ភ្នំពេញ ៖ យុទ្ធនាការរឹតបន្ដឹងច្បាប់ចរាចរណ៍ទូទាំងប្រទេស នៅថ្ងៃទី១ ខែតុលា ឆ្នាំ២០១៨ នគរបាល ចរាចរណ៍ បានត្រួតពិនិត្យយានយន្ដលើចំនួន ២,៤០៦គ្រឿង រកឃើញល្មើសច្បាប់ ៤៤៣គ្រឿង ក្នុងនោះ ម៉ូតូ៥៦% អប់រំម្ចាស់ចំនួន ១៥០គ្រឿង និងផាកពិន័យ ២៩៣គ្រឿង។
របាយការណ៍ដដែលបញ្ជាក់ថា ចំពោះការត្រួតពិនិត្យមួកសុវត្ថិភាព និងកញ្ចក់ នៅថ្ងៃទី១ ខែតុលា នេះដែរ ត្រួតពិនិត្យជារួមបានចំនួន ២៨គ្រឿង, អប់រំម្ចាស់ចំនួន ១,៣២១គ្រឿង និងផាកពិន័យ ចំនួន ២២៩គ្រឿង៕
ភ្នំពេញ ៖ នាយករដ្ឋមន្ត្រីកម្ពុជា បានបញ្ជាក់ខ្លាំងៗថា «ខ្ញុំស្អប់ខ្លាំងណាស់ចំពោះក្រុមចោរលួចកាប់ព្រៃឈើ» ។ សម្តេចក៏បានព្រមានយ៉ាងម៉ឺងម៉ាត់ឲ្យចាប់ក្រុមចោរកាប់ឈើទាំងនោះ ហើយជាថ្មីម្តងទៀត បានបញ្ជាឲ្យឧទ្ធម្ភាគចក្រតាមដានជនដែលចូលលួចកាប់ព្រៃឈើ ហើយបាញ់ពីលើឧទ្ធម្ភាគចក្រតែម្តង។
សម្តេចនាយករដ្ឋមន្ត្រីកម្ពុជា បានថ្លែងបែបនេះ ខណៈជួបសំណេះសំណាលជាមួយពលរដ្ឋខ្មែរ-អាមេរិកាំងនៅសហរដ្ឋអាមេរិកនាថ្ងៃទី៣០ ខែកញ្ញា គ្រាដែលសម្តេចទៅចូលរួមប្រជុំមហាសន្និបាតអង្គការសហប្រជាជាតិ នាទីក្រុងញូវយ៉ក ចាប់តាំងពី ថ្ងៃ ទី២៧ ដល់ទី៣០ ខែកញ្ញា នេះ។
សម្តេចតេជោ ហ៊ុន សែន បញ្ជាក់ថា «ខ្ញុំទទួលស្គាល់អាចោរលួចកាប់ព្រៃឈើ ខ្ញុំកំពុងឲ្យឧទ្ធម្ភាគចក្របាញ់ពីលើផងឥឡូវហ្នឹង។ ខ្ញុំស្អប់អាចោរលួចកាប់ឈើ ក៏ប៉ុន្តែករណីរាប់លានហិកតា ដែលប្រជាពលរដ្ឋទៅកាប់ដើម្បីធ្វើស្រែចម្ការ អាហ្នឹងវាជាការបាត់បង់ព្រៃឈើ។ ដីហ្នឹងអាណាជីកយកទៅណា វានៅហ្នឹង រាប់ទាំងពួកប្រឆាំងផងហ្នឹង»។
ប៉ុន្តែអតីតមន្ត្រីបក្សប្រឆាំងលោក អ៊ូ ច័ន្ទរ័ត្ន បានថ្លែងថា វិធានការរបស់រដ្ឋាភិបាលពុំមានប្រសិទ្ធភាព ដោយសារមន្ត្រីមានអំណាចមួយចំនួនការពារអ្នករកស៊ីឈើធំៗ ហើយចំណាត់ការប៉ុន្មានឆ្នាំមុនក៏ដូចគ្នាដែរ ប្រើសុទ្ធតែកងកម្លាំងប្រដាប់អាវុធទាំងមន្ត្រីកងរាជអាវុធហត្ថ និងគណៈកម្មការដើម្បីត្រួតពិនិត្យ និងចាត់វិធានការ ប៉ុន្តែរហូតមកដល់ពេលនេះ ពុំមានការកាត់ទោសអ្នករកស៊ីឈើធំៗណាម្នាក់ឡើយ៕
ភ្នំពេញ ៖ មនុស្សចំនួន៨នាក់ ត្រូវបានប៉ូលិសតាមចាប់ខ្លួននៅកន្លែងផ្សេងគ្នាជាបន្តបន្ទាប់ និងរឹបអូសកាំភ្លើងប្រភេទ AK ស្វាយបត់ចំនួន ២៨ដើម ចំណែកមេក្លោងសមត្ថកិច្ចកំពុងតាមចាប់ខ្លួនបន្តទៀត។
ប្រតិបត្តិការសម្ងាត់នេះ ត្រូវបានអនុវត្តយូរមកហើយ ហើយការបង្ក្រាបចុងក្រោយចាប់តាំងពីថ្ងៃទី២៨ ខែកញ្ញា មកនេះ ដោយចាត់ទុកថាជាករណីជួញដូរអាវុធខុសច្បាប់ប្រឆាំង នឹងរាជរដ្ឋាភិបាល កម្ពុជា។ រីឯមេក្លោង និងបក្ខពួកមួយចំនួនទៀត សមត្ថកិច្ចកំពុងតែស្វែងរកចាប់ខ្លួនដើម្បីយកមកផ្តន្ទាទោសតាមច្បាប់។
នេះបើតាមលោកឧត្តមសេនីយ៍ឯក ឆាយ គឹមឃឿន អគ្គស្នងការរងនគរបាលជាតិ និងជានាយសេនាធិការ បានថ្លែងប្រាប់បណ្តាញព័ត៌មាននៅព្រឹកថ្ងៃទី១ ខែតុលា ឆ្នាំ២០១៨ នេះ។
បើតាមសេចក្តីរាយការណ៍បានឲ្យដឹងថា ជនសង្ស័យទាំង៨នាក់ ត្រូវបានប៉ូលិសចាប់ខ្លួននៅខេត្តកំពង់ស្ពឺ ខេត្តកំពត និងខេត្តពោធិ៍សាត់។ អាវុធដែលដកហូត គឺប្រភេទអាកាស្វាយបត់ចំនួន ២៨ដើម។ ក្នុងនោះ ជនសង្ស័យបានកប់លាក់ទុកនៅក្នុងដី ស្ថិតនៅសង្កាត់ពន្សាំង ខណ្ឌព្រែកព្នៅ រាជធានីភ្នំពេញ ចំនួន២៥ដើម, នៅភូមិតេជោក្បាលដំរី ខេត្តកំពត រកឃើញកាំភ្លើងចំនួន២ដើម និងនៅស្រុកក្រគរ ខេត្តពោធិ៍សាត់ រកឃើញកាំភ្លើងចំនួន១ដើម៕
ឧត្តរមានជ័យ ៖ ពលករមួយនាក់ក្នុងចំណោមខ្មែរមួយក្រុម ដែលចូលទៅដីថៃខុសច្បាប់ត្រូវបានយោធាថៃ ស្ថិតនៅក្នុងស្រុកកាប់ជើង ខេត្តសុរិនប្រទេថៃ ជាប់ព្រំប្រទល់ សង្កាត់អូរស្មាច់ ក្រុងសំរោង ខេត្តឧត្ដរមានជ័យ ចាប់ខ្លួនជាមួយវត្ថុតាងឈើក្រញូងមួយរទេះ។ ករណីនេះកើតឡើង កាលពីថ្ងៃទី ២៧ ខែកញ្ញា ឆ្នាំ២០១៨ កន្លងទៅ។
ពលរដ្ឋដែលត្រូវថៃចាប់ខ្លួនបាន មានឈ្មោះ រឿន សិលា ភេទប្រុសអាយុ ៣៥ឆ្នាំរស់នៅ ភូមិអូខ្លាឃុំ សង្កាត់អូស្មាច់ ក្រុងសំរោង បានបង្ហើបថា ពួកគេមានមេខ្យល់ចាំប្រមូលទិញឈើ ទើបចេះតែលួចចូលទៅកាប់ម្យ៉ាងមេខ្យល់គេជួយសម្រួលឲ្យឆ្លងដែនតាមច្រករបៀងព្រំដែនផង។
បើទោះបីជាឈ្មោះ រឿន សិលា មិនបាននិយាយដល់ឈ្មោះលោក ប៉ុក សុផល មេបញ្ជាការវរៈការពារព្រំដែន៤០២ ក្តី ក៏គេអាចយល់បានថា បើគ្មានការឃុបឃិតពីមេយោធាព្រំដែនទេ គឺគ្មាននរណាម្នាក់អាចឆ្លងកាត់ព្រំសិមាបានឡើយ។
សមត្ថកិច្ចកម្ពុជា បានអោយដឹងថា នៅតំបន់នេះមានឈ្មួញឈ្មោះ សាក់ និងឈ្មោះ ដុស ជាមេឈ្មួញឧក្រិដ្ឋកម្មឈើឆ្លងដែន និងកៀងគរឲ្យពលរដ្ឋស៊ីឈ្នួល ឬអូសទាញឲ្យលួចចូលទៅកាប់ឈើក្នុងទឹកដីថៃ ច្រើនឆ្នាំមកហើយ ចាប់ពីបង្គោលសិមាលេខ១៣ រហូតនៅក្នុងតំបន់ទិសទី៣ ទាំងមូលតែម្ដង។
ប្រភពដដែលបន្តថា បទល្មើសព្រៃឈើដែលកើតឡើងជាច្រើនឆ្នាំមកនេះ គឺដោយសារតែមានការឃុបឃិតគ្នាជាមួយកងកំលាំងឈរជើងតាមព្រំដែនខាងលើ ជាពិសេសនៅតំបន់វរៈការពារព្រំដែន៤០២ ដែលបច្ចុប្បន្នគ្រប់គ្រងដោយលោកឧត្ដមសេនីយ៍ត្រី ប៉ុក សុផល មេបញ្ជាការវរៈការពារព្រំដែន ៤០២ របស់យោធភូមិភាគទី៤។
ជុំវិញករណីខាងលើនេះ ភ្នាក់ងារព័ត៌មាន មេគង្គប៉ុស្តិ៍ មិនអាចស្វែងរកសុំការបំភ្លឺពីលោកឧត្ដមសេនីយ៍ត្រី ប៉ុក សុផល បាននៅឡើទេ៕
ភ្នំពេញ ៖ អគ្គនាយកដ្ឋានកាំកុងត្រូលកម្ពុជា បានច្រានចោលចំពោះការលើកឡើងរបស់លោក សម រង្ស៊ី ដែលថ្លែងតាមឃ្លីបវីដេអូ មួយថា ម្ហូបអាហារ និងបន្លែបង្ការនៅក្នុងប្រទេសកម្ពុជា មានផ្ទុកទៅដោយសារធាតុគីមី ដែលកំពុងតែបំផ្លាញបន្តិចម្តងៗទៅដល់សុខភាពរបស់ប្រជាពលរដ្ឋ។
អគ្គនាយកដ្ឋានកាំកុងត្រូល នៅថ្ងៃទី ៣០ ខែកញ្ញា បាន្រកាសចាត់ទុកការលើកឡើងរបស់ លោក សម រង្ស៊ី ពីបញ្ហាសុវត្ថិភាពម្ហូបអាហារ គឺគ្រាន់តែជាការកេងចំណេញផ្នែកនយោបាយប៉ុណ្ណោះ បំពានទាំងស្រុងគ្មានដឹងពីស្ថានភាពពិត និងអ្វីដែលរាជរដ្ឋាភិបាល និងប្រជាពលរដ្ឋកម្ពុជា បាន និងកំពុងធ្វើ ពិសេសលើបញ្ហាសុវត្ថិភាពម្ហូបអាហារ នេះឡើយ។
អគ្គនាយកដ្ឋានកាំកុងត្រូលបានអះអាងថា កម្ពុជា មានមន្ទីរពិសោធន៍ម្ហូបអាហារ ដែលមានសមត្ថភាពវិភាគរកឃើញសារធាតុគីមី មេរោគចម្លង កត្ដាគ្រោះថ្នាក់ជារូបវន្ដផ្សេងៗមិនចាញ់ ប្រទេស ជឿនលឿននៅលើពិភពលោកនោះឡើយ៕
ភ្នំពេញ ៖ សហព័ន្ធកីឡាបាល់ទាត់កម្ពុជា នៅថ្ងៃទី៣០ ខែកញ្ញា ឆ្នាំ២០១៨ នេះ បានឲ្យដឹងថា សំបុត្រចូលទស្សនាការប្រកួតរវាងក្រុមជម្រើសជាតិកម្ពុជា ជាមួយ ទីម័រខាងកើត បានចាប់ផ្ដើមលក់ហើយ នៅព្រឹកថ្ងៃទី០១ ខែតុលា ឆ្នាំ២០១៨ នេះ ចាប់ពីម៉ោង៩ព្រឹក ដល់ម៉ោង ៦ល្ងាច ក្នុង ថ្ងៃដដែល នៅបញ្ជរមុខពហុកីឡដ្ឋានជាតិអូឡាំពិក នារាជធានីភ្នំពេញ ។
សហព័ន្ធកីឡាបាល់ទាត់កម្ពុជា បានបញ្ជាក់ពីតម្លៃសំបុត្រ រួមមាន សំបុត្រសម្រាប់កៅអីធម្មតាថ្លៃ ៥.០០០រៀល និងសម្រាប់កៅអីពិសេសមានតម្លៃ ១០.០០០រៀល។
សូមជម្រាបថា ការប្រកួតសម្រាប់ក្រុមជម្រើសជាតិកម្ពុជា នឹងបើកទ្វារទទួលភ្ញៀវ ទីម័រខាង កើត នាថ្ងៃទី១២ ខែតុលា នេះ មុនជួបក្រុមជម្រើសរបស់សិង្ហបុរី នៅថ្ងៃទី១៦ ខែតុលា ក្នុងជំនួបមិត្តភាពត្រៀម Suzuki Cup នាពេលខាងមុខ៕
ភ្នំពេញ ៖ គ្រោះថ្នាក់ចរាចរណ៍ នៅទូទាំងប្រទេសនៅថ្ងៃទី៣០ ខែកញ្ញា ឆ្នាំ២០១៨ កើតឡើងចំនួន ៨លើក បណ្តាលឲ្យស្លាប់ ៧នាក់ របួសធ្ងន់ស្រាលចំនួន ២៣នាក់ ក្នុងនោះស្រី៨នាក់ មិនពាក់ពួកសុវត្ថិភាពពេលគ្រោះថ្នាក់១៤នាក់។
តាមរបាយការពីនាយកដ្ឋានចរាចរណ៍ នៃអគ្គស្នងការដ្ឋាននគរបាលជាតិ បង្ហាញថា នៅក្នុងករណីគ្រោះថ្នាក់ចរាចរណ៍ទាំង ៨លើកនេះ បានបង្កឲ្យមានការខូចខាតយានយន្តសរុប ១៧គ្រឿង ក្នុងនោះមានម៉ូតូ ១០គ្រឿង រថយន្តតូច ៣គ្រឿង រថយន្តធំ ៣គ្រឿង។
របាយការណ៍ដដែលបញ្ជាក់ថា គ្រោះថ្នាក់ចរាចរណ៍ផ្លូវគោកទូទាំងប្រទេស រយៈពេល៣០ថ្ងៃ គិតចាប់ពីថ្ងៃទី១ ដល់ទី៣០ ខែកញ្ញា ឆ្នាំ២០១៨ បានកើតឡើងចំនួន ២៥០លើក បណ្តាលឲ្យមនុស្សស្លាប់ចំនួន ១៣១នាក់ របួសធ្ងន់ ២៥១នាក់ និងរបួសស្រាល ៨១នាក់ ៕
ភ្នំពេញ ៖ តាមរបាយការណ៍របស់នាយកដ្ឋាននគរបាលចរាចរណ៍ នៃអគ្គស្នងការដ្ឋាននគរបាលជាតិ បានឲ្យដឹងថា យុទ្ធនាការរឹតបន្ដឹងច្បាប់ចរាចរណ៍ទូទាំងប្រទេសក្នុងថ្ងៃទី៣០ ខែកញ្ញា ឆ្នាំ ២០១៨ នេះ កម្លាំងនគរបាលចរាចរណ៍ បានត្រួតពិនិត្យយានយន្ដចំនួន ៤.០២៦គ្រឿង រកឃើញ ល្មើស ច្បាប់ ១.១១៩គ្រឿង ក្នុងនោះម៉ូតូ៩០% អប់រំ១៤៩គ្រឿង និងផាកពិន័យ ៩៧០គ្រឿង។
របាយការណ៍បានបញ្ជាក់ទៀតថា ចំពោះការត្រួតពិនិត្យមួកសុវត្ថិភាព និងកញ្ចក់ នៅថ្ងៃ ទី ៣០ ខែ កញ្ញានេះ ត្រួតពិនិត្យរួមបានចំនួន ១.៦៨៩គ្រឿង, អប់រំម្ចាស់ចំនួន ១០៥គ្រឿង និងផាក ពិន័យ ២៦៨គ្រឿង។
ចំពោះលទ្ធផល នៃការត្រួតពិនិត្យរយៈពេល៣០ថ្ងៃ ចាប់ពីថ្ងៃទី១ ដល់ថ្ងៃទី៣០ ខែកញ្ញានេះ ការត្រួតពិនិត្យយានយន្តបានចំនួន ១០៤.៥៨០គ្រឿង រកឃើញយានយន្តល្មើស ២២.៨៣២ ក្នុងនោះម៉ូតូ ៧៨% ធ្វើការអប់ម្ចាស់ចំនួន ៧.០៦៩ និងផាកពិន័យ ១៥.៧៦៣គ្រឿង៕
ភ្នំពេញ ៖ មានប្រសាសន៍នៅទីក្រុងញូវយ៉ក សហរដ្ឋអាមេរិក សម្ដេចនាយករដ្ឋមន្ត្រី ហ៊ុន សែន បាន ប្រកាសជាថ្មីថា រដ្ឋាភិបាល នឹងស្នើសុំព្រះមហាក្សត្រ លើកលែងទោសទណ្ឌិត ជាលក្ខណៈទ្រង់ ទ្រាយធំ នៅក្នុងពិធីបុណ្យភ្ជុំបិណ្ឌ នេះ។
សម្តេចតេជោ បានថ្លែងបែបនេះ ក្នុងពិធីជួបសំណេះសំណាលជាមួយពលរដ្ឋខ្មែរនៅអាមេរិក ។សម្តេចបញ្ជាក់ថា ឆ្នាំនេះខ្ញុំចង់ឲ្យលើកលែងទោសដោយទ្រង់ទ្រាយធំ នៅពេលភ្ជុំបិណ្ឌ នៅពេលបុណ្យឯករាជ្យ និងនៅពេលខួប២០ឆ្នាំ នៃការបញ្ចប់សង្គ្រាមស៊ីវិលនៅកម្ពុជា»។
ជាមួយនេះ សម្តេចតេជោ ក៏បានបញ្ជាក់ផងដែរថា ក្រសួងយុត្តិធម៌ និងក្រសួងមហាផ្ទៃ កំពុងពិនិត្យមើលករណីអ្នកទោសទាំងនេះហើយ ដើម្បីលើកលែងទោសឲ្យពួកគេ អាចចេញមកកែប្រែខ្លួន នៅក្រៅពន្ធនាគារមុនការកំណត់៕
ឥណ្ឌូនេស៊ី ៖ ចំនួនមនុស្សស្លាប់ ដោយសារតែការវាយប្រហារដោយគ្រោះរញ្ជួយដីកម្រិត ៧,៥ រ៉ិចទ័រ បង្កជារលកយក្ស ស៊ូណាមិក នៅលើកោះ Sulawesi របស់ឥណ្ឌូណេស៊ី បានកើនដល់៤២០នាក់ និងអ្នករបួសប្រមាណ ៥៤០នាក់ ខណៈក្រុមជួយសង្គ្រោះកំពុងខ្នះខ្នែង ដើម្បីតាមស្វែង រកជន ដែលអាចនៅរស់រានមានជីវិត ព្រមទាំងសាកសពអ្នកដែលស្លាប់នៅ តាមគំនរអាគារបាក់ បែកក្នុង តំបន់នានា ដែលរងការវាយប្រហារ។
អ្នកនាំពាក្យទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ី បានប្រកាសនៅរសៀលថ្ងៃ ទី៣០ ខែកញ្ញា ឆ្នាំ២០១៨ នេះថា ប្រជាជនប្រមាណ ២,៤លាននាក់ បានរងផលប៉ះពាល់ដោយ សារគ្រោះធម្មជាតិដ៏អាក្រក់នេះ។ មនុស្សរាប់រយនាក់ទៀត បានរងរបួស និងយ៉ាងតិចជាង១៧ម៉ឺន នាក់ បានបាត់បង់ទីជម្រក។ចំណែក ទំហំនៃការបំផ្លិចបំផ្លាញដោយ គ្រោះរញ្ជួយដីនេះ មិនទាន់ កំណត់ច្បាស់លាស់នៅឡើយទេ ខណៈប្រព័ន្ធអគ្គិសនី និងការទំនាក់ទំនងត្រូវបានកាត់ផ្តាច់ ហើយផ្លូវថ្នល់ក៏ត្រូវខូចខាតទៀតនោះ ជាហេតុបង្កផលលំបាកខ្លាំងក្នុងការចូលជួយសង្គ្រោះ៕
ភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានលើកឡើង ថា ចាប់ពីពេលនេះតទៅ មិនអនុញ្ញាឲ្យឡានធំ ចេញ-ចូលរាជធានីភ្នំពេញពេលថ្ងៃទៀតទេ ហើយក៏លែងឱ្យមានការកំណត់ម៉ោងនេះ ម៉ោងនោះចេញ ចូលក្រុងដូចមុនទៀតដែរ និងលុបបំបាត់មិនឲ្យមានប័ណ្ណអនុញ្ញាតចេញ-ចូលរាជធានីប្រភេទA B និង C នោះទៀតផង។ លោកថ្លែងបែបនេះ នៅក្នុងពិធីជួបសំណេះសំណាលជាមួយមន្ដ្រីរាជការចំណុះសាលាខណ្ឌចំការមន និងសង្កាត់ កាលពីថ្ងៃទី២៨ ខែកញ្ញាឆ្នាំ២០១៨ ។
លោក ឃួង ស្រេង បានបញ្ជាក់ថា កន្លងមកនេះ រថយន្តចេញចូលរាជធានីភ្នំពេញ បានតាម ចិត្ត អោយតែមានប័ណ្ណអនុញ្ញាតចេញ-ចូលក្រុង ប្រភេទA B និង C ដែលជាហេតុបង្កឱ្យមានគ្រោះ ថ្នាក់ និងការកកស្ទះចរាចរណ៍នៅក្នុងរាជធានីភ្នំពេញយ៉ាងខ្លាំង។ ឯ.ឧ. បន្ដថា បញ្ហាប័ណ្ណអនុញ្ញាត ចេញ-ចូលក្រុង ប្រភេទ A, B និង C នេះ គេអាច កូពី បានយ៉ាងស្រួល ដោយគ្មានសមត្ថកិច្ចណាយកមកពិនិត្យ ថាពិត ឬមិនពិតនោះ ដូច្នេះចាប់ពីពេលនេះតទៅឬថយន្តធុនធំ នឹងបិទមិនឲ្យចេញ ចូលក្រុង ទៀតឡើយ៕
ក្នុងឆមាសទី១ ឆ្នាំ២០១៨នេះ អ្នកញៀនគ្រឿងញៀនចំនួន ៣.២៣១នាក់ បានមកទទួល យកសេវាព្យាបាលនៅតាមមូលដ្ឋាននានារបស់ក្រសួងសុខាភិបាល។ ចំនួននេះ បានកើន ឡើង១០២% បើប្រៀបនឹងឆមាសទី១ ឆ្នាំ ២០១៧ ដែលមានត្រឹម១.៥៩៦នាក់ប៉ុណ្ណោះ។
ក្រសួងសុខាភិបាល បញ្ជាក់ថា ចំនួនអ្នកញៀនគ្រឿងញៀនដែលមកទទួលការព្យាបាលនៅ តាមសេវាសុខាភិបាលនានា មានចំនួន ៣.២៣១នាក់ ក្នុងនោះ បុរស ៩៣% និងស្ត្រី ៧% ពួកគេត្រូវបានបែងចែកជាពីរ គឺអ្នកញៀនប្រភេទអំហ្វេតាមីន ចំនួន ៣.១០៨នាក់ និងអ្នកញៀនប្រភេទហេរូអ៊ីន ចំនួន ១២៣។ ពួកគេទាំងអស់នោះ បានទទួលការព្យាបាលនៅតាមមន្ទីរពេទ្យជាតិ, មន្ទីរពេទ្យបង្អែក, មណ្ឌលសុខភាព, មណ្ឌលព្យាបាល និងស្ដារនីតិសម្បទាជាដើម៕
គ.ជ.ប ជូនដំណឹងថា ប្រជាពលរដ្ឋអាចចាប់ផ្តើមទៅពិនិត្យ និងចុះឈ្មោះបោះឆ្នោត នៅតាម សាលាឃុំ សង្កាត់ទូទាំងប្រទេស ចាប់ពីថ្ងៃទី១ រហូតដល់ថ្ងៃទី១៨ ខែតុលា ឆ្នាំ២០១៨។ក្នុងករណី ដែលពិនិត្យឃើញមានកំហុសឆ្គងណាមួយពលរដ្ឋអាចស្នើសុំឲ្យមានការកែតម្រូវដោយ យោងតាមឯកសារសំអាងច្បាស់លាស់។
គ.ជ.ប ក៏បានអំពាវនាវឲ្យប្រជាពលរដ្ឋដែលគ្រប់អាយុបោះឆ្នោត ប្រញាប់ទៅចុះឈ្មោះចាប់ពីថ្ងៃទី១ ដល់ថ្ងៃទី១៨ ខែតុលា ខាងមុខ នៅតាមឃុំសង្កាត់ដែលខ្លួនកំពុងរស់នៅ។
គួរបញ្ជាក់ថា នៅក្រោយការបោះឆ្នោត ជ្រើសតាំងតំណាងរាស្ត្រនីតិកាលទី៦កន្លងទៅ គ.ជ.ប បាន លុបឈ្មោះពលរដ្ឋចំនួន ៩៥.៩២៨នាក់។ លោក សោម សូរីដា បញ្ជាក់ថា មូលហេតុដែល គ.ជ.ប សម្រេចលុបឈ្មោះ ដោយសារតែមួយចំនួន បានទទួលមរណភាព មួយចំនួនត្រូវបានដកហូតនូវសិទ្ធិបោះឆ្នោតជាបណ្តោះអាសន្ន ឬផ្លាស់ទីលំនៅ៕
ភ្នំពេញ ៖ សមត្ថកិច្ចចម្រុះខេត្តកណ្តាល នៅថ្ងៃទី២៨ ខែកញ្ញា នេះ បានបើកប្រតិបត្តិការចុះត្រួតពិនិត្យទីតាំងកែច្នៃរថយន្តមួយកន្លែង ដែលសង្ស័យថា លួចកែច្នៃរថយន្តស៊េរីទាបៗ កាត់តបាញ់ថ្នាំឡើងទៅជាស៊េរីខ្ពស់ ឫជារថយន្តដែលមានប្រភពចេញមកពីអំពើចោរកម្ម។
ទីតាំងនេះ ស្ថិតនៅតាមផ្លូវលំ ក្នុងភូមិស្ទឹងជ្រៅ សង្កាត់ដើមមៀន ក្រុងតាខ្មៅ ត្រូវបានកម្លាំងចម្រុះចុះឡោមព័ទ្ធ តាំងពីយប់ថ្ងៃទី២៧ ខែកញ្ញា ឆ្នាំ២០១៨ ហើយមកដល់ព្រឹកថ្ងៃទី២៨ ខែកញ្ញា សមត្ថកិច្ចបន្តធ្វើការឡោមព័ទ្ធត្រួពិនិត្យនៅឡើយ និងឆែកឆេររកឃើញមានរថយន្ចំនួនត៩គ្រឿង ដែលកែច្នៃខុសច្បាប់។
យ៉ាងណាក៏ដោយ រហូតមកដល់ពេលនេះ សមត្ថកិច្ចមិនទាន់បញ្ចេញរបាយការណ៍ពិស្តារបែបណានៅឡើយទេ៕
ភ្នំពេញ ៖ ទំនាស់ហិង្សាគញរួសារមួយ ឈានដល់ប្អូនថ្លៃលីកាំបិតផ្គាក់ទៅកាប់បងថ្លៃ រងរបួសដាច់ម្រាមអស់៣ ឯបងថ្លៃមិនប្រើហិង្សាសងសឹកទេ តែប្តឹងទាមទារសំណងចំនួន ២.៥០០ដុល្លា ហើយដោយសារប្អូនថ្លៃជាជនដៃដល់គ្មានលុយឲ្យ បងថ្លៃក៏សម្រេចប្តឹងប៉ូលិសចាប់ខ្លួនតែម្តង កាលពីវេលាម៉ោង៧ និង៣០នាទី យប់ថ្ងៃទី២៩ ខែកញ្ញា ឆ្នាំ២០១៨ ស្ថិតនៅក្នុងភូមិត្រពាំងពោធិ សង្កាត់ចោមចៅ៣ ខណ្ឌពោធិសែនជ័យ។
សមត្ថកិច្ចឲ្យដឹងថា ជនរងគ្រោះឈ្មោះ សិដ្ឋ សុខ ភេទប្រុស អាយុ៣៧ឆ្នាំ មានទៅលំនៅភូមិត្រពាំងពោធិ សង្កាត់ចោមចៅ៣ ខណ្ឌពោធិសែនជ័យ ។ ចំណែកជនបង្ក ត្រូវជាប្អូនថ្លៃឈ្មោះ ប៊ិន ណារ៉ា ហៅអូន ភេទប្រុស អាយុ២៨ឆ្នាំ មានទីលំនៅផ្ទះក្បែរគ្នា ក្នុងភូមិខាងលើ ត្រូវបានសមត្ថកិច្ចឃាត់ខ្លួន។
តាមសម្តីជនរងគ្រោះ ត្រូវជាបងថ្លៃ បានឲ្យដឹងថា មុនកើតហេតុ ខណៈដែលខ្លួនរួមជាមួយ អ្នកជិតខាង បងប្អូនមានគ្នា៥នាក់ អង្គុយហូបចុកតិចតួចនៅមុខផ្ទះរបស់ខ្លួន ដោយមានចាក់ធុង បាស់កំដរផង។ នៅពេលនោះ ប្អូនថ្លៃបានដើរមកប្រាប់ឲ្យបិទធុងបាសដោយស្រែកថា រកដេកពួនមិនបាន តែមិនបានប្រាប់ឲ្យស្រួលទេ គឺប្រសំដីធំៗ ក៏កើតជាទំនាស់។ បន្ទាប់មក ប្អូនថ្លៃបានដើរចូលក្នុងផ្ទះ ទាញយកបានកាំបិតផ្គាក់មួយដើរចញមកវិញ សំដៅមកកាប់ត្រូវម្រាមដៃនោះតែម្តង បណ្តាលឲ្យរងរបួសដាច់ម្រាមដៃឆ្វេងអស់៣ ហូរឈាមកក្លាក់ បង្កឲ្យភ្ញាក់ផ្អើលឆោឡោសមត្ថកិច្ចចុះទៅអន្តរាគមន៍ ឃាត់ហៅនាំភាគី ទាំង២ មកនិយាយសាកសួរនៅប៉ុស្តិ៍ចោមចៅ៣។
តាមប្រភពពីសាច់ញាតិរបស់ភាគីទាំង២ បានឲ្យដឹងថា ជនរងគ្រោះ ត្រូវជាបងថ្លៃដែលជាជនរងគ្រោះទាមទារសំណងចំនួន២.៥០០ដុល្លារ ថ្លៃព្យាបាលដាច់ម្រាម៣ តែប្អូនថ្លៃគ្មានលុយ ទើបជនរងគ្រោះសម្រេចប្តឹង សមត្ថកិច្ចឲ្យឃាត់ខ្លួនដើម្បីចាត់ការតាមច្បាប់តែម្តង បច្ចុប្បន្ន ជនដៃដល់ត្រូវបានសមត្ថកិច្ចឃាត់ខ្លួនកសាងសំណុំរឿង បញ្ជូនទៅផ្នែកជំនាញអធិការដ្ឋានខណ្ឌ បន្តតាមនីតិវិធី ៕
