All posts by មេគង្គ ប៉ុស្តិ៍

ឃាត់ស្ត្រីជនជាតិថៃម្នាក់ដកហូតថ្នាំញៀនជាង២គីឡូក្រាម

March 31, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖ចាប់ស្ត្រីជនជាតិថៃម្នាក់ដែលលួចនាំចូលថ្នាំញៀនប្រភេទកូកាអ៊ីនទម្ងន់ជាង ២,៥គីឡូក្រាមដោយបង្កប់ក្នុងសូកូឡាតាមចក្រអាកាសយានដ្ឋានអន្តរជាតិភ្នំពេញ។ ការឃាត់ខ្លួននេះធ្វើឡើងនៅវេលាម៉ោង ៨យប់ថ្ងៃទី៣០ ខែមីនា ឆ្នាំ២០១៦។
យោងតាមប្រភពព័ត៌មានមន្ត្រីគយប្រចាំព្រលានយន្តហោះអន្តរជាតិភ្នំពេញបានឲ្យដឹងថា ប្រតិបត្តិការនេះធ្វើឡើងដោយមានការសហការពីកម្លាំងគយ និងរដ្ឋាករប្រចាំផ្នែកច្រកអ្នកដំណើរមកដល់ រួមនិងនគរបាលអន្តោប្រវេសន៍ ព្រមទាំងសមត្ថកិច្ចពាក់ព័ន្ធដឹកនាំ ដោយព្រះរាជអាជ្ញារង អមសាលាដំបូងរាជធានីភ្នំពេញ លោក សៀង សុខ។ ប្រភពបន្តថា ស្ត្រីជនជាតិថៃនេះ មានឈ្មោះ KAEWKANLAYA AMPHAWAN ធ្វើ ដំណើរមកពីប្រទេសកាតា តាមជើងយន្តហោះលេខ QR970 (ដូហា-ភ្នំពេញ)។
ប្រភពបញ្ជាក់ថា ក្រោយការឆែកឆេររកឃើញវត្ថុតាងជាសារធាតុញៀន ប្រភេទកូកាអ៊ីនជាក់ស្តែងទម្ងន់ ២,៥៩៤.៥១ក្រាម ទាំងស្ត្រីសង្ស័យរួមនិងថ្នាំញៀនត្រូវបានប្រគល់ជូនលោកវរសេនីយ៍ទោ សារី បុត្រសត្យា នាយការិយាល័យជំនួញគ្រឿងញៀនខុសច្បាប់ ដើម្បីគ្រប់គ្រងថែ រក្សា និង អនុវត្តនីតិវិធីបន្ត៕

U16 កម្ពុជា យកឈ្នះលើ ក្រុម Kagoshima United របស់ជប៉ុន ២-០

March 30, 2016កីឡាមេគង្គ ប៉ុស្តិ៍

បាល់ទាត់៖ការប្រកួតពានរង្វាន់ J.League U16 Challenge 2016 មុននេះបន្តិច ក្រុមជម្រើសជាតិកម្ពុជាអាយុក្រោម១៦ឆ្នាំ (U16) ឈ្នះក្រុមម្ចាស់ផ្ទះ Kagoshima United FC របស់ជប៉ុន ដោយលទ្ធផល ២-០ ។នេះបើយោងតាមការឲ្យដឹងពី Page ផ្លូវការរបស់សហព័ន្ធបាល់ទាត់កម្ពុជា។
គួរបញ្ជាក់ដែរថា ក្រុម U16 របស់កម្ពុជានៅថ្ងៃស្អែកនឹងមានការប្រកួត២ប្រកួត ដោយប៉ះជាមួយក្រុម Kamatamare Sanuki FC វេលាម៉ោង៩ព្រឹក ហើយដល់ម៉ោង ២:៣០នាទីរសៀលនៅថ្ងៃ ពួកគេត្រូវប្រកួតជាមួយក្រុម PVF របស់វៀតណាម។ ខណៈដែលថ្ងៃទី១ខែមេសា ក្រុម U16 ត្រូវបន្ដប្រកួតជាមួយក្រុម Roasso Kumamoto FC របស់ជប៉ុន នៅវេលាម៉ោង១០:៣០ នាទីព្រឹកហើយនៅវេលាម៉ោង ២:៣០ នាទីត្រូវប្រកួតចុងក្រោយជាមួយក្រុមជប៉ុនមួយទៀតគឺក្រុម Avispa Fukuoka FC៕

Inter Milan កំពុងតាមប្រមាញ់ Nani របស់ក្លិប Fenerbahc

March 30, 2016កីឡាមេគង្គ ប៉ុស្តិ៍

បាល់ទាត់៖អតីតខ្សែបម្រើស្លាបក្រុម Manchester United កីឡាករ Nani ត្រូវបានរាយការណ៍ថាក្លិបយក្សអ៊ីតាលី Inter Milan រៀបចំបញ្ជីរឈ្មោះក្នុងការទិញយកកីឡាកររូបនេះមកកាន់ ក្របខ័ណ្ឌអ៊ីតាលី Serie A នៅពេលរដូវក្តៅខាងមុខនេះ។
ខ្សែបម្រើសា្លបសញ្ជាតិព័រទុយហ្គាល់វ័យ២៩ឆ្នាំរូបនេះ បានផ្លាស់ចេញពីកីឡាដ្ឋាន Old Trafford មកកាន់ក្រុម Fenerbahce ដោយបានស៊ុតបាល់បញ្ចូលទីបាន១០គ្រាប់ និងជួយបញ្ជូនបាល់ឲ្យដៃគូបានចំនួន ប្រាំបីលើកសម្រាប់ក្រុមទួរគីមួយនេះ។
បើយោងតាមការចុះផ្សាយរបស់គេហទំព័រ Tuttosport បានឲ្យដឹងថា លោក គ្រួបង្វឹករបស់ក្រុម Inter Milan លោក Roberto Mancini កំពុងតែសម្លឹងមើលយ៉ាងយកចិត្តទុកដាក់ចំពោះកីឡាកររូបនេះនៅពេលដែល ក្លិបមាន ផែនការរុះរើរចនាសម្ព័ន្ធរបស់ក្លិបនៅរដូវកាលក្រោយ ។ របាយការណ៍នេះបានបន្ថែមថា កីឡាករវ័យ២៩ឆ្នាំរូបនេះនឹងត្រូវបានបើកចំហចំពោះការរំពឹងទុកនៃការផ្លាស់ប្តូរទៅកាន់ទឹកដី San Siro វិញ។
គួរបញ្ជាក់ថា កិច្ចសន្យារបស់កីឡាកររូបនេះនៅពហុកីឡដ្ឋាន Sukru Saracoglu មិនផុតកំណត់រហូតដល់ចុងបញ្ចប់នៃរដូវកាល ២០១៧-១៨ ឯងណោះ៕

លោក កឹម សុខា ចោទ CPP ថា កំពុងប្រើយុទ្ធសាស្ត្រកាត់ក្បាលបំបែកខ្លួន CNRP

March 30, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖លោក កឹម សុខា ប្រធានស្តីទីគណបក្សសង្គ្រោះជាតិ បានថ្លែងនៅព្រឹកនេះ ក្នុងវេទិការ CNRP មួយថា « ឥឡូវនេះ គេកំពុងប្រើយុទ្ឋសាស្ត្រកាត់ក្បាលបំបែកខ្លួន បន្ទាប់ពីគេលេងយុទ្ឋសាស្ត្រពុះក្បាលបំបែកខ្លួនមិនបានសម្រេច »។
លោក កឹម សុខា មិនបានថា អ្នកដែលកំពុង ប្រើយុទ្ធសាស្ត្រនេះជាអ្នកណា ឬគណបក្សណាមួយពិតប្រាកដនោះទេ។ ប៉ុន្តែគេយល់ថា ការនិយាយនោះគឺសំដៅលើបក្សកាន់អំណាច CPP តែម្តង ។
លោក កឹម សុខា បញ្ជាក់ថា ក្បាលនោះគឺរូបលោក (កឹម សុខា) និង លោក សម រង្ស៊ី ឯខ្លួនគឺសមាជិកសមាជិកាគណបក្សសង្គ្រោះជាតិ និងអ្នកគាំទ្រនៅថ្នាក់ក្រោមទាំងអស់។
លោក កឹម សុខា បានថ្លែងបែបនេះ នៅក្នុងវេទិកា“គណៈប្រតិបត្តិសង្គ្រោះជាតិ” ដែលប្រារព្ឋធ្វើនៅព្រឹកថ្ងៃទី៣០មីនា ២០១៦ នៅក្នុងសង្កាត់កំពង់លាវ ក្រុងព្រៃវែង៕

ប្រធានាធិបតីថ្មីរបស់មីយ៉ាន់ម៉ាស្បថចូលកាន់តំណែងជាផ្លូវការ

March 30, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

មីយ៉ាន់ម៉ា៖យោងតាមការផ្សាយរបស់សារព័ត៌មានស៊ិនហួរនៅព្រឹកថ្ងៃទី៣០មីនានេះបានឲ្យដឹងថា ប្រធានាធិបតីជាជនស៊ីវិលដំបូងបំផុតរបស់មីយ៉ាន់ម៉ា លោក U Htin Kyaw បានស្បថចូលកាន់តំណែងជាផ្លូវការហើយ នៅក្នុងសភាជាតិ។
បេក្ខជនមកពីយោធាមីយ៉ាន់ម៉ា លោក U Myint Swe ត្រូវបានប្រកាសតែងតាំងជាអនុប្រធានាធិបតីទីមួយ និងលោក Henry Van Thio មកពីគណបក្ស NLD របស់លោកស្រី អ៊ុងសាន ស៊ូជី ធ្វើជាអនុប្រធានាធិបតីទីពីរ។ ប្រមុខ ដឹកនាំកំពូលៗទាំងបីនេះ បានស្បថចូលកាន់តំណែង ក្រោមអធិបតីភាពរបស់លោក U Mann Win Khaing Than ប្រធានសភានៃសហភាពមីយ៉ាន់ម៉ា៕

CNRP គ្រោងប្តឹងក្រុមយុវជន ដែលនាំគ្នាតវ៉ាប្រឆាំងលោក កឹម សុខា

March 30, 2016Uncategorizedមេគង្គ ប៉ុស្តិ៍

រាជធានីភ្នំពេញ៖លោក ស្រី ចំរើន តំណាងក្រុមនិស្សិត កាលពីម្សិលមិញ បានដឹកនាំយុវជនមួយក្រុមហែក្បួនដាក់ញ្ញតិទៅកាន់រដ្ឋសភា ស្នាក់ការអង្គការសហប្រជាជាតិ ស្នាក់ការគណបក្សសង្គ្រោះជាតិនិងផ្ទះលោក កឹម សុខា ក្នុងគោលបំណងទាមទារឲ្យលោក កឹម សុខា បកស្រាយរឿងខ្សែអាត់សំឡេង ដែលក្រុមនេះសង្ស័យថាជាសំឡេងលោក កឹម សុខា សន្ទនាស្នេហា។
ផ្តើមពីនោះ គណបក្សប្រឆាំងបានចេញ សេចក្តីប្រកាសព័ត៌មានមួយចេញផ្សាយនៅរសៀលម្សិលមិញនេះដែរ ហើយបានប្រកាស ថ្កោលទោសចំពោះទង្វើរបស់យុវជន ស្រី ចំរើន ដែលបានយកទង់ អាវ និងមួក មានសញ្ញាសម្គាល់គណបក្សសង្គ្រោះ « ទៅធ្វើសកម្មភាពអនាធិបតេយ្យ » នៅរាជធានីភ្នំពេញ។
តាមខ្លឹមសារនៃសេចក្តីប្រកាសព័ត៌មាននោះ គណបក្សប្រឆាំង បានចាត់ទុកការយកសម្ភារដែលមានសញ្ញាសម្គាល់គណបក្សសង្គ្រោះជាតិទៅធ្វើការហែក្បួន នឹងប្រមូលផ្តុំដោយក្រុមលោក ស្រី ចំរើន នេះថាជាការរំលោភច្បាប់ស្តីពីកម្មសិទ្ធិបញ្ញានិងច្បាប់ព្រហ្មទណ្ឌ។ ផ្តើមពីនោះ គណបក្សក៏បានចាត់ទុកក្រុមនេះថាមានចេតនាបង្កឲ្យមានភាពអនាធិបតេយ្យនៅក្នុងសង្គម។ គណបក្សនេះក៏បានស្នើឲ្យអាជ្ញាធរមានសមត្ថកិច្ចដកហូតអាវ មួក និងទង់ ដែលមានសញ្ញាសម្គាល់គណបក្សសង្គ្រោះជាតិពីក្រុមលោក ស្រី ចំរើន នោះវិញ។
ទាក់ទងករណីខាងលើនេះ លោក យឹម សុវណ្ណ អ្នកនាំពាក្យ CNRP បានអះអាងថា យើងកំពុងពិភាក្សាគ្នាពីពាក្យបណ្តឹងនេះ តែមិនទាន់កំណត់ពេលដាក់ប្តឹងនៅឡើយទេ។ លោកថា ទង្វើរបស់ក្រុមលោក ស្រី ចំរើន មិនមានការអនុញ្ញាតិពីគណបក្សនោះទេ ហើយធ្វើសកម្មភាពល្មើសច្បាប់៕

លោក កឹម សុខា ត្រូវលាលែងពីតំណាងរាស្ត្រ បើខ្សែអាត់សំឡេងជារឿងពិត

March 30, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖អ្នកនាំពាក្យរដ្ឋសភាលោក ឈាង វុន បានថ្លែងថា លោក កឹម សុខា តំណាងរាស្ត្រ CNRP ខេត្តកំពង់ចាម ត្រូវលាលែងពីតំណាងរាស្ត្រ ប្រសិនបើអាស្រូវស្នេហាជារឿងពិត ព្រោះថា លោក កឹម សុខា រំលោភ”តម្លៃស្ត្រីខ្មែរនិងសិទ្ធិនារី” ហើយ បញ្ហានេះ គ្រោះថ្នាក់មែនទែន។ ទន្ទឹមនោះ ករណីនេះវារំលោភច្បាប់ឯកពន្ធភាព (ប្តីមួយប្រពន្ធមួយ) ទៀតផង។
លោក ឈាង វុន បញ្ជាក់ថា គណៈកម្មការអចិន្ត្រៃយ៍នៃរដ្ឋសភាមានសិទ្ធិបង្កើតគណៈកម្មការស៊ើបអង្កេតរឿងនេះនៅក្នុងរដ្ឋសភា។ លោកផ្តល់យោបល់ថាលោក កឹម សុខា ត្រូវតែលាលែងពីតំណាងរាស្ត្រ ប្រសិនបើអាស្រូវស្នេហាជារឿងពិត៕

U16 កម្ពុជា ជួបក្រុម Kagoshima United របស់ជប៉ុនរសៀលនេះ

March 30, 2016កីឡាមេគង្គ ប៉ុស្តិ៍

បាល់ទាត់៖ក្រុមជម្រើសជាតិកម្ពុជាអាយុក្រោម១៦ឆ្នាំត្រូវជួបប្រកួតជាមួយនឹងក្រុមម្ចាស់ផ្ទះ Kagoshima United FC U១៦នៅកីឡដ្ឋាន Global Arena ក្នុងប្រទេសជប៉ុនក្នុងយុទ្ធនាការពានរង្វាន់ J.League U16 Challenge 2016 វេលាម៉ោង១៤ និង៣០នាទី(ម៉ោងនៅកម្ពុជា)៕

មនុស្ស៧នាក់ស្លាប់ក្នុងហេតុការណ៍ធ្លាក់យន្តហោះ មួយគ្រឿងនៅកាណាដា

March 30, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

កាណាដា៖យន្តហោះធុនតូចឯកជនមួយគ្រឿងបានធ្លាក់លើកោះមួយនាភាគខាងកើតឆ្នេរសមុទ្រនៃខេត្តកេប៊ិច ប្រទេសកាណាដាបានបណ្តាលឲ្យមនុស្សចំនួន៧នាក់ស្លាប់បាត់បង់ជីវិត។ នេះបើយោងតាមការចុះផ្សាយរបស់ BBC។
តាមមន្ត្រីអាជ្ញាធរកាណាដាបានឲ្យដឹងថា យន្តហោះខាងលើបានធ្លាក់ខណៈពេលដែលវាជិតទៅដល់ព្រលានយន្តហោះ Îles-de-la-Madeleine ជួបនឹងខ្យល់ខ្លាំងនិងព្រិលទឹកកក។ ទន្ទឹមនោះមន្ត្រីអាជ្ញាធររួមទាំងក្រុមប្រឹក្សាសុវត្ថិភាពដឹកជញ្ជូននៃប្រទេសកាណាដា កំពុងធ្វើដំណើរទៅកោះ Havre aux Maisons ដែលស្ថិតនៅប្រជុំកោះ Magdalen ដើម្បីពិនិត្យរកមើលមូលហេតុដែលបង្កឲ្យយន្តហោះខាងលើធ្លាក់ជាបន្ត៕

សមត្ថកិច្ចចម្រុះចុះពិនិត្យកន្លែងទិញស្តុកដំឡូងមីលាយដីខ្សាច់លក់ឲ្យថៃ

March 30, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ ប៉ែន សុផល
ខេត្តបាត់ដំបង៖ព្រះរាជអាជ្ញារងលោក ហេង លុយ បានដឹកនាំកម្លាំងចម្រុះចុះពិនិត្យកន្លែងស្តុកដំឡូងមីមួយកន្លែងយីហោ ហុង ហាន ស្ថិតនៅចំណុចភូមិអូរចំណិត ឃុំតាស្តា ស្រុកសំពៅលូន ខេត្តបាត់ដំបង មាន បានលាយជាមួយដីខ្សាច់រួចថ្លឹងលក់លក់ឲ្យឈ្មួញថៃ។
តាមប្រភពព័ត៌មានពីជាយដែនបានឲ្យដឹងថា កាលពីវេលាម៉ោង២០ និង៣០នាទីយប់ដ្ងៃទី២៨ខែមីនាឆ្នៃ២០១៦ ម្ចាស់ឃ្លាំងទិញទំនិញកសិផល១កន្លែង មានផ្លាកយីហោ ហុង ហាន បានបែកធ្លាយរឿងលក់ដំឡូងមីមានលាយដីខ្សាច់បន្លំលក់ឲ្យឈ្មួញថៃ ហើយឈ្មួញថៃនោះបានមកប្តឹងសមត្ថកិច្ចស្រុកសំពៅលូនឲ្យជួយអន្តរាគមន៍។ លុះព្រឹកថ្ថៃទី២៩ ខែមីនា ឆ្នាំ២០១៦ លោក ហេង លុយ ព្រះរាជអាជ្ញារងអមសាលាដំបូងខេត្តបានដឹកនាំកម្លាំងចម្រុះចុះពិនិត្យមើលទីតាំងសៃឡូនោះ ដែលជាកម្មសិទ្ធរបស់ឈ្មោះ ហុង ហាន ភេទប្រុសអាយុ៥៤ឆ្នាំ រស់នៅភូមិស្រឡៅជ្រុំភូមិតាស្តាស្រុកសំពៅលូននិងកម្មករ
១.ឈ្មោះ សុំ ខន ភេទប្រុសអាយុ២៧ឆ្នាំទីលំនៅភូមិអូរល្វាឃុំជ្រៃសីមាស្រុកសំពៅលូនខេត្តប/ប មុខរបរជាកម្មករ
២.ឈ្មោះ ងួន បុល ភេទប្រុសអាយុ៣២ឆ្នាំទីលំនៅភូមិស្រឡៅជ្រុំឃំុសិរីមានជ័យស្រុកសំពៅលូនខេត្តបាត់ដំបងមុខរបរជាកម្មករ។
បច្ចុប្បន្នសមត្ថកិច្ចកំពុងឃាត់ខ្លួនម្ចាស់សៃឡូ ឈ្មោះ ហុង ហាន និងកម្មករ២នាក់ទៀតកំពុងធ្វើការសាកសួរនៅអធិការស្រុកសំពៅលូននៅឡើយ៕

ឃាត់ខ្លួនវៀតណាមស្នាក់នៅ និងធ្វើការខុសច្បាប់២៧នាក់ក្នុងខណ្ឌសែនសុខ

March 30, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖កម្លាំងនគរបាលអន្តោប្រវេសន៍ បានឃាត់ខ្លួនជនជាតិវៀតណាមចំនួន ២៧នាក់ ដែលលួចឆ្លងដែន ស្នាក់នៅ និងធ្វើការខុសច្បាប់នៅសង្កាត់ឃ្មួញ ខណ្ឌសែនសុខនៅព្រឹកថ្ងៃទី៣០ ខែមីនា ឆ្នាំ២០១៦នេះ។
តាមសេចក្តីរាយការណ៍បានឲ្យដឹងថា ប្រតិបត្តិការចុះបង្ក្រាបនេះដឹកនាំដោយ លោកឧត្តមសេនីយទោ អ៊ុក ហៃសិលា ប្រធាននាយកដ្ឋានស៊ើបអង្កេត និងអនុវត្តនីតិវីធី នៃអគ្គនាយកដ្ឋានអន្តោប្រវេសន៍ក្រោមការបញ្ជាផ្ទាល់ពីនាយឧត្តមសេនីយ សុខ ផល អគ្គនាយកនៃនអគ្គនាយកដ្ឋានអន្តោប្រវេសន៍ សហការជាមួយស្នងការដ្ឋាន នគរបាលរាជធានីភ្នំពេញ ដោយមានការសម្របសម្រួលពី លោក មាស ចន្ទ័ពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ។
សេចក្តីរាយការណ៍បញ្ជាក់ថា ក្នុងប្រតិបត្តិការនេះបានឃាត់ខ្លួនជនជាតិវៀតណាមចំនួន២៧ ដែលលួចឆ្លងដែន និងកំពុងស្នាក់នៅគ្មានលិខិតឆ្លងដែន ធ្វើការងារខុសច្បាប់ នៅសិប្បកម្មដែក កម្មករសំណង់ នៅសង្កាត់ឃ្មួញ ខណ្ឌសែនសុខ ដោយក្នុងនោះចំនួន០៣នាក់ បញ្ជូនទៅអគ្គនាយកដ្ឋានអន្តោប្រវេសន៍ ដើម្បីសាកសួរតាមនីតិវិធី៕

មេបញ្ជាការសឹករងខេត្តព្រះវិហារលោក សោម បុប្ឆារ័ត្ន ទទួលមរណភាព

March 30, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តព្រះវិហារ៖លោក សោម បុប្ជារ័ត្ន មេបញ្ជាការសឹករងព្រះវិហារ កាលពីរាត្រីទៀបភ្លឺម៉ោង១និង៤៦នាទី ថ្ងៃទី៣០ ខែមីនា ឆ្នាំ២០១៦ បានទទួលមរណភាពនៅអាយុ ៥៥ឆ្នាំ ដោយរោគាពាធ។
តាមប្រភពព័ត៌មានបានឲ្យដឹងថា លោក សោម បុប្ជារ័ត្ន បានទទួលមរណភាពដោយ រោគាពាធ កាលពីវេលាម៉ោង១ និង៤៦នាទីរំលងអធ្រាត្រឈានចូលថ្ងៃទី៣០ ខែមីនា ឆ្នាំ២០១៦ ហើយសពបានតំកល់នៅគេហដ្ឋានរបស់គាត់ក្នុងទីរួមខេត្តព្រះវិហារ ធ្វើបុណ្យតាមប្រពៃណី៕

ស្លាប់៣នាក់ រងរបួស១៥នាក់ដោយសារគ្រោះថ្នាក់ចរាចរណ៍ម្សិលមិញ

March 30, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖នៅថ្ងៃទី២៩ ខែមីនា ឆ្នាំ២០១៦ ម្សិលមិញនេះមានករណីគ្រោះថ្នាក់ចរាចរណ៍កើតឡើងចំនួន ៩លើក បណ្ដាលឲ្យមានមនុស្សស្លាប់ បាត់បង់ជីវិតចំនួន៣នាក់ រងរបួសធ្ងន់១១នាក់ និងរបួសស្រាល៤នាក់។
យោងតាមនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានឲ្យដឹងថា គ្រោះថ្នាក់ទាំង ៩លើកនោះបានបណ្ដាលឲ្យខូចខាតម៉ូតូ១១គ្រឿង, រថយន្តតូច ១គ្រឿង, រថយន្តធំ ៣គ្រឿង និងថ្មើរជើង ២នាក់៕

លោក សួន សេរីរដ្ឋា ចាត់ទុកលោក សម រង្ស៊ី ជាអ្នកនយោបាយបែបអំពិល អំពែក

March 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖មេបក្សអំណាចខ្មែរ លោក សួន សេរីរដ្ឋា បានសរសេរនៅលើ Face book របស់លោកនៅថ្ងៃនេះ ដោយវាយប្រហារ ធ្ងន់ៗ ទៅលោក សម រង្ស៊ី ដោយចោទថា លោក សម រង្ស៊ី មិនដែលបានដាក់ចេញនូវយុទ្ធសាស្ត្រ ដើម្បីដណ្តើមអំណាច ពីសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជានោះឡើយ ក្រៅតែពីឈរ ស្រែកជយោ! និងស្រែកអួតថា ឈ្នះហើយ! នៅចំពោះមុខអ្នកគាំទ្រប៉ុណ្ណោះ។ ទន្ទឹមនោះ លោក សម រង្ស៊ី មើលមកគណបក្សដែលគ្មានកៅអីក្នុងសភាថាជា គណបក្សអំពិលអំពែក តែមិនដែលមើលឃើញនិងទទួលស្គាល់ខ្លួនឯងថា ធ្វើនយោបាយបែបសត្វអំពិលអំពែក ម្តងប្រឆាំង ម្តងស្រប ធ្វើឲ្យតែអ្នកគាំទ្រវេទនា ស្លាប់ របួស គ្រប់អាណត្តិនោះទេ។
លោក សួន សេរីរដ្ឋា បន្ថែមការរិះគន់ថា លោក សម រង្ស៊ី ក្រៅពីឈរស្រែក ជយោ និងស្រែកអួតថា អាណត្តិក្រោយយើងឈ្នះហើយ នៅចំពោះមុខអ្នកគាំទ្រនោះ មេបក្សប្រឆាំងអំពិលអំពែកនេះ មិនដែលមានយុទ្ធសាស្ត្រនយោបាយអី ដើម្បីយកឈ្នះ លោក ហ៊ុន សែន ឡើយ។
មេបក្សអំណាចខ្មែរ រូបនោះបានអះអាងថា បើពលរដ្ឋខ្មែរនៅតែបន្តគាំទ្រលោក សម រង្ស៊ី តទៀតនោះ ការចង់បានការផ្លាស់ប្តូរនឹង គ្មានលទ្ធផល គឺប្រៀបដូចជាយកទឹកទន្លេ ទៅដាំរំងាស់យកអំបិល។
គេកត់សម្គាល់ថា លោក សួន សេរីរដ្ឋា តែងតែបានធ្វើការវាយប្រហារយ៉ាងចាស់ដៃទៅមេដឹកនាំ CNRP រួមទាំងសម្តេច ហ៊ុន សែន ផងដែរ។ ប៉ុន្តែនយោបាយ គណបក្សអំណាចខ្មែរ ហាក់លម្អៀងទៅរកទិន្នាការបែបសាធារណរដ្ឋរបស់លោក លន់ នល់៕

ទាហានលើកគ្នាសម្រុកចូលស្នាក់ការរដ្ឋបាលព្រៃឈើស្រុកអន្លង់វែងបម្រុងរំដោះឡានដឹកឈើ

March 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តឧត្តរមានជ័យ៖នៅវេលាម៉ោង ១១ព្រឹក ថ្ងៃទី ២៨ ខែមីនា ឆ្នាំ ២០១៦ មានក្រុមទាហានប្រមាណ១០នាក់បានសម្រុកចូលស្នាក់ការរដ្ឋបាលព្រៃឈើ ស្រុកអន្លង់វែង បម្រុងរំដោះ រថយន្តទាហានដឹកឈើ២គ្រឿងដែលត្រូវបានកម្លាំងចម្រុះបានចាប់កាលពីថ្ងៃទី២៥ ខែកុម្ភៈ ឆ្នាំ២០១៦កន្លងទៅ។ ហេតុការណ៍នោះ ស្ថិតក្នុងភូមិកុងប៊ិញ ឃុំលំទង ស្រុកអន្លង់វែង ខេត្តឧត្តរមានជ័យ។
មន្ត្រីរដ្ឋបាលព្រៃឈើ បានឲ្យដឹងថា ដំបូងឡើយគេ បានឃើញក្រុមទាហានជាច្រើននាក់ មកឈរនៅពីមុខស្នាក់ការសង្កាត់រដ្ឋបាលព្រៃឈើ និងខ្លះទៀតសម្រុកចូលទៅក្នុងស្នាក់ការរដ្ឋបាលព្រៃឈើឡើងបញ្ឆេះរថយន្តបម្រុងបើកចេញ ហើយស្រែកឡូឡាពលរដ្ឋមានអារម្មណ៍ភ័យខ្លាចនឹងមានផ្ទុះអាវុធ ពីព្រោះមានរថយន្តរដ្ឋបាលព្រៃឈើចតនៅពាំងខ្លោងទ្វារជាប់។
លោក ខន ខែម នាយសង្កាត់រដ្ឋបាលព្រៃឈើ ស្រុកអន្លង់វែង បានឱ្យដឹងថា រថយន្តកងទ័ព២គ្រឿងដឹកឈើលេខ២ប្រមាណជាង១០ម៉ែត្រគូប ត្រូវកំលាំងមន្ត្រីជំនាញសហការជាមួយប៉ូលិស ប៉េអឹម ស្រុកឃាត់ចាប់ កាលពីរសៀលថ្ងៃទី២៥ កុម្ភៈ ២០១៦ កន្លងទៅនេះយកមករក្សាទុក្ខនៅស្នាក់ការសង្កាត់រដ្ឋបាលព្រៃឈើស្រុកអន្លង់វែង។
លោក ខន ខែម បានបញ្ចាក់ថា ទី១-រថយន្តម៉ាកកូរ៉េចំណុះ២តោនកន្លះ ពណ៌ត្រេអ៊ី ជារថយន្តរបស់អង្គភាពយោធភូមិទី៤ ទី២-រថយន្តម៉ាកកូរ៉េដែរចំណុះ២តោនកន្លះ ពណ៌ត្រេអ៊ី ជារថយន្តអង្គភាពកងពលតូចអន្តរាគមន៍លេខ៤។ រថយន្តទាំង២គ្រឿងនេះតែងតែដឹកឈើជាយូរឆ្នាំ ហើយគ្មានឯកសារដោយយកលេសដឹកជញ្ជូនទៅកសាងបន្ទាយ តែបើតាមការសង្កេតគឺដឹកដាក់នៅដេប៉ូឯខេត្តបន្ទាយមានជ័យ៕