ភ្នំពេញ ៖ ស្ត្រីរងកម្មម្នាក់ ត្រូវបានម្តាយក្មេក និងប្តីវាយបណ្តាលឲ្យបែកក្បាលហូរឈាមជោកជាំ ខណៈស្រវឺងស្រាភ្លេចដាំបាយ។ហេតុការណ៏ភ្ញាក់ផ្អើលខាងលើនេះ បានកើតឡើងកាលពីវេលាម៉ោង១រសៀលថ្ងៃទី១១ ខែកុម្ភៈ ឆ្នាំ២០២០ ស្ថិតនៅចំណុចក្រោមស្ពានអាកាសស្ទឹងមានជ័យផ្លូវ២៧១ ភូមិមានជ័យ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
ស្ត្រីរងគ្រោះខាងលើមានឈ្មោះ រ៉ាត់ សុខឡេង អាយុ៤១ឆ្នាំ មុខរបរនៅផ្ទះ មានស្រុកកំណើត នៅភូមិអំពិល ឃុំ ប៉ុស្តិ២ ស្រុកក្រូចឆ្មា ខេត្តកំពង់ចាម ស្នាក់នៅចំនុចកើតហេតុខាងលើ មានប្តីឈ្មោះ យិន សុផល អាយុ៥១ឆ្នាំមុខរបរមន្ត្រីនគរបាលនៅស្រុកល្វាឯម ចំណែកម្តាយក្មេកដៃឆៅ មាន ឈ្មោះ ជុំ ប៊ុនធឿន ស្នាក់នៅក្បែរគ្នា។

ប្រភពព័ត៌មាននៅកន្លែងកើតហេតុបានឲ្យដឹងថា ជារៀងរាល់ថ្ងៃគេឃើញគ្រួសារខាងលើនេះ តែងតែប្រមូលផ្តុំគ្នាផឹកស្រាថ្នាំបណ្តាំគ្រូ លុះពេលស្រវឹងស្រឿងៗ បានឈ្លោះប្រកែកជេរបញ្ចោគ្នាស្ទើរតែរៀងរាល់ពេល ។ លុះមុនពេលកើតហេតុស្ត្រីរងគ្រោះរាងស្រវឹងធ្លាក់ភ្នែកបន្តិចបានដើរកាន់ឈើច្រត់ទៅសុំបាយម្តាយក្មេកមួយចាន យកទៅឲ្យកូនរបស់គាត់ហូប ពេលនោះម្តាយក្មេកបានស្តីបន្ទោសឲ្យថា ង៉ែងមិនចេះដាំបាយឲ្យកូនស៊ីទេ គិតតែពីនាំគ្នាផឹកស្រាពេលស្រវឹងមករកសុំបាយអញ មិនឲ្យទេ បើអត់មានអង្ករ អញឲ្យពីរ បីគីឡូ យកទៅទុកដាំបាយឲ្យកូនស៊ីទៅ។
ទោះបីឮពាក្យតិះដៀលក្តី ក៏ស្រីរូបនេះនៅតែចចេសចូលទៅដួសបាយ ធ្វើអោយម្តាយក្មេកខឹងចាប់វាយនឹងចានថែមទាំងបោកក្បាលផ្តួលទៅលើឥដ្ឋបណ្តាលឲ្យបែកក្បាលហូរឈាមជោកជាំពេញខ្លួនតែម្តង ត្រូវបានបញ្ជូនទៅតាមរថយន្តសាមុយដឹកយកទៅកាន់មន្ទីរពេទ្យមិត្តភាពកម្ពុជាសូវៀត ដើម្បីធ្វើការសង្គ្រោះ។
ក្រោយពេលកើតហេតុ សមត្ថកិច្ចប៉ុស្តិនគរបាលស្ទឹងមានជ័យទី១ បានចុះទៅពិនិត្យ និងស្រាវជ្រាវនៅកន្លែងកើតហេតុ និងធ្វើការឃាត់ខ្លួនប្តី និងម្តាយក្មេកទៅធ្វើការសាកសួនៅប៉ុស្តិ៍នគរបាលស្ទឹងមានជ័យទី១ ដើម្បីចាត់ការតាមនីតិវិធី៕

ភ្នំពេញ ៖ លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានមានប្រសាសន៏ថា រោងចក្រនៅកម្ពុជាមួយចំនួន ដែលទទួលវត្ថុធាតុដើមផលិតពីចិន អាចនឹងរងផលប៉ះពាល់ ដោយសារចិនបិទទ្វាររោងចក្រទាំងអស់ ក្នុងនោះក៏មានកម្ពុជាដែរ ។ លោក ផៃ ស៊ីផាន បានអះអាងថា ការសុំព្យួររោងចក្រពីកម្ពុជា មិនទាក់ទងទៅនឹង ប្រព័ន្ធអនុគ្រោះពន្ធ។

ក្នុងសន្និសីទសារព័ត៌មានស្ដីពី «វឌ្ឍភាពនិងទិសដៅការងារបន្ត របស់ក្រសួងអប់រំយុវជន និងកីឡា» នៅព្រឹកថ្ងៃទី១០ ខែកុម្ភៈ ឆ្នាំ២០២០ លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានថ្លែងថា រោងចក្ររបស់កម្ពុជា អាចនឹងមានផលប៉ះពាល់ ក្នុងការទទួលវត្ថុធាតុដើមពីប្រទេសចិន គ្រាដែលប្រទេសចិន បានបិទទ្វារោងចក្រទាំងអស់។ ការបិទរោងចក្ររបស់ចិន ដោយសារពាក់ព័ន្ធនឹងវិរុសកូរ៉ូណា ធ្វើឲ្យការផលិតក្រណាត់ជាវត្ថុធាតុដើមផ្គត់ផ្គង់មកកម្ពុជា ជួបនូវបញ្ហា។ ទោះយ៉ាងណា ការផ្អាកដំណើរការរោងចក្រនៅកម្ពុជា គឺមិនទាក់ទងទៅនឹងប្រព័ន្ធអនុគ្រោះពន្ធរបស់សហភាពអឺរ៉ុបនោះទេ។

បើតាមសារព័ត៌មានចិន ស៊ីស៊ីថាម  បានចុះផ្សាយថា យ៉ាងហោចណាស់មានរោងចក្រចន្លោះពី១០ទៅ១៥ កំពុងពិចារណាសុំព្យួរកិច្ចសន្យាការងារមួយរយៈដោយសារតែខ្វះ«វត្ថុធាតុដើម»ដើម្បីដំណើរការសង្វាក់ផលិតកម្មរបស់ខ្លួន។បច្ចុប្បន្នរោងចក្រទាំងនោះបានជូនដំណឹងទៅក្រសួងការងាររួចរាល់ហើយ ហើយកំពុងពិភាក្សាជាមួយក្រសួងរកដំណោះស្រាយស្វែករកវត្ថុធាតុដើម ដើម្បីបំពេញសង្វាក់ផលិតកម្ម។ ប្រសិនបើរោងចក្រទាំងអស់នោះត្រូវបិទទ្វាវានឹងប៉ះពាល់ដល់កម្មករកម្មការិនីរោងចកក្រប្រមាណពី៦ពាន់ទៅ៨ពាន់នាក់។នេះបើតាមអះអាងរបស់ ឯ.ឧ ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជិវៈ។ ការខ្វះ«វត្ថុធាតុដើម» ដើម្បីដំណើរការសង្វាក់ផលិតកម្មរោងចក្រ គឺជាក្តីបារម្ភដ៏ធំមួយសម្រាប់វិស័យកាត់ដេរនៅកម្ពុជា ហើយប្រសិនបើរោងចក្រនៅប្រទេសចិននៅតែផ្អាកមិនដំណើរការគេរំពឹងថានឹងមានរោងចក្រមួយចំនួននឹងសុំព្យួរ ឬបិទមិនដំណើរការនៅកំឡុងពាក់កណ្តាលខែមីនា និងខែមេសាខាងមុខនេះ។

លោក ហេង សួរ អ្នកនាំពាក្យក្រសួងការងារ បានបញ្ជាក់ដែរថា ប្រសិនបើមានរោងចក្របិទទ្វានៅកំឡុងខែមីនា និងខែមេសាមែននោះ វាមិនមែនដោយសារឥទ្ធិពលប្រព័ន្ធអនុគ្រោះពន្ធ EBA របស់សហភាពអឺរ៉ុបឡើយ តែគឺបណ្តាលមកពីឥទ្ធិពលចំបងគឺកង្វះនូវ«វត្ថុធាតុដើម» ដោយសារវីរុសកូរ៉ូណា រោងចក្រជាច្រើននៅចិន បានបិទដំណើរការ៕

ភ្នំពេញ ៖ សិក្ខាសាលាស្តីពីការបង្រៀនភាសាអង់គ្លេស CamTESOL ប្រចាំឆ្នាំ លើកទី១៦ បានទទួលស្វាគមន៍អ្នកចូលរួមប្រមាណជាង១៦០០នាក់ មកពី៣១ប្រទេសមកកាន់រាជធានីភ្នំពេញ ដែលធ្វើឱ្យប្រទេសកម្ពុជា ក្លាយទៅជាវេទិកាដ៏សំខាន់ ក្នុងតំបន់ និងអន្តរជាតិ ក្នុងការចែក រំលែក របកគំហើញថ្មីៗនិងវិធីសាស្ត្រក្នុងការស្រាវជ្រាវ ការរៀន និងការបង្រៀនភាសាអង់គ្លេស។

CamTESOLដែលត្រូវបានរៀបចំដោយស្ថាប័ន IDP Education ដែលជាស្ថាប័នឈានមុខលើពិភពលោក ក្នុងការបញ្ជូនសិស្ស និស្សិត ទៅសិក្សានៅបរទេស មានធ្វើបទបង្ហាញ ជាង៥០០ ដោយអ្នកជំនាញ ក្នុងវិស័យអប់រំផ្នែកភាសាអង់គ្លេសជាង៤០០នាក់ ក្នុងប្រទេសកម្ពុជា និងបណ្តាប្រទេសនានាលើសកលលោក។ CamTESOL ប្រចាំឆ្នាំនេះ ត្រូវបានប្រារព្ធឡើង ចាប់ពីថ្ងៃទី៧ដល់ថ្ងៃទី៩ ខែកុម្ភៈ ឆ្នាំ២០២០ នៅវិទ្យាស្ថានបច្ចេកវិទ្យាកម្ពុជា លើប្រធានបទ “ការបង្រៀនភាសាអង់គ្លេស ក្នុងសតវត្សន៍ទី២១:  វិធីសាស្ត្រសម្រាប់ការអនុវត្តប្រកបដោយប្រសិទ្ធភាព”។ CamTESOL បានក្លាយជាវេទិកាដ៏សំខាន់មួយ ក្នុងការចែករំលែកចំណេះដឹងអំពី ការបង្រៀនភាសាអង់គ្លេស ក្នុងតំបន់អាស៊ីប៉ាស៊ីហ្វិក។

លោកបណ្ឌិតសភាចារ្យ ហង់ ជួន ណារ៉ុន បានមានប្រសាសន៍ថា”ខ្ញុំពិតជាមានសេចក្តីសោមនស្សរីករាយ ដែលអ្នកចូលរួមទាំងអស់បានចែករំលែកវិធីសាស្ត្របង្រៀនភាសា អង់គ្លេសអោយមានប្រសិទ្ធិភាព។ គ្រូបង្រៀនមាននាទីដ៏សំខាន់ក្នុងការអភិវឌ្ឍវិស័យអប់រំ”។

លោក Pablo Kang បានរៀបរាប់ពីមុខងារនៃគ្រូបង្រៀនភាសាអង់គ្លេសក្នុងការអភិវឌ្ឍថា “គ្រូបង្រៀនមាននាទីសំខាន់ក្នុងការអប់រំភាសាអង់គ្លេសដល់សិស្សជំនាន់ក្រោយ ព្រោះវាគឺជាជំនាញដ៏មានសារៈប្រយោជន៍”។

លោកជំទាវ Tina Redshaw បានថ្លែងថា “គ្រូបង្រៀនក្នុងប្រទេសកម្ពុជាប្រហែលជាមិនមានឳកាសច្រើនក្នុងការធ្វើដំណើរទៅចូលរួមសិក្ខាសាលាធំៗនៅប្រទេសផ្សេងៗ ដូច្នេះការដែល CamTESOL នាំអ្នកចូលរួមមកកាន់ប្រទេសកម្ពុជាគឺជាគំនិតដ៏អស្ចារ្យមួយ”។

គួរបញ្ជាក់ថា នៅក្នុងសិក្ខាសាលា ក៏មានការតាំងពិព័រណ៍ ដែលចូលរួមដាក់បង្ហាញ   សម្ភារៈនិងសេវាកម្មទាក់ទងនឹងការបង្រៀនភាសាអង់គ្លេស ដោយស្ថាប័នជាតិ និង អន្តរជាតិមួយចំនួនដូចជា Cambridge English Assessment, Oxford University Press, National Geography Learning និង Macmillan Publishers។

ក្នុងចំណោមអ្នកចូលរួមទាំង១៧០០នាក់ មានគ្រូបង្រៀន និងអ្នកអប់រំភាសាអង់គ្លេសជនជាតិកម្ពុជា ប្រមាណជាង១០០០នាក់ ដែលភាគច្រើនជាគ្រូបង្រៀនមកពីតាមបណ្តាខេត្ត។

សិក្ខាសាលា ក៏មាននូវបទបង្ហាញ និងវេទិកាពិភាក្សាពិសេសដោយអ្នកជំនាញ ក្នុងប្រទេសកម្ពុជា និងបណ្តាប្រទេសផ្សេងៗជុំវិញពិភពលោក រួមមាន សហរដ្ឋអាមេរិក អូស្ត្រាលី ចក្រភពអង់គ្លេស នូវែលហ្សេឡង់ និងសាំងហ្កាពួរ។

លោក ម៉ៅ ស្រេង បានថ្លែងថា “CamTESOL មានភាពសោមនស្សរីករាយណាស់ ដែលទទួលបាននូវការគាំទ្រ និងការចូលរួមពីសំណាក់អ្នកអប់រំ និងស្ថាប័នជាច្រើន ទាំងក្នុង និងក្រៅប្រទេស ដែលបានធ្វើឱ្យកម្ពុជា ក្លាយទៅជាវេទិកាដ៏សំខាន់ក្នុងតំបន់ និងឆាកអន្តរជាតិ ក្នុងការចែករំលែករបកគំហើញថ្មីៗ និង វិធីសាស្ត្រក្នុងការស្រាវជ្រាវ ការរៀន និងការបង្រៀនភាសាអង់គ្លេស”។

សូមបញ្ជាក់ផងដែរថា CamTESOL ទទួលបានការគាំទ្រពីសំណាក់ ក្រសួងអប់រំ យុវជន និងកីឡា ស្ថានទូត អូស្ត្រាលី ស្ថានទូតអាមេរិក ស្ថានទូតអង់គ្លេស និងស្ថាប័ននានា ព្រមទាំងបុគ្គលដែលពាក់ព័ន្ធនៅក្នុងវិស័យបង្រៀនភាសាអង់គ្លេសក្នុងប្រទេសកម្ពុជា តំបន់អាស៊ីអាគ្នេយ៍ និងអន្តរជាតិ។ CamTESOL ត្រូវបានទទួលស្គាល់ចំពោះមុខងារ និងការរួមចំណែក ក្នុងការរីកលូតលាស់ និងភាពល្បីល្បាញរបស់សិក្ខាសាលា ព្រមទាំងការរីកចំរើននៃស្តង់ដារការបង្រៀន និងការរៀនភាសាអង់គ្លេសផងដែរ៕

ភ្នំពេញ ៖ លោក ឌី ខាំបូលី អ្នកនាំពាក្យក្រសួងអប់រំ យុវជន និងកីឡា បានបញ្ជាក់ថា បើមានករណី គ្រូណាម្នាក់ហ៊ានយកលុយពីសិស្សក្នុងម៉ោងសិក្សា ត្រូវរាយការណ៍ជាបន្ទាន់មកក្រសួង ដើម្បីចាត់វិធានការភ្លាមៗ ដោយមិនទុកបង្អង់យូរឡើយ។

នៅក្នុងសន្និសីទសារព័ត៌មានស្ដីពី វឌ្ឍភាពនិងទិសដៅការងារ បន្តរបស់ក្រសួងអប់រំយុវជន និងកីឡា នៅថ្ងៃទី១០ ខែកុម្ភៈ ឆ្នាំ២០២០ លោក ឌី ខាំបូលី បានបញ្ជាក់ប្រាប់អ្នកសារព័ត៌មានថា ជាគោលការណ៍ក្រសួងមិនអនុញ្ញាតឲ្យមានការយកថ្លៃសិក្សា ពីសិស្សនៅតាមសាលារៀនឡើយ។ អ្នកនាំពាក្យក្រសួងអប់រំ យុវជន និងកីឡា លោក ឌី ខាំបូលី បានបញ្ជាក់ថា បើមានករណី គ្រូណាម្នាក់ហ៊ានយកលុយពីសិស្សក្នុងម៉ោងសិក្សា ត្រូវរាយការណ៍ជាបន្ទាន់មកក្រសួង ដើម្បីចាត់វិធានការភ្លាមៗ ដោយមិនទុកបង្អង់យូរឡើយ។ ទោះយ៉ាងណា ក៏ដោយរូបភាព នៃការយកលុយពីសិស្សភាគច្រើនគឺ នៅសាលាបឋមសិក្សា នៅរាជធានីភ្នំពេញ ដែលមានលោកគ្រូ-អ្នកគ្រូ មួយចំនួនតូច បានយកលុយពីសិស្សានុសិស្ស(រៀនបឋម) ជារៀងរាល់ថ្ងៃ ក្រោមហេតុផលថាយកលុយបង់រៀនគួរបន្ថែម។

បើតាមឪពុកម្តាយសិស្ស ដែលសុំមិនបញ្ចេញឈ្មោះបានបង្ហើបថា យ៉ាងហោចណាស់គាត់ត្រូវចំណាយក៣ពាន់រៀលក្នុងមួយថ្ងៃ សម្រាប់កូនម្នាក់ ដើម្បីបង់ឲ្យគ្រូបង្រៀន ដូច្នោះក្នុងមួយខែគាត់ត្រូវបង់ឲ្យគ្រូ ក្រោមរូបភាពនៃការបង់គួរ រហូតដល់ជាង២០ម៉ឺនរៀល។

គួរបញ្ជាក់ថា នៅទូទាំងប្រទេសកម្ពុជាមានសាលារៀនពីមត្តេយ្យ-វិទ្យាល័យ ចំនួន១៣៣០០ ក្នុងនោះសាលាមតេយ្យសិក្សាមានចំនួនជាង៤៣០០សាលា បឋមសិក្សាចំនួនជាង៧២០០សាលា អនុវិទ្យាល័យចំនួនជាង១២៤៦សាលា និងវិទ្យាល័យ៥២៥សាលារៀន៕

ភ្នំពេញ ៖ ថ្លែងក្នុងពិធីបើកការដ្ឋានស្តារ និងសាងសង់ផ្លូវជាតិលេខ២ និងលេខ២២ នៅព្រឹកថ្ងៃទី ១១ ខែកុម្ភៈ ឆ្នាំ២០២០នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានលើកឡើងថា ជំងឺកូរ៉ូណា មិនទាន់ឆ្លងមកពលរដ្ឋកម្ពុជា តែពលរដ្ឋភ័យខ្លាច ដោយសារមកពីពួកអគតិ និងជន ខិលខូចមួយចំនួន។

សម្តេចតេជោ ហ៊ុន សែន នាយករដ្ឋមន្ត្រី​កម្ពុជា បានប្រកាស​ជា​សាធារណៈថា ករណី​កូ​រ៉ូ​ណា​ត្រូវបាន​បញ្ចប់​នៅ​កម្ពុជា​ក្រោយពេលដែល​អ្នកជំងឺ​ជនជាតិ​ចិន​ម្នាក់​ត្រូវបាន​ជាសះស្បើយ ហើយ​ចេញពី​មន្ទីរពេទ្យ​រស់នៅ​ជាធម្មតាវិញ។​

​សម្តេចតេជោ​​បន្ថែមថា ជន​ជាតិចិន​ម្នាក់នេះ​គ្រោង​នឹង​ចាក​ចេញពី​កម្ពុជា​វិល​ទៅ​ស្រុកកំណើត​របស់ខ្លួន​វិញ​ក្នុងពេល​ឆាប់ៗ​នេះ។ សម្តេច​បន្តថា មកដល់ពេលនេះ​មិនទាន់មាន​ជនជាតិកម្ពុជា​ណា​ម្នា​ក់បាន​ឆ្លង​វី​រូស​កូ​រ៉ូ​ណា​នោះទេ ប៉ុន្តែ​ពួក​អគតិ​បាន​ផ្សព្វផ្សាយ​ព័ត៌មាន​បំ​ភ្លើ​សដែល​នាំ​ឲ្យ​មានការ​ភ័យខ្លាច​ប៉ុណ្ណោះ។​ ​សម្តេចតេជោ ហ៊ុន សែន បានបញ្ជាក់​បន្ថែមថា សម្តេច​បានប្រកាស​ម្តង​រួចមកហើយ​ថា ជំងឺ ពិតប្រាកដ​របស់​យើង​មិនមែន​ជំងឺ​កូ​រ៉ូ​ណា​ទេ តែ​ជា​ជំងឺ​ភ័យខ្លាច​តែ​ចាប់ពីពេលនោះ​មក​បញ្ហា ភ័យខ្លាច​បាន​សាបរលាប​បន្តិច​ម្តងៗ។

ជាមួយសម្តេច បានកោតសរសើរ ក្រសួងសុខាភិបាល និងអាជ្ញាធរ​ចាត់វិធានការណ៍ ការពារវីរុសកូរ៉ូណាថ្មី។ សម្តេចថា មកដល់ពេលនេះ កូរ៉ូណា ត្រូវបានបញ្ចប់ នៅកម្ពុជា ដោយសារការព្យាបាល ជំងឺជនជាតិចិនម្នាក់ មានជំងឺនេះ បានជាសះស្បើយ៕
​ ​
​

ខេត្តកំពង់ចាម​ ៖ ​តំណាងម្ចាស់​សហគ្រាសធុនតូច​ និងមធ្យមក្នុងខេត្តកំពង់ចាម​ ប្រមាណ​ជាង​៣០០នាក់​ បាន​ចូលរួម​ក្នុង​វគ្គ​សិក្ខាសាលា​ផ្សព្វផ្សាយ​ស្តីពី​គោលនយោបាយ​លើក​ទឹកចិត្ត​ផ្នែក​គយ​ និង​ពន្ធដារ​ នាព្រឹក​ថ្ងៃទី១០ ខែកុម្ភៈ​ ឆ្នាំ២០២០ នៅសណ្ឋាគារអាស៊ាន LBN ខេត្តកំពង់ចាម ក្រោម​វត្តមាន​លោកបណ្ឌិត​ គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន គយ​ និងរដ្ឋាករកម្ពុជា​ និងលោក​ អ៊ុន​ ចាន់ដា​ អភិបាលនៃគណៈអភិបាលខេត្តកំពង់ចាម​ ដោយ​មាន​ការ​អញ្ជើញ​ចូល​រួម​ពី​ថ្នាក់ដឹកនាំ​ក្រសួង​ពាក់ព័ន្ធ​ និង​មន្ទីរអង្គភាព​ជុំវិញខេត្ត​ជាច្រើន​រូប​ផងដែរ​។

ថ្លែង​ក្នុង​ពិធី​នោះ​ លោក​ អ៊ុន​ ចាន់ដា​ អភិបាលខេត្តកំពង់ចាម​ បាន​លើក​ឡើង​ថា​ វគ្គ​សិក្ខាសាលាដែលបានរៀបចំនេះ​ គឺក្នុងគោលបំណងលើកកម្ពស់ ការអភិវឌ្ឍន៍សហគ្រាស ធុនតូចនិងធុនមធ្យម ដើម្បីបង្កើតការងារ បង្កើនសមត្ថភាព និងលទ្ធផលប្រកួតប្រជែង របស់ផលលិតកម្ម ក្នុងស្រុក ក៏ដូចជាការលើកទកចិត្ត ផ្នែកគយ​ និងពន្ធដារ សម្រាប់សហគ្រាសធុនតូច និងធុនមធ្យម (SMEs) ឆ្នាំ២០២០ នាពេលនេះ គឺជាលើកដំបូង សម្រាប់ខេត្តកំពង់ចាម​ ដែលមានមន្ត្រី ជំនាញនៃអគ្គនាយកដ្ឋានគយនិងរដ្ឋាករកម្ពុជា និងអគ្គនាយកដ្ឋានពន្ធដារ ធ្វើការរផ្សព្វផ្សាយ ជូនដល់ម្ចាស់ឬតំណាងសហគ្រាសធុនតូចនិងមធ្យមទាំង អស់តាមដំណាក់កាលនីមួយៗ ។

ជាមួយគ្នា​នោះ​ លោកបណ្ឌិត​ គុណ​ ញឹម​ បាន​លើក​ឡើង​ថា​ សហគ្រាសធុនតូច និងមធ្យម គឺជាឆ្អឹងខ្នងសេដ្ឋកិច្ច និងជាកម្លាំងចលករដ៏ខ្លាំងមួយ ក្នុងការជំរុញកំណើន​ និងបង្កើតការងារ។ ក្នុងបរិបទនេះរាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានដាក់ចេញនូវវិធានការជាច្រើន ដើម្បីគាំទ្រវិស័យសហគ្រាសធុនតូច និងមធ្យម ដូចមានចែងក្នុងឯកសារគោលនយោបាយ និងឯកសារយុទ្ធសាស្រ្ត រួមមាន ៖ គោលនយោបាយអភិវឌ្ឍន៍វិស័យឧស្សាហកម្មឧស្សាហកម្ម​ ឆ្នាំ២០១៥ ដល់ឆ្នាំ២០២៥។ ២.យុទ្ធសាស្ត្រចតុកោណដំណាក់កាលទី៤ និង៣. យុទ្ធសាស្ត្រគៀងគររកចំណូលឆ្នាំ២០១៩ ឆ្នាំ ដល់ឆ្នាំ២០២៣ ដែលក្នុងនោះមានការកំណត់គោលដៅជាយុទ្ធសាស្ត្រក្នុងការពង្រឹងនិងធ្វើទំនើបកម្មសហគ្រាសធុនតូច​ និងមធ្យមដែលផ្ដោតលើការរៀបចំយន្តការលើកទឹកចិត្ត​ និងជំរុញដល់ការអភិវឌ្ឍលើវិស័យសហគ្រាសធុនតូចនិងមធ្យមព្រោះវាជាសំខាន់ណាស់ដែលត្រូវបានចាត់ទុកជាឆ្អឹងសេដ្ឋកិច្ចនិងជាកម្លាំងចលករដ៏ខ្លាំងក្លាមួយក្នុងការជំរុញកំណើនសេដ្ឋកិច្ចនិងការបង្កើតការងារជូនប្រជាពលរដ្ឋ​ ៕

ភ្នំពេញ ៖ ក្រសួងធនធានទឹក និងឧតុនិយម នៅព្រឹកថ្ងៃទី១១ ខែកុម្ភៈ ឆ្នាំ២០២០នេះ បានចេញសេចក្តីជូនដំណឹងស្តីពីស្ថានភាពអាកាសធាតុនៅកម្ពុជា ចាប់ពីថ្ងៃនេះដល់ថ្ងៃទី១៧ ខែកុម្ភៈ ឆ្នាំ២០២០។

ក្រសួងធនធានទឹកបានឲ្យដឹងថា តាមរយៈការតាមដានស្ថានភាព អាកាសធាតុជាប់ជាបន្ត សង្កេតឃើថា៖ កម្រិតសម្ពាធទាបខ្សោយ បាននឹងកំពុងគ្របដណ្តប់លើកម្ពុជា។ ស្ថានភាពបែបនេះ ធ្វើឲ្យ៖

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក ផាក ហ៊ឹងឃ្យុង (Park Heung-Kyeong) ឯកអគ្គរដ្ឋទូតសាធារណរដ្ឋកូរ៉េ ប្រចាំនៅកម្ពុជានៅព្រឹកថ្ងៃទី១១ ខែកុម្ភៈ ឆ្នាំ២០២០នេះអញ្ជើញជាអធិបតីដ៏ខ្ពង់ខ្ពស់ក្នុងពិធីបើកការដ្ឋានស្តារ និងសាងសង់ផ្លូវលេខ២ និងលេខ២២ ប្រវែងសរុបជាង ៧២គីឡូម៉ែត្រ។

គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ២ និងផ្លូវជាតិលេខ២២ មានប្រវែងសរុប ៧២.១៧គីឡូម៉ែត្រ។ ក្នុងនោះកំណាត់ផ្លូវជាតិលេខ២ ចាប់ពីរង្វង់មូលតាខ្មៅ ដល់អូរចំបក់ មានប្រវែង ៦២.៥៦គីឡូម៉ែត្រ (ឆ្លងកាត់រាជធានីភ្នំពេញ ប្រវែង ៥.៤គីឡូម៉ែត្រ ខេត្តកណ្តាល ប្រវែង ១៤.២១គីឡូម៉ែត្រ និងខេត្តតាកែវ ប្រវែង ៥២.៥៦គីឡូម៉ែត្រ) និងផ្លូវជាតិ២២ ពីអូរចំបក់ ដល់អង្គតាសោម មានប្រវែង ៩.៦១គីឡូម៉ែត្រ ស្ថិតក្នុងភូមិសាស្រ្ត ខេត្តតាកែវ។

ផ្លូវទាំងពីរខ្សែនេះ នឹងសាងសង់ជាប្រភេទផ្លូវបេតុងកៅស៊ូ AC ដោយគ្រោងចំណាយថវិកាសរុបប្រមាណ ៥៦.១លានដុល្លារអាមេរិក ជាហិរញ្ញប្បទានពីរដ្ឋាភិបាលសាធារណរដ្ឋកូរ៉េ រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីននិងយុទ្ធភ័ណ្ឌមិនទាន់ផ្ទុះ និងពន្ធអាករ៕

ភ្នំពេញ ៖ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ បានប្រកាសពីថ្ងៃ សុក្រ ថា សវនាការក្នុងសប្ដាហ៍ទី៥ គឺនៅថ្ងៃពុធ និងព្រហស្បតិ៍ នាសប្ដាហ៍ក្រោយ តុលាការនឹងបន្តសួរដេញដោលលោក កឹម សុខា អតីតប្រធានបក្សប្រឆាំងអំពីអង្គហេតុត្រូវវ៉ូវគ្នាសម្ងាត់ជាមួយបរទេសចាប់តាំងពីពេលបង្កើតគណបក្សសង្គ្រោះជាតិ មុនពេលបោះឆ្នោត និងក្រោយការបោះឆ្នោត២០១៣ រហូតដល់ពេលចាប់ខ្លួន។

លោក កុយ សៅ ដែលជាប្រធានក្រុមប្រឹក្សាជំនុំជម្រះថ្លែងដូចនេះ មុនពេលលោកប្រកាស បិទសវនាការដែលបានធ្វើឡើងរយៈពេលតែ ១ ព្រឹកនៅថ្ងៃទី៧ កុម្ភៈ និងជាសវនាការថ្ងៃទី៨ សប្ដាហ៍ទី៤ ពាក់ព័ន្ធនឹងរឿងសន្ទិដ្ឋភាពជាមួយបរទេសរបស់លោក កឹម សុខា។

សវនាការចាប់ផ្ដើមដំបូងលោក កុយ សៅ ប្រាប់ឱ្យចាក់ខ្សែវីដេអូខ្លីៗជិត ២០ ដែលជាវីដេអូបង្ហាញពីសកម្មភាព និងការថ្លែងរបស់លោក កឹម សុខា។ ក្នុងចំណោមវីដេអូទាំង នោះ មានខ្លះបង្ហាញពីការថ្លែងសារពាក់ព័ន្ធនឹងសិទ្ធិមនុស្សកាលពីលោក កឹម សុខា ធ្វើជាប្រធានមជ្ឈមណ្ឌលសិទ្ធិមនុស្ស។ វីដេអូខ្លះទៀតបង្ហាញពីលោក កឹម សុខា ថ្លែងសារនយោបាយក្នុងពេលធ្វើសមាជបក្ស និងការថ្លែងតាមវេទិកាជួបជាមួយអ្នកគាំទ្រកាលលោកធ្វើជាប្រធាន គណបក្សសិទ្ធិមនុស្ស។

មានវីដេអូមួយបង្ហាញពីសកម្មភាពលោក កឹម សុខា ដឹកនាំការដើរយាត្រាផ្សព្វផ្សាយដល់ប្រជាពលរដ្ឋអំពីការចេះប្រើប្រាស់សិទ្ធិផ្សេងៗនៅពេលលោកធ្វើជាប្រធានមជ្ឈមណ្ឌលសិទ្ធិមនុស្ស ហើយសារនយោបាយគឺពាក់ព័ន្ធនឹងគោលជំហររបស់លោកគណបក្សសិទ្ធិ មនុស្ស និងគោលជំហររបស់អតីតគណបក្សសង្គ្រោះជាតិជុំវិញមូលហេតុបង្កើតគណបក្សទាំង ២ នេះ។

សូមជម្រាបថា ក្នុងរយៈពេលសវនាការប៉ុន្មានសប្ដាហ៍មកនេះ តុលាការបានបើកការសួរ ដេញដោលលោក កឹម សុខា អំពីសកម្មភាពរបស់លោកចាប់តាំងពីក្លាយជាតំណាងរាស្ដ្រដំបូងក្នុងឆ្នាំ ១៩៩៣។ ការឈប់ធ្វើនយោបាយមកបង្កើតមជ្ឈមណ្ឌលសិទ្ធិមនុស្ស និងការ បង្កើតគណបក្សសិទ្ធិមនុស្សរហូតដល់ឆ្នាំ២០១២៕

ភ្នំពេញ ៖ ក្រសួងបរិស្ថាន បានរៀបចំវេទិកាកេសរកូលលើកទី១ ជាមួយនឹងការដាក់តាំងពិពរណ៌កេសរកូល (ផ្កាអ័រគីដេ) ជាច្រើនប្រភេទដល់អ្នកចូលរួមទស្សនា។ បើតាម លោក អ៊ាង សុផល្លែត រដ្ឋលេខាក្រសួងបរិស្ថាន បានបញ្ជាក់ថា កេសរកូល រឺផ្ការអ័រគីដេនៅកម្ពុជាបច្ចុប្បន្ន មានរហូតជាង៥០០ប្រភេទ។

លោក អ៊ាង សុផល្លែត រដ្ឋលេខាធិការក្រសួងបរិស្ថាន បានថ្លែងថា វេទិកានេះគឺជាឱកាសសម្រាប់ស្វែងយល់ និងដកពិសោធលើការងារ ទៅវិញ ទៅមក លើការងារអភិរក្សធនធានពន្ធុ (Plant Genetic) ក៏ដូចជាវិស័យបរិស្ថាននិងធនធានធម្មជាតិ ដែលជាការបោះជំហានថ្មីថែមមួយកម្រិតរវាងព្រះ រាជាណាចក្រកម្ពុជា និងសាធារណរដ្ឋបារាំង បន្ថែមពីលើក្របខណ្ឌនៃកិច្ចសហប្រតិបត្តិការយ៉ាងជិតស្និទ្ធរវាងប្រទេសទាំងពីរក្នុងវិស័យជាច្រើនទៀត។បច្ចុប្បន្ន នេះមន្ត្រីជំនាញនៃក្រសួងបរិស្ថានបានស្រាវជ្រាវ និងអភិរក្សកេសរកូល (ផ្កាអ័រគីដេ)បានចំនួន១៦០ប្រភេទ ខណៈប្រភេទកេសរកូលសរុបនៅក្នុងប្រ ទេសកម្ពុជាត្រូវគេប៉ានស្មានថាមានប្រមាណជាង ៥០០ ប្រភេទ។ កាលពីឆ្នាំ ២០១៨ រាជរដ្ឋាភិបាលបានសម្រេចបង្កើតមជ្ឈ មណ្ឌលស្រាវជ្រាវនិងអភិរក្សកេសរកូល សុខ អាន ភ្នំគូលែន ក្នុងគោលបំណងលើកកម្ពស់ការសិក្សាស្រាវជ្រាវ អភិរក្សកេសកូល អប់រំផ្សព្វផ្សាយពីតម្លៃនៃកេសរកូល និងទាក់ទាញភ្ញៀវទេសចរឱ្យមកទស្សនាកម្សាន្ត និងសំដៅធានាឱ្យបាននូវការគ្រប់គ្រងក្នុងតំបន់ការពារធម្មជាតិឱ្យមានប្រសិទ្ធភាព ព្រមទាំងការលើកកម្ពស់ជីវភាពសហគមន៍មូលដ្ឋាន។

លោក អ៊ាង សុផល្លែត បានមានប្រសាសន៍ថា មជ្ឈមណ្ឌលនេះ ផ្តល់អត្ថប្រយោជន៍ ក្នុងការរក្សា និងស្ដារពូជកេសរកូលព្រៃក្នុងស្រុក ប្រមូលផ្ដុំសំណាកកេសរកូលរស់ កត់ត្រា និងធ្វើសារពើភ័ណ្ឌជាកន្លែងសម្រាប់អ្នកសិក្សាស្រាវជ្រាវអនុវត្តដោយផ្ទាល់ ផ្ដល់ចំណេះដឹង និងព័ត៌មានវិទ្យាសាស្រ្តពីកេសរកូលព្រៃសម្រាប់មនុស្សជំនាន់ក្រោយ ភ្ជាប់ទំនាក់ទំនងមនុស្សនិងធម្មជាតិជាគោលដៅទេសចរណ៍ធម្មជាតិថ្មី បង្កើនជីវភាពរស់នៅរបស់សហគមន៍មូលដ្ឋាន ទទួលចំណេះដឹង ជំនាញ និងបទពិសោធន៍ពីអ្នកជំនាញជាតិ និងអន្តរជាតិ កៀរគរថវិកា សម្ភារ និងបច្ចេកទេសក្នុងការគ្រប់គ្រងធនធាន។ ក្រសួងបរិស្ថានមានបំណងប្រែក្លាយមជ្ឈមណ្ឌលនេះឱ្យក្លាយទៅជាផលិតផលទេសចរថ្មីបែបធម្មជាតិ បន្ថែមលើផលិតផលទេសចរបេតិកភណ្ឌវប្បធម៌ដ៏សម្បូរណ៍បែបនៅក្នុងរមណីយដ្ឋានអង្គរ ខេត្តសៀមរាប។ វាក៏នឹងរួមចំណែកកាត់បន្ថយការពឹងផ្អែករបស់សហគមន៍មូលដ្ឋានដែលកំពុងរស់នៅជុំវិញតំបន់នេះពីការកាប់ឈើ និងការទាញយកធនធានធម្មជាតិ ជីវៈចម្រុះ មកជាអ្នករៀបចំសេវាកម្មទេសចរ និងផលិតផលិតផលទេសចរនៅពេលដែលមជ្ឈមណ្ឌលនេះត្រូវបានអភិវឌ្ឍន៍ពេញលេញ និងគ្រប់ជ្រុងជ្រោយស្របតាមផែនការមេ៕

ភ្នំពេញ ៖ នាវេលាម៉ោង ១៤:១៥ នាទីរសៀល ថ្ងៃទី០៩ ខែកុម្ភៈ ឆ្នាំ២០២០ នៅវិមានព្រឹទ្ធសភា សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានទទួលជួបសវនាការជាមួយនឹងឯកឧត្តម ប៊ុនញ៉ាំង វរជិត (Bounnhang Vorachith) ប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ ក្នុងឱកាសដែលឯកឧត្តមដឹកនាំគណៈប្រតិភូមកបំពេញទស្សនកិច្ចជាផ្លូវរដ្ឋនៅព្រះរាជាណាចក្រកម្ពុជា។

នៅក្នុងឱកាសនោះ ឯកឧត្តម ប៊ុនញ៉ាំង វរជិត បានថ្លែងអំណរគុណយ៉ាងជ្រាលជ្រៅចំពោះសម្តេចប្រធានព្រឹទ្ធសភា ដែលបានទទួលស្វាគមន៍ដោយមិត្តភាព ក្នុងនាមជាប្រទេសភូមិផងរបងជាមួយគ្នា និងជាបងប្អូន។ ជាមួយគ្នានេះ ឯកឧត្តមប្រធានរដ្ឋ បានពាំនាំនូវការផ្តាំផ្ញើសួរសុខទុក្ខពីលោកជំទាវប្រធានរដ្ឋសភាឡាវ ជូនចំពោះសម្តេចវិបុលសេនាភក្តី សាយ ឈុំ ប្រធានព្រឹទ្ធសភា។

ឯកឧត្តមប្រធានរដ្ឋ បានមានប្រសាសន៍ថា កាលពីពេលកន្លងទៅនេះ ទំនាក់ទំនង និងកិច្ចសហប្រតិបត្តិការរវាងព្រឹទ្ធសភា រដ្ឋសភា និងរដ្ឋាភិបាលនៃប្រទេសទាំងពីរ មានការផ្លាស់ប្តូរទស្សនកិច្ចគ្នាទៅវិញទៅមក និងមានទំនាក់ទំនង និងកិច្ចសហប្រតិបត្តិការជាមួយគ្នាជាច្រើនវិស័យ ជាពិសេសវិស័យអប់រំ វប្បធម៌ ការពារជាតិ ការពារសន្តិសុខសាធារណៈ ក៏ដូចជាបញ្ហាព្រំដែន។
ឯកឧត្តមប្រធានរដ្ឋ បានសម្តែងនូវសេចក្តីរីករាយដោយមើលឃើញថា ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរកាន់តែស៊ីជម្រៅ និងមានការរីកចម្រើនជានិច្ច។ ចំពោះបញ្ហាព្រំដែន ឯកឧត្តមប្រធានរដ្ឋ បានគាំទ្រការដោះស្រាយរួមគ្នារបស់នាយករដ្ឋមន្ត្រីនៃប្រទេសទាំងពីរ។ កាលពីពេលថ្មីៗនេះ នាយករដ្ឋមន្ត្រីឡាវ ក៏បានអញ្ជើញមកទស្សនកិច្ចនៅប្រទេសកម្ពុជា ហើយភាគីទាំងពីរក៏បានលើកកម្ពស់ទំនាក់ទំនង និងកិច្ចសហប្រតិបត្តិការជាដៃគូយុទ្ធសាស្ត្រគ្រប់ជ្រុងជ្រោយ គង់វង្ស និងយូរអង្វែង។
ឯកឧត្តមប្រធានរដ្ឋ បានរម្លឹកថា ប្រទេសឡាវ និងប្រទេសកម្ពុជា មានទំនាក់ទំនង និងកិច្ចសហប្រតិបត្តិការជាមួយគ្នាតាំងពីបុរាណកាលមក។ ឯកឧត្តមបានបញ្ជាក់ និងអះអាងថា ប្រទេសទាំងពីរជានិច្ចជាកាលតែងតែរួមគ្នាថែរក្សាសាមគ្គីភាព មិត្តភាព និងកិច្ចសហប្រតិបត្តការល្អជាមួយគ្នា។ ទោះបីជាប្រទេសទាំងពីរជួបឧបសគ្គយ៉ាងណាក៏ដោយ ក៏ប្រទេសទាំងពីរបានខិតខំដើម្បីសុខដុមរមនា សម្រាប់ជីវភាពរស់របស់ប្រជាជនឱ្យកាន់តែល្អប្រសើរឡើង។ ប្រទេសទាំងពីររួមគ្នាថែរក្សាការពារព្រំដែនឱ្យមានសន្តិសុខ ដើម្បីឱ្យព្រំដែនក្លាយជាព្រំដែនសន្តិ-ភាព មិត្តភាព និងកិច្ចសហប្រតិបត្តិការ។ បញ្ហាប្រឈម និងបញ្ហាគ្រឿងញៀន ការឆ្លងដែនខុសច្បាប់ ការជួញដូរខុសច្បាប់ ទាមទារឱ្យសមត្ថកិច្ចនៃប្រទេសទាំងពីរ ត្រូវខិតខំសហការជាមួយគ្នា ដើម្បីប្រឆាំងនឹងអំពើខុសច្បាប់នេះ។

ឯកឧត្តមប្រធានរដ្ឋ បានមានប្រសាសន៍ថា ប្រទេសឡាវបានលក់អគ្គិសនីឱ្យប្រទេសកម្ពុជាចំនួន ១៩៥ មេហ្គាវ៉ាត់ ហើយបើតាមផែនការ ប្រទេសកម្ពុជាត្រូវការអគ្កិសនីចំនួន ៣.០០០ មេហ្គាវ៉ាត់បន្ថែមទៀតនៅឆ្នាំ២០៣០។ ក្នុងឱកាសនោះដែរ ឯកឧត្តមក៏បានសំណូមពរសម្តេចប្រធានព្រឹទ្ធសភា ជួយជំរុញឱ្យប្រទេសទាំងពីរមានការផ្លាស់ប្តូរទស្សនកិច្ចគ្នា ក៏ដូចជាការសហការគ្នាទៅវិញទៅមកឱ្យកាន់តែច្រើនថែមទៀត ដើម្បីបង្កើនការយោគយល់គ្នា។
សម្តេចវិបុលសេនាភក្តី សាយ ឈុំ បានថ្លែងអំណរគុណចំពោះប្រសាសន៍ដ៏ល្អប្រពៃរបស់ឯកឧត្តម ប៊ុនញ៉ាំង វរជិត និងសូមអរគុណលោកជំទាវប្រធានរដ្ឋសភា នៃសាធារណរដ្ឋប្រជាធិបតេយ្យប្រជាមានិតឡាវ ដែលបានផ្តាំផ្ញើសួរសុខទុក្ខសម្តេចផ្ទាល់។
ក្នុងនាមព្រឹទ្ធសភា ប្រជាជនកម្ពុជា និងក្នុងនាមខ្លួនសម្តេចផ្ទាល់ សម្តេចវិបុលសេនាភក្តី សាយ ឈុំ បានសម្តែងនូវមនោសញ្ចេតនាសប្បាយរីករាយ និងសូមស្វាគមន៍ដ៏កក់ក្តៅបំផុតចំពោះឯកឧត្តមប្រធានរដ្ឋ និងគណៈប្រតិភូ ដែលបានអញ្ជើញមកបំពេញទស្សនកិច្ចជាផ្លូវរដ្ឋ នៅព្រះរាជាណាចក្រកម្ពុជា

សម្តេចប្រធានព្រឹទ្ធសភា បានវាយតម្លៃខ្ពស់ចំពោះដំណើរទស្សនកិច្ចផ្លូវរដ្ឋរបស់ឯកឧត្តមនៅព្រះរាជាណាចក្រកម្ពុជានាឱកាសនេះ និងសូមចាត់ទុកទស្សនកិច្ចនេះ ជាទស្សនកិច្ចប្រវត្តិសាស្រ្ត ដែលនាំមកនូវការពង្រឹងពង្រីកទំនាក់ទំនងមិត្តភាព សាមគ្គីភាពជាប្រពៃណី និងកិច្ចសហប្រតិបត្តិការលើគ្រប់វិស័យ ដើម្បីជាគុណប្រយោជន៍ដ៏ធំធេងសម្រាប់ប្រជាជន និងប្រទេសទាំងពីរ ដែលមានតាំងពីយូរលង់ណាស់មកហើយ។

សម្តេចប្រធានព្រឹទ្ធសភា បានមានប្រសាសន៍ថា ប្រទេសកម្ពុជា និងប្រទេសឡាវបានភ្ជាប់ទំនាក់ទំនងការទូតក្រោមស្នាព្រះហស្ថរបស់ព្រះករុណា “ព្រះបរមរតនកោដ្ឋ” អតីតព្រះមហាក្សត្រ នៃព្រះរាជាណាចក្រកម្ពុជា និងថ្នាក់ដឹកនាំឡាវជំនាន់មុន។ ប្រជាជននៃប្រទេសទាំងពីរធ្លាប់មានប្រវត្តិតស៊ូ ពុះពារឆ្លងកាត់ឧបសគ្គ លំបាក និងជួយគ្នាទៅវិញទៅមក។ ប្រជាជននៃប្រទេសទាំងពីរមានប្រពៃណីស្រឡាញ់រាប់អានគ្នាទៅវិញទៅមក និងមានទំនៀមទម្លាប់ ប្រពៃណី វប្បធម៌ប្រហាក់ប្រហែលគ្នា និងកាន់ព្រះពុទ្ធសាសនាដូចគ្នា ព្រមទាំងរួមគ្នាប្រើប្រាស់ទន្លេមេគង្គធ្វើជាប្រភពទឹកសម្រាប់ការរស់នៅរៀងៗខ្លួន។

សម្តេចប្រធានព្រឹទ្ធសភា បានសម្តែងនូវសេចក្តីសប្បាយរីករាយដោយមើលឃើញថា ចំណង មិត្តភាព សាមគ្គីភាព និងកិច្ចសហប្រតិបត្តិការរវាងប្រជាជន និងប្រទេសទាំងពីរ មានការរីកចម្រើនឥតឈប់ឈរ ហើយទំនាក់ទំនងប្រទេសទាំងពីរ ត្រូវបានលើកកម្ពស់ជា “ដៃគូយុទ្ធសាស្រ្តគ្រប់ជ្រុងជ្រោយ និងយូរអង្វែង”។

សម្តេចប្រធានព្រឹទ្ធសភា បានបញ្ជាក់ថា ប្រទេសកម្ពុជា និងប្រទេសឡាវ គឺជាដៃគូដ៏ល្អ ជាមិត្តល្អ ជាបងប្អូនល្អ និងជាអ្នកជិតខាងល្អ។ ក្នុងនាមព្រឹទ្ធសភា សម្តេចសូមគាំទ្រទាំងស្រុងរាល់កិច្ចព្រមព្រៀង និងអនុស្សរណៈដែលរដ្ឋាភិបាលនៃប្រទេសទាំងពីរ បានចុះហត្ថលេខា និងសូមលើកទឹកចិត្តឱ្យរដ្ឋាភិបាលនៃប្រទេសទាំងពីរ ជំរុញការអនុវត្តឱ្យមានប្រសិទ្ធភាព ដើម្បីជាគុណប្រយោជន៍ក្នុងការអភិវឌ្ឍ ប្រកបដោយមោទនភាព វិបុលភាព សម្រាប់ប្រទេសទាំងពីរ ក៏ដូចជាចូលរួមចំណែកថែរក្សាសុខសុវត្ថិភាព នៅក្នុងតំបន់ និងអន្តរជាតិ។

សម្តេចប្រធានព្រឹទ្ធសភា បានសម្តែងនូវការអបអរសាទរចំពោះលទ្ធផលការធ្វើខណ្ឌសីមា និងបោះបង្គោល ព្រំដែនបានរួចរាល់ចំនួន៨៦%នៃខ្សែព្រំដែនរួម នៅសល់១៤%ទៀត ប្រទេសទាំងពីរ បាននឹងកំពុងយកចិត្តទុកដាក់ដោះស្រាយ។ លទ្ធផល ដែលសម្រេចបានគួរជាទីមោទនៈនេះ បញ្ជាក់ឱ្យឃើញពីការខិតខំប្រឹងប្រែងយ៉ាងពេញទំហឹងក្នុងសុឆន្ទៈមោះមុត យ៉ាងពិតប្រាកដក្នុងការដោះស្រាយបញ្ហាព្រំដែនរវាងប្រទេសទាំងពីរ ដើម្បីប្រែក្លាយខ្សែព្រំដែនជាព្រំដែន សន្តិភាព មិត្តភាព សហប្រតិបត្តិការ និងការអភិវឌ្ឍលើគ្រប់វិស័យ នាំមកនូវភាពសុខសាន្តជូនប្រទេសជាតិ និងប្រជាជននៃប្រទេសទាំងពីរយូរអង្វែងជាមរតកសម្រាប់អ្នកជំនាន់ក្រោយ។

សម្តេចប្រធានព្រឹទ្ធសភា បានគូសបញ្ជាក់ថា ទំនាក់ទំនង និងកិច្ចសហប្រតិបត្តិការរវាងព្រឹទ្ធសភាកម្ពុជា និងរដ្ឋសភាឡាវ ត្រូវបានលើកកម្ពស់ឥតឈប់ឈរ។ ទន្ទឹមនឹងនេះ ក្រុមសមាជិកសភាដែលទទួលបន្ទុកការងារ CLV ក៏បានធ្វើការជួបគ្នាជាបន្តបន្ទាប់ ដើម្បីរួមចំណែកដល់ការអភិវឌ្ឍតំបន់ត្រីកោណកម្ពុជា-ឡាវ-វៀតណាម ព្រមទាំងគាំទ្រគ្នាទៅវិញទៅមកនៅក្នុងក្របខ័ណ្ឌអន្តរសភា ជាពិសេស AIPA, IPU, APPF។

សម្តេចប្រធានព្រឹទ្ធសភា បានអបអរសាទរយ៉ាងក្លៀវក្លាចំពោះសមិទ្ធផលដ៏ធំធេង ដែលប្រជាជនឡាវសម្រេច បានក្រោមការដឹកនាំរបស់ឯកឧត្តមប្រធានរដ្ឋ និងសូមប្រសិទ្ធពរជូនបក្សប្រជាជនបដិវត្តឡាវ រដ្ឋាភិបាល និងប្រជាជនឡាវ ទទួលបានជោគជ័យឧត្តុង្គឧត្តម និងថ្មីៗបន្ថែមទៀត ដើម្បីបុព្វហេតុអភិវឌ្ឍន៍ ប្រកបដោយមោទនភាព និងវិបុលភាព សម្រាប់ប្រជាជនឡាវជានិច្ចនិរន្តរ៍តទៅ។

សម្តេចប្រធានព្រឹទ្ធសភា បានប្រសិទ្ធពរជូនគណៈប្រតិភូ ស្នាក់នៅ និងបំពេញទស្សនកិច្ចនៅព្រះរាជាណាចក្រកម្ពុជា សូមឱ្យមានសុខភាពល្អ បរិបូរណ៍ និងទទួលបានជ័យជម្នះ៕

ភ្នំពេញ ៖ រដ្ឋបាល​រាជធានី​ភ្នំពេញ នឹង​កែ​សម្រួល​ប្រព័ន្ធ​ចរាចរណ៍​ត្រង់​ចំណុច​ប្រសព្វ​ក្តាន់ពីរ​រវាង​មហាវិថី​ស៊ីធីសេនធ័រ (ផ្លូវ​ R6) និង​មហា​វិថី​សាធារណរដ្ឋ​ឆេក ក្នុងនោះ​នឹង​ធ្វើការ​កែសម្រួល​ផ្ទៃសួនច្បារ​ក្តាន់ពីរ​មួយ​ផ្នែក​ទៅជា​រង្វង់មូលក្តាន់ពីរ និង​ស្ថាបនា​ផ្លូវជុំវិញ​រង្វង់មូលនេះ ដោយ​រក្សា​រូបសំណាក​ក្តាន់ពីរ ឱ្យ​នៅ​ដដែល។ នេះបើតាម​សេចក្តីជូនដំណឹង​របស់​រដ្ឋបាល​រាជធានី​ភ្នំពេញ នៅថ្ងៃទី​១០ ខែកុម្ភៈ ឆ្នាំ​២០២០។

ជាមួយគ្នានេះ រដ្ឋបាល​រាជធានី ក៏ស្ថាបនា​ពង្រីក​កំណាត់​​មហាវិថី​សហព័ន្ធ​រុស្ស៊ី​ចិញ្ចើម​ខាងជើង ចាប់ពី​ស្ថានីយ​ប្រេង​ឥន្ធនៈតូតាល់ ដល់​ផ្លូវកែងមហា​វិថីស៊ីធី​សេនធ័រ​ចូល​ទីក្រុងរណប​ភ្នំពេញ ស៊ីធី សែនធ័រ (អតីតតំបន់​អភិវឌ្ឍ​បឹងកក់) និង​ដាក់​លូ​ទំហំ​ ១ម៉ែត្រ ដើម្បី​រំដោះ​ទឹកចេញពី​ដងមហាវិថី​ព្រះមុនីវង្ស និង​មហាវិថី​សហព័ន្ធ​រុស្ស៊ី។

ការងារខាងលើនេះធ្វើឡើង​បន្ទាប់ពី​រដ្ឋបាលរាជធានី​ភ្នំពេញបាន​ពិនិត្យ​ឃើញ​ពីការកកស្ទះចរាចរណ៍ ខ្លាំង​នៅលើ​កំណាត់​មហាវិថី​សហព័ន្ធរុស្ស៊ី ចាប់​ពី​ចំណុច​ប្រសព្វ​ក្តាន់ពីរ រហូតដល់​ស្តុបបេកាសេ។ រដ្ឋបាល​រាជធានី​ ចាប់ផ្តើម​អនុវត្ត​ការដ្ឋាន​ខាងលើ ចាប់ពីថ្ងៃជូនដំណឹង​នេះតទៅ៕

ភ្នំពេញ ៖ ​នៅម៉ោង​ជាង១រំលង​អធាត្រ​ឈានចូល​ថ្ងៃទី៩ ខែ​កុម្ភៈ ឆ្នាំ​២០២០ សមត្ថកិច្ចបានបើកប្រតិបត្តិការ​បង្ក្រាប​គ្រឿងញៀន​នៅ​មណ្ឌល​កម្សាន្ត​ក្លិប​ផ្លាយ នៅ​ផ្លូវកែវ​ចិន្តា​ភូមិ៣ សង្កាត់​ជ្រោយ​ចង្វា ខណ្ឌ​ជ្រោយចង្វា រាជធានី​ភ្នំពេញ ដោយបានឃាត់ខ្លួន​មនុស្ស​ចំនួន ៧០​នាក់ រកឃើញ​គ្រឿងញៀន​គ្រប់ប្រភេទ​មួយចំនួន​ដូចជា ៖ ថ្នាំក្រវី​ជាង១០០កញ្ចប់តូច​នឹងគ្រាប់​ចំនួន ៥​កញ្ចប់ រួមនិង​ឧបករណ៍​ប្រើប្រាស់​មួយចំនួន ម៉ូតូ​៣៧គ្រឿង រថយន្ត​៧គ្រឿង។ 

ការ​បង្ក្រាប​នេះ ដឹកនាំ​បញ្ជា​ផ្ទាល់​ដោយ​លោក​ឧត្តម​សេនីយ៍ឯក ស ថេត អគ្គស្នងការ​រង​នគរបាលជាតិ និងជា​ស្នងការ​នគរបាល​រាជធានី​ភ្នំពេញ និងមាន​ការចូលរួម​ពីកម្លាំង​សមត្ថកិច្ច​ចម្រុះ​មានដូចជា ការិយាល័យ​ព្រហ្មណ្ឌ​កម្រិតស្រាល កម្លាំង​អន្តរាគមន៍ នឹង​សមត្ថកិច្ច​ខណ្ឌជ្រោយចង្វារ។

លោក​ឧត្តមសេនីយ៍ឯក ស ថេត អគ្គស្នងការ​រង​នគរបាល​ជាតិ និងជា​ស្នងការ​នគរបាល​រាជធានី​ភ្នំពេញបានឲ្យដឹងនៅ​ព្រឹក​ថ្ងៃទី១០ ខែ​កុម្ភៈនេះ​ថា ប្រតិបត្តិការ​បង្ក្រាប​មណ្ឌល​កម្សាន្ត​ក្លិបផ្លាយ ឃាត់ខ្លួន​មនុស្ស​ចំនួន ៧០​នាក់ និង​រកឃើញ​គ្រឿងញៀន​មួយ​ចំនួន។ ដោយលោក​បានបញ្ជាក់​ថា ក្នុង​ចំណោម​មនុស្ស​ចំនួន ៧០​នាក់ មាន​អ្នក​ប្រើប្រាស់​គ្រឿងញៀន និងអ្នក​មិន​ប្រើប្រាស់។ ចំពោះ​អ្នក​មិនប្រើប្រាស់ គឺ​អប់រំ ណែនាំ ឲ្យត្រឡប់​ទៅផ្ទះវិញ។ ចំណែក​អ្នកប្រើប្រាស់​គឺឲ្យពួកគាត់​ស្ម័គ្រចិត្ត​ទៅទទួល​ការព្យាបាល ឬ​បន្សាប។ លោក​ឧត្តមសេនីយ៍​ឯក ស ថេត បាន​បញ្ជាក់​ថា ចំពោះ​អ្នកចែកចាយ​គ្រឿងញៀន​នៅក្នុង​មណ្ឌល​កម្សាន្ត​ក្លិបផ្លាយ គឺអនុវត្ត​ទៅតាម​ច្បាប់ ដោយមិន​លើកលែង​ឡើយ។

យោងតាមរបាយការណ៍បានបង្ហាញថា ជនសង្ស័យចំនួនពីរនាក់ ដែលចែកចាយគ្រឿងញៀន គឺទី១. ឈ្មោះ ឃាង ដារ៉ា ភេទប្រុស អាយុ២២ឆ្នាំ នៅភូមិក្តីចាស់ ឃុំព្រែកលួង ស្រុកខ្សាច់កណ្តាល និងទី២. រ័ត្ន ធានី ភេទស្រី អាយុ៣៧ឆ្នាំ ជាមេការមណ្ឌលកម្សាន្តក្លិបផ្លាយ។ វត្ថុតាងរកឃើញមានដូចជាៈ ក្រាមពណ៌ស (ខេតាមីន) ចំនួន ១០១កញ្ចាប់ ថ្នាំគ្រាប់ពណ៌ស្លែ ចំនួន ៣២គ្រាប់ ថ្នាំគ្រាប់ពណ៌ត្រួយចេក ចំនួន ១០គ្រាប់ ជញ្ជីងថ្លឹងចំនួនមួយ៕