ភ្នំពេញ ៖ គណៈកម្មាធិការចម្រុះកម្ពុជា-ជប៉ុន ដែលមានលោក សុខ ចិន្តាសោភា រដ្ឋមន្ត្រីប្រតិភូអម នាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា តំណាងខាងភាគីកម្ពុជា និង លោក ម៉ាសាហ៊ីរ៉ូ មីខាមី ឯកអគ្គរដ្ឋទូតជប៉ុនប្រចាំកម្ពុជា តំណាងខាងភាគីជប៉ុន បានដឹកនាំកិច្ចប្រជុំលើកទី១៩ នៃគណៈកម្មាធិការចម្រុះកម្ពុជា-ជប៉ុន ហើយតាមការបញ្ជាក់របស់ក្រុមប្រឹក្សាអភិវឌ្ឍន៍កម្ពុជាថា កិច្ចប្រជុំ ទ្វេភាគីមួយនេះ គឺជាផ្នែកមួយនៃយន្តការដើម្បីថែទាំវិនិយោគ ដែលត្រូវបានរៀបចំឡើងតាំងតែពីឆ្នាំ ២០០៩មកម្ល៉េះ ក្រោមក្របខណ្ឌនៃកិច្ចព្រមព្រៀងរវាងប្រទេសទាំងពីរ ស្តីពីសេរីភាវូបនីយកម្ម ការជំរុញ និងការការពារវិនិយោគ ដែលត្រូវបានចុះហត្ថលេខាដោយប្រមុខរដ្ឋាភិបាលប្រទេសទាំងពីរ កាលពីខែមិថុនា ឆ្នាំ២០០៧។

តាមសេចក្តីថ្លែងរបស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ឆ្លងកាត់កិច្ចប្រជុំចំនួន១៨លើក កន្លងទៅនេះ បញ្ហាប្រឈមមួយចំនួនដែលអ្នកវិិយោគបានលើកឡើង ត្រូវបានភាគីរាជរដ្ឋាភិបាលបាន និងកំពុងផ្តល់ជូននូវដំណោះស្រាយដ៏សមស្របជាបន្តបន្ទាប់ ដែលបានញ៉ាំងឱ្យមានការបណ្តាក់ទុនវិនិ យោគបន្ថែមនៅកម្ពុជាពីមួយឆ្នាំទៅមួយឆ្នាំ។

ដោយឡែកសម្រាប់កិច្ចប្រជុំលើកទី១៩ នៃគណៈកម្មាធិការចម្រុះកម្ពុជា-ជប៉ុន នាពេលនេះត្រូវ ផ្តោតការពិភាក្សាលើចំណុចអាទិភាពមួយចំនួនទាក់ទងទៅនឹងបរិយាកាសវិនិយោគនៅកម្ពុជារួមមាន៖ ១.វឌ្ឍនភាពនៃការត្រៀមបើកច្រកទ្វារអន្តរជាតិស្ទឹងបត់, ២.ពន្ធអប្បបរមា, ៣.ការទូទាត់ប្រាក់បំណាច់ អតីតភាពការងារ និងទី៤.តម្លៃ និងស្ថិរភាពនៃការផ្គត់ផ្គង់អគ្គិសនី។

ឆ្លៀតយកឱកាសនៃកិច្ចប្រជុំនេះ ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានអរគុណចំពោះក្រុមអ្នកវិនិយោគជប៉ុនដែលបានផ្តល់នូវ ទំនុកចិត្តខ្ពស់ចំពោះរាជរដ្ឋាភិបាលកម្ពុជា ហើយជាមួយគ្នានេះ ឯកអគ្គរដ្ឋទូតជប៉ុនប្រចាំកម្ពុជា ឯកឧត្តម ម៉ាសាហ៊ីរ៉ូ មីខាមី ក៏បានសរសើរចំពោះគ្រប់ផ្នែកពាក់ព័ន្ធទាំងអស់របស់កម្ពុជា ដែលបានខិតខំប្រឹងប្រែង ប្រកបដោយស្មារតីទទួលខុសត្រូវខ្ពស់ក្នុងការសម្របសម្រួល និងផ្តល់នូវការឆ្លើយតបជាវិជ្ជមានចំពោះ កង្វល់ និងសំណូមពររបស់អ្នកវិនិយោគជប៉ុន ជាពិសេស អគ្គនាយកដ្ឋានពន្ធដារដែលបានដោះស្រាយ បញ្ហាពន្ធមួយចំនួនធំ។

គួររំព្ញកថា គិតត្រឹមដំណាច់ឆ្នាំ២០១៩ ក្រុមប្រឹក្សាអភិវឌ្ឍន៍កម្ពុជា បានសម្រេចអនុញ្ញាត គម្រោងវិនិយោគជប៉ុនចំនួន ១៤៣គម្រោង ក្នុងទុនវិនិយោគសរុបប្រមាណ ២៧៨៥ លានដុល្លារអាមេ រិក៕

ភ្នំពេញ ៖ សវនាការសំណុំរឿងលោក កឹម សុខា អតីតប្រធាននៃអតីតគណបក្សសង្គ្រោះជាតិ នៅព្រឹកថ្ងៃទី១២ ខែកុម្ភៈ នេះ បានឈានមកដល់ថ្ងៃទី៩ សប្តាហ៍ទី៥ ហើយ ពាក់ព័ន្ធការចោទប្រកាន់អំពីបទ “ក្បត់ជាតិ” ឃុបឃិតជាមួយជនបរទេស ដើម្បីផ្តួលរំលំរាជរដ្ឋាភិបាលកម្ពុជា។

សវនាការនៅថ្ងៃនេះនឹងផ្តោតសំខាន់ទៅលើអង្គហេតុសកម្មភាពរបស់លោក កឹម សុខា នៅចន្លោះឆ្នាំ២០១៣ដល់ឆ្នាំ២០១៧ ពោលគឺក្នុងកំឡុងពេលលោក កឹម សុខា ត្រូវបានសមត្ថកិច្ចឃាត់ខ្លួនទាំងកណ្តាលអាធ្រាត្រ។

ការពិភាក្សានេះ គ្រោងនឹងត្រូវចែកចេញជា៣ដំណាក់កាល ដោយជជែកពីអង្គហេតុនៃការបង្កើតនិងរចនាសម្ព័ន្ធគណបក្សសង្គ្រោះជាតិ អង្គហេតុ ជុំវិញការបោះឆ្នោត ឆ្នាំ២០១៣ និង អង្គហេតុ ក្រោយការបោះឆ្នោត ឆ្នាំ២០១៣ រហូតដល់ការចាប់ខ្លួន លោក កឹម សុខា តែម្តង។

ជាមួយគ្នានេះ គេសង្កេតឃើញថា នៅតាមដងផ្លូវមុខសាលាដំបូងរាជធានីភ្នំពេញ មានកងកម្លាំងចម្រុះបានដាក់ពង្រាយជាធម្មតា ដើម្បីសម្រួលចរាចរណ៍ជូនអ្នកដំណើរ ហើយក្រុមអ្នកសារព័ត៌មាន រួមទាំងអង្គការសង្គមស៊ីវិល សកម្មជនអតីតគណបក្សសង្គ្រោះជាតិ នៅតែបន្តការតាមដានសំណុំរឿងដ៏ក្តៅគគុកនេះ យ៉ាងយកចិត្តទុកដាក់ផងដែរ។

សូមជម្រាបថា សវនាការសំណុំរឿងលោក កឹម សុខា ពាក់ព័ន្ធទោសក្បត់ជាតិ ឃុបឃិតជាមួយបរទេសនេះ ត្រូវបានក្រុមប្រឹក្សាជំនុំជម្រះសម្រចធ្វើរយៈពេល ២ថ្ងៃក្នុងមួយសប្តាហ៍ ពោលគឺរៀងរាល់ថ្ងៃពុធ និងថ្ងៃព្រហស្បតិ៍ ហើយសវនាការនេះ នឹងអាចពន្យារពេលជាច្រើនថ្ងៃបន្តទៀត ដោយសារតែមានអ្នកពាក់ព័ន្ធជាច្រើន ដែលនឹងត្រូវផ្តល់សក្ខីកម្មជូនដល់តុលាការ ៕

ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ បានរៀបចំឡើងនូវសេចក្តីព្រាងផែនការសកម្មភាពសម្រាប់អនុវត្តយុទ្ធ សាស្រ្ត នៃការកែទម្រង់ប្រព័ន្ធលទ្ធកម្មសាធារណៈឆ្នាំ២០១៩-២០២៥ ហើយសេចក្តីព្រាងផែនការសកម្ម ភាពមួយនេះត្រូវបានលើកជារបៀបវារៈសម្រាប់សិក្ខាសាលាកាលពីម្សិលមិញ ដោយមានការចូលរួមពីគ្រប់ ផ្នែកពាក់ព័ន្ធ សរុបចំនួនជិត ៤០០នាក់ ដោយបានពិគ្រោះយោបល់ និងប្រមូលធាតុចូលបន្ថែមទៀត សំដៅធានាឱ្យការរៀបចំសេចក្តីព្រាងផែនការសកម្មភាពសម្រាប់អនុវត្តយុទ្ធសាស្រ្តនៃការកែទម្រង់ប្រព័ន្ធលទ្ធ កម្មសាធារណៈឆ្នាំ២០១៩-២០២៥នេះ មានភាពគ្រប់ជ្រុងជ្រោយអាចដាក់ឱ្យអនុវត្តបានដោយរលូន។
ក្នុងសិក្ខាសាលានេះ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ឯកឧត្តម ហ៊ីវ សុវណ្ណ បានគូស បញ្ជាក់ថា យុទ្ធសាស្ត្រនៃការកែទម្រង់ប្រព័ន្ធលទ្ធកម្មសាធារណៈឆ្នាំ២០១៩-២០២៥ ត្រូវបានអនុម័ត ដោយរាជរដ្ឋាភិបាលកម្ពុជាកាលពីថ្ងៃទី៨ ខែឧសភា ឆ្នាំ២០១៩ និងបានប្រកាសដាក់ឱ្យអនុវត្តរួមគ្នា ជាមួយ យុទ្ធសាស្ត្រចំនួន២ផ្សេងទៀត ដោយការរៀបចំសេចក្ដីព្រាងផែនការសកម្មភាពកែទម្រង់ប្រព័ន្ធលទ្ធកម្មសា ធារណៈឆ្នាំ ២០១៩-២០២៥ គឺផ្អែកទាំងស្រុងលើផែនទីចង្អុលផ្លូវ ដែលបានកំណត់នៅក្នុងយុទ្ធសាស្រ្ត នៃការ កែទម្រង់ប្រព័ន្ធលទ្ធកម្មសាធារណៈឆ្នាំ២០១៩ -២០២៥។
ដោយឡែក ឯកឧត្តមបណ្ឌិត ឈឹម សារ៉េត ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយក ដ្ឋានលទ្ធកម្មសាធារណៈមានអនុសាសន៍ថា ដើម្បីសម្រេចបាននូវគោលបំណង និងទិសដៅយុទ្ធសាស្ត្រនៃ ការកែទម្រង់ប្រព័ន្ធលទ្ធកម្មសាធារណៈឆ្នាំ២០១៩-២០២៥ គឺចាំបាច់តម្រូវឱ្យមានការរៀបចំផែនការសកម្ម ភាពលម្អិតសម្រាប់អនុវត្តយុទ្ធសាស្ត្រនៃការកែទម្រង់ប្រព័ន្ធលទ្ធកម្មសាធារណៈឆ្នាំ២០១៩-២០២៥។ ជាមួយ គ្នានេះ អគ្គនាយកដ្ឋានលទ្ធកម្មសាធារណៈបានរៀបចំសេចក្ដីព្រាងផែនការសកម្មភាពនេះ ដោយផ្អែកទាំងស្រុង លើផែនទីចង្អុលផ្លូវ ដែលបានកំណត់នៅក្នុងយុទ្ធសាស្រ្តនៃការកែទម្រង់ប្រព័ន្ធលទ្ធកម្មសាធារណៈឆ្នាំ២០១៩ -២០២៥ ដោយបំបែកជាសកម្មភាពលម្អិត និងបានកំណត់ច្បាស់ពីក្របខណ្ឌពេលវេលាទៅតាមត្រីមាស នីមួយៗនៃឆ្នាំ ព្រមទាំងបានកំណត់ច្បាស់លាស់ពីអង្គភាព/ស្ថាប័នទទួលខុសត្រូវលើការអនុវត្តសកម្មភាពកែ
ទម្រង់នីមួយៗសម្រាប់អនុវត្តរយៈពេល ៧ឆ្នាំគឺចាប់ពីឆ្នាំ២០១៩ រហូតដល់ឆ្នាំ២០២៥។
សេចក្ដីព្រាងឯកសារផែនការសកម្មភាពនេះ ត្រូវបានរៀបចំចេញជា ៥ផ្នែក រួមមាន៖ ១.ការរៀបចំ និង ការអនុម័តផែនការលទ្ធកម្ម, ២.ការអនុវត្តកិច្ចលទ្ធកម្មសាធារណៈ, ៣.ការត្រួតពិនិត្យ និងវាយតម្លៃលើការអនុវត្តកិច្ចលទ្ធកម្ម, ៤.ការពង្រឹងឯករាជ្យភាពនៃយន្តការដោះស្រាយបណ្តឹងតវ៉ា និង ៥.ហេដ្ឋារចនាសម្ព័ន្ធ ទ្រទ្រង់ដែលរួមមាន៖ ការកែលម្អក្របខ័ណ្ឌគតិយុត្តពាក់ព័ន្ធលទ្ធកម្មសាធារណៈ ការរៀបចំសៀវភៅណែនាំស្តីពីលទ្ធកម្មសាធារណៈ ការសិក្សាអំពីការប្រើប្រាស់លទ្ធកម្មសាធារណៈតាមប្រព័ន្ធអេឡិចត្រូនិច និងការ កសាងសមត្ថភាពជាដើម៕

ភ្នំពេញ ៖ ប្រធាន​អង្គការ​សុខភាព​ពិភពលោក (WHO) លោក Tedros Adhanom Ghebreyesus នៅថ្ងៃ១២​ខែ កុម្ភៈបានថ្លែងអំណរគុណដល់រដ្ឋាភិបាល និងប្រជាជនកម្ពុជាជាពិសេសនាយករដ្ឋមន្ត្រីកម្ពុជាសម្តេច ហ៊ុន សែន ចំពោះការអនុញ្ញាតឲ្យនាវាទេសចរណ៍ Westerdam ចូលសំចតនៅកំពុងផែក្រុងព្រះសីហនុ។ តំណាងអង្គការអន្តរជាតិរូបនេះបានបញ្ជាក់ថា ការចូលរួមរបស់កម្ពុជាជាកាយវិការបង្ហាញពីសាមគ្គីភាព ខណៈពិភពលោកកំពុងជួបវិបត្តិ។ 

តាមបណ្តាញទំនាក់ទំនងសង្គមធ្វីតធឺលោក Tedros ឱ្យដឹងថា “ខ្ញុំសូមថ្លែងអំណរគុណយ៉ាងជ្រាលជ្រៅ បំផុតចំពោះរាជរដ្ឋាភិបាលកម្ពុជា និងសម្តេចតេជោដែលបានអនុញ្ញាតឱ្យមានការចូលចតនៃនាវា Westerdam នៅខេត្តព្រះសីហនុ។ នេះជាការបង្ហាញនូវ ការស្វាគមន៍ ប្រកបដោយ សាមគ្គីភាព ក្នុងគ្រាដែលពិភពលោក កំពុងស្ថិតនៅក្នុងតំណាក់ ដើម្បីបឈ្ឈប់ការ រីករាលដាល មេរោគCOID19”។

សូមជម្រាបថា ការសម្រេចអនុញ្ញាតឲ្យនាវាដឹកអ្នកដំណើររបស់ក្រុមហ៊ុន Holland America Line ធ្វើឡើងបន្ទាប់ពីនាវាដែលដឹកអ្នកដំណើររហូតដល់ ​១៤៥៥​នាក់ និង​អ្នកបម្រើ​ក ៨០២ នាក់នេះត្រូវបានបដិសេធ​​ឲ្យ​ចូល​ចត​ពី​សំណាក់​ប្រទេស ហ្វីលីពីន ថៃ ជប៉ុន កោះ​តៃវ៉ាន់ និងកោះ ហ្គាម ក្រោមហេតុផលភ័យខ្លាចការរាតត្បាតនៃកូរ៉ូណាវីរុស COVID19៕

ភ្នំពេញ ៖ ចាប់តាំងពីឆ្នាំ១៩៩៤ មកដល់ឆ្នាំ២០១៨ រដ្ឋាភិបាលប្រទេសស្វីស បានគាំទ្រដល់មន្ទីរពេទ្យគន្ធបុប្ផា គិតជាថវិកាប្រមាណជា៦០លានដុល្លារអាមេរិក និងបានបន្តគាំទ្រពីឆ្នាំ២០១៩ដល់ឆ្នាំ ២០២១ នូវទឹកប្រាក់ប្រមាណជា ១២លានដុល្លារបន្ថែមទៀត ក្នុងរយៈពេល៣ឆ្នាំ ដើម្បីទ្រទ្រង់ដល់ការព្យាបាលកុមារកម្ពុជា។

ថ្លែងប្រាប់ លោក ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ កាលពីព្រឹកថ្ងៃទី១២ ខែកុម្ភៈ នេះ លោកជំទាវ ការីន សាលីណូ (Carin SALERNO) ឯកអគ្គរដ្ឋទូតថ្មី នៃប្រទេសស្វីសប្រចាំកម្ពុជា ដែលមាននិវេសនដ្ខាន នៅទីក្រុងបាងកក បានឱ្យដឹងថា ក្រៅពីកិច្ចទំនាក់ទំនងការទូត និងកិច្ចសហប្រតិបត្តិការយ៉ាងជិតស្និតលើវិស័យជាច្រើនជាមួយកម្ពុជា រដ្ឋាភិបាលស្វីសបានជួយឧបត្ថម្ភគាំទ្រក្នុងវិស័យសុខាភិបាល ដោយផ្តោតទៅលើការមន្ទីរពេទ្យគន្ធបុប្ផា តាំងពីឆ្នាំ១៩៩៤មកម៉េះ។ នេះបើតាមការបញ្ជាក់របស់ លោក កុយ គួង អនុរដ្ឋលេខាធិការ និងជាអ្នកនាំពាក្សក្រសួងការបរទេស នៅក្រោយជំនួបទ្វេភាគីនេះ។
អ្នកនាំពាក្សបន្តថា រដ្ឋាភិបាលស្វីសបានផ្ដោតសំខាន់ ទៅលើវិស័យ សុខាភិបាលដែលជួយទៅលើសុខភាពកុមារ,សុវត្ថិភាពស្បៀងនិងវិស័យកសិកម្ម ។

ចំពោះវិស័យសុខាភិបាលនៅកម្ពុជា ស្វីសនៅតែបន្តគាំទ្រដល់ថវិកាប្រចាំឆ្នាំចំនួន៤លានហ្វ្រង់ស្វីសស្មើនឹង៤ លានដុល្លារ ក្នុង១ឆ្នាំដល់មន្ទីរពេទ្យគន្ធបុប្ផា បើទោះបីជាបច្ចុប្បន្ននេះ មន្ទីរពេទ្យគន្ធបុប្ផាត្រូវបានគ្រប់គ្រងដោយវេជ្ជបណ្ឌិត ជនជាតិខ្មែរក៏ដោយ។

ក្រៅពីនេះរដ្ឋាភិបាលស្វីស បានផ្ដល់ការបណ្ដុះបណ្ដាលដល់មន្ត្រីកសិកម្ម និងផ្នែកបដិសណ្ឋារកិច្ចទទួលភ្ញៀវទេសចរណ៍ និងផ្ដល់ជំនួយសម្រាប់វិស័យដោះមីន ពីឆ្នាំ 2020-2025 នូវថវិកា 6លានដុល្លាបន្ថែមទៀត តាមផែនការកម្ពុជានឹងបញ្ចប់ការដោះមីននៅឆ្នាំ 2025 ដែលកម្ពុជានឹងគ្មានគ្រាប់មីន។ ជាមួយគ្នានោះ រដ្ឋាភិបាលស្វីស បានផ្ដល់ជំនួយលើអភិបាលកិច្ចល្អ និងវិមជ្ឈការដោយមានកិច្ចសហការជាមួយនឹងក្រសួងមហាផ្ទៃ។

លោកឧបនាយករដ្ឋមន្ត្រី ប្រាក់ សុខុន បានថ្លែងអំណរគុណដល់រដ្ឋាភិបាលស្វីសដែលបានផ្តល់ជំនួយដល់វិស័យបោសសំអាតមីននៅកម្ពុជា និងជំនួយអភិវឌ្ឍន៍ជាច្រើនទៀតនៅកម្ពុជា ព្រមទាំងបានបន្តនឹងជំរុញបង្កើនទំហំពាណិជកម្ម នៃប្រទេសទាំងពីរឲ្យកាន់តែល្អប្រសើរ នៅក្នុងឆ្នាំ២០២០ នេះ តាមរយៈលោកជំទាវឯកអគ្គរដ្ឋទូត និងដឹកនាំអ្នកធុរកិច្ច ជាប្រធានក្រុមហ៊ុនធំៗរបស់ស្វីសមកសិក្សាពីសក្តានុពលវិនិយោគនៅកម្ពុជា និងជំរុញទេសចរណ៍ស្វីស មកកម្ពុជា ដើម្បីឲ្យកម្ពជាបន្តមានកំណើនសេដ្ឋកិច្ច សម្រាប់ជាផលប្រយោជន៍ប្រជាជននិងប្រទេសទាំង២។

គួរបញ្ជាក់ផងដែរថា ក្រៅពីការគាំទ្ររបស់រដ្ឋាភិបាលស្វីស រាជរដ្ឋាភិបាលកម្ពុជា បានផ្ដល់ដល់មន្ទីរពេទ្យគន្ធបុប្ផាក្នុង ១ឆ្នាំ១០លានដុល្លារ កាកបាទក្រហមកម្ពុជា ផ្ដល់ថវិកាដល់មន្ទីរពេទ្យគន្ធបុប្ផា ក្នុងមួយឆ្នាំ១លានដុល្លារ និង មូលនិធិគន្ធបុប្ផា បានរួមចំណែកជាថវិកា ក្នុង១ឆ្នាំប្រមាណ ជា៥លានដុល្លារផងដែរ៕

ភ្នំពេញ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា ក្នុងនាមជាតំណាងឱ្យប្រជាជាតិកម្ពុជា និងលោកជំទាវ លឿកា រ៉ូទ្រីហ្គេស បារីយ៉ូស ឯកអគ្គរដ្ឋទូតថ្មី ប្រទេសគុយបា ក្នុងនាមជាតំណាងឱ្យ ប្រជាជាតិគុយបា បានបង្ហាញអំពីការពេញចិត្តចំពោះទំនាក់ទំនងការទូត និងការជួយគ្នាទៅវិញ ទៅមក នៃប្រជាជាតិទាំងពីរនៅក្នុងគ្រាលំបាក។ ការបង្ហាញពីមនោសញ្ចេតនាទៅវិញទៅមកបែបនេះធ្វើឡើងក្នុង ឱកាសដែលលោកជំទាវទូតគុយបាថ្មីប្រចាំកម្ពុជា អញ្ជើញចូលជួបសម្តែងការគួរសមចំពោះសម្តេចប្រធាន រដ្ឋសភាកម្ពុជា នាវិមានរដ្ឋសភា កាលពីព្រឹកថ្ងៃទី១២ កុម្ភៈនេះ។

ក្នុងជំនួបនេះ សម្តេចអគ្គមហាពញាចក្រី ហេង សំរិន មានប្រសាសន៍ថា កម្ពុជា-គុយបា មានទំនាក់ ទំនង និងកិច្ចសហប្រតិបត្តិការជាមួយគ្នាជាយូរមកហើយ គឺនៅតែប៉ុន្មានខែទៀតប៉ុណ្ណោះគម្រប់៦០ឆ្នាំ នៃចំណងការទូតរវាងប្រទេសទាំងពីរ ដែលចំណងការទូតនេះ ត្រូវបានថ្នាក់ដឹកនាំប្រទេសទាំងពីរបន្ត ថែរក្សា និងលើកកម្ពស់រហូតដល់ពេលបច្ចុប្បន្ន។ សម្តេចប្រធានរដ្ឋសភា បានលើកឡើងថា គុយបា ជា មិត្តដ៏ល្អរបស់កម្ពុជា តែងជួយ និងគាំទ្រគ្នានៅគ្រប់កាលៈទេសៈ។ ជាក់ស្តែង នៅពេលកម្ពុជា ទើបបាន រំដោះចេញពីរបបប្រល័យពូជសាសន៍ និងត្រូវបានហ៊ុមព័ទ្ធសេដ្ឋកិច្ចពីប្រទេសមហាអំណាចមួយចំនួន នាទសវត្ស៨០ មិត្តគុយបា បានចាប់ផ្តើមទំនាក់ទំនងការទូតឡើងវិញ និងបានផ្តល់ជំនួយភ្លាមៗមកដល់ ពលរដ្ឋកម្ពុជាដែលនៅរស់រានមានជីវិតពីរបប ប៉ុល ពត ជាពិសេសការជួយរបស់គុយបាមកលើផ្នែកសុខា ភិបាល ដែលជាជំនួយដ៏មានសារៈសំខាន់បំផុតក្នុងគ្រាដែលសុខភាពប្រជាជនកម្ពុជានាពេលនោះមាន បញ្ហាលំបាកយ៉ាងខ្លាំង ហើយដោយឡែកលោកជំទាវ លឿកា រ៉ូទ្រីហ្គេស បារីយ៉ូស ឯកអគ្គរដ្ឋទូត គុយបាថ្មីក៏បានអរគុណចំពោះកម្ពុជាវិញដែរ។ គុុយបា អរគុណកម្ពុជា ក៏ព្រោះតែកម្ពុជាមិនបានគាំទ្រ ចំពោះការហ៊ុមព័ទ្ធខាងផ្នែកសេដ្ឋកិច្ចរបស់សហរដ្ឋអាមេរិកមកលើប្រទេសគុយបា ហើយដែលប្រទេស ទាំងពីរតែងបានជួយគ្នាទៅវិញទៅមកនៅគ្រប់កាលៈទេសៈទាំងអស់។ លោកជំទាវ បានអរគុណរដ្ឋសភា កម្ពុជា ដែលតែងជំរុញដល់ការលើកកម្ពស់ចំណងមិត្តភាពកម្ពុជា-គុយបា ឲ្យរឹងមាំជាលំដាប់ ពិសេសតាម រយៈក្រុមមិត្តភាពរដ្ឋសភាកម្ពុជា-គុយបា។

លោកជំទាវទូតបានលើកឡើងថា ចំណងមិត្តភាពកម្ពុជាគុយបា ក្នុងរយៈពេល៦០ឆ្នាំមកនេះ មិន មែនត្រឹមជាទំនាក់ទំនងការទូតនោះទេ តែជាទំនាក់ទំនងប្រវត្តិសាស្រ្ត ដែលប្រទេសទំាងពីរបានធ្វើកិច្ចការ ជាច្រើនរួមគ្នា និងថា លោកជំទាវមានកិត្តិយសណាស់ ដែលបានមកបំពេញបេសកកម្មការទូតនៅកម្ពុជា និងបានសន្យាថា នឹងខិតខំជំរុញលើកកម្ពស់ចំណងមិត្តភាព និងកិច្ចសហប្រតិបត្តិប្រទេសទំាងពីរឲ្យកាន់ តែរឹងមាំឡើង ខណៈដែលសម្តេចប្រធានរដ្ឋសភាកម្ពុជាបានអះអាងថា រដ្ឋសភាកម្ពុជាពិតជាពេញចិត្ត ចំពោះកិច្ចសហប្រតិបត្តិការដ៏ល្អរវាងរដ្ឋាភិបាលនៃប្រទេសទាំងពីរ ដែលបាននាំមកនូវផលប្រយោជន៍ ទាំងសងខាង តាមរយៈការផ្លាស់ប្តូរទស្សនកិច្ច និងការគាំទ្រគ្នាទៅវិញទៅមកនៅលើឆាកអន្តរជាតិ។ រដ្ឋសភាកម្ពុជាគាំទ្របេសកកម្មការទូតរបស់លោកជំទាវ លឿកា រ៉ូទ្រីហ្គេស បារីយ៉ូស ដោយនឹងធ្វើកិច្ច សហប្រតិបត្តិការពេញលេញ ដើម្បីឱ្យការងារការទូតរបស់លោកជំទាវទទួលបានជោគជ័យ៕

ភ្នំពេញ ៖ ក្រសួងទេសចរណ៍ នាព្រឹកថ្ងៃទី១២ កុម្ភៈ នេះ បានធ្វើការប្រកាសផ្សព្វផ្សាយជាផ្លូវការស្តីពី “កម្ពុជាទទួលធ្វើជាម្ចាស់ផ្ទះវេទិកាទេសចរណ៍អាស៊ានឆ្នាំ២០២១” នៅរាជធានីភ្នំពេញចាប់ពីថ្ងៃទី១៧ -២៣ ខែមករា ឆ្នាំ២០២១ក្រោមប្រធានបទ “អាស៊ាន ៖ សហគមន៍សន្តិភាព និងអនាគតតែមួយ” ដោយក្នុងពិធីនេះ លោក ថោង ខុន រដ្ឋមន្រ្តីក្រសួងទេសចរណ៍ បានគូសបញ្ជាក់ថា វេទិកាទេសចរណ៍អាស៊ានឆ្នាំ២០២១ នេះ មានព្រឹត្តិការណ៍សំខាន់ៗដូចជា កិច្ចប្រជុំថ្នាក់រដ្ឋមន្ត្រីទេសចរណ៍អាស៊ាន, កិច្ចប្រជុំស្ថាប័នជាតិទេសចរណ៍អាស៊ាន និងកិច្ចប្រជុំពាក់ព័ន្ធ ព្រមទាំងកិច្ចប្រជុំផ្នែកឯកជន, សិក្ខាសាលានានា និងព្រឹត្តិការណ៍ពិព័រណ៍ទេសចរណ៍អន្តរជាតិជាដើម។

ដោយឡែកការតាំងពិព័រណ៍ទេសចរណ៍អន្តរជាតិ ដែលជាវេទិកាធុរកិច្ចទេសចរណ៍ដ៏ធំបំផុតក្នុងអាស៊ានដែលនឹងប្រព្រឹត្តទៅចាប់ពីថ្ងៃទី១៩-២១ ខែមករា ឆ្នាំ២០២១ នឹងមានការចូលរួមពីក្រុមហ៊ុនជាអ្នកលក់ ប្រមាណជាង ៤៥០ក្រុមហ៊ុន ក្រុមហ៊ុនជាអ្នកទិញប្រមាណ ៤៥០ក្រុមហ៊ុន និងអ្នកសារព័ត៌មានជាតិ-អន្តរជាតិ ១០០រូប មកពីជុំវិញពិភពលោកផង ដែរ។

ក្នុងឱកាសនេះ លោករដ្ឋមន្រ្តីក្រសួងទេសចរណ៍ បានអំពាវនាវដល់គ្រប់ភាគីពាក់ព័ន្ធក្នុងវិស័យទេសចរណ៍ទាំងផ្នែករដ្ឋ និងឯកជន ក៏ដូចជាប្រជាពលរដ្ឋទូទាំងប្រទេសកម្ពុជាឱ្យចូលរួមផ្សព្វផ្សាយអំពីការទទួលធ្វើជាម្ចាស់ផ្ទះ “វេទិកាទេសចរណ៍អាស៊ានឆ្នាំ២០២១” របស់កម្ពុជា និងចូលរួមជាមួយរាជរដ្ឋាភិបាលក្នុងការរៀបចំធ្វើជាម្ចាស់ផ្ទះនេះ ដើម្បីទទួលភ្ញៀវដែលមកលេងផ្ទះរបស់យើងប្រកបដោយទស្សនទាន “ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ ផ្តល់ភាពកក់ក្តៅដល់ទេសចរ”។ លោកបានបន្តថា ស្របពេលដែលពិភពលោកកំពុងប្រឈមនឹងការរាតត្បាតនៃជម្ងឺរលាកផ្លូវដង្ហើមដែលបង្កដោយវីរុសកូរ៉ូណាប្រភេទថ្មី កម្ពុជានៅតែ
ជាគោលដៅទេសចរណ៍ប្រកបដោយសុខសុវត្ថិភាពសម្រាប់ភ្ញៀវទេសចរគ្រប់រូប ក្នុងនោះគោលដៅទេសចរណ៍ប្រកបដោយសក្តានុពលរបស់កម្ពុជាសម្បូរទៅដោយផលិតផលទេសចរណ៍វប្បធម៌ បេតិកភណ្ឌ និងអេកូទេសចរណ៍៕

ភ្នំពេញ ៖ នាព្រឹកថ្ងៃទី១២ ខែកុម្ភៈ ឆ្នាំ២០២០នេះ លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានអនុញ្ញាតឱ្យ លោក Pablo Kang ឯកអគ្គរដ្ឋទូតថ្មីអូស្រ្តាលី ប្រចាំព្រះរាជាណាចក្រកម្ពុជា ចូលជួបសំដែងការគួរសម និងពិភាក្សាការងារ។

ក្នុងនាមសម្តេចតេជោ ប្រធានអាជ្ញាធរមីន លោកទេសរដ្ឋមន្រ្តី លី ធុជ បានថ្លែងអំណរគុណយ៉ាងជ្រាលជ្រៅបំផុតជូនដល់រដ្ឋាភិបាល និងប្រជាជនអូស្រ្តាលី ដែលបានផ្តល់ការគាំទ្រ និងចូលរួមជាមួយរាជរដ្ឋាភិបាលកម្ពុជាក្នុងការងារបោសសម្អាតមីនមនុស្សធម៌នៅកម្ពុជា ដើម្បីកាត់លបន្ថយជនរងគ្រោះ និងកាត់បន្ថយភាពក្រីក្ររបស់ប្រជាពលរដ្ឋកម្ពុជា។

លោក Pablo Kang បានមានប្រសាសន៍ថា ប្រទេសអូស្រ្តាលីបានគាំទ្រដល់ការងារបោសសម្អាតមីននៅកម្ពុជាចាប់តាំងពីឆ្នាំ១៩៩៤មក និងបានចំណាយថវិកាប្រមាណជាង១០០លានដុល្លារអាមេរិក ដែលបានចូលរួមរំដោះផ្ទៃដីដែលមានការគម្រាមកំហែងដោយសារមីនដើម្បីផ្តល់ដីសម្រាប់កសាងលំនៅដ្ឋាន និងធ្វើកសិកម្មប្រកបដោយសុវត្ថិភាពជូនដល់ប្រជាជនរស់នៅតំបន់រងផលប៉ះពាល់ខ្លាំងដោយសារមីន។ ជាមួយគ្នានេះ លោក Pablo Kang បានបញ្ជាក់បន្ថែមថា ប្រទេសអូស្រ្តាលីនៅតែបន្តចូលរួមគាំទ្រវិស័យសកម្មភាពមីននៅកម្ពុជា តាមរយៈគម្រោងបោសសម្អាតមីនដើម្បីលទ្ធផលដំណាក់កាលទី៤ ដែលគាំទ្របច្ចេកទេសដោយអង្គការយូអិនឌីភី៕

ភ្នំពេញ ៖ នារសៀលថ្ងៃអង្គារ ទី១១ ខែកុម្ភៈ ឆ្នាំ២០២០ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតឱ្យលោក Gluseppe De Vincentiis អ្នកតំណាងថ្មីរបស់ការិយាល័យឧត្តមស្នងការសហប្រជាជាតិទទួលបន្ទុកជនភៀសខ្លួន (UNHCR) ប្រចាំតំបន់ ចូលជួបសម្ដែងការគួរសម នៅទីស្ដីការក្រសួងមហាផ្ទៃ។

នៅក្នុងជំនួបនេះ សម្ដេចក្រឡាហោម ស ខេង ឧបនាយករដ្ឋមន្ត្រី បានសម្ដែងការនូវការអបអរសាទរចំពោះកិច្ចសហប្រតិបត្តិការដ៏ល្អ រវាងព្រះរាជាណាចក្រកម្ពុជាជាមួយការិយាល័យឧត្តមស្នងការសហប្រជាជាតិទទួលបន្ទុកជនភៀសខ្លួន UNHCR និងជាពិសេសរវាងក្រសួងមហាផ្ទៃ និងUNHCR ក្នុងការងារជួយគាំទ្រកិច្ចគាំពារជនភៀសខ្លួន និងជនស្វែងរកសិទ្ធិជ្រកកោន ។

សម្ដេចក្រឡាហោម ស ខេង បានចាត់ទុកថា ប្រសិនបើគ្មានកិច្ចសហប្រតិបត្តិការល្អជាមួយគ្នាទេ ក៏យើងមិនអាចសម្រចនូវលទ្ធផលល្អដូចសព្វថ្ងៃនេះដែរ។ សម្ដេចក្រឡាហោម ស ខេង ក៏បានបញ្ជាក់ថា កម្ពុជា គឺជាប្រទេសហត្ថលេខីនៃអនុសញ្ញាជនភៀសខ្លួនឆ្នាំ១៩៥១ ហេតុដូច្នេះហើយ កម្ពុជាមានភារកិច្ចក្នុងការត្រួតពិនិត្យរាល់ជនទាំងឡាយណាដែលទទួលរងការធ្វើទុក្ខបុកម្នេញលើសិទ្ធិសេរីភាព ក៏ដូចជាក្រោមហេតុផលនយោបាយ ឬជនដែលរត់គេចពីសង្គ្រាមដែលស្ថិតក្រោមលក្ខណ្ឌផ្សេងៗដូចមានចែងក្នុងអនុសញ្ញាឆ្នាំ១៩៥១។

សម្ដេចក្រឡាហោម ស ខេង បន្តថាជាទូទៅកម្ពុជាតែងតែអនុវត្តយ៉ាងល្អប្រសើរដោយមានកិច្ចសហប្រតិបត្តិការជាមួយUNHCRលើកិច្ចការជួយគាំពារជនភៀសខ្លួន និងជនស្វែងរកសិទ្ធិជ្រកកោន។

មានប្រសាសន៍ជម្រាបជូនសម្ដេចក្រឡាហោម ស ខេង នាឱកាសនោះ លោក Giusepe De Vincentis អ្នកតំណាងថ្មីរបស់ការិយាល័យឧត្តមស្នងការសហប្រជាជាតិទទួលបន្ទុកជនភៀសខ្លួន UNHCR ប្រចាំតំបន់ បានសម្ដែងក្ដីរីករាយចំពោះការទទួលភារកិច្ចជាតំណាង UNHCR នៅក្នុងអាណត្តិនេះ និងបានសម្ដែងក្ដីរំភើបរីករាយដែលបានវិលមកបំពេញការងារនៅប្រទេសកម្ពុជាជាថ្មីទៀត បន្ទាប់ពីធ្លាប់បានមកធ្វើការម្ដងរួចមកហើយកាលពីឆ្នាំ១៩៩១។

លោកបានថ្លែងកោតសរសើរយ៉ាងខ្លាំងចំពោះប្រទេសកម្ពុជាដែលនៅក្នុងតំបន់អាស៊ាន មិនមានប្រទេសច្រើនទេ ជារដ្ឋហត្ថលេខីនៃអនុសញ្ញាជនភៀសខ្លួន ប៉ុន្តែកម្ពុជាគឺជាប្រទេសមួយនៃរដ្ឋហត្ថលេខី
ដោយឯកឧត្តមសម្ដែងការគោពនិងប្ដេជ្ញាបន្តជួយផ្ដល់ការគាំទ្រ និងចែករំលែកបទពិសោធន៍ផ្សេងៗជាមួយក្រសួងមហាផ្ទៃ និងអង្គភាពជំនាញរបស់ក្រសួង ដើម្បីឱ្យការងារនេះកាន់តែទទួលបានជោគជ័យ
ជាពិសេសការកសាងសមត្ថភាពមន្ត្រី និងការងារផ្សេងទៀតដែលក្រសួងមានតម្រូវការចាំបាច់ក្នុងការស្នើសុំ UNHCR ជួយ។
អ្នកតំណាងរបស់ការិយាល័យឧត្តមស្នងការសហប្រជាជាតិទទួលបន្ទុកជនភៀសខ្លួន UNHCR ក៏បានថ្លែងនូវការស្វាគមន៍ចំពោះវឌ្ឍនភាពកម្ពុជាក្នុងការងាររៀបចំប្រព័ន្ធអត្រានុកូលដ្ឋាន ដែលឯកឧត្តមចាត់ទុកថាជាកិច្ចការមួយដ៏មានសារៈសំខាន់ និងជាការរួមចំណែកដល់ចុះបញ្ជីតាមដានចំនួនជនភៀសខ្លួន និងអ្នកស្វែងរកសិទ្ធិជ្រកកោន។
ជាថ្មីម្ដងទៀតលោកបានបង្ហាញការស្វាគមន៍ និងរីករាកក្នុងការជួយក្រសួងមហាផ្ទៃលើការងារពាក់ព័ន្ធនឹងការអនុវត្តភារកិច្ចគាំពារជនភៀសខ្លួន និងជនស្វែងរកសិទ្ធិជ្រកកោននេះតាមស្ដង់ដាអន្តរជាតិ។

ជាការឆ្លើយតប សម្ដេចក្រឡាហោម ស ខេង បានថ្លែងអំណរគុណចំពោះការវាយតម្លៃរបស់ឯកឧត្តម អ្នកតំណាងថ្មីរបស់ការិយាល័យឧត្តមស្នងការសហប្រជាជាតិទទួលបន្ទុកជនភៀសខ្លួន UNHCRនិងសូមគាំទ្រ ព្រមទាំងយល់ស្របនូវការលើកឡើងដែលថាកម្ពុជាជាប្រទេសមួយក្នុងចំណោមរដ្ឋតិចតួចក្នុងតំបន់អាស៊ាន ដែលបានចុះហត្ថលេខាលើសន្ធិសញ្ញាស្ដីពីសិទ្ធិជនភៀសខ្លួន១៩៥១។ ទន្ទឹមនោះសម្ដេចក្រឡាហោម ស ខេង ក៏បានសម្ដែងការគាំទ្រចំពោះគំនិតផ្ដួចផ្ដើមបង្កើតឱ្យមានការគាំទ្រការបណ្ដុះបណ្ដាលសមត្ថភាពមន្ត្រីឱ្យបំពេញការងារមានវិជ្ជាជីវៈច្បាស់លាស់ និងប្រកបដោយប្រសិទ្ធភាព។

ក្នុងជំនួបនោះដែរ លោកតំណាងថ្មីនៃ UNHCR បានជម្រាបសម្ដេចក្រឡាហោម ថា បញ្ហាជនភៀសខ្លួននៅក្នុងបរិបទបច្ចុប្បន្ននេះកាន់តែមានភាពស្មុគស្មាញ ដោយតួលេខចុងក្រោយមានប្រមាណ៧០លាននាក់លើពីភពលោក ហើយមូលហេតុគឺដោយសារកត្តាសង្គ្រាម សេដ្ឋកិច្ច និងបញ្ហាផ្សេងទៀត ដោយបញ្ហាអស់ទាំងនេះUNHCRកំពុងខិតខំដោះស្រាយ ហើយថា ក្នុងក្របខណ្ឌនៃកិច្ចសហប្រតិបត្តិការជាមួយកម្ពុជា លោករីករាយ និងផ្ដល់ការគាំទ្រឱ្យបានសមស្របទៅតាមស្តង់ដាអន្តរជាតិនៃបរិបទពិភពលោកបច្ចុប្បន្ន៕

ភ្នំពេញ ៖ សមាគមរោងចក្រកាត់ដេរនៅកម្ពុជា (GMAC) បានបញ្ជាក់ថា នៅថ្ងៃទី១១ ខែកុម្ភៈ ឆ្នាំ២០២០នេះ បានចេញសេចក្តីប្រកាសព័ត៌មានថ្មីមួយ ដោយបញ្ជាក់ពីស្ថានភាពវិស័យកាត់ដេរសម្លៀកបំពាក់ និងផលិតស្បែកជើង នៅក្នុងប្រទេសកម្ពុជា ដោយសារការខ្វះខាតវត្ថុធាតុដើមក្នុងការផលិត។

ដោយ​សារ​តែ​ការ​ផ្ទុះ​វីរុសកូរ៉ូណានៅក្នុងប្រទេសចិន​ រោងចក្រ​ផលិត​វត្ថុធាតុដើម និង​ក្រុមហ៊ុន​ផ្តល់​សេវា​ជាច្រើន​បាន​បិទ​ដំណើរការ​បណ្តោះអាសន្ន ហើយ​រហូត​ដល់ចុងខែនេះ ទើបអាច​ចាប់ផ្តើម​ដំណើរការ​ឡើងវិញបាន។ នេះ​បើតាម​សេចក្តី​ប្រកាស​ព័ត៌មាន​របស់​សមាគមរោងចក្រកាត់ដេរ​នៅ​កម្ពុជា នៅថ្ងៃទី១១ ខែកុម្ភៈ ឆ្នាំ​២០២០។

បញ្ហានេះ​នឹង​បង្កឱ្យ​មានផលប៉ះពាល់​ចង្វាក់​ផ្គត់ផ្គង់​ដល់​រោងចក្រ​នៅ​កម្ពុជា ខណៈ​បច្ចុបន្ននេះ វត្ថុធាតុដើម​ប្រហែលជាង៦០% សម្រាប់​បម្រើ​ឱ្យ​ផលិតកម្ម​ក្នុង​វិស័យ​កាត់ដេរ​សម្លៀក​បំពាក់ និង​ផលិត​ស្បែកជើងនៅកម្ពុជា​ ត្រូវបាន​នាំចូល​ពីប្រទេសចិន។

សម្រាប់​រោងចក្រ​មួយចំនួន វត្ថុធាតុដើម​នៅក្នុង​ស្តុក​សម្រាប់​ផលិតកម្ម​អាច​នឹង​អស់​នៅត្រឹម​សប្តាហ៍​ក្រោយ ឬ​សប្តាហ៍​បន្ទាប់ ហើយ​ការបិទ​រោងចក្រ​បណ្តោះអាសន្ន​នៅ​ប្រទេសចិន អាច​នឹង​ធ្វើឱ្យរោងចក្រ​មួយចំនួន​ខ្វះ​វត្ថុធាតុ​ដើម​នៅចុងខែនេះ និង​ក្នុង​ខែមីនា​ខាងមុខ។ ប្រឈម​នឹង​បញ្ហា​នេះ រោងចក្រ​គ្មាន​ជម្រើសអ្វី​ក្រៅពី​ការផ្អាក​ប្រតិបត្តិការ​ផលិតកម្ម​ជាបណ្តោះអាសន្ន ដែលអាច​មាន​រយៈពេល ១ខែ​ពេញ ឬដល់ ២ខែ។

ប្រភព​ដដែល​អះអាងថា «ការ​ផ្អាក​បណ្តោះអាសន្ន​រយៈពេល​ខ្លីដែល​យើង​អាច​រំពឹង​ទុកថា នឹងកើតឡើង​​ក្នុងពេល​ដ៏ខ្លី​ខាងមុខនេះ មិនមាន​អ្វីពាក់ព័ន្ធនឹង​ដំណើរការ​នៃការ​ដកប្រព័ន្ធ​អនុគ្រោះពាណិជ្ជកម្ម (EBA) របស់​សហភាព​អឺរ៉ុប​មកលើ​ប្រទេស​កម្ពុជា​ទេ។ ការ​សម្រេច​ចិត្ត​ណាមួយ​របស់សហភាព​អឺរ៉ុប នឹង​ត្រូវ​ចូល​ជាធរមាន​នៅក្នុងរយៈពេល​មិនតិចជាង ៦ខែ​ខាងមុខនេះ​ទៅនឹង​បញ្ហា EBA មិនមែន​ជាការ​ត្រឹមត្រូវទេ»៕