ខេត្តព្រះវិហារ ៖ ស្នងការនគរបាលខេត្តព្រះវិហារ បានប្រកាសផ្ទេរភារកិច្ច និងតែងតាំងឋានន្តរសក្ដិថ្មីមន្ត្រី នៃស្នងការនគរបាលចំនួន៤៣៤នាក់ នៅថ្ងៃទី៣០មេសា២០២០នេះ ក្រោមអធិបតីភាព លោកឧត្តមសេនីយ៍ទោ សួស សុខតារា មេបញ្ជាការស្នងការនគរបាលខេត្តព្រះវិហារ។
លោកឧត្តមសេនីយ៍ទោ សួស សុខតារា បានមានប្រសាសន៍ថា ក្នុងនាម លោកជាមេបញ្ជាការ នៃស្នងនរគបាលខេត្តព្រះវិហារ សូមចូលរួមអបអរសាទរ និងកោតសរសើរចំពោះស្នាដៃ ដល់មន្ត្រី នៃ ស្នងការនគរបាលជាតិ ទាំងអស់ ក្នុងការបំពេញតួនាទី បេសកម្មការងាររបស់ខ្លួន ប្រកបដោយស្មារតីទទួលខុសត្រូវខ្ពស់ និងសម្រេចបានជោគជ័យកន្លងមក ។
ក្នុងការប្រកាសតែងតាំងមុខងារ នឹងបំពាក់ឋានន្តរសក្តិថ្មីនាពេលនេះ បានបង្ហាញពីការយកចិត្តទុកដាក់ចំពោះមន្រ្តីដែលបានខិតខំបំពេញតួនាទីភារកិច្ច មិនខ្លាចនឿយហត់ ហ៊ានធ្វើពលីកម្មគ្រប់បែបយ៉ាង ក្នុងការចូលរួមចំណែកការពារសន្តិសុខសង្គម សណ្តាប់ធ្នាប់សាធារណៈ ដើម្បីបម្រើសេចក្តីសុខជូនប្រជាពលរដ្ឋនិងសង្គមជាតិផងដែរ ។
តំណាងមន្ត្រី នៃស្នងការនគរបាល បានឡើងប្ដេជ្ញាចិត្តនឹងសន្យាខិតខំ បំពេញកិច្ចការដោយស្មោះ ដើម្បីបម្រើជាតិមាតុភូមិនិងបម្រើប្រជាពលរដ្ឋនៅក្នុងខេត្តព្រះវិហារទាំងមូលផងដែរ ៕

ខេត្តកំពង់ចាម ៖ លោក ហេង វណ្ណនី អភិបាលរងខេត្តតំណាងលោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តនាព្រឹកថ្ងៃទី៣០  ខែមេសា ឆ្នាំ២០២០នេះ បានអញ្ជើញចូលរួមកិច្ចប្រជុំគណៈកម្មការត្រួតពិនិត្យវាយតម្លៃការរៀបចំតាំងទីលំនៅថ្មីរបស់បងប្អូនប្រជាពលរដ្ឋដែលរងផលប៉ះពាល់ដោយកត្តាធម្មជាតិការបាក់ស្រុតច្រាំងទន្លេ  ក្នុងខេត្តកំពង់ចាម ដោយមានការអញ្ជើញចូលរួមពីសំណាក់មន្ត្រីជំនាញ ថ្នាក់ដឹកនាំ មន្ទីរអង្គភាពពាក់ព័ន្ធ និងរដ្ឋបាលក្រុង-ស្រុកដែលពាក់ព័ន្ធផងដែរ។

លោក ហេង វណ្ណនី អភិបាលរងខេត្តបានឲ្យដឹងថា ពាក់ព័ន្ធនឹងករណីគ្រោះធម្មជាតិសម្រាប់ខេត្តកំពង់ចាមមានក្រុង-ស្រុកចំនួន៦លើ១០ក្រុង-ស្រុក ដែលទទួលរងផលប៉ះពាល់ដោយសារការបាក់ស្រុតច្រាំងទន្លេ ជារៀងរាល់ឆ្នាំដែលក្នុងនោះរួមមាន នៅក្នុងស្រុកស្ទឹងត្រង់មានចំនួន៥ឃុំ ស្រុកកំពង់សៀម  មានចំនួន៦ឃុំ ស្រុកកោះសូទិនមាន៤ឃុំ ក្រុងកំពង់ចាមមាន១សង្កាត់ ស្រុកកងមាសមាន៥ឃុំ និងស្រុកស្រីសន្ធរមាន៥ឃុំផងដែរ។

លោក អភិបាលរងខេត្តបានបញ្ជាក់ថា ពាក់ព័ន្ធនឹងគ្រោះធម្មជាតិនេះដែរ ជាក់ស្តែងក្នុងឆ្នាំ២០១៩ កន្លងទៅ ខេត្តកំពង់ចាម ទទួលរងផលប៉ះពាល់ដោយសារការបាក់ស្រុតច្រាំងទន្លេមានប្រវែងប្រមាណជា២២.១៧៦ម៉ែត្រ និងទទឹងចាប់ពី៥ ទៅ៣០ម៉ែត្រ បណ្តាលឲ្យរុះរើផ្ទះចំនួន១២២ខ្នង ក្នុងនោះផ្ទះចំនួន២១ខ្នង ពុំទាន់បានសាងសង់ឡើងវិញនៅឡើយទេ និងផ្ទះដែលប្រឈមនឹងការរុះរើមានរហូត ចំនួន៥៥៩ខ្នង និងសាលាឃុំ១កន្លែង ហើយក៏មានការប៉ះពាល់ដល់ហេដ្ឋាចរនាសម្ព័ន្ធ និងផ្ទៃដីកសិកម្ម  របស់បងប្អូនប្រជាពលរដ្ឋមួយចំនួនផងដែរ ៕ ដោយ ៖ ប៉ែន សុផល

ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃកម្ពុជា បានអះអាងថា ការចាប់ផ្តើមពង្រឹងការអនុវត្តច្បាប់ចរាចរណ៍នៅថ្ងៃទី០១ ខែឧសភាស្អែកនេះ គឺមិនមែន​ជាវិធានការដើម្បីដាក់បន្ទុកលើប្រជាពលរដ្ឋនៅក្នុងស្ថានភាពលំបាកនៃជំងឺកូវីដ-១៩នោះទេ ប៉ុន្តែ​គឺដើម្បីសេចក្ដីសុខសុវត្ថិភាព សណ្ដាប់ធ្នាប់សាធារណៈ និងសុវត្ថិភាពសង្គម។

ការលើក​ឡើងរបស់សម្តេចក្រឡាហោមនេះគឺធ្វើឡើងក្នុងកិច្ចប្រជុំពិនិត្យសេចក្ដីព្រាង សេចក្ដីណែនាំស្ដីពីតួនាទីភារកិច្ច និងរបៀបរបប​ការងាររបស់រដ្ឋលេខាធិការ អនុរដ្ឋលេខាធិការ និងអគ្គនាយក ឬអង្គភាពប្រហាក់ប្រហែល​ចំណុះ​ក្រសួងមហាផ្ទៃ នៅព្រឹកថ្ងៃទី៣០ ខែមេសា ឆ្នាំ២០២០ នាទីស្ដីការក្រសួងមហាផ្ទៃ បន្ទាប់ពីមានការរិះគន់ពីសំណាក់មជ្ឈដ្ឋានមួយចំនួនដែលបានលើកឡើងពាក់ព័ន្ធនឹងការអនុវត្តអនុក្រឹត្យថ្មីស្ដីពីការផាកពិន័យចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក ដែលមានការបង្កើនកម្រិតទឹកប្រាក់ផាកពិន័យ​ ហើយ ​សមត្ថកិច្ចនឹងចាប់ផ្ដើមអនុវត្តន៍ចាប់ពីថ្ងៃទី០១ ខែឧសភា ឆ្នាំ២០២០ ស្របពេលដែលប្រជា​ពលរដ្ឋ​បាននិងកំពុងប្រឈមនឹងបញ្ហាជីវភាព ខណៈដែលនៃការផ្ទុះឡើងនូវជំងឺកូវីដ-១៩ នៅ លើពិភពលោក ក៏ដូចជានៅកម្ពុជាបច្ចុប្បន្ននេះ។

សម្តេចក្រឡាហោម ស ខេង បានសង្កត់ធ្ងន់ថា វិធានការរឹតបន្តឹងច្បាប់ចរាចរណ៍ផ្លូវគោកនេះ គឺដាក់ចេញដើម្បីឆ្លើយតបនឹងភាពអាសន្ននៃគ្រោះថ្នាក់ចរាចរណ៍ដែលមានកំណើនយ៉ាងគំ ហុកកាលពីឆ្នាំកន្លងទៅ បានបណ្ដាលឱ្យមានអ្នកស្លាប់ របួស ពិការ បង្កឱ្យមានកុមារកំព្រា និងការវិនាសព្រាត់ប្រាស់ក្នុងគ្រួសារ ទាំងនៅក្នុងស្ថានភាពដែលប្រទេសជាតិ បានចាកផុត​ពីភ្លើងសង្គ្រាម មានសន្តិភាព និងការអភិវឌ្ឍទៅហើយនោះ។ សម្ដេចក្រឡាហោមបានគូស​បញ្ជាក់ថា គណៈកម្មាធិការជាតិសុវត្ថិភាពចរាចរណ៍ផ្លូវគោក បានសម្រេចកំណត់យក​ឆ្នាំ​២០២០នេះ ជាឆ្នាំបង្កើនការរឹតបន្តឹងការអនុវត្តច្បាប់ជាងបណ្ដាឆ្នាំណាៗទាំងអស់ ដែល​វិធាន​ការនេះ​មិន​មែនជាការដាក់បន្ទុកលើប្រជាពលរដ្ឋនៅក្នុងស្ថានភាពលំបាកនៃជំងឺកូវីដ-១៩នោះ​ទេ ប៉ុន្តែគឺដើម្បីសេចក្ដីសុខសុវត្ថិភាព សណ្ដាប់ធ្នាប់សាធារណៈ និងសុវត្ថិភាពសង្គម។

សម្ដេច​ក្រឡាហោមបានបន្ដថា សមត្ថកិច្ចនឹងមិនឃាត់ដំណើរបងប្អូនជនរួមជាតិដែល​ធ្វើ​ដំណើរប្រកបដោយការគោរពច្បាប់ ដើម្បីសួរនាំរកឯកសារនោះទេ។ សម្តេចក្រឡាហោម​បានអះអាងថា បងប្អូនអ្នកត្រឹមត្រូវគឺអាចធ្វើដំណើរបានដោយរលូន លើកលែងតែបានធ្វើ​ដំណើរដោយបំពានច្បាប់ ត្រង់ចំណុចណាមួយ ដូចជាមិនពាក់មួកសុវត្ថិភាព ឬបំពាន​ភ្លើង​សញ្ញា ទើបសមត្ថកិច្ចឃាត់មិនឱ្យធ្វើដំណើរ ហើយចាប់ផ្ដើមសួរនាំរកឯកសារ៕

ភ្នំពេញ ៖ នៅព្រឹកថ្ងៃទី៣០ ខែមេសា ឆ្នាំ២០២០នេះ គេសង្កេតឃើញបងប្អូនប្រជាពលរដ្ឋជាច្រើនបានសម្រុកចុះធ្វើឆៀក និងប័ណ្ណបើកបរ ព្រមទាំងធ្វើឯកសារផ្សេងៗដែលពាក់ព័ន្ធក្នុងការបញ្ជាយានយន្តលើដងផ្លូវ មុនថ្ងៃរឹតបន្តឹងច្បាប់ចរាចរណ៍ផ្លូវគោក ដែលនឹងត្រូវបានអនុវត្តពីថ្ងៃទី១ ឧសភា ២០២០ស្អែកនេះ ដើម្បីការពារ នៃការផាកពិន័យទ្វេដងពីសមត្ថកិច្ចចរាចរណ៍ផ្លូវគោក។

ការអនុវត្តន៍ច្បាប់នៃការរឹតបន្តឹងនឹងចាប់ពីថ្ងៃសុក្រ ទី០១ ខែឧសភា ឆ្នាំ២០២០ស្អែកនេះ កម្លាំងនគរបាលចរាចរណ៍ផ្លូវគោក នៅទូទាំងប្រទេស ជាមួយការផាកពិន័យជាទឹកប្រាក់ខ្ពស់ជាងមុន ពោលកម្រិតពិន័យបានកើនឡើងទ្វេដងបើធៀបនឹងការពិន័យចាស់។ ក្នុងន័យនេះគឺច្បាស់ណាស់ថា អ្នកបំពានច្បាប់អាចរអាចំពោះចំនួនទឹកប្រាក់ច្រើន ហើយតាំងចិត្តច្បាស់លាស់ថា នឹងមិនបំពានច្បាប់ទៀតនោះទេ។ ទោះជាអ្នកមានប្រាក់សម្រាប់បង់ការផាកពិន័យនេះក៏ដោយ ក៏វាបានបង្ហាញអំពីកំហុសឆ្គងដ៏ធំ និងគួរឲ្យខ្មាសអៀននៅក្នុងសង្គមផងដែរ។

លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានជូនដំណឹងដល់បងប្អូនប្រជាពលរដ្ឋឲ្យបានជ្រាបថា ៖ ឯកសារដែលត្រូវដាក់តាមខ្លួន ជាប្រចាំនៅពេលបើកបរគឺ៖ ១-ប័ណ្ណបើកបរ (ច្បាប់ដើម) ២-លិខិតអាជីវកម្មចំពោះក្រុមហ៊ុន(ច្បាប់ដើម)។ ចំពោះឯកសារផ្សេងៗទៀត ដូចជាកាតសំគាល់យានយន្ត (កាតគ្រី) អាចធ្វើការថតចម្លង ដោយគ្រាន់តែបញ្ជាក់ពីអាជ្ញាធរដែនដី ដែលពាក់ព័ន្ធ ក្នុងការបញ្ជាយានយន្តលើដងផ្លូវ៕

ភ្នំពេញ ៖ សម្តេច​នាយករដ្ឋមន្រ្តី ហ៊ុន សែន បានបង្ហោះសានៅលើហ្វេសបុកថា ថ្ងៃនេះគឺជាខួប ២១ឆ្នាំ (៣០ មេសា ១៩៩៩ – ៣០ មេសា ២០២០) ដែលកម្ពុជាចូលជាសមាជិកអាស៊ាន។ ចាប់តាំងពីបានក្លាយជាសមាជិកអាស៊ាន នៅថ្ងៃទី៣០ ខែមេសា ១៩៩៩មក កម្ពុជាបានធ្វើការយ៉ាងជិតស្និទ្ធជាមួយសមាជិកដទៃទៀត ក្នុងការកសាងសហគមន៍អាស៊ានមួយ ដែលផ្តោតលើប្រជាជន និងយកប្រជាជនជាស្នូល ក្នុងស្មារតីនៃភាពម្ចាស់ការ និងការទទួលខុសត្រូវរួម។

សម្ដេច ហ៊ុន សែន បាន​បន្ត​ថាជាការពិត អាស៊ានបានក្លាយជាស្នូលមួយនៃនយោបាយការបរទេសរបស់កម្ពុជា ដែលអាចឆ្លុះបញ្ចាំងបានតាមរយៈការផ្សារភ្ជាប់ការអភិវឌ្ឍ ផ្នែកនយោបាយ សង្គម-សេដ្ឋកិច្ចរបស់កម្ពុជា ទៅនឹងសមាហរណកម្មតំបន់ និងកិច្ចសហប្រតិបត្តិការអន្តរជាតិ។ ក្នុងខណៈដែលកម្ពុជា ប្តេជ្ញាសម្រេចនូវចក្ខុវិស័យក្នុងការក្លាយទៅជាប្រទេស មានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍន៍នៅឆ្នាំ២០៥០ កម្ពុជាចាត់ទុកសហគមន៍អាស៊ានជាប្រភពនៃសន្តិភាព សន្តិសុខ និងវិបុលភាពសំរាប់ប្រជាជនខ្មែរ។

សូមបញ្ជាក់ថា បន្ទាប់ពីការស្វះស្វែងតាមនយោបាយការទូតយ៉ាងស្វិតស្វាញ និងទន់ភ្លន់ កម្ពុជាត្រូវបានអាស៊ាន សម្រេចឱ្យចូលជាសមាជិកទី១០ ក្នុងកិច្ចប្រជុំកំពូលរបស់ខ្លួននៅទីក្រុងហាណូយ ប្រទេសវៀតណាម នៅថ្ងៃទី៣០ ខែមេសា ឆ្នាំ១៩៩៩ ហើយការក្លាយទៅជាសមាជិកអាស៊ានកាលពីថ្ងៃទី៣០ ខែមេសា ឆ្នាំ១៩៩៩ ត្រូវបានគេមើលឃើញថា ជាជោគជ័យនៃការទូតមួយរបស់ប្រទេសកម្ពុជា។ ការចូលជាសមាជិកអាស៊ាន ក៏ជាពង្រីកអនុភាព និងបង្កើនតួនាទីរបស់ខ្លួនកាន់តែសកម្មភាពនៅក្នុងតំបន់ផងដែរ។

ភ្នំពេញ ៖ ច្បាប់ស្ដីពី«ការគ្រប់គ្រងប្រទេសជាតិស្ថិតក្នុងភាពអាសន្ន» ត្រូវបានប្រមុខរដ្ឋស្ដីទី និងជាប្រធានព្រឹទ្ធសភាសម្តេច សាយ ឈុំ ចុះហត្ថលេខាដាក់ឲ្យប្រើប្រាស់ជាផ្លូវការហើយ កាលពីថ្ងៃទី២៩ ខែមេសា ម្សិលមិញនេះ។

ការសម្រេចដាក់ឲ្យប្រើប្រាស់ច្បាប់ថ្មីសន្លាងមួយសម្រាប់ប្រទេសកម្ពុជា នេះ បន្ទាប់ពីរដ្ឋសភាបានអនុម័តកាលពីថ្ងៃទី១០ ខែមេសា និងឆ្លងការពិភាក្សា និងសម្រេចដោយព្រឹទ្ធសភា កាលពីថ្ងៃទី១៧ ខែមេសា ព្រមទាំងត្រូវបានក្រុមប្រឹក្សារដ្ឋធម្មនុញ្ញប្រកាសឯកភាពថា សមស្របនឹងរដ្ឋធម្មនុញ្ញផងដែរ។

«ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន» បានបញ្ជាក់ថា ការដាក់ប្រទេសជាតិក្នុងភាពអាសន្ន អាចធ្វើឡើងនៅពេលប្រជាជាតិប្រឈមមុខនឹងគ្រោះថ្នាក់ ជាគ្រោះថ្នាក់ដែលបង្កឡើងដោយសង្គ្រាម ឬការឈ្លានពានពីកម្លាំងបរទេស គ្រោះអាសន្នបន្ទាន់ចំពោះសុខភាពសាធារណៈបណ្តាលមកពីការឆ្លងរាលដាលនៃជំងឺ ភាពវឹកវរធ្ងន់ធ្ងរដល់សន្តិសុខជាតិ និងសណ្តាប់ធ្នាប់សាធារណៈ ព្រមទាំងគ្រោះមហន្តរាយធ្ងន់ធ្ងរ ដែលគំរាមកំហែង ឬអាចបង្កគ្រោះថ្នាក់រីករាលដាលដល់កម្រិតទូទាំងប្រទេស។

សូមជម្រាបថា «ច្បាប់ស្ដីពីការគ្រប់គ្រងប្រទេសជាតិស្ថិតក្នុងភាពអាសន្ន» ដែលមាន ៥ជំពូក និងចែកជា ១២មាត្រា ត្រូវបានកត់សម្គាល់ថា បានរៀបចំឡើងស្របពេលដែលកម្ពុជា រងការរាតត្បាតពីវីរុសកូរ៉ូណា ឬកូវីដ-១៩ និងរៀបចំឡើងផ្អែកតាមមាត្រា២២ថ្មី នៃរដ្ឋធម្មនុញ្ញកម្ពុជា ដែលចែងថា នៅពេលប្រទេសជាតិប្រឈមមុខនឹងគ្រោះថ្នាក់ ព្រះមហាក្សត្រទ្រង់ប្រកាសប្រទានដំណឹងជាសាធារណៈ ដាក់ប្រទេសជាតិស្ថិតក្នុងភាពអាសន្ន ក្រោយពីបានមតិឯកភាពពីនាយករដ្ឋមន្ដ្រី ប្រធានរដ្ឋសភា និងប្រធានព្រឹទ្ធសភា៕

​ដោយ ៖ នូ វី

បន្ទាយមានជ័យ ៖ ពលរដ្ឋកម្ពុជា នៅតែមិនទាន់មានចំណេះដឹងទូលំទូលាយពីការនេសាទនៅឡើយ ទើបធ្វើអោយពួកគេបន្តប្រើឧបករណ៍នេសាទខុសច្បាប់ ដូចជាអួនស្បៃមុង ដែលសុទ្ធតែបំផ្លាញដល់ពពួកត្រីតូចៗ និងអាចធ្វើអោយហិនហោចពូជត្រីផងដែរ ។ ឃើញនូវសកម្មភាពបែបនេះ សមត្ថកិច្ចកងកម្លាំងអាវុធហត្ថក្រុងប៉ោយប៉ែង ខេត្តបន្ទាយមានជ័យ បានចុះបង្រ្កាបនិងដកហូតបាននូវឧបករណ៍ខុសច្បាប់មួយចំនួន ។

នៅក្នុងប្រតិបត្តិការចុះបង្ក្រាបបទល្មើសនេសាទកាលពីថ្ងៃទី២៩ មេសា ២០២០ លោក ឃឿន វីរៈ នាយសង្កាត់រដ្ឋបាលជលផលក្រុងប៉ោយប៉ែត បានឲ្យដឹងថា អួនក្រឡាញឹក និងស្បៃមុង ដែលប្រជាពលរដ្ឋមួយចំនួនបាននេសាទនៅក្នុងទឹកអាងអូរខៃដននេះ ជាបទល្មើសនេសាទខុសច្បាប់ ដែលបំផ្លាញកូនត្រី ។ បើមិនមានការទប់ស្កាត់ទេនោះ ពូជត្រីប្រឈមនិងការបាត់បង់ ហើយការនេសាទនៅឆ្នាំក្រោយៗវានឹងធ្លាក់ចុះជាបន្តបន្ទាប់ ។
លោកបានបន្តថា ក្នុងប្រតិបត្តិការចុះបង្ក្រាបរបស់កម្លាំងចម្រុះ ដកហូតបានអួនស្បៃមុង និងលូស្បៃមុងចំនួន២៥មាត់ អួនស្បៃមុងក្រឡាញឹកប្រវែង៩០០ម៉ែត្រ និងលូស្បៃមុងប្រវែង៣០០ម៉ែត្រ សរុបមានប្រវែង១២០០ម៉ែត្រ ត្រូវបានអូសដាក់លើគោកដុតកម្ទេចចោល ។

លោក ឃឿន វីរៈ បានសំណូមពរឲ្យប្រជាពលរដ្ឋអោយចូលរួមថែរក្សាការពារនូវពូជត្រី តាមរយៈការនេសាទ ជាលក្ខណៈគ្រួសារ មានដូចជា ការបង់សំណាញ់ រាយមង បបក់ ស្ទូច និងមធ្យោបាយរកត្រីមួយចំនួនទៀត ដែលច្បាប់អនុញ្ញាតិ និងមិនធ្វើឲ្យបាត់បង់ពូជត្រី ។

រដ្ឋមន្ត្រី ក្រសួងកសិកម្មរុក្ខាប្រមាញ់និងនេសាទ លោកវេង សាខុន ធ្លាប់បានលើកឡើងថា ការនេសាទ ដោយប្រើឧបករណ៍ខុសច្បាប់ និងនេសាទនៅរដូវត្រីបន្តពូជ (ត្រីពង ) គឺជាសកម្មភាពខុសច្បាប់ ដែលអាចបំផ្លាញដល់ធនធានត្រី និងធ្វើអោយធនធានត្រី របស់កម្ពុជាកាន់តែខ្សត់ខ្សោយទៅៗ ដូច្នេះ ប្រជានេសាទត្រូវយល់ដឹងពីចំណុចនេះ ហើយសូមកុំវាយបំបែកឆ្នាំងបាយខ្លួនឯង ៕

​ភ្នំពេញ ៖ កម្លាំង​ជំនាញ​មន្ទីរ​ប្រឆាំង​គ្រឿងញៀន នៃ​អគ្គស្នងការ​រដ្ឋា​ន​នគរបាលជាតិ នៅ​រសៀល​ម្សិលមិញ​ បាន​បើក​ប្រតិបត្តិ​ការបង្ក្រាប​ករណី​កែច្នៃ ជួញដូរ​សារធាតុ​ញៀន ក្នុង​ខ​ណ្ឌ​ពោធិ៍​សែន​ជ័យ​ដោយបាន ឃាត់ខ្លួន​មេខ្លោង​ជា​ជន​ជាតិចិន​ហុងកុង​ម្នាក់​និង​ស្ត្រី​ជនជាតិ​មី​យ៉ាន់​ម៉ា​ម្នាក់ (សរុប​២​នាក់) រួមទាំង​រឹបអូស​គ្រឿងញៀន​ជិត​៦០​គីឡូក្រាម​។​

​មន្ត្រី​ប្រឆាំង​គ្រឿងញៀន​បាន​ឲ្យ​ដឹងថា ប្រតិបត្តិ​ការបង្ក្រាប​ក​រ​ណី​គ្រឿង​ញៀ​នេះ ធ្វើឡើង នៅ​ចំណុច​ផ្ទះ​គ្មាន​លេខ ភូមិ​ត្រពាំង​ពោធិ៍ សង្កាត់​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ។​

​ចំពោះ​លទ្ធផល​នៃ​ការបង្ក្រាប​ករណី​កែច្នៃ​គ្រឿងញៀន​ដ៏​ធំ​នេះ គឺ​បាន​ឃាត់ខ្លួន​ជនសង្ស័យ​២​នាក់ ទី​១/ ឈ្មោះ LEE KWAN FUK ភេទ​ប្រុស ជនជាតិ​ចិន (​ហុងកុង​) កាន់​លិខិត​ឆ្លង ដែន​លេខ KJ06288571 និង​ទី​២/ ឈ្មោះ THET THET HLAING ភេទ​ស្រី ជនជាតិ​មី​យ៉ាន់​ម៉ា កាន់​លិខិតឆ្លងដែន​លេខ MA 030746​។ រីឯ​វត្ថុតាង​ដែល​ដកហូត​បានរួម​មាន​ ៖ សារធាតុ​ញៀន​អិ​ច​ស្តា​ស៊ី​ប្រមាណ ១៤០,០០០​គ្រាប់ មាន​ទម្ងន់​ជាង​៥៧​គីឡូក្រាម និង​ម៉ាស៊ីន​កែឆ្នៃ​២​គ្រឿង​ទៀត៕

ភ្នំពេញ ៖ នៅថ្ងៃទី៣០ ខែមេសា ឆ្នាំ២០២០នេះ ក្រសួងសុខាភិបាលបានចេញប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១១៩នាក់។

ចំណែកអ្នកកំពុងសម្រាកព្យាបាលជំងឺកូវីដ នៅសល់តែ៣នាក់ប៉ុណ្ណោះ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី៣០ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលទទួលបានមុននេះបន្តិច៕