ភ្នំពេញ ៖ នៅថ្ងៃទី១៣ ខែឧសភា ឆ្នាំ២០២០នេះ ក្រសួងសុខាភិបាល បានចេញសេចក្តីប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១២១នាក់។

ចំណែកអ្នកកំពុងសម្រាកព្យាបាលជំងឺកូវីដនៅសល់ម្នាក់គត់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី១៣ ខែឧសភា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែល ទទួលបានមុននេះបន្តិច៕

ភ្នំពេញ ៖ នៅថ្ងៃទី១២ ខែឧសភា ឆ្នាំ២០២០នេះ នគរបាលចរាចរណ៍ទូទាំងប្រទេសបានរកឃើញយានយន្តល្មើស ចំនួន១,២១៦គ្រឿង ក្នុងនោះ មានម៉ូតូ៨៩០គ្រឿង និងរថយន្ត ៣២៦គ្រឿង។ នេះបើតាមរបាយការណ៍របស់អគ្គស្នងការដ្ឋាននគរបាលជាតិ។

សម្រាប់បទល្មើសម៉ូតូ គឺភាគច្រើនមិនពាក់មួកសុវត្ថិភាព និងល្មើសផ្សេងៗ។ ដោយឡែកបទល្មើសរថយន្ត ភាគច្រើនអត់ខ្សែក្រវាត់ បើកលើសល្បឿន ផ្ទុកលើសចំណុះ និងមិនគោរពភ្លើងសញ្ញា។

បើសរុបយានយន្តល្មើសទាំងរយៈពេល១២ថ្ងៃ (ថ្ងៃទី០១-១២ ខែឧសភា) មានចំនួន២០,៨៩៦រឿង ក្នុងនោះម៉ូតូចំនួន១៥,៣៨៨គ្រឿង និងរថយន្ត៥,៥០៨គ្រឿង៕

​
ដោយ ប៉ែន សុផល
កំពង់ចាម​ ÷ លោកស្រី ប៉ាង ដានី អភិបាលរងខេត្ត និងជាអនុប្រធានអចិន្រ្តៃយ៏សាខាកាកបាទក្រកម្ពុជាខេត្តកំពង់ចាម តំណាង លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិកាសាខាកាកបាទក្រហមកម្ពុជាខេត្ត រួមជាមួយអាជ្ញាធរមូលដ្ឋាន នាព្រឹក​ថ្ងៃ​ទី​១២​ ខែឧសភា​ ឆ្នាំ​២០២០នេះ​ បាន​នាំយកអំណោយមនុស្សធម៌សាខាកាកបាទក្រហមកម្ពុជាខេត្ត ជូនក្រុមគ្រួសារ​ជនរងគ្រោះ​ ចំនួន៣គ្រួសារ នៅភូមិទី២ ឃ៉ំកោះសំរោង ស្រុកកំពង់សៀម ដែល​បាន​ស្លាប់​បាត់បង់​ជីវិត​ ក្នុង​ឧបទ្ទវហេតុ​គ្រោះថ្នាក់​ចរាចរ​ផ្លូវ​ទឹក​ កាលពីយប់ថ្ងៃទី១០ ខែឧសភា ឆ្នាំ២០២០កន្លង​ទៅ​ថ្មីៗ​នេះ​ ខណៈ​ដែលជន​រងគ្រោះ​ទាំង​នោះ​ធ្វើដំណើរត្រឡប់មកពីពិធីមង្គលការនៅឃុំរំចេកវិញ។

គួរ​រំលឹក​ផង​ដែរ​ថា​ មនុស្ស​ចំនួន​៣នាក់​ ក្នុង​ចំណោម​១០នាក់​ ត្រូវ​បានបាត់ខ្លួន​ និងម្នាក់​ទៀត​ត្រូវ​រងរបួស ខណៈ​ទូក​អូស​យ៉ាងកាវ​ បេីកបុក​ជាមួយ​ទូក​ប្រជាពលរដ្ឋ​ ដែល​ជិះ​​ឆ្លង​ទន្លេ​ គ្រា​ដែល​​ជនរងគ្រោះ​​ត្រឡប់​មក​ពី​ពិធី​មង្គលការ​មួយ​ ហើយ​ឆ្ពោះ​ទៅកាន់លំនៅឋាន​របស់​ខ្លួន​ ស្ថិត​នៅភូមិទី២ ឃុំកោះសំរោង ស្រុកកំពង់សៀម ខេត្តកំពង់ចាម កាលពីវេលាម៉ោង១០យប់​ ថ្ងៃទី១០ ខែឧសភា​ ឆ្នាំ២០២០ ។
មេឃុំកោះសំរោងលោក សន សុខ បាន​ឲ្យដឹង​ថា នៅយប់ថ្ងៃកើតហេតុ មានករណីគ្រោះថ្នាក់ រវាង ទូកអូសយ៉ាំងកាវ បានបុកជាមួយនឹងទូកចាប់គែម របស់ប្រជាពលរដ្ឋ រស់នៅភូមិទី២ ឃុំកោះសំរោង ស្រុកកំពង់សៀម ដែលបានធ្វើដំណើរឆ្លងមកពី ចូលរួមពិធីមង្គលការ នៅឃុំរំចេកត្រើយម្ខាង មានប្រជាពលរដ្ឋចំនួន១០នាក់ជិះលើកូនទូកនោះ ក្នុងគោលដៅវិលត្រឡប់មកកាន់លំនៅដ្ឋាននៅកំពង់ក្បាលកោះជ័យ ក៏ត្រូវបានជួបគ្រោះថ្នាក់ដោយទូកអូសយ៉ាំងកាវ បើកបុក នៅចំណុច កណ្ដាលទន្លេ រវាងឃុំរំចេក និងឃុំកោះសំរោង បណ្ដាលឲ្យលិចទូកចាប់គែមរបស់ប្រជាពលរដ្ឋ បណ្ដាលឱ្យមនុស្សចំនួន៣នាក់បាត់ខ្លួន និងម្នាក់ទៀតរងរបួស ។

គួរ​បញ្ជាក់​ផង​ដែរ​ថា ជនរងគ្រោះ​ទាំង០៣នាក់នោះ ទី១-ឈ្មោះ រិន ជា ភេទប្រុស អាយុ៥៣ឆ្នាំ។
ទី២-ឈ្មោះ ធីម ថាន ភេទប្រុស អាយុ៥២ឆ្នាំ​ ។
​ទី៣-ឈ្មោះ ឡាង ប៉េងហ៊ត់​ ភេទប្រុស អាយុ៣៣ឆ្នាំ​ ។ រហូត​មក​ដល់​ថ្ងៃ​ទី​១២​ ខែឧសភា​ ឆ្នាំ​២០២០នេះ​ សព​ជនរងគ្រោះ​ទាំង​៣នាក់​ ត្រូវ​បានរក​ឃើញ​ ហើយ​យក​ទៅ​ធ្វើ​បុណ្យ​តាម​ប្រពៃណី​ផងដែរ​ ខណៈ​ដែល​ក្រុម​គ្រួសារ​សព​ បាន​ទទួល​អំណោយ​មនុស្សធម៌​ ពី​សាខា​កាកបាទក្រហម​កម្ពុជា​ខេត្ត​កំពង់ចាម​ ៕

ខេត្តបន្ទាយមានជ័យ ៖  នៅព្រឹកថ្ងៃទី១២ ខែឧសភា ឆ្នាំ២០២០ នេះ អង្គភាពហេឡូត្រាស់ ប្រចាំខេត្តបន្ទាយមានជ័យ បានទទួលយកគ្រាប់មិនទាន់ផ្ទុះចំនួន១៥គ្រាប់ពីនគរបាលការពារព្រំដែន ៨០៧ បឹងត្រកួន ដើម្បីយកទៅកំទេចចោល។ គ្រាប់មិនទាន់ផ្ទុះទាំង១៥គ្រាប់ត្រូវបាន  ប្រជាពលរដ្ឋប្រទះឃើញ នៅចំណុចចម្ងាយពីបង្គោលសីម៉ាលេខ៣២ប្រហែល ១៧០ម៉ែតតាមបន្ទាត់ព្រំដែនកម្ពុជា -ថៃ ស្ថិតក្នុងភូមិអូរកំបុត ឃុំគោករមៀត ស្រុកថ្មពួក ខេត្តបន្ទាយមានជ័យ។

លោកវរសេនីយ៍ឯក ឡុង សំណាង មេបញ្ជាការវរសេនាតូចនគរបាលការពារព្រំដែនលេខ៨០៧ បានឲ្យដឹងថា នៅវេលាម៉ោង០៨ និង៤០នាទីព្រឹកថ្ងៃទី១១ខែឧសភា ឆ្នាំ២០២០ មានប្រជាពលរដ្ឋ ឈ្មោះ ជុំ រស្មី អាយុ៥៣ឆ្នាំ រស់នៅភូមិអូរកំបុត ឃុំគោករមៀត ស្រុកថ្មពួក  ខេត្តបន្ទាយមានជ័យ បានភ្ជួរដីធ្វើចំការ ក៏បានប្រទះឃើញ  ហើយរាយការណ៍មកកម្លាំងនគរបាលការពារព្រំដែនប៉ុស្តិ៍អូរកំបុត។

ក្រោយពីទទួលបានព័ត៌មាន កម្លាំងនគរបាលការពារព្រំដែនប៉ុស្តិ៍អូរកំបុត បានសហការជាមួយកម្លាំងសំអាតមីនអង្គភាពហេឡូត្រាស ចុះទៅពិនិត្យជាក់ស្តែងរួចក៏បានធ្វើការប្រគល់គ្រាប់មីនទាំងនោះ ទៅកម្លាំងសំអាតមីនអង្គភាពហេឡូត្រាស យកទៅធ្វើការបំផ្លាញចោល បញ្ចៀសការគ្រោះថ្នាក់ដល់ប្រជាពលរដ្ឋ។

លោក ឡុង សំណាង បានញ្ជាក់ផងដែរថាគ្រាប់មិនទាន់ផ្ទុះទាំងនេះគឺជាគ្រាប់ដែលកប់ចោល បន្សល់ទុកក្នុងអំឡុងប្រទាញប្រទង់គ្នារវាងកងទ័ពរាជរដ្ឋាភិបាលជាមួយកងទ័ពតស៊ូរបស់ខ្មែរក្រហម។ហើយគ្រាប់ទាំងនេះផងដែរត្រូវបានគេដាក់នៅរាយប៉ាយពាស់ពេញដីដើម្បីប្រឆាំងមនុស្ស។គ្រាប់នៅមានច្រើនទៀត ដូច្នេះបើបងប្អូនជួបប្រទះត្រូវតែរាយការណ៍បន្ទាន់មកអាជ្ញាធរមូលដ្ឋានឬសមត្ថកិច្ចដើម្បីមានវិធានការសំអាតកំទេចចោល៕

បន្ទាយមានជ័យ ៖ លោកជំទាវឧកញ៉ា ហេម ចិត្តា មហាឧបាសិកាពុទ្ធសាសនូបត្ថម្ភ ម៉ៅ មាល័យ កែ គឹមយ៉ាន និងជាប្រធានកិត្តិយសសមាគន៍នារីកម្ពុជា ដើម្បីសន្តិភាពនិងអភិវឌ្ឍន៍ខេត្ត អមដំណើដោយ លោក លោកជំទាវ អ្នកតំណាងរាស្រ្តមណ្ឌលខេត្តបន្ទាយមានជ័យ បានអញ្ជើញចុះជួបសំណេះសំណាលសួរសុខទុក្ខ បងប្អូនប្រជាពលរដ្ឋចំនួន១៥០គ្រួសារដែលមានជីភាពខ្វះខាត និងចាស់ជរា ក្នុងស្រុកស្វាយចេក ខេត្តបន្ទាយមានជ័យ ព្រឹកថ្ងៃទី១២ ខែឧសភា ឆ្នាំ២០២០ ស្ថិតនៅបរិវេណសាលាស្រុកស្វាយចេក។       

ថ្លែងក្នុងឱកាសនោះ លោក ប៉ាល់ សំអឿន អ្នកតំណាងរាស្រ្តមណ្ឌលខេត្តបន្ទាយមានជ័យ បានមានប្រសាសន៍ផ្តាំផ្ញើ សូមបងប្អូនប្រជាពលរដ្ឋ យើងទាំងអស់ ត្រូវមានការប្រុងប្រយ័ត្នជាប់ជានិច្ចជាមួយនឹងជំងឺឆ្លងកូវីដ-១៩ ដ៏កាចសាហាវនេះ។ ជាពិសេស បងប្អូនមិនត្រូវមើលស្រាលចំពោះជំងឺកូវីដ-១៩នេះដាច់ខាត ហើយសូមថែរក្សាសុខភាព ដោយអនាម័យល្អ ដូចជាឧស្សាហ៍លាងដៃជាមួយសាប៊ូនិងទឹកស្អាត ឬអាល់កុល ឬទឹកជែលលាងដៃឱ្យបានញឹកញាប់ ប្រើប្រាស់ម៉ាស់ខ្ទប់មាត់និងច្រមុះពេលក្អកកណ្តាស់ជាដើម។

លោក ប៉ាល់ សំអឿន បានធ្វើការផ្តាំផ្ញើ ដល់បងប្អូនប្រជាពលរដ្ឋ ដែលមានជីវភាពខ្វះខាត ចាស់ជរា ចំនួន៥០គ្រួសារចំនួន៤ចំណុចរួមមាន៖
១,យើងទាំងគ្នារក្សាការពារអោយបានរឹងមាំនៅសុខសន្តិភាព សូមអរគុណសន្តិភាព មានសន្តិភាពមានការអភិវឌ្ឍន៍។
២,ចូលយើងប្រុងប្រយ័ត្នខ្ពស់អោយបានគ្រប់ៗគ្នា គ្រប់ក្រុមគ្រួសាររួមគ្នាបន្តប្រយុទ្ធប្រឆាំង ទប់ស្កាត់ការីករាលដាល ជំងឺកូវីដ-១៩ ដោយត្រូវចងចាំជានិច្ច។
៣,ខិតខំជំរុញការងារកសិកម្ម(ធ្វើស្រែ ចិញ្ចឹមសត្វ និងដាំដំណាំរួមផ្សំផ្សេងៗ)។

៤,ចូលយើងគ្រប់ៗគ្នា ត្រូវចូលរួមគោរពច្បាប់ចរាចរណ៍កាត់បន្ថយគ្រោះថ្នាក់និងស្លាប់តាមដងផ្លូវ ស្របតាមការណែនាំ និងវិធានការសំខាន់ៗជាច្រើនរបស់រាជរដ្ឋាភិបាល។ឯកឧត្តមក៏បានជម្រុញដល់បងប្អូនប្រជាពលរដ្ឋត្រូវធ្វេីការដាំដុះបន្លែរបង្កា រ ឬចិញ្ចឹមសត្វសម្រាប់ផ្គត់ផ្គង់ជីវភាពរស់នៅប្រចាំថ្ងៃ ហេីយបេីបងប្អូនដែលចង់ដាំបន្លែ និងចិញ្ចឹមសត្វ សម្រាប់បង្កេីនសេដ្ឋកិច្ចគ្រួសារ និងបំពេញតម្រូវការទីផ្សារ ។

អំណោយសម្រាប់សម្ភារៈចែកជូនបងប្អូនប្រជាពលរដ្ឋដែលមានជីវភាពខ្វះខាត ចាស់ជរា ចំនួន១៥០គ្រួសារ ក្នុងមួយគ្រួសារទទួលបាន អង្ករ២៥គីឡូក្រាម,មី១កេស,ទឹត្រីក១យួរ,ទឹកសីុអីុវ១យួរ,ត្រីខ១០កំប៉ុង។

បន្ទាប់ចប់ពិធីសំណេះសណាលរួចមក ឯកឧត្តម លោកជំទាវអ្នកតំណាងរាស្រ្តមណ្ឌលខេត្តបន្ទាយមានជ័យ បានបន្តអញ្ជើញចុះពិនិត្យមើលការសាងសង់ស្ពាននាគ ក្នុងស្រុកស្វាយចេក ជាមួយគ្នានោះ ឯកឧត្តម លោកជំទាវ បានឧបត្ថម្ភថវិកាចំនួន៦០០ដុល្លាសម្រាប់ជួយដល់ការសាងសង់ស្ពាននោះផងដែរ៕

ខេត្តសៀមរាប ៖ ស្រះស្រង់ និងប្រាសាទបន្ទាយក្ដី ទំនងជាត្រូវបានកសាងឡើងដំបូងគេបង្អស់ក្នុងចំណោមព្រះរាជសមិទ្ធផលនានារបស់ព្រះបាទជ័យវរ្ម័នទី៧ មុនការកសាងប្រាសាទតាព្រហ្ម នៅឆ្នាំ១១៨៦។
នៅកណ្ដាលស្រះស្រង់ក៏មានប្រាសាទតូចមួយដែរ ប៉ុន្តែប្រាសាទនោះត្រូវបានបាក់រលំជាច្រើនរយឆ្នាំមកហើយ។ មកដល់ពេលបច្ចុប្បន្ននេះ អាជ្ញាធរជាតិអប្សរាបានបើកការជួសជុលប្រាសាទនេះឡើងវិញ ដែលគ្រោងនឹងបញ្ចប់ឲ្យបានរួចរាល់នៅចុងឆ្នាំ២០២០នេះ។

នាពេលថ្មីៗនេះ ក្រុមការងាររបស់អាជ្ញាធរជាតិអប្សរាបានរកឃើញបុរាណវត្ថុមួយចំនួនពីការធ្វើកំណាយនៅក្រោមប្រាសាទកណ្ដាលស្រះស្រង់នេះ ក្នុងនោះរួមមាន ខ្វាតពណ៌ស ឬគ្រីស្ដាល់ជាច្រើនគ្រាប់ ចម្លាក់ថ្មក្បាលនាគដ៏ធំមួយ ត្រីសូល៍ធ្វើអំពីលោហៈចំនួន ៤ ដែលមួយនៅមានរូបរាងល្អ និងមួយទៀតនៅសល់តែបំណែកចុងស្រួចមួយចំហៀង។ គេក៏បានធ្វើកំណាយរកឃើញចម្លាក់ថ្មរូបសត្វអណ្ដើក ២ ទៀតដែរ ខណៈក្រុមការងារកំពុងវិភាគស្រាវជ្រាវរកអំណះអំណាងបន្ថែមអំពីប្រភព និងបុព្វហេតុនៃការបុរាណវត្ថុទាំងនេះ៕

ភ្នំពេញ ៖ សម្តេចតេជោ ហ៊ុន សែន បានសរសេរនៅលើទំព័រហ្វេសប៊ុកនាព្រឹកនេះថា ទោះកម្ពុជា​មាន​ចំនួនអ្នកជាសះស្បើយបាន​ច្រើន ហើយពុំមានអ្នក​ឆ្លងថ្មីក៏ដោយ គឺ​សម្តេចបានអំពាវនាវ​ឱ្យប្រជាពលរដ្ឋ​ប្រុងប្រយ័ត្ន​ជាប់ជានិច្ច។

តាមរយៈទំព័រ Facebook នៅព្រឹកថ្ងៃអង្គារ ទី១២ ខែឧសភា ឆ្នាំ២០២០នេះ សម្តេចតេជោនាយករដ្ឋមន្ត្រី បានកត់សម្គាល់ថា តែក្នុងមួយប៉ប្រិចភ្នែកសោះចំនួនអ្នកឆ្លងជំងឺកូវីដ19 នៅក្នុងពិភពលោក បានកេីនជាង៤លាននាក់។ សម្តេចតេជោ ហ៊ុន សែន បានគូសបញ្ជាក់ថា នេះជាក្តីបារម្ភខ្លាំងបំផុតរបស់ពិភពលោកទាំងមូល។

សម្រាប់កម្ពុជាមកដល់ព្រឹកថ្ងៃអង្គារ ទី១២ ខែឧសភា ឆ្នាំ២០២០នេះ អ្នកឆ្លងជំងឺកូវីដ១៩ ចំនួន ១២២នាក់ ត្រូវបានព្យាបាលជាសះស្បើយ១២១នាក់ហើយ នៅសល់តែ ១នាក់ទៀតប៉ុណ្ណោះ។ ជាមួយគ្នារយៈពេលជិត ១ខែហើយ មិនមានអ្នកឆ្លងថ្មីទៀតនោះឡើយ។

សម្តេចតេជោ ហ៊ុន សែន ប្រមុខរាជរដ្ឋាភិបាល ដែលបានយកចិត្តទុកដាក់ខ្ពស់ចំពោះសុខភាពរបស់ប្រជាពលរដ្ឋ និងបានដាក់ចេញវិធានការជាច្រើន ដើម្បីបញ្ចៀសការរាតត្បាតជំងឺកូវីដ១៩មកលើប្រជាពលរដ្ឋនោះ នៅតែមានការបារម្ភចំពោះការរីករាលដាលនៃជំងឺនេះ។ សម្តេចនាយករដ្ឋមន្ត្រី បន្តរំលឹកឱ្យប្រជាពលរដ្ឋយកចិត្តទុកដាក់ខ្ពស់ជានិច្ចចំពោះអនាម័យសុខភាពជាប្រចាំ។

សម្តេចតេជោ ហ៊ុន សែន រំលឹកប្រជាពលរដ្ឋត្រូវឧស្សាហ៍ដុសលាងសម្អាតដៃជាមួយសាប៊ូ ទឹកអាល់កុល ឬជែលសម្លាប់មេរោគ។ លើសពីនេះទៀត ត្រូវពាក់ម៉ាស ឬក្រម៉ាកុំឱ្យឆ្លងរោគ ព្រោះជំងឺដ៏កាចសាហាវនេះងាយឆ្លងលឿនណាស់។

សម្តេចតេជោ ក៏បានរំលឹកឱ្យប្រជាពលរដ្ឋបន្តយកចិត្តទុកដាក់ស្តាប់តាមការណែនាំរបស់ក្រសួងសុខាភិបាល។

សូមជម្រាប​ថា យោងតាម​សេចក្តីប្រកាសព័ត៌មានរបស់​ក្រសួងសុខាភិបាលនាព្រឹកថ្ងៃទី១២ ខែឧសភា ឆ្នាំ​២០២០នេះ ឱ្យដឹងថា កម្ពុជាមានអ្នកជាសះស្បើយពីជំងឺកូវីដ១៩ ចំនួន១នាក់ទៀត ពោលគឺសល់តែ១នាក់ចុងក្រោយប៉ុណ្ណោះ ដែលមិនទាន់ជាសះស្បើយ៕

ខេត្តកណ្តាល ៖ សមត្ថកិច្ចប៉ូលិស ស្រុក​ស្អាងបាន​រាយការណ៍ នៅថ្ងៃទី១១ ឧសភាម្សិលមិញថា មាន ករណីសង្ស័យជា​អំពើឃាតកម្មដែល​បង្កឡើង​ដោយ​បុរស​ជា​ប្តីវាយ​សម្លាប់​ប្រពន្ធ បន្ទាប់ពីលែងលះគ្នារយៈពេល​ជាង​១​ខែ​មកហើយ។ ករណីនេះ​កើតឡើងនៅ​ថ្ងៃទី​១០ ខែឧសភា​ ឆ្នាំ២០២០ វេលា​ម៉ោង​១៦ ​និង​៣០នាទី នៅ​ចំណុចចិញ្ចើមផ្លូវ​បេតុង​ចូល​វត្តស្អាង​ភ្នំ​ខាងកើត ស្ពានបឹង​កាចា​ន់ ស្ថិតនៅ​​ភូមិ​ព្រែក​ខ្មែរ ឃុំ​ស្អាង​ភ្នំ ស្រុក​ស្អាង។

មន្ត្រីប៉ូលិសបុស្តិ៍រដ្ឋបាល ឃុំស្អាងភ្នំបានប្រាប់ឲ្យដឹងថា ​ជនរងគ្រោះ​ជា (​ប្រពន្ធ​) ឈ្មោះ​ នី ឡេ​ហ្សា អាយុ២២ឆ្នាំ​ ជនជាតិខ្មែរ មុខរបរ​កម្មការិនីរោងចក្រ មាន​ទីលំនៅ​ភូមិពាម​សាលា ឃុំ​ស្អាង​ភ្នំ ស្រុក​ស្អាង (​ស្លាប់​)។ ចំណែកជនសង្ស័យ​ជា ​(​ប្ដី​) ឈ្មោះ​ ជួន សារ៉ន ​អាយុ​៣៧ឆ្នាំ ជនជាតិខ្មែរ មាន​ទីលំនៅ​ភូមិ​វាល ឃុំ​ស្អាង​ភ្នំ ស្រុក​ស្អាង។​
​ប្រភពបន្តថា កន្លងមក​ជនសង្ស័យ និង​ជនរងគ្រោះ​ជា​ប្តី​ប្រពន្ធបាន​ឈ្លោះលែងលះគ្នា​រយៈពេល​ជាង​១​ខែ​មកហើយ​។ លុះដល់​ថ្ងៃខែ​កើតហេតុ ជនសង្ស័យ​បាន​ជិះ​ម៉ូតូទៅ​កៀរ​ម៉ូតូ​របស់ជនរងគ្រោះ​បណ្ដាល​
ឲ្យ​ធ្លាក់​ពីចិញ្ចើមផ្លូវ រួច​អង្គុយ​និយាយជាមួយ​ប្រពន្ធ បាន​បន្តិច​ជនសង្ស័យបាន​យកដៃ​ឆ្វេង​គៀកករ ហើយ​យកដៃ​ស្ដាំ​ដាល់​ទៅលើដើមទ្រូង​ជនរងគ្រោះ។ ប្រភពបញ្ជាក់ថា ពេល​វាយ​រួច​ជនសង្ស័យ បាន​ឡើង​ជិះ​ម៉ូតូ​គេចខ្លួនបាត់​។ ចំណែក​ជនរងគ្រោះ​បានដួល​ផ្កាប់មុខ​ទៅលើ​ដី ហើយ​បាន​ក្រុមគ្រួសារ​ដឹក​យកទៅ​ពេទ្យ តែ​ជនរងគ្រោះ​ក៏បាន​ស្លាប់​នៅ​មន្ទីរពេទ្យបង្អែក​ស្រុក​ស្អាង​។​

ប្រភពឲ្យដឹងទៀតថា ដោយបាន​ការបញ្ជា​ដឹកនាំ​ពីលោកស្នងការ ប៉ូលិសខេត្តកណ្តាល និងទទួលបាន​ការសម្របសម្រួល នីតិវិធី​ពី​លោកព្រះរាជអាជ្ញាអម​សាលាដំបូង​ខេត្តកណ្ដាល នៅ​ព្រឹក​ថ្ងៃទី​១១ ឧសភា ២០២០ មន្ត្រី​ជំនាញ ខេត្ត ស្រុក ប៉ុស្តិ៍​​បាន​ដំណើរការធ្វើ​កោសល្យវិច័យ​លើ​សាកសព និង បើក​ការ​ស៊ើប អង្កេតរកបទល្មើស ដែល​បណ្ដាល​ឲ្យ​ជនរងគ្រោះ​ស្លាប់ នៅ​មន្ទីរពេទ្យបង្អែក​ស្រុក​ស្អាង។ ជា​លទ្ធផលត្រួតពិនិត្យ​សាកសព​សមត្ថកិច្ចសន្និដ្ឋានថា​ ជនរងគ្រោះ​ស្លាប់​ដោយ​អំពើ​(​ឃាតកម្ម​)។ ចំណែកសាកសព ជនរងគ្រោះត្រូវបានសមត្ថកិច្ចប្រគល់ជូនគ្រួសារញាតិសន្តានយកទៅធ្វើបុណ្យតាមគន្លងប្រពៃណី។ ចំណែកជនសង្ស័យសមត្ថកិច្ចកំពុងតាមដានស្វែងរកចាប់ខ្លួនដើម្បីផ្តន្ទាទោសតាមច្បាប់៕

ភ្នំពេញ ៖ នៅថ្ងៃទី១២ ខែឧសភា ឆ្នាំ២០២០នេះក្រសួងសុខាភិបាល បានចេញប្រកាសនូវដំណឹងល្អថា អ្នកជំងឺកូវីដ១៩ បានជាសះស្បើយថ្មីម្នាក់ទៀតហើយ ធ្វើឲ្យចំនួនអ្នកជាសះស្បើយកើនឡើងរហូតដល់១២១នាក់ ហើយពុំមានករណីអ្នកឆ្លងជំងឺកូវីដថ្មីទេ។

ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួនម្នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី១២ ខែឧសភា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលទទួលបានមុននេះបន្តិច។

អ្នកដែលជាសះស្បើយជា បុរសជនជាតិខ្មែរ អាយុ៧៥ឆ្នាំ គាត់រស់នៅភូមិកំពង់ត្រឡាចក្រោម ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង ដែលបានបញ្ជូនទៅសម្រាកព្យាបាលបន្តនៅ មន្ទីរពេទ្យមិត្តភាពខ្មែរ-សូវៀត នាថ្ងៃទី០៨ ខែឧសភា ឆ្នាំ២០២០។ បច្ចុប្បន្នត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន២ដង និងត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត៕