All posts by មេគង្គ ប៉ុស្តិ៍

ក្រុមអ្នកស្រាវជ្រាវបញ្ជូនឯកសារចម្រុះភាសានៅកម្ពុជា ទៅតម្កល់នៅប្រទេសបារាំង

May 4, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ វិទ្យាសា្ថនស្រាវជ្រាវ និងអភិរក្សសាស្ត្រាស្លឹករឹតខ្មែរ ប្រមូលឯកសារ
ព័ត៌មានចេញផ្សាយចម្រុះភាសា នៅប្រទេសកម្ពុជា ពីទសវត្ស១៩៧៩មកបច្ចុប្បន្ន ផ្ញើទៅរក្សាទុកនៅ សារមន្ទីរប៊ុយឡាក់(BULAC )ប្រទេសបារាំង។

ឯកសារព័ត៌មាន ព្រឹត្តិការណ៍នៅកម្ពុជា ដែលបានបោះពុម្ពផ្សាយរួចហើយ ត្រូវបានវិទ្យាសា្ថនស្រាវជ្រាវនិងអភិរក្សសាស្ត្រាស្លឹករឹតខ្មែរ ដែលមានទីតាំងនៅក្នុងវត្តឧណ្ណាលោមប្រមូលទិញយកទៅរក្សាទុកជាឯកសារស្រាវជ្រាវ នៅសារមន្ទីរ ប៊ុយឡាក់ ប្រទេសបារាំង។

ឯកសារព័ត៌មានទម្ងន់ជាង២តោន ដែលបោះពុម្ពផ្សាយ ពីព្រឹត្តិការណ៍ជាតិសំខាន់ៗរបស់ប្រទេសកម្ពុជា ផ្សាយនៅក្នុងកាសែត និងទស្សនាវដ្តី ចម្រុះភាសា ត្រូវបានសាលា បារាំងចុងបូព៌ា សហការជាមួយ វិទ្យាសា្ថនស្រាវជ្រាវ និងអភិរក្សសាស្ត្រាស្លឹករឹតខ្មែរប្រមូលយកទៅផ្ញើទុកនៅ សារមន្ទីរBULAC នៃប្រទេសបារាំង។

លោក ឡេង កុកអាន សហការីវិទ្យាសាស្ត្រផ្នែកសាស្ត្រាស្លឹករឹត និងជាប្រធានអភិរក្ស បានថ្លែងថា ឯកសារព័ត៌មាន ដូចជា កាសែត ទស្សនាវដ្តី សៀវភៅប្រលោមលោក ដែលបានចេញផ្សាយពីព្រឹត្តិការណ៍ របស់ប្រជាជាតិកម្ពុជា ត្រូវបានវិទ្យាសា្ថនស្រាវជ្រាវ និងអភិរក្សសាស្ត្រាស្លឹករឹតខ្មែរ ប្រមូលដើម្បីរក្សាទុកជា ឯកសារស្រាវជ្រាវ ប្រវត្តិសាស្ត្រ។

ការប្រមូលយកទុក ឯកសារព័ត៌មាននោះ គឺជំនួយពីសាសាបារាំងចុងបូព៌ាពីឆ្នាំ១៩៩០ ដឹកនាំដោយសាស្ត្រចារ្យ អីលីវីយេ ឌើ ប៊ែរណាន់(Olivier de Bernon )ផ្តួចផ្តើមឲ្យប្រមូល ឯកសារព័ត៌មានចម្រុះភាសាក្នុងគោលបំណង ចងក្រងព័ត៌មានឯកសារទាំងនោះ សម្រាប់មនុស្សជំនាន់ក្រោយងាយស្រាវជ្រាវ រកប្រវត្តិនានា វប្បធម៌ជាតិ នយោបាយដឹកនាំ ជីវភាពប្រជាជនកម្ពុជា ដែលបានចេញផ្សាយ នៅតាមនៅដំណាក់កាលដឹកនាំ ក្នុងរជ្ជកាល នីមួយៗរបស់ប្រទសកម្ពុជា។

លោក ឡេង កុកអាន មានប្រសាសន៍បន្តថា ការដឹកជញ្ជូនឯកសារពត៌មានកម្ពុជា ទៅទុកនៅសារមន្ទីរ ប៊ុយឡាក់នោះ បានធ្វើ៣ដងហើយ។ ការប្រមូលឯកសារព័ត៌មាន គឺប្រមូលពីការបោះពុម្ពផ្សាយគ្រប់ជំនាន់ ដែលសរសេរពីព្រឹត្តិការណ៍នៅក្នុងប្រទេសកម្ពុជា។ ពិសេសការបោះពុម្ពផ្សាយនៅក្នុងឆ្នាំ១៩៧៩ មកបច្ចុប្បន្ន ដើម្បីសំគាល់ពីការវិវឌ្ឍនៃភាសាខ្មែរ ក៏ដូចជានយោបាយ។

លោក ឡេង កុកអាន ឲ្យដឹងថា ការបញ្ជូន ឯកសារព័ត៌មានកម្ពុជា ទៅរក្សាទុកនៅសារមន្ទីរ ប៊ុយឡាក់ ប្រទេសបារាំង ចាប់ផ្តើមពីឆ្នាំ២០០៥ ២០០៩ និង២០១៨។ បច្ចុប្បន្ន នៅមាន កាសែតនិងទស្សនាវដ្តីជាង ២០០០គីឡក្រាមទៀត គ្រោងបញ្ជូនទៅដែរ៕

រោងចក្របរទេសចំនួន៩ថ្មីទៀត បានបង្កើតនៅកម្ពុជា ប្រើទុនជាង៣១លានដុល្លារ

May 3, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គម, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ ខណៈដែលរាជរដ្ឋាភិបាលកម្ពុជាកំពុងជម្រុញគោលនយោបាយទាក់ទាញការវិនិយោគពីបរទេស ដើម្បីបង្កើតការងារបន្ថែមក្នុងប្រទេសកម្ពុជា ទិន្នន័យរបស់ក្រុមប្រឹក្សាអភិវឌ្ឍន៍កម្ពុជា ក្នុងមេសាកន្លងមក បង្ហាញថា មានក្រុមហ៊ុនវិនិយោគបរទេសថ្មីចំនួន៩ ដែលជាគម្រោងរោងចក្រកាត់ដេរ សម្លៀកបំពាក់ និងស្បែកជើង បានទទួលការអនុម័តពីរាជរដ្ឋាភិបាលអោយបើកដំណើរការនៅកម្ពុជា ដែលនឹងបង្កើតការងារថ្មី ប្រមាណ១ម៉ឺនកន្លែង សម្រាប់ពលរដ្ឋកម្ពុជា ។

ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានបង្ហាញរបាយការណ៌មួយ នៅលើទំព័រហ្វេសប៊ុករបស់ខ្លួនថា ក្នុងខែមេសា ឆ្នាំ២០១៨ កន្លងមក រាជរដ្ឋាភិបាលកម្ពុជា បានចេញវិញ្ញាបនបត្រចុះបញ្ជីជាស្ថាពរដល់ក្រុមហ៊ុនវិនិយោគបរទេសចំនួន ៩ ក្រុមហ៊ុន ដែលមានទុនវិនិយោគសរុបជាង ៣១ លានដុល្លារអាមរិក។ ដែលគម្រោងវិនិយោគភាគច្រើន ជារោងចក្រកាត់ដេរសម្លៀកបំពាក់ និងស្បែកជើង ដោយនៅក្នុងគម្រោងវិនិយោគទាំងអស់នេះបានអះអាងពីការផ្តល់ការងារសរុបចំនួនជាង ១ ម៉ឺននាក់។ ការអនុម័តលើគម្រោងវិនិយោគថ្មីចំនួន៩នេះ គឺធ្វើឡើងតាមសំណើសុំ របស់ក្រុមហ៊ុនតាមរយៈគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ក្នុងនោះរួមមាន គម្រោងបង្កើតរោងចក្រកាត់ដេរសម្លៀកបំពាក់ និងស្បែកជើងចំនួន ៥ មានទីតាំងនៅក្នុងរាជធានីភ្នំពេញ និងរោងចក្រផលិតកាបូប និងសម្លៀកបំពាក់ចំនួន៤ ផ្សេងទៀត មានទីតាំងស្ថិតក្នុងខេត្តកណ្តាល តាកែវ និងកំពង់ស្ពឺ។

គួរបញ្ជាក់ថា យោងតាមទិន្នន័យរបស់ក្រសួងមហាផ្ទៃ គិតត្រឹមចុងឆ្នាំ២០១៧ មានក្រុមហ៊ុនបរទេសសរុបចំនួន២១៥២ក្រុមហ៊ុន កំពុងវិនិយោគនៅក្នុងប្រទេសកម្ពុជា។

ទន្ទឹមនេះតាមរបាយការណ៍របស់ក្រុមប្រឹក្សាភិវឌ្ឍន៍កម្ពុជា ក្នុងឆ្នាំ២០១៧ រាជរដ្ឋាភិបាលកម្ពុជាបានផ្តល់សិទិ្ធលើគម្រោងស្នើសុំវិនិយោគរបស់ក្រុមហ៊ុនក្នុងស្រុក និងក្រុមហ៊ុនបរទេស សរុបមានតម្លៃជាទឹកប្រាក់ ៦ពាន់៣០០ លានដុល្លារអាមេរិក។ ចំណែកទិន្នន័យ របស់ក្រសួងឧស្សាហកម្ម និងសិប្បកម្ម គិតត្រឹមដំណាច់ឆ្នាំ២០១៧ រោងចក្រកាត់ដេរសម្លៀកបំពាក់ ស្បែកជើង និង កាបូប មានចំនួនសរុប ១០៣១រោងចក្រ ដែលមានចំនួនកម្លាំងពលកម្មបំរើការសរុបជាង ៨៤ម៉ឺន ៧ពាន់នាក់៕

លោក ហ៊ុន ជា ត្រូវផ្តន្ទាទោសដាក់ពន្ធនាគារ ១៨ខែ ករណីបាញ់មេឃ នៅខណ្ឌដូនពេញ

May 3, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ ចៅក្រមជំនុំជម្រះ រស់ ពិសិដ្ឋ ជាចៅក្រមស៊ើបសួរសាលាដំបូងរាជធានីភ្នំពេញនៅល្ងាចថ្ងៃទី២ ខែឧសភា ឆ្នាំ២០១៨ នេះ បានបើកសវនាការជំនំជម្រះភ្លាមៗ និងសម្រេចចេញដីកាផ្តន្ទាទោសលោក ហ៊ុន ជាដាក់ពន្ធនាគារព្រៃសរយៈ១៨ខែ ពាក់ព័ន្ធករណីបាញ់បោះសេរីបង្កការភ្ញាក់ផ្អើលនៅសង្កាត់ផ្សារថ្មីទី១ ខណ្ឌដូនពេញ កាលពីយប់ថ្ងៃទី០១ ខែឧសភា ឆ្នាំ២០១៨។ នេះ បើយោងតាមមន្ត្រីសាលាដំបូងរាជធានីភ្នំពេញបានបង្ហើបអោយដឹងថាការសម្រចនេះធ្វើឡើងក្នុងអង្គជំនុំជម្រះភ្លាមៗលើករណីបទល្មើសជាក់ស្តែង។

សវនាការនេះ មានការចូលរួមដោយលោក ហ៊ឹង ប៊ុនថន ជាតំណាងអយ្យការ និងលោក រស់ ពិសិដ្ឋ ជាចៅក្រមស៊ើបសួរសាលាដំបូងរាជធានីភ្នំពេញ។
គួររំលឹកផងដែរថា ក្រោយករណីផ្ទុះអាវុធនេះកើតឡើងកម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃបានធ្វើការឃាត់ខ្លួន លោកហ៊ុនជាភ្លាមៗផងដែរដើម្បីយកទៅសួរនាំពាក់ព័ន្ធករណីផ្ទះអាវុធនៅក្នុងខណ្ឌដូនពេញកន្លងមកនេះ។ ករណីផ្ទុះអាវុធជាច្រើនគ្រាប់នេះ ផ្ដើមចេញពីជម្លោះក្នុងគ្រួសារធ្វើឲ្យលោកហ៊ុន ជា ទប់កំហឹងមិនបាន ទើបបាញ់ឡើងលើជាច្រើនគ្រាប់តែម្ដង ហើយករណីនេះមិនបង្កឲ្យនរណាម្នាក់រងគ្រោះថ្នាក់នោះទេ។

សូមបញ្ជាក់ថា រឿងហេតុខាងលើនេះ ទាំងចៅហ្វាយខណ្ឌ និងកម្លាំងសមត្ថកិច្ចខណ្ឌដូនពេញ មានប៉េអឹម និងប៉ូលិស ត្រូវបានគេរាយការណ៍មកថា បានត្រឹមឈរមើលពីចម្ងាយមិនហ៊ានចូលទៅកន្លែងកើតហេតុ បន្ទាប់ពីមានករណីផ្ទុះអាវុធប្រមាណជាង១០គ្រាប់ហើយក៏ស្ងប់ស្ងាត់ទៅវិញ។

បើតាមសេក្ដីរាយការណ៍មានករណីផ្ទុះអាវុធជាច្រើនគ្រាប់ជាប់ៗគ្នាតែម្ដងចេញពីផ្ទះលេខ១១បើកអាជីវកម្មវេរលុយយីហោ True Money នៅតាមបណ្ដោយផ្លូវ១០៨ កែងផ្លូវ៥១ ស្ថិតក្នុងភូមិ១១ សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ បង្កការភ្ញាក់ផ្អើលយ៉ាងខ្លាំងកាលពីវេលាម៉ោងប្រមាណ១០និង២៥នាទីយប់ ថ្ងៃអង្គារទី១ ខែឧសភា ឆ្នាំ២០១៨ ប៉ុន្តែករណីនេះក៏បានស្ងប់ស្ងាត់ទៅវិញភ្លាមៗផងដែរ៕

ការផ្សងប្រថ្នូលគោឧសភរាជឆ្នាំនេះ ដំណាំស្រូវ ពោត និងសណ្តែក ទទួលបានផលខ្ពស់

ស្វាយរៀង ៖ ពិធីផ្សងប្រថ្នូល តាមរយៈការបរិភោគអាហាររបស់គោឧសភរាជបរិភោគ នៅក្នុង ក្នុងព្រះរាជពិធីច្រត់ព្រះនង្គ័ល ឆ្នាំ២០១៨នេះ បានឱ្យដឹងថា ទិន្នផលដំណាំស្រូវ ពោត និងសណ្តែកឆ្នាំនេះ ទទួលបានទិន្នផលខ្ពស់។ នេះគឺជាការប្រកាសរបស់ព្រហ្មណ៍ព្រះរាជគ្រូ ដែលបានក្រាបបង្គំទូលថ្វាយ ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។

ព្រះរាជពិធីច្រត់ព្រះនង្គ័ល ឆ្នាំ២០១៨នេះ ត្រូវបានប្រារព្ធធ្វើឡើងនៅទីព្រះស្រែ ស្ថិត នៅភូមិស្រះវង់ សង្កាត់ស្វាយរៀង ក្រុងស្វាយរៀង ខេត្តស្វាយរៀង ក្រោមព្រះរាជាធិបតីភាពដ៏ខ្ពស់ខ្ពស់បំផុតរបស់ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។

ជាមួយគ្នានេះ វត្តមានដ៏ខ្ពង់ខ្ពស់របស់ថ្នាក់ដឹកនាំកំពូលៗរបស់ជាតិ ក៏បានអញ្ជើញចូលរួមក្នុងព្រះរាជពិធីច្រត់ព្រះនង្គ័លនេះផងដែរ ក្នុងនោះមានវត្តមានដ៏ខ្ពង់ខ្ពស់របស់ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចចៅវាហ្វាវាំង វរវៀងជ័យ អធិបតីស្រឹង្គារ៍ គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងជាប្រធានគណៈកម្មាធិការ ជាតិរៀបចំបុណ្យជាតិ និងអន្តរជាតិ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ព្រមទាំងព្រះវត្តមាន និងវត្តមានរបស់ព្រះរាជវង្សានុវង្ស ឯកឧត្តម លោកជំទាវ ជាសមាជិកសមាជិការ ព្រឹទ្ធសភា រដ្ឋសភា រាជរដ្ឋាភិបាល ឯកឧត្តម លោកជំទាវ ជាឯកអគ្គរាជទូត ឯកអគ្គរដ្ឋទូត នៃបណ្តាប្រទេសជាមិត្តប្រចាំកម្ពុជា ព្រមទាំងភ្ញៀវជាតិ អន្តរជាតិ និងបងប្អូនប្រជាពលរដ្ឋ និងប្រជាកសិករជាច្រើនពាន់នាក់។

សម្រាប់ព្រះរាជពិធីច្រត់ព្រះនង្គ័ល នៅឆ្នាំ២០១៨នេះ ព្រះករុណាជាអម្ចាស់ជីវិតលើតម្កល់ត្បួង ព្រះមហាក្សត្រ នៃព្រះរាជាណាចក្រកម្ពុជា ទ្រង់បានសព្វព្រះរាជហឬទ័យ ប្រោសព្រះរាជទានដល់ ឯកឧត្តម ហ៊ួត ប៊ុនណារី រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជាអ្នកកាន់នង្គ័លយោង ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង ច្រត់ព្រះនង្គ័លជា ស្តេចមាឃ និងលោកជំទាវ ឈុន ណារី ជាមេហូ និង ឯកឧត្តម កុល ប៊ុនលី រដ្ឋលេខាធិការក្រសួងព្រះបរមរាជវាំង ជាអ្នកកាន់នង្គ័លក្រោយ។

សម្រាប់ឆ្នាំទិន្នផលកសិកម្មនៅឆ្នាំ២០១៨នេះ បើតាម ព្រហ្មណ៍ព្រះរាជគ្រូ បានប្រកាសឱ្យដឹងថា អាហារទាំង ៧មុខ ដែលរួមមានៈ ស្រូវ ពោត សណ្តែក ល្ង ស្មៅ ទឹក និងស្រា ដែលបានតំកល់លើតុកណ្តាលទីព្រះស្រែ ដើម្បីឱ្យគោឧសភរាជបរិភោគ ដែលជាកិច្ចផ្សងប្រថ្នូលតាមបវេណីនោះ ឃើញថា អាហារតែ ៣ មុខប៉ុណ្ណេះ ដែលត្រូវបានគោឧសភរាជបរិភោគ រួមមាន៖ ស្រូវ ពោត និងសណ្តែក តាមរយៈនេះ បានបង្ហាញថា ដំណាំស្រូវឆ្នាំនេះ ទទួលបានទិន្នផលល្អប្រសើរ រហូតដល់ទៅ ៩៥% ដំណាំពោត ក៏ទទួលបានទិន្នផលល្អប្រសើររហូតដល់ទៅ ៩៥% និងដំណាំសណ្តែក ក៏ទទួលបានទិន្នផលល្អប្រសើរដូចគ្នា រហូតដល់ទៅ ៨០%។

ជាមួយនឹងការប្រកាសនូវលទ្ធផលផ្សងប្រផ្នូលដូច្នេះ អាច្ចារ្យព្រហ្មព្រលោហិត បានលើកឡើងថា នេះគឺជាការផ្សងប្រផ្នូលទៅតាមទំនៀមទំលាប់ព្រះរាជវេណី នៃព្រះរាជពិធីច្រត់ព្រះនង្គ័ល ដែលមានតាំងពីបុរាណកាលមកប៉ុណ្ណោះ ក៏ដូចជាការប្រកាសថា រដូវវប្បមង្គលចូលមកដល់ហើយ។ ដូច្នេះសូមប្រជាកសិករ ត្រៀមលក្ខណៈសម្បត្តិប្រុងប្រៀបរៀបចំការងារបង្ក បង្កើនផល ឲ្យបានទទួលនូវទិន្នផលខ្ពស់ ដើម្បីលើកស្ទួយកម្រិត ជីវភាពបានល្អប្រពៃ។

ស្ថិតក្នុងឱកាសដ៏វិសេសវិសាលនេះដែរ ព្រះករុណាជាអម្ចាស់ជីវិតលើត្បួង ព្រះមហា ក្សត្រ នៃព្រះរាជាណាចក្រកម្ពុជា ព្រះអង្គ បានសព្វព្រះរាជហរទ័យ ប្រោសព្រះរាជទាន នូវព្រះរាជអំណោយចំពោះប្រជាកសិករ ចំនួន ១០០នាក់ ដោយក្នុងនោះបុរស ក្នុងម្នាក់ៗ ទទួលបាន មួក ១ ខាវអាវ ១កម្លេ ស្បែកជើង ១គូរ និងថវិកា ២០មឺនរៀល និងនារី ក្នុង ម្នាក់ៗ ទទួលបានក្រមា ១ ខាវអាវ ១កម្លេ ស្បែកជើង ១គូរ និងថវិកា ២០មឺនរៀលដូចគ្នា។ បន្ទាប់មក ព្រះករុណាជាអម្ចាស់ជីវិតលើត្បួង ព្រះមហាក្សត្រ នៃព្រះរាជាណាចក្រកម្ពុជា ព្រះអង្គ បានសព្វព្រះរាជហរទ័យ ស្តេចយាងទត ព្រះពន្លាតាំងពិព័រណ៌ ដែលតាំងបង្ហាញ ដោយបណ្តាលក្រសួងនានា របស់រាជរដ្ឋាភិបាលផងដែរ៕

នាយករដ្ឋមន្ត្រីប្រាប់ឲ្យប្រព័ន្ធផ្សព្វផ្សាយផ្ដល់ព័ត៌មានពិត និងទទួលខុសត្រូវ

ភ្នំពេញ ៖ ក្នុងសារលិខិតរបស់សម្ដេចតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ក្នុងឱកាស”ទិវាសេរីភាពសារព័ត៌មានសកលលោក”នាថ្ងៃទី៣ ខែឧសភា ឆ្នាំ២០១៨នេះ បានសរសេរ ថា ទិវាសេរីភាពសារព័ត៌មានឆ្នាំនេះ បានផ្ដោតលើប្រធានបទស្ដីពី”ប្រព័ន្ធផ្សព្វផ្សាយយុត្តិធម៌ និងនីតិរដ្ឋ” គឺពិតជាមានសារៈសំខាន់ ស្របតាមតម្រូវការចាំបាច់របស់រាជរដ្ឋាភិបាលកម្ពុជា ដែលចង់បានប្រព័ន្ធផ្សព្វផ្សាយមានថាមពល និងប្រកបដោយគុណភាព យុត្តិធម៌ និងការទទួលខុសត្រូវ ក្នុងការផ្ដល់ព័ត៌មានពិត ដែលជាកញ្ចក់ឆ្លុះបញ្ចាំងនូវការពិតជាក់ស្ដែងក្នុងសង្គម មិនឲ្យឆ្វេកពេក មិនស្ដាំពេក គឺចលនាកណ្ដាលនិយម ដែលអាចទទួលយកបានទាំងអស់គ្នា។

ម្យ៉ាងទៀតនោះ គឺត្រូវហ៊ាននិយាយការពិត និងហ៊ានរិះគន់ក្នុងន័យស្ថាបនា ដើម្បីចូលរួមក្នុងការលើកស្ទួយលិទ្ធិប្រជាធិបតេយ្យ ការកសាងសង្គមមួយមានយុត្តិធម៌ នីតិរដ្ឋ សុខសន្តិភាព និងការអភិវឌ្ឍប្រកបដោយចីរភាព ដែលជាបំណងប្រាថ្នា និងជាចក្ខុវិស័យរបស់រាជរដ្ឋាភិបាលកម្ពុជា។

សម្ដេចតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានផ្ដល់អនុសាសន៍ក្នុងសារលិខិតនេះ ថា ដើម្បីឲ្យប្រព័ន្ធផ្សព្វផ្សាយ មានយុត្តិធម៌ និងប្រទេសមួយមាននីតិរដ្ឋ គឺទាមទារឲ្យអ្នកសារព័ត៌មានត្រូវខិតខំប្រឹងប្រែងបន្តទៀត នូវការអភិវឌ្ឍសមត្ថភាពយល់ដឹងរបស់ខ្លួន និងមានភាពស្មោះត្រង់ក្នុងវិជ្ជាជីវៈ ក្លាហានហ៊ាននិយាយការពិត និងដោយហ៊ានទទួលយកការពិត ដើម្បីឲ្យព័ត៌មានរបស់ខ្លួនក្លាយជាព័ត៌មានពិត ហើយការឆ្លុះបញ្ចាំងឲ្យឃើញតថភាពសង្គម ដើម្បីចូលរួមប្រឆាំងអំពើពុករលួយ ការកែទម្រង់ច្បាប់ ប្រព័ន្ធយុត្តិធម៌ និងការកែទម្រង់រដ្ឋបាលសាធារណៈ ហើយការងាររបស់អ្នកកាសែត ដែលត្រូវបំពេញមានច្រើនណាស់ ទាំងនៅពេលបច្ចុប្បន្ន និងនៅពេលអនាគត។

សម្ដេចតេជោហ៊ុន សែន ក៏បានបញ្ជាក់ក្នុងសារលិខិតនេះផងដែរ ថា នៅខែកក្កដា ឆ្នាំ២០១៨នាពេលដ៏ខ្លីខាងមុខនេះ ប្រទេសកម្ពុជានឹងរៀបចំការបោះឆ្នោតសកលជ្រើសតាំងតំណាងរាស្ដ្រនីតិកាលទី៦ តម្រូវឲ្យអ្នកសារព័ត៌មានប្រកាន់ភាពយុត្តិធម៌ ធ្វើការចូលរួមមផ្សព្វផ្សាយនូវព័ត៌មានពិត ដើម្បីធានាឲ្យបរិយាកាសនយោបាយ និងដំណើរការនៃការបោះឆ្នោតបានប្រព្រឹត្តទៅប្រកបដោយភាពសសេរី ត្រឹមត្រូវ យុត្តិធម៌ ហើយលទ្ធផលនៃការបោះឆ្នោតអាចទទួលយកបានគ្រប់ភាគីពាក់ព័ន្ធ៕

ខេត្តព្រៃវែងបិទបញ្ចប់ការវាស់វែងទំហំខ្នាតឯកសណ្ធានសម្រាប់នគរបាល

May 2, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ព្រៃវែង ៖ នារសៀលថ្ងៃទី២ ខែឧសភា ឆ្នាំ២០១៨ នៅស្នងការដ្ឋាននគរបាលខេត្តព្រៃវែង ក្រុមការងាររបស់នាយកដ្ឋានភស្ដុភារ និងសម្ភារៈបច្ចេកទេសដឹកនាំដោយលោកឧត្ដមសេនីយ៍ទោ សាន.ច័ន្ទសារ៉េតប្រធានក្រុមការងារទី៥ជាអនុប្រធាននាយកដ្ឋានភស្ដុភានិងសម្ភារៈបច្ចេកទេស និងលោកឧត្តមសេនីយ៍ទោស្រេង.ជាស្នងការ នគរបាលខេត្តព្រៃវែងបានបើកកិច្ចប្រជុំស្តីពីបិទបញ្ចប់ការចុះវាស់វែងទំហំខ្នាតឯកសណ្ឋានជូនដល់កងកម្លាំងនគរបាលជាតិទូទាំងស្នងការដ្ឋាននគរបាលខេត្តព្រៃវែង។

ពិធីនេះក៍មានការអញ្ជើញចូលរួមពីសំណាក់ក្រុមការងារនាយកដ្ឋានភស្ដុភានិងសម្ភារៈបច្ចេកទេសលោកលោកស្រីឧត្តមសេនីយ៍ស្នងការរងប្រធានការិយាល័យជំនាញ.លោកមេបញ្ជាការវរៈការពារព្រំដែនគោកលេខ៦០៧,អធិការនគរបាលស្រុក,ក្រុងទាំង១៣។ លោកឧត្តមសេនីយ៍ទោសាន.ច័ន្ទសារ៉េតបានមានប្រសាសន៍លើកឡើងថាដោយអនុវត្តតាមគោលការណ៍កំណែទម្រង់របស់ឯកឧត្តមនាយឧត្តមសេនីយ៍សន្តិបណ្ឌិតអគ្គនាយកនៃអគ្គនាយកដ្ឋានភស្តុភារនិងហិរញ្ញវត្ថុបានចាត់បញ្ជូនក្រុមការងារចុះវាស់វែងទំហំខ្នាតឯកសណ្ឋានជូនដល់មន្ត្រីនគរបាលជាតិប្រចាំឆ្នាំ២០១៨ក្នុងខេត្តព្រៃវែងដើម្បីយកទំហំខ្នាតតាមបណ្តាអធិការដ្ឋាននគរបាលស្រុក,ក្រុងនិងស្នងការដ្ឋាននគរបាលខេត្តមកធ្វើការវាស់កាត់ឯកសណ្ឋានឲ្យបានត្រឹមត្រូវតាមទំហំខ្នាតសំរាប់បើកផ្តល់ជូនមន្ត្រីនគរបាលជាតិស្លៀកពាក់បានសមរម្យហើយថ្លៃថ្នូរ។

ជាក់ស្តែងរយៈពេល១សប្តាហ៍គឺចាប់ពីថ្ងៃទី២៥ខែមេសារហូតដល់ថ្ងៃទី១ខែឧសភាឆ្នាំ២០១៨នេះក្រុមការងាររបស់នាយកដ្ឋានភស្ដុភារ និងសម្ភារៈបច្ចេកទេសបានចុះមកធ្វើការវាស់ទាំហំខ្នាតគឺតម្រូវទៅតាមលេខទំហំខ្នាតឯកសណ្ឋានជូនមន្ត្រីនគរបាលជាតិសម្រាប់ឆ្នាំ២០១៨ក្នុងនោះដែរលោកឧត្តមសេនីយ៍ទោសាន.សារ៉េតបានលើកឡើងបញ្ជាក់ជូនលោកស្នងការនគរបាលខេត្តថាចំពោះឯកសណ្ឋានដែលក្រុមការងារបានវាស់ទំហំខ្នាតជូននៅពេលនេះគឺតម្រូវទៅតាមលេខទំហំខ្នាតនៃការស្លៀកពាក់របស់មន្ត្រីនគរបាលម្នាក់ៗ។ក្រុមការងារទី៥របស់នាយកដ្ឋានភស្ដុភារនិងសម្ភារៈបច្ចេកទេសបានបែងចែកទៅតាមបណ្តាអធិការដ្ឋាននគរបាលស្រុក,ក្រុងនគរបាលប៉ុស្តិ៍រដ្ឋបាលអង្គភាពជំនាញក្រោមឱវាទជូនមន្ត្រីម្នាក់ៗទៅតាមទំហំខ្នាតក្នុងនោះមានការផ្ទៀងផ្ទាត់យ៉ាងហ្មត់ចត់នូវចំនួនក្របខណ្ឌប្រភេទកម្លាំងជំនាញលំដាប់ឋានន្តរសក្តិទៅតាមគម្រោងរបស់ស្នងការដ្ឋានស្នើឡើងឲ្យបានត្រឹមត្រូវដើម្បីជាភាពងាយស្រួលដល់ការធានាស្លៀកពាក់របស់មន្ត្រីគ្រប់រូប។

ឧត្តមសេនីយ៍ទោស្រេង.ជាស្នងការនគរបាលខេត្តបានថ្លែងអំណរគុណដល់ថ្នាក់ដឹកនាំក្រសួងមហាផ្ទៃអគ្គស្នងការនគរបាលជាតិអគ្គនាយកដ្ឋានភស្តុភារនិងហិរញ្ញវត្ថុដែលជានិច្ចជីកាលតែងតែយកចិត្តទុកដាក់ជួយផ្គត់ផ្គង់ឧបត្ថម្ភដល់កងកម្លាំនគបាលជាតិនៅតាមស្នងការដ្ឋាននគរបាលខេត្តតាមរយៈលោកឧត្ដមសេនីយ៍ទោសាន.ច័ន្ទសារ៉េតប្រធានក្រុមការងារទី៥ជា

អនុប្រធាននាយកដ្ឋានភស្ដុភារនិងសម្ភារៈបច្ចេកទេសបានធ្វើការវាស់លេខទំហំឯកសណ្ឋានសម្រាប់ឆ្នាំ២០១៨ដល់ស្នងការដ្ឋាននគរបាលខេត្តព្រៃវែងផ្ទាល់តែម្តងដើម្បីងាយស្រួលដល់ការផ្គត់ផ្គង់ជូនដល់កងកម្លាំងម្នាក់ៗស្លៀកពាក់ឲ្យបានសមរម្យថ្លៃថ្នូរនិងទាន់ពេលវេលាដើម្បីឆ្លើយតបចំពោះការគិតគូរយកចិត្តទុកដាក់ដ៏ខ្ពង់ខ្ពស់របស់ថ្នាក់ដឹកនាំក្រសួងគ្រប់ជាន់ថ្នាក់ដល់កងកម្លាំងនគរបាលជាតិ។

លោកឧត្តមសេនីយ៍ទោស្នងការនគរបាលខេត្តព្រៃវែងបានប្តេជ្ញានិងធ្វើការបែងចែកឯកសណ្ឋានតាមទំហំខ្នាតឲ្យបានដល់ដៃមន្ត្រីនគរបាលក្រោមឱវាទទៅតាមគោលរបបដែលក្រសួងបានកំណត់៕

កម្ពុជាឱ្យគ្រប់ភាគីពាក់ព័ន្ធចូលរួមត្រួតពិនិត្យការអនុវត្តអនុសញ្ញា UN ប្រឆាំងអំពើពុករលួយ

May 2, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ អង្គភាពប្រឆាំងអំពើពុករលួយ នៅព្រឹកថ្ងៃទី២ ខែ ឧសភា ឆ្នាំ២០១៨នេះ បានរៀបចំសិក្ខាសាលា ស្តីពី ការត្រួតពិនិត្យ ការអនុវត្ត អនុសញ្ញាអង្គការសហប្រជាជាតិ ប្រឆាំងអំពើពុករលួយ (UNCAC) ជុំទី២ នៅកម្ពុជា ដើម្បីចែករំលែកបទពិសោធន៍នានាជុំវិញដំណើរការនេះ។

ថ្លែងនៅក្នុងពិធីនោះ លោក តុប សំ ប្រធានក្រុមប្រឹក្សាជាតិ ប្រឆាំងអំពើពុករលួយ បានឱ្យដឹងថា សិក្ខាសាលានេះប្រារពធ្វើឡើងក្នុងគោលបំណង៣សំខាន់ៗគឺ ផ្តល់ដល់់ភាគីពាក់ព័ន្ធ នូវចំណេះដឹងពីអនុសញ្ញាអង្គការសហប្រជាជាតិ ប្រឆាំងអំពើពុករលួយ និងយន្តការ នៃការត្រួតពិនិត្យ ។ ផ្តល់ដល់ សិក្ខាកាម នូវព័ត៌មាន អំពី លទ្ធផល នៃការត្រួតពិនិត្យ អនុសញ្ញា អង្គការសហប្រជាជាតិ ប្រឆាំងអំពើពុករលួយជុំទី១នៅកម្ពុជា និង វឌ្ឍនភាព នៃការអនុវត្តផែនការសកម្មភាព ស្របតាមអនុសាសន៍ ដែលបានដាក់ចេញដោយភាគីត្រួតពិនិត្យ។ មួយវិញទៀត គឺ ផ្តល់វេទិកា ដល់ភាគីពាក់ព័ន្ធ ចូលរួមផ្តល់ធាតុចូលដើម្បីរៀបចំរបាយការណ៍ ស្វ័យតម្លៃ ត្រៀមទទួលការត្រួតពិនិត្យការអនុវត្តជុំទី២។

លោកប្រធានក្រុមប្រឹក្សាជាតិបានបញ្ជាក់ថា“ការត្រួតពិនិត្យ ការអនុវត្ត UNCACជុំទី២នឹងផ្តោតលើ វិធានការបង្ការ ទប់ស្កាត់ អំពើពុករលួយ និងការរឹបអូសផល នៃបទល្មើស។ ហើយការត្រួតពិនិត្យនឹងផ្អែកលើរបាយការណ៍ ស្វ័យវាយតម្លៃ ដែលកម្ពុជា រៀបចំតាមរយៈការឆ្លើយតបទៅ នឹងបញ្ជីសំណួរដែលផ្តល់ដោយអង្គការសហប្រជាជាតិ។ កម្ពុជា ដែលមានអង្គភាពប្រឆាំងអំពើពុករលួយ ជាស្ថាប័នបង្គោលសម្របសម្រួលលើការងារត្រួតពិនិត្យនេះ បានបើកទូលាយ ដល់គ្រប់ភាគីពាក់ព័ន្ធឲ្យចូលរួម និងធ្វើជាម្ចាស់ ក្នុងដំណើការ ចាប់ពីពេលត្រៀមចេញដំណើរ រហូតដល់ដំណាក់កាលចុងក្រោយ នៃការត្រួតពិនិត្យ ជាពិសេ ក្នុងដំណាក់កាល នៃការរៀបចំរបាយការណ៍ស្វ័យវាយតម្លៃ ដើម្បីគ្រប់ភាគីពាក់ព័ន្ធទាំង វិស័យសាធារណៈ វិស័យឯកជន ផ្នែកសិក្សាធិការ ផ្នែកសារព័ត៌មាន និងសង្គមស៊ីវល អាចផ្តល់ធាតុចូល លើការងារ ដែលខ្លួនបានអនុវត្តន៍ ក្នុងការប្រយុទ្ធប្រឆាំងអំពើពុករលួយនៅកម្ពុជាកាន់តែគ្រប់ជ្រុងជ្រោយតាមការតម្រូវរបស់ UNCAC”។

លោក បន្ថែមថា ក្នុងដំណើរការត្រួតពិនិត្យការអនុវត្ត UNCAC រាជរដ្ឋាភិបាលកម្ពុជា ដែលមាន សម្តេចតេជោជាប្រមុខបានផ្តោតយកចិត្តទុកដាក់យ៉ាងខ្លាំង និងរៀបចំប្រកបដោយតម្លាភាពនិងភាពគ្រប់ជ្រុងជ្រោយ ដោយទទួលបានការកោតសរសើរ និងត្រូវបានអង្គការសហប្រជាជាតិ កំណត់ជាគំរូនៃការរៀបចំដ៏ល្អ ដោយកម្ពុជា បានបើកទូលាយឲ្យមានការចូលរួមពីគ្រប់ភាគីពាក់ព័ន្ធ ក្នុងដំណើរការ នៃការត្រួតពិនិត្យនេះ។

សូមបញ្ជាក់ថា UNCAC ជាលិខិតតូបករណ៍អន្តរជាតិដែលមានលក្ខណៈសកល និងមានលក្ខណៈចង កាតព្វកិច្ចតម្រូវឲ្យប្រទេសរដ្ឋភាគីទទួលការត្រួតពិនិត្យការអនុវត្តអនុសញ្ញាលើទិដ្ឋភាពច្បាប់ និងយន្តការនៃការអនុវត្តនានា ក្នុងការប្រយុទ្ធប្រឆាំងអំពើពុករលួយ៕

អតីតចៅអធិការវត្ត ជ្រោះព្រះគន្លោង ដែលផ្សឹកដោយសាររឿងស្រី បានលួចបួសឡើងវិញ

កំពង់ស្ពឺ ៖ កាលពីព្រឹកថ្ងៃទី២៩ ខែមេសា ឆ្នាំ២០១៨ កន្លងទៅនេះ ដែលចំថ្ងៃ១៥កើតពេញបូណ៌មី ខែពិសាខ (ចំថ្ងៃបុណ្យ វិសាខបូជា)ផងនោះ មានការភ្ញាក់ផ្អើលមួយបានកើតឡើងបន្ទាប់ពីពុទ្ឋបរិស័ទ្ធ បានឃើញវត្តមានរបស់អតីតចៅអធិការវត្តវិបស្សនាជ្រោះព្រះគន្លោងមួយអង្គ(ព្រះនាម សូរ រិទ្ធី) ដែលត្រូវបានសមត្ថកិច្ចខេត្តកណ្តាល និងខាងធម្មការចាប់ផ្សឹករឿងដេកជាមួយស្រីរោងចក្រនៅបន្ទប់ជួលមួយកន្លែង ក្នុងភូមិពោធិឃុំម្កាក់ ស្រុកអង្គស្នួល ខេត្តកណ្តាល កាលពីថ្ងៃទី២០ ខែមេសា ឆ្នាំ២០១៧ កន្លងទៅនោះ។

វត្តមានរបស់បុគ្គលរូបនេះ បង្កអោយកើតមានចំងល់ជាច្រើន ពាក់ព័ន្ឋវត្តមានរបស់លោក ដែលត្រួវខាងអនុគុណស្រុក ចាប់ផ្សឹកតាមវិន័យព្រះពុទ្ឋសាសនា នៃអប្បដិ បរាជិកនោះ ពេលនេះ បានមកគ្រងតំណែងជាចៅអធិការវត្តដូចដើមវិញហើយ ថែមទាំងធ្វើហោរទស្សន៍ទាយនិងស្រោចទឹកអោយពុទ្ធបរិស័ទថែមទៀតផង។

ដោយចង់ដឹងរឿងនេះអោយបានច្បាស់ថាតើអ្នកណាជាអ្នកអនុញាតអោយលោកបួសជាសង្ឃជាថ្មីនេះ អ្នកយកពត៌មានបានព្យាមសុំជួបព្រះតេគុណ សូរ រិទ្ឋី ដើម្បីបកស្រាយដែរ តែលោកបានបដិសេធមិនអោយជួប ហើយថែមទាំងរត់ឡើងឡានឡង់គ្រីស័រមួយគ្រឿង ពណ៌ស្លែចាស់ ពាក់ស្លាកលេខភ្នំពេញ 2J 1346 ជិះគេចចេញពីវត្តបាត់ទៅ ដែលឡាននោះ ត្រូវបានដឹងថា ជាឡានរបស់លោកផ្កាយ២ និងលោកជំទាវមួយរូប ដែលជាអ្នកជួយជ្រោមជ្រែងអោយលោកបានបួសហើយគ្រងតំណែងចៅអធិការដូចដើមវិញ។

មានការលើកឡើងថា”ជាធម្មតាទោសនៃអប្បដិ បរាជិកតាមធម៌វិន័យ គឺមិនអនុញាតអោយសាងផ្នួសម្តងទៀតបានឡើយ ចុះហេតុអ្វីបានជាបុគ្គលរូបនេះ អាចបួសបានហើយគ្រងតំណែងជាចៅអធិការដូចមុនដដែលបានទៀតទៅវិញ?
តើលោកប្រធានការិយាល័យធម្មការស្រុក និងលោកប្រធានមន្ទីរធម្មការខេត្ត បានដឹងរឿងនេះដែរឬទេ? ឬមួយដឹងដែរតែធ្វើមិនដឹង?”

មានការលើកឡើងទៀតថា តើនៅខេត្តកំពង់ស្ពឺ ខ្វះព្រះសង្ឃបរិសុទ្ឋ និងមានចំណេះក្នុងការដឹកនាំកសាងវត្តមែនទេ ទើបបានជាបណ្តោយអោយបុគ្គលដែលមានទោស ដែលជាទោស១ក្នុងចំណោមទោសទាំង៧របស់ភិក្ខុសង្ឃត្រឡប់មកក្នុងសមណៈភេទហើយគ្រងតំណែងជាចៅអធិការបែបនេះទៅកើត?”

ពុទ្ឋបរិស័ទចំណុះជើងវត្តបានលើឡើងថា រាល់ថ្ងៃឃើញតែអ្នកមកពីចំងាយមករកលោកចំណែកអ្នកនៅក្បែរវត្តមិនសូវចេញចូលនោះទេ សព្វថ្ងៃនេះនៅក្នុងវត្តមានលោកនេន៣អង្គ និងអ្នកបួសឈ្មោះ សូរ រិទ្ឋី នេះម្នាក់ផង។ ក្នុងនោះផងដែរ គេតែងសង្កេតឃើញរថយន្តឡង់គ្រីស័រមួយគ្រឿង ដែលតែងតែចេញចូលយប់ព្រលប់ទៅមករកបុគ្គលខាងលើតែមិនមានអ្នកណាអាចដឹងទេថា រាល់យប់ នៅពេលដែលឡានឡង់គ្រីស័រនោះចេញពីវត្ត តើបុគ្គលសូរ រិទ្ឋី នោះ ទៅជាមួយ ឬយ៉ាងណានោះទេ។

ពាក់ព័ន្ឋករណីនេះដែល ព្រះអនុគណស្រុកសំរោងទង ព្រះនាម លាង ប៊ុនហាក់ បានមានថេរដីកាថា ព្រះអង្គមិនបានដឹងថា សង្ឃអង្គនោះ(សូរ រិទ្ធី) បួសនៅឯណានោះទេ “ករណីបុគ្គល សូរ រិទ្ឋី លួចបួសនៅឯណាក៏គ្មានអ្នកដឹងដែរ បន្ទាប់ពីផ្សឹកបុគ្គល សូរ រិទ្ធី នោះរួចមក ខាងអនុគណ និងមន្ទីរធម្មការខេត្ត បានជ្រើសព្រះសង្ឃអង្គថ្មីមកធ្វើជាចៅអធិការរួចហើយ “ប៉ុន្តែលោកបានលាចាកសិក្ខាបទមុនចូលឆ្នាំខ្មែរទៅវិញហើយ។ព្រះអង្គ លាង ប៊ុនហាក់ អនុគណស្រុក បានបន្តថា បើដូច្នេះមែនបុគ្គល សូរ រិទ្ធី ធ្វើទង្វើបែបនេះខុសវិន័យសង្ឃធ្ងន់ធ្ងរណាស់។

ពាក់ពន្ធ័និងការលេចមុខលោកសង្ឃក្លែងក្លាយ សូរ រិទ្ធី អតីតចៅអធិការវត្តវិបស្សនា ជ្រោះព្រះកន្លោង មានវត្តមាននៅក្នុងវត្តនេះដែល លោក សម សោភាន់ ប្រធានមន្ទីរធម្មការខេត្តកំពង់ស្ពឺ មិនបានដឹងរឿងនេះឡើយ ដោយលោកថា និងដាក់កម្លាំងតាមដានឃ្លាំមើលបុគ្គល សូរ រិទ្ធី នេះដែលធ្វើទង្វើផ្តេសផ្តាស ធ្វើអោយប៉ះពាល់សាសនាព្រះពុទ្ធខ្លាំងណាស់។

សូមរំលឹកថា កាលពីរសៀលថ្ងៃទី២៣ ខែមេសា ឆ្នាំ២០១៧ កន្លងទៅ តាមពត៌មានពីព្រះគ្រូអនុគណស្រុកអង្គស្នួល បានផ្តល់អោយកាលពីថ្ងៃទី២០ ខែមេសា ឆ្នាំ២០១៧ ថា ព្រះគ្រូចៅអធិការវត្តវិបស្សនា ជ្រោះព្រះគន្លោង ព្រះនាម សូ រឹទ្ឋី ស្ថិតក្នុងឃុំក្រាំងអំពិល មានករណីដេកជាមួយស្រី ហើយបែករឿងដល់ប៉ូលីស ត្រូវបានឃាត់យកទៅកាន់សាលាអនុគណដើម្បីសួរនាំ។
នៅចំពោះមុខអនុគុណស្រុកអង្គស្នួល ព្រះអង្គសូ រឹទ្ឋី ប្រាប់មន្ត្រីសង្ឃអស់ហើយចំពោះទង្វើប្រសចាកវិន័យរបស់ខ្លួន ហើយអីឡូវនេះ ព្រះគ្រូអនុគណស្រុកសំរោងទង ក៏បានទៅដោះស្រាយនៅវត្តអនុគណស្រុកអង្គស្នួលភ្លាមៗផងដែរ។ រឿងនេះ លោកធ្វើច្រើនដងមកហើយ ទើបតែលើកនេះត្រូវបែកការណ៍ត្រូវចាប់ផ្សឹកតែម្តង។

មានការបង្ហើបថា លោក សូរ រិទ្ឋី បានប្រើប្រាស់លុយជាច្រើនដល់សមត្ថកិច្ចស្រុកអង្គស្នួល ដើម្បីអោយជួយបិតបាំងរឿងអាស្រូវរបស់ខ្លួន ងាយស្រួលក្នុងការលើកស្បង់ចីពរគ្រងជាសង្ឃជាថ្មី៕

ឯកសារព័ត៌មានជាង ២ពាន់គីឡូក្រាម ត្រូវបញ្ជូនទៅរក្សាទុកនៅបារាំង

ភ្នំពេញៈ នៅក្នុងបន្ទប់ដ៏ក្ដៅមួយនៅឯបណ្ណាល័យក្នុងវត្តឧណ្ណាលោមក្នុងរាជធានីភ្នំពេញក្រុមអ្នកស្រាវជ្រាវដែលមានលោក ឡេង កុកអាន និងលោក សួន កុសល ទើបតែបញ្ចប់ការរៀបចំកាសែតចំនួន ២៥០០ គីឡូក្រាមដាក់ក្នុងកេសក្រដាសកាតុង។

លោក កុកអាន លោក កុសល និងអ្នកស្រាវជ្រាវម្នាក់ទៀតឈ្មោះ ឃុន សុភាព នឹងធ្វើដំណើរទៅជាមួយកេសកាសែតនេះនៅថ្ងៃចន្ទក្នុងដំណើររយៈពេល ២០ ថ្ងៃទៅកាន់ទីក្រុងប៉ារីសហើយក្រោយមកត្រូវបញ្ជូនឯកសារទាំងនោះទៅសាលាបារាំង French School of the Far East ដែលប្រមូលផ្តុំកាសែតបោះពុម្ពនៅកម្ពុជានៅឯបណ្ណាល័យភាសាដើម និងអរិយធម៌ (BULAC) ។

នៅទីនោះឯកសារទាំងអស់នឹងស្ថិតនៅក្រោមការឃ្លាំមើលពីសាស្ត្រាចារ្យ Olivier de Bernon នៃសាលាបារាំងចុងបូព៌ា (EFEO) ដែលអាចជាការប្រមូលផ្តុំកាសែត និងទស្សនាវដ្តីធំជាងគេតែមួយគត់ដែលចាប់ផ្តើមប្រមែរប្រមូលចាប់តាំងពីឆ្នាំ ១៩៦៤ មកម្ល៉េះ។

លោក កុកអាន បានថ្លែងដោយអស់សំណើចថា៖ «ក្រសួងព័ត៌មានអាចមិនមានព័ត៌មានច្រើនដូចនេះទេ»។ ការប្រមូលផ្តុំឯកសារនេះត្រូវបានបង្កើតឡើងនៅឆ្នាំ ១៩៩០ ដោយលោក de Bernon មុនពេលដែលវាត្រូវបានអភិវឌ្ឍ និង ទទួលបានការឧបត្ថម្ភពីសាលាបារាំងចុងបូព៌ា (EFEO) ក្នុងឆ្នាំ ២០០៥ ដែលជាពេលលោក កុកអាន និងសហការីរបស់គាត់ធ្វើដំណើរទៅកាន់ទីក្រុងប៉ារីសជាលើកដំបូង។ នេះគឺជាការដឹកជញ្ជូនលើកទី ៣ ហើយដើម្បីបន្ថែមលើចំនួនដែលមានស្រាប់។

លោក កុកអាន ថ្លែងថា៖ «នៅពេលអនាគតប្រជាជនអាចរកមើលនូវអ្វីដែលបានកើតឡើងនៅក្នុងពេលនេះហើយវាគឺជាភ័ស្តុតាងមួយ»។ ខណៈដែលគ្មាននរណាម្នាក់ក្នុងចំណោមពួកគេបានអានកាសែត ឬទស្សនាវដ្តីជារៀងរាល់ថ្ងៃនោះគោលបំណងដ៏សំខាន់របស់ពួកគេគឺសិក្សា និងអភិរក្សសត្រាស្លឹករឹតពីបុរាណដែលបានតម្កល់ទុកនៅវត្តឧណ្ណាលោមដែលពួកគេយល់ថាពួកគេជាអ្នកថែរក្សាប្រវត្តិសាស្ត្រ។

លោក កុកអាន រៀបរាប់ថា៖ «យើងមិនត្រឹមតែយកចិត្តទុកដាក់ថែរក្សាប្រវត្តិសាស្ត្រប៉ុណ្ណោះទេ ប៉ុន្តែថែមទាំងថែរក្សាប្រពៃណី ឬនយោបាយថែមទៀតផង។ ឯកសារទាំងអស់នោះគឺសម្រាប់ក្មេងៗជំនាន់ក្រោយដើម្បីរៀនសូត្រ»។
មុនពេលការប្រមូលនេះលោក de Bernon បានចាប់ផ្ដើមប្រមូលឯកសារទៀងទាត់ពេលវេលាយ៉ាងសកម្មគឺពីឯកសារប្រវត្តិសាស្ត្រឯកជនរបស់អ្នកប្រាជ្ញជនជាតិអាមេរិក លោក Michael Vickery ដែលបានប្រមូលផ្តុំចងក្រងសៀវភៅតាំងពីឆ្នាំ ១៩៧៩ តាមរយៈបណ្តាញមិត្តភក្តិ។

មុនពេលរបបខ្មែរក្រហមលោក de Bernon បានសរសេរថាការប្រមូលនេះវាបានឆ្លុះបញ្ចាំងអំពីឥទ្ធិពលភាសាបារាំងនៅក្នុងប្រទេសកម្ពុជាដោយមានកាសែតប្រចាំថ្ងៃជាច្រើនត្រូវបានបោះពុម្ពជាភាសាបារាំង ហើយក្នុងចំណោមឧទាហរណ៍មួយចំនួនទៀតនៃការបោះពុម្ពផ្សាយទស្សនីយភាពនយោបាយគឺកាសែតជាភាសាខ្មែរ និងបារាំងដែលមានឈ្មោះថា Psin-Psin។

ភាគច្រើននៃវត្ថុទាំងនេះត្រូវបានប្រមូលដោយអតីតព្រះមហាក្សត្រនរោត្តមសីហនុ។ បន្ទាប់ពីរដ្ឋប្រហារលន់នល់អ្នកកាសែតជនជាតិបារាំងឈ្មោះ Grard-Henri Briss និងជាមិត្តភក្ដិរបស់ព្រះមហាក្សត្រសីហនុបានប្រមូលបន្ត ហើយឯកសារដែលបានចងក្រងទាំងអស់ត្រូវបានបញ្ជូនទៅឱ្យសាលាបារាំងចុងបូព៌ា (EFEO) រួមជាមួយនឹងវត្ថុផ្សេងទៀតរបស់ព្រះមហាក្សត្រក្នុងឆ្នាំ ២០០៤ សម្រាប់រក្សាឲ្យមានសុវត្ថិភាព។

នៅក្នុងឯកសារនោះលោក de Bernon និយាយថាគេអាចសង្កេតមើលឃើញ «ការផ្លាស់ប្តូរយ៉ាងស៊ីជម្រៅ» នៃការសរសេរភាសាខ្មែរ។ លោកបានសរសេរក្នុងអត្ថបទមួយក្នុងឆ្នាំ ២០១៧ ថា៖ «ពួកគេភាគច្រើនកើតចេញពីការបង្កើតថ្មីដែលប្រែទៅជាវាក្យសព្ទក្នុងអំឡុងសម័យបដិវត្តន៍ [ខ្មែរក្រហម] ជាពិសេសការប្រើប្រាស់ការនិយាយស្តីដើម្បីទទួលស្គាល់ពីឋានៈអាយុ និងមុខងារសង្គម។
យោងតាមលោក de Bernon បានឲ្យដឹងថាការប្រមូលផ្តុំឯកសារនេះក៏ជារូបភាពមួយនៃអក្សរសិល្ប៍ផងដែរ។ ក្នុងករណីដែលគ្មានការបោះពុម្ពផ្សាយរឿងប្រលោមលោក ឬកំណាព្យកាសែតដូចជា រស្មីកម្ពុជា កោះសន្តិភាព ឬក៏ការបោះពុម្ពផ្សាយរបស់នគរបាលជាតិពីក្នុងឆ្នាំ ១៩៨០ រហូតដល់ដើមឆ្នាំ ២០០០ អាចបោះពុម្ពផ្សាយជាអក្សរសិល្ប៍នៅលើទំព័ររបស់ពួកគេបានរួមទាំងការបកប្រែរឿងប្រលោមលោកបរទេសផងដែរហើយជួនកាលជាសំណេរពីរឿងរ៉ាវផ្អែមល្ហែមបែបមនោសញ្ចេតនាលន្លង់លន្លោច។

ប៉ុន្តែវាជាកំណត់ត្រានយោបាយ និងសង្គមរបស់ប្រទេសកម្ពុជា និងជាទស្សនវិស័យដែលប្រជាពលរដ្ឋកម្ពុជាមានក្នុងរយៈពេលពាក់កណ្ដាលសតវត្សរ៍នៃប្រវត្តិសាស្ត្ររបស់ពួកគេដែលត្រូវបានរក្សាទុកក្នុងទំព័រនៅក្នុងបណ្ណាល័យ។
លោក កុកអាន ថ្លែងថាសព្វថ្ងៃនេះមានតែកាសែតប្រចាំថ្ងៃ ៩ ប៉ុណ្ណោះដែលត្រូវបានប្រមូលបើប្រៀបធៀបទៅនឹងការបោះពុម្ពផ្សាយដាច់ដោយឡែកចំនួន ២០៧ នៅក្នុងទសវត្សរ៍ឆ្នាំ ១៩៩០ ដែលឆ្លុះបញ្ចាំងអំពីទំព័រថ្មីនៅក្នុងប្រវត្តិសាស្ត្រប្រព័ន្ធផ្សព្វផ្សាយរបស់ប្រទេសកម្ពុជា។ ទស្សនាវដ្តីត្រូវបានកាត់ចេញពីការប្រមូលនេះដោយសាតែវាមានតែការនិយាយដើមពីតារា។លោក កុសល ថ្លែងអំពីបរិមាណបោះពុម្ពផ្សាយនេះថា៖ «វាជាបញ្ហាមួយនៅក្នុងសង្គមរបស់យើង។ ប្រសិនបើពួកគេអាចរកប្រាក់ចំណេញបានពីការបោះពុម្ពផ្សាយនោះពួកគេនឹងបន្តធ្វើ ប៉ុន្តែប្រសិនបើមិនបានប្រាក់ចំណេញទេនោះគេនឹងបិទ…ប៉ុន្តែទោះជាយ៉ាងណាក៏ដោយនៅក្នុងករណីរបស់កាសែត Cambodia Daily វាមិនមែនក្ស័យធនទេ ប៉ុន្តែវាត្រូវបានបិទទ្វារដោយសារតែបញ្ហាផ្សេង»។

នៅពេលសាកសួរអំពីការបាត់បង់ប្រព័ន្ធផ្សព្វផ្សាយឯករាជ្យថាតើវានឹងធ្វើឲ្យប៉ះពាល់ដល់តម្លៃនៃឯកសារនោះបែបណា លោក កុកអាន បានលើកឡើងថា ក្រុមការងារគ្រាន់តែប្រមូលឯកសារ ឯរឿងរ៉ាវនយោបាយទុកសម្រាប់អ្នកដទៃប៉ុណ្ណោះ។

លោក កុកអាន ថ្លែងថា៖ «ប្រសិនបើនរណាម្នាក់ចង់វិភាគរឿងនេះវាជាទំនួលខុសត្រូវរបស់ពួកគេ»។ លោករំឭកថាវាជា «ភ័ស្តុតាង» មួយ៕

ប្រភព ៖ postkhmer

ឯកសារព័ត៌មានដែលរៀបចំបញ្ជូនទៅបារាំង។ រូបថត Alessandro

អាជ្ញាធរព្រមានចាត់ការតាមច្បាប់ចំពោះអ្នកដើររៃអង្គាសតាមទីសាធារណៈ

ភ្នំពេញ ៖ ថ្លែងក្នុងពិធីប្រកាសតែងតាំងមន្ត្រីសង្ឃសង្កាត់ទាំង៥ ក្នុងខណ្ឌសែនសុខ នារសៀល ថ្ងៃទី១ ខែឧសភា ប្រធានមន្ទីរធម្មការ និងសាសនារាជធានីភ្នំពេញ លោក ផន ដាវី បានស្នើ អោយមានចំណាត់ការតាមផ្លូវច្បាប់ និងមានប្រសិទ្ធភាព ចំពោះក្រុមជនទាំងឡាយណាដែលដើររៃអង្គាសប្រាក់ដោយគ្មានការអនុញ្ញាត ដើម្បីជាការការពារដល់តម្លៃនៃព្រះពុទ្ធសាសនានៅកម្ពុជា។

លោកថា ៖ មន្ត្រីសង្ឃសង្កាត់ទាំង៥ ក្នុងខណ្ឌសែនសុខ ដែលបានប្រកាសតែងតាំងជា ផ្លូវការនាពេលនេះមានសារៈសំខាន់ណាស់ក្នុងការជួយកិច្ចការព្រះពុទ្ធសាសនានៅក្នុងសង្កាត់ របស់ខ្លួន ក្នុងនោះត្រូវជួយទប់ស្កាត់រាល់សកម្មភាពដែលនាំអោយប៉ះពាល់ដល់តម្លៃព្រះពុទ្ធ សាសនាមាន ការដើររៃអង្គាសនៅតាមទីសាធារណៈជាដើម ដោយលោកបានចាត់ទុកក្រុម ជនដើររៃអង្គាសគ្មានការអនុញ្ញាតថា ជាអ្នកប្រព្រឹត្តខុសច្បាប់ និងនាំអោយស្រអាប់ដល់តម្លៃ នៃព្រះពុទ្ធសាសនាក្នុងប្រទេសកម្ពុជា។ ក្រុមជនទាំងនេះត្រូវតែមានវិធានការណ៍ខាងផ្លូវច្បាប់ ជាចាំបាច់ ក្នុងនោះមន្ត្រីសង្ឃសង្កាត់ត្រូវសហការជាមួយអាជ្ញាមូលដ្ឋាន នាំខ្លួនពួកគេមក សាកសួរ អប់រំ ណែនាំ និងធ្វើកិច្ចសន្យាអោយបញ្ឈប់ការដើររៃអង្គាសតទៅទៀត ហើយបើ មិនធ្វើតាមកិច្ចសន្យាទេនោះ នៅពេលដែលចាប់បានម្តងទៀត គឺត្រូវតែទទួលទោសទណ្ឌ ជាធរមាននិងមិនអាចអត់ឱនអោយម្តងទៀតបានឡើយ។

ជាការឆ្លើយតប សម្តេចព្រះសាក្យមុនី រ័ត្ន សារឿន សមាជិកថេរសភានៃព្រះពុទ្ធ សាសនានៅកម្ពុជា និងជាព្រះអនុគណខណ្ឌសែនសុខបានគាំទ្រចំពោះការលើកឡើងរបស់ ប្រធានមន្ទីរធម្មការ និងសាសនារាជធានីភ្នំពេញបែបនេះ និងបានបញ្ជាក់ថា មន្ត្រីសង្ឃសង្កាត់ ទាំង៥ ក្នុងខណ្ឌសែនសុខ ដែលបានតែងតាំងនៅថ្ងៃនេះរួមមាន សង្កាត់ភ្នំពេញថ្មី សង្កាត់គោកឃ្លាង សង្កាត់ទឹកថ្លា សង្កាត់ឃ្មួញ និងសង្កាត់ក្រាំងធ្នង់ ត្រូវបំពេញករណីយកិច្ចរបស់ខ្លួន អោយទទួលបានជោគជ័យ ក្នុងនោះក៏មានការទប់ស្កាត់ការដើររៃអង្គាសដោគ្មានការអនុញ្ញាត ផដែរ៕

(បុរស ស្ត្រី វ័យចាស់ ដែលត្រូវសមត្ថកិច្ចឃាត់ខ្លួនអប់រំ ពេលដើររៃអង្គាសតាមទីសាធារណៈ នាពេលកន្លងមក)

ឆ្នាំ២០១៧ កម្ពុជាប្រមូលផលស្រូវប្រាំងនិងវស្សាសរុប ជាង១០លានតោន

May 1, 2018Uncategorized, ព័ត៌មានគួរចាប់អារម្មណ៍, ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ បើគិតក្នុងឆ្នាំ២០១៧ ដល់ដើមឆ្នាំ២០១៨នេះ ប្រទេសកម្ពុជា ប្រមូលទិន្នផលស្រូវទាំងរដូវវស្សា និងរដូវប្រាំងបានជាង១០លានតោន ដែលចំនួននេះ បានធ្វើអោយកម្ពុជាមានអតិរេកស្រូវប្រមាណ៥លាន៦សែនតោន ស្មើនឹងអង្ករ៣លាន៥សែន៦ម៉ឺនតោន។

នៅក្នុងឆ្នាំ២០១៧ កន្លងទៅនេះ ពិតមែនតែអាកាសធាតុ មានការប្រែប្រួលខ្លះក៏ដោយ ប៉ុន្តែជារួមស្ថានភាពអាកាសធាតុ បានអំណោយផលច្រើន ដល់ការរីកលូតលាស់ផលដំណាំ ផលត្រី និងធនធានជីវចម្រុះផ្សេងទៀត ។ ក្នុងនោះ កម្ពុជាសម្រេចបានផ្ទៃដីដាំដុះដំណាំស្រូវ ជាង៣លាន២សែនហិកតា ដែលកើនប្រមាណ ២.៨% ធៀបនឹងឆ្នាំ២០១៦។ នេះបើតាមការបញ្ជាក់របស់ លោក វេង សាខុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៣០ ខែមេសា ឆ្នាំ២០១៨ នៅក្នុងពិធីបើកសន្និបាតបូកសរុបការងារកសិកម្ម រុក្ខាប្រមាញ់ និងនេសាទ និងលើកទិសដៅឆ្នាំ២០១៨-២០១៩។

លោក វេង សាខុន បានបង្ហាញថា លើផ្ទៃដីប្រមូលផលប្រមាណ៣លាន២សែនហិកតានេះ ក្នុងនោះស្រូវវស្សាមាន ២លាន៦៤ម៉ឺនហិកតា និងស្រូវរដូវប្រាំងមាន៥៥ម៉ឺនហិកតា។ ចំពោះទិន្នផលស្រូវ គិតជាមធ្យមទាំងប្រាំង និងវស្សា បានកើនដល់ ៣ពាន់២៩៥តោនក្នុងមួយហិកតា។

បើគិតលើតែទិន្នផលស្រូវវស្សាទទួលបានប្រមាណ ៣ពាន់៥២តោនក្នុងមួយហិកតា ចំណែកទិន្នផលស្រូវរដូវប្រាំងទទួលបាន ជាង៤តោនកន្លះក្នុងមួយហិកតា។ ដូចនេះ ក្នុងឆ្នាំ២០១៧ បរិមាណផលស្រូវវស្សា ទទួលបាន ចំនួនជាង៨លាន៦សែនតោន និងបរិមាណផលស្រូវរដូវប្រាំង ទទួលបាន២លាន៤៥ម៉ឺនតោន។ ដូចនេះ បរិមាណផលស្រូវសរុបទាំងប្រាំង និងវស្សា ដែលកម្ពុជាប្រមូលបាន ក្នុងឆ្នាំ២០១៧ កើនឡើង ដល់ជាង១០លាន៥សែនតោន ពោលគឺកើនប្រហែល៥.៦% ធៀបនឹងឆ្នាំ២០១៦។ ទិន្នផលនេះធ្វើឲ្យកម្ពជាមានអតិរេកស្រូវ រឺនៅសល់ស្រូវលើសតម្រូវការ ជាង ៥លាន៦សែន តោន គិតជាអង្ករស្មើនឹង៣លាន៥៦ម៉ឺនតោន គឺកើនប្រមាណ៨.៦%ធៀបនឹងឆ្នាំ២០១៦។

សូមបញ្ជាក់ថា បរិមាណអង្ករសរុបដែលកម្ពុជាបាននាំចេញក្នុងឆ្នាំ២០១៧ ក្នុងក្របខណ្ឌនៃច្រកចេញចូលតែមួយ មានចំនួន ៦៣ម៉ឺន៥ពាន់៦៩៧តោន កើនឡើង១៧.៣% ធៀបនឹងឆ្នាំ២០១៦ ក្នុងនោះ ប្រភេទអង្ករក្រអូបមានចំនួន៦១.៧%! អង្ករស គ្រប់ប្រភេទមានចំនួន ២៤.៦% និងអង្ករចំហុយ មានចំនួន ១៣.៤% ។ ក្រុមហ៊ុននាំអង្ករកម្ពុជាចេញ មានចំនួន៨៤ក្រុមហ៊ុន ដោយនាំចេញទៅកាន់ទិសដៅ៦៣ប្រទេស នៅលើសាកលលោក ៕

លោក ញឹក ប៊ុនឆៃ ត្រូវបានដោះលែងដោយសារបញ្ហាសុខភាព

May 1, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ អតីតប្រធានគណបក្សខ្មែររួបរួមជាតិ ត្រូវលោក លី លឹមម៉េង ចៅក្រមស៊ើបសួរសាលាដំបូងរាជធានីភ្នំពេញ ចេញដីកាបង្គាប់អោយដោះលែងបណ្តោះអាសន្ន កាលពីព្រលប់ ក្នុងថ្ងៃទី៣០ ខែមេសា ម្សិលមិញនេះ។

នៅព្រឹកថ្ងៃទី១ ខែឧសភាឆ្នាំ២០១៨ លោក ញឹក ប៊ុនឆៃ អតីតប្រធានគណបក្សខ្មែររួបរួមជាតិ ត្រូវបានតុលាការចេញដីកាបង្គាប់ឲ្យដោះលែងនៅក្រៅឃុំជាណ្តោះអាសន្ន បន្ទាប់ពីសាលាដំបូងរាជធានីភ្នំពេញ បានចោទប្រកាន់ពីបទ សមគំនិតក្នុងការផលិតគ្រឿងញៀន និងនាំចូលនូវសារធាតុសម្រាប់ផ្សំគ្រឿងញៀនប្រព្រឹត្តិនៅ ភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កាលពីថ្ងៃទី១ ខែមេសា ឆ្នាំ ២០០៧។

តាមមាត្រាទី២៩នៃក្រមព្រហ្មទណ្ឌ និងមាត្រា ៣៨ .១ថ្មី ចំណុចទី៤ មាត្រា ៣២ . ១ថ្មីចំណុចទី៤.ងនៃច្បាប់ស្តីពីវិសោធនកម្មច្បាប់ស្តីពីការត្រួតពិនិត្យគ្រឿងញៀនឆ្នាំ២០០៥ អោយនៅក្រៅឃុំជាបណ្តោះអាសន្ន ប្រសិនបើឈ្មោះនេះមិនត្រូវបានឃុំខ្លួនពីបទល្មើសផ្សេងទៀត។

លោក ញឹក ប៊ុនឆៃ អតីតប្រធានគណបក្សខ្មែររួបរួមជាតិ ត្រូវបានឃុំខ្លួនអស់រយៈ៩ខែ មកហើយ ពាក់ព័ន្ធនឹងបទល្មើសគ្រឿងញៀនកាលពី១០ឆ្នាំមុន។
ក្នុងដីកាបង្គាប់ឲ្យដោះលែងចុះថ្ងៃទី៣០ ខែមេសា ឆ្នាំ២០១៨ ចៅក្រមស៊ើបសួរ នៃសាលាដំបូងរាជធានីភ្នំពេញលោក លី លឹមម៉េង បានប្រាប់មកប្រធានមណ្ឌលអប់រំកែប្រែរាជធានីភ្នំពេញ ឲ្យដោះលែងលោក ញិកប៊ុនឆៃ(ញឹក ប៊ុនឆៃ) ដែលមានទីលំនៅបច្ចុប្បន្នខណ្ឌជ្រោចង្វារាជធានីភ្នំពេញ។

បើតាមកាបង្គាប់ដដែល តុលាការមិនបានបញ្ជាក់លម្អិតណាមួយ ពីមូលហេតុនៃការដោះលែង លោក ញឹក ប៊ុនឆៃ នោះទេ ប៉ុន្តែ តុលាការដាក់ លោក ប៊ុនឆៃ ឲ្យស្ថិតនៅក្រោមការត្រួតពិនិត្យពីបទ «សមគំនិតផលិតគ្រឿងញៀន និងនាំចូលសារធាតុសម្រាប់ផ្សំគ្រឿងញៀន» ដែលតុលាការថា បានប្រព្រឹត្តិឡើងនៅស្រុកភ្នំស្រួច ខេត្តកំពង់ស្ពឺ កាលពីឆ្នាំ២០០៧។

ប្រភពព័ត៌មានមួយផ្សេងទៀត បានឲ្យដឹងថា ការសម្រេចដោះលែងឲ្យនៅក្រោឃុំបណ្តោះអាសន្ននេះ ដោយសារលោក ញឹក ប៊ុនឆៃ មានបញ្ហាសុខភាពធ្ងន់ធ្ងរដែលត្រូវព្យាបាល។

សូមបញ្ជាក់ថា លោក ញឹក ប៊ុនឆៃ ត្រូវបានចាប់ខ្លួនកាលពីថ្ងៃទី៣ ខែសីហា ឆ្នាំ២០១៧ ជាប់ពាក់ព័ន្ធនឹងបទល្មើសគ្រឿងញៀនកាលពី១០ឆ្នាំមុន ។ លោក ញឹក ប៊ុនឆៃ ក៏ធ្លាប់បានសារភាពពីកំហុស ដោយថ្លែងថា លោកបានប្រព្រឹត្តមិនគប្បីចំពោះសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ៕

កម្ពុជាឈានចេញពីប្រទេសពឹងលើកសិកម្ម ទៅពឹងលើឧស្សាហកម្ម និងសេវាកម្ម

May 1, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ម

ភ្នំពេញ ៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើក ឡើងថា កម្ពុជាកំពុងផ្លាស់ប្តូរ ពីប្រទេសពឹងលើកសិកម្ម ទៅជាប្រទេស ពឹងលើ ឧស្សាហកម្ម និងសេវាកម្ម ក្នុងនោះវិស័យឯកជន ដើរតួនាទីសំខាន់ សម្រាប់ការ អភិវឌ្ឍន៍សេដ្ឋកិច្ច។

ថ្លែងនៅក្នុងនៅសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅឆ្នាំ ២០១៨ របស់សភាពាណិជ្ជកម្មកម្ពុជា នារសៀលថ្ងៃ ទី៣០ ខែមេសានេះ នៅសណ្ឋាគារកាំបូឌីយ៉ាណា លោក ប៉ាន សូស័ក្តិ រដ្ឋមន្ត្រីក្រសួងពាណិជ្ជកម្មបានមានប្រសាសន៍ថា នាពេលបច្ចុប្បន្ន កម្ពុជាកំពុងផ្លាស់ប្តូររចនាសម្ព័ន្ធ សេដ្ឋកិច្ច ពីប្រទេសដែលពឹងផ្អែកលើវិស័យកសិកម្ម ទៅជាប្រទេសដែលពឹងផ្អែកលើវិស័យឧស្សាហកម្ម និងសេវាកម្ម និងបានក្លាយជាគោលដៅដ៏ទាក់ទាញ សម្រាប់ភ្ញៀវទេសចរគ្រប់ជាតិសាសន៍ និងវិនិយោគិនអន្តរជាតិធំៗ នៅលើពិភពលោក ។

លោកបន្តថា លំហូរវិនិយោគផ្ទាល់ពីបរទេស ឬហៅថា FDI មកកម្ពុជា ក្នុងរយៈពេល៥ឆ្នាំចុងក្រោយនេះ មានលក្ខណៈថេរ ពោលគឺមានតម្លៃចន្លោះពី ១ពាន់៧រយលានដុល្លារអាមេរិកទៅ២ពាន់លានដុល្លារអាមេរិក ។ កំណើននៃលំហូរវិនិយោគទាំងអស់នេះ បានបង្កើននូវឱកាសការងារយ៉ាងច្រើន ជាមួយប្រាក់ចំណូលកាន់តែខ្ពស់ សម្រាប់ប្រជាពលរដ្ឋកម្ពុជា។
លោកបន្ថែមថា ប្រទេសកម្ពុជាមានផែនការ និងកម្មវិធីកាត់បន្ថយការចំណាយថ្លៃដើម ដែលមិនចាំបាច់ជាច្រើន លើការវិនិយោគនៅពេលអនាគត ។បច្ចុប្បន្ននេះ រាជរដ្ឋាភិបាល បាននិងកំពុងកសាងហេដ្ឋាសម្ព័ន្ធថ្មីៗ ដើម្បីសម្រួលដល់ការធ្វើពាណិជ្ជកម្ម កាត់បន្ថយថ្លៃដឹកជញ្ជូន និងធ្វើអោយប្រសើរឡើងនូវសមត្ថភាពប្រកួតប្រជែងរបស់កម្ពុជា ។ សេវាចំណាយខ្ពសលើផែទន្លេ និងសមុទ្រទឹកជ្រៅ ព្រមទាំងបណ្ដាញគមនាគមន៍ខ្វែងខ្វាត់ទូទាំងប្រទេស ដែលផ្ដល់លទ្ធភាពជាច្រើនដល់ពាណិជ្ជករក្នុងស្រុក និងវិនិយោគិនអន្តរជាតិ ។

អ្នកឧកញ៉ា គិតម៉េង ប្រធានសភាពាណិជ្ជកម្មកម្ពុជា បានលើកឡើងផងដែរថា សភាពាណិជ្ជកម្មកម្ពុជា កំពុងបន្តពង្រឹងទំនាក់ទំនងល្អជាមួយសមាគមធុរកិច្ចជាតិ និងអន្តរជាតិ និងស្ថានទូតបរទេសនៅកម្ពុជា និងបានរៀបចំជំនួបពាណិជ្ជកម្មជាច្រើនលើក ជាមួយវិនិយោគិនបរទេស ដូចជាជប៉ុន ចិនកូរ៉េ រុស្ស៊ី ថៃ ម៉ាឡេស៊ី សឹង្ហបុរី ជាដើម ។

អ្នកឧកញ៉ា គិត ម៉េង បញ្ជាក់ថា ក្នុងរយៈពេលជាច្រើនឆ្នាំកន្លងមកនេះ សភាពាណិជ្ជកម្មកម្ពុជា កំពុងបន្តភារកិច្ចស្នូលរបស់ខ្លួនតំណាងអោយផលប្រយោជន៍វិស័យឯកជន និងចូលរួមអនុវត្តគោលនយោបាយសេដ្ឋកិច្ចនិងពាណិជ្ជកម្ម។ ជាក់ស្ដែងក្នុងឆ្នាំ ២០១៧កន្លងទៅ សភាពាណិជ្ជកម្មបានដោះស្រាយបញ្ហាចំនួន ១៩៤ ជូនវិស័យឯកជនក្នុងស្រុក ខណៈវិស័យនេះ បានតួនាទីសំខាន់សម្រាប់ចរន្តសេដ្ឋកិច្ចជាតិ ៕

រោងចក្រចំនួន៣ថ្មីទៀតនឹងបង្កើតនៅភ្នំពេញ ប្រើទុនជាង១០លានដុល្លារ

May 1, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គម, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ ក្នុងសប្តាហ៍នេះ ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានចុះបញ្ជីអនុញ្ញាតឲ្យរោងចក្រកាត់ដេរសម្លៀកបំពាក់ចំនួន២ និងផលិតស្បែកជើងថ្មី ចំនួន១ បើកដំណើរការនៅកម្ពុជា ក្រោមទុនវិនិយោគជាង១០លានដុល្លារអាមេរិក ដែលរំពឹងថានឹងផ្តល់ការងារថ្មីជាង ៣ពាន់កន្លែង។

បើតាមព័ត៌មានលើទំព័រ Facebook ផ្លូវការរបស់ ក្រុមប្រឹក្សាអភិវឌ្ឍន៍កម្ពុជា ហៅថា CDC នៅថ្ងៃទី៣០ ខែមេសានេះថា បានបង្ហាញថា គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ «វិញ្ញាបនប័ត្រចុះបញ្ជីជាស្ថាពរ» ដល់ក្រុមហ៊ុនវិនិយោគបរទេសថ្មីចំនួន៣ ដែលជារោងចក្រដំណើរការលើការផលិតសំលៀកបំពាក់ និង ផលិតស្បែកជើង ក្នុងនោះមាន ៖

១៖ ក្រុមហ៊ុន JIN YUNJIN (CAMBODIA) GARMENT CO.,LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ៤ ភូមិផ្សារកំបូល សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគជាង ២លាន៣សែន ដុល្លារអាមេរិក និងអាចបង្កើតការងារបានចំនួនប្រមាណ ៨៦០កន្លែង។

២៖ ក្រុមហ៊ុន HOTA FOOTWEAR CO., LTD.: គម្រោងបង្កើតរោងចក្រផលិតស្បែកជើង ដែលមានទីតាំងវិនិយោគស្ថិតនៅភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគជាង ៥លាន៤សែនដុល្លារអាមេរិក និងអាចបង្កើតការងារបានជាង ១ពាន៦រយកន្លែង។

៣៖ ក្រុមហ៊ុន CAMBO H.D.Y.L GARMENT CO.,LTD. :គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ មានទុនវិនិយោគជាង២លាន៣សែនដុល្លារអាមេរិក និងអាចបង្កើតការងារបានចំនួនប្រមាណ ៨៦០កន្លែង។

ជារួម ការចេញវិញ្ញបនប័ត្រចុះបញ្ជី អនុញ្ញាតរបស់ ក្រុមប្រឹក្សាអភិវឌ្ឍន៍កម្ពុជាដល់រោងចក្រចំនួន៣ថ្មីនេះ មានទុនវិនិយោគសរុបជាង១០លានដុល្លារអាមេរិក និងអាចផ្តល់ការងារថ្មីៗជូនប្រជាពលរដ្ឋបានជាង៣ពាន់កន្លែង។

គួរបញ្ជាក់ថា តាមរបាយការណ៍ របស់ក្រុមប្រឹក្សាភិវឌ្ឍន៍កម្ពុជា ក្នុងឆ្នាំ ២០១៧ រាជរដ្ឋាភិបាលកម្ពុជាបានផ្តល់សិទិ្ធដល់គម្រោងស្នើសុំវិនិយោគរបស់ក្រុមហ៊ុនក្នុងស្រុក និងក្រុមហ៊ុនបរទេស សរុបមានតម្លៃជាទឹកប្រាក់ ៦ពាន់៣០០ លានដុល្លារអាមេរិក។ ចំណែកយោងតាមទិន្នន័យរបស់ក្រសួងមហាផ្ទៃ គិតត្រឹមចុងឆ្នាំ២០១៧ មានក្រុមហ៊ុនបរទេសសរុបចំនួន២១៥២ក្រុមហ៊ុន កំពុងវិនិយោគនៅក្នុងប្រទេសកម្ពុជា៕0 00

ដឹងទេ ! បុណ្យ«វិសាខបូជា» ជាអ្វី និង មានប្រវត្តិដូចម្តេច ?

April 30, 2018ព័ត៌មានគួរចាប់អារម្មណ៍, ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ ថ្ងៃ១៥កើត ខែពិសាខ ជាថ្ងៃដែលព្រះសម្មាសម្ពុទ្ធទ្រង់បានប្រសូត្រឡើងនៅលើភពផែនដី ហើយក៏ជាថ្ងៃដែលព្រះអង្គត្រាស់ដឹង និងជាថ្ងៃដែលទ្រង់ចូលបរិនិព្វានផងដែរ។ ចាប់ពីពេលនោះមក សាវ័ករបស់ព្រះសម្មាសម្ពុទ្ធ បានកំណត់យកថ្ងៃពេញបូណ៌មីនាខែវពិសាខនេះ ដើម្បីប្រារព្ធធ្វើពិធីបុណ្យដ៏ធំរំលឹកខួបប្រចាំឆ្នាំនៅទូទាំងពិភពលោក អស់កាលជាង២៥៦២ព្រះវស្សា មកហើយ និងបានកំណត់និយមន័យរួមជា«បុណ្យវិសាខបូជា»។

បុណ្យនេះដែរ ក៏ត្រូវបានអង្គការសហប្រជាជាតិទទួលស្គាល់កាលពីថ្ងៃទី១៥ ខែធ្នូ ឆ្នាំ១៩៩៨ ជាពិធីបុណ្យសាសនាអន្តរជាតិ និងបានប្រសិទ្ធិនាមព្រះពុទ្ធសាសនា ថាជាសាសនាសន្តិភាព (ស្ងប់សុខ ប្រាសចាកហិង្សាគ្រប់រូបភាព) និងជាទិវាសន្តិភាព សកល (វីសាខ ដេ Visak day) ដែលបានប្រារពធ្វើនៅទីស្នាក់ការកណ្តាលអង្គការសហប្រជាជាតិនៅសហរដ្ឋអាមេរិកជារៀងរាល់ឆ្នាំផងដែរ។

ដើម្បីស្វែងយល់ខ្លឹមសារ នៃបុណ្យវិសាខបូជា នេះឱ្យកាន់តែច្បាស់ ទស្សនាចរណ៍ក្រុមផ្កាឈូក សហការជាមួយ សមាគមពាណិជ្ជកម្ម និងវិនិយោគកម្ពុជា-ជប៉ុន (CJBI) បានរៀបចំកម្មវិធីវិសាខបូជា នៅរសៀលថ្ងៃទី២៨ ខែមេសា ឆ្នាំ២០១៨នេះ នៅមជ្ឈមណ្ឌលសហប្រតិបត្តិការកម្ពុជា-ជប៉ុន ដោយមានការនិមន្ត យាង និងអញ្ជើញចូលរួមពីចូលរួមប្រមាណជាង៥០០អង្គ/នាក់ ដើម្បីលើកស្ទួយព្រះពុទ្ធសានា ដែលជាសាសនារបស់រដ្ឋ បង្កើនការយល់ដឹងអំពីខ្លឹមសារ នៃទិវាវិសាខបូជា ដែលឧទ្ទិសដល់ព្រឹត្តិការណ៍ដ៏សំខាន់ទាំង៣របស់ព្រះសម្មាសម្ពុទ្ធ ។

លោក អៀង សុធារ៉ា ប្រធានមូនិធិអៀង បានមានប្រសាសន៍ឱ្យដឹងក្នុងថ្ងៃប្រារពពិធី ស្វែងយល់ពីបុណ្យវិសាខបូជា នេះថា “វិសាខបូជា គឺជាបុណ្យប្រពៃណី ព្រះពុទ្ធសាសនាមួយ ដែលពុទ្ធសាសនិកទូទាំងពិភពលោក តែងតែប្រារពធ្វើ ដើម្បីរំលឹកដល់នក្ខត្តសម័យសំខាន់ៗរបស់ព្រះសមា្មសម្ពុទ្ធ។ ពិធីនេះ នៅកម្ពុជា ត្រូវបានគេប្រារព្ធធ្វើនៅតាមទីវត្តអារាមតំបន់ស្រុក ខេត្ត ដើម្បីបំពេញតួនាទីជាពុទ្ធសាសនិកដ៏ល្អរបស់ព្រះពុទ្ធសាសនា ដែលមានតួនាទីជាអ្នកថែរក្សា ការពារ និងផ្សព្វផ្សាយនូវគុណតម្លៃ និងបញ្ជាក់ពីកត្តញ្ញូកតវេទី ចំពោះកិចុ្ចខិតខំប្រឹងប្រែងតស៊ូពុះពារ ដឹកនាំ ប្រៀនប្រដៅទាំងថ្ងៃ ទាំងយប់របស់ព្រះពុទ្ធជាម្ចាស់”។ ទន្ទឹមនឹងនេះដែរ រាជរដ្ឋាភិបាល បានកំណត់យករមណីយដ្ឋានភ្នំព្រះរាជទ្រព្យ នៅស្រុកឧដុង្គ ធ្វើជាទីកន្លែងប្រារព្ធពិធី បុណ្យវិសាខបូជា ជារៀងរាល់ឆ្នាំ។

លោក ហេង មណីចិន្តា នាយកអង្គការ ព្រះពុទ្ធសាសនា ដើម្បីអភិវឌ្ឍន៍បានមានប្រសាសន៍ ឱ្យដឹងថា « បុណ្យវិសាខបូជា» ជាបុណ្យធំណាស់ ក្នុងព្រះពុទ្ធសាសនា ហើយពុទ្ធសាសនិកបានធ្វើជាសតវត្សៗរៀងរាបមក ក្នុងថ្ងៃ១៥កើត ខែវិសាខ។ ក្រៅពីរំលឹកដល់ថ្ងៃកើត ថ្ងៃត្រាស់ និងថ្ងៃបរិនិព្វាន របស់ព្រះពុទ្ធ ក៏បានបញ្ជាក់ផងដែរដោយអមពីគោលបំណងរបស់មនុស្សម្នាក់ៗ នៅពេលដែលខ្លួនកើតមក ថាតើមានគោលបំណងអ្វី បន្ទាប់ពីបានសម្រេចបំណងហើយត្រូវធ្វើអ្វី ដើម្បីបន្សល់ឱ្យអ្នកជំនាន់ក្រោយពោលគឺមុនពេលយើងស្លាប់ទៅ”។

ចំណែក លោក ហឿន សំនាង ដែលបានចូលរួមក្នុងកម្មវិធីនោះ បានឱ្យដឹងថា កម្មវិធីនេះមានអត្ថប្រយោជន៍ណាស់ សម្រាប់រូបលោកផ្ទាល់ និងសម្រាប់អប់រំដល់យុវជនជំនាន់ក្រោយៗ ព្រោះជាបុណ្យប្រពៃណីពុទ្ធសាសនា និងសិក្សាអំពីដំណើរជីវិតរបស់ព្រះសម្មាសម្ពុទ្ធនៃយើងផង៕

ប្រវត្តិបុណ្យវិសាខបូជា

ពុទ្ធបរិស័ទក្នុងប្រទេសទាំងឡាយដែលរាប់អានព្រះពុទ្ធសាសនា នាំគ្នាធ្វើវិសាខបូជា នៅថ្ងៃ ពេញបូណ៌មីខែពិសាខ រៀងៗមកតាំងពីបុរាណកាល ។ តាមការស្រាវជ្រាវគេបានដឹងថា បុណ្យ វិសាខបូជាទំនងជាធ្វើនៅក្រោយពុទ្ធបរិនិព្វានច្រើនរយឆ្នាំ។ គេថាប្រទេសឥណ្ឌា និងប្រទេសលង្កា បានប្រារព្ធពិធីបុណ្យនេះយូរយារណាស់មកហើយ ។ ចំណែកប្រទេសសៀម និងប្រទេសខ្មែរទើប នឹងចាត់ចែងធ្វើនៅគ្រឹស្តសតវត្សទី ១៩។ នៅក្នុងប្រទេសកម្ពុជា បុណ្យវិសាខបូជា តាមដែលចាស់ ទុំអ្នកមុខអ្នកកាទាំងឡាយដំណាលតៗគ្នាបានឲដឹងថា គេបានផ្តើមធ្វើក្នុងរជ្ជកាលព្រះបាទសម្តេច ព្រះហរិរក្សមារា (ព្រះអង្គដួង) ដែលគង់នៅក្រុងឧត្តុង្គ ក្នុងពុទ្ធសករាជ ២៣៩៧ គ្រិស្តសករាជ ១៨៥៤ ដោយមហាប៉ាន ដែលស្តេចសៀម បានបញ្ជូនមកកាន់ឧត្តុង្គ តាមសំណើព្រះបាទ អង្គដួង។

បុណ្យវិសាខបូជាត្រូវបាន រាជរដ្ឋាភិបាល ចាត់ទុកជាថ្ងៃបុណ្យជាតិ របស់ប្រទេសកម្ពុជា ។ នៅឆ្នាំ ១៩៩៩ សមាជិកនៃអង្គការសហប្រជាជាតិ ជិត ២០០ ប្រទេសបានអនុម័តជាឯកច្ឆន្ទទទួល ស្គាល់ និងចាត់ទុកបុណ្យ វិសាខបូជារបស់ ព្រះពុទ្ធសាសនាជាបុណ្យអន្តរជាតិ។

វិសាខបូជានេះ បុរាណាចារ្យលោកសំដៅយកនក្ខត្តឫក្ស៣ យ៉ាងគឺកំណត់យកត្រង់ថ្ងៃដែល ព្រះសម្ពុទ្ធបរមគ្រូទ្រង់ប្រសូត១, ទ្រង់បានត្រាស់ដឹងនូវអនុត្តរសម្មាសម្ពោធិញាណ១, ទ្រង់ចូលកាន់ ព្រះនិព្វាន១ ។ អាស្រ័យហេតុនេះហើយ ទើបអ្នកប្រាជ្ញបុរាណលោកកំណត់យក ថ្ងៃពេញបូណ៌មី ខែពិសាខនេះ ទុកជាពិធីធ្វើសក្ការបូជាជាដរាបរៀងរាបមកទល់គ្នានឹងសម័យបច្ចុប្បន្ននេះ ៕