បន្ទាយមានជ័យ ៖ ក្រុងប៉ោយប៉ែត ខេត្តបន្ទាយមានជ័យ កំពូងប្រឈមនឹងគ្រោះធម្មជាតិ ដោយ ទឹគជំនន់ហូរធ្លាក់ពីប្រទេសថៃ ឡើងលិចភូមិចំនួន២០ និងដំណាំពលរដ្ឋខូចខាតជាង ១០០០ ហិកតា។នេះបើតាមបញ្ជាក៉របស់លោក គាត ហ៊ុល អភិបាលក្រុងប៉ោយប៉ែត បានថ្លែងក្នុងពិធីចែក អំណោយដល់ប្រជាពលរដ្ឋនិងសម្ភារសិក្សាដល់សិស្សានុសិស្ស នៅព្រឹកថ្ងៃទី៤ ខែតុលា ឆ្នាំ ២០១៩ នៅក្នុងវត្តស្រះត្រាច សង្កាត់ប៉ោយប៉ែត ក្រុងប៉ោយប៉ែត។

លោក គាត ហ៊ុល បានឲ្យដឹងទៀតថា ក្រុងប៉ោយប៉ែត មានសង្កាត់ចំនួន៣ និងភូមិចំនួន៣៨ ក្នុង នោះមានភូមិចំនួន២០ ដែលពេលថ្មីៗកន្លងទៅនេះ រងគ្រោះទឹកជំនន់ហូរធ្លាក់ពីប្រទេសថៃ ដោយ ៨ភូមិរងការជន់លិចរយៈពេលខ្លី និងភូមិចំនួន១២ បានរងការជន់លិចរយៈពេលវែង ព្រោះភូមិទាំង នោះ លិចដោយសារទឹកជំនន់មកពីប្រទេសថៃ និងមកពីតំបន់ផ្សេងៗ។

លោកបានបញ្ជាក់ថា៖ គ្រោះទឹកជំនន់នេះ បានបំផ្លិចបំផ្លាញធ្វើឲ្យដំណាំស្រូវរបស់ ប្រជាពលរដ្ឋរង នូវ ការខាត អស់ចំនួន១.១៧២ហិកតា និងដំឡូងមីអស់ចំនួន១០១ហិកតា និងដំណាំរួមផ្សំ១៥ ផ្សេងទៀតត្រូវបានខូចខាតផងដែរ។ ក្នុងនោះអាជ្ញាធរ កម្លាំងប្រដាប់អាវុធ និងសប្បុរសជនបាន ជម្លៀសប្រជាពលរដ្ឋរកទីទួលសុវត្ថិភាព ចែកគ្រឿងឧបភោគ បរិភោគ ចំនួន ១៤៦គ្រួសារ និងបាន ស្តារលូ និងកាយប្រឡាយទឹក ដើម្បីជួយរំដោះទឹកពេលមានភ្លៀងធ្លាក់ខ្លាំង ដោះស្រាយនូវទុក លំបាក នាពេលលិចទឹកកន្លងមកផងដែរ។
សូមបញ្ជាក់ថា អំណោយនាពេលនោះ រួមមានគ្រឿងឧបភោគ បរិភោគ បានចែកជូនដល់ប្រជាពល រដ្ឋ ដែលកំពុងខ្លះខាតចំនួន ១០០គ្រួសារ និងចែកសម្ភារសិក្សាដល់សិស្សានុសិស្សចំនួន ៣០០ នាក់ ផងដែរ៕

ខេត្តព្រះសីហនុ ៖ កម្លាំងសមត្ថកិច្ច នៃស្នងការដ្ឋាននគរបាលខេត្តព្រះសីហនុ បានឲ្យដឹងនៅព្រឹក ថ្ងៃទី៤ ខែតុលា ឆ្នាំ២០១៩ ថា ដោយមានការស្រាវជ្រាវយ៉ាងយកចិត្តទុកដាក់ របស់សមត្ថកិច្ច ជំនាញពាក់ព័ន្ធទាំងអស់ ក្រោមការដឹកនាំពី លោកនាយឧត្តមសេនីយ៍ នេត សាវឿន អគ្គស្នងការ នគរបាលជាតិ និងលោក គួច ចំរើន អភិបាល នៃគណៈអភិបាលរដ្ឋបាលខេត្ត និងជាប្រធានគណៈ បញ្ជាការឯកភាពរដ្ឋបាលខេត្តព្រះសីហនុ ព្រមទាំងមានការសម្របសម្រួលនីតិវិធីច្បាប់ដោយ លោក សៀង សុខ ព្រះរាជអាជ្ញា អមសាលាដំបូងខេត្តព្រះសីហនុ។ សមត្ថកិច្ច បានបំបែកសំណុំ រឿង ករណីប្រជាពលរដ្ឋប្រទះឃើញសាកសពមិនស្គាល់អត្តសញ្ញាណ នៅចំណុចដីឡូត៍មួយកន្លែង ស្ថិតនៅអូរត្រេះ២ ភូមិ៦ សង្កាត់៤ ក្រុង-ខេត្តព្រះសីហនុ ពេលនេះ ត្រូវបានបង្រ្កាប និងឃាត់ខ្លួន ជនសង្ស័យបានជនជាតិចិនម្នាក់។ ជនសង្ស័យរូបនោះមានឈ្មោះ ZHOU YA YUN ភេទប្រុស អាយុ ២៩ឆ្នាំ ជនជាតិចិន មុខរបរ ប្តូរប្រាក់ លិខិតឆ្លងដែនលេខៈ E05801588 ស្នាក់នៅហាង ប្តូរប្រាក់ ជាំងស៊ូ ស្ថិតនៅក្រុម១៤ ភូមិ៤ សង្កាត់៤ ក្រុង-ខេត្តព្រះសីហនុ។

ជនសង្ស័យបានសារភាពថា៖ ឃាតកម្មនេះ កើតឡើងដោយសារ ជនរងគ្រោះ ឈ្មោះ WU CHEN GHUI ភេទប្រុស ជនជាតិចិន កើតនៅថ្ងៃទី៣១ ខែធ្នូ ឆ្នាំ១៩៩៥ មុខរបរ ប្តូរប្រាក់ លិខិតឆ្លងដែន លេខៈ ED7591553 បានទំនាក់ទំនងទៅជនសង្ស័យ ដើម្បីប្តូរប្រាក់ចិន ជាប្រាក់ដុល្លារអាមេរិក ចំនួន ៧០,០០០$ (ប្រាំពីម៉ឺនដុល្លារអាមេរិច)។

សមត្ថកិច្ចបន្តថា នៅថ្ងៃទី ៣០ លុះខែកញ្ញា ឆ្នាំ២០១៩ វេលាម៉ោង ១៧ និង ០០នាទី ជនរងគ្រោះ បានទៅហាងប្តូប្រាក់ របស់ជនសង្ស័យ ដែលមានស្លាកយីហោរ ប្តូរប្រាក់ ជាំងស៊ូ ស្ថិតនៅក្រុមទី ១៤ ភូមិ៤ សង្កាត់៤ ក្រុង-ខេត្តព្រះសីហនុ បន្ទាប់ពីជនរងគ្រោះ បានវេប្រាក់ទៅអោយជន សង្ស័យ រួចរាល់ហើយ ក៏ត្រូវជនសង្ស័យប្រើកាំប៉ិត កាប់ និងចាក់សម្លាប់ជនរងគ្រោះតែម្តង។

បន្ទាប់ពីសម្លាប់ជនរងគ្រោះរួចហើយ ជនសង្ស័យបានកាត់សាកសព របស់ជនរងគ្រោះជា ៣ កំណាត់ រួចយកសាកសពវេចខ្ចប់ជាមួយភួយ និងអាវ ដែលធ្វើសកម្មភាព និងស្បោងពណ៌ខ្មៅ រហូតដល់ម៉ោង ០១ រំលងអាធ្រាត្រ ឈានចូលថ្ងៃទី១ ខែតុលា ឆ្នាំ២០១៩ ជនសង្ស័យ បានទៅ ជួលរថយន្ត ០១គ្រឿង ម៉ាក LEXUS 470 ពណ៌ស ស្លាកលេខៈ ភ្នំពេញ 2AH-1611 ដើម្បីដឹក សាកសព របស់ជនរងគ្រោះយកទៅប្លុងចោលនៅកន្លែងផ្សេងៗពីគ្នា ។

សូមបញ្ជាក់ថា កាលពីថ្ងៃទី១ ខែតុលា ឆ្នាំ២០១៩ វេលាម៉ោង ៩ និង៣០នាទី មានប្រជាពលរដ្ឋ បានរាយការណ៍ប្រាប់សមត្ថកិច្ចថា បានប្រទះឃើញមានសាកសពមិនស្គាល់អត្តសញ្ញាណ នៅ ចំណុចដីឡូត៍មួយកន្លែង ស្ថិតនៅអូរត្រេះ២ ភូមិ៦ សង្កាត់៤ ក្រុង-ខេត្តព្រះសីហនុ។ បន្ទាប់ពីធ្វើការ ពិនិត្យសាកសព និងប្រមូលភស្តុតាងកន្លែងកើត ហេតុរួចមក កម្លាំងជំនាញផែននគរបាលព្រហ្ម ទណ្ឌ បានបន្តធ្វើការស្រាវជ្រាវយកចិត្តទុកដាក់ យ៉ាង ស្រស្រាក់ស្រស្រាំ ប្រើប្រាស់ជំនាញរបស់ នគរបាលចូលជ្រៅ រហូតធ្វើឃាត់ខ្លួនបានជនសង្ស័យ នៅថ្ងៃទី២ ខែតុលា ឆ្នាំ២០១៩ វេលាម៉ោង ២ និង០០នាទី រំលងអធ្រាត នៅចំណុចហាងប្តូរប្រាក់ ជាំងស៊ូ ស្ថិតនៅក្រុមទី១៤ ភូមិ៤ សង្កាត់៤ ក្រុង-ខេត្តព្រះសីហនុ។

ជនរងគ្រោះឈ្មោះ WU CHENGHUI ភេទប្រុស ជនជាតិចិន កើតនៅថ្ងៃទី៣១ ខែធ្នូ ឆ្នាំ១៩៩៥ មុខរបរ ប្តូរប្រាក់ លិខិតឆ្លងដែនលេខៈ ED7591553 សាកសព របស់ជនរងគ្រោះ ត្រូវបានកាត់ជា ៣កំណាត់ ដោយកំណាត់ទី១ ពីក្បាលដល់ចង្កេះ ,កំណាត់ទី២ ពីចង្កេះដល់ជង្គង់ ,កំណាត់ទី៣ ពី ជង្គង់ដល់បាតជើង។
ចំពោះឃាតកម្មខាងលើនេះ មន្ត្រីនគរបាល ការិយាល័យនគរបាលព្រហ្មទណ្ឌកម្រិតស្រាល ស្នង ការដ្ឋាននគរបាលខេត្តព្រះសីហនុ កំពុងបន្តនីតិវិធី និងកសាងសំណុំរឿងបញ្ជូនទៅសាលាដំបូង ខេត្តព្រះសីហនុ ដើម្បីចាត់ការតាមផ្លូវច្បាប់៕ 

ភ្នំពេញ ៖ តាមការគ្រោងទុក សម្តេចតេជោ នាយករដ្ឋមន្ត្រី ហ៊ុន សែន នឹងដឹកនាំគណៈប្រតិភូជាន់ខ្ពស់ អញ្ជើញទៅបំពេញទស្សនកិច្ចផ្លូវការ នៅរដ្ឋធានីហាណូយ ប្រទេសវៀតណាម ចាប់ពីថ្ងៃទី៤ ដល់ថ្ងៃទី៥ ខែតុលា ឆ្នាំ២០១៩នេះ ដែលអមដំណើរដោយមន្ត្រីជាន់ខ្ពស់សំខាន់ៗមួយចំនួន ក្នុងនោះក៏មានប្រធានអាជ្ញាធរជាតិទទួលបន្ទុកកិច្ចការព្រំដែន ផងដែរ។

តាមសេចក្តីប្រកាសរបស់ក្រសួងការបរទេសកម្ពុជាបានឲ្យដឹងថា ក្នុងដំណើរទស្សនកិច្ចនៅវៀតណាម លើកនេះ អមដំណើរដោយរដ្ឋមន្ត្រីការបរទេស ប្រធានអាជ្ញាធរជាតិទទួលបន្ទុកកិច្ចការព្រំដែន រដ្ឋមន្ត្រីពាណិជ្ជកម្ម រដ្ឋមន្ត្រីរ៉ែ និងថាមពល ព្រមទាំងរដ្ឋមន្ត្រីទេសចរណ៍ រួមទាំងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជាផងនោះ សម្តេចតេជោ ហ៊ុន សែន និងនាយករដ្ឋមន្ត្រីវៀតណាម នៅទីក្រុងហាណូយ នឹងចូលរួមជាអធិបតីភាពក្នុងសន្និសីទបូកសរុបការងារខណ្ឌសីមា និងបោះបង្គោលព្រំដែន ដែលនឹងមានការចុះហត្ថលេខាលើឯកសារច្បាប់ ចំនួនពីរ ដើម្បីទទួលស្គាល់លទ្ធផលការងារខណ្ឌសីមាព្រំដែន ៨៤% ដែលសម្រេចបាន។

សូមជម្រាបថា នៅមុនការអញ្ជើញទៅកាន់ប្រទេសវៀតណាម នៅក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យ ប៊ែលធី អន្តរជាតិ ( BELTEI International University ) នៅមជ្ឈមណ្ឌលសន្និបាត និងពិព័រណ៍កោះពេជ្រ ក្នុងរាជធានីភ្នំពេញ កាលពីព្រឹកថ្ងៃទី០២ ខែតុលា ឆ្នាំ២០១៩ សម្តេចតេជោ ហ៊ុន សែន បានប្រកាសថា កម្ពុជា និងវៀតណាម សម្រេចបោះបង្គោលខណ្ឌសីមា បាន ៨៤% រួចហើយ ដែលសម្តេច ទៅប្រទេសវៀតណាមនេះ នឹងចុះហត្ថលេខាទទួលយកសមិទ្ធផល ៨៤% នេះ៕

ខេត្តរតនគីរី ៖ ករណីបាញ់សម្លាប់មន្ត្រីនគរបាលម្នាក់ក្នុងហាងកាហ្វេមួយកន្លែង ស្ថិតក្នុងសង្កាត់បឹងកន្សែង ក្រុងបានលុង ខេត្តរតនគិរី កាលពីវេលាម៉ោង ៩និង២០នាទី នោះ ត្រូវបានសមត្ថកិច្ចតាមចាប់ឃាត់ខ្លួនជនសង្ស័យបានហើយ គឺត្រូវជាមិត្តភ័របស់ជនរងគ្រោះ ហើយជនសង្ស័យបានសារភាពថា រូបគេពិតជាបានបាញ់សម្លាប់ប្រាកដមែន ដោយសាររឿងគំនុំ។

នងការនគរបាលខេត្តរតនគិរី លោកយិន ចំណាន បានប្រាប់ឲ្យដឹងថា ជនដៃដល់ត្រូវបាន កម្លាំងនគរបាលតាមចាប់ខ្លួនបាននៅវេលាម៉ោង ១០និង៤៥នាទី នៅរមណីយដ្ឋានបឹងយក្សឡោម ក្រុងបានលុង ពោលក្រោយធ្វើសកម្មភាព ក្នុងរយៈពេលជាង ១ម៉ោង និងដកហូតរថយន្ដរបស់ជនដៃដល់ ដែលបើកទៅធ្វើសកម្មភាពមួយគ្រឿង ម៉ាក NISSAN ពណ៌ស ពាក់ផ្លាកលេខ 2N-5011 បន្ទាប់ពីជនបង្កឈ្មោះ នួន មករា បានប្រើកាំភ្លើងខ្លីបាញ់ចំក្បាលជនរងគ្រោះឈ្មោះ ផន ទុំ ១គ្រាប់ ក្នុងខណៈជនរងគ្រោះកំពុងអង្គុយផឹកកាហ្វេ។

លោកឧត្តមសេនីយ៍ស្នងការ បានបញ្ជាក់ទៀតថា ជនដៃដល់រូបនេះ ឈ្មោះ នួន មករា អាយុ៣១ឆ្នាំ ជាមន្ដ្រីនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តរតនគិរី។ ជនរងគ្រោះលោក ផន ទុំ មានតួនាទីជានាយរងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តរតនគិរី ជាមួយគ្នា និងត្រូវជាមិត្តភ័ក្តិ។

បច្ចុប្បន្ន ជនសង្ស័យបានឃាត់ខ្លួននៅការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តរតនគិរី ដើម្បីបំពេញបែបបទបញ្ជូនទៅតុលាការតាមនីតិវិធី៕

ភ្នំពេញ ៖ EDC បានចេញសេចក្តីជូនដំណឹង ស្តីពីការផ្អាកការផ្គត់ផ្គង់ចរន្តអគ្គិសនីនៅតាមតំបន់មួយចំនួន ក្នុងក្រុងភ្នំពេញ ដើម្បីអនុវត្តការងារជួសជុល ផ្លាស់ប្តូរ តម្លើងបរិក្ខារនានា និងរុះរើគន្លងខ្សែបណ្តាញបង្កលក្ខណៈដល់ការដ្ឋានពង្រីកផ្លូវ នៅថ្ងៃទី០៤ ខែតុលា ឆ្នាំ២០១៩ ដល់ថ្ងៃទី០៦ ខែតុលា ឆ្នាំ២០១៩។

ភ្នំពេញ ៖ លោក ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៅថ្ងៃទី០៣ ខែតុលា ឆ្នាំ២០១៩នេះ បានគូសបញ្ជាក់ថា ក្នុងរយៈពេល៩ខែ ដើមឆ្នាំ២០១៩នេះ រដ្ឋាភិបាលជប៉ុន បានផ្ដល់ជំនួយសរុបជិត៦០លានដុល្លារអាមេរិកដល់ប្រទេសកម្ពុជា។

ការគូសបញ្ជាក់យ៉ាងដូច្នេះ បានធ្វើឡើងនៅក្នុងពីធីចុះហត្ថលេខា លើលិខិតប្ដូរសារស្តីពី ការផ្តល់ហិរញ្ញប្បទាន រវាងលោក ឧបនាយករដ្ឋមន្ត្រី ប្រាក់ សុខុន និងឯកឧត្តម មីកាមី ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជា នៅទីស្តីការក្រសួងការបរទេស។

លោក ប្រាក់ សុខុន បានបញ្ជាក់ទៀតថា ពីដើមឆ្នាំ ដល់ចុងខែកញ្ញា កន្លងទៅនេះ រាជរដ្ឋាភិបាលកម្ពុជា និងរដ្ឋាភិបាលជប៉ុន បានចុះហត្ថលេខា លើលិខិតប្ដូរសារ និងកំណត់ហេតុនៃការពិភាក្សា ស្ដីពី ហិរញ្ញប្បទាន របស់ជប៉ុន ជាបន្ដបន្ទាប់ ចំនួន៣លើក ដែលលើកទី១ នៅថ្ងៃទី២០ ខែកុម្ភៈ ឆ្នាំ២០១៩ បានចុះហត្ថលេខាលើឯកសារ ស្ដីពី ហិរញ្ញប្បទានរបស់ជប៉ុន សរុបចំនួន៤,៩៣៩លានយ៉េន ស្មើនឹងប្រមាណ៤៣លានដុល្លារអាមេរិក ក្នុងនោះ ឥណទានសម្បទាន សម្រាប់អនុវត្ដគម្រោងកែលម្អ និងស្ដារប្រព័ន្ធស្រោចស្រប់ និងប្រព័ន្ធរំដោះទឹកភាគខាងលិច បឹងទន្លេសាប ជំហានទី២ និងហិរញ្ញប្បទានឥណសំណង់ សម្រាប់អនុវត្ដគម្រោងអភិវឌ្ឍន៍ ប្រព័ន្ធផ្លាស់ប្ដូរទិន្នន័យអគ្គិសនី នៅកំពង់ផែ ដើម្បីធ្វើទំនើបកម្មកំពង់ផែ។

លើកទី២៖ នៅថ្ងៃទី៣១ ខែឧសភា ឆ្នាំ២០១៩ នៅទីក្រុងតូក្យូ ប្រទេសជប៉ុន ក្រោមអធិបតីភាពសម្ដេចតេជោ ហ៊ុន សែន និងនាយករដ្ឋមន្ដ្រីជប៉ុន ចុះហត្ថលេខា លើឯកសារ ស្ដីអំពី ការផ្ដល់ហិរញ្ញប្បទានឥតសំណង សរុប៥៣៩លានយ៉េន ស្មើនឹងប្រមាណ៥លានដុល្លារអាមេរិក សម្រាប់អនុវត្ដគម្រោង២ គឺគម្រោងអាហារូបករណ៍អភិវឌ្ឍន៍ធនធានមនុស្ស និងគម្រោងសាងសង់ឃ្លាំង នៅតំបន់សេដ្ឋកិច្ចពិសេស កំពង់ផែស្វយ័តក្រុងព្រះសីហនុ។

លើកទី៣៖ នៅថ្ងៃទី១៧ ខែកក្កដា ឆ្នាំ២០១៩ ចុះហត្ថលេខាលើឯកសារ ស្ដីពីការផ្ដល់ហិរញ្ញប្បទានឥតសំណង់ ចំនួន៥០០លានយ៉េន ស្មើនឹងប្រមាណ ៤.៦លានដុល្លារអាមេរិក សម្រាប់ការផ្គប់ផ្គង់គ្រឿងចក្រ ជួសជុលផ្លូវថ្នល់នៅប្រទេសកម្ពុជា។
ឯកឧត្តមឧបនាយករដ្ឋមន្ត្រី បានបន្ថែមទៀតថា រដ្ឋាភិបាលជប៉ុន មិនត្រឹមតែបានរួមចំណែកយ៉ាងសំខាន់ ដល់សន្ដិភាព និងស្ថេរភាពនៅកម្ពុជាប៉ុណ្ណោះទេ តែក៏បាននឹងកំពុងជួយទ្រទ្រង់យ៉ាងសកម្មដល់ការស្ដារ និងអភិវឌ្ឍន៍ សេដ្ឋកិច្ចសង្គមផងដែរ។
សូមជម្រាបថា រដ្ឋាភិបាលជប៉ុន តាមរយៈឯកអគ្គរាជទូតរបស់ខ្លួនប្រចាំកម្ពុជា នៅថ្ងៃទី០៣ ខែតុលានេះ បានចុះហត្ថលេខាលើលិខិតប្ដូរសារ ស្តីពី ការផ្តល់ហិរញ្ញប្បទាន ឥតសំណង របស់ខ្លួន ដែលមានទឹកប្រាក់សរុប ២,៧៧៧លានយ៉េន ប្រមាណជា២៦លានដុល្លារអាម៉េរិក សម្រាប់អនុវត្តន៍គម្រោងអភិវឌ្ឍន៍ប្រព័ន្ធបង្ហូរទឹកកខ្វក់ ក្នុងរាជធានីភ្នំពេញ។

តាមរយៈហិរញ្ញប្បទានឥតសំណងនេះ ជប៉ុននឹងសាងសង់ស្ថានីយ៍ប្រព្រឹត្តិកម្មទឹកកខ្វក់មុននឹងបង្ហូរចូល ទៅក្នុងបឹងជើងឯង ភាគខាងត្បូង រាជធានីភ្នំពេញ។ ជំនួយរបស់ជប៉ុននេះ នឹងរួមចំណែកដ៏សំខាន់ ដល់ការធ្វើឲ្យប្រសើរឡើង នូវបរិស្ថានរស់នៅក្នុងប្រទេសកម្ពុជា៕

ភ្នំពេញ ៖ ជារៀងរាល់ឆ្នាំ ប្រទេសអារ៉ាប៊ីសាអូឌីត តែងបានផ្តល់អាហារូបករណ៍ឱ្យដល់និស្សិតកម្ពុជាជាច្រើនកន្លែងដើម្បីទៅសិក្សានៅប្រទេសអារ៉ាប៊ីសាអូឌីត ហើយថាសម្រាប់ឆ្នាំខាងមុខអារ៉ាប៊ីសាអូឌីតនឹងបន្ថែមចំនួនអាហារូប ករណ៍ជាច្រើនកន្លែងទៀតដល់និស្សិតកម្ពុជា ដែលការផ្តល់អាហារូបករណ៍នេះធ្វើឡើងមិនមែនតែសម្រាប់និស្សិត ដែលកាន់សាសនាឥស្លាមនោះទេ អ្នកកាន់សាសនាដទៃទៀតក៏អាចដាក់ពាក្យស្នើសុំអាហារូបករណ៍នេះបានដូចគ្នា នេះជាការបញ្ជាក់ជូនសម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា ពីលោកឯកអគ្គរាជទូតអារ៉ាប៊ីសាអូឌីត ប្រចាំកម្ពុជា នាជំនួបសម្តែងការគួរសមនៅវិមានរដ្ឋសភាព្រឹកថ្ងៃទី៣ តុលានេះ។

ជាការឆ្លើយតប សម្តេចប្រធានរដ្ឋសភាកម្ពុជាបានថ្លែងអំណរគុណចំពោះគម្រោងការនៃការបន្ថែមចំនួនអាហារូបករណ៍ដល់នស្សិតកម្ពុជាទៅបន្តការសិក្សានៅប្រទេសអារ៉ាប៊ីសាអូឌីត។ ជាមួយគ្នានេះ សម្តេចពញាចក្រី ហេង សំរិន មានប្រសាសន៍ថា ប្រទេសទំាងពីរ កម្ពុជា-អារ៉ាប៊ីសាអូឌីត បានភ្ជាប់ទំនាក់ទំនងការទូតជាមួយគ្នាទើប តែជិត១០ឆ្នាំប៉ុណ្ណោះ ប៉ុន្តែទំនាក់ទំនងមិត្តភាព និងកិច្ចសហប្រតិបត្តិការរវាងព្រះរាជាណាចក្រទាំងពីរ ត្រូវលើក កម្ពស់គួរអោយកត់សំគាល់។

សម្តេចបានបន្តទៀតថា វត្តមាននៃបេសកកម្មរបស់លោក Saud F.M. Al Suwelim ជាឯកអគ្គរាជទូត ប្រចាំនៅកម្ពុជា ពិតជាមានសារៈសំខាន់ខ្លាំងណាស់ដែលនឹងបន្តជម្រុញកិច្ចសហប្រតិបត្តិការល្អដែលមានស្រាប់ អោយកាន់តែបានប្រសើរខ្លាំងក្លាថែមទៀត ហើយក្នុងនាមរដ្ឋសភានៃព្រះរាជាណាចក្រកម្ពុជា សម្តេចអគ្គមហាពញាចក្រី ហេង សំរិន បានវាយតំលៃខ្ពស់ចំពោះវឌ្ឍនភាពនៃទំនាក់ទំនង និងកិច្ចសហប្រតិបត្តិការទ្វេភាគីរវាង ប្រទេសទំាងពីរ កម្ពុជា-អារ៉ាប៊ីសាអូឌីត ដោយបានបង្កើតនូវកិច្ចព្រមព្រៀងជាមួយគ្នាមួយចំនួន ជាពិសេសការគាំទ្រ គ្នាទៅវិញ ទៅមកនៅក្នុងវេទិកាអង្គការសហប្រជាជាតិ ដែលកិច្ចសហប្រតិបត្តិការទំាងនេះបានរួមចំណែកយ៉ាង សំខាន់ដល់ការថែរក្សាស្ថិរភាព សន្តិសុខ សន្តិភាព និងការអភិវឌ្ឍទំាងក្នុងតំបន់ និងសកលលោកផងដែរ។

លោក Saud F.M. Al Suwelim ឯកអគ្គរាជទូតអារ៉ាប៊ីសាអូឌីតប្រចាំនៅកម្ពុជាមានប្រសាសន៍ជម្រាប ជូនសម្តេចប្រធានរដ្ឋសភាកម្ពុជាថា អារ៉ាប៊ីសាអូឌីតប្រាថ្នាចង់ឃើញនូវការរីកចំរើននៃទំនាក់ទំនងរវាងប្រទេសទាំង ពីរ កម្ពុជា-អារ៉ាប៊ីសាអូឌីត នៅលើវិស័យការទូត នយោបាយ សេដ្ឋកិច្ច ពាណិជ្ជកម្ម និងកិច្ចសហប្រតិបត្តិការជា ពហុវិស័យផ្សេងៗទៀតផងដែរ៕

ភ្នំពេញ ៖ លោក សាន ម៉ៅ ដែលជាតារាកំប្លែងដ៏ល្បីមួយរូបរបស់កម្ពុជា បានទទួលមរណភាពហើយ នៅវេលាម៉ោង ៦ល្ងាច ថ្ងៃទី២ ខែតុលា ឆ្នាំ២០១៩ នេះ ក្នុងមន្ទីរពេទ្យមួយនៅប្រទេសថៃ។

នេះបើតាមការបញ្ជាក់របស់ លោក ហេង ឡុង ប្រធានក្រុមប្រឹក្សាភិបាលរបស់សមាគមសិល្បករខ្មែរ បានបញ្ជាក់ថា ក្នុងនាមជាប្រធានក្រុមប្រឹក្សាភិបាលរបស់សមាគមសិល្បករខ្មែរ សូមចូលរួមរំលែកទុក្ខដ៏ក្រៀមក្រំបំផុតខណៈដែលលោក សាន ម៉ៅ បានទទួលមរណភាព នៅម៉ោង ៦ល្ងាចនេះ នៅឯមន្ទីរពេទ្យប្រទេសថៃ៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍ថា មានស្ថានទូតអាមេរិក និងសាលា West Point អាមេរិកប៉ុណ្ណោះ ដែលអាចបញ្ជាក់ថា សញ្ញាបត្ររបស់ លោក ឧត្តមសេនីយ៏ឯក ហ៊ុន ម៉ាណែត ពិត រឺក្លែងក្លាយ។ សម្តេច បានបញ្ជាក់ប្រាប់ទៅលោក សម រង្ស៊ីថា ការមើលងាយចំពោះសមត្ថភាពរបស់កូនខ្មែរ និងប្រព័ន្ធអប់រំខ្មែរ គឺជាមើលងាយជាតិសាសន៏ខ្លួនឯង ហើយក៏ជាមើលស្រាលចំពោះសកម្មជនខ្លួនឯង ដែលបញ្ចប់ការសិក្សានៅកម្ពុជាដែរនោះ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចាត់ទុកអ្នកមើលងាយសមត្ថភាពយុវជនខ្មែរ គឺជាមើលងាយជាតិសាសន៏ខ្លួន និងឲ្យតម្លៃបរទេស ជ្រុលហួសហេតុ។ រឿងសញ្ញាបត្ររបស់លោក ឧត្តមសេនីយ៏ឯក ហ៊ុន ម៉ាណែត នៅសាលាបណ្ឌិតសភាយោធាសហរដ្ឋអាមេរិក West Point មានតែស្ថានទូតអាមេរិក និងសាលា West Point ទេ អាចបញ្ជាក់ថា ជាសញ្ញាបត្រពិត រឺគ្រាន់តែសញ្ញាបត្រកិត្តិយសនោះ។ ការបញ្ជាក់របស់សម្តេចតេជោ នៅពេលនេះ គឺនៅក្រោយប្រតិកម្មរបស់កូនប្រុសច្បងរបស់សម្តេច ចំពោះការលើកឡើងដោយគ្មានមូលដ្ឋានពីសំណាក លោកសម រង្ស៊ី ដែលថាសញ្ញាបត្ររបស់បណ្ឌិត ហ៊ុន ម៉ាណែត នៅសាលាយោធាជើងគោកអាមេរិក ជាសញ្ញាបត្រក្លែងក្លាយ ជាសញ្ញាបត្រការទូតសម្រាប់ផ្តល់ឲ្យនិស្សិតយោធាបរទេសដើម្បីជាការលើកទឹកចិត្តតែប៉ុណ្ណោះ ហើយនិស្សិតបរទេសមិនបាច់ខំរៀនក៏បានចូលនិងបានជាប់ដោយងាយដែរ។

លោក សម រង្ស៊ី បាននិយាយជាសាធារណៈទៅកាន់អ្នកគាំទ្រគាត់នៅសហរដ្ឋអាមេរិក កាលពីថ្ងៃទី ២៨ ខែកញ្ញា ២០១៩ ដែលបានលើកតម្កើនប្រព័ន្ធអប់រំស្រុកបារាំង និងលើកពីខ្លួនគាត់ដែលបានសិក្សានៅទីនោះ គាត់ក៏បានវាយប្រហារមើលងាយប្រព័ន្ធអប់រំនៅប្រទេសកម្ពុជា និងកូនប្រុសច្បងគឺ លោក ហ៊ុន ម៉ាណែត។ ភ្លាមៗ ឧត្តមសេនីយ៏ឯក ហ៊ុន ម៉ាណែត ដែលជាមេបញ្ជាការកងទ័ពជើងគោក បានបបួលលោកសម រង្ស៊ីភ្នាល់ ដើម្បីការពារកិត្តិយសផ្ទាល់ខ្លួន។ ឯ.ឧ ហ៊ុន ម៉ាណែតថា បើសិនជាសាលាបណ្ឌិតសភាយោធាសហរដ្ឋអាមេរិក West Point មានការផ្ដល់សញ្ញាបត្រពីរប្រភេទដូចលោក សម រង្ស៊ី បានលើកនោះ ជាពិសេសគឺសញ្ញាបត្រប្រភេទ២ ដែលជាសញ្ញាបត្រក្លែងក្លាយ ឬការទូតដែលសាលាបណ្ឌិតសភាយោធា West Point ផ្តល់អោយនិស្សិតយោធាបរទេសនោះ ហើយបើការបណ្ដុះបណ្ដាលនៅសាលា West Point ពិតជាមានការបែងចែកស្តង់ដារខុសគ្នារវាងនិស្សិតយោធាបរទេស និងអាមេរិកមែននោះ ឯ.ឧ នឹងលាលែងតួនាទីទាំងអស់ ក្នុងកងកម្លាំងប្រដាប់អាវុធហើយធ្វើជាប្រជាជនស៊ីវិលជារៀងរហូត។

ប៉ុន្តែបើលោក សម រង្ស៊ី មិនអាចបង្ហាញថា សាលាWest Point មានសញ្ញាបត្រពីរប្រភេទដែលមានតម្លៃខុសគ្នា ដោយមួយប្រភេទមានតម្លៃពិតប្រាកដ សម្រាប់ផ្ដល់ដល់និស្សិត យោធាអាមេរិក និងមួយប្រភេទទៀតដែលជាសញ្ញាបត្រក្លែងក្លាយ ឬសញ្ញាបត្រការទូតសម្រាប់ ផ្តល់ដល់និស្សិតនាយទាហានបរទេស ហើយការអប់រំបណ្ដុះបណ្ដាលនិស្សិតយោធាបរទេសនិងនិស្សិតយោធាអាមេរិកមានស្តង់ដារខុសគ្នានៅ West Point នោះ ឯ.ឧ ហ៊ុន ម៉ាណែត សូមឲ្យលោក សម រង្ស៊ី លាឈប់ពីនយោបាយជារៀងរហូត៕

ភ្នំពេញ ៖ លោក ឱម យ៊ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយនៅកម្ពុជា បានថ្លែងថា ACU គាំទ្រគ្រប់រូបភាពក្នុងសមត្ថកិច្ចរបស់ខ្លួនដល់វិស័យឯកជន ក្នុងការប្រកបធុរកិច្ចស្អាតស្អំនៅកម្ពុជា។

លោក ឱម យិនទៀង បានថ្លែងយ៉ាងដូចនេះ នាព្រឹកថ្ងៃទី០២ ខែតុលា ឆ្នាំ២០១៩ ក្នុងឱកាសដែលលោកបានអញ្ជើញជាអធិបតី ក្នុងសិក្ខាសាលាស្តីពី«ការចូលរួមរបស់ធុរកិច្ចក្នុងការប្រយុទ្ធប្រឆាំងអំពើពុករលួយនៅកម្ពុជា» ដែលបានធ្វើឡើងនៅសណ្ឋាគារសាន់វេភ្នំពេញ។ ដោយមានការចូលរួមពីឯកឧត្តម Luke Arnold អនុប្រធានបេសកកម្មការទូត នៃស្ថានទូតអូស្ត្រាលីប្រចាំនៅកម្ពុជា លោក Francesco Chechi ទីប្រឹក្សាការប្រឆាំងអំពើពុករលួយ អង្គការសហប្រជាជាតិទទួលបន្ទុកគ្រឿងញៀន និងបទឧក្រិដ្ឋ (UNODC) ប្រចាំតំបន់អាស៊ីអាគ្នេយ៍និងប៉ាស៊ីហ្វិក និងធុរកិច្ចក្នុងវិស័យឯកជនជាច្រើនទៀតផងដែរ។

ប្រធានអង្គភាពប្រឆាំងអំពើពុករលួយ បានបញ្ជាក់ទៀតថា សិក្ខាសាលាខាងលើនេះ ត្រូវបានរៀបចំឡើងក្នុងគោលបំណងកៀងគរ ការចូលរួមរបស់សហគមន៍ធុរកិច្ចនៅកម្ពុជា រួមជាមួយតំណាងរាជរដ្ឋាភិបាល សង្គមស៊ីវិល ដើម្បីពិភាក្សាលើការរួមគ្នា ដោះស្រាយបញ្ហាអំពើពុករលួយក្នុងវិស័យឯកជនដោយកំណត់នូវ ឧត្តមានុវត្តន៍នៃការពង្រឹងការបង្ការទប់ស្កាត់អំពើពុករលួយក្នុងកិច្ចលទ្ធកម្មសាធារណៈ និងបញ្ហាអំពើពុករលួយនៃភាពជាដៃគូរវាងវិស័យឯកជន និងសាធារណៈ , ដំណោះស្រាយ និងការពង្រឹងសុចរិតភាពធុរកិច្ចក្នុងវិស័យឯកជន។

លោក ឱម យិនទៀង បានបញ្ជាក់ទៀតថា សិក្ខាសាលានេះ ក៏បានចែករំលែកបទពិសោធន៍ពីភាគីពាក់ព័ន្ធជាអ្នកជំនាញ អ្នកអនុវត្តផ្ទាល់លើការងារ មកពីអង្គការអន្តរជាតិស្ថាប័នសាធារណៈ វិស័យឯកជន និងសង្គមស៊ីវិលយ៉ាងប្រទាក់ក្រឡាគ្នា ក្នុងក្របខ័ណ្ឌបទដ្ឋានអន្តរជាតិនៃការប្រឆាំងអំពើពុករលួយក្នុងវិស័យឯកជន, ក្របខ័ណ្ឌច្បាប់សម្រាប់ការដោះស្រាយអំពើពុករលួយ ប្រឈមដោយធុរកិច្ចនៅកម្ពុជា, អភិក្រមក្រុមហ៊ុនធានានូវសុចរិតភាពធុរកិច្ច និងការអនុវត្តការបង្ការទប់ស្កាត់អំពើពុករលួយ ក៏ដូចជាលើកកម្ពស់សកម្មភាពរួម សម្រាប់សុចរិតភាពធុរកិច្ច។

ស្របនឹងសភាពការក្នុងប្រទេស និងអន្តរជាតិ បន្តពង្រឹងការចូលរួមរបស់វិស័យឯកជនក្នុងការប្រយុទ្ធប្រឆាំងអំពើពុករលួយ ដើម្បីកម្ពុជាបន្តរក្សាបាន និងធ្វើឱ្យប្រសើរឡើងនូវបរិយាកាសធុរកិច្ចអំណោយផល ដល់ការវិនិយោគប្រកបដោយចីរភាព ជំរុញកំណើនសេដ្ឋកិច្ចគួរជាទីគាប់ចិត្តបន្តទៀត ក៏ដូចជាការឆ្លើយតបទៅនឹងកាតព្វកិច្ចរបស់កម្ពុជា ក្នុងឋានៈជារដ្ឋភាគីនៃអនុសញ្ញាអង្គការសហប្រជាជាតិប្រឆាំងអំពើពុករលួយ (UNCAC) ពាក់ព័ន្ធការបង្ការទប់ស្កាត់អំពើពុករលួយក្នុងវិស័យឯកជន និងក្នុងកិច្ចលទ្ធកម្មសាធារណៈ ការត្រួតពិនិត្យការអនុវត្តសម្រាប់ជុំទី២នេះ។

សិក្ខាសាលានេះ ក៏បានឆ្លុះបញ្ចាំងនូវឆន្ទៈ ការប្តេជ្ញា សហការរួមគ្នាបន្តប្រយុទ្ធប្រឆាំងអំពើពុករលួយពីគ្រប់ភាគីពាក់ព័ន្ធបន្ថែមលើកិច្ចសហការកន្លងមក ដូចជា ការចូលរួមគោរពច្បាប់ ការចូលរួមក្នុងគំនិតផ្តួចផ្តើមប្រឆាំងអំពើពុករលួយផ្សេងៗដាក់ចេញដោយអង្គភាពប្រឆាំងអំពើពុករលួយ ការចូលរួមរៀបចំនិងដាក់ចេញនូវសៀវភៅណែនាំស្តីអំពីកម្មវិធីប្រឆាំងអំពើពុករលួយសម្រាប់ធុរកិច្ចនៅកម្ពុជា និងកិច្ចសហការផ្សេងៗទៀត ។

ជាមួយគ្នានោះក៏លើកទឹកចិត្តដល់អ្នកចូលរួមទាំងអស់ ទាញយកប្រយោជន៍ពីសិក្ខាសាលានេះ តាមរយៈការទទួលយកបទពិសោធន៍ ដែលបានចែករំលែកដោយភាគីពាក់ព័ន្ធកម្រិតជាតិ អន្តរជាតិ ពីវិស័យសាធារណៈឯកជន និងអង្គការសង្គមស៊ីវិល លើកឡើងពិភាក្សារកដំណោះស្រាយលើបញ្ហាដែលខ្លួនជួបប្រទះ និងរួមគ្នាកំណត់នូវឧត្តមានុវត្តន៍នៃការបង្ការទប់ស្កាត់អំពើពុករលួយតាមរយៈគំនិតផ្តួចផ្តើមផ្សេងៗស្របតាមបរិបទ និងកាលៈទេសៈជាក់ស្តែង។

សូមបញ្ជាក់ដែរថា សិក្ខាសាលាស្តីពីការចូលរួមរបស់វិស័យធុរកិច្ចក្នុងការប្រយុទ្ធប្រឆាំងអំពើពុករលួយនៅកម្ពុជា សហការរៀបចំដោយស្ថាប័នចំនួន៥រួមមាន ការិយាល័យអង្គការសហប្រជាជាតិទទួលបន្ទុកគ្រឿងញៀន និងបទឧក្រិដ្ឋ(UNODC), អង្គភាពប្រឆាំងអំពើពុករលួយ, សភាពាណិជ្ជកម្មអឺរ៉ុប (EuroCham), តំបន់សេដ្ឋកិច្ចពិសេសភ្នំពេញ (PPSEZ), សហព័ន្ធនិយោជកនិងសមាគមពាណិជ្ជកម្មកម្ពុជា (CAMFEBA) និងគាំទ្រដោយរដ្ឋាភិបាលអូស្ត្រាលី៕