ភ្នំពេញ ៖ ស្ទើរតែផ្ងាខណះក្រុមកម្មករបើកទ្វាបន្ទប់បំរុងចុះទៅធ្វើការស្រាប់តែឃើញបុរសម្នាក់ចងកសម្លាប់ខ្លួនជាប់និងដែកបង្កាន់ដៃជណ្តើរបង្កអោយមានការភ្ញាក់ផ្អើលនិងភិតភ័យយ៉ាងខ្លាំង។ ហេតុការណ៍ភ្ញាក់ផ្អើលខាងលើនេះបានកើតឡើងកាលពីវេលាម៉ោង៧ព្រឹកថ្ងៃទី២៥ ខែវិច្ឆិកា ឆ្នាំ២០១៩ស្ថិតនៅចំណុចផ្ទះជួលមួយកន្លែងស្ថិតនៅភូមិទួលពង្រ សង្កាត់ចោមចៅទី១ ខណ្ឌពោធិសែនជ័យ រាជធានីភ្នំពេញ។

សពបុរសខាងលើមានឈ្មោះ ជា សុខលី អាយុ៣២ឆ្នាំ មុខរបរព្រូឡានស្នាក់នៅកន្លែងធ្វើការក្នុងឃ្លាំងម្តុំរោងចក្រ៦ជាន់សង្កាត់ចោមចៅទី១ខណ្ឌពោធិសែនជ័យ។

តាមការរៀបរាប់ពីស្ត្រីម្នាក់ដែលជាប្រពន្ធរបស់បុរសខាងលើបានបង្ហើបឲ្យដឹងថា មុនពេលកើតហេតុ២ថ្ងៃ រូបគាត់ និងប្តីបានឈ្លោះប្រកែកគ្នាជាញឹកញាប់ដោយស្ត្រីជាប្រពន្ធបានសង្ស័យថា ប្តីរបស់ខ្លួនជាមនុស្សញៀនថ្នាំតែងតែទាញកាំបិតគំរាមរករឿងគាត់ជារៀងរាល់ថ្ងៃ ហើយរូបគាត់មានការភ័យខ្លាចប្តីរបស់គាត់បែកថ្នាំឈានដល់ការយកកាំបិតចាក់សម្លាប់គាត់ស្ត្រីជាប្រពន្ធបានសម្រេចចិត្តរើខោអាវវេចមកស្នាក់នៅជាមួយមិត្តភក្តិនៅចំណុចកើតហេតុខាងលើ ហើយប្រាប់ប្តីថា ឯងទៅដេកនៅឃ្លាំងកន្លែងធ្វើការឯងទៅ ខ្ញុំទៅហើយមិនបាច់ទៅរកខ្ញុំទេ។

លុះបាត់ប្រពន្ធរយៈពេល២ថ្ងៃ ទើបបុរសជាប្តីតាមរកប្រពន្ធឃើញប្រពន្ធបិទទ្វារដេកនៅក្នុងបន្ទប់ជួលដោយមានស្បែកជើងចំនួន២គូនៅមុខបន្ទប់ បុរសជាប្តីគិតខ្លីស្មានតែប្រពន្ធដេកជាមួយប្រុសផ្សេង ក៏សម្រេចចិត្តយកខ្សែពួរចងកជាប់នឹងជណ្តើរបង្កាន់ដៃមុខបន្ទប់ជួលរបស់ប្រពន្ធស្លាប់បាត់បង់ជីវិតបង្កឲ្យមានការភ្ញាក់ផ្អើលដល់កម្មករដែលជួលបន្ទប់នៅខាងលើ និងប្រជាពលរដ្ឋដែលរស់នៅក្បែរៗកន្លែងកើតហេតុ  រួចក៏បានរាយការណ៍ជូនសមត្ថកិច្ចមូលដ្ឋាន។

ក្រោយពេលសមត្ថកិច្ចមូលដ្ឋានទទួលបានព័ត៌មានថា មានមនុស្សចងកស្លាប់ភ្លាមកម្លាំងនគរបាលប៉ុស្តិ៍ចោមចៅទី១បានរាយការណ៍ និងសហការជាមួយកម្លាំងនគរបាលការិយាល័យជំនាញកោសល្យវិច្ច័យស្នងការនគរបាលរាជធានីភ្នំពេញចុះមកធ្វើកំណត់ហេតុ និងពិនិត្យសពបុរសខាងលើ។ បន្ទាប់ពីធ្វើការពិនិត្យសពរួចរាល់សមត្ថកិច្ចជំនាញបានបញ្ជាក់ឲ្យដឹងថា សពបុរសខាងលើពិតជាចងកធ្វើអត្តឃាតសម្លាប់ខ្លួនឯងពិតប្រាកដមែន។

សពត្រូវបានប្រគល់ទៅឲ្យក្រុមគ្រួសារដឹកយកទៅធ្វើបុណ្យតាមប្រពៃណី៕

ភ្នំពេញ ៖ ព្រះ​សព​របស់​សម្ដេច​រាជបុត្រី ព្រះរៀម នរោត្តម បុប្ផា​ទេវី នឹងត្រូវ​រៀបចំ​ពិធី​បូជា​នៅ​ព្រឹក​ថ្ងៃទី​២៥ ខែវិច្ឆិកា ឆ្នាំ​២០១៩​នេះ នៅខាងមុខ​វត្ដ​បទុម​វ​តី​រាជ​វ​រា​រាម ។​

​ព្រះករុណា​ជា​អ​ម្ចាស់ជីវិតលើត្បូង ព្រះបាទ សម្តេចព្រះ​បរមនាថ នរោត្តម សីហមុនី ព្រះមហាក្សត្រ នៃ​កម្ពុជា និង​សម្តេចព្រះ​មហាក្សត្រី ព្រះ​វ​រាជមាតា​ជាតិខ្មែរ ជាទីគោរព​សក្ការៈ​ដ៏​ខ្ពង់ខ្ពស់​បំផុត ព្រះអង្គ​ទាំង​ទ្វេ​សព្វព្រះរាជហឫទ័យ នឹង​យាង​ជា​ព្រះរាជាធិបតី​ដ៏​ខ្ពង់​ខ្ពស់បំផុត ក្នុង​ព្រះ​ពិធី​ថ្វាយ​ព្រះ​ភ្លើង​ព្រះ​សព សម្តេច​រាជបុត្រី​ព្រះរៀម នរោត្តម បុប្ផា​ទេវី។

សូមជម្រាបថា សម្ដេចរាជបុត្រី ព្រះរៀម នរោត្តម បុប្ផាទេវី ដែលជាបុត្រច្បងរបស់ព្រះករុណា ព្រះបាទ សម្តេចព្រះ នរោត្តម សីហនុ ព្រះមហាវីរក្សត្រកម្ពុជា បានសោយទិវង្គតនាវេលាម៉ោង ១២៖៣០នាទី ថ្ងៃត្រង់ ថ្ងៃទី១៨ ខែវិច្ឆិកា ឆ្នាំ២០១៩ ក្នុងមន្ទីរពេទ្យព្រះរាជាណាចក្រថៃ ដោយជរាពាធ៕

ភ្នំពេញ ៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានទទួលជួបជាមួយលោក ប៉ាទ្រីក មើហ្វី ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា ដើម្បីពិភាក្សាការងារនានា ដើម្បីពង្រឹងចំណងមិត្តភាព និងបង្កើនពាណិជ្ជកម្មទៅវិញទៅមក ។ ជំនួបនេះ ត្រូវបានធ្វើឡើងនៅព្រឹកថ្ងៃទី២២ ខែវិច្ឆិកា ឆ្នាំ២០១៩ នាទីស្តីការក្រសួង ។

ជាកិច្ចចាប់ផ្ដើម លោករដ្ឋមន្ត្រី បានជម្រាបជូនថា កាលពីថ្ងៃទី២១ ខែវិច្ឆិកា ឆ្នាំ២០១៩ កន្លងទៅនេះ រាជរដ្ឋាភិបាលកម្ពុជា បានចុះអនុស្សរណៈជាមួយអង្គការការងារអន្តរជាតិ (ILO) និងសមាគមរោងចក្រកាត់ដេរនៅកម្ពុជា ស្ដីពីកម្មវិធីគម្រោងរោងចក្រកាន់តែប្រសើរនៅកម្ពុជា ដើម្បីបន្តលើកកម្ពស់លក្ខខណ្ឌការងារក្នុងវិស័យកាត់ដេរសម្លៀកបំពាក់ និងវាយនភ័ណ្ឌ ដែលទទួលស្គាល់ស្តង់ដារការងារជាអន្តរជាតិ។

ការអនុវត្តគម្រោងរោងចក្រកាន់តែប្រសើរនៅកម្ពុជា ត្រូវបានទទួលស្គាល់ជាអន្តរជាតិ ហើយក៏បានទាក់ទាញវិនិយោគទុន បង្កើតការងារ និងប្រាក់ចំណូលសម្រាប់កម្មករ-កម្មការិនីឲ្យកាន់តែប្រសើរទ្បើង។ ជាមួយនោះដែរ ។

លោករដ្ឋមន្ត្រី ក៏បានសម្ដែងការសរសើរចំពោះការចូលរួមលើការពង្រឹងស្ដង់ដារការងារដោយក្រុមហ៊ុនអាមេរិក ដែលបានវិនិយោគទុននៅកម្ពុជា ហើយក៏សំណូមពរឲ្យមានការកៀរគរវិនិយោគទុនបន្ថែមទៀតលើវិស័យដែលបង្កើតតម្លៃ និងជំនាញបន្ថែមដូចជា កែច្នៃកសិផល កែច្នៃត្បូងពេជ្រ កម្មន្ដសាលធន់ស្រាល អេឡិចត្រូនិក ។

លោក ប៉ាទ្រីក មើហ្វី បានគាំទ្រការអនុវត្តគោលនយោបាយការងាររបស់កម្ពុជា ដោយយល់ថាការរក្សាបាន និងលើកកម្ពស់បន្ថែមទៀតនៃស្ដង់ដារការងារនៅកម្ពុជា ក៏ពង្រឹងកិត្តិនាមរបស់កម្ពុជា ក្នុងការទាក់ទាញវិនិយោគទុនបន្ថែមទៀត។ លោកឯកអគ្គរដ្ឋទូត ក៏បានឯកភាពលើការចូលរួមវិភាគទានរបស់ក្រុមហ៊ុនអាមេរិកក្នុងវិស័យនេះ ក៏ដូចជាបង្កើតការងារ និងបណ្ដុះបណ្ដាលជំនាញជូនពលករកម្ពុជា។ ឯកលោកបានមានប្រសាសន៍ដែរថា ក្នុងរយៈពេលដ៏ខ្លីដែលឯកឧត្តមបានមកបំពេញបេសកកម្មនៅកម្ពុជា ឯកឧត្តមយល់ឃើញថាសហគ្រាសធុនតូច និងមធ្យម ជាចលករមួយដ៏សំខាន់នៅក្នុងសេដ្ឋកិច្ចកម្ពុជា។ ដើម្បីគាំទ្រការអភិវឌ្ឍសហគ្រាសធុនតូច និងមធ្យមនៅកម្ពុជា ស្ថានទូតអាមេរិកនឹងរៀបចំវេទិកាស្ដីពីកសិ-ឧស្សាហកម្ម នៅខែកុម្ភៈ ឆ្នាំ២០២០ ហើយនឹងអញ្ជើញក្រសួងពាណិជ្ជកម្មចូលរួមក្នុងវេទិកានេះ។ ក្រៅពីនេះទៀត ឯកឧត្តមក៏បានជម្រាបថា ក្រុមហ៊ុនអាមេរិកជីអ៊ី  (GE) ក៏មានបំណងចូលរួមក្នុងវិស័យថាមពល ដើម្បីរួមវិភាគទានលើការខ្វះខាតអគ្គីសនីនៅកម្ពុជា។

លោករដ្ឋមន្ត្រី បានលើកទឹកចិត្តឲ្យក្រុមហ៊ុនអាមេរិក និងសភាពាណិជ្ជកម្មអាមេរិកប្រចាំនៅកម្ពុជា ចូលរួមឲ្យបានសកម្មក្នុងដំណើរការវេទិការាជរដ្ឋាភិបាល និងវិស័យឯកជន ដើម្បីលើកកិច្ចប្រឈមនានា ដើម្បីរាជរដ្ឋាភិបាលដោះស្រាយជូនបានទាន់ពេលវេលា៕

ខេត្តកំពង់ចាម ៖ ស្ថាប័នជំនាញ និងអាជ្ញាធរខេត្តបានធ្វើការបំផុសឲ្យប្រជាពលរដ្ឋសិស្សានុសិស្សទាំងអស់ត្រូវតែនាំគ្នាគោរពច្បាប់ចរាចរណ៍ឲ្យបានខ្ជាប់ខ្ជួន។ ពិធីនេះបានប្រារព្ធឡើងនៅក្នុងកម្មវិធីទិវាអន្តរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៤នៅវិទ្យាល័យសម្ដេចអគ្គមហាសេនាបតីតេជោហ៊ុន សែន ក្នុងឃុំបាធាយស្រុកបាធាយ នាព្រឹកថ្ងៃទី២៤ វិច្ឆិកា២០១៩។ ហើយម្នាក់ៗ បានប្ដេជ្ញាចិត្តប្រឹងប្រែងនាំគ្នាគោរពច្បាប់ចរាចរណ៍ទាំងម៉ូតូ និងរថយន្ត។

លោក អ៊ុន ចាន់ដា អភិបាលខេត្តកំពង់ចាមមានប្រសាសន៍ឲ្យដឹងថា យោងតាមរបាយការណ៍របស់ស្នងការដ្ឋាននគរបាលខេត្តបានបញ្ជាក់ថាគ្រោះថ្នាក់ចរាចរណ៍ផ្លូវគោកបានកើតឡើងនៅស្រុកបាធាយច្រើនជាងគេទើបយើងបានប្រារព្ធធ្វើកម្មវិធីនៅទីនេះតែម្ដង។

លោកអភិបាលខេត្តមានប្រសាសន៍បន្តថា គ្រោះថ្នាក់ចរាចរណ៍កើតឡើងតាមការសង្កេតគឺមានប្រមាណ៧០% អ្នកដែលស្លាប់នោះគឺមិនបានពាក់មួកសុវត្ថិភាពនោះទេ។ ហេតុដូច្នេះនឺងដើម្បីកាត់បន្ថយគ្រោះថ្នាក់ចរាចរណ៍សូមឱ្យក្មួយៗជាសិស្សានុសិស្សឬក៏ប្រជាពលរដ្ឋត្រូវតែពាក់មួកសុវត្ថិភាពរាល់ការធ្វើដំណើរទោះបីជាផ្លូវជិតឬឆ្ងាយក៏ដោយ។ ហើយមួយវិញទៀតគ្រោះថ្នាក់ចរាចរណ៍គឺជាឃាតករលាក់មុខ ដែលអាចឆក់យកជីវិតយើងបានគ្រប់ពេលណាបើយើងមានការធ្វេសប្រហែសនោះធ្វើយ៉ាងណាយើងត្រូវតែគោរពច្បាប់ចរាចរណ៍ឲ្យបានគ្រប់គ្នាដើម្បីកាត់បន្ថយអត្រាអ្នកស្លាប់និងរបួសឲ្យមានការថយកាន់តែតិចៗទៅ។

ជាមួយនោះលោកក៏បានស្នើសុំដល់ប្រជាកសិករត្រូវតែយកចិត្តទុកដាក់ក្នុងការបង្កបង្កើនផលដំណាំស្រូវស្របពេលដែលស្ថានភាពអាកាសធាតុមានការប្រែប្រួល(អែលនីណូ) សំណូមពរដល់អ្នកដែលធ្វើស្រូវ២ដងមេត្តាធ្វើតែ១ ដងដើម្បីរក្សាទឹកទុកប្រើប្រាស់ឲ្យបានគ្រប់គ្រាន់ចៀសវាងកុំឲ្យខ្វះ៕ ដោយ ៖ ប៉ែន សុផល

ខេត្តព្រះសីហនុ ៖ មុននឹងបើកកិច្ចប្រជុំសាកល្បងសម្របសម្រួលស្តីពីករណីវិវាទដីធ្លីរវាង លោកស្រី ហ៊ឹម សុវណ្ណរី និងប្រជាពលរដ្ឋស្ថិតនៅតំបន់អូរដំរី ក្នុងភូមិសាស្រ្ត ស្រុកស្ទឹងហាវ និងក្រុងព្រះសីហនុ នាព្រឹកថ្ងៃទី២១ ខែវិច្ឆកា ឆ្នាំ២០១៩ កន្លងទៅនេះ។

ថ្នាក់ដឹកនាំខេត្តព្រះសីហនុ បានលើកឡើងថា « មានអ្នកដើរចាប់យករដ្ឋ ដូចជា ដីគម្របព្រៃ និង ដីបរិស្ថាន ជាដើម  ហើយដើម្បីឲ្យស្រច្បាប់ ពួកគេបានកៀងគរកម្លាំងប្រជាជនមកធ្វើជាខែល និង មានអ្នកខ្លះ យកដីខ្លួនឯងដែលរំលោភបំពាន់បាន ទៅធ្វើសម្បទានអោយអ្នកនេះ អោយអ្នកនោះ រួមទាំងអោយរដ្ឋវិញ ជាដើម ហើយមានអ្នកខ្លះទៀត រំលោភទន្ទ្រានយកដីរបស់គេ ទៅពុះជាឡូត៍ លក់ថោកៗ ដើម្បីអោយមានមនុស្សដែលមិនបានដឹងរឿងពិតទៅទិញ បង្កើតទៅជាក្រុម ជាភូមិ ដើម្បីការពារទង្វើខុសច្បាប់របស់ខ្លួន។ បំណងពិតប្រាកដ គឺដើម្បីយកគេមកបិទបាំង ឬក៏អូសទាញ គេមកអោយជួយការពារដីខ្លួនឯងដែលធ្វើការការរំលោភបាន »។

ឯកឧត្តម គួច ចំរើន លើកឡើងបែបនេះ នៅក្នុងកិច្ចប្រជុំមួយស្តីពីករណីវិវាទដីធ្លីរវាងលោកស្រី ហ៊ឹម សុវណ្ណរី និងប្រជាពលរដ្ឋស្ថិតនៅតំបន់អូរដំរី ក្នុងភូមិសាស្រ្ត ស្រុកស្ទឹងហាវ និងក្រុងព្រះសីហនុ នៅសាលប្រជុំតូចនៃសាលាខេត្តព្រះសីហនុ ។ លោកអភិបាលខេត្ត បញ្ជាក់ថា ៖ « រឿងនេះ វាកើតមានឡើងនៅខេត្តព្រះសីហនុ អីចឹងបើនៅតែមានការទៅរំលោភបំពានយក ដីរបស់រដ្ឋ វាអាចថា បើនៅពេលមានការភិតភ័យខ្លាំង អីចឹងដើម្បីអោយមានមនុស្សមកជួយ អោយបានច្រើន គេត្រូវធ្វើសម្បទាន ឬត្រូវលក់ថោកៗ ហើយសម្បទានខ្លះ អាចមានការពាក់ព័ន្ធ រហូតទៅដល់មន្ត្រី និងកងកម្លាំង និងមានកន្លែងខ្លះ មានទាំងអ្នកកាសែតទៀតផង»។

ពលរដ្ឋដែលចូលរួមក្នុងកិច្ចប្រជុំនោះ បានថ្លែងថា ទោះបីជាការលើកឡើងមិនចំឈ្មោះក្តី ក៏អង្គប្រជុំបានយល់ថា គឺសំដៅទៅលើកលោកស្រី ហ៊ឹម សុវណ្ណរី និងបក្សពួកគូកន  ដែលគេដឹងថា បច្ចុប្បន្ននេះ លោកស្រី ហ៊ឹម សុវណ្ណរី កំពុងធ្វើសកម្មភាពរំលោភលើដីរបស់ប្រជាពលរដ្ឋ និងដីវត្ត ជាច្រើនហិកតា នៅក្នុងតំបន់ អូរកូនដំរី ស្ថិតក្នុងភូមិ៤ ឃុំអូរត្រេះ ស្រុក ស្ទឹងហាវ ខេត្តព្រះសីហនុ យកទៅធ្វើអំណោយអោយទៅមន្ត្រីកំពូលៗ ថ្នាក់ដឹកនាំ កងកម្លាំងធំៗ និងប្រជាពលរដ្ឋមួយចំនួន ដែលស្ត្រីរូបនេះបានកេណ្ឌមកពីតាមបណ្តាលខេត្តនានា ក្នុងគោលបំណងបំភាន់ភ្នែកអាជ្ញាធរ អោយមើលឃើញថា ខ្លួនជាអ្នកធ្វើល្អ និងប្រើប្រាស់ឥទ្ធិពលនេះ ដើម្បីការពារដីដែលទន្ទ្រានបាន ធ្វឲ្យទៅជាដីស្របច្បាប់។

ប្រភពដដែល បានបន្តថា ទង្វើបែបនេះ ត្រូវបានប្រជាពលរដ្ឋមួយចំនួនដែលកំពុងរងគ្រោះដោយអំពើរំលោភដីធ្លីពីសំណាក់ លោកស្រី ហ៊ឹម សុវណ្ណរី មានការឈឺចាប់ខ្លោចផ្សាជាខ្លាំង ដោយសារតែបាត់បង់ដីធ្លី ផ្ទះសំបែង ដែលពួកគាត់អះអាងថា បានរស់នៅយ៉ាងសុខសាន្តរាប់ឆ្នាំមកហើយទៀតផង ស្ត្រីរូបនេះត្រូវបានប្រជាពលរដ្ឋរងគ្រោះ  ដាក់បណ្តាសារ គ្រប់ៗគ្នាជារៀងរាល់ថ្ងៃផងដែរ។

បើតាមឯកឧត្តម គួច ចំរើន បានលើកឡើងថា ៖ រឿងនេះវាគ្រាន់តែជាវិធីមួយ ប៉ុន្តែចាប់ពីពេល នេះតទៅ លោកនឹងធ្វើការគាស់រំលើងរឿងនេះឡើងវិញ មិនទុកអោយអំពើទុច្ចរិតបែបនេះ បន្តអូសបន្លាយប៉ះពាល់ទៅដល់ការដឹកនាំរបស់រដ្ឋាភិបាលនោះទេ។

ឯកឧត្តម អភិបាលខេត្តព្រះសីហនុ បានបន្តថា ៖ « ចាប់ពីពេលនេះតទៅ លោក នឺងដាក់ការស៊ើបអង្កេតហើយ ៗអ្នកដែលពាក់ព័ន្ធនៅក្នុងរឿងហ្នឺង ត្រូវតែដកថយជាបន្ទាន់

… ជាគោលការ ហាមពាក់ព័ន្ធលើកយោបល់ផ្ទាល់ ហើយហាមធ្វើអន្តរាគមន៍ព្រោះកន្លងទៅគឺវាធ្លាប់មានរឿងអីចឺង…»។

លោកស្រី ហ៊ឹម សុវណ្ណរី ដែលកំពុងត្រូវក្រុមប្រជាពលរដ្ឋចោទប្រកាន់ រួមទាំងការព្រមានដោយប្រយោលពីសំណាក់អភិបាលខេត្តផងដែរនោះ មិនទាន់អាចទាក់ទងដើម្បីសុំការពន្យល់ឆ្លើយតបបានទេ។

យ៉ាណាក៏ដោយ លោកអភិបាលខេត្តរូបនេះ បានអះអាងដោយសង្កត់ធ្ងន់ថា រដ្ឋបាលខេត្តព្រះសីហនុ បានរកឃើញបញ្ហាមួយចំនួនរួចហើយ ដែលលោកត្រូវធ្វើការគាស់រំលើងបញ្ហានេះ។ អ្នកដែលបង្កើតបញ្ហានៅទីនេះ គឺចៀសមិនផុតពីការទទួលខុសត្រូវតាមផ្លូវច្បាប់នោះឡើយ »៕