ភ្នំពេញ ៖ អាជីវករ លក់ដូរ សម្ភារៈសម្រាប់ បូជាថ្វាយ ចំពោះព្រះពុទ្ធសាសនា រួមមាន ទៀន ធូប ទ័យទាយ និង សម្ភារៈផ្សេងៗ មុនពិធីបុណ្យចូលព្រះវស្សាមកដល់ឆ្នាំនេះ លក់ដាច់ជាងឆ្នាំមុនៗ ជាពិសេសទៀនព្រះវស្សា និង សំពតសាដក ចាប់ពីដើមខែកក្កដាមកនេះ អាចលក់បានពី៤០ទៅ៥០គូរក្នុង១ថ្ងៃៗ។
ម្ចាស់ហាង ឧត្តម ឧត្តម លោកពូ ស៊ិន ហាំ ដែលលក់នៅតាមបណ្តោយផ្លូវលេខ ១៨២ ក្នុងសង្កាត់វាលវង់ ខណ្ឌ៧មករា បានមានប្រសាសន៍ប្រាប់ឱ្យដឹងថា ចាប់តាំងពីចូលដល់ខែ ទុតិយាសាឍ ឬ ខែកក្កដានេះមក ការលក់ដូរសម្ភារៈគ្រឿងបូជាថ្វាយចំពោះព្រះពុទ្ធសាសនា ក្នុងឆ្នាំនេះ លក់ដាច់ជាងឆ្នាំមុនៗ លោកពូរំពឹងថា ឆ្នាំនេះ លោកអាចលក់ទៀនព្រះវស្សា ឬ សំពត់សាដក បានពី៧០០ទៅ១០០០គូរ លើសពីឆ្នាំ មុនៗ។
លោកពូបញ្ជាក់ថា ភាគច្រើន អ្នកទិញទៀនព្រះវស្សា ពួកគាត់តែងតែទិញ សំពត់សាដក ភ្ជាប់ជាមួយ ហើយម្នាក់ចូលមកទិញ មានអ្នកខ្លះទិញមួយគូរ ហើយក៏មានអ្នកខ្លះទៀត ទិញច្រើនគូរផងដែរ។ ដែលទៀនមួយគូរៗ មានតម្លៃចាប់ពី៣០ដុល្លាររហូតដល់ទៅ១៥០ដុល្លារ ទៅតាមប្រភេទ និងទំហំរបស់ទៀន។ ហើយលក់ដាច់ជាងគេគឺទៀនដែលផលិតនៅក្នុងស្រុក មានទំហំចាប់ពី៨តឹក ដល់១ម៉ែត្រ៦០។
តាមទំនៀម ជាប្រពៃណី នៃព្រះពុទ្ធសាសនា ព្រះសង្ឃ គ្រប់អារាម ក្នុងព្រះរាជាណាចក្រកម្ពុជា ត្រូវនិមន្តចូលកាន់ព្រះវស្សា អស់ថេរវេលា៣ខែ ចាប់តាំងពីថ្ងៃ ១រោជ ទុតិយាសាឍ រហូតដល់ ថ្ងៃ ១៥កើត ខែអស្សុជ ទៅតាមព្រះបរមសាស្ត្រា នៃយើង ទ្រង់បានបញ្ញត្តិ ឲ្យមានកិច្ចចូលព្រះវស្សា។ ប៉ុន្តែសព្វថ្ងៃ នៅ កម្ពុជា ការចូលព្រះវស្សា មានកណត់ត្រឹមតែ៣ខែ។ ក្នុងរយៈវេលា៣ខែនេះ នៅគ្រប់ព្រះវិហារ នៃ ទីវត្តទាំងឡាយ គេតែងរក្សាភ្លើងទៀន ព្រះវស្សាឲ្យនៅឆេះជានិច្ច លើកលែងតែស្រុកទេស មានគ្រោះមហន្តរាយ ណាមួយកើតឡើង។
បើតាម ព្រះញាណវិសុទ្ធិវង្ស សាត វិបុល ព្រះរាជាគណៈថ្នាក់ចត្វា ព្រឹទ្ធបុរសរងពុទ្ធិកសាកលវិទ្យា ល័យព្រះសីហនុរាជ ព្រះចៅអធិការវត្ត ជេដ្ឋាឧត្តម បានមានថេរដិការឱ្យដឹងថា បុណ្យចូលព្រះវស្សាក៏ជាបុណ្យដ៏ធំមួយ ដែលអាចចាត់ទុកថា ជាបុណ្យដែលមានសារៈសំខាន់នៅក្នុងចំណោមបុណ្យផ្សេងៗ នៅក្នុងព្រះពុទ្ធសាសនា។ ជារៀងរាល់ឆ្នាំ នៅពេលដល់ថ្ងៃខែ ដែលត្រូវប្រារឰពីធីបុណ្យចូលព្រះវស្សា ប្រជាពលរដ្ឋ ដែលជាអ្នកកាន់ព្រះពុទ្ធសាសនា ក៏បាននាំគ្នាជ្រះថ្លារៀបចំគ្រឿងសក្ការៈ និងគ្រឿងឧបភោគបរិភោគ ផ្សេងៗ សម្រាប់ឧបត្ថម្ភ ដល់ភិក្ខុសង្ឃឆាន់ និង ប្រើប្រាស់ក្នុងរដូវកាលចូលកាន់ព្រះវស្សា។
ព្រះញាណវិសុទ្ធិវង្សបន្ថែមថា ចំណែកឯទាយក ទាយិកា ឧបាសក ឧបាសិកា ជាពុទ្ធសាសនិក ចំណុះជើងវត្តនីមួយៗ ក្រោមការដឹកនាំរបស់លោកអាចារ្យវត្តក៏ប្រារព្ធ ធ្វើបុណ្យចូលវស្សា ឬ កាន់វស្សានោះផងដែរ ជាពិសេស គឺចាត់ចែងវស្សិកសាដក (សំពត់ សំរាប់ងូតទឹកភ្លៀង) ដែលនិយមហៅថា សំពត់សាដក ចំណាំវស្សា ព្រមទាំងប្រេងកាត ទៀន ធូប និងភេសជ្ជៈមួយចំនួនទៀតតាមលទ្ធភាព៕
កំពង់ស្ពឺ ៖ ថ្ងៃទី១៨ ខែកក្កដា ឆ្នាំ២០១៨ លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានអញ្ជើញបន្តចុះពិនិត្យស្ថានភាពជំនន់ទឹកភ្លៀងស្ថិតនៅឃុំព្រៃរំដួលនិងឃុំតាំងខ្យាស្រុកភ្នំស្រួចដែលមានកម្ពស់ទឹកជន់លិចកើនឡើងរហូតកម្ពស់១ម៉ែត្រ ។
លោក វ៉ី សំណាង បានអោយកម្លាំងមានសមត្ថកិច្ច អាជ្ញាស្រុក ត្រូវត្រៀម និងយកចិត្តទុកដាក់លើមុខសញ្ញា ដែលងាយរងគ្រោះដូចជា៖ កុមារតូចៗ, ចាស់ជរា, ជនពិការជាដើម ក្នុងការត្រៀមបម្រុងរកទីទួលសុវត្ថិភាពជូនប្រជាពលរដ្ឋ។
លោក វ៉ី សំណាង បានប្រាប់ប្រជាពលរដ្ឋថាអាជ្ញាធរខេត្ត អាជ្ញាធរស្រុក ឃុំ សង្កាត់ បាននិងកំពុងយកចិត្តទុកដាក់បំផុតចំពោះសុវត្ថិភាពរបស់បងប្អូន ហើយក៏បានត្រៀមវិធានការដោះស្រាយ ទប់ស្កាត់ ចំពោះគ្រោះធម្មជាតិមួយនេះហើយ ដើម្បីដោះស្រាយអោយបានទាន់ពេលវេលា ។
ជាមួយគ្នានេះដែលឯកឧត្តម ក៏បានផ្តាំផ្ញើ ដល់បងប្អូនត្រូវប្រុងប្រយ័ត្នពីបញ្ហាសុខភាព ដោយហូបស្អាត ផឹកស្អាត រស់នៅស្អាត ជាពិសេស ត្រូវប្រុងប្រយ័ត្នចំពោះមនុស្សចាស់ ក្មេងតូចៗ នៅពេលមានខ្យល់ ឬ ភ្លៀង ហាមជ្រកក្រោមដើមឈើ និងប្រយ័ត្នចំពោះពពួកសត្វមានពិសជាដើម។
លោកបានបញ្ជាក់ថាថ្មីៗនេះដោយសារតែមានភ្លៀងធ្លាក់ជាបន្តបន្ទាប់នៅក្នុងស្រុកភ្នំស្រួចទាំងមូលដែលជាហេតុបង្កអោយមានទឹកជំនន់ ក្នុងឃុំចំនួន០៧ ក្នុងស្រុកភ្នំស្រួច (ឃុំ ក្រាំងដីវ៉ាយ ត្រែងត្រយឹង តាំងស្យា តាំងសំរោង ដំបូករូង ព្រៃរំដួលនិង ឃុំចំបក់) ស្មើនឹង២៣ភូមិ ក្នុងនោះបណ្តាលអោយលិចដល់ផ្ទះរបស់ប្រជាពលរដ្ឋ ចំនួន០៨ ភូមិ និងបណ្តាលអោយមានផលប៉ះពាល់ដូចខាងក្រោម៖
– លិចដំណាំស្រូវសរុបចំនួន ៤៩០,៥ ហិកតា
– ចំការស្វាយសរុបចំនួន ២៥២ ហិចតា
– ដំណាំរួមផ្សំសរុបចំនួន១៥ហិចតា
– ច្រោះផ្លូវសរុបចំនួន ១៤កន្លែង ស្មើនឹង១៣៣៥ម៉ែត្រ
– ដាច់ផ្លូវចំនួន១៣ កន្លែង ស្មើនឹង៧០ ម៉ែត្រ
– បាត់សត្វគោរបស់ប្រជាពលរដ្ឋចំនួន០៧ ក្បាលមិនទាន់រកឃើញនោះទេ៕
កំពង់ស្ពឺ ៖ យ៉ាងហោសណាស់ក៏មានកម្មករកម្មការិនីរោងចក្របានរងរបួសធ្ងន់ស្រាលជាង៣០នាក់ខណៈដែលជិះរថយន្តត្រឡប់មកផ្ទះហើយតៃកុងរថយន្តបើកលឿនវ៉ាជែងគេឯងបណ្តាលអោយក្រឡាប់រងរបួសរណូករណែល កាលពីវេលាម៉ោង០៤និង៣០នាទីរសៀលថ្ងៃទី១៨ ខែកក្កដា ឆ្នាំ២០១៨នៅលើផ្លូវលំភូមិពោធិថ្មី ឃុំដំណាក់រាំង ស្រុកឧដុង្គ ខេត្តកំពង់ស្ពឺ។តាមសម្តីរបស់មន្ត្រីនគរបាលស្រុកឧដុង្គបាននិយាយអោយដឹងថាមានករណីរថយន្តដឹកកម្មករក្រឡាប់នៅចំណុចភូមិពោធិថ្មី ឃុំដំណាក់រាំង មុខខ្លោងទ្វារចូលបន្ទាយសាលាជើងគោកបណ្តាលអោយរងរបួសរណូករណែល ក្រោយកើតហេតុអ្នកបើកបររថយន្តបានទុករថយន្តចោលរត់គេចខ្លួនបាត់ស្រមោល។
នគរបាលបន្តថារថយន្តម៉ាក ម៉ាសស្ដា ផលិតនៅប្រទេស(កូរ៉េ)ពណ៌ផ្ទៃមេឃ ពាក់ស្លាកលេខគ7187ភព2បើកបរដោយឈ្មោះដួង គឹមតុងភេទប្រុសអាយុ៣៣ឆ្នាំមុខរបរបើកបររថយន្តដឹកកម្មកររោងចក្ររស់នៅក្នុងភូមិពោធិថ្មី ឃុំដំណាក់រាំង ស្រុកឧដុង្គ ខេត្តកំពង់ស្ពឺ។ នគរបាលបានបន្ថែមថាបន្ទាប់ពីតៃកុងបើកបរក្នុងល្បឿនលឿនរួចមកដោយធ្វើដំណើរតាមបណ្តោយផ្លូវលំ ស្របទិសគ្នាពីទិសខាងត្បូងទៅទិសខាងជើង
រថយន្តដឹកកម្មករធ្វើដំណើរពីត្បូងទៅជើងដល់ចំណុចកើតហេតុបានវ៉ាជែង រថយន្តមួយគ្រឿងទៀតមិនផុតក៏បាន ប៉ះរថយន្តមួយគ្រឿងបណ្ដាលអោយក្រឡាប់ផ្អៀងមួយចំហៀងរថយន្តប្រភេទកូរ៉េម៉ាកហ៊ីយ៉ាន់ដាយពណ៌ខៀវលាយសគ្មានស្លាក
លេខអ្នកបើបររថយន្ត បានរត់គេចខ្លួនបាត់ស្រមោល។
នគរបាលនិយាយអោយដឹងថា រថយន្តក្រឡាប់ខាងលើមានដឹកកម្មករចំនួន៣៥នាក់ក្នុងនោះ ស្រីចំនួន៣០នាក់ ប្រុសចំនួន០៥នាក់។ក្រោយកើតហេតុមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចហៅរថយន្តសាមុយដឹកអ្នករងរបួសយកទៅសង្គ្រោះភ្លាមៗផងដែរ។
ចំណែករថយន្តដែលរងការខូចខាតនោះត្រូវបាននគរបាលជំនាញអូសយកទៅរក្សាទុកនៅអធិការដ្ឋាននគរបាលស្រុកឧដុង្គរង់ចាំម្ចាស់ចូលខ្លួនមកដោះស្រាយនៅពេលក្រោយ។សូមបញ្ជាក់អ្នករងរបួសមិនទាន់ដឹងចំនួននៅឡើយទេ និងមិនទាន់ស្គាល់ឈ្មោះផងដែរ៕
ភ្នំពេញ ៖ ទន្ទឹមនឹងកំណើននៃការនាំចេញផលិតផលសម្លៀកបំពាក់ និងស្បែកជើងទៅដល់៤ពាន់លានដុល្លារនៅឆមាសទី១ឆ្នាំ២០១៨ ក៏វិស័យកាត់ដេរសម្លៀកបំពាក់ និងស្បែកជើង បន្តមានបញ្ហាប្រឈមលើការរក្សាភាពប្រកួតប្រជែងជាមួយប្រទេសក្នុងតំបន់ ដែលមានវៀតណាម បង់ក្លាដែស និងមីយ៉ាន់ម៉ា។
យោងតាមរបាយការណ៍បញ្ជាក់ថា ការនាំចេញផលិតផលកាត់ដេរសម្លៀកបំពាក់ និងស្បែកជើង ក្នុងរយៈពេល៦ខែ ឆ្នាំ២០១៨នេះ មានកំណើនប្រមាណ១១,១ភាគរយ ខ្ពស់ជាងឆមាសទី១ ឆ្នាំ២០១៧ ដែលមានត្រឹមតែ៧ភាគរយ។ នេះបើតាមរបាយការណ៍ឆមាសទី១របស់ធនាគារជាតិកម្ពុជា។
របាយការណ៍ដដែលបង្ហាញថា វិស័យឧហស្សាហកម្ម ជាពិសេសវិ បើតាមធនាគារជាតិកម្ពុជា បញ្ហាប្រឈមនោះ ក៏រួមមានការកើនឡើង យ៉ាងឆាប់រហ័សនៃប្រាក់ឈ្នួលអប្បបរមាក្នុងវិស័យកាត់ដេរនៅកម្ពុជា ដែលបានកើនឡើងពី១៥៣ដុល្លារអាមេរិក នៅឆ្នាំ២០១៧ ដល់១៧០ដុល្លារក្នុងមួយខែ ក្នុងឆ្នាំ២០១៨នេះ។
គួរជម្រាបជូនថា របាយការណ៍របស់ក្រសួងការងារឆ្នាំ២០១៧ បង្ហាញថា កម្ពុជាបាននាំចេញផលិតផលវាយនភណ្ឌ សម្លៀកបំពាក់ និងស្បែកជើង ទៅកាន់ទីផ្សារអន្ដរជាតិប្រមាណ៧ពាន់៦រយលានដុល្លារសហរដ្ឋអាមេរិក ក្នុងនោះ សហរដ្ឋអាមេរិក និងអឺរ៉ុប គឺជាទីផ្សារនាំចូលធំជាងគេពីប្រទេសកម្ពុជា ក្នុងវិស័យវាយនភណ្ឌកាត់ដេរសម្លៀកបំពាក់ និងស្បែកជើង៕
ភ្នំពេញ ៖ ក្រសួងធនធានទឹកនិងឧតុនិយម នៅថ្ងៃទី១៨ខែកក្កដានេះ បានចេញសេចក្តីជូនដំណឹង ស្តីពី ស្ថានភាព និងឥទ្ធិពលរបស់ព្យុះទី ៩ ឈ្មោះ សុនទីញ (SON-TINH) បាននិងកំពុងស្ថិតនៅភាគខាងកើតកោះហៃណាំ។ ព្យុះនេះ នឹងធ្វើដំណើរកាត់កោះហៃណាំ រួចទៅដល់ឆ្នេរតុងកឹង ប្រទេសវៀតណាម នៅយប់ថ្ងៃទី១៩ ខែកក្កដា ឆ្នាំ២០១៨៕
ភ្នំពេញ ៖ ប្រជាពលរដ្ឋដែលធ្វើដំណើរតាមរថយន្តក្រុងទាំងអស់ បានទៅដល់គោលដៅដោយសុវត្ថិភាព និងផាសុខភាព រួមទាំងការប្រើប្រាស់សេវាអ៊ិនធឺណែត (Wifi) ដោយឥតគិតថ្លៃ ដែលមានលេខសម្ងាត់ “ppcitybus ” ។ នេះបើតាមការជូនដំណឹងរបស់រដ្ឋាករស្វយ័តដឹកជញ្ជូនសាធារណៈរាជធានីភ្នំពេញ។
បើតាមរដ្ឋាករស្វយ័តដឹកជញ្ជូនសាធារណៈរថយន្តក្រុង នៅថ្ងៃទី១៨ ខែកក្កដា ឆ្នាំ២០១៨ នេះ បានជូនដំណឹងដល់ប្រជាពលរដ្ឋ ជាពិសេសអ្នកជិះរថយន្តក្រុងសាធារណៈឲ្យបានជ្រាបថា រដ្ឋាករស្វយ័តដឹកជញ្ជូនសាធារណៈរថយន្តក្រុង សហការជាមួយក្រុមហ៊ុន Space Media នឹងតភ្ជាប់ Wifi នៅលើរថយន្តក្រុងទាំងអស់ ដោយអាចប្រើប្រាស់បានដោយសេរី៕
ខេត្តព្រះសីហនុ៖ សកម្មភាពលក់ដូរផលនេសាទសមុទ្រជាមូលដ្ឋាននេះ គឺមានដំណើរការជាធម្មតា បើទោះបីស្ថានភាពធាតុអាកាសមិនសូវអំណោយផល ដោយមានភ្លៀង និងខ្យល់ព្យុះបោកបក់ខ្លាំងបែបណាក្តី។
ងាកមកអាជីវករផ្សារលើបានឲ្យដឹងថា ត្រី ក្តាម មឹក និងបង្គាជាដើម មានលក់ជាធម្មតានៅលើទីផ្សារ ខេត្តព្រះសីហនុ។ នេះបើតាមការឲ្យដឹងរបស់អ្នកគ្រប់គ្រងផ្សារលើ ក្រុងព្រះសីហនុ នៅថ្ងៃ១៨ ខែកក្កដា ឆ្នាំ២០១៨។
អ្នកនេសាទសមុទ្រមួយចំនួន ក៏បានឲ្យដឹងស្រដៀងគ្នាដែរថា រាល់ថ្ងៃនេះ ទូកនេសាទបានចេញនេសាទជាធម្មតា ព្រោះមិនមានខ្យល់កន្ត្រាក់ ឬខ្យល់ព្យុះកើតឡើងធំដុំទេ៕
យ៉ាងនេះក្តី សេចក្តីជូនដំណឹង របស់ក្រសួងធនធានទឹក និងឧត្តុនិយម បានរំលឹកដល់បងប្អូនប្រជានេសាទសមុទ្រ ឲ្យបង្កើនការប្រុងប្រយ័ត្ន ពេលចេញធ្វើរបរនេសាទសមុទ្រ ជាពិសេសត្រូវមានឧបករណ៍សង្គ្រោះបឋម ដាក់តាមទូកជាប្រចាំ ដើម្បីការពារខ្លាចមានគ្រោះថ្នាក់ផ្សេងៗកើតឡើងជាយថាហេតុ។
ទាក់ទិនបញ្ហាអាកាសធាតុនេះដែរ សមត្ថកិច្ចនគរបាលខេត្តព្រះសីហនុ បានឲ្យដឹងថា សប្តាហ៍កន្លងទៅនេះ មានកម្មករនេសាទម្នាក់ រស់នៅស្រុកស្ទឹងហាវ បានធ្លាក់ទឹកស្លាប់ពេលចេញធ្វើនេសាទ និងមានទូកនេសាទ១គ្រឿងទៀត បានលិចនៅក្នុងលំហសមុទ្រ ប៉ុន្តែអ្នកនេសាទចំនួន៣នាក់ ដែលនៅលើទូកនេសាទនោះ ត្រូវបានទូកនេសាទដូចគ្នាជួយសង្គ្រោះទាន់ពេលវេលា៕
ជប៉ុន ៖ ប្រព័ន្ធផ្សព្វផ្សាយបានរាយការណ៍ថា រលកកម្តៅ ខ្លាំង បានសំលាប់មនុស្សយ៉ាងតិច 14 នាក់ ក្នុងរយៈពេល 3 ថ្ងៃ ចុងសប្តាហ៍មុន នៅប្រទេសជប៉ុន។
សីតុណ្ហភាពខ្ពស់ បានរារាំងដល់ការស្តារឡើងវិញនៅតំបន់ដែលរងគ្រោះ ដោយទឹកជំនន់ ដែលសំលាប់មនុស្សជាង 200 នាក់ កាលពីសប្ដាហ៍មុន។យោងតាមរបាយការណ៍ របស់ប្រព័ន្ធផ្សព្វផ្សាយបានរាយការណ៍ថា យ៉ាងហោចណាស់ មនុស្ស 14 នាក់ បានស្លាប់ ដោយសារកំដៅកើនឡើងខ្លាំង ក្នុងនោះ ស្ត្រីអាយុ 90 ឆ្នាំម្នាក់ ដែលត្រូវបានគេរកឃើញថា បានសន្លប់នៅ វាលស្រែ ហើយ មនុស្ស រាប់ពាន់នាក់ផ្សេងទៀត កំពុងព្យាបាលនៅក្នុងមន្ទីរពេទ្យ សម្រាប់លក្ខខណ្ឌទាក់ទងនឹងកំដៅ។
កំដៅខ្លាំងបំផុត នៅក្នុងតំបន់ជាប់សមុទ្រ ដូចជាខេត្ត ហ្គីហ្វូ ដែលបានឡើងដល់ 39.3 អង្សាសេ ដែលជាចំណុចក្តៅបំផុតនៅក្នុងប្រទេស។ ចំណែកទីក្រុងតូក្យូ ត្រូវបានកត់ត្រាពីកម្រិតកំដៅខ្ពស់ 34 អង្សាសេ។
សីតុណ្ហភាពនៅក្នុងផ្នែកខ្លះ នៃភាគខាងលិចប្រទេសជប៉ុន ដែលត្រូវបានវាយប្រហារ ដោយទឹកជំនន់ មានកំដៅកើនឡើងដល់ 34.3 អង្សាសេ ដោយបង្កើតឱ្យមានស្ថានភាពគ្រោះថ្នាក់ដល់បុគ្គលិកយោធា និងអ្នកស្ម័គ្រចិត្ត ដែលសំអាតភក់ និងកម្ទេចកម្ទីនៅទីនោះ៕
ថៃ ៖ ឧទ្ធម្ភាគចក្រស៊ីវិល មួយគ្រឿង បានធ្លាក់លើវាលស្រែ ដោយបានសម្លាប់មនុស្ស៣ នាក់នៅលើយន្តហោះនៅប៉ែកឥសានប្រទេសថៃនៅថ្ងៃពុធនេះ។ យោងតាមនាយកព្រលានយន្តហោះខុនកេន បានឲ្យដឹងថា ឧទ្ធម្ភាគចក្រ AS355 បាន ធ្លាក់មកលើដីវាលស្រែ ក្នុងស្រុកចុនណាបុត នៃខេត្តខុនកេន មានចម្ងាយប្រមាណ ៤៥០គីឡូម៉ែត្រ ប៉ែកឥសានទីក្រុងបាងកក ដោយបានសម្លាប់មនុស្ស៣នាក់ មិនទាន់ ស្គាល់អត្តសញ្ញាណ។ ឧទ្ធម្ភាគចក្រព័រណ៌ស ជួបឧបត្តិហេតុ ត្រូវបានឆាបឆេះភ្លាមៗ បន្ទាប់ពីធ្លាក់នៅវាលស្រែ។
នាយកព្រលានយន្តហោះនិយាយថា ក្នុងស្ថានភាពមើល មិន ឃើញ និងមានភ្លៀងធ្លាក់ខ្លាំង ត្រូវបានគេជឿថា ជាមូលហេតុ នៃការធ្លាក់ឧទ្ធម្ភាគចក្រ បណ្តាលឲ្យមានមនុស្សស្លាប់។ អាជ្ញាធរកំពុងបើកប្រតិបត្តិការស៊ើបអង្កេត ពីមូលហេតុ ច្បាស់លាស់ នៃការធ្លាក់នេះ៕
មីយ៉ាន់ម៉ា ៖ សារព័ត៌មានប្រចាំថ្ងៃ 7Day Daily បានរាយការណ៏ថា ក្រុមហ៊ុនអាកាសចរណ៏ក្នុងស្រុក ចំនួន២ គឺក្រុមហ៊ុន អាកាសចរណ៏ បាហ្គាន អេផិច បានបញ្ឈប់ប្រតិបត្តិការរបស់ខ្លួន ដោយប្រគល់អាជ្ញាប័ណ្ណប្រតិបត្តិករអាការចរណ៏ ទៅឲ្យអាជ្ញាធរ កាលពីពេលថ្មីៗនេះ។
ដោយមានការខ្វះយន្តហោះ និងការខាតបង់ផ្នែកសេដ្ឋកិច្ច បានបង្ខំឲ្យក្រុមហ៊ុនអាកាស ចរណ៏ក្នុងស្រុមទាំងពីរនេះបញ្ឈប់ប្រតិបត្តិការរបស់ពួកគេ។
ដោយអនុលោមតាម សកម្មភាពអាកាសចរណ៏ ប្រទេសមីយ៉ាន់ម៉ា ក្រុមហ៊ុនអាកាស ចរណ៏ ទាំងពីរ និងត្រូវបានបានអុញ្ញាតិអនុវត្តន៏អាជ្ញាប័ណ្ណប្រតិបត្តិករវិញ នៅពេលក្រុម ហ៊ុន មាន យន្តហោះគ្រប់គ្រាន់ដើម្បីបន្តជើងហោះហើរ។
ក្រុមហ៊ុនអាកាសចរណ៏ អ៊ែរបាហ្គាន បានចាប់ផ្តើមសេវាកម្មរបស់ខ្លួនក្នុងផ្លូវហោះហើរក្នុងស្រុកចំនួន២០ ក្នុងឆ្នាំ ២០១២ ហើយក្រុមហ៊ុន អេផិចអ៊ែរឡាញ បានចាប់ផ្តើមដំណើរការផ្លូវហោះហើរក្នុងស្រុក ចំនួន៥ ក្នុងឆ្នាំ២០១៥។ ជាមួយគ្នានេះដែរ ក្រុមហ៊ុនអាកាសចរណ៏ FMI Air ជាជើងហោះ ហើរក្នុងស្រុកដែរនោះ ក៏មានផែនការបញ្ឈប់ការលក់សំបុត្រយន្តហោះ ដោយមិនដឹងពី ហេតុផល ចាប់ពីថ្ងៃទី២០ ខែកក្កដានេះ។
មានក្រុមហ៊ុនអាកាសចរណ៏ក្នុងស្រុកចំនួន១០ ដែលមានយន្តហោះចំនួនប្រមាណ៤០ ដំណើរការនៅក្នុងប្រទេសមីយ៉ាន់ម៉ា៕
ភ្នំពេញ ៖ តំបន់មួយចំនួនក្នុងខេត្តចំនួន៥ របស់ប្រទេសកម្ពុជា គឺខេត្តព្រះសីហនុ ខេត្តកំពង់ស្ពឺ ខេត្តកំពត ខេត្តកោះកុង និងខេត្តបាត់ដំបង កំពុងរងការគមរាមកំហែងដោយជំនន់ទឹកភ្លៀង ហើយបង្កឲ្យមានផលប៉ះពាល់គួរឲ្យកត់សម្គាល់។
យោងតាមសេចក្តីរាយការណ៍បានឲ្យដឹងថា ក្នុងចំនួនដែលប្រឈមខ្លាំងជាងគេ គឺកោះកុង ស្រុកចំនួន៤ នៃខេត្តជាប់មាត់សមុទ្រមួយនេះ រួមមាន ស្រុកថ្មបាំង ស្រុកកោះកុង ស្រុកស្រែអំបិល និងស្រុកមណ្ឌលសីមា ត្រូវជំនន់ទឹកភ្លៀងជន់លិច ខ្លាំងអស់រយៈពេលជាង៣ថ្ងៃមកហើយ។ ក្នុងនោះប្រជាពលរដ្ឋាជាង៣០០គ្រួសារ នៅក្នុងស្រុកទាំងនេះ ត្រូវបានជន្លៀស ទៅកាន់ទីទួលសុវត្ថិភាព។
លោក កែវ វី នាយកខុទ្ទកាល័យ និងជាអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់ថា ដូចគ្នាដែរ នៅខេត្តកំពង់ស្ពឺ នៅមិនទាន់មានផលប៉ះពាល់ខ្លាំងនៅឡើយ ខណៈខេត្តមួយនេះ មានទំនប់ និងទ្វារទឹកជាច្រើន ដើម្បីដោះស្រាយបញ្ហាទឹក ហើយពេលនេះទើបតែបើកទ្វារទឹកចំនួន ២ប៉ុណ្ណោះ។
ទោះយ៉ាងណា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បញ្ជាក់ថា មកទល់ពេលនេះ នៅមិនទាន់មានរបាយការណ៍រួមជាក់លាក់ ស្តីពីទំហំនៃការខូចខាត ដែលបណ្តាលមកពីជំនន់ទឹកភ្លៀងនៅឡើយទេ៕
អាហ្វ្រិក ៖ ប្រទេសចិន ជាប្រទេសអភិវឌ្ឍន៍ខ្លាំងបំផុតលើពិភពលោក និង អាហ្វ្រិក ជាទ្វិបមួយ មាន ចំនួនប្រទេសកំពុងអភិវឌ្ឍន៏ ដែលពេលនេះមានទំនាក់ទំនងកាន់តែជិតស្និត ។ កាល ពី៥ឆ្នាំមុន បែបផែនថ្មី នៃដៃគូជាយុទ្ធសាស្ត្រ រវាងប្រទេសចិន និងអាហ្វ្រិក បាននិងកំពុង ធ្វើឲ្យកាន់តែស៊ីជម្រៅ ចាប់ពីសេដ្ឋកិច្ច និងពាណិជ្ជកម្ម រហូតដល់ ការផ្លាស់ប្តូរ វប្បធម៌ និងចាប់ពីកំរិតរដ្ឋាភិបាល ដល់វិស័យឯកជន។ គំរោងជាបន្តបន្ទាប់ ទាក់ទងទៅនឹង សុខមាលភាព និងការរស់នៅរបស់ប្រជាជន និងអគារវប្បធម៌ បានបង្ហាញពីភាពរីកចំរើន ដែល ធ្វើឡើងក្នុងកិច្ចសហប្រតិបត្តិការជាមិត្តភាព រវាងចិន និងអាហ្វ្រិក។
ប្រធានាធិបតី ចិន លោក ហ្សីជីនពីង បានធ្វើដមណើរទស្សនកិច្ចចំនួន៣លើក ទោកាន់ទ្វិបអាហ្វ្រិកកាល ពី៥ឆ្នាំកន្លងទៅ ក្នុងកិច្ចប្រឹងប្រែងក៏សាង សហគមន៏ នៃវាសនានិងផលប្រយោជន៏ តែមួយ និងបានជម្រុញទឹកចិត្តគ្នាក្នុងការអភិវឌ្ឍន៏ ទំនាក់ទំនង ចិន អាហ្វ្រិក។ ក្នុងខែកក្កដាឆ្នាំ២០១៨នេះ ប្រធានាធិបតីចិន លោក ហ្សី ជិនពីង និងធ្វើដំណើរមកកាន់ ទឹកដីនៃទ្វិបអាហ្វ្រិកម្តងទៀត ដែលជាការបើកទំព័រថ្មី សំរាប់ការសម្របសម្រួល នៃក្តី សុបិន្ត ចិន និងអាហ្វ្រិក៕
ចិន ៖ យោងតាមអាជ្ញាធរឧតុនិយមក្នុងតំបន់បានឲ្យដឹងថា ព្យុះទីហ្វុងទី៩ នៅឆ្នាំនេះ ឈ្មោះ សុនទិញ បានធ្វើឲ្យមានការបាក់ដី នៅថ្ងៃពុធនេះ ក្នុងក្រុងវ៉ាននីង ខេត្តហេណាន ប្រទេសចិនភាគខាងត្បូង ដោយនាំមកនូវសន្ទុះខ្យល់ រហូតដល់ ២៣ម៉ែត្រក្នុងមួយវិនាទី។
ភ្លៀងធ្លាក់ខ្លាំង និងព្យុះទីហ្វុង បានបក់បោកមកលើក្រុង វ៉ាននីង ប៉ុន្តែ វាមិនមែន ស្ថិតក្នុងម៉ោងដែលមានមនុស្សធ្វើដំណើរច្រើន នោះទេ ខណៈវាវាយប្រហាខេត្តដីកោះ មួយនេះ។ ជាមួយគ្នានេះដែរចរាចរណ៏ក្នុងតំបន់ត្រូវបានកាត់ផ្តាច់នៅតាមដងផ្លូវមួយ ចំនួន។
ទោះជាយ៉ាងណា ការព្រួយបារម្ភពីសុវត្ថិភាព សេវានាវាចម្លងអ្នកដំណើរ រវាង កោះហេណាននិងខេត្តហ្គាងដុង ត្រូវបានផ្អាកចាប់តាំងពីរសៀលថ្ងៃអង្គារម្សិលមិញ ហើយរថភ្លើងដឹកអ្នកដំណើរ នៅជុំវិញកោះ ក៏ត្រូវបានផ្អាកផងដែរ។
យោងតាមអាជ្ញាធរ ឧត្តុងនិយម បានឲ្យដឹងថា ព្យុះទីហ្វុង សុន ទីញ ដែលកំពុងធ្វើដំណើរឆ្ពោះទៅ ភាគខាង លិចយ៉ាងលឿន ទៅកាន់ ឈូងសមុទ្របេប៊ូ នៅប៉ែកពាយព្យសមុទ្រចិនខាងត្បូង ប៉ុន្តែ មិនបានធ្វើឲ្យប៉ះពាល់ខ្លាំងដល់ខេត្តឡើយ គ្រាន់តែបង្ករឲ្យមានសីតុណ្ហភាព ធ្លាក់ចុះ ប៉ុណ្ណោះ៕
ជប៉ុន ៖ ចំពេលមានការព្រួយបារម្ភអំពីសង្គ្រាមពាណិជ្ជកម្ម ប្រទេសជប៉ុន និងសហភាពអឺរ៉ុបបាន ចុះហត្ថលេខាលើកិច្ចព្រមព្រៀងពាណិជ្ជកម្មសេរីមួយ នៅកិច្ចប្រជុំកំពូល នៅទីក្រុងតូក្យូ នៅក្នុងអ្វី ដែលប្រទេសទាំងពីរ បានមើលឃើញថាជាការជុំរុញ ប្រឆាំងនឹងសហរដ្ឋអាមេរិកចំពោះការការពារនិយម ក្រោមការដឹកនាំរបស់លោក ដូណាល់ ត្រាំ។
ប្រធានក្រុមប្រឹក្សាអឺរ៉ុប លោកដូណាល់ធូស Donald Tusk និងលោកហ្សង់ក្លៅចាំងឃឺ Jean-Claude Juncker ប្រធានគណៈកម្មការអឺរ៉ុបបាន ជួបសន្ទនាជាមួយនាយករដ្ឋមន្ត្រីជប៉ុន លោកស៊ីនហ្សូ អាបេ ដើម្បី ចុះហត្ថលេខា លើកិច្ចព្រមព្រៀងនេះ បន្ទាប់ពីកិច្ចប្រជុំពេលមុន នៅទីក្រុងព្រូស៊ែល ប្រទេសប៊ែលហ្សីក ត្រូវបានពន្យារពេលកាលពីសប្តាហ៍មុនដោយសារទឹកជំនន់ នៅភាគខាងលិចប្រទេសជប៉ុន។
កិច្ចព្រមព្រៀង ដែលបានចុះហត្ថលេខានៅទីក្រុងតូក្យូ នឹងលុបចោលពន្ធគយស្ទើរតែទាំងអស់ ដោយបង្កើតទីផ្សារ សមរាប់មនុស្ស600 លាននាក់ ដែលផ្ទុយទៅនឹងរបៀបវារៈការការពារនិយម របស់ប្រធានាធិបតីសហរដ្ឋអាមេរិក លោក ដូណាល់ ត្រាំ។
ប្រទេសជប៉ុនក៏យល់ព្រមផងដែរ ក្នុងការអនុម័តស្តង់ដាររថយន្តអន្តរជាតិជាលើកដំបូង។
ប្រទេសជប៉ុន និងសហភាពអឺរ៉ុប បានចាប់ផ្តើមការចរចាទ្វេភាគីរបស់ខ្លួន នៅក្នុងឆ្នាំ 2013 ប៉ុន្តែបានកំពុងខិតខំប្រឹងប្រែង ដើម្បីសម្រេចបានការបំបែកភាពទ័លច្រកដ៏សំខាន់ នៅក្នុងវិស័យសំខាន់ៗដូចជាប្រទេសជប៉ុន បានទម្លាក់ពន្ធលើផលិតផលឈីស (cheese) និងស្រាអឺរ៉ុប ហើយអឺរ៉ុប ផ្តល់លទ្ធភាពកាន់តែច្រើន ដល់រថយន្តជប៉ុន និងគ្រឿងបន្លាស់រថយន្ត៕
ម៉ិកស៊ិកូ ៖ ប្រព័ន្ធផ្សព្វផ្សាយរដ្ឋ បានរាយការណ៍ថា មនុស្សជាង ១០នាក់ បានស្លាប់ នៅក្នុងតំបន់ អូហ្សាកា ភាគខាងត្បូង ប្រទេសម៉ិកស៊ិក លើជំលោះដីធ្លីរយះពេលជាច្រើនទស្សវតន៍ ជាមួយសហគមន៍ជិតខាង។
យោងទៅតាមការិយាល័យអគ្គមេធាវី ក្រុងអូហ្សាកា បានអោយដឹងថា មនុស្ស១៣នាក់ នៅក្នុង ទីក្រុង សាន់តា ម៉ារី ត្រូវបានសំលាប់ដោយប្រជាពលរដ្ឋ មកពីសហគមន៍ សាន់ លូកាស់។ ប្រភព័ត៌មានដដែល បានរាយការណ៍ថា ប្រជាពលរដ្ឋមក ទីក្រុងសាន់តា ម៉ារី បានធ្វើដំណើរ ទៅកាន់តំបន់ដីដែលមានជំលោះ នៅពេលមានការរាយការណ៍ថា ដីនោះត្រូវគេរំលោភយក។
ប៉ូលីសរដ្ឋ មកពីតំបន់ អូហ្សាកា ដែលទទួលខុសត្រូសំរាប់តំបន់មានភាពវិកវរនេះ នឹងធ្វើការ រៀបចំច្បាប់ និងសណ្តាប់ធ្នាប់ឡើងវិញ។
យោងទៅតាមប្រព័ន្ធផ្សព្វផ្សាយ បានអោយដឹងថា ទីក្រុង សាន់តា ម៉ារី មានជំលោះជាច្រើនករណី ជាមួយសហគមន៍ក្នុងតំបន់ លើតំបន់ព្រៃឈើក្នុងតំបន់៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
