​ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី​កម្ពុជា គ្រោង​នឹងធ្វើ​សន្និសីទ​សារព័ត៌មាន​ពិសេស​មួយ នៅ​វិមាន​សន្តិភាព ដែលសន្និសីទ​សារព័ត៌មាន​ពិសេស​នេះ​នឹង​ចាប់ផ្តើម​ពី​ម៉ោង​៩,០០​នាទី​ព្រឹក​ថ្ងៃទី​០៧ ខែមេសា ឆ្នាំ​២០២០​ស្អែក​នេះ។​ នេះ​បើ​យោងតាម​ការចុះផ្សាយ​រប​ស់​សារព័ត៌មាន​ល្បីៗ នៅក្នុង​ស្រុក ហើយ​នេះ​ក៏​ជាការ​ជូនដំណឹង​ដល់​សាធារណជន​ផងដែរ។​

​សន្និសីទ​សារព័ត៌មាន​ពិសេស​នេះ​ធ្វើឡើង ដើម្បី​ឆ្លើយតប​នឹង​ស្ថានភាព​ទូទៅ​នៃ​ជំងឺ​ COVID-19 នៅ​កម្ពុជា៕

បន្ទាយមានជ័យ៖ ប្រជាពលរដ្ឋខ្វះខាត៥០គ្រួសារ ដែលសម្រាកពីការងារនៅតាមបន្ទាត់ព្រំដែនកម្ពុជា.ថៃ ក្នុងស្ថានភាពរាជរដ្ឋាភិបាលកម្ពុជា.ថៃ កំពុងធ្វើការទប់ស្កាត់ការរីករាលដាលនៃជំងឺកូវីត១៩ ទទួលគ្រឿងឧបភោគ បរិភោគពីក្រុមចលនាយុវជនកម្ពុជា (ក្រុម១៥៧) ក្រុងប៉ោយប៉ែត សាខាខេត្តបន្ទាយមានជ័យ ព្រះសង្ឃ និងសប្បុរសជន នៅរសៀលថ្ងៃទី០៥ ខែមេសា ឆ្នាំ២០២០ នៅក្នុងភូមិអូរល្ហុង ឃុំទួលពង្រ ស្រុកម៉ាឡៃ។

ប្រធានសមាគមចលនាយុវជនកម្ពុជា(ក្រុម១៥៧) ក្រុងប៉ោយប៉ែត សាខាខេត្តបន្ទាយមានជ័យ លោក គង់ រិទ្ធា បានប្រាប់ថា សម្ភារ គ្រឿងឧបភោគ បរិភោគរួមទាំងថវិកា គឺទទួលបានពីព្រះគ្រូអនុគណ និងជាព្រះគ្រូចៅអធិការវត្តស្ទឹងបត់ ព្រះគ្រូចៅអធិការវត្តរតនសុខសាន្ត ព្រះគ្រូចៅអធិការវត្តសុវណ្ណពោធិសិលារាម លោកអាអាន និងសមាជិកសមាជិកាយុវជនកម្ពុជា(ក្រុម១៥៧)ក្រុងប៉ោយប៉ែត ដែលក្នុងមួយ១គ្រួសារទទួលបាន អង្គរ២៥គីឡូក្រាម ទឹកសុទ្ធ១ដប ទឹកស៊ីអ៊ីវ១ដប មី១កេស និងថវិកា ២០,០០០រៀល។

លោកបានបញ្ជាក់ថា ប្រជាពលរដ្ឋដែលខ្វះខាត ភាគច្រើនជាប្រជាពលរដ្ឋធ្វើការនៅតាមបន្ទាត់ជាយដែនប្រទេសថៃដែលទៅព្រឹកវិលល្ងាច តែដោយសាររយៈនេះ ការរីករាលដាលនៃជំងឺកូវីត១៩ ធ្វើឲ្យប្រទេសថៃគេដាក់ប្រទេសក្នុងភាពអាសន្ន ទើបធ្វើឲ្យច្រកព្រំដែនទាំងអស់ត្រូវបិទ មិនអាចឲ្យពួកគាត់ធ្វើការងារបាន ហើយត្រូវសម្រាកនៅតែផ្ទះ ទើបសមាគមចលនាយុវជនកម្ពុជា ដែលដឹកនាំដោយលោកផ្ទាល់ រួមទាំងព្រះសង្ឃ សប្បុរសជន យក សម្ភារ គ្រឿងឧបភោគ បរិភោគរួមទាំងថវិកា ចែកជូនដើម្បីដោះស្រាយការលំបាកបានមួយគ្រា ក៏ដូចជាបានចូលរួមជួយចែករំលែកបន្ទុករាជរដ្ឋាភិបាលផងដែរ។

ក្នុងឱកាសនោះ លោកបានផ្តាំផ្ញើឲ្យប្រជាពលរដ្ឋទាំងអស់ត្រូវ ធ្វើអនាម័យ ការពារខ្លួន ស្តាប់តាមការណែនាំរបស់មន្ត្រីសុខាភិបាល ក៏ដូចជាអាជ្ញាធរ សមត្ថកិច្ច ដែលបានចុះមកផ្សព្វផ្សាយអប់រំ ហើយបងប្អូនទើបមកពីប្រទេសជិតខាង ត្រូវរក្សាខ្លួនដាច់ដោយឡែកចំនួន១៤ថ្ងៃពីក្រុមគ្រួសារ ដើម្បីខ្លួនឯង ក្រុមគ្រួសារ និងសហគមន៍ផងដែរ៕

ភ្នំពេញ ៖ នៅថ្ងៃនេះក្រសួងសុខាភិបាល បានចេញប្រកាសនូវដំណឹងដ៏សែនរីករាយដល់ប្រជាពលរដ្ឋបន្តទៀតថា រយៈពេល៣ថ្ងៃជាប់គ្នាហើយ ពុំមានអ្នកឆ្លងជំងឺកូវីដថ្មីទេ មានតែករណីជាសះស្បើយចំនួន៣នាក់ថ្មីទៀត ធ្វើឲ្យអ្នកជាសះស្បើយសរុបកើនដល់៥៣នាក់។

ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន៦១នាក់ នៃអ្នកឆ្លងសរុប១១៤ នាក់។ បើគិតត្រឹមព្រឹកថ្ងៃទី០៦ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ។

ករណីជាសះស្បើយ៣នាក់ថ្មីទៀតនេះ មានបរុសជនជាតិម៉ាឡេស៊ី អាយុ៣៩ឆ្នាំ បុរសជនជាតិម៉ាឡេស៊ី អាយុ២៦ឆ្នាំ និងបុរសជនជាតិម៉ាឡេស៊ី អាយុ៤០ឆ្នាំ ដែលត្រឡប់មកពីធ្វើបុណ្យសាសនា នៅស្រុកកងមាស ខេត្តកំពង់ចាម។ ពេលនេះ ពួកគេត្រូវបានអនុញ្ញាតឱ្យចាកចេញពីមន្ទីរពេទ្យខេត្តកំពង់ចាម ត្រឡប់ទៅផ្ទះវិញហើយ៕

ភ្នំពេញ ៖ សម្តេច ហ៊ុន សែន កាលពីថ្ងៃទី៤ ខែមេសា ឆ្នាំ​២០២០ បានចេញ​បញ្ជា​ណែនាំ​បន្ថែម​ក្នុងការ​ដោះស្រាយ​ជូន​ពលករ​ដែលបាន​វិលត្រឡប់​មកពីប្រទេសថៃកន្លងមក​ចំនួនប្រមាណ ៥ម៉ឺន​នាក់ ហើយដែលចំនួននេះនឹងមាន​មកជាបន្តបន្ទាប់ទៀត ដែលអាច​នឹងកើន​ទៅដល់៦ម៉ឺននាក់។

ក្នុងនាមជា​ប្រធាន​គណៈកម្មការជាតិ​ប្រយុទ្ធ​ប្រឆាំង​នឹងជំងឺកូវីដ-១៩ សម្តេចតេជោ បានណែនាំ​ទៅក្រសួងសុខាភិបាលថា ៖ «ត្រូវតាមដានត្រួតពិនិត្យនៅតាមទល់ដែនអោយបានហ្មត់ចត់ ហើយក្នុងនោះត្រូវត្រៀមរៀបចំបំពាក់សម្ភារៈបរិក្ខារពេទ្យ និងរៀបចំទីកន្លែងពិនិត្យសុខភាពអោយបានល្អដល់ពលករ។ ក្រសួងសុខាភិបាលត្រូវធ្វើជាម្ចាស់ការលើការងារនេះ ហើយសហការជាមួយក្រុមការងារនៅតាមព្រំដែនទាំងអស់។ ទន្ទឹមនឹងនេះ គឺត្រូវត្រៀមទិញមុង, ភួយ, កន្ទេល, ខ្នើយ, ក្រមា សម្រាប់ប្រគល់ជូនបងប្អូនកូនក្មួយពលករដែលត្រូវដាក់អោយស្នាក់នៅដាច់ដោយឡែកបណ្តោះអាសន្នចំនួន១៤ថ្ងៃ ដូចជានៅតាមសាលារៀន តាមសហគម ឬនៅតាមលំនៅដ្ឋានជាមួយក្រុមគ្រួសារជាដើម»។

សម្តេចតេជោ​ ហ៊ុន​ សែន​ បានបញ្ជាក់ផងដែរថា ៖ «ពេលណាបងប្អូនចាកចេញពីទីនោះ គឺសូមប្រគល់សំម្ភារៈទាំងនោះជូនទៅគាត់យកទៅប្រើប្រាស់តែម្តង។ ចំពោះមធ្យោបាយសម្រាប់ដឹកជញ្ជូនបងប្អូនកូនក្មួយពលករវិញ គឺត្រូវប្រើប្រាស់រថយន្តកងទ័ពមកពីកងពលលេខ៩០ និង កងពលលេខ៩៩ ដែលត្រូវរៀបចំដាក់ដំបូលអោយបានស្រួល។ មកទល់ពេលនេះ បងប្អូនកូនក្មួយពលករទាំងអស់ដែលបានវិលត្រឡប់មកប្រទេសវិញ គឺមិនមានបង្ករហានិភ័យណាមួយនៅតាមសហគមនៅឡើយទេ»។

សម្តេច​ ហ៊ុន សែន បានអបអរសាទរ និងកោតសរសើរដល់ថ្នាក់ភូមិ, ថ្នាក់ឃុំ, ស្រុក និងថ្នាក់ជាតិ ដែលបានចុះជួយនៅតាមមូលដ្ឋាន​ ក្នុងនោះរួមទាំងការអប់រំឃោសនា ផ្សព្វផ្សាយ​ណែនាំទប់ស្កាត់ជំងឺឆ្លងកូវីដ-១៩ ដែលធ្វើឱ្យ​កម្ពុជា គ្រប់គ្រង​ស្ថានការណ៍​បានល្អ​មកទល់ពេល​នេះ៕

ភ្នំពេញ ៖ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល នៅរសៀលថ្ងៃទី០៥ ខែមេសា ឆ្នាំ២០២០នេះ បានចេញសេចក្តីណែនាំថ្មីមួយបន្ថែមទៀត ស្តីពីវិធានការ ការពារការចម្លងវីរុសកូវីដ១៩ ចំពោះម្ចាស់រថយន្ត និងអ្នកដំណើរដោយមធ្យោបាយដឹកជញ្ជូនរួម ដែលមានផ្ទុកអ្នកដំណើរច្រើនចាប់ពី១០នាក់ឡើងទៅ។

សេចក្តីណែនាំរបស់ក្រសួងសុខាភិបាលបានបញ្ជាក់ថា ដើម្បីទប់ស្កាត់ការចម្លងវីរុសកូវីដ១៩ ក្រសួងសូមណែនាំដល់ម្ចាស់រថយន្ត និងអ្នកដំណើរដោយមធ្យោបាយដឹកជញ្ជូនរួម ដែលមានផ្ទុកគ្នាច្រើនលើសពី១០នាក់ដូចខាងក្រោម៖

* បើកបង្អូចរថយន្ត ឲ្យខ្យល់ចេញចូល (ដោយមិនប្រើម៉ាស៊ីនត្រជាក់)
* លើកទឹកចិត្តឲ្យអ្នកដំណើរពាក់ម៉ាស ឬក្រម៉ាខ្ចប់មាត់ ច្រមុះ ដើម្បីជៀសវាងការចម្លងជាយថាហេតុ នៃវីរុសផ្តាសាយផ្សេងៗ រួមទាំងកូវីដ១៩ផងដែរ
* ត្រូវសំអាតរថយន្តជាប្រចាំ ដោយប្រើប្រាស់ទឹកសាប៊ូ និងជូនអាល់កុល តាមធ្នាក់កៅអី
* ម្ចាស់រថយន្តត្រូវមានទឹកអាល់កុល ឬជែលអាល់កុល ឲ្យអ្នកដំណើរលាងដៃ ពេលឡើងលើរថយន្ត
* ចំពោះអ្នកបើកបររថយន្តទាំងនោះ បើមានរោងសញ្ញា ដូចជាផ្តាសាយ ត្រូវតែផ្អាកការបើកបរ ជាបណ្តោះអាសន្ន រួចអញ្ជើញទៅមន្ទីរពេទ្យសាធារណៈ ដើម្បីត្រួតពិនិត្យសុខភាព៕

ខេត្តកំពង់ចាម​ ៖ លោក ចាន់ដា​ អភិបាលខេត្តកំពង់ចាម​ និង​លោក​ ខ្លូត​ ផន​ ប្រធាន​ក្រុម​ក្រុមប្រឹក្សា​ខេត្ត​ បាន​អញ្ជើញ​ចុះ​ទទួល​សម្លៀកបំពាក់​ ចំនួន​៥០០០​កំប្លេ​ ដែល​ក្រុមហ៊ុន​ SUN HSU GARMENT Co.Ltd បាន​ផ្ដល់​ជូន​រដ្ឋបាល​ខេត្ត​កំពង់ចាម​ ដេីម្បី​បន្ត​ចែក​ជូន​ដល់​កុមារ​ ស្ថិត​ក្នុង​គ្រួសារ​​ទីទ័ល​ ជួប​ការ​លំបាក​ ក្នុងតំណាក់កាលដែលបង្កឡើងដោយជម្ងឺ​ កូវីដ១៩​ ដែលពិធី​ប្រគល់​ និង​ទទួល​នេះ​ ត្រូវ​បាន​ធ្វើឡើង​នាព្រឹក​ថ្ងៃ​ទី​៣​ ខែមេសា​ ឆ្នាំ​២០២០​ នៅ​​រោងចក្រ​កាត់ដេរ​សាន់ស៊ូ​ ស្ថិត​ក្នុង​ឃុំ​ខ្វិត​ធំ​ ស្រុក​ព្រៃឈរ​ ខេត្ត​កំពង់ចាម​ ដោយ​មានការ​អញ្ជើញ​ចូលរួមពី​ លោក​ លោកស្រី​ អភិបាល​រង​ខេត្ត​ ថ្នាក់ដឹកនាំ​មន្ទីរអង្គភាព​ពាក់ព័ន្ធ​ជុំវិញខេត្ត​ និង​អាជ្ញាធរ​មូលដ្ឋាន​ផងដែរ​។

ឆ្លៀត​ក្នុង​ឱកាស​នោះ​ លោក​ អ៊ុន​ ចាន់ដា​ អភិបាលខេត្តកំពង់ចាម​ និង​ប្រតិភូអមដំណើរ​ បាន​ធ្វើ​ការត្រួត​ពិនិត្យ​ លេី​ឧបករណ៍​តាម​ដាន​សុខភាព​ ​ដេីម្បី​បង្ការ​ ​ទប់ស្កាត់​ ​ការ​រីករាលដាល​ ​នៃ​វីរុស​កូរ៉ូណា​(កូវីដ​១៩)​ ដោយមិន​ឲ្យ​ឆ្លង​ដល់​កម្មករ​ កម្មការិនី​ ដែល​កំពុង​​បម្រើ​ការងារ​​ប្រមាណ​ជា​៤០០០នាក់​​ ក្នុង​រោងចក្រ​សាន់​ស៊ូ​ នោះឡើយ​ ហើយ ​លោកអភិបាលខេត្ត​​ ក៏បាន​ថ្លែង​អរគុណ​ ដល់​ក្រុមហ៊ុន​សានស៊ូ​ ដែល​បានអនុវត្ត​តាម​ការ​អំពាវនាវ​របស់​រាជរដ្ឋាភិបាល​ ក្នុង​ការ​ចូលរួម​ប្រយុទ្ធ​ប្រឆាំង​ទប់ស្កាត់​ការ​រីករាលដាល​ នៃ​ជំងឺ​កូវីដ​១៩​ នៅ​កម្ពុជា​ ព្រមទាំង​បាន​ជួយ​ឧបត្ថម្ភ​ជា​សម្លៀកបំពាក់​ ចំនួន​៥០០០កំប្លេ​ សម្រាប់​កុមារ​​ ស្ថិត​ក្នុង​គ្រួសារ​ទីទ័ល​ ជួប​ការ​លំបាក​ផងដែរ​។

ជាមួយគ្នា​នោះ​ លោក ​អភិបាលខេត្ត​ ក៏​បាន​ផ្តាំផ្ញេី​ដល់​ក្រុមហ៊ុន​ ត្រូវ​យកចិតទុកដាក់​ ក្នុង​ការ​ត្រួតពិនិត្យ​​តាម​ដាន​ ចំពោះ​សុខភាព​ បងប្អូន​កម្មករ​ កម្មការិនី​ ប្រកបដោយ​អនាម័យ​ ទាំង​ក្នុង​ពេល​បម្រើការ​ងារ​​ ​និង​ការ​ហូបចុក​ជា​ប្រចាំ​ បេី​មាន​បញ្ហា​លេី​ សុខភាព​ ត្រូវ​ប្រញាប់ប្រញាល់​ បញ្ជួនគាត់​ទៅ​មន្ទីរពេទ្យ​ជាបន្ទាន់​ផងដែរ​។

ដោយ​ឡែក​ លោក​អគ្គនាយកក្រុមហ៊ុន សាន់ស៊ូ​ បាន​ឲ្យដឹង​ថា រោងចក្ររបស់លោក នៅតែបន្តការផលិតជាធម្មត្តា ដោយរោងចក្រមានវត្ថុធាតុដើមគ្រប់គ្រាន់ និងធានាបានដល់ការផលិត។ ចំពោះ​បញ្ហាសុខភាពរបស់បងប្អូន កម្មករ កម្មការីនី រៀងរាល់ពេលចេញ ចូល​ ធ្វើការងា​ គឺបានឆ្លងកាត់ការត្រួតពិនិត្យជាប្រចាំ ស្រមតាមការណែនាំរបស់រាជរដ្ឋាភិបាល និងការណែនាំរបស់ ក្រសួងសុខាភិបាល ដោយប្រើប្រាស់ម៉ាស៊ីនស្គែន និងត្រួតពិនិត្យកម្តៅផងដែរ​ ៕ ដោយ ៖ ប៉ែន សុផល

ភ្នំពេញ ៖ នៅថ្ងៃនេះក្រសួងសុខាភិបាល បានចេញប្រកាសនូវដំណឹងដ៏សែនរីករាយដល់ប្រជាពលរដ្ឋបន្តទៀតថា អ្នកជំងឺកូវីដ១៩ បានជាសះស្បើយរហូតដល់១៥នាក់ថ្មីទៀត ធ្វើឲ្យចំនួនអ្នកជាសះស្បើយកើនឡើងរហូតដល់៤៩នាក់ ហើយពិសេសបំផុតគ្មានអ្នកឆ្លងជំងឺកូវីដថ្មីទេ។

ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន៦៥នាក់ នៃអ្នកឆ្លងសរុប១១៤នាក់។ បើគិតត្រឹមព្រឹកថ្ងៃទី០៤ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល៕

ស្ថានទូតនៃព្រះរាជាណាចក្រកម្ពុជាប្រចាំនៅព្រះរាជាណាចក្រថៃ នាថ្ងៃទី៣ ខែមេសាឆ្នាំ ២០២០ នេះបានចេញសេចក្តី ជូនដំណឹងស្ដីពីរាជរដ្ឋាភិបាលថៃប្រកាសដាក់បម្រាមគោចរនៅទូទាំងប្រទេស។
ក្នុងសេចក្តីជូនដំណឹងបានចែងថា រដ្ឋាភិបាលថៃហាមមិនឱ្យប្រជាពលរដ្ឋទូទាំងប្រទេសចេញក្រៅផ្ទះចាប់ពីម៉ោង ១០យប់ រហូតដល់ម៉ោង ៤៖00 ព្រឹក លើកលែងតែមានការណីចាំបាច់ដូចជា អ្នកបំពេញការងារផ្នែកវេជ្ជសាស្ត្រ ធនាគារ ការដឹកជញ្ជូន គ្រឿងបរិក្ខារ គ្រឿងបរិភោគ ផលិតផលកសិកម្ម បរិក្ខារពេទ្យ កាសែត ប្រេងឥន្ធនៈ ការនាំចេញនាំចូល ជាដើម។

សេចក្តីជូនដំណឹងរបស់ស្ថានទូតកម្ពុជា ក៏បានបញ្ជាក់ជូនប្រជាពលរដ្ឋខ្មែរដែលនៅប្រទេសថៃទាំងអស់ សូមអនុវត្តតាមបម្រាមគោចររបស់អាជ្ញាធរថៃឲ្យបានខ្ជាប់ខ្ជួន ក្នុងករណីពលរដ្ឋខ្មែរនៅថៃមានបញ្ហាអ្វីមួយនៅក្នុងអំឡុងពេលនេះសូមទាក់ទងផ្តល់ព័ត៌មានទៅស្ថានតំណាងកម្ពុជាប្រចាំនៅថៃ តាមរយៈលេខទូរសព្ទ ០៩២ ៨០ ៥០ ៥៦១ និងលេខ ០៩៤ ០៩ ២៥ ៩០៥។

ខាងក្រោមនេះ ជាខ្លឹមសារទាំងស្រុងនៃសេចក្តីជូនដំណឹងរបស់ស្ថានទូតកម្ពុជាប្រចាំនៅប្រទេសថៃ ៖

ភ្នំពេញ ៖ កំណើនសេដ្ឋកិច្ចកម្ពុជាអាចនឹងធ្លាក់មកនៅត្រឹម ២,៣% សម្រាប់ឆ្នាំ ២០២០នេះ និន្នាការនេះ គឺដោយសារការរាតត្បាតនៃមេរោគកូរ៉ូណា ឬCOVID-19។ នេះបើយោងតាមការព្យាករណ៍របស់ធនាគារ អភិវឌ្ឍន៍អាស៊ី ចេញផ្សាយនៅថ្ងៃទី៣ ខែមេសា ឆ្នាំ២០២០ នេះ។

លោកស្រី Sunniya Durrani-Jamal នាយិកាធនាគារអភិវឌ្ឍន៍អាស៊ី ប្រចាំប្រទេស កម្ពុជា មានប្រសាសន៍ថា ៖ សេដ្ឋកិច្ចកម្ពុជារំពឹងថា នឹងហក់ឡើងវិញដល់ ៥,៧% ក្នុងឆ្នាំ ២០២១ ខាងមុខ ប្រសិនបើជំងឺរាតត្បាតនេះត្រូវបញ្ចប់ ហើយសកម្មភាពសេដ្ឋកិច្ច នឹងវិល មករកប្រក្រតីភាពវិញ។ លោកស្រី បានគូសបញ្ជាក់ថា៖ រាជរដ្ឋាភិបាលកម្ពុជា បានចាត់ វិធានការត្រឹមត្រូវ ដើម្បីឆ្លើយតបនឹងបញ្ហាប្រឈម ដោយជំងឺកូវីដ១៩ ដែលមិនធ្លាប់ កើត មានពីមុនមកនេះ ដូចជាការគាំទ្របៀវត្សរ៍ដល់កម្មករកាត់ដេរ ក៏ដូច ជាការសម្រាលពន្ធ និងបំណុលដល់អាជីវកម្មនានា។ លោកស្រីថា រាជរដ្ឋាភិបាល ក៏បានរៀបចំថវិកាបំរុង សម្រាប់អន្តរាគមន៍ចាំបាច់ដើម្បីកាត់បន្ថយផលប៉ះពាល់នៃវិបត្តិនេះ ទៅលើសេដ្ឋកិច្ចជាតិ ជាពិសេសទៅ លើប្រជាពលរដ្ឋដែលងាយរងគ្រោះ។

បើតាមរបាយការណ៍បានឱ្យដឹងថា ក្នុងឆ្នាំ២០២០ ផ្នែកសេវាកម្មរបស់កម្ពុជា នឹង ធ្លាក់ចុះប្រមាណ ១,៧% ដោយសារឱនភាពវិស័យទេសចរណ៍ និងការថមថយនៃកំណើន អចលនទ្រព្យ។ កំណើននៃ វិស័យឧស្សាហកម្ម បានត្រូវព្យាករណ៍ថា នឹងចុះដល់ ៦,៥% ដោយសារកម្រិតទាបនៃផលិតកម្មសំលៀក បំពាក់សម្រាប់ការនាំចេញ ក៏ដូចជាវិស័យ សំណង់ដែលបន្ថយល្បឿន។ អតិផរណាត្រូវបានរំពឹងថា នឹង នៅតែមានអត្រាទាប ដែល ជាមធ្យម ត្រឹម ២,១% ក្នុងឆ្នាំ២០២០ ខណៈដែលកំណើនសេដ្ឋកិច្ច ថយចុះ ហើយអត្រា អតិផរណា នឹងនៅតែទាបក្នុងឆ្នាំ២០២១ ដោយសារតម្លៃប្រេងអន្តរជាតិធ្លាក់ចុះទាប។

ធនាគារអភិវឌ្ឍន៍អាស៊ីបានសំណូមពរថា៖ រាជរដ្ឋាភិបាលកម្ពុជា គួរផ្តោតជាសំខាន់ លើការទប់ ស្កាត់ជំងឺកូវីដ១៩។ បើមិនដូច្នោះទេ ការងើបឡើងវិញនៃវិស័យទេសចរណ៍ និងសេវាកម្ម នឹងមានការ លំបាក។ ទន្ទឹមនេះ រាជរដ្ឋាភិបាល អាចប្រើថវិកាពីក្នុងកញ្ចប់របស់ធនាគារអភិវឌ្ឍន៍អាស៊ី ដែលសរុប មានចំនួន ៦,៥ពាន់ លានដុល្លារអាមេរិក ត្រូវបានប្រកាសកាលពីថ្ងៃទី១៨ មីនា ឆ្នាំ២០២០ សម្រាប់ឆ្លើយតប នឹងជំងឺកូវីដ១៩នេះ៕

ភ្នំពេញ ៖ ជំនួយឧបត្ថម្ភក្រោមក្របខណ្ឌអង្គការសង្គមស៊ីវិល សម្រាប់ការពារសុខភាពប្រឆាំង កូវីដ១៩ ផ្តល់ដោយមូលនិធិចិន ដើម្បីសន្តិភាពនិងការអភិវឌ្ឍន៍ ដែលមានតម្លៃសរុប ១,១៣ លានយ័ន ត្រូវបានប្រគល់ជូនរាជរដ្ឋាភិបាលកម្ពុជា នាព្រឹកថ្ងៃទី៣ ខែមេសា នេះ នៅទីស្តីការគណៈរដ្ឋមន្រ្តី ក្រោមវត្តមានលោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងលោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា។

នាឱកាសនោះ លោក ឧបនាយករដ្ឋមន្រ្តី ប្រាក់ សុខុន បានថ្លែងអំណរគុណចំពោះ នាយកដ្ឋានអន្តរជាតិ នៃគណៈកម្មាធិការកណ្តាលបក្សកុម្មុយនីសចិន ដែលបានសម្របសម្រួលជាបន្ទាន់ ដើម្បីប្រមូលការគាំទ្រសម្រាប់ជួយកម្ពុជា ក្នុងកិច្ចប្រឹងប្រែងទប់ស្កាត់ និងគ្រប់គ្រងការឆ្លងរីករាលដាល នៃជំងឺកូវីដ១៩។ បរិក្ខាពេទ្យដែលជាអំណោយពីមូលនិធិចិន ដើម្បីសន្តិភាព និងការអភិវឌ្ឍន៍ នៃអង្គការសង្គមស៊ីវិលចិនដែលរួមមាន៖ ម៉ាស អាវការពារខ្លួន និងថ្នាំបុរាណចិន មានតម្លៃសរុបចំនួន១,១៣លានយ័ន ជំនួយទាំងនេះពិតជា មានសារសំខាន់យ៉ាងខ្លាំងចំពោះកម្ពុជា ដែលកំពុងត្រូវការសម្ភារៈបរិក្ខាពេទ្យ ដើម្បីប្រយុទ្ធនឹងការរីករាលដាលនៃកូវីដ១៩។

លោក ប្រាក់ សុខុន បានបញ្ជាក់ថា កាយវិការសប្បុរសធម៌នេះ ឆ្លុះបញ្ចាំងយ៉ាងច្បាស់ពីចំណងមិត្តភាពរវាងប្រទេសនិងប្រជាជនទាំងពីរ។ក្នុងអំឡុងពេលនៃការផ្ទុះឡើងនូវជំងឺកូវីដ១៩ដ៏សាហាវនេះ កម្ពុជាបានទទួលជំនួយជាច្រើនពីរដ្ឋាភិបាលចិន ក្នុងនោះក្រុមអ្នកជំនាញវេជ្ជសាស្រ្ត៧រូប ត្រូវបានបញ្ជូនពីតំបន់ក្វាងស៊ីមកភ្នំពេញ រួមជាមួយសម្ភារៈបរិក្ខាសម្រាប់ការពារនិងទប់ស្កាត់ការឆ្លងរីករាលដាលនៃជំងឺរាតត្បាត ដែលមានតម្លៃជាង៣លានយ័ន។ កាលពីថ្ងៃទី០១មេសានេះដែរ កងទ័ពរំដោះប្រជាជនចិន ក៏បានបញ្ជូនបរិក្ខាពេទ្យទម្ងន់ជាង២តោនមកជួយកម្ពុជា នៅមានក្រុមហ៊ុនចិនមួយចំនួនទៀត ក៏បានចូលរួមជួយផ្តល់បរិក្ខាការពារដល់ប្រជាជនកម្ពុជាផងដែរ។
បន្ថែមពីនេះ លោក ក៏បានទទួលព័ត៌មានថា អង្គការសង្រ្គោះមេឃពណ៌ខៀវ ត្រៀមបញ្ជូនក្រុមគ្រូពេទ្យស្ម័គ្រចិត្តចំនួន១១រូប ដែលមានបទពិសោធន៍ប្រយុទ្ធនិងកូវីដ១៩នៅចិន រួមជាមួយបរិក្ខាពេទ្យ និងថ្នាំព្យាបាលជំងឺ តម្លៃជាង១លានយ័ន ដែលគ្រោងធ្វើដំណើរតាមរថយន្តពីខេត្ត យូណាន មកកម្ពុជា តាមខេត្តស្ទឹងត្រែង នាពេលខាងមុខនេះ ដើម្បីជួយកម្ពុជាកំចាត់ជំងឺកូវីដរយៈពេល១៥ថ្ងៃផងដែរ៕

ភ្នំពេញ ៖ ក្រសួងសុខាភិបាល​កម្ពុ​ជា​បាន​ឲ្យ​ដឹងថា ទារក​ម្នាក់​ភេទ​ប្រុស​អាយុ០៤​ខែ ជា​កូនបង្កើត​របស់​ជនជាតិ​បារាំង ដែល​ទើបបាន​ព្យាបាល​ជាសះស្បើយ​ពី​ជំងឺ COVID-19 ហើយ ត្រូវបាន​ឲ្យ​ចេញពី​មន្ទីរពេទ្យ​កុមារ​ជាតិ​។

​សូមជម្រាបថា តាម​របាយការណ៍​ក្រសួងសុខាភិបាល​បាន​បញ្ជាក់ថា នៅ​ថ្ងៃ​ម្សិលមិញ​ករណី​ថ្មី​រកឃើញ​វិជ្ជមាន COVID-19 ចំនួន ០៤​នាក់ គឺ​ ៖
​ក​- បុរស​ជនជាតិ​បារាំង អាយុ ៦៧​ឆ្នាំ និង​ស្ត្រី​ជនជាតិ​បារាំង​អាយុ៦៧​ឆ្នាំ វិជ្ជមាន​កូ​វីដ​១៩ ត្រូវបាន​ដាក់​ឲ្យ​នៅ​ព្យាបាល​ក្នុង​សណ្ឋាគារ​ក្នុង​ក្រុងព្រះសីហនុ​។ បុគ្គល​ទាំងពីរ​រូបនេះ ជា​អ្នកទេសចរ​បារាំង​នៅក្នុង​ក្រុម​ជាមួយ​អ្នកទេសចរ​បារាំង​ជាង៣០​នាក់ ដែល​មួយចំនួនធំ​បាន​រកឃើញ​មានវី​រ៉ុ​ស​កូ​វីដ​១៩ ក្នុងពេល​កន្លងមកនេះ​។​
​ខ​- ស្ត្រី​អាយុ៥៩​ឆ្នាំ ជនជាតិ​បារាំង វិជ្ជមាន​កូ​វីដ​១៩ ជា​អ្នក​នៅក្នុង​ចំណោម​ក្រុម​ទេសចរ​បារាំង​ចំនួន ០៤​នាក់​ផ្សេង​ពី​ក្រុម​ខាងលើ ដេ​ល​បាន​រកឃើញ​ក្នុង​ក្រុម​នេះ មាន​វិជ្ជមាន​កូ​វីដ​១៩ ចំនួន​០២​នាក់ ដំបូង​គេ ត្រូវបាន​ដាក់​ឲ្យ​ព្យាបាល​នៅ​សណ្ឋាគារ​ក្នុង​ក្រុងព្រះសីហនុ​។​
​គ​- បុរស​អាយុ ៤០​ឆ្នាំ ជនជាតិ​ម៉ាឡេស៊ី វិជ្ជមាន​វីរុស​កូ​វីដ​១៩ ជា​អ្នកដំណើរ​ស្នាក់នៅ​បណ្ដោះអាសន្ន នៅ​ឃុំ​ពាមជីកង​. ស្រុក​កងមាស ខេត្តកំពង់ចាម ត្រូវបាន​ដាក់​ឲ្យ​ព្យាបាល​នៅ​មន្ទីរពេទ្យ​ខេត្តកំពង់ចាម​។ បុរស​រូបនេះ ជា​ក្រុម​មក​ធ្វើការ​ការងារ​សាសនា​មាន​គ្នា​ចំនួន ០៨​នាក់ ដែល​ចំនួន ០៧​នាក់ លើក​មុន បាន​រកឃើញ​មាន​វីរុស​កូ​វីដ​១៩ នៅ​ស្រុក​កងមាស​នេះដែរ​។​
​តួលេខ​សរុប​នៅក្នុង​ង​ប្រទេស​កម្ពុជា នៃ​អ្នក​កើតមាន​ជំងឺ​កូ​វីដ​១៩ មាន​សរុប​ចំនួន ១១៤​នាក់ ក្នុងនោះ​ព្យាបាល​ជាសះស្បើយ សរុប​ចំនួន ៣៥​នាក់៕

​