ខេត្តបន្ទាយមានជ័យ ៖ លោកវរសេនីយទោ អ៊ុន ចាន់ មេបញ្ជាការរងកងល្បាតយោធាការពារព្រំដែនលេខ៥០៣ កំពុងមានការិៈគន់ពីសំណាក់កូនទាហានរបស់ខ្លួន ថា បានបើកដៃឲ្យស្ត្រីជនជាតិថៃម្នាក់ឈ្មោះ ម៉ែ ឡាត់ យកទំនិញគ្រប់ប្រភេទពីប្រទេសថៃ មកដាក់ស្តុកក្នុងឃ្លាំងមួយនៅជាប់ច្រករបៀងណងចាន់ ឋិតក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលជាឃ្លាំងឯកជន។ទំនិញទាំងនេះសម្រាប់ចែកចាយបន្តជាងដប់ឆ្នាំមកហើយឲ្យពលរដ្ឋខ្មែរតាមបន្ទាត់ព្រំដែន ក៏ដូចជានៅតាមទីផ្សារនៅក្នុងខេត្តបន្ទាយមានជ័យ យកទៅលក់ ដោយអនុវត្តផ្ទុយពីថ្នាក់ដឹកនាំខេត្ត និងប្រមុខរាជរដ្ឋាភិបាលដែលបានដាក់មកឲ្យមន្ត្រីថ្នាក់ក្រោមជាតិអនុវត្តន៍រួមទាំងស្ថាប័នប្រដាប់អាវុធគរប់ប្រភេទ ដើម្បីទប់ស្កាត់ឲ្យបានរាល់បទល្មើស់ឆ្លងដែន តាមច្រករបៀងនានានៅព្រំដែនខ្មែរ-ថៃ ពិសេសដើម្បីពង្រឹងសន្តិសុខ ទប់ស្កាត់ ទំនិញគេចពន្ធ គ្រឿងញៀន អាភៀន ការរត់ពន្ធមនុស្ស បទល្មើសផ្សេងៗ តាមខ្សែបន្ទាត់ព្រំដែនប្រកបដោយប្រសិទ្ធភាព។ក៏ប៉ុន្តែជាក់ស្ដែងបច្ចុប្បន្នច្រករបៀង ណងចាន់ ក្នុងភូមិជោគជ័យឃុំអូរបីជាន់ ស្រុកអូរជ្រៅដែលគ្រប់គ្រងដោយលោក អ៊ុន ចាន់ មេបញ្ជាការរងយោធាការពារព្រំដែនលេខ៥០៣ យោធភូមិភាគទី៥ នៅតែបន្ត ដំណើរការយ៉ាងរលូនឲ្យជនជាតិថៃ យកទំនិញមកស្តុកក្នុងឃ្លាំងដើម្បីចែកចាយដល់ឈ្មួញតូចធំ
ធ្វើឲ្យបាត់បង់ថវិកាជាតិតាមរយៈមិនបង់ពន្ធចូលរដ្ឋ។

ប្រភពច្បាស់ការពីពលទាហាន ជាកូនចៅរបស់លោក អ៊ុន ចាន់ ដោយសុំមិនបញ្ចេញឈ្មោះបានប្រាប់ថាច្រករបៀងមួយនេះមាននាំចូលមកដូចជាម៉ូតូគេចពន្ធ សាច់មាន់ខូចគុណ
ភាព គ្រឿងក្នុងជ្រូកជាដើម។ មុខទំនិញទាំងនោះគ្មានការត្រួតពិនិត្យពីមន្រ្តីជំនាញនោះទេ ដែលអាចប្រឈមទៅនឹងគ្រោះថ្នាក់បញ្ហាសុខភាពដល់ប្រជាពលរដ្ឋជាអ្នកទិញទៅបរិភោគ ដោយថាការនាំចេញទំនិញមកនេះឈ្មួញបានបង់លុយឲ្យស្ថាប័នគយ នគរបាលសេដ្ឋកិច្ចខេត្តនៅប្រចាំច្រកខាងលើរួចហើយ តែគ្មានវិក្កយបត្រ័នោះទេគ្រាន់តែបង់ប្រាក់តាមការព្រមព្រៀងរួច អាចចេញចូលទៅបានយ៉ាងរលូន។

ទោះយ៉ាងណា មន្រ្តីផ្នែកច្បាប់បានពន្យល់ថា ការបង់ពន្ធចូលរដ្ឋតាមរយៈគយ ឬនគរបាលសេដ្ឋ្ឋកិច្ចគ្មានវិក្កយប័ត្រ គឺជាអំពើពុករលួយរបស់មន្រ្តី ។

ពួកគាត់លើកឡើងថា ៖ ច្រករបៀងខាងលើដែលគ្រប់គ្រងដោយ លោក អ៊ុន ចាន់ មេបញ្ជាការរងកងល្បាតការពារព្រំដែន៥០៣យោធភូមិភាគទី ៥ ត្រូវ សម្តេចក្រឡាហោម ស ខេងបញ្ជាឲ្យបិទច្រករបៀងនេះរួចទៅហើយ ដោយយល់ឃើញថា ធ្វើឲ្យខាតបង់ថវិកាជាតិដោយមានទំនិញគេចពន្ធរាប់រយមុខចេញចូលតាមច្រករបៀងមួយនេះ និងអាចនាំឲ្យមានការលួចបន្លំចរាចរណ៍នូវគ្រឿងញៀនផងែរ។ ប៉ុន្តែនៅច្រករបៀងនេះ នៅតែដំណើរការរហូតដល់បច្ចុប្បន្នដែលគេសង្ស័យថា មានការត្រូវគ្នាជាមួយអាជ្ញាធរ មន្ត្រីជំនាញក្នុងមូលដ្ឋានទើបបើកឲ្យទំនិញនាំចូលមិនបានបង់ពន្ធដល់សព្វថ្ងៃនេះ។

លោក អ៊ុន ចាន់ មេបញ្ជាការរងអង្គភាពខាងលើអ្នកសារព័ត៌មានយើងបានទំនាក់ទំនងតាមទូរស័ព្ទកាលពីរសៀលថ្ងៃទី២៧ ខែឧសភា នេះ ដើម្បីសុំការបញ្ជាក់បញ្ហានាំទំនិញរបស់ស្ត្រីជនជាតិថៃម្នាក់ឈ្មោះ ម៉ែ ឡាត់ ដែលយកទំនិញមកស្តុកក្នុងឃ្លាំងដែលគ្រប់គ្រងដោយលោកផ្ទាល់នៅក្បែរច្រករបៀងខាងលើនោះ ហើយលោកប្រាប់ថា ជាប់ទៅរៀននៅភ្នំពេញ តែពេលសាកសួរកូនចៅរបស់លោកដែលប្រចាំការនៅទីនោះ បានប្រាប់ថាលោក អ៊ុន ចាន់ គាត់នៅកន្លែងច្រករបៀងខាងលើនោះ លោកមិនទៅភ្នំពេញស្អីនោះឡើយ។

ទាក់ទិនករណីខាងលើនេះ លោក ឃួន ជឿន មេបញ្ជាការកងល្បាតការពារព្រំដែន៥០៣យោធ ភូមិ ភាគទី ៥ បានប្រាប់ភ្នាក់ងារកាសែតនគរវត្តកាលពីរសៀលថ្ងៃទី២៨ ខែឧសភានេះថា រឿងឃ្លាំងផ្ទុកទំនិញខុសច្បាប់នេះមិនពាក់ព័ន្ធនឹងអង្គភាពរបស់លោកទេ។លោកបានដេញឲ្យសួរលោក អ៊ុន ចាន់ ជាមេបញ្ជាការរងរបស់លោកដែលពាក់ព័ន្ធគ្រប់គ្រងឃ្លាំងឯកជនមួយនេះ ព្រោះមិនមែនជាឃ្លាំងស្ថិតក្រោមការគ្រប់គ្រងរបស់អង្គភាពនោះទេ៕

ភ្នំពេញ ៖ ក្នុងខែឧសភា ឆ្នាំ ២០២០នេះដែលធ្វើអោយពលរដ្ឋជ្រួលច្របល់ និងល្បីតៗគ្នាតាមបណ្ដាញសង្គម ដោយសារតែការទទួលព័ត៌មានមិនគ្រប់ជ្រុងជ្រោយ ។

រឿងទី១ គេកត់សម្គាល់ឃើញថា នៅខែឧសភា ឆ្នាំ ២០២០ គឺជាពេលវេលា ដែលសមត្ថកិច្ចចរាចរណ៍ ចាប់ផ្ដើមរឹតបន្តឹងច្បាប់ចរាចរណ៍ថ្មី ហើយកាលនោះ ប្រជាពលរដ្ឋបានសម្រុកនាំគ្នាទៅធ្វើឆៀករថយន្ត និងទៅធ្វើ ឬប្តូរបណ្ណបើកបរថ្មី ដើម្បីគេចពីការផាកពិន័យរបស់សមត្ថកិច្ចចរាចរណ៍ដែលចាំផាកនៅតាមដងផ្លូវសំខាន់ៗ ។ ការផាកពិន័យនេះ ត្រូវបានមើលឃើញថាមានទឹកប្រាក់ច្រើនលើសលប់ ហើយមន្ត្រីជាន់ខ្ពស់ផ្នែកចរាចរណ៍នេះ ក៏បានអះអាងថា ការធ្វើបែបនេះមិនមែនចង់បានលុយពីពលរដ្ឋទេ គឺចង់អោយពលរដ្ឋគោរពច្បាប់ចរាចរណ៍តែប៉ុណ្ណោះ ។

រឿងរ៉ាវទី២ ដែលជាការកត់សម្គាល់ដែរនោះ និងបង្កចលាចលដល់ពលរដ្ឋ គឺពាក់ព័ន្ធនឹងទៅក្រដាសប្រាក់១ដុល្លារ២ដុល្លារ និង៥ដុល្លារ ដោយធនាគារជាតិនៃកម្ពុជា គ្រាន់តែប្រកាសអញ្ជើញតំណាងធនាគារពាណិជ្ជនិងគ្រឹះស្ថានមីក្រូហិរញ្ញវត្ថុនានាមកប្រជុំស្ដីពីការផ្អាកទទួកយកក្រដាសប្រាក់ដុល្លារទាំងបីប្រភេទ ធ្វើអោយបណ្ដាសារព័ត៌មានមួយចំនួនយកចុះផ្សាយដោយនិយាយថាធនាគារជាតិប្រកាសផ្អាកយកប្រាក់ ១ដុល្លារ ២ដុល្លារ និង៥ដុល្លារ ហើយក៏បានធ្វើអោយប្រជាពលរដ្ឋអាជីវករតាមផ្សារនានា បដិសេធក្នុងការទទួលយកប្រកាសប្រាក់ដុល្លារទាំងបីប្រភេទនោះ បើទោះបីជាធនាគារជាតិ និងប្រមុខរាជរដ្ឋាភិបាលចេញប្រកាសថា ក្រដាសប្រាក់ដុល្លារទាំងបីប្រភេទនៅតែអាចចាយវាយធម្មតាក្ដី៕

ភ្នំពេញ ៖ លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យ នៃអគ្គស្នងការដ្ឋាននគរបាលជាតិបានឲ្យដឹងថា រយៈពេល២៩ថ្ងៃ នៃការរឹតបន្ដឹងច្បាប់ចរាចរណ៍ផ្លូវគោក ដោយបង្កើនប្រាក់ពិន័យ តាមអនុក្រឹត្យលេខ៣៩ ពោលគឺថ្ងៃទី០១-២៩ ខែឧសភា ឆ្នាំ២០២១នេះ នគរបាលចរាចរណ៍ទូទាំងប្រទេស បានត្រួតពិនិត្យ និងផាកពិន័យយានយន្ត ៤២៣៧៦គ្រឿង ក្នុងនោះម៉ូតូ ៣០៩២០គ្រឿង និងរថយន្តគ្រប់ប្រភេទ ១១៤៥៦គ្រឿង។

បើតាមលោកឧត្តមសេនីយ៍ឯកបានបញ្ជាក់ថា សម្រាប់ថ្ងៃទី២៩ ខែឧសភា ឆ្នាំ២០២០នេះ មានករណីគ្រោះថ្នាក់ចរាចរណ៍ចំនួន ៨លើក ស្លាប់៥នាក់ របួស១៨នាក់ (របួសធ្ងន់១១នាក់)។ សម្រាប់ថ្ងៃទី២៩ ខែឧសភា ឆ្នាំ២០២០នេះដែរ មានយានយន្ត ១៤៨០គ្រឿង ត្រូវបានត្រួតពិនិត្យ និងផាកពិន័យ។ ក្នុងនោះ ម៉ូតូមាន ១០៦៩គ្រឿង ខណៈរថយន្តមានចំនួន ៤១១គ្រឿង។

បទល្មើសកត់សម្គាល់សម្រាប់ម៉ូតូ គឺអត់មួក ល្មើសសញ្ញា គ្មានស្លាកលេខ ដឹកលើសទម្ងន់ និងប្រើប្រាស់ទូរស័ព្ទដៃ ដោយឡែកបទល្មើសកត់សម្គាល់ សម្រាប់រថយន្ត គឺលើសល្បឿន អត់ខ្សែក្រវាត់ ល្មើសសញ្ញា លើសទម្ងន់ ប្រើប្រាស់ទូរស័ព្ទ អត់ស្លាកលេខ និងស្រវឹង។

ឧត្តមសេនីយ៍ឯក ឆាយ គឹមខឿន បានបន្តថា រយៈពេល ២៩ថ្ងៃនេះ ការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើស បានដំណើរការទៅយ៉ាងល្អប្រសើរ។

លោកបានថ្លែងអំណរគុណ និងកោតសរសើរដល់ជនរួមជាតិ ជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើរ រយៈពេលកន្លងមកនេះ ជាពិសេសកោតសរសើរ និងអរគុណ ដល់នគរបាលចរាចរណ៍ ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ ប្រកបដោយស្មារតីទទួលខុសត្រូវខ្ពស់បំផុត៕

ភ្នំពេញ ៖ នាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិបានថ្លែងឲ្យដឹងនៅថ្ងៃទី៣០ ខែឧសភា ឆ្នាំ២០២០នេះថា នៅថ្ងៃទី២៩ ខែឧសភា ឆ្នាំ២០២០ ម្សិលមិញនេះ មានកងកម្លាំងមួក ខៀវកម្ពុជាម្នាក់ បានស្លាប់នៅក្នុងមន្ទីរពេទ្យប្រទេសម៉ាលី ដោយសារតែឆ្លងជំងឺកូវីដ១៩។

បើតាមលោកនាយឧត្តមសេនីយ៍ អ្នកនាំពាក្យក្រសួងការពារជាតិបានបញ្ជាក់ថា ទាហានកម្ពុជាម្នាក់ដែលបានបាត់បង់ជីវិត នៅប្រទេសម៉ាលីនេះមានឈ្មោះ ស សាវី មានឋានន្តរស័ក្តិថ្នាក់ ឧត្តមសេនីយ៍ទោ ដែលបានទៅបំពេញបេសកកម្មមនុស្សធម៌ ក្រោមស្លាកអង្គការសហប្រជាជាតិ។ លោកបានសម្តែងការសោកស្តាយ និងចូលរួមរំលែកទុក្ខដ៏ក្រៀមក្រំចំពោះក្រុមគ្រួសារ របស់យុទ្ធជនដែលបានពលីនៅប្រទេសម៉ាលីនេះផងដែរ។

សូមបញ្ជាក់ថា កាលពីពេលថ្មីៗនេះ មានកងកម្លាំងយោធាមួកខៀវកម្ពុជា ៣នាក់ ដែលបំពេញបេសកកម្ម នៅប្រទេសម៉ាលី បានឆ្លងជំងឺកូវីដ១៩ ក្នុងនោះមាន២នាក់ជាសះស្បើយឡើងវិញ។ បច្ចុប្បន្ននេះកងកម្លាំងមួកខៀវរបស់កម្ពុជា ចំនួន៥ កងកម្លាំងធំៗ សរុបជិត ៨០០នាក់ ក្នុងនោះនារីជិត ៨០នាក់ បាននឹងកំពុងបំពេញបេសកកម្មរក្សាសន្តិភាពក្រោមឆ័ត្ររបស់អង្គការសហប្រជាជាតិ នៅតាមបណ្តាប្រទេសចំនួន៤រួមមាន៖ លីបង់, ស៊ូដង់ខាងត្បូង, ម៉ាលី និងសាធារណរដ្ឋអាហ្វ្រិកកណ្តាល៕

ភ្នំពេញ ៖ ក្រសួងសុខាភិបាល នៅថ្ងៃទី៣០ ខែឧសភា ឆ្នាំ២០២០នេះ បានប្រកាសថា ខ្លួនបានរកឃើញមេរោគកូវីដ១៩ លើបុរសជនជាតិខ្មែរម្នាក់ទៀត ដែលទើបត្រឡប់មកពីចូលរួមសិក្សាសាសនានៅប្រទេសថៃ ខណៈដែលថ្ងៃនេះដែរ មានអ្នកជំងឺកូវីដ១៩ ម្នាក់បានជាសះស្បើយថែមទៀត។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល។

បើតាមក្រសួងសុខាភិបាល, ករណីវិជ្ជមានថ្មីនេះ ត្រូវបានរកឃើញនៅលើខ្លួនបុរសជនជាតិខ្មែរអាយុ ២៦ឆ្នាំ រស់នៅភូមិរកាពរ៥ ឃុំរកាពរ៥ ស្រុកត្បូងឃ្មុំ ខេត្តត្បូងឃ្មុំ ដែលបានទៅចូលរួមសិក្សាសាសនាមួយនៅសាលាមួយនៃខេត្តយ៉ាឡាក្នុងប្រទេសថៃ ហើយបានវិលត្រឡប់មកពីប្រទេសថៃវិញ ដោយបានធ្វើដំណើរតាមរថយន្តទេសចរណ៍១២កៅអី (មានតែក្រុមគាត់ ១០នាក់ និងអ្នកបើកបរ) រហូតមកដល់ច្រកចូលអូរបីជាន់ រួចបានឆ្លងចូលមកកម្ពុជា នៅថ្ងៃទី២៨ ខែឧសភា ឆ្នាំ២០២០។ បុរសរូបនេះ ត្រូវបានក្រុមគ្រូពេទ្យយកវត្ថុសំណាក របស់គាត់ទៅវិភាគនៅវិទ្យាស្ថានប៉ាស្ទ័រកម្ពុជា ដោយទទួលបានលទ្ធផលវិជ្ជមានវីរុសកូវីដ-១៩ នៅថ្ងៃទី២៩ ខែឧសភា ឆ្នាំ២០២០។ បច្ចុប្បន្ន បុរសខាងលើរូបនេះ ត្រូវបានបញ្ជូនទៅសម្រាក ព្យាបាល នៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបុរី ខេត្តបន្ទាយមានជ័យ នៅថ្ងៃដដែល នេះរួចហើយដែរ។ ចំណែកបុរស ០៨នាក់ផ្សេងទៀត មានតេស្តអវិជ្ជមាន កំពុងដាក់បន្តធ្វើចត្តាឡីស័ក ចំនួន ១៤ថ្ងៃ នៅមណ្ឌលធ្វើចត្តាឡីស័ករបស់ខេត្ត។ រីឯបុរសម្នាក់ទៀត កំពុងរង់ចាំយកវត្ថុ សំណាកទៅធ្វើការវិភាគនៅវិទ្យាស្ថានប៉ាស្ទ័របញ្ជាក់ឡើងវិញ ហើយរូបគាត់ត្រូវបានដាក់ឱ្យនៅ តាមដាននៅក្នុងមន្ទីរពេទ្យខេត្តបន្ទាយមានជ័យនាពេលបច្ចុប្បន្ននេះ។

ដោយឡែក ករណីជាសះស្បើយវិញ គឺស្ត្រីជនជាតិខ្មែរ អាយុ ៣៩ឆ្នាំ មានទីលំនៅនៅសង្កាត់ទឹកថ្លា រាជធានីភ្នំពេញ ដែលបានវិលត្រឡប់ មកពីសហរដ្ឋអាមេរិក។ រូបគាត់ទទួលបានលទ្ធផលតេស្តអវិជ្ជមានចំនួន ០២លើក ហើយត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត នៅថ្ងៃទី២៩ ខែឧសភា ឆ្នាំ២០២០ រួចហើយ។

សូមបញ្ជាក់ថា រហូតមកដល់ពេលនេះ កម្ពុជាបានរកឃើញករណីកូវីដ១៩ ចំនួន១២៥ករណីហើយ ដែលក្នុងនោះ១២៣នាក់ ត្រូវបានព្យាបាលជាសះស្បើយ និង២នាក់ (បូកទាំងករណីថ្មីនេះ) កំពុងសម្រាកព្យាបាលនៅមន្ទីរពេទ្យ៕

ភ្នំពេញ ៖ ដោយទទួលបានការណែនាំពីលោក ផាន អូន អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប) នៅយប់រំលងអធ្រាត្រ ឈានចូលថ្ងៃសុក្រ ៨កើត ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៩ ខែឧសភា ឆ្នាំ២០២០ មន្រ្តីនៃអគ្គនាយកដ្ឋាន ក.ប.ប. ដោយមានកិច្ចសហការពីមន្រ្តីនាយកដ្ឋាននគរបាលប្រឆាំងបទល្មើសសេដ្ឋកិច្ច និងមានការសម្របសម្រួលពីលោកព្រះរាជអាជ្ញាអមសាលាដំបូងរាជធានីភ្នំពេញ បានស្ទាក់ឃាត់រថយន្តដឹកគ្រឿងសមុទ្រចំនួន ០៣ គ្រឿង នៅលើផ្លូវជាតិលេខ៤ និងផ្លូវជាតិលេខ៣ ស្ថិតក្នុងភូមិសាស្ត្រខណ្ឌកំបូល និងខណ្ឌដង្កោរាជធានីភ្នំពេញ។

បន្ទាប់ពីបានត្រួតពិនិត្យ មន្ត្រីជំនាញបានរកឃើញបង្គាមានចាក់បញ្ចូលសារធាតុស្រដៀងចាហួយ ចំនួន ៤៤៩ កេស ស្មើនឹង ១១,២២៥ គីឡូក្រាម។ ដោយមានការឯកភាពពីលោកព្រះរាជអាជ្ញាអមសាលាដំបូងរាជធានីភ្នំពេញ រថយន្ត និងវត្ថុតាងខាងលើ ត្រូវបានបញ្ជូនមកអគ្គនាយកដ្ឋាន ក.ប.ប. ដើម្បីបន្តអនុវត្តតាមនីតិវិធី។

អគ្គនាយកដ្ឋាន ក.ប.ប. នឹងបន្តស្រាវជ្រាវ ស៊ើបអង្កេត និងអនុវត្តតួនាទីភារកិច្ចដែលច្បាប់បានផ្តល់អាណត្តិ ដើម្បីបង្កើនប្រសិទ្ធភាពនៃកិច្ចការពារអ្នកប្រើប្រាស់ ទាំងផ្នែកសុខុមាលភាព ទាំងផលប្រយោជន៍សេដ្ឋកិច្ចរបស់ប្រជាពលរដ្ឋ។

អគ្គនាយកដ្ឋាន ក.ប.ប. សូមអំពាវនាវដល់បងប្អូនប្រជាពលរដ្ឋ សូមចូលរួមសហការផ្តល់ព័ត៌មានក្នុងករណីមានការសង្ស័យពាក់ព័ន្ធការក្លែងបន្លំគុណភាព សុវត្ថិភាពទំនិញ និងសេវា ដើម្បីអគ្គនាយកដ្ឋានចាត់វិធានការបានទាន់ពេលវេលា៕