ខេត្តរតនគិរី ៖ សមត្ថកិច្ចបានចាប់ពិរុទ្ធជនម្នាក់ដែលលួចរត់ចេញពីពន្ធនាគារភ្នំស្វាយ កាលពីថ្ងៃទី២៥ ខែឧសភា ឆ្នាំ២០១៧កន្លងទៅមកវិញហើយកាលពីព្រឹកថ្ងៃទី២៩ ខែតុលា ឆ្នាំ២០១៧។
សមត្ថកិច្ចបានប្រាប់ឲ្យដឹងថា ពិរុទ្ធជនរូបនេះឈ្មោះ កែវ ឆក ភេទប្រុស អាយុ២៤ឆ្នាំជនជាតិខ្មែរ មានទីលំនៅភូមិ៤ សង្កាត់កាចាញ ក្រុងបានលុង ខេត្តរតនគិរី ត្រូវបានកម្លាំងឃាត់ខ្លួនតាមដីកាបង្គាប់លេខ ១៥/១៧ ចុះថ្ងៃទី១២ ខែមិថុនា ឆ្នាំ២០១៧ ចេញដោយចៅក្រមស៊ើបសួរ ឈុន ច័ន្ទសីហា នៃសាលាដំបូងខេត្តរតនគិរី។
បច្ចុប្បន្ននគរបាលក្រុងបានលុងបានបញ្ជូនពិរុទ្ធជនរូបនេះទៅសាលាដំបូងខេត្ត ដើម្បីចាត់វិធានការតាមច្បាប់៕
ខេត្តស្វាយរៀង ៖ យ៉ាងហោចណាស់ក៏មានប្រជាពលរដ្ឋចំនួន៣៦នាក់ រស់នៅឃុំគគីរ ស្រុករមាសហែក ខេត្តស្វាយរៀង ដែលសង្ស័យរងការប៉ះពាល់ពីគ្រាប់បែកគីមីរបស់អាមេរិកនោះ កំពុងសម្រាកព្យាបាលនៅមន្ទីរពេទ្យបង្អែក ខេត្តស្វាយរៀងនៅឡើយ ។ នេះបើមន្ត្រីសុខាភិបាលខេត្តស្វាយរៀង។
យ៉ាងណាក៏ដោយ មន្ត្រីជំនាញខាងលើបានអះអាងថា ចំនួនអ្នកជំងឺទាំង៣៦នាក់នោះ ភាគច្រើនមានបញ្ហារមាស់លើរាងកាយនិងបញ្ហាផ្សេងៗ ទៀត ដែលសង្ស័យមានការប៉ះពាល់ពីគ្រាប់បែករបស់សហរដ្ឋអាមេរិក ៕
អេស្ប៉ាញ ៖ មេដឹកនាំចលនាឯករាជ្យតំបន់កាតាឡូណា លោក Carles Puigdemont បានថ្លែងប្រឆាំងទៅនឹងសេចក្ដីសម្រេចរបស់រដ្ឋាភិបាលកណ្ដាលអេស្ប៉ាញ ដែលបានបណ្ដេញរូបលោកចេញពីតំណែង ដោយជំរុញឲ្យតស៊ូប្រឆាំងក្នុងលក្ខណៈប្រជាធិបតេយ្យ ចំពោះការគ្រប់គ្រងដោយផ្ទាល់ ដែលត្រូវបានដាក់តំបន់នេះ ដើម្បីបញ្ឈប់ការប៉ុនប៉ងបំបែកខ្លួនចេញពីអេស្ប៉ាញ។ នេះបើយោងតាមទីភ្នាក់ងារព័ត៌មាន AFP។
នៅក្នុងសេចក្ដីថ្លែងការណ៍តាមទូរទស្សន៍ លោក Puigdemont បានចោទរដ្ឋាភិបាលក្រុងម៉ាឌ្រីតថា បានជាន់ពន្លិចឆន្ទៈរបស់ប្រជាជនកាតាឡូណាដែលចង់បានឯករាជ្យ។ លោកថ្លែងបន្តថា ការសម្រេចចិត្តរបស់ក្រុងម៉ាឌ្រីតដណ្ដើមអំណាចពីតំបន់កាតាឡូណាបង្កើតទៅជា «ការឈ្លានពាន»។
ជាមួយគ្នានោះមេដឹកនាំផ្ដាច់ខ្លួនរូបនេះបាននិយាយថា ការជំទាស់តាមបែបប្រជាធិបតេយ្យ គឺជាវិធីទៅមុខតែមួយគត់ ប៉ុន្តែលោកមិនបានបញ្ជាក់ឲ្យច្បាស់លាស់អំពីទម្រង់នៃការជំទាស់ដែលលោកអាចប្រកាន់យកនោះឡើយ៕
តេអ៊ីរ៉ង់ ៖ ទីភ្នាក់ងារសារព័ត៌មាន ចិនស៊ិនហួ ចេញផ្សាយដោយដកស្រង់សម្តីមន្ត្រីថាមពលអ៊ីរ៉ង់ ថា ប្រទេសអ៊ីរ៉ង់នឹងចាប់ផ្តើមនាំប្រេងចេញទៅប្រទេសរុស្ស៊ី ក្នុងពេលឆាប់ៗខាងមុខ ក្រោមផែនការណ៍នាំចេញប្រេងដោះដូរនឹងទំនិញ។
ដោយឡែកបើតាមអនុរដ្ឋមន្ត្រីប្រេងប្រទេស អ៊ីរ៉ង់ លោក Ali Kardor ថា កន្លងមកបញ្ហាធនាគារដែលបានបង្កការរាំងស្ទះ ដល់ការនាំចេញប្រេងពីប្រទេស អ៊ីរ៉ង់ ទៅកាន់ប្រទេស រុស្ស៊ី ប៉ុន្តែក្រោយមកបញ្ហានេះត្រូវបានដោះស្រាយរួចរាល់ ដែលអាចឱ្យប្រទេសទាំងពីរចាប់ផ្តើមទំនាក់ទំនងនេះឡើងវិញ។
សូមបញ្ជាក់ថា កាលពីឆ្នាំ២០១៤កន្លងទៅនេះ ប្រទេស អ៊ីរ៉ង់ និងរុស្ស៊ី បានឈានដល់កិច្ចព្រមព្រៀងមួយ ដោយរដ្ឋាភិបាលក្រុង ម៉ូស្គូ នឹងទិញប្រេងអ៊ីរ៉ង់ចំនួន ៥០០,០០០បារ៉ែលក្នុងមួយថ្ងៃ ជាថ្នូរនឹងការផ្គត់ផ្គង់ជាសម្ភារៈ និងទំនិញដល់រដ្ឋាភិបាលក្រុងតេអ៊ីរ៉ង់វិញ៕
សូម៉ាលី ៖ អាជ្ញាធរសូម៉ាលីបានឱ្យដឹងថា មនុស្សយ៉ាងហោចណាស់ចំនួន២៥នាក់បានស្លាប់នៅការវាយប្រហារបំផ្ទុះគ្រាប់បែកពីរ នៅក្នុងរដ្ឋធានី Mogadishu ពោលគឺតែពីរសប្ដាហ៍ប៉ុណ្ណោះបន្ទាប់ពី មនុស្ស៣៥៨នាក់ ត្រូវបានសម្លាប់នៅក្នុងការវាយប្រហារបំផ្ទុះគ្រាប់បែកដ៏អាក្រក់បំផុត នៅក្នុងរដ្ឋធានីនៃប្រទេសអាហ្វ្រិកមួយនេះ។ នេះបើតាមទីភ្នាក់ងារសារព័ត៌មាន Reuters ។
យោងតាមអាជ្ញាធរនៅក្នុងតំបន់បានថ្លែងថា ក្រុមសកម្មប្រយុទ្ធជាច្រើននាក់បានដឹកនាំការវាយប្រហារបំផ្ទុះគ្រាប់បែកបង្កៃក្នុងរថយន្ដ កាលពីថ្ងៃសៅរ៍ សំដៅទៅលើសណ្ឋាគារមួយកន្លែង ខណៈគ្រាប់បែក ទីពីរត្រូវគេបំផ្ទុះ នៅក្បែរអតីតវិមានសភានៅជិតនោះ ដោយបានផ្ដាច់យកអាយុជីវិតមនុស្ស២៥នាក់ និងជាច្រើននាក់ទៀតរងរបួស។
ភ្លាមៗនោះដែរក្រុមឧទ្ទាម al-Shabab មានទំនាក់ទំនងជាមួយក្រុមអាល់កៃដា បានចេញអះអាងថា ខ្លួនអ្នកនៅពីក្រោយការវាយប្រហារបំផ្ទុះគ្រាប់បែកទាំងពីរលើកនេះ ហើយថាខ្លួនជ្រើសរើសគោលដៅនៃការវាយប្រហារនេះ ពីព្រោះវាទីប្រជុំជនសម្បូរមន្ត្រីសន្តិសុខ និងអ្នកនយោបាយ៕
រាជធានីភ្នំពេញ ៖ គិតត្រឹមម៉ោង៦ល្ងាចថ្ងៃទី២៦ ខែតុលា ឆ្នាំ២០១៧ ដំណើរការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧ មានប្រជាពលរដ្ឋខ្មែរចំនួន ៤៥៤,១១៦នាក់ហើយ បានទៅចុះឈ្មោះបោះឆ្នោត ខណៈការចុះឈ្មោះឆ្នោតនឹងត្រូវបញ្ចប់ត្រឹមថ្ងៃទី០៩ ខែវិច្ឆិកា ឆ្នាំ២០១៧ខាងមុខ។ នេះបើតាមគណៈកម្មាធិការជាតិរៀបចំការបោះឆ្នោត (គ.ជ.ប)។
សូមបញ្ជាក់ថា តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង១.៦លាននាក់ ខណៈប្រជាពលរដ្ឋខ្មែរដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩.៨លាននាក់៕
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) ចេញផ្សាយនូវប្រតិទិនថ្មី នៃការបោះឆ្នោតជ្រើស តាំងសមាជិកព្រឹទ្ធសភា នីតិកាលទី៤ ឆ្នាំ២០១៨ បន្ទាប់ពីរាជរដ្ឋាភិបាល សម្រេចលើកថ្ងៃបោះឆ្នោតពីថ្ងៃទី១៤ ខែមករា ទៅថ្ងៃទី២៥ ខែកុម្ភៈ ឆ្នាំ២០១៨វិញ។
សូមបញ្ជាក់ថា កាលពីថ្ងៃទី២៧ ខែតុលា ឆ្នាំ២០១៧ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានចេញសេចក្តីសម្រេចដោយកែសម្រួលកាលបរិច្ឆេទ នៃការបោះឆ្នោតជ្រើសតាំងសមាជិកព្រឹទ្ធសភា ទៅថ្ងៃអាទិត្យ ទី២៥ ខែកុម្ភៈ ឆ្នាំ២០១៨វិញ៕
ខេត្តប៉ៃលិន ៖ អាជ្ញាធរថៃបានចាប់ខ្លួនកម្មករខ្មែរចំនួន៧នាក់ ដែលលួចឆ្លងដែនចូលកាប់ឈើខុសច្បាប់ក្នុងទឹកដីថៃ ក្នុងចន្លោះបង្គោលព្រំដែនលេខ៦៧ និង៦៨ ជាប់នឹងភូមិបហ៊ុយត្បូង សង្កាត់បយ៉ាខា ក្រុងប៉ៃលិន នៅវេលាម៉ោង៧ និង៣០នាទីព្រឹក ថ្ងៃទី២៧ ខែតុលា ឆ្នាំ២០១៧នេះ។
អាជ្ញាធរថៃបានរាយការណ៍ថា ពលរដ្ឋខ្មែរដែលត្រូវចាប់ខ្លួននោះ ទី១-ឈ្មោះ ខ្លឹម ចិត្រ ភេទប្រុស អាយុ៤៣ឆ្នាំ ទី២-ឈ្មោះ ហ៊ុន សុខសាន្ដ ភេទប្រុស អាយុ៣៤ឆ្នាំ ទី៣-ឈ្មោះ យ៉ាប់ ធា ភេទប្រុស អាយុ៣២ឆ្នាំ ទី៤-ឈ្មោះ អឹម ភីន ភេទប្រុស អាយុ២៥ឆ្នាំ, ទាំង៤នាក់រស់នៅក្នុងភូមិបតាំងស៊ូ សង្កាត់បយ៉ាខា ក្រុងប៉ៃលិន។ ទី៥- ឈ្មោះ ទិត រិន ភេទប្រុស អាយុ២៤ឆ្នាំ រស់នៅភូមិ បរហ៊ុយត្បូង សង្កាត់បរយ៉ាខា ក្រុងប៉ៃលិន ទី៦- ឈ្មោះ រ៉ុន ភេទប្រុស អាយុ៤៥ឆ្នាំ និងទី៧-ឈ្មោះ សិទ្ធ ភេទប្រុស អាយុ២៥ឆ្នាំ, ទាំង២នាក់ រស់នៅភូមិបហ៊ុយជើង សង្កាត់បយ៉ាខា ក្រុងប៉ៃលិន។
តាមរបាយការណ៍ឲ្យដឹងថា បច្ចុប្បន្នជនសង្ស័យទាំង៧នាក់ខាងលើ ត្រូវបានទាហានថៃបញ្ជូនទៅស្រុកពោងណាំរ៉ន ខេត្ដចាន់បូរី ប្រទេសថៃ ដើម្បីចាត់ការតាមនីតិវិធី ៕
រាជធានីភ្នំពេញ ៖ អតីតប្រធានគណបក្សសង្គ្រោះជាតិ ដែលកំពុងនិរទេសខ្លួនលោក សម រង្ស៊ី នៅថ្ងៃទី២៧ ខែតុលា ឆ្នាំ២០១៧នេះ បានចេញនូវវីដេអូឃ្លីបមួយ ខណៈដែលខ្លឹមសារខ្លះៗ ដែលលោកបាននិយាយធ្វើឲ្យគេកត់សម្គាល់ថា លោកចាប់ផ្តើមសង្ស័យលើលោក កឹម សុខា ដែលកំពុងជាប់ឃុំខ្លួនក្នុងពន្ធនាគារត្រពាំងថ្លុង។
លោក សម រង្ស៊ី បាននិយាយថា « ឥឡូវនេះលោក កឹម សុខា គឺស្ថិតនៅក្រោមការគំរាមកំហែង ។ ដូច្នេះរាល់សេចក្តីសម្រេច ឬសេចក្តីប្រកាសអ្វីមួយរបស់លោក កឹម សុខា យើងជឿ ជាក់ថា មិនមែនជាសេចក្តីសម្រេចរបស់គាត់ពិតប្រាកដនោះទេ » ។ លោកបន្តថា បើគាត់មានសេរីភាពពេញលេញ គឺគាត់ច្បាស់ជាមិនធ្វើអ្វីតាមគេបង្គាប់បញ្ជារឲ្យគាត់ធ្វើនោះទេ ។ លោកថា មានអ្នកខ្លះកំពុងយក ឈ្មោះលោក កឹម សុខា ទៅប្រើប្រាស់ ដើម្បីទាក់ទាញមន្ត្រីគណបក្សសង្គ្រោះជាតិឲ្យចុះចូល ជាមួយបក្សកាន់អំណាច!….។
លោក សម រង្ស៊ី បាននិយាយថា យើងមិនព្រមដាច់ខាតរាល់ការសម្រេចទាំងឡាយណា របស់លោក កឹម សុខា នៅពេលដែលលោក កឹម សុខា ពុំមានសេរីភាពគ្រប់គ្រាន់ ។លោកថា រាល់ការសម្រេចរបស់គណបក្សសង្គ្រោះជាតិ គឺមានតែគណកម្មាធិការអចិន្ត្រៃយ៍គណបក្សទើប ធ្វើសេចក្តីសម្រេចចិត្តបាន ។
ការប្រកាសរបស់លោក សម រង្ស៊ី ធ្វើឡើងបន្ទាប់ពីចរន្តនៃការចុះចូលរបស់មន្ត្រីថ្នាក់លើ និងមន្ត្រីថ្នាក់មូលដ្ឋានរបស់គណបក្សសង្គ្រោះជាតិ ទៅចូលរួមជីវភាពនយោបាយជាមួយ CPP កាន់តែច្រើនឡើងៗ បើទោះជាមន្ត្រីមួយចំនួនបានធ្វើការរារាំងតាមគ្រប់រូបភាពក៏ដោយ ។
តាមព័ត៌មានទទួលបានមន្ត្រីភាគច្រើនរបស់គណបក្សសង្គ្រោះជាតិ បានទទួលសារណែនាំពីមន្ត្រីជំនិតរបស់លោក កឹម សុខា ដែលផ្តាំផ្ញើឲ្យមន្ត្រីគណបក្សសង្គ្រោះជាតិ ចុះចូលជាមួយបក្សប្រជាជនកម្ពុជាទៅ ដើម្បីរក្សាតំណែង និងអនាគតនយោបាយ ព្រោះគណបក្សសង្គ្រោះជាតិនឹងត្រូវរលាយនៅពេលឆាប់ៗ ខាងមុខនេះហើយរឿងក្បត់ជាតិ ។
ព័ត៌មានខាងលើនេះ បានធ្វើឲ្យលោក សម រង្ស៊ី កើតមន្ទិលយ៉ាងខ្លាំង ចំពោះលោក កឹម សុខា ដែលអាចនិយាយថា លោក កឹម សុខា កំពុងតែត្រូវរ៉ូវគ្នាជាមួយថ្នាក់ដឹកនាំបក្សកាន់ អំណាច ហើយបង្កើតឆាកល្ខោននយោបាយនេះឡើង ដោយលោក កឹម សុខា សុខចិត្តទទួលយកទោសក្បត់ជាតិ ជាថ្នូរនឹងអ្វីមួយ ។
ទាក់ទងព័ត៌មាននេះ គេគួរតែរម្លឹកទៅអតីតកាលបន្តិចនៅពេលដែល Facebook សីហា បានទម្លាយសម្លេងឆ្លើយឆ្លងរវាងសម្តេច ហ៊ុន សែន និងលោក កឹម សុខា ក្នុងការរៀបចំសេណា នីយោ ទាញទម្លាក់លោក សម រង្ស៊ី ពីប្រធានគណបក្សសង្គ្រោះជាតិ ហើយតំណែងប្រធាន គណបក្សសង្គ្រោះជាតិត្រូវដណ្តើមកាន់កាបដោយលោក កឹម សុខា ។ បើយើងបានស្តាប់ និងពិចារណាទៅលើសម្លេងឆ្លើយឆ្លងនោះ គឺសម្តេច ហ៊ុន សែន និងលោក កឹម សុខា ជាមនុស្សក្នុងក្រុមជាមួយគ្នា ហើយរួមគ្នាកម្ចាត់លោក សម រង្ស៊ី ៕
ភ្នំពេញ ៖ ជនសង្សយ័ម្នាក់បានធ្វើសកម្មភាពឆក់ទូរសព្ទ័មួយគ្រឿងម៉ាក Iphone5 ពីយុវតី២នាក់ខណៈអង្គុយលើបង់លេងជាមួយមិត្តភក្តិ។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង៩ និង១៥នាទីព្រឹកថ្ងៃទី២៧ ខែតុលា ឆ្នាំ២០១៧ ស្ថិតនៅក្នុងបរិវេណកោះពេជ្រក្នុងសង្កាត់ទន្លេបាសាក់ខណ្ឌចំការមន។
បើយោងតាមសម្តីយុវតីរងគ្រោះខាងលើបានអោយដឹងថា មុនពេលកើតហេតុរូបនាងនិងមិត្តភក្រ័ម្នាក់ទៀតបានអង្គុយចុចទូរស័ព្ទលេង ស្របពេលនោះក៏លេចមុខជនសង្សយម្នាក់ជិះម៉ូតូមួយគ្រឿងម៉ាកC125 សេរីឆ្នាំ២០១៥ ពណ៌ខ្មៅពាក់ស្លាកលេខកំពង់ឆ្នាំង1A0159បានជិះមកក្បែរនាង ហើយសួរថា មេច ហើយមកអង្គុយលេងតែ២នាក់ទេហ្អ៊ែ ហើយក៏បានឆក់ទូរស័ព្ទពីដៃនាង ហើយព្យាយាមជិះម៉ូតូរត់គេចខ្លួន តែត្រូវបានសន្តិសុខ និងប្រជាពលរដ្ឋចាប់វាយបែកក្បាលប្រគល់អោយនគរបាលប៉ុស្តិ៍ទន្លេបាសាក់។
សមត្ថកិច្ចបានអោយដឹងថា ជនសង្ស័យមានឈ្មោះ ភុន អាក់ អាយុ២៩ឆ្នាំ មុខរបររត់ម៉ូតូឌុបស្នាក់នៅបន្ទប់ជួលភូមិតាឡី សង្កាត់ដង្កោ ខណ្ឌដង្កោ។ ចំណែកយុវតីរងគ្រោះខាងលើមានឈ្មោះ គុណ ណាវីអាយុ១៦ឆ្នាំស្នាក់នៅម្តំផ្សាររាត្រី។
បច្ចុប្បន្នជនសង្ស័យលើត្រូវបានបញ្ជូនទៅឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌចំការមនដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី៕
រាជធានីភ្នំពេញ ៖ អ្នកនាំពាក្យរាជរដ្ឋាភិបាល លោក ផៃ ស៊ីផាន បានដកស្រង់ប្រសាសន៍សម្តេច មកបញ្ជាក់ថា «សម្តេចតេជោ គ្មានទ្រព្យសម្បត្តិណាទុកនៅក្រៅប្រទេសទេ គឺមានតែថវិកាកសាងសាលារៀន កសាងជាតិតែប៉ុណ្ណោះ ។ សម្តេចបញ្ជាក់ថា ការចូលទៅកាន់ទឹកដីសហរដ្ឋអាមេរិកមិនប៉ះពាល់ដល់អារម្មណ៍របស់សម្តេចនោះទេ សម្តេចគ្មានពេលធ្វើដំណើរទៅសហរដ្ឋអាមេរិកទាល់តែសោះ ក៏ប៉ុន្តែមន្ត្រីណាមួយប៉ះពាល់ជារឿងដាច់ដោយឡែកតែប៉ុណ្ណោះ»។
សម្តេច ហ៊ុន សែន បានបញ្ជាក់បន្ថែមថា គ្មានអ្វីអាចបង្វែរទិសដៅនៃការបេ្តជ្ញាការពារកម្ពុជា មិនអោយវិលត្រលប់ទៅកាន់អតីតកាល នៃសោកដនាកម្មកម្ពុជា ដែលបំផ្លាញដោយបរទេសនោះទេ។
សម្តេច ហ៊ុន សែន បានបង្ហាញជំហររឹងមាំក្នុងកិច្ចការការពារ និងថែរក្សា សន្តិភាព សន្តិសុខជាតិ និងវិបុលភាព សម្រាប់ប្រជាជាតិខ្មែរទាំងអស់ ទោះជាតម្លៃណាក៏ដោយ គឺមិនអនុញ្ញាតឲ្យកម្ពុជាវិលត្រឡប់ទៅកាន់សភាពការអាក្រក់ដូចឆ្នាំ១៩៧០ ដែលបំផ្លាញអនាគតកម្ពុជាជាច្រើនទសវត្សរ៍នោះឡើយ៕
កូរ៉េខាងត្បូង ៖ នៅថ្ងៃសុក្រនេះរដ្ឋមន្ត្រីការពារសហរដ្ឋអាមេរិកលោក ជេម ម៉ាទីស (James Mattis) បានធ្វើដំណើរទៅដល់ប្រទេសកូរ៉េខាងត្បូងដែលជាការធ្វើដំណើរដ៏សំខាន់នៅតំបន់អាស៊ីក្នុងបំណងបញ្ជាក់ពីកិច្ចប្រឹងប្រែងការទូតដោះស្រាយវិបត្តិអហិង្សានូវភាពតានតឹងដែលចេះតែកើនឡើងរវាងសហរដ្ឋអាមេរិកនិងប្រទេសកូរ៉េខាងជើង។
ក្នុងដំណើរមកដល់របស់រដ្ឋមន្ត្រីការពារអាមេរិកនៅថ្ងៃនេះត្រូវបានគេរំពឹងថា លោកនឹងធ្វើដំណើរជាមួយរដ្ឋមន្ត្រីការជាតិប្រទេសកូរ៉េខាងត្បូងលោក សុង យុងមូ ទៅតំបន់គ្មានកងទ័ព ឬហៅថា តំបន់ស (DMZ) ដែលជាបន្ទាត់ចែកព្រំដែនរវាងប្រទេសកូរ៉េខាងជើង និងខាងត្បូង។ ក្នុងរយៈពេលប៉ុន្មានថ្ងៃថ្មីៗនេះលោក ម៉ាទីស បានធ្វើការរិះគន់ខ្លាំងៗជាថ្មីទៀតចំពោះការបាញ់សាកល្បងមីស៊ីលពីសំណាក់ប្រទេសកូរ៉េខាងជើងដោយនិយាយថា ប្រទេសនេះកំពុងគំរាមកំហែងសន្តិសុខតំបន់និងពិភពលោក។
សូមបញ្ជាក់ថា លោក ម៉ាទីស បានចាប់ផ្ដើមដំណើរទស្សនកិច្ចមកតំបន់អាស៊ីរយៈពេល១សប្ដាហ៍ដោយចាប់ផ្ដើមធ្វើដំណើរមុនគេគឺទៅកាន់ប្រទេសហ្វីលីពីនកាលពីថ្ងៃចន្ទដើមសប្ដាហ៍នេះ៕
រាជធានីភ្នំពេញ ៖ លោក ឡុង ប៊ុន្នី តំណាងរាស្ត្រគណបក្សសង្គ្រោះជាតិ (CNRP) ដែលបានមកចូលរួមជីវភាពនយោបាយជាមួយ គណបក្សប្រជាជនកម្ពុជា ត្រូវបានទទួលតំណែងជាទីប្រឹក្សាផ្ទាល់សម្តេចនាយករដ្ឋមន្ត្រី ។ នេះបើយោងតាមការសរសេរនៅលើប្រព័ន្ធទំនាក់ទំនងសង្គមរបស់អ្នកនាំពាក្យរាជរដ្ឋាភិបាល ។
លោក ផៃ ស៊ីផាន បានសរសេរថា ឯកឧត្តម ឡុង ប៊ុន្នី ទទួលបានឱកាសក្នុងកិច្ចចូលរួមកសាងការពារប្រជាពលរដ្ឋខ្មែរប្រាសចាកពីអំពើក្បត់ជាតិនៃក្រុមឧទ្ទាមជាប្រព័ន្ធគណបក្សសង្គ្រោះជាតិ។ជាមួយនេះដែរ សម្តេចតេជោបានបង្ហាញជំហររឹងមាំ ក្នុងកិច្ចការការពារ និងថែរក្សា សន្តិភាព សន្តិសុខជាតិ និងវិបុលភាព សម្រាប់ប្រជាជាតិខ្មែរទាំងអស់ ទោះជាតម្លៃណាក៏ដោយគឺមិនអនុញ្ញាតអោយកម្ពុជាវិលត្រឡប់ទៅកាន់សភាពការអាក្រក់ដូចឆ្នាំ ១៩៧០ ដែលបំផ្លាញអនាគតកម្ពុជាជាច្រើនទស្សវត្ស” ៕
រាជធានីភ្នំពេញ ៖ ថ្លែងនៅក្នុងសន្និសីទកាសែតនាព្រឹកថ្ងៃទី២៧ ខែតុលា ឆ្នាំ២០១៧នេះ លោក ញ៉េម ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច បានថ្លែងថា គណបក្សរាជានិយមមួយនេះ នឹងទទួលយកអសនៈរដ្ឋសភា ខណៈដែលគណបក្សសង្គ្រោះជាតិ ត្រូវរំលាយនាពេលឆាប់ៗ ខាងមុខនេះ ។
នៅព្រឹកនេះ មន្ត្រីជាន់ខ្ពស់គណបក្សហ្វ៊ុនស៊ិនប៉ិច ដឹកនាំដោយ លោក ញ៉េប ប៊ុនជិន អ្នកនាំពាក្យគណបក្ស បាននឹងកំពុងរៀបចំសន្និសីទសារព័ត៌មាន ស្ដីពីស្ថានការនយោបាយ កម្ពុជា នាពេលបច្ចុប្បន្ន ខណដែលគេរំពឹងថា ការរំលាយគណបក្សសង្គ្រោះជាតិ កាន់តែខិត ជិតមកដល់ ហើយគណបក្សរាជានិយមមួយនេះនឹងត្រូវទទួលបានអសនៈរដ្ឋសភាច្រើនជាងគេ ៕
រាជធានីភ្នំពេញ ៖ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានថ្លែងថា នៅកម្ពុជាមានអ្នកមានជំងឺអេពីឡឹបស៊ី ឬជំងឺឆ្កួតជ្រូក ប្រមាណ១០ម៉ឺននាក់ ខណៈនៅក្នុងពិភពលោកមានយ៉ាងហោចណាស់ ៥០លាននាក់នោះ។
លោក ម៉ម ប៊ុនហេង បានបញ្ជាក់ថា ជាការឆ្លើយតប ក្នុងការប្រយុទ្ធប្រឆាំងចំពោះជំងឺនេះ ក្រសួងសុខាភិបាលបានរួមសហការ ជាមួយមន្ទីរពេទ្យសកលវិទ្យាល័យ វិទ្យាសាស្ត្រសុខាភិបាល សមាគមប្រសាទសាស្ត្រកម្ពុជា សមាគមប្រយុទ្ធប្រឆាំង នឹងអេពីឡឹបស៊ីកម្ពុជា និងភាគីបារាំង តាមរយៈវគ្គបណ្តុះបណ្តាលគ្រូពេទ្យ អំពីជំងឺអេឡឹបស៊ី នៅទូទាំងប្រទេស ធ្វើការសិក្សាអំពីប្រេវ៉ាឡង់ អំពីអេពីឡឹបស៊ី នៅខេត្តព្រៃវែង និងគម្រោងស្រាវជ្រាវជំងឺនេះ នៅខេត្តត្បូងឃ្មុំ ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
