រាជធានីភ្នំពេញ៖ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃកម្ពុជា បានប្រោសប្រទានព្រះរាជក្រឹត្យត្រាស់បង្គាប់តែងតាំង និងផ្តល់ឋានៈឧបការី នៃអង្គភាពប្រឆាំងអំពើពុករលួយ (ACU) ចំនួន១៨រូប ឲ្យមានឋានៈស្មើអគ្គនាយក អនុរដ្ឋលេខាធិការ រដ្ឋលេខាធិការ និងរដ្ឋមន្ត្រីផងដែរ៕
រាជធានីភ្នំពេញ៖យោងតាមរបាយការណ៍នគរបាលជាតិ បានឲ្យដឹងថា ថ្ងៃទី២៥ ខែមេសា ឆ្នាំ២០១៦ បង្ក្រាបបទល្មើសជួញដូរ រក្សាទុក និងប្រើប្រាស់ ៥ករណីឃាត់ មនុស្ស ៦នាក់ (ស្រី១នាក់) មេតំហ្វេតាមីន (ice) ០,០៩ក្រាម, ២កញ្ចប់ធំ និង១៨កញ្ចប់តូច។
របាយការណ៍ដដែលបញញជាក់ថា ទីតាំងបង្ក្រាប ទី១. ភ្នំពេញ បង្រា្កប ១ករណី ឃាត់ខ្លួន ១នាក់ (ប្រុស) មេតំហ្វេតាមីន (ice) ១កញ្ចប់ធំ និង ៩កញ្ចប់តូច, ទី២. កំពង់ឆ្នាំង បង្រា្កប ១ករណី ឃាត់ខ្លួន ២នាក់ (ស្រី១នាក់) មេតំហ្វេតាមីន (ice) ០,០៩ក្រាម, ទី៣. រតនគិរី បង្រា្កប ១ករណី ឃាត់ខ្លួន ១នាក់(ប្រុស) មេតំហ្វេតាមីន (ice) ២កញ្ចប់តូច និងទី៤. កំពង់ចាម បង្រា្កប ២ករណី ឃាត់ខ្លួន ២នាក់ (ប្រុស) មេតំហ្វេតាមីន (ice) ១កញ្ចប់ធំ និង៧កញ្ចប់តូច៕
រាជធានីភ្នំពេញ៖នៅថ្ងៃទី២៥ ខែមេសា ឆ្នាំ២០១៦ម្សិលមិញនេះ មានករណី គ្រោះថ្នាក់ចរាចរណ៍ នៅទូទាំងប្រទេស កើតឡើងចំនួន១១លើក ក្នុងនោះយប់ ៩លើក បណ្តាលឲ្យមនុស្សស្លាប់ ៩នាក់ រងរបួសធ្ងន់ ៦នាក់ (ស្រី២នាក់) និងរបួសស្រាល ៣នាក់ (ស្រី១នាក់)។ នេះយោងតាមរបាយការណ៍នាយកដ្ឋាន នគរបាលចរាចរណ៍ និងសណ្ដាប់ធ្នាប់ សាធារណៈ នៃអគ្គស្នងការដ្ឋាន នគរបាលជាតិ។
របាយការណ៍ដដែលបន្តថា នៅក្នុងហេតុការណ៍ គ្រោះថ្នាក់ចរាចរណ៍ ទាំង ១១លើកនេះ បណ្តាលឲ្យខូចខាត យានយន្ត សរុប ចំនួន ១៦គ្រឿង រួមមាន ម៉ូតូចំនួន ៩គ្រឿង, រថយន្តធុនតូច ៤គ្រឿង ,រថយន្តធុនធំ ៣គ្រឿង ។ របាយការណ៍ខាងលើបញ្ជាក់ថា មូលហេតុ ដែលបណ្តាលឲ្យកើតមានករណី គ្រោះថ្នាក់ចរាចរណ៍ រួមមាន ល្មើសល្បឿន ៤លើក (ស្លាប់៤នាក់), មិនគោរពសិទ្ធិ ២លើក (ស្លាប់១នាក់), ប្រជែង ៣លើក (ស្លាប់២នាក់), ស្រវឹង ១លើក (ស្លាប់១នាក់) កត្តាយានយន្ត ១លើក (ស្លាប់១នាក់) ។ ក្នុងនោះ អ្នកមិនពាក់មួក សុវត្ថិភាព ពេលគ្រោះថ្នាក់ចរាចរណ៍ ១០នាក់ (យប់៣នាក់) ។ គ្រោះថ្នាក់លើដងផ្លូវ រួមមាន ផ្លូវជាតិ ចំនួន ៥លើក , ផ្លូវខេត្តក្រុង ៣លើក, ផ្លូវលំ ៣លើក ។ យានយន្តបង្កហេតុ រួមមាន ម៉ូតូ ៧លើក រថយន្តធុនតូច ២លើក , រថយន្តធុនធំ ២លើក ។ ខេត្ត រាជធានី ដែលមានគ្រោះថ្នាក់ និងរងគ្រោះថ្នាក់ ច្រើន រួមមាន បាត់ដំបង ១លើក ស្លាប់១នាក់, កំពង់ស្ពឺ ២លើក ស្លាប់ ២នាក់, កំពត ២លើក ស្លាប់២នាក់ (ស្រី១នាក់) របួស២នាក់, ព្រះសីហនុ ២លើក ស្លាប់ ២នាក់ (ស្រី១នាក់), កណ្តាល ១លើក ស្លាប់១នាក់, កោះកុង ១លើក ស្លាប់ ១នាក់ និងក្រចេះ ១លើក របួស ៤នាក់។ ជាមួយគ្នានោះលទ្ធផលត្រួតពិនិត្យ ការអនុវត្ត ច្បាប់ចរាចរណ៍ផ្លូវគោក មធ្យោបាយល្មើស ៤.១២៧ គ្រឿង, អប់រំ ២.០០២ គ្រឿង , ពិន័យ ២.១២៥ គ្រឿង ៕
អារ៉ាប៊ីសាអូឌីត៖សមាជិកនៃបណ្តាញភេរវកម្មអាល់កៃដាជាង៨០០នាក់នៅក្នុងប្រទេសយ៉េមែនត្រូវបានកងកម្លាំងសម្ព័ន្ធមិត្តអារ៉ាប់ដឹកនាំដោយប្រទេសអារ៉ាប៊ីសាអូឌីតសម្លាប់ក្នុងការវាយប្រហារតាមអាកាស។
យោងតាមសារព័ត៌មានស៊ិនហួរចេញផ្សាយថា កងកម្លាំងចំរុះដឹកនាំដោយទ័ពអាកាសរបស់អារ៉ាប៊ី សាអូឌីត បានចេញប្រតិបត្តិការនៅរយៈពេល កន្លងមកនេះ ដោយបានសម្លាប់សមាជិកអាល់កៃដា និងមេដឹកនាំជួរមុខមួយ ចំនួនផងដែរសរុបជាង ៨០០នាក់។ នេះជាលទ្ធផលធំមួយ ដែលអារ៉ាប៊ី សាអូឌីត លើកឡើងថាជាការសម្រួលឲ្យរដ្ឋាភិបាលថ្មី ឡើងកាន់អំណាចដោយស្របច្បាប់ និងអនុញ្ញាតឲ្យក្រុមផ្តល់ជំនួយមនុស្សធម៌ចូលមកកាន់ប្រទេសអាហ្វ្រិកខាងកើតមួយនេះ ដោយសុវត្ថិភាព។
គួរបញ្ជាក់ថា កងកម្លាំងចំរុះខាងលើនេះ បានចងសម្ព័ន្ធគ្នាកាលពីខែមីនា ឆ្នាំមុនដើម្បីប្រយុទ្ធប្រឆាំង នឹងក្រុមឧទ្ទាម ហួទី ដែលបានចុះចូលនឹងក្រុមអាល់កៃដា និងបានបង្កអស្ថិរភាពយ៉ាងខ្លាំងនៅយ៉េមែន ជាពិសេសពួកគេបានរារាំងដល់ ការឡើងកាន់តំណែងរបស់រដ្ឋាភិបាលថ្មី ដែលបានមកពីការបោះឆ្នោត៕
រាជធានីភ្នំពេញ៖ថ្លែងនៅក្នុងសន្និសីទសារព័ត៌មាននារសៀលនេះ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានអះអាងថា ការចាប់ខ្លួនលោក ស៊ាង ចែត មេឃុំគណបក្ស សម រង្ស៊ី មិនមែនដោយសារអក្សរចំនួន៤ទំព័ររបស់កញ្ញា ខុម ចាន់ដារ៉ាទី ហៅស្រីមុំ នោះទេ ហើយការចាប់ខ្លួននោះក៏មិនដូចខ្មែរក្រហមនោះឡើយ។ ប៉ុន្តែយោងតាមចម្លើយរបស់លោកមេឃុំនោះតែម្តង។ លោកអះអាងទៀតថា ប្រមាណ៣៦ម៉ោងនេះ លោកមិនបានសម្រាកនៅឡើយទេ តែលោកមេឃុំបានសម្រាក បាយភ្លៅមាន់ និងដេកក្នុងបន្ទប់ម៉ាស៊ីនត្រជាក់។
លោក ឱម យ៉ិនទៀង បានឲ្យដឹងទៀតថា ACU បានកោះអញ្ជើញមនុស្ស៨នាក់ផ្សេងទៀត ដើម្បីស្តាប់បំភ្លឺជុំវិញករណីកញ្ញា ស្រីមុំ ក្នុងករណីទទួលសំណូក៥០០ដុល្លារ ។ ប៉ុន្តែម្តាយរបស់ស្រីមុំមិនបានទទួលលុយពីលោកមេឃុំនោះឡើយ ។ ដូច្នេះមានន័យថា ម្តាយស្រីមុំមិនមានទោសនោះទេ។
លោកប្រធានអង្គភាពប្រឆាំងអំពើពុករលួយក៏បានប្រតិកម្មចំពោះការចោទប្រកាន់របស់គណបក្សប្រឆាំងដែលចោទថា ការចាប់ខ្លួនមេឃុំ ស៊ាន ចែត ធ្វើដូចរបបខ្មែរក្រហម ប៉ុន្តែលោកថា នោះជាការលាបពណ៌ ដើម្បីបង្ខូចកិត្តិយសអង្គភាពរបស់លោកតែប៉ុណ្ណោះ។ លោកបញ្ជាក់ថា ACU មិនបានចាប់ខ្លួនលោកមេឃុំរូបនោះទេ តែបានអញ្ជើញគាត់ទៅជួបគ្នានៅសាលាស្រុក ហើយបានសាកសួរទាក់ទងការផ្តល់លុយឲ្យគ្រួសារកញ្ញា ស្រីមុំ ហើយលោកក៏បានសារភាព។
លោក ឱម យ៉ិនទៀង បានលើកឡើងថា មានមនុស្ស៨នាក់ទៀតនិងត្រូវកោះហៅមកសាកសួរទាក់ទងករណីខាងលើនេះ ហើយលោកដឹងថា ក្នុងចំណោមអ្នកទាំង៨នាក់នោះមានម្នាក់បាននឹងកំពុងរត់គេចខ្លួនទៅព្រំដែនថៃ តែលោកបានសំណូមពរឲ្យអាជ្ញាធររារាំងមិនឲ្យគាត់ចាកចេញទៅប្រទេស៕
រាជធានីភ្នំពេញ៖អង្គភាពប្រឆាំងអំពើពុករលួយ ACU បានកោះហៅមន្ត្រីសមាគមសិទ្ធិមនុស្សអាដហុក៥រូប ឲ្យចូលបំភ្លឺទាក់ទងនឹងរឿងអាស្រូវផ្លូវភេទរបស់លោក កឹម សុខា ខណដែលកញ្ញា ខុម ចាន់តារ៉ាទី ហៅស្រីមុំ ក៏បានស្នើឲ្យតុលាការចាត់ការលើមន្ត្រីអាដហុកដែលនាងចោទថាបានឲ្យនាងនិយាយកុហក ពេលចូលបំភ្លឺនៅតុលាការ ផងដែរ។
មន្ត្រីសមាគមសិទ្ធិមនុស្ស អាដហុក ដែលត្រូវ ACU កោះហៅរួមមាន៖ ឈ្មោះ អ្នកស្រី ទ្រី ឈូន , លោក លឹម មុនី មន្ត្រីអង្កេតជាន់ខ្ពស់នៃសមាគម , លោក នី សុខា ប្រធានផ្នែកស៊ើបអង្កេតនៃសមាគម , លោក យី សុខសាន្ត អនុប្រធានផ្នែកស៊ើបអង្កេតនៃសមាគមនិងលោក ណៃ វ៉ងដា អនុប្រធានផ្នែកស៊ើបអង្កេត៕
អាមេរិក៖ប្រធានាធិបតីអាមេរិកលោក បារ៉ាក់ អូបាម៉ា បានលើកឡើងកាលពីម្សិលមិញ ដោយអំពាវនាឲ្យគ្រប់ភាគីជម្លោះនៅក្នុងប្រទេសស៊ីរី វិលរកតុចរចាដោយសន្តិវិធី ហើយផ្អាកការបាញ់គ្នាជាបណ្តោះអាសន្នសិន។ នេះបើយោងតាមសារព័ត៌មាន Channel News Asia។
ថ្លែងក្នុងសន្និសីទសារព័ត៌មាននៅអាល្លឺម៉ង់លោក អូបាម៉ា ថា កាលពីដើមសប្តាហ៍មុន លោកបាននិយាយទៅកាន់ប្រធានាធិបតីរុស្ស៊ីលោក វ្លាឌីមៀ ពូទីម ដើម្បីជជែកពីការធ្វើការរួមគ្នា ផ្អាកការបាញ់គ្នា និងធ្វើឲ្យភាគីពាក់ព័ន្ធចូលតុចរចាដើម្បីដោះស្រាយបញ្ហា។ ទោះយ៉ាងណាសេតវិមានលើកឡើងថា ការឈប់បាញ់គ្នាវាមិនទាន់គ្រប់គ្រាន់ទេក្នុងការដោះស្រាយបញ្ហា តែវាផ្លូវតែមួយគត់នៃច្រកចេញដើម្បីដោះស្រាយជម្លោះដែលមានការកាប់សម្លាប់ព្រៃផ្សៃជាង៥ឆ្នាំមកនេះ បានបណ្តាលឲ្យមនុស្សជាង២០០,០០០នាក់ស្លាប់៕
សុខភាព៖បរិភោគដំឡូងបារាំងច្រើន ពុំត្រឹមតែមិនធ្វើឱ្យឡើងទម្ងន់ដូចដែលមនុស្សជាច្រើនតែងយល់ច្រឡំ នោះឡើយ តែថែមទាំងមានប្រយោជន៍បញ្ចុះសម្ពាធឈាមទៀតផង។ ពួកអ្នកវិទ្យាសាស្ត្របានដាក់បន្ថែមមើមដំឡូងបារាំង៦-៨មើម មានទំហំប្រហាក់ ប្រហែលគ្រាប់បាល់ហ្គោល ទៅក្នុងអាហារថ្ងៃត្រង់ និងពេលយប់របស់ជនជាតិអាមេរិកកើតជំងឺលើសឈាមនិងលើសទម្ងន់, ធាត់ចំនួន១៨ នាក់ ។
ក្រោយរយៈពេលមួយខែ សម្ពាធឈាមរបស់អ្នកចូលរួមពិសោធន៍សុទ្ធតែមានសញ្ញាថយចុះ ប្រែប្រួលក្នុងប្រមាណ៤,៣ភាគរយ ចំពោះតួលេខ វាស់សម្ពាធឈាមអប្បបរមានិង៣,៥ ភាគរយតួលេខវាស់សម្ពាធឈាមអតិបរមាក្នុងពេលទម្ងន់របស់ពួកគេហាក់ដូចជា មិនផ្លាស់ប្តូរ។
ដំឡូងបារាំងអាចធ្វើឱ្យថយចុះគ្រោះថ្នាក់ឈឺបេះដូង និងឈាមកកនៅខួរក្បាល ។ ក្រៅពីនេះបរិភោគដំឡូងបារាំងអាំង ឬស្ងោរកិនឱ្យម៉ដ្ឋជាប្រចាំក៏ល្អបំផុតសម្រាប់សុខភាពរបស់អ្នក មិនកើតជំងឺអំពីសម្ពាធឈាម ឬសរសៃឈាមបេះដូង។
មុនមហាវិទ្យាល័យ Scranton ការស្រាវជ្រាវរបស់វិទ្យាស្ថានស្រាវជ្រាវអាហារអង់គ្លេសក៏ធ្លាប់ អះអាងថា សារជាតិ Kukoamine មានក្នុងដំឡូងបារាំងអាចកែប្រែឱ្យប្រសើរសុខភាពជួយឱ្យគេងលក់ស្រួល និងបញ្ចុះសម្ពាធឈាម៕
បាល់ទាត់៖សេចក្តីរាយការណ៍មួយបានឲ្យដឹងថា ក្រុមចចកព្រៃ Roma ត្រៀមដាក់សំណើរទៅក្រុម AS Monaco របស់បារាំង ក្នុងការនាំយកខ្សែប្រយុទ្ធ Radamel Falcao មកកាន់ទឹកដីនៃប្រទេសអ៊ីតាលីនៅពេលចប់រដូវកាលនេះ។
ខ្សែប្រយុទ្ធសញ្ជាតិកូឡុំប៊ីវ័យ៣០ឆ្នាំរូបនេះ បាននិយាយថា រូបគេបានសម្រេចជំនួសកន្លែងរបស់កីឡាករ Edin Dzeko ដែលបានបង្ហាញខ្លួនត្រឹមតែ១៣លើប៉ុណ្ណោះ ។
យោងតាមការចេញផ្សាយ Corriere dello Sport របស់ប្រទេសអ៊ីតាលី បានឲ្យដឹងថា ក្រុមចចកព្រៃ Roma កំពុងមានចាប់អារម្មណ៍ក្នុងការចុះហត្ថលេខាជាមួយខ្សែប្រយុទ្ធវ័យ៣០ឆ្នាំរូបនេះដែលបច្ចុប្បន្នកំពុងតែប្រកបអាជិពនៅក្រុមតោខៀវ Chelsea ជាលក្ខណៈខ្ចីជើង ប៉ុន្តែមានពាក្យចចាមអារាម បានលើឡើងថា ក្រុម AS Monaco អាចនឹងតម្លៃខ្លួនចំពោះកីឡារូបនេះប្រមាណជាង ៥.៤៥លានផោន សម្រាប់ក្រុមចចកព្រៃដែលចង់បាន។
Falcao បានបញ្ជាក់ថា រូបគេបានចូលលេងឲ្យក្រុមតោខៀវ Chelsea បានតែ១០ប្រកួត
ប៉ុណ្ណោះ នៅក្នុងក្របខ័ណ្ឌ Premier League ចាប់តាំងពី Chelsea ខ្ចីជើងពីក្រុម Monaco កាលពីរដូវកាលមុន។
គួរបញ្ជាក់ថា ក្រុមចចកព្រៃ Roma កាលពីមិនមានការផ្សារភ្ជាប់ជាមួយនឹងកាផ្លាស់ប្តូរខ្សែការពាររបស់ក្រុម Chelsea កីឡាករ Branislav Ivanovic ប៉ុន្តែត្រូវបានរលាយសាបសូន្យទៅវិញ៕
សុខភាព៖ការស្រាវជ្រាវថ្មីមួយ បានបង្ហាញថាការចាប់ផ្តើម ពេលព្រឹកជាមួយនឹង អាហារសម្បូរទៅ ដោយ សាច់ និងបង្អែមដូចជានំដូណាត់ ឬនំមួយដុំ អាច ជួយឲ្យអ្នកចុះ ទម្ងន់និងរក្សាវាឲ្យនៅដដែល។
អ្នកស្រាវជ្រាវ បានប្រៀបធៀបលើចំណី អាហារ២ប្រភេទដែលមួយ មានជាតិស្ករតិចចំពោះ អាហារពេលព្រឹក និងមួយទៀតមានជាតិប្រូតេអ៊ីនខ្ពស់ និងជាតិស្ករខ្ពស់នៅពេលព្រឹកក្រុមដែលអាហារពេលព្រឹកមានបង្អែមមានការស្រកទម្ងន់ក្នុងរយៈពេល ៨ខែបន្ទាប់។
អ្នកស្រាវជ្រាវបាននិយាយថា ការស្រកទម្ងន់ដែលបានទាក់ទងនឹងអាហារ ជារឿយៗធ្វើឲ្យឃ្លាន និងចង់ញ៉ាំខ្លាំងនៅពេល ដែលមានការថយចុះខ្លាំង នៃអរម៉ូនដែលធ្វើឲ្យឃ្លាន នេះអាចជំរុញឲ្យឡើងទម្ងន់បាន។
ការស្រាវជ្រាវបានរាប់ បញ្ចូលមនុស្សប្រុស និងស្ត្រីធាត់ដែលរស់ នៅដោយជីវភាពសុខស្រួល ប៉ុន្តែមិនមាន ជំងឺទឹកនោមផ្អែមប្រភេទទី២ នោះទេ។ទម្ងន់សន្ទស្សន៍ខ្លួន ជាមធ្យមគឺ ៣២,២។ ទម្ងន់សន្ទស្សន៍៣០ត្រូវបាន គេចាត់ទុកថាជាការធាត់ ដែលក្រោម ២៥ត្រូវបាន គេចាត់ទុកថាធម្មតា។
អ្នកស្រាវជ្រាវបាននិយាយថា អ្នកញ៉ាំអាហារដែលមានជាតិស្ករនៅពេលព្រឹកមានកម្រិតនៃអរម៉ូនដែលធ្វើឲ្យឃ្លានធ្លាក់ចុះដូចនេះពួកគេមិនឃ្លាន ហើយមិនសូវជាមានបំណងញ៉ាំអាហារមុននោះទេ។ ការតមចំណីអាហារដែល សំបូរជាតិស្ករមិនជាចាំបាច់នោះទេ។ ប្រសិនបើអ្នកចូលចិត្តផ្អែម អ្នកអាចញ៉ាំវាបានម្តងឬពីរដងក្នុងមួយសប្តាហ៍៕
អេក្វាទ័រ៖ចំនួនអ្នកស្លាប់ដោយសារគ្រោះរញ្ជួយដីកម្រិត៧,៨រ៉ិចទ័រដែលវយាប្រហារប្រទេសអេក្វាទ័រកាលពីសប្តាហ័មុនបានកើនឡើងដលើចំនួន៦៥៤នាក់ហើយ។ នេះបើតាមអាជ្ញាធរគ្រប់គ្រងការសង្គ្រោះបន្ទាន់របស់ប្រទេសអេក្វាទ័រ បានឲ្យដឹងនៅព្រឹកថ្ងៃចន្ទនេះ។
បើយោងតាមការចេញផ្សាយរបស់សារព័ត៌មាន Reuters ចេញផ្សាយនៅថ្ងៃទី២៥ ខែមេសានេះ បានឲ្យដឹងថា របាយការណ៍ចុងក្រោយបានឲ្យដឹងថា មនុស្ស ១៦,៦០០នាក់ បានរងរបួសដោយសារគ្រោះធម្មជាតិនេះ ខណៈដែលមនុស្ស ៥៨នាក់ផ្សេងទៀតបាននិងបន្តបាត់ខ្លួន និងមនុស្សរាប់រយនាក់ទៀតកំពុងត្រូវការជម្រកស្នាក់នៅ។
ជាមួយគ្នានោះរដ្ឋាភិបាលនៃប្រទេសអេក្វាទ័របានអំពាវនាវស្វែងរកជំនួយជាបន្ទាន់ ដោយតាមការប៉ាន់ប្រមាន អេក្វាទ័រត្រូវការប្រាក់ ៣ពាន់លានដុល្លារអាមេរិក ដើម្បីកសាងប្រទេសឡើងវិញក្រោយពីជួបគ្រោះរញ្ជួយដីនេះ៕
មណ្ឌលគិរី៖មន្ត្រីយាមល្បាតនៅក្នុងតំបន់អភិរក្យសត្វព្រៃភ្នុំព្រេចបានឃាត់ខ្លួនជនសង្ស័យចំនួន១២នាក់ ដែលចូលកាប់ឈើប្រណីតខុសច្បាប់នៅក្នុងតំបន់ព្រៃការពារដែនជម្រកសត្វព្រៃព្រេច ហើយការឃាត់ខ្លួននេះចាប់តាំងពីថ្ងៃទី២១ ខែមេសាឆ្នាំ២០១៦មកម្ល៉េះ។ ក្នុងប្រត្តិបត្តិការនេះ ដឹកនាំដោយ លោក ហាន សាខន មន្ត្រីនគរបាលយុត្តិធម៌ របស់ក្រសួងបរិស្ថាន ក្រោយមកទើបបញ្ជូនមកមន្ទីរ បរិស្ថានខេត្តមណ្ឌលគិរី កសាងសំណុំរឿង។
លោក ហាន សាខន មន្ត្រីនគរបាលយុត្តិធម៌ របស់ក្រសួងបរិស្ថានបានឲ្យដឹងថា ជនសង្ស័យដែលធ្វើសកម្មភាពបទល្មើសនៅក្នុងតំបន់ព្រៃការពារដែនជម្រកសត្វព្រៃភ្នំព្រេច ដែលមាននិយាមការលេខ(0703934-1412597) នៅក្នុងឃុំពូជ្រៃ ស្រុកពេជ្រាដា ខេត្តមណ្ឌលគិរី សុទ្ធតែអ្នករស់នៅក្នុងភូមិរវៀង ឃុំស្រែជិះ ស្រុកសំបូរ ខេត្តក្រចេះ ក្នុងនោះទី១ឈ្មោះ ណែត ដុល ភេទប្រុស អាយុ៤០ឆ្នាំ ទី២ឈ្មោះ ងៀង គម ភេទប្រុស អាយុ ៤២ ឆ្នាំ ទី៣ឈ្មោះ វិច គ្រប់ ភេទប្រុស អាយុ២០ឆ្នាំ ទី៤ឈ្មោះ ថាន់ សួរ ភេទប្រុស អាយុ១៨ឆ្នាំ ទី៥ឈ្មោះ ដុល មករា ភេទប្រុស អាយុ១៨ឆ្នាំ ទី៦ឈ្មោះ ខេន ព្រិច ភេទប្រុស អាយុ២៤ឆ្នាំ ទី៧ឈ្មោះ ម៉ើល ឌឿន ភេទប្រុស អាយុ២៧ឆ្នាំ ទី៨ឈ្មោះ ឃិន ថាន់ ភេទប្រុស អាយុ៥១ឆ្នាំ ទី៩ឈ្មោះ ខេន ពានិច្ច ភេទប្រុស អាយុ១៧ឆ្នាំ ទី១០ឈ្មោះ ថែត កាត់ ភេទប្រុស អាយុ៣៨ឆ្នាំ ទី១១ឈ្មោះ ឃាង ភិញ ភេទប្រុស អាយុ២០ឆ្នាំ និងទី១២ឈ្មោះ កឹង ឆែ ភេទប្រុស អាយុ១៩ឆ្នាំ មុខរបរសុទ្ធតែកសិករដូចគ្នា ។
ចំណែកវត្ថុតាំងដែលឃាត់បានរួមមាន៖ គោយន្តកន្ត្រៃយ៍ចំនួន០៤គ្រឿង រណាយន្តចំនួន០៣គ្រឿង ពូថៅដៃចំនួន០៣គ្រឿង កាំបិតចំនួន០៣គ្រឿង ដែកត្បែងចំនួន០២ដើម ត្រសេសចំនួន០១ដើម ទូរស័ព្ទចំនួន០១គ្រឿង កៅឡាក់ចំនួន០៤ និងឈើប្រណិតប្រភេទឈើបេងចំនួន១៦ដុំ៕
ខេត្តសៀមរាប៖នៅវេលាម៉ោង១០ និង១៥នាទីព្រឹកថ្ងៃទី២៥ ខែមេសា ឆ្នាំ២០១៦ អគ្គិភ័យបានលេបត្របាក់ផ្ទះប្រជាពលរដ្ឋ២ខ្នង ដោយសារឆ្លងចរន្តអគ្គិសនី ស្ថិតនៅខាងក្រោយផ្សារសាមគ្គី ក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប ។
អគ្គិភ័យនេះ ត្រូវបានសមត្ថកិច្ចជួយអន្តរាគមន៍ភ្លាមៗ ផងដែរ ហើយមិនបណ្តាលឲ្យឆេះរាលដាលដល់ផ្ទះប្រជាពលរដ្ឋផ្សេងទៀតឡើយ៕
ខេត្តបន្ទាយមានជ័យ៖រយៈពេល១០ថ្ងៃទៀតអ្នកក្រុងសិរីសោភណ៌ ខេត្តបន្ទាយមានជ័យនិងទទួលបានទឹកប្រើប្រាស់ឡើងវិញ បន្ទាប់ពីក្រសួងធនធានបានទឹកដាក់ម៉ាស៊ីនបូមទឹកធន់ធំចំនួន២៥គ្រឿងដើម្បីរំដោះទឹកពីអាងកំពីងពួយ ខេត្តបាត់ដំបងចំនួន៥លានម៉ែត្រ។
លោក ចាន់ យុត្ថា អ្នកនាំពាក្យអោយក្រសួងធនធានទឹក និងឧត្តុនិយមនៅថ្ងៃទី២៣ ខែមេសា ឆ្នាំ២០១៦បានអោយដឹងថា ដោយសារតម្រូវការទឹកប្រើប្រាស់ប្រចាំថ្ងៃមិនអាចខ្វះបានរបស់ប្រជាពលរដ្ឋក្នុងក្រុងសិរីសោភណ៌ខេត្តបន្ទាយមានជ័យ ក្រសួងជំនាញបានសម្រេចប្រើប្រាស់ជំរើសចុងក្រោយដោយទាញយកទឹកពីអាងកំពីងពួយក្នុងខេត្តបាត់ដំបងផ្ទុយពីច្បាប់ធម្មជាតិបញ្ច្រាស់ពីក្រោមឡើងទៅលើវិញដែលមានកម្ពស់រហូតដល់ទៅ១០ម៉ែត្រក្នុងការជួយសង្គ្រោះបន្ទាន់នេះ។
ការទាញយកទឹកពីក្រោមឡើងទៅលើចំនួន៥លានម៉ែត្រគូបនេះអ្នកបច្ចេកទេសបានប្រើប្រាស់ម៉ាស៊ីនបូមចំនួន២៥គ្រឿង និងទុយោមានមុខកាត់៣តឹកហើយទប់ទំនប់កាត់ព្រែកចំនួន៥ដំណាក់កាលដោយទាញយកទឹកពីមួយដំណាក់កាលម្ដងៗក្នុងចម្ងាយផ្លូវចំនួន២០គីឡូម៉ែត្រគិតចាប់ពីមាត់អាងកំពីងពួយកាត់តាមព្រែកអន្លង់ស្វាយ ប្រឡាយមេអូរដូនពៅ សំណង់តាហែនរហូតដល់ស្ទឹងបវេលឆ្ពោះទៅកាន់ស្ទឹងសិរីសោភ័ណតែម្ដង។
លោក ចាន់ យុត្ថា បានបន្ដថា ការងាររំដោះទឹកនេះត្រូវប្រើប្រាស់រយះពេលពី១សប្ដាហ៍ទៅ១០ថ្ងៃ ដែលសម្រាប់តែផ្គត់ផ្គង់ការប្រើប្រាស់ក្នុងជីវភាពប្រចាំថ្ងៃតែប៉ុណ្ណោះ ផ្ទុយទៅវិញរបបទឹកនេះមិនបានសម្រាប់បំរើការស្រោចស្រពឡើយប្រជាកសិករពិតមានការយោគយល់។ ទំហំទឹកចំនួន៥លានម៉ែត្រគូបគោលដៅសង្គ្រោះបញ្ហាប្រឈមអ្នកខេត្តបន្ទាយមានជ័យនេះដែរជាជំហានទី១គ្រាន់តែជាការដោះស្រាយការខ្វះខាតមួយរយះប៉ុណ្ណោះដើម្បីរងចាំការធ្លាក់ភ្លៀងបន្ថែមទៀត ប៉ុន្ដែបើប្រជាពលរដ្ឋនៅតែប្រឈមខ្លាំងខ្វះខាតទឹកប្រើប្រាស់ទៀតក្រសួងជំនាញនិងអនុវត្តជំហានបន្ដរ។
ទំហំទឹកចំនួន៥លានម៉ែត្រគូបដែលត្រូវបូមចេញពីអាងស្ដុកទឹកកំពីងពួយខាងលើនេះមិនបានប៉ះពាល់ទៅដល់ការស្រោចស្រពស្រូវរដូវប្រាំងរបស់បងប្អូនប្រជាកសិករក្នុងស្រុកបាណន់និងតំបន់ដទៃឡើយព្រោះបរិមាណទឹកក្នុងអាងកំពីងពួយបន្ទាប់ពីបូមរួចនៅសល់ចំនួន៤០លានម៉ែត្រគូបទៀតសម្រាប់ប្រើប្រាស់និងសង្គ្រោះនូវការចាំបាច់ណាមួយ៕ប៉ែន សុផល
ខេត្តមណ្ឌលគិរី៖ឪពុក និងកូន៣នាក់រួមនឹងអ្នកភូមិជនជាតិភាគតិចម្នាក់ត្រូវបានចាប់បញ្ជូនទៅតុលាការខេត្តមណ្ឌលគិរីរឿងបាញ់សម្លាប់ និងដឹកជញ្ជូនសាច់សត្វទន្សោងទម្ងន់ជាង១០០គីឡូក្រាមមួយក្បាលកាលពីម្សិលមិញ។
ប្រធានព្រៃការពារ មណ្ឌលគិរី លោក ឡុង ប៊ុង បានឲ្យដឹងថា កម្លាំងល្បាតព្រៃការពារមណ្ឌលគិរីបានស្ទាក់ចាប់បានអ្នកភូមិជនជាតិភាគតិចព្នង៤នាក់នៅពេលដែលពួកគេកំពុងតែដឹកសាច់សត្វទន្សោងទម្ងន់ ១៤៥ គីឡូក្រាមមួយក្បាលតាមម៉ូតូបីគ្រឿងក្នុងតំបន់ព្រៃការពារស្ថិតក្នុងភូមិស្រែហ៊ុយ ឃុំស្រែហ៊ុយ ស្រុកកោះញែកកាលពីវេលាម៉ោងជាងពាក់កណ្តាលអធ្រាត្រឈានចូលថ្ងៃសៅរ៍។
លោក ប៊ុង បញ្ជាក់ថា៖ កម្លាំងល្បាតបានចាប់ពួកគេពេលកំពុងដឹកសាច់សត្វទន្សោងឈ្មោលច្រកបាវចេញពីព្រៃនៅពេលយប់។ យើងចោទប្រកាន់ពួកគេពាក់ព័ន្ធនឹងការសម្លាប់សត្វទន្សោងមួយក្បាលដែលជាប្រភេទមានដោយកម្រហើយបានបញ្ជូនទៅតុលាការហើយ។
មនុស្សទាំងបួននាក់នោះរួមមានឪពុកឈ្មោះ ធីន ក្រាក់ អាយុ ៥៨ ឆ្នាំកូនប្រុសគាត់ពីរនាក់ឈ្មោះ ក្រាក់ សុខាង អាយុ ២៧ ឆ្នាំ និងឈ្មោះ ក្រាក់ ឡេវ អាយុ ១៩ ឆ្នាំហើយអ្នកភូមិម្នាក់ផ្សេងទៀតឈ្មោះ ញ៉ន ម៉ៅ អាយុ ២៥ ឆ្នាំ។
លោក ឡុង ប៊ុង បន្តថា ពួកជនសង្ស័យបានសារភាពថាពួកគេបានឃើញសត្វទន្សោងនោះត្រូវរបួសហើយបាននាំគ្នាចាក់សម្លាប់នឹងកាំបិតហើយបានពន្លះសាច់ដឹកតាមម៉ូតូយកទៅក្នុងភូមិដើម្បីចែកគ្នាបរិភោគ។ប៉ុន្តែ មិនមែនយកទៅធ្វើការជួញដូរនោះទេ។ លោកថាបន្ទាប់ពីរឹបអូសសាច់សត្វទន្សោងនោះត្រូវបានដុតកម្ទេចចោលដោយមានការឯកភាពពីព្រះរាជអាជ្ញាសាលាដំបូងខេត្តរីឯក្បាលរបស់វាត្រូវបានរក្សាទុកនៅហ្នឹងទីស្នាក់ការព្រៃការពារមណ្ឌលគិរី។
កាលពីខែមីនាកន្លងមកសត្វខ្ទីងមួយក្បាលក៏ត្រូវបានក្រុមទាហាន ៤ នាក់ និងអ្នកភូមិម្នាក់បាញ់សម្លាប់យកសាច់នៅឃុំស្រែហ៊ុយ ស្រុកកោះញែក ដដែលនោះផងដែរ។
លោក ឡុង ប៊ុង បានឲ្យដឹងថា សំណុំរឿងសត្វខ្ទីងនោះត្រូវបានបញ្ជូនទៅតុលាការហើយនៅពេលនេះជនសង្ស័យ និងសាក្សីកំពុងតែត្រូវបានហៅទៅបំភ្លឺជាបន្តបន្ទាប់។
ករណីដាច់ដោយឡែកមួយទៀតកម្លាំងអាជ្ញាធរមានសមត្ថកិច្ចបានចាប់ឃាត់ខ្លួនយុវជនពីរនាក់កាលពីថ្ងៃសុក្របន្ទាប់ពីពួកគេបានវ៉ៃសម្លាប់សត្វឈ្លូសមួយក្បាលនៅក្នុងតំបន់អភិរក្សអង្គខេត្តសៀមរាបនៅជិតកំពែងខាងកើតប្រាសាទបាយ័នក្នុងភូមិគោកដួង សង្កាត់គោកចក ក្រុងសៀមរាប។
លោក ម៉ាន់ ឈឿន អនុប្រធាននាយកដ្ឋាននគរបាលការពារបេតិកភណ្ឌខេត្តសៀមរាបបានឲ្យដឹងថាសត្វឈ្លូសញី និងឈ្មោលពីរក្បាលបានរត់ចូលក្នុងភូមិដើម្បីរកទឹកផឹកហើយត្រូវអ្នកភូមិប្រទះឃើញក៏ដេញវ៉ៃងាប់ឈ្លូសមេមួយក្បាលនោះ។ រីឯឈ្លូលឈ្មោលត្រូវក្រុមអភិរក្សសង្គ្រោះពីអ្នកភូមិទាន់ពេលវេលាហើយយកទៅលែងទៅក្នុងព្រៃធម្មជាតិវិញ។
លោកបញ្ជាក់ថា៖ «រដូវនេះវាក្តៅខ្លាំងហើយរីងទឹកតាមថ្លុកត្រពាំងអូរអស់ទៅអ៊ីចឹងហើយវាចេញពីព្រៃមករកទឹកផឹក។ វាក៏ប៉ះនឹងកូនក្មេងនាំគ្នាដេញចាប់បានទាំងពីរក្បាលហើយវ៉ៃងាប់អស់មួយទៅ។ សមត្ថកិច្ចឃើញទាន់ក៏យកបានមួយមកវិញ។ កុំអីគេសម្លាប់ទាំងពីរហ្នឹងហើយ»។
ទោះបីយ៉ាងណាលោក ភួង លីណា ប្រធានមន្ទីរបរិស្ថានខេត្តសៀមរាបបានឲ្យដឹងកាលពីម្សិលមិញថាអាជ្ញាធរមានសមត្ថកិច្ចគ្រាន់តែបានធ្វើការអប់រំយុវជនទាំងពីរនាក់នោះហើយបានដោះលែងទៅវិញបន្ទាប់ពីព្រមបង់ប្រាក់ផាកពិន័យមួយចំនួន។
លោកថា យុវជនទាំងពីរនាក់ដែលមានអាយុប្រមាណ ១៥ ឬ ១៦ ឆ្នាំនោះបានចុះចាប់សត្វឈ្លូសនោះបន្ទាប់ពីត្រូវសត្វឆ្កែក្នុងភូមិដេញសត្វនោះធ្លាក់ទឹកទន្លេ។
បើតាមព័ត៌មានចុងក្រោយកាលពីព្រលប់ម្សិលមិញជនជាប់ចោទ ៣ នាក់ត្រូវតុលាការសម្រេចឃុំខ្លួនលើកលែងតែជនជាប់ចោទឈ្មោះ ធីន ក្រាក់ ម្នាក់ប៉ុណ្ណោះត្រូវបានតុលាការឲ្យស្ថិតនៅក្រៅឃុំបណ្តោះអាសន្នដោយសារតែគាត់មានវ័យចំណាស់តែតម្រូវឲ្យតម្កល់ប្រាក់ ១០ លានរៀល។ នេះបើយោងតាមការឲ្យដឹងពីលោក ឡុង ប៊ុង៕
