ដោយ៖បញ្ញា
ភ្នំពេញ៖ជនសង្ស័យ២នាក់ដែលជាមុខសញ្ញាប្លន់ និងជួញដូរគ្រឿងញៀនបានព្យាយាមជិះរត់គេចពីកម្លាំងអាវុធហត្ថដែលកំពុងល្បាតក៏ជ្រុលទៅបុកម៉ូតូដែលចតស្ងៀមហើយក៏បានព្យាយាមរត់ត្រូវបានប្រជាពលរដ្ឋនៅទីនោះឃាត់ខ្លួនហើយរកឃើញកាំភ្លើងម៉ាក k54 មួយដើម និងថ្នាំញៀន១កញ្ចប់ធំផងដែរ ហេតុការណ៍នេះបង្កអោយមានការភ្ញាក់ផ្អើលនៅវេលាម៉ោង៣ និង២៥នាទីរសៀលថ្ងៃទី៦ ខែកញ្ញា ឆ្នាំ២០១៦ ស្ថិតនៅតាមបណ្តោយផ្លូវបេតុង ត្រង់ចំណុចផ្សារទួលពង្រ សង្កាត់ចោមចៅ ខណ្ឌពោធិ៍សែនជ័យ។
ជនសង្ស័យដែលឃាត់ខ្លួនបានទី១ឈ្មោះ ធូ រិន អាយុ២៦ឆ្នាំ មុខរបរមិនពិតប្រាកដ ស្នាក់នៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ នៅភូមិព្យា ស្រុកសំរោង ខេត្តតាកែវ ជនសង្ស័យម្នាក់ទៀតមិនបានស្គាល់អត្តសញ្ញាណ ជនសង្ស័យទាំង២នាក់ធ្វើដោយទោចក្រយានយន្តឌ្រីមស៊េរី០១៦ស្លាកលេខ1FZ9277ក្នុងទិសដៅពីត្បូងទៅជើងល្បឿនលឿននិងមានការផិតភ័យពីសមត្ថកិច្ចក៏ជ្រុលទៅបុកម៉ូតូដែលចតស្ងៀមក៏ដួលជ្រុះកាំភ្លើងត្រូវបានប្រជាពលរដ្ឋចាប់ប្រគល់អោយសមត្ថកិច្ចតែម្តង។
បច្ចុប្បន្នជនសង្ស័យទាំង២នាក់ ត្រូវបានបញ្ជូនទៅអធិការនគរបាលខណ្ឌពោធិ៍សែនជ័យដើម្បីសាកសួរ៕
បាងកក៖សារព័ត៌មាន Channel News Asia ផ្សាយមុននេះបន្តិចថា យ៉ាងហោចណាស់មនុស្ស០២នាក់បានស្លាប់ ក្នុងហេតុការណ៍បំផ្ទុះគ្រាប់នៅក្បែរសាលាមត្តេយ្យមួយកន្លែងនៅជិតព្រំដែន ថៃ-ម៉ាឡេស៊ី ក្នុងខេត្ត Narathiwat ភាគខាងត្បូងប្រទេសថៃ។
អ្នកនាំពាក្យមេបញ្ជាប៉ូលីសថៃលោក Yuthanam Petchmuang បាននិយាយថា មនុស្សដែលស្លាប់បាត់ជីវិតគឺជាឪពុក និងកូនស្រីដែលអាយុ ០៥ឆ្នាំ រួមនឹងមនុស្ស ០៨នាក់ទៀតបានរងរបួស នៅពេលម៉ូតូមួយគ្រឿង ដែលចតនៅមុខខ្លោងទ្វារចូលសាលារៀនបានផ្ទុះឡើង អំឡុងពេលដែល ឪពុកម្តាយនានា កំពុងជូនកូនៗទៅសាលារៀន។ លោកបញ្ជាក់ថា ការបំផ្ទុះគ្រាប់បែកនេះ គឺជាទង្វើ របស់ក្រុមដែលមានបំណងចង់ មានភាពចលាចលក្នុងប្រទេស៕
រាជធានីភ្នំពេញ៖យោងតាមសេចក្តីប្រកាសព័ត៌មានរបស់ គ.ជ.ប បានឲ្យដឹងថា រយៈពេល៥ថ្ងៃចាប់ពីថ្ងៃទី០១ ដល់ ថ្ងៃទី០៥ ខែកញ្ញា ឆ្នាំ២០១៦ ចំនួនប្រជាពលរដ្ឋដែលទៅចុះឈ្មោះបោះឆ្នោត នៅទូទាំងប្រទេសកម្ពុជាបានកើនដល់ ៨៣៣,៤៥១នាក់ហើយក្នុងចំណោមពលរដ្ឋប្រមាណជាង៩លាននាក់ ដែលមានអាយុត្រូវបោះឆ្នោត៕
ដោយ៖ប៉ែន សុផល
បាត់ដំបង៖ក្រុមបង្ការបង្ក្រាបនៃស្នងការនគរបាលខេត្តបាត់ដំបងនៅម៉ោងជាង១០ និង០០ព្រឹកថ្ងៃទី០៦ ខែកញ្ញា ឆ្នាំ២០១៦នេះបានកំណត់មុខសញ្ញាជនសង្ស័យកាច់សោម៉ូតូសកម្មឆ្លងដែន និងឈានដល់ការឃាត់ខ្លួនបានម្នាក់ បន្ទាប់ពីប្រុងជើងការកាច់សោម៉ូតូនៅមណ្ឌលគាំពារមាតា និងទារកខេត្តបាត់ដំបង។
សមត្ថកិច្ចបានបង្ហើបថា មុនពេលកើតហេតុមានស្ត្រីម្នាក់ជិះម៉ូតូដ្រីម សេ១២៥ ឆ្នាំ២០១៦មកចតនៅមុខមណ្ឌលហើយចូលទៅពិនិត្យសុខភាព ភ្លាមនោះមុខសញ្ញាជនសង្ស័យបានដើរសំដៅក្បែរម៉ូតូរួចដកឧបករណ៍កាច់សោរ ក្នុងពេលជាមួយគ្នាសមត្ថកិច្ចបានសួរនាំហើយជនសង្ស័យបានឆ្លើយថាចាំទទួលប្រពន្ធបន្ទាប់មកបានដើរត្រសៀរៗហើយរត់គេចខ្លួន ការព្យាយាមរត់គេចនេះត្រូវសមត្ថកិច្ចបង្ខំចិត្តបាញ់ភ្លៅខាងឆ្វេងតែម្តង។
ជនសង្ស័យមានឈ្មោះជា សំណាង ភេទប្រុស អាយុ៣៧ឆ្នាំ រស់នៅភូមិបណ្តុះសណ្តែក ឃុំស្រះបន្ទាយ ស្រុកបារាយ ខេត្តកំពុងធំជាមុខសញ្ញាសកម្មបានធ្វើសកម្មភាពជាបន្តរបន្ទាប់ក្នុងខេត្តពោធិសាត់ បន្ទាយមានជ័យនិងខេត្តបាត់ដំបងហើយត្រូវបានឃាត់ខ្លួនជនបង្ករនិងបក្សពួកជាបន្តរផងដែរ។
ជនសង្ស័យខាងលើបន្ទាប់ពីសមត្ថកិច្វឃាត់ខ្លួនបានហើយ បានបញ្ជូនទៅកាន់មន្ទីរពេទ្យរុំមុខរបួសរួចបញ្ជួនបន្តមកកាន់អធិការក្រុងបាត់ដំបងដើម្បីសាកសួរ៕
អង់ការ៉ា៖នាយករដ្ឋមន្រីតួកគី លោក Binali Yildirim បានប្រកាសថាតំបន់ព្រំដែន រវាងតួកគី និង ស៊ីរីមានសុវត្ថិភាពទាំងស្រុងហើយ បន្ទាប់ពីកងកម្លាំងតួកគី និង ក្រុមឧទ្ទាមស៊ីរី គាំទ្រដោយទីក្រុងអង់ការ៉ា បានវាយបណ្ដេញក្រុម ISIS ចេញពីទីតាំងឈរជើងចុងក្រោយជា ច្រើន ដែលក្រុមមួយនេះ ធ្លាប់គ្រប់គ្រងកន្លងមកនោះ ។
លោក Binali Yildirim បានអះអាងដូច្នេះក្នុងសុន្ទរកថា មួយតាមកញ្ចក់ទូរទស្សន៍រដ្ឋ។ ដោយឡែក អង្គការឃ្លាំមើលសិទ្ធិមនុស្សស៊ីរី ក៏បានទទួលស្គាល់ផងដែរចំពោះការអះអាងនេះ ដោយបញ្ជាក់ថា តាមរយៈការបាត់បង់ទីតាំងឈរជើងទាំងនេះ នឹងធ្វើឱ្យក្រុមរដ្ឋអ៊ីស្លាម ISIS លែងមាន ទំនាក់ទំនងជាមួយនឹងពិភពក្រៅបន្តទៀត៕
ដោយ៖ប៉ែន សុផល
បាត់ដំបង៖ភ្នាក់ងារនគរបាលយុត្តិធម៌ជាង៣១៥នាក់មកពីក្រុងស្រុកទាំង១៤និងមន្ត្រីមកការិយាល័យនានាចំណុះឲ្យស្នងការខេត្តមួយចំនួនបានចូលស្បថបំពេញមុខងារនៅក្នុងតុលាការខេត្តបាត់ដំបង នាព្រឹកថ្ងៃទី៦ខែកញ្ញាឆ្នាំ២០១៦ ដោយមានការចូលរួមជាគណអធិបតីពីស្ថាប័នតុលាការមានប្រធានក្រុមប្រឹក្សាស្បថបំពេញជាភ្នាក់ងារ ដោយលោក ជា វណ្ណៈ ប្រធានសាលាដំបូងខេត្ត អនុប្រធាន២រូបមានលោក ហេង លុយ តំណាងអយ្យការណ៍ និងលោកស្រី យិច ឈាណាវី ជាចៅក្រម។
តាមលោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្តបានឲ្យដឹងស្បថក្នុងអំឡុងឆ្នាំ២០០៨កន្លងមកស្នងការដ្ឋាននគរបាលខេត្តយើងបានធ្វើពិធីនេះម្តងរួចមកហើយ ក្នុងនោះក៏មានការបែងចែកនិងចូលស្បថជាមន្ត្រីនគរបាលយុត្តិធម៌ដែលមានតួនាទី ឬមានពីឋានន្តរសក្តិពីអនុសេនីយ៍ឯកឡើងទៅ។ ដោយឡែកយើងបានធ្វើពិធីនៅថ្ងៃនេះ គឺសម្រាប់តែភ្នាក់ងារនគរបាលយុត្តិធម៌មានចំនួន៣១៥នាក់ បានចូលស្បថបំពេញមុខងារនៅតុលាការខេត្តបាត់ដំបង បន្ទាប់ពីមានលិខិតស្នើសុំរបស់លោកឧត្តមសេនីយ៍ទោ ស ថេត ស្នងការនគរបាលខេត្តនាពេលកន្លងមកថ្មីៗនេះ។
លោកឧត្តមសេនីយ៍ត្រី ជេត វណ្ណនី បានបញ្ជាក់ថា ការចូលស្បថនាថ្ងៃនេះ ជាលើកទី២ហើយ គឺជាមន្ត្រីនគរបាលមកពីមូលដ្ឋានតាមបណ្តាស្រុកក្រុងទាំង១៤ និងមន្ត្រីនគរបាលមកពីការិយាល័យនានាចំណុះឲ្យស្នងការខេត្តមួយចំនួន ដើម្បីបំពេញមុខងារ( បំពេញសិទ្ធ)ជាភ្នាក់ងារនគរបាលយុត្តិធម៌ តែមិនមានសិទ្ទ្ធសម្រេចអ្វីធំដុំទេ អាចសម្រេចបានត្រឹមបទលហុប៉ុណ្ណោះ ដូចមានចែងក្នុងក្រម ក្នុងមាត្រា៧៦, ៧៧, ៧៨, ក្រោយបានស្បថហើយមន្ត្រីទាំងអស់ ត្រូវបានទទួលស្គាល់និងចេញវិញ្ញាបនបត្រពីសាលាដំបូងខេត្តបាត់ដំបង ។ ដោយខុសគ្នាពីមន្ត្រីនគរបាលយុត្តិធម៌ ដែលធ្លាប់បានទៅស្បថនៅសាលាឧទ្ធរណ៍ ដែលមានសញ្ញាបត្របញ្ជាក់ពីលោករដ្ឋមន្ត្រីក្រសួងយុត្តិធម៌ និងក្រសួងមាហាផ្ទៃ ហើយមានសិទ្ធិសម្រេចការងារទៅតាមភារកិច្ចជំនាញដែលថ្នាក់លើប្រគល់ជូន៕
ខេត្តបាត់ដំបង៖បុរសអ្នកនេសសាទម្នាក់បានស្លាប់នៅនឹងកន្លែង ខណៈប្រើប្រាស់ឧបករណ៍ឆក់ត្រីនៅក្នុងអាងកំពីងពួយដោយមិនប្រយ័ត្នជាហេតុឆ្លងចរន្តបណ្តាលឲ្យឆក់ ដែលហេតុការណ៍នេះកើតឡើងវេលាម៉ោងជាង១១ និង០០ព្រឹកថ្ងៃទី០៥ ខែកញ្ញា ឆ្នាំ២០១៦ក្នុងអាងកំពីពួយចំណុចជីរក់ ភូមិបឹងក្រសាល ឃុំស្នឹង ស្រុកបាណន់ ខេត្តបាត់ដំបង។
បើប្រជានេសាទម្នាក់បានបញ្ជាក់ថា ជនរងគ្រោះឈ្មោះ ហាក់ ហ៊ាង ភេទប្រុស អាយុ៥៣ឆ្នាំរស់នៅកន្លែងកើតហេតុខាងលើ នៅក្នុងភូមិសាស្ត្រចំណុចជីរក់នេះប្រជាពលរដ្ឋជាច្រើនបានរិះគន់ជាខ្លាំងទៅលើសមត្ថកិច្ចពិសេសមន្ត្រីជំនាញដែលមិនមានការហាមឃាត់បណ្តោយអោយប្រជានេសាទឆក់ត្រីជាអំពើខុសច្បាប់យ៉ាងពពាក់ពពួន៕
រាជធានីភ្នំពេញ៖ក្រោមការសម្របសម្រួលពីលោក សៀង សុខ ព្រះអាជ្ញារងអយ្យការអមសាលាដំបូងរាជធានីភ្នំពេញនៅព្រឹកព្រលឹមថ្ងៃទី៦ ខែកញ្ញា ឆ្នាំ២០១៦នេះនាយកដ្ឋានស៊ើបអង្កេត និងអនុវត្តនីតិវិធី សហការជាមួយស្នងការដ្ឋាននគរបាលរាជធានីភ្នំពេញបានបន្តយុទ្ធនាការចុះត្រួតពិនិត្យ និងធ្វើការឃាត់ខ្លួនជនជាតិវៀតណាម៨នាក់ ពីបទរស់នៅ និងធ្វើការខុសច្បាប់។
ប្រធាននាយកដ្ឋានស៊ើបអង្កេត និងអនុវត្តនីតិវិធី លោកឧត្តមសេនីយ៍ទោ អ៊ុក ហៃសីឡា បានឲ្យដឹងថា ការចុះត្រួតពិនិត្យខាងលើនេះ បានធ្វើឡើងនៅផ្ទះលេខ២០ និងផ្ទះលេខ២៦ ផ្លូវលេខ៤០ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។ លោកឧត្តមសេនីយ៍បានបន្តថា ជនជាតិវៀតណាមទាំង៨នាក់នេះ មានស្រីម្នាក់ មានកាន់លិខិតឆ្លងដែន ទិដ្ឋាការE ចំនួន៣នាក់ តែគ្មានសៀវភៅការងារ ត្រូវបានដកយកលិខិតឆ្លងដែនមកធ្វើការផកពិន័យ តាមច្បាប់ការងារ។ ដោយឡែកមនុស្សចំនួន៥នាក់ គ្មានលិខិតឆ្លងដែន មានតែអត្តសញ្ញាណប័ណ្ណវៀតណាម ត្រូបាននាំខ្លួនយកមកអគ្គនាយកដ្ឋានអន្តោប្រវេសន៍ ដើម្បីអនុវត្តតាមនីតិវិធី៕
អាមេរិក៖សេតវិមានបាននិយាយកាលពីថ្ងៃចន្ទថា ប្រធានាធិបតីអាមេរិកលោក Barack Obama បានលុប ចោលកិច្ចប្រជុំមួយដែលបានគ្រោងទុកជាមួយមេដឹកនាំប្រទេសហ្វីលីពីនលោក Rodrigo Duterte បន្ទាប់ពីសម្ព័ន្ធមិត្តនៅអាស៊ីរបស់លោកមួយនេះបាននិយាយរិះគន់ប្រឆាំងនឹងលោក។
លោក Duterte បានជេរប្រមាថលោក Obama ខណៈដែលលោកបានសន្យាថា លោកនឹងមិនអនុញ្ញាតឲ្យមេដឹកនាំអាមេរិករូបនេះបង្រៀនគាត់អំពីសិទ្ធិមនុស្សនោះទេ។
អ្នកនាំពាក្យក្រុមប្រឹក្សាសន្តិសុខជាតិ Ned Price បានថ្លែងថា “លោកប្រធានាធិបតី Obama នឹងមិនជួបប្រជុំទ្វេភាគីជាមួយលោកប្រធានាធិបតី Duterte នៃប្រទេសហ្វីលីពីននៅរសៀលនេះទេផ្ទុយទៅវិញលោកនឹងជួបជាមួយប្រធានាធិបតីសាធារណរដ្ឋកូរ៉េគឺលោកស្រី Park Geun-hye”។
លោក Obama ត្រូវបានគេគិតថានឹងបង្ហាញពីអំណាចដាក់លោក Duterte នៅថ្ងៃអង្គារខណៈដែលកិច្ចប្រជុំកំពូលថ្នាក់តំបន់បានដំណើរការទៅនៅក្នុងតំបន់អាស៊ីនិងចំពេលដែលភាពតានតឹងកើនឡើងជុំវិញមហិច្ឆតាទឹកដីរបស់ប្រទេសចិន។
មេដឹកនាំទាំងពីរនេះគ្រោងនឹងជួបប្រជុំគ្នាក្នុងប្រទេសឡាវនៅឯការជួបជុំមួយដែលរៀបចំដោយសមាគមប្រជាជាតិអាស៊ីអាគ្នេយ៍ដែលជាព្រឹត្តិការណ៍ប្រចាំឆ្នាំក្នុងន័យដើម្បីជំរុញភាពសុខដុមរមនាដែលជាញឹកញាប់តែងតែត្រូវបានរំខានដោយជម្លោះក្នុងតំបន់។
ទោះជាយ៉ាងណាក៏ដោយ ក្នុងរយៈពេលខ្លីមុនពេលហោះហើរទៅកាន់រដ្ឋធានីវៀងចន្ទន៍ លោក Duterte បានចាប់ផ្តើមជេរប្រមាថដាក់លោក Obama ។
លោក Duterte បានប្រាប់ថា “ខ្ញុំនឹងដាក់បណ្តាសាអ្នកនៅក្នុងវេទិកានោះ” ។ លោកបានលើកឡើងបែបនេះប្រាប់អ្នកកាសែតនៅពេលដែលសួរអំពីផែនការរបស់លោក Obama ដែលចង់លើកឡើងពីការព្រួយបារម្ភអំពីសង្គ្រាមលើឧក្រិដ្ឋកម្មនៅក្នុងប្រទេសហ្វីលីពីនដែលបណ្តាលឲ្យមនុស្សជាង២.៤០០នាក់ស្លាប់។
គួរបញ្ជាក់ថា ជម្លោះរវាងសម្ព័ន្ធមិត្តទាំងពីរនេះបានក្លាយជាការផ្តោតអារម្មណ៍ដ៏សំខាន់ចាប់តាំងពីលោក Duterte បានឡើងកាន់តំណែងជាប្រធានាធិបតីនៅថ្ងៃទី៣០ខែមិថុនា៕
កំពង់ស្ពឺ៖អ្នករកស៊ីទាំងតូចទាំងធំ ដែលដឹកទំនិញមកពីណាក៏ដោយឱ្យតែឆ្លងកាត់ខេត្តកំពង់ស្ពឺ ពិសេសឆ្លងកាត់ផ្លូវជាតិលេខ៤តែម្តង មិនអាចគេចផុតពីការតាមប្រមាញ់របស់ក្រុមកូនចៅលោក ស៊ុន សុធា នេះឡើយ ទោះបីទំនិញទាំងនោះមានច្បាប់ មានបង់ពន្ធគ្រប់ក៏ដោយ ក៏ត្រូវបង់សេវាឱ្យក្រុមនគរបាលរបស់លោក ស៊ុន សុធា ផងដែរ។
ប្រភពពីក្រុមមន្ត្រីនគរបាលខាងលើបានឱ្យដឹងទៀតថា លោក ស៊ុន សុធា ធ្លាប់ចុះទៅបំពេញការងារ នៅខេត្តស្ទឹងត្រែង និងខេត្តបាត់ដំបង ហើយពេលនោះគាត់ត្រូវរងនូវការរិះគន់យ៉ាងខ្លាំង ពីរឿងកៀរគរក្រុមឈ្មួញ ដែលរកស៊ីដឹកជញ្ជូនឈើ និងទំនិញគេចពន្ធ ឱ្យចូលបង់លុយ ដើម្បីចៀសផុតពីការបង្ក្រាប និងធ្វើសកម្មភាពតាមអំពើចិត្តដោយគ្មានគោរពអាជ្ញាធរខេត្តនោះឡើយ។
តាមសេចក្តីរាយការណ៍ថា លោក ស៊ុន សុធា ប្រធានក្រុមនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃចុះ ប្រតិបត្តិការខេត្តកំពង់ស្ពឺ(បុស្តិ៍ឧត្តុង) និងផ្លូវជាតិលេខ៤ កំពុងតែប្រើអំណាចឥទ្ធិពល គ្របដណ្តប់ទៅលើមន្ត្រីនគរបាលរបស់ខេត្ត តាមរយៈនៃ ការដាក់ពង្រាយកុងត្រូលជជុះ និងឱ្យកូនចៅដេញបង្ក្រាបក្រុមអ្នករកស៊ី ជម្រិតយកលុយជាជាងការស្វែងរកបទល្មើស ។
ពេលនេះចាប់តាំងពីលោក ស៊ុន សុធា បានទទួលលិខិតបេសកកម្ម ជាប្រធានក្រុមប៉ូលិសប្រឆាំងបទល្មើសសេដ្ឋកិច្ចក្រសួងមហាផ្ទៃ ប្រចាំប្រតិបត្តិការខេត្តកំពង់ស្ពឺ កាលពីដើមខែសីហា កន្លងទៅនេះ លោក ស៊ុន សុធា បានបែងចែកកម្លាំងក្រោមឱវាទទៅតាមជំនាញ ដើម្បីប្រមូលលុយ យកមកបង់ជូនគាត់ ហើយគាត់ចាំដេកអេះពោះ ប្រមូលលុយដុំៗយ៉ាងត្រជាក់មេជើង និងយកទៅបង់ជូនថ្នាក់លើបន្តផងដែរ ។
ក្រុមអ្នករកស៊ី ដឹកជញ្ជូនឈើ និងទំនិញ តាមផ្លូវជាតិលេខ៥ ត្រូវតែទំនាក់ទំនង ចូលបង់លុយឱ្យនគរបាលសេដ្ឋកិច្ច ក្រសួងមហាផ្ទៃ ក្រោមបញ្ជារបស់លោក ស៊ុន សុធា ដែលដាក់ប៉ុស្តិ៍នៅក្បែរផ្សារ ឧដុង្គផងដែរ ទៅតាមតម្លៃ ដែលពួកគេបានកំណត់ មានដូចជា លុយប្រចាំខែ ប្រចាំជើង និងលុយថ្លៃបាយ យ៉ាងតិច១ម៉ឺនទៅ២ម៉ឺនរៀល ចំពោះទំនិញស្របច្បាប់ បង់ឱ្យទៅក្រុមមន្ត្រី ដែលប្រចាំការតាមប៉ុស្តិ៍ជជុះទាំងនោះ។ សម្រាប់ក្រុមឈ្មួញ ដែលរកស៊ីដឹកជញ្ជូនទំនិញ ប្រើប្រាស់រថយន្តយីឌុប ទាំងខ្សែៗ ភាគច្រើនដឹកទំនិញគេចពន្ធ ឬទំនិញខុសច្បាប់ ត្រូវទំនាក់ទំនង បង់លុយដុំជូនលោក ស៊ុន សុធា តាមរយៈមន្ត្រីដែលឈរជើងនៅតាមប៉ុស្តិ៍ ។ ហើយក្រៅពីនេះ ក៏មានមន្ត្រីក្រោមឱវាទច្រើនទៀត ដែលមានជំនាញស្ពាយកាតាប ដើរប្រមូលលុយពីឈ្មួញ តាមក្រុមហ៊ុន ឬតាមហាងកាហ្វេ តាមផ្ទះធ្វើអាជីវកម្មជម្រិតយកលុយដោយគ្មានអៀនខ្មាសអ្វីឡើយ។
ពាក់ព័ន្ធទៅនឹងរឿងរ៉ាវខ្សឹបខាងលើនេះដែរ ក្រុមអ្នករកស៊ីបានខ្សឹបប្រាប់មកនាយក្តាមប្រៃយើងឱ្យដឹង ផងដែរថា ជារៀងរាល់ថ្ងៃ ក្រុមអ្នករកស៊ី ដែលបានដឹកជញ្ជូនទំនិញ ទាំងតូចទាំងធំ ឆ្លងកាត់ផ្លូវជាតិលេខ៤ ពីខេត្តព្រះសីហនុ និងខេត្តកោះកុង បានរអ៊ូរទាំពីសកម្មភាពកោសរូស បង្ខំឱ្យបង់លុយ ពីសំណាក់មន្ត្រី ប៉ូលិសសេដ្ឋកិច្ច ក្រសួងមហាផ្ទៃក្រោមការដឹកនាំ របស់លោក ស៊ុន សុធា ដែលឈរជើង នៅតាមដងផ្លូវជាតិលេខ៤ និងទូទាំងខេត្តកំពង់ស្ពឺ ពិសេសក្នុងស្រុកភ្នំស្រួច ដែលក្រុមប៉ូលិសនេះបានដាក់កំហិត ឱ្យពួកគាត់បង់លុយ ទៅតាមតែអំពើចិត្ត មិនអាចសុំចុះថ្លៃបានទេ ក្រោមលេស ធ្វើតាមបញ្ជា របស់មេថ្មី (លោកស៊ុន សុធា)។
មន្ត្រីនគរបាលនៅក្នុងនាយកដ្ឋានដែលអត់ខ្សែបាននិយាយថា លោៈក ស៊ុន សុធាដែលទទួលបានការងារត្រួតត្រាអ្នករកស៊ីក្នុងតួនាទីជាប្រធាន ក្រុមប៉ូលិសសេដ្ឋកិច្ចក្រសួងមហាផ្ទៃប្រតិបត្តិការខេត្តកំពង់ស្ពឺ តាមផ្លូវជាតិលេខ៤នេះគឺគាត់បានចាយ ចាយលុយទិញយក លិខិតបេសកកម្ម ពីលោកផ្កាយ៣ ចាន់ វ៉ាន់ធឿន ប្រធាននាយកដ្ឋានប្រឆាំងបទល្មើស សេដ្ឋកិច្ចក្រសួងមហាផ្ទៃ ដើម្បីបានចុះបំពេញភារកិច្ច ។ចឹងលោកលោក ស៊ុន សុធា បានដាក់ផែនការឱ្យកូនចៅ ដែលមានជំនាញខាងចុះប៉ុស្តិ៍ និងប្រដេញរថយន្តដឹកទំនិញគ្រប់សារពើ ពិសេសពីឈ្មួញរកស៊ីដឹកឈើប្រណីត។
ទោះជាមានពតិមានចឹងក៏ដោយ ក៏គ្មានអ្នកណាហ៊ានក្អកជាមួយដែរ ព្រោះមានសេចក្តីរាយការណ៍ថាៈលោកវរសេនីយ៍ ស៊ុន សុធា ប្រធានក្រុមនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ប្រតិបត្តិការខេត្តកំពង់ស្ពឺ គាត់ មានខ្នងបង្អែករឹងមាំ ថ្នាក់ឧបនាយករដ្ឋមន្ត្ រី និងមានឪពុកជាអ្នកតំណាងរាស្ត្រផងដែរ ៕
រាជធានីភ្នំពេញ៖គ្រោះថ្នាក់ចរាចរមួយបានកើតឡើង កាលពីវេលាម៉ោង១២ និង២០នាទីរំលងអធ្រាត្រ ឈានចូលថ្ងៃទី៦ ខែកញ្ញា ឆ្នាំ២០១៦ នៅតាមបណ្តោយផ្លូវ៣៦០ កែងផ្លូវ៥១ ក្នុងសង្កាត់បឹងកេងទី១ ខណ្ឌចំការមនភ្នំពេញ ដោយ រថយន្ត២គ្រឿងបើកបុកគ្នាពេញទំហឹងបណ្តាលឲ្យមនុស្សប្រុសស្រី២នាក់ បានផ្លោងចេញពីរក្នុងថយន្តរងរបួសធ្ងន់ធ្ងរ ។
សមត្ថកិច្ចឲ្យដឹងថា នៅមុនកើតហេតុគេបានឃើញរថយន្ត BMW មួយគ្រឿងពាក់ស្លាកលេខភ្នំពេញ2Y-0089 បើកបរដោយបុរសម្នាក់ក្នុងល្បឿនយ៉ាងលឿន តាមបណ្តោយផ្លូវ៣៦០ ក្នុងទិសដៅពីជើងទៅត្បូង ។ លុះមកដល់ចំណុចកើតហេតុ ក៏មានរថយន្តមួយគ្រឿងទៀតម៉ាក Corolla បានមកដល់ដែរ ធ្វើឲ្យរថយន្តទាំង២បានបុកគ្នាយ៉ាងពេញទំហឹង ដែលធ្វើឲ្យបុរសម្នាក់រួមជាមួយនារីម្នាក់ជិះនៅក្នុងរថយន្ត Corolla ហោះផ្លោងចេញពីរថយន្តបណ្តាលឲ្យរងរបួសធ្ងន់ធ្ងរ ។
តាមការអះអាងរបស់ប្រជាពលរដ្ឋ គឺភ្លាមៗ បន្ទាប់ពីគ្រោះថ្នាក់នោះពួកគាត់បាននាំគ្នារត់ដេញចាប់ម្ចាស់រថយន្ត BMW ដែលជាអ្នកបង្ក ប៉ុន្តែតែដេញចាប់ស្រាប់តែបុរសជាម្ចាស់រថយន្ត BMW រូបនោះបានដកកាំភ្លើងខ្លីហើយ ភ្ចង់គំរាមរកបាញ់ឃើញ ដូច្នេះអ្នកដែលរត់ដេញក៏នាំគ្នាដកថយវិញធ្វើឲ្យម្ចាស់រថយន្ត BMW ក៏មានឱកាសរត់គេចខ្លួនបាត់៕
រាជធានីភ្នំពេញ៖សភាស៊ើបសួរសាលាឧទ្ធរណ៍កាលពីម្សិលមិញនេះ បានបើកសវនាការជាអសាធាណៈ និងបានសម្រេច ច្រានចោលបណ្តឹងរបស់ក្រុមមេធាវីការពារក្ដីលោក កឹម សុខា ដែលប្តឹងមោឃភាពដីកាដំណោះស្រាយ របស់ចៅក្រមស៊ើបសួរសាលាដំបូងរាជធានីភ្នំពេញ ។ ដូច្នេះសាលាដំបូងរាជធានីភ្នំពេញ នឹងបើកសវនាការសំណុំរឿងលោក កឹម សុខា នៅថ្ងៃទី៩ កញ្ញា តាមការគ្រោងទុកនិងមិនផ្លាស់ប្តូរពេលវេលានោះឡើយ ។
គួរបញ្ជាក់ថា ប្រធានស្តីទីគណបក្សសង្គ្រោះជាតិ លោក កឹម សុខា ជាប់ចោទពីបទ «បដិសេធក្នុងការចូលខ្លួន» ដែលតុលាការចាត់ទុកថាជាបទល្មើសព្រហ្មទណ្ឌជាក់ស្ដែង ដែលកន្លងមក លោក កឹម សុខា ខកខានពីរលើកក្នុងការចូលបំភ្លឺតុលាការ ក្នុងនាមសាក្សីករណីសញ្ចារកម្មដែលមាននាងខុម ចាន់តារាទី ហៅស្រីមុំ ជាជនរងគ្រោះ ខណៈសំណុំរឿងនេះ កំពុងបង្ខំចិត្តលោក កឹម សុខា សម្រេចការឃុំខ្លួនឯងក្នុងទីស្នាក់ការ CNRP ដល់សព្វថ្ងៃ៕
រាជធានីភ្នំពេញ៖តំណាងរាស្ត្រគណបក្សសង្គ្រោះជាតិ លោក ស៊ុន ឆ័យ បានអះអាងថា ក្រុមតំណាងរាស្ត្រគណបក្សសង្គ្រោះជាតិ កាលពីព្រឹកមិញនេះ បានដាក់ញត្តិជូនស្ថានទូតចំនួន១៥ប្រទេសរួចហើយ ដើម្បីផ្តល់ព័ត៌មាននិងសំណូមពរមួយចំនួន របស់ CNRP ទៅកាន់ថ្នាក់ដឹកនាំប្រទេសអាស៊ានទាំង១០ រួមទាំងថ្នាក់ដឹកនាំប្រទេស ដែលបានចុះហត្ថលេខាលើកិច្ចព្រមព្រៀងក្រុងប៉ារីស ផងដែរ៕
រាជធានីភ្នំពេញ៖យោងតាមការអះអាងពីមន្ត្រីតុលាការបានឲ្យដឹងថា សាលាដំបូងរាជធានីភ្នំពេញ បានសម្រេចប្រកាសសាលក្រមនៃសំណុំរឿង លោក អ៊ុំ សំអាន មន្ត្រីជាន់ខ្ពស់គណបក្សសង្គ្រោះជាតិ នៅថ្ងៃទី១០ ខែតុលា ឆ្នាំ២០១៦ ខាងមុខនេះ។
គួរបញ្ជាក់ថា នៅព្រឹកថ្ងៃទី០៥ ខែកញ្ញា ឆ្នាំ២០១៦នេះ សលាដំបូងរាជធានីភ្នំពេញបានបើកសវនាការជំនុំជម្រះសំណុំរឿងលោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដែលដឹកនាំដោយលោក ហេង សុខណា ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ និង លោក គុជ គឹមឡុង ជាតំណាងអយ្យការ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
