រាជធានីភ្នំពេញ ៖ អតីតប្រធានគណបក្សសង្គ្រោះជាតិ ដែលកំពុងនិរទេសខ្លួនលោក សម រង្ស៊ី នៅថ្ងៃទី២៧ ខែតុលា ឆ្នាំ២០១៧នេះ បានចេញនូវវីដេអូឃ្លីបមួយ ខណៈដែលខ្លឹមសារខ្លះៗ ដែលលោកបាននិយាយធ្វើឲ្យគេកត់សម្គាល់ថា លោកចាប់ផ្តើមសង្ស័យលើលោក កឹម សុខា ដែលកំពុងជាប់ឃុំខ្លួនក្នុងពន្ធនាគារត្រពាំងថ្លុង។
លោក សម រង្ស៊ី បាននិយាយថា « ឥឡូវនេះលោក កឹម សុខា គឺស្ថិតនៅក្រោមការគំរាមកំហែង ។ ដូច្នេះរាល់សេចក្តីសម្រេច ឬសេចក្តីប្រកាសអ្វីមួយរបស់លោក កឹម សុខា យើងជឿ ជាក់ថា មិនមែនជាសេចក្តីសម្រេចរបស់គាត់ពិតប្រាកដនោះទេ » ។ លោកបន្តថា បើគាត់មានសេរីភាពពេញលេញ គឺគាត់ច្បាស់ជាមិនធ្វើអ្វីតាមគេបង្គាប់បញ្ជារឲ្យគាត់ធ្វើនោះទេ ។ លោកថា មានអ្នកខ្លះកំពុងយក ឈ្មោះលោក កឹម សុខា ទៅប្រើប្រាស់ ដើម្បីទាក់ទាញមន្ត្រីគណបក្សសង្គ្រោះជាតិឲ្យចុះចូល ជាមួយបក្សកាន់អំណាច!….។
លោក សម រង្ស៊ី បាននិយាយថា យើងមិនព្រមដាច់ខាតរាល់ការសម្រេចទាំងឡាយណា របស់លោក កឹម សុខា នៅពេលដែលលោក កឹម សុខា ពុំមានសេរីភាពគ្រប់គ្រាន់ ។លោកថា រាល់ការសម្រេចរបស់គណបក្សសង្គ្រោះជាតិ គឺមានតែគណកម្មាធិការអចិន្ត្រៃយ៍គណបក្សទើប ធ្វើសេចក្តីសម្រេចចិត្តបាន ។
ការប្រកាសរបស់លោក សម រង្ស៊ី ធ្វើឡើងបន្ទាប់ពីចរន្តនៃការចុះចូលរបស់មន្ត្រីថ្នាក់លើ និងមន្ត្រីថ្នាក់មូលដ្ឋានរបស់គណបក្សសង្គ្រោះជាតិ ទៅចូលរួមជីវភាពនយោបាយជាមួយ CPP កាន់តែច្រើនឡើងៗ បើទោះជាមន្ត្រីមួយចំនួនបានធ្វើការរារាំងតាមគ្រប់រូបភាពក៏ដោយ ។
តាមព័ត៌មានទទួលបានមន្ត្រីភាគច្រើនរបស់គណបក្សសង្គ្រោះជាតិ បានទទួលសារណែនាំពីមន្ត្រីជំនិតរបស់លោក កឹម សុខា ដែលផ្តាំផ្ញើឲ្យមន្ត្រីគណបក្សសង្គ្រោះជាតិ ចុះចូលជាមួយបក្សប្រជាជនកម្ពុជាទៅ ដើម្បីរក្សាតំណែង និងអនាគតនយោបាយ ព្រោះគណបក្សសង្គ្រោះជាតិនឹងត្រូវរលាយនៅពេលឆាប់ៗ ខាងមុខនេះហើយរឿងក្បត់ជាតិ ។
ព័ត៌មានខាងលើនេះ បានធ្វើឲ្យលោក សម រង្ស៊ី កើតមន្ទិលយ៉ាងខ្លាំង ចំពោះលោក កឹម សុខា ដែលអាចនិយាយថា លោក កឹម សុខា កំពុងតែត្រូវរ៉ូវគ្នាជាមួយថ្នាក់ដឹកនាំបក្សកាន់ អំណាច ហើយបង្កើតឆាកល្ខោននយោបាយនេះឡើង ដោយលោក កឹម សុខា សុខចិត្តទទួលយកទោសក្បត់ជាតិ ជាថ្នូរនឹងអ្វីមួយ ។
ទាក់ទងព័ត៌មាននេះ គេគួរតែរម្លឹកទៅអតីតកាលបន្តិចនៅពេលដែល Facebook សីហា បានទម្លាយសម្លេងឆ្លើយឆ្លងរវាងសម្តេច ហ៊ុន សែន និងលោក កឹម សុខា ក្នុងការរៀបចំសេណា នីយោ ទាញទម្លាក់លោក សម រង្ស៊ី ពីប្រធានគណបក្សសង្គ្រោះជាតិ ហើយតំណែងប្រធាន គណបក្សសង្គ្រោះជាតិត្រូវដណ្តើមកាន់កាបដោយលោក កឹម សុខា ។ បើយើងបានស្តាប់ និងពិចារណាទៅលើសម្លេងឆ្លើយឆ្លងនោះ គឺសម្តេច ហ៊ុន សែន និងលោក កឹម សុខា ជាមនុស្សក្នុងក្រុមជាមួយគ្នា ហើយរួមគ្នាកម្ចាត់លោក សម រង្ស៊ី ៕
ភ្នំពេញ ៖ ជនសង្សយ័ម្នាក់បានធ្វើសកម្មភាពឆក់ទូរសព្ទ័មួយគ្រឿងម៉ាក Iphone5 ពីយុវតី២នាក់ខណៈអង្គុយលើបង់លេងជាមួយមិត្តភក្តិ។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង៩ និង១៥នាទីព្រឹកថ្ងៃទី២៧ ខែតុលា ឆ្នាំ២០១៧ ស្ថិតនៅក្នុងបរិវេណកោះពេជ្រក្នុងសង្កាត់ទន្លេបាសាក់ខណ្ឌចំការមន។
បើយោងតាមសម្តីយុវតីរងគ្រោះខាងលើបានអោយដឹងថា មុនពេលកើតហេតុរូបនាងនិងមិត្តភក្រ័ម្នាក់ទៀតបានអង្គុយចុចទូរស័ព្ទលេង ស្របពេលនោះក៏លេចមុខជនសង្សយម្នាក់ជិះម៉ូតូមួយគ្រឿងម៉ាកC125 សេរីឆ្នាំ២០១៥ ពណ៌ខ្មៅពាក់ស្លាកលេខកំពង់ឆ្នាំង1A0159បានជិះមកក្បែរនាង ហើយសួរថា មេច ហើយមកអង្គុយលេងតែ២នាក់ទេហ្អ៊ែ ហើយក៏បានឆក់ទូរស័ព្ទពីដៃនាង ហើយព្យាយាមជិះម៉ូតូរត់គេចខ្លួន តែត្រូវបានសន្តិសុខ និងប្រជាពលរដ្ឋចាប់វាយបែកក្បាលប្រគល់អោយនគរបាលប៉ុស្តិ៍ទន្លេបាសាក់។
សមត្ថកិច្ចបានអោយដឹងថា ជនសង្ស័យមានឈ្មោះ ភុន អាក់ អាយុ២៩ឆ្នាំ មុខរបររត់ម៉ូតូឌុបស្នាក់នៅបន្ទប់ជួលភូមិតាឡី សង្កាត់ដង្កោ ខណ្ឌដង្កោ។ ចំណែកយុវតីរងគ្រោះខាងលើមានឈ្មោះ គុណ ណាវីអាយុ១៦ឆ្នាំស្នាក់នៅម្តំផ្សាររាត្រី។
បច្ចុប្បន្នជនសង្ស័យលើត្រូវបានបញ្ជូនទៅឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌចំការមនដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី៕
រាជធានីភ្នំពេញ ៖ អ្នកនាំពាក្យរាជរដ្ឋាភិបាល លោក ផៃ ស៊ីផាន បានដកស្រង់ប្រសាសន៍សម្តេច មកបញ្ជាក់ថា «សម្តេចតេជោ គ្មានទ្រព្យសម្បត្តិណាទុកនៅក្រៅប្រទេសទេ គឺមានតែថវិកាកសាងសាលារៀន កសាងជាតិតែប៉ុណ្ណោះ ។ សម្តេចបញ្ជាក់ថា ការចូលទៅកាន់ទឹកដីសហរដ្ឋអាមេរិកមិនប៉ះពាល់ដល់អារម្មណ៍របស់សម្តេចនោះទេ សម្តេចគ្មានពេលធ្វើដំណើរទៅសហរដ្ឋអាមេរិកទាល់តែសោះ ក៏ប៉ុន្តែមន្ត្រីណាមួយប៉ះពាល់ជារឿងដាច់ដោយឡែកតែប៉ុណ្ណោះ»។
សម្តេច ហ៊ុន សែន បានបញ្ជាក់បន្ថែមថា គ្មានអ្វីអាចបង្វែរទិសដៅនៃការបេ្តជ្ញាការពារកម្ពុជា មិនអោយវិលត្រលប់ទៅកាន់អតីតកាល នៃសោកដនាកម្មកម្ពុជា ដែលបំផ្លាញដោយបរទេសនោះទេ។
សម្តេច ហ៊ុន សែន បានបង្ហាញជំហររឹងមាំក្នុងកិច្ចការការពារ និងថែរក្សា សន្តិភាព សន្តិសុខជាតិ និងវិបុលភាព សម្រាប់ប្រជាជាតិខ្មែរទាំងអស់ ទោះជាតម្លៃណាក៏ដោយ គឺមិនអនុញ្ញាតឲ្យកម្ពុជាវិលត្រឡប់ទៅកាន់សភាពការអាក្រក់ដូចឆ្នាំ១៩៧០ ដែលបំផ្លាញអនាគតកម្ពុជាជាច្រើនទសវត្សរ៍នោះឡើយ៕
កូរ៉េខាងត្បូង ៖ នៅថ្ងៃសុក្រនេះរដ្ឋមន្ត្រីការពារសហរដ្ឋអាមេរិកលោក ជេម ម៉ាទីស (James Mattis) បានធ្វើដំណើរទៅដល់ប្រទេសកូរ៉េខាងត្បូងដែលជាការធ្វើដំណើរដ៏សំខាន់នៅតំបន់អាស៊ីក្នុងបំណងបញ្ជាក់ពីកិច្ចប្រឹងប្រែងការទូតដោះស្រាយវិបត្តិអហិង្សានូវភាពតានតឹងដែលចេះតែកើនឡើងរវាងសហរដ្ឋអាមេរិកនិងប្រទេសកូរ៉េខាងជើង។
ក្នុងដំណើរមកដល់របស់រដ្ឋមន្ត្រីការពារអាមេរិកនៅថ្ងៃនេះត្រូវបានគេរំពឹងថា លោកនឹងធ្វើដំណើរជាមួយរដ្ឋមន្ត្រីការជាតិប្រទេសកូរ៉េខាងត្បូងលោក សុង យុងមូ ទៅតំបន់គ្មានកងទ័ព ឬហៅថា តំបន់ស (DMZ) ដែលជាបន្ទាត់ចែកព្រំដែនរវាងប្រទេសកូរ៉េខាងជើង និងខាងត្បូង។ ក្នុងរយៈពេលប៉ុន្មានថ្ងៃថ្មីៗនេះលោក ម៉ាទីស បានធ្វើការរិះគន់ខ្លាំងៗជាថ្មីទៀតចំពោះការបាញ់សាកល្បងមីស៊ីលពីសំណាក់ប្រទេសកូរ៉េខាងជើងដោយនិយាយថា ប្រទេសនេះកំពុងគំរាមកំហែងសន្តិសុខតំបន់និងពិភពលោក។
សូមបញ្ជាក់ថា លោក ម៉ាទីស បានចាប់ផ្ដើមដំណើរទស្សនកិច្ចមកតំបន់អាស៊ីរយៈពេល១សប្ដាហ៍ដោយចាប់ផ្ដើមធ្វើដំណើរមុនគេគឺទៅកាន់ប្រទេសហ្វីលីពីនកាលពីថ្ងៃចន្ទដើមសប្ដាហ៍នេះ៕
រាជធានីភ្នំពេញ ៖ លោក ឡុង ប៊ុន្នី តំណាងរាស្ត្រគណបក្សសង្គ្រោះជាតិ (CNRP) ដែលបានមកចូលរួមជីវភាពនយោបាយជាមួយ គណបក្សប្រជាជនកម្ពុជា ត្រូវបានទទួលតំណែងជាទីប្រឹក្សាផ្ទាល់សម្តេចនាយករដ្ឋមន្ត្រី ។ នេះបើយោងតាមការសរសេរនៅលើប្រព័ន្ធទំនាក់ទំនងសង្គមរបស់អ្នកនាំពាក្យរាជរដ្ឋាភិបាល ។
លោក ផៃ ស៊ីផាន បានសរសេរថា ឯកឧត្តម ឡុង ប៊ុន្នី ទទួលបានឱកាសក្នុងកិច្ចចូលរួមកសាងការពារប្រជាពលរដ្ឋខ្មែរប្រាសចាកពីអំពើក្បត់ជាតិនៃក្រុមឧទ្ទាមជាប្រព័ន្ធគណបក្សសង្គ្រោះជាតិ។ជាមួយនេះដែរ សម្តេចតេជោបានបង្ហាញជំហររឹងមាំ ក្នុងកិច្ចការការពារ និងថែរក្សា សន្តិភាព សន្តិសុខជាតិ និងវិបុលភាព សម្រាប់ប្រជាជាតិខ្មែរទាំងអស់ ទោះជាតម្លៃណាក៏ដោយគឺមិនអនុញ្ញាតអោយកម្ពុជាវិលត្រឡប់ទៅកាន់សភាពការអាក្រក់ដូចឆ្នាំ ១៩៧០ ដែលបំផ្លាញអនាគតកម្ពុជាជាច្រើនទស្សវត្ស” ៕
រាជធានីភ្នំពេញ ៖ ថ្លែងនៅក្នុងសន្និសីទកាសែតនាព្រឹកថ្ងៃទី២៧ ខែតុលា ឆ្នាំ២០១៧នេះ លោក ញ៉េម ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច បានថ្លែងថា គណបក្សរាជានិយមមួយនេះ នឹងទទួលយកអសនៈរដ្ឋសភា ខណៈដែលគណបក្សសង្គ្រោះជាតិ ត្រូវរំលាយនាពេលឆាប់ៗ ខាងមុខនេះ ។
នៅព្រឹកនេះ មន្ត្រីជាន់ខ្ពស់គណបក្សហ្វ៊ុនស៊ិនប៉ិច ដឹកនាំដោយ លោក ញ៉េប ប៊ុនជិន អ្នកនាំពាក្យគណបក្ស បាននឹងកំពុងរៀបចំសន្និសីទសារព័ត៌មាន ស្ដីពីស្ថានការនយោបាយ កម្ពុជា នាពេលបច្ចុប្បន្ន ខណដែលគេរំពឹងថា ការរំលាយគណបក្សសង្គ្រោះជាតិ កាន់តែខិត ជិតមកដល់ ហើយគណបក្សរាជានិយមមួយនេះនឹងត្រូវទទួលបានអសនៈរដ្ឋសភាច្រើនជាងគេ ៕
រាជធានីភ្នំពេញ ៖ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានថ្លែងថា នៅកម្ពុជាមានអ្នកមានជំងឺអេពីឡឹបស៊ី ឬជំងឺឆ្កួតជ្រូក ប្រមាណ១០ម៉ឺននាក់ ខណៈនៅក្នុងពិភពលោកមានយ៉ាងហោចណាស់ ៥០លាននាក់នោះ។
លោក ម៉ម ប៊ុនហេង បានបញ្ជាក់ថា ជាការឆ្លើយតប ក្នុងការប្រយុទ្ធប្រឆាំងចំពោះជំងឺនេះ ក្រសួងសុខាភិបាលបានរួមសហការ ជាមួយមន្ទីរពេទ្យសកលវិទ្យាល័យ វិទ្យាសាស្ត្រសុខាភិបាល សមាគមប្រសាទសាស្ត្រកម្ពុជា សមាគមប្រយុទ្ធប្រឆាំង នឹងអេពីឡឹបស៊ីកម្ពុជា និងភាគីបារាំង តាមរយៈវគ្គបណ្តុះបណ្តាលគ្រូពេទ្យ អំពីជំងឺអេឡឹបស៊ី នៅទូទាំងប្រទេស ធ្វើការសិក្សាអំពីប្រេវ៉ាឡង់ អំពីអេពីឡឹបស៊ី នៅខេត្តព្រៃវែង និងគម្រោងស្រាវជ្រាវជំងឺនេះ នៅខេត្តត្បូងឃ្មុំ ៕
ម៉ិកស៊ិក ៖ ក្រុមរដ្ឋអាជ្ញាម៉ិកស៊ិកបាននិយាយថា ប៉ូលិសបានចាប់ខ្លួនកំពូលមេជួញដូរគ្រឿងញៀនហេរ៉ូអ៊ីនម្នាក់ដែលជាកូនប្រុសរបស់លោក ហ្គូស្មាន់ ជាមេខ្លោងជួញដូរគ្រឿងញៀនស៊ីណាឡៅ (Sinaloa) នៅប្រទេសម៉ិកស៊ិក។
កូនប្រុសរបស់លោក ហ្គូស្មាន់ បានឡើងកាន់តំណែងជាមេខ្លោងជួញដូរគ្រឿងញៀនបន្តពីឪពុករបស់លោកបន្ទាប់ពីប៉ូលិសបានចាប់ខ្លួនឪពុករបស់លោកកាលពីឆ្នាំមុន ហើយបញ្ជូនទៅសហរដ្ឋអាមេរិក។
ការិយាល័យអគ្គមេធាវីបាននិយាយថា លោក វិចទ័រ ម៉ាញូល ហ្វេលិក ត្រូវបានចាប់ខ្លួនពីថ្ងៃម្សិលមិញនេះនៅបរិវេណផ្ទះល្វែងមួយនៅជាយទីក្រុងម៉ិកស៊ីកូនៅប្រទេសម៉ិកស៊ិក។
សូមបញ្ជាក់ថា លោក ហ្វេលិក ត្រូវបានប្រកាសតាមចាប់ខ្លួនពីបទជួញដូរគ្រឿងញៀនហេរ៉ូអ៊ីនតាមការស្នើសុំពីសហរដ្ឋអាមេរិក ហើយលោក ហ្វេលិក ក៏រងការចោទប្រកាន់ថា មានការពាក់ព័ន្ធនឹងការលាងលុយកខ្វក់តាមរូបជាប្រតិបត្តិការហិរញ្ញវត្ថុតំណាងឲ្យបងប្អូនមួយចំនួនទៀតផងដែរ៕
ហ្សាការតា ៖ ប៉ូលិសឥណ្ឌូណេស៊ីបាននិយាយថា មនុស្ស៣០នាក់ និងរបួស៤៦នាក់ក្នុងហេតុការណ៍ផ្ទុះឆេះរោងចក្រផលិតកាំជ្រួច នៅក្នុងក្រុងតាងហ្គឺរ៉ាង (Tangerang) ក្បែររដ្ឋធានីហ្សាការតា។ នេះបើតាមទីភ្នាក់ងារព័ត៌មានចិន ស៊ីនហួរ។
មន្ត្រីប៉ូលិសរក្សាសន្តិសុខសណ្តាប់ធ្នាប់ប្រចាំទីក្រុង Tangerang ដែលស្ថិតនៅភាគនិរតីរដ្ឋធានីហ្សាការតា ឈ្មោះ Saduni បានប្រាប់អ្នកសារព័ត៌មានថា អ្នកដែលបានទទួលរបួសទាំងអស់ កំពុងសម្រាកព្យាបាលនៅក្នុងមន្ទីរពេទ្យចំនួន ០៣កន្លែង នៅក្បែរៗនោះ។ អាជ្ញាធររូបនេះបានបន្ថែមថា ចំនួនមនុស្សស្លាប់នាពេលនេះ គឺ ៣០នាក់ និងរបួស ៤៦នាក់។
បើតាមមេបញ្ជាការប៉ូលិសក្រុង Tangerang លោក Hari Kurniawan ហេតុការណ៍ខាងលើសង្ស័យថា ត្រូវបានបង្កឡើងដោយសារតែបញ្ហាផ្នែកចរន្តអគ្គីសនី៕
រាជធានីភ្នំពេញ ៖ នៅព្រឹកថ្ងៃទី២៧ ខែតុលា ឆ្នាំ២០១៧នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នឹងអញ្ជើញដឹកនាំកិច្ចប្រជុំគណៈរដ្ឋមន្ត្រី ដើម្បីពិភាក្សាទៅលើរបៀវារៈសំខាន់មួយចំនួន។
របៀបវារៈដែលលើកមកពិភាក្សាក្នុងកិច្ចប្រជុំគណៈរដ្ឋមន្ត្រីនាព្រឹកនេះរួមមាន៖
១- សេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៨។
២- សេចក្តីព្រាងច្បាប់ ស្តីពីការទូទាត់ថវិការទូទៅរបស់រដ្ឋសម្រាប់ការគ្រប់គ្រងឆ្នាំ២០១៦ ។
៣- បញ្ហាផ្សេងៗ ៖សំណើរសុំការយស់ព្រមពីគណៈរដ្ឋមន្ត្រីដើម្បីិសុំសច្ចាប័នពីស្ថាប័ននីតិប្បញ្ញត្តិលើ៖
៣.១- កិច្ចព្រមព្រាងរវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋសិង្ហឹបុរី ស្តីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធ និងពន្ធលើប្រាក់ចំណូល។
៣.២- កិច្ចព្រមព្រាងរវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាមានិតចិន ស្តីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធ និងពន្ធលើប្រាក់ចំណូល។
៣.៣- កិច្ចព្រមព្រាងរវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃព្រះចៅស៊ុលតង់ និងយ៉ាងឌិពើរតួននៃប្រទេសប្រ៊ុយណេដារូសាឡឹម ស្តីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធ និងពន្ធលើប្រាក់ចំណូល។
៣.៤- កិច្ចព្រមព្រាងរវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃព្រះរាជាណាចក្រថៃ ស្តីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធ និងពន្ធលើប្រាក់ចំណូល។
៣.៥- ធម្មនុញ្ញមជ្ឈមណ្ឌលត្រៀមបង្ការគ្រោះមហន្តរាយអាស៊ី(ADPC)៕
រាជធានីភ្នំពេញ ៖ សហព័ន្ធស្រូវអង្ករកម្ពុជាបានឲ្យដឹងថា ដើម្បីស្វែងរកអ្នកទទួលជ័យលាភីអង្ករ ដែលមានគុណភាពល្អបំផុត យកទៅប្រកួតប្រជែងជាមួយប្រទេសនានាក្នុងកម្មវិធីការប្រកួតអង្ករល្អបំផុតពិភពលោកលើកទី៩ ដែលនឹងប្រព្រឹត្តទៅនៅថ្ងៃទី ៦-៨ ខែវិច្ឆិកា ឆ្នាំ២០១៧ នៅទីក្រុងម៉ាកាវ ប្រទេសចិន សហព័ន្ធស្រូវអង្ករកម្ពុជានឹងរៀបចំឲ្យមានការប្រកួតអង្ករល្អបំផុតប្រចាំឆ្នាំ ដែលប្រព្រឹត្តទៅនៅថ្ងៃទី០១ ខែវិច្ឆិកា ឆ្នាំ២០១៧ នៅភោជនីដ្ឋាន អ៊ុយ គុយទាវ (បឹងកេងកង)។
សហព័ន្ធស្រូវអង្ករបានឲ្យដឹងថា ចំពោះអង្ករដែលនឹងត្រូវយកមកប្រកួតស្វែងរកជ័យលាភីមាន ៣ប្រភេទដូចខាងក្រោម ៖ ១. ជ័យលាភីលើអង្ករក្រអូបប្រណិត (Premium Fragrant Rice)។ ២. ជ័យលាភីលើអង្ករក្រអូប (Fragrant Rice)។ ៣. ជ័យលាភីលើអង្ករសគ្រាប់វែង (Long Grain White Rice)៕
បាងកក ៖ ប្រទេសថៃបានចាប់ផ្ដើមប្រារព្ធព្រះរាជពិធីថ្វាយព្រះភ្លើងព្រះសពព្រះមហាក្សត្រ ភូមិបុលអាឌុលយ៉ាដេត រយៈពេល៥ថ្ងៃ ហើយថ្ងៃនេះគឺថ្ងៃដែលត្រូវថ្វាយព្រះភ្លើងរំលាយព្រះសពហើយ។
ព្រះមហាក្សត្រ ភូមិបុល បានសោយទិវង្គតកាលពីឆ្នាំមុនក្នុងព្រះជន្ម៨៨ព្រះវស្សា ហើយព្រះសពព្រះអង្គនឹងត្រូវថ្វាយព្រះភ្លើងនៅទីវាលព្រះមេរុនៅខាងមុខព្រះរាជវាំងក្នុងទីក្រុងបាងកកប្រទេសថៃ ហើយគេរំពឹងថា ព្រះរាជពិធីនេះនឹងមានអ្នកចូលរួមប្រហែល២៥ម៉ឺននាក់។
នៅថ្ងៃនេះព្រះសពព្រះមហាក្សត្រនឹងត្រូវរំកិលចេញពីព្រះបរមរាជវាំងដង្ហែទៅកាន់ព្រះមេរុតម្កល់ព្រះសពនៅទីលានសាធារណៈមួយនៅខាងមុខព្រះរាជវាំងជាទីដែលមានប្រជាពលរដ្ឋរាប់ពាន់នាក់បាននាំគ្នាបោះតង់ដើម្បីចូលរួមក្នុងពិធីនេះ។
សូមរំលឹកថា អតីតព្រះមហាក្សត្រថៃ ភូមិបុល អាឌុលយ៉ាដេត បានគ្រងរាជ្យអស់រយៈពេល៧០វស្សា ហើយព្រះអង្គបានសោយព្រះទិវង្គតក្នុងព្រះជន្ម៨៨វស្សាកាលពីឆ្នាំ២០១៦ ហើយព្រះរាជបុត្ររបស់ព្រះអង្គ ព្រះនាម ម៉ាហា វ៉ាជីរ៉ាលុងកន បានស្នងរាជ្យបន្តពីព្រះអង្គ៕
ខេត្តកំពង់ចាម ៖ សង្វៀនបញ្ជល់មាន់ នៅតាមស្រុកមួយចំនួនក្នុងខេត្តកំពង់ចាម នៅតែកើតមានទ្បើងដូចផ្សិត មានទីតាំងខ្លះកើតនៅក្បែរៗ អធិការដ្ឋាននគរបាលស្រុកទៅទៀត ដូចជានៅក្នុងស្រុកចំការលើ និងស្រុកជើងព្រៃ ជាដើម។
ទោះបីរាជរដ្ឋាភិបាល បានដាក់កំហិត រឹតបន្តឹងអោយ មន្ត្រីមានសមត្ថកិច្ចជួយទប់ស្កាត់បង្រា្កប បទល្មើស ទាំងនោះក្តី ក៏អស់លោកមានសមត្ថកិច្ចមួយចំនួនបានធ្វើព្រងើយកន្តើយ និងបានប្រើប្រាស់សារាចរណែនាំ របស់ថ្នាក់ដឹកនាំខេត្ត ឬប្រមុខរាជរដ្ឋាភិបាល ធ្វើជាដាវអាជ្ញាសឹក ដើរប្រុមូលលុយពីបទល្មើសគ្រប់ជំពូក ដូចជាពីម្ចាស់សង្វៀនជល់មាន់ ឬល្បែងស៊ីសងនានាទៅវិញ។
ករណីជាក់ស្តែងមួយ ស្ថិតនៅទល់មុខអនុវិទ្យាលយ័ ស្គន់ ខាងក្រោយហាងសាំង តាសារឹម ចំងាយប្រហែល ៥00 ម៉ែត្រ មានសង្វៀនបញ្ជល់មាន់មួយកន្លែង បានបើកលេងយ៉ាងចំហយ៉ាងអនាធិបតេយ្យ និងសង្វៀនបញ្ជល់មាន់មួយកន្លែងទៀត ស្ថិតនៅចំណុចដីថ្មី ក្នុងភូមិដីថ្មី ឃុំ តាប្រ៉ុក ស្រុកចំការលើ ខេត្តកំពង់ចាម បានបើកលេងគគ្រឹកគគ្រេងដែរ ហាក់ក្លាយជាល្បែងប្រជាប្រិយ៏ទៅហើយ។
ប្រជាពលរដ្ឋដែលនៅជិតផ្លូវចូលទៅសង្វៀនទាំងនោះ បានប្រាប់ឱ្យដឹងថា ពលរដ្ឋក្នុងតំបន់នេះ គ្មានជំនឿទុកចិត្តលើសមត្ថកិច្ចទៀតទេ ព្រោះកន្លងមក គេឃើញមន្ត្រីនគរបាលស្រុក និងនគរបាលប៉ុស្តិ៍ ពេលចុះបង្រាបម្តងៗ មិនដែលឃើញចាប់បានអ្នកលេង ឬម្ចាស់សង្វៀននោះទ្បើយ សម្បីតែម៉ូតូ ឬរថយន្ត ដែលជាមធ្យោបាយ របស់អ្នកញៀនល្បែងជិះមកលេង ក៏មិនដែលចាប់បានដែរ។ ប្រភពដដែល បន្តថា នៅក្នុងជួរសមត្ថកិច្ច មានរនុកក្នុងរបស់មេសង្វៀន ដូច្នេះ អ្នកលេងទាំងអស់ត្រូវបានមន្ត្រីខិលខូចលួចបោះដៃឱ្យរត់គេចខ្លួនអស់តាំងពីមុនពេលសមត្ថកិច្ចទៅដល់ម្ល៉េះ។ ចំណែកសមត្ថកិច្ចបានត្រឹមតែរុះដំបូលរោងប្រកតង់កៅស៊ូ និងកៅអីជរ័ ៥ ទៅ១០ កៅអី មកដុតចោល បង្ហាញថ្នាក់លើ និងបំភ័នភ្នែកប្រជាពលរដ្ឋប៉ុណ្ណោះ។
យ៉ាងណាក៏ដោយ ប្រជាពលរដ្ឋបានទទូចស្នើឱ្យលោក ឯម កុសល ស្នងការនគរបាលខេត្ត និងលោក ក្រួច ចំរើន អភិបាលខេត្តកំពង់ចាម មេត្តាត្រួតពិនិត្យមន្ត្រីថ្នាក់ក្រោម និងមានវិធានការលើករណីដូចបានរៀបរាប់ខាងលើផង ព្រោះបទល្មើសជាច្រើន រួមទាំងអំពើហិង្សាក្នុងគ្រួសារផង បានកើតចេញពីអ្នកចាញ់ល្បែងនេះឯង៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
