ភ្នំពេញ ៖ កម្ពុជា ភ្លៀងនឹងបន្តធ្លាក់នៅទូទាំងប្រទេស ដែលអាចប៉ះពាល់ដល់តំបន់មួយចំនួន ពិសេស តំបន់ទំនាបកណ្តាល និងតំបន់ខ្ពង់រាប ប្រឈមនឹងមានជំនន់ទឹកភ្លៀង។ នេះបើតាមការ ព្យាកររបស់ក្រសួងធនធានទឹក និងឧតុនិយម នៅថ្ងៃនេះ។
ការព្យាករ បានបញ្ជាក់ឱ្យដឹងថា ចាប់ពីថ្ងៃទី១ រហូតដល់ទី៧ ខែតុលា ឆ្នាំ២០១៨ អាកាសធាតុនៅកម្ពុជានឹងមានស្ថានភាពប្រែប្រួលចាប់ពីថ្ងៃទី១ ដល់ថ្ងៃទី៧ ខែតុលា អាចនឹងមានភ្លៀងធ្លាក់ពីបង្គួរទៅច្រើន ក្នុងក្របខណ្ឌទូទាំងប្រទេស។
ក្រសួងធនធានទឹក ក៏បានអំពាវនាវផងដែរ ឱ្យបង្កើនការប្រុងប្រយ័ត្ន តំបន់ទំនាបកណ្ដាល និងតំបន់ខ្ពង់រាប ដែលអាចមានភ្លៀងធ្លាក់ច្រើន ចាប់ពីថ្ងៃទី១ ដល់ថ្ងៃទី៧ ខែតុលា នឹងអាចបង្កជាជំនន់ទឹកភ្លៀង៕
ខេត្តកំពង់ចាម ៖ ក្រុមមន្ត្រីកាំកុងត្រូលខេត្តកំពង់ចាម នៅព្រឹកថ្ងៃទី៣ ខែតុលានេះ បានចុះប្រតិបត្តិការត្រួតពិនិត្យចំណីអាហារដែលអាជីវករដាក់តាំងលក់នៅជុំវិញផ្សារ និងក្នុងផ្សារស្គន់ ក្នុងស្រុកជើងព្រៃ ខេត្តកំពង់ចាម ។
លោក ស៊ាន ស៊ីណាត ប្រធានកាំកុងត្រូលខេត្តកំពង់ចាម ដែលដឹកនាំប្រតិបត្តិការនេះ បានបញ្ជាក់ឲ្យដឹងថា ថ្មីៗនេះ អគ្គនាយកដ្ឋានកាំកុងត្រូល បានរៀបចំមន្ត្រីជំនាញ និងឧបករណ៍ពិសោធន៍ ចុះប្រតិបត្តិការ និងប្រចាំការតាមទីផ្សារគោលដៅសំខាន់ៗ ចំនួន៨ ក្នុងរាជធានីភ្នំពេញ។ គោលបំណង គឺដើម្បីត្រៀមធ្វើអន្តរាគមន៍ឆ្លើយតបបន្ទាន់ចំពោះហេតុការណ៍ចាំបាច់ ដោះស្រាយបញ្ហា ឬបាតុភាពជាយថាហេតុណាមួយរបស់ប្រជាពលរដ្ឋ ព្រមទាំងផ្តល់ការអប់រំលើកកម្ពស់ការយល់ដឹង ជូនអ្នកប្រើប្រាស់ អាជីវករ អ្នកលក់ដូរ អំពីបញ្ហាគុណភាព សុវត្ថិភាពផលិតផលទំនិញផងដែរ។ ដោយឡែក កាំកុងត្រូល ខេត្តកំពង់ចាម ក៏ត្រូវអនុវត្តតាមគោលការណ៍ដូចគ្នា ដោយត្រូវរៀបចំផែនការដើម្បីចុះត្រួត្យពិនិត្យគុណភាពម្ហូបអាហារជាប្រចាំ និងណែនាំដល់បងប្អូនអាជីវករ ឲ្យបានយល់ច្បាស់ពីការទទួលខុសត្រូវរាល់មុខទំនិញដែលខ្លួនបានដាក់តាំងលក់ ពិសេសគឺកាលបរិច្ឆេទប្រើប្រាស់ និងការហួសកំណត់ប្រើប្រាស់ ដែលចាំបាច់មិនត្រូវបន្តដាក់លក់ទៀតឡើយ។
លទ្ធផលនៃការចុះត្រួតពិនិត្យនេះ សមត្ថកិច្ចកាំកុងត្រូលខេត្តកំពង់ចាម បានដកហូតនូវទំនិញខូចគុណភាព និងហួសកំណត់ប្រើប្រាស់ជាច្រើនមុខ ដើម្បីយកទៅកម្ទេចចោល មានដូចជា ភេសជ្ជៈ គ្រឿងកំប៉ុង គ្រឿងទេស និងនំចណីកញ្ចប់ជាច្រើនមុខផ្សេងទៀតផង។
លោក ស៊ាន ស៊ីណាត ប្រធានកាំកុងត្រូលខេត្តកំពង់ចាម ក៏បានអំពាវនាវឱ្យប្រជាពលរដ្ឋដែលជាអ្នកប្រើប្រាស់ និងអាជីករ បើមានចម្ងល់ ឬមានបញ្ហាពាក់ព័ន្ធនឹងសុវត្ថិភាពម្ហូបអាហារ គឺអាចទាក់ទងផ្ទាល់ជាមួយមន្ត្រីកាំកុងត្រូល ដែលកំពុងប្រតិបត្តិការនៅតាមបណ្តាផ្សារ។ លោក ក៏បានផ្តាំផ្ញើផងដែរ ដល់ប្រជាពលរដ្ឋឲ្យបង្កើនការប្រុងប្រយ័ត្នចំពោះករណីពុលអាហារ នៅក្នុងឱកាសបុណ្យភ្ជុំបិណ្ឌនេះ៕
ភ្នំពេញ ៖ រដ្ឋមន្ត្រីក្រសួងអប់រំ យុវជន និងកីឡា ឯ.ឧ. ហង់ ជួនណារ៉ុន បានថ្លែងថា នៅថ្ងៃទី៥ ខែតុលា នេះ ក្រសួងនឹងរៀបចំប្រារព្ធទិវាគ្រូបង្រៀននៅវិទ្យាស្ថានជាតិអប់រំ ដោយមានការចូលរួមជាអធិបតី ពីសម្តេចនាយករដ្ឋមន្ត្រី ក្នុងនោះ បានជ្រើសរើសយកគ្រូបង្រៀនចំនួន១០រូប ដែលបង្រៀនសិស្សប្រឡងជាប់បាននិទ្ទេស A ដើម្បីទទួលយកពានរង្វាន់ជ័យលាភី និងនាយកសាលាដែលមានសិស្សទទួលបាននិទ្ទេស A ច្រើនជាងគេ ក៏ចូលរួមទទួលផងដែរ។
គួរជម្រាបថា សមាគមគ្រូបង្រៀនកម្ពុជាឯករាជ្យ ក៏នឹងប្រារព្ធទិវាគ្រូបង្រៀននៅទីលានប្រជា ធិបតេយ្យ ហើយក៏មានការហែរក្បួនដាក់ញ្ញត្តិនៅក្រសួងអប់រំ និងខុទ្ទកាល័យនាយករដ្ឋន្ត្រីផងដែរ។ យ៉ាងណាក៏ដោយ សាលារាជធានីភ្នំពេញបានអនុញ្ញាតឲ្យសមាគមគ្រូបង្រៀនកម្ពុជាឯករាជ្យប្រារព្ធ ទិវាគ្រូបង្រៀន តែនៅទីលានប្រជាធិបតេយ្យប៉ុណ្ណោះ គឺមិនអនុញ្ញាតឲ្យធ្វើនៅសួនច្បារមុខវត្តភ្នំនោះ ទេ៕
ភ្នំពេញ ៖ លោក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីក្រសួងមហាផ្ទៃបាន បញ្ជាក់នៅថ្ងៃទី២ តុលា នេះថា ជនជាតិចិនចំនួន១០៣នាក់ ត្រូវបានឃាត់ខ្កួនកាលពីសប្តាហ៍មុន ពាក់ព័ន្ធនឹងបទល្មើសជម្រិតទារប្រាក់តាមប្រព័ន្ធអ៊ីនធឺណិត ក្នុងនោះមាន១២នាក់ គឺពួកគេ បាន ប្រព្រឹត្តបទល្មើសនៅប្រទេសចិន ហើយមកសំងំលាក់ខ្លួននៅរាជធានីភ្នំពេញ និង៩១នាក់ទៀត បានប្រើប្រាស់ទឹកដីកម្ពុជាដើម្បីប្រព្រឹត្តបទល្មើស។
លោក អ៊ុក ហៃសីឡា បញ្ជាក់ថា គិតមកដល់ពេលនេះ មានជនជាតិចិនជិត ២ពាន់នាក់ ហើយ ដែលប្រព្រឹត្តិបទល្មើស និងបញ្ជូនទៅប្រទេសចិនវិញ។ដោយឡែក ក្នុងចំណោមជនជាតិចិន ចំនួន១០៣នាក់ ដែលបានឃាត់ខ្លួននោះ មានចំនួន ៩១នាក់ ពាក់ព័ន្ធការយកកម្ពុជាធ្វើជាទីតាំងដើម្បីជម្រិតទារប្រាក់ពីជនជាតិចិនដូចគ្នាដែលកំពុងរស់នៅប្រទេសចិន។ លោក ថា ជនជាតិចិន ទាំង១០៣ នាក់នោះ នឹងត្រូវបញ្ជូនចេញពីរាជធានីភ្នំពេញ តាមរយៈយន្តហោះដែលរដ្ឋាភិបាលចិនបញ្ជូនមកទទួលដឹកចេញយកទៅ នៅយប់ថ្ងៃទី៤ និងថ្ងៃទី១០ ខែតុលា ខាងមុខនេះ៕
លោក ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង បានឲ្យដឹងថា រហូតមកដល់ម៉ោង ៣ រសៀលថ្ងៃទី១ តុលា ម្សិលមិញនេះ មានប្រជាជនប្រមាណ ១១៥ ខ្នងផ្ទះបានធ្វើការផ្លាស់ទីទៅបោះទីតាំងបណ្តោះអាសន្នបណ្តើរៗហើយ បន្ទាប់ពីអាជ្ញាធរខេត្តកំពង់ឆ្នាំង បានបញ្ជាឲ្យប្រជាជនប្រមាណជាង ២ ពាន់គ្រួសារ ក្នុងនោះមានជនជាតិវៀតណាម និងជនជាតិខ្មែរអ៊ិស្លាម ដែលរស់ នៅលើផ្ទះបណ្ដែតទឹក ធ្វើការជម្លៀសផ្លាស់ទីឲ្យអស់នៅចុងឆ្នាំ២០១៩ ដើម្បីកែលម្អឲ្យទឹកទន្លេស្អាតឡើងវិញ។
លោក ស៊ុន សុវណ្ណរិទ្ធ បានបញ្ជាក់ថា «ពួកគាត់ធ្វើការផ្លាស់ទីនេះ ដោយម្ចាស់ការ ដោយខ្លួនគាត់។ គាត់អូស ផ្ទះបណ្តែតទឹកដោយស្ម័គ្រចិត្តខ្លួនគាត់ ហើយគ្រាន់តែយើងជួយសម្របសម្រួលជួយការពារសន្តិសុខជូនគាត់។ លោក ថា យើងមានការរៀបចំកម្លាំងជួយតទឹក តភ្លើង និងត្រៀមសន្តិសុខការពារសណ្តាប់ធ្នាប់ជូនគាត់ ហើយយើងមានក្រុមការងារជួយសម្របសម្រួលជូនគាត់នៅពេលគាត់មានការខ្វះខាត»៕
ភ្នំពេញ ៖ ជនសង្ស័យ៨នាក់ ក្នុងនោះមានស្ត្រីម្នាក់ នៅព្រឹកថ្ងៃទី២ តុលា នេះ ត្រូវសាលាដំបូងរាជធា នីភ្នំពេញ បានចោទប្រកាន់ចំនួន៣បទល្មើសពាក់ព័ន្ធការជួញដូរអាវុធ ដើម្បីប្រឆាំងរាជរដ្ឋាភិបាល កម្ពុជា ។ នេះបើយោងតាមការបញ្ជាក់របស់ លោក លី សុផាណា អ្នកនាំពាក្យអយ្យការអមសាលា ដំបូងរាជធានីភ្នំពេញ ។
អ្នកនាំពាក្យរូបនោះ បានបញ្ជាក់បន្ថែមថា ជនសង្ស័យទាំង៨នាក់ ដែលត្រូវបានប៉ូលិសចាប់ ខ្លួននៅ កន្លែងផ្សេងពីគ្នា គឺនៅខេត្តកំពង់ស្ពឺ ខេត្តកំពត និងខេត្តពោធិ៍សាត់ កាលពីចុងខែកញ្ញា ឆ្នាំ២០១៨ ពាក់ព័ន្ធករណីជួញដូរអាវុធខុសច្បាប់ ប្រឆាំងនិងរាជរដ្ឋាភិបាលកម្ពុជាស្របច្បាប់ដែលកើតចេញពីការបោះឆ្នោត ចំណែកមេខ្លោង និងបក្ខពួកមួយចំនួនទៀតសមត្ថកិច្ចកំពុងតែស្វែងរកចាប់ខ្លួន ដើម្បី យកមកផ្តន្ទាទោសតាមច្បាប់៕
ភ្នំពេញ ៖ លោក កៅ គឹមហួន រដ្ឋមន្ត្រីអមនាយករដ្ឋមន្ត្រី បានបញ្ជាក់ថា កម្ពុជា និងសហរដ្ឋអាមេរិក កំពុងបន្តការពិភាក្សាលើបញ្ហារុករកអដ្ឋិធាតុសាកសពទាហានអាមេរិកដែលបាត់បង់ជីវិតនៅលើទឹកដីកម្ពុជា រួមជាមួយការពិភាក្សាលើការធ្វើមាតុភូមិនិវត្តន៍របស់ពលរដ្ឋខែ្មរដែលកំពុងជាប់ពន្ធនា គារនៅទឹកដីអាមេរិក ដែលអាមេរិកគ្រោងបញ្ជូនមកកម្ពុជាវិញ ។ លោក កៅ គឹមហួន បានថ្លែងយ៉ាងដូច្នេះ នៅក្រោយការវិលត្រឡប់ពីសហអាមេរិករបស់ប្រតិភូជាន់ខ្ពស់នៃរាជរដ្ឋាភិបាលកម្ពុជាដឹកនាំដោយសម្តេចតេជោ ហ៊ុន សែន កាលពីថ្ងៃទី១ ខែតុលា។
លោក បានបញ្ជាក់ថា សម្តេចតេជោ ហ៊ុន សែន និងលោក Alexander Feldman ប្រធាននាយកប្រតិបត្តិក្រុមប្រឹក្សាធុរកិច្ចអាមេរិក ទទួលបន្ទុកអាស៊ាន បានជួបពិភាក្សាលើកិច្ចការជាច្រើន ពិសេសការរុករកអដ្ឋិធាតុសពទាហានអាមេរិក ដែលបាត់បង់ជីវិតនៅលើទឹកដីកម្ពុជាក្នុង សម័យ សង្គ្រាមរួមនិងការធ្វើមាតុភូមិនិវត្តន៍របស់ពលរដ្ឋខែ្មរដែលមានទោសនៅសហរដ្ឋអាមេរិកផងដែរ៕
ភ្នំពេញ ៖ រយៈពេល៩ខែ ក្នុងឆ្នាំ២០១៨ នេះ កងយោធពលខេមរភូមិន្ទ បានបង្ក្រាបបទល្មើសតាមខ្សែបន្ទាត់ព្រំដែនបានចំនួន ៤.២៣៣លើក ក្នុងនោះនៅតាមបណ្តោយព្រំដែន កម្ពុជា-ថៃ ចំនួន២.០៥៤លើក, ព្រំដែនកម្ពុជា-វៀតណាម ចំនួន១.០០៨លើក និងព្រំដែនកម្ពុជា- ឡាវ ចំនួន១.១៧១លើក ។ នេះបើយោងតាមការឲ្យដឹងពីឧត្តមសេនីយ៍ ឈុំ សុជាតិ អ្នកនាំពាក្យក្រសួង ការពារជាតិ ដែលថ្លែងនៅថ្ងៃទី២ ខែតុលា ឆ្នាំ២០១៨នេះ ។
លោក ឈុំ សុជាតិ បានបញ្ជាក់ថា ការអនុវត្តភារកិច្ចការពារ បូរណភាពទឹកដី កងយោធពល ខេមរភូមិន្ទ បានបន្តពង្រឹងប្រៀបការពារជាតិលើគ្រប់វិស័យ នៅតាមតំបន់ព្រំដែនធ្វើល្បាតជាប្រចាំ ដើម្បីត្រួតពិនិត្យគ្រប់គ្រងសភាពការណ៍ និងភូមិសាស្ត្រទទួលខុសត្រូវនិងបានចូល រួមទប់ស្កាត់ បទល្មើសផ្សេងៗ ។ ដោយឡែក ក្នុងរយៈពេលមួយត្រីមាស កន្លងទៅនេះ កងយោធពលខេមរ ភូមិន្ទក៏បានសហ ការជាមួយក្រុមហ៊ុនរុករកអដ្ឋិធាតុទាហានវៀតណាម ដោយបានរកឃើញអដ្ឋិ ធាតុទាហាន វៀតណាម ចំនួន ៥៦៦ធាតុផងដែរ៕
ភ្នំពេញ ៖ រយៈពេល៩ខែ ដើមឆ្នាំ ២០១៨ នេះ គ្រឹះស្ថានអង្គរ រកចំណូលពីការលក់សំបុត្រចូលទស្សនារមណីយដ្ឋានអង្គរ បានចំនួនជាង ៨៥លានដុល្លារអាមេរិក។
យោងតាមសេចក្តីជូនដំណឹងដែលចុះផ្សាយនៅថ្ងៃទី១ ខែតុលា ភ្ញៀវទេសចរបរទេសដែលបានមកទស្សនាខេត្តសៀមរាប និងបានចូលទិញសំបុត្រចូលទស្សនារមណីយដ្ឋានអង្គរមានចំនួន ជិត២លាននាក់ កើនឡើងជាង ៨ភាគរយ គិតជាចំណូលថវិកាប្រមាណជាង ៨៥លានដុល្លារ (៨៥,៥៧៩,៥២៣ដុល្លារ) កើនឡើងជាង ១៣ភាគរយ។
ជាមួយគ្នានេះដែរ ក្នុងរយៈពេលដូចគ្នានេះ ទឹកប្រាក់ដែលបានឧបត្ថម្ភចូលទៅមូលនិធិមន្ទីរពេទ្យគន្ធបុប្ផា មានចំនួនសរុបចំនួនជិត ៤លានដុល្លារ (៣,៨០៣,១៣៨ដុល្លារ)៕
ភ្នំពេញ ៖ នៅខែកញ្ញា ឆ្នាំ២០១៨កន្លងទៅនេះគ្រោះថ្នាក់ចរាចរផ្លូវគោក នៅទូទាំងប្រទេស បានកើតឡើង ២៥០ លើក បណ្តាលឲ្យស្លាប់ ១៣១ នាក់ និងរបួស ៣៣២ នាក់។ បើធៀបនឹងខែសីហា ឆ្នាំ២០១៨ គឺគ្រោះថ្នាក់ចរាចរនៅខែកញ្ញា កើនឡើងទាំងចំនួនគ្រោះថ្នាក់ កើនទាំងចំនួនអ្នកស្លាប់ និងរបួស។ នេះបើតាមរបាយការណ៍របស់ប៉ូលិសនាយកដ្ឋានចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ។ ដោយឡែករយៈពេល៩ខែសម្លាប់មនុស្ស ១.៣១៣ នាក់ របួស ៣.៤២៧នាក់។
ក្នុងចំណោមអ្នកស្លាប់ ១៣១ នាក់ មានអ្នកស្លាប់១១៥ នាក់ ជាអ្នកធ្វើដំណើរតាមម៉ូតូ។ ចំណែកមូលហេតុគ្រោះថ្នាក់ នៅខែកញ្ញា បង្កឡើងច្រើនជាងគេ ដោយការសារការបើកបរលឿន លើសល្បឿនកំណត់ មិនគោរពសិទ្ធិ មិនប្រកាន់ស្តាំ បត់គ្រោះថ្នាក់ ប្រជែង ស្រវឹង កត្តាយានយន្ត និងងងុយដេក។ចំណែករាជធានីខេត្ត ដែលគ្រោះថ្នាក់ នៅភ្នំពេញ ខេត្តព្រះសីហនុ កំពង់ស្ពឺ កំពង់ធំ ស្វាយរៀង បន្ទាយមានជ័យ កំពត តាកែវ និងខេត្តពោធិ៍សាត់៕
ភ្នំពេញ ៖ លោក នេត្រ ភក្ត្រា អ្នកនាំពាក្យក្រសួងបរិស្ថានបានថ្លែងអះអាងថា ក្រសួងនឹងពិនិត្យលិខិតស្នើសុំរបស់ GMAC ជុំវិញករណីកាកសំណល់ឧស្សាហកម្ម ខណៈដែល GMAC ស្នើសុំជួប ពិភាក្សាជាមួយក្រសួងដើម្បីរកដំណោះស្រាយលើការប្រមូលកាកសំណល់ឧស្សាហកម្មនៅតាមរោងចក្រនានា ដែលមានការយឺតយ៉ាវនាពេលកន្លងមក។
សូមជម្រាបថា កាលថ្ងៃទី ២៦ ខែកញ្ញា ឆ្នាំនេះ សមាគមរោងចក្រកាត់ដេរកម្ពុជា ( GMAC ) បានស្នើសុំឲ្យរដ្ឋមន្ត្រីបរិស្ថានរៀបចំការជួបពិភាក្សាគ្នាត្រីភាគីរវាងក្រសួងបរិស្ថាន សមាគមរោង ចក្រកាត់ដេរនៅកម្ពុជា និងក្រុមហ៊ុនប្រមូលសំរាមSarom Trading Co.,Ltd ដោយសមាគមរោង ចក្រ បានអះអាងថា ក្រុមហ៊ុននេះ ប្រមូលសំរាមពុំមានប្រសិទ្ធភាពដូចការកំណត់ ដោយយឺតយ៉ាវទាំងការប្រមូល និងប្រមូលមិនគ្រប់តាមការកំណត់ក្នុងមួយខែៗ៕
នៅក្នុងឱកាសនៃពិធីបុណ្យភ្ជុំបិណ្ឌខាងមុខនេះ អ្នកទោសជាង៣០០នាក់ នឹងត្រូវស្នើលើកលែង និងបន្ធូរបន្ថយទោស ដោយផ្អែកលើគោលការណ៍ច្បាប់ និងមនុស្សធម៌។ បញ្ជីឈ្មោះអ្នកទោសទាំងនោះ កំពុងស្ថិតនៅក្នុងដៃរបស់គណៈកម្មការពិនិត្យ មុនដាក់ឲ្យនាយករដ្ឋមន្ត្រីសម្រេច។ អ្នកនាំពាក្យរូបនេះបានបន្ថែមថា បច្ចុប្បន្នបញ្ជីឈ្មោះអ្នកទោសចំនួន ៣១៩នាក់ ក្នុងនោះមានស្ត្រីប្រមាណជា១០០នាក់ កំពុងស្ថិតនៅក្នុងដៃរបស់គណៈកម្មការជាតិ ដើម្បីពិនិត្យមើល មុននឹងបញ្ជូនទៅឲ្យនាយករដ្ឋមន្ត្រីសម្រេច។ បន្ទាប់មក នាយករដ្ឋមន្ត្រី នឹងស្នើទៅកាន់ព្រះមហាក្សត្រ ដើម្បីសុំលើកលែងទោស។
សម្តេចនាយករដ្ឋមន្ត្រី ហ៊ុន សែន សម្តេចនឹងស្នើឲ្យមានការលើកលែងទោសជាទ្រង់ទ្រាយធំមួយ បន្ថែមលើកម្មវិធីលើកលែងទោសប្រចាំឆ្នាំ ដូចជា នៅពេលភ្ជុំបិណ្ឌ បុណ្យឯករាជ្យជាតិ និងនៅពេលប្រារព្ធខួប២០ឆ្នាំ នៃការបញ្ចប់សង្គ្រាមស៊ីវិលនៅកម្ពុជាជាដើម៕
ភ្នំពេញ ៖មន្ត្រីកម្ពុជា និងសាធារណរដ្ឋឆេក ទទួលបន្ទុកផ្នែកឧស្សាហកម្មរ៉ែ នៅថ្ងៃទី១ ខែតុលា បានសម្រេចបង្កើតក្រុមការងាររួមមួយ សម្រាប់កិច្ចការពង្រឹងការផ្លាស់ប្តូរព័ត៌មាន លើគោលដៅបង្កើនកិច្ចសហការទ្វេភាគីក្នុងវិស័យរ៉ែ។
ក្រុមការងារមួយដែលត្រូវបានបង្កើតឡើងនេះ គឺបន្ទាប់ពីមន្ដ្រីរបស់ប្រទេសទាំងពីរបានជួបគ្នា និងពិភាក្សានៅក្នុងសិក្ខាសាលាកម្ពុជា និងឆេក អំពីការរុករករ៉ែ និងការស្រាវជ្រាវភូមិសាស្ដ្រ ដែលបានដឹកនាំដោយលោកឯកអគ្គរាជទូតនៃសាធារណរដ្ឋឆេក ប្រចាំកម្ពុជា និងលោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែ។
គួរជម្រាបថា មានក្រុមហ៊ុន៣ មកពីសាធារណរដ្ឋឆេក បានចូលរួមក្នុងកិច្ចការ គឺក្រុមហ៊ុនមានឯកទេសខាងការរុករករ៉ែ ប្រឹក្សាយោបល់សម្រាប់ការអាជីវកម្មរុករករ៉ែ និងក្រុមហ៊ុនលក់
ឧបករណ៍សម្រាប់វិស័យរុករករ៉ែ៕
ភ្នំពេញ ៖ តាមការគ្រោងទុក វិមានឈ្នះ-ឈ្នះ ដែលជានិម្មិតរូបនៃសុខសន្តិភាពនៅកម្ពុជា និងសម្ភោធ ជាផ្លូវការនៅថ្ងៃទី២៩ ខែធ្នូ ចុងឆ្នាំ២០១៨ ។ តាមកិច្ចប្រជុំរបស់រដ្ធបាលសាលារាជធានីភ្នំពេញ កាលពីព្រឹកថ្ងៃទី១ ខែតុលា បានពិភាក្សាស្តីពីការត្រៀមកម្លាំងរៀបចំគ្រប់ផ្នែកជំនាញ ដើម្បីឈាន ទៅប្រារព្ធពិធីសម្ភោធវិមានឈ្នះ-ឈ្នះ នាពេលខាងមុខអោយបានល្អប្រសើរ។
សូមរំឭកថា វិមានឈ្នះ-ឈ្នះ ដែលរៀបចំកសាងឡើងដោយក្រសួងការពារជាតិ បានចាប់ ផ្តើមសាងសង់ឡើង កាលពីខែកុម្ភៈ ឆ្នាំ ២០១៦ លើទំហំផ្ទៃដី ៨ហិកតា ស្ថិតនៅខណ្ឌជ្រោយចង្វារ រាជធានីភ្នំពេញ ។ វិមានឈ្នះ ឈ្នះ គឺជានិម្មិតរូប នៃការបញ្ចប់សង្គ្រាមនៅកម្ពុជា ក្រោមនយោបាយ ឈ្នះ-ឈ្នះ របស់សម្តេចតេជោ ហ៊ុន សែន ដែលជាស្ថាបនិកសន្តិភាព តែមួយគត់ និងជាអ្នកពន្លត់ ភ្លើងសង្គ្រាមដ៏រ៉ាំរ៉ៃនៅកម្ពុជា៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
