ភ្នំពេញ ៖ រាជធានីភ្នំពេញនឹងមានខ្សែរត់រថភ្លើងអាកាស AGT ប្រវែងជិត២០គីឡូម៉ែត្រ ដោយរត់ លើ មហាវិថី៦ខ្សែនៅកណ្តាលនិងនៅជាយក្រុងនាពេលឆាប់ៗខាងមុខនេះ ដើម្បីចូលរួមការកាត់បន្ថយ ការកកស្ទះចរាចរណ៍ ការប្រែប្រួលអាកាសធាតុ និងការវិវត្តន៍នៃសង្គមសេដ្ឋកិច្ចរបស់ប្រទេសកម្ពុជា នាពេលអនាគត ។
ការបង្ហាញពីគម្រោងដ៏ថ្មីនិងមិនធ្លាប់មាននេះបានបង្ហាញឡើងកាលពីទី១៩ ខែធ្នូ ឆ្នាំ ២០១៧ នៅសាលរាជធានីភ្នំពេញ ក្នុងប្រជុំពិភាក្សាការងារបច្ចេកទេសជាមួយក្រុមការងារអង្គការ JICA ដឹកនាំដោយលោក ស៊ូកាណូ យូឈី (Sugano Yuichi) ប្រធានតំណាងJICA និង លោក ឃួង ស្រេង អភិបាលនៃគណៈអភិបាលរាជធានីភ្នំពេញ ស្ដីពីតម្រូវការដឹកជញ្ជូនក្នុងរាជធានីភ្នំពេញ ជុំវិញការររៀបចំរថភ្លើងលើអាកាស AGT។
បើតាមមន្ត្រីរដ្ឋបាលរាជធានីភ្នំពេញបានអោយដឹងថា គម្រោងខ្សែរត់រថភ្លើងអាកាសនេះ មានប្រវែង១៨គីឡូម៉ែត្រ ដោយរត់តាមបណ្តោយមហាវិថីហ្សាលដឺហ្គោល មហាវិថីព្រះមុនីរ៉េត ផ្លូវលេខ ២១៧ ផ្លូវ វេងស្រេង ឆ្ពោះមកព្រលានយន្តហោះអន្តរជាតិភ្នំពេញ និង១ខ្សែទៀតបែកខ្នែង ទៅផ្លូវជាតិលេខ៤និងផ្លូវកប់ស្រូវ។
មន្ត្រីរដ្ឋបាលរាជធានីភ្នំពេញរូបនេះនូវបានបញ្ជាក់ថាការរៀបចំអោយមានខ្សែរថភ្លើងលើអាកាស AGT នេះ ធ្វើឡើងដើម្បីចូលរួមការកាត់បន្ថយការកកស្ទះចរាចរណ៍ ការប្រែប្រួល អាកាស ធាតុ និងការវិវត្តន៍នៃសង្គមសេដ្ឋកិច្ច របស់ប្រទេសកម្ពុជានាពេលអនាគត។ សេវាដឹកជញ្ជូនលើ អាកាសខ្នាតមធ្យមជាផ្នែកមួយដ៏សំខាន់ដែលជាមធ្យោបាយដឹកជញ្ជូនសាធារណៈល្អប្រសើរសម្រាប់រាជធានីភ្នំពេញបាពេលបច្ចុប្បន្ន និងទៅអនាគតស្របតាមកំណើតប្រជាជន និងភ្ញៀវទេសចរណ៍ មានការកើនឡើងជាលំដាប់៕
សៀមរាប ៖ មន្ត្រីអភិរក្សរបស់អង្គការយូណេស្កូ បានឲ្យដឹងថា កំពូលប្រាសាទបន្ទាយឆ្មា ធ្វើពីមាសសុទ្ធទម្ងន់ ៧គីឡូក្រាម ត្រូវបានក្រុមអភិរក្ស និងជួសជុលប្រាសាទបន្ទាយឆ្មា ក្នុងខេត្តបន្ទាយមានជ័យ បានរកឃើញកប់នៅក្នុងដី កាលពីថ្ងៃទី១៧ ខែធ្នូ ឆ្នាំ២០១៧ កន្លងមកនេះ និងបានប្រគល់ជូនអាជ្ញាធរ ដើម្បីរក្សាទុក។
យោងតាមឯកសារបាន្យដឹងថា ប្រាសាទបន្ទាយឆ្មា គឺជាប្រាសាទមួយ ដែលបានកសាងឡើងពីចុងសតវត្សរ៍ទី១២ និងដើមសតវត្សរ៍ទី១៣ ក្នុងរជ្ជកាលព្រះបាទជ័យវរ្ម័នទី៧ ដើម្បីឧទ្ទិសដល់បុត្រា និងមេទ័ព ៤នាក់របស់ព្រះអង្គដែលបានពលីក្នុងសមរភូមិដេញចាមក្នុងឆ្នាំ១១៧៧។ប្រាសាទបន្ទាយឆ្មាមានទីតាំងស្ថិតក្នុងភូមិបន្ទាយឆ្មា ស្រុកពួក ខេត្តបន្ទាយមានជ័យ និងមានចម្ងាយប្រមាណ៧គីឡូម៉ែត្រ ពីទីប្រជុំជនខេត្តបន្ទាយមានជ័យភាគខាងជើង៕
ភ្នំពេញ ៖ ក្រសួងសុខាភិបាលកម្ពុជា បានប្រកាសឱ្យប្រមូលផលិតផលទឹកដោះគោម្សៅ៣ប្រភេទ ដូចជា សេលីយ៉ា អាដេ (CELIA AD), សេលីយ៉ា ម៉ាម៉ា (CELIA MAMA) និងពីកូត អេស អិល (PICOT SL) ក្រោយទទួលដំណឹងពីការមានឆ្លងមេរោគ សាលម៉ូណែលឡា (Salmonella) ក្នុងខ្សែសង្វាក់ផលិតកម្មមេរោគ ពីបណ្តាញអាជ្ញាធរសុវត្ថិភាពចំណីអាហារអន្តរជាតិ និងសេចក្តីប្រកាសរបស់រោងចក្រឈ្មោះ ឡាក់តាលីសអាំងទែណាស្យូណាល់ (LACTALIS INTERNATIONAL) ។
ក្នុងសេចក្តីប្រកាសព័ត៌មានដដែលបានបញ្ជាក់ថា មេរោគដែលមាននៅក្នុងផលិតផលម្សៅទឹកដោះគោទាំងនោះ អាចបង្កឱ្យមានគ្រោះថ្នាក់សុខភាពអ្នកប្រើប្រាស់ ពិសេសចំពោះទារក កុមារតូចៗ ស្ត្រីមានផ្ទៃពោះ និងស្ត្រីកំពុងបំបៅដោះកូន ៕
ក្រសួង ហាមម្ចាស់ស្ថានីយវិទ្យុ ទូរទស្សន៍ មិនឱ្យចាក់ផ្សាយបទ«គ្រូបង្រៀនស្រវឹងស្រា»របស់ផលិតកម្មថោន។
https://youtu.be/m77tR8NWdWc
ភ្នំពេញ ៖ ប្រមុខរាជរាជរដ្ឋាភិបាលកម្ពុជា សម្តេចនាយករដ្ឋមន្ត្រី តេជោ ហ៊ុន សែន បានថ្លែងថា រាជ រដ្ឋាភិបាលកម្ពុជា គ្រោងនឹងបង្កើតធនាគារថ្មីមួយ សម្រាប់ផ្តល់ឥណទានដល់សហគ្រាសធុនតូច និងមធ្យម ដើម្បីឮបង្កើនការផលិត និងបង្កើតការងារដល់ប្រជាពលរដ្ឋ ជាមួយនោះ ក៏ដើម្បីសម្រាប់ ទប់ទល់ជាមួយនឹងសម្ពាធពីក្រៅប្រទេសផងដែរ។
សម្តេចនាយករដ្ឋមន្ត្រីតេជោ ហ៊ុន សែន បានថ្លែងយ៉ាងដូច្នេះនៅក្នុងជួបសំណេះសំណាល ជាមួយតំណាងកម្មករ កម្មការិនី នៅថ្ងៃទី២០ ខែធ្នូ នេះ ប្រមាណ១៦.១១៨នាក់ មកពីរោងចក្រ ចំនួន១៤ នៅតំបន់ទួលពង្រ ខណ្ឌពោធិ៍សែនជ័យ។
តាមប្រសាសន៍របស់នាយករដ្ឋមន្ត្រី បានឱ្យដឹងថា ការបង្កើតនេះ ក្នុងន័យទប់ទល់ ជាមួយសម្ពាធពីប្រទេសខាងក្រៅ ដែលកំពុងព្រមានមកលើកម្ពុជា ក្រោយរំលាយគណបក្សប្រឆាំង ហើយសម្តេចបានផ្តាំផ្ញើថា ទោះមានសម្ពាធយ៉ាងណាក៏គណបក្សសង្គ្រោះជាតិ មិនអាចរស់ ឡើងវិ ញដែរ។
នាយករដ្ឋមន្ត្រី ហ៊ុន សែន បានគូសបញ្ជាក់ច្បាស់ថា នៅពេលខាងមុខនេះ រាជរដ្ឋា ភិបាលកម្ពុជា នឹងបង្កើតធនាគារថ្មីមួយទៀត សម្រាប់សហគ្រាសធន់តូច និងមធ្យម ដើម្បីផ្តល់ ឥណទានបង្កើនការផលិ ដោយចាប់ផ្តើមជាមួយទុនប្រមាណ១០០លាន ដុល្លារសហរដ្ឋអាមេរិក និងដើម្បីចូលរួមបង្កើតការងារដល់ប្រជាពលរដ្ឋខ្មែរ។
ប្រមុខរាជរដ្ឋាភិបាលកម្ពុជា បានអះអាងថា កម្ពុជាមិនអាចពឹងផ្អែកតែលើវិស័យមួយ បាន ទេ គឺកម្ពុជាត្រូវតែអភិវឌ្ឍន៍លើគ្រប់វិស័យទាំងអស់ ទាំងកសិកម្ម ឧស្សហកម្ម និងវិស័យផ្សេងៗ ទៀត ដើម្បីពង្រីកការងារជូនប្រជាពលរដ្ឋ ក្នុងន័យទប់ទល់ជាមួយសម្ពាធពីខាងក្រៅ ហើយដោយ មិនត្រូវរង់ចាំការដកដង្ហើមពីប្រទេសដទៃដែរ គឺរាជរដ្ឋាភិបាលនឹងខិតខំបង្កើត មុខរបរ និងការងារ ធ្វើកាន់តែច្រើនថែមទៀត សម្រាប់ជួយដល់ពលរដ្ឋរបស់កម្ពុជា ដើម្បីបង្កើនតម្រូវការក្នុងស្រុក និង ការនាំចេញទៅក្រៅប្រទេស។
យោងតាមលិខិតរបស់ រដ្ឋមន្ត្រីក្រសួងពាណិជ្ជកម្មកម្ពុជាបានលើកឡើងថា ប្រសិនបើ សហភាពអឺរ៉ុប តម្រូវឲ្យកម្ពុជាបង់ពន្ធនាំចូលគិតជាមធ្យម ៦៧៦លានដុល្លារអាមេរិក កាលពីឆ្នាំ ២០១៦ ចំណែកការនាំចូលទៅសហរដ្ឋអាមេរិកវិញ កម្ពុជាត្រូវបង់ពន្ធស្ទើរតែទាំងស្រុង។
ពាក់ព័ន្ធនឹងការរំលាយបក្សប្រឆាំង សម្តេចនាយករដ្ឋមន្ត្រីតេជោ ហ៊ុន សែន បានប្រកាស ជាថ្មីម្តងទៀត នៅថ្ងៃនេះថា បើទោះបីជាមានសម្ពាធពីអន្តរជាតិក្តី ក៏គណបក្សសង្គ្រោះជាតិ មិន អាចរស់ ឡើងវិញដែរ ហើយសម្តេចបានសង្កត់ធ្ងន់ថា ឲ្យកាប់ថ្មចំណាំចាប់ពីពេលនេះតទៅ ព្រោះ គណបក្សនេះ ត្រូវបានរំលាយដោយអំណាចសាលដីកាស្ថាពរពីបទក្បត់ជាតិ របស់ស្ថាប័នតុលាការ កំពូល ចប់រួចរាល់ហើយ៕
ភ្នំពេញ ៖ អង្គភាពប្រឆាំងអំពើពុករលួយ ហៅកាត់ថា អ ប ព នៅថ្ងៃទី១៩ ខែធ្នូ ឆ្នាំ២០១៧ នេះ បាន សេចក្តីជូនដំណឹង និងអញ្ជើញដល់អ្នកសារព័ត៌មានទាំងអស់ ឲ្យចូលរួមកម្មវិធីសិក្ខាសាលា ដែល ផ្តោតទៅលើអ្នកសាព័ត៌មាន និងការប្រឆាំងអំពើពុករលួយ។
ក្នុងសេចក្តីជូនដំណឹងនេះ បានបញ្ជាក់ថា អង្គភាពប្រឆាំងអំពើពុករលួយសូមជម្រាបជូនដល់ អ្នកសារព័ត៌មានទាំងអស់ឱ្យបានជ្រាបថា អ ប ព នឹងរៀបចំបើកសិក្ខាសាលាក្រោមប្រធានបទ “អ្នកសារព័ត៌មាន និងការប្រយុទ្ធប្រឆាំងអំពើពុករលួយ” រយៈពេលមួយថ្ងៃ ដែលនឹងប្រព្រឹត្តទៅនៅ ថ្ងៃចន្ទ ទី25 ខែធ្នូ ឆ្នាំ2017 ចាប់ពីម៉ោង 8:30នាទី ព្រឹក នៅអង្គភាពប្រឆាំងអំពើពុករលួយ ដោយ មានរៀបចំទទួលអាហារថ្ងៃត្រង់ផងដែរ។
អង្គភាពប្រឆាំងអំពើពុករលួយ នឹងទទួលចុះឈ្មោះអ្នកសារព័ត៌មានដែលមានបំណងចូលរួម (រួមទាំងសារព័ត៌មានដែលបានលុបឈ្មោះ) ចាប់ពីថ្ងៃជូនដំណឹងនេះ រហូតដល់ថ្ងៃអាទិត្យ ទី24 ខែធ្នូ ឆ្នាំ2017 វេលាម៉ោង 17:00នាទី នៅអង្គភាពផ្ទាល់ ឬតាមរយៈទូរស័ព្ទេបស់មន្ត្រីប្រចាំការដូចខាង ក្រោមៈ
-លោក ឡឹក ពុំបូរិន 093 82 32 85
-កញ្ញា អ៊ឹង សៀកអៀង 089 80 93 45
-កញ្ញា ឡូវ សុខលាង 070 85 95 07
-កញ្ញា ហុង ស្រីវេត 088 898 28 27
-កញ្ញា អ៊ុ ផាណុង 086 83 22 70
-កញ្ញា ស្រី បុប្ផា 017 51 60 07
ក្នុងសេចក្តីជូនដំណឹងនេះ អង្គភាពប្រឆាំងអំពើពុករលួយ ក៏បានអំពាវនាវសូមអ្នកសារព័ត៌ មាន ទាំងអស់ជ្រាបជាដំណឹង និងសូមអញ្ជើញចូលរួមឲ្យបានច្រើនកុះករផងដែរ៕
ខេត្តព្រៃវែង ប្រកាសលុបចោល និងដកហូតឯកសារមិនប្រក្រតីរបស់ជនបរទេស
ព្រៃវែង ៖ នារសៀលថ្ងៃទី១៩ ខែធ្នូ ឆ្នាំ២០១៧ នៅសាលប្រជុំស្នងការដ្ធាននគរបាលខេត្តព្រៃវែង លោកឧត្តមសេនីយ៍សន្តិបណ្ឌិត សុខ ផល អគ្គនាយក.នៃអគ្គនាយកដ្ធានអន្តោប្រវេសន៍ក្រសួងមហាផ្ទៃបានអញ្ជើញជាអធិបតីក្នុងកម្មវិធីផ្សព្វផ្សាយ ស្តីពីការលុបចោលនិងដកហូតឯកសាររដ្ធបាលកម្ពុជាមិនប្រក្រតីដែលជនបរទេសកំពុងកាន់កាប់ប្រើប្រាស់។
ពិធីនេះក៍មានការអញ្ជើញចូលរួមពីសំណាក់លោឧត្តមសេនីយ៍.ឧត្តមសេនីយ៍ទោ.លោកអភិបាល.អភិបាលរងខេត្ត.លោកស្នងការស្នងការរងខេត្ត.កងរាជអាវុធហត្ថខេត្ថ.អភិបាលស្រុក.អធិការ.មេឃុំ.មេប៉ុស្តិ៍រដ្ធបាលនិងមន្ត្រីនគរបាលអន្តោប្រវេសន៍ប្រចាំការតាមច្រកទ្វារទូទាំងខេត្តព្រៃវែង។
លោកឧត្តមសេនីយ៍ឯក សុវណ្ណា ពិសាខា អគ្គនាយករងនៃអគ្គនាយកដ្ធានអន្តោប្រវេសន៍បានបង្ហាញនូវការផ្តោតសំខាន់អនុក្រឹតលេខ១២៩អនក្រ របស់រាជរដ្ធាភិបាលស្តីពីការលុបចោលនូវឯកសាររដ្ធបាលកម្ពុជាមិនប្រក្រតីដែលជនបរទេសកំពុងកាន់ប្រើប្រាស់.លិខិតលេខ.៤៣៣១ ប្រ ក របស់ក្រសួងមហាផ្ទៃប្រកាសស្តីពីបែបបទនិងនីតិវិធីនៃការដកហូតឯកសាររដ្ធបាលកម្ពុជាមិនប្រក្រតីដែលជនបរទេសកាន់កាប់ប្រើប្រាស់នៅក្នុងខេត្តព្រៃវែង។ ក្នុងឱកាសនោះដែរលោក ជា សុមេធី អភិបាលខេត្តព្រៃវែងបានណែនាំឲ្យស្នងការនគរបាលខេត្ត.រដ្ធបាលក្រុង.ស្រុក.មេឃុំ.ចៅសង្កាត់.អធិការ.ប៉ុស្តិ៍រដ្ធបាលនគរបាលទូទាំងខេត្តត្រូវចូលរួមសហការឲ្យបានជិតស្និទ្ធជាមួយមន្ត្រីនគរបាលជំនាញអន្តោប្រវេសន៍ដើម្បីអនុវត្តឲ្យបានជោគជ័យនូវអនុក្រឹតលេខ១២៩ ហើយក៍សំណូមពរឲ្យមន្ត្រីរដ្ធបាល.ឃុំសង្កាត់និងប៉ុស្តិ៍រដ្ធបាលទាំងអស់មុននិងចេញលិខិតស្នាមរដ្ធបាលផ្សេងៗជូនប្រជាពលរដ្ធឲ្យបានត្រឹមត្រូវច្បាស់លាស់ព្រោះយើងទាំងអស់គ្នាជាអ្នកបំរើប្រជាពលរដ្ធ។លោកអភិបាលក៍បានជំរុញឲ្យមន្ត្រីជំនាញជួយពិនិត្យមើលតាមវង់ល្បែងកាស៊ីណូ និងតាមបណ្តាក្រុមហ៊ុនរោងចក្រសហគ្រាសផ្សេងៗ ដែលមានជនបរទេសអន្តោប្រវេសន៌ចូលមកអត់ច្បាប់ទន្លាប់ហើយសូមឲ្យអាជ្ញាធរសមត្ថកិច្ចជួយពិនិត្យមើលល្បែងតាមកាស៊ីណូបើទោះមានច្បាប់ក៍ត្រូវពិនិត្យជនជាតិខ្មែរចូលលេងផងព្រោះច្បាប់ស្រុកយើងមិនឲ្យមានជនជាតិខ្មែរចូលលេងទេ។លោកអភិបាលក៍បានជំរុញបន្ថែមទៀតសូមឲ្យអាជ្ញាធរសមត្ថកិច្ចត្រូវសហការគ្នាជាមួយមន្ត្រីជំនាញតាមច្រកទ្វារជួយត្រួតពិនិត្យឲ្យបានតឹងរឹងរាល់ការនាំចេញចូលនូវជំនិញគ្រប់ប្រភេទពីគុណភាពឲ្យបានម៉ឺងមាត់ដើម្បីសុខភាពអ្នកបរិភោគជាពិសេសសុខភាពប្រជាពរដ្ធ។
ក្នុងឱកាសនោះដែរលោកឧត្តមសេនីយ៍សន្តិបណ្ឌិត សុខផល បានមានប្រសាសន៍ថាអគ្គនាយកដ្ធានអន្តោត្ថូវធ្វើជាសេនាធិការជូនក្រសួងមហាផ្ទៃដឹកនាំសម្របសម្រួលជាមួយបណ្តាអង្គភាពនិងអាជ្ញាធរដែនដីពាក់ពន្ធ័ដើម្បីដកហូតឯកសាររដ្ធបាលកម្ពុជាមិនប្រក្រតីដែលជនបរទេសកំពុងកាន់កាប់ប្រើប្រាស់ដូចមានចែងក្នុងប្រការ១នៃប្រកាសលេខ៤៣៣១ប្រក។បន្ថែមពីនោះអគ្គនាយកដ្ធានអន្តោប្រវេសន៍ក៍ត្រូវរៀបចំបែបបទនីតិវិធីដើម្បីដកហូតឯកសារមិនប្រក្រតីដែលជនបរទេសកំពុងប្រើប្រាស់។លោកអគ្គនាយកដ្ធានបន្តថា ត្រូវចាត់តាំងក្រុមការងារចុះសហការជាមួយសមត្ថកិច្ចមូលដ្ធានពាក់ពន្ធ័នៅរាជធានី.ខេត្តដើម្បីអនុវត្តកិច្ចការនេះ។ចំណែកជនបរទេសណាដែលលាក់លៀមមិនយកឯកសាររដ្ធបាលកម្ពុជាមិនប្រក្រតីមកបង្ហាញដល់សមត្ថកិច្ចត្រូវផ្តន្ទាទោសតាមច្បាប់ជាធរមានរួមទាំងខ្លឹមសារសំខាន់ៗមួយចំនួនបន្ថែមទៀត៕
ឧត្តរមានជ័យ ៖ មានការភ្ញាក់ផ្អើលដល់ប្រជាពលរដ្ឋនៅស្រុកត្រពាំងប្រាសាទ ខេត្តឧត្តរមានជ័យនាំគ្នីគ្នាទៅអុជធូបបុណ្យស្រន់ និងសុំសេចក្តីសុខ ពីសាកសពកូនគោចំឡែកពីរក្បាលដែលកើតមកជាប់គ្នា ដោយពួកគាត់គិតថា ជារឿងអភូតហេតុ និងមានអ្នកមានបុណ្យបារមីមកចាប់ជាតិ។
តាមការរៀបរាប់ពីម្ទាស់គោចំឡែកនេះ ឈ្មោះ ប្រាក់ ហៀន ភេទ ស្រី អាយុ ៥០ ឆ្នាំ រស់នៅភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ បាននិយាយថា កូនគោចំឡែកដែលកើតមកមានឈ្មោលមួយក្បាល និងញីមួយក្បាល មានជើង ៨ ក្បាលពីរ និងកន្ទុយពីរ តែត្រគៀកជាប់ ដែលបានកើតនៅវេលាម៉ោង ១២ រំលងអាធ្រាតឈានចូលថ្ងៃទី១៩ ខែធ្នូ ឆ្នាំ២០១៧ ហើយរយពេលបីម៉ោងមកក៏បានស្លាប់ទៅវិញ។
បងស្រីបានបញ្ជាក់ថា លុះព្រឹកឡើងថ្ងៃដដែល មានអ្នកជិតខាង អ្នកនៅភូមិជាមួយ និងអ្នកភូមិផ្សេងទៀត ដែលដំណឹងនេះ ក៏នាំគ្នាមកមើលកូនគោភ្លោះញីឈ្មោលនេះ ដោយមានប្រជាពលរដ្ឋខ្លះបានអុជធូបបួងសុំសេចក្តីសុខ ព្រោះពួកគាត់គិតថា វាជាអភូតហេតុ។ ហើយមិនតែប៉ុណ្ណោះ ក៏មានអាចារ្យ យាយតា និងចាស់ទុំ ក៏បានរៀបចំពិធីសូត្រមន្ត និងបានជ្រើសរើសថ្ងៃបញ្ចុះសាកសពកូនគោភ្លោះញីឈ្មោល នៅថ្ងៃទី២០ ខែធ្នូ ឆ្នាំ២០១៧ ដូចទៅនឹងពិធីបុណ្យសពប្រពៃណីទៅតាមជំនឿតរៀងមក៕
ភ្នំពេញ៖ ភោគជនីយដ្ឋាន “ម្លប់ស្បូវ ក្លាសស៊ីក” កំពុងតែសាងសង់ស្រាប់តែជាងផ្សារដែកធ្លាក់កំទេចដែកផ្សារលើជញ្ជាំងស្បូវបណ្តាលអោយឆាបឆេះចេះជាអណ្តាតភ្លើងតែសំណាងល្អត្រូវបានអ្នកជិតខាងយកបំពងបាញ់ពន្លត់អគ្គិយភ័យទាន់ពេលវេលា ហេតុការណ៍នេះបានបង្កអោយមានការភ្ញាក់ផ្អើលកាលពីវេលាម៉ោង ១៣និង៤០នាទីរសៀលថ្ងៃទី១៩ខែធ្នូឆ្នាំ២០១៧ នៅក្នុងភោគជនីយដ្ឋានយីហោ “ម្លូបស្បូវ ក្លាសស៊ីក” ដែលស្ថិតនៅតាមបណ្តោយផ្លូវ៤៥៤ សង្កាត់ទួលទំពុង១ ខណ្ឌចំការមន រាជធានីភ្នំពេញ។
ប្រភពពីកន្លែងកើតហេតុបានអោយដឹងថា នៅមុនពេលកើតហេតុគឺមានជាងផ្សារដែកប្រមាណ៣-៤នាក់បានកំពុងផ្សារដំបូលនៅក្បែរជញ្ជាំងស្បូវ ភ្លាមនោះស្រាប់តែមានភ្លើងឆាបឆេះជញ្ជាំងនោះតែម្តង ហើយប្រជាពលរដ្ឋបាននាំគ្នាដងទឹកជះ និងបានយកបំពងពន្លត់អគ្គិភ័យបាញ់អស់ចំនួន៤បំពងទើបរលត់ជាស្ថាពរ ទើបមិនបណ្តាលអោយឆេះរាលដាលដល់ផ្ទះប្រជាពលរដ្ឋនៅក្បែរនោះឡើយ។
ក្រោយពេលកើតហេតុសមត្ថកិច្ចមូលដ្ឋានបានចុះទៅដល់ភ្លាមៗ ដោយសារតែស្ថានភាពអាចគ្រប់គ្រងបានទើបមិនមានរថយន្តពន្លត់អគ្គិភ័យទេ៕ បក្សីចាំក្រុង
បាត់ដំបង ៖ បុរស២នាក់នាំគ្នាយកផាវកែច្នៃធ្វើជាគ្រាប់បែក ទៅបោកយកត្រី បណ្តាលឲ្យត្រូវរបួសខ្លួនឯង កាលវេលាម៉ោង១៧,០០នាទី ថ្ងៃទី១៨ ខែធ្នូ ឆ្នាំ២០១៧ នៅភូមិកែវមុន្នី ឃំុបាសាក់ ស្រុករុក្ខគិរី ខេត្តបាត់ដំបង។
ប្រភពពី លោកវរ:សេនីយ៍ត្រី ស៊ីវ សុផល អាវុធហត្ថស្រុករុក្ខគិរីបានឲ្យដឹងថា មានករណីផ្ទុះគ្រាប់បែកឆ្នៃបោកត្រី ដែលមានគ្នា៤នាក់ បណ្តាលឲ្យមានការរងរបួស២នាក់ ធ្ងន់១នាក់ ស្រាល១នាក់។
1.ឈ្មោះខួ តូរី ប្រុសអាយុ៣០ឆ្នាំ រស់នៅភូមិកេីតហេតុខាងលេី របួសធ្ងន់ បញ្ជួនទៅមន្ទីរពេទ្យបាត់ដំបង
2.ឈ្មោះឈឹម ឆាន ប្រុសអាយុ៣៧ឆ្នាំរស់នៅភូមិកើតហេតុខាងលើ របួសភ្ខាងឆ្វេង ស្រាល ត្រូវបញ្ជួនទៅមន្ទីរពេទ្យបង្អែកស្រុកមោង៕ ដោយ ៖ សុផល
ភ្នំពេញ ៖ នៅថ្ងៃទី ២០ ខែធ្នូ ឆ្នាំ២០១៧ វេលាម៉ោង ០៩:៣០ នាទីព្រឹក នៅទីស្ដីការក្រសួងការបរទេស និងសហប្រតិបត្តិការអន្តរជាតិ ឯកឧត្ដម ប្រាក់ សុខុន ទេសរដ្ឋមន្ដ្រី រដ្ឋមន្ដ្រីការបរទេសនិងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងឯកឧត្ដម ហូរីណូអ៊ូជិ ហ៊ីដេហ៊ីសា(HORINOUCHI Hidehisa) ឯកអគ្គរាជទូតជប៉ុនប្រចាំកម្ពុជា នឹងអញ្ជើញចុះហត្ថលេខា នៅថ្ងៃទី ២០ ខែធ្នូ ឆ្នាំ២០១៧ វេលាម៉ោង ០៩:៣០ នាទីព្រឹក នៅទីស្ដីការក្រសួងការបរទេស និងសហប្រតិបត្តិការអន្តរជាតិ លើលិខិតប្ដូរសារ និងកំណត់ហេតុនៃការពិភាក្សា ស្ដីពីការផ្ដល់ ហិរញ្ញប្បទានឥតសំណង ដែលមានទឹកប្រាក់សរុបចំនួន ៣ ១៧០ លានយ៉េន (ប្រមាណ ២៨ លានដុល្លារអាមេរិក) សម្រាប់អនុវត្តគម្រោង «សាងសង់វិទ្យាស្ថានគរុកោសល្យ» នៅរាជធានីភ្នំពេញ និងខេត្តបាត់ដំបង។
ហិរញ្ញប្បទានឥតសំណងនេះ ត្រូវបានផ្តល់ជូនរដ្ឋាភិបាល នៃព្រះរាជាណាចក្រកម្ពុជាដោយរដ្ឋាភិបាលជប៉ុន ដើម្បីលើកកំពស់សមត្ថភាពធនធានមនុស្ស នៃព្រះរាជាណាចក្រកម្ពុជា ក្នុងការឆ្លើយតបនឹងតម្រូវការអភិវឌ្ឍន៍សេដ្ឋកិច្ច-សង្គម របស់ជាតិ៕
ភ្នំពេញ ៖ ក្រុមប្រឹក្សាទេសចរណ៍ពិភពលោក (WTTC)បានឱ្យដឹងថា វិស័យទេសចរណ៍នៅកម្ពុជា បានបង្កើតការងារសរុប ដោយផ្ទាល់ និងប្រយោលចំនួនជាង២,២លាននាក់ ស្មើនឹង ២៦% នៃការងារសរុប ក្នុងនោះការងារផ្ទាល់មានប្រមាណ១.២លាននាក់ ស្មើ ១២% នៃការងារសរុប ហើយការងារផ្ទាល់នៅក្នុងវិស័យទេសចរណ៍មានប្រមាណជាង៦២ម៉ឺននាក់។
ដោយឡែកក្នុងរយៈពេល១០ខែ ដើមឆ្នាំ ២០១៧ កម្ពុជាទទួលបានភ្ញៀវទេសចរអន្តរជាតិចំនួន ៤,៣ លាននាក់ កើនឡើង ១០.៤% ធៀបនឹងរយៈដូចគ្នាក្នុងឆ្នាំ២០១៦ ហើយនៅឆ្នាំ២០១៧ នឹងកើនឡើងចំនួន ៥,៦ លាននាក់។
ដោយផ្អែកលើស្ថានភាពដ៏ប្រសើរនាពេលបច្ចុប្បន្ននិងនៅអនាគតនៅឆ្នាំ២០២០កម្ពុជា នឹងទទួលបានទេសចរអន្តរជាតិប្រមាណ៧លាននាក់ ដែលនឹងបង្កើតការងារផ្ទាល់ប្រមាណ១លាននាក់ និងចំណូលចូលជាតិប្រមាណ៥.០០០លានដុល្លារអាមេរិក ។
តាមសន្ទុះនៃការចម្រើនឥតឈប់ឈរ និងគ្រប់កាលៈទេសៈ វិស័យទេសចរណ៍មិនត្រឹមតែបានទទួលស្គាល់ដោយអង្គការពិភពលោកនានាថា ចូលរួមអភិវឌ្ឍសេដ្ឋកិច្ច សង្គម សម្បត្តិវប្បធម៌ និងធម្មជាតិ ប៉ុណ្ណោះទេ ថែមទាំងចូលរួមសម្រេចការអភិវឌ្ឍប្រកបដោយនិរន្តរភាពរបស់ពិភពលោកទៀតផង។
ស្ថាប័នទេសចរណ៍ដ៏ធំខាងលើបានបង្ហាញទៀតថា ក្នុងបរិបទអាស៊ាន ឆ្នាំ២០១៦ តំបន់ទាំងមូលបានទទួលទេសចរអន្តរជាតិចំនួន១១៦លាននាក់ កើនឡើង ៦,៥% ក្នុងនោះទេសចរផ្ទៃក្នុងអាស៊ាន មានចំនួនជាង ៥៣,៣លាននាក់។ ទេសចរណ៍អាស៊ានបានបង្កើតចំណូលជូនជាតិប្រមាណ១២% នៃផលិតផលក្នុងស្រុកសរុប (GDP) និងការងារសរុបប្រមាណ៤៥លាននាក់ ក្នុងនោះការងារផ្ទាល់មានប្រមាណ ១៣លាននាក់។ ជាចក្ខុវិស័យឆ្នាំ ២០២០ អាស៊ានរំពឹងទទួលបានទេសចរអន្តរជាតិប្រមាណ១២៣លាននាក់។
គួររំលឹកថា វិស័យទេសចរណ៍នៅកម្ពុជា មានការរីកចម្រើនខ្លាំងក្លា ខណៈដែលឆ្នាំ១៩៩៨ កម្ពុជាបានទទួលទេសចរអន្តរជាតិប្រមាណតែ២៩ម៉ឺននាក់ និងមានកំណើនយ៉ាងឆាប់រហ័ស រហូតដល់ជាង៥លាននាក់ នៅឆ្នាំ ២០១៦ កើន១៦២៤% លើរយៈពេល១៨ឆ្នាំ។ នៅឆ្នាំ ២០១៦ ជាមួយនឹងកំណើន៥% ទេសចរណ៍កម្ពុជាបាននាំចំណូលចូលសេដ្ឋកិច្ចប្រមាណ៣.៤០០លានដុល្លារអាមេរិក ស្មើនឹង១២% នៃផលិតផលក្នុងស្រុកសរុប(GDP)៕
បាត់ដំបង ៖ នគរបាលការិយាល័យប្រឆាំងគ្រឿងញៀនប ញ្ជូនខ្លួនបុរសសង្ស័យ២នាក់និងថ្នាំញៀនម៉ាទឹកកក២០ថង់ ស្មើ៥,៨៣ក្រាម និង១៨គ្រាប់ទម្ងន់១,៤៨ក្រាម និងសម្ភារ:ពាក់ព័ន្ធមួយចំនួន ទៅតុលាការចាត់ការតាមនិតិវិធី នារសៀល ថ្ងៃទី១៨ ខែធ្នូ ឆ្នាំ២០១៧ ។
លោក ស៊ាន សូណាល់ នាយការិយាល័យប្រឆាំងគ្រឿងញៀនបានឲ្យដឹងថា នៅវេលាម៉ោង១០ និង២០នាទីព្រឹក ថ្ងៃទី១៧ ខែធ្នូ ឆ្នាំ២០១៧ កម្លាំងក្រុមអន្តរាគមន៍ប្រឆាំងបទល្មើសនៃស្នងការដ្ឋាននគរបាលខេត្តបាត់ដំបង សហការជាមួយកម្លាំងនគរបាលការិយាល័យប្រឆាំងគ្រឿងញៀន បានចុះបង្ក្រាបឃាត់ខ្លួនជនសង្ស័យម្នាក់ ឈ្មោះធា គឹមស៊ា ភេទប្រុស អាយុ២០ឆ្នាំ រស់នៅភូមិព្រៃដាច់ សង្កាត់អូរម៉ាល់ ក្រុង-ខេត្តបាត់ដំបង។ដកហូតថ្នាំញៀនម៉ាទឹកកក១ថង់ ទម្ងន់០,២៨ក្រាម ពេលកំពុងជិះម៉ូតូ។
ក្រោយទទួលចម្លើយពីបុរសសង្ស័យខាងលើ នៅម៉ោង១៥ និង៤០នាទី ថ្ងៃដដែល សមត្ថកិច្ចឈានដល់ការឃាត់ខ្លួន ជនសង្ស័យម្នាក់ទៀត ឈ្មោះស៊ឹម ឡាយ ភេទស្រី អាយុ៤៨ឆ្នាំ នៅ ចំណុចរង្វង់មូលយាយទេព ផ្លូវជាតិលេខ៥អញ្ចាញ ភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង។ដកហូតថ្នាំញៀនមេតំហ្វេតាមីន(ម៉ាទឹកកក ice)ចំនួន១៩ថង់ទម្ងន់៥,៥៥ក្រាមនិង ថ្នាំញៀនមេតំហ្វេតាមីន(យ៉ាម៉ា wy)១៨គ្រាប់ ទម្ងន់១,៤៨ក្រាម. ទូរស័ព្ទចំនួន១គ្រឿង ដែកកេះ១ កូនកន្ត្រៃ១និងកូនថង់សំរាប់ច្រកថ្នាំញៀនមួយចំនួនទៀត៕ ដោយ ៖ សុផល
កំពង់ស្ពឺ ៖ សត្វព្រៃនៅមានជីវិតចំនួន១០ក្បាល និងសាច់ជាច្រើនគីឡូក្រាម ត្រូវបានសមត្ថកិច្ចចម្រុះ ចុះដកហូតចេញពីផ្ទះបើករកស៊ីខុសច្បាប់ចំនួន២កន្លែង ស្ថិតនៅឃុំអូរ ស្រុកភ្នំស្រួច ខេត្តកំពង់ស្ពឺ។ប្រតិបត្តិការនេះ បានចុះអនុវត្តកាលពីម៉ោង១ និង០៥នាទីរសៀលថ្ងៃទី១៨ ខែធ្នូ ឆ្នាំ២០១៧។
តុលាការខេត្តកំពង់ស្ពឺ នោះ បានបង្គាប់ឲ្យឆែកឆេរលំនៅឋានចំនួន២ ដែលលួចលាក់ធ្វើសន្និធិ និងសំណាកសត្វព្រៃដោយខុសច្បាប់។ម្ចាស់ផ្ទះទាំង២ រួមមានទី១ឈ្មោះ-ឯម សុភី ភេទស្រីអាយុ៣០ឆ្នាំនៅភូមិកូនត្រុំ ឃុំអូរ ស្រុកភ្នំស្រួច បានរកឃើញនិងដកហូតពង្រូល(រស់) ០៣ក្បាល ស្មើ៤,៥០Kg, កន្ធាយ(រស់) ០២ ក្បាល ស្មើ១,៨០kg, ពង្រូល (ងាប់)០១ក្បាល ស្មើ៧,០០kg.កន្ធាយ(ងាប់)០៤ក្បាល ស្មើ៨,៣០kg.សាច់ជ្រូក ព្រៃ(ស្រស់)ស្មើ១៤kg. ជើងសត្វកេះ០៤(ស្រស់)ស្មើ១,៨០kg .រោមក្ងោកស្មើ១,០០kg។
ទី២-ម្ចាស់ផ្ទះឈ្មោះ ប្រាក់ សុភាស់ ភេទប្រុស អាយុ៣២ឆ្នាំនៅភូមិចេក ឃុំអូរ ស្រុកភ្នំស្រួច រកឃើញនិងដកហូតបានពង្រូល (រស់)០១ក្បាល ស្មើ២,០០kg .អណ្តេីក(រស់)០៤ក្បាល ស្មើ៧,២០kg .ស្រកាសត្វពង្រូល ស្មើ ២,៨០kg។
បច្ចុប្បន្នម្ចាស់លំនៅដ្ឋាន ត្រូវបានសមត្ថកិច្ចធ្វេីការអប់រំ និងឲ្យធ្វើកិច្ចសន្យាបញ្ឈប់ការរកស៊ីលក់ដូរសត្វព្រៃខុសច្បាប់បន្តទៀត។
ចំណែកសត្វនៅរស់ចំនួន១០ក្បាល ត្រូវបានយកទៅព្រលែងនៅមជ្ឈមណ្ឌលលទ្ធកម្មនៅខេត្តកោះកុង ។ដោយឡែកសត្វងាប់និងសំណាកសត្វព្រៃ ត្រូវបានយកមកដុតកំទេចចោលនៅសាលាដំបូងខេត្តកំពង់ស្ពឺ៕
ភ្នំពេញ ៖ ស្ថានតំណាងពាណិជ្ជកម្ម ប្រចាំស្ថានឯកអគ្គរាជទូតថៃ នៅរាជធានីភ្នំពេញ បានបញ្ជាក់ថា ចេតនារបស់រាជរដ្ឋាភិបាលថៃ ជាពិសេសក្រសួងពាណិជ្ជកម្មថៃ ដែលតែងតែខិតខំពង្រីកទំនាក់ទំនង ផ្នែកពាណិជ្ជកម្ម និងការវិនិយោគរវាងថៃ និងកម្ពុជា ឱ្យកាន់តែមានវិសាលភាពធំធេងជាងបណ្តាឆ្នាំមុនៗថែមទៀត។
លោក ជីវ៉ាវុឍ សុវណ្ណាអាត អគ្គទីប្រឹក្សាពាណិជ្ជកម្មប្រចាំកម្ពុជា បានលើកឡើងនៅក្នុងពិធីសម្ពោធហាងលក់សម្ភារៈកីឡា Plus Nine by His and Her នៅផ្សារទំនើបអ៊ីអនម៉ល កាលពីរសៀលថ្ងៃទី១៧ ខែធ្នូនេះថា ដោយផ្អែកលើប្រទេសកម្ពុជា មានសុខសន្តិភាពពេញលេញ មានស្ថិរភាព នយោបាយ ធានាបាននូវសន្តិសុខសាធារណៈ ហើយជាប្រទេសកំពុងមានការអភិវឌ្ឍរីកចំរើនគួរឱ្យកត់សម្គាល់ និងមានកិច្ចសហប្រតិបត្តិការល្អ រវាង ប្រទេសទាំង២ផង និងក្នុងនាមជាអ្នកភូមិផងរបងជាប់គ្នា ក៏ដូចជាការឧបត្ថម្ភគាំទ្រដល់អាជីវករថៃ ឱ្យកាន់តែមានទីផ្សារបន្ថែមនៅក្នុងប្រទេសកម្ពុជា ក្រសួងពាណិជ្ជកម្មថៃ បានជម្រុញដល់អ្នកវិនិយោគរបស់ឱ្យ បន្តមកបណ្តាក់ទុនវិនិយោគនៅកម្ពុជាឱ្យបានកាន់តែច្រើនថែមទៀត។
លោកបន្តថា រាជរដ្ឋាភិបាល និង ក្រសួងពាណិជ្ជកម្មថៃ បានត្រៀមខ្លួនជាស្រេច ក្នុងការគាំទ្រវិស័យឯកជនរបស់ប្រទេសទាំង២ ដើម្បីឱ្យពាណិជ្ជកម្ម និងការវិនិយោគបន្តរីកចំរើន យូរអង្វែងលើគ្រប់វិស័យ។
ចំណែកលោក ថាណុងឆៃ ជុងពីយវ៉ារាំង ជាអ្នកវិនិយោគិនបានអះអាងថា ខ្លួនមិនញញើតនឹងការបោះទុនវិនិយោគនៅកម្ពុជានោះឡើយ ខណៈប្រទេសមានការវិវត្តជឿនលឿន ហើយប្រជាជនមានការពេញនិយមលើផលិតផលបរទេស ដែលមានគុណភាព ។ ឆ្លើយតបនឹងតម្រូវការមួយនេះ ហាងរបស់លោកធានាថា មិនឱ្យអតិថិជនអស់សង្ឃឹមឡើយ។ ហើយលោកនឹងបន្តពង្រីកមុខរបស់របស់ខ្លួនឱ្យបានកាន់តែច្រើនថែមទៀតនៅកម្ពុជា ព្រោះលោកទទួលបានជោគជ័យជាបន្តបន្ទាប់ ក្នុងការប្រកបមុខរបរនៅកម្ពុជា។
លោកក៏បានអះអាងថា នឹងបន្តចាប់ដៃគូរជាមួយអ្នកវិនិយោគក្នុងស្រុក ដើម្បីនាំនូវផលិតផលដែលមានគុណភាព មកកាន់ទីផ្សារប្រទេសកម្ពុជា ពិសេសលើសម្ភារៈកីឡា និងគ្រឿងប្រើប្រាស់នានា ដែលកំពុងពេញនិយម នៅលើសកលលោក៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
