ឥណ្ឌូនេស៊ី៖រដ្ឋមន្ត្រីម្នាក់បាននិយាយថា ប្រទេសឥណ្ឌូនេស៊ីនឹងបន្តការរានដីឡើងវិញដែលនឹងជួយការពារទីក្រុងហ្សាការតាពីការលិចក្រោមនីវ៉ូទឹកសមុទ្រ។ នេះជាការលើកឡើងមួយបន្ទាប់ពីការងារត្រូវបានផ្អាកកាលពីប្រាំខែមុនដោយសារតែក្តីបារម្ភពីបញ្ហាបទប្បញ្ញត្តិនិងបរិស្ថាន។
ហ្សាការតាដែលជាទីក្រុងមួយក្នុងចំណោមទីក្រុងនានាមានប្រជាជនរស់នៅច្រើនបំផុតលើពិភពលោកគឺឋិតនៅលើដីល្បប់ហើយកំពុងលិចក្នុងកម្រិតលឿនជាងទីក្រុងផ្សេងទៀតនៅក្នុងពិភពលោក។
ក្រុងហ្សាការតាបានផ្តោតការយកចិត្តទុកដាក់លើការពង្រឹងការការពាររបស់ខ្លួនជាមួយនឹងជញ្ជាំងសមុទ្រប្រវែង១៥ម៉ាយនិងជួសជុលប្រព័ន្ធប្រឡាយទឹកដែលបាក់បែក។
រដ្ឋាភិបាលបានសម្រេចចិត្តកាលពីល្ងាចថ្ងៃអង្គារឲ្យអនុញ្ញាតធ្វើការដើម្បីបន្តដំណាក់កាលដ៏សំខាន់មួយនៃ “ជញ្ជាំងសមុទ្រយក្ស” ដែលមានគោលបំណងដើម្បីពង្រឹងភាគខាងជើងនៃទីក្រុងហ្សាការតាខណៈកែលម្អរូបភាពរបស់ទីក្រុងនេះឲ្យទៅជាទីក្រុងមាត់ទឹកដូចប្រទេសសិង្ហបុរី។
រដ្ឋមន្ត្រីក្រសួងសម្របសម្រួលដែនសមុទ្រលោក Luhut Pandjaitan ប្រាប់អ្នកកាសែតកាលពីថ្ងៃអង្គារថា “ប្រសិនបើជញ្ជាំងសមុទ្រយក្សនេះមិនត្រូវបានធ្វើឲ្យហើយទេនោះ វានឹងបង្កើតផលប៉ះពាល់ដ៏ធំលើទីក្រុងហ្សាការតាដែលទាក់ទងទៅនឹងការជ្រៀតចូលទឹកប្រៃ”។
រួមបញ្ចូលនៅក្នុងផែនការមេនេះគឺការកសាងកោះសិប្បនិម្មិតចំនួន១៧នៅជិតឆ្នេរសមុទ្រភាគខាងជើងរបស់ក្រុងហ្សាការតាជាកន្លែងដែលក្រុមហ៊ុនអភិវឌ្ឍន៍អចលនទ្រព្យមានផែនការសាងសង់ផ្សារទំនើបនិងទាក់ទាញស្រដៀងគ្នាទៅនឹងកោះ Sentosa របស់សិង្ហបុរី។
ប៉ុន្តែការងារលើគម្រោងនេះត្រូវបានផ្អាកនៅខែមេសាបន្ទាប់ពីមានការខ្វែងគំនិតគ្នារវាងរដ្ឋាភិបាលនិងអភិបាលក្រុងហ្សាការតាចំពោះបញ្ហាថាតើអ្នកណាដែលមានអំណាចក្នុងការចេញលិខិតអនុញ្ញាត្តិ។ អ្នកនេសាទមួយចំនួនក៏បានធ្វើការតវ៉ាប្រឆាំងនឹងការរានយកដីផងដែរដោយនិយាយថា វានឹងកាត់បន្ថយផលនេសាទរបស់ពួកគេ៕
