អាមេរិក ៖ អភិបាលរដ្ឋកាលីហ្វរញ៉ាលោក ចឺរី ប្រោន (Jerry Brown) បាននិយាយថា មនុស្ស១១នាក់ហើយបានបាត់បង់ជីវិត ក្នុងគ្រោះអគ្គិភ័យភ្លើងឆេះព្រៃដ៏សន្ធោសន្ធៅមួយដែលបាននិងកំពុងតែវាយប្រហារតំបន់ភាគខាងជើង នៃរដ្ឋកាលីហ្វរញ៉ា និងបំផ្លិចបំផ្លាញផ្ទះសម្បែងក៏ដូចជាអគារពាណិជ្ជកម្ម១,៥០០ពាន់ខ្នង ខណៈដែលមនុស្សប្រមាណ២០,០០០នាក់ត្រូវបង្ខំជម្លៀសខ្លួនចេញពីកន្លែងជ្រកកោណរបស់ពួកគេថែមទៀតផង។ នេះបើតាមសារព័ត៌មាន BBC។
លោកអភិបាលបន្តថា លោកបានសម្រេចប្រកាសអាសន្ននៅក្នុងតំបន់ Napa, Soma, និង Yuba ខណៈដែលអណ្តាតភ្លើងបានបន្តរីករាលដាលទៅកាន់ទិស ខាងត្បូងរកតំបន់ San Francisco Bay។ ទន្ទឹមនោះលោក Brown ក៏បានពង្រីកសេចក្តីប្រកាសអាសន្ននេះទៅដល់តំបន់ចំនួន០៤ទៀត នៅភាគខាងជើងរដ្ឋ រួមជាមួយនិងតំបន់ Orange នៅភាគខាងត្បូង។
គួរបញ្ជាក់ថា ភ្លើងឆេះ ព្រៃចំនួន១៥ដាច់ដោយឡែកពីគ្នា នៅលើផ្ទៃដីប្រមាណជិត០៣ម៉ឺនហិកតា ក្នុងភាគខាងជើងរដ្ឋកាលីហ្វរញ៉ា ចាប់តាំងតែពីយប់ថ្ងៃអាទិត្យកន្លងទៅ (ពេលវេលានៅភាគខាងលិចអាមេរិក)៕
រាជធានីភ្នំពេញ ៖ រឿងជួញដូរគ្រឿងញៀនជាង១៤គីឡូក្រាម នៅរសៀលថ្ងៃទី១០ ខែតុលា ឆ្នាំ២០១៧នេះ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោស ជនជាប់ចោទឈ្មោះ IHEONU GRABRIEL ភេទប្រុស អាយុ៤២ឆ្នាំ ជនជាតិនីហ្សេរីយ៉ា ដាក់ពន្ធនាគារអស់មួយជីវិត និងពិន័យជាប្រាក់ ៨០លានរៀលចូលជាថវិការដ្ឋ ពីបទរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀនចំនួន ១៤,៤៦៨.៥០ក្រាម ប្រព្រឹត្តកាលពីថ្ងៃទី១០ ខែមិថុនា ឆ្នាំ២០១៦ នៅចំណុចច្រកទ្វាព្រំដែន អន្តរជាតិកម្ពុជា-វៀតណាម ស្មាច់ (ត្រពាំងថ្លុង) ខេត្តត្បូងឃ្មុំ ៕
រាជធានីភ្នំពេញ ៖ បន្ទាប់ពីប្រតិភូសហភាពអឺរ៉ុបបានចេញនូវសេចក្តីថ្លែងការណ៍មួយ ដោយចាត់ទុកការរំលាយបក្សប្រឆាំងអាចនឹងធ្វើឲ្យបាត់បង់កិត្យានុភាពនៃដំណើរការបោះឆ្នោតនោះ អ្នកនាំពាក្យក្រសួងមហាផ្ទៃ លោកឧត្តមសេនីយ៍ ខៀវ សុភ័គ ត្រូវបានដកស្រង់សំដីដោយ VOD ដោយចាត់ទុកសេចក្តីថ្លែងការណ៍របស់ប្រតិភូសហភាពអឺរ៉ុបធ្វើឡើងតាមខ្លួននឹកឃើញតែប៉ុណ្ណោះ ។
លោក ខៀវ សុភ័គ បានបញ្ជាក់ថា កម្ពុជាជាប្រទេសគោរពរដ្ឋធម្មនុញ្ញ និងលទ្ធិប្រជាធិបតេយ្យ សេរីពហុបក្ស ហើយបើទោះជាគ្មានគណបក្សសង្គ្រោះជាតិ ចូលរួមបោះឆ្នោតនៅឆ្នាំ២០១៨ ក៏មានគណបក្សផ្សេងទៀតចូលរួម សម្រាប់ការបោះឆ្នោតដែរ ។
VOD បានដកស្រង់សំដីលោក ខៀវ សុភ័គ ផ្សាយថា ជាការពិតណាស់ កាលហ្នឹង (ការបោះឆ្នោតឃុំសង្កាត់ ឆ្នាំ២០១៧) ប្រជាពលរដ្ឋអត់បានដឹងថា បក្សសង្គ្រោះជាតិ ត្រូវបានដឹកនាំដោយបុគ្គលឈ្មោះ កឹម សុខា ដែលជាជនក្បត់ជាតិ។ ទើបតែនៅពេលនេះលោកដឹងហើយថា អ្វីដែលលោក កឹម សុខា បានធ្វើគឺជាការធ្វើឡើង ដោយតាមការណែនាំរបស់បរទេសដែលចង់នាំឲ្យប្រទេសកម្ពុជាឆ្ពោះទៅកាន់ប្រទេស ដូចជាស៊ីរី ឬលីប៊ី ជាដើម។ ដូច្នេះ ប្រជាពលរដ្ឋកម្ពុជា គាត់បានដកឃ្លា មកពិចារណាអំពីសន្លឹកឆ្នោតរបស់ខ្លួនហើយ នៅឆ្នាំ២០១៨ ។ លោកបញ្ជាក់បន្ថែមថា ជំហររបស់រដ្ឋាភិបាល មិនអាចថយក្រោយនោះទេ តែថា ការសម្រេចរំលាយ ឬមិនរំលាយយ៉ាងណានោះ គឺស្ថិតទៅលើការសម្រេចតុលាការកំពូល ៕
ភ្នំពេញ ៖ មន្ដ្រីជាន់ខ្ពស់ក្រសួងព័ត៌មាន បានជំរុញឱ្យស្ថាប័នផ្សព្វផ្សាយរបស់រដ្ឋទាំងអស់បង្កើនការផ្សព្វផ្សាយអំពីការទប់ស្កាត់ជំងឺអេដស៍ក្នុងឱកាសព្រះរាជពិធីបុណ្យអុំទូកខាងមុខនេះ ដើម្បីផ្តល់ជាសារជូនដល់ប្រជាពលរដ្ឋមានការយល់ដឹង និងមានការប្រុងប្រយ័ត្ននៃការឆ្លងមេរោគអេដស៍បន្ថែមទៀត។
ថ្លែងក្នុងកិច្ចប្រជុំក្រុមការងារប្រយុទ្ធប្រឆាំងជំងឺអេដស៍របស់ក្រសួង កាលពីព្រឹកថ្ងៃទី១០ តុលានេះនៅទីស្តីការក្រសួងលោក មាស សោភ័ណ្ឌ អនុរដ្ឋលេខាធិការក្រសួងព័ត៌មានមានប្រសាសន៍ថាគណៈកម្មការប្រយុទ្ធប្រឆាំងនឹងជំងឺអេដស៍របស់ក្រសួងព័ត៌មាននឹងរៀបចំ យុទ្ធនាការផ្សព្វផ្សាយសារមួយចំនួនពាក់ព័ន្ធទៅនឹងការប្រយុទ្ធប្រឆាំងជំងឺអេដស៍ ទៅដល់ប្រជាពលរដ្ឋទូទៅក្នុងឱកាសនៃព្រះរាជពិធីបុណ្យអុំទូក អកអំបុក និងសំពះព្រះខែខាងមុខនេះដែលជាពិធីបុណ្យដែលមានប្រជាលរដ្ឋមកលេងកម្សាន្តច្រើននៅភ្នំពេញ។
ឯកឧត្ដមអនុរដ្ឋលេខាធិការបញ្ជាក់ថា បញ្ហាអេដស៍បច្ចុប្បន្ននេះ នៅតែជាបញ្ហាប្រឈម បើទោះបីជាជំងឺអេដស៍នៅកម្ពុជាមានការថយចុះក៏ដោយ តែយើងត្រូវមានការប្រុងប្រយ័ត្ន ហើយត្រូវរួមគ្នាទប់ស្កាត់ជំងឺអេដស៍នេះដើម្បីលប់បំបាត់ជម្ងឺអេដស៍នេះឱ្យបានតាមគោលដៅនៅឆ្នាំ២០២០ខាងមុខ ហើយថា ដើម្បីសម្រេចគោលដៅនេះប្រព័ន្ធផ្សព្វផ្សាយរដ្ឋ និងឯកជន ត្រូវបន្តផ្សព្វផ្សាយអោយបានខ្លាំងក្លាតាមរយៈជាសារអប់រំ តាមកាសែត វិទ្យុ និងការរត់អក្សរតាមកញ្ចក់ទូរទស្សន៍ដែលពាក់ព័ន្ធនឹងជំងឺអេដស៍អោយបានកាន់ច្រើនបន្ថែមទៀត ដើម្បីជា ប្រយោជន៍ដល់សាធារណជនបានយល់ដឹងអំពីផលប៉ះពាល់ និងផលវិបាកដែលបង្ករឡើងដោយជំងឺអេដស៍។ ជាមួយគ្នានេះឯកឧត្ដមបានអំពាវនាវអោយប្រជាពលរដ្ឋដែលគ្រោងមកកំសាន្ដក្នុងព្រះរាជពិធីបុណ្យអុំទូក សូមការពារខ្លួន និងបង្កើនការប្រុងប្រយ័ត្នកុំអោយឆ្លងមេរោគអេដស៍ឱ្យសោះ ពោលគឺសូមកុំនាំអេដស៍ចូលផ្ទះ៕
រាជធានីភ្នំពេញ ៖ រយៈពេល៣៨ថ្ងៃ នៃដំណើរការបើកឲ្យចុះឈ្មោះបោះឆ្នោត គឺចាប់ពីថ្ងៃទី០១ ខែកញ្ញា ដល់ថ្ងៃទី០៨ ខែតុលា ឆ្នាំ២០១៧ មានប្រជាពលរដ្ឋខ្មែរចំនួន ៣៣៨,០១៨នាក់ហើយបានទៅចុះឈ្មោះបោះឆ្នោត ខណៈដែលអ្នកត្រូវលុបឈ្មោះចេញមានចំនួន ៣,៤០៧នាក់ និងអ្នកខុសកែតម្រូវមានចំនួន ៣,០៤៩នាក់។ នេះបើយោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប)។
គ.ជ.ប បានឲ្យដឹងថា តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង១.៦លាននាក់ ខណៈប្រជាពលរដ្ឋខ្មែរដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩.៨លាននាក់៕
ម៉ាឡេស៊ី ៖ មនុស្សចំនួន៨នាក់ត្រូវបានប៉ូលិសម៉ាឡេស៊ីចាប់ខ្លួនដោយសង្ស័យថា មានការពាក់ព័ន្ធនឹងសកម្មភាពភេរវកម្មថ្មីៗនេះពីព្រោះគេមានភស្តុតាងមួយចំនួនបង្ហាញថា សកម្មភាពរបស់ក្រុមជនសង្ស័យទាំងនេះបានបង្កការព្រួយបារម្ភនៅប្រទេសម៉ាឡេស៊ីដែលមានប្រជាពលរដ្ឋពហុជាតិសាសន៍និងពហុសាសនា។
ឧបនាយករដ្ឋមន្ត្រីលោក អះម៉ាដ ហ្សាហ៊ីដ ហាមីឌី បាននិយាយថា គោលបំណងសំខាន់របស់ក្រុមជ្រុលនិយមនេះគឺចង់បង្ហាញឲ្យសាធារណជនចាប់អារម្មណ៍ថា ប្រទេសម៉ាឡេស៊ីមិនមានសិទ្ធិសេរីភាពផ្នែកសាសនានោះទេ។ លោកបានបញ្ជាក់ថា ការចាប់ខ្លួនក្រុមជនសង្ស័យនេះត្រូវបានធ្វើឡើងដោយក្រុមប្រឆាំងភេរវកម្មពិសេសនៅប្រទេសម៉ាឡេស៊ីដើម្បីប្រយុទ្ធប្រឆាំងនឹងការវាយប្រហារភេរវកម្មនៅប្រទេសនេះ។
គួរបញ្ជាក់ថា ចាប់ពីថ្ងៃទី២៧ខែកញ្ញាដល់ថ្ងៃទី៦ខែតុលា មនុស្សចំនួន៨នាក់ត្រូវបានចាប់ខ្លួននៅតាមតំបន់មួយចំនួននៅប្រទេសម៉ាឡេស៊ីដោយសង្ស័យថា រៀបចំសកម្មភាពភេរវកម្ម កេណ្ឌអ្នកទោសឲ្យចូលរួមក្រុមភេរវករ និងផែនការវាយប្រហារលំនៅឋានពលរដ្ឋគោរពសាសនាអ៊ីស្លាម គ្រឹស្តសាសនា និងសាសនាហិណ្ឌូដើម្បីបង្កើតជម្លោះនៅប្រទេសនេះ៕
ប៉ាគីស្ថាន ៖ មន្ត្រីមូលដ្ឋានបាននិយាយថា ក្រុមខ្មាន់កាំភ្លើងបានសម្លាប់ពលរដ្ឋមូស្លីមនិកាយសៀ (Shia) ចំនួន៥នាក់មកពីសហគមន៍ជនភាគតិចហាហ្សារ៉ា (Hazara) នៅភាគនិរតីប្រទេសប៉ាគីស្ថានកាលពីថ្ងៃចន្ទម្សិលមិញ។
ការវាយប្រហារនេះបានកើតឡើងនៅខេត្តបាឡូគីស្ថានជាទីដែលជនជាតិភាគតិចហាហ្សារ៉ាជិតកន្លះលាននាក់បានតាំងទីលំនៅនៅទីនោះតាំងពីពួកគេបានរត់គេចពីអំពើហិង្សានៅប្រទេសអាហ្វហ្គានីស្ថានដែលជាស្រុកកំណើតរបស់ខ្លួនកាលពី៤ទសវត្សរ៍មុន។
មន្ត្រីប៉ូលិសម្នាក់បាននិយាយថា ក្រុមអ្នកវាយប្រហារបានបើកការបាញ់ប្រហារពីលើម៉ូតូមួយគ្រឿងក្រោយពីបានសុំឲ្យរថយន្តមួយគ្រឿងឈប់នៅតាមផ្លូវរួចហើយ។ មន្ត្រីប៉ូលិសបានបញ្ជាក់ថា ក្រុមអ្នកវាយប្រហារបានបាញ់សម្លាប់បុរសចំនួន៥នាក់ដែលកំពុងធ្វើដំណើរទៅលក់ដូរបន្លែនៅផ្សារមួយកន្លែងបន្ទាប់មកក្រុមខ្មាន់កាំភ្លើងបានរត់គេចខ្លួន ហើយមកដល់ពេលនេះមិនទាន់មានក្រុមណាមួយអះអាងទទួលខុសត្រូវចំពោះការបាញ់ប្រហារនេះនៅឡើយទេ៕
រាជធានីភ្នំពេញ ៖ យុវជនម្នាក់ដែលរំលោភ និងសម្លាប់ក្មេងស្រីអាយុ១០ឆ្នាំ រួចបោះសពចោលក្នុងទឹកទន្លេនៅកោះដាច់ ត្រូវបានសាលាដំបូងរាជធានីភ្នំពេញសម្រេចផ្តន្ទាទោសដាក់ពន្ធនាគាររយៈពេល១៥ឆ្នាំ និងបង្គាប់ឲ្យសងសំណងជាប្រាក់ទៅគ្រួសារជនរងគ្រោះចំនួន៨០លានរៀល ក្រោមបទចោទ «ឃាតកម្មមានស្ថានទម្ងន់ទោស តាមមាត្រា២០២ នៃក្រមព្រហ្មទណ្ឌ» ។ ការប្រកាសសាលក្រមនេះធ្វើឡើងកាលពីម្សិលមិញ។
ជនជាប់ចោទឈ្មោះ ហ៊ន សុខហេង ភេទប្រុស អាយុ១៧ឆ្នាំ មុខរបរសិស្សថ្នាក់ទី១០ នៅវិទ្យាល័យ ប៊ុន រ៉ានី ហ៊ុន សែនកោះដាច់។ មុនពេលត្រូវចាប់ខ្លួន រស់នៅភូមិរនៈ សង្កាត់កោះដាច់ ខណ្ឌជ្រោយចង្វារាជធានីភ្នំពេញ។ ដោយឡែក ជនរងគ្រោះមានឈ្មោះ ឌ.ត អាយុ១០ឆ្នាំ ជាសិស្សថ្នាក់ទី៣ខ នៃសាលាបឋមសិក្សាសម្តេចឪ រស់នៅជាមួយឪពុកម្តាយភូមិកោះដាច់ សង្កាត់កោះដាច់ ខណ្ឌជ្រោយចង្វា។
សូមរម្លឹកថា កាលពីល្ងាចថ្ងៃទី១ ខែមីនា ឆ្នាំ២០១៧ ខណៈដែលជនរងគ្រោះដើរមកពីសាលារៀន សំដៅទៅផ្ទះម្នាក់ឯង លុះដល់ចំណុចកើតហេតុខាងលើ ជនជាប់ចោទបានហៅជនរងគ្រោះ មកជិះម៉ូតូជាមួយ រួចឌុបជនរងគ្រោះ ទៅច្រាំងទន្លេជាកន្លែងស្ងាត់ ហើយសុំជនរងគ្រោះរួមភេទ ប៉ុន្ដែជនរងគ្រោះមិនព្រម ពេលនោះ ជនជាប់ចោទបានចាប់ក្រៀកឱបជនរងគ្រោះផ្ដួលទៅលើដី តែជនរងគ្រោះបានរើបំរាស់រួច ក៏រត់ចេញពីជនជាប់ចោទ។ ដោយខ្លាចជនរងគ្រោះនិយាយប្រាប់ឪពុកម្ដាយ ទើបជនជាប់ចោទបានដេញតាមចាប់ជនរងគ្រោះបាន រួចចាប់ច្របាច់ក និងអូសទៅច្រមុជទឹកសម្លាប់ចោលក្នុងទន្លេតែម្តង។ ចំណែកសពក្មេងស្រីរងគ្រោះខាងលើត្រូវបានប្រជាពលរដ្ឋប្រទះ អណ្តែកក្នុងទន្លេ នៅចំណុចភូមិចុះកោះ សង្កាត់កោះដាច់ ខណ្ឌជ្រោយចង្វា កាលពីព្រឹកថ្ងៃទី២ ខែមីនា ឆ្នាំ២០១៧កន្លងទៅ៕
ដាម៉ាស ៖ អង្គការឃ្លាំមើលសិទ្ធិមនុស្សស៊ីរី (SOHR) បានអះអាងថា ការវាយប្រហារតាមផ្លូវអាកាសដឹកនាំដោយសហរដ្ឋអាមេរិក នៅក្នុងទីក្រុងរ៉ាកា (Raqqa) របស់ប្រទេសស៊ីរីក្នុងអំឡុងពេល ០៤ថ្ងៃកន្លងទៅនេះបានបណ្តាលឲ្យជនស៊ីវិលយ៉ាងតិច២៥០នាក់ ស្លាប និងជាច្រើននាក់រងរបួស ។ នេះបើតាមទីភ្នាក់ងារព័ត៌មានចិន ស៊ីនហួរ។
អង្គការឃ្លាំមើលសិទ្ធិមនុស្សស៊ីរី (SOHR) ដែលមានមូលដ្ឋាននៅក្នុងចក្រភពអង់គ្លេសបានអះអាងទៀតថា ប្រតិបត្តិការតាមផ្លូវអាកាសធ្វើឡើងដោយក្រុមចម្រុះអន្តរជាតិ ដឹកនាំដោយអាមេរិក បានផ្តាច់យកអាយុជីវិតប្រជាជនស៊ីវិលស្លូតត្រង់ យ៉ាងហោចណាស់ចំនួន១,១១៧នាក់ ដោយក្នុងនោះរួមមានកុមារ២៦៧នាក់ និងស្ត្រី១៦៤នាក់ បើគិតចាប់តាំងតែពីខែមិថុនា ឆ្នាំ២០១៧។ SOHR បានឲ្យដឹងថា ៨៥ភាគរយ នៃទីក្រុង Raqqa ត្រូវបានវាយរំដោះចេញពីការគ្រប់គ្រងរបស់ក្រុមសកម្មប្រយុទ្ធ ISIS ហើយ៕
រាជធានីភ្នំពេញ ៖ កម្ពុជានឹងទទួលរងនូវប្រព័ន្ធសម្ពាធទាបនៅភាគខាងជើង ចាប់ពីថ្ងៃទី១១ ខែតុលា ដែលធ្វើឱ្យមានភ្លៀងធ្លាក់នៅទូទាំងប្រទេសចាប់ពីថ្ងៃទី១៣ ដល់២២ ខែតុលា ឆ្នាំ២០១៧។ នេះបើយោងតាមការព្យាករណ៍របស់ក្រសួងធនធានទឹក និងឧតុនិយម។ តាមការព្យាករណ៍ខាងលើបញ្ជាក់ថា នេះរាជធានី និងខេត្តជាច្រើនរបស់កម្ពុជា អាចប្រឈមនឹងជំនន់ទឹកភ្លៀង។ ចំណែកទឹកទន្លេក៏នឹងហក់ឡើងជាថ្មីផងដែរ៕
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីរសៀលថ្ងៃទី០៩ ខែតុលា ឆ្នាំ២០១៧នេះ បានប្រកាសជាផ្លូវការថា ក្រុមហ៊ុន សុខាអូតែល បានស្ម័គ្រចិត្តឈប់លក់សំបុត្រយកថ្លៃ ចូលឧទ្យានជាតិព្រះមុនីវង្ស «បូកគោ» និងរមណីយដ្ឋានបូកគោ ដែលនឹងចូលជាធរមាន ចាប់ពីវេលាម៉ោង ០០៖០០នាទី ថ្ងៃទី១៥ ខែតុលា ឆ្នាំ២០១៧តទៅ។
សម្តេចតេជោ ហ៊ុន សែន បានប្រកាសតាមរយៈ Facebook ផ្លូវការរបស់សម្តេចយ៉ាងដូច្នេះថា៖ «ទូលព្រះបង្គំ ខ្ញុំព្រះករុណាខ្ញុំ ក្នុងនាមរាជរដ្ឋាភិបាល មានសេចក្តីរីករាយ សូមជម្រាបជូនដល់សាធារណជនឱ្យបានជ្រាបថា ក្រុមហ៊ុន សុខា អូតែល បានស្ម័គ្រចិត្តឈប់លក់សំបុត្រយកថ្លៃចូលឧទ្យានជាតិព្រះមុនីវង្ស «បូកគោ» និងរមនីយដ្ឋានបូកគោ ដែលនឹងចូលជាធរមាន ចាប់ពីវេលាម៉ោង ០០:០០នាទី ថ្ងៃទី១៥ ខែតុលា ឆ្នាំ២០១៧ តទៅ។
ទូលព្រះបង្គំ ខ្ញុំព្រះករុណាខ្ញុំ យល់ថា ការឈប់លក់សំបុត្រយកថ្លៃចូលឧទ្យានជាតិនេះ នឹងជួយសម្រួលដល់បងប្អូនជនរួមជាតិ ក៏ដូចជាភ្ញៀវទេសចរណ៍ទាំងអស់បានឡើងទៅទស្សនាកម្សាន្ដនៅលើតំបន់រមណីយដ្ឋានប្រវត្តិសាស្ដ្រ ជាពិសេសបានទស្សនាទេសភាពដ៏ស្រស់ត្រកាលនិងសែនមនោរម្យ និងស្វែងយល់អំពីប្រភេទសត្វ និងរុក្ខជាតិដ៏មានតម្លៃ ដែលមាននៅក្នុងតំបន់ឧទ្យានជាតិ។ បងប្អូនជនរួមជាតិ នឹងមានភាពងាយស្រួលក្នុងការធ្វើដំណើរឡើងទៅកាន់តំបន់រមណីយដ្ឋានបូគោ ដើម្បីស្វែងយល់ពីហេដ្ឋារចនាសម្ព័ន្ធវប្បធម៌ និងសាសនា ក៏ដូចជាការគោរពប្រតិបត្តិពិធីប្រពៃណីសាសនានៅលើតំបន់ប្រវត្តិសាស្ដ្រនេះ។ លើសពីនេះទៅទៀត ទូលព្រះបង្គំ ខ្ញុំព្រះករុណាខ្ញុំសង្ឃឹមថា ដំណោះស្រាយនេះ ក៏នឹងជួយជំរុញឱ្យសកម្មភាពទេសចរណ៍នៅតំបន់ឧទ្យានជាតិព្រះមុនីវង្ស «បូគោ» ក៏ដូចជានៅរបៀងទេសចរណ៍ភាគខាងត្បូង ជាពិសេសតំបន់ឆ្នេរ មានការកើនឡើងបន្ថែមទៀត សំដៅរួមចំណែកដល់សេដ្ឋកិច្ចសង្គម និងជីវភាពរស់នៅរបស់ប្រជាសហគមន៍ក្នុងមូលដ្ឋាន»៕
រាជធានីភ្នំពេញ ៖ លោក គឹម សុខ អ្នកវិភាគនយោបាយ ដែលកំពុងជាប់ឃុំនៅពន្ធនាគារព្រៃសរ កាលពីថ្ងៃទី៦ ខែតុលានេះ បានសរសេរសំបុត្រមួយច្បាប់ ដោយទាមទារឲ្យដោះលែងលោក កឹម សុខា ប្រធានគណបក្សសង្គ្រោះជាតិ ។ ការទាមទាររបស់លោក គឹម សុខ នោះគឺវិធានការបង្អត់ អាហារ ( មិនហូបបាយ ) និងសាច់ ឬម្ហូបអាហារមានសាច់ នោះទេ។ ប៉ុន្តែលោកហូបទឹកបបរសជាមួយអំបិល និងបន្លែស្រុះទឹកក្ដៅជំនួសវិញ។ បើតាមលោក គឹម សុខ កូដកម្មនេះឈប់ទៅបាន លុះណាមានការដោះលែងលោក កឹម សុខា មានសេរីភាព និងមានឱកាសប្រកួតប្រជែងផ្នែកនយោបាយឡើងវិញ។
លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា បានសរសេរបែបចំអកទៅលោក គឹម សុខ វិញតាមបណ្តាញទំនាក់ទំនងសង្គម តេឡេក្រាម ដោយពន្យុះឲ្យលោក គឹម សុខ បន្តបង្អត់អាហារខ្លួនឯងរហូតទៅ មិនបាច់ផ្អាកទេ ហើយបើបង្អត់បបរទៀតក៏ជាការកាន់តែប្រសើរ។
លោកសុខ ឥសាន្ត បានលើកឡើងថា គឹម សុខ បានប្រើមធ្យោបាយបង្អត់បាយ ដើម្បីដាក់សម្ពាធមកលើរាជរដ្ឋាភិបាលនិងតុលាការឲ្យដោះលែងការចោទប្រកាន់ កឹម សុខា ពីទោសក្បត់ជាតិ និងដោះលែងឲ្យមានសេរីភាពឡើងវិញ។ បើ កឹម សុខាមិនត្រូវបានដោះលែងទេ គឹម សុខ នៅតែបង្អត់បាយខ្លួនឯងដដែលតរៀងទៅ ។
យ៉ាងណាក៏ដោយ អ្នកជំនាញសុខាភិបាលបានលើកឡើងថា ការធ្វើដូចលោក គឹម សុខ មិនហៅថា បង្អត់អាហារនោះទេ ព្រោះបើហុតទឹកបបរ ហូបបន្លែ ផ្លែឈើវាកាន់តែធ្វើឲ្យមនុស្សមានសុខភាពល្អទៅវិញទេ ៕
រាជធានីភ្នំពេញ ៖ ថ្លែងជាសាធារណកាលពីព្រឹកមិញនេះ សម្តេចនាយករដ្ឋមន្ត្រី ហ៊ុន សែន បានប្រកាសថា ចាប់ពីឆ្នាំ២០១៨តទៅ ស្ត្រីជាមន្ត្រីរាជការស៊ីវិល នគរបាល និងកងទ័ព នឹងទទួលបាន ប្រាក់៨០ម៉ឺនរៀល សម្រាប់ការឆ្លងទន្លេ សម្រាប់កូនមួយ ។ ចំណែកស្ត្រីសម្រាលបានកូនភ្លោះ២ទទួលបានប្រាក់១,៦០លានរៀល , កូនភ្លោះបីទទួលបានប្រាក់ ២,៤លានរៀល ។
សម្តេចបានបន្ថែមថា បច្ចុប្បន្នស្ត្រីក្នុងក្របខណ្ឌមន្ត្រីរាជការ ស៊ីវិល នគរបាល និងកងទ័ព មានសរុបប្រមាណ៩ម៉ឺននាក់។ តែក្នុងនោះស្ត្រីមាន លទ្ធភាពមានកូនមានប្រមាណតែ ១០,៨៤៤នាក់ ដែលក្នុងនោះមន្ត្រីរាជការស៊ីវិល មាន ១០,៣៦០នាក់ នគរបាលមានចំនួន ១៩៤ និងកងទ័ពមានចំនួន ២៥០នាក់។
សម្តេច ហ៊ុន សែន បានថ្លែងអះអាងថា ចាប់ពីឆ្នាំ២០១៨តទៅ ការឧបត្ថម្ភសម្រាប់ស្ត្រីឆ្លង ទន្លេផ្នែកកម្មករ និយោជិតត្រូវចំណាយប្រមាណ ១០លានដុល្លារ និងសម្រាប់ស្ត្រីជាមន្ត្រីរាជការ ស៊ីវិល និងកងកម្លាំងប្រដាប់អាវុធមានប្រមាណ២លានដុល្លារ ៕
ភ្នំពេញ ៖ នៅព្រឹកថ្ងៃទី៩ខែតុលាឆ្នាំ២០១៧លោក ឃឹម ប៉ុណ្ណ អនុប្រធានតុលាការកំពូល និងជាប្រធានក្រុមប្រឹក្សាជំនុំជម្រះតុលាការកំពូលបានប្រកាសសាដីកាសម្រេចតម្កល់ទោសអតីតឧត្ដមសេនីយ៍ឯកយោធា ឈឿន ចាន់ថន អាយុ៤១ឆ្នាំ ដាក់ពន្ធនាគារ១៥ឆ្នាំដដែលក្រោមការចោទប្រកាន់ពីបទ”រំលោភលើទំនុកចិត្ត , បំផ្លិចបំផ្លាញដោយចេតនា , គៃបំបាត់ដោយទុច្ចរិត , លក់ដូរនិងចែកចាយអាវុធ , បំផ្លិចបំផ្លាញនូវសម្ភារៈយោធាសម្រាប់បម្រើការប្រយុទ្ធនិងខ្វះស្មារតីទទួលខុសត្រូវក្នុងការដឹកនាំគ្រប់គ្រងអង្គភាព”ប្រព្រឹត្តនៅរាជធានីភ្នំពេញ ក្នុងឆ្នាំ២០០៧ តាមមាត្រា៦០១ មាត្រា៤៤៧ មាត្រា៣៩២នៃក្រមព្រហ្មទណ្ឌ មាត្រា២០នៃច្បាប់ស្ដីពីការគ្រប់គ្រងអាវុធជាតិផ្ទុះនិងគ្រាប់រំសេវ និង មាត្រា៩នៃក្រឹត្យច្បាប់លេខ០៤ឆ្នាំ១៩៨១ ។
កាលពីថ្ងៃទី២ខែតុលាឆ្នាំ២០១៧តុលាការកំពូល បានបើកសវនាការជំនុំជម្រះ ទោសអតីតឧត្ដមសេនីយ៍ឯកយោធា ឈឿន ចាន់ថន នាពេលសវនាការជនជាប់ចោទបានឆ្លើយបដិសេធថា ខ្លួនមិនបានប្រព្រឹត្តអ្វីដូចតុលាការយោធាចោទប្រកាន់នោះទេ ហើយសូមស្នើឲ្យតុលាការកំពូលដោះលែងឲ្យមានសេរីភាពវិញ។គួរបញ្ជាក់ថា អតីតឧត្តមសេនីយ៍ឯកឈឿន ចាន់ថន ហៅម៉ៅ មេបញ្ជាការកងអង្គរក្សសម្តេចអគ្គមហាធម្មពោធិសាលជា ស៊ីម បានត្រូវកម្លាំងកងរាជអាវុធហត្ថចាប់ខ្លួន កាលពីព្រឹកព្រលឹមថ្ងៃទី១៣ ខែសីហា ឆ្នាំ២០១១ រួមជាមួយអង្គរក្ស៣នាក់ផ្សេងទៀតនៅក្នុងភូមិគ្រឹះតម្លៃជិត១លានដុល្លារ លេខ៦៥ ផ្លូវលេខ៩៥ សង្កាត់បឹងកេងកងទី៣ ខណ្ឌចំការមន ។
ការចាប់ខ្លួនគួរឱ្យភ្ញាក់ផ្អើលនេះ គឺបន្ទាប់ពីមានព្រះរាជក្រឹត្យដកហូតឋានន្តរស័ក្តិ និងតួនាទីដែលឡាយព្រះហស្តលេខាដោយព្រះមហាក្សត្រកាលពីថ្ងៃទី១២ ខែសីហា ឆ្នាំ២០១១មានន័យថា ការចាប់ខ្លួននេះធ្វើបន្ទាន់តែម្តង។ ជាមួយគ្នានេះ ក៏មានអនុក្រឹត្យតែងតាំងលោកឧត្តមសេនីយ៍ឯកយឹម លាង ឱ្យទទួលតំណែងជាមេបញ្ជាការកងអង្គរក្សជំនួសវិញ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
