នេះបើតាមការដកស្រង់ចេញផ្សាយដោយសារព័ត៌មានរុស្ស៊ី Sputnik ។
ក្រុមអ្នកវិភាគមកពីសាកលវិទ្យាល័យធំៗ នៅសហរដ្ឋអាមេរិកបានឲ្យដឹងថា ការធ្វើបែបនេះនឹងគូសបញ្ជាក់កាន់តែច្បាស់ ពីភាពឯកោរបស់សហរដ្ឋអាមេរិក នៅក្នុងអង្គការពិភពលោកមួយនេះ ដោយវានឹងជះឥទ្ធិពលអវិជ្ជមាន ទៅលើទីក្រុងវ៉ាស៊ីនតោនផ្ទាល់ ច្រើនជាងមកលើអង្គការបេតិកភណ្ឌពិភពលោក UNESCO ខណៈការសម្រេចចិត្តដ៏ចម្លែកនេះ នឹងបង្កើនភាពឯកោរបស់សហរដ្ឋអាមេរិក នៅក្នុងសហគមន៍អន្តរជាតិ។
ម្យ៉ាងវិញទៀត ការសម្រេចចិត្តខាងលើ នឹងធ្វើឲ្យអាមេរិកជាប់គាំងកាន់តែខ្លាំង នៅក្នុងរង្វង់នៃភាពឯកោក៏ដូចជាមន្ទិលសង្ស័យ ពាក់ព័ន្ធនឹងការធ្វើកិច្ចសហប្រតិបត្តិការជាមួយបណ្តាអង្គការអន្តរជាតិ ហើយវានឹងបង្កផលវិបាកជាខ្លាំង ដើម្បីផ្លាស់ប្តូរការសម្រេចចិត្តនេះវិញ សម្រាប់រដ្ឋបាលក្រោយថ្មីទៀត។
បើតាមក្រុមសាស្ត្រចារ្យជំនាញៗដដែលថា ការសម្រេចចិត្តរបស់ លោក ត្រាំ ក្នុងការដកអាមេរិកចេញពីអង្គការ UNESCO គឺស្ថិតក្រោមក្របខណ្ឌនៃយុទ្ធនាការរបស់ទីក្រុងវ៉ាស៊ីនតោន ដើម្បីធ្វើយ៉ាងណាមិនឲ្យអង្គការសហប្រជាជាតិ រួមទាំងអង្គការពាក់ព័ន្ធផ្សេងៗទៀត មានឥទ្ធិពលក្នុងការជួយប៉ាឡេស្ទីន ប្រឆាំងនឹងអ៊ីស្រាអែល។
សូមរម្លឹកថា ម្សិលមិញសហរដ្ឋអាមេរិកបានប្រកាសថា នឹងដកខ្លួនចេញពីអង្គការ UNESCO នៅចុងឆ្នាំ២០១៨ខាងមុខ ដោយឈរលើហេតុផលថា អង្គការបេតិកភណ្ឌពិភពលោកត្រូវការធ្វើកំណែទម្រង់ឡើងវិញ ហើយ UNESCO មានទំនោរប្រឆាំងនឹងអ៊ីស្រាអែល៕
រាជធានីភ្នំពេញ ៖ ឥទ្ធិពលព្យុះទី២០ ឈ្មោះ ខាណុន នឹងនាំឲ្យមានភ្លៀងធ្លាក់រាយប៉ាយអាចបង្កឲ្យមានជំនន់ទឹកភ្លៀងច្រើនកន្លែងទៀតផងចាប់ពីថ្ងៃទី១៥ ដល់ថ្ងៃទី១៩ ខែតុលា ឆ្នាំ២០១៧នេះ។ នេះយោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយម។
សេចក្ដីជូនដំណឹងដដែលបានបញ្ជាក់ថា ព្យុះទី២០ឈ្មោះ ខាណុន ដែលបានវិវត្តន៍ខ្លួនពីសម្ពាធទាប និងកំពុងស្ថិតនៅភាគខាងជើង ប្រទេសហ្វីលីពីន ហើយពេលធ្វើដំណើរដល់សមុទ្រចិនខាងត្បូង នឹងបង្កើនឥទ្ធិពលទៅជាព្យុះទីហ្វុង ឆ្ពោះមកទិសខាងលិច ក្នុងល្បឿន១២០គីឡូម៉ែត្រក្នុងមួយម៉ោង៕
ខេត្តកំពត ៖ កម្លាំងសមត្ថកិច្ចនគរបាលព្រហ្មទណ្ឌខេត្តកំពតបានចាប់ឃាត់បុរសល្មោភកាមម្នាក់ ដែលបានល្បួងក្មេងស្រីជាអនីតិជនអាយុ១៦ឆ្នាំ ទៅរំលោភសេពសន្ថវៈ រហូតបានសម្រេច ខណៈដែលកាឃាត់ខ្លួននេះធ្វើឡើងកាលពីរសៀលថ្ងៃទី១២ ខែតុលា ឆ្នាំ២០១៧ម្សិលមិញ ស្ថិតនៅភូមិស្រែចែង ឃុំស្រែចែង ស្រុកជុំគិរី ខេត្តកំពត។
សមត្ថកិច្ចបានឲ្យដឹងថា ជនសង្ស័យឈ្មោះ សៅ ណុប អាយុ២២ឆ្នាំ រសនៅភូមិ ឃុំ កន្លែងឃាត់ខ្លួនខាងលើ។ ចំណែកក្មេងស្រីរងគ្រោះអាយុ១៦ឆ្នាំ រស់នៅភូមិកំណប់ ឃុំស្រែចែង ស្រុកជុំគិរី ខេត្តកំពត។សមត្ថកិច្ចនគរបាលដដែលបានបន្តថា ជនសង្ស័យខាងលើត្រូវបានកម្លាំងសមត្ថកិច្ចឃាត់ខ្លួនបានពីបទលួងលោមរំលោភសេពសន្ថវៈ លើជនរងគ្រោះដែលបានប្រព្រឹត្តធ្វើសកម្មភាពរំលោភសេពសន្ថវ កាលពីវេលាម៉ោង១១៖៣០នាទីយប់ នាថ្ងៃទី១១ ខែតុលា ឆ្នាំ២០១៧។
បើតាមសមត្ថកិច្ចបានបញ្ជាក់ថា ជនសង្ស័យប្រើល្បិចទូរស័ព្ទហៅជនរងគ្រោះទៅហូបស៊ុប នៅផ្សារត្រពាំងអណ្ដើក ហើយជនសង្ស័យ ក៏ដឹកជនរងគ្រោះទៅដេកនៅបន្ទប់ សាលារៀននៅម្ដុំផ្សារ អង្គតាសោម ស្រុកត្រាំកក់ ខេត្តតាកែវ ហើយជនសង្ស័យធ្វើសកម្មភាពចាប់រំលោភជនរងគ្រោះបានសម្រចតែម្តង។ ក្រោយពីបែកការណ៍ ក្រុមគ្រួសារខាងជនរងគ្រោះបានប្តឹងសមត្ថកិច្ចឲ្យឃាត់ខ្លួនជនសង្ស័យខាងលើតែម្តង។
បច្ចុប្បន្នជនសង្ស័យកំពុងសាកសួរ នៅការិយាល័យនគរបាលព្រហ្មទណ្ឌកម្រិតធ្ងន់ខេត្ត ដើម្បីចាត់ការតាមនីតិវិធីច្បាប់៕
ខេត្តក្រចេះ ៖ ជនសង្ស័យប្រុសស្រីចំនួន១០នាក់ នឹងត្រូវសមត្ថកិច្ចជំនាញបញ្ជូនទៅសាលាដំបូងខេត្តក្រចេះនៅថ្ងៃទី១៣ ខែតុលា នេះ ពាក់ព័ន្ធករណីជួញដូរ និងចែកចាយគ្រឿងញៀន ប្រព្រឹត្តទៅនៅក្នុងទីតាំងស្តុកឈើកែឆ្នៃឈើមួយកន្លែងក្នុងស្រុកចិត្របុរី ។
ជនសង្ស័យប្រុសស្រីទាំង១០នាក់ មានជាប់ពាក់ព័ន្ធនឹងករណីជួញដូរ និងចែកចាយគ្រឿងញៀនយ៉ាងអនាធិបតេយ្យ នៅក្នុងភូមិសាស្ត្រខាងលើ ហើយក៏ជាកន្លែងទីតាំងស្តុក និងកែច្នៃឈើខុសច្បាប់ផងដែរ។ ដោយឡែកក្មេងស្រី៣នាក់ផ្សេងទៀតទើបនឹងមកពីខេត្តព្រៃវែងទៅលេងផ្ទះបងប្អូនក្បែរទីតាំងលើត្រូវបានសមត្ថកិច្ចរកឃើញថា មិនមានជាប់ពាក់ព័ន្ធក៏សម្រេចដោះលែងវិញ៕
អាមេរិក ៖ អាជ្ញាធរបាននិយាយថា ចំនួនមនុស្សស្លាប់បានកើនដល់៣១នាក់ហើយដោយសារភ្លើងឆេះព្រៃយ៉ាងសន្ធោសន្ធៅនៅភាគខាងជើងរដ្ឋកាលីហ្វរញ៉ា ដែលជាភ្លើងឆេះព្រៃសម្លាប់មនុស្សច្រើនបំផុត នៅក្នុងប្រវត្តិសាស្ត្រសហរដ្ឋអាមេរិក។ នេះបើតាមសារព័ត៌មាន The Guardian ចេញផ្សាយនៅព្រឹកថ្ងៃសុក្រនេះ។
អាជ្ញាធរបញ្ជាក់ថា មនុស្សពីរនាក់បន្ថែមទៀតត្រូវគេរាយការណ៍ថា បានស្លាប់កាលពីយប់ថ្ងៃព្រហស្បតិ៍ ហើយនេះបានធ្វើឱ្យចំនួនអ្នកសា្លប់កើនឡើងពី ២៩នាក់ដល់៣១នាក់ ខណៈតំបន់រងគ្រោះខ្លាំងជាងគេ គឺនៅតំបន់ ណាប៉ា (Napa) និង សូណូម៉ា (Sonoma) នៃភាគកណ្ដាលរដ្ឋកាលីហ្វ័រញ៉ា ដោយភ្លើងបានឆាប់ឆេះលើផ្ទៃដី ៥២,០០០ហិកតា និងបង្កផលប៉ះពាល់ដល់តំបន់ផលិតស្រាដ៏ធំផងដែរ។ ទន្ទឹមនោះមនុស្សជាង ៥,០០០នាក់ កំពុងបន្តស្ថិតក្នុងទីជម្រកសុវត្ថិភាពដដែល រីឯក្រុមអ្នកពន្លត់អគ្គីភ័យច្រើនជាង ៨,០០០នាក់ កំពុងតស៊ូប្រយុទ្ធនឹងអណា្ដតភ្លើង៕
ខេត្តស្វាយរៀង ៖ នៅព្រឹកថ្ងៃទី១៣ ខែតុលា ឆ្នាំ២០១៧នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិអមដំណើរដោយមន្ត្រីក្រសួងការពារជាតិ និងមន្ត្រីជាន់ខ្ពស់នៃកងកម្លាំងប្រដាប់អាវុធជាច្រើនរូប បានធ្វើដំណើរចុះមកដល់តំបន់គ្រាប់បែកគីមីអាមេរិក ដែលបន្សល់ទុកពីសម័យសង្គ្រាម ស្ថិតនៅក្នុងឃុំគគីរ ស្រុករមាសហែក ខេត្តស្វាយរៀង បន្ទាប់គ្រាប់បែកគីមីសល់ពីសម័យសង្គ្រាម ជាច្រើនគ្រាប់ត្រូវបានរកឃើញជាបន្តបន្ទាប់។
សូមជម្រាប់ថា កម្លាំងអាជ្ញាធរជាតិអាវុធគីមី និងកម្លាំងមជ្ឈមណ្ឌលបោសសំអាតមីន និងយុទ្ធភណ្ឌមិនទាន់ផ្ទុះ បានរកឃើញគ្រាប់បែកគីមីបន្សល់ពី សម័យសង្គ្រាមរហូតដល់ ១៥ទីតាំងហើយនៅក្នុងឃុំគគី។ តាមការប៉ាន់ស្មានអាចនឹងមានគ្រាប់បែកជាច្រើនទៀត បន្សល់នៅក្នុងឃុំនេះ ដែលមិនទាន់រកឃើញនៅឡើយ៕
ខេត្តរតនគិរី ៖ កម្លាំងសមត្ថកិច្ចចម្រុះស្រុកអូរយ៉ាដាវស្ទាក់ចាប់បានរថយន្តដឹកឈើប្រណីត១គ្រឿង កាលពីវេលាម៉ោង៣ និង៣០នាទីរសៀលថ្ងៃទី១២ ខែតុលា ឆ្នាំ២០១៧ តាមបណ្តោយផ្លូវជាតិលេខ៧៨ ត្រង់ចំណុចភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។
ប្រតិបត្តិការបង្ក្រាបនេះ ដឹកនាំដោយលោក ស៊ឹម លីន អភិបាលរងស្រុកអូរយ៉ាដាវ ជាប្រធានចម្រុះ និង លោក កង សារឿន ប្រធានចម្រុះខេត្ត បានដឹកនាំកម្លាំង សហការគ្នាឃាត់រថយន្តដឹកឈើប្រណិត១គ្រឿង ម៉ាក MAZDA ស៊េរីចាស់ ពណ៌ខ្មៅ ពាក់ស្លាកលេខ ភ្នំពេញ 2B- 8631 បានផ្ទុកឈើប្រណិតជាច្រើនដុំនៅក្នុងរថយន្ត។ បច្ចុប្បន្នវត្ថុតាងនឹងរថយន្តត្រូវបានប្រគល់ទៅឲ្យជំនាញរដ្ឋបាលព្រៃឈើផ្នែកបកែវចាត់ការបន្តតាមនិតិវិធី៕
រាជធានីភ្នំពេញ ៖ ព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យតែងតាំង ដំឡើង និងផ្តល់ឋានៈដល់មន្ត្រី១០រូប នៅក្នុងគណៈកម្មាធិការសិទ្ធិមនុស្សកម្ពុជា។
តាមព្រះរាជក្រឹត្យនេះ ក្នុងចំណោមមន្ត្រីទាំង១០រូបនោះ មាន៧រូប ត្រូវបានតែងតាំងជា និងផ្តល់ឋានៈជាអនុប្រធាន និងសមាជិក ដែលមានឋានៈស្មើចាប់ពីអគ្គនាយក រហូតដល់រដ្ឋលេខាធិការ។ ចំណែក៣រូបផ្សេងទៀត រួមមាន មានសមាជិកគណៈកម្មាធិការសិទ្ធិមនុស្សម្នាក់ ត្រូវបានដំឡើងឋានៈស្មើរដ្ឋលេខាធិការ និងមន្ត្រី២នាក់ទៀតទេ ត្រូវបានតែងតាំងជាអគ្គនាយកនៃអគ្គនាយកដ្ឋានរដ្ឋបាល និងពាក្យបណ្តឹង និងជាអគ្គនាយកនៃអគ្គនាយកដ្ឋានស៊ើបអង្កេត និងអប់រំសិទ្ធិមនុស្ស៕
វ៉ាស៊ីនតោន ៖ ភ្នាក់ងារសារព័ត៌មាន The Guardian បានរាយការណ៍ថា ប្រធានាធិបតីអាមេរិកលោក ដូណាល់ ត្រាំ កំពុង ពិចារណាថានឹងធ្វើទស្សនកិច្ចទៅកាន់តំបន់ដកទ័ព នៅបន្ទាត់ព្រំដែនរវាងប្រទេសកូរ៉េទាំងពីរ ក្នុងអំឡុងនៃទស្សនកិច្ចទៅកាន់ប្រទេស កូរ៉េខាងត្បូងក្នុងពេលខាងមុខ ខណៈមានរបាយការណ៍បង្ហាញថា ប្រធានាធិបតីរូបនេះអាចនឹងប្រឈមមុខជាមួយកូរ៉េខាងជើង។
សារព័ត៌មានកូរ៉េខាងត្បូង Yonhap News បានឱ្យដឹងថា តំបន់ដកទ័ពដែលបែងចែកប្រទេស កូរ៉េទាំងពីរ ចាប់តាំងពីសង្គ្រាមកូរ៉េឆ្នាំ១៩៥០ ដល់១៩៥៣ នឹងក្លាយជាទីតាំងគោលដៅនៃដំណើរទស្សនកិច្ចរបស់លោក ត្រាំ ក្នុងតំបន់អាស៊ី។ ក្នុងនោះដែរប្រធានាធិបតីមហាអំណាចរូបនេះក៏គ្រោងនឹងធ្វើទស្សនកិច្ចទៅកាន់ប្រទេស ជប៉ុន ចិន វៀតណាម និងហ្វីលីពីនផងដែរ។
ជាមួយគ្នានេះដំណើរទស្សនកិច្ចរបស់លោកប្រធានាធិបតី ដូណាល់ ត្រាំ លើកដំបូងទៅកាន់ឧបទ្វីបកូរ៉េ ក្នុងនាមជាប្រធានាធិបតីនេះត្រូវបានគេរំពឹងថា គឺជាការបញ្ជូនសារដ៏មុតមាំមួយទៅកាន់ប្រទេស កូរ៉េខាងជើង៕
វ៉ាស៊ីនតោន ៖ រដ្ឋមន្ត្រីក្រសួងការបរទេសសហរដ្ឋអាមេរិកបានទាមទារឲ្យអង្គការយូណេស្កូ ធ្វើកំណែទម្រង់មូលដ្ឋានឡើងវិញ នឹងបានប្រកាសថា ខ្លួននឹងដកសមាជិកភាពចេញពីភ្នាក់ងារវប្បធម៌មួយនេះបន្ទាប់ពីរដ្ឋាភិបាលក្រុងវ៉ាស៊ីនតោនមើលឃើញថា អង្គការនេះបានប្រឆាំងនឹងប្រទេស អ៊ីស្រាអែលដោយភាពលំអៀង។ នេះបើយោងតាមទីភ្នាក់ងារសារព័ត៌មានស៊ិនហួរ។
ក្នុងសេចក្តីថ្លែងការណ៍ រដ្ឋមន្ត្រីក្រសួងការបរទេសអាមេរិក បាននិយាយថា ខ្លួនបានដាក់ញ្ញត្តិទៅប្រធានអង្គការយូណេស្កូ លោកស្រី Irina Bokova នៅថ្ងៃព្រហស្បតិ៍ម្សិលមិញនេះ។ ទន្ទឹមនោះសហរដ្ឋអាមេរិក មានបំណងស្នើកាន់តួនាទីជាអ្នកអង្កេតការណ៍អចិន្ត្រៃយ៍ក្នុងអង្គការនេះជំនួសវិញ។
សូមជម្រាបថា អង្គការយូណេស្កូ (UNESCO) ជាភ្នាក់ងារអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិមានមូលដ្ឋាននៅទីក្រុង ប៉ារីស និងមានសមាជិកចំនួន១៩៥ប្រទេស។
គួរបញ្ជាក់ថា ការដកសមាជិកភាពរបស់សហរដ្ឋអាមេរិកនឹងចូលជាធរមាននៅថ្ងៃទី៣១ ខែធ្នូ ឆ្នាំ២០១៨ខាងមុខ។ សហរដ្ឋអាមេរិកបានផ្អាកមូលនិធិដល់អង្គការយូណេស្កូ តាំងពីឆ្នាំ២០១១មកម្ល៉េះ បន្ទាប់ពីអង្គការនេះ បោះឆ្នោតដាក់ប៉ាឡេស្ទីនជាសមាជិក៕
រាជធានីភ្នំពេញ ៖ នៅព្រឹកថ្ងៃទី១២ ខែតុលា ឆ្នាំ២០១៧ នេះលោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ប្រើកណ្ដាប់ដៃដែកដឹកនាំ អភិបាលរាជធានីភ្នំពេញ លោក ឃួង បើកប្រតិបត្តិការដឹកនាំកម្លាំងចម្រុះ ចុះទៅត្រួតពិនិត្យធ្វើការវាស់វែងកំណត់ព្រំដីឲ្យបានច្បាស់លាស់ជូនប្រជាពលរដ្ឋចំនួន៩គ្រួសារ ជាម្ចាស់បណ្ដឹង បានបាត់បង់ដីធ្លីអស់រយៈពេលជិត១០ឆ្នាំមកហើយ។
ការចុះត្រួតពិនិត្យវាស់វែងកំណត់ព្រុំដីធ្លី ធ្វើឡើងស្ថិតនៅបរិវេណជុំវិញដីក្នុងបុរី «CamCoCity» ភូមិគង្គារផុស សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ៕
វៀតណាម ៖ ខ្យល់ព្យុះត្រូពិកបានវាយប្រហារភាគកណ្ដាលប្រទេសវៀតណាមកាលពីដើមសប្ដាហ៍នេះដោយនាំមកនូវការធ្លាក់ភ្លៀងយ៉ាងខ្លាំងនៅតំបន់នេះ និងផ្នែកជាច្រើនទៀតនៅភាគខាងជើងប្រទេសនេះបង្កជាទឹកជំនន់បណ្តាលឲ្យមនុស្ស១៥នាក់ស្លាប់ និង៨នាក់ទៀតកំពុងបាត់ខ្លួន។
មន្ត្រីគ្រោះមហន្តរាយបាននិយាយថា មនុស្សចំនួន៨នាក់រួមទាំងក្មេង២នាក់ផងដែរបានស្លាប់នៅខេត្តង៉េអាន (Nghe An) នៅភាគកណ្ដាលប្រទេសវៀតណាម។ ចំណែកនៅខេត្តថាញ់ហាវនៅជាប់ខេត្តង៉េអានវិញ មានមនុស្សចំនួន២នាក់បានស្លាប់ និង៣នាក់ទៀតកំពុងបាត់ខ្លួននៅឡើយ ខណៈមនុស្សចំនួន២នាក់បានស្លាប់នៅហាវប៊ីញនៅខាងជើងប្រទេសនេះ ខណៈមនុស្សចំនួន៣នាក់បានស្លាប់ និងចំនួន៥នាក់ទៀតត្រូវគេរាយការណ៍ថាកំពុងបាត់ខ្លួននៅឡើយនៅខេត្តយ៉េនបៃនៅភាគខាងជើងប្រទេសវៀតណាម។
សូមបញ្ជាក់ថា វៀតណាមគឺជាប្រទេសមួយងាយរងគ្រោះដោយព្យុះភ្លៀង និងទឹកជំនន់ដែលបានសម្លាប់មនុស្សរាប់រយនាក់ជារៀងរាល់ឆ្នាំ៕
អាមេរិក ៖ អាជ្ញាធរបាននិយាយថា មកទល់ពេលនេះចំនួនមនុស្សស្លាប់បានកើនឡើងដល់២១នាក់ ស្របពេលជាមួយគ្នាលំនៅឋាន និងក្រុមហ៊ុនចំនួន៣៥០០កន្លែងនៅភាគខាងជើងរដ្ឋកាលីហ្វ័រញ៉ាសហរដ្ឋអាមេរិកក៏ត្រូវបានបំផ្លាញផងដែរ។
ភ្លើងបានឆេះព្រៃចំនួន២២កន្លែងនៅក្នុងស្រុកចំនួន៩នៅរដ្ឋកាលីហ្វ័រញ៉ា និងបានគ្រប់ដណ្ដប់លើផ្ទៃដីទំហំ៦៨ ៧៩៧ហិកតាគិតចាប់តាំងពីភ្លើងនេះបានឆេះជាលើកដំបូងកាលពីយប់ថ្ងៃអាទិត្យ ហើយមន្ត្រីមូលដ្ឋានបានចាត់ទុកគ្រោះថ្នាក់បានសម្លាប់មនុស្សច្រើនជាងគេបំផុតក្នុងប្រវត្តិសាស្ត្រនៅក្នុងរដ្ឋនេះ។
ពេលនេះមនុស្សជាង៥៥០នាក់ទៀតកំពុងបាត់ខ្លួននៅឡើយនៅក្នុងស្រុកសូណូម៉ា ប៉ុន្តែគេមិនច្បាស់ថា តើមានមនុស្សប៉ុន្មាននាក់ដែលរងគ្រោះដោយភ្លើងឆេះព្រៃនេះ និងប៉ុន្មាននាក់ទៀតដែលមិនបានចុះឈ្មោះក្នុងបញ្ជីជនរងគ្រោះដោយសារគ្រោះថ្នាក់នេះ។
សូមបញ្ជាក់ថា ស្រុកសូណូម៉ានេះគឺជាស្រុកមួយសម្បូរដើមស្រល់ហើយតែងតែរងគ្រោះដោយភ្លើងឆេះព្រៃជារៀងរាល់ឆ្នាំ ប៉ុន្តែភ្លើងឆេះព្រៃលើកនេះគឺមានកម្រិតមួយខ្លាំងជាងពេលណាទាំងអស់នៅក្នុងប្រវត្តិសាស្ត្រនៅក្នុងរដ្ឋកាលីហ្វ័រញ៉ា៕
ម៉ិកស៊ិក ៖ មន្ត្រីបាននិយាយថា មនុស្សចំនួន១៦នាក់ស្លាប់ និង៨នាក់ទៀតរងរបួសក្នុងអំពើកុបកម្មនៅ ពន្ធគារមួយនៅរដ្ឋនូវ៉ូឡេអូននៅភាគខាងជើងប្រទេសម៉ិកស៊ិក ដោយក្នុងនោះមានឆ្មាំពន្ធនាគារចំនួន២នាក់ផងដែរបានរងរបួសធ្ងន់ ខណៈដែលរដ្ឋាភិបាលនៅក្នុងរដ្ឋនេះបាននិយាយពីថ្ងៃម្សិលមិញថា អ្នកទោសចំនួន៣នាក់ទៀតបានស្លាប់ដោយត្រូវរបួសធ្ងន់ពេកមិនអាចសង្គ្រោះបាន។
ក្រុមមន្ត្រីពាក់ព័ន្ធបានប្រាប់ក្រុមអ្នកកាសែតថា គេមិនទាន់ធ្វើកោសល្យវិច័យរួចនៅឡើយទេក្នុងការកំណត់ថា តើមានអ្នកទោសប៉ុន្មាននាក់ស្លាប់ដោយសារគ្រាប់កាំភ្លើងរបស់កងកម្លាំងប៉ូលិសរដ្ឋ និងប៉ូលិសសហព័ន្ធក្នុងប្រតិបត្តិការបង្ក្រាបអំពើនេះ។
សូមបញ្ជាក់ថា អំពើកុបកម្មនេះបានកើតឡើងកាលពីថ្ងៃអង្គារកន្លងទៅនេះដោយក្រុមអ្នកទោសបានចាប់ឆ្មាំពន្ធនាគារជាចំណាប់ខ្មាំង ហើយបានវាយដំ និងគំរាមទម្លាក់ពួកគេតាមដំបូលអគារពន្ធនាគារ។
គួររំលឹកដែរថា កាលពីខែមីនាឆ្នាំ២០១៧ អ្នកទោសចំនួន៤នាក់បានស្លាប់ ហើយកាលពីខែកុម្ភៈឆ្នាំ២០១៦ អ្នកទោសចំនួន៤៩នាក់បានស្លាប់ដោយសារតែអំពើស្រដៀងគ្នានេះផងដែរ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
