ភ្នំពេញ៖មានករណីឆក់ខ្សែភ្លើងមួយបានបណ្តាលឲ្យបុរស២នាក់ស្លាប់បាត់បង់ជីវិត ខណៈពេលដែលយកម៉ូទ័របូមមកទឹកភ្លៀងចេញ ដែលហេតុការណ៍នេះបានកើតឡើងកាលពីវេលាម៉ោង២រសៀលថ្ងៃទី២៩ ខែមេសា ឆ្នាំ២០១៧ ស្ថិតនៅភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានបានឲ្យដឹងថា មុនពេលកើតហេតុជនរងគ្រោះបានយកម៉ូទ័រមកបូមទឹក ដែលលិចចេញពីក្នុងផ្ទះ តែចៃដន្យម៉ូទ័របានឆ្លងភ្លើងហើយបានឆក់ស្លាប់ទាំង២នាក់តែម្តង។
ក្រោយកើតហេតុសមត្ថកិច្ចបានចុះមកធ្វើកោសល្យវិច័យ ហើយប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕
ខេត្តឧត្តរមានជ័យ៖រថយន្ដម៉ាកកាមរីបាឡែនមួយគ្រឿងពណ៌ស្ករអត់ស្លាកលេខបានក្រឡាប់ផ្ងារជើងចូលទៅក្នុងរណ្ដៅក្អែចេញសុទ្ធតែឈើគ្រញូង តែសំណាងល្អមិនមានគ្រោះថ្នាក់ដល់អាយុជីវិតមនុស្សដែលករណីនេះកើតឡើងនៅល្ងាចថ្ងៃអាទិត្យទី៣០ ខែមេសាឆ្នាំ២០១៧ ស្ថិតនៅភូមិទំនប់លើឃុំត្រពាំងប្រិយស្រុកអន្លង់វែងខេត្តឧត្តរមានជ័យ។
សមត្ថកិច្ចបានអោយដឹងថា ដោយសាតែតៃកុងរថយន្ដបើកលឿនដូចហោះពេលមកដល់ផ្លូវបត់អកស៊ើក៍បានជ្រុលចង្កូតហួសផ្លូវចូលទៅក្នុងរណ្ដៅចញ្ចើមផ្លូវក្រឡាប់ផ្ងារជើងតែម្ដងទៅតែសំណាងល្អមិនមានគ្រោះថ្នាក់ដល់អាយុជីវិតមនុស្ស។ សមត្ថកិច្ចបន្តថា រថយន្ដដឹកឈើក្រញូងក្រឡាប់ផ្ងារជើងខាងលើគឺជារបស់មេឈ្មួញរបស់ ខ្វៀង ធីម៉ៃ ហៅយាយម៉ាយ ដែលបានដឹកជញ្ជូនចេញពីតំបន់កងអនុសេនាធំលេខ៥នៃសឹករងស្រុកត្រពាំងប្រាសាទ គោលបំណងយកមកស្តុបទុកនៅក្នុងស្រុកអន្លង់វែង និងធ្វើការដឹកជញ្ជូនបន្ដទៅខេត្តស្វាយរៀងដែលជាខេត្តគោលដៅ និងបន្ដចូលទៅលក់នៅប្រទេសវៀតណាម។ សមត្ថកិច្ចបញ្ជាក់ថា បើតាមការប៉ានស្មានឈើក្នុងរថយន្តមានប្រហែលជាងមួយតោន នេះគ្រាន់តែជាការបឋមដែលជំនាញមិនទាន់មានការវាស់វែងបានត្រឹមត្រូវនៅឡើយ។
ដោយឡែករថយន្ដរួមទាំងវត្ថុតាងឈើក្ររញូងត្រូវបានមន្ដ្រីជុំនាញស្ទូចយកទៅរក្សាទុកនៅខណ្ឌរដ្ឋបាលព្រៃឈើខេត្តឧត្តរមានជ័យ ខណៈតៃកុង និងម្ចាស់បានរត់គេចខ្លួនបាត់ស្រមោល៕
ខេត្តកំពង់ឆ្នាំង៖យ៉ាងហោចណាស់មនុស្ស៤នាក់ស្លាប់ និង៧នាក់ផ្សេងទៀតរងរបួស ក្នុងហេតុការណ៍គ្រោះថ្នាក់ចរាចរណ៍រវាងរថយន្ដកាមរីបុកជាមួយរថយន្ដក្រុងដឹកអ្នកដំណើររបស់ ក្រុមហ៊ុន ថោងស៊ីញ រួចបន្ដទៅបុករថយន្ដធុនធំមួយគ្រឿងទៀត។ ហេតុការណ៍នេះកើតឡើងនៅយប់ថ្ងៃទី២៩ ខែមេសា ឆ្នាំ២០១៧ តាមបណ្ដោយផ្លូវជាតិលេខ៥ ចន្លោះគីឡូម៉ែត្រលេខ៤៨-៤៩ ស្ថិតក្នុងភូមិស្ពានពោធិ ឃុំសេដ្ឋី ស្រុកសាមគ្គីមានជ័យ។
មន្ត្រីជំនាញនគរបាលចរាចរណ៍បានឲ្យដឹងថា មូលហេតុបង្កឲ្យមានគ្រោះថ្នាក់ គឺដោយសារមកពីរថយន្តកាមេរីគូថប៉ោង បើកជែងជាមួយរថយន្តដឹកទំនិញមួយគ្រឿងទៀត (ដឹកដំឡូងមី) ក្នុងស្ថានភាពផ្លូវគ្រោះថ្នាក់ ស្របពេលមានរថយន្តក្រុងក្រុមហ៊ុនថោងស៊ីញមកដល់ល្មម ក៏បុកគ្នាពេញទំហឹង បង្ក ឲ្យមានមនុស្សស្លាប់និងរបួសជាច្រើននាក់ ។
សមត្ថកិច្ចបន្តថា ក្នុងករណីគ្រោះថ្នាក់ចរាចរណ៍នេះបណ្តាលឲ្យមនុស្សជិះក្នុងរថយន្តកាមេគូទប៉ោងស្លាប់០៤នាក់ ស្រី០១នាក់ និងរបួស០៤នាក់ (ធ្ងន់០៣នាក់ ស្រី០១នាក់ )។ អ្នករបួស និងអ្នកស្លាប់ មានទីលំនៅភូមិម្លូមឺន ឃុំផ្សារដែក ស្រុកពញាឮ ខេត្តកណ្តាល។
បច្ចុប្បន្ន អ្នករបួសត្រូវបានក្រុមគ្រួសារដឹកទៅសង្គ្រោះនៅមន្ទីរពេទ្យ។ ដោយឡែកអ្នកស្លាប់សាច់ញាតិបានយកទៅធ្វើបុណ្យតាមប្រពៃណី៕
កូរ៉េខាងត្បូង៖ប្រធានាធិបតីអាមេរិកលោក ដូណាល់ ត្រាំ បានថ្លែងក្នុងកិច្ចសម្ភាសមួយថា លោកចង់ឲ្យកូរ៉េខាងត្បូងបង់ប្រាក់១ពាន់លានដុល្លារសម្រាប់ប្រព័ន្ធការពារមីស៊ីល THAAD តែកូរ៉េថា មិនអាចទៅរួចឡើយ។
ទីប្រឹក្សាជាន់ខ្ពស់ទទួលបន្ទុកគោលនយោបាយការបរទេសរបស់បេក្ខជនប្រធានាធិបតីកូរ៉េខាងត្បូង លោក មូន ជែអ៊ីន បាននិយាយថា សំណើរបស់ប្រធានាធិបតីអាមេរិក លោក ដូណាល់ ត្រាំ ដែលចង់ឲ្យក្រុងសេអ៊ូលបង់ប្រាក់សម្រាប់ការដំឡើងប្រព័ន្ធការពារមីស៊ីលរបស់អាមេរិកនោះ នឹងក្លាយទៅជាជម្រើសដែលមិនអាចទៅរួច។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
ប៉ុន្តែ លោក គីម គីជុង ទីប្រឹក្សាគោលនយោបាយការបរទេសរបស់លោក មូន បានប្រាប់ថា បើទោះបីជាយើងទិញប្រព័ន្ធការពារមីស៊ីល THAAD ក៏ដោយ ប៉ុន្តែប្រតិបត្តិការសំខាន់របស់វា នឹងនៅតែស្ថិតក្នុងកណ្ដាប់ដៃអាមេរិកដដែល។ លោកបន្តថា ដូច្នេះការទិញវា នឹងមិនមែនជាជម្រើសល្អនោះឡើយ៕
វ៉ាស៊ីនតោន៖បើតាមសារព័ត៌មាន CNN ផ្សាយថា យ៉ាងហោចណាស់មនុស្ស០៦នាក់បានស្លាប់ និង៥៥នាក់ទៀតបានរងរបួស ដោយសារខ្យល់ព្យុះបង្កជាជំនន់ទឹកភ្លៀងដ៏ខ្លាំង នៅតាមបណ្ដារដ្ឋមួយចំនួនដូចជា រដ្ឋ Missouri, Arkansas និងរដ្ឋ Texas។
អាជ្ញាធរអាមេរិកបាននិយាយស្ត្រីចំណាស់អាយុ៧២ឆ្នាំម្នាក់ បានស្លាប់នៅភាគអាគ្នេយ៍នៃរដ្ឋ Missouri សហរដ្ឋអាមេរិក បន្ទាប់ពីត្រូវទឹកកួចនាំយក ទៅជាមួយរថយន្ដ រីឯស្ត្រីម្នាក់ទៀតបានបាត់បង់ជីវិត កាលពីថ្ងៃសៅរ៍ ដោយសារដើមឈើបាក់រលំសង្កត់ នៅឯរដ្ឋ Arkansas ខណៈមនុស្ស០៤នាក់ ផ្សេងទៀតក៏ត្រូវបានគេរាយការណ៍ថា ស្លាប់ផងដែរនៅក្នុងរដ្ឋTexas។
បើតាមអាជ្ញាធរឧតុនិយមអាមេរិក ភ្លៀងធ្លាក់យ៉ាងខ្លាំង បានបង្កឱ្យកម្ពស់ទឹកភ្លៀងកើនដល់ ៤ទៅ៦ inches ឬក៏៩ inches នៅតាមតំបន់ នីមួយៗ នៅក្នុងរដ្ឋ Missouri និងរដ្ឋTexas ហើយមនុស្សរាប់រយនាក់ ត្រូវបានជម្លៀសទៅកាន់ទីទទួលមានសុវត្ថិភាព៕
ភ្នំពេញ៖ទីតាំងកត់ឆ្នោតវៀតណាមដែលសមត្ថកិច្ចខណ្ឌមានជ័យធ្លាប់បង្ក្រាបបីទីតាំងកន្លងមកនៅភូមិសាស្ត្រទឹកដីស្ទឹងមានជ័យ ខណ្ឌមានជ័យត្រូវបានបើកដំណើរការវិញយ៉ាងរលូនសង្ស័យម្ចាស់ទីតាំងខាងលើចេះសិល និងចេះបំបាំងកាយខ្លួនមិនជាប់គុកថែមទាំងបន្តមុខរបរកត់កន្ទុយលេខវៀតណាមដោយសមត្ថកិច្ចមើលមិនឃើញដោយសារតែក្រុមនេះមានយន្តក្រាសៗ។
គួរបញ្ជាក់ផងដែរថា ទីតាំងទាំង៣ដែលលោក ហ៊ួ ម៉េងវ៉ាង អធិការរងទទួលបន្ទុកផ្នែកព្រហ្មទណ្ឌខណ្ឌមានជ័យធ្លាប់បានបង្ក្រាប និងឃាត់បានមេកន្ទុយលេខ ហើយក៏បានដោះលែងទៅវិញ រួចក្នុងទឹកដីសង្កាត់ស្ទឹងមានជ័យដែលមានលោក ឯម ភារី ជានាយរងប៉ុស្តិ៍ស្តីទី។ ទី១នៅខាងក្រោយផ្សារក្រមួនផ្លូវ២១៧ភូមិឬស្សី សង្កាត់ស្ទឹងមានជ័យបានបើកកត់វិញ។ ទី២នៅដីថ្មីភូមិដំណក់ធំ២ សង្កាត់ស្ទឹងមានជ័យចាប់ហើយបើកវិញ និងទីតាំងទី៣ក្នុងសង្កាត់ស្ទឹងមានជ័យ ខណ្ឌមានជ័យជាប់ខាងជាងផ្សារលឹមឈាងក្នុងភូមិឬស្សី១ សង្កាត់ស្ទឹងមានជ័យដំណើការឡើងវិញ មិនតែប៉ុណ្ណោះក៏មានបន្ថែមកន្លែងកត់ឆ្នោតផ្សេងទៀតនៅមូលដ្ឋានសង្កាត់ស្ទឹងមានជ័យជាច្រើនកន្លែង តែសមត្ថកិច្ចប៉ុស្តិ៍ស្ទឹងមានជ័យឆ្លើយថា អត់ដឹង។ នេះបើយោងតាមការរាយការណ៍ពីមន្ត្រីនគរបាលប៉ុស្តិ៍ស្ទឹងមានជ័យម្នាក់ដែលសុំមិនបញ្ចេញឈ្មោះ៕
ដោយ៖ប៉ែន សុផល
បាត់ដំបង៖ស្ត្រី២នាក់ជាបងប្អូននឹងគ្នាត្រូវបានរន្ទះបាញ់ស្លាប់ម្នាក់ និងរងរបួសធ្ងន់ម្នាក់ ខណៈនៅធ្វើចំការពេលដែលមេឃកំពុងធ្លាក់ភ្លៀង ដែលហេតុការណ៍គួរអោយអាណោចអាធម៌ខាងលើនេះបានកើតឡើងនៅ វេលាម៉ោង១៦ និង០០នាទី ថ្ងៃទី២៨ ខែមេសា ឆ្នាំ២០១៧ នៅចំណុចក្រុមទី៤ ស្ថិតក្នុងភូមិ កណ្តាល ឃុំស៊ុង ស្រុកសំឡូត ខេត្តបាត់ដំបង។
លោកវសេនីយ៍ត្រី អ៊ាម សេងអឿន មេបញ្ជាការកងរាជអាវុធហត្ថស្រុកសំឡូតបានប្រាប់អោយដឹងថា ជនរងគ្រោះទី១ឈ្មោះ សៀន ឆើត ភេទស្រី អាយុ២៦ឆ្នាំ (ស្លាប់)។ ទី២ឈ្មោះ សៀន ឆេន ភេទស្រី អាយុ២៤ឆ្នាំ(រងរបួសធ្ងន់) ទាំងពីរនាក់រស់នៅក្រុមទី៤ ភូមិកណ្តាល ឃុំស៊ុង ស្រុកសំឡូត ខេត្តបាត់ដំបង។
លោកមេបញ្ជាការបញ្ជាក់ថា នៅមុនពេល កើតហេតុជនរងគ្រោះពីរនាក់បងប្អូនបាននាំគ្នានៅធ្វើចំការខាងក្រោយផ្ទះ ខណៈនោះក៍ស្រាប់តែមេឃចាប់ផ្តើមធ្លាក់ភ្លៀងមកធ្វើអោយមានផ្គរ និងរន្ទះបាញ់បណ្តាលអោយស្លាប់ម្នាក់និងម្នាក់ទៀតរងរបួសធ្ងន់តែម្តង។
បច្ចុប្បន្នសពត្រូវបានក្រុមគ្រួសារយករៀបចំធ្វើបុណ្យតាមប្រពៃណី ចំណែកជនរងគ្រោះត្រូវបានដឹកយកទៅសង្គ្រោះព្យាបាលនៅឯមន្ទីរពេទ្យ៕
ភ្នំពេញ៖ឧប្បត្តិហេតុគ្រោះថ្នាក់ចរាចរមួយបានកើតឡើង រវាងរថយន្តហ៊ីយ៉ាន់ដាយដឹកដែក១គ្រឿង បានបុក គ្នាជាមួយរថយន្តម៉ាកកាមរីបាឡែន១គ្រឿងទៀតពេញទំហឹង បណ្ដាលឲ្យរងការខូចខាតក្រពឹតរួញមុខទាំង ស្រុងដូចគ្នា ហើយខណៈនោះអ្នកបើកបររថយន្តកូរ៉េដឹកដែក បានស្លាប់បាត់បង់ជីវិតក្រោយពេលបញ្ជូនទៅ សង្គ្រោះបន្ទាន់ដល់មន្ទីរពេទ្យព្រះកុសុមៈ។ រីឯព្រូបានរងរបួសធ្ងន់ធ្ងរ និងត្រូវបានគេបញ្ជូនទៅសង្គ្រោះ បន្ទាន់នៅគ្លីនិកឯកជនឯចំការដូង ស្ថិតនៅក្នុងសង្កាត់ដង្កោ ខណ្ឌដង្កោ ដោយឡែកអ្នកបើកបរនិងជិះនៅក្នុង រថយន្តកាមរីបាឡែនមិនបានរងរបួសនោះឡើយ ព្រោះបានពោងសុវត្ថិភាពផ្ទុះការពារ។
ឧប្បទ្ទវហេតុគ្រោះថ្នាក់ចរាចរនោះ បានកើតឡើងកាលពីវេលាម៉ោង៥និង៣០នាទីព្រឹកថ្ងៃទី២៩ ខែមេសា ឆ្នាំ២០១៧ នៅលើកំណាត់ផ្លូវជាតិលេខ៣ ត្រង់ចំណុចខាងត្បូងវត្តស្លែង ស្ថិតនៅក្នុងភូមិទឹកថ្លា សង្កាត់ ក្រាំងពង្រ ខណ្ឌដង្កោ រាជធានីភ្នំពេញ។
តាមប្រភពព័ត៌មានបានឲ្យដឹងថា រថយន្តដែលបានបើកបុកគ្នានោះ១គ្រឿងម៉ាកហ៊ីយ៉ាន់ដាយ ពណ៏ស ពាក់ស្លាកលេខភ្នំពេញ2H-3361 ដឹកដែកហើយបុរសអ្នកបើកបរនិងព្រូមិនត្រូវបានគេស្គាល់ឈ្មោះនៅ ឡើយទេ រថយន្តនេះបានបើកបុកគ្នាជាមួយរថយន្តមួយគ្រឿងទៀត ម៉ាកកាមរីបាឡែនពណ៏ខ្មៅពាក់ស្លាក លេខភ្នំពេញ 2I-1166 បើកបរដោយបុរសមិនស្គាល់ឈ្មោះម្នាក់។រថយន្តទាំងពីរគ្រឿងនោះបានរងការខូច ខាតខ្ទេចមុខទាំងស្រុងដូចគ្នា ហើយក្រោយពេលកើតហេតុ ក្រុមសង្គ្រោះអង្គភាព៧១១ របស់កងពលតូច លេខ៧០ បានដឹកអ្នកបើកបររថយន្តកូរ៉េទៅសង្គ្រោះបន្ទាន់នៅមន្ទីរពេទ្យព្រះកុសុមៈ។ ប៉ុន្តែជាអកុសលបាន ស្លាប់នៅទីនោះ ចំណែកព្រូត្រូវបានបញ្ជូនទៅសង្គ្រោះនៅគ្លីនិកឯកជន ចំណែករថយន្តទាំងពីរគ្រឿងត្រូវបាន ក្រុមសង្គ្រោះខាងលើស្ទូចចេញពីកន្លែងកើតហេតុ បញ្ចៀសការកកស្ទះចរាចរនៅលើកំណាត់ផ្លូវនោះ។
ប្រភពដដែលបានបន្តថា នៅមុនពេលកើតហេតុរថយន្តទាំងពីរគ្រឿងនោះបានបើកបរបញ្ច្រាស់ទិសគ្នា ដោយរថយន្តម៉ាកហ៊ីយ៉ាន់ដាយដឹកដែក បានបើកបរធ្វើដំណើរក្នុងទិសដៅពីជើងទៅត្បូង ចំណែកឯរថយន្ត ម៉ាកកាមរីបាឡែនបានបើកបរធ្វើដំណើរ ក្នុងទិសដីពីត្បូងទៅជើងក្នុងល្បឿនលឿនដូចគ្នា លុះពេលទៅដល់ ត្រង់ចំណុចកើតហេតុ មិនដឹងថាមានបញ្ហាអ្វីទេទើបបុកគ្នាពេញទំហឹង បណ្ដាលឲ្យមានគ្រោះថ្នាក់បែបនេះ តែម្ដង។ក្រោយពេលកើតហេតុ នគរបាលការិយាល័យចរាចរផ្លូវគោកនៃស្នងការដ្ឋាននគរបាលរាជធានី ភ្នំពេញ បានចុះទៅធ្វើការវាស់វែង និងនាំយករថយន្តទាំងពីរគ្រឿង ទៅរក្សាទុករង់ចាំការដោះស្រាយគ្នានៅ ពេលក្រោយ៕
ក្រចេះ៖យ៉ាងហោចណាស់មានមនុស្សប្រុសស្រីក្មេងចាស់៥នាក់ត្រូវបានបញ្ជូនទៅសម្រាក់ព្យាបាលនៅមន្ទីរពេទ្យបង្អែកខេត្តក្រចេះ ដោយសាររន្ទះបាញ់ ។
ហេតុការណ៍នេះ បានកើតឡើងកាលពីរសៀលថ្ងៃទី ២៧ ខែមេសា ឆ្នាំ២០១៧ វេលាម៉ោងប្រមាណជា១៣នឹង៥០នាទី នៅចំនុចអូរមៀត ភូមិកសាង ឃុំចង្ក្រង់ ស្រុកចិត្របុរី ខេត្តក្រចេះ ។
អនុសេនីយ៍ឯក រស់ ប៊ុនធឿន នាយប៉ុស្ដិ៍នគរបាលរដ្ឋបាលចង្ក្រង់ បានឲ្យដឹងថា ជនរងគ្រោះទាំ៥នាក់ ទី១ មានឈ្មោះ ណុន សេនរ៉ុន ភេទប្រុស អាយុ២៧ឆ្នាំ,ទី២ ឈ្មោះ ចន្ថា ផាវី ភេទស្រី អាយុ២៧ឆ្នាំ ,ទី៣ ឈ្មោះ ថា ចាន់ដារា ភេទប្រុស អាយុ១៣ឆ្នាំ ,ទី៤ ឈ្មោះ ណុប មេ ភេទប្រុស អាយុ ១៣ឆ្នាំ និងទី៥ ឈ្មោះ រ៉ុន ស្រីម៉ិវ ភេទស្រី អាយុ ៦ឆ្នាំ ជនរងគ្រោះទាំង៥នាក់ រស់នៅក្នុងភូមិឃុំកើតហេតុខាងលើ។
សមត្ថកិច្ចបន្តថា មុនពេលកើតហេតុពពកខ្មៅដោយដុំៗនិងដោយកន្លែង នឹងមានភ្លៀងធ្លាក់ស្រិចៗ ហើយចំណែកឯជនរងគ្រោះទាំង៥នាក់ គឺកំពុងអង្គុយលេងលើគ្រែនៅក្រោមផ្ទះ ស្រាប់តែមានរន្ទះបាញ់សសរបាក់បីបួនដើម ចំណែកឯអ្នកអង្គុយក្រោយផ្ទះនោះ ក៏សន្លប់ទាំងអស់គ្នា ឃើញហេតុការដូច្នេះ ក្រុមគ្រួសារជនរងគ្រោះក៏បញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តក្រចេះតែម្តង ។
គួររំលឹកថា កាលពីថ្ងៃទី២៣ ខែមេសាកន្លងទៅថ្មីៗនេះ ខណៈដែលមានភ្លៀងបានធ្លាក់លាយឡំនឹងខ្យល់កន្ដ្រាក់បក់បោកយ៉ាងខ្លាំង ក៏កើតមានហេតុការណ៍រន្ទះបាញ់ បណ្តាលអោយស្ត្រីម្នាក់ស្លាប់នៅលើផ្ទះផងដែរ ឋិតនៅភូមិព្រែកកូវ ឃុំបុសលាវ ស្រុកចិត្របុរី ខេត្តក្រចេះ និងបែកប្រេះសសរអស់ជាច្រើនដើម៕
កូរ៉េខាងត្បូង៖កូរ៉េខាងជើងបានបាញ់សាកល្បងមីស៊ីល ទៀតហើយ ដោយបាញ់ចេញតំបន់ក្បែរសមុទ្រភាគខាងកើត នៃប្រទេស ប៉ុន្តែទទួលបរាជ័យ។ នេះបើយោងតាមទីភ្នាក់ងារសារព័ត៌មាន AP ដែលចេញផ្សាយនាព្រឹកព្រលឹមថ្ងៃទី២៩ ខែមេសា ឆ្នាំ២០១៧នេះដោយដកស្រង់សម្តីមន្ត្រីកូរ៉េខាងត្បូង និងសហរដ្ឋអាមេរិក។
ប្រភពដដែលបញ្ជាក់ថា ការបាញ់សាកល្បងនេះគឺជាប្រភេទគ្រាប់មីស៊ីល Ballistic ដោយធ្វើឡើងនៅព្រឹកព្រលឹមថ្ងៃសៅរ៍នេះនៅតំបន់ក្បែរសមុទ្រភាគខាងកើត នៃប្រទេសកូរ៉េខាងជើង ប៉ុន្តែត្រូវបានធ្លាក់មកវិញបន្ទាប់ពីបាញ់ចេញ២-៣នាទីក្រោយមក។
គួរបញ្ជាក់ថា នេះជាលើកទី២ ហើយ ដែលកូរ៉េខាងជើងបាញ់សាកល្បងមីស៊ីលទទួលបរាជ័យ៕
កាប៊ុល៖មេដឹកនាំជាន់ខ្ពស់នៃក្រុមភេរវករម្នាក់និងបក្សពួកក្រុមសកម្មប្រយុទ្ធ ISIS សរុប៤៥នាក់ត្រូវបានកងកម្លាំងសន្តិសុខនៃប្រទេសអាហ្វហ្គានីស្ថានសម្លាប់ក្នុងអំឡុងការវាយប្រហារតាមផ្លូវអាកាស និងប្រតិបត្តិការបោសសម្អាតតាមផ្លូវគោកនៅស្រុក Achin នៃខេត្ត Nangarhar ។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅរសៀលថ្ងៃសុក្រ ទី២៨ ខែមេសា ឆ្នាំ២០១៧។
កម្លាំងសន្តិសុខអាហ្វហ្គានីស្ថាន បានឲ្យដឹងថា ក្នុងចំណោមជនសកម្មប្រយុទ្ធដែលត្រូវបានសម្លាប់ រួមមានបុគ្គលឈ្មោះ Qari Nafiz ជាមេដឹកនាំជាន់ខ្ពស់ម្នាក់ ទទួលបន្ទុកខាងទំនាក់ទំនងរបស់ក្រុមភេរវករ ISIS។ ជនឈ្មោះ Nafiz បានបាត់បង់ជីវិត រួមជាមួយក្រុមសកម្មប្រយុទ្ធ ៣៦នាក់ផ្សេងទៀត ខណៈ០៩នាក់ត្រូវបានសម្លាប់ ក្នុងប្រតិបត្តិការយោធាដាច់ដោយឡែកពីគ្នា នៅស្រុក Haska Mina នៃខេត្តដដែល។
គួរបញ្ជាក់ថា ក្រុមភេរវករ ISIS និងក្រុមឧទ្ទាមតាលីបង់ បានបង្កអស្ថិរភាពសន្តិសុខ នយោបាយ សង្គម ឲ្យប្រទេសនៅតំបន់អាស៊ីខាងត្បូងមួយនេះអស់រយៈពេលជាយូរណាស់មកហើយ ហើយក្នុងប្រតិបត្តិការដ៏ក្តៅគគុក ដើម្បីប្រយុទ្ធប្រឆាំងភេរវកម្មនៅទូទាំងប្រទេស៕
រាជធានីភ្នំពេញ៖ជនសង្ស័យជាឃាតករ ដែលបានប្រើក្រម៉ារឹតកសម្លាប់យុវតីវ័យ១៦ឆ្នាំម្នាក់ បណ្ដាលឲ្យស្លាប់នៅក្នុងរោងគោ តាមបណ្ដោយផ្លូវទន្លេសាប ស្ថិតក្នុងភូមិដើមគរ សង្កាត់ជ្រោយចង្វា ខណ្ឌជ្រោយចង្វា កាលពីយប់ថ្ងៃទី២៥ ខែមេសា ឆ្នាំ២០១៧ ត្រូវបានសមត្តកិច្ចចាប់ខ្លួនបានហើយ។
ការចាប់ខ្លួននេះបានកើតឡើងនៅវេលាម៉ោង៥ និង០០ល្ងាចថ្ងៃទី២៧ ខែមេសា ឆ្នាំ២០១៧ និងដកហូតបានមកវិញនូវទូរស័ព្ទ១គ្រឿង នៅឯផ្ទះបងប្អូនរបស់ជនសង្ស័យ ស្ថិតក្នុងឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ក្រោយពីឃាតករបានសម្លាប់ និងយកទាំងគ្រឿងអលង្ការ រួមនិងទូរស័ព្ទ ហើយរត់គេចបានរយៈពេល២ថ្ងៃនេះ ។
ជនសង្ស័យជាឃាតករដែលត្រូវចាប់ខ្លួនឈ្មោះ យ៉ុង ឧត្តម «ហៅទន្សាយ» ភេទប្រុស អាយុ១៧ឆ្នាំ មុខរបរកម្មករស៊ីឈ្នួលដឹកគោ ស្នាក់នៅក្បែរផ្ទះជនរងគ្រោះ។ ចំណែនក្មេងស្រីរងគ្រោះឈ្មោះ ម៉ាន ស្រីមុំ អាយុ១៦ឆ្នាំ មុខរបរសិស្ស ស្នាក់នៅជាមួយឪពុកឈ្មោះ ទូ ល័សមាន និងម្ដាយឈ្មោះ ជីត ម៉ ជាខ្មែរឥស្លាម មានមុខរបរលក់សាច់គោ ស្នាក់នៅផ្ទះគ្មានលេខ ស្ថិតតាមបណ្ដោយផ្លូវទន្លេសាប ក្នុងក្រុមទី៦ ភូមិដើគ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ៕
ខេត្តព្រះសីហនុ៖ផ្ទុះឡកំដៅកុងប្លាកេក្នុងរោងចក្រហ្លាញហ្វ្លរីងខេមបូឌា ខូអិលធីឌី ផលិតក្ដារកុងប្លាកេ បណ្ដាលអោយកម្មករចំនួន០២នាក់រងរបួសធ្ងន់ ដែលករណីនេះកើតឡើងនៅរសៀលថ្ងៃទី ២៧ខែមេសា ឆ្នាំ២០១៧ វេលាម៉ោង៥ និង៣៥នាទីក្នុងតំបន់សេដ្ឋកិច្ចពិសេសបិតត្រាំងស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ។
ប្រភពពីកន្លែងកើតហេតុបានឲ្យដឹងថាជនរងគ្រោះទី១.ឈ្មោះ រាំង ធី ភេទ ប្រុស មានទីលំនៅ ភូមិពូធឿងឃុំបិតត្រាំង ស្រុកព្រៃនប់ ខេត្តព្រះសីហនុ និងទី២ .ឈ្មោះនាង នឿន ភេទប្រុស មានទីនៅភូមិព្រៃនប់២ ស្រុក ព្រៃនប់ ខេត្តព្រះសីហនុ ក្រោយកើតហេតុជនរងគ្រោះទាំត្រូវបញ្ជូនទៅសង្គ្រោះនៅមន្ទីពេទ្យសេតេ។ចំពោះករណីនេះគេនៅពុំទាន់ដឹងមូលហេតុនៅឡើយទេ៕
វ៉ាស៊ីនតោន៖យោងតាមសារព័ត៌មានបរទេសបានឲ្យដឹងថា សហរដ្ឋអាមេរិក នឹងស្នើសុំឲ្យ អ ស ប បិទស្ថានទូតកូរ៉េខាងជើង នៅទូទាំងពិភពលោក ខណៈ កិច្ចប្រជុំពិសេស នៃក្រុមប្រឹក្សាសន្តិសុខ អ ស ប ដែលនឹងប្រព្រឹត្តទៅនៅថ្ងៃសុក្រនេះ (ម៉ោងនៅក្នុងទីក្រុងញូយ៉ក)។
លោក Mark Toner អ្នកនាំពាក្យក្រសួងការបរទេសអាមេរិក បានឲ្យដឹងថា រដ្ឋមន្ត្រីការបរទេសអាមេរិក លោក រិច ធីល្លឺសុន នឹងធ្វើជាប្រធានដឹកនាំកិច្ចប្រជុំពិសេសថ្នាក់រដ្ឋមន្ត្រីនៃក្រុមប្រឹក្សាសន្តិសុខ ដើម្បីពិភាក្សាលើសំណុំរឿងនុយក្លេអ៊ែរកូរ៉ខាងជើង នៅក្នុងក្របខណ្ឌ នៃការពង្រឹងការគាំទ្រពីអន្តរជាតិ បង្កើនការដាក់សម្ពាធលើទីក្រុងព្យុងយ៉ាង សម្រាប់កម្មវិធីនុយក្លេអ៊ែរ និងមីស៊ីលផោ្លង។
លោក Mark Toner បានបញ្ជាក់ដូច្នេះថា «មានជំរើសជាច្រើន ក៏ប៉ុន្តែក្នុងចំណោមជំរើសទាំងនេះ ក៏មានការដាក់ទណ្ឌកម្ម ហើយការធ្វើឱ្យឯកោនៃការទូតកូរ៉េខាងជើង ក៏ជាមធ្យោបាយមួយផងដែរ»៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
