ភ្នំពេញ ៖ ច្បាប់ស្ដីពី«ការគ្រប់គ្រងប្រទេសជាតិស្ថិតក្នុងភាពអាសន្ន» ត្រូវបានប្រមុខរដ្ឋស្ដីទី និងជាប្រធានព្រឹទ្ធសភាសម្តេច សាយ ឈុំ ចុះហត្ថលេខាដាក់ឲ្យប្រើប្រាស់ជាផ្លូវការហើយ កាលពីថ្ងៃទី២៩ ខែមេសា ម្សិលមិញនេះ។

ការសម្រេចដាក់ឲ្យប្រើប្រាស់ច្បាប់ថ្មីសន្លាងមួយសម្រាប់ប្រទេសកម្ពុជា នេះ បន្ទាប់ពីរដ្ឋសភាបានអនុម័តកាលពីថ្ងៃទី១០ ខែមេសា និងឆ្លងការពិភាក្សា និងសម្រេចដោយព្រឹទ្ធសភា កាលពីថ្ងៃទី១៧ ខែមេសា ព្រមទាំងត្រូវបានក្រុមប្រឹក្សារដ្ឋធម្មនុញ្ញប្រកាសឯកភាពថា សមស្របនឹងរដ្ឋធម្មនុញ្ញផងដែរ។

«ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន» បានបញ្ជាក់ថា ការដាក់ប្រទេសជាតិក្នុងភាពអាសន្ន អាចធ្វើឡើងនៅពេលប្រជាជាតិប្រឈមមុខនឹងគ្រោះថ្នាក់ ជាគ្រោះថ្នាក់ដែលបង្កឡើងដោយសង្គ្រាម ឬការឈ្លានពានពីកម្លាំងបរទេស គ្រោះអាសន្នបន្ទាន់ចំពោះសុខភាពសាធារណៈបណ្តាលមកពីការឆ្លងរាលដាលនៃជំងឺ ភាពវឹកវរធ្ងន់ធ្ងរដល់សន្តិសុខជាតិ និងសណ្តាប់ធ្នាប់សាធារណៈ ព្រមទាំងគ្រោះមហន្តរាយធ្ងន់ធ្ងរ ដែលគំរាមកំហែង ឬអាចបង្កគ្រោះថ្នាក់រីករាលដាលដល់កម្រិតទូទាំងប្រទេស។

សូមជម្រាបថា «ច្បាប់ស្ដីពីការគ្រប់គ្រងប្រទេសជាតិស្ថិតក្នុងភាពអាសន្ន» ដែលមាន ៥ជំពូក និងចែកជា ១២មាត្រា ត្រូវបានកត់សម្គាល់ថា បានរៀបចំឡើងស្របពេលដែលកម្ពុជា រងការរាតត្បាតពីវីរុសកូរ៉ូណា ឬកូវីដ-១៩ និងរៀបចំឡើងផ្អែកតាមមាត្រា២២ថ្មី នៃរដ្ឋធម្មនុញ្ញកម្ពុជា ដែលចែងថា នៅពេលប្រទេសជាតិប្រឈមមុខនឹងគ្រោះថ្នាក់ ព្រះមហាក្សត្រទ្រង់ប្រកាសប្រទានដំណឹងជាសាធារណៈ ដាក់ប្រទេសជាតិស្ថិតក្នុងភាពអាសន្ន ក្រោយពីបានមតិឯកភាពពីនាយករដ្ឋមន្ដ្រី ប្រធានរដ្ឋសភា និងប្រធានព្រឹទ្ធសភា៕

​ដោយ ៖ នូ វី

បន្ទាយមានជ័យ ៖ ពលរដ្ឋកម្ពុជា នៅតែមិនទាន់មានចំណេះដឹងទូលំទូលាយពីការនេសាទនៅឡើយ ទើបធ្វើអោយពួកគេបន្តប្រើឧបករណ៍នេសាទខុសច្បាប់ ដូចជាអួនស្បៃមុង ដែលសុទ្ធតែបំផ្លាញដល់ពពួកត្រីតូចៗ និងអាចធ្វើអោយហិនហោចពូជត្រីផងដែរ ។ ឃើញនូវសកម្មភាពបែបនេះ សមត្ថកិច្ចកងកម្លាំងអាវុធហត្ថក្រុងប៉ោយប៉ែង ខេត្តបន្ទាយមានជ័យ បានចុះបង្រ្កាបនិងដកហូតបាននូវឧបករណ៍ខុសច្បាប់មួយចំនួន ។

នៅក្នុងប្រតិបត្តិការចុះបង្ក្រាបបទល្មើសនេសាទកាលពីថ្ងៃទី២៩ មេសា ២០២០ លោក ឃឿន វីរៈ នាយសង្កាត់រដ្ឋបាលជលផលក្រុងប៉ោយប៉ែត បានឲ្យដឹងថា អួនក្រឡាញឹក និងស្បៃមុង ដែលប្រជាពលរដ្ឋមួយចំនួនបាននេសាទនៅក្នុងទឹកអាងអូរខៃដននេះ ជាបទល្មើសនេសាទខុសច្បាប់ ដែលបំផ្លាញកូនត្រី ។ បើមិនមានការទប់ស្កាត់ទេនោះ ពូជត្រីប្រឈមនិងការបាត់បង់ ហើយការនេសាទនៅឆ្នាំក្រោយៗវានឹងធ្លាក់ចុះជាបន្តបន្ទាប់ ។
លោកបានបន្តថា ក្នុងប្រតិបត្តិការចុះបង្ក្រាបរបស់កម្លាំងចម្រុះ ដកហូតបានអួនស្បៃមុង និងលូស្បៃមុងចំនួន២៥មាត់ អួនស្បៃមុងក្រឡាញឹកប្រវែង៩០០ម៉ែត្រ និងលូស្បៃមុងប្រវែង៣០០ម៉ែត្រ សរុបមានប្រវែង១២០០ម៉ែត្រ ត្រូវបានអូសដាក់លើគោកដុតកម្ទេចចោល ។

លោក ឃឿន វីរៈ បានសំណូមពរឲ្យប្រជាពលរដ្ឋអោយចូលរួមថែរក្សាការពារនូវពូជត្រី តាមរយៈការនេសាទ ជាលក្ខណៈគ្រួសារ មានដូចជា ការបង់សំណាញ់ រាយមង បបក់ ស្ទូច និងមធ្យោបាយរកត្រីមួយចំនួនទៀត ដែលច្បាប់អនុញ្ញាតិ និងមិនធ្វើឲ្យបាត់បង់ពូជត្រី ។

រដ្ឋមន្ត្រី ក្រសួងកសិកម្មរុក្ខាប្រមាញ់និងនេសាទ លោកវេង សាខុន ធ្លាប់បានលើកឡើងថា ការនេសាទ ដោយប្រើឧបករណ៍ខុសច្បាប់ និងនេសាទនៅរដូវត្រីបន្តពូជ (ត្រីពង ) គឺជាសកម្មភាពខុសច្បាប់ ដែលអាចបំផ្លាញដល់ធនធានត្រី និងធ្វើអោយធនធានត្រី របស់កម្ពុជាកាន់តែខ្សត់ខ្សោយទៅៗ ដូច្នេះ ប្រជានេសាទត្រូវយល់ដឹងពីចំណុចនេះ ហើយសូមកុំវាយបំបែកឆ្នាំងបាយខ្លួនឯង ៕

​ភ្នំពេញ ៖ កម្លាំង​ជំនាញ​មន្ទីរ​ប្រឆាំង​គ្រឿងញៀន នៃ​អគ្គស្នងការ​រដ្ឋា​ន​នគរបាលជាតិ នៅ​រសៀល​ម្សិលមិញ​ បាន​បើក​ប្រតិបត្តិ​ការបង្ក្រាប​ករណី​កែច្នៃ ជួញដូរ​សារធាតុ​ញៀន ក្នុង​ខ​ណ្ឌ​ពោធិ៍​សែន​ជ័យ​ដោយបាន ឃាត់ខ្លួន​មេខ្លោង​ជា​ជន​ជាតិចិន​ហុងកុង​ម្នាក់​និង​ស្ត្រី​ជនជាតិ​មី​យ៉ាន់​ម៉ា​ម្នាក់ (សរុប​២​នាក់) រួមទាំង​រឹបអូស​គ្រឿងញៀន​ជិត​៦០​គីឡូក្រាម​។​

​មន្ត្រី​ប្រឆាំង​គ្រឿងញៀន​បាន​ឲ្យ​ដឹងថា ប្រតិបត្តិ​ការបង្ក្រាប​ក​រ​ណី​គ្រឿង​ញៀ​នេះ ធ្វើឡើង នៅ​ចំណុច​ផ្ទះ​គ្មាន​លេខ ភូមិ​ត្រពាំង​ពោធិ៍ សង្កាត់​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ។​

​ចំពោះ​លទ្ធផល​នៃ​ការបង្ក្រាប​ករណី​កែច្នៃ​គ្រឿងញៀន​ដ៏​ធំ​នេះ គឺ​បាន​ឃាត់ខ្លួន​ជនសង្ស័យ​២​នាក់ ទី​១/ ឈ្មោះ LEE KWAN FUK ភេទ​ប្រុស ជនជាតិ​ចិន (​ហុងកុង​) កាន់​លិខិត​ឆ្លង ដែន​លេខ KJ06288571 និង​ទី​២/ ឈ្មោះ THET THET HLAING ភេទ​ស្រី ជនជាតិ​មី​យ៉ាន់​ម៉ា កាន់​លិខិតឆ្លងដែន​លេខ MA 030746​។ រីឯ​វត្ថុតាង​ដែល​ដកហូត​បានរួម​មាន​ ៖ សារធាតុ​ញៀន​អិ​ច​ស្តា​ស៊ី​ប្រមាណ ១៤០,០០០​គ្រាប់ មាន​ទម្ងន់​ជាង​៥៧​គីឡូក្រាម និង​ម៉ាស៊ីន​កែឆ្នៃ​២​គ្រឿង​ទៀត៕

ភ្នំពេញ ៖ នៅថ្ងៃទី៣០ ខែមេសា ឆ្នាំ២០២០នេះ ក្រសួងសុខាភិបាលបានចេញប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១១៩នាក់។

ចំណែកអ្នកកំពុងសម្រាកព្យាបាលជំងឺកូវីដ នៅសល់តែ៣នាក់ប៉ុណ្ណោះ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី៣០ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលទទួលបានមុននេះបន្តិច៕ 

ខេត្តកំំំំំំំពង់ចាម ៖ ផ្ទះវេរលុយ និងលក់សាំងដបមួយកន្លែង ត្រូវជនសង្សយ័មួយក្រុមតូចប្រើល្បិចឲ្យស្ត្រីម្នាក់ជិះម៉ូតូចូលទៅចាក់សាំងបំភ័នអ្នកលក់ ហុចឱកាសឲ្យបក្ខពួកម្នាក់ទៀត ចូលទៅក្នុងផ្ទះលួចយកប្រាក់អស់ចំនួន ៣មុឺនដុល្លា ហើយគេចខ្លួនបាត់ ។ 

ប៉ូលិសបានអោយដឹងថា ថ្ងៃទី២៩ ខែមេសា ឆ្នាំ២០២០ វេលាម៉ោង៩ និង៣០នាទី សមកិច្ចនគរបាលបានទទួលបណ្តឹងពី ឈ្មោះ ស្រ៊ុនវ៉ានថាន ភេទប្រុស អាយុ៣៨ឆ្នាំ ជាតិខ្មែរ និងប្រពន្ធ ឈ្មោះ នីម តូនីតា អាយុ ២៨ឆ្នាំ ជាតិខ្មែរ មានទីលំនៅភូមិថ្មគោល ឃុំរអាង ស្រុកកំពង់សៀម ខេត្តកំពង់ចាម ថាៈ នៅវេលាម៉ោង៩ និង១០នាទី ខ្លួនកំពុងតែនៅលក់ដូរ និងមានវេលុយ(វីង) នៅផ្ទះរបស់ខ្លួន ស្រាប់តែមានមនុស្សស្រីម្នាក់បានជិះម៉ូតូ១គ្រឿងម៉ាកហុងដាសេ១២៥មិនចាំសេរី ពណ៌ខ្មៅ មិនចាំផ្លាកលេខ ស្លៀកខោអាវឈុត ពណ៌ក្រហម ផ្កាពណ៌ស បានមកឈប់ចាក់សាំងខ្លួនចំនួន៤លីត្រ ដោយអោយខ្លួនយកសាំងមកចាក់ម្តង២លីត្រ។  នៅពេលនោះក៏មានបក្ខពួកម្នាក់ទៀត ស្លៀកខោកាប៊យជើងវែង ពាក់អាវយឺតដៃវែងពណ៌ខ្មៅ ពាក់មួកពណ៌ប៉ារ៉េពណ៌ខ្មៅ ពាក់ម៉ាស់ បានធ្វើសកម្មភាពដើរចូលមកក្នុងរោងវេលុយ(វីង)របស់ ម្ចាស់ផ្ទះហើយបានយក លុយរបស់ខ្លួននៅក្នុងថតតុសំរាប់ទុកវេអោយភ្ញៀវអស់ចំនួន ៣០.០០០$ (បីម៉ឺនដុល្លាអាមេរិក) ក្នុងខណ:ខ្លួនកំពុងតែនៅចាក់សាំង អោយបក្ខពួករបស់វានៅមុខផ្ទះ ។​

ប៉ូលិសបានបន្តថា បន្ទាប់ពីទទួលបានព័ត៌មាន និងបណ្តឹងភ្លាម កម្លាំងសមត្ថកិច្ចនគរបាលស្រុកកំពង់សៀម រួមជាមួយកម្លាំងសមត្ថកិច្ចនគរបាលប៉ុស្តិ៍រអាង ចាត់វិធានជាបន្ទាន់ចុះដល់កន្លែងកើតហេតុ ធ្វើការស្រាវជ្រាវ និងរៀបចំកសាងឯកសារសំណុំរឿងតាមនិតិវិធី៕       

ខេត្តបន្ទាយមានជ័យ ៖ នៅក្នុងដំណាក់កាលកូវីដ ១៩ មិនទាន់រលត់ពីប្រទេសកម្ពុជានិងពិភពលោកនៅឡើយ ការជួបជុំជាលក្ខណៈទ្រង់ទ្រាយធំ ក៏នៅតែបន្តហាមប្រាម ហើយនៅកម្ពុជាក៏ដូចគ្នា រាជរដ្ឋាភិបាលនៅតែបន្តអនុវត្តន៍រក្សាគម្លាតសង្គម ។ ដោយហេតុនេះ អង្គមេទិ្ទញរបស់កាកបាទក្រហមកម្ពុជា ដែលនឹងធ្វើឡើងនៅនៅតាមបណ្ដាខេត្តក៏បានប្រកាសមិនរៀបចំតែនៅបន្តទទួលមូលនីធិពីសប្បុរសជនដដែល ជាក់ស្ដែងសាខាកាកបាទក្រហមខេត្តបន្ទាយមានជ័យ បានប្រកាសមិនធ្វើអង្គមេទ្ទិញនោះទេ តែនឹងគៀងគរមូលនីធិបន្ថែមសម្រាប់ជួយទ្រទ្រង់ដល់សកម្មភាពមនុស្សធម៌របស់កាកបាទក្រហមកម្ពុជា ។

ក្នុងកិច្ចប្រជុំពិភាក្សាផ្សព្វផ្សាយផែនការខួបទី១៥៧ របស់កាកបាទក្រហមខេត្តបន្ទាយមានជ័យ លោក អ៊ុំ រាត្រី ប្រធានគណៈកម្មាធិការ សាខាកាកបាទក្រហមកម្ពុជាខេត្ត មានប្រសាសន៍ថា យោងសេចក្តីប្រកាសព័ត៌មាន របស់កាកបាទក្រហមកម្ពុជា ស្តីពីការផ្អាកប្រារព្ធពិធីអបអរខួបលើកទី ១៥៧ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា សាខាកាកបាទក្រហមកម្ពុជា ខេត្តបន្ទាយមានជ័យ បានសម្រេចផ្អាកការប្រារព្ធមេទ្ទិញ អបអរខួបលើកទី ១៥៧ ទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២០ “ ដើម្បីចូលរួមចំណែកយ៉ាងធំធេង ក្នុងការទប់ស្កាត់ការរាតត្បាតវីរុសកូរ៉ូណា ( កូវីដ ១៩ ) មកលើប្រជាពលរដ្ឋ និងការឆ្លើយតបទៅនឹងការអំពាវនាវដ៏ខ្ពង់ខ្ពស់របស់ សម្តេចតេជោ នាយករដ្ឋមន្រ្តីនៃព្រះរាជាណាចក្រកម្ពុជា ឲ្យប្រជាពលរដ្ឋនៅតែរក្សាការប្រុងប្រយ័ត្នខ្ពស់ចំពោះជំងឺកូវីដ ១៩ ដ៏កាចសាហាវនេះ។

លោកបន្តថា ទោះបីសាខាមិនបានរៀបចំពីធីមេទ្ទិញ អបអរខួបទី ១៥៧ ទិវាពិភពលោកក៏ដោយ ក៏ សាខាកាកបាទក្រហមកម្ពុជាខេត្តបន្ទាយមានជ័យនៅតែកៀងគររកមូលនិធិ និងស្វាគមន៏ការចូលរួមបរិច្ចាគនូវ ថវិកា សម្ភារៈ ដោយស្មគ្រចិត្តពីព្រះតេជគុណ សប្បុរសជន មន្រ្តីរាជការនៃស្ថាប័នរដ្ឋ និងវិស័យឯកជន ដូចដែលធ្លាប់បានធ្វើកាលពីបណ្តាឆ្នាំកន្លងទៅ ៕

ខេត្ត​មណ្ឌលគិរី ៖ សមត្ថកិច្ច​បាន​ចាប់​វ៉ៃខ្នោះ​បុរស​តិ​រច្ឆា​ន​ជា​ឪពុក​ម្នាក់​ដែល​បានធ្វើ​សកម្មភាព​ចាប់រំលោភ​សេពសន្ថវៈ​លើ​កូនស្រី​បង្កើត​ខ្លួនឯង​ជាច្រើន​ដង​រហូត​មាន​ផ្ទៃពោះ ទើប​បែកធ្លាយ ហើយ​ត្រូវបាន​ម្តាយបង្កើត​ប្តឹងទៅ​សមត្ថកិច្ច​ឲ្យ​ចាប់ខ្លួន​តែម្តង។​

​ចំពោះមុខ​សមត្ថកិច្ច​ជន​តិ​រិ​ច្ឆា​ន​ជា​ឪពុក​បាន​សារភាពថា​ខ្លួន​ពិតជា​បាន​រំលោភ​លើ​កូនស្រី​ខ្លួនឯង​ដែលមាន​អាយុ​ទើបតែ​១៦​ឆ្នាំ​នោះ​ប្រាកដ​មែន​។ ការរំលោភ​កូនស្រី​ខ្លួនឯង​លើកទីមួយ​គឺ​ចាប់ផ្ដើម​នៅក្នុង​ខែតុលា​ឆ្នាំ ២០១៩​និង​ជា​បន្តបន្ទាប់​រហូតដល់​ទៅ​៩​ដង​។​

​មន្ត្រី​ស្នងការដ្ឋាន​ខេត្តមណ្ឌលគិរី​បានបញ្ជាក់​អំពី​សកម្មភាព​រំលោភ​ថា ជនសង្ស័យ​ជា​ឪពុក បានធ្វើ​សកម្មភាព​រំលោភ​កូនស្រី​ខ្លួនឯង​នៅលើផ្ទះ​ពេលយប់ ពេល​ម្ដាយ​មិន​នៅ ដោយ​ឡើងទៅ​ខ្ទប់មាត់ រួច​សម្រាត​ខោអាវ​ធ្វើ​ការរំលោភ​បានសម្រេច​និង​បាន​គំរាម​លើ​កូនស្រី​នោះ​ថា​នឹង​សម្លាប់ចោល បើសិនជា​ហ៊ាន​ប្រាប់​ទៅ​ម្ដាយ ឬ​បង​របស់ខ្លួន​។​

​តាម​ការសារភាព​រប​ស់ជន​សង្ស័យ​ការរំលោភរ​បស់ជនស​ង្ស័​យ​ទៅលើ​ជនរងគ្រោះ​គឺ​ប្រព្រឹត្ត​នៅលើផ្ទះ​របស់​ខ្លួនឯង ចំនួន​៣​លើក និង​បន្តទៅ​រំលោភ​នៅឯ​ខ្ទម​ចាំ​ស្រែ​ចំនួន​៦​លើក​ទៀត​។ ជនសង្ស័យ​បន្តថា ដោយសារ​តែមាន​ការរួម​រ័ក​មេត្រី​ជាច្រើនលើក​ច្រើនសា​បែបនេះ ជនសង្ស័យ និង​ជនរងគ្រោះ​ហាក់​មាន​ភាពស្និទ្ធស្នាល​ខុសប្លែក ហើយ​កូនស្រី​បាន​សួរ​ទៅ​ឪពុក​ថា​នឹង​បន្ត​ការស្រលាញ់​មកលើ​ខ្លួន​បែបនេះ​ទៀត​ឬក៏​យ៉ាងណា​? ឪពុក​ចិត្តខ្មៅ​តាំងពី​ពេលនោះ​មក ក៏​ឈប់​បង្កើត​ភាពស្និទ្ធស្នាល​ជាមួយ​កូនស្រី​នោះ​ទៀត​ដែរ​។ ​រហូត​កូនស្រី​មាន​ផ្ទៃពោះ​ក៏​ចាប់ផ្ដើម​មានការ​សួរនាំ​ពី​ម្ដាយ​ក៏ដូចជា​សាច់ញាតិ ហើយ​កូនស្រី​បាន​សារភាពថា​ត្រូវ​ឪពុក​បង្កើត​រំលោភ​រហូត​មាន​ផ្ទៃពោះ ពេលនោះ​ហើយ​ដែល​ម្ដាយ​ក៏​សម្រេច​ប្ដឹងទៅ​សមត្ថកិច្ច​ឱ្យ​ចាប់ខ្លួន​ឪពុក តែម្ដងទៅ​។​

​សមត្ថកិច្ច​នគរបាល​បានឱ្យដឹងថា ជនសង្ស័យ ត្រូវបាន​ឃាត់ខ្លួន​កាលពី​ថ្ងៃទី​២៦​ខែមេសា ឆ្នាំ ២០២០​នៅ​ភូមិ ណង​ប៊ួ ឃុំ​ណង​ឃី​លឹក ស្រុក​កោះ​ញែក ខេត្តមណ្ឌលគិរី ។​ជនសង្ស័យ​ឈ្មោះ សិង សៃ អាយុ ៤២ ឆ្នាំ មុខរបរ កសិករ រស់នៅ​ចំណុច​ទំនប់​បាក់​ខាំ ភូមិ​ណង​ប៊ួ ឃុំ​ណង​ឃី​លក ស្រុក​កោះ​ញែក​។ ជនរងគ្រោះ​ឈ្មោះ​សៃ ធុ​យ អាយុ​១៩ ឆ្នាំ រស់នៅ​ភូមិ​ឃុំ​ខាងលើ​៕

ខេត្តសៀមរាប ៖ នៅ​ព្រឹក​ថ្ងៃទី​២៩ ខែមេសា ឆ្នាំ​២០២០​នេះ តុលាការ​ខេត្តសៀមរាប បាន​បន្ត​សវនាការ​លើ​សំណុំរឿង​ឆបោក​ប្រាក់​រាប់លាន​ដុល្លារ​ដែល​បង្កឡើង​ដោយ​នាយក​ក្រុមហ៊ុន​អ៊ី​ណា​រីតា ដែល​បោក​លុយ​ប្រជាពលរដ្ឋ​រាប់លាន​ដុល្លារ។ ប៉ុន្តែ​នៅ​ខាងក្រៅ​តុលាការ​ឯណោះ​គេ​ឃើញ​បាតុករ​មួយក្រុម​ដឹកនាំ​ដោយ លោកស្រី ខាត់ សុ​ឃីម និង​ស្វាមីបាននាំគ្នា​តវ៉ា​ទាមទារ​ឲ្យ​ដោះលែង​នាយក​ក្រុមហ៊ុន​អ៊ី​ណា​រីតា ដែល​សមត្ថកិច្ច​អះអាងថា បានធ្វើការ​ឆបោក​ប្រាក់​អតិថិជន​ជាច្រើន​សិប​នាក់ រហូត​ជាង​១៤​លាន​ដុល្លា​អាមេរិក​ទៅវិញ ហើយ​នេះ​ក៏​ជា​បាតុកម្ម​តវ៉ា​លើក​ទី​២​ដែរ ដែល​ដឹកនាំ​ដោយ​លោកស្រី ខាត់ សុ​ឃីម រួមទាំង​ស្វាមី​ផងដែរ។​

​បាតុកម្ម​តវ៉ា​នៅ​ព្រឹក​នេះ បណ្តាល​ឲ្យឲ្យមាន​ការស្ទះ​ផ្លូវ​នៅមុខ​សាលាដំបូង​ខេត្តសៀមរាប អស់​ជាច្រើន​ម៉ោង​ផងដែរ បន្ទាប់មក​លោក សំរិទ្ធ សុខុន ព្រះរាជអាជ្ញារង​អម​សាលាដំបូង​ខេត្តសៀមរាប​ក៏បាន​ចេញមក​ពន្យល់​ពី​បញ្ហា​ផ្លូវច្បាប់​នៅ​ចំពោះមុខ​បាតុកម្ម អំពី​ការឃុំខ្លួន​នាយក​ក្រុមហ៊ុន​អ៊ី​ណា​រីតា​ខាងលើ​។​

​សូមជម្រាបថា នាយក​ក្រុមហ៊ុន​អ៊ី​ណា​រីតា ដែល​ត្រូវ​ចាប់ខ្លួន ​និង​ធ្វើឲ្យមាន​ការតវ៉ា​ទាមទារឲ្យ​ដោះលែង​នោះ មានឈ្មោះ ឌី​ន សួន​ណាត ភេទ​ប្រុស ត្រូវបាន​សមត្ថកិច្ច​ចាប់ខ្លួន​កាលពី​អំឡុង​ខែកក្កដា ឆ្នាំ​២០១៩​កន្លងទៅនេះ ពីបទ​ឆបោក​ដោយមាន​ស្ថាន​ទំងន់ទោស និង​មិន​បំពេញ​កាតព្វកិច្ច​ចំពោះ​ឧបករណ៍​ដែល​អាច​ជួញដូរ​បាន​។​ នេះ​បើ​យោងតាម​ការបញ្ជា​ក់រប​ស់លោក យិន ស្រាង ប្រធាន​លេខាធិការដ្ឋាន​និង​ជា​អ្នកនាំពាក្យ​សាលាដំបូង​ខេត្តសៀមរាប​៕
​

ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំប្រារព្ធទិវាពិភពលោក ដើម្បីសុវត្ថិភាព និងសុខភាពការងារឆ្នាំ២០២០ ក្រោមប្រធានបទ “បញ្ឈប់ការរាតត្បាតសាកល ៖ ការរៀបចំផែនការ ឆ្លើយតបគ្រោះអាសន្នដើម្បីបញ្ឈប់ការឆ្លងរីករាលដាលនៃជំងឺកូវីដ-១៩ នៅកន្លែង ធ្វើការ” តាមរយៈប្រព័ន្ធអ៊ិនធើណេត វីដេអូ Conferenceនាព្រឹក ថ្ងៃទី២៩ ខែមេសា ឆ្នាំ២០២០។

ពិធីនេះរៀបចំឡើងក្រោមត្តមានលោកបណ្ឌិត អ៊ិតត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ, លោក Graeme Buckley នាយកប្រចាំប្រទេសនៃអង្គការអន្តរជាតិខាងការងារសម្រាប់ ប្រទេសកម្ពុជា ថៃ និងឡាវ, លោក កាំង ម៉ូនីកា អគ្គលេខាធិការរង នៃសមាគមរោងចក្រកាត់ដេរ នៅកម្ពុជា(តំណាងនិយោជក), លោក អាត់ ធន ប្រធានសហភាព ការងារកម្ពុជា(តំណាងសហជីព) ព្រមទាំងមានការចូលរួមពីថ្នាក់ដឹកនាំនៃក្រសួងការងារ និងបណ្តុះបណ្តាលវិជ្ជាជីវៈ និងស្ថាប័នពាក់ព័ន្ធ តំណាងនិយោជក និងកម្មករនិយោជិត សរុបពី៥០០នាក់ ទៅ ១០០០នាក់។

នេះជាឆ្នាំទី១៥ ដែលក្រសួងការងារ និងបណ្តុះបណ្តាលវិជ្ជាជីវៈ រៀបចំទិវាពិភពលោក ដើម្បីសុខភាព និងសុវត្ថិភាពការងារ ក្រោមកិច្ចសហការផ្នែកបច្ចេកទេស ជាមួយអង្គការអន្តរជាតិ ខាងការងារ (ILO) តាមរយ:គម្រោងរោងចក្រកាន់តែប្រសើរនៅកម្ពុជា (ILO-BFC) និងគម្រោងលើកកម្ពស់ស្តង់ដាសុខភាព និងសុវត្ថិភាពការងារក្នុងវិស័យសំណង់ (ILO-OSH) ក្នុងគោលបំណងជំរុញគ្រប់ភាគីពាក់ព័ន្ធដើម្បីរៀបចំផែនការឆ្លើយតប និងវិធានការណ៍ចាំបាច់នានាក្នុងការទប់ស្កាត់ការរីករាលដាលនៃជំងឺកូវីដ-១៩នៅកន្លែងធ្វើការ។

លោក Graeme Buckley នាយកប្រចាំប្រទេសអង្គការអន្តរជាតិខាងការងារសម្រាប់ប្រទេសកម្ពុជា ថៃ និងឡាវ មានប្រសាសន៍តាមវីដេអូ Conference ពីទីក្រុងបាងកក ព្រះរាជាណាចក្រថៃ បានថ្លែងអំណរគុណ ដល់ឯកឧត្តម លោក លោកស្រី សម្រាប់កិច្ចសហការ ទាំងអស់ ក្នុងអំឡុងពេលប៉ុន្មានខែចុងក្រោយនេះ ស្តីពីការឆ្លើយតបទៅនឹងមេរោគ កូវីត-19 (Covid-19)។ រូបលោកពិតជាកោតសរសើរយ៉ាងខ្លាំង ចំពោះការប្តេជ្ញាចិត្តរបស់ យើងទាំងអស់គ្នា ក្នុងការចាត់វិធានការណ៍ដោះស្រាយ ពីការគំរាមកំហែងនៃមេរោគ កូវីត-19 រួមទាំងកម្មករនិយោជិត នៅតាមបណ្តារោងចក្រកាត់ដេរផងដែរ។ ទន្ទឹមនេះដែរ អង្គការ ILO រួមទាំងគម្រោងរោងចក្រកាន់តែប្រសើរនៅកម្ពុជា និង គម្រោងលើកកម្ពស់ស្តង់ដារសុខភាព និងសុវត្ថិភាពនៅកន្លែងការងារ របស់អង្គការ ILO នៅក្នុងប្រទេសកម្ពុជា ប្តេជ្ញាធ្វើការរួមគ្នាជាមួយភាគីពាក់ព័ន្ធទាំងអស់ ដើម្បីសម្រេច នូវចក្ខុវិស័យពិភពលោកដែលមាន កន្លែងការងារកាន់តែមានសុខភាព និងសុវត្ថិភាព ប្រសើរឡើងសម្រាប់ប្រជាជនទាំងអស់។

តាមរយៈ វីដេអូ Conferenceនេះដែរ លោកបណ្ឌិត អ៊ិត សំហេង មានប្រសាសន៍ថា នៅក្នុងបរិបទនៃរីករាលដាលការឆ្លងជាសកល នៃជំងឺកូវីដ-១៩ (COVID-19) រាជរដ្ឋាភិបាលកម្ពុជា បានដាក់ចេញនូវវិធានការបង្ការ ទប់ស្កាត់ នឹងប្រយុទ្ធប្រឆាំងកូវិដ១៩ ប្រកបដោយប្រសិទ្ធភាពខ្ពស់។ ក្រសួងសុខាភិបាលបានធ្វើការយ៉ាងជិតស្និទ្ធ និងហ្មត់ចត់ដោយផ្ទាល់ ជាមួយអង្គការសុខភាពពិភពលោក និងកំពុងបន្តផ្សព្វផ្សាយអប់រំ ស្តីពីជំងឺកូវីដ-១៩នេះ ដល់ប្រជាជនទូទាំងប្រទេស ដើម្បីផ្តល់ចំណេះដឹងពីសុខភាពសាធារណៈ លើការបង្ការខ្លួនឲ្យចៀសផុតពីការឆ្លង។ ក្រសួងការងារ និងបណ្តុះបណ្តាលវិជ្ជាជីវៈ បានចេញនូវសេចក្តីណែនាំបន្ថែមជាបន្តបន្ទាប់ ថែមទាំងបានចាត់ ក្រុមការងារឱ្យចុះធ្វើសកម្មភាពផ្សព្វផ្សាយ និងបង្រៀនដល់រដ្ឋបាល ប្រធានក្រុម ប្រធានផ្នែក រោងចក្រ សហគ្រាស ពីវីធីបង្ការ ទប់ស្កាត់ និងប្រយុទ្ធប្រឆាំងជំងឺកូវីដ-១៩។

ការលេចឡើងនូវជំងឺកូវីដ-១៩ នាពេលថ្មីៗនេះ បានបង្កជាបញ្ហាប្រឈមដ៏ធំមួយទៀត បន្ថែមលើបញ្ហាដែលមានស្រាប់ ជាពិសេសគឺសង្គ្រាមពាណិជ្ជកម្ម និងការថមថយកំណើនសេដ្ឋកិច្ច សម្រាប់សកលលោកក៏ដូចជាកម្ពុជាយើង។ ដើម្បីកាត់បន្ថយផលប៉ះពាល់ រក្សាលំនឹងអាជីវកម្ម និង លំនឹងជីវភាពជូនកម្មករនិយោជិតទាំងអស់ រាជរដ្ឋាភិបាលបានដាក់ចេញវិធានការអន្តរាគមន៍បន្ទាន់ជុំទីមួយ ទី២ និងទី៣ ដល់វិស័យដែលទទួលរងផលប៉ះពាល់ធ្ងន់ជាងគេ គឺវិស័យអាជីវកម្ម ទេសចរណ៍ និងវិស័យកាត់ដេរសំលៀកបំពាក់ ស្បែកជើង និងកាបូប។

ជាមួយគ្នានោះ រាជរដ្ឋាភិបាល ក៏បានដាក់ចេញនូវវិធានការទូទៅ សម្រាប់ជួយដល់កម្មករនិយោជិតដែលទទួលរងផលប៉ះពាល់ រួមមាន ៖ ការលើកលែងពន្ធប្រថាប់ត្រាចំពោះការទិញផ្ទះតម្លៃ ក្រោម៧ម៉ឺនដុល្លារអាមេរិក ការស្នើឱ្យ ក្រុមហ៊ុនអភិវឌ្ឍលំនៅដ្ឋានពន្យារពេលការបង់រំលោះ និង អគ្គិសនីកម្ពុជា និងរដ្ឋាករទឹក អនុញ្ញាតឱ្យកម្មករនិយោជិតជំពាក់ ការបង់ថ្លៃសេវាប្រើប្រាស់ ក្នុងអំឡុងពេលព្យួរកិច្ចសន្យាការងារ ព្រមទាំងគ្រឹះស្ថានធនាគារ និងមីក្រូហិរញ្ញវត្ថុធ្វើការបន្ធូរបន្ថយការប្រាក់ និងពន្យារពេលការសងប្រាក់ដើម។ លើសពីនេះ រាជរដ្ឋាភិបាលក៏បានត្រៀមដាក់ចេញនូវវិធានការថ្មីៗបន្ថែមទៀត ក្នុងករណីដែល ស្ថានភាពសេដ្ឋកិច្ចរងផលប៉ះពាល់កាន់តែធ្ងន់ធ្ងរ។

នាឱកាសនោះដែរ ក្នុងនាមរាជរដ្ឋាភិបាលកម្ពុជា លោកបណ្ឌិត អ៊ិត សំហេង បានបន្តអំពាវនាវជាថ្មី ម្តងទៀតដល់ម្ចាស់រោងចក្រ សហគ្រាស គ្រឹះស្ថាន និងបងប្អូនកម្មករនិយោជិតទាំងអស់ សូមចូលរួមអនុវត្តអោយបានហ្មត់ចត់បំផុតនូវវិធានការបង្កា និងទប់ស្កាត់ការចម្លងវីរុសកូវីដ-១៩ ឱ្យ បានត្រឹមត្រូវទៅតាមការណែនាំរបស់ក្រសួងសុខាភិបាល និងក្រសួងការងារ និងបណ្តុះបណ្តាលវិជ្ជា ជីវៈ តាមរយៈការអនុវត្តនូវវិធានការសុវត្ថិភាព និងសុខភាពការងារជូនបងប្អូនកម្មករនិយោជិត។ រាជរដ្ឋាភិបាលសង្ឃឹមយ៉ាងមុតមាំថា គ្រប់ម្ចាស់ នាយករោងចក្រ សហគ្រាស គ្រឹះស្ថាន និងបងប្អូនកម្មករនិយោជិតទាំងអស់ នឹងចូលរួមទប់ស្កាត់ និងប្រឆាំងជំងឺរលាកផ្លូវដង្ហើមធ្ងន់ធ្ងរ កូវីដ-១៩ ដើម្បីសេចក្តីសុខសាន្តយើងទាំងអស់គ្នា ដើម្បីអនាគតការងារយើង សង្គមជាតិយើង និងសេដ្ឋកិច្ចជាតិយើង។

ផ្អែកតាមផែនការយុទ្ធសាស្រ្តអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈឆ្នាំ ២០១៩-២០២៣ ក្រសួងកំពុងបន្តជំរុញការផ្តោតការយកចិត្តទុកដាក់បន្តទៀត ទៅលើវិស័យសុវត្ថិភាពការងារនិងសុខភាពការងារ ដែលកន្លងមកនេះ យើងបានសម្រេចលទ្ធផលសំខាន់ៗដូចខាងក្រោម៖

– បានដាក់ឱ្យប្រើប្រាស់នូវផែនការមេលើកទី២ ស្តីពីសុវត្ថិភាព និងសុខភាពការងារឆ្នាំ២០១៨-២០២២ដែលជាផែនទីចង្អុលផ្លូវក្នុងអភិវឌ្ឍវិស័យសុវត្ថិភាព និងសុខភាពការងារនៅក្នុងប្រទេសកម្ពុជា
– បានបន្តយន្តការនៃគណៈកម្មាធិការជាតិសុវត្ថិភាព និងសុខភាពការងារ ដើម្បីសម្របសម្រួល និងផ្តល់យោបល់ដើម្បីពង្រឹងប្រព័ន្ធគ្រប់គ្រងសុវត្ថិភាព និងសុខភាពការងារ ថ្នាក់ជាតិ និងសហគ្រាស គ្រឹះស្ថាន
– បានកែលម្អប្រព័ន្ធអធិការកិច្ចការងារឱ្យកាន់តែមានប្រសិទ្ធភាព និងគុណភាព តាមរយៈការកែលម្អរបាយការណ៍អធិការកិច្ចការងារ ការពង្រឹងសមត្ថភាពមន្ត្រីទទួលបន្ទុកអធិការកិច្ចការងារ និងការបង្កើនការចុះអធិការកិច្ចការងារបន្ថែមទៀតទៅដល់វិស័យសំណង់ ឡឥដ្ឋ និងសេវាកម្សាន្ត
– បានដាក់ចេញនូវផែនយុទ្ធសាស្រ្តអភិវឌ្ឍន៍វិស័យការងារ និងបណ្តុះ បណ្តាលវិជ្ជាជីវៈឆ្នាំ២០១៩-២០២៣ ដែលសុវត្ថិភាព និងសុខភាពការងារស្ថិតនៅក្នុងកម្មវិធីទី១ “ការអភិវឌ្ឍលក្ខខណ្ឌការងារ និងសុខដុមនីយកម្មនៃទំនាក់ទំនងវិជ្ជាជីវៈ” ដែលផ្តល់នូវកាលានុវត្ត ជាយុទ្ធសាស្រ្ត ដើម្បីពង្រឹងលក្ខខណ្ឌសុវត្ថិភាព និងសុខភាពការងារ ជាពិសេសការរៀបចំច្បាប់ស្តីពីសុវត្ថិភាព និងសុខភាពការងារ ជំរុញ និងលើកទឹកចិត្តដល់សហគ្រាស គ្រឹះស្ថានដែលអនុវត្តតាមបទដ្ឋានការងារស្នូលសុវត្ថិភាព និងសុខភាពការងារ។
– សហការជាមួយទីភ្នាក់ងារជាតិសុខភាព និងសុវត្ថិភាពការងារកូរ៉េ ដើម្បីចាប់ផ្តើមសិក្សា និងរៀបចំ សេចក្តីព្រាងច្បាប់ស្តីពីសុខភាព និងសុវត្ថិភាពការងារ
– បន្តកិច្ចសហការជាមួយគម្រោងលើកកម្ពស់ស្តង់ដា សុខភាព និងសុវត្ថិភាពការងារ នៃអង្គការអន្តរជាតិខាងការងារ (ILO/OSH Project) នូវផែនការសកម្មភាពដូចខាងក្រោម៖
-បន្តរៀបចំគោលនយោបាយជាតិស្តីពីសុខភាព និងសុវត្ថិភាពការងារ និង កម្រងព័ត៌មានជាតិស្តីពីសុខភាព និងសុវត្ថិភាពការងារ
-ពិនិត្យមើលនូវការវាយតម្លៃការអនុវត្ត ផែនការមេលើកទី២ ស្តីពីសុខភាព និងសុវត្ថិភាពការងារ (២០១៨ – ២០២២)
-បង្កើតនូវបញ្ជីផ្ទៀងផ្ទាត់ ស្តីពីការកែលម្អរបៀបធ្វើការ នៅក្នុងការដ្ឋានសំណង់ខា្នតធំ និងមធ្យម
-បន្ថែមវគ្គបណ្តុះបណ្តាលបំប៉នគ្រូបង្គោលស្តីពី WISCON៕