កីឡា ៖ សហព័ន្ធកីឡាប្រដាល់គុនខ្មែរអន្តរជាតិ និងរៀបចំការប្រកួតកីឡាគុនខ្មែរពិភពលោកជាផ្លូវការលើកទី១ដើម្បីដណ្ដើមខ្សែត្រវាត់កម្រិតពិភពលោកប្រចាំឆ្នាំ ចាប់ពីថ្ងៃទី ៨-១០ខែ ធ្នូ ២០១៧ ខាងមុខនេះ នៅវិមានពហុកីឡាដ្ឋានជាតិ ចាប់ពីម៉ោង ១៥:០០ដល់ ១៩:០០ ក្នុងនោះក៏មានការផ្សាយផ្ទាល់នៅលើកញ្ចប់ទូរទស្សន៍ប៉ុស្ត៍លេខ៥ និងចូលរួមទស្សនាដោយសេរី ផងដែរ។
ជាមួយគ្នានោះដែរកីឡាករកីឡាករការិនីជើងខ្លាំងកម្ពុជា រួមមានកីឡាករ រឿង សោភ័ណ្ឌ , ឡុង សុភី,ចាន់ រតនា,ព្រំ សំណាង,ឌុំ កែវដា,ឆាយ សារ៉ា,សួត ប៊ុនធី,ឃឹម ឌិម៉ា ,ឌុន រដ្ឋា,សេន ប៊ុនថេន និងកីឡការិនី អេ យ៉ានុត និង ពុធ ថាវី នឹង ត្រូវប្រកួតជាមួយកីឡាករកីឡាការិនី ៩ ប្រទេសផ្សេងទៀត ដូចជា: បារាំង អុ៑យក្រែន អូស្ត្រាលី អឺរ៉ង់ នេប៉ាល់ នីស្សេរីយ៉ា វៀតណាម ឡាវ ថៃ ផងដែរ៕
រាជធានីភ្នំពេញ ៖ តាមរបាយការណ៍នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិបានឲ្យដឹងថា ពេញ១ខែវិច្ឆិកា ឆ្នាំ២០១៧ គ្រោះថ្នាក់ចរាចរណ៍ទូទាំងប្រទេសកើតឡើងចំនួន២៧៦ករណី បណ្តាលឲ្យមនុស្សស្លាប់១៤៨នាក់ និងរបួស៥៧៧នាក់ ក្នុងនោះរបួសធ្ងន់២៨១នាក់ និងរបួសស្រាល២៩៦នាក់។
របាយការណ៍ដដែលបន្តថា មូលហេតុដែលនាំឲ្យគ្រោះថ្នាក់ចរាចរណ៍រួមមាន បើកបរល្មើសល្បឿន ១០៤លើក ស្រវឹង២៤លើក ប្រជែង២៧លើក មិនគោរពសិទ្ធិ៤៨លើក មិនប្រកាន់ស្តាំ៣៩លើក បត់គ្រោះថ្នាក់១៩លើក កត្តាយានយន្ត១០លើក និងងងុយដេក៤លើក ដែលខូចខាតម៉ូតូ២៦៨គ្រឿង រថយន្តតូច១២២គ្រឿង និងរយយន្តធំ៧៧គ្រឿង។
របាយការណ៍ខាងលើបញ្ជាក់ថា រាជធានីខេត្ត ដែលមានគ្រោះថ្នាក់ចរាចរណ៍ច្រើនជាងគេ រួមមាន ៖ ភ្នំពេញ កើតឡើង៤៦លើក ស្លាប់១៨នាក់ របួស៥៦នាក់។ សៀមរាប កើតឡើង១៥លើក ស្លាប់១២នាក់ របួស២៤នាក់។ កំពង់ធំ កើតឡើង១៧លើក ស្លាប់១២នាក់ របួស១២នាក់។ ព្រះសីហនុ កើតឡើង១៨លើក ស្លាប់១០នាក់ របួស១៦នាក់។ កំពង់ស្ពឺ កើតឡើង៨លើក ស្លាប់១០នាក់ របួស៨នាក់។ បាត់ដំបង កើតឡើង១៥លើក ស្លាប់៩នាក់ របួស១៧នាក់។ ស្វាយរៀង កើតឡើង១៥លើក ស្លាប់៨នាក់ របួស២៨នាក់។ កំពង់ចាម កើតឡើង១៣លើក ស្លាប់៧នាក់ របួស៧៨នាក់៕
ខេត្តបាត់ដំបង ៖ ពិជារឿងគួរឲ្យសង្វេគ និងអាណោចអាធ័មបំផុត ខណៈដែលក្មេងស្រីវ័យ៧ឆ្នាំម្នាក់ បានបាត់បង់ជីវិតតែមួយប៉ប្រិចភ្នែក ដោយសារលង់ទឹកស្រះ ដែលករណីនេះកើតឡើងកាលពីវេលាម៉ោង៤ និង៣០នាទីរសៀលថ្ងៃទី៣០ ខែវិច្ឆិកា ឆ្នាំ២០១៧ នៅចំណុចស្រះទឹកខាងក្រោយផ្ទះប្រហែល១០ម៉ែត្រ ស្ថិតនៅក្នុងក្រុមទី០២ ភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង។
តាមប្រភពព័ត៌មានបានឲ្យដឹងថា ក្មេងស្រីរងគ្រោះ ឈ្មោះ សូ សាវឌី អាយុ០៧ឆ្នាំ ឪពុកឈ្មោះ សូ វណ្ណី អាយុ៣៧ឆ្នាំ។ ប្រភពបន្តថា មុនពេលកើតហេតុ ក្មេងស្រីរងគ្រោះ បានទៅលេងទឹកស្រះក្រោយផ្ទះ ក៏បណ្តាលឲ្យលង់ទឹកស្លាប់តែម្តង។
ក្រោយពីសមត្ថកិច្ចចុះពិនិត្យកន្លែងកើតហេតុ និងសាកសពឃើញថា ក្មេងស្រីរងគ្រោះពិតជាស្លាប់ដោយសារលង់ទឹកស្លាប់ពិតប្រាកដមែន ហើយក៏បានប្រគល់សាកសពជូនក្រុមគ្រួសារធ្វើបុណ្យតាមប្រពៃណី៕
ហ្ស៊កដានី ៖ ក្រសួងមហាផ្ទៃនៃប្រទេសហ្ស៊កដានីបានថ្លែងថា ជនភៀសខ្លួនស៊ីរីដែលកំពុងរស់នៅក្នុងប្រទេសហ្ស៊កដានីកាន់តែច្រើនៗឡើងបានចាប់ផ្តើមវិលត្រឡប់ទៅផ្ទះសម្បែងរបស់ពួកគេនៅក្នុងប្រទេសស៊ីរីវិញហើយ ចាប់តាំងពីពួកគេបានដឹងថាកងកម្លាំងរដ្ឋាភិបាលស៊ីរីកំពុងតែដណ្តើមបានមកវិញនូវប្រទេសទាំងមូលជាបណ្តើរៗ។
យោងតាមទិន្នន័យរបស់ក្រសួងមហាផ្ទៃនៃប្រទេសហ្ស៊កដានី, រដ្ឋាភិបាលហ្ស៊កដានីនឹងបញ្ជូនជនភៀសខ្លួនស៊ីរីចំនួន២០០នាក់ត្រឡប់ទៅផ្ទះរបស់ពួកគេវិញក្នុងរយៈពេល៣ថ្ងៃម្តង ហើយជារៀងរាល់ថ្ងៃមានជនភៀខ្លួនស៊ីរីប្រហែល២រយនាក់បានទៅចុះឈ្មោះដើម្បីត្រឡប់ទៅវិញ។
នាយកនៃនាយកដ្ឋានកិច្ចការជនភៀសខ្លួនស៊ីរីរបស់ប្រទេសហ្ស៊កដានីបាននិយាយថា ពួកគេបានណែនាំឲ្យជនភៀសខ្លួនស៊ីរីបន្តស្នាក់នៅក្នុងប្រទេសរបស់គេមួយរយៈពេលខ្លីទៀតសិន បន្ទាប់ពីពួកគេបានទទួលការអនុញ្ញាតឲ្យត្រឡប់ទៅផ្ទះវិញ ខណៈដែលស្ថានភាពនៅក្នុងប្រទេសស៊ីរីនៅមិនទាន់ស្ងប់ស្ងាត់ទាំងស្រុងនៅឡើយទេ។
គួរបញ្ជាក់ថា កាលពីដើមខែវិច្ឆិកា ទីក្រុងអាល់ប៊ូកាម៉ាល់ (Albu Kamal) ដែលជាទីក្រុងធំចុងក្រោយដែលត្រូវបានគ្រប់គ្រងដោយក្រុមអាយស៊ីសនេះត្រូវបានកងទ័ពស៊ីរី និងកម្លាំងសម្ព័ន្ធមិត្តវាយដណ្ដើមយកមកវិញ។ មកដល់ពេលនេះ ក្រុមអាយស៊ីសនៅគ្រប់គ្រងតែតំបន់មួយចំនួនប៉ុណ្ណោះនៅក្នុងតំបន់វាលខ្សាច់ដាច់ស្រយាល និងភូមិមួយចំនួននៅក្បែរនោះ ព្រមទាំងនៅក្នុងតំបន់តូចៗមួយចំនួននៅក្នុងប្រទេសស៊ីរី និងអ៊ីរ៉ាក់៕
ខេត្តកណ្ដាល ៖ អគ្គិភ័យបានឆាបឆេះផ្ទះប្រជាពលរដ្ឋ២ល្វែងនៅម្ដុំអ្នកតាចិន ក្រុងតាខ្មៅ ខេត្តកណ្ដាល កាលវេលាម៉ោងជាង១០យប់ ថ្ងៃទី៣០ ខែវិច្ឆិកា ឆ្នាំ២០១៧ បានបំផ្លាញទ្រព្យសម្បត្តិ ប្រហែល១២ម៉ឺនដុល្លារ ខណៈដែលការឆាបឆេះនេះបណ្តាលមកពីផ្ទុះឌុយដោតឆ្នាំងបាយ។
តាមប្រភពព័ត៌មានពីសមត្ថកិច្ចបានឲ្យដឹងថា អគ្គិភ័យនេះបានរលត់ទៅវិញនៅវេលាម៉ោងជិត១១យប់ ថ្ងៃទី៣០ ខែវិច្ឆិកា ឆ្នាំ២០១៧នេះ បន្ទាប់ប្រតិបត្តិការជួយសង្គ្រោះដោយប្រើប្រាស់រថយន្ដពន្លត់អគ្គិភ័យ អស់ចំនួន១០គ្រឿង ដោយពីស្នងការនគរបាលខេត្ត៤គ្រឿង, បញ្ជាការដ្ឋានអង្គរក្ស២គ្រឿង និងស្នងការដ្ឋាននគរបាលរាជធានីភ្នំពេញ៩គ្រឿងផងដែរ។
ប្រភពបន្តថា ផ្ទះដែលរងគ្រោះថ្នាក់អគ្គិភ័យនេះ គឺមានលក់ទូរស័ព្ទ, លក់ខោអាវ និងប៉ះកង់រថយន្ដ ដែលរងការខូតខាតអស់ទ្រព្យសម្បត្ដិមួយចំនួនធំផងដែរ។ ប្រភពបញ្ជាក់ថា ម្ចាស់ទី១៖ ឈ្មោះ ឃឹម សុភឹម អាយុ៧០ឆ្នាំ ក្រុមប្រឹក្សាសង្កាត់តាខ្មៅ។ ទី២៖ ឈ្មោះ ហម ស៊ិនណា ស្រី អាយុ៦០ឆ្នាំ អាជីវករ ជាផ្ទះផ្តើមឆេះ៕
វៀតណាម ៖ មេធាវីបាននិយាយថា តុលាការមួយនៅប្រទេសវៀតណាមកាលពីថ្ងៃព្រហស្បតិ៍បានគាំទ្រការកាត់ទោសជាប់គុក១០ឆ្នាំចំពោះអ្នកសរសេរប្លុកម្នាក់ដែលត្រូវគេចោទពីបទឃោសនាប្រឆាំងនឹងរដ្ឋដែលនេះជាសកម្មភាពចុងក្រោយក្នុងការបង្ក្រាបលើអ្នករិះគន់នៃរដ្ឋឯកបក្សមួយនេះ។
បើទោះបីជាមានកំណែទម្រង់សេដ្ឋកិច្ចធំធេងនិងការបើកទូលាយឆ្ពោះទៅរកការផ្លាស់ប្តូរសង្គមរួមទាំងសិទ្ធិអ្នកស្រឡាញ់ភេទដូចគ្នានិងមនុស្សប្តូរភេទក៏ដោយ, គណបក្សកុម្មុយនិស្តដែលកំពុងកាន់អំណាចរបស់ប្រទេសវៀតណាមបានត្រួតត្រាប្រព័ន្ធផ្សព្វផ្សាយយ៉ាងតឹងរ៉ឹងនិងមិនអត់ឱនចំពោះការរិះគន់នោះទេ។
នាង Nguyen Ngoc Nhu Quynh អាយុ៣៧ឆ្នាំដែលត្រូវបានគេស្គាល់ថាជា “Me Nam” ឬ “មេផ្សិត” ហើយទទួលបានការចាប់អារម្មណ៍ពីប្លុកអំពីបញ្ហាបរិស្ថាននិងការស្លាប់នៅក្នុងការឃុំឃាំងរបស់ប៉ូលិសនោះគឺត្រូវបានរកឃើញថាមានកំហុសនៅក្នុងខែមិថុនាសម្រាប់ការចែកចាយនូវអ្វីដែលប៉ូលិសហៅថា របាយការណ៍ប្រឆាំងនឹងរដ្ឋ។
មេធាវីម្នាក់របស់នាងបាននិយាយ តុលាការមួយនៅទីក្រុងភាគកណ្តាល Nha Trang បានគាំទ្រការកាត់ទោសរបស់ Quynh។
លោក Ha Huy Son បានប្រាប់រ៉យទ័រតាមទូរស័ព្ទថា “ការកាត់ទោសនេះមិនមានគោលដៅនិងមិនយុត្តិធម៌ទេ។ Quynh បាននិយាយថា នាងគ្មានកំហុសទេហើយនាងបានអនុវត្តសិទ្ធិរបស់នាងក្នុងនាមជាពលរដ្ឋម្នាក់”។
កាលពីខែមីនាឆ្នាំ២០០៩ នាង Quynh ត្រូវជាប់ក្នុងមន្ទីរឃុំខ្លួនរបស់ប៉ូលិសរយៈពេល៩ថ្ងៃដោយសារការទទួលបានមូលនិធិពី Viet Tan ដែលជាក្រុមសកម្មជនវៀតណាមមួយមានមូលដ្ឋាននៅរដ្ឋកាលីហ្វ័រនីញ៉ាដែលវៀតណាមហៅថាជាក្រុមភេរវករ។
នាង Quynh ក៏បាននិយាយប្រឆាំងនឹងក្រុមហ៊ុនបុត្រសម្ព័ន្ធ Formosa Plastics Corp របស់កោះតៃវ៉ាន់ផងដែរដែលបានបង្កឲ្យមានគ្រោះធម្មជាតិមួយក្នុងចំណោមគ្រោះមហន្តរាយបរិស្ថានធំបំផុតរបស់វៀតណាមកាលពីខែមេសា៕
រាជធានីភ្នំពេញ ៖ យោងតាមការឲ្យដឹងថា ពីលោក ឈាង វុន អ្នកនាំពាក្យរដ្ឋសភាបានបញ្ជាក់ថា សភានឹងប្រជុំពេញអង្គនៅថ្ងៃទី៧ ខែធ្នូ ឆ្នាំ២០១៧ខាងមុខ ដើម្បីប្រកាសផ្តល់សុពលភាព សមាជិករដ្ឋសភាបន្ថែមទាំង១៦រូបនិងសមាជិកគណៈកម្មាធិការជាតិរៀបចំការបោះឆ្នោត (គ.ជ.ប)ថ្មីចំនួន៣រូប ។
សមាជិកសភាចំនួន ១៦រូប ដែលរដ្ឋសភាប្រកាសសុពលភាព នៅថ្ងៃទី៧ ធ្នូ ខាងមុខនឹងត្រូវចូលធ្វើពិធីសម្បថ នៅព្រះបរមរាជវាំង នារសៀលថ្ងៃ៧ធ្នូ នោះផងដែរ ។
សូមជម្រាបថា សមាជិកសភាថ្មីចំនួន១១រូប គឺជាសំណល់អសនៈដែលបែងចែកឲ្យគណបក្សផ្សេងៗ ហើយទាំង១១អសនៈនោះត្រូវបានទៅគណបក្សប្រជាជនកម្ពុជា ។ ចំណែកសភាថ្មី៤នាក់ទៀត គឺចូលជំនួសតំណែងសភារបស់ CPP ដែលបានលាលែងពីតំណែងសភា ។ ចំណែកសមាជិក គ.ជ.ប ចំនួន៣រូប រួមមាន លោកនុត សុខុម លោក ឌឹម សាវណ្ណារ៉ុម និងលោកហែល សារ៉ាត់ ជំនួសសមាជិក គ.ជ.ប ៣រូបដែលបានលាលែង គឺលោក គួយ ប៊ុនរឿន , លោក រ៉ុង ឈុន និងលោកស្រី តែ ម៉ានីរ៉ុង” ៕
វ៉ាស៊ីនតោន ៖ មន្ត្រីរដ្ឋាភិបាលជាន់ខ្ពស់អាមេរិកបានថ្លែងថា សេតវិមានបានដាក់ចេញនូវគម្រោងថ្មី ដោយគ្រោងនឹងដករដ្ឋមន្ត្រីការបរទេស លោក Rex W.Tillerson ចេញពីតំណែង បន្ទាប់ទំនាក់ទំនងរវាងលោកជាមួយប្រធានាធិបតីដូណាល់ត្រាំ ត្រូវរកាំរកូស។ នេះបើតាមសារព័ត៌មាន New York Times។
មន្ត្រីរូបនោះបញ្ជាក់ថា តំណែងរបស់លោក Tillerson នឹងត្រូវជំនួសវិញដោយលោក Mike Pompeo ប្រធានភ្នាក់ងារ CIA ក្នុងរយៈពេលប៉ុន្មានសប្តាហ៍ខាងមុខ ហើយតំណែងជាប្រធានភ្នាក់ងារ CIA របស់លោក Pompoe នឹងត្រូវបានជំនួសវិញ ដោយសមាជិកសភាលោក Tom Cotton ជាសមាជិកបក្សសាធារណរដ្ឋ មកពីរដ្ឋអាឡាស្កាដែលបានក្លាយជាសម្ព័ន្ធមិត្តដ៏សំខាន់របស់ប្រធានាធិបតីអាមេរិក លើបញ្ហាសន្តិសុខជាតិ។ លោក Cotton បានបង្ហាញសញ្ញាថា លោកនឹងទទួលតំណែងនេះ ប្រសិនបើមានការតែងតាំងលោកមែននោះ។
ទោះបីយ៉ាងណារហូតមកទល់ពេលនេះ គេនៅមិនទាន់ច្បាស់នៅឡើយថាតើលោក ត្រាំ បានផ្តល់សេចក្តីសម្រេចចុងក្រោយស្តីពីគម្រោងនេះហើយឬនៅ ប៉ុន្តែលោកបានបញ្ជាក់ថា លោកពិតជាមានជម្លោះជាមួយលោក Tillerson ហើយត្រៀមជាស្រេចក្នុងការធ្វើកំណែទម្រង់ទៅលើក្រសួងការបរទេស។
សូមបញ្ជាក់ថា រដ្ឋមន្ត្រីការបរទេសរូបនេះ ធ្លាប់បានហៅលោក ត្រាំថាជា«មនុស្សល្ងីល្ងើ» ខណៈដែលលោកត្រាំ បានរិះគន់ជាសាធារណៈទៅលើលោក Tillerson វិញថាបាន«បំផ្លាញពេលវេលារបស់លោក» ក្នុងកិច្ចការទំនាក់ទំនងការទូតជាមួយប្រទេសកូរ៉េខាងជើង៕
រាជធានីភ្នំពេញ ៖ ក្រសួងធនធានទឹកនិងឧត្តុនិយមបានប្រកាសថា បន្ទាប់ពីតាមដានលើស្ថានភាពអាកាសធាតុនៅកម្ពុជាបង្ហាញថា ខ្យល់មូសុងឥសាន បាននឹងកំពុងបន្តបង្កើនឥទ្ធិពលខ្លាំងមកលើកម្ពុជា ដែលលក្ខណៈបែបនេះ នឹងធ្វើឱ្យសីតុណ្ហភាពអប្បបរមានៅកម្ពុជាបន្តថយចុះបន្ថែមទៀតជាបន្តបន្ទាប់។
យោងតាមការព្យាករណ៍បានបង្ហាញថា ចាប់ពីថ្ងៃទី០៨ ដល់ទី ១៤ ខែធ្នូ សីតុណ្ហភាពអប្បបរមា នឹងធ្លាក់ចុះខ្លាំងនៅតាមបណ្តាខេត្តមួយចំនួនដូចជា៖ ខេត្តរតនគិរី មណ្ឌលគិរី ស្ទឹងត្រែង ព្រះវិហារ ឧត្តរមានជ័យ និងខេត្តប៉ៃលិន ដែលសីតុណ្ហភាពនឹងចុះទៅត្រឹមរង្វង់ពី១៦ទៅ១៨ អង្សារសេ ខណៈដែលបណ្តារាជធានីខេត្តដទៃទៀត សីតុណ្ហភាពនឹងចុះត្រជាក់ត្រឹមតែ១៩ទៅ ២០អង្សាសេតែប៉ុណ្ណោះ៕
រាជធានីភ្នំពេញ ៖ អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានបញ្ជាក់ថា នៅអំឡុងខែមករា ដល់ខែកុម្ភៈ ដើមឆ្នាំ២០១៨ខាងមុខ សីតុណ្ហភាពនៅកម្ពុជានឹងចុះត្រជាក់ខ្លាំង ដែលអាចនឹងធ្លាក់ដល់ជាង១០អង្សាសេឯណោះ ។
លោក ចាន់ យុត្ថា បានបន្តថា តំបន់ដែលនឹងមានអាកាសធាតុចុះត្រជាក់ខ្លាំងបែបនេះ រួមមាន តំបន់ជួរភ្នំដងរែក ជួរភ្នំក្រវ៉ាញ និងតំបន់ទំនាប់កណ្ដាលភាគពាយព្យ ដែលមានដូចជាខេត្ដពោធិ៍សាត់ បាត់ដំបង បន្ទាយមានជ័យ និងខេត្ដសៀមរាប។ ដោយឡែក តំបន់ជួរភ្នំ និងតំបន់ខេត្ដភាគពាយ័ព្យ អាកាសធាតុនឹងត្រជាក់ខ្លាំង តែតំបន់មាត់សមុទ្រ និងតំបន់មួយចំនួន មិនមានសញ្ញាប្រាប់ថា អាកាសធាតុនឹងត្រជាក់ខ្លាំងដូចតំបន់ទាំងពីរនេះទេ។
យ៉ាងណាក៏ដោយ លោកអំពាវនាវឲ្យប្រជាពលរដ្ឋត្រៀមលក្ខណៈទុកជាមុន សំខាន់មនុស្សចាស់និងស្ត្រីមានផ្ទៃពោះ ដើម្បីការពារសុខភាព នៅពេលដែលអាកាសធាតុចុះត្រជាក់ខ្លាំង ចូលមកដល់ ៕
រាជធានីភ្នំពេញ ៖ លោក ឌឹម សុវណ្ណារុំ ប្រធានផ្នែកទំនាក់ទំនងសាធារណនៃសាលាក្តីខ្មែរក្រហម ត្រូវបានរដ្ឋសភាអនុម័តជ្រើសរើសជាសមាជិក គ.ជ. ខណៈដែលរដ្ឋសភា នាព្រឹកថ្ងៃទី៣០ ខែវិច្ឆិកា ឆ្នាំ២០១៧នេះ បានសម្រេចជ្រើសរើសបេក្ខជនចំនួន៣រូប ដើម្បីជំនួសតំណែង អនុប្រធាន-សមាជិកនៃគណៈកម្មាធិការជាតិរៀបចំការបោះឆ្នោត៣រូប ដែលបានលាលែងពីតំណែង ។
បេក្ខជន៣រូបនោះរួមមាន៖ ទី១៖ លោក នុត សុខុម មកពីគណបក្សហ្វ៊ុនស៊ិនប៉ិច ជាអនុប្រធាន គ.ជ.ប ទី២៖ លោក ហ៊ែល សារ៉ាត់ សមាជិកមកពីគណបក្សសញ្ជាតិកម្ពុជា សមាជិក គ.ជ.ប និង៣៖ លោក ឌឹម សុវណ្ណារុំ ប្រធានផ្នែកទំនាក់ទំនងសាធារណ: នៃសាលាក្តីខ្មែរក្រហម ជាសមាជិក គ.ជ.ប ៕
រាជធានីភ្នំពេញ ៖ អនុរដ្ឋលេខាធិការក្រសួងព័ត៌មាន លោក សោម សារុន ត្រូវបានគេរាយការណ៍ ថា បានទទួលមរណៈភាពហើយកាលពីវេលាម៉ោង ៦,២០នាទី នាថ្ងៃទី៣០ ខែវិច្ឆិកា ឆ្នាំ២០១៧ នេះ ដោយរោគាពាធ ក្នុងជន្មាយុ៦២ឆ្នាំ ។
សពលោក សោម សារុន បានតម្កល់ធ្វើបុណ្យតាមប្រពៃណីនៅគេហដ្ឋានលេខ៣១ ផ្លូវ០៩ ក្នុង បុរីប៉េងហួត បឹងស្នោរ ។ ភរិយារបស់លោក សោម សារុន មានឈ្មោះ ហេង មុនីថង និងមានកូន២នាក់៕
រាជធានីភ្នំពេញ ៖ មហាយក្សចិនបានប្រកាសការគាំទ្រសារជាថ្មី ចំពោះការដឹកនាំរបស់សម្តេច ហ៊ុន សែន ក្នុងការជួយកម្ពុជាអោយកាន់តែរីកចម្រើនខ្លាំងឡើងថែមទៀតទៀត ។ ការប្រកាសនោះធ្វើឡើងនៅក្នុងពិធីជប់លៀង ដែលរៀបចំឡើងដោយ លោក សុង ថាវ រដ្ឋមន្ត្រីក្រសួងអន្តរជាតិនៃគណៈកម្មាធិការមជ្ឍឹមបក្សកុម្មនីស្តចិន នៅសាលគីងហ្គុង អគារលេខ៥ ផ្ទះសំណាស់រដ្ឋទែវយូថៃ (Diaoyutai State Guesthouse) នៃសាធារណៈរដ្ឋប្រជាមានិតចិន ជូនសម្តេចនាយករដ្ឋមន្ត្រី ហ៊ុន សែន នៅថ្ងៃទី២៩ ខែវិច្ឆិកា ឆ្នាំ២០១នេះ ។
ពិធីជប់លៀងនេះគឺធ្វើឡើងដើម្បីស្វាគមន៍ អបអរសាទរ សម្ដេចតេជោ ហ៊ុន សែន ដែលបានអញ្ជើញមកចូលរួមក្នុងកិច្ចសន្ទនាជាន់ខ្ពស់រវាងគណបក្សកុម្មុយនីស្តចិនជាមួយគណបក្សនយោបាយនានាជុំវិញពិភពលោក និងដើម្បីរឹតចំណងមិត្តភាព កិច្ចសហប្រតិបត្តិការគ្រប់ជ្រុងជ្រោយ រវាង កម្ពុជា ចិនផងដែរ។ ភាគីមិត្តចិនពេញចិត្ត កោតសរសើរ និងគាំទ្រចំពោះការដឹកនាំរបស់ សម្ដេចតេជោ ហ៊ុន សែន ដែលបាននាំមកនូវស្ថិរភាពនយោបាយ សេដ្ឋកិច្ច និងការរីកចម្រើនរបស់កម្ពុជាសព្វថ្ងៃ ៕
ញូដេលី ៖ តុលាការថ្នាក់តំបន់ក្នុងរដ្ឋ Maharashtra ភាគខាងលិចប្រទេសឥណ្ឌានាថ្ងៃពុធម្សិលមិញនេះ បានសម្រេចកាត់ទោសប្រហារជីវិតបុរស ០៣នាក់ ពីបទរំលោភសេពសន្ថវៈ និងឃាតកម្មទៅលើយុវតីវ័យ១៥ឆ្នាំម្នាក់។ នេះបើតាមទីភ្នាក់ងារព័ត៌មានចិន ស៊ីនហួរ។
ឧប្បត្តិហេតុខាងលើបានបង្កឲ្យមានការខឹងសម្បាជាខ្លាំង ពីសំណាក់សាធារណជន នៅទូទាំងរដ្ឋ ដោយប្រជាជនរាប់ពាន់នាក់ បានប្រមូលផ្តុំគ្នាធ្វើបាតុកម្មតវ៉ាពាសពេញដងផ្លូវ ខណៈដែលការរំលោភបំពានផ្លូវភេទ បានក្លាយជាប្រធានបទក្តៅគគុក នៅក្នុងប្រទេសមហាយក្សទីពីរនៅអាស៊ី ដែលមានចំនួនប្រជាជនជា ១.២ពាន់លាននាក់មួយនេះ។
សូមរលឹកថា កាលពីខែកក្កដា ឆ្នាំ២០១៦ បុរសទាំង០៣ ដែលស្ថិតក្នុងវ័យខ្ទង់២០ឆ្នាំដូចគ្នាបានប្រព្រឹត្តសកម្មភាពរំលោភសេពសន្ថវៈ ទៅលើយុវតីរងគ្រោះ នៅក្នុងភូមិ Kopardi នៃស្រុក Ahmednagar ចម្ងាយប្រហែល ៣០២គីឡូម៉ែត្រ ភាគខាងកើតទីក្រុង Mumbai ដែលជារដ្ឋធានីរបស់រដ្ឋ Maharashtra៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
