ភ្នំពេញ ៖ ក្រសួងឧស្សាហកម្ម និងសិប្បកម្ម បានចេញសេចក្តីសម្រេចកែសម្រួលថ្លៃទឹកស្អាត ដែលផលិត និងផ្គត់ផ្គង់ដោយរដ្ឋាករទឹកស្វយ័តក្រុងភ្នំពេញ ដែលចាប់ផ្តើមអនុវត្តន៍ចាប់ពីថ្ងៃទី១ ខែមករា ឆ្នាំ២០២០តទៅ។ នេះបើតាមសេចក្តីសម្រេចរបស់ក្រសួងឧស្សាហកម្ម និងសិប្បកម្ម។

យោងតាមសេចក្តីសម្រេចនេះ តម្លៃទឹកត្រូវបានបញ្ចុះថ្លៃចំពោះអតិថិជនជីវភាព (អ្នកប្រើប្រាស់តាមផ្ទះ) ដែលបានប្រើប្រាស់មិនលើសពី២៥ម៉ែត្រគូប ក្នុង១ខែ ខណៈអ្នកប្រើប្រាស់លើសពី២៥ ម៉ែត្រ គូប ក្នុង១ខែឡើងទៅនឹងត្រូវដំឡើងថ្លៃ។

សម្រាប់ប្រភេទអតិថិជនអាជីវកម្ម ត្រូវបានរក្សានៅតម្លៃដដែល លើកលែងតែប្រើប្រាស់ទឹកចាប់ពីលើស ១៥ម៉ែត្រគូបក្នុង១ខែឡើងទៅ នឹងត្រូវដំឡើងថ្លៃ។ ចំណែកអតិថិជនជាក្រសួងស្ថាប័ន អង្គភាពនានា និងស្ថានទូតវិញ តម្លៃទឹកនឹងត្រូវដំឡើងទ្វេគុណ៕

ភ្នំពេញ ៖ ស្របពេលធនធានរ៉ែនៅកម្ពុជា ដល់ដំណាក់កាលប្រមូលផលបណ្ដើរៗនោះ ក្រសួងរ៉ែនិងថាមពលដែលសមត្ថកិច្ចគ្រប់គ្រងក្នុងវិស័យចាប់ផ្ដើមធ្វើនីតិវិធី ស្មុគស្មាញ មុននឹងផ្ដល់អាជ្ញាប័ណ្ណដល់ក្រុមហ៊ុនដែលចង់ធ្វើអាជីវកម្មរ៉ែនៅកម្ពុជា ។ ការធ្វើបែបនេះ ត្រូវបានកក្រសួងអះអាងថា ដើម្បីផលប្រយោជន៍ប្រជាពលរដ្ឋនិងមិនធ្វើអោយផលប៉ះពាល់ពលរដ្ឋក៏ដូចជាវិស័យរ៉ែទាំងមូល។

យោងតាមប្រសាសន៍លោក ម៉េង សក្ដិធារ៉ា រដ្ឋលេខាធិការក្រសួងរ៉ែ និងថាមពល បានមាបន្រសាសន៍នៅក្នុងវេទិការវាងពលរដ្ឋ ក្រុមហ៊ុន និងអាជ្ញាធរនៅសណ្ឋាគារកាំបូឌីយ៉ាណាកាលពីថ្ងៃទី ២២ វិច្ឆិកានេះថា កាលពីមុនការផ្ដល់អាជ្ញាប័ណ្ណជូនក្រុមហ៊ុនធ្វើអាជីវកម្មរ៉ែ ត្រូវបានធ្វើឡើងដោយស្ងាត់ៗ ។ ឧទាហរណ៍ថា ក្រុមហ៊ុនរុករកបានឃើញ នូវសក្ដានុពលរ៉ែនៅតំបន់ណា ហើយចង់ធ្វើអាជីវកម្មទាញយក អាចដាក់ពាក្យស្នើសុំអាជ្ញាប័ណ្ណមកក្រសួងរ៉ែ និងថាមពល រួចក្រសួងនឹងពិនិត្យមើល ក៏ផ្ដល់អាជ្ញាប័ណ្ណជូន ។ ឥឡូវ មិនអញ្ចឹងទៀតទេ , ការផ្ដល់អាជ្ញាប័ណ្ណ ត្រូវបានធ្វើឡើងជាដំណាក់ៗ ។ មុននឹងក្រសួងផ្ដល់អាជ្ញាប័ណ្ណទៅក្រុមហ៊ុនមួយ ក្រសួងត្រូវប្រកាសជាសាធារណៈ  ដោយក្រសួងនឹងប្រកាសប្រាប់ថាតំបន់ណាមួយអាចធ្វើអាជីវកម្មបាន ដើម្បីអោយក្រុមហ៊ុនដាក់ពាក្យស្នើសុំអាជ្ញាប័ណ្ណ មកក្រសួង ។

លោកបន្តថា ការធ្វើបែបនេះ ដើម្បីងោយប្រជាពលរដ្ឋនៅក្នុងតំបន់នោះ អាចប្ដឹងតវ៉ាមកក្រសួងបើសិនជាមានផលប៉ះពាល់ណាមួយដល់ជីវភាពឬប្រយោជន៍ធំរបស់ពួកគាត់ ដើម្បីអោយក្រសួងយកបញ្ហានោះ មកជជែកពិភាក្សាទាំងអស់គ្នា ។នៅពេលដែលក្រសួងពិនិត្យមើល និងពិគ្រោះយោបល់ហើយ វាមានផលប៉ះពាល់អវិជ្ជមានច្រើន នោះក្រសួងនឹងមិនផ្ដល់អាជ្ញាប័ណ្ណទៅ អោយក្រុមហ៊ុនឯកជននោះសម្រាប់ធ្វើអាជីវកម្មនោះឡើយ ។

លោកបញ្ជាក់ថា បងប្អូនប្រជាពលរដ្ឋក្នុងតំបន់នោះ បើសិនជាមានអ្វីត្រូវលើកឡើងឬជំទាស់ត្រូវធ្វើមុនក្រសួងចេញអាជ្ញាប័ណ្ណ ព្រោះនៅពេលដែលយើងចេញអាជ្ញាប័ណ្ណរួចហើយ យើងមិនចេះតែដកឬបញ្ឈប់គេបាននោះទេ ព្រោះគេបានដាក់ទុនលុយជាច្រើនដើម្បីបង្កើតក្រុមហ៊ុនមួយៗចឹងបើសិនជាដកឬបញ្ឈប់យើងត្រូវសងគេ  ។ នេះជាច្បាប់ដែលបងប្អូនប្រជាពលរដ្ឋត្រូវយល់ដឹងទាំងអស់គ្នានិងត្រូវយល់ពីគ្នាផងដែរ ។

បើតាមប្រសាសន៍ឯកឧត្តមស៊ុយ សែម រដ្ឋមន្ត្រីក្រសួងរ៉ែនិងថាមពលបានអោយដឹងថា ការជំរុញ អភិវឌ្ឍន៍វិស័យរ៉ែ និងប្រេងកាតមួយ ប្រកបដោយការទទួលខុសត្រូវ និងស្របតាមគោលដៅ អភិវឌ្ឍន៍ប្រកបដោយចីរភាពគឺជាឆន្ទៈនយោបាយនិងជាគោលដៅយុទ្ធសាស្ត្រ ដ៏ចំបងរបស់ក្រសួងរ៉ែនិងថាមពល ។ ការផ្ដល់ពីការបង្កើតក្រសួងរ៉ែនិងថាមពល បំបែកចេញពីអតីតក្រសួងឧស្សាហកម្មរ៉ែនិងថាមពល ការអនុវត្តកម្មវិធី កំណែទម្រង់ត្រូវបានអនុវត្តដោយបានឆ្លងកាត់ដំណាក់កាលសំខាន់ជាយុទ្ធសាស្ត្រចំនួនពីររួចហើយគឺ ១.ដំណាក់កាលពីឆ្នាំ ២០១៣ដល់ឆ្នាំ ២០១៦ ជាដំណាក់កាលនៃការរៀបចំ កសាងនិងពង្រឹងសមត្ថភាពស្ថាប័នកិច្ចនៅក្នុងវិស័យរ៉ែ និងប្រេងកាត ទី២ .ដំណាក់កាលពីឆ្នាំ ២០១៦ ដល់ឆ្នាំ ២០១៨ ជាដំណាក់កាលនៃការពង្រឹងភាពអនុលោម និងការអនុវត្តច្បាប់ ។

លោកបន្តថា បច្ចុប្បន្ន ដំណាក់កាលពីឆ្នាំ ២០១៨ ដល់ឆ្នាំ ២០២៣ គឺជាដំណាក់កាលនៃការប្រមូលផល ដែលកម្ពុជាអាចចាប់ផ្ដើមកសាងបានជាលើកដំបូងនូវខឿនឧស្សាហកម្មប្រភេទថ្មីរបស់ខ្លួន ឧស្សាហកម្ម និស្សារណៈកម្ម បន្ថែមលើខឿនឧស្សាហកម្មនិងសេដ្ឋកិច្ចនាពេលបច្ចុប្បន្ន ។ ការចាប់ផ្ដើមឡើងនៃខឿន ឧស្សាហកម្មថ្មីនេះ បាននិងកំពុងស្ដែងឡើងតាមរយៈការបង្កើតបាននូវរោងចក្រឧស្សាហកម្មផលិតស៊ីម៉ង់ត៍ធំៗ ការអភិវឌ្ឍអណ្ដូង រ៉ែ និងបង្កើតរោងចក្រចម្រាញ់រ៉ែមាសទំនើបខ្នាតធំ និងការអភិវឌ្ឍអណ្ដូងអាជីវកម្មរ៉ែ ប្រេងកាតរបស់កម្ពុជាជាលើកដំបូងនៅពេលឆាប់ៗខាងមុខនេះ ។ខឿនឧស្សាហកម្មនេះ មានសារៈសំខាន់ធំធេងណាស់ សម្រាប់ការអភិវឌ្ឍសេដ្ឋកិច្ចនិងសង្គមរបស់កម្ពុជា ទាំងការចូលរួមដោយផ្ទាល់ និងទាំងដោយប្រយោល ។

តាមលោកម៉េង សក្ដិធារ៉ា នៅព្រឹកថ្ងៃទី ២២ វិច្ឆិកាថា បច្ចុប្បន្នក្រុមហ៊ុនដែលមានអាជ្ញាប័ណ្ណធ្វើអាជីវកម្មរ៉ែទាំងនៅក្នុងប្រទេសមានប្រមាណជិត១០០ក្រុមហ៊ុន ក៏ប៉ុន្តែមានក្រុមហ៊ុនតិចតួចប៉ុណ្ណោះ ដែលមានឆន្ទៈក្នុងការសហការជាមួយពលរដ្ឋនិងអាជ្ញាធរ ដើម្បីធ្វើអាជីវកម្មមួយប្រកបដោយទំនួលខុសត្រូវសង្គមខ្ពស់ ៕

ភ្នំពេញ ៖ គណៈកម្មាធិការជាតិរៀបចំបុណ្យជាតិ-អន្ដរជាតិ បានឲ្យដឹងថា ព្រះសពរបស់សម្ដេចរាជបុត្រី ព្រះ​រៀម នរោត្តម បុប្ផាទេវី នឹងត្រូវរំកិលពីវត្ដបទុមវតីរាជវរារាម នៅព្រឹកថ្ងៃទី២៥ ខែវិច្ឆិកា ឆ្ពោះ​ទៅ​កាន់​ព្រះ​មេរុ នៅមុខវត្ដបទុមវតីរាជវរារាម ដើម្បីរៀបចំពិធីបូជាព្រះសព នៅព្រឹកថ្ងៃទី២៥ ខែវិច្ឆិកា ឆ្នាំ​២០១៩ ដើមសប្តាហ៍ក្រោយ។

សូមជម្រាថា សម្ដេចរាជបុត្រី ព្រះរៀម នរោត្តម បុប្ផាទេវី បានយាងសោយព្រះទិវង្គតក្នុងព្រះជន្ម ៧៦ព្រះវស្សា នាវេលាម៉ោង ១២:៣០ នាទី ថ្ងៃទី១៨ ខែវិច្ឆិកា ឆ្នាំ២០១៩ ក្នុងមន្ទីរពេទ្យព្រះរាជាណាចក្រថៃ ដោយព្រះរោគាពាធ។ ព្រះ​សព​ត្រូវ​បាន​បញ្ជូន​មក​ដល់​កម្ពុជា និង​ដង្ហែ​ទៅ​កាន់​វត្ត​បទុមវតី កាល​ពី យប់ ថ្ងៃទី១៩ ខែវិច្ឆិកា ឆ្នាំ២០១៩៕

ខេត្តសៀមរាប ៖  សហគមន៍ទេសចរណ៍ធម្មជាតិកំពង់ភ្លុក ស្ថិតនៅតាមមាត់បឹងទន្លេសាប ក្នុងឃុំកំពង់ភ្លុក ដែលមាន០៣ភូមិ រួមមាន៖ ភូមិត្នោតកំបុត ភូមិគោកក្តុល និងភូមិដីក្រហម ស្រុកប្រាសាទបាគង ខេត្តសៀមរាប និងមានចំងាយប្រមាណ ៣០គីឡូម៉ែត្រពីទីរួមខេត្តសៀមរាប ដោយធ្វើដំណើរតាមផ្លូវជាតិលេខ៦ ឆ្ពោះទៅរាជធានីភ្នំពេញ។

ដោយសហគមន៍នេះមានភាពទាក់ទាញដល់អ្នកទេសចរអាចទស្សនាជីវភាពរស់នៅប្រចាំថ្ងៃរបស់ប្រជាជននៅតាមមាត់បឹងទន្លេសាប ទស្សនាផ្ទះសង់ខ្ពស់ៗនៅលើផ្ទៃទឹក ទស្សនាភូមិបណ្តែតទឹក អុំទូកទស្សនាក្នុងភូមិ ទស្សនាព្រៃលិចទឹក និងផ្តិតយកនូវរូបភាពស្អាតៗ ហើយអ្វីដែលកាន់តែពិសេសគឺអាចទស្សនាផ្ទៃបឹងទន្លេសាបដ៏ធំល្វឹងល្វើយជាមួយនឹងភោជនីយដ្ឋានបណ្តែតទឹក បែចិញ្ជឹមត្រី រួមជាមួយនឹងទិដ្ឋភាពថ្ងៃរៀបលិចដ៏ស្រស់ស្អាតនៅលើផ្ទៃបឹង។

ចំពោះលក្ខណ:ពិសេសប្លែកគេរបស់សហគមន៍ ហើយដែលភ្ញៀវទេសចរជាតិ-អន្តរជាតិពេញចិត្តបំផុតនោះគឺ សេវាអុំទូកកម្សាន្តក្នុងភូមិមើលទេសភាព និងព្រៃលិចទឹកដែលមានអ្នកអុំទូកជាស្ត្រីទាំងអស់ក្នុងចំណោមទូកចំនួន ៩៦១។ ក្រុមស្ត្រីអុំទូកនេះមិនត្រឹមតែជាអ្នកអុំទូកដ៏ជំនាញប៉ុណ្ណោះទេ ប៉ុន្តែថែមទាំងជាមគ្គុទ្ទេសក៍ទេសចរដែលអាចពន្យល់រៀបរាប់ដល់ភ្ញៀវអំពីលក្ខណ:ស្ថានភាព ធម្មជាតិ ប្រពៃណីទំនៀមទម្លាប់ និងសក្តានុពលដែលមានក្នុងសហគមន៍ ប្រកបដោយស្នាមញញឹម រួសរាយរាក់ទាក់ ស្និទ្ធស្នាល ផ្តល់នូវភាពកក់ក្តៅ។

ភ្ញៀវទេសចរជាតិ-អន្តរជាតិ អាចធ្វើដំណើរទៅកាន់សហគមន៍ទេសចរណ៍កំពង់ភ្លុកបានតាមរយ: រថយន្ត រ៉ឺម៉ក ឬម៉ូតូដោយប្រើរយៈពេលប្រមាណជា ២៥នាទីពីទីរួមខេត្តទៅកាន់ចំណតកាណូតរបស់សហគមន៍ ហើយបន្ទាប់មកយើងធ្វើដំណើរតាមកាណូតទៅកាន់សហគមន៍ដោយប្រើរយៈពេលប្រមាណ ២០ នាទីទៀត ទើបយើងទៅដល់សហគមន៍កំពង់ភ្លុក៕

ភ្នំពេញ ៖ លោក ថោង ខុន រដ្ឋមន្ត្រីក្រសួងទេសចរណ៍ បាន​ឲ្យ​ដឹង​ថា គិត​ត្រឹម ៨ខែ ឆ្នាំ២០១៩នេះ ការ វិនិយោគ​លើ​វិស័យ​ទេស​ចរណ៍​មាន​ការ​កើន​ឡើង​យ៉ាង​គំហុក​រហូត​ដល់​៩៤% បើ​ធៀប​រយៈ​ពេល​ដូច​គ្នា​ឆ្នាំ​២០១៨។ លោកថ្លែង​បែប​នេះ​ នៅ​ក្នុង​វេទិកា​វិនិយោគ​លើ​វិស័យ​ទេសចរណ៍​នៅ​កម្ពុជា​លើក​ទី២ នៅ​ថ្ងៃ​ទី ២១ ខែវិច្ឆិកា នៅ​សណ្ឋាគារ​សូហ្វី​តែល ដោយយោង​តាម​ទិន្នន័យ​របស់​ក្រុម​ប្រឹក្សា​អភិវឌ្ឍន៍​កម្ពុជា។

ដោយ​ឡែក​សម្រាប់​ការវិនិយោគពីឆ្នាំ ២០១៦ ដល់ ខែសីហា ឆ្នាំ២០១៩ ការវិនិយោគ​ក្នុង​វិស័យ​ទេសចរណ៍​មាន​កើន​ឡើង​​ប្រមាណ ៤៧% មាន ៨១៣គម្រោង​មាន​ទុន​វិនិយោគ សរុប​ប្រមាណ ២២,៥ពាន់លានដុល្លារ ក្នុងនោះគម្រោងទេសចរណ៍ និង​ផ្នែក​ពាក់​ព័ន្ធ​មាន​ចំនួន ៣៨គម្រោង ដែលមានទុនវិនិយោគប្រមាណជាង ៩ពាន់លានដុល្លា៕

ភ្នំពេញ ៖ ប្រធានាធិបតីសហរដ្ឋអាមេរិក បាន​សរ​សេរ​លិខិត​ដោយ​ផ្ទាល់ដៃ ផ្ញើជូនសម្តេចតេជោ ហ៊ុន​ សែន​ ប្រមុ​ខរាជរដ្ឋាភិបាលកម្ពុជា ដើម្បីបន្តការរិតចំណងទាក់ទង កិច្ច​សហ​ប្រតិ​បត្តិការ​ទ្វេភាគី​ឱ្យ​កាន់​តែ​មាន​ការ​រីកចម្រើនល្អប្រសើរឡើងថែមទៀត គោរពអធិបតេយ្យភាពកម្ពុជានិង មិនមានការគាំទ្រ ឱ្យ​មាន​ការប្តូររបបនៅកម្ពុជា​នោះទេ។​ នេះបើ​តាមការបញ្ជាក់របស់ លោក កៅ គឹមហួន រដ្ឋ​មន្ត្រី​ប្រតិភូ​អម​នាយករដ្ឋមន្ត្រី​ ថ្លែងប្រាប់អ្នកកាសែតបន្ទាប់ពីជំនួបរវាងសម្តេច ហ៊ុន​ សែន​ ជាមួយលោក​ Patrick Murphy​ ​​កាល​ពីថ្ងៃទី២១​ ខែវិច្ឆិកា នៅវិមាមសន្តិភាព​។

លោក កៅ គឹមហួន បានបន្តឱ្យដឹងទៀតថា នៅក្នុងជំនួបនេះសម្តេចតេជោ ហ៊ុន​ សែន​ បាន​គូស​បញ្ជាក់​ថា សហរដ្ឋអាមេរិក គាំ​ទ្រក​ម្ពុជា​ទទួ​លស្គា​ល់កម្ពុជា​តាំង​ពីមុ​នកម្ពុជា​ទទួលបានឯ​ករាជ្យ​ពី​បារាំង​នៅឆ្នាំ១៩៥៣ ទៅទៀត។

នៅ​ក្នុង​ជំនួបនេះ​ លោក​ឯកអគ្គ​រដ្ឋ​ទូត​ក៏​បាន​សម្ដែង​រួម​ការ​សោក​ស្ដាយ​និង​កាន់​ទុក្ខ​ចំពោះ​ការ​បាត់​បង់​ព្រះ​រាជបុត្រី ព្រះរៀម បុប្ផា ទេវី ហើយ​សម្ដេច​ក៏បានអ​រគុណ​ចំពោះ​ឯកអគ្គ​រដ្ឋ​ទូត​សហរដ្ឋ​អាមេរិក​ដែល​បាន​ចូលរួ​មមរណ​ទុក្ខ​នេះ​ហើយ​ក៏​បានអរគុណដល់ឯកអគ្គរដ្ឋទូតសហរដ្ឋអាមេរិក ​ដែ​ល​កន្លង​មក​បាន​ចូលរួម យ៉ាងសកម្ម ​ក្នុង​ការគោរពនិងចូលរួមបុណ្យជាតិរបស់កម្ពុជា គឺ​ជាបុ​ណ្យអុំ​ទូក​ និងបានធ្វើកា​រជាបន្ត​បន្ទាប់​ជាមួយ​នឹង​មន្ត្រី​ដូចជាជួបជាមួយសម្ដេចទៀបាញ់ ឧបនាយករដ្ឋមន្ត្រី រដ្ឋមន្ត្រីការពារជាតិ,ជួបជាមួយនឹងរដ្ឋ​មន្ត្រី​ក្រ​សួង​ព័ត៌​មាន​ជាដើ​ម ហើ​យ​សម្ដេចពិ​តជា​មាន​ការ​រី​ក​រាយ​ដែលលោកទូតបា​នប​ន្តធ្វើ​ការ​ជាមួ​យមន្ត្រី​របស់​រដ្ឋាភិ​បាល​។

ឯកអគ្គរដ្ឋទូតសហរដ្ឋអាមេរិកក៏បាននាំនូវលិខិតមួយផ្សេងទៀត ពាក់ព័ន្ធនឹ​ងកិ​ច្ចស​ហប្រ​តិ​ប​ត្តិ​កា​រ​រវា​ង​អាស៊ា​ន​និង​សហរដ្ឋ​អាមេ​រិ​ក​ព្រោះ​លិ​ខិតនេះគឺជាលិខិតផ្ទាល់ដែលចុះហត្ថលេខាដោយប្រធានា​ធិប​តីដូណាល់​ត្រាំផ្ញើ​ជូនមកសម្ដេ​ចជួប​ផ្ទាល់​ដែរ​ ហើយអ្វីដែលសំ​ខាន់​នៅក្នុង​លិខិតនេះ ​ប្រធានា​ធិបតី​ដូ​ណាល់ត្រាំ​បាន​អញ្ជើញ​សម្ដេច​នាយករដ្ឋ​មន្ត្រី​ទៅ​ចូល​រួម​កិច្ច​ប្រជុំ​កំពូល​អាស៊ាន​សហ​រដ្ឋ​អាមេរិក​នៅសហរដ្ឋអាមេរិក ក្នុង​ឆ្នាំ​២០២០ ខាងមុខ។

ដោយសារ​អា​មេរិក​ជាដៃ​គូ​យុទ្ធសាស្ត្ររ​បស់​អា​ស៊ានដូ​ច្នេះស​ម្ដេច​បាន​មា​នប្រសាស​ន៍ថា​សម្ដេច​គាំ​ទ្រ​គំនិត​ផ្ដួច​ផ្ដើម​របស់​ប្រធានាធិបតី ដូណាល់​ត្រាំ នៅក្នុងកិច្ចប្រជុំកំពូលអាស៊ានសហរដ្ឋអាមេរិក ដែលជា​កិច្ច​ប្រជុំ​ពិសេស។

ឆ្នាំ២០១០ បានធ្វើម្ដងរួចមកហើយៗនៅទីក្រុងញូយ៉កក្នុងឆ្នាំ២០២០នោះ កម្ពុជាគាំទ្រកិច្ច​ប្រជុំ​នេះ​ដោ​យសា​រអា​មេរិ​កជា​ដៃគូយុទ្ធ​សាស្ត្ររបស់អា​ស៊ាន ព្រោះថាអា​ស៊ា​ន​និ​ង​សហរដ្ឋអា​មេរិ​ក​មា​ន​កិ​ច្ច​ស​ហ​ប្រ​តិបត្តិការ​ជា​ច្រើន​វិស័យ​​​​កំពុងដើម្បីផលប្រ​យោជន៍​ទាំង​សងខា​ង។​សម្ដេ​ច​ថាក្នុងប​ញ្ហា​នេះ ​ស​ម្ដេ​ច​នឹ​ងពិភាក្សា​ជាមួ​យមេ​ដឹ​កនាំអា​ស៊ាន​ដទៃ​​ទៀត​ដើម្បី​គាំទ្រ​ធ្វើ​យ៉ាង​ណា​ឲ្យ​មាន​ការ​ឯកភាព​គ្នា​ជា​ឯកច្ឆន្ទ សម្រាប់​ការចូល​កិច្ច​ប្រជុំ​នៅពេ​លខា​ង​មុខ​នេះ ដូច្នេះ​គោល​ជំហរ​របស់​សម្ដេច​គឺ​ច្បាស់​លាស់​គាំទ្រ​ធ្វើយ៉ាងណាឱ្យ​ដៃគូ​យុទ្ធ​សាស្ត្រ​អាស៊ា​នស​ហ​រដ្ឋអាមេរិក​នេះបន្ត​រីក​ចម្រើន បន្តផ្ដល់ផល​ប្រយោជន៍ឲ្យគ្នាទៅវិញទៅមក។

សម្តេចក៏បានជំរាបឯកអគ្គរដ្ឋទូតផងដែរថា សម្តេចនឹងធ្វើ​លិខិ​ត​ឆ្លើយ​តបវិញ ទៅ​នឹង​លិខិត​របស់ ប្រធានាធិបតីសហរដ្ឋអាមេរិក ដូណាល់ត្រាំ ដែលបាន​សរសេរ​ដោយ​ផ្ទាល់​ដៃ​ផ្ញើ​ជូន​សម្តេច​នៅ​ពេល​នេះ៕

ក្រុងប៉ោយប៉ែត ៖ បន្ទាប់ពីកម្លាំងអគ្គនាយកដ្ឋានប្រឆាំងបទល្មើសល្បែងបច្ចេកវិទ្យា សហការជាមួយកម្លាំងនគរបាលស្នងការខេត្តបន្ទាយមានជ័យ ចុះបង្ក្រាបល្បែងអនឡាញអត់ច្បាប់នៅកាស៊ីណូចំនួន២កន្លែងផ្សេងគ្នា នៅក្រុងប៉ោយប៉ែងអស់រយៈពេលពីថ្ងៃកន្លងមក នៅរសៀលថ្ងៃទី២១ខែវិច្ឆិកា ឆ្នាំ២០១៩ នេៈ អាជ្ញាខេត្តបន្ទាយមានជ័យ បានប្រគល់ជនជាតិថៃប្រុស ស្រីចំនួន ១៧៣នាក់ក្នុងនោះស្រី១១៧នាក់ ទៅឲ្យអាជ្ញាធរថៃ នៅចំណុចលើស្ពានមិតភាពកម្ពុជា-ថៃ។

នៅក្នុងកិច្ចការរៀបចំប្រគល់ ទទួលនេះ អាជ្ញាធរកម្ពុជាដឹកនាំដោយលោកអភិបាលខេត្តបន្ទាយមានជ័យ អ៊ុ រាត្រី រួមនិងមន្ត្រីក្រោមឱវាទជាច្រើននាក់ ចំណែកអាជ្ញាធរថៃ ដឹកនាំដោយលោកអភិបាលខេត្តស្រះកែវ (ថៃ) លោក វីរៈផាន់សុវ៉ាន់នុត និងមន្ត្រីក្រោមឱវាទជាច្រើនរូបផងដែរ ដោយបានបិទផ្លូវផ្អាកការធ្វើចរាចរណ៍ជាបណ្តោះអាសន្នប្រហែលមួយម៉ោង ដើម្បីឲ្យរថយន្តដឹកជនជាតិថៃ ចូលមកដល់គល់ស្ពានមិត្តភាព និងងាយស្រូលក្នុងការផ្ទេរ និងរាប់ចំនួនមនុស្សប្រគល់ទៅឲ្យអាជ្ញាធរថៃ។

ប្រភពពីសន្តិសុខកាស៊ីណូបង្ហើបថា បើទោះជាប្រមុខរាជរដ្ឋាភិបាលប្រកាសឲ្យបិទល្បែងស៊ីសង (អនឡាញ) នៅក្នុងកាស៊ីណូ យ៉ាងណាក៏ដោយ ប៉ុន្តែនៅតែមានបើកល្បែងអនឡាញលួចលាក់ ទើបកម្លាំងអគ្គនាយកដ្ឋានប្រឆាំងបទល្មើសល្បែងបច្ចេកវិទ្យា មកបង្ក្រាបហើយរកឃើញថា ក្នុងកាស៊ីណូខាងលើ នៅមានល្បែងអនឡាញលួចលាក់ខុសច្បាប់ ដែលគេសង្ស័យថា សមត្ថកិច្ចពាក់ព័ន្ធក្នុងក្រុងប៉ោយប៉ែត បង្ក្រាបល្បែងស៊ីសងនៅមានកំរិត ដោយដៃម្ខាងបង្ក្រាប ដៃម្ខាងទៀតជំរាបសួរ ទើកើតមានល្បែងខុសច្បាប់ទាំងនេះ។

ជុំវិញករណីជនជាតិថៃ មកស្នាក់នៅបើកល្បែងស៊ីសងក្រៅច្បាប់ជ្រកក្រោមស្លាកកាស៊ីណូ ខាងលើនេះ ក្រុមអ្នកសារព័ត៌មានមិនអាចសុំការបកស្រាយពីមន្ត្រីអន្តោប្រវេសន្ត៍ទាំងខេត្ត ទាំងប្រធានស្នាក់ការ ឬមន្រ្តីណាម្នាក់ក្នុងកម្មវិធីនោះទេ  ដោយជំរុញឲ្យអ្នកសារព័ត៌មាន សាកសួរបន្តទៅអគ្គនាយកដ្ឋានអន្តប្រវេសន៍ បើចង់ដឹងព័ត៌មានច្បាស់ហាក់បីដូចជាមានការលាក់បាំង៕