ភ្នំពេញ ៖ ប្រធានព្រឹទ្ធសភាកម្ពុជា សម្តេចវិបុលសេនាភក្តី សាយ ឈុំ នា បានអនុញ្ញាតឱ្យ លោកជំទាវ Carmen Moreno ឯកអគ្គរដ្ឋទូតសហភាពអឺរ៉ុប ប្រចាំព្រះរាជាណាចក្រកម្ពុជា ចូលជួបសម្តែងការគួរសមនៅវិមានព្រឹទ្ធសភា ព្រឹកថ្ងៃទី២៦ខែវិច្ឆិកាឆ្នាំ២០១៩ នេះ។
នៅក្នុងជំនួបនេះសម្តេចវិបុលសេនាភក្តី សាយ ឈុំ បានសម្តែងការអបអរសាទរ និងស្វាគមន៍ចំពោះវត្តមានលោកជំទាវដែលត្រូវបានតែងតាំងជាឯកអគ្គរដ្ឋទូតសហភាពអឺរ៉ុបប្រចាំកម្ពុជា។ តាមរយៈបេសកកម្មការទូតនៅកម្ពុជា សម្តេចប្រធានព្រឹទ្ធសភា សង្ឃឹមថា លោកជំទាវ នឹងខិតខំលើកកម្ពស់ទំនាក់ទំនង និងកិច្ចសហប្រតិបត្តិការលើគ្រប់វិស័យ រវាងកម្ពុជា និងសហភាពអឺរ៉ុបកាន់តែល្អប្រសើរបន្ថែមទៀត ដើម្បីជាគុណប្រយោជន៍ដ៏ធំធេង សម្រាប់ប្រជាជនកម្ពុជា និងប្រជាជននៃសហភាពអឺរ៉ុប ទាំងពេលបច្ចុប្បន្ន និងក្នុងពេលអនាគត។
ក្នុងឱកាសនោះ លោកជំទាវ Carmen Moreno បានសម្តែងនូវសេចក្តីរីករាយកដោយមើលឃើញនូវកំណើនសេដ្ឋកិច្ច និងការអភិវឌ្ឍរបស់ប្រទេសកម្ពុជា មានការរីកចម្រើនយ៉ាងឆាប់រហ័សគួឱ្យកត់សម្គាល់។តាមរយៈការរីកចម្រើននេះប្រទេសកម្ពុជានឹងសម្រេចបាននូវចក្ខុវិស័យរបស់ខ្លួនដែលកសាងប្រទេសកម្ពុជា ឱ្យក្លាយទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។ លោកជំទាវបានកោតសរសើរ ចំពោះការកំណែទម្រង់ជាច្រើន និងទទួលបានលទ្ធផលយ៉ាងច្រើនសន្ធឹកសន្ធាប់។
លោកជំទាវបញ្ជាក់ថា តាមរយៈបេសកកម្មការទូតរបស់លោកជំទាវនៅកម្ពុជា នឹងខិតខំរួមចំណែកធ្វើឱ្យទំនាក់ទំនង មិត្តភាព និងកិច្ចសហប្រតិបត្តិការ រវាងរដ្ឋាភិបាល ព្រឹទ្ធសភា រដ្ឋសភាជាមួយនឹងសហភាពអ៊ឺរ៉ុបឱ្យកាន់តែល្អប្រសើរថែមទៀត។
សម្តេចវិបុលសេនាភក្តីសាយឈុំប្រធានព្រឹទ្ធសភា បានបញ្ជាក់ថា ប្រទេសកម្ពុជា និងសហភាពអឺរ៉ុប បានភ្ជាប់ទំនាក់ទំនងការទូតនៅថ្ងៃទី០១ ខែមករា ឆ្នាំ១៩៩៤។ ចាប់តាំងពីថ្ងៃបង្កើតទំនាក់ទំនងការទូតមក ចំណងមិត្តភាព និងកិច្ចសហប្រតិបត្តិការ ត្រូវបានពង្រឹងពង្រីកជាបន្តបន្ទាប់។
សម្តេចប្រធានព្រឹទ្ធសភា បានថ្លែងអំណរគុណ ចំពោះសហភាពអ៊ឺរ៉ុប ដែលបានផ្តល់ហិរញ្ញប្បទានសហប្រតិបត្តិការឥតសំណង លើផែនការអភិវឌ្ឍ យុទ្ធសាស្រ្តជាតិ វិស័យសេដ្ឋកិច្ច សង្គម សម្របសម្រួលពាណិជ្ជកម្ម ហេដ្ឋារចនាសម្ព័ន្ធ អប់រំ សុខាភិបាល និងវិស័យជាច្រើនទៀត៕
យោងតាមសម្តីលោកវរសេនីយ៍ត្រី ជា ពិសី មេបញ្ជាការមូលដ្ឋានកងរាជអាវុធហត្ថស្រុកអូរជ្រៅបានប្រាប់ឲ្យដឹងថា ជនរងមានគ្រោះឈ្មោះ ជ្រុន ធឿន ភេទប្រុស អាយុ៣៨ឆ្នាំ រស់នៅភូមិរកុំក្រោម ឃុំឬស្សីក្រាំង ស្រុកមោងឬស្សី ខេត្ដបាត់ដំបង។
លោកវរសេនីយ៍ត្រី ជា ពិសី បានបញ្ជាក់ឲ្យដឹងទៀតថា នៅមុនពេលកើតហេតុ គឺជនរងគ្រោះបាន និងកំពុងបើកម៉ាសីុនច្រូតស្រូវនៅក្នុងស្រែមួយកន្លែងដែលនៅឆ្ងាយពីភូមិប្រមាណជាប្រហែល ៨០០ម៉ែត្រ។លុះកំពុងតែច្រូតមិនទាន់បានប៉ុន្មានផង ស្រាប់តែបើកទៅកិនចំមីនតោនរួចក៏ផ្ទុះឡើងបណ្តាលអោយម៉ាស៊ីនច្រូតប៉ើងឡើងនិងក្រឡាប់បះជើងដាច់ច្រវ៉ាក់ រីឯអ្នកបើកបរប៉ើងធ្លាក់មកដីដាច់ដៃស្តាំរងរបួសធ្ងន់។ ក្រោយឮសំឡេងផ្ទុះខ្ទ័ររញ្ឆួយភូមិ បងប្អូនប្រជាពលរដ្ឋក្នុងភូមិក៏នាំគ្នារត់ទៅចោមរោមមើល និងជួយលើកជនរងគ្រោះដឹកទៅកាន់មន្ទីរពេទ្យ។ តែដោយស្ថានភាពរងរបួសមានលក្ខណៈធ្ងន់ធ្ងរក្រុមគ្រួពេទ្យក៏សម្រេចបញ្ជូនជនរងគ្រោះទៅកាន់មន្ទីរពេទ្យស្រុកអារញ្ញ ខេត្តស្រះកេវ ប្រទេសថៃ វិញ។
សូមបញ្ជាក់ថា ចំណុចកន្លែងកើតហេតុ គឺជាសមរភូមិចាស់ ជាកន្លែងប្រទាញប្រទង់គ្នាយ៉ាងស្វិតស្វាញរវាងកងទ័ពរដ្ឋាភិបាលជាមួយកម្លាំងទ័ពរបបកម្ពុជាប្រជាធិបតេយ្យ ហើយមីនតោនត្រូវបានគេដាក់តាំងពេលនោះ ដើម្បីប្រឆាំងជាមួយរថពាសដែក និងការដឹកជញ្ជូនសព្វាវុធធុនធ្ងន់ ឬរថយន្តធំៗ ជាដើម៕
ព្រះករុណាជាអម្ចាស់ជីវិតលើត្បូង ព្រះបាទ សម្តេចព្រះបរមនាថ នរោត្ត ម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវរាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គទាំងទ្វេ បានយាងថ្វាយព្រះភ្លើងព្រះសព សម្តេចរាជបុត្រីព្រះរៀម នរោត្តម បុប្ផាទេវី នាវេលាព្រឹកថ្ងៃទី២៥ ខែវិច្ឆិកា ឆ្នាំ២០១៩នេះ។
ពិធីដង្ហែព្រះរបរមសព សម្តេចរាជបុត្រីព្រះរៀម នរោត្តម បុប្ផាទេវី ឆ្ពោះទៅព្រះមេរុ ដើម្បីប្រារព្ធព្រះពិធីថ្វាយព្រះភ្លើង នៅខាងមុខវត្តបទុមវតី នៅព្រឹកថ្ងៃទី២៥ ខែវិច្ឆិកា ឆ្នាំ២០១៩ គេសង្កេតឃើញមហាជនបានអញ្ជើញចូលរួមដង្ហែ ដើម្បីថ្វាយព្រះដំណើរជាលើកចុងក្រោយ។ បងប្អូនប្រជាពលរដ្ឋ បានចូលរួមដង្ហែព្រះរបរមសព សម្តេចរាជបុត្រីព្រះរៀម នរោត្តម បុប្ផាទេវី ជាលើកចុងក្រោយ បានសំដែងនូវការសោកស្តាយជាពន់ពេកចំពោះការបាត់បង់ សម្តេចព្រះរាជបុត្រី ដែលមានស្នាព្រហស្ថជាច្រើន ក្នុងវិស័យវប្បធម៌។
សម្តេចនាយករដ្ឋមន្ត្រី នាពេលកន្លងទៅនេះ បានបញ្ជាក់ថា ការបាត់បង់សម្តេចរាជបុត្រីព្រះរៀម នរោត្តម បុប្ផាទេវី គឺជាការបាត់បង់ដ៏ធំធេងបំផុតនូវតួអង្គពហុជំនាញក្នុងវិស័យវប្បធម៌ អរិយធម៌ជាតិខ្មែរ ជាដួងព្រលឹងរឹងមាំខ្លាំងក្លា ពិសេសតាំងពីសម័យសង្គមរាស្ត្រនិយមដ៏ឧត្តុង្គឧត្តម ដែលមានព្រះរាជបុត្រី អង្គព្រះមហាក្សត្រដ៏ឆ្នើមព្រះនាម នរោត្តម បុប្ផាទេវី ដ៏ស្រស់ល្វតល្វៃ ទ្រង់ពេញព្រះហឫទ័យនឹងនាដកម្ម ជាតួអង្គឯករបាំអប្សរា លើកតម្កើងវប្បធម៌ពណ្ណរាយជាតិ ថ្កើងថ្កាន ល្បីល្បាញរន្ទឺទូទាំងសកលលោក»។
សូមជម្រាបថា សម្ដេចរាជបុត្រីព្រះរៀមនរោត្តម បុប្ផាទេវី បានសោយព្រះពិរាល័យ នាវេលាម៉ោង ១២៖៣០នាទី ថ្ងៃត្រង់ ថ្ងៃទី១៨ ខែវិច្ឆិកា ឆ្នាំ២០១៩ ក្នុងមន្ទីរពេទ្យទីក្រុងបាងកកព្រះរាជាណាចក្រថៃ ដោយជរាពាធ ក្នុងព្រះជន្ម៧៦។ ព្រះសពព្រះអង្គ ត្រូវបានដង្ហែចេញពីអាកាសយានដ្ឋានអន្តរជាតិភ្នំពេញ ឆ្ពោះទៅវត្តបុទុមវតី កាលពីយប់ថ្ងៃអង្គារ ទី១៩ ខែវិច្ឆិកា។ សម្ដេចរាជបុត្រី ព្រះរៀម នរោត្តម បុប្ផាទេវី ជាព្រះរាជបុត្រីច្បង នៃព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ និងអ្នកម្នាង ផាត់ កាញ៉ុល នាដការី នៃរបាំព្រះរាជទ្រព្យ។ ព្រះអង្គ ត្រូវជាព្រះរៀមបង្កើតមាតាទីទៃ នៃព្រះករុណាជាអម្ចាស់ជីវិតលើត្បូង ព្រះបាទសម្ដេចព្រះបរមនាថ នរោត្តម សីហមុនីព្រះមហាក្សត្រ នៃព្រះរាជាណាចក្រកម្ពុជា៕
