All posts by មេគង្គ ប៉ុស្តិ៍

ល្ងាចនេះ ! ជម្រើសជាតិកម្ពុជា ប៉ះក្រុម MCL ចម្រុះជាតិសាសន៍

March 14, 2016កីឡាមេគង្គ ប៉ុស្តិ៍

បាល់ទាត់៖នាវេលាម៉ោង៥ល្ងាចថ្ងៃទី១៤ ខែមីនា ឆ្នាំ២០១៦នេះក្រុមបាល់ទាត់ជម្រើសជាតិកម្ពុជានឹងប្រកួត មិត្តភាពកម្តៅសាច់ដុំជាមួយក្រុមកីឡាករទាំងខ្មែរ និងបរទេសដែលជ្រើសរើសចេញពីក្លឹបនានាក្នុងលីគបាល់ទាត់កំពូលកម្ពុជា នៅពហុកីឡដ្ឋានជាតិ។
គួរបញ្ជាក់ថា ការប្រកួតរបស់ក្រុមជម្រើសជាតិកម្ពុជានេះដើម្បីត្រៀមខ្លួនចេញទៅប្រកួតបង្គ្រប់កិច្ចនៃយុទ្ធនាការជម្រុះ 2018 FIFA World Cup Russia ជាមួយ ប្រទេសស៊ីរី នៅថ្ងៃទី២៤ ខែមីនា ឆ្នាំ២០១៦ នៅប្រទេស អូម៉ង់ ជាទឹកដីកណ្ដាល៕

គង់ ចាន់ស្រីមុំ និង គឹម សីហា ត្រៀមប្រាក់ជាង១០ម៉ឺនដុល្លារសម្រាប់រៀបការថ្ងៃទី១៤មីនានេះ

March 14, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជា, សិល្បៈ / កម្សាន្តមេគង្គ ប៉ុស្តិ៍

ដោយ៖រតនៈ

ភ្នំពេញ៖ ថ្ងៃទី១៤មីនានេះតារាសម្តែងស្រីសាច់ខ្ចីគួរឲ្យខ្នាញ់កញ្ញា គង់ ចាន់ស្រីមុំ បានដឹកដៃគូស្នេហ៍លោក គឺម សីហា ចូលរោងការជាផ្លូវការហើយ។ តារាស្រី និងតារាប្រុសដែលល្បីខាងមុខជំនួញជាច្រើនមុខទាំងពីរនាក់គ្រោងត្រៀមកញ្ចប់ថវិកាប្រមាណជាង១០ម៉ឺនដុល្លារដើម្បីរៀបចំពិធីមង្គលការនេះ។

ចំណងស្នេហ៍ ៩ឆ្នាំរបស់ គឹម សីហា និង គង់ ចាន់ស្រីមុំ បានឈានដល់ដំណាក់កាលក្រាបផ្ទឹមដល់កន្ទេលតាមទំនៀមទម្លាប់ខ្មែរ។ក្រោយពីប្រកាសទំនាក់ទំនងស្នេហារបស់អ្នកទាំងពីរជិតមួយទសវត្សរ៍មក គឹម សីហា និងគង់ ច័ន្ទស្រីមុំ បានរួមគ្នាបោះទុនបើកមុខជំនួញជាច្រើនដូចជាបើកដំណើរការហាងលក់សំលៀកបំពាក់ នាំចូលទឹកអប់ម៉ាកផ្ទាល់ខ្លួន បើកដំណើរការភោជនីយដ្ឋានជាដើម។ ចំណងស្នេហ៍របស់ពួកគេមិនងាយប្រឈមនឹងភាពរង្គោះរង្គើទេខណៈដែលកន្លងទៅមានបុរសជាច្រើនព្យាយាមទាក់ទងសុំស្នេហ៍ពី គង់ ចាន់ស្រីមុំ ដោយហ៊ានចំណាយធនធានដ៏ក្រាស់ក្រែលប៉ុន្តែមិនបានសម្រេច។

តារាសម្តែងគង់ ចាន់ស្រីមុំ បញ្ជាក់ថា នាងបានចំណាយពេលតែមួយខែប៉ុណ្ណោះដើម្បីរៀបចំមង្គលការនេះ ព្រោះពីដំបូងនាងមិនទាន់បានគិតគូរពីការរៀបការហ្នឹងទេប៉ុន្តែចាស់ទុំទាំងសងខាងបានទៅគន់គូររកវេលា ហើយក៏មានតែថ្ងៃទី ១៤ ខែ មីនា ឆ្នាំ ២០១៦ នេះមួយថ្ងៃគត់ដែលល្អទើបមិនត្រូវរង់ចាំទៀត។

តារាស្រីវ័យ ២៦ ឆ្នាំរូបនេះ បានបញ្ជាក់បន្ថែមថា នាងនិងអនាគតស្វាមីគ្រោងចំណាយប្រមាណជាង១០ម៉ឺនដុល្លារសម្រាប់ពិធីមង្គលការនាងបើទោះបីជាពិធីមង្គលការនេះមានតែរយៈពេលមួយថ្ងៃក្តី។ នាងបន្តថា ពិធីក្រុងពាលី និងសូត្រមន្តធ្វើឡើងនៅព្រឹកថ្ងៃទី ១៤ នោះតែម្ដងដោយគ្មានពិធីហែរជំនួន ប៉ុន្តែបានរៀបចំរួចទុកជាស្រេច។ ដោយឡែកពិធីបំពាក់ចិញ្ចៀន និងពិធីផ្សេងៗដទៃទៀត ធ្វើឡើងជាធម្មតា។ នាងថាការចំណាយខ្ពស់ទៅលើសម្ភារៈតុបតែង ពិសេសគឺពិធីទទួលភ្ញៀវ និងអាហារត្រូវបានធ្វើឡើងនៅសណ្ឋាគារលំដាប់ផ្កាយប្រាំ សូហ្វីតែល ភ្នំពេញ ភូគីត្រា ហើយបានរៀបចំកាដូយ៉ាងពិសេសដោយផ្ទាល់ដៃសម្រាប់ទុកជូនភ្ញៀវថែមទៀតផង។ នាងបន្តទៀតថា ការចំណាយទៅលើការៀបចំពិធីការ សម្អាងការ ជាងថតរូបជំនាញ ថ្លៃអាហារ និងកាដូសម្រាប់ភ្ញៀវរាប់រយនាក់នោះគឺជាការរៀបចំពិសេសដោយនាងនិងអនាគតស្វាមីផ្ទាល់ហើយការចំណាយទាំងនេះមិនបូកបញ្ចូលតម្លៃចិញ្ចៀនពេជ្រតម្លៃជាង១០ម៉ឺនដុល្លារដែល គឹម សីហា ទិញជូនកាលពីថ្មីៗនោះឡើយ៕

វាយប្រហារតាមអាកាសនៅយេមែនសម្លាប់ក្រុមសកម្មប្រយុទ្ធ១៧នាក់

March 14, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

យេមែន៖ក្រុមចម្រុះដឹកនាំដោយអារ៉ាប់ប៊ីសាអូឌីបានបើកការវាយប្រហារតាមអាកាស នៅភាគខាងត្បូងប្រទេសយេមែនបណ្តាលឲ្យស្លាប់ក្រុមសកម្មប្រយុទ្ធ១៧នាក់ ជនស៊ីវិល ទាហាន និងកងកម្លាំងសន្តិសុខជាច្រើននាក់រងរបួសផងដែរ។
ក្រុមចម្រុះដឹកនាំដោយអារ៉ាប់ប៊ីសាអូឌីត បានចាប់ផ្តើមធ្វើយុទ្ធនាការវាយប្រហារតាមអាកាសប្រឆាំងក្រុមឧទ្ទាម Houthis កាលពីឆ្នាំមុន ក្រោយមានការសុំអន្តរាគមន៍ពីរដ្ឋាភិបាលយេមែន និងបន្ទាប់ពីក្រុមឧទ្ទាម បានវាយលុកចូលក្នុងទីក្រុងធំរបស់ប្រទេសយេមែន ដោយសារមិនពេញចិត្តរបបគ្រប់គ្រងរបស់រដ្ឋាភិបាលបច្ចុប្បន្ន៕

ភ្លើងឆេះព្រៃរាលឆេះរថយន្តបទល្មើសអស់២៧គ្រឿង និងឈើមួយចំនួននៅទីស្នាក់ការរដ្ឋបាលព្រៃឈើក្រវាញ

March 14, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តពោធិ៍សាត់៖រថយន្តបទល្មើសព្រៃឈើអស់ចំនួន២៧គ្រឿងដែលកម្លាំងរដ្ឋបាលព្រៃឈើបង្ក្រាបនិងដកហូតបានកាលពីពេលកន្លងទៅយកមករក្សាទុកក្នុងទីស្នាក់ការរដ្ឋបាលព្រៃក្រវាញ ត្រូវបានភ្លើងឆេះអស់ទាំងស្រុងដោយសារភ្លើងឆេះព្រៃឆ្លងតាមប្រហោងសត្វកាយ។ ហេតុការណ៍នេះកើតឡើងនៅរសៀលថ្ងៃទី១៣ ខែមីនា ឆ្នាំ២០១៦ស្ថិតនៅផ្នែករដ្ឋបាលព្រៃឈើក្រវាញ ស្ថិតនៅក្នុងភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់។
តាមប្រមន្ត្រីសាលាស្រុកភ្នំក្រវាញ បានឲ្យដឹងថា មានករណីភ្លើងឆេះព្រៃ ហើយក៏ស្រាប់តែរីករាលដាល បណ្តាលអោយឆេះរថយន្តបទល្មើសព្រៃឈើត្រូវបានកម្លាំងរដ្ឋបាលព្រៃឈើបង្ក្រាប និងដកហូតបានកាលពីពេលកន្លងទៅអស់ចំនួន២៧គ្រឿង។ ប្រភពបញ្ជាក់ថា ករណីភ្លើងឆេះព្រៃរហូតរាលដាលបណ្តាលឲ្យឆេះរថយន្តចំនួន២៧គ្រឿង និងឈើមួយចំនួននេះ ដោយសារភ្លើងឆ្លងតាមប្រហោងសត្វកាយនៅជ្រុងខាងលិច នៃទីស្នាក់ការ។
យ៉ាងណាក៏ដោយក្រោយកើតហេតុ និងមានករណីនេះកើតឡើង កម្លាំងសមត្ថកិច្ច និងមន្ត្រីនៅទីស្នាក់មួយនេះ ក៏ជួយអន្តរាគមន៍ផងដែរ តែមិនអាចជួយបាន៕

ស្លាប់២៧នាក់ របួស៧៥នាក់ ក្នុងហេតុការណ៍បំផ្ទុះគ្រាប់បែកនៅតួកគី

March 14, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

តួកគី៖យោងតាមព័ត៌មាន Reuters ចេញផ្សាយនៅយប់ជ្រៅចូលថ្ងៃទី១៤ ខែមីនា ឆ្នាំ២០១៦ ឲ្យដឹងថា មានករណីបំផ្ទុះគ្រាប់បែកផ្ទុកក្នុងរថយន្តដ៏សាហាវមួយ នៅកណ្តាលទីក្រុង Ankara ប្រទេសតួកគី បណ្តាលឲ្យមនុស្ស២៧ស្លាប់ និងរបួស៧៥នាក់។
បើយោងតាមអាជ្ញាធរប្រទេសតួកគី ថ្លែងថា ការបាញ់ប្រហារក៏បានឮសូរផងដែរ បន្ទាប់ពីមានការផ្ទុះគ្រាប់បែក។ ដោយឡែករថយន្តសង្គ្រោះបន្ទាន់បានបញ្ជូនទៅកាន់កន្លែងកើតហេតុភ្លាមផងដែរ។ ទោះបីយ៉ាងណាគេមិនទាន់ដឹងច្បាស់ថា មានមនុស្សប៉ុន្មាននាក់ស្លាប់ និងរបួសរងរបួសនោះទេ៕

ស្ត្រីកូរ៉េម្នាក់សុំគូស្នេហ៍វិលទៅប្រទេសវិញមិនបាន ទូរស័ព្ទប្រាប់គេថាចាប់ជំរិត

March 13, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ ស សាម

ភ្នំពេញ៖មានការភ្ញាក់ផ្អើលទាំងព្រឹកថ្ងៃទី១៣ ខែមីនា នេះ ឮដល់សមត្ថកិច្ចទូទាំងក្រុងនិងស្ថានទូតកូរ៉េប្រចាំនៅកម្ពុជាដោយស្ត្រីជនជាតិកូរ៉ម្នាក់បានទូរស័ព្ទទៅប្រាប់បងប្អូននៅប្រទេសកូរ៉េថា មានជនជាតិកូរ៉េដូចគ្នាបានចាប់ជម្រិត។
ពេលទទួលបានព័ត៌មាននេះភ្លាម ទាំងនគរបាលមូលដ្ឌាន និងអគ្គនាយកដ្ឌានអន្តោប្រវេសន៍រូមទាំងស្ថានទូតបានចុះមកដល់កន្លែងកើតហេតុនៅចំនុចបុរីអង្គរ ស្ថិតនៅភូមិទួលគោកសង្កាត់ទួលសង្កែ ខណ្ឌឬស្សីកែវ។

ក្រោយពេលសមត្ថកិច្ចធ្វើការសាកសួរជនជាតិកូរេប្រុសស្រីទាំង២នាក់រួចមកទើបដឹងថាជនជាតិកូរ៉េទាំង២នាក់នេះជាគូស្នេហ៌នឹងគ្នា ចំណែកស្ត្រីជាជនជាតិកូរ៉េនោះគឺមានប្តីដើមនៅប្រទេសកូរ៉េហើយគាត់ក៏បានសុំសង្សារត្រឡប់ទៅប្រទេសកូរ៉េវិញតែខាងប្រុសបង្ខាំងមិនអោយទៅ គឺមិនមែនជាករណីចាប់ជំរិតអីនោះទេ។

ដោយមានការសង្សយ័ពីអគ្គនាយកដ្ឌានអន្តោប្រវេសន៍ថាជនជាតិកូរេទាំង២នាក់រួមទាំងបុរសជនជាតិកូរេចំនួន៣នាក់ទៀតដែលបានមកស្នាក់នៅបុរីអង្គរខាងលើទើបសុំឆែកPastsport និង visa តែពួកគេគ្មានលិខិតត្រឹមត្រូវ
ដូច្នេះកំលាំងអគ្គនាយកដ្ឌានអន្តោប្រវេសន៍បាននាំខ្លួនជនជាតិកូរ៉េទាំង៥នាក់ទៅកាន់នាយកដ្ឌានអន្តោប្រវេសន៍ដើម្បីធ្វើការសាកសួរតាមនីតិវិធី៕

ក្រុមចោរគាស់ហាងលក់ទូរស័ព្ទដៃយកអស់ជាង២០០គ្រឿងគិតជាទឹកប្រាក់៦ម៉ឺនដុល្លារ

March 13, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ប៉ែនសុផល

បាត់ដំបង៖ក្រុមចោរមួយក្រុមបានធ្វើសកម្មភាពកាត់សំណាញ់ដែក និងគាស់ទ្វារផ្ទះចូលប្រមូលយកទូរសព្ទ័ដៃជាច្រើនគ្រឿងរួចគេចខ្លួនបាត់ដោយសុវត្ថិភាព។

ហេតុការណ៍គួរអោយភ្ញាក់ផ្អើលខាងលើនេះបានកើតឡើងកាលពី វេលាម៉ោង ៧៖៣០ នាទីព្រឹកថ្ងៃទី១៣ ខែមីនា ឆ្នាំ២០១៦នៅចំណុចបូរី ស្ទឹងសង្កែដែលមានយីហោ(ពិភពអេឡិចត្រូនិក លក់ទូរស័ព្ទដៃទំនើប)ដែលមានទីតាំងតាមបណ្ដោយផ្លូវលេខ១របមាត់ស្ទឹងសង្កែ ស្ថិតក្នុងភូមិកំពង់ក្របី សង្កាត់ស្វាយប៉ោក្រុងបាត់ដំបង។

យោងតាមប្រភពព័ត៌មានពីលោក ឈឹម សំប៊ុននិងប្រពន្ធឈ្មោះជូត ច័ន្ទចរិយាដែលជាម្ចាស់ផ្ទះ(ពិភពអេឡិចត្រូនិកលក់ទូរស័ព្ទដៃទំនើប)ខាងលើបានរៀបរាប់ថា នៅយប់កើតហេតុថ្ងៃទី១២ ខែមីនា ឆ្នាំ២០១៦ លោកព្រមទាំងភរិយាមិនបាននៅដេកផ្ទះទេដោយចាក់សោរផ្ទះចោលរួចនាំគ្នាទៅដេកនៅបូរីផ្សារភូ ប៊ុយ លុះដល់ព្រឹកឡើងម៉ោង៧៖៣០នាទី ថ្ងៃទី១៣ ខែមីនា ឆ្នាំ២០១៦លោកព្រមទាំងភរិយាបានមកចាក់សោរចូលផ្ទះដើម្បីរៀបចំលក់ដូរក៏ឃើញ ទូរដាក់ទូរស័ព្ទរបើក និងបាត់អស់ទូរស័ព្ទជាច្រើនគ្រឿង និងមានស្នាមគាស់ទ្វារ និងកាត់សំណាញ់ដែកជាច្រើនបន្លោះ។

ប្រភពបន្តថា សម្ភារដែលបាត់បង់មាន ទូរស័ព្ទដៃទំនើបៗជាង២០០គ្រឿង ក្នុងមួយគ្រឿងតំលៃចាប់ពី៣០០ដុល្លាទៅដល់៨០០ដុល្លារ ដែលសរុបជាទឹកប្រាក់ប្រហែល៦ម៉ឺនដុល្លា(ប្រាំមួយម៉ឺនដុល្លារ)។

បច្ចុប្បន្នសមត្ថកិច្ចកំពុងធ្វើ ការងារស្រាវជ្រាវរកមុខសញ្ញាក្រុមចោរលួចទាំងនោះ៕

បញ្ជូនបក្ខពួកឃាតករ៣នាក់ទៅស្នងការខេត្តពាក់ព័ន្ធករណីឃាតកម្ម

March 13, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយះប៉ែនសុផល

បាត់ដំបង៖ កម្លាំងនគរបាលស្រុកឯកភ្នំបានបញ្ជូនបក្ខពួកឃាតករ៣នាក់ក្នុងចំណោម៥នាក់ទៅស្នងការខេត្តនៅរសៀលថ្ងៃទី១៣ខែមីនាឆ្នាំ២០១៦ ពាក់ព័ន្ធឃាតកម្មគិតទុកជាមុន បន្ទាប់ពីពួកគេបានសមគំនិតគ្នា សម្លាប់ជនរងគ្រោះម្នាក់ កាលពីវេលាម៉ោង២២និង៣០នាទីយប់ថ្ងៃទី៩ ខែមីនា ឆ្នាំ២០១៦ នៅចំណុចបឹងស្វាយត្រាំ ក្នុងភូមិសាស្ត្រឡូត៍នេសាទលេខ២ ស្ថិតក្នុងភូមិព្រែកទាល់ ឃុំកោះជីវាំងស្រុកឯកភ្នំ ខេត្តបាត់ដំបង។

លោក ឡុង យោធាវីរៈ អធិការនគរបាលស្រុកឯកភ្នំបានឲ្យដឹងថា បន្ទាប់ពីប្រជាពលរដ្ឋបានប្រទះឃើញសពបុរសម្នាក់កាលពីថ្ងៃទី១០ខែមីនាឆ្នាំ២០១៦ មានស្នាមកាប់ជាច្រើនពូថៅស្លាប់ក្នុងព្រៃរនាមតំបន់ឡូត៍លេខ២ ត្រង់ចំណុចបឹងស្វាយត្រាំអាចាកែងកុងស៊ី ច្រកចូលទៅព្រែកកូនយំ ស្ថិតនៅក្នុងតំបន់ឡូត៍អភិរក្ស(ឡូត៍លេខ២)ស្ថិតក្នុងភូមិព្រែកទាល់ឃុំកោះជីវាំង។

តាមសមត្ថកិច្ចការបានប្រាប់ឲ្យដឹងថា ជនរងគ្រោះរូបនេះ ជាបណ្តាញកងកម្លាំងស៊ើបការ(គ្មានក្របខណ្ឌ)នៃការិយាល័យទី២កងទ័ពជើងគោកប្រចាំទិសបឹងទន្លេសាប។

សមត្ថកិច្ចបានបន្តថា នៅមុនពេលកើតហេតុនៅយប់នោះមានការផឹកស៊ីមានមនុស្សជិត១០នាក់ ជនរងគ្រោះបាមមកចូលក្រោយគេ ហើយបានបញ្ចប់ការផឹកស៊ីរួចម្តងហើយ ក៏បានផឹកស៊ីជាមួយគ្នាម្តងទៀតហើយបានបញ្ចប់ការផឹកស៊ីរួចម្តងទៀត ប៉ុន្តែទំនងធ្លាប់មានទំនាស់ពាក្យសម្តីគ្នាកន្លងមកផង ហើយបក្ខពួកជនសង្ស័យមានគ្នា៥នាក់បានរួមគំនិតគ្នា វាយសម្លាប់ជនរងគ្រោះតែម្តង។ក្រោយពេលផឹកស៊ីលើកទី២រួចរួច ពួកគេបានដោយពូថៅមកកាប់ទៅលើជនរងគ្រោះជាច្រើនពូថៅបណ្តាលស្លាប់នៅនឹងកន្លែង ហើយនាំគ្នាគេចខ្លួនបាត់អស់។

សមត្ថកិច្ចបានបញ្ជាក់ទៀតថា ជនរងគ្រោះមានឈ្មោះ លន់ ឃីម ហៅជីម ភេទប្រុសអាយុ៤៧ឆ្នាំ រស់នៅភូមិគោកពន្លៃ សង្កាត់អូរម៉ាល់ ក្រុងបាត់ដំបង។ចំណែកបក្ខពួកជនសង្ស័យមានទី១ឈ្មោះ ខាន ភឿត ភេទប្រុសអាយុ២៩ឆ្នាំ ទី២ឈ្មោះ ថន ថៃ ភេទប្រុសអាយុ៣៧ឆ្នាំ ទី៣ឈ្មោះ ភៀត ក្លែប ភេទប្រុសអាយុ៣៧ឆ្នាំ ទាំង៣នាក់នេះរស់នៅក្នុងឃុំរការ ស្រុកសង្កែ ខេត្តបាត់ដំបង ឯបក្ខពួក២នាក់ទៀតបានរត់គេចខ្លួនបាត់។

បច្ចុប្បន្នជនសង្ស័យទាំង៣នាក់ត្រូវសមត្ថកិច្ចនគរបាលស្រុកបានកសាងសំណុំរឿងបញ្ជូនមកស្នងការនគរបាលខេត្តនៅរសៀលថ្ងៃទី១៣ខែមីនាឆ្នាំ២០១៦ នេះដើម្បីចាត់ការបន្តតាមច្បាប់៕

អស់កង្វល់បញ្ហាមុនក្បាលខ្មៅ គ្រាន់តែប្រើក្រូចឆ្មារ និងទឹកឃ្មុំ

March 13, 2016សុខភាពមេគង្គ ប៉ុស្តិ៍

សុខភាព៖ក្រូចឆ្មា មានលក្ខណៈសម្បត្តិ ជួយកម្ចាត់កោសិកាស្បែកងាប់ ហើយអនុញ្ញាតឲ្យកំណើនថ្មីនៃស្បែក ហើយវា ជួយសម្អាតដល់រន្ធញើស សម្អាតស្បែកឲ្យស្អាត និងកាត់បន្ថយមុនក្បាលខ្មៅយ៉ាងមានប្រសិទ្ធភាព។ នេះបើយោងតាមសារព័ត៌មានផ្នែកសុខភាព Womenhealth។
លើសពីនេះទៅទៀត ទឹកឃ្មុំមានតួនាទីក្នុងការជួយរឹតបន្តឹងស្បែករន្ធញើស និងការផ្ដល់នូវភាពស្រស់ស្អាតដល់ស្បែកមុខសុភាពនារីទាំងឡាយ ដែលជួបនូវបញ្ហាមុនក្បាលខ្មៅ ។
ដើម្បីធ្វើឲ្យក្រូចឆ្មាមានសប្រសិទ្ធភាពខ្ពស់ អ្នកគួរតែ ប្រើប្រាស់វា ជាមួយនឹងទឹកឃ្មុំចំនួន ៣តំណក់ ហើយយកវាលាបរឹត វាឲ្យពេញនៅលើផ្ទៃមុខ របស់អ្នករួចរក្សាវាទុកក្នុងរយៈពេល ៥ ទៅ ៧ នាទី ហើយលាងជាមួយទឹកត្រជាក់ចេញជាធម្មតា ដោយអនុវត្តវិធីនេះ រយៈពេល២សប្តាហ៍ បញ្ហាមុនក្បាលខ្មៅ នឹងលែមាននៅលើផ្ទៃមុខ របស់អ្នក៕

ចាញ់ល្បែងយកម៉ូតូទៅបញ្ចាំ ប្រឌិតថាចោរប្លន់ស្រែកផ្អើលសមត្ថកិច្ច

March 13, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖យុវជនម្នាក់ចាញ់ល្បែងអស់ យកម៉ូតូទៅបញ្ចាំ រួមបានប្រឌិតរឿងថា មានចោរប្លន់ម៉ូតូរបស់ខ្លួនស្រែកផ្អើលសមត្ថកិច្ចខណ្ឌទួលគោកចុះមកសួរនាំ និងអន្តរាគមន៍។ ប៉ុន្តែក្រោយការជជីកសួរនាំរួចមក ស្រាប់តែជននេះឆ្លើយប្រប់ថា ខ្លួនបានយកម៉ូតូ ទៅបញ្ចាំចំនួន៧០០ដុល្លារ។ ហេតុការណ៍ នេះកើតឡើងនៅយប់ថ្ងៃទី១២ ខែមីនា ឆ្នាំ២០១៦នេះ ស្ថិតនៅក្បែរ ផ្សារសំណង់១២ សង្កាត់ទឹកល្អក់ទី៣ ខណ្ឌទួលគោក។
យុវជនរូបនេះមានឈ្មោះ ឡឹក រិទ្ធរក្ស អាយុ២២ឆ្នាំ រ់នៅសង្កាត់ទឹកថ្លា ខណ្ឌសែនសុខ មានមុខរបរជាអ្នកលក់គ្រឿងអេឡិចត្រូនិច តាមប្រព័ន្ធ Online។ ចំណែកម៉ូតូដែលដាក់បញ្ចាំនោះម៉ាក Zoomer ពាក់ស្លាកលេខភ្នំពេញ 1DF-2250 ។
បើតាមការបញ្ជាក់ពីសមត្ថកិច្ច យុវជនរូបនេះ មានលេងល្បែងចាក់បាល់ នៅតាមប្រព័ន្ធ Internet បណ្តាលឲ្យចាញ់ ទើបយកម៉ូតូរបស់ខ្លួនទៅបញ្ចាំចំនួន៧០០ដុល្លារ នៅហាង បញ្ចាំឈ្មោះ ម៉ារ៉ាន់II ស្ថិតនៅផ្ទះលេខ៨ ផ្លូវលេខ១៨៦ សង្កាត់ទឹកល្អក់ទី៣ ខណ្ឌទួលគោក ហើយជននេះ តែងតែបញ្ចាំនៅហាងមួយនេះជាប្រចាំទៅហើយ។ តែលើកនេះ ក្រោយចេញពីហាងបញ្ចាំ ក៏ប្រឌិតរឿងថា ចោរប្លន់តែម្តង ធ្វើឲ្យមានការភ្ញាក់ផ្អើល ដល់សមត្ថកិច្ច និងប្រជាពលរដ្ឋចុះទៅមើលជាច្រើននាក់។
ក្រោយដឹងថាជននេះប្រឌិតរឿងនោះ សមត្ថកិច្ចក៏នាំខ្លួនទៅហាងបញ្ចាំនោះ និងយកម៉ូតូមកវិញ ហើយបញ្ជូនទៅកាន់អធិការដ្ឋាននគរបាលខណ្ឌទួលគោក រង់ចាំសុំគោលការណ៍ ណែនាំបន្តទៀតពីស្នងការនគរបាលរាជធានីភ្នំពេញ៕

ឃាត់ជនដៃដល់ជាកម្មករទូកនេសាទ២នាក់ បន្ទាប់ពីយកពូថៅកាប់សម្លាប់តៃកុងទូក

March 13, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តព្រះសីហនុ៖កម្លាំងនគរបាលខេត្តព្រះសីហនុបានចាប់ជនដៃដល់២នាក់ជាកម្មករទូកនេសាទ ដែលជាប់ពាក់ព័ន្ធ អំពើឃាតកម្ម វាយនឹងពូថៅទៅលើតៃទូកនេសាទដូចគ្នា បណ្តាលឲ្យស្លាប់ ខណៈដែលពួកគេ បានចេញទៅនេសាទនៅលើផ្ទៃសមុទ្រ ក្បែរកោះក្រាស ក្នុងឃុំកោះស្តេច ស្រុកបទុមសាគរ ខេត្តកោះកុង។
ស្នងការនគរបាលខេត្តព្រះសីហនុ លោកឧត្តមសេនីយ៍ ជួន ណារិន្ទ ថ្លែងថា ដំណឹងនៃអំពើឃាតកម្មនេះត្រូវបានថៅទូកនេសាទលោក ហេង សុគន្ធ អាយុ៤៣ឆ្នាំ មានទីលំនៅភូមិ៣ សង្កាត់១ ក្រុងព្រះសីហនុ ដែលបានទៅរាយការណ៍ជូននគរបាលរបស់លោក។ ថៅកែទូក រូបនេះ បានប្រាប់ថា កាលពីថ្ងៃទី៨ ខែមីនា ឆ្នាំ២០១៦ ទូកនេសាទរបស់ គាត់បានចេញ ទៅនេសាទលើផ្ទៃសមុទ្រក្បែរកោះក្រាស ដោយនៅលើទូកមានកម្មករ៣នាក់ រួមមាន ជនរងគ្រោះឈ្មោះ រ៉ា អាយុ៤៤ឆ្នាំ មានស្រុកកំណើតខេត្តកំពង់ស្ពឺ ជាតៃកុងទូក រួមជាមួយជនដៃដល់ទាំង២នាក់ រួមមានទី១ឈ្មោះ លឹម លុច អាយុ២៤ឆ្នាំ រស់នៅ សង្កាត់១ ក្រុងព្រះសីហនុ និងទី២ឈ្មោះ លឹម ធា អាយុ២១ឆ្នាំ មានស្រុកកំណើត ភូមិអង្គសុភី ស្រុកកំពង់ត្រាច ខេត្តកំពត។
លុះដល់វេលាម៉ោង៨ព្រឹកថ្ងៃទី១០ ខែមីនា ឆ្នាំ២០១៦ ជនរងគ្រោះ និងជនដៃដល់ទាំង៣នាក់ កើតមានជម្លោះជាមួយគ្នា រហូតជនទាំង២នាក់ បានយកពូថៅដៃវាយតៃកុងទូកចំក្បាល២ពូថៅ។ ពេលនោះ តៃកុងទូកបានលោតចុះពីទូក ហើយកម្មករទូកទាំង២នាក់ បានកាត់ខ្សែយុត្តិកាទូករួចបើកទូកយកមកទុក ចោលនៅកោះស្តេច ហើយនាំគ្នាឡើងជិះរថយន្តគេចខ្លួន។ ចំណែកជនរងគ្រោះ ជាតៃកុងទូកបានស្លាប់ ដោយរកឃើញសពអណ្តែតនៅជិតកោះ ក្រាស។
លោកឧត្តមសេនីយ៍ ស្នងការខេត្តព្រះសីហនុ បានបញ្ជាក់ថា ក្រោយពីទទួល បានព័ត៌មានពីថៅកែទូក កម្លាំងជំនាញបើកការស៊ើបអង្កេត ស្រាវជ្រាវជាបន្ទាន់ និងឈានទៅចាប់ខ្លួន ជនសង្ស័យបានជាបន្តបន្ទាប់នៅថ្ងៃនេះ ក្នុងនោះជនសង្ស័យ ឈ្មោះ លឹម ធា ចាប់បាននៅម៉ោង៨ និង០០នាទីព្រឹក នៅភូមិអង្គរសុភី ស្រុកកំពង់ត្រាច ខេត្តកំពត ហើយជនសង្ស័យឈ្មោះ លឹម លុច ចាប់បាននៅម៉ោង ៣៖០០នាទីរសៀល ថ្ងៃដដែលនេះនៅភូមិ៣ សង្កាត់១ ក្រុងព្រះសីហនុ។
បច្ចុប្បន្នជនសង្ស័យទាំង ២នាក់ ស្ថិតក្រោមការសាកសួរនៅ ស្នងការដ្ឋាននគរបាល ខេត្តព្រះសីហនុ ដើម្បីកសាងសំណុំរឿងបញ្ជូន ទៅតុលាការចាត់ការតាមច្បាប់បន្តទៀត៕

បុរស២នាក់ត្រូវរន្ទះបាញ់ស្លាប់ម្នាក់ របួសម្នាក់នៅខេត្តប៉ៃលិន

March 12, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តប៉ៃលិន៖បុរសម្នាក់ស្លាប់ និងម្នាក់ទៀតរងរបួសស្រាលដោយសារទអភូតហេតុរន្ទះបាញ់។ហេតុការណ៍នេះកើតឡើងកាលពីវេលាម៉ោង ៤និង ៣០នាទី រសៀលថ្ងៃទី១១ ខែមីនា ឆ្នាំ២០១៦ ក្នុងចំការដំឡូងមីមួយកន្លែង នាភូមិអូរទឹកភ្លាវ ឃុំអូរអណ្តូង ស្រុកសាលាក្រៅ ខេត្តប៉ៃលិន ខណៈដែលបុរសរងគ្រោះទាំងពីរនាក់ ទៅជ្រកក្រោម ដើមអំពឹលមួយដើម ព្រោះតែភ្លៀងមួយមេធំ។
ជនរងគ្រោះទាំងពីរមានឈ្មោះទី១ ឈ្មោះ យ៉ាត ភេទប្រុស អាយុ៣៦ឆ្នាំ (ស្លាប់នឹងកន្លែង ) ទី២ឈ្មោះ រឿន ណារិទ្ទ ភេទប្រុស អាយុ២៨ឆ្នាំ (របួសស្រាល) អ្នកទាំងពីរមានទីលំនៅបច្ចុប្បន្នភូមិកោះកែវ ឃុំសាលាក្រៅ ស្រុកសាលាក្រៅ ខេត្តប៉ៃលិន ជាកម្មករស៊ីឈ្នួលដកដំឡូងមី។
ប្រភពព័ត៌មានឲ្យដឹងថា មុនពេលកើតហេតុគេឃើញមនុស្សមួយក្រុម ដែលជាកម្មករស៊ីឈ្នូលដកដំឡូងមីឲ្យគេ បានទៅដកដំឡូងមី នៅកន្លែងកើតហេតុខាងលើ មួយសន្ទុះក្រោយមកស្រាប់តែផ្ទៃមេឃអួរអាប់បង្កជាដុំពពកខ្មៅ លាយឡំនិងភ្លៀងរលឹមស្រិចៗ ។
ប្រភពព័ត៌មានបន្តថា នៅពេលភ្លៀងចាប់ផ្តើមធ្លាក់ ក្រុមកម្មករទាំងនោះ ក៏បានរត់ទៅជ្រកក្រោមដើមអំពឹលមួយដើម ពេលនោះស្រាប់តែស្នូររន្ទះបានបាញ់ចេញពីក្រោមដើមអំពិល បណ្តាលឲ្យចំដើមទ្រូងបុរសម្នាក់ ស្លាប់ភ្លាមមួយរំពេច និងម្នាក់ទៀតរងរបួសស្រាល ។
បច្ចុប្បន្នសាកសពជនរងគ្រោះ ត្រួវបានរថយន្តសង្គ្រោះរបស់មន្ទីរពេទ្យបង្អែកខេត្ត ដឹកបញ្ជូនយកទៅលំនៅដ្ឋានជនរងគ្រោះ ភូមិកោះកែវ ឃុំសាលាក្រៅ ស្រុកសាលាក្រៅ ខេត្តប៉ៃលិន ដើម្បីធ្វើបុណ្យតាមប្រពៃណី៕

អ្នកជំនាញ៖សំឡេងសន្ទនាក្នុងខ្សែអាត់ពិតជាលោក កឹម សុខា និងកញា ស្រី មុំ ១០០%

March 12, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ក្រុមយុវជនស្វែងការពិត បានធ្វើសន្និសីទកាសែតស្តីពី”លទ្ធផលនៃខ្សែអាត់សំឡេងដែលសង្ស័យជាលោក កឹម សុខា និងនារីវ័យក្មេងឈ្មោះ ខុម ចាន់ដារ៉ាទី ហៅស្រីមុំ បានបង្ហាញភស្តុតាងបញ្ជាក់ថាសំឡេងក្នុងខ្សែអាត់នោះ ដូចសំឡេងស្រីមុំ១០០%” ។

នៅក្នុងសន្និសីទកាសែតនោះលោក ស្រី ចំរើន តំណាងក្រុមយុវជនស្វែងរកការពិត និងអ្នកជំនាញសុទ្ធតែបានអះអាងសំឡេង នាងស្រីមុំ ក្នុងពេលសន្ទនារវាងលោក កឹម សុខា និងសំឡេងក្នុងការផ្តល់បទសំភាសន៍រវាងលោក ជុន ចាន់បុត្រ ជាសំឡេងនាងស្រីមុំពិត១០០%។

អ្នកជំនាញបានបង្ហាញនូវការអះអាងថា សំឡេងលោក កឹម សុខា និងកញ្ញា ស្រីមុំ ពិត១០០%នោះដោយសំអាងលើរលកសម្លេង និងរលកហ្វ្រេកង់ សំឡេងដូចគ្នាពិត១០០%។ ទន្ទឹមនោះលោក ស្រី ចំរើន បញ្ជាក់ថា ដោយលោក កឹម សុខា គឺជាមនុស្សសាធារណៈ និងជាអ្នកនយោបាយ ដែលមានស្នេហាលួចលាក់បែបនេះ ត្រូវតែចេញមកសុំទោសប្រជាពលរដ្ឋខ្មែរជាសាធារណៈ និងប៉ះពាល់ដល់កិត្តិយសស្ត្រីខ្មែរ និងសមភាពយេនឌ័រ និងគ្មានការទទួលខុសត្រូវ។ លោក ស្រី ចំរើន បានបញ្ជាក់ទៀតថា លោកបានដាក់បណ្តឹងទៅព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ដោយប្តឹងកញ្ញា ខុម ចាន់ដារ៉ាទី ហៅស្រីមុំ ពីបទឆបោក កុហក់សាធារណជន និងគ្មានហេតុផលសមរម្យ។

លោក ស្រី ចំរើន បានទាមទារឲ្យកញ្ញា ស្រីមុំ និងលោក កឹម សុខា ត្រូវមានភាពក្លាហានបង្ហាញលិខិតឆ្លងដែន និងសំបុត្រយន្តហោះដែលអ្នកទាំងពីរបានធ្វើដំណើរទៅប្រទេសថៃ ក្នុងអំឡុងខែកុម្ភៈឆ្នាំ២០១៦ ដល់សាធារណៈ ៕

ចិនរំពឹងថា ទំនាក់ទំនងមិត្ដភាពជាមួយរុស្ស៊ីនឹងកាន់តែរឹងមាំ

March 12, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉េកាំង៖រដ្ឋមន្ដ្រីការបរទេសចិន លោក Wang Yi បាននិយាយថា ចិនមានទំនុកចិត្ដយ៉ាងខ្លាំងចំពោះទំនាក់ទំនងរវាងចិនជាមួយរុស្ស៊ី។ លោកថ្លែងបែបនេះក្នុងអំឡុងពេលជួបសំណេះសំណាលជាមួយរដ្ឋមន្ដ្រីការបរទេសរុស្ស៊ីលោក Sergei Lavrov គ្រាដែលលោករដ្ឋមន្ត្រីធ្វើដំណើរទស្សនកិច្ចក្នុងប្រទេសរុស្ស៊ី។
លោក Wang Yi បានបន្ដថា ក្នុងនាមចិន និងរុស្ស៊ីគឺជាដៃគូដ៏មានសារៈសំខាន់ និងផ្ដល់អាទិភាព រវាងគ្នាទៅវិញទៅមក ប្រទេសទាំងពីរកំពុងអភិវឌ្ឍយុទ្ធសាស្ដ្រចម្បងៗដែលបានសហការគ្នា។ លោកបញ្ជាក់ថា មិនថាមានអ្វីកើតឡើងនៅក្នុងតំបន់ ឬក្នុងពិភពលោក គោលនយោបាយនៃភាពជាដៃគូរវាងប្រទេសទាំងពីរគ្មានអ្វីផ្លាស់ប្ដូរទេ។
លើសពីនេះប្រទេសជាដៃគូទាំងពីរមានគម្រោងរៀបចំការផ្លាស់ប្ដូរនិងការចូលរួម កម្មវិធីសំខាន់ៗជាមួយគ្នាជាច្រើនទៀត ដូចជាការផ្ដួចផ្ដើមអនុវត្ដយុទ្ធសាស្ដ្រសេដ្ឋកិច្ច ទាំងយុទ្ធសាស្ដ្រសេដ្ឋកិច្ចរបស់ចិន និងយុទ្ធសាស្ដ្រសេដ្ឋកិច្ចរុស្ស៊ីផងដែរ ហើយរំពឹងថានឹងមានលទ្ធផលផ្លែផ្កា៕

The Penthouse Residence បញ្ចុះបឋមសិលាសាងសង់អគារខុនដូទំនើប

March 12, 2016ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ៖ គ្រាដែលសំណង់អគារខុនដូកំពុងមានការរីកចម្រើនក្នុងប្រទេសកម្ពុជា ហើយកំពុងទទួលបានការពេញនិយមពីអតិថិជននោះ The Penthouse Residence បានក៏ចាប់ផ្តើមគម្រោងរបស់ខ្លួនក្នុងទីផ្សារកម្ពុជាផងដែរ។ ដើម្បីអបអរសាទការលក់គម្រោងខុនដូ The Penthouse Residence នៅព្រឹកថ្ងៃទី១២ ខែមីនា ឆ្នាំ២០១៦នេះបានរៀបចំពិធីក្រុងពាលីបញ្ចុះបឋមសិលាសាងសង់អគារខុនដូ មានទីតាំងស្ថិតនៅខាងមុខផ្សារទំនើបអ៊ីអននិងសណ្ឋាគារសូហ្វ៊ីតែល អគារលេខ83B ផ្លូវសុធារស ស្ថិតក្នុងសង្កាត់ទន្លេបាសាក ខណ្ឌចំការមន។

The Penthouse Residence បាននាំមកនូវគម្រោងអភិវឌ្ឍន៍ចម្រុះមួយ ដែលដាក់បញ្ចូលគ្នាទាំងលំនៅដ្ឋាន និងអគារពាណិជ្ជកម្ម នៅតាមបណ្តោយផ្លូវសុធារស ក្រុងភ្នំពេញ។ The Penthouse Residence មិនមែនជាគម្រោងដំបូងរបស់ ឧកញ៉ា លី ហុង នោះទេ។

ស្នាដៃដ៏ប្រកបដោយភាពជោគជ័យ និងគួរអោយស្ញប់ស្ញែងជាច្រើនដែលលោកបានសម្រេចកន្លងមកមានដូចជា សណ្ឋាគារលំដាប់ផ្កាយ៥ អង្គរផាលេស និង បុរីអង្គរផាលេស ក្នុងក្រុងសៀមរាប។ The Penthouse Residence ត្រូវបានសាងសង់ទ្បើង ដើម្បីបំពេញបំណងប្រាថ្នារបស់អតិថិជន ដែលជារចនាប័ទ្មជីវិតដ៏ប្រណីត ជាមួយនឹងភាពងាយស្រួលគ្រប់តំបន់នៃ រាជធានីភ្នំពេញ។ The Penthouse Residence មានទីតាំងស្ថិតនៅខាងមុខផ្សារទំនើបអ៊ីអននិងសណ្ឋាគារសូហ្វ៊ីតែល អគារលេខ83B ផ្លូវសុធារសដែលជាបេះដូងនៃរាជធានីភ្នំពេញ ដែលពោរពេញដោយភាពងាយស្រួល និងរស់នៅក្នុងភាពស៊ីវីល័យ។ នៅជុំវិញ The Penthouse Residence មានសាលារៀន មន្ទីរពេទ្យ ស្ថានទូត អគារពាណិជ្ជកម្មជាច្រើន និងជាកន្លែងប្រកបដោយផាសុកភាព និងសុវត្ថិភាពបំផុតក្នុងការរស់នៅ។

អគារទាំងមូលបំពាក់ដោយកញ្ចក់ថ្លា ដែលអាចឱ្យអ្នកទស្សនាពីទេសភាពទីក្រុងភ្នំពេញទាំស្រុងដូចជា៖ ព្រះបរមរាជវាំង ទន្លេសាប ទន្លេមេគង្គ ទន្លេចតុមុខ និងវិមានឯករាជ្យដែលជាទីតាំងដ៏ល្អបំផុតក្នុងទីក្រុងនៃប្រទេសកម្ពុជា។ លក្ខណៈពិសេសរបស់អាគារthe Penthouse Residence គឺមាន៣៦ជាន់ មានអាងហែលទឹក កន្លែងហាត់ប្រាណ សូណា ស្កាយបារ មាននៅជាន់ទី ៣៦ និងមានសន្តិសុខ២៤ម៉ោង។ អ្វីដែលពិសេសបំផុតមួយទៀតគឺ មានភោជនីយដ្ឋានវិលដំបូងគេនៅកម្ពុជា ដោយផ្តល់ជូនអតិថិជនទស្សនាទេសភាពបាន ៣៦០ដឺក្រេក្នុងទីក្រុង និងអាចវិលបានមួយជុំក្នុងរយៈពេលមួយម៉ោង។

The Penthouse Residence ជាអគារលំនៅដ្ឋានខ្ពស់ដំបូងគេដែលត្រូវបានរចនាឡើងក្នុងបទដ្ឋានខ្ពស់បំផុតកម្រិតអន្ដរជាតិលំដាប់ផ្កាយ៥។ អ្វីដែលជាបំណងរបស់វិនិយោគិនចំពោះគម្រោងស្ថាបត្យកម្មនេះ ត្រូវបានបង្កើតនូវការអភិវឌ្ឍខុនដូប្រណីតជាលើកដំបូងក្នុងប្រទេសកម្ពុជា។ ជាកន្លែងស្នាក់នៅប្រកបដោយកិត្យានុភាព និងស័ក្តិសមជាគេហដ្ឋានលំដាប់កំពូលពិតៗ។លំនៅដ្ឋាននីមួយៗមានលក្ខណៈប្លែកៗពីគ្នាដោយមានការរចនាបែបលក្ខណៈសិល្បៈពិសេសនោះមានបរិយាកាសខ្យល់ដង្ហើមបរិសុទ្ធជាមួយនឹងជំនោរទន្លេ និងទេសភាពស្រស់ត្រកាលក្នុងទីក្រុងដែលធ្វើឱ្យ The Penthouse Residence ក្លាយជាទិសដៅដែលមនុស្សចង់រស់នៅច្រើនបំផុតក្នុងរាជធានីភ្នំពេ។

The Penthouse Residence មានបន្ទប់៥ជម្រើសសម្រាប់អតិថិជន 1. Comfort Bedroom 2. Suite 1 + Bedroom 3. Embassy 2 bedrooms 4. President 3 bedrooms 5. Richmond Penthouses អ្វីដែលគួរអោយកត់សំគាល់បំផុតនោះ ក្នុងរយៈពេលត្រឹមតែ ប្រាំសប្តាហ៍ដំបូង គម្រោង ThePenthouse Residence បានទទួលការចាប់អារម្មណ៍ពីអតិថិជនសម្បើមខុសប្លែកពីធម្មតា ហើយបានលក់អស់ ៥០% ហើយក៏មានអតិថិជនជាច្រើនទៀតកំពុងធ្វើការពិចារណាកក់ទិញជាបន្តបន្ទាប់ផងដែរ។

បើយោងតាមសន្ទុះនៃការលក់ខាងលើនេះ The Penthouse Residence នឹងលក់អស់ ១០០% នាពេលឆាប់ៗខាងមុខនេះ។ ប្រាក់កក់ដំបូងត្រឹមតែ១០០០ដុល្លារតែប៉ុណ្ណោះ អ្នកនឹងអាចក្លាយជាម្ចាស់ខុនដូលំដាប់ពិភពលោក។ សម្រាប់ព័ត៌មានលំអិតសូមអញ្ជើញមកទស្សនាផ្ទាល់នៅ Office Show Room The Penthouse Residence រឺទូរស័ព្ទមកលេខ (……………)ជីវិតដ៏ប្រណីតរបស់លោកអ្នក គឺជាតម្រូវការរបស់យើងខ្ញុំ៕