រាជធានីភ្នំពេញ៖សមត្ថកិច្ចប៉ុស្ដិ៍ទួលសង្កែ ខណ្ឌឫស្សីកែវ ចាប់ក្របួចចាប់វាយ ខ្នោះជនល្មោភកាមម្នាក់បានភ្លាមៗ ក្រោយពីជនល្មោភកាមរូបនេះ បានធ្វើសកម្មភាពចាប់រំ លោភក្មេងស្រី ម្នាក់មិនទាន់គ្រប់អាយុ បានសម្រេចជាច្រើនលើក ព្រមទាំងគំរាមសម្លាប់ចោលបើសិនហ៊ាន ទម្លាយរឿងនេះ ឲ្យអ្នកផ្សេងបានដឹង ។
យ៉ាងណាក៏ដោយ ព័ត៌មាននេះ ត្រូវបានដឹងដល់ក្រុមគ្រួសារ ហើយបានប្តឹងទៅសមត្ថកិច្ច ហើយសមត្ថកិច្ចក៏បានឃាត់ខ្លួនជនសង្ស័យ នៅយប់ថ្ងៃទី១៨ ខែសីហា ឆ្នាំ២០១៦ នៅចំណុចផ្ទះគ្មានលេខ ផ្លូវលេខ៩០០ ក្រុមទី១ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ជនសង្ស័យមាន ឈ្មោះ ថន ធារ៉ា ហៅ(ធា) អាយុ ១៨ឆ្នាំ មានមុខ របរកម្មករលក់គ្រឿងរថយន្ត ស្នាក់នៅ ក្បែរចំណុចកើតហេតុ ខាងលើ ។ ចំណែកជនរងគ្រោះមាន អាយុ១២ឆ្នាំ ជាសិស្ស ស្នាក់នៅជាមួយម្ដាយមីងខណ្ឌរស្សីកែវ។ ជនរងគ្រោះបានរៀបរាប់ប្រាប់សមត្ថកិច្ចថា មុនពេលកើតហេតុ តាំងពីអំឡុងខែ មិថុនា ឆ្នាំ២០១៦ ជនសង្ស័យបានបបួលជនរងគ្រោះទៅទិញទូរស័ព្ទ១គ្រឿង និងភ្ជាប់អ៉ិនណេត ដើម្បីចុចមើលកំសាន្ដរួចជនសង្ស័យបានបន្តសកម្មភាពល្បួងរំលោភជនរងគ្រោះទាល់តែបានសម្រេច ជាច្រើនដង ខណៈនោះជនសង្ស័យខ្លាចបែកធ្លាយរឿងទើបប្រើកូនកាំបិតដើម្បីគំរាមសម្លាប់ ជនរងគ្រោះបើសិនហ៊ានយករឿងនេះប្រាប់ទៅប្រាប់ម្ដាយមីង”។
ជនរងគ្រោះបន្តថា ក្រោយជនសង្ស័យរំលោភជាច្រើនដង ទើបបណ្ដាលឲ្យ ជន រងគ្រោះមានអាការៈស្លេកស្លាំង ហើយម្ដាយមីងរបស់ក្មេងស្រីរងគ្រោះមានការសង្ស័យ ក៏សួរនាំស្រាប់តែបែកធ្លាយរឿងជនសង្ស័យខាងលើ បានប្រើកាំបិតគំរាមសម្លាប់ និងរំលោភ បានសម្រេចជាច្រើនដងមកហើយ៕
យេមែន៖អង្គការគ្រូពេទ្យគ្មានព្រំដែន(MSF)កាលពីថ្ងៃព្រហស្បតិ៍បានឲ្យដឹងថា ខ្លួនកំពុងជម្លៀសបុគ្គលិករបស់ខ្លួនចេញពីមន្ទីរពេទ្យចំនួនប្រាំមួយនៅភាគខាងជើងប្រទេសយេមែនបន្ទាប់ពីមនុស្ស១៩នាក់ត្រូវបានសម្លាប់ក្នុងការវាយប្រហារអាកាសមួយលើទីតាំងរបស់ខ្លួនកាលពីដើមសប្តាហ៍នេះ។
ការវាយប្រហាររបស់ក្រុមចម្រុះដែលដឹកនាំដោយអារ៉ាប៊ីសាអ៊ូឌីតកាលពីថ្ងៃចន្ទលើមន្ទីរពេទ្យ Abs ក្នុងខេត្ត Hajja ដែលពួកឧទ្ទាមកាន់កាប់គឺជាការវាយប្រហារលើកទីបួននិងសម្លាប់មនុស្សច្រើនបំផុតលើទីតាំងរបស់អង្គការ MSF ក្នុងប្រទេសយេមែនដែលហែកហួរដោយសង្គ្រាម។ នេះបើយោងតាមការលើកឡើងរបស់អង្គការនេះ។
ទីភ្នាក់ងារជំនួយដែលមានមូលដ្ឋាននៅទីក្រុងប៉ារីសបាននិយាយក្នុងសេចក្តីថ្លែងការណ៍មួយថា ការសម្រេចចិត្តដកបុគ្គលិកចេញនេះនឹងត្រូវធ្វើឡើងបន្តិចម្តងៗ។ ទីភ្នាក់ងារនេះបានចោទប្រកាន់ក្រុមចម្រុះអំពីការទម្លាក់គ្រាប់បែកមិនរើសមុខនិងការធានាមិនគួរឲ្យទុកចិត្តបាន ។
សេចក្តីថ្លែងការណ៍នេះបានបន្តថា “ដោយសាតែការវាយលុកកាន់តែខ្លាំងឡើងៗនិងការបាត់បង់ទំនុកចិត្តរបស់យើងចំពោះលទ្ធភាពរបស់ក្រុមចម្រុះដឹកនាំដោយអារ៉ាប៊ីសាអ៊ូឌីតក្នុងការទប់ស្កាត់ការវាយប្រហារសាហាវបែបនេះទៀត MSF បានពិចារណាថា មន្ទីរពេទ្យនៅក្នុងតំបន់ Saada និង Hajjah គឺគ្មានសុវត្ថិភាពចំពោះទាំងអ្នកជំងឺនិងបុគ្គលិក”។ MSF បាននិយាយថា មន្ទីរពេទ្យទាំងនេះនឹងបន្តគ្រប់គ្រងដោយកម្មករក្នុងស្រុកនិងអ្នកស្ម័គ្រចិត្ត។
ប្រទេសយេមែនបានរងគ្រោះដោយភាពចលាចលចាប់តាំងពីពួកឧទ្ទាមនិកាយស៊ីអ៊ីត Huthi ដែលគាំទ្រដោយអ៊ីរ៉ង់និងសម្ព័ន្ធមិត្តស្មោះត្រង់អតីតប្រធានាធិបតី Ali Abdullah Saleh បានរាតត្បាតរដ្ឋធានី Sanaa នៅខែកញ្ញាឆ្នាំ ២០១៤។
អំពើហិង្សាបានកើនឡើងបន្ទាប់ពីក្រុមចម្រុះអារ៉ាប់ដឹកនាំដោយអារ៉ាប៊ីសាអ៊ូឌីតចាប់ផ្ដើមយុទ្ធនាការយោធាមួយនៅក្នុងខែមីនាឆ្នាំមុនដើម្បីជួយដល់រដ្ឋាភិបាលរបស់លោកប្រធានាធិបតី Abedrabbo Mansour Hadi ៕
រាជធានីភ្នំពេញ៖មន្ត្រីក្រសួងការបរទេស បានបញ្ជាក់ថា កម្ពុជា បានផ្ញើកំណត់ទូតប្រមាណ១០រួចមកហើយ ទៅភាគីវៀតណាម ពាក់ព័ន្ធការរំលោភបំពានរបស់វៀតណាម តាមបណ្តោយព្រំដែនកម្ពុជា-វៀតណាម។ ប៉ុន្តែភាគីវៀតណាមមិនបានឆ្លើយតបអ្វីទាំងអស់ ហើយអ្វីដែលជាសកម្មភាពរំលោភបំពានរបស់គេនៅតែបន្តដដែល ហាក់មិនចាប់អារម្មណ៍ចំពោះកំណត់ទូតរបស់កម្ពុជានោះឡើយ៕
ខេត្តកណ្ដាល៖បុរសម្នាក់បានសម្រេចចិត្តចងកសម្លាប់ខ្លួន ព្រោះរតែសុំលុយប្រពន្ធទៅទិញស្រាផឹកមិនបាន ដែលហេតុការណ៍បង្កឱ្យភ្ញាក់ផ្អើលនេះកើតឡើងកាលពីម៉ោង០៩ និង៣០នាទីព្រឹកថ្ងៃទី១៨ ខែសីហា ឆ្នាំ២០១៦ ស្ថិតនៅចំណុចមុខផ្ទះជនរងគ្រោះ ក្នុង ភូមិព្រែកតាមេម ឃុំព្រែកស្ដី ស្រុកកោះធំ ។
សមត្ថកិច្ចបានឲ្យដឹងថា ជនរងគ្រោះឈ្មោះគៀង គី អាយុ៤៣ឆ្នាំ ជាកសិករ មានទីលំនៅៗក្នុងភូមិកើតហេតុ ។
តាមក្រុមគ្រួសារបានឲ្យដឹងដែរថា នៅថ្ងៃទី១៨ សីហា វេលាម៉ោង០៨ និង៣០នាទីយប់ ជនរងគ្រោះទារលុយពីប្រពន្ធយកទៅទិញស្រាផឹក ប្រពន្ធបានឱ្យលុយ១០០០រៀល ។ ជនរងគ្រោះបានទៅទិញស្រាផឹកមួយសន្ទុះក្រោយមក ជនរងគ្រោះក៏មកទារលុយ១០០០រៀលម្តងទៀត ត្រូវប្រពន្ធប្រាប់ថា កុំផឹកច្រើនពេក ព្រោះស្រវឹងហើយមិនឱ្យលុយទៀតទេ ។ ប៉ុន្តែ ជនរងគ្រោះនិយាយតបទៅប្រពន្ធវិញថា ឯងចាំមើលអញផឹកស្រាទាល់តែងាប់។ ក្រោយមកប្រពន្ធក៏ឡើងទៅលើផ្ទះដេកទៅ ។ ជនរងគ្រោះបានឡើងទៅលើផ្ទះដែរ ក៏ហូបបាយម្នាក់ឯង ហើយក៏ចុះមកដីវិញ ។
ក្រោយមកប្រពន្ធមិនឃើញប្តីឡើងមកលើផ្ទះ ក៏ចុះមករកប្តី ក៏ប្រទះឃើញបានចង.កនឹងដើមស្វាយមុខផ្ទះស្លាប់បាត់ទៅហើយយ ក៏ស្រែកផ្អើលហៅបងប្អូន និងអ្នកជិតខាងមកជួយស្រាយចំណង តែម្តង ខណដែលជនរងគ្រោះបានស្លាប់បាត់ទៅហើយ៕
វ៉ាស៊ីនតោន៖លោក បារ៉ាក់ អូបាម៉ា នឹងធ្វើដំណើរ ទៅកាន់ប្រទេសឡាវ នៅដើមខែកញ្ញាខាងមុខនេះ ដែលជាដំណើរ ទស្សនកិច្ចជាប្រវត្តិសាស្ត្រទៅកាន់ប្រទេសឡាវ ជាលើកដំបូង ។ នេះបើតាមការចេញផ្សាយនៅមុននេះរបស់ទីភ្នាក់ងារព័ត៌មានចិនស៊ិនហួរ ។
សម្រាប់ដំណើរទៅកាន់ប្រទេសឡាវនេះ លោក បារ៉ាក់ អូបាម៉ា នឹងចូលរួមក្នុងកិច្ចប្រជុំកំពូល អាមេរិក-អាស៊ាន និងកិច្ចប្រជុំកំពូលអាស៊ីបូព៌ាផងដែរ។ បន្ទាប់ពីនោះលោកនឹងជួបពិភាក្សាទ្វេភាគី ជាមួយនឹងប្រធានាធិបតីឡាវលោក Bounnhang Vorachith និងមន្ត្រីរដ្ឋាភិបាលឡាវសំខាន់ៗដៃទៀត ដើម្បីជជែកគ្នាអំពីទំនាក់ទំនងសេដ្ឋកិច្ចរវាង អាមេរិក និងឡាវ, ការអភិវឌ្ឍ, និងទំនាក់ទំនងរវាងប្រជាជន និងប្រជាជននៃប្រទេសទាំងពីរ ៕
រាជធានីភ្នំពេញ៖នាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋានអន្ដោប្រវេសន៍ និងជាអនុប្រធានអចិន្ដ្រៃយ៍គណៈកម្មការជំរឿន បានថ្លែងនៅថ្ងៃនេះថា រយៈពេលមួយឆ្នាំកន្លះនេះ មានជនបរទេស អន្ដោប្រវេសន៍សរុប៤៦,៥១៦គ្រួសារ ស្មើនឹង១៦០,៨៧២នាក់ ស្រី៧៨,០៧នាក់ ក្នុងនោះជនជាតិវៀតណាមច្រើនជាងគេគឺមាន៩៩,៤៩% ត្រូវបានរកឃើញ និងបណ្តេញចេញពីកម្ពុជា។
ការលើកឡើងដូច្នេះ ធ្វើឡើងក្នុងពិធី ប្រជុំផ្សព្វផ្សាយបូកសរុបរបាយការណ៍ជំហានដំបូង ស្ដីពីការអនុវត្តបន្ដការងារគ្រប់គ្រង ជនបរទេសអន្ដោប្រវេសន៍ នៅកម្ពុជា នាព្រឹកថ្ងៃសុក្រនេះ។
ពិធីនេះក៏មានការចូលរួមពីសម្តេចក្រឡាហោម ស ខេង ឧបនាយករដ្ឋមន្ត្រី ក្រសួងមហាផ្ទៃ ព្រមទាំងលោកឧត្តមសេនីយ៍ នេត សាវឿន អគ្គស្នងការនគរបាលជាតិ៕
ខេត្តពោធិ៍សាត់៖មនុស្សចំនួន០៣នាក់បានរងរបួសធ្ងន់ស្រាល បន្ទាប់ពីរថយន្តកាមរីបាឡែនមួយគ្រឿងបានបុកគោយន្តពីក្រោយ ដែលហេតុការណ៍នេះកើតឡើងនៅវេលាម៉ោង៥ និង៤៥នាទីព្រឹក ថ្ងៃទី១៩ ខែសីហា ឆ្នាំ២០១៦នេះ នៅលើកំណាត់ផ្លូវជាតិលេខ៥ ស្ថិតក្នុងភូមិអូរស្តៅ សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់។
អធិការនគរបាលក្រុងពោធិ៍សាត់ លោក ឈន រិទ្ធ បានប្រាប់ថា មុនពេលកើតហេតុ ជនរងគ្រោះទាំង ០៣នាក់ បាននឹងកំពុងធ្វើដំណើរតាមគោយន្ត លុះមកដល់ចំណុចកើតហេតុ ស្រាប់តែរថយន្តកាមរីបាឡែន ពាក់ស្លាកលេខ ភ្នំពេញ 2R-4177 បានបុកពីក្រោយ ក្នុងទឹកដៅពីលិចទៅកើតដូចគ្នា បណ្តាលឲ្យគោយន្តក្រឡាប់ខូចស្ទើរទាំងស្រុង រងរបួសធ្ងន់ ២នាក់ និងស្រាល ១នាក់ ដោយឡែកម្ចាស់រថយន្តរត់គេចខ្លួនបាត់ស្រមោល។
ក្រោយពេលកើតហេតុ កម្លាំងនគរបាលក្រុងពោធិ៍សាត់ បានចុះទៅជួយអន្តរាគមន៍ភ្លាមៗ ដោយដឹកជនរងគ្រោះទៅសង្គ្រោះនៅមន្ទីរពេទ្យ ព្រមទាំងមិនទាន់បានបញ្ជាក់អត្តសញ្ញាណជនរងគ្រោះនៅឡើយ ចំណែករថយន្តបង្កគ្រោះថ្នាក់ត្រូវបានកម្លាំងជំនាញ យកមករក្សាទុកនៅការិយាល័យចរាចរណ៍ផ្លូវគោកខេត្ត រងចាំម្ចាស់រថយន្តចូលខ្លួនមកដោះស្រាយ៕
រាជធានីភ្នំពេញ៖នៅព្រឹក ថ្ងៃទី១៩ ខែសីហា ឆ្នាំ២០១៦នេះនគរបាលអន្ដោប្រវេសន៍បានបណ្ដេញចេញជនជាតិវៀតណាម២២នាក់ ក្នុងនោះស្រី២នាក់ឲ្យត្រឡប់ទៅវិញ បន្ទាប់ពីចូលមករស់នៅខុសច្បាប់ក្នុងខេត្តសៀមរាប ខេត្តកោះកុង និងភ្នំពេញ។
ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍លោកឧត្តមសេនីយ៍ទោ អ៊ុក ហៃសីឡា បានឲ្យដឹងថា ជនជាតិវៀតណាមទាំង២២នាក់ ក្នុងនោះ ស្រី២នាក់ ដែលបានឃាត់ខ្លួននេះ ត្រូវបានបណ្ដេញចេញពីកម្ពុជា តាមច្រកអន្ដរជាតិព្រែកចាក នៅថ្ងៃនេះ។ លោកឧត្តសេនីយ៍ទោ បានបញ្ជាក់ថា ក្រោមបញ្ជាពីនាយឧត្តមសេនីយ៍ សុខ ផល កម្លាំងនគរបាលអន្ដោប្រវេសន៍ នៅតែបន្ដឃាត់ខ្លួន និងបណ្ដេញជនបរទេសណា ដែលបានចូលមករស់នៅកម្ពុជា ដោយខុសច្បាប់ជាបន្ដបន្ទាប់៕
រាជធានីភ្នំពេញ៖ជនសង្ស័យដែលចូលភ្ជង់ម្ចាស់ហាង «លឹម ហាវ» ប្លន់យកទូរស័ព្ទចំនួន៦គ្រឿងនៅក្បែរផ្សារនាគមាស សង្កាត់ផ្សារដើមគរ ខណ្ឌទួលគោក កាលពីរសៀលថ្ងៃម្សិលមិញនោះ បានបាញ់សម្លាប់ខ្លួនឯង នាព្រឹកព្រលឹមថ្ងៃទី១៩ ខែសីហា ឆ្នាំ២០១៦នេះ នៅគីឡូទី១១ សង្កាត់ស្វាយប៉ាក ខណ្ឌឫស្សីកែវ។
បើតាមមន្ត្រីអាវុធមាននិយាយថា នៅពេលដែលកម្លាំងត្រៀមចូលទៅចាប់ជនសង្ស័យរូបនោះ ស្រាប់តែឮសំឡេងផូង ហើយពេលទៅមើលឃើញ ជនសង្ស័យ ស្លាប់បាត់ទៅហើយ ដោយសារបាញ់សម្លាប់ខ្លួនឯងដោយប្រើកាំភ្លើងរឡូ។ ប្រភពបញ្ជាក់ថា ជនសង្ស័យរូបនេះ គឺជាមុខសញ្ញាប្លន់ទូរស័ព្ទកាលពីពេលកន្លងទៅផងដែរ។
គួរបញ្ជាក់ថា កម្លាំងអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថខណ្ឌឫស្សីកែវបានធ្វើការឡោមព័ទ្ធកន្លែងជនសង្ស័យស្នាក់នៅតាំងពីម៉ោង១១យប់រហូតដល់ព្រឹកនេះ៕
រាជធានីភ្នំពេញ៖នៅថ្ងៃទី១៨ ខែសីហា ឆ្នាំ២០១៦ ម្សិលមិញនេះកម្លាំងនគរបាលបានបង្ក្រាបបទល្មើសជួញដូរ រក្សាទុក និងប្រើប្រាស់៨ករណី ឃាត់មនុស្ស១៩នាក់ (ស្រី៦នាក់) ក្នុងនោះមុខសញ្ញាជួញដូរ៦នាក់ និងមុខសញ្ញាប្រើប្រាស់១៣នាក់ និងដកហូតមេតំហ្វេតាមីន (ice) ១៥.៨១ក្រាម និង១១កញ្ចប់តូច។
យោងតាមរបាយការណ៍អគ្គស្នងការនគរបាលជាតិបានបញ្ជាក់ថា ជនសង្ស័យទាំងនោះត្រូវបានឃាត់ខ្លួនដោយ៖ នគរបាលរាជធានីភ្នំពេញ បង្ក្រាប១ករណីឃាត់ខ្លួនម្នាក់, កណ្ដាល បង្ក្រាប២ករណី (១ដីកា) ឃាត់ខ្លួន៤នាក់, ត្បូងឃ្មុំ បង្ក្រាប១ករណីឃាត់ខ្លួនម្នាក់, ឧត្តរមានជ័យ បង្ក្រាប១ករណី (ដីកា) ឃាត់ខ្លួនម្នាក់, បន្ទាយមានជ័យ បង្ក្រាប១ករណី (ដីកា) ឃាត់ខ្លួនម្នាក់ និងសៀមរាប បង្ក្រាប២ករណីឃាត់ខ្លួន១១នាក់៕
រាជធានីភ្នំពេញ៖ស្ថានភាពកម្ពស់ទឹកនៅតាមបណ្តាស្ថានីយជលសាស្ត្រនានារួមមាន៖ស្ថានីយទន្លេមេគង្គ-ស្ទឹងត្រែង, ស្ថានីយទន្លេមេគង្គ-ក្រចេះ, ស្ថានីយទន្លេ មេគង្គ-កំពង់ចាម, ស្ថានីយបាសាក់-ចតុមុខ, ស្ថានីយមេគង្គ-អ្នកលឿង, ស្ថានីយបាសាក់-កោះខែល និងស្ថានីយទន្លេសាប-ព្រែកក្តាមសម្រាប់ថ្ងៃទី១៩ ខែសីហា ឆ្នាំ២០១៦នេះ៕
រាជធានីភ្នំពេញ៖នៅថ្ងៃទី១៨ ខែសីហា ឆ្នាំ២០១៦ម្សិលមិញនេះមានករណីគ្រោះថ្នាក់ចរាចរណ៍ នៅទូទាំងប្រទេស កើតឡើងចំនួន២២លើក (យប់១២លើក) បណ្តាលឲ្យមនុស្សស្លាប់២នាក់ រងរបួសធ្ងន់២១នាក់ និងរបួសស្រាល៦នាក់។ នេះបើតាមរបាយការណ៍របស់អគ្គស្នងការនគរបាលជាតិ។
ប្រភពដដែលបន្តថា គ្រោះថ្នាក់ចរាចរណ៍ទាំង២២លើកនេះ បណ្តាលឲ្យខូចខាតយានយន្តសរុបចំនួន៣៣គ្រឿង រួមមានម៉ូតូចំនួន២០គ្រឿង រថយន្តធុនតូចចំនួន៧គ្រឿង និងរថយន្តធុនធំចំនួន២គ្រឿង, យានផ្សេងៗ៤គ្រឿង,ថ្មើរជើង២នាក់។ ប្រភពបញ្ជាក់ថា មូលហេតុដែលបណ្តាលឲ្យ កើតមានករណីគ្រោះថ្នាក់ចរាចរណ៍ រួមមានល្មើសល្បឿន, ស្រវឹង, មិនគោរពសិទ្ធិ, មិនប្រកាន់ស្តាំ, បត់គ្រោះថ្នាក់, មិនប្រកាន់ស្តាំ, ប្រជែង៣លើក និងកត្តាយានយន្ត ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍២១នាក់ (យប់១១នាក់)។
ជាមួយគ្នានេះនៅថ្ងៃទី១៨ ខែសីហា ឆ្នាំ២០១៦ លទ្ធផលត្រួតពិនិត្យ អនុវត្តច្បាប់ចរាចរណ៍ផ្លូវគោកឃើញថា យានយន្តដែលល្មើសសរុប ទូទាំងប្រទេសមាន ចំនួន៣,២០០គ្រឿង ក្នុងនោះបានធ្វើការអប់រំចំនួន១,៥៦៧គ្រឿង និងពិន័យសរុបចំនួន១,៦៣៣គ្រឿង៕
ហាណូយ៖ទីភ្នាក់ងារស៊ិនហួរបានផ្សាយឲ្យដឹងថា មន្ត្រីរដ្ឋាភិបាលវៀតណាម ០២នាក់ត្រូវបានមិត្តរួមការងារបាញ់សម្លាប់ ហើយជនបង្កក៏បានធ្វើអត្តឃាតដោយកាន់កាំភ្លើងបាញ់ ទំលុះក្បាលខ្លួនឯង បន្ទាប់ពីបាញ់មិត្តភក្តិស្លាប់ ។ ការបាញ់សម្លាប់គ្នានេះធ្វើឡើង នៅក្នុងខេត្ត Yen Bai ភាគខាងជើង ប្រទេសវៀតណាម។
ហេតុការណ៍ខាងលើនេះ បានកើតឡើងនាវេលាម៉ោង ៧៖៤៥នាទីព្រឹកថ្ងៃព្រហស្បតិ៍ ដោយក្នុងនោះលោក Do Cuong Minh អនុប្រធាននាយកដ្ឋានការពារ ព្រៃឈើក្នុងខេត្ត Yen Bai បានដើរចូលទៅក្នុងការិយាល័យ របស់លោក Pham Duy Cuong លេខាធិការបក្សប្រចាំខេត្ត Yen Bai និងលោក Ngo Ngoc Tuan ប្រធានក្រុមប្រឹក្សាប្រជាជននៅខេត្ត ដដែលនេះ ហើយក៏បានធ្វើការបាញ់រះទៅលើ មន្ត្រីទាំងពីររូបនេះ ឲ្យស្លាប់នៅហ្នឹងកន្លែងតែម្តង។
ប៉ូលិសវៀតណាម នៅមិនទាន់ដឹងថា ការបាញ់ប្រហារនេះ បណ្តាលមកពីរឿងអ្វីនៅឡើយទេ ប៉ុន្តែសម័យប្រជុំលើកទីពីរនៃ ក្រុមប្រឹក្សាប្រជាជនខេត្ត Yen Bai គ្រោងនឹងប្រារព្ធឡើងនៅវេលាម៉ោង ៨៖០០នាទីព្រឹកថ្ងៃព្រហស្បតិ៍នេះ ប៉ុន្តែវាត្រូវបានលុបចោល ដោយសារតែការបាញ់ប្រហារនោះ កើតឡើង៕
រាជធានីភ្នំពេញ៖ស្ត្រីជនជាតិអេស្ប៉ាញដែលពាក់ព័ន្ធយុទ្ធនាការអាវខ្មៅជាមួយសកម្មជនបឹងកក់ ត្រូវបានបណ្តេញចេញពីប្រទេសកម្ពុជា ហើយខណៈដែលមន្ត្រីរដ្ឋាភិបាលអះអាងថា អ្នកស្រី Marga Bucosa Segada បានលូកដៃចូលកិច្ចការផ្ទៃក្នុងរបស់ប្រទេសកម្ពុជា ដែលអាចប្រឈមនឹងការជាប់ពន្ធនាគារនៅប្រទេសកម្ពុជា។
លោក អ៊ុក ហៃសីឡា ប្រធានផ្នែកស៊ើបអង្កេតនិងអនុវត្តនីតិវិធីនៃនាយកដ្ឋានអន្តោប្រវេសន៍ បានប្រាប់អ្នកសារព័ត៌មានថា រដ្ឋាភិបាលសម្រេចបណ្តេញអ្នកស្រី Marga Bucosa Segada ដែលចូលរួមសកម្មជាមួយស្ត្រីបឹងកក់នៅល្ងាចម្សិលមិញ ដោយមូលហេតុដែលគាត់ស្នាក់នៅកម្ពុជាធ្វើការដោយមិនមានសៀវភៅការងារនិងបានចូលរួមសកម្មភាពតវ៉ាប្រឆាំងរដ្ឋាភិបាល។ លោកបន្ថែមថា អ្នកស្រីអាចត្រូវហាមមិនឲ្យចូលកម្ពុជាប្រហែល២ទៅ៣ឆ្នាំអាស្រ័យទៅលើការប្រព្រិត្តល្មើសរបស់លោកស្រី៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
