All posts by មេគង្គ ប៉ុស្តិ៍

ប្រទះឃើញសពទារិកាក្នុងការ៉ុងចោលក្បែរគំនរសំរាម នៅសង្កាតចោមចៅ

May 23, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ សាកសពទារិកាម្នាក់ ដែលមានសភាពនៅស្រស់ៗ ត្រូវបានប្រជាពលរដ្ឋប្រទះឃើញនៅ ក្បែរគំនរសំរាម តាមចិញ្ចើមផ្លូវមួយកន្លែង កាលពីវេលាម៉ោង១៣និង១០នាទីរសៀលថ្ងៃទី២៣ ខែឧសភា ឆ្នាំ២០១៨ នៅចំណុចខាងក្រោយរោងចក្រ កាណាឌីយ៉ា ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។

ប្រជាពលរដ្ឋដែលចោមរោមមើល បានសម្តែងការស្តោកស្តាយអាណិតអាសូរយ៉ាងខ្លាំងចំពោះការស្លាប់បាត់បង់ជីវិតរបស់ទារិកា ដែលត្រូវគេយកមកបោះចោលនៅក្បែរគំនរសំរាមដូចខ្មោចសត្វធាតុ។

សូមបញ្ជាក់ថា ហេតុការណ៍នេះតែងតែកើតមានជាញឹកញាប់ណាស់ នៅពេលដែលប្រទះឃើញទារិកាបែបនេះ ទោះជានៅមានជីវិត ឬ បាត់បង់ជីវតិ មិនដែលមាននរណាម្នាក់ចេញមុខអះអងថា ជាទង្វើរបស់ខ្លួននោះទេ។

ក្រោយរាយការណ៍ប្រាប់សមត្ថកិច្ចរួចមក សមត្ថកិច្ច ក៏បានប្រគល់ឱ្យប្រជាពលរដ្ឋ យកទៅបញ្ចុះនៅក្បែរកន្លែងកើតហេតុដោយរៀបចំពិធីតិចតួចតាមបែបសាសនា ដើម្បីអោយព្រលឹងសពទារិកាបានទៅកាន់សុខកតិភព កុំអោយកើតមកអភ័ព្វដូចជាតិនេះទៀត ៕

លោកទេសរដ្ឋមន្ត្រី លី ធុជ ចូលរួមកិច្ចប្រជុំ UN-ESCAP នៅទីក្រុងបាងកក

May 23, 2018ព័ត៌មានថ្មីចុងក្រោយ, ព័ត៌មានអន្តរជាតិ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ លោក ទេសរដ្ឋមន្ត្រី លី ធុជ ប្រធានគណៈកម្មាធិការជាតិសេដ្ឋកិច្ច និងសង្គមកិច្ច (អេស្កាប់)តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានអញ្ជើញចូលរួមក្នុងសន្និបាតប្រចាំឆ្នាំលើកទី៧៤ របស់គណៈកម្មា ធិការអង្គការសហប្រជាជាតិទទួលបន្ទុកសេដ្ឋកិច្ច និងសង្គមកិច្ចប្រចាំតំបន់អាស៊ីប៉ាស៊ីហ្វិកក្រោម ប្រធានបទ “វិសមភាពក្នុងសករាជនៃរបៀបវារៈឆ្នាំ ២០៣០ សម្រាប់ការអភិវឌ្ឍដោយចីរភាព របស់គណៈកម្មការសេដ្ឋកិច្ច និងសង្គមកិច្ចប្រចាំតំបន់អាស៊ី និងប៉ាស៊ីហិ្វករបស់អង្គការសហ ប្រជាជាតិ (UN-ESCAP) ដែលបានប្រព្រឹត្តទៅនៅទីក្រុងបាងកក ប្រទេសថៃ កាលពីពេលថ្មីៗ កន្លងទៅនេះ។

គោលបំណងដ៏ចំបងនៃសន្និបាតនេះ គឺពិនិត្យ និងអនុម័តលើរបាយការណ៍ការងារ ដែល អគ្គលេខាធិការដ្ឋាន UN-ESCAP និងរដ្ឋជាសមាជិកបានអនុវត្តក្នុងឆ្នាំ២០១៧ និងអនុម័តសេចក្តី សម្រេចផែនការផ្សេងៗ ដែលបានស្នើឡើងដោយរដ្ឋជាសមាជិក និងអគ្គលេខាធិការដ្ឋាន UN-ESCAP សម្រាប់ឆ្នាំ ២០១៨។

ក្នុងនាមជាតំណាងរបស់សម្តេចតេជោនាយករដ្ឋមន្ត្រី ឯកឧត្តម លី ធុជ ត្រូវបាន UN-ESCAP អញ្ជើញឲ្យធ្វើជាអធិបតីក្នុងពិធីបើកកិច្ចប្រជុំថ្នាក់រដ្ឋមន្ត្រីនៃសន្និបាតប្រចាំឆ្នាំលើកទី៧៤ នេះ ដែលមានការចូលរួមពីប្រមុខរដ្ឋ នាយករដ្ឋមន្ត្រី ឧបនាយករដ្ឋមន្ត្រី រដ្ឋមន្ត្រី ឧត្តមមន្ត្រី និង មន្ត្រីនៃរដ្ឋជាសមាជិក និងរដ្ឋសង្កេតការណ៍ប្រមាណជាង ៦០ ប្រទេស ព្រមទាំងតំណាង អគ្គលេខាធិការអង្គការសហប្រជាជាតិ លេខាប្រតិបត្តិ UN-ESCAP មន្ត្រីជំនាញមកពីអង្គការសហប្រជាជាតិ ស្ថាប័នហិរញ្ញវត្ថុពិភពលោក ដៃគូអភិវឌ្ឍន៍ អង្គការមិនមែនរដ្ឋាភិបាល សង្គមស៊ីវិល និងវិស័យឯកជនជាច្រើនទៀត ដោយកិច្ចប្រជុំបានពិភាក្សាលើចំណុចសំខាន់ៗ ចំនួន៤ គឺៈ វិសមភាពក្នុងសករាជនៃរបៀបវារៈឆ្នាំ ២០៣០ សម្រាប់ការអភិវឌ្ឍដោយ ចីរភាព បញ្ហាប្រឈម និងឱកាសក្នុងរបៀបវារៈឆ្នាំ២០៣០ សម្រាប់ការអភិវឌ្ឍដោយចីរភាព តួនាទីតំបន់ អាស៊ី និងប៉ាស៊ីហ្វិកក្នុងការងារពហុភាគី និងអភិបាលកិច្ចសកលនៃសករាជរបៀបវារៈឆ្នាំ ២០៣០ ការច្នៃប្រឌិតបច្ចេកវិទ្យាដើម្បីជួយជម្រុញដល់ភាពជោគជ័យនៃការអភិវឌ្ឍដោយចីរភាព។

ក្នុងកិច្ចប្រជុំនេះឯកឧត្តមទេសរដ្ឋមន្ត្រី លី ធុជ បានកត់សំគាល់ពីភាពជោគជ័យសំខាន់ៗ ៣ របស់កម្ពុជា ដែលឆ្លើយតបទៅនឹងប្រធានបទខាងលើគឺៈ ១/ ការកសាងសនិ្តភាព គឺជាកត្តា ចាំបាច់បំផុតមិនអាចខ្វះបានសម្រាប់ការអភិវឌ្ឍ ដែលជាការអភិវឌ្ឍដោយចីរភាពទៅ តាម របៀបវារៈឆ្នាំ ២០៣០ និងការអភិវឌ្ឍដោយចីរភាពកម្ពុជាឆ្នាំ ២០១៦-២០៣០។

២/ ការកាត់ បន្ថយភាពក្រីក្រដ៏គួរឧ្យកត់សំគាល់ ដែលបានធ្លាក់ចុះពី ៥៣% ក្នុងឆ្នាំ២០០៤ មកនៅត្រឹមតែ ១៣,៥% ក្នុងឆ្នាំ២០១៤ ហើយនឹងនៅបន្តធ្លាក់ចុះជាង១% ក្នុងមួយឆ្នាំៗទៀត នេះបានធ្វើឲ្យ កម្ពុជាក្លាយជាប្រទេសមួយ ក្នុងចំណោមប្រទេសដែលមានការកាត់បន្ថយភាពក្រីក្របានច្រើន ជាងគេក្នុងពិភពលោក និងមិនមាននរណាម្នាក់ដែលត្រូវទុកចោល ដោយមិនទទួលបានផល ពីការអភិវឌ្ឍឡើយ និង៣/ កម្ពុជាមានកំណើនសេដ្ឋកិច្ចខ្លាំង ហើយបន្តមានលំនឹងរឹងមាំក្នុង កម្រិត ៧.២% និងបន្តនៅចន្លោះ ៧.១ ឬ ៧.២% ក្នុងឆ្នាំ២០១៧ និង២០១៨ ផងដែរ៕

ព្រែកតូច នៅស្រុកអង្គរជ័យ ត្រូវគេរំលោភយកក្រោមរូបភាពធ្វើកន្លែងកម្សាន្ត

ខេត្តកំពត ៖ «ព្រែកតូច» ដែលជាព្រែកធម្មជាតិមូយកន្លែងហើយបានរីងស្ងួតទឹកអស់ ស្ថិតនៅក្នុងភូមិសាស្ត្រឃុំដើមដូង ក្នុងស្រុកអង្គជ័យ ត្រូវបានគេយកគ្រឿងចក្រកាយកាត់ជាកង់ៗ យកធ្វើជាកម្មសិទ្ធិ ក្រោមរូបភាពធ្វើសួនកំសាន្តកណ្ដាលព្រែកតូច នេះ ដើម្បីបំភាន់ភ្នែកសាធារណជន។

លោក ទ្រី មេឃុំដើមដូង បានប្រាប់អោយដឹងថា ការកាយដីព្រែកដែលតភ្ជាប់មកពីភូមិសាស្ត្រ ស្រុកបន្ទាយមាស នេះ គីលោកមិនបានដឹងទេ ប្រហែលជាគេលួចកាយ ។
ព្រែតូចនេះ បច្ចុប្បន្នកំពុងត្រូវបានគេរំលោភយកធ្វើជាទីតាំងសួនកម្សាន្តឯកជន កាលពីថ្ងៃទី21 ខែឧសភា នេះ ដោយម្ចាស់សួនកម្សាន្តនេះ បានជួលជាងផ្សារដែកមកផ្សារកែច្នៃធ្វើជាស្ពានសម្រាប់អោយអ្នកចូលទៅលេង អាចដើរឆ្លងកាត់ពីកន្លែងមួយទៅកន្លែងផ្សេងទៀត។

លោក ងឺម ញន មេឃុំ ម្រោម បានប្រាប់អោយដឹងថា ការសាងសង់កន្លែងកំសាន្ត លើព្រែកតូច នេះ គ្មានច្បាប់អនុញ្ញាតទេ។លោកថា ពីមុនព្រែកនេះ សំបូដើមឈូក តែឥឡូវនេះមិនដឹងថាម្ចាស់ទីតាំងកម្សាន្តគេរៀបចំយ៉ាងម៉េចទេ។ លោកបន្តថា អ្នកចេញមុខធ្វើកន្លែងកម្សាន្តលើព្រែកធម្មជាតិនេះ គឺជាអ្នករស់នៅឯឃុំដើមដូង។ លោក ងឹម ញន បាននិយាយប្រាប់បន្តថា អ្នកធ្វើសួនកំសាន្តនៅលើព្រែកនោះ មិនទាន់មានច្បាប់ទេ៕

នាយករដ្ឋមន្ត្រីកម្ពុជា ៖ កំណើនវិស័យឧស្សាកម្មកាត់ដេរ ស្ថិតក្នុងចក្ខុវិស័យពង្រីករោងចក្រជិត២០ឆ្នាំ

May 23, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

កំពង់ស្ពឺ ៖ នៅព្រឹកថ្ងៃពុធ នេះ សម្តេចតេជោនាយករដ្ឋមន្ត្រី បានថ្លែងនៅក្នុងពេលជួបជាមួយកម្មករ កម្មការិនី រោងចក្រក្នុងខេត្តកំពង់ស្ពឺថា វិស័យឧស្សាហកម្មកាត់ដេរ នៅក្នុងខេត្តកំពង់ស្ពឺមានការរីកចម្រើនខ្លាំង ចាប់តាំងពីពេលកម្ពុជាមានសុខសន្តិភាពពេញលេញ ជាពិសេសក៏ដោយសារតែមានការដាក់ចេញនូវចក្ខុវិស័យពង្រីករោងចក្រ តាមបណ្តោយផ្លូវជាតិលេខ៤ ដែលត្រូវបានអនុវត្តជិត២០ឆ្នាំមកហើយ។

នាព្រឹកថ្ងៃពុធ ទី២៣ ខែឧសភា នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបន្តចុះជួបសំណេះសំណាលជាមួយកម្មករ កម្មការិនីរោងចក្រ សរុប ជិត២ម៉ឺននាក់ទៀត មកពីរោងចក្រ សហគ្រាសចំនួន១៧នៅក្នុងក្រុងច្បារមន ខេត្តកំពង់ស្ពឺ។ ដូចនេះ បើគិតចាប់តាំងពីថ្ងៃទី២០ ខែសីហា ឆ្នាំ២០១៧ រហូតដល់ថ្ងៃទី២៣ ខែឧសភា ឆ្នាំ២០១៨ នេះ សម្តេចតេជោ ហ៊ុន សែន បានជួបផ្ទាល់ជាមួយ កម្មករ កម្មការិនី ចំនួន៤២លើក ដែលមានកម្មករ កម្មការិនីសរុបជាង៥២ម៉ឺន៤ពាន់នាក់។

សកម្មភាពចុះជួបសំណេះសំណាលជាមួយកម្មករ កម្មការិនីទាំងក្នុងរាជធានីភ្នំពេញ និងតាមបណ្តាខេត្តនេះ គឺមានគោលបំណងស្វែងយល់ពីសុខទុក្ខ និងដោះស្រាយទុក្ខលំបាករបស់កម្មករ កម្មការិនី និងដើម្បីជំរុញការរីកចម្រើនបន្ថែមទៀតលើវិស័យឧស្សាហកម្ម ដែលជាវិស័យដ៏សំខាន់ក្នុងការជំរុញសេដ្ឋកិច្ចជាតិ។ តាមរយៈជំនួបជាបន្តបន្ទាប់នេះដែរ ក៏បានធ្វើឲ្យបរិយាកាសការងារនៅតាមរោងចក្រ សហគ្រាសមានភាពល្អប្រសើរ ទាំងការតម្លើងប្រាក់ខែអប្បរមារ១៧០ដុល្លារ រួមនិង គោលនយោបាយគាំពារសង្គមជាច្រើនទៀតដែលសម្រួលដល់ជីវភាពរបស់ កម្មករ កម្មការិនី។

ក្នុងនោះ គិតចាប់តាំងពីថ្ងៃទី០១ ខែមករា ដល់ថ្ងៃទី២២ ខែឧសភា ឆ្នាំ២០១៨ រាចរដ្ឋាភិបាល បានចំណាយកញ្ចប់ថវិកា៨ពាន់៦រយលានរៀល សម្រាប់ផ្តល់ប្រាក់ឧបត្ថម្ភដល់កម្មការិនី សម្រាលកូន ចំនួន ២ម៉ឺន១ពាន់៦៣២នាក់ ។ នៅក្នុងឳកាសជួបជាមួយកម្មករ កម្មការិនីរោងចក្រនៅខេត្តកំពង់ស្ពឺ សម្តេចតេជោ នាយករដ្ឋមន្ត្រី បានរំលឹកថា ខេត្តកំពង់ស្ពឺ កាលពីអតីតកាល គឺជាតំបន់សមរភូមិក្តៅ ដែលមានក្រុមខ្មែរក្រហមនៅ ជាពិសេសក្នុងតំបន់ឳរ៉ាល់ ប៉ុន្តែដោយសារការធ្វើសមាហរណកម្មនយោបាយឈ្នះឈ្នះ ដែលនាំមកនូវសន្តិភាពពេញលេញ សម្រាប់ខេត្តកំពង់ស្ពឺ រួមនិងការដោះស្រាយបញ្ហាប្រឈមនានាក្នុងខេត្តដូចជាបញ្ហាទឹកជំនន់ ជាដើមនោះ ទើបធ្វើអោយខេត្តកំពង់ស្ពឺ បានក្លាយជាតំបន់មានសក្តានុពលទាក់ទាញមួយ សម្រាប់ការវិនិយោគជាពិសេស លើវិស័យរោងចក្រកាត់ដេរ តែម្តង ដោយមកដល់ពេលបច្ចុប្បន្ន ខេត្តកំពង់ស្ពឺ មានរោងចក្រ សហគ្រាស និងគ្រឹះស្ថានសរុបចំនួន២២៥ មានកម្មករ និយោជិត កំពុងបំរើការងារ ជាង ៩ម៉ឺន៨ពាន់នាក់ ហើយបើគិតជាទំហំប្រាក់ឈ្នួលសរុបក្នុងវិស័យនេះ មានជាង ២២០លានដុល្លារក្នុងមួយឆ្នាំៗ។

សម្តេចតេជោ បានចាត់ទុកថា ការរីកចម្រើននៃវិស័យរោងចក្រកាត់ដេរ ក្នុងខេត្តកំពង់ស្ពឺនេះ គឺកើតចេញពីការអនុវត្តជិត២០ឆ្នាំមកហើយ តាមចក្ខុវិស័យពង្រីករោងចក្រ តាមបណ្តោយផ្លូវជាតិលេខ៤ ដើម្បីផ្សារភ្ជាប់តំបន់ប៉ូលសេដ្ឋកិច្ចភ្នំពេញ ទៅកាន់តំបន់ប៉ូលសេដ្ឋកិច្ចខេត្តព្រះសីហនុ។ ជារួមនេះជានយោបាយអាទិភាពមួយរបស់រាជរដ្ឋាភិបាល ក្នុងការពង្រាយរោងចក្រទៅតាមបណ្តាខេត្ត អោយជិតកន្លែងរស់នៅរបស់ប្រជាពលរដ្ឋ ដើម្បីងាយស្រួល រកការងារធ្វើ និងចូលរួមបង្កើនចរន្តសេដ្ឋកិច្ចក្នុងមូលដ្ឋាន។ ដូចនេះ សម្តេចតេជោ នៅតែបន្តអំពាវនាវអោយម្ចាស់រោងចក្រ និងកម្មករ ត្រូវមានទំនាក់ទំនងល្អជាមួយគ្នា ដើម្បីរក្សាឆ្នាំងបាយរបស់ខ្លួន ដោយម្ចាស់រោងចក្រត្រូវ យកចិត្តទុកដាក់ដល់សុខភាពរបស់កម្មករ ហើយកម្មករក៏ត្រូវខំប្រឹងបង្កើនគុណភាពផលិតភាពការងារផងដែរ។ ជាពិសេស មិនត្រូវអោយកើតមានដាច់ខាត ដូចជាបញ្ហាគ្រឿងញៀន និងបញ្ហាបងតូចបងធំ ក្នុងរោងចក្រជាដើម។

បើតាមការថ្លែងបញ្ជាក់របស់ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម អ៊ិត សំហេង បានឲ្យដឹងថា ខេត្តកំពង់ស្ពឺ ត្រូវបានចាត់ទុកថាជាខេត្តកសិកម្មមួយ ហើយក៏ធ្លាប់ជាតំបន់សមរភូមិប្រយុទ្ធក្នុងសម័យសង្គ្រាមនាពេលកន្លងមក។ ប៉ុន្តែ នាពេលបច្ចុប្បន្ន ខេត្តកំពង់ស្ពឺ បានក្លាយទៅជាខេត្តមួយមានសក្តានុពលខ្ពស់ទាំងការងារកសិកម្ម និងឧស្សាហកម្ម ដែលកំពុងទាក់ទាញការវិនិយោគពីបរទេសជាបន្តបន្ទាប់។ ជាពិសេស រោងចក្រ សហគ្រាសនៅក្នុងខេត្តកំពង់ស្ពឺនេះ ត្រូវបានកសាងនៅតាមមូលដ្ឋានជាប់នឹងប្រជាពលរដ្ឋ ដែលបានបង្កើតការងារ និងមុខរបរបន្ថែមជាច្រើនសម្រាប់ប្រជាពលរដ្ឋ តាមរយៈ របរជួលផ្ទះ លក់ម្ហូបអាហារ ការដឹកជញ្ជូន និងសេវាកម្មផ្សេងៗទៀត ៕

បន្លែ ស្ពៃក្តោប ត្រូវហាមឃាត់មិនឲ្យនាំ ចូលកម្ពុជាតាមច្រកទ្វារអន្តរជាតិភ្នំដិន

May 22, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ខេត្តតាកែវ ៖ លោក ប៉ោ លាងគង់ ប្រធានសាខាកាំកុងត្រូលខេត្ត តាកែវ ដែលបានសហការនឹងមន្ត្រីជំនាញកាំកុងត្រូល បានធ្វើការត្រួតពិនិត្យលើបន្លែ ផ្លែឈើទាំង២៥មុខ នៅច្រកទ្វារអន្តរជាតិភ្នំដិនដោយរថយន្តពិសោធន៍ចល័ត របស់អគ្គនាយកដ្ឋានកាំកុង ត្រូល យើងបានរកឃើញស្ពៃក្តោបមានវត្តមានសំណល់ថ្នាំកសិកម្ម ដែលប៉ះពាល់សុខភាពប្រជាពលរដ្ឋ ព្រោះសំណល់ថ្នាំកសិកម្មនេះ វានឹងធ្វើឲ្យអ្នកបរិភោគមានអាការៈរាគរូស ក្អូតចង្អោរ ធ្វើឲ្យអស់កម្លាំងជាធ្ងន់ធ្ងរ និងអាចធ្វើឲ្យប៉ះពាល់ប្រព័ន្ធសសៃប្រាសាទ។

លោកប្រសាសន៍ថា ជាវិធានការណ៍ដើម្បីទប់ស្កាត់នូវហានិភ័យខ្ពស់ចំពោះសុខភាពប្រជាពលរដ្ឋ មន្ត្រីជំនាញបានសម្រេចធ្វើការបិទការនាំចូលនូវប្រភេទបន្លែស្ពៃក្តោបនេះ តាមច្រកទ្វារអន្តរជាតិភ្នំដិន ។

លោកប៉ោ លាងគង់ ប្រសិនបើយើងធ្វើការអនុញ្ញាតឲ្យស្ពៃក្តោបនេះ នាំចូលមកទីផ្សារស្រុកខ្មែរវិញបាន ទាល់ តែមានការបញ្ជាក់ពីអាជ្ញាធរវៀតណាមថា ស្ពៃក្តោបនេះពិតជាពុំមានវត្តមានសំណល់ថ្នាំកសិកម្មនេះឡើយ នឹងត្រូវមានការពិនិត្យនឹងធ្វើត្តេស៍ម្តងទៀតពីមន្ត្រីជំនាញកាំកុងត្រូល ទើបបានអាចនាំចូលឡើងវិញបាន ។

ជាមួយគ្នានេះដែរ រថយន្តពិសោធន៍ចល័តរបស់អគ្គនាយដ្ឋានកាំកុងត្រូល ក៍បានធ្វើការចុះមកត្រួតពិនិត្យបន្លែ ផ្លែឈើ និងចំណីអាហារនៅផ្សារអង្គតាសោម ក្នុងនោះដោយដកហូតយកធ្វើជាគំរូចំនួន៣៦មុខ យកមកវិភាគនៅក្នុងរថយន្តអគ្គនាយកដ្ឋានកាំកុងត្រូល ជាលទ្ធផលមន្ត្រីជំនាញបានរកឃើញសសៃគុយទាវបាញ់ប្រហិតប៉ាតេសាច់ជ្រូកមានសារ ធាតុគីមីប៉ូរ៉ាក់ និងរកឃើញស្លឹកខ្ទឹម និងស្ពៃក្តោបមានវត្តមានសំណល់ថ្នាំកសិកម្ម ។

ចំពោះសសៃគុយទាវដែលមានសារធាតុគីមីប៉ូរ៉ាក់ មន្ត្រីជំនាញបានដកហូតនឹងបិទមិនឲ្យលក់នៅលើទីផ្សារ៕

៤ខែដើមឆ្នាំនេះ កម្ពុជារកចំណូលពីពន្ធអាករបានជាង ៩០៩លានដុល្លារ

May 22, 2018ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ អគ្គនាយកដ្ឋានពន្ធដារ បានបង្ហាញថា ការប្រមូលចំណូលពន្ធ-អាករគ្រប់ប្រភេទ ក្នុងរយៈពេល៤ខែ ដើមឆ្នាំ២០១៨ មានចំនួនជាង៩០៩លានដុល្លារអាមេរិក គឺកើនឡើងប្រមាណ១២ភាគរយ ធៀបនឹងឆ្នាំមុន ដែលការប្រមូលពន្ធនាពេលបច្ចុប្បន្ន គឺត្រូវបានធ្វើឡើងតាមប្រព័ន្ធគ្រប់គ្រងទិន្នន័យចំណូលអនឡាញ ។

បើតាមការថ្លែងបញ្ជាក់របស់ ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុក ជាអគ្គនាយកនៃអគ្គនាយកដ្ឋានពន្ធដារ កាលពីថ្ងៃទី២១ខែឧសភា ឆ្នាំ២០១៨ នៅក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែមេសា ឆ្នាំ២០១៨ បង្ហាញថា ក្នុងខែមេសា ឆ្នាំ២០១៨កន្លងមកនេះ អគ្គនាយកដ្ឋានពន្ធដារ បានប្រមូលចំណូលពន្ធ-អាករគ្រប់ប្រភេទ តាមប្រព័ន្ធគ្រប់គ្រងទិន្នន័យចំណូលអនឡាញ (Online) បានចំនួន ជាង៥៩២ពាន់៧រយ លានរៀល ស្មើនឹងជាង ១៤៨លាន១សែន៧ម៉ឺនដុល្លារអាមេរិក។ ចំនួននេះ ស្នើនឹង៧.៧% នៃផែនការច្បាប់។

បើប្រៀបធៀបទៅនឹងចំណូលខែមេសា កាលពីឆ្នាំ២០១៧ ឃើញថា ការប្រមូលចំណូលពន្ធ-អាករគ្រប់ប្រភេទក្នុងខែមេសា ឆ្នាំ២០១៨ កើនឡើងប្រមាណ ១៧លាន៦សែន៨ម៉ឺន ដុល្លារអាមេរិក ស្មើនឹង ១៣.៥៥%។

ដោយឡែក បើគិតសរុបក្នុងរយៈពេល៤ខែដើមឆ្នាំ២០១៨ ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារ ប្រមូលបានមានចំនួន ជាងប្រមាណ៩០៩លាន៥សែន៧ម៉ឺនដុល្លារអាមេរិក ស្មើប្រមាណជា ៤៧.២៩% នៃផែនការកំណត់ដោយច្បាប់។ ប្រសិនបើប្រៀបធៀបនឹង ៤ខែដើមកាលពីឆ្នាំ២០១៧ ឃើញថាការប្រមូលពន្ធ-អាករគ្រប់ប្រភេទ ក្នុងរយៈពេល៤ខែ ឆ្នាំ២០១៨ កើនឡើង ប្រមាណ១២.០១% រឺស្មើនឹង ៩៧លាន៤សែន៩ម៉ឺនដុល្លារអាមេរិក។

គួរបញ្ជាក់ថា ដើម្បីជម្រុញជាអតិបរមា ឱ្យអ្នកជាប់ពន្ធទាំងឡាយចូលរួមកិច្ចសហការល្អក្នុងការបង់ពន្ធអោយបានត្រឹមត្រូវ អគ្គនាយកដ្ឋានពន្ធដារ បានដាក់ចេញនូវវិធានការមួយចំនួន ដូចជា៖ ការបន្តអនុវត្តយុទ្ធសាស្ត្រកៀរគរចំណូលរយៈពេលមធ្យមរបស់រាជរដ្ឋាភិបាល ឆ្នាំ២០១៤-២០១៨ ។ ការបន្តពង្រឹងការចុះបញ្ជីពន្ធដារ និងធ្វើបច្ចុប្បន្នភាពព័ត៌មានសហគ្រាស ឱ្យកាន់តែប្រសើរឡើងថែមទៀត។

ការប្រកាសដាក់ឱ្យប្រើប្រាស់នូវប្រព័ន្ធតាមដានឯកសារ ហៅថា Document Tracking System ទូទាំងគ្រប់អង្គភាពក្រោមឱវាទអគ្គនាយកដ្ឋានពន្ធដារ ក្នុងគោលដៅពង្រឹងការផ្តល់សេវាសាធារណៈជូនអ្នកជាប់ពន្ធ ដោយផ្តល់លទ្ធភាពឱ្យអ្នកជាប់ពន្ធអាចដឹងពីស្ថានភាព នៃឯកសារដែលពួកគាត់បានដាក់ចូលមកអគ្គនាយកដ្ឋានពន្ធដារ និងបន្តធ្វើទំនើបកម្មប្រព័ន្ធព័ត៌មានវិទ្យា ដោយអភិវឌ្ឍគ្រប់គ្រងការប្រមូលពន្ធ តាមបច្ចេកវិទ្យាព័ត៌មាន បន្ថែមទៀតជាដើម ៕

កម្ពុជា-ឥណ្ឌា ប្ដេជ្ញាបង្កើនទំហំពាណិជ្ជ កម្ម ខណៈបច្ចុប្បន្នមានជាង១០០លានដុល្លារ

ភ្នំពេញ ៖ ស្របពេលទំហំពាណិជ្ជកម្មរវាងប្រទេសកម្ពុជា និងឥណ្ឌា នៅមានបរិមាណតិចតួចនៅឡើយ ប្រទេសទាំងពីរបានប្ដេជ្ញាពង្រឹង និងជំរុញអោយទំហំពាណិជ្ជកម្ម កាន់តែច្រើនឡើង ដោយនឹងមានការវិនិយោគបន្ថែមទៅលើវិស័យមួយចំនួន និងការបន្ថែមការនាំចេញនាំចូលទាំងពីរភាគី ។

តាមរបាយការណ៍របស់ក្រសួងពាណិជ្ជកម្មកម្ពុជា បង្ហាញថាទំហំពាណិជ្ជកម្មរវាងកម្ពុជា និងឥណ្ឌាកាលពីឆ្នាំ ២០១៧ កន្លងទៅមានចំនួន ១២៦លានដុល្លារអាមេរិក ចំណែកឯការវិនិយោគរបស់ឥណ្ឌាក្នុងប្រទេសកម្ពុជា កាលពីឆ្នាំ ២០១៦ កន្លងទៅមានតែជាង២០លានដុល្លារអាមេរិកប៉ុណ្ណោះ ។

តាមប្រសាសន៍លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានអោយដឹងថា បន្ទាប់ពីវេទិកានេះបានបញ្ចាប់ កម្ពុជារំពឹងខ្ពស់លើការធ្វើពាណិជ្ជកម្មរវាងទ្វេរភាគី ដោយនឹងមានការវិនិយោគបន្ថែមទៀតទៅលើវិស័យមួយចំនួន ដូចជាវិស័យអប់រំ សុខាភិបាល និងការនាំចេញនាំចូលជាដើម ។

លោកបន្តថា កម្ពុជាមានកំលាំងពលកម្មសម្រាប់បម្រើអោយការវិនិយោគរបស់ឥណ្ឌា ហើយកម្ពុជាក៏មាននូវកសិឧស្សាហកម្មសម្រាប់សក្ដានុពលវិនិយោគរបស់ឥណ្ឌាផងដែរ ជាក់ស្ដែងផលិផលដំឡូងមី ដែលជាអាចកែច្នៃជាសំបកថ្នាំពេទ្យ ដូចនេះឥណ្ឌាអាចនឹងចាប់អារម្មណ៍លើវិស័យមួយនេះ សម្រាប់នាំដំឡូងមីទៅកែច្នៃជាសំបកថ្នាំពេទ្យនៅប្រទេសឥណ្ឌា រឺក៏អាចមកបណ្ដាក់ទុនកែច្នៃនៅនឹងកន្លែងតែម្ដងក៏បានដែរ ។

លោកបន្ថែមថា ដើម្បីអោយទំហំពាណិជ្ជកម្មរវាងប្រទេសទាំងពីរ កាន់តែមានទំហំធំឡើង កម្ពុជា ឥណ្ឌាក៏កំពុងតែជំរុញអោយមានជើងហោះហើរត្រង់ផ្ទាល់តែម្ដង ពីព្រោះបច្ចុប្បន្ននេះ គេឃើញថា ទេសចរកម្ពុជា ទៅប្រទេសឥណ្ឌាក៏ច្រើនដែរ ដែលភាគច្រើនគឺទៅទស្សនកិច្ចនៅតំបន់ប្រវត្តិសាស្ត្រដែនដី កំណើតរបស់ព្រះពុទ្ធ ហើយឥណ្ឌាវិញក៏បានមកកម្ពុជាច្រើនគួសមដែរ ។

លោក ស៊ូរ៉េស ប្រាប៊ូ រដ្ឋមន្ត្រីក្រសួងពាណិជ្ជកម្ម ឧស្សាហកម្ម និងអាកាសចរណ៍ស៊ីវិលឥណ្ឌា បានអោយដឹងថា ឥណ្ឌានឹងជួយផ្សព្វផ្សាយផលិតផលកម្ពុជា តាមរយៈពិព័រណ៍នានានៅប្រទេសឥណ្ឌា សម្របសម្រួល និងជំរុញការវិនិយោគពីឥណ្ឌាមកកម្ពុជា ជាពិសេសក្នុងវិស័យកែច្នៃផលិតផលកសិកម្ម ឧស្សាហកម្ម និងថ្នាំពេទ្យ ។

លោកបន្តថា រដ្ឋាភិបាលឥណ្ឌាបានរៀបចំកញ្ចប់ថវិកាមួយហៅថា Project Development Fund តាមរយៈធនាគារ អេហ្ស៊ីម ( EXIM Bank ) របស់ឥណ្ឌា ដើម្បីផ្ដល់ជាប្រាក់កម្ចីដល់ក្រុមហ៊ុនឥណ្ឌា ដែលមានបំណងមកវិនិយោគនៅប្រទេស CLMV ។ ក្រៅពីនេះទៀត ក្រសួងពាណិជ្ជកម្មឥណ្ឌាក៏បានសន្យាថានឹងជួយគាំទ្រដល់ការអភិវឌ្ឍន៍ធនធានមនុស្សផងដែរ៕

ក្រសួងហាមលក់ថ្នាំបំប៉នផ្លូវភេទ Male extra

May 22, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ ក្រសួងសុខាភិបាលកម្ពុជា បានចេញសេចក្ដីជូនដំណឹង ដោយហាមប្រាមប្រជាពលរដ្ឋមិនឱ្យប្រើប្រាស់ឱសថបំប៉នផ្លូវភេទបុរសមួយប្រភេទឈ្មោះ Male extra ។

សេចក្តីជូនដំណឹងបានលើកឡើងថា ថ្នាំបំប៉នសុខភាពផ្លូវភេទ Male extra ដែលផ្សព្វផ្សាយលក់តាមបណ្ដាញសង្គមហ្វេសប៊ុក គឺគ្មានការចុះពញ្ជិកា និងគ្មានច្បាប់អនុញ្ញាត ពីក្រសួងសុខាភិបាលទេ។

គួរជម្រាបជូនផងដែរថា កន្លងទៅនេះ នៅតាមបណ្តាញសង្គមហ្វេសប៊ុក ឃើញមានប្រកាសផ្សព្វផ្សាយល់កថ្នាំបំប៉នផ្លូវភេទជាសាធារណៈ រួមមានទាំងថ្នាំគ្រាប់ ប៉ូម៉ាត ក្រែម ស្ព្រាយ ។ បញ្ហាសំខាន់ និងមិនគួរឲ្យទុកចិត្តនោះគឺ អ្នកលក់មិនហ៊ានបង្ហាញអសយដ្ឋានទីតាំងលក់ឱសថនោះទេ ដោយគ្រាន់តែប្រកាសថា មានការដឹកជញ្ជូនដល់កន្លែងដោយឥតគិតថ្លៃ៕

ការបំពុលបរិស្ថាននិងធ្វើឲ្យប៉ះពាល់ដល់វិមាន Taj Mahal របស់ ឥណ្ឌា

May 22, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

យោងតាមអ្នកប្រវត្តិសាស្ត្រ និងអ្នកមគ្គុទេសទេសចរណ៏ក្នុងតំបន់ ដែលកំពុង អំពាវនាវដល់ រដ្ឋាភិបាល ឲ្យការពារ និងអនុវត្តន៏ការងារអភិរក្សទីតាំងវិមាន បានឲ្យដឹងថា វិមានដ៏ល្បី ឈ្មោះបំផុតរបស់ប្រទេសឥណ្ឌា ជាថ្មកែវព័ណ៌ស គឺវិមាន Taj Mahal កំពុង ទទួលរងពីការបំពុលបរិស្ថានយ៉ាងខ្លាំង។ យោងតាមបញ្ជីរបស់អង្គការសុខភាពពិភពលោកនៅឆ្នាំនេះបានឲ្យដឹងថា ការបំពុលបរិ ស្ថាន ក្នុងក្រុងអាក្រា បាន កើនឡើងខ្លាំង រយៈពេលជាង៣០ឆ្នាំមកនេះ ។ ទីក្រុងដែលស្ថិត នៅលើខ្សែក្រវ៉ាត់ ឧស្សាហកម្ម គឺមានចំណាត់ថ្នាក់ទី៨ ក្នុងការបំពុល បរិយាកាស ខ្លាំង បំផុតលើពិភពលោក ។

វិមានមូហ្គាល់ Mughal palace សតវត្សន៏ទៅ១៧ ត្រូវបានសាងសង់ឡើងដោយ អធិរាជ្យ សាចាអាន ក្នុងការចងចាំនៃ ម្ចាស់ក្សត្រី ជាទីស្រលាញ់របស់ព្រះអង្គ មុមតាយ ម៉ាហល ដែលមានមនុស្សរាប់លាននាក់ មកទស្សនា ជារៀងរាល់ឆ្នាំ រួមទាំងគ្រួសាររាជវង្ស និងតារាភាពយន្ត ។ប៉ុន្តែអ្នកមគ្គុទេស ទេសចរណ៏ និយាយថា ភ្ញៀវទេសចរណ៏បរទេស កំពុងធ្លាក់ចុះ ដោយសារតែការបំពុល បរិស្ថាន ដែលធ្វើឲ្យជញ្ជាំងវិមានថេម៉ាហល មានព័ណ៌លឿង ។

មានការបំពុលបរិស្ថាន មកពី លូបង្ហូទឹក ដែលធ្វើឲ្យកើនឡើងនូវសត្វល្អិត និងភាពកក្វក់នៅជុំវិញ។ ការបញ្ចេញ ផ្សែងពីយានយន្ត ដ៏ច្រើន ដែលស្ទះចរាចរណ៏លើដងផ្លូវ ក៏ជាការបង្ករបញ្ហា បំពុល បរិស្ថានផងដែរ៕

ប្រធានាធិបតី កូរ៉េខាងត្បូង បានទៅដល់អាមេរិក ហើយ!

May 22, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប្រធានាធិបតី កូរ៉េខាងត្បូង បានទៅដល់ សហរដ្ឋអាមេរិក ក្នុងដំណើរទស្សនកិច្ចដ៏សំខាន់មួយ មុនពេលសន្និសីទពិសេសរវាងមេដឹកនាំជាគូរសត្រូវប្រវត្តិសាស្ត្រ គឺ សហរដ្ឋអាមេរិក និង កូរ៉េខាងជើង ដែលមានគម្រោងធ្វើឡើងនៅថ្ងៃទី 12 ខែ មិថុនា ខាងមុខនេះ។

ប្រធានាធិបតី កូរ៉េខាងត្បូង លោក មូន ចេ-អ៊ីន ជួបជាមួយប្រធានាធិបតី សហរដ្ឋអាមេរិក លោក ដូណាល់ ត្រាំ នៅថ្ងៃអង្គារ ទី 22 ឧសភានេះ ក្នុងទីក្រុង វ៉ាស៊ីនតោន មុនពេលលោក ដូណាល់ ត្រាំ ជួបជាមួយលោក គីម ជុងអ៊ុន នៅថ្ងៃទី 12 ខែ មិថុនា ក្នុងប្រទេស សិង្ហបុរី ។

ជំនួបរវាងមេដឹកនាំសម្ព័ន្ធមិត្តទាំងពីរ ធ្វើឡើងមួយថ្ងៃមុនពេល កូរ៉េខាងជើង រុះរើទីកន្លែងសាកល្បងអាវុធនុយក្លេអ៊ែរ ដែលបានកំណត់ពេលវេលាធ្វើឡើងនៅថ្ងៃទី 23 ដល់ថ្ងៃទី 25 ខែ មិថុនា ។ ការបំផ្លាញទីកន្លែងសាកល្បងអាវុធនុយក្លេអ៊ែរ រួមមាន ការបំផ្លាញផ្លូវក្រោមដីទាំងអស់ ក្នុងតំបន់ ពុងចេ-រី ដោយការបំផ្ទុះគ្រាប់ បំផ្លាញទីតាំងតាមដាន និងអគារផ្សេងៗ ដែលប្រើប្រាស់ជាប៉មត្រួតពិនិត្យ ។

មុនពេលជួបគ្នាដោយផ្ទាល់, លោក ដូណាល់ ត្រាំ និងលោក មូន ចេ-អ៊ីន បានជួបគ្នាតាមទូរស័ព្ទ ដោយសន្ទនាផ្តោតទៅលើបញ្ហាប្រទេស កូរ៉េខាងជើង ពិសេសកម្មភាពជាក់លាក់ទាំងឡាយ ដូចជាការរុះរើទីកន្លែងសាកល្បងគ្រាប់បែកនុយក្លេអ៊ែរជាដើម ។

មេដឹកនាំទាំងពីរ ព្រមព្រៀងទៅលើកិច្ចការរួមដែលកាន់តែជិតស្និត ពិសេសកិច្ចការដែលត្រូវធ្វើមុនពេលសន្និសីទថ្ងៃទី 12 ខែមិថុនា ជាមួយលោក គីម ជុងអ៊ុន ក្នុងប្រទេស សឹង្ហបុរី ដែលជាជំនួបដំបូង ក្នុងប្រវត្តិសាស្ត្រនៃប្រទេសទាំងពីរ៕

ភ្លៀងធ្លាក់ខ្លាំង និងរអិលបាក់ដី សម្លាប់មនុស្ស 5 នាក់នៅប្រទេសស្រីលង្កា

May 22, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ភ្លៀងខ្យល់មូសុង នៅក្នុងប្រទេសស្រីលង្កា បានសម្លាប់មនុស្ស យ៉ាងហោចណាស់ 5 នាក់ ដែលជំរុញឱ្យអាជ្ញាធរព្រមាន ពីការបាក់ដី និងទឹកជំនន់ នៅក្នុងតំបន់ទំនាប បន្ទាប់ពីទឹកជំនន់ហៀរ ឆ្លងកាត់កោះមហាសមុទ្រឥណ្ឌា។

មន្ត្រីនៅមជ្ឈមណ្ឌលគ្រប់គ្រងគ្រោះមហន្តរាយរបស់ប្រទេស បាននិយាយថា ក្នុងចំណោមជន រងគ្រោះ 5 នាក់ មាន 3 នាក់បានស្លាប់ដោយសារន្ទះ ម្នាក់ដោយសារការបាក់ដី និងម្នាក់ទៀត ដោយសារដើមឈើបាក់សង្កត់។
អ្នកនាំពាក្យរបស់មជ្ឈមណ្ឌលនេះ បាននិយាយថា ទឹកជំនន់បានបង្ខំឱ្យមានការជន្លៀស ប្រជាជននៅក្នុងតំបន់ ដែលមានទន្លេរជន់ហូរហៀរ ខណៈសង្កាត់ចំនួន 4 បានព្រមាន អាសន្នពណ៌ក្រហម” ចំពោះការបាក់ដីដែលអាចកើតមាន។

ខែឧសភា ចាប់ផ្តើមរដូវខ្យល់មូសុង នៅភាគខាងត្បូងប្រទេសស្រីលង្កា។ ជាទូទៅ រយៈពេលនេះ គឺជាពេលវេលាមួយដ៏វែងបំផុតនៃរដូវសំណើម ហើយអូសបន្លាយរហូតដល់ខែកញ្ញា៕

លោក ត្រាំ មានឆន្ទៈក្នុងការចាកចេញពីជំនួបកំពូលជាមួយកូរ៉េខាងជើង

May 22, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អនុប្រធានាធិបតីអាមេរិក លោក ម៉ៃ ផេន Mike Pence បាននិយាយថា ប្រធានាធិបតីអាមេរិក លោក ដូណាល់ ត្រាំ មានបំណងចាកចេញពីជំនួបកំពូល ដែលមិនធ្លាប់មានពីមុនមក ជាមួយមេដឹកនាំកូរ៉េខាងជើង លោកគីម ជុងអ៊ុន ដែលគ្រោងនឹងធ្វើឡើង នៅខែក្រោយនេះ បន្ទាប់ពីកូរ៉េខាងជើងបាន គំរាម កិច្ចប្រជុំនេះ កាលពីសប្តាហ៍មុន។

លោក Mike Pence បានប្រាប់សារព័ត៌មាន ហ្វក ញ៉ូវស៍ ថា ប្រទេសកូរ៉េខាងជើង មិនគួរព្យាយាមស្វែងរកការសម្របសម្រួល ពីសហរដ្ឋអាមេរិក សម្រាប់ការសន្យាដែលខ្លួនមិនមានបំណងចង់រក្សា នោះទេ។

លោក Mike Pence បាននិយាយថា វានឹងជាកំហុសដ៏ធំមួយ សម្រាប់លោកគីម ជុងអ៊ុន ដែលគិតថាលោក អាចលេងសើចជាមួយនឹងលោក ដូណាល់ ត្រាំ ។

នៅពេលសួរថាតើ លោក ត្រាំ នៅតែអាចដើរចេញពីជំនួបកំពូល ដែលគ្រោងធ្វើនៅថ្ងៃទី 12 ខែមិថុនា នៅប្រទេសសឹង្ហបុរីបានដែរឬ យ៉ាងណា លោក Mike Pence បានឆ្លើបតបនឹងសំនួរនេះថា លោកសុំមិនបញ្ចេញយោបល់៕

កម្អែភ្នំភ្លើងកោះហាវ៉ៃ គំរាមកំហែងរោងចក្រអគ្គិសនី

May 22, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

កំអែលភ្នំភ្លើងចេញពីភ្នំភ្លើង Kilauea គីឡាអ៊ី ដែលកំពុងផ្ទុះ នៅកោះហាវ៉ៃ បានហូរទៅកាន់ រោងចក្រថាមពល ខណះដែលកម្មករប្រញាប់ប្រញាល់នាំគ្នាបិទទ្វាររោងចក្រ ដើម្បី ការពារការ បញ្ចេញ ឧស្ម័នពុលដែលមិនអាចគ្រប់គ្រងបាន ។

វីដេរអូថតពីលើអាកាសបានបង្ហាញ ពីប្រភពបញ្ចេញកំអែលភ្នំភ្លើងជាច្រើន ដែលចេញពីរណ្ដៅនិងកំទេចកំទី។ វាជាគ្រោះថ្នាក់ចុងក្រោយបង្អស់ ពីការផ្ទុះភ្នំភ្លើង Kilauea ដែលភូគុព្ភវិទូនិយាយថា គឺជាព្រឹត្តិការណ៍ដ៏អាក្រក់បំផុតមួយ ក្នុងរយះពេលមួយសតវត្សរ៍ ពីភ្នំភ្លើងសកម្មបំផុតមួយនៅលើពិភពលោក។

ចំងាយប្រមាណជិត៥គីឡូម៉ែត្រ នៅខាងកើតរោងចក្រ សារធាតុអាស៊ីត និងធូលី យ៉ាងក្រាស់ បានហុយទៅលើអាកាស ខណះដែលកំអែលភ្នំភ្លើង បានហូរចូលក្នុងមហាសមុទ្រ ។

ផេះ ដែលជាបន្សំនៃកំអែលភ្នំភ្លើង គឺជាប្រតិកម្មខ្លាំងក្លានៃផ្សែងទឹកអាស៊ីតអ៊ីដ្រូសែនក្លរិច ចំហាយទឹក និង កំអែលភ្នំភ្លើង ដែលអាចឡើងដល់កម្តៅ 1093 អង្សាសេ ប្រតិកម្មជាមួយទឹកសមុទ្រ៕

សម្តេចតេជោ ប្រគល់អំណោយរថយន្ត១២គ្រឿង ឲ្យ ស.ស.យ.ក និងសមាគមគ្រូពេទ្យ ស្ម័គ្រចិត្ត TYDA

ភ្នំពេញ ៖ រថយន្តថ្មី ប្រភេទដឹកជញ្ជូនចំនួន១២គ្រឿង ដែលជាអំណោយដ៏ថ្លៃថ្លា របស់សម្តេច តេជោ ហ៊ុន សែន នាយករដ្ឋមន្ត្រីនៃកម្ពុជា ដែលទទួលបានពីក្រុមហ៊ុនដំឡើងរថយន្ត ដេហាន អូតូ (ខេមបូឌា) ត្រូវបានក្រសួងការងារ និងបណ្តុះបណ្តាល វិជ្ជាជីវៈ ប្រគល់ជូនទៅ សភាពសហព័ន្ធយុវជនកម្ពុជា និងសមាគមគ្រូពេទ្យស្ម័គ្រចិត្តយុវជនសម្តេចតេជោ TYDA។

នាឱកាសនោះ លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ប្រាប់ក្រុមអ្នកសារព័តមាន នៅក្រោយពិធីប្រគល់-ទទួលរថយន្ត នាព្រឹកថ្ងៃទី ២២ ខែឧសភា ឆ្នាំ២០១៨នេះថា រថយន្តចំនួន១២គ្រឿងនេះ ត្រូវបានក្រុមហ៊ុន ដេហាន គ្រុប ផ្តល់ជូន សម្តេចនាយករដ្ឋមន្ត្រី ហើយសម្តេចបានសម្រេចថា ដើម្បីឲ្យការប្រើប្រាស់នេះ បានផលប្រយោជន៍ជាទូទៅដល់ កម្មករ និយោជិត ក៏ដូចជាប្រជាពលរដ្ឋ សម្តេច បានផ្តល់រថយន្តមួយផ្នែកឱ្យក្រសួងការងារយកទៅចែកបន្ត ដែលក្នុងនោះ រថយន្តចំនួន០៦គ្រឿង ប្រគល់ជូនទៅឱ្យសភាពសហព័ន្ធយុវជនកម្ពុជា និង០៦គ្រឿងទៀត ប្រគល់ជូនទៅសមាគមគ្រូពេទ្យស្ម័គ្រចិត្ត យុវជនសម្តេច តេជោ ដែលរថយន្តទាំងអស់នេះ ក្រុមការងារនឹងយកទៅទុកសម្រាប់ដឹកជញ្ជូនគ្រូពេទ្យផងនិងបងប្អូនប្រជាពលរដ្ឋដែលមកពិនិត្យនិងព្យាបាល និងការប្រើប្រាស់ទៅតាមយន្តការជាក់ស្តែង។

ជាមួយគ្នានេះ ឯកឧត្តម សុះ មុះសិន អនុប្រធានសភាពសហព័ន្ធយុវជនកម្ពុជា និងលោកវេជ្ជបណ្ឌិត ស៊ូ ស៊ីផាណា ប្រធានប្រតិបត្តិនៃសមាគមគ្រូពេទ្យស្ម័គ្រចិត្តយុវជនសម្តេចតេជោ បានថ្លែងអំណរគុណ ចំពោះក្រុមហ៊ុន ពិសេសសម្តេចនាយករដ្ឋមន្ត្រី សម្រាប់អំណោយដ៏ថ្លៃថ្លានេះ និងសន្យាថា នឹងយករថយន្ត ទាំងនេះទៅប្រើប្រាស់ជាផលប្រយោជន៍ទូទៅ សម្រាប់ប្រជាពលរដ្ឋ និង កម្មករនិយោជិត។

លើសពីនេះ ប្រើប្រាស់ជាផលប្រយោជន៍សង្គមទាំងមូល ដោយមិនប្រកាន់ពូជសាសន៍ សាសនា ពណ៌សម្បុរ ឬក៏និន្នាការនិយោបាយ ពោលគឺបើកទូលាយ ចំពោះការប្រើប្រាស់រថយន្ត ពិសេសសម្រាប់ប្រយោជន៍សាធារណៈ ចូលរួមចំណែកមួយរបស់រដ្ឋាភិបាល នៅក្នុងការលើកកម្ពស់ជីវភាពរស់នៅ ក៏ដូចជា បញ្ហាសុខភាពសុមាលភាពរបស់ប្រជាពលរដ្ឋផងដែរ៕

ប៉ូលិសដែលទះកំផ្លៀងស្ត្រី ត្រូវបានដកបញ្ឈរជើងបណ្តោះអាសន្ន

ភ្នំពេញ ៖ មន្ត្រីនគរបាលពាក់ស័ក្តិ២ ដែលបានប្រើហិង្សា ទះកំផ្លៀងស្ត្រីម្នាក់ជិះម៉ូតូអត់ពាក់មួកសុវត្ថិភាព និងជិះម៉ូតូបញ្ច្រាសទិស ហើយត្រូវបានគេថតវីដេអូបង្ហោះលើ Facebook រកការរិះគន់យ៉ាងខ្លាំងនោះ ពេលនេះត្រូវបាននាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញ បញ្ជាឲ្យចាប់ខ្លួនមកកាន់ស្នងការនគរបាលរាជធានីភ្នំពេញហើយ។

នាយឧត្តមសេនីយ៍ ជួន សុវណ្ណ បានឲ្យដឹងថា ករណីដែលមន្ត្រីនគរបាលទះកំផ្លៀងស្ត្រីម្នាក់កាលពីថ្ងៃមិញនេះ លោកបានបញ្ជាឲ្យចាប់ខ្លួនមកកាន់ស្នងការនគរបាលរាជធានីភ្នំពេញ ដើម្បីដាក់វិន័យទៅតាមច្បាប់របស់នរគបាលជាតិ។

នាយឧត្តមសេនីយ៍ ជួន សុវណ្ណ ក៏បានសូមទោសដល់ជនរងគ្រោះ និងក្រុមគ្រួសាររបស់នាង ហើយលោកក៏បានសូមទោសដល់ប្រជាពលរដ្ឋខ្មែរផងដែរ ចំពោះទង្វើមិនគប្បីរបស់សមត្ថកិច្ច ដែលមានឥរិយាបទមិនសមរម្យជាមន្ត្រីរាជការបែបនេះ។

សូមជម្រាបថា ករណីហិង្សានេះ បានកើតឡើងនៅម៉ោងប្រហែល១១ព្រឹក ថ្ងៃទី២១ ខែឧសភា ឆ្នាំ២០១៨ ស្ថិតនៅចំណុចផ្លូវលេខ២៩៨ កែងផ្សារអូរឡាំពិក ក្នុងសង្កាត់ ទួលស្វាយព្រៃ១ ខណ្ឌចំការមន រាជធានីភ្នំពេញ។

មន្ត្រីនគរបាលដែលប្រើហិង្សាលើស្ត្រីជាគ្រូពេទ្យមានឈ្មោះ កៅ សំអុល អាយុ៤៨ឆ្នាំ ជានគរបាលប៉ុស្តិ៍ទួលស្វាយព្រៃ១ ដោយបានទះកំផ្លៀងទៅលើស្ត្រីរងគ្រោះឈ្មោះ ឌី លីណា អាយុ៣៧ឆ្នាំ ស្នាក់នៅខណ្ឌ៧មករា ខណៈដែលកំពុងចាប់ឃាត់ម៉ូតូ មិនគោរពច្បាប់៕