ភ្នំពេញ ៖ នាយករដ្ឋមន្ត្រីកម្ពុជា បានប្រកាសជាសាធារណៈថា នឹងមានការកែសម្រួលសមាសភាពគណៈរដ្ឋមន្ត្រី ដើម្បីជំរុញប្រសិទ្ធភាពការងារ និងកែប្រែភាពអសកម្មមួយចំនួននៅក្នុងរដ្ឋាភិបាល នៅបន្ទាប់ពីបានពិនិត្យឃើញថា ការអនុវត្តកន្លងមករបស់ក្រសួងខ្លះ មានភាពស្ពឹកស្រពន់។
សម្តេចនាយករដ្ឋមន្ត្រី បានប្រកាសបបែននេះនៅក្នុងកិច្ចប្រជុំរបស់ឧត្តមក្រុមប្រឹក្សាពិគ្រោះ និងផ្តល់យោបល់ និងសន្និសីទសារព័ត៌មាន នៅវិមានសន្តិភាពកាលពីថ្ងៃទី ២៤ ខែកុម្ភៈ ម្សិលមិញ។
សម្តេចនាយករដ្ឋមន្ត្រី បានថ្លែងថា ៖ «ខ្ញុំគ្រាន់តែឱ្យសញ្ញាថា នឹងមានការកែសម្រួលគណៈរដ្ឋមន្ត្រីក្នុងពេលខាងមុខមិនជាយូរប៉ុន្មាន បន្ទាប់ពីច្បាប់ស្តីពីការបង្កើតក្រសួងឧស្សាហកម្ម វិទ្យាសាស្ត្របច្ចេកទេស និងនវានុវត្តន៍។ ឆ្លៀតពេលនោះយើងត្រូវមានការបោះឆ្នោតជ្រើសរើសរដ្ឋមន្ត្រី ហើយរដ្ឋមន្ត្រីនោះក៏នៅតែជាឯកឧត្តម ទេសរដ្ឋមន្ត្រី ចម ប្រសិទ្ធ ដដែលទេ ក៏ប៉ុន្តែអាចនឹងមានក្រសួងមួយចំនួនមានការកែសម្រួល …ការកែសម្រួលវាជារឿងធម្មតាទេ នៅប្រទេសខ្លះមានការដូររហ័ស តែយើងក៏នៅទុកពេលដើម្បីឲ្យធ្វើការ»។
ទោះជាយ៉ាងនេះក្តី សម្តេចតេជោ បានថ្លែងថា៖ «… ប៉ុន្តែក៏ការកែសម្រួលនោះ ក៏មិនខ្លាំងរហូតដល់រំលាយចោលរដ្ឋាភិបាលនោះដែរ។ ព្រោះយើងគ្រាន់តែឃើញថា មានភាពស្ពឹកស្រពន់នៅកន្លែងខ្លះ ហើយកន្លែងខ្លះប្រសិទ្ធភាពវាតិច ដែលមិនទាន់ឆ្លើយតបនឹងការចង់បានរបស់យើង ដែលវាគួរតែលឿនជាង ក៏ប៉ុន្តែបែរជាត្រូវបាន ១០០ភាគរយ តែបានតែ ៧០ភាគរយ ដែលត្រូវតែកែដែរ»។
គួរជម្រាបថា បើយោងតាមរដ្ឋធម្មនុញ្ញនៃព្រះរាជាណាចក្រកម្ពុជា បានចែងថា គណៈរដ្ឋមន្ត្រីត្រូវមានសមាសភាព នាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និងរដ្ឋលេខាធិការ៕

ខេត្តសៀមរាប ៖ រាជរដ្ឋាភិបាលបានសម្រេចពន្យាររយៈពេលនៃសំបុត្រចូលទស្សនា តំបន់អង្គរសម្រាប់ភ្ញៀវទេសចរបរទេសទៅតាមប្រភេទសំបុត្រចំនួន៣ ផ្សេងពីគ្នា ដូចជា ៖ ១.សំបុត្រសម្រាប់រយៈពេល១ថ្ងៃ អាចចូលទស្សនាបានរយៈពេល២ថ្ងៃ ២.សំបុត្រសម្រាប់រយៈពេល៣ថ្ងៃ អាចចូលទស្សនាបានរយៈពេល៥ថ្ងៃ និង៣.សំបុត្រសម្រាប់រយៈពេល ៧ថ្ងៃ អាចចូលទស្សនារយៈពេល១០ថ្ងៃជាដើម។ នេះបើយោងតាមខ្លឹមសារនៃលិខិតរបស់រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ ដែលបានផ្ញើជូនអគ្គនាយកគ្រឹះស្ថានអង្គរនៅថ្ងៃទី២៥ ខែកុម្ភៈ ឆ្នាំ២០២០នេះ។

ក្នុងលិខិតនេះ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកអគ្គបណ្ឌិតសភា ចារ្យ អូន ព័ន្ធមុនីរ័ត្ន បានលើកឡើងថា យោងតាមប្រសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ក្នុងកិច្ចប្រជុំក្រុមប្រឹក្សាពិគ្រោះ និងផ្តល់យោបល់ នាថ្ងៃទី២៤ ខែកុម្ភៈ ឆ្នាំ២០២០ និងចំណារដ៏ខ្ពង់ខ្ពស់ របស់សម្តេចតេជោនាយករដ្ឋមន្ត្រី ចុះថ្ងៃទី២១ ខែកុម្ភៈ ឆ្នាំ២០២០ ទាក់ទងទៅនឹងវិធានការសម្រួលផល ប៉ះពាល់មកលើវិស័យទេសចរណ៍នៅក្នុងខេត្តសៀមរាបនោះ សូមលោកអគ្គនាយកគ្រឹះស្ថានអង្គរជ្រាប ថា ដើម្បីជួយលើកស្ទួយវិស័យទេសចរណ៍ និងទាក់ទាញភ្ញៀវទេសចរបរទេសឱ្យបន្តស្នាក់នៅក្នុងព្រះ រាជាណាចក្រកម្ពុជាកាន់តែបានច្រើនថ្ងៃ ស្របពេលដែលវិស័យទេសចរណ៍នៅក្នុងតំបន់ និងនៅប្រទេស កម្ពុជា បានទទួលរងនូវផលប៉ះពាល់ ក្នុងអំឡុងពេលនៃការផ្ទុះឡើងនូវជំងឺ ខូវីដ-19 ដោយសារភ្ញៀវទេស ចរបរទេសចម្រុះជាតិសាសន៍បានផ្អាក ឬលុបចោលការធ្វើដំណើរទេសចរណ៍របស់ខ្លួន ពិសេសជនជាតិចិន៕

ភ្នំពេញ ៖ សម្តេចនាយករដ្ឋមន្ត្រីកម្ពុជា បានថ្លែងក្រើនរំលឹកដល់មន្ត្រីរាជការក្នុងស្ថាប័នរដ្ឋទាំងអស់ ត្រូវតែបម្រើរាស្ត្រដោយភាពស្មោះត្រង់ និងមិនត្រូវតាំងខ្លួនជាចៅហ្វាយនាយលើប្រជាពលរដ្ឋនោះឡើយ។ សម្តេចតេជោ ក៏ក្រើនរំលឹកផងដែរថា កុំឲ្យភរិយាលូកដៃចូលក្នុងកិច្ចការរបស់ប្តី នាំឲ្យប៉ះពាល់ដល់ប្រសិទ្ធភាពការងាររបស់ស្ថាប័នរដ្ឋ។

នៅចំពោះមុខមន្ត្រីរាជរដ្ឋាភិបាល សិស្សមន្ត្រីជាន់ ខ្ពស់ និង សិស្សមន្ត្រីក្រមការ នៃសាលាភូមិន្ទរដ្ឋបាលដែលទើបបញ្ចប់ការសិក្សា នៅព្រឹកថ្ងៃទី២៥ ខែកុម្ភៈ នាវិទ្យាស្ថានជាតិអប់រំ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាស់តឿន ក្រើនរំ លឹកមន្ត្រីរាជការទំាងអស់ កុំពើងទ្រូងដាក់រាស្ត្រ ប៉ុន្តែត្រូវបំរើពលរដ្ឋដោយស្មោះត្រង់ និងកុំតាំងខ្លួនជាចៅហ្វា យនាយរបស់ពលរដ្ឋ។ រាជរដ្ឋាភិបាលកម្ពុជា នឹងមិនអាចបន្តបណ្តែតបណ្តោយ ទុកអោយមន្ត្រី ដែលតាំងខ្លួន ជាចៅហ្វាយពលរដ្ឋអាចបន្តការងាររបស់ខ្លួនតទៅទៀតបានទេ គឺត្រូវដល់ពេលវះកាត់មន្ត្រីទាំងនោះហើយ។

សម្តេចតេជោ សង្កត់ធ្ងន់ថា ធ្វើជាមន្ត្រី ត្រូវផ្តល់សេចក្តីទុកចិត្តដល់ប្រជាពលរដ្ឋ មិនត្រូវធ្វើឲ្យពលរដ្ឋស្អប់ខ្ពើមនោះទេ ព្រោះវានឹងប៉ះពាល់ដល់កិច្ចខិតខំប្រឹង ប្រែងរបស់រាជរដ្ឋាភិបាល ក្នុងការធ្វើកំណែទម្រង់រដ្ឋ។ សម្តេចតេជោ ក៏ប្រាប់ឲ្យ មន្ត្រីទំាងអស់ខិតខំបំពេញការងាក្នុងតួរនាទីរបស់ខ្លួនអោយបានល្អ ទៅតាមច្បាប់ដែលបានកំណត់ ដោយមិនត្រូវវរងចាំតែអនុសាសន៍របស់ថ្នាក់ដឹក នាំនោះទេ។

ក្រៅពីការដាស់តឿនមន្ត្រីរាជការ ឲ្យបំរើរាស្ត្រដោយភាពស្មោះត្រង់ហើយ នោះ សម្តេចតេជោ បានរំលឹកប្រាប់មន្ត្រី និងថ្នាក់ដឹកនាំតាមក្រសួងស្ថាប័នរដ្ឋនានា មិនត្រូវឲ្យភរិយា រឺកូនលូកដៃចូលក្នុងកិច្ចការក្រសួង ស្ថាប័នដែលខ្លួន កំពុងកាន់តំណែងដាច់ខាត។ ពិសេសមន្ត្រីថ្នាក់ដឹកនាំ ត្រូវបញ្ជៀសអោយបាននូវការប្រើប្រាស់អំណាចតួនាទីរបស់ខ្លូនពីសំណាក់ប្រពន្ឋ និងកូនដែល សម្តេចហៅថា មន្ត្រីស័ក្តិ ៣ ប្រពន្ឋស័ក្តិ ៤ និងកូនស័ក្តិ ៥។

លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារ ណៈ និងជាប្រធានក្រុមប្រឹក្សាភិបាលសាលាភូមិន្ទរដ្ឋ បាលបានបញ្ជាក់ថា សាលាភូមិន្ទរដ្ឋបាល ជាសាលាគោលខាងការបណ្តុះបណ្តាលភ្នាក់ងារនៃរដ្ឋបាលសាធារណៈ ទទួលបន្ទុកមុខងារមួយយ៉ាងសំខាន់ គឺជ្រើសរើស បណ្តុះបណ្តាល និងធ្វើវិក្រិត្យការមន្ត្រីរាជការដែលត្រូវបម្រើរដ្ឋបាលនៃព្រះរាជាណាចក្រកម្ពុជា ចូល រួម យ៉ាងសកម្មក្នុងកំណែទម្រង់រដ្ឋ និងត្រូវក្លាយទៅ ជាតួអង្គមិនលំអៀងនៃការប្រែប្រួល ជាអ្នកធានាពហុនិយម និងសន្តិភាពរបស់ប្រជាពលរដ្ឋ និងជាសសរគោលនៃការធ្វើទំនើបកម្មរបស់ប្រទេស។

គិតចាប់ពីឆ្នាំ១៩៩២ ដល់ឆ្នាំ២០១៩ សាលាបានបណ្តុះបណ្តាលសិស្សមន្ត្រីជាន់ខ្ពស់ សិស្សមន្ត្រីមធ្យម សិស្សមន្ត្រីក្រមការ, កម្ម សិក្សាការីមន្រ្តីជាន់ខ្ពស់, កម្មសិក្សាការីមន្រ្តីមធ្យម និងសិក្ខាកាមសរុប ១៣,០៥៥ នាក់ នារី ២,៨៣០នាក់៕

ភ្នំពេញ ៖ ឥស្សរជនបរទេសទីមួយ នោះគឺឯកអគ្គរដ្ឋទូតសហព័ន្ធរុស្ស៊ីប្រចាំព្រះរាជាណាចក្រកម្ពុជាលោក Dmitry TSVETKOV ដែលត្រូវបានរាជរដ្ឋាភិបាលកម្ពុជាសម្រេចតែងតាំងជាសមាជិកកិត្តិយស នៃរាជ បណ្ឌិត្យសភាកម្ពុជា ដោយពិធីប្រកាសគោរមងារជាសមាជិកកិត្តិយស នៃរាជបណ្ឌិត្យសភាកម្ពុជាជូន ឯកអគ្គរដ្ឋទូតសហព័ន្ធរុស្ស៊ីរូបនេះជាផ្លូវការ ធ្វើឡើងក្រោមអធិបតីភាពលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបណ្ឌិត សភាចារ្យ នៃរាជបណ្ឌិត្យសភាកម្ពុជា នៅរាជបណ្ឌិត្យសភាកម្ពុជា កាលពីរសៀលថ្ងៃទី២៤ កុម្ភៈ។

បើតាមការអះអាងរបស់លោកបណ្ឌិតសភាចារ្យ សុខ ទូច អនុប្រធានប្រចាំការក្រុមប្រឹក្សា បណ្ឌិតសភាចារ្យ និងជាប្រធានរាជបណ្ឌិត្យសភាកម្ពុជាថា ឯកអគ្គរដ្ឋទូតសហព័ន្ធរុស្ស៊ីប្រចាំព្រះរាជាណា
ចក្រកម្ពុជាឯកឧត្តម Dmitry TSVETKOV មានគុណសម្បត្តិក្នុងការបំពេញភារកិច្ចជាតំណាងស្ថានទូត សហព័ន្ធរុស្ស៊ី មានគុណបំណាច់ និងស្នាដៃក្នុងការដឹកនាំ គ្រប់គ្រងស្ថាប័ន សម្របសម្រួលកិច្ចសហ ប្រតិបត្តិការរវាងប្រទេសទាំងពីរ កម្ពុជា-រុស្ស៊ី ក៏ដូចជាការរឹតចំណងកិច្ចសហប្រតិបត្តិការរួមគ្នាលើកិច្ច ការងារស្រាវជ្រាវ បែបវិទ្យាសាស្ត្ររវាងរាជបណ្ឌិត្យសភាកម្ពុជា និងស្ថាប័នស្រាវជ្រាវរុស្ស៊ីជាដើម ទើបនាំឱ្យ រាជរដ្ឋាភិបាលកម្ពុជាសម្រេចតែងតាំងរូបលោកជាសមាជិកកិត្តិយស នៃរាជបណ្ឌិត្យសភាកម្ពុជាតែម្តង
ទៅ។

ដោយឡែកចំពោះលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីបានគូស បញ្ជាក់ថា ការផ្តល់គោរមងារជាសមាជិកកិត្តិយស នៃរាជបណ្ឌិតសភាកម្ពុជា ជូនឯកអគ្គរដ្ឋទូតសហព័ន្ធ រុស្ស៊ីនាពេលនេះ គឺជាការបង្ហាញអំពីគុណវុឌ្ឍិ និងគុណសម្បត្តិគ្រប់លក្ខណៈ តាមរយៈការខិតខំប្រឹងប្រែង អស់ពីកម្លាំងកាយចិត្តរបស់ឯកឧត្តមឯកអគ្គរដ្ឋទូត ដែលបានរួមចំណែកយ៉ាងសកម្មលើវិស័យអប់រំ ការ អភិវឌ្ឍ និងការជម្រុញការសិក្សាស្រាវជ្រាវវិទ្យាសាស្ត្ររវាងស្ថាប័នស្រាវជ្រាវ នៃរាជបណ្ឌិត្យសភាកម្ពុជា និងស្ថាប័នស្រាវជ្រាវ នៃសហព័ន្ធរុស្ស៊ី ជាពិសេសកិច្ចសហប្រតិបត្តិការលើវិស័យសំខាន់ៗជាច្រើនទៀត ជាមួយស្ថាប័ននានា នៃព្រះរាជាណាចក្រកម្ពុជា និងសហព័ន្ធរុស្ស៊ី

គួររំលឹកថា៖ ឯកអគ្គរដ្ឋទូតសហព័ន្ធរុស្ស៊ីប្រចាំព្រះរាជាណាចក្រកម្ពុជា ឯកឧត្តម Dmitry TSVETKOV គឺជាបុគ្គលដែលបានបញ្ចប់ការសិក្សាថ្នាក់បណ្ឌិតផ្នែកវិទ្យាសាស្រ្តនយោបាយពីសាកល វិទ្យាល័យទំនាក់ទំនងអន្តរជាតិក្រុងមូស្គូ។ ក្រៅពីភាសាកំណើត លោកអាចនិយាយ និងប្រើប្រាស់បាន បីភាសាយ៉ាងស្ទាត់ជំនាញ គឺភាសាខ្មែរ អង់គ្លេស និងភាសាបារាំង ហើយឯកឧត្តមក៏ជាបុគ្គលម្នាក់ដែល បានទទួលនូវកោតសរសើរ និងទទួលបាននូវគ្រឿងឥស្សរិយយសជាច្រើនពីរដ្ឋាភិបាលរុស្ស៊ីផងដែរ៕

ភ្នំពេញ ៖ លំនៅឋានប្រមាណ ១៥ខ្នង និង ៨០បន្ទប់ជួល នៅអមតាមអតីតផ្លូវរថភ្លើង ស្ថិតក្នុងភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ ត្រូវបានអគ្គិភ័យឆាប់ឆេះ នៅម៉ោង ៩និង២០នាទី ថ្ងៃទី២៥ ខែកុម្ភៈ ឆ្នាំ២០២០ បណ្តាលឲ្យខូចខាតស្ទើរទាំងស្រុង តែគ្មានមនុស្សណាម្នាក់រងគ្រោះថ្នាក់ទេ។ ក្នុងហេតុការណ័នេះ សមត្ថកិច្ច បានប្រើប្រាស់រថយន្តពន្លត់អគ្គិភ័យជាង ៤០គ្រឿង និងប្រើពេលជាងមួយម៉ោងទើបអាចពន្លត់បានទាំងស្រុង។

បើតាមរបាយការណ៍របស់សមត្ថកិច្ចនៅកន្លែងកើតហេតុ ភ្លើងបានឆេះផ្ទះអស់ចំនួន ១៥ខ្នង និង ៨០បន្ទប់ជួល។ មូលហេតុបណ្តាលមកពីផ្ទុះកំប៉ុងហ្គាស ពេលកំពុងដាំស្លរ ទើបបង្កជាអគ្គិភ័យ ឆាបឆេះឡើង តែគ្មានអ្នករងគ្រោះថ្នាក់ទេ។

គួររំឭកថា នៅវេលាម៉ោង ១ និង៣០នាទីយប់ រំលងអធ្រាត្រឈានចូលថ្ងៃទី៦ ខែមករា ឆ្នាំ២០២០ ផ្ទះប្រជាពលរដ្ឋអមតាមផ្លូវរថភ្លើងសង់ពីឈើប្រក់ស័ង្កសី ១៥ល្វែង ប្រមាណជា១៦៥បន្ទប់ ស្មើ ១៦៥គ្រួសារ ត្រូវបានអគ្គិភ័យឆាបឆេះអស់ទាំងស្រុង ស្ថិតនៅតាមបណ្តោយផ្លូវរថភ្លើង ក្រុមទី១ ភូមិសាមគ្គី សង្កាត់ទួលសង្កែទី១ ខណ្ឌឫស្សីកែវ៕

ភ្នំពេញ ៖ ក្រសួងកិច្ចការនារី បានចេញសេចក្ដីថ្លែងការណ៍មួយ បញ្ជាក់អំពីវិធានការលើកអ្នកលក់ផលិតផលតាមអនឡាញ ដែលបញ្ចេញ និងប្រើប្រាស់រូបភាពអាសអាភាស សិចស៉ីហួសប្រមាណ និងគោលការណ៍គោរពសិទ្ធិរបស់ស្ដ្រី។

តាមរយៈសេចក្ដីថ្លែងការណ៍ក្រសួងកិច្ចការនារី បានអះអាងថា វិធានការនេះបាននិងកំពុងទទួលការអបអរសាទរ ពីសំណាក់មហាជន ព្រោះជាវិធានការដើម្បីទប់ស្កាត់សកម្មភាពផ្សព្វផ្សាយ និងចែកចាយរូបភាពអាសអាភាស តាមបណ្ដាញសង្គមក្នុងចំណោមអ្នកប្រើប្រាស់ប្រព័ន្ធអនឡាញ ដែលភាគច្រើនជាក្រុមមនុស្សវ័យក្មេង សំដៅការពារសិទ្ធិ និងសេចក្ដីថ្លៃថ្នូររបស់មនុស្ស ជាពិសេសស្ដ្រី បង្កើនសុខុមាលភាពរបស់ប្រជាពលរដ្ឋ និងរក្សាការពារ លើកកម្ពស់ទំនៀមទម្លាប់ ប្រពៃណីដ៏ល្អរបស់ជាតិ៕

ភ្នំពេញ ៖ អគ្គិភ័យបានឆាបឆេះផ្ទះឈើលើថ្មក្រោមអស់ទាំងស្រុងខណះពេលម្ចាស់ផ្ទះកំពុងតែដេកលង់លក់មួយភាំង។ ហេតុការណ៏អគ្គីភ័យខាងលើនេះបានកើតឡើងកាលពីវេលាម៉ោង៥ និង២០ នាទីទៀបភ្លឺនាព្រឹកថ្ងៃទី២៥ខែកុម្ភះឆ្នាំ២០២០ស្ថិតនៅចំណុចផ្លូវលំភូមិឬស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថាមុនពេលកើតហេតុម្ចាស់ផ្ទះបានដុតធូបមូសក្បែរពូក ខណៈកំពុងតែដេកលង់លក់មួយភាំងធូបមូសបានធ្លាក់ចំពីលើពូកបណ្តាលឲ្យឆាបឆេះចេញជាអណ្តាតភ្លើងយ៉ាងសន្ធសន្ធៅ ភ្លាមៗនោះម្ចាស់ផ្ទះក៏បានស្ទុះចេញរួមជាមួយអ្នកជិតខាងយកបំពង់បាញ់ពន្លត់ និងនាំគ្នាយកទឹកជួយជះពន្លត់តែដោយសារស្ថានភាពភ្លើងឆេះខ្លាំងពេកមិនអាចគ្រប់គ្រងបានទើបកម្លាំងអាវុធហត្ថរាជធានីភ្នំពេញបានបញ្ជូនរថយន្តពន្លត់អគ្គិភ័យចំនួន៤គ្រឿងចេញទៅជួយអន្តរាគមន៏បាញ់ទប់ស្កាត់តែដោយសារតែច្រកចូលតូចពេកទើបបណ្តាលឲ្យរថយន្តពិបាក និងចូលទៅបាញ់ទឹកពន្លត់ទើបអគ្គិភ័យខាងលើលេបត្របាក់អស់ផ្ទះមួយខ្នងទាំងស្រុងតែម្តង។

ក្នុងហេតុការណ៍អគ្គិភ័យខាងលើនេះពុំបណ្តាលឲ្យមានអ្នករងរបួសនោះទេគ្រាន់តែខូចខាតអស់ផ្ទះមួយខ្នងឈើលើថ្មក្រោមនិងខូចខាតទ្រព្យសម្បត្តិរបស់ម្ចាស់ផ្ទះមួយចំនួនប៉ុណ្ណោះ៕

ភ្នំពេញ ៖ នៅព្រឹកថ្ងៃអង្គារ ៣កើត ខែផល្គុន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៥ ខែកុម្ភៈ ឆ្នាំ២០២០នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញប្រគល់សញ្ញាបត្រ និងវិញ្ញាបនបត្រដល់និស្សិតសាលាភូមិន្ទរដ្ឋបាល ចំនួន
៥៧៥នាក់ នារី ១០៥នាក់ បន្ទាប់ពីបានបញ្ចប់ការសិក្សាដោយជោគជ័យ។

និស្សិតដែលទទួលសញ្ញាបត្រ និងវិញ្ញាបនបត្រនៅថ្ងៃនេះ រួមមានសិស្សមន្ត្រីជាន់ខ្ពស់ជំនាន់ទី១០, សិស្សមន្ត្រីក្រមការ ជំនាន់ទី៨ និងកម្មសិក្សាការី ឆ្នាំ២០១៨។

សម្តេចតេជោនាយករដ្ឋមន្ត្រី តែងតែផ្តល់កិត្តិយសអញ្ជើញជាអធិបតីប្រគល់សញ្ញាបត្រ និងវិញ្ញាបនបត្រដល់និស្សិតសាលាភូមិន្ទនៅពេលពួកគេបញ្ចប់ការសិក្សា ដើម្បីផ្តល់នូវដំបូន្មាន និងអនុសាសន៍ល្អៗជូនដល់សិស្សដែលជាមន្ត្រីរាជការ ក្នុងការពង្រឹងប្រសិទ្ធភាពលើការងាររបស់ពួកគេ៕