រាជធានីភ្នំពេញ ៖ ព្រះមហាក្សត្របានចេញព្រះរាជក្រិត្យ ព្រះរាជទានលើកលែងទោសលោកហុង សុខហួរ អតីតសមាជិកព្រឹទ្ធសភាមកពីគណបក្សសមរង្ស៊ី និងដោះលែងឲ្យមានសេរីភាពទ្បើងវិញហើយ។ ការលើកលែងទោសនោះបន្ទាប់ពីលោក ហុង សុខហួរ ធ្វើលិខិតសុំទោសសម្តេច ហ៊ុន សែន ចំពោះកំហុសឆ្គងរបស់ខ្លួនទាក់ទងបញ្ហាព្រំដែន ៕
ខេត្តប៉ៃលិន ៖ នៅព្រឹកថ្ងៃទី២៥ ខែតុលានេះ សមត្ថកិច្ចបានបញ្ជូនសកម្មជន CNRP ដែលជាសមាជិកក្រុមប្រឹក្សាឃុំស្ទឹងកាច់ ស្រុកសាលាក្រៅ ខេត្តប៉ៃលិនទៅកាន់តុលាការ បន្ទាប់ពីសមត្ថកិច្ចចាប់ខ្លួនកាលពីម្សិលមិញ ពាក់ព័ន្ធពាក្យបណ្ដឹងលួចថតរូប និងថតសំឡេងដែលនាំឲ្យប៉ះពាល់ ដល់សិទ្ធិបុគ្គល។
សមត្ថកិច្ចបានបញ្ជាក់ថា ជនសង្ស័យដែលឃាត់ខ្លួនឈ្មោះ ឈុន សិទ្ធី អាយុ៣៨ឆ្នាំ ដែលមានតួនាទីជាសមាជិកក្រុមប្រឹក្សាឃុំស្ទឹងកាច់ ។ ជនសង្ស័យរូបនោះត្រូវបានស្មៀន និងសមាជិកក្រុមប្រឹក្សាផ្សេងទៀត ដាក់ពាក្យប្ដឹង ដោយសារតែជននេះនៅពេលប្រជុំម្ដងៗ បានលួចថតរូប និងថតសំឡេងដែលប៉ះពាល់ដល់សិទ្ធិបុគ្គល ៕
រាជធានីភ្នំពេញ ៖ ក្រុមប្រតិបត្តិការចម្រុះនាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ សហការជាមួយ ស្នងការដ្ឋាននគរបាលរាជធានីភ្នំពេញ សមត្ថកិច្ចដែនដី និងអាជ្ញាធរមូលដ្ឋានបានបន្តឃាត់ខ្លួនជនជាតិវៀតណាមចំនួន១៤នាក់។ ប្រតិបត្តិការនេះធ្វើឡើងនៅចំណុចផ្ទះជួលលេខ៣៧៧ ផ្លូវលេខ៣៦៧ ភូមិកណ្តាល សង្កាត់ច្បារអំពៅ២ ខណ្ឌច្បារអំពៅ នៅព្រឹកថ្ងៃទី២៥ ខែតុលា ឆ្នាំ២០១៧នេះ។
ប្រធាននាយកដ្ឋានស៊ើបអង្កេត និងអនុវត្តនីតិវិធី លោកឧត្តមសេនីយ៍ឯក អ៊ុក ហៃសីឡា បានប្រាប់អ្នកសារព័ត៌មានថា ប្រតិបត្តិការនេះធ្វើឡើងដោយបានការអនុញ្ញាតពី លោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។ លោកបញ្ជាក់ថា ជាលទ្ធផលកម្លាំងបានត្រួតពិនិត្យឃើញមានជនបរទេសចំនួន១៤នាក់ ស្រី០៥នាក់ ជាជនជាតិវៀតណាម បានលួចស្នាក់នៅដោយខុសច្បាប់ គ្មានលិខិតឆ្លងដែន និងប្រើប្រាស់ឯកសារស្នាក់នៅមិនត្រឹមត្រូវ។
បច្ចុប្បន្នជនជាតិវៀតណាមទាំង១៤នាក់នោះ ត្រូវបានសម្រេចបញ្ជូនទៅអគ្គនាយកដ្ឋានអន្តោប្រវេសន៍ ដើម្បីត្រួតពិនិត្យឯកសារតាមនីតិវិធី៕
ខេត្តប៉ៃលិន ៖ សមត្ថកិច្ចខេត្តប៉ៃលិនបានឃាត់ខ្លួន សកម្មជនគណបក្សសង្គ្រោះជាតិម្នាក់ នៅឃុំស្ទឹងកាច់ ស្រុកសាលាក្រៅ កាលពីរសៀលម្សិលមិញ បន្ទាប់ពីសកម្មជនរូបនោះ បង្ហោះវីដេអូមួយ ដោយជាប់សង្ស័យថាជាការប្រមាថ និងញុះញង់ឱ្យមានការរើសអើង។
ជនសង្ស័យម្នាក់នោះ មានឈ្មោះ ឈុន សិទ្ធី ភេទប្រុស អាយុ៣៨ឆ្នាំ រស់នៅឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ ការឃាត់ខ្លួននេះ ដោយសារតែជាប់ព័ន្ធនឹងនឹងករណីសង្ស័យ២ករណី រួមានធ្វើឱ្យប៉ះពាល់ដល់សិទ្ធិខាងរូបភាពនៃបុគ្គល និងបទស្តាប់ រឺថតពាក្យសម្តីឯកជន នៅចំណុចសាលាឃុំស្ទឹងកាច់ ស្រុកសាលាក្រៅ ខេត្តប៉ៃលិន កាលពីថ្ងៃទី២១ ខែសីហា ឆ្នាំ២០១៧ និងញុះញង់ឱ្យមានការរើសអើងក្នុងសង្គម ៕
សេអ៊ូល ៖ យោធាកូរ៉េខាងត្បូងបាននិយាយថា កូរ៉េខាងត្បូង សហរដ្ឋអាមេរិក និងជប៉ុន នៅថ្ងៃអង្គារម្សិលមិញនេះបានចាប់ផ្ដើមធ្វើសមយុទ្ធយោធារយៈពេលពីរថ្ងៃ ដោយផ្ដោតសំខាន់លើការពង្រឹងសមត្ថភាពចាប់សញ្ញា និងស្ទាក់ចាប់ មីស៊ីលផ្លោងរបស់កូរ៉េខាងជើង នៅក្នុងករណីមានការវាយប្រហារជាយថាហេតុណាមួយ។ នេះបើយោងតាមសារព័ត៌មាន Russian Today ។
ក្នុងសេចក្តីថ្លែងការណ៍របស់យោធាកូរ៉េខាងត្បូងបានបញ្ជាក់ថា៖ «សមយុទ្ធយោធាស្ទាក់ចាប់មីស៊ីលមានរយៈពេលពីរថ្ងៃ បានចាប់ផ្ដើមនៅថ្ងៃអង្គារនេះ និងនៅថ្ងៃពុធនេះ នៅឯឈូង សមុទ្រកូរ៉េខាងត្បូង និងជប៉ុន ហើយវាធ្វើឡើងក្នុងគោលបំណងបង្កើនសមត្ថភាពចាប់សញ្ញាអាវុធនុយក្លេអ៊ែរ និងស្ទាក់ចាប់មីស៊ីលកូរ៉េខាងជើង ក្នុងករណីមានការគំរាមកំហែងណាមួយ»។ តាមរយៈសមយុទ្ធយោធានេះ ភាពតានតឹងនៅលើឧបទ្វីបកូរ៉េ ត្រូវបានគេរំពឹងថានឹងផ្ទុះឡើងជាថ្មី ខណៈលោកដូណាល់ ត្រាំ នឹងបំពេញដំណើរទស្សនកិច្ចមកកាន់តំបន់អាស៊ី នៅខែវិច្ឆិកា ខាងមុខនេះ។
សមយុទ្ធយោធា រវាងសម្ព័ន្ធមិត្តទាំងបី ធ្វើឡើងក្រោមការចូលរួមពីនាវាពិឃាតអាមេរិក USS Stethem, នាវាពិឃាតបំពាក់មីស៊ីលជប៉ុន JDS Kirishima និងនាវាពិឃាត កូរ៉េខាងត្បូង Sejong៕
រាជធានីភ្នំពេញ ៖ ច្បាប់ទាំង៤ពាក់ព័ន្ធការបោះឆ្នោតជ្រើសរើសតំណាងរាស្ត្រ, សមាជិកព្រឹទ្ធសភា, ក្រុមប្រឹក្សាឃុំ-សង្កាត់, ក្រុមប្រឹក្សារាជធានី ខេត្ត ក្រុង ស្រុក និងខណ្ឌ ដែលស្នើធ្វើវិសោធនកម្មដោយតំណាងរាស្ត្រមកពីគណបក្សប្រជាជនកម្ពុជានោះ ត្រូវបានក្រុមប្រឹក្សាធម្មនុញ្ញពិនិត្យ និងពិភាក្សារួចរាល់ហើយនៅល្ងាចថ្ងៃទី២៤ ខែតុលា ឆ្នាំ២០១៧នេះ។
ក្រោយបញ្ចប់កិច្ចប្រជុំភ្លាមៗនោះ ក្រុមប្រឹក្សាធម្មនុញ្ញបានបញ្ជាក់ថា ច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រទាំង៤នេះ គឹត្រឹមត្រូវស្របតាមរដ្ឋធម្មនុញ្ញ។ ក្រុមប្រឹក្សាធម្មនុញ្ញបានបញ្ជាក់ទៀតថា សេចក្តីសម្រេចរបស់ខ្លួននេះ គឺជាសេចក្តីសម្រេចជាស្ថាពរ បិទផ្លូវតវ៉ា ហើយមានអនុភាពអនុវត្តទៅលើអំណាចទាំងអស់ ដែលមានចែងក្នុងរដ្ឋធម្មនុញ្ញ និងត្រូវចុះផ្សាយក្នុងរាជកិច្ចផងដែរ។
អគ្គនាយកដ្ឋានរដ្ឋបាល-ហិរញ្ញកិច្ចនៃក្រុមប្រឹក្សាធម្មនុញ្ញ លោក ម៉េង ផល្លា បានឲ្យដឹងថា ក្រោយពិនិត្យសេចក្តីស្នើធ្វើវិសោធនកម្មច្បាប់ទាំង៤នេះ ត្រូវបានប្រគល់ជូនទៅរដ្ឋសភារួចរាល់ហើយ ដើម្បីរដ្ឋសភាបន្តនីតិវិធីសុំការឡាយព្រះហស្ថពីព្រះមហាក្សត្រខ្មែរ ដើម្បីដាក់ឲ្យប្រើប្រាស់។
សូមបញ្ជាក់ថា សេចក្តីស្នើច្បាប់ស្តីពីវិសោធនកម្មស្តីពីច្បាប់បោះឆ្នោត ដែលស្នើឡើងដោយតំណាងរាស្ត្ររបស់គណបក្សប្រជាជនកម្ពុជាចំនួន ៤៩រូបនោះ គឺផ្តោតសំខាន់ទៅលើការបែងចែកអាសនៈ របស់គណបក្សនយោបាយណាមួយ ដែលត្រូវបានរំលាយចោល ឬបោះបង់អាសនៈចោល៕
រាជធានីភ្នំពេញ ៖ តារាចម្រៀងអ្នកនាង ទូច ស្រីលក្ខ បើករថយន្តស៊េរីទំនើបមួយគ្រឿងម៉ាក BMW បុកម៉ូតូ Dream C125 អូសប្រហែលម៉ូតូប្រហែល៣០០ម៉ែត្រ បណ្ដាលឲ្យបុរសម្នាក់រងរបួសស្រាល។ ហេតុការណ៍នេះកើតឡើងនៅវេលាម៉ោង១ និង៣០នាទីរំលងអធ្រាត្រឈានចូល ថ្ងៃទី២៥ ខែតុលា ឆ្នាំ២០១៧ ស្ថិតនៅតាមបណ្ដោយផ្លូវ២១៧ កែងនិងផ្លូវវេងស្រេង ជិតកងរាជអាវុតហត្ថរាជធានីភ្នំពេញ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ។
តាមអ្នកឃើញហេតុការណ៍បានឲ្យដឹងថា តារាចម្រៀងខាងលើបានបើករថយន្តម៉ាក BMW ពាក់ស្លាកលេខភ្នំពេញ 2AB-3288 បើកពីត្បូងទៅជើង លុះមកដល់ចំណុចកើតហេតុ មានម៉ូតូ Dream C125 ឆ្នាំ២០១២ ពណ៌ពាក់ស្លាកលេខ កំពង់ធំ 1D-6904 បើកដោយបុរសម្នាក់ ពីកើតទៅលិច ក្នុងល្បឿនលឿនដូចគ្នា ហើយបុកគ្នាពេញទំហឹង បណ្ដាលឲ្យម្ចាស់ម៉ូតូខ្ទាតចេញទៅម្ខាង រងរបួសស្រាល។ ប្រភពបន្តថា ក្រោយកើតហេតុរថយន្តមិនបានឈប់ទេ ដោយព្យាយាមបើករត់អូសម៉ូតូបានប្រហែល៣០០ម៉ែត្រ ទើបប្រជាពរដ្ឋដេញពីក្រោយឃាត់បានទាំងរថយន្ត និងម្ចាស់តែម្ដង។
ក្រោយកើតហេតុភាគីទាំងពីរ បានសំរបសំរួលគ្នា ដោយភាគីខាងរថយន្តព្រមសងសំណងថ្លៃព្យាបាល ទៅលើជនរងគ្រោះទាំងអស់ និងម៉ូតូដែលខូចខាតផងដែរ ដើម្បីបញ្ចប់រឿង៕
រាជធានីភ្នំពេញ ៖ ក្រសួងពាណិជ្ជកម្ម បានចេញផ្សាយតារាងតម្លៃប្រេងឥន្ធនៈ ដែលត្រូវលក់រាយតាម បណ្តាស្ថានីយប្រេងទូទាំងប្រទេសកម្ពុជា ចាប់ពីថ្ងៃនេះ ដល់ថ្ងៃទី៣១ ខែតុលា មានដូចជា៖
រាជធានីភ្នំពេញ ៖ សាលារាជធានីភ្នំពេញកាលពីព្រឹកថ្ងៃទី២៤ ខែតុលា ឆ្នាំ២០១៧បានបើកកិច្ច ប្រជុំបន្ទាន់មួយក្រោមវត្តមាន លោក ឃួង ស្រេង អភិបាលរាជធានីភ្នំពេញ ដើម្បីពិភាក្សាលើ ការជួសជុលមហាវិថីសហព័ន្ធរុស្សី និងកំណាត់ផ្លូវជាតិលេខ៤ ឲ្យល្អប្រសើរឡើងឡើងវិញ ខណៈកំណាត់ផ្លូវនេះ មានការខូចខាតមួយចំនួន និងបង្កឲ្យមានការកកស្ទះចរាចរ ។ មន្ត្រីក្រសួងសាធារណការក៏មានវត្តមានក្នុងកិច្ចប្រជុំនោះផងដែរ ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា កិច្ចប្រជុំខាងលើនេះ គឺក្នុងគោលបំណងដើម្បីបែងចែកការងារ ឲ្យដាច់រវាងកំណាត់ផ្លូវនេះ ថាតើចំណុច ណា ដល់ចំណុចណា ដែលក្រសួងទទួលខុសត្រូវ ក្នុងការជួសជុល ហើយចំណុចណាដែល ខាងអាជ្ញាធរ រាជធានីភ្នំពេញ ជាទទួលខុសត្រូវ ក្នុងការជួសជុល ដោយសារកន្លងមកនេះ ការបែងចែកគ្នាមិនច្បាស់ធ្វើអោយការជួលជុលមានការយឺតយ៉ាវ និងអូសបន្លាយពេលវេលា ធ្វើឲ្យមានការថ្នាំងថ្នាក់ពីប្រជាពលរដ្ឋ។
អ្នកនាំពាក្យរូបនោះបានបញ្ជាក់ថា ក្រោយកិច្ចប្រជុំនេះ គឺបានសម្រេចគ្នាថា ក្នុងចំណាយផ្លូវ សហព័ន្ធរុស្សី និងផ្លូវជាតិលេខ៤ ដែលគ្រោងនឹងធ្វើការ ជួសជុលឡើងវិញនេះ មានប្រវែង ប្រមាណ២០គីឡូម៉ែត្រ ដោយរាជធានីភ្នំពេញ ទទួលការជួសជុលពីស្តុបបេកាសេ (ស្តុបអគារការណាឌីយ៉ា) រហូតដល់ស្តុបកប់ស្រូវ ដែលមានប្រវែងជាង១៩គីឡូម៉ែត្រ ចំណែកក្រសួងសាធារណការ និងដឹកជញ្ជូន ជាអ្នកទទួលខុសត្រូវជួសជុលផ្លូវជាតិលេខ៤ ចាប់ផ្តើមពីស្តុបកប់ស្រូវ ដល់ព្រំប្រទល់ខេត្តកណ្តាលដែលមាន៧៧០ម៉ែត្រ។
យ៉ាងណាក៏ដោយ លោកថា ការសម្រេចឲ្យមានការជួសជុលផ្លូវសហព័ន្ធរុស្សី និងផ្លូវជាតិ លេខ៤ឡើងវិញនេះ ធ្វើឡើងតាមបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ក្នុងឱកាសដែលសម្តេចបានអញ្ជើញសំណេះសំណាលជាមួយបងប្អូនកម្មករ-កម្មការិនីរោងចក្រ កាលពីថ្ងៃ១៨ ខែតុលា កន្លងមកនេះ។ លោកបញ្ជាក់ថា ចំពោះចំណុចផ្លូវ ដែលត្រូវជួសជុសនោះ រួមមាននៅមុខតុលាការខ្មែរក្រហមផ្លូវជាតិលេខ៤ ចំណុចរង្វង់មូល ចោមចៅ ការដ្ឋានសាងសង់ស្ពានអាកាស ដីហុយការដ្ឋានក្រុមហ៊ុន ប៊ូ យ៉ុង សង្កាត់ទឹកថ្លា និងនៅមុខក្រសួងការងារ។
លោក ម៉េត មាសភក្តី បានបញ្ជាក់ថា តាមពិតទៅគម្រោងជួសជុលផ្លូវខាងលើនេះ ត្រូវពឹងលើ ថវិកាគម្រោងអភិវឌ្ឍន៍ឆ្នាំ២០១៨ ប៉ុន្តែទោះបីជា យ៉ាងណាក្តី រដ្ឋបាលរាជធានីភ្នំពេញ នឹងខិតខិតរកថវិកា ដើម្បីជួសជុលកំណាត់ផ្លូវនេះ ឲ្យបានដើម្បីសម្រួលចរាចររបស់ប្រជាពលរដ្ឋ តបតាមបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា៕
រាជធានីភ្នំពេញ ៖ សមាជិកព្រឹទ្ធសភាអាមេរិកម្នាក់ គឺលោក ថេត គ្រូហ្ស ( Ted Cruz ) បានធ្វើការព្រមានថា នឹងពិចារណាបិទទិដ្ឋាការ VISA ចំពោះមន្ត្រីកម្ពុជាមួយចំនួនដែលពាក់ព័ន្ធ ប្រសិនបើមិនដោះលែងលោក កឹម សុខា ប្រធានគណបក្សសង្គ្រោះជាតិ ក្នុងរយះពេល២០ថ្ងៃ ( មុនថ្ងៃទី៩វិច្ឆិកា ) ខាងមុខនេះ ។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានប្រតិកម្មភ្លាមៗ ទៅនឹងការព្រមានរបស់ Tel Cruz សមាជិកព្រឹទ្ធសភាអាមេរិក ។ តាមរយះ Facebook លោក ផៃ ស៊ីផាន បានហៅសំដី សមាជិកព្រឹទ្ធសភានោះថា ជាការប្រមាថ និងឈ្លានពានដល់កិច្ចការផ្ទៃក្នុង នៃរដ្ឋអធិបតេយ្យ ដែលមិនក្រោមចំណុះក៏ដូចជា ការប្រឆាំងយ៉ាងពិតប្រាកដ ដល់គោលនយោបាយបរទេស របស់ប្រធានាធិបតី ដូណាល់ ត្រាំ ក្នុងការបញ្ឈប់ការលូកលាន់ជ្រៀតជ្រែកកិច្ចការផ្ទៃក្នុង ពីសំណាក់សហរដ្ឋអាមេរិក។
លោក ផៃ ស៊ីផាន បញ្ជាក់ថា វិសោធនកម្មច្បាប់ជាសិទ្ធិផ្តាច់មុខ របស់សភាកម្ពុជាដែលតំណាង ឲ្យអធិបតេយ្យ កម្ពុជា គឺពុំមានជនណា ឬ ក្រុមណាទោះបីជាកម្ពុជាផ្ទាល់ ក៏ដូចជាបរទេសដែល ចូលជ្រៀតជ្រែកការងារនេះបានឡើយ។ នោះរាប់ទាំងច្បាប់ និងនីតិវិធី គឺជាផលប្រយោជន៍ ផ្តាច់មុខ របស់សមាជិកសភា នៅក្នុងកិច្ចការងារនេះ។
លោកបន្តថា ចំពោះការរំលាយគណបក្ស ក៏ជាដែនសមត្ថកិច្ចផ្តាច់មុខរបស់តុលាការកម្ពុជា នៅក្នុងការវិនិច្ឆ័យក្តីរបស់ខ្លួន ដែលឈរនៅលើអង្គសេចក្តី និងអង្គច្បាប់។ ការវិនិច្ឆ័យក្តីនេះ គឺស្ថិតនៅក្នុងនាម ក៏ដូចជាផលប្រយោជន៍របស់ពលរដ្ឋខ្មែរសុទ្ធសាធ គឺមិនស្ថិត ឬរណបជនណា អង្គការណា ឬបរទេសណាមួយឡើយ ។ លោកថា រាល់ចំណាត់ការទាំងពីរស្ថាប័ន ខាងលើនេះ គឺស្ថិតនៅក្នុងមូលដ្ឋានគ្រឹះនៃកិច្ចរក្សា និងបន្ត «សន្តិភាព សន្តិសុខ និងវិបុលភាព» ដែលជាផលប្រយោជន៍ផ្តាច់មុខ នៅក្នុងប្រទេសរបស់ ប្រជាពលរដ្ឋកម្ពុជាសុទ្ធសាធ។
លោក ផៃ ស៊ីផាន បានបន្ថែមថា ចំណែកលទ្ធផលនៃការបោះឆ្នោតដែលនឹងឆ្លុះបញ្ចាំងពីអ្វីៗ នៃការអនុវត្តច្បាប់បោះឆ្នោតកម្ពុជា ដែលធានាបាននូវភាពសេរី និងទទួលយកបាន គឺប្រាសចាកពីការ លូកលាន់របស់បរទេសជិត ឆ្ងាយ ដែលប្រជាពលរដ្ឋខ្មែរ «ប្រើប្រាស់ និងការពារសិទ្ធស្វ័យសម្រេចរបស់ខ្លួន ។
អ្នកនាំពាក្យរូបនោះបានបន្ថែមទៀតថា ចំពោះឧសានវាទ ថ្ងៃទី០៩ វិច្ឆិកា ក្នុងការដោះលែង ជនជាប់ចោទណាមួយឲ្យរួចខ្លួន ដោយឥតលក្ខខណ្ឌនោះ គឺពុំមានបានចែងនៅក្នុងច្បាប់ កម្ពុជានោះទេ ហើយថ្ងៃទី០៩ វិច្ឆិកានេះ គឺប្រាកដណាស់ ថាជាថ្ងៃដែលប្រជាពលរដ្ឋខ្មែរគ្រប់រូប បានធ្វើពលីកម្មគ្រប់បែបយ៉ាងជាច្រើនជំនាន់ ក្នុងកិច្ចដណ្តើមយក និងកិច្ចការពារ ឯករាជ្យ ប្រជាជាតិរបស់ខ្លួន។
លោកបន្តថា ប្រជាពលរដ្ឋខ្មែរគ្រប់រូបមិនត្រឹមតែអបអរសាទរ នៃទិវាប្រកាសឯករាជ្យនេះទេ ប្រជាជាតិទាំងមូលរបស់ខ្លួននៅតែប្រកាន់យក ឯកភាព សាមគ្គី គោរព ដល់ព្រះមហាក្សត្រជាទីសក្ការៈរបស់ខ្លួន រួមគ្នាជាមួយនឹងរាជរដ្ឋាភិបាល ដែលកើតចេញពីការបោះឆ្នោត ជាមួយនឹងកិច្ចពង្រឹងបន្ថែមទៀតនូវឯករាជ្យភាពនេះ។ ហើយកម្ពុជាតែងតែទទួលបានលិខិតចូលរួមអបអរសាទរ នៃទិវាឯករាជ្យនេះ ពីប្រជាជាតិជាមិត្តនានាក្នុងសកលលោក ជាពិសេសពីសហរដ្ឋអាមេរិកផងដែរ។ កម្ពុជាមិនអាចឯករាជ្យរបស់ខ្លួនជាថ្នូរដូរជាមួយជនក្បត់ឯករាជ្យជាតិនេះបានទេ ទោះតម្លៃណាក៏ដោយ៕
រាជធានីភ្នំពេញ ៖ នារសៀលថ្ងៃទី២៤តុលានេះ ក្រុមប្រឹក្សាធម្មនុញ្ញនឹងប្រជុំពិនិត្យច្បាប់ស្តីពីការបែងចែកអាសនៈគណបក្សនយោបាយដែលត្រូវរំលាយ សង្គ្រោះជាតិដែលនឹងត្រូវរំលាយចោល។
អគ្គនាយកដ្ឋានរដ្ឋបាលហិរញ្ញកិច្ច នៃក្រុមប្រឹក្សាធម្មនុញ្ញ លោក ម៉េង ផល្លា ថ្លែងប្រាប់អ្នកសារព័ត៌មានថា សេចក្តីស្នើច្បាប់ស្តីពីវិសោធនកម្មច្បាប់ស្តីការបោះឆ្នោតចំនួន៤ នឹងត្រូវក្រុមប្រឹក្សាធម្មនុញ្ញបើកកិច្ចប្រជុំពិនិត្យ និងពិភាក្សា នៅរសៀលថ្ងៃទី២៤ ខែតុលា ឆ្នាំ២០១៧នេះ។ សេចក្តីស្នើច្បាប់ចំនួន៤ ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ, ជ្រើសតាំងសមាជិកព្រឹទ្ធ, ជ្រើសរើសក្រុមប្រឹក្សាឃុំ សង្កាត់ និងជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ។
កិច្ចប្រជុំនេះធ្វើឡើងក្រោយពីរដ្ឋសភា និងព្រឹទ្ធសភាអនុម័តវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ, ជ្រើសតាំងសមាជិកព្រឹទ្ធ, ជ្រើសរើសក្រុមប្រឹក្សាឃុំ សង្កាត់ និងជ្រើសរើសក្រុមប្រឹក្សារាជធានី ខេត្តក្រុងស្រុក និងខណ្ឌ កាលពីពេលថ្មីៗនេះ។ វិសោធនកម្មច្បាប់បោះឆ្នោត ដែលស្នើឡើងដោយតំណាងរាស្ត្ររបស់គណបក្សប្រជាជនកម្ពុជាចំនួន៤៩ ដោយគ្មានវត្តមានបក្សសង្គ្រោះជាតិ ផ្តោតសំខាន់ទៅលើការបែងចែកអាសនៈគណបក្សនយោបាយមួយនេះ មុនកាលរំលាយចោល៕
ខេត្តព្រះវិហារ ៖ ត្រឹមតែរយៈពេលប្រហែលមួយម៉ោង តូបលក់ដូររបស់អាជីវករចំនួន១២តូប នៅក្នុងផ្សារកំពង់ប្រណាក ខេត្តព្រះវិហារ ត្រូវបានអគ្គិភ័យឆាបឆេះខូចខាតទាំងស្រុង ខណៈដែលករណីនេះកើតឡើងនៅវេលាម៉ោង១០ និង១៥នាទីយប់ថ្ងៃទី២៣ ខែតុលា ឆ្នាំ២០១៧ ស្ថិតក្នុងភូមិឡអិដ្ឋ សង្កាត់កំពង់ប្រណាក ក្រុងព្រះវិហារ។
អធិការនគរបាលក្រុងព្រះវិហារលោកវរសេនីយ៍ទោ គង់ គា បានប្រាប់ឲ្យដឹងថា ករណីឆេះតូបក្នុងផ្សារកំពង់ប្រណាកនេះ គឺបណ្តាលមកពីឆ្លងចរន្តអគ្គិសនី ទើបបង្កជាភ្លើងឆេះខូចខាតទាំងស្រុងអស់១២តូប ស្មើនិង៣ម្ចាស់។ លោកបន្តថា ក្នុងហេតុការណ៍នេះកម្លាំងនគរបាលរបស់៣០នាក់ និងកម្លាំងស្នងការ៥០នាក់បានចុះអន្តរាគមន៍ភ្លាមៗ ដោយប្រើប្រាស់រថយន្តពន្លត់អគ្គិភ័យ៣គ្រឿង ក្នុងនោះបាញ់ទឹកអស់៥រថយន្ត ទើបបណ្តាលឲ្យភ្លើងរលត់ទាំងស្រុង៕
ភ្នំពេញ ៖ ផ្ទុះកាប៊ីនភ្លើងបណ្តាលអោយមានអគ្គិភ័យឆាបឆេះបង្គោលភ្លើង និងរាលដាលឆេះខ្សែយ៉ាងសន្ធោសន្ធៅ ដែលហេតុការណ៍ភ្ញាក់ផ្អើលបានកើតឡើងកាលពីវេលាម៉ោង៨ និង៥០នាទីថ្ងែទី២៤ ខែតុលា ឆ្នាំ២០១៧ ស្ថិតនៅតាមបណ្តោយផ្លូ១៩៩កែងនិងផ្លូវ៤៣០ក្នុងសង្កាត់ទំនប់ទឹក ខណ្ខចំកាមន រាជធានីភ្នំពេញ។
សម្ថតកិច្ចបានប្រាប់អោយដឹងថា មានអគ្គិភ័យឆាបឆេះនៅលើបង្គោលភ្លើងនេះគឺបណ្តាលមកពីឆ្លងចរន្តនៅក្នុងប្រអប់កាបីនភ្លើងទើបណ្តាលអោយមានការឆេះរាលដាលទៅតាមខ្សែភ្លើងដែលមានជាតិជ័រកាន់យែខ្លាំងទើបធ្វើអោយការគ្រប់គ្រងមិនបានប្រជាពលរដ្ឋដែលនៅកន្លែងកើតហេតុបាននាំគ្នាយកបំពង់ពន្លត់អគ្គិភ័យបាញ់ពន្លត់អស់ចំនួន៧ធុង តែនៅមិនអាចគ្រប់គ្រងបាន បានអោយរថយន្តអគ្គិភ័យបានមកជួយអន្តរាគមន៍មកចំនួន២គ្រឿងបានបាញ់អន្តរាគមន៍អស់ចំនួន១ឡានទើបរត់អស់ទាំងស្រុងមោនមានកាប៉ះពាល់ដល់ផ្ទះអ្នកជិតខាង។
ក្រោយពីសម្ថតកិច្ចបានពន្លត់អគ្គិភ័យនេះរួចបានប្រគល់ទៅអោយក្រុមជំនាញអគ្គិសនីជាអ្នកគ្រប់គ្រងវិញ៕
ខេត្តបន្ទាយមានជ័យ ៖ ក្មេងប្រុស២នាក់បានលង់ទឹកស្លាប់យ៉ាងអាណោចអាធ័ម ខណៈតាមបងទៅដាក់ទ្រូនៅស្រែ ។ ករណីគួរតក់ស្លុតនេះកើតឡើងនៅវេលាម៉ោង១ថ្ងៃត្រង់ថ្ងៃទី២៣ ខែតុលា ឆ្នាំ២០១៧ នៅត្រង់ចំណុចប្រឡាយខាងលិចភូមិចំការចេក ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ ។
លោកវរសេនីយ៍ត្រី រស់ សំបូរ មេបញ្ជាការមូលដ្ឋានកងរាជអាវុធហត្ថស្រុកមង្គលបូរីបានប្រាប់ឲ្យដឹងថា ក្មេងជនរងគ្រោះទាំង២នាក់ ៖ ទី១ឈ្មោះ ធឿម ចាន់ថាត់ ភេទប្រុស អាយុ១០ឆ្នាំ រស់នៅភូមិចំការចេក ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ។ ទី២ឈ្មោះ រី សារឿម ភេទប្រុស អាយុ១១ឆ្នាំ រស់នៅភូមិ ក្រមល់ ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ។ លោក រស់ សំបូរ បានឲ្យដឹងទៀតថា នៅមុនពេលកើតហេតុនោះម្តាយកុមាររងគ្រោះទាំង២នាក់បានជាប់រវល់ទៅដង្ហែសពយាយរបស់កុមាររងគ្រោះយកទៅបូជានៅឯវត្ត។ ម្តាយឪពុកក្មេងទាំង២ក្រោយពីវិលត្រឡប់មកវិញបានត្រឹមឱបសពកូនយំសោកស្តាយប៉ុណ្ណោះ។
កុមាររងគ្រោះទាំង២ត្រូវបានឪពុក ម្តាយ យកទៅធ្វើបុណ្យតាមប្រពៃណីនៅគេហដ្ឋានរៀងៗខ្លួន៕
ហ្វីលីពីន ៖ ប្រធានវិស័យការពារជាតិមកពីប្រទេសជាសមាជិកអាស៊ានទាំង១០បានប្ដេជ្ញាចិត្តប្រឹងប្រែងរួមគ្នាក្នុងការប្រយុទ្ធប្រឆាំងអំពើភេរវកម្ម ។ ការប្តេជ្ញាបែបនេះធ្វើឡើងនៅឯកិច្ចប្រជុំគណៈរដ្ឋមន្ត្រីការពារជាតិអាស៊ានលើកទី១១កាលពីថ្ងៃចន្ទនៅទីក្រុងក្លាក (Clark) ប្រទេសហ្វីលីពីន។
គណៈរដ្ឋមន្ត្រីមកពីប្រទេសជាសមាជិកអាស៊ានបានចុះហត្ថលេខាលើសេចក្ដីប្រកាសរួមគ្នាមួយដើម្បីបញ្ជាក់ជាថ្មីពីការប្ដេជ្ញាចិត្តធ្វើការរួមគ្នាប្រឆាំងគ្រប់ទម្រង់ទាំងអស់នៃអំពើភេរវកម្មនិងជ្រុលនិយមនៅក្នុងតំបន់អាស៊ាន។ ទន្ទឹមនោះគណៈរដ្ឋមន្ត្រីមួយចំនួនក៏បានថ្កោលទោសការឡោមព័ទ្ធរយៈពេល១ខែពីសំណាក់ក្រុមឧទ្ទាមនៅក្នុងទីក្រុងម៉ារ៉ាវីនៅប្រទេសហ្វីលីពីន និងបានសម្ដែងការគាំទ្រយ៉ាងពេញទំហឹងចំពោះកិច្ចប្រឹងប្រែងរបស់ រដ្ឋាភិបាលប្រទេសនេះក្នុងការដោះស្រាយស្ថានការណ៍សន្តិសុខ និងមនុស្សធម៌នៅក្នុងទីក្រុងនេះ។
ជាមួយគ្នានោះកិច្ចប្រជុំនេះបានអនុម័តបង្កើតផែនការសកម្មភាពរយៈពេល៣ឆ្នាំមួយដោយមានការយល់ព្រមពីគណៈរដ្ឋមន្ត្រីការពារជាតិរបស់អាស៊ាន និងបានសម្រេចរៀបចំកិច្ចប្រជុំបូកគណៈរដ្ឋមន្ត្រីការពារជាតិអាស៊ានជារៀងរាល់ឆ្នាំដោយចាប់អនុវត្តពីឆ្នាំក្រោយតទៅ៕
