រាជធានីភ្នំពេញ ៖ រដ្ឋសភាអនុម័តសេចក្តីព្រាងច្បាប់ ស្តីពីវិសោធនកម្មច្បាប់ស្តីពីការបោះឆ្នោត ជ្រើសតាំងអ្នកតំណាងរាស្ត្រ ជាឯកច្ឆ័ន្ធ ដោយសំឡេង ៦៧នៃចំនួនសមាជិកសភាទាំងមូល។
សូមបញ្ជាក់ថា នៅព្រឹកថ្ងៃទី១៦ ខែតុលា ឆ្នាំ២០១៧នេះ រដ្ឋសភាបានបើកកិច្ចប្រជុំពិភាក្សាលើសេចក្តីស្នើវិសោធនកម្មច្បាប់ ទាំង៤ ដែលពាក់ព័ន្ធទៅនឹងនិតិវិធីនៃការរំលាយគណបក្សសង្គ្រោះជាតិ ។
ច្បាប់ទាំងបួន ដែលស្នើធ្វើវិសោធនកម្ម ហើយគណៈកម្មាធិការអចិន្ត្រៃយ៍រដ្ឋសភាសម្រេច ដាក់ចូលក្នុងរបៀបវារៈនៃកិច្ចប្រជុំសភានាព្រឹកនេះមាន៖ ១៖ វិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ។ ២៖ វិសោធនកម្មច្បាប់ស្តីពីការបោះឆ្នោតជ្រើសតាំងព្រឹទ្ធសភា។ ៣៖ វិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ/សង្កាត់។ ៤៖ វិសោធនកម្ម ច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ។
កត់សម្គាល់ថា សម្តេច ហ៊ុន សែន នាយករដ្ឋមន្ត្រីកម្ពុជាក៏បានអញ្ជើញចូលរួមក្នុងកិច្ចប្រជុំសភាពេញអង្គនៅថ្ងៃនេះផងដែរ ប៉ុន្តែតំណាងរាស្ត្របក្សប្រឆាំងអវត្តមាន៕
អូទ្រីស ៖ លោក Sebastian Kurz ប្រធានគណបក្សប្រជាជន (People’s Party) បានប្រកាសពីការទទួលជ័យជំនះលើការបោះឆ្នោត ហើយការទទួលបានជោគជ័យនេះធ្វើឲ្យលោកក្លាយមេដឹកនាំវ័យក្មេងជាងគេនៅលើពិភពលោកកាលពីយប់មិញ។ នេះបើយោងតាមការចេញផ្សាយរបស់សារព័ត៌មាន BBC។
គណបក្ស People’s Party ដែលមានវ័យត្រឹមតែ៣១ឆ្នាំរូបនេះ ទទួលបានជ័យជំនះចំនួន ៣១,៥ភាគរយ នៃលទ្ធផលឆ្នោត, បន្ទាប់មកគណបក្ស Social Democrats ២៧,១ភាគរយ និងគណបក្ស Freedom Party ២៥,៩ភាគរយ៕
សូម៉ាលី ៖ អាជ្ញាធរសូម៉ាលីបានឲ្យដឹងថា មនុស្សស្លាប់២៣១នាក់ និង២៧៥នាក់ផ្សេងទៀតបានទទួលរងរបួស ដោយសារការវាយប្រហារពីសំណាក់រថយន្តដឹកទំនិញ បំផ្ទុះគ្រាប់បែកមួយគ្រឿង នៅក្នុងរដ្ឋធានី របស់ប្រទេសសូម៉ាលី។ អាជ្ញាធរបញ្ជាក់ថា ការវាយប្រហារនៅថ្ងៃសៅរ៍នេះ គឺជាការវាយប្រហារសម្លាប់មនុស្សច្រើនជាងគេបំផុតតែមួយគត់ មិនធ្លាប់មានពីមុនមក នៅក្នុងប្រទេសស្ថិតក្នុងទ្វីបអាហ្វ្រិកមួយនេះ។
ជាមួយគ្នានេះប្រធានាធិបតី Mohamed Abdullahi Farmaajo បានប្រកាសកាន់ទុក្ខរយៈពេល៣ថ្ងៃ និងអំពាវនាវឲ្យប្រជាពលរដ្ឋ ជួយបរិច្ចាកឈាម ជួយសង្គ្រោះជនរងគ្រោះ។ ទន្ទឹមនោះរដ្ឋាភិបាលសូម៉ាលី ក៏បានស្តីបន្ទោសចំពោះក្រុមភេរវកម្ម Al-Shabab ថា បានធ្វើការវាយប្រហារនេះ ខណៈក្រុមភេរវកម្មមួយនេះមិនទាន់មានការបកស្រាយនៅឡើយនោះទេ៕
រាជធានីភ្នំពេញ ៖ រង្វង់មូលកាំកូស៊ីធី ដែលមានទីតាំងនៅជាប់ព្រំប្រទល់រវាងខណ្ឌឫស្សីកែវ និងខណ្ឌទួលគោក នឹងត្រូវបាត់រូបរាងពីរាជធានីភ្នំពេញ នៅមុនពិធីបុណ្យអ៊ំទូក និងជំនួសដោយភ្លើងស្តុបវិញ ស្រប ពេលដែលថ្មីៗនេះមានរង្វង់មូលចំនួន២កន្លែងរួចហើយ ដែលត្រូវបានយកចេញ និងបានជំនួស ដោយភ្លើងស្តុបដូចគ្នាដែរ ។
មន្ត្រីរដ្ឋបាលរាជធានីភ្នំពេញបានអោយដឹងថា ការដាក់ភ្លើងស្តុបជំនួសរង្វង់មូលវិញនេះ ធ្វើ ឡើងដោយសារតែនៅចំណុចរង្វង់មូលកាំកូស៊ីធីនេះ មានការកកស្ទះចរាចរខ្លាំងជារៀងរាល់ថ្ងៃ ដោះស្រាយមិនចេញ និងក្រោយពីសិក្សាទៅមើលឃើញថា មានតែឈូសយករង្វង់មូលចេញ ទើប ដោះស្រាយបញ្ហាកកស្ទះបាន ទើបរដ្ឋបាលរាជធានីភ្នំពេញសម្រេចឈួសរង្វង់មូលនេះចេញតែ ម្តង។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹង នៅ ព្រឹកថ្ងៃទី១៤ តុលានេះ ថា ក្រុមការងារនឹងធ្វើសកម្មភាពដោយដាក់គ្រឿងចក្រឈួសឆាយរង្វង់មូលកាំកូស៊ីធី ចេញតែម្តង នៅរាត្រីទី១៤ ខែតុលា នេះ ដើម្បីប្តូរពីរង្វង់មូលទៅជាភ្លើងស្តុបបញ្ជា ចរាចរណ៍វិញ ។ លោកបន្តថា ការងារតំឡើងភ្លើងស្តុបថ្មី ជំនួសឱ្យរង្វង់មូលនៅចំណុចនេះ រដ្ឋបាល រាជធានីភ្នំពេញមានគម្រោងធ្វើអោយបានរួចរាល់នៅមុនព្រះរាជពិធីបុណ្យអ៊ុ ទូក អកអំបុក សំពះព្រះខែ ដែលនឹងឈានចូលមកដល់នាពេលដ៏ខ្លីខាងមុខនេះ មានន័យថា ព្រះរាជពិធីបុណ្យអុំ ទូក អកអំបុក សំពះព្រះ មកដល់ស្តុបថ្មីនេះ ចាប់ផ្តើមដំណើរការតែម្តង។
មន្ត្រីរដ្ឋបាលរាជធានីភ្នំពេញបានអោយដឹងទៀតថា ភ្លើងស្តុបរង្វង់មួលកាំកូស៊ីធី នឹងបំពាក់ ភ្លើង ស្តុប ភ្លើងសញ្ញាមិនខុសគ្នាប៉ុន្មានពីស្តុបរង្វង់មួលទួលគោក និងស្តុបនាងគង្ហីងប៉ុន្មានឡើយ ដោយសារតែនៅចំណុចស្តុបទាំងនេះ មានផ្លូវច្រើនត្រូវឆ្លងកាត់ ហើយក្រោយការបំពាក់ភ្លើងស្តុប សញ្ញាចរាចរណ៍រួចហើយ ចំណុចរង្វង់មូលកាំកូស៊ីធីនេះហើយ វា នឹងអាចដោះស្រាយចរាចរណ៍ បានល្អប្រសើរជាងមុន ជាក់ជាមិនខានឡើយ៕
ខេត្តស្ទឹងត្រែង ៖ កាលពីយប់ថ្ងៃទី១៤តុលាកន្លងទៅថ្មីៗនេះមានករណីឃាតកម្មដ៏សាហាវ១កើតឡើងនៅស្រុកសៀមប៉ាង ឃុំព្រែកមាស ភូមិពងគ្រៀលនៅចំនុចទួលវែង ដោយជន សង្ស័យបានធ្វើសកម្មភាព មកលើកុម៉ាច្របាប់ករួចហើយ ច្រកចូលការុង អូសយកទៅទំលាក់ក្នុងទឹកស្រះស្លាប់តែម្ដងនៅក្នុងទីតាំងភូមិកើតហេតុខាងលើ។ ឪពុកម្ដាយរបស់កុមាររងគ្រោះបានឲ្យដឹងផងថា ដោយបាត់កូនអត់ឃើញក៏ដើររក តែរកមិនឃើញ លុះព្រឹកឡើងថ្ងៃទី១៥តុលាក៏ប្រទះឃើញសាកសពកូននៅក្នុងការុងអណ្ដែតក្នុងទឹតស្រះនោះ។
បើតាមសម្ដីរបស់សមត្ថកិច្ចបានឲ្យដឹងថា កុមារាម្នាក់ដែលបានស្លាប់នោះមានឈ្មោះ ម៉ៅ តយ ភេទប្រុស អាយុ៤ឆ្នាំ ឪពុកឈ្មោះ សន ម៉ៅ អាយុ៣៩ ម្ដាយឈ្មោះ ចាន់លី អាយុ៣៨ឆ្នាំរស់នៅ ភូមិកើតហេតុខាងលើ។ សមត្ថកិច្ចបានបន្ថែមថា ជនសង្ស័យដែលបានធ្វើសកម្មភាព សម្លាប់មកលើកុមារាម្នាក់នោះនៅ មិនទាន់ស្គាល់អត្តសញ្ញាណនៅឡើយទេហើយក៏មិនដឹងពីមូលហេតុអ្វីដែរបានជាជនសង្ស័យសម្លាប់កុម៉ារាម្នាក់នោះដែរ។ ប៉ុន្តែសមត្ថកិច្ចនិងបន្តស្រាវជ្រាវ វែកមុខរក ឃាតករនោះមកផ្ដន្ទាទោសទៅតាមច្បាប់ឲ្យបាន។ ដោយឡែកសាកសពកុមារារងគ្រោះបន្ទាប់ពីសមត្ថកិច្ចធ្វើកោសល្យវិច័យរួចហើយសមត្ថកិច្ចបានប្រគល់ឲ្យក្រុមគ្រួសារដើម្បីយកទៅធ្វើបុណ្យទៅតាមប្រពៃណី៕
ខេត្តរតនគិរី ៖ ព្រះរាជអាជ្ញារងអមសាលាដំបូងខេត្ត លោក ហាក់ ហ័ន បានដឹកនាំកម្លាំងនគរបាលការិយាល័យបច្ចេកទេសវិទ្យាសាស្ត្រនៃស្នងការដ្ឋាននគរបាលខេត្តចុះត្រួតពិនិត្យធ្វើកុសលវិច្ច័យលើសាកសពយុវជន២នាក់បន្ទាប់ពីយុវជនទាំង២នោះបានបាត់បង់ជីវិតនៅក្នុងអណ្តូងរ៉ែមាសក្រុមហ៊ុនមាសស្គូហ្គោលដោយសារធុងយោងរ៉ែដាច់ធ្លាក់ពីលើមកក្រោម។
យុវជន២នាក់ស្លាប់បាត់បង់ជីវិតនៅវេលាម៉ោង១០ និង៣០នាទីព្រឹកថ្ងៃទី១៣ ខែតុលា ឆ្នាំ២០១៧ ស្ថិតនៅភូមិពាក់ ឃុំយ៉ាទុង ស្រុកអូរយ៉ាដាវ នៅក្នុងក្រុមហ៊ុនធ្វើរ៉ែមាស «មាសស្គូហ្គោ»ត្រង់ចំណុចអណ្តូងរ៉ែមាស។
បើតាមការអោយដឹងពីកម្មករធ្វើការជាមួយគ្នាថា យុវជនទាំង២នាក់រងគ្រោះដោយសារដាច់ធុងយោងអាចម៌ដីធ្លាក់ពីលើបន្ទាប់ពីធុងយោងនោះបានដាក់ស៊ីម៉ងចុះទៅបាតរណ្តៅហើយពេលយោងធុងនោះឡើងមកវិញបានកម្ពស់ប្រមាណជាង២០ម៉ែត្រក៏ដាច់ទឹកអន្សាធ្លាក់មកវិញត្រូវយុវជនទាំង២ដែលនៅខាងក្រោមបណ្តាលឲ្យបាក់ចង្កេះ បាក់ថ្កាមទាំង២នាក់ស្លាប់ភ្លាមៗនៅកន្លែងកើតហេតុតែម្តង។
ប្រភពបានបន្តថា ជនរងគ្រោះទាំងពីរនាក់បងប្អូនមានឈ្មោះ ទី១ ឆក សារុំ ភេទប្រុស អាយុ២២ឆ្នាំ ទី២ឈ្មោះ ឆក សារិទ្ធ ភេទប្រុស អាយុ១៨ឆ្នាំ ជនជាតិខ្មែរ អ្នកទាំងពីរនាក់ជាបងប្អូនបង្កើតមានទីលំនៅភូមិកប្បា ឃុំមេម៉ង ស្រុកមេម៉ត់ ខេត្តត្បូងឃ្មុំ ទើបតែមកធ្វើការក្នុងក្រុមហ៊ុននេះបានជាងមួយសប្តាហ៍តែប៉ុណ្ណោះហើយប្រាក់កម្រៃម្នាក់ៗទទួលបាន៣ម៉ឺនរៀលក្នុង១ថ្ងៃ។
បន្ទាប់ពីកើតហេតុខាងក្រុមហ៊ុនបានរាយការណ៍មកសមត្ថកិច្ចនគរបាលខេត្ត ហើយដឹកសាកសពជនរងគ្រោះទាំង២មកវត្តភូមិថ្មី សង្កាត់ឡាបានសៀក ក្រុងបានលុង ដើម្បីប្រគល់ជូនព្រះរាជអាជ្ញារងអមសាលាដំបូងខេត្តរតនគិរីដឹកនាំកម្លាំងជំនាញចុះធ្វើកុសលវិច្ច័យ។
បើយោងតាមការឲ្យដឹងពីនគរបាលការិយាល័យបច្ចេកទេសវិទ្យាសាស្ត្រនៃស្នងការនគរបាលខេត្តថា ជនរងគ្រោះទាំង២ពិតជាគ្រោះថ្នាក់ដោយសារឧប្បវហេតុខាងលើពិតប្រាកដមែន។
បន្ទាប់ពីធ្វើកោសល្យវិច្ច័យរួចលោកព្រះរាជអាជ្ញារងបានបញ្ចាឲ្យសមត្ថកិច្ចធ្វើកំណត់ហេតុប្រគល់សាកសពជូនក្រុមគ្រួសារឫក្រុមហ៊ុនដើម្បីចាត់ចែងបន្ត។
បើតាមការឲ្យដឹងពីតំណាងក្រុមហ៊ុនរ៉ែមាស«មាសស្គូហ្គោ»របស់ក្រុមហ៊ុនឥណ្ឌានោះថា សាកសពទាំង២ត្រូវបានក្រុមហ៊ុនទទួលខុសត្រូវទាំងស្រុងទាំងជួលឡានពេទ្យដឹកសាកសពនិងធ្វើបុណ្យនៅខេត្តត្បូងឃ្មុំ។ លោកបានបន្តថា ចំណែកការសងសំណងទៅលើសាកសពទាំងពីរលោកមិនទាន់ដឹងថាខាងក្រុមហ៊ុនសងប៉ុន្មាននោះទេ ក៏ប៉ុន្តែលោកដឹងថា ខាងបេឡាជាតិសន្តិសុខសង្គមដែលហៅកាត់ថា ប ស ស និងធានាចិញ្ចឹមម្តាយជនរងគ្រោះអស់មួយជីវិត៕
ម៉ិចស៊ីកូ ៖ គ្រោះរញ្ជួយដីមួយកម្រិត៥.៤រ៉ិចទ័រ បានវាយប្រហារជាថ្មីម្តងទៀតនៅភាគអាគ្នេយ៍ នៃប្រទេសម៉ិចស៊ីកូ។ នេះបើតាមទីភ្នាក់ងារព័ត៌មានចិន ស៊ីនហួរ ចេញផ្សាយនៅមុនបន្តិច។
ទីភ្នាក់ងារស្ទាបស្ទង់ភូមិសាស្ត្រអាមេរិក USGS បានឲ្យដឹងថា ហេតុការណ៍រញ្ជួយផែនដីខាងលើ មានចំណុចរំញ័រនៅប៉ុន្មាន ០៩គីឡូម៉ែត្រពីភាគខាងក្រុង សាន់ ឌីអូនីស៊ីយ៉ូ ឌែល ម៉ា (San Dionisio del Mar) ដែលស្ថិតនៅភាគអាគ្នេយ៍ម៉ិចស៊ីកូ ហើយវាមានជម្រៅប្រមាណ ៥៩.៥២គីឡូម៉ែត្រ ក្រោមផ្ទៃសមុទ្រ។
ទោះបីយ៉ាងណានៅពុំទាន់ទទួលបានសេចក្តីរាយការណ៍ ស្តីពីមនុស្សរងគ្រោះ ឬការបំផ្លិចបំផ្លាញ ក៏ដូចជារលកយក្សស៊ូណាមិ ដែលអាចបង្កឡើងនៅឡើយទេ៕
ប៉េកាំង ៖ អ្នកនាំពាក្យអគ្គនាយកដ្ឋានគយរបស់ប្រទេសចិនបាននិយាយថា ការនាំចូលពីប្រទេសកូរ៉េខាងជើងមកកាន់ប្រទេសចិនបានធ្លាក់ចុះរហូតដល់ទៅ៣៧.៩% នៅក្នុងខែកញ្ញាបើធៀបទៅនឹងឆ្នាំមុន ដែលនេះបានបង្ហាញពីការធ្លាក់ចុះចំនួន៧ខែជាប់គ្នា។
អ្នកនាំពាក្យបានបន្ថែមថា ការនាំចូលនូវធ្យូងថ្ម, រ៉ែដែក និងសម្លៀកបំពាក់ត្រូវបានធ្លាក់ចុះទាំងអស់កាលពីខែកញ្ញា។ រីឯការនាំចេញពីប្រទេសចិនទៅកាន់ប្រទេសកូរ៉េខាងជើងនៅក្នុងខែកញ្ញាក៏បានធ្លាក់ចុះចំនួន៦.៧%ផងដែរ ប្រសិនបើធៀបទៅនឹងរយៈពេលដូចគ្នាកាលពីឆ្នាំមុន។
បើគិតនៅក្នុងរយៈពេល៩ខែដំបូងនៃឆ្នាំ២០១៧នេះ, ការនាំចូលពីប្រទេសកូរ៉េខាងជើងមកកាន់ប្រទេសចិនបានធ្លាក់ចុះចំនួន១៦.៧% ពោលគឺ១.៤៨ពាន់លានដុល្លារអាមេរិកបើធៀបទៅនឹងឆ្នាំមុន។ ប៉ុន្តែការនាំចេញរបស់ប្រទេសចិនទៅកាន់ប្រទេសកូរ៉េខាងជើងនៅក្នុងឆ្នាំនេះមានការកើនឡើងចំនួន២០.៩% ពោលគឺ២.៥៥ពាន់លានដុល្លារអាមេរិក ដែលកំណើននេះបានធ្វើឲ្យមានអតិរេកពាណិជ្ជកម្មជាមួយប្រទេសកូរ៉េខាងជើងចំនួន១.០៧ពាន់លានដុល្លារអាមេរិកនៅក្នុងរយៈពេល៩ខែដំបូងនៃឆ្នាំនេះ។
សូមជម្រាបថា ប្រទេសចិនក៏បានចូលរួមក្នុងការបង្កើនការដាក់ទណ្ឌកម្មពាណិជ្ជកម្មរបស់អង្គការសហប្រជាជាតិទៅលើប្រទេសកូរ៉េខាងជើងកាលពីខែកញ្ញា បន្ទាប់ពីប្រទេសកូរ៉េខាងជើងបានបាញ់សាកល្បងនុយក្លេអ៊ែរលើកទី៦របស់គេផងដែរ ៕
វ៉ាស៊ីនតោន ៖ ក្រុមអ្នកវិភាគបានលើកឡើងថា ការសម្រេចចិត្តរបស់រដ្ឋបាលប្រធានាធិបតី ដូណាល់ ត្រាំ ក្នុងការដកខ្លួនសហរដ្ឋអាមេរិក ចេញពីអង្គការ UNESCO គឺជាសញ្ញាថ្មីចុងក្រោយបំផុតមួយ ដែលបង្ហាញពីការកើនឡើង នៃភាពឃ្លាតដាច់ឆ្ងាយដោយឡែកពីគេរបស់អាមេរិក ព្រមទាំងដាក់សម្ពាធគាបសង្កត់របស់ទីក្រុងវ៉ាស៊ីនតោន មកលើអង្គការសហប្រជាតិ។ នេះបើតាមការដកស្រង់ចេញផ្សាយដោយសារព័ត៌មានរុស្ស៊ី Sputnik ។
ក្រុមអ្នកវិភាគមកពីសាកលវិទ្យាល័យធំៗ នៅសហរដ្ឋអាមេរិកបានឲ្យដឹងថា ការធ្វើបែបនេះនឹងគូសបញ្ជាក់កាន់តែច្បាស់ ពីភាពឯកោរបស់សហរដ្ឋអាមេរិក នៅក្នុងអង្គការពិភពលោកមួយនេះ ដោយវានឹងជះឥទ្ធិពលអវិជ្ជមាន ទៅលើទីក្រុងវ៉ាស៊ីនតោនផ្ទាល់ ច្រើនជាងមកលើអង្គការបេតិកភណ្ឌពិភពលោក UNESCO ខណៈការសម្រេចចិត្តដ៏ចម្លែកនេះ នឹងបង្កើនភាពឯកោរបស់សហរដ្ឋអាមេរិក នៅក្នុងសហគមន៍អន្តរជាតិ។
ម្យ៉ាងវិញទៀត ការសម្រេចចិត្តខាងលើ នឹងធ្វើឲ្យអាមេរិកជាប់គាំងកាន់តែខ្លាំង នៅក្នុងរង្វង់នៃភាពឯកោក៏ដូចជាមន្ទិលសង្ស័យ ពាក់ព័ន្ធនឹងការធ្វើកិច្ចសហប្រតិបត្តិការជាមួយបណ្តាអង្គការអន្តរជាតិ ហើយវានឹងបង្កផលវិបាកជាខ្លាំង ដើម្បីផ្លាស់ប្តូរការសម្រេចចិត្តនេះវិញ សម្រាប់រដ្ឋបាលក្រោយថ្មីទៀត។
បើតាមក្រុមសាស្ត្រចារ្យជំនាញៗដដែលថា ការសម្រេចចិត្តរបស់ លោក ត្រាំ ក្នុងការដកអាមេរិកចេញពីអង្គការ UNESCO គឺស្ថិតក្រោមក្របខណ្ឌនៃយុទ្ធនាការរបស់ទីក្រុងវ៉ាស៊ីនតោន ដើម្បីធ្វើយ៉ាងណាមិនឲ្យអង្គការសហប្រជាជាតិ រួមទាំងអង្គការពាក់ព័ន្ធផ្សេងៗទៀត មានឥទ្ធិពលក្នុងការជួយប៉ាឡេស្ទីន ប្រឆាំងនឹងអ៊ីស្រាអែល។
សូមរម្លឹកថា ម្សិលមិញសហរដ្ឋអាមេរិកបានប្រកាសថា នឹងដកខ្លួនចេញពីអង្គការ UNESCO នៅចុងឆ្នាំ២០១៨ខាងមុខ ដោយឈរលើហេតុផលថា អង្គការបេតិកភណ្ឌពិភពលោកត្រូវការធ្វើកំណែទម្រង់ឡើងវិញ ហើយ UNESCO មានទំនោរប្រឆាំងនឹងអ៊ីស្រាអែល៕
រាជធានីភ្នំពេញ ៖ ឥទ្ធិពលព្យុះទី២០ ឈ្មោះ ខាណុន នឹងនាំឲ្យមានភ្លៀងធ្លាក់រាយប៉ាយអាចបង្កឲ្យមានជំនន់ទឹកភ្លៀងច្រើនកន្លែងទៀតផងចាប់ពីថ្ងៃទី១៥ ដល់ថ្ងៃទី១៩ ខែតុលា ឆ្នាំ២០១៧នេះ។ នេះយោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយម។
សេចក្ដីជូនដំណឹងដដែលបានបញ្ជាក់ថា ព្យុះទី២០ឈ្មោះ ខាណុន ដែលបានវិវត្តន៍ខ្លួនពីសម្ពាធទាប និងកំពុងស្ថិតនៅភាគខាងជើង ប្រទេសហ្វីលីពីន ហើយពេលធ្វើដំណើរដល់សមុទ្រចិនខាងត្បូង នឹងបង្កើនឥទ្ធិពលទៅជាព្យុះទីហ្វុង ឆ្ពោះមកទិសខាងលិច ក្នុងល្បឿន១២០គីឡូម៉ែត្រក្នុងមួយម៉ោង៕
ខេត្តកំពត ៖ កម្លាំងសមត្ថកិច្ចនគរបាលព្រហ្មទណ្ឌខេត្តកំពតបានចាប់ឃាត់បុរសល្មោភកាមម្នាក់ ដែលបានល្បួងក្មេងស្រីជាអនីតិជនអាយុ១៦ឆ្នាំ ទៅរំលោភសេពសន្ថវៈ រហូតបានសម្រេច ខណៈដែលកាឃាត់ខ្លួននេះធ្វើឡើងកាលពីរសៀលថ្ងៃទី១២ ខែតុលា ឆ្នាំ២០១៧ម្សិលមិញ ស្ថិតនៅភូមិស្រែចែង ឃុំស្រែចែង ស្រុកជុំគិរី ខេត្តកំពត។
សមត្ថកិច្ចបានឲ្យដឹងថា ជនសង្ស័យឈ្មោះ សៅ ណុប អាយុ២២ឆ្នាំ រសនៅភូមិ ឃុំ កន្លែងឃាត់ខ្លួនខាងលើ។ ចំណែកក្មេងស្រីរងគ្រោះអាយុ១៦ឆ្នាំ រស់នៅភូមិកំណប់ ឃុំស្រែចែង ស្រុកជុំគិរី ខេត្តកំពត។សមត្ថកិច្ចនគរបាលដដែលបានបន្តថា ជនសង្ស័យខាងលើត្រូវបានកម្លាំងសមត្ថកិច្ចឃាត់ខ្លួនបានពីបទលួងលោមរំលោភសេពសន្ថវៈ លើជនរងគ្រោះដែលបានប្រព្រឹត្តធ្វើសកម្មភាពរំលោភសេពសន្ថវ កាលពីវេលាម៉ោង១១៖៣០នាទីយប់ នាថ្ងៃទី១១ ខែតុលា ឆ្នាំ២០១៧។
បើតាមសមត្ថកិច្ចបានបញ្ជាក់ថា ជនសង្ស័យប្រើល្បិចទូរស័ព្ទហៅជនរងគ្រោះទៅហូបស៊ុប នៅផ្សារត្រពាំងអណ្ដើក ហើយជនសង្ស័យ ក៏ដឹកជនរងគ្រោះទៅដេកនៅបន្ទប់ សាលារៀននៅម្ដុំផ្សារ អង្គតាសោម ស្រុកត្រាំកក់ ខេត្តតាកែវ ហើយជនសង្ស័យធ្វើសកម្មភាពចាប់រំលោភជនរងគ្រោះបានសម្រចតែម្តង។ ក្រោយពីបែកការណ៍ ក្រុមគ្រួសារខាងជនរងគ្រោះបានប្តឹងសមត្ថកិច្ចឲ្យឃាត់ខ្លួនជនសង្ស័យខាងលើតែម្តង។
បច្ចុប្បន្នជនសង្ស័យកំពុងសាកសួរ នៅការិយាល័យនគរបាលព្រហ្មទណ្ឌកម្រិតធ្ងន់ខេត្ត ដើម្បីចាត់ការតាមនីតិវិធីច្បាប់៕
ខេត្តក្រចេះ ៖ ជនសង្ស័យប្រុសស្រីចំនួន១០នាក់ នឹងត្រូវសមត្ថកិច្ចជំនាញបញ្ជូនទៅសាលាដំបូងខេត្តក្រចេះនៅថ្ងៃទី១៣ ខែតុលា នេះ ពាក់ព័ន្ធករណីជួញដូរ និងចែកចាយគ្រឿងញៀន ប្រព្រឹត្តទៅនៅក្នុងទីតាំងស្តុកឈើកែឆ្នៃឈើមួយកន្លែងក្នុងស្រុកចិត្របុរី ។
ជនសង្ស័យប្រុសស្រីទាំង១០នាក់ មានជាប់ពាក់ព័ន្ធនឹងករណីជួញដូរ និងចែកចាយគ្រឿងញៀនយ៉ាងអនាធិបតេយ្យ នៅក្នុងភូមិសាស្ត្រខាងលើ ហើយក៏ជាកន្លែងទីតាំងស្តុក និងកែច្នៃឈើខុសច្បាប់ផងដែរ។ ដោយឡែកក្មេងស្រី៣នាក់ផ្សេងទៀតទើបនឹងមកពីខេត្តព្រៃវែងទៅលេងផ្ទះបងប្អូនក្បែរទីតាំងលើត្រូវបានសមត្ថកិច្ចរកឃើញថា មិនមានជាប់ពាក់ព័ន្ធក៏សម្រេចដោះលែងវិញ៕
អាមេរិក ៖ អាជ្ញាធរបាននិយាយថា ចំនួនមនុស្សស្លាប់បានកើនដល់៣១នាក់ហើយដោយសារភ្លើងឆេះព្រៃយ៉ាងសន្ធោសន្ធៅនៅភាគខាងជើងរដ្ឋកាលីហ្វរញ៉ា ដែលជាភ្លើងឆេះព្រៃសម្លាប់មនុស្សច្រើនបំផុត នៅក្នុងប្រវត្តិសាស្ត្រសហរដ្ឋអាមេរិក។ នេះបើតាមសារព័ត៌មាន The Guardian ចេញផ្សាយនៅព្រឹកថ្ងៃសុក្រនេះ។
អាជ្ញាធរបញ្ជាក់ថា មនុស្សពីរនាក់បន្ថែមទៀតត្រូវគេរាយការណ៍ថា បានស្លាប់កាលពីយប់ថ្ងៃព្រហស្បតិ៍ ហើយនេះបានធ្វើឱ្យចំនួនអ្នកសា្លប់កើនឡើងពី ២៩នាក់ដល់៣១នាក់ ខណៈតំបន់រងគ្រោះខ្លាំងជាងគេ គឺនៅតំបន់ ណាប៉ា (Napa) និង សូណូម៉ា (Sonoma) នៃភាគកណ្ដាលរដ្ឋកាលីហ្វ័រញ៉ា ដោយភ្លើងបានឆាប់ឆេះលើផ្ទៃដី ៥២,០០០ហិកតា និងបង្កផលប៉ះពាល់ដល់តំបន់ផលិតស្រាដ៏ធំផងដែរ។ ទន្ទឹមនោះមនុស្សជាង ៥,០០០នាក់ កំពុងបន្តស្ថិតក្នុងទីជម្រកសុវត្ថិភាពដដែល រីឯក្រុមអ្នកពន្លត់អគ្គីភ័យច្រើនជាង ៨,០០០នាក់ កំពុងតស៊ូប្រយុទ្ធនឹងអណា្ដតភ្លើង៕
ខេត្តស្វាយរៀង ៖ នៅព្រឹកថ្ងៃទី១៣ ខែតុលា ឆ្នាំ២០១៧នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិអមដំណើរដោយមន្ត្រីក្រសួងការពារជាតិ និងមន្ត្រីជាន់ខ្ពស់នៃកងកម្លាំងប្រដាប់អាវុធជាច្រើនរូប បានធ្វើដំណើរចុះមកដល់តំបន់គ្រាប់បែកគីមីអាមេរិក ដែលបន្សល់ទុកពីសម័យសង្គ្រាម ស្ថិតនៅក្នុងឃុំគគីរ ស្រុករមាសហែក ខេត្តស្វាយរៀង បន្ទាប់គ្រាប់បែកគីមីសល់ពីសម័យសង្គ្រាម ជាច្រើនគ្រាប់ត្រូវបានរកឃើញជាបន្តបន្ទាប់។
សូមជម្រាប់ថា កម្លាំងអាជ្ញាធរជាតិអាវុធគីមី និងកម្លាំងមជ្ឈមណ្ឌលបោសសំអាតមីន និងយុទ្ធភណ្ឌមិនទាន់ផ្ទុះ បានរកឃើញគ្រាប់បែកគីមីបន្សល់ពី សម័យសង្គ្រាមរហូតដល់ ១៥ទីតាំងហើយនៅក្នុងឃុំគគី។ តាមការប៉ាន់ស្មានអាចនឹងមានគ្រាប់បែកជាច្រើនទៀត បន្សល់នៅក្នុងឃុំនេះ ដែលមិនទាន់រកឃើញនៅឡើយ៕
ខេត្តរតនគិរី ៖ កម្លាំងសមត្ថកិច្ចចម្រុះស្រុកអូរយ៉ាដាវស្ទាក់ចាប់បានរថយន្តដឹកឈើប្រណីត១គ្រឿង កាលពីវេលាម៉ោង៣ និង៣០នាទីរសៀលថ្ងៃទី១២ ខែតុលា ឆ្នាំ២០១៧ តាមបណ្តោយផ្លូវជាតិលេខ៧៨ ត្រង់ចំណុចភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។
ប្រតិបត្តិការបង្ក្រាបនេះ ដឹកនាំដោយលោក ស៊ឹម លីន អភិបាលរងស្រុកអូរយ៉ាដាវ ជាប្រធានចម្រុះ និង លោក កង សារឿន ប្រធានចម្រុះខេត្ត បានដឹកនាំកម្លាំង សហការគ្នាឃាត់រថយន្តដឹកឈើប្រណិត១គ្រឿង ម៉ាក MAZDA ស៊េរីចាស់ ពណ៌ខ្មៅ ពាក់ស្លាកលេខ ភ្នំពេញ 2B- 8631 បានផ្ទុកឈើប្រណិតជាច្រើនដុំនៅក្នុងរថយន្ត។ បច្ចុប្បន្នវត្ថុតាងនឹងរថយន្តត្រូវបានប្រគល់ទៅឲ្យជំនាញរដ្ឋបាលព្រៃឈើផ្នែកបកែវចាត់ការបន្តតាមនិតិវិធី៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
