All posts by មេគង្គ ប៉ុស្តិ៍

២នាក់ប្ដីប្រពន្ធជិះម៉ូតូបុកខឿនផ្លូវត្រូវរថយន្តធុនធំបើកថយក្រោយកិនថែម

June 7, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ បុរសនិងស្ត្រី២នាក់ប្ដីប្រពន្ធបានរងរបួសធ្ងន់ធ្ងរនិងត្រូវបានគេបញ្ជូនទៅកាន់មន្ទីរពេទ្យរុស្ស៊ីដើម្បីសង្គ្រោះបន្ទាន់ភ្លាមៗ ក្រោពេលដែលពួកគាត់ទាំង២នាក់ជិះម៉ូតូ១គ្រឿងឌុបគ្នាទៅធ្វើការរោងចក្រ ហើយជ្រុលទៅបុកខឿនផ្លូវបណ្ដាលឲ្យដួល ។ស្របពេលនោះមានរថយន្តធុនធំ១គ្រឿងម៉ាកហ៊ីណូដឹកទ្រុងមាន់បើករ៉ឺយែថយក្រោយកិនថែម បណ្ដាលឲ្យរងរបួសធ្ងន់តែម្ដង ចំណែកម៉ូតូបានស្ថិតនៅក្រោមរថយន្តរងការខូចខាតយ៉ាងដំណំ។

ហេតុការណ៍នោះបានកើតឡើងកាលពីវេលាម៉ោង៧ព្រឹក ថ្ងៃទី៧ ខែមិថុនា ឆ្នាំ២០១៨ នៅលើកំណាត់ផ្លូវ៥០ម៉ែត្រ សកថិតនៅក្នុងភូមិអន្លូងគងថ្មី សង្កាត់ព្រៃស ខណ្ឌដង្កោ ។

តាមប្រភពព័ត៌មានបានឲ្យដឹងថា ជនរងគ្រោះទាំង២នាក់ប្ដីប្រពន្ធនោះមិនទាន់ត្រូវបានស្គាល់ឈ្មោះនៅឡើយ។ នៅមុនពេលកើតហេតុពួកគាត់បានជិះម៉ូតូ១គ្រឿងម៉ាកយ៉ាម៉ាហាស៊ីរូសពណ៌ ខ្មៅលាយក្រហមពាក់ស្លាកលេខភ្នំពេញ1BC-1967 ក្នុងទិសដៅពីជើងទៅត្បូង។ក្នុងបំណងទៅធ្វើការរោងចក្រ លុះពេលទៅដល់ត្រង់ចំណុចកើតហេតុបានជ្រុលទៅបុកខឿនផ្លូវបណ្ដាលឲ្យដួល ស្របពេលនោះមានរថយន្តម៉ាកហ៊ីណូពណ៍ស ពាក់ស្លាកលេខកំពត3A-0729បើករ៉ឺយែថយក្រោយជ្រុលទៅកិនទើបបណ្ដាលឲ្យរងរបួសធ្ងន់ទាំង២នាក់ចំណែលម៉ូតូរងការខូចខាតយ៉ាងដំណំ។

ក្រោយពេលកើតហេតុជនរងគ្រោះត្រូវបានគេបញ្ជូនទៅកាន់មន្ទីរពេទ្រុស្ស៊ីយដើម្បីសង្គ្រោះបន្ទាន់ភ្លាមៗ ដោយឡែករថយន្តនិងម៉ូតូក្រោពីការវាស់វែងរួចនគរបាលចរាចរខណ្ឌដង្កោបាននាំយកទៅរក្សាទុករង់ចាំការដោះស្រាយគ្នានៅពេលក្រោយ៕

រដ្ឋសភាអនុម័តយល់ព្រមលើសេចក្តីព្រាងច្បាប់ស្តីពីប្រាក់ឈ្នួលអប្បបរមា

June 7, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ សម័យប្រជុំរដ្ឋសភាលើកទី១០ នីតិកាលទី៥ នាព្រឹកថ្ងៃទី៧ មិថុនា នេះក្រោមអធិបតីភាពដ៏ខ្ពង់ ខ្ពស់សម្តេចអគ្គមហាពញាចក្រី ហេង សំរិន ប្រធានរដ្ឋសភា ដែលមានសមាជិកសភាចូលរួមចំនួន ១០៨ រូប បានអនុម័តជាឯកច្ឆ័នទៅលើសេចក្តីព្រាងច្បាប់ស្តីពីប្រាក់ឈ្នួលអប្បបរមា ដែលមាន ៦ជំពូក ចែក ចេញជា ៣០មាត្រា ហើយតាមការគូសបញ្ជាក់របស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម អុិត សំហេង ថា សេចក្តីព្រាងច្បាប់មួយនេះធ្វើឡើងក្នុងគោលបំណងចំនួន ២គឺ៖ ទី១.លើក កម្ពស់ជីវភាពរស់នៅសមរម្យ ថ្លៃថ្នូរ បង្កើតឱកាសការងារ និងបង្កើនផលិតភាពរបស់កម្មករនិយោជិត និង ទី២.ជម្រុញអោយមានបរិយាកាសវិនិយោគ និងធុរកិច្ចកាន់តែល្អប្រសើរប្រកបដោយភាពទាក់ទាញ។

រដ្ឋសភា ដែលជាអ្នកពិនិត្យ និងអនុម័តលើសេចក្តីព្រាងច្បាប់ស្តីពីប្រាក់ឈ្នួលអប្បបរមានេះបាន បញ្ជាក់ថា សេចក្តីព្រាងច្បាប់នេះត្រូវបានរៀបចំឡើងស្របតាមស្ថានភាពនៃវឌ្ឍនភាពផ្នែកសេដ្ឋកិច្ចសង្គម និងស្ថិតក្នុងបរិបទ ដែលប្រទេសក្នុងតំបន់កំពុងមានការប្រកួតប្រជែងកាន់តែខ្លាំងក្នុងវិស័យពាណិជ្ជកម្ម អន្តរជាតិ ហើយថា ការគ្រប់គ្រងលើតម្លៃពលកម្មដ៏សមស្របមួយគឺជាចំណុចអាទិភាពដែលព្រះរាជាណា ចក្រកម្ពុជាតែងតែផ្តោតការយកចិត្តទុកដាក់ខ្លាំងបំផុត។ ក្នុងន័យនេះ ការពង្រឹងយន្តការកំណត់ប្រាក់ ឈ្នួលអប្បបរមា ពិតជាមានសារៈសំខាន់ ដើម្បីឆ្លើយតបទៅនឹងស្ថានភាពសេដ្ឋកិច្ច និងសង្គមរបស់ ប្រទេសជាតិ។

ចំណុចមួយ ក្នុងជំពូក២ នៃសេចក្តីព្រាងច្បាប់ស្តីពីប្រាក់ឈ្នួលអប្បបរមានេះបានចែងថា ប្រាក់ ឈ្នួល យ៉ាងតិចណាស់ក៏ត្រូវអោយស្មើនឹងប្រាក់ឈ្នួលអប្បបរមា ដែលជាប្រាក់ឈ្នួលកម្រិតទាបបំផុត ហើយចំណុចមួយ ក្នុងជំពូកទី៣ ចែងថា ប្រាក់ឈ្នួលអប្បបរមាត្រូវតែជាតួលេខ ឬអត្រាបម្រែបម្រួលដែល អាចព្យាករណ៍បាន ពោលគឺត្រូវកើនតាមលំដាប់បន្តបន្ទាប់។

សូមជម្រាបជូនថា៖ សម័យប្រជុំរដ្ឋសភាលើកទី១០ នីតិកាលទី៥ នាព្រឹកមិញនេះ ក្រៅពីបាន ពិភាក្សា និងអនុម័តលើសេចក្តីព្រាងច្បាប់ស្តីពីប្រាក់ឈ្នួលអប្បបរមាហើយនោះក៏បានពិភាក្សា និងអនុម័ត លើវិសោធនកម្មមាត្រាមួយចំនួននៃសេចក្តីព្រាងច្បាប់ស្តីពីការងារ និងច្បាប់ស្តីពីស្តង់ដាកម្ពុជាផងដែរ។

ឆ្នាំ២០១៨នេះ រាជរដ្ឋាភិបាលបានផ្តល់បុរេប្រទានថវិកាចំនួន ៤,៦លានដុល្លារអាមេរិក ដើម្បីដោះស្រាយ ករណីរោងចក្រ
(អត្ថបទៈចាន់ សុភឿន,រូបភាពៈហេង សុខន)
យោងតាមសេចក្តីថ្លែងហេតុនៃសេចក្តីព្រាងច្បាប់ស្តីពីការងារ ដែលបានដាក់ជូនសម័យប្រជុំរដ្ឋ សភាពិនិត្យ និងអនុម័តលើវិសោធនកម្មមួយចំនួននៃសេចក្តីព្រាងច្បាប់នេះបានលើកឡើងថា ក្នុងឆ្នាំ ២០១៨នេះ រាជរដ្ឋាភិបាលបានផ្តល់បុរេប្រទានថវិកាចំនួន ៤,៦លានដុល្លារអាមេរិក ដើម្បីដោះស្រាយ ករណីរោងចក្រចំនួន៩ នៅរាជធានីភ្នំពេញ ខេត្តកណ្តាល និងខេត្តកំពង់ស្ពឺ ដែលបានបិទទ្វារ ហើយធ្វើ អោយប៉ះពាល់ដល់កម្មករនិយោជិត ចំនួន ៤១៦៥នាក់ ដែលអន្តរាគមន៍នេះ មានគោលបំណងធានាការ ទទួលបានប្រាក់ឈ្នួល ប្រាក់បំណាច់បណ្តេញចេញ និងអត្ថប្រយោជន៍ផ្សេងៗ ដែលបានកំណត់នៅក្នុង ច្បាប់ស្តីពីការងារជូនបងប្អូនកម្មករនិយោជិតគ្រប់រូប។

ក្នុងសេចក្តីថ្លែងហេតុខាងលើនេះបានបញ្ជាក់ថា ស្ថិតក្នុងបរិបទនៃការអភិវឌ្ឍសេដ្ឋកិច្ចដ៏ឆាប់ រហ័ស វិស័យការងារត្រូវបានប្រឈមនឹងបញ្ហាមួយចំនួនដែលរាជរដ្ឋាភិបាលតែងតែបានចូលរួមអន្តរាគមន៍ ដោះស្រាយរាល់ការលំបាករបស់បងប្អូនកម្មករនិយោជិត ជាពិសេសក្នុងករណីរោងចក្រ សហគ្រាសបិទ ទ្វារ ដោយម្ចាស់រត់ចោល៕

សង្គមហ្វេសប៊ុកវាយប្រហារព្រោងព្រាត ក្រោយដោះលែងអន្ទិត ស្រិល វណ្ណា

June 6, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ប៉ោយប៉ែត ៖ បន្ទាប់ពីព្រះអនុគណក្រុងប៉ោយប៉ែតចាប់ផ្សឹកព្រះចៅអធិការវត្តភ្នំបាក់លើ ព្រះនាម ស្រិល វណ្ណាហៅ អៀម វណ្ណា និងត្រូវបាននាំខ្លួនទៅស្នងការដ្ឋាននគរបាលខេត្តដើម្បីការពារសុវត្ថិភាពបញ្ញចៀសហិង្សាបានប៉ុន្មានម៉ោងរួចមក សមត្ថកិច្ចបានអនុញ្ញាតឲ្យអន្ទិតរូបនេះបានវិលត្រឡប់ទៅផ្ទះវិញ នាវេលាម៉ោង ៣រសៀលថ្ងៃទី៥ ខែមិថុនា ឆ្នាំ២០១៨ ក្នុងថ្ងៃដែលបានចាប់ផ្សឹក។ ភ្លាមៗនោះ នៅលើបណ្តាញសង្គមហ្វេសប៊ុក គេឃើញមានការបង្ហោះព្រោងព្រាតពាក់ព័ន្ធនឹង រឿងនេះ ដែលភាគច្រើន ជាមតិរិះគន់។

លោក សិទ្ធ ឡោះ ស្នងការងរងនគរបាលខេត្តបន្ទាយមានជ័យបញ្ជាក់ថា ចៅអធិការវត្តភ្នំបាក់លើ និងជាអនុគណៈក្រុងសិរីសោភ័ណឈ្មោះ ស្រិល វណ្ណា ហៅ អៀម វណ្ណា ដែលកម្លាំងនគរបាលខេត្តបន្ទាយមានជ័យដឹកមកស្នងការនគរបាលខេត្តបន្ទាយមានជ័យ មិនមែនឃាត់ខ្លួននោះទេគឺដឹកគាត់ចេញពីហ្វូងមនុស្សដែលចង់ប្រើហិង្សានៅក្បែរព្រះវិហារជាកន្លែងផ្សឹក ហើយមកដល់ពេលនេះឈ្មោះ ស្រិល វណ្ណា ហៅ អៀម វណ្ណា ត្រូវបានប្រគល់ជូនមន្ទីរធម្មការនិងសាសនាឲ្យត្រឡប់ទៅវិញដើម្បីទៅពិនិត្យសម្ភារៈក្នុងកុដិវត្តភ្នំបាក់លើ។ ចំពោះការដោះលែងទៅវិញនេះ គឺដោយសារគ្មានពាក្យបណ្តឹងចោទប្រកាន់ណាមួយទៅលើគាត់ទេ ។

លោក ប្រធានមន្ទីរធម្មការ និងសាសនាខេត្តបន្ទាយមានជ័យ យិន យឿន ឲ្យដឹថា ក្រោយពេលផ្សឹកចៅអធិការវត្តភ្នំបាក់លើ ដែលបរាជិកដោយចោទប្រកាន់ពីស្ត្រីឈ្មោះ កាយ វិតា អាយុ១៩ឆ្នាំ រស់នៅភូមិក្បាលកោះ សង្កាត់/ក្រុងប៉ោយប៉ែត បានចោទថាបានចាប់នាងរំលោភ បានសម្រេចនិងគម្រាម ហើយត្រូវមន្ត្រីធម្មការ និងសាសនាខេត្តរួមជាមួយមន្ត្រីសង្ឃផ្សឹក នៅរសៀលថ្ងៃទី៥ ខែមិថុនា ឆ្នាំ២០១៨នេះ នៅក្នុងវត្តសុមាធិផលស្ថិតក្នុងសង្កាត់ព្រះពន្លា ក្រុងសិរីសោភ័ណ។ ក្នុងឱកានោះ គេឃើញប្រជាពលរដ្ឋជាច្រើនបានចោមរោមទំនងជាប៉ុនប៉ងប្រើហិង្សា ហើយដោយមានការព្រួយបារម្ភខ្លាចផ្ទុះហិង្សាកើតឡើង និងដើម្បីការពារសុវត្ថិភាពកម្លាំងនគរបាលស្នងការនគរបាលខេត្តប្រមាណ១០នាក់ បានការពារនាំយកឡើងរថយន្តដឹកមកស្នងការដ្ឋាននគរបាលខេត្តដឹកចេញតែម្តង ។នៅសៀលថ្ងៃដដែលមន្ត្រីធម្មការ និងសាសនារួមជាមួយមន្ត្រីសង្ឃក្នុងខេត្តបន្ទាយមានជ័យ បាននាំខ្លួនឈ្មោះ ស្រិល វណ្ណា ហៅ អៀម វណ្ណា ទៅវត្តភ្នំបាក់លើ វិញ ដើម្បីធ្វើការត្រួតពិនិត្យសម្ភារៈផ្ទាល់ខ្លួន ត្រូវបានប្រគល់ជូនឲ្យទទួលយកទៅផ្ទះវិញហើយ រីឯវត្តនេះត្រូវបានតែងតាំងថ្មីជាបណ្តោះអាសន្ននូវចៅអធិការវត្ត ព្រះនាម សុភា ទិត្យ (សាមណេ)ដែលបួស៥វស្សាមកហើយ ។នៅវត្តភ្នំបាក់លើ ស្ថិតភូមិភ្នំបាក់សង្កាត់ទឹកផ្លា ក្រុងសិរីសោភ័ណ។

ប្រភពមួយបានឲ្យដឹងថា ក្រោយពីផ្ទុះរឿងបង្ហោះរូបភាពចៅអធិការវត្តភ្នំបាក់លើមានរូបស្និតស្នាលជាមួយស្ត្រីដើមចោទហើយរូបភាពជាច្រើនសន្លឹកដែលប៉ះពាល់សាសនាធ្វើឲ្យភាគីនារីឈ្មោះ កាយ វិតា គ្រោងប្តឹងសង្ឃអង្គនេះដែរ តែត្រូវបានចាស់ទុំសម្របសម្រួលសុំកុំឲ្យប្តឹងដើម្បីទុកជជែកគ្នារកដំណោះស្រាយក្រៅប្រព័ន្ធច្បាប់នៅពេលក្រោយបន្តទៀត ទើបសមត្ថកិច្ចមិនចាត់ការ ព្រោះគ្មានពាក្យបណ្តឹង និងបានអនុញ្ញាតឲ្យអន្ទិតរូបនេះ បានវិលត្រឡប់ទៅផ្ទះវិញ។

ចំណែក ខាងស្រី ឈ្មោះ លីតា ដែលជាក្មេងស្រីវ័យ១៩ឆ្នាំ បានអះអាងថា នាងបង្ហោះរូបភាព និងវិដេអូ កៀកកើយរវាងនាង និងសង្ឃបរាជិក ដោយសារតែខាងសង្ឃអង្គនោះ ព្យាយាមគេចពីនាង និងបិទទូរស័ព្ទមិនព្រមឆ្លើយឆ្លងគ្នា ។ នាងទាមទារឲ្យថ្នាក់ដឹកនាំសង្ឃ ចាប់លោកនោះ ផ្សឹក ហើយនាងប្តឹងពីបទរំលោភ និងគំរាម ប៉ុន្តែដោយចាស់ទុំសម្របសម្រួលទើបក្រុមគ្រួសារពិចារណាមិនទាន់ដាក់ពាក្យបណ្តឹងនៅឡើយ។

ទាក់ទិនរឿងនេះ គេឃើញនៅលើបណ្តាញសង្គមហ្វេសប៊ុក មានគេបង្ហោះរូបភាព Troll ជាច្រើន ពាក់ព័ន្ធករណីព្រះសង្ឃ ស្រិល វណ្ណា ហៅ អៀម វណ្ណា ឆាន់ពោតជាមួយស្រីស្នេហ៍ ហើយកើតជារឿងរ៉ាវ ឈានដល់ចាប់ផ្សឹកព្រះសង្ឃបរាជិកនោះ។ នៅមានរូបភាពជាច្រើនទៀត ត្រូវបានគេបង្ហោះឡើង រួមមាន៖ “ពោត ជាអាវុធប្រល័យលោក” ហូបពោតខុសបច្ចេកទេស “អ្នកវិទ្យាសាស្ត្រវ័យក្មេង ជាអ្នករកឃើញអាវុធប្រល័យលោក គឺកញ្ញា លីតា”, “ផ្អាកឆាន់ពោតមួយរយៈ” “ស៊ីពោតស្ងោរ អាចនាំឲ្យខូចអនាគត ដូច្នេះមុននឹងស៊ី ត្រូវចេះប្រុងប្រយ័ត្ន” “តើមួយណាជាអាវុធប្រល័យលោក?” “កញ្ញា លីតា ស្ថាបនិករកឃើញអាវុធប្រល័យលោក” ជាដើម៕

គម្រោងផ្លូវរថភ្លើងលើអាកាសពីកណ្តាលក្រុងភ្នំពេញទៅព្រលានយន្តហោះ ចាប់ផ្ដើមឆ្នាំក្រោយ

June 6, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ ដោយសារការកកស្ទះចរាចរណ៍នៅតែជាបញ្ហាចំបងមួយក្នុងរាជធានីភ្នំពេញ ក្រសួងសាធារណៈការ និងដឹកជញ្ជូន បានបង្ហាញកាន់តែច្បាស់ ពីគម្រោងស្ថាបនារថភ្លើងលើអាកាសនាឆ្នាំក្រោយ ដោយកំណត់យកទីតាំងពីចំណុចជិតផ្សារថ្មី ឆ្ពោះទៅកាន់អាកាសយានដ្ឋានអន្តរជាតិភ្នំពេញ ដែល គ្រោងចំណាយថវិកាប្រមាណ៨រយលានដុល្លារអាមេរិក។

តាមការបញ្ជាក់របស់ រដ្ឋមន្ត្រីក្រសួងសាធារណការ និង ដឹកជញ្ជូន ឯកឧត្តម ស៊ុន ចាន់ថុល កាលពីថ្ងៃទី៥ ខែមិថុនា ឆ្នាំ២០១៨ បានបង្ហាញថា ការសិក្សាគម្រោងសាងសង់ស្ពានអាកាស និង រថភ្លើងលើអាកាស ក្នុងរាជធានីភ្នំពេញបានចប់សព្វគ្រប់ហើយនាពេលនេះ ហើយគម្រោងនេះនឹងចាប់ផ្ដើមស្ថាបនានៅដើមឆ្នាំ២០១៩ខាងមុខ ដោយកំណត់យកទីតាំងចាប់ពីចំណុចជិតផ្សារធំថ្មី ឆ្ពោះទៅកាន់អាកាសយាដ្ឋានអន្តរជាតិភ្នំពេញ ដើម្បីសម្រួល ការធ្វើដំណើរ និងផ្តល់ជម្រើសកាន់តែច្រើនថែមទៀតដល់ប្រជាពលរដ្ឋនៅរាជ ធានីភ្នំពេញ ក៏ដូចជាភ្ញៀវទេសចរអន្តរជាតិ ។

លោក ស៊ុន ចាន់ថុល បាន បានបញ្ជាក់ថា ហេតុផលដែលជ្រើសរើសទីតាំងនេះ ព្រោះជារៀងរាល់ថ្ងៃ មហាវិថីសហព័ន្ធរុស្សី មានភាពកកស្ទះច្រើនជាងគេ ជាពិសេស ជាមហាវិថីសំខាន់បំផុតក្នុងការធ្វើដំណើររបស់ប្រជាពលរដ្ឋចេញទៅតាមបណ្តាខេត្តនានា និងដោយសារផ្លូវនេះ មានភាពមមាញឹកសម្រាប់អ្នកដែលធ្វើដំណើរចាកចេញទៅក្រៅប្រទេសតាមរយៈការហោះហើរផងដែរ។

លោក ស៊ុន ចាន់ថុល បញ្ជាក់ថា គម្រោងស្ថាបនារថភ្លើងលើអាកាស ពីចំណុចជិតផ្សារធំថ្មី ទៅកាន់អាកាសយាដ្ឋានអន្តរជាតិភ្នំពេញនេះ មានប្រវែង១៨គីឡូម៉ែត្រ ដែលត្រូវចំណាយថវិកាប្រមាណ៨រយលានដុល្លារអាមេរិក ក្រោមជំនួយរបស់ទីភ្នាក់ងារសហប្រតិបត្តិ ការអន្តរជាតិនៃប្រទេសជប៉ុន ហៅកាត់ថា JICA ។

ប៉ុន្តែការស្ថាបនាផ្លូវរថភ្លើងអាកាសនេះ នឹងត្រូវធ្វើឡើងជា២ដំណាក់កាល ដោយបែងចែកគម្រោងផ្លូវនៅលើអាកាសចំនួន១៤គីឡូម៉ែត្រ និងផ្លូវនៅក្រោមដី ប្រវែង៤គីឡូម៉ែត្រពីស្ថានីយ៌ចំណតដែលស្ថិតនៅក្នុងអាកាសយានដ្ឋានអន្តរជាតិភ្នំពេញតែម្ដង ។

គួរបញ្ជាក់ថា គម្រោងការសាងសង់ផ្លូវរថភ្លើងអាកាសនេះ ត្រូវបានធ្វើការសិក្សាតាំងពីអំឡុងឆ្នាំ២០១៤ ទៅលើផ្លូវចំនួន៣ខ្សែ គឺខ្សែទី១ ចាប់ផ្តើមពីមហាវិថីកម្ពុជាក្រោម, មហាវិថីព្រះមុនីវង្ស, មហាវិថីសហព័ន្ធរុស្ស៊ី និងរង្វង់មូលចោមចៅ។ ខ្សែទី២ ចាប់ ផ្តើមពីមហាវិថីព្រះមុនីវង្ស រត់ស្របផ្លូវរថភ្លើង(ចាស់) ចូលអាកាសយានដ្ឋានអន្តរជាតិភ្នំពេញ និងខ្សែទី៣ ចាប់ផ្តើមពីផ្សារធំថ្មី, មហាវិថីហ្សាលដឺហ្គោល, មហាវិថីព្រះមុនីរ៉េត ផ្លូវវេងស្រេង ឆ្ពោះមករង្វង់មូលចោមចៅ និងបត់មកអាកាសយានដ្ឋានអន្តរជាតិភ្នំពេញវិញ ។

គម្រោងអភិវឌ្ឍន៍ផ្លូវរថភ្លើងលើអាកាសនេះ គឺជាគំនិតផ្ដួចផ្តើមរបស់សម្ដេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា នៅក្នុងអំឡុងដំណើរទស្សនកិច្ចផ្លូវការនៅប្រទេសជប៉ុន កាលពីខែសីហា ឆ្នាំ២០១៧កន្លងមក ។

ដោយនៅពេលនោះ សម្តេចតេជោបានស្នើរដ្ឋាភិបាលជប៉ុន ឲ្យជួយគិតគូរផ្ដល់ជំនួយជាហិរញ្ញវត្ថុនិងបច្ចេកទេស ដើម្បីអភិវឌ្ឍន៍លើវិស័យដឹកជញ្ជូន ជាពិសេស រៀបចំឲ្យមានរថភ្លើងស្វ័យប្រវត្តិលើអាកាសបែបនេះ ដើម្បីកាត់បន្ថយនូវការចំណាយរបស់ពលរដ្ឋ ព្រមទាំងកាត់បន្ថយការកកស្ទះចរាចរណ៍ និងគ្រោះថ្នាក់ផ្សេងៗ។

បច្ចុប្បន្ន ក្នុងរាជធានីភ្នំពេញ ក៏កំពុងប្រើប្រាស់បណ្តាញដឹកជញ្ជូនសាធារណៈច្រើនដែរ ទាំងផ្លូវគោគ និងផ្លូវទឹក តាមរយៈការផ្តល់សេវាដឹកជញ្ជូនតាមរថយន្ត សាធារណៈរបស់សាលារាជធានីភ្នំពេញ និង កាណូតដឹកអ្នកដំណើរដែលឆ្លងកាត់ពីតំបន់ព្រែកភ្នៅ ទៅដល់ក្រុងតាខ្មៅ ផងដែរ ៕
( រូបតំណាង )

អ្នកខ្ចីលុយធនាគារទិញដីទុក«ខកចិត្ត»ព្រោះគម្រោងសង់ព្រលាននៅខេត្តកណ្តាលមិនច្បាស់លាស់

ភ្នំពេញ ៖ គម្រោងសាងសង់អាកាសយានដ្ឋានអន្តរជាតិថ្មី នៅក្នុងស្រុកកណ្តាលស្ទឹង ខេត្តកណ្តាល ដែលកំពុងធ្វើអោយតម្លៃដីនៅតំបន់នោះឡើងខ្លាំង ពេលនេះស្ថិតក្នុងភាពមិនច្បាស់នៅឡើយថា នឹងត្រូវបានលុបចោលវិញ ឬនៅបន្តដំណើរការដដែល ខណៈដែលមិនទាន់មានការជូនដំណឹងជាផ្លូវការ ពីរាជរដ្ឋាភិបាលនៅឡើយ។

គម្រោងសាងសង់អាកាសយានដ្ឋានអន្តរជាតិថ្មី មានផ្ទៃដីទំហំ២៦០០ហិកតា ស្ថិតក្នុងស្រុកកណ្តាលស្ទឹង ខេត្តកណ្តាល ដែលជាគម្រោងវិនិយោគរវាងក្រុមហ៊ុនក្នុងស្រុក OCIC ជាមួយក្រុមហ៊ុនចិន ក្នុងទឹកប្រាក់ប្រមាណ១ពាន់៥រយលានដុល្លារអាមេរិកនោះ កំពុងស្ថិតក្នុងភាពមិនច្បាស់នៅឡើយថា នឹងត្រូវបានលុបចោលវិញ រឺនៅតែបន្តដំណើរការ ខណៈដែលប្រព័ន្ធផ្សព្វផ្សាយ មួយចំនួន និយាយថា គម្រោងនេះត្រូវបានលប់ចោលវិញហើយ បន្ទាប់ពីអ្នកជំនាញរបស់ចិនបានសិក្សាចប់ ហើយបង្ហាញថា នៅទីតាំងនោះមិនអាចសាងសង់អាកាសយានដ្ឋានបានទេ ដោយសារហេតុផលបច្ចេកទេស និងនគរូបនីយកម្មសំខាន់ៗចំនួនបី៖ ទី១ គឺដោយសារទីតាំងអាកាសយានដ្ឋានអន្តរជាតិថ្មីនេះ ស្ថិតនៅលើផ្ទៃបឹងដែលនាំឲ្យពិបាកក្នុងការសាងសង់ ដោយសារដីខាងក្រោមជ្រាយ ។ ទី២ ទីតាំងគម្រោងអាកាសយានដ្ឋានអន្តរជាតិថ្មីនេះ ស្ថិតនៅជិតក្រុងភ្នំពេញពេក ព្រោះរយៈពេលយ៉ាងយូរ១០ឆ្នាំទៀត ទីក្រុងភ្នំពេញនឹងរីកទៅដល់តំបន់នេះ។ ទី៣ គឺដោយសារ អាកាសយានដ្ឋានអន្តរជាតិថ្មីនេះ ស្ថិតនៅក្បែរនឹងភូមិគ្រឹះរបស់សម្តេចតេជោនាយករដ្ឋមន្ត្រីពេក។

ទន្ទឹមនេះ ប្រភពពីមន្ត្រីរាជរដ្ឋាភិបាល បានបញ្ជាក់ថា គម្រោងនេះកំពុងបន្តដំណើរការដដែលតាមការគ្រោងទុក។ ទោះជាយ៉ាងណា រឿងគម្រោងអាកាសយានដ្ឋានថ្មីនេះនៅមិនទាន់ មានការបញ្ជាក់ជាផ្លូវការស្តីពីបច្ចុប្បន្នភាព រឺដំណើរការយ៉ាងណានៅឡើយ។ ប៉ុន្តែ បើតាមការចេញផ្សាយរបស់ បណ្តាញសារព័ត៌មាននានា បានលើកឡើងនូវការឆ្លើយតបរបស់ លោក ម៉ៅ ភិរុន អភិបាលខេត្តកណ្តាល ថា លោកមិនដែលបានដឹងពីគំរោងសាងសង់អាកាសយានដ្ឋានថ្មីនេះទេ ហើយក៏មិនបានដឹងថាគេនឹងសាងសង់នៅទីណាដែរ ព្រោះរហូតមកទល់ពេលនេះ មិនទាន់ទទួលបានឯកសារឬព៌តមានពីក្រុមហ៊ុនណាថាចង់សាងសង់អាកាសយានដ្ឋានថ្មីនេះឡើយ។

បើតាមប្រភពព៌តមានផ្សេងទៀត បានឲ្យដឹងថា បច្ចុប្បន្នរដ្ឋាភិបាលកំពុងសិក្សាសាងសង់អាកាសយាដ្ឋានថ្មី នៅទីតាំងចាស់ ស្ថិតក្នុងខេត្តកំពង់ឆ្នាំង និងទីតាំងថ្មីមួយទៀតស្ថិតក្នុងខេត្តកំពង់ស្ពឺ ប៉ុន្តែការសិក្សាលំអិតនិងបញ្ចប់នៅពេលណា និងជ្រើសរើសទីតាំងណាមួយពិតប្រាកដ មិនទាន់បញ្ចប់នៅឡើយទេ។

សូមបញ្ជាក់ថា គម្រោងសាងសង់អាកាសយានដ្ឋានអន្តរជាតិថ្មី នៅក្នុងភូមិសាស្ត្រក្រុងតាខ្មៅ ស្រុកកណ្តាលស្ទឹង ខេត្តកណ្តាល ដែលត្រូវចំណាយទុន វិនិយោគសរុបប្រមាណ ១ពាន់៥រយលានដុល្លារអាមេរិក គឺជាការវិនិយោគរួមគ្នាក្នុងនោះមានកម្ចីពីធនាគារចិនចំនួន១ពាន់១រយលានដុល្លារ! កម្ចីពីភាគទុនក្រុមហ៊ុន OCIC ចំនួន ២៨០លានដុល្លារ និងដើមទុនចុះបញ្ជីចំនួន ១២០លានដុល្លារដែលក្រុមហ៊ុន OCIC មាន៩០ភាគរយ និងរដ្ឋលេខាធិការដ្ឋានអាកាសចរស៊ីវិល ដែលតំណាងរាជរដ្ឋាភិបាលកម្ពុជា មាន១០ភាគរយ។

គម្រោងអាកាសយានដ្ឋានអន្តរជាតិថ្មីនេះ ត្រូវអភិវឌ្ឍក្នុងលំដាប់ថ្នាក់4F និងដំណើរការក្រោមឈ្មោះ ក្រុមហ៊ុន ខេមបូឌា អ៊ែរផត អ៊ិនវេសមិន ខូអិលធីឌី (Cambodia Airport Investment Co.,Ltd)។

គួរកត់សំគាល់ថា គម្រោងសាងសង់អាកាសយានដ្ឋានអន្តរជាតិថ្មី នៅក្នុងភូមិសាស្ត្រក្រុងតាខ្មៅ ស្រុកកណ្តាលស្ទឹង ខេត្តកណ្តាល ត្រូវបានផ្សព្វផ្សាយតាមបណ្តាញសារព័ត៌មាន នៅក្នុងខែមករា ឆ្នាំ២០១៨ ដែលចាប់ពីពេលនោះមកធ្វើអោយតម្លៃដីនៅក្នុងតំបននោះបានឡើងថ្លៃយ៉ាងខ្លាំង និងមានអ្នកសម្រុកទៅទិញទុក ដើម្បីលក់យកចំណេញនៅពេលគម្រោងនេះលេចជារូបរាង ប៉ុន្តែដំណឺងនៃការលប់ចោលគម្រោងសាងសង់អាកាសយាន្ដដ្ឋានអន្តរជាតិថ្មីនេះ នឹងធ្វើអោយសកម្មភាពទិញលក់ដីធ្លីនៅតំបន់នោះ អាចនឹងធ្លាក់ចុះវិញ។

នាពេលបច្ចុប្បន្ន ប្រទេសកម្ពុជា មានអាកាសយានដ្ឋានអន្តរជាតិធំៗ ចំនួន៣កំពុងដំណើរការ គឺអាកាសយានដ្ឋានអន្តរជាតិភ្នំពេញ !អាកាសយានដ្ឋានអន្តរជាតិខេត្តសៀមរាប! និងអាកាសយានដ្ឋានអន្តរជាតិកងកេង ខេត្តព្រះសីហនុ។ ចំណែក គម្រោងសាងសង់អាកាសយានដ្ឋានអន្តរជាតិថ្មី ក្នុងស្រុកសូត្រនិគម ខេត្តសៀមរាប ត្រូវបានសម្រេចជាគ្រោងប្លង់រួចរាល់ហើយ និងរង់ចាំការចាប់ផ្តើមដំណើរការសាងសង់នាពេលឆាប់ៗនេះ លើផ្ទៃដី៧០០ហិកតា និងចំណាយថវិកាជាង៩០០លានដុល្លារអាមេរិក ។

គម្រោងសាងសង់ព្រលានយន្តហោះខ្នាតអន្តរជាតិថ្មីមួយនៅខេត្តកណ្តាលនោះ ត្រូវបានគេអះអាងថា នឹងពន្យារពេលផ្តើមសាងសង់នៅឆ្នាំ២០២៥ ធ្វើឲ្យអ្នកទិញដីនៅតំបន់ដែលគេគ្រោងនឹងសាងសង់ព្រលានយន្តហោះនោះ ខកចិត្តនិងមានអ្នកខ្លះចង់ចង.ក ព្រោះតែខ្ចីបុលពីធនាគាររាប់សែនដុល្លារ ៕

ស៊យមែន ចោរឆក់កាបូបហើយ មកជួបគ្រោះថ្នាក់ចរាចរណ៏ថែមទៀត

ភ្នំពេញ ពីរនាក់ប្តីប្រពន្ធជិះម៉ូតូឌុបគ្នាត្រូវចោរឆក់កាបូបរបស់ស្ត្រីដែលប្រពន្ធដែលជិះខាងក្រោយរត់បាត់ដោយសុវត្ថភាពក្រោយពេលដឹងថាចោរឆក់កាបូបរបស់ប្រពន្ធរបស់គាត់ភ្លាមបុរសជាប្តីបានជិះម៉ូតូដេញតាមជនសង្សយ័ដោយជិះបញ្ច្រាសទិសក៏បានជ្រុលទៅបុកអ្នកជិះម៉ូតូ១គ្រឿងទៀតបណ្តាលអោយរងរបួសស្រាលទាំងសងខាង
ហេតុការណ៏គ្រោះថ្នាក់ចរាចរណ័ខាងលើនេះបានកើតឡើងកាលពីវេលាម៉ោង២និង៣០នាទីរសៀលថ្ងៃទី៦ខែមិថុនាឆ្នាំ២០១៨ស្ថិតនៅចំនុចលើស្ពានអាកាសស្ទឹងមានជយ័ខណ្ឌមានជយ័រាជធានីភ្នំពេញ

បើយោងតាមសម្តីបុរសដែលត្រូវចោរឆក់កាបូបរបស់ប្រពន្ធគាត់បានរៀបរាប់អោយដឹងថាមុនពេលកើតហេតុរូបគាត់បានជិះម៉ូតូមួយគ្រឿងម៉ាកscoopyពណ៍ក្រហមពាក់ស្លាកលេខភ្នំពេញ1CX1547ដឹកប្រពន្ធគាត់ត្រលប់មកពីផ្សាដើមគរខណះពេលកំពុងតែជិះជិតដល់ស្តុបផ្សាដើមគរផ្លូវមុន្នីរ៉េតក្នុងសង្កាត់បឹងសាឡាងខណ្ឌទួលគោករាជធានីភ្នំពេញត្រូវជនសង្សយ័មានគ្នា២នាក់បានធ្វើសកម្មភាពឆក់កាបូបប្រពន្ធរបស់គាត់អស់លុយជាង១លានរៀលនិងទូរសព្ទ័អាយហ្វូនសិចផ្លើស១គ្រឿងហើយគាត់ក៏បានជិះដេញតាមជ្រុលទៅបុកអ្នកជិះម៉ូតូឃ្លិចពណ៍ស១គ្រឿងទៀតពាក់ស្លាកលេខភ្នំពេញ 1CZ2492ដោយរូបគាត់បានបញ្ចប់រឿងសងថ្លៃខូតខាតដល់ម្ចាស់ម៉ូតូឃ្លិកចំនួន៩០ដុល្លាទៀត។ក្រោយមកក៏ដឹកប្រពន្ធទៅប្តឹងនគរបាលប៉ុស្តិបឹងសាឡាងអោយជួយអន្តរាគមន៍។

គ្រោះថ្នាក់ចរាចរណ៍គួរឲ្យរន្ធត់ របួសធ្ងន់ស្រាល៥នាក់ នៅស្រុកព្រៃនប់

June 6, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ព្រៃនប់់ ៖ មនុស្ស៥នាក់រងរបួសដោយគ្រោះថ្នាក់ចរាចរណ៍រថយន្ត២គ្រឿងបុកគ្នានៅផ្លូវជាតិលេខ៤ ក្នុងស្រុកពៃនប់ រវាងរថយន្តធំដឹកត្រី ០១គ្រឿងម៉ាក HYUNDAI ពណ៌ ស ពាក់ផ្លាកលេខកំពត2A-0786 និងរថយន្តតួរីស ពណ៌ ស្លែ ពាក់ផ្លាកលេខភ្នំពេញ2L-3189 មានទិសដៅពីផ្ទុយគ្នា នៅផ្លូវជាតិលេខ៤ ចន្លោះគីឡូម៉ែត្រ ២០៧-២០៨ ស្ថិតនៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ វេលាម៉ោងជិត៧ព្រឹក ថ្ងៃទី៦ ខែមិថុនា២០១៨ នេះ បណ្តាលអោយមនុស្ស៥នាក់(ស្រី២នាក់ )ដែលជិះក្នុងរថយន្តតួរីស រងរបួសធ្ងន់ និងស្រាល ក្នុងនោះមាន៤នាក់រងរបួសធ្ងន់ ។

ករណីនេះ បើតាមអ្នកឃើញហេតុការណ៍ផ្ទាល់ថា កើតឡើងពេលដែលរថយន្តដឹកត្រីទិសដៅចូលទៅក្រុងព្រះសីហនុ បំរុងបើកវ៉ាជែងរថយន្តដឹកកម្មករ ប៉ុន្តែវ៉ាមិនផុត ក៍ជ្រុលទៅបុករថយន្តតួរីសដឹកអ្នកដំណើរដែលកំពុងបើកបរមកពីមុខបញ្ច្រាសទិសគ្នា ។
ឈ្មោះជនរងគ្រោះទាំង៥នាក់រួមមាន៖
១-ឈ្មោះសួន ស៊ីនេត ភេទប្រុស អាយុ៣០ឆ្នាំ(អ្នកបើកបររថយន្តតួរីស) ទីលំនៅឃុំ អូរឧកញ៉ាហេង ស្រុកព្រៃនប់ របួសធ្ងន់។
២-ឈ្មោះដែង ធារៈភេទស្រីអាយុ២២ឆ្នាំ ទីលំនៅភូមិងន ឃុំងន ស្រុកសណ្តាន់ខេត្តកំពង់ធំ របួសធ្ងន់។
៣-ឈ្មោះកង វីនភេទប្រុសអាយុ២៨ឆ្នាំទីលំនៅភូមិងន ឃុំងន ស្រុកសណ្តាន់ខេត្តកំពង់ធំ របួសធ្ងន់។
៤-ឈ្មោះសឿង យ៉ុន ភេទប្រុសអាយុ៥២ឆ្នាំ ជាកងទព័អង្គភាពឆត្រ័យោង៩១១ មធ្យ។
៥-មនុស្សស្រី មិនទាន់ស្គាល់ឈ្មោះ របួសធ្ងន់៕

នាយករដ្ឋមន្ត្រីកម្ពុជា បន្តជួបកម្មការិនីជាង២ម៉ឺននាក់ នៅស្រុកជើងព្រៃ

June 6, 2018Uncategorized, ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

កំពង់ចាម ៖ គិតចាប់តាំងពីថ្ងៃទី២០ ខែសីហា ឆ្នាំ២០១៧មក សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានចុះជួបសំណេះសំណាលជាមួយកម្មករ កម្មការិនីរោងចក្រកាត់ដេរ ចំនួន៤៤លើកហើយ ដោយនាព្រឹកថ្ងៃទី៦ ខែមិថុនា នេះ សម្តេចតេជោ បានបន្តជួបជាមួយកម្មកររោងចក្រ ជិត២ម៉ឺន២ពាន់នាក់ទៀត មកពីរោងចក្រ សហគ្រាស ក្នុងខេត្តកំពង់ចាម ក្នុងនោះមានរោងចក្រ សហគ្រាស ចំនួន៧ មកពីស្រុកជើងព្រៃ និង រោងចក្រចំនួន១ មកពីស្រុកបាធាយ។ រោងចក្រ សហគ្រាសទាំង៨នេះ មានរោងចក្រកាត់ដេរសម្លៀកបំពាក់ចំនួន១, ផលិតស្បែកជើងចំនួន៥, ផលិតស្រោមដៃចំនួន១ និងផលិតការ៉ុងចំនួន១។ ចំណែកផលិតផលផលិតចេញពីរោងចក្រ សហគ្រាសទាំងនេះ ភាគច្រើនត្រូវបាននាំចេញទៅកាន់ទីផ្សារអន្តរជាតិ និង ផ្គត់ផ្គង់ទីផ្សារក្នុងប្រទេស។ រោងចក្រទាំងនេះមានអ្នកវិនិយោគមកពីប្រទេសចិនចំនួន៦, កាណាដាចំនួន១ និងខ្មែរចំនួន១។

តាមការបញ្ជាក់របស់ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ខេត្តកំពង់ចាម ជាខេត្តមួយដែលធ្លាប់ជាតំបន់សមរភូមិប្រយុទ្ធកាលពីអតីតកាលផងដែរ តែបច្ចុប្បន្នបានប្រែក្លាយទៅខេត្តមានការអភិវឌ្ឍទាំងវិស័យឧស្សាហកម្ម និងកសិឧស្សាហកម្ម។ ពេលបច្ចុប្បន្ន ខេត្តកំពង់ចាម មានសហគ្រាស គ្រឹះស្ថានចំនួន៤០០ មានកម្មករ និយោជិត ជាង៣ម៉ឺន៥ពាន់៤រយនាក់ ក្នុងនោះ រោងចក្រកាត់ដេរសម្លៀកបំពាក់ និងផលិតស្បែកជើងមានចំនួន១៤ មានកម្មករនិយោជិតចំនួនជាង២ម៉ឺន៥ពាន់៧រយនាក់ ដែលមានប្រាក់ឈ្នួលសរុបជាង ៥២លានដុល្លារក្នុងមួយឆ្នាំ។

លោក អ៊ិត សំហេង បានលើកឡើងថា ការអភិវឌ្ឍតំបន់ឧស្សាហកម្មក្នុងខេត្តកំពង់ចាម គឺជាជោគជ័យនៃគោលនយោបាយទាក់ទាញវិនិយោគរបស់រាជរដ្ឋាភិបាល ដើម្បីបង្កើតការងារជូនកម្មករ និយោជិត និងជាជោគជ័យក្នុងការអនុវត្តគោលនយោបាយជាតិស្តីពីមុខរបរ និងការងារ ស្របតាមគោលនយោបាយបាយអភិវឌ្ឍន៍វិស័យឧស្សាហកម្មកម្ពុជា, គោលនយោបាយស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ និងក្របខណ្ឌគោលនយោបាយជាតិគាំពារសង្គម ដែលកំពុងប្រែក្លាយខេត្តកំពង់ចាម ទៅជាតំបន់សេដ្ឋកិច្ចដ៏មានសក្តានុពលមួយនៅកម្ពុជា។
សម្តេចតេជោ ហ៊ុន សែន បានគូសបញ្ជាក់ថា គោលនយោបាយពង្រាយរោងចក្រ សហគ្រាសទៅតាមបណ្តាខេត្ត គឺជាចក្ខុវិស័យ និងជាគោលនយោបាយអាទិភាពមួយរបស់រាជរដ្ឋាភិបាលកម្ពុជា ដែលត្រូវបានអនុវត្តរយៈពេលជិត២០ឆ្នាំមកហើយ បន្ទាប់ពីនយោបាយពង្រាយសាលារៀនទៅតាមភូមិឋានរបស់ប្រជាពលរដ្ឋ ក្នុងគោលបំណងបង្ខិតការងារទៅជិតកន្លែងរស់នៅរបស់ប្រជាពលរដ្ឋ។

តាមរយៈជំនួបជាបន្តបន្ទាប់នេះដែរ ក៏បានធ្វើឲ្យបរិយាកាសការងារនៅតាមរោងចក្រ សហគ្រាសមានភាពល្អប្រសើរ ទាំងការតម្លើងប្រាក់ខែអប្បរមារដល់១៧០ដុល្លារក្នុងឆ្នាំ២០១៨នេះ រួមនិង គោលនយោបាយគាំពារសង្គមជាច្រើនទៀតដែលសម្រួលដល់ជីវភាពរបស់ កម្មករ កម្មការិនី។

ក្នុងនោះ គ្រាន់តែគោលនយោបាយគាំពារសុខមាលភាពសម្រាប់កម្មការិនីមានផ្ទៃពោះ គិតចាប់តាំងពីថ្ងៃទី០១ ខែមករា ដល់ថ្ងៃទី៥ ខែមិថុនា ឆ្នាំ២០១៨ រាជរដ្ឋាភិបាល បានចំណាយកញ្ចប់ថវិកា៩ពាន់៨រយលានរៀល សម្រាប់ផ្តល់ប្រាក់ឧបត្ថម្ភដល់កម្មការិនី សម្រាលកូន ចំនួន ២ម៉ឺន៤ពាន់នាក់ ៕

អាជ្ញាធរប្រកាសឲ្យប្រុងប្រយ័ត្ន ខណៈភ្លៀងធ្លាក់បីថ្ងៃជាប់គ្នាធ្វើឲ្យទន្លេសេសាន្តជន់លិច

June 5, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តរតនគិរី ៖ មន្ទីរធនធានទឹកខេត្តរតនគិរី សូមអំពាវនាវ ដល់ប្រជាពលរដ្ឋ ដែលរស់នៅតាមដងទន្លេសេសាន្ត និងទន្លេស្រែពក ក្នុងខេត្តរតនគិរី ឲ្យមានការប្រុងប្រយ័ត្ន ត្រៀមលក្ខណៈរកទីទួលសុវត្ថិភាព។
ការសុំអំពាវនាវនេះ លោក ចាន់ ប៊ុនធៀន ប្រធានមន្ទីរធនធានទឹក និងឧតុនិយម បានផ្ដល់បទសម្ភាស ដល់ក្រុមអ្នកសារព័ត៌មានកាលពីថ្ងៃទី០៥ មិថុនា ឆ្នាំ២០១៨ បន្ទាប់ពីខេត្តរតនគិរី មានភ្លៀងធ្លាក់ជាបន្តបន្ទាប់ រយៈពេលថ្ងៃ ហើយទឹកទន្លេមានទឹកឡើងយ៉ាងកំហុក។

បើតាមលោក ចាន់ ប៊ុនធៀន ប្រធានមន្ទីរធនធានទឹក និងឧតុនិយមខេត្តរតនគិរី បានឲ្យដឹងថា បើទោះជាទឹកទន្លេសេសាន្ត និងទឹកទន្លេស្រែពក ក្នុងខេត្តរតនគិរី មានកំរិតកំពស់ទឹកមិនទាន់ដល់កំរិតប្រកាស់អាសន្តយ៉ាងណាក៏ដោយ ក៏ការសុំអំពាវនាវនេះ គ្រាន់ជាការដាសតឿន ដល់ប្រជាពលរដ្ឋ។ លោកប្រធានមន្ទីរបានបញ្ជាក់ថា ក្នុងខេត្តរតនគិរី តំបន់ដែលងាយរងគ្រោះដោយសារទឹកជំនន់ មាន៤ស្រុក គឺស្រុកតាវែង ស្រុកអណ្ដូងមាស ស្រុកវើនសៃ និងស្រុកលំផាត់ ស្រុកទាំង៤នេះ ប្រជាពលរដ្ឋសុទ្ធសឹងរស់នៅតាមដងទន្លេសេសាន្តនិងទន្លេស្រែពក។ ប្រជាពលរដ្ឋទាំងស្រុក៤ស្រុកនេះ សុទ្ធតែធ្លាប់រងគ្រោះ ខូចខាតទ្រព្យសម្បត្តិដោយសារជំនន់ទឹកភ្លៀង ស្ទើរតែរៀងរាល់ឆ្នាំ ពិសេសជាងគេគឺ ស្រុកលំផាត់ ដែលមានភូមិប្រជាពលរដ្ឋរស់នៅប្រ៉បតាមដងទន្លេស្រែពកតែម្ដង។

គួរបញ្ជាក់ថា ទឹកទន្លេស្រែពក ស្ថិតក្នុងស្រុកលំផាត់ ភ្លៀងប៉ុន្មានថ្ងៃជាប់ៗគ្នានេះ ធ្វើឲ្យទឹកកើនឡើងកំពស់ ៤.២៦ម៉ែត្រ ក្នុងកំរិតប្រកាសអាសន្ន១២.៥០ម៉ែត្រ។ ទឹកទន្លេសេសាន្ត ស្ថិតក្នុងស្រកអណ្ដូងមាស ស្រុកតាវែង និងស្រុកវើនសៃ កំពស់ទឹកបានកើនកើនឡើង៣.០៥ម៉ែត្រ ដែលក្នុងកំរិតប្រកាសអាសន្ន៨.៥០ម៉ែត្រ។
បើទោះជាកំរិតទឹកនៅទាបយ៉ាងណាក៏ដោយ ក៏ប៉ុន្តែនៅខេត្តរតនគិរី ទឹកជំនន់អាចបង្ករជាគ្រោះមហន្តរាយដល់ប្រជាពលរដ្ឋ តែរយៈពេលពី២ទៅ៣ម៉ោង បន្ទាប់ពីមានភ្លៀងធ្លាក់ជាប់ៗគ្នាជាច្រើនថ្ងៃ៕

ព្រឹទ្ធសភាអាមេរិក ជួបជាមួយ ប្រធានាធិបតីគុយបា ទើបកាន់តំណែងថ្មី

June 5, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាមេរិក ៖ ព្រឹទ្ធសភាសហរដ្ឋអាមេរិក លោក ជេហ្វវ្លេក Jeff Flake និងអតីតប្រធានប្រតិបត្តិ ក្រុមហ៊ុន Google លោកអ៊ីរីក ឈ្មីត និងជាអ្នកការទូតកំពូល របស់រដ្ឋបាលលោក ដូណាល់ ត្រាំ បានជួបជាមួយ ប្រធានាធិប តី គុយបា ថ្មី លោក មីហ្គែល ឌៀសកានែល ក្នុងប្រទេស គុយបា ជាជំនួបជាមួយ គណៈ ប្រតិភូ សហរដ្ឋអាមេរិក កំរិតខ្ពស់ ចាប់តាំងពីលោក ឡើង កាន់តំណែង។ លោក ឌៀស កានែល បានឡើងកាន់តំណែងជាប្រធានាធិបតី កាលពីខែ មេសា បន្តតំណែងពីលោក រ៉ូល កាស្ត្រូ។

លោក វ្លេក និងលោក ឈ្មីត ដែលបច្ចុប្បន្ននេះ ជា សមាជិកគណៈនាយក នៃក្រុមហ៊ុន Google parent Alphabet Inc កំពុងស្ថិតក្នុង ដំណើរទស្សនកិច្ច រយៈពេល២៤ម៉ោង ដើម្បីពិភាក្សាលើ ការធ្វើឲ្យប្រសើរឡើង ប្រព័ន្ធ អ៊ីនធឺណេតនៅលើប្រទេសដីកោះមួយនេះ និងបានជួបជាមួយ រដ្ឋមន្ត្រីការបរទេស និងមន្ត្រីក្រសួងទូរគមនាគមន៏គុយបាផងដែរ។ លោកដូណាល់ត្រាំ ដែលបានឡើងកាន់ តំណែង កាលពីខែមករា ឆ្នាំ២០១៧ បានដកនូវគោលនយោបាយនៃការជាប់ទាក់ទងជា មួយកោះមួយនេះ ជាគោលនយោបាយ របស់អតីតប្រធានាធិបតី បារ៉ាក់អូបាម៉ា ។

ក្រុមហ៊ុន Google បានទាញយកអត្ថប្រយោជន៍ពីការបន្ធូរបន្ថយភាពមិនចុះសម្រុងគ្នានា សម័យកាលរបស់លោកអូបាម៉ាដែលរួមមានការបង្កើតទំនាក់ទំនងការទូតឡើងវិញ ហើយ បានចុះហត្ថលេខាលើកិច្ចព្រមព្រៀងមួយនៅឆ្នាំ 2016 ដើម្បីផ្តល់ឱ្យអ្នកប្រើប្រាស់អ៊ីនធឺ ណេត នូវការចូលទៅកាន់មាតិកា របស់ខ្លួនកាន់តែឆាប់រហ័ស៕

លោក ត្រាំ និងលោក គីម ចុងអ៊ុន នឹងជួបគ្នានៅម៉ោង៩ព្រឹកថ្ងៃទី១២ មិថុនា នៅសឹង្ហបុរី

June 5, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

កូរ៉េ ៖ សេតវិមានបាននិយាយថា ការរៀបចំសម្រាប់កិច្ចប្រជុំកំពូល រវាងប្រធានាធិបតីសហរដ្ឋអាមេរិក លោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន កំពុងដំណើរការទៅយ៉ាងល្អ ហើយភាគី ទាំងពីរគ្រោងនឹងជួបប្រជុំនៅម៉ោង 9 ព្រឹកម៉ោង ក្នុងប្រទេសសឹង្ហបុរី នៅថ្ងៃទី 12 ខែមិថុនា។

ការប្រកាសអំពីពេលវេលា សម្រាប់កិច្ចប្រជុំលើកដំបូង រវាងមេដឹកនាំទាំងពីរនេះ បានធ្វើឡើងត្រឹមតែរយៈពេលបីថ្ងៃប៉ុណ្ណោះ បន្ទាប់ពីលោកត្រាំ បានទទួលគណៈប្រតិភូជាន់ខ្ពស់ កូរ៉េខាងជើង នៅសេតវិមាន ។

អ្នកនាំពាក្យរបស់សេតវិមាន លោកស្រី សារ៉ា សេនដ័រ បាននិយាយថា យើងគិតថាអ្វីៗ កំពុង បន្តឆ្ពោះទៅមុខ និងមានការរីកចំរើនល្អ។

លោកស្រី ក៏បានឆ្លើយតបនឹងសំនួរ អំពីយុទ្ធនាការ ដាក់ សម្ពាធអតិបរិមារបស់សរដ្ឋអាមេរិកទៅលើកូរ៉េខាងជើង ដោយនិយាយថា គោលនយោបាយសហ រដ្ឋអាមេរិក មិនមានការផ្លាស់ប្តូរទេ ហើយរដ្ឋាភិបាលទីក្រុងវ៉ាស៊ីនតោន នឹងបន្តរក្សាទណ្ឌកម្ម លើទី ក្រុងព្យុងយ៉ាង។

កាលពីសប្តាហ៍មុន លោក Trump បាននិយាយថា លោកមិនចង់ប្រើពាក្យថា សម្ពាធអតិបរមា” ដើម្បីពណ៌នាអំពីយុទ្ធនាការទៀតនោះទេ ដោយសារកូរ៉េខាងជើង កំពុងធ្វើកិច្ចសហប្រតិបត្តការថែមទៀត ទោះបីសហរដ្ឋអាមេរិកកំពុងរក្សាទណ្ឌកម្មនាពេលបច្ចុប្បន្នក៏ដោយ៕

ប្រធានផ្តល់ជំនួយ UN គាំទ្រការដាក់ទណ្ឌកម្មសេដ្ឋកិច្ចអ្នកបង្កសង្គ្រាមនៅស៊ូដង់ខាងត្បូង

June 5, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ស៊ូដង់ ៖ អ្នកសម្របសម្រួលជំនួយការជាន់ខ្ពស់ របស់អង្គការសហប្រជាជាតិ អំពាវនាវដល់ប្រទេសមហាអំណាចធំ ៗ ក្នុងការបង្កើនដាក់ទណ្ឌកម្ម លើក្រុមមេដឹកនាំប្រទេសស៊ូដង់ខាងត្បូង ដោយបង្កកទ្រព្យសម្បត្តិ និង ហាម ឃាត់ការធ្វើដំណើរ ដើម្បីនាំភាគីទាំងអស់ចូលក្នុងតុចរចា ក្នុងបំណងបញ្ចប់ ជម្លោះ រយៈពេលប្រាំឆ្នាំ។

លោក ម៉ាក ឡូខក់ អ្នកសម្របសម្រួលផ្នែកជំនួយសង្គ្រោះបន្ទាន់របស់អង្គការសហប្រជាជាតិ បាននិយាយថា ការដាក់ទណ្ឌកម្មគួរតែផ្តោតលើ ការបង្កើតកងទ័ព និងអ្នកមាន កាំភ្លើង ។
ក្រុមប្រឹក្សាសន្តិសុខអង្គការសហប្រជាជាតិ បានបោះឆ្នោត ដើម្បីបន្តការដាក់ទណ្ឌកម្មមួយចំនួន ទៅលើប្រទេសស៊ូដង់ខាងត្បូង រហូតដល់ពាក់កណ្តាលខែកក្កដា និងដើម្បីពិចារណាលើការដាក់បំរាមលើការធ្វើដំណើរ និងការបង្កកទ្រព្យសម្បត្តិ ទៅលើមេដឹកនាំស៊ូដង់ខាងត្បូងចំនួនប្រាំមួយនាក់ ប្រសិនបើជម្លោះរបស់ប្រទេសនេះ មិនបញ្ឈប់ត្រឹមថ្ងៃទី 30 ខែមិថុនា។

លោក ឡូខក់ បាននិយាយថា ធនធានធម្មជាតិ និងទ្រព្យសម្បត្តិ របស់ប្រទេសស៊ូដង់ខាងត្បូង ស្ថិតក្នុងសភាពគ្រោះថ្នាក់ ខណៈពេលដែលភាគីសង្គ្រាម កំពុងទទួលបានប្រេង និងមាសរបស់ប្រទេសនេះ។

ទោះបីជាមានការចាប់ពង្រត់ ឃាតកម្ម និងការលួចប្លន់ក៏ដោយ បុគ្គលិកជំនួយទាំងអស់ នឹងបន្តនៅក្នុងប្រទេសមួយនេះ ដែលមានមនុស្ស 7 លាននាក់ ពឹងផ្អែកលើជំនួយមនុស្សធម៌ ក្នុងការរស់រានមានជីវិត។ លោកឡូខក់ បានព្រមានថា ប្រទេសស៊ូដង់ខាងត្បូងគឺជា កន្លែងគ្រោះថ្នាក់បំផុត ក្នុងពិភពលោក ដោយនិយាយថា បុគ្គលិកជំនួយ 100 នាក់ បានបាត់បង់ជីវិត ចាប់តាំងពីឆ្នាំ 2013 មក ហើយ រដ្ឋាភិបាលត្រូវតែទទួលខុសត្រូវ ៕

អាជីវកម្មខ្នាតតូច និងមធ្យមគួរសម្របខ្លួនទៅនឹងសេដ្ឋកិច្ចឌីជីថល

June 5, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ ខណៈដែលប្រទេសកម្ពុជាកំពុងវិវត្តន៌ខ្លួនទៅកាន់សេដ្ឋកិច្ចបែបឌីជីថល នាឆ្នាំ២០២៣ខាងមុខនេះ វិស័យឯកជនដែលជាឆ្អឹងខ្នងដ៏សំខាន់នៃកំណើនសេដ្ឋកិច្ចក៏ត្រូវតែចាប់ផ្តើមផ្លាស់ប្តូរបរិបទជាបណ្តើរៗពីការធ្វើអាជីវកម្មបែបប្រពៃណី ទៅកាន់ការធ្វើអាជីវកម្មបែបទំនើប ទើបអាចតាមទាន់ទីផ្សារប្រកួតប្រជែង។

នាពេលបច្ចុប្បន្ន តំបន់អាស៊ាន បានឈានមកដល់ដំណាក់កាលបដិវត្តន៌នៃឧស្សាហកម្មទី៤ ដែលកំពុងវិវត្តន៌យ៉ាងខ្លាំងលើប្រព័ន្ធបច្ចេកវិទ្យាឌីជីថល ទាំងក្នុងការរស់នៅប្រចាំថ្ងៃ ការបំពេញកិច្ចការនានា ជាពិសេស អាស៊ាន ក៏កំពុងឈានទៅរកសេដ្ឋកិច្ចបែបថ្មីមួយ គឺសេដ្ឋកិច្ចបែបឌីជីថល ដែលតម្រូវអោយប្រទេសជាសមាជិកទាំង១០ ត្រូវពង្រឹងសមត្ថភាពដើម្បីអោយដំណើរការនេះមានភាពស៊ីសង្វាក់គ្នាទៅនឹងស្ថានភាពសេដ្ឋកិច្ចជាក់ស្តែង របស់ប្រទេសនីមួយៗ។

ទន្ទឹមនេះ ប្រទេសកម្ពុជា ក៏កំពុងរៀបចំខ្លួនដើម្បីប្រែក្លាយទៅក្នុងសេដ្ឋកិច្ចបែបឌីជីថលនេះដែរ នៅក្នុងឆ្នាំ២០២៣ខាងមុខដែរ ជាក់ស្តែងតាមរយៈវេទិកាសេដ្ឋកិច្ចពិភពលោក ដែលកម្ពុជាជាម្ចាស់ផ្ទះ កាលពីឆ្នាំ២០១៧ រាជរដ្ឋាភិបាលកម្ពុជា បានជំរុញយ៉ាងខ្លាំង អោយវិស័យរដ្ឋ និងវិស័យឯកជន ត្រូវពង្រឹងនូវសមត្ថភាពផ្នែកបច្ចេកវិទ្យាទំនើប ដើម្បីតាមអោយទាន់ ទៅនឹងការវិវត្តន៌របស់ពិភពលោក។ ប៉ុន្តែរហូតមកដល់ឆ្នាំ២០១៨នេះ ក្នុងវិស័យឯកជន សហគ្រាសធុនតូចនិងមធ្យមនៅកម្ពុជាភាគច្រើន នៅពុំទាន់មានការប្រើប្រាស់ ប្រព័ន្ធអាជីវកម្មបែបទំនើប រឺហៅថា បែបឌីជីថល អោយបានទូលំទូលាយនៅឡើយ ខណៈដែលសហគ្រាសធំៗជាច្រើន កំពុងប្រើប្រាស់ ប្រព័ន្ធអាជីវកម្ម ទាំងបែបប្រពៃណី និងបែបឌីជីថល ។ លោក យ៉ន សុភារិទ្ធ សាស្ត្រាចារ្យផ្នែកសេដ្ឋកិច្ច និងជានាយកគ្របគ្រងគេហទំព័រពាណិជ្ជកម្ម Bizkhmer យល់ឃើញថា ផ្អែកលើស្ថានភាពសេដ្ឋកិច្ច របស់កម្ពុជានាពេលបច្ចុប្បន្ន ម្ចាស់អាជីវកម្មខ្នាតតូច និងមធ្យម គួរចាប់ផ្តើម ប្រើប្រាស់យុទ្ធសាស្ត្រទីផ្សារតាមបែបទំនើប រឺហៅថា Digital Marketing ដើម្បី ត្រៀមប្រកួតប្រជែងក្នុងទីផ្សារបែបឌីជីថល។ ជាពិសេស ការប្រើប្រាស់យុទ្ធសាស្ត្រទីផ្សារតាមបែបទំនើប គឺមិនចំណាយថវិកាច្រើន ដូចការប្រើយុទ្ធសាស្ត្រទីផ្សារបែបប្រពៃណីនោះទេ។

ទន្ទឹមនេះ លោក មើលឃើញថា ដោយសារបច្ចុប្បន្នប្រជាជនកម្ពុជាប្រហែលពាក់កណ្តាលនៃចំនួនសរុប ប្រើប្រាស់ប្រព័ន្ធអ៊ិនធើណិត ដូចនេះបើសិនជាម្ចាស់អាជីវកម្ម ចេះប្រើប្រាស់បណ្តាញសង្គម បូកផ្សំជាមួយយុទ្ធសាស្ត្រទីផ្សារទំនើបអោយបានត្រឹមត្រូវ នឹងធ្វើអោយផលិតផល និងម៉ាកយីហោរបស់អាជីវកម្មកាន់តែរីកចម្រើន ៖៖៖ (សម្ភាសន៌ លោក យ៉ន សុភារិទ្ធ សាស្ត្រាចារ្យផ្នែកសេដ្ឋកិច្ច និងជានាយកគ្របគ្រងគេហទំព័រពាណិជ្ជកម្ម Bizkhmer ) គួរបញ្ជាក់ថា សហគ្រាសធុនតូច និង មធ្យម មានចំនួនប្រមាណ៩០ភាគរយ នៃចំនួនសហគ្រាសសរុបនៅកម្ពុជា។

ពលករខ្មែរឈ្លោះវាយគ្នាស្លាប់ម្នាក់នៅ ខេត្តឈុនបុរី

June 5, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ប្រទេសថៃ ៖ ជនរងគ្រោះម្នាក់ដែលជាកម្មករខ្មែរធ្វើការនៅក្នុងខេត្តឈុនបុរី ប្រទេសថៃ បានស្លាប់ភ្លាមៗក្រោយពីបានបញ្ជូនទៅកាន់មន្ទីរពេទ្យ ខណៈដែលជនរងគ្រោះរូបនេះ កំពុងអង្គុយធ្វើការសុខៗ ស្រាប់តែមានជនជាតិខ្មែរដូចគ្នា បានលបវាយនឹងដំបងឈើជ្រុងចំក្បាលពីក្រោយ ព្រមទាំងបានវាយបន្ថែមទើបរត់គេចខ្លួន។

ហេតុការណ៍ដែលយើងទទួលបានពីសារព័ត៌មានថៃនេះ បានកើតឡើងកាលពីថ្ងៃទី៤ ខែមិថុនា ឆ្នាំ២០១៨ វេលាម៉ោង ១២ ថ្ងៃត្រង់ នៅត្រង់ចំណុចទីតាំងកន្លែង បាញ់ថ្នាំរថយន្ត មួយកន្លែង លេខ ១៩/១ ស្ថិតក្នុងភូមិ១ ឃុំណងរី ស្រុកមឿង ខេត្តឈុនបុរី ប្រទេសថៃ ។ ជនរងគ្រោះមានឈ្មោះ វ៉ា គឹមសេង ភេទប្រុស អាយុ៣៧ឆ្នាំ ប៉ុន្តែគេមិនទាន់ដឹងថា ជនរងគ្រោះរស់នៅក្នុងខេត្តណា នៃប្រទេសកម្ពុជា នោះឡើយ ។

បើតាមការអះអាងពីសាក្សីឈ្មោះ ស៊ុ សក្តិ ភេទប្រុស អាយុ៤៧ឆ្នាំ ជាជនជាតិថៃ ធ្វើការនៅកន្លែងជាមួយគ្នា បាននិយាយថា នៅមុនពេលកើតហេតុ គឺជនរងគ្រោះ កំពុងអង្គុយធ្វើការជាធម្មតា ឯខ្លួនក៏នៅធ្វើការមិនឆ្ងាយពីគ្នាប៉ុន្មានដែរ ។ ភ្លាមៗនោះ ក៏ស្រាប់តែឮដូចជាសម្លេងគេវ៉ៃមនុស្ស លុះពេលក្រលេកមើលទៅម្តងទៀត គឺឃើញ ជនរងគ្រោះដួលដេកទៅលើដី ពោរពេញដោយឈាមទៅហើយ ហើយនៅពីក្រោយខ្នង ឃើញឈ្មោះ ផេក លៀប ភេទប្រុស អាយុ២៧ឆ្នាំ ត្រូវជាក្មួយ កំពុងឈរកាន់ដំបងឈើជ្រុងវាយបន្ថែមទៀត ទើបខ្លួនបានលោតទៅស្រែឃាត់ ហើយជនសង្ស័យក៏បានរត់គេចខ្លួនបាត់តែម្តង ។

ដោយឡែកអ្នកស្រី ថុនឌី សកល អាយុ៣៧ឆ្នាំ ជាថៅកែនៅកន្លែងកើតហេតុនេះ បានលើកឡើង និងសរសើរថា ជនសង្ស័យខាងលើ គេគឺជាមនុស្សរាបសារណាស់ ដោយមិនដែលចេះកោងកាចដាក់អ្នកណាម្នាក់ឡើយ ដោយគ្រាន់តែកន្លងមក គេធ្លាប់មានរោគសរសៃប្រសាទហើយសង្ស័យថា អាចខានលេបថ្នាំយូរពេកទើបរោគសញ្ញានេះរើឡើងវិញ ។

បន្ទាប់មក ក្រុមតម្រួតថៃបានបញ្ជូនជនរងគ្រោះទៅកាន់មន្ទីរពេទ្យខេត្ត ឈុនបុរី ព្រមទាំងបានជួយធ្វើចលនាបេះដូងផង ប៉ុន្តែជនរងគ្រោះបានស្លាប់ដោយមិនទាន់បានទៅដល់មន្ទីរពេទ្យផង ។ ឯជនសង្ស័យត្រូវបានសមត្ថកិច្ចថៃ តាមប្រមាញ់នឹងចាប់ខ្លួនបាននៅត្រង់ចំណុចឃុំបាងប្លាសយ ក្នុងស្រុកមឿង និងបាននាំយកទៅសាកសួរបន្តតាមច្បាប់ ៕

សម្តេច ហេង សំរិន អញ្ជើញបើកកិច្ចប្រជុំគណៈអចិន្ត្រៃយ៍រដ្ឋសភា

June 5, 2018Uncategorized, ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ គណៈកម្មាធិការអចិន្ត្រៃយ៍រដ្ឋសភានៃព្រះរាជាណាចក្រកម្ពុជា ព្រឹកថ្ងៃទី៥ ខែមិថុនា ឆ្នាំ២០១៨នេះ បានបើកកិច្ចប្រជុំ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា ដោយ អង្គប្រជុំបានធ្វើការពិភាក្សា និងអនុម័តតាមរបៀបវារៈមួយចំនួនដូចខាងក្រោម៖

១- អនុម័តបញ្ចូលក្នុងរបៀបវារៈនៃសម័យប្រជុំរដ្ឋសភាលើកទី១០ នីតិកាលទី៥ នូវ៖ សេចក្តីព្រាងច្បាប់ស្តីពី ប្រាក់ឈ្នួលអប្បបរមា -សេចក្តីព្រាងច្បាប់ស្តីពី វិសោធនកម្មមាត្រា៨៧ ចំណងជើងចំណុច “គ” ផ្នែកទី៣ នៃជំពូកទី៤ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និងមាត្រា១២២ នៃច្បាប់ស្តីពីការងារ -សេចក្តីព្រាងច្បាប់ស្តីពីវិសោធនកម្មមាត្រា៣ មាត្រា៦ មាត្រា៧ មាត្រា៨ មាត្រា៩ មាត្រា១១ មាត្រា១២ ចំណងជើងជំពូកទី៤ មាត្រា១៦ មាត្រា១៩ មាត្រា២៦ មាត្រា៥០ មាត្រា៥១ មាត្រា៥២ មាត្រា៥៣ មាត្រា៥៤ មាត្រា៥៥ មាត្រា៥៦ មាត្រា៥៧ មាត្រា៥៨ មាត្រា៥៩ មាត្រា៦៥ មាត្រា៦៦ មាត្រា៦៧ និងមាត្រា៦៨ នៃច្បាប់ស្តីពីស្តង់ដាកម្ពុជា។

២- អង្គប្រជុំបានអនុម័តកាលបរិច្ឆេទបន្តសម័យប្រជុំរដ្ឋសភាលើកទី១០ នីតិកាលទី៥ នៅព្រឹកថ្ងៃព្រហស្បតិ៍ ទី៧ ខែមិថុនា ឆ្នាំ២០១៨ ដោយមានរបៀបវារៈសម័យប្រជុំ ដូចខាងក្រោម៖
ការពិភាក្សា និងអនុម័ត សេចក្តីព្រាងច្បាប់ស្តីពី ប្រាក់ឈ្នួលអប្បបរមា ការពិភាក្សា និងអនុម័ត សេចក្តីព្រាង ច្បាប់ស្តីពី វិសោធនកម្មមាត្រា៨៧ ចំណងជើងចំណុច “គ” ផ្នែកទី៣ នៃជំពូកទី៤ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និងមាត្រា១២២ នៃច្បាប់ស្តីពីការងារ -ការពិភាក្សា និងអនុម័ត សេចក្តីព្រាងច្បាប់ស្តីពីវិសោធនកម្មមាត្រា៣ មាត្រា៦ មាត្រា៧ មាត្រា៨ មាត្រា៩ មាត្រា១១ មាត្រា១២ ចំណងជើងជំពូកទី៤ មាត្រា១៦ មាត្រា១៩ មាត្រា២៦ មាត្រា៥០ មាត្រា៥១ មាត្រា៥២ មាត្រា៥៣ មាត្រា៥៤ មាត្រា៥៥ មាត្រា៥៦ មាត្រា៥៧ មាត្រា៥៨ មាត្រា៥៩ មាត្រា៦៥ មាត្រា៦៦ មាត្រា៦៧ និងមាត្រា៦៨ នៃច្បាប់ស្តីពីស្តង់ដាកម្ពុជា៕