ភ្នំពេញ ៖ លោក Bernard Krisher ជាអតីតម្ចាស់កាសែត The Cambodia Daily ដែល កំពុងរស់ នៅទីក្រុងតូក្យូ ប្រទេសជប៉ុន បានចេញមុខសុំការទទួលខុសត្រូវ ជំនួសកូនស្រីរបស់ខ្លួន គឺអ្នកស្រី Deborah Krisher Steel ដែលម្ចាស់ថ្មីរបស់ The Cambodia Daily ករណីជំពាក់ បំណុលពន្ធកម្ពុជារយៈពេល១០ ជាង៦លានដុល្លារ ។
ការលើកឡើងរបស់អតីតម្ចាស់កាសែតនេះ ត្រូវបានអគ្គនាយក នៃអគ្គនាយក ដ្ឋាន ពន្ធដារ លោក គង់ វិបុល ឆ្លើយតបវិញថា គឺជារឿងនីតិបុគ្គល គ្មានជនណាមួយអាចមក ទទួលខុសត្រូវជំនួសបានទេ អ្នកណាជំពាក់ពន្ធ អ្នកនោះត្រូវតែសង។
ក្នុងលិខិតរបស់លោក Bernard Krisher ដែលផ្ញើជូនសម្តេចតេជោ ហ៊ុន សែន នាយក រដ្ឋមន្ត្រីនៃកម្ពុជា អតីតម្ចាស់កាសែត The Cambodia Daily រូបនេះ បង្ហាញក្តីសោកស្តាយ ចំពោះ ការបិទកាសែតដែលមានអាយុកាល២៤ឆ្នាំមួយនេះ និងបានស្នើសុំសម្តេចតេជោ អនុញ្ញាតឲ្យរូបលោកជាអ្នកទទួលខុសត្រូវ ចំពោះការជំពាក់ពន្ធជាង៦លានដុល្លារនេះ ដោយហេតុផលថា ក្នុងអំឡុងពេលជំពាក់ប្រាក់ពន្ធនោះ កាសែត The Cambodia Daily គឺ ស្ថិតក្នុងការគ្រប់គ្រងរបស់ខ្លួន ហើយកូនស្រីរបស់ខ្លួន ទើបតែគ្រប់គ្រងបន្តបានត្រឹម តែ ៤ខែប៉ុណ្ណោះ។
អគ្គនាយកពន្ធដារ លោក គង់ វិបុល បានបញ្ជាក់ឆ្លើយតបចំពោះសុំការទទួលខុស ត្រូវបំណុលពន្ធជំនួសរបស់ លោក Bernard Krisher អតីតម្ចាស់កាសែត The Cambodia Daily ថា រឿងនីតិបុគ្គល គឺជារឿងនីតិបុគ្គល មិនអាចចេះតែមាននរណា សុំមកទទួលខុស ត្រូវនោះទេ ជំពាក់ពន្ធរបស់រដ្ឋគឺត្រូវតែសងជាចាំបាច់។
សូមបញ្ជាក់ថា ពាក់ព័ន្ធសំណុំរឿងជំពាក់បំណុលពន្ធនេះ អគ្គនាយកដ្ឋានពន្ធដារ បានដាក់ពាក្យប្តឹងថ្នាក់ដឹកនាំ៣រូប របស់កាសែត The Cambodia Daily រួចហើយ រួមមាន ម្ចាស់ស្ថាប័ន, បណ្ណាធិការ និង ចាងហ្វាយការផ្សាយកាសែត Cambodia Daily ។ នៅបន្ទាប់ ពីមានការប្តឺងនេះ ទើបលោក Bernard Krisher ដែលជាអតីតម្ចាស់កាសែត The Cambodia Daily បានផ្ញើលិខិតជូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដោយបង្ហាញពី ការសោកស្តាយ និងទទួលស្គាល់កំហុសពីការខកខានបង់ពន្ធជូនរដ្ឋ ព្រមទាំងបានចាត់ ទុកថា ការបញ្ឈប់ការផ្សាយរបស់កាសែត The Cambodia Daily មិនមែនជារឿងនយោ បាយ នោះឡើយ៕
ម៉ិចស៊ីកូ ៖ សារព័ត៌មាន ABC News ចេញផ្សាយនៅព្រឹកនេះថា ចំនួនអ្នកស្លាប់បានកើនដល់៦១នាក់ហើយ ខណៈប្រធានាធិបតីម៉ិចស៊ីកូសម្រេចប្រកាសយកពេល០៣ថ្ងៃដើម្បីធ្វើការកាន់ទុក្ខដល់ជនរងគ្រោះទូទាំងប្រទេស ក្រោយហេតុការណ៍គ្រោះរញ្ជួយដីដ៏ខ្លាំងក្លាបានអង្រួនកក្រើកបណ្តោយឆ្នេរភាគខាងត្បូង ប្រទេសម៉ិចស៊ីកូកាលពីម្សិលមិញ។
ប្រធានាធិបតីម៉ិចស៊ីកូលោក Enrique Pena Nieto បានថ្លែងឲ្យដឹងថា មនុស្សចំនួន៦១បានបាត់បង់ជីវិត ដោយ៤៥នាក់នៅរដ្ឋ Oaxaca, ១២នាក់នៅរដ្ឋ Chiapas, និង០៤នាក់នៅរដ្ឋ Tabasco ហើយលោក បានសម្រេចប្រកាសយកពេល០៣ថ្ងៃ ដើម្បីធ្វើការកាន់ទុក្ខដល់ជនរងគ្រោះទូទាំងប្រទេស។ ក្រៅពីមានមនុស្សស្លាប់ គ្រោះរញ្ជួយដីខាងលើ ថែមទាំងបានដួលរលំអគារជាង៤០០ខ្នង និងប្រមាណ១,៧០០ខ្នងទៀតបានទទួលរងការខូចខាតផងដែរ។
បើតាមទីភ្នាក់ងារស្ទាបស្ទង់ភូមិសាស្ត្រអាមេរិក (USGS) វាមានកម្រិត៨.១រ៉ិចទ័រ ខណៈលោក Enrique Pena Nieto បានអះអាងថា វាមានកម្រិត៨.២រ៉ិចទ័រ គឺខ្លាំងក្លាជាងគេបង្អស់ប្រចាំប្រវត្តិសាស្ត្រម៉ិចស៊ីកូ ក្នុងអំឡុងពេលមួយសតវត្សរ៍កន្លងទៅនេះ ដោយមានជម្រៅ៣៣គីឡូម៉ែត្រក្រោមផ្ទៃសមុទ្រ នៅចម្ងាយ១២៣គីឡូម៉ែត្រភាគនិរតី ពីទីក្រុង Pijijiapan នៃរដ្ឋ Chiapas៕
ខេត្តកណ្ដាល៖ សមត្ថកិច្ចចម្រុះដឹកនាំដោយមន្ត្រីអាជ្ញាសាលារបស់តុលាការខេត្តកណ្ដាល ចុះអនុវត្តសាលក្រម តុលាការកំពូល កាលពីព្រឹកថ្ងៃទី៨កញ្ញា នៅភូមិទួលក្រសាំង ឃុំរកាខ្ពស់ស្រុកស្អាង ។ ការអនុវត្តសាលក្រមនេះ ផ្ទះប្រជាពលរដ្ឋចំនួន៣ខ្នង ត្រូវបានជាន់កម្ទេចដោយគ្រឿងចក្រ បន្ទាប់មកប្រគល់ដីទៅអោយភាគីឈ្នះក្តី។
ការអនុវត្តសាលក្រមនេះបានជោគជ័យទាំងក្តីសោកសង្រេងរបស់ប្រជាពលរដ្ឋចាញ់ក្តី ដោយ ការសោកស្តាយទ្រព្យសម្បត្តិរបស់ខ្លួន ជាមួយក្រុមគ្រួសារដួលសន្លប់ចំនួនពីរនាក់( ស្រីមួយនាក់ ) ផ្ទះបីខ្នងដែលត្រូវបានជាន់កម្ទេចនោះ ធ្វើអំពីឈើបករក់សង្គ័សី មួយខ្នង និងផ្ទះ ថ្មប្រក់សង្គ័សី ពីរខ្នង ហើយការអនុវត្តសាលក្រមនេះដែរត្រូវបានបញ្ចប់ដោយជោគជ័យនៅវេលាម៉ោងជាង១២ថ្ងៃត្រង់ ។
បើតាមមន្ត្រីតុលាការខេត្តកណ្ដាល ដែលដឹកនាំកំលាំងចម្រុះ មកអនុវត្តសាលក្រម របស់តុុលាការកំពូលបានឱ្យដឹងថា រឿងក្តី នេះគឺកើតមានតាំងពីឆ្នាំ២០០៤ មក ដែលមានដើមបណ្ដឹង ឈ្មោះមីុ កល្យាញ ភេទស្រី អាយុ៥៧ឆ្នាំ មានទីលំនៅសង្កាត់បឹងកេងកង២ ខណ្ឌចំការមន រាជធានីភ្នំពេញ ជាអ្នកឈ្នះក្តី ចាប់តាំង ពីលាលាដំបូងខេត្តកណ្ដាល សាលាឩទ្ធរណ៍ រហូតដល់តុលាការកំពូល ។ ចំណែកភាគីចាញ់ក្ដី ទី១ ឈ្មោះប៉ុន ថន ភេទប្រុសអាយុ៤៣ឆ្នាំ ទី២ឈ្មោះ អ៊ុង អ៊ីម ភេទស្រី អាយុ៥៥ឆ្នាំ និងទី៣ ឈ្មោះ សែ គឹមអូន ភេទស្រីអាយុ៣៤ឆ្នាំ អ្នកទាំងបីនាក់មានទីលំនៅភូមិទួលក្រសាំង ឃំុរកាខ្ពស់ស្រុកស្អាង ។
ដីដែលអនុវត្តសាលក្រម អោយទៅភាគីឈ្នះក្តី មាន ទំហំ ២៥គុណនិង១០ម៉ែត្រ ពីរប្លង់ និងដីទំហំ ២០គុណនិង១០០ម៉ែត្រ មួយប្លង់ ។
សាលក្រម របស់តុលាការកំពូល បាន បង្គាប់អោយភាគីចាញ់ក្តី រុះរើផ្ទះ ចេញប្រគល់ដីអោយភាគី ឈ្នះក្ដី និងជួយដោះស្រាយ សំណង ពីរគ្រួសារ ក្នុងមួយគ្រួសារៗចំនួន១ពាន់ដុល្លារ និង មួយគ្រួសារទៀត ២ ពាន់ដុល្លារ តែភាគីចាញ់ក្ដីមិនព្រមរុះរើ តាមសាលដីការ ។
ប៉ុន្តែបើតាមភាគីចាញ់ក្តីទាំងបីគ្រួសារ បានប្រាប់អោយដឹងថា ដីនេះ ជាដី ពួកគាត់ រស់នៅតាំង ពី ឆ្នាំ១៩៨៧ មកម្លិះ គឺ តាំងពីមិនទាន់មាន អ្នកមករស់នៅទីនោះច្រើនមកម្លេះ ។ហើយក៏មានការទទួលស្គាល់ ពីប្រធានភូមិ មេឃំុដែរ និងមានបង្កាន់ដៃដែលចេញការិយាល័យសុរិយោដីស្រុកស្អាងទៀតផង ។ ភាគី ចាញ់ក្ដីថា សាលក្រម អោយពួកគាត់ចាញ់ក្ដី បែបនេះ ពិត ជាអយុត្តិធម៌ខ្លាំងណាស់ និង បាន លើករូបថតសម្ដេច អគ្គមហាសេនាបតីតេជោ និងសម្ដេចកិត្តិព្រឹទ្ធបណ្ឌិត ជួយរកយុត្តិធម៌ ដល់ពួកគាត់ ទាំងអស់គ្នា ជាប្រជាពលរដ្ឋស្លូតត្រង់ផង។
នៅពេលដែលសមត្ថកិច្ច ចម្រុះ ជាច្រើននាក់ ចុះអនុវត្តសាលក្រមនេះ ក្រុមគ្រួសាភាគីចាញ់ក្ដី បាន ព្យាយាមរារាំង ក្រុមសមត្ថកិច្ច ដោយមានអ្នកខ្លះ ឡើងអង្គុយលើដៃគ្រឿងចក្រ លើកង់គ្រឿងចក្រ ខ្លះដេកលើដី រារាំងមិនអោយគ្រឿងចក្រ ចូលទៅកាយ កំទេច រុះរើផ្ទះ និង បានដុត សំបកកង់ឡាន ជាច្រើន ឆេះផ្សែង ខ្មៅខ្មួលខ្មាញ់ លើអាកាសសា បង្ករអោយ អ្នកធ្វើដំណើរតាមផ្លូវ ឈប់មើលត្រៀបត្រា ក្នុងទឹកចិត្ត អាណិតភាគីចាញ់ក្ដី ជាពន់ពេក។
ក្រុមគ្រួសារ អ្នកចាញ់ខ្លះទៀត មានកាន់ដបសាំង នៅក្នុងដៃ គម្រាម ចាក់ដុតផ្ទះ និងដុតខ្លួនប្រាណ ប៉ុន្តែត្រូវក្រុមសមត្ថកិច្ច ចាប់ សែង គ្រាកចេញ មានការប៉ះទង្គិច ប្រើអំពើហឹង្សា ដាក់គ្នាទៅវិញទៅមកផងដែរ តែមិនមានអ្នករងរបួស ធ្ងន់ធ្ងរទេ។ ដោយសារតែមានការ ស្លុតចិត្តខ្លាំងពេក និងទ្រហោ៑យំ និង ប៉ះទង្គិច ច្រានគ្នាទៅវិញទៅមក បានបណ្ដាលអោយភាគីចាញ់ក្តីពីរនាក់ បានដួលសន្លប់ ស្រីម្នាក់ និងប្រុសម្នាក់ ត្រូវបាន ក្រុ មគ្រួសារបញ្ជូនទៅ មន្ទីពេទ្យ ដែលជាឱកាសដល់ ក្រុមសមត្ថកិច្ចបញ្ជាដោយមន្ត្រី តុលាការ អោយ គ្រឿងចក្រ សម្រុកចូល ទៅជាន់កម្ទេចផ្ទះទាំងបីខ្នង បានសម្រចនៅវេលាម៉ោង ជាង១២ ថ្ងៃត្រង់ ខណះដែល ក្រុមគ្រួសារភាគីចាញ់ក្ដី នៅទ្រហោយំ កងរំពង សម្លឹងមើលផ្ទះដែលខ្ទេចខ្ទីគ្នានសល់នោះ ។
គួរបញ្ជាក់ថា សកម្មភាពអនុវត្តសាលក្រមនោះ គេបានឃើញម្ចាស់បំណុលហាក់ខ្នះខ្នែងបញ្ជារកម្មករឲ្យរុះរើនិងកម្ទេចផ្ទះអ្នកចាញ់ក្តី និង ចាប់ដៃចាប់ជើង សែងក្មេងស្រី និង ស្ត្រីចាស់ៗដែលព្យាយាមការពារផ្ទះរបស់ខ្លួន ។ ជាងនេះទៅទៀត គេសំគាល់ឃើញម្ចាស់បំណុលបានបង្គាប់បញ្ជារមន្ត្រីអាជ្ញាសាលា និង មន្ត្រីតុលាការទៀតផង ។ សកម្មភាពនេះ ត្រូវបានគេវាយតម្លៃថា ការអនុវត្តសាលក្រមមិនធម្មតាគួរឲ្យភ័យខ្លាច ៕
រាជធានីភ្នំពេញ ៖ ក្រសួងអប់រំយុវជន និងកីឡា នឹងធ្វើការប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៧ នៅរសៀលថ្ងៃទី១០ ខែកញ្ញាវិញ សម្រាប់រាជធានីភ្នំពេញ និងខេត្តកណ្តាល ហើយសម្រាប់ខេត្តផ្សេងៗទៀត នឹងប្រកាសនៅថ្ងៃទី១១ ខែកញ្ញា ។ នេះបើយោងតាម Facebook របស់ក្រសួងអប់រំ យុវជន និងកីឡា ចេញផ្សាយនៅថ្ងៃនេះ ។
ក្រសួងអប់រំបញ្ជាក់ថា ការប្រកាសលទ្ធផលនេះ ធ្វើឡើងមុនកាលបរិច្ឆេទកំណត់ដោយសារដំណើរការកំណែ និងដំណើរការស្រង់ បូកពិន្ទុ និងផ្ទៀងផ្ទាត់ពិន្ទុតាមប្រព័ន្ធកុំព្យូទ័របានប្រព្រឹត្តទៅដោយរលូន និងតម្លាភាពប្រកបដោយស្មារតីយកទុកដាក់និងទទួលខុសត្រូវខ្ពស់ពីសំណាក់ប្រធាន អនុប្រធាន និងសមាជិកអនុគណៈកម្មការទាំងអស់ដែលពាក់ព័ន្ធ៕
ម៉ិចស៊ីកូ ៖ សារព័ត៌មានរុស្ស៊ី Russia Today (RT) ចេញផ្សាយថា គ្រោះរញ្ជួយដីដ៏ខ្លាំងក្លាមួយបានអង្រួនឆ្នេរភាគខាងត្បូង ប្រទេសម៉ិចស៊ីកូ ដោយបានឆក់យកជីវិតមនុស្សយ៉ាងហោចណាស់ចំនួន៣២នាក់។
បើតាមអាជ្ញាធរម៉ិចស៊ីកូនិយាយថា មនុស្ស២៣នាក់ ក្នុងចំណោមអ្នកដែលបានបាត់បង់ជីវិត គឺស្ថិតក្នុងរដ្ឋ Oaxaca ខណៈ០៧នាក់បានស្លាប់នៅក្នុងរដ្ឋ Chiapas ជាទីដែលរដ្ឋាភិបាលម៉ិចស៊ីកូ បានប្រកាសដាក់ឲ្យស្ថិតក្រោមភាពអាសន្ន។ ស្របពេលជាមួយគ្នា គ្រោះរញ្ជួយផែនដីនេះ បានផ្តាច់អាយុជីវិត កុមារាចំនួន០២នាក់ផ្សេងទៀត ក្នុងរដ្ឋ Tabasco ដែលនៅក្បែរនោះ ដោយម្នាក់ត្រូវបានជញ្ជាំងអគាររលំលើ និងម្នាក់ទៀតគឺជាទារក ដែលកំពុងប្រើប្រាស់ឧបករណ៍ជំនួយដង្ហើម បានស្លាប់ បន្ទាប់ពីមន្ទីរពេទ្យរបស់គេ ដាច់ភ្លើងដោយសារឥទ្ធិពលរញ្ជួយដី។
បើតាមទីភ្នាក់ងារស្ទាបស្ទង់ភូមិសាស្ត្រអាមេរិក (USGS) វាមានកម្រិត៨.១រ៉ិចទ័រ និងមានជម្រៅ៣៣គីឡូម៉ែត្រក្រោមផ្ទៃសមុទ្រ នៅចម្ងាយ១២៣គីឡូម៉ែត្រភាគនិរតី ពីទីក្រុង Pijijiapan នៃរដ្ឋ Chiapas៕
រាជធានីភ្នំពេញ ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ថាចាប់ពីថ្នាក់តំណាងរាស្ត្ររហូតដល់ក្រុមប្រឹក្សារាជធានី-ខេត្ត និងឃុំ នឹងត្រូវបញ្ចប់តំណែង ប្រសិនបើបក្សប្រឆាំងពិតជាត្រូវរំលាយចោលនោះ ។ ភ្លាមៗនេះ លោក អេង ឆៃអ៊ាង អនុប្រធានគណបក្សសង្គ្រោះជាតិប្រតិកម្មតបថា លោកហង្ស ពុទ្ធា និយាយហួសបច្ចេកទេសហើយ។
លោក ហង្ស ពុទ្ធ អ្នកនាំពាក្យ គ.ជ.ប បញ្ជាក់អំពីការអស់តំណែងនិងតួនាទីរបស់មន្ត្រីគណបក្សសង្គ្រោះជាតិ គឺក្រោយពេលដែលមន្ត្រីរដ្ឋាភិបាលព្រមានគណបក្សសង្គ្រោះជាតិ ថាអាចនឹងត្រូវរំលាយចោល ប្រសិនគណបក្សនេះនៅតែរឹងទទឹងមិនដូរ ឬដាក់ប្រធានថ្មីជំនួសលោក កឹម សុខាឬគណបក្សនៅតែចេញមកការពារលោកកឹម សុខា។
លោក ហង្ស ពុទ្ធា បញ្ជាក់ប្រាប់វិទ្យុក្រៅស្រុកមួយថា តាមច្បាប់ស្ដីពីការជ្រើសតាំងតំណាងរាស្ត្រ គឺក្រោយពេលរំលាយគណបក្សហើយ សមាជិកទាំងអស់ដែលមានតួនាទីជាប់ដោយការបោះឆ្នោត នឹងត្រូវអស់តួនាទីតាមគណបក្សដែលត្រូវគេរំលាយដែរ។
គួរបញ្ជាក់ថា ច្បាប់វិសោធនកម្មស្ដីពីគណបក្សនយោបាយដែលទើបត្រូវបានអនុម័តកាលពីពេលថ្មីៗនេះ បានចែងនៅត្រង់វាក្យខណ្ឌទី២ មាត្រា៤៥ថ្មី (ស្ទួន) ថា ត្រូវលុបឈ្មោះគណបក្សនយោបាយចេញពីបញ្ជីគណបក្សនយោបាយឈរឈ្មោះបោះឆ្នោតនៅក្នុងករណីដែលគណបក្សនយោបាយនោះ ត្រូវសម្រេចផ្អាក ឬត្រូវបានរំលាយដោយស្របតាមច្បាប់នេះ៕
ភ្នំពេញ ៖ គម្រោងដឹកជញ្ជូនដោយរថភ្លើងលើអាកាសនេះ មានចម្ងាយប្រមាណ ១៨គីឡូម៉ែត្រ ពីកណ្តាលរាជធានី ទៅព្រលានយន្តហោះអន្តរជាតិភ្នំពេញ (ពោធិ៍ចិនតុង)។ ចំណែកការសិក្សាលើគម្រោង នឹងប្រើពេលមួយឆ្នាំ។ នេះបើតាមបញ្ជាក់របស់អភិបាលរងរាជធានីភ្នំពេញ លោក អៀង អូននី នៅក្នុងកិច្ចប្រជុំដែលបានធ្វើឡើងនៅសាលារាជធានីភ្នំពេញ កាលពីថ្ងៃទី៦ ខែកញ្ញា កន្លងទៅ។
លោក អៀង អូននី បញ្ជាក់ថា ក្រុមការងារបច្ចេកទេសសាលារាជធានីភ្នំពេញ បានជួបប្រជុំជាមួយក្រុមការងារ JICA ដឹកនាំដោយលោក Kuroki Yasunari ដែលមកបំពេញបេសកកម្ម ស្របតាមការស្នើសុំរបស់សម្តេច ហ៊ុន សែន សម្រាប់ការសិក្សាគម្រោងដឹកជញ្ជូនដោយរថភ្លើងលើអាកាស (Phnom Penh Urban Railway Development Project)៕
ភ្នំពេញ ៖ នគរបាលខណ្ឌដង្កោបង្ហាញមុខក្រុមជួញដូរថ្នាំញៀន និងមុខសញ្ញាគាស់ផ្ទះលួចទ្រព្យសម្បត្តិកាលពីព្រឹកថ្ងៃទី៨ ខែកញ្ញា ឆ្នាំ២០១៧នេះនៅខាងមុខអធិកាដ្ឋាននគរបាលខណ្ឌដង្កោ។
លោកវរសេនីយ៍ឯក ជឹម ស៊ីថា អធិកានគរបាលខណ្ឌដង្កោបានប្រាប់អោយដឹងថា ដោយក្នុងរយៈពេល៣ថ្ងៃកម្លាំងនគបាលខណ្ឌដង្កោឃាតខ្លួនបានជនសង្ស័យចំនួន១២នាក់ដោយមានបទល្មើសផ្សេងៗគ្នាជាក់ស្តែងកាលពីយប់ថៃ្ងទី៧ខែកញ្ញានេះបានឃាត់ខ្លួនបានជនសង្ស័យចំនួន៣នាក់ដែលជាមុខសញ្ញាជួញដូរយ៉ាងសកម្មដោយបានដកហូតបាននៅថ្នាំញៀនជិតកន្លះគីឡូនិងម៉ូតូចំនួន៣គ្រឿងសរុបមនុស្ស១២នាក់បទល្មើសផ្សេងៗគ្នា។ លោកបានបន្តទៀតថា នឹងបង្រាបបទល្មើសនៅក្នុងមូលដ្ឋានរបស់គាត់មិនអោយមានគ្រឿងញៀននៅក្នុងខណ្ឌដង្កោ។ ចំណែកជនសង្ស័យទាំង១២នាក់ត្រួវបានកសាងសំណុំរឿងបញ្ជូនទៅតុលាការនៅថ្ងៃស្អែកចាត់ការតាមផ្លូវច្បាប់៕
រាជធានីភ្នំពេញ ៖ ក្រសួងរៀបចំដែនដី នគរូបនយកម្ម និងសំណង់គ្រោងនឹងរៀបចំបង្កើតទីក្រុងថ្មីមួយបន្ថែមទៀត ដែលមានឈ្មោះថា ទីក្រុងនាគរាជតេជោ ។ នេះបើយោងតាមការឲ្យដឹងពីមន្ត្រីជាន់ខ្ពស់ក្រសួងមួយនេះ ។ មន្ត្រីរូបនោះបញ្ជាក់ថា ការបង្កើតទីក្រុងថ្មីនេះ គឺដើម្បីឆ្លើយតបទៅនឹងកំណើនប្រជាពលរដ្ឋនៅក្នុងទីក្រុងភ្នំពេញ ដែលចេះតែកើនឡើងជាបន្តបន្ទាប់។
លោក ភឿង សុភ័ណ្ឌ រដ្ឋលេខាធិការក្រសួង រៀបចំដែនដី នគរូបនីយកម្ម និងសំណង់ ត្រូវដកស្រង់សម្តីដោយទីភ្នាក់ងារព័ត៌មានកម្ពុជា (AKP) ខណៈដែលលោកអះអាងថា គម្រោងបង្កើតទីក្រុងនាគរាជតេជោថ្មីនេះ ក្នុងគោលដៅធ្វើយ៉ាងណាដើម្បីកុំឱ្យទីក្រុងមានការកកស្ទះចរាចរណ៍ មានសោភណភាព និងបរិស្ថានល្អ ខណៈពេល ដែលការបង្កើតទីក្រុងភ្នំពេញ កាលពីជំនាន់មុនធ្វើឡើងតម្រូវទៅតាម ប្រជាពលរដ្ឋរស់នៅ ចំនួនត្រឹមតែក្រោម ១លាននាក់ប៉ុណ្ណោះ។ ប៉ុន្ដែបច្ចុប្បន្ននេះ ប្រជាពលរដ្ឋបានកើន ឡើងរហូតដល់ជិត ៣លាននាក់ហើយ។
លោកបញ្ជាក់ថា ការបង្កើតទីក្រុងថ្មីនេះ ត្រូវធ្វើជាដំណាក់កាលៗ និងកាត់ចេញមកធ្វើ ជាកង់ៗដោយសារតែគម្រោងត្រូវការថវិកាច្រើនសន្ធឹកសន្ធាប់។ យោងទៅតាមស្ថានភាពបច្ចុប្បន្ននេះ នៅក្នុងរាជធានីភ្នំពេញ គឺមនុស្សបានមករស់នៅច្រើនបណ្ដាលឲ្យមានការស្ទះចរាចរណ៍ ហើយសំណង់អគារមួយចំនួននៅមិនទាន់បានរៀបរយល្អ។ ដូច្នេះ បើតាមការសិក្សាស្រាវជ្រាវ បង្ហាញឲ្យឃើញថា កម្ពុជាបើគិតរហូតមកដល់ពេលនេះ គឺខកខានសាង សង់ទីក្រុងជាង៥៨០ឆ្នាំ ហើយគម្រោងចង់បង្កើតទីក្រុងថ្មីបន្ថែមទៀតនេះ គឺស្របពេលដែលប្រទេស ជាតិមានសុខសន្ដិភាព មានការរីកចម្រើនលើគ្រប់វិស័យ។
យ៉ាងណាក៏ដោយ គម្រោងបង្កើតទីក្រុងនាគរាជថ្មី គឺក្រុមការងារក្រសួងរៀបចំដែនដីបានរចនា គម្រោងរួចហើយ ប៉ុន្ដែត្រូវចំណាយថវិកាច្រើន ហើយប្រសិនបើគម្រោងនេះ ចាប់ផ្ដើមដំណើរការ ក្រុមហ៊ុនផ្នែកវិស័យសំណង់ របស់ប្រទេសបារាំងនឹងជួយគាំទ្រក្នុងការចូលរួមចំណែកសាងសង់សំណង់អគារ ការផ្ដល់ជំនាញបច្ចេកទេស ថ្មីៗដល់កម្ពុជាផងដែរ ។
ប៉ុន្តែទីតាំងសម្រាប់បង្កើតទីក្រុងថ្មីមួយនេះ មិនទាន់ត្រូវបានប្រកាសជាផ្លូវការនៅឡើយទេ ខណដែលព័ត៌មានខាងក្រៅលេចឮថា ទីក្រុងថ្មីនេះគ្រោងបង្កើតនៅខេត្តកណ្តាល ៕
ខេត្តកំពង់ស្ពឺ ៖ ស្ត្រីញៀនស្រាបានយកកាំបិតអារ-កសម្លាប់ខ្លួន ព្រោះតែខឹងក្មួយហាមមិនឲ្យផឹកស្រា ខណៈដែលករណីនេះកើតឡើងកាលពីរសៀលថ្ងៃទី៦ ខែកញ្ញា ឆ្នាំ២០១៧ ស្ថិតក្នុងភូមិអូរកូនត្រុំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ ស្ត្រីដែលធ្វើអត្តឃាតខ្លួនឯងនោះ ឈ្មោះ ស៊ន ធីម អាយុ៤៥ឆ្នាំ មុខរបរកសិករ រស់នៅភូមិដំបូកខ្ពស់ ឃុំត្រែងត្រយឹង ស្រុកភ្នំស្រួច។
បើតាមសម្តីអ្នកភូមិក្បែរខាងបានប្រាប់ថា ស្ត្រីរងគ្រោះជាមនុស្សផឹកស្រាប្រចាំ ហើយក្មួយរបស់គាត់បានប្រាប់ថា ឈប់ឲ្យពិសាស្រាទៀត ព្រោះខ្លាចខូចសុខភាព មួយសន្ទុះក្រោយ ស្ត្រីខាងលើបានឡើងទៅលើផ្ទះយកកាំបិតបុ័ងតោអារ.កសម្លាប់ខ្លួនឯងបណ្តាលឲ្យស្លាប់នៅនឹងកន្លែងតែម្តង។
ក្រោយពេលកើតហេតុសមត្ថកិច្ចជំនាញស្រុកបានចុះធ្វើការពិនិត្យ និងបំពេញឯកសារតាមនីតិវិធីរួច ប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី៕
ក្រិក ៖ ប្រធានាធិបតីប្រទេសបារាំង លោក អេម៉ាញូអែល ម៉ាក្រុង បានអំពាវនាវឲ្យសមាជិកសហភាពអឺរ៉ុបបង្កើតតំបន់អឺរ៉ុបឲ្យកាន់តែខ្លាំង និងរឹងមាំថែមទៀត។ លោកថ្លែងបែបនេះនៅពេលកំពុងបំពេញទស្សនកិច្ចនៅទីក្រុងអាថែន ប្រទេសក្រិក កាលពីថ្ងៃព្រហស្បតិ៍ម្សិលមិញ។
លោក ម៉ាក្រុង បានអំពាវនាវឲ្យសមាជិកសហភាពអឺរ៉ុបបង្កើនឡើងវិញនូវប្លុកអឺរ៉ុបដែលមានអាយុកាល៦០ឆ្នាំមកនេះជាមួយកំណែទម្រង់នយោបាយទូទៅបើមិនដូច្នេះប្រឈមនឹងការមិនធ្វើសមាហរណកម្មយឺតយ៉ាវជាមិនខាន។ ទន្ទឹមនោះលោក ម៉ាក្រុង ក៏បានជំរុញឲ្យប្រទេសសហភាពអឺរ៉ុបទាំងអស់ធ្វើការពិនិត្យសើរើថ្នាក់ជាតិរយៈពេល៦ខែឡើងវិញស្ដីពីកំណែទម្រង់សហភាពអឺរ៉ុបមុនពេលដាក់ចេញឲ្យអនុវត្ត។
ទោះបីយ៉ាងណាលោក ម៉ាក្រុង ក៏បានគាំទ្រចំពោះកិច្ចប្រឹងប្រែងសម្រាប់ការធ្វើសមាហរណកម្មឲ្យកាន់តែជិតស្និទ្ធជាងមុននៅតំបន់អឺរ៉ុបដែលកំពុងរងគ្រោះដោយវិបត្តិហិរញ្ញវត្ថុ បញ្ហាចំណាកស្រុក វិបត្តិប្រជានិយម និងការចាកចេញរបស់ចក្រភពអង់គ្លេសផងដែរ៕
ម៉ុងហ្គោលី ៖ កាលពីម្សិលមិញសភានៃប្រទេសម៉ុងហ្គោលីនៅក្នុងកិច្ចប្រជុំពិសេសមួយបានសម្រេចតំណែងនាយករដ្ឋមន្ត្រីពីលោក ចាហ្គាល់ទូលហ្គីន អឺដេនេបាត់ និងប្រកាសរំលាយរដ្ឋាភិបាលម៉ុងហ្គោលី ចោលទាំងស្រុងទៅ ផងដែរ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ។
លោក អឺដេនេបាត់ ស្ថិតក្នុងវ័យ៤៤ឆ្នាំ គឺជាសមាជិកនៃគណបក្សប្រជាជនម៉ុងហ្គោលី និងបានឡើងកាន់តួនាទីជានាយករដ្ឋមន្ត្រីនៃប្រទេសអាស៊ីខាងកើតមួយនេះកាលពីថ្ងៃទី០៧ ខែកក្កដា ឆ្នាំ២០១៦។ ទោះបីយ៉ាងណាភ្លាមៗនេះនៅពុំទាន់មានការបញ្ជាក់ណាមួយស្តីពីការដកតំណែងរបស់លោកធ្វើឡើង ដោយសារតែមូលហេតុអ្វីនៅឡើយទេ៕
រាជធានីភ្នំពេញ ៖ សម្តេចវិបុលសេនាភក្តី សាយ ឈុំ ប្រមុខរដ្ឋស្តីទីនៃព្រះរាជាណាចក្រកម្ពុជា នៅ ថ្ងៃ ទី៧ ខែកញ្ញា បានអនុញ្ញាតឲ្យឯកឧត្តម Wang Jiarui អនុប្រធានសភាប្រឹក្សា នយោបាយ ប្រជាជនចិន ចូលជួបសម្តែងការគួរសម ក្នុងឱកាសដែលឯកឧត្តម ដឹកនាំគណៈប្រតិភូ មកបំពេញទស្សនកិច្ចជាផ្លូវការនៅកម្ពុជា។
ក្នុងព្រះបរមនាម ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះ មហាក្សត្រនៃព្រះរាជាណាចក្រកម្ពុជា សម្តេច ប្រមុខរដ្ឋស្តីទី បានសម្តែងនូវ សេចក្តី សប្បាយរីករាយ ស្វាគមន៍ដ៏កក់ក្តៅ ចំពោះគណៈប្រតិភូ ដែលបានអញ្ជើញមក បំពេញ ទស្សន កិច្ចផ្លូវការនៅកម្ពុជានាឱកាសនេះ។
តាមរយៈដំណើរទស្សនកិច្ចនាពេលនេះ គឺពិតជាបានរួមចំណែកដ៏ធំធេងក្នុងការបន្ត ពូនជ្រុំចំណងមិត្តភាព សាមគ្គីភាពជាប្រពៃណី និងកិច្ចសហប្រតិបត្តិការ គ្រប់ជ្រុងជ្រោយ រវាងប្រជាជន និងប្រទេសទាំងពីរ ដែលមានតាំងពីរយូលង់ណាស់មកហើយ។
លោក Wang Jiarui បានបញ្ជាក់ថា សាធារណរដ្ឋប្រជាមានិតចិនតែងតែចាត់ទុកកម្ពុជា ជាមិត្តល្អ ដៃគូល្អ ហើយតាមរយៈ ដំណើរទស្សនកិច្ចនាពេលនេះ សភានៃប្រទេសទាំងពីរ នឹងខិតខំជំរុញកិច្ចសហប្រតិបត្តិ ការរវាងប្រជាជន និងប្រទេសទាំងពីរឲ្យកាន់តែរឹងមាំ។ប្រទេសទាំងពីរ មានកិច្ចសហប្រតិ បត្តិការ គ្នាដ៏ល្អប្រសើរលើវិស័យសេដ្ឋកិច្ច នយោបាយ និង វប្បធម៌ជាដើម។
សម្តេចប្រមុខរដ្ឋស្តីទី វិបុលសេនាភក្តី សាយ ឈុំ បានសម្តែងនូវក្តីរីករាយ ដែលបាន ឃើញទំនាក់ទំនង មិត្តភាព សាមគ្គីភាព និងកិច្ចសហប្រតិបត្តិការ រវាងប្រទេសទាំងពីរ កម្ពុជា-ចិន មានការរីកចម្រើនជាលំដាប់ ឈានដល់កម្រិតកំពូល គឺកិច្ចសហប្រតិ បត្តិការ ជាដៃគូរយុទ្ធសាស្ត្រគ្រប់ជ្រុងជ្រោយ។
ប្រមុខរដ្ឋស្តីទី បានអរគុណមិត្តចិន ដែលបានរួមវិភាគទានយ៉ាងធំធេង ក្នុងការសាង និងអភិវឌ្ឍន៍ប្រទេសកម្ពុជា ព្រមទាំងចាត់ទុកប្រទេសកម្ពុជា គឺជាមិត្តដែលផ្តល់ភាព អនុគ្រោះសម្រាប់កិច្ចសហប្រតិ បត្តិការលើគ្រប់វិស័យ។កម្ពុជាបានចាត់ទុកប្រជាជន និង ប្រទេសចិន ជាអ្នកជិតខាងល្អ មិត្តល្អ បងប្អូនល្អ និងជាដៃគូល្អ។ សម្តេច អរគុណចំពោះ រដ្ឋាភិបាល និងក្រុមគ្រូពេទ្យចិន ដែលបានយកចិត្តទុកដាក់ខ្ពស់ ក្នុងការថែទាំព្រះរាជ សុខភាព ព្រះ ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះវររាជមាតា ជាតិ ខ្មែរ និងអរគុណសភាប្រឹក្សានយោបាយប្រជាជនចិន និងរដ្ឋាភិបាលចិន ដែលបានផ្តល់ ជំនួយជាបន្តបន្ទាប់ដល់ព្រឹទ្ធសភាកម្ពុជា។ ជំនួយទាំងអស់នោះ បានរួមចំណែកយ៉ាង ខ្លាំងក្លា ក្នុងការពង្រឹងស្ថាប័ន និងលើកម្ពស់សមត្ថភាពការងារ មន្ត្រីនៃអគ្គលេខា ធិការ ដ្ឋានព្រឹទ្ធ- សភា។ ព្រឹទ្ធសភាកម្ពុជា បានប្រើប្រាស់ជំនួយទាំងអស់នោះ ប្រកបដោយ ប្រសិទ្ធភាពខ្ពស់៕
ភ្នំពេញ ៖ កាលបរិច្ឆេទនៃការផ្អាកធ្វើចរាចរណ៍លើស្ពានមិត្តភាព កម្ពុជា-ជប៉ុន ឬស្ពានជ្រោយ ចង្វាទី១ នឹងត្រូវផ្អាកចរាចរណ៍ឆ្លងកាត់ទាំងស្រុងចាប់ពីថ្ងៃទី១ ខែតុលា ឆ្នាំ២០១៧ តទៅ រហូតការដ្ឋានជួសជុលត្រូវបានចប់ជាស្ថាពរ នៅអំឡុងឆ្នាំ២០១៩។ អាជ្ញាធ បាន អះអាង ថា ការផ្លាស់ប្តូរនេះ ដើម្បីជួយសម្រួលកុំឱ្យស្ទះចរាចរណ៍ក្នុងថ្ងៃបុណ្យភ្ជុំបិណ្ឌ។
យោងតាមចេញសេចក្តីជូនដំណឹងរបស់ រដ្ឋបាលសាលារាជធានីភ្នំពេញ បានឱ្យដឹង ថា កន្លងមក អាជ្ញាធរគ្រោងឱ្យផ្អាកចរាចរណ៍ឆ្លងកាត់ស្ពានជ្រោយចង្វារចាស់ ចាប់ពីថ្ងៃ ទី១៥ ខែកញ្ញា ឆ្នាំ២០១៧នេះតទៅ ប៉ុន្តែដោយមានការរិះគន់ និងការលើកឡើងជាច្រើន ថា អាជ្ញាធរគួរតែទុកពេលឲ្យប្រជាពលរដ្ឋបានធ្វើដំណើរឆ្លងកាត់ទៅស្រុកកំណើត នាអំឡុង បុណ្យភ្ជំបិណ្ឌសិន ទើបរដ្ឋបាលសាលារាជធានីភ្នំពេញ បានសម្រេច ផ្លាស់ប្តូរ កាលបរិច្ឆេទនេះ ទៅថ្ងៃទី១ ខែតុលា វិញ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានប្រាប់ឱ្យដឹងថា ៖ មូល ហេតុលើកពេលបន្តទៀតនេះ ដោយសារកៀកនឹងពិធីបុណ្យភ្ជុំបិណ្ឌ ដែលពេលនោះ នឹងមានប្រជាពលរដ្ឋច្រើនធ្វើដំណើរឆ្លងកាត់ស្ពាន ដើម្បីទៅកាន់ស្រុកកំណើត ដូច្នេះ ដើម្បីដោះស្រាយការកកស្ទះនេះ សាលារាជធានីភ្នំពេញ ត្រូវពន្យាពេលបន្តទៀត។
លោក ម៉េត មាសភក្ដី បានបញ្ជាក់ថា ក្រោយពេលផ្អាកធ្វើចរាចរ ណ៍ លើស្ពាន ជ្រោយចង្វារទី១នេះ អាជ្ញាធររាជធានីបានត្រៀមកម្លាំងរួចជាស្រេចហើយ ក្នុងការសម្រួល ចរាចរណ៍ ដោយសារប្រជាពលរដ្ឋត្រូវធ្វើដំណើរ ទៅមកលើស្ពានមិត្តភាព កម្ពុជា-ចិន ឬ ជ្រោយចង្វារទី២ នៅពេលដែលស្ពានជ្រោចង្វារចាស់ ត្រូវផ្អាកចរាចរណ៍ដើម្បី ធ្វើការ ជួស ជុល។
បើតាមក្រសួងសាធារណការ ថវិកាសម្រាប់ជួសជុលស្ពានមិត្តភាពកម្ពុជា ជប៉ុននេះ គឺជាជំនួយឥតសំណងរបស់រាជរដ្ឋាភិបាលជប៉ុន តាមរយៈ JICA ប្រមាណ៣០លាន ដុល្លារ។ ប្រសិនបើគ្មានអ្វីប្រែប្រួលទេនោះ ការជួសជុលឡើងវិញនេះ ត្រូវការរយៈពេល ២២ខែ។
គួររំលឹកថា ស្ពានជ្រោយចង្វារទី១ ត្រូវបានបំផ្លាញក្នុងឆ្នាំ១៩៩៧២។ ក្រោយថ្ងៃ រំដោះ ៧ មករា ១៩៩៧៩ ពោលគឺនៅឆ្នាំ១៩៩៥ រាជរដ្ឋាភិបាលកម្ពុជា បានទទួលជំនួយ ឥត សំណង ពីរាជរដ្ឋាភិបាលជប៉ុនដើម្បីតភ្ជាប់ស្ពាន និងដាក់ឲ្យប្រើប្រាស់រហូតមក ដល់ សព្វថ្ងៃនេះ
ទោះជាយ៉ាងណា រដ្ឋបាលសាលារាជថានីភ្នំពេញ បានអំពាវនាវ ស្នើសុំ ប្រជាពល រដ្ឋមេត្តាយោគយល់ក្នុងរយៈពេលនៃការជួសជុលស្ពានជ្រោចង្វារចាស់ ដូចបានជំរាមជូន ខាងលើនេះ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
