ខេត្តកែប ៖ ជនជាតិរុស្ស៊ីម្នាក់ត្រូវបានកម្លាំងនគរបាលឃាត់ខ្លួនពាក់ព័ន្ធពីបទប្រើប្រាស់ឯកសណ្ឋានយោធា ប្រើ ប្រាស់ខ្នោះ ដៃនឹងវទ្យុទាក់ទងខុសច្បាប់នឹងសង្ស័យប្រើកញ្ឆាខុសច្បាប់នៅផ្ទះជួល ខណៈដែលការឃាត់ខ្លួននេះធ្វើឡើងកាលពីម្សិលមិញ។
សមត្ថកិច្ចមូលដ្ឋានបានឲ្យដឹងថា ជនសង្ស័យខាងលើជាជនជាតិរុស្ស៊ី ឈ្មោះ Vlasovilya ភេទប្រុស អាយុ៣៧ឆ្នាំ កាន់លិខិតឆ្លង ដែនលេខ 714309033 ជាអ្នកទេសចរ ស្នាក់នៅផ្ទះជួលក្នុងភូមិកែប សង្កាត់ក្រុងកែប។ ចំណែកវត្ថុតាងដកហូតបានរួមមាន ៖ ខ្នោះដៃមួយគូរ, វិទ្យុទាក់ទង២គ្រឿង, ស្រោមកាំបិតស្នៀតមួយ, អាវក្រោះមួយ៥, ខោប៉ារ៉ាមួយ, សាំងតេរ៉ុងមួយ, ទ្រនាប់ក្បាលជង្គង់មួយគូ និងទ្រនាប់កែងដៃមួយគូ។ ក្រៅពីនោះឆែកឆេរក្រៅ ផ្ទះ(ចំងាយ៣-៤ម៉ែត្រ) រកឃើញកាំភ្លើងខ្លីជ័រមួយដើមនិងកញ្ឆាក្រៀមមួយកញ្ចប់ទំងន់ជាងមួយខាំ។
បច្ចុប្បន្នកម្លាំងជំនាញកំពុងកសាងសំណុំរឿងបន្តនីតិវិធីទៅតុលាការខេត្តកំពតដើម្បីចាត់ការបន្តតាមច្បាប់៕
ហ្វីលីពីន ៖ កាលពីថ្ងៃពុធក្រុមសមាជិកសភាប្រទេសហ្វីលីពីនបានគាំទ្រទាំងស្រុងនូវផែនការរបស់ប្រធានាធិបតី លោក រ៉ូឌ្រីហ្គោ ឌូធឺតេ ក្នុងការបន្តអនុវត្តច្បាប់អាជ្ញាសឹករយៈពេលមួយឆ្នាំទៀតនៅលើកោះមីនដាណាវនៅភាគខាងត្បូងប្រទេស ដើម្បីបំផ្លាញក្រុមអ៊ីស្លាមនិយម និងក្រុមឧទ្ទាមកុម្មុយនិស្ត។
ការបន្តអនុវត្តច្បាប់អាជ្ញាសឹករហូតដល់ថ្ងៃទី៣១ ខែធ្នូ ឆ្នាំ២០១៨ខាងមុខនេះគឺជារយៈពេលមួយយូរជាងគេបំផុតក្នុងចំណោមច្បាប់អាជ្ញាសឹក ដែលបុរសខ្លាំងប្រទេសហ្វីលីពីនគឺលោក ហ្វេឌីណាន ម៉ាកូស ធ្លាប់បានប្រើតាំងពីទសវត្សរ៍ឆ្នាំ១៩៧០។
ក្នុងសម័យប្រជុំពេញអង្គនៃសភាជាតិពីថ្ងៃម្សិលមិញនេះ សមាជិកសភាចំនួន២៤០រូបក្នុងចំណោម២៦៧រូបបានបោះឆ្នោតគាំទ្រលោក ឌូធឺតេ ដើម្បីចាត់វិធានការតឹងរ៉ឹងបញ្ឈប់ក្រុមសកម្មប្រយុទ្ធគាំទ្ររដ្ឋអ៊ីស្លាមដែលកំពុងជ្រើសរើសយុទ្ធជន និងត្រៀមខ្លួនធ្វើការវាយប្រហារថ្មីៗទៀត។
សូមបញ្ជាក់ថា ក្នុងការអនុវត្តច្បាប់អាជ្ញាសឹកនៅភាគខាងត្បូងប្រទេសហ្វីលីពីនកន្លងមកនេះ កងកម្លាំងប្រដាប់អាវុធប្រទេសហ្វីលីពីនបានសម្លាប់មនុស្សជាង១១០០នាក់ភាគច្រើនជាក្រុមសកម្មប្រយុទ្ធ និងបានធ្វើឲ្យប្រជាពលរដ្ឋមូលដ្ឋានជាង២០ម៉ឺននាក់រត់ចេញពីទីក្រុងម៉ារ៉ាវី៕
តួកគី ៖ បណ្ដាប្រទេសមូស្លីមបានថ្កោលទោសប្រធានាធិបតីអាមេរិកលោក ដូណាល់ ត្រាំ ដែលបានទទួលស្គាល់ទីក្រុងហ្សេរុយសាឡឹមជារដ្ឋធានីរបស់ប្រទេសអ៊ីស្រាអែល ហើយបានអំពាវនាវឲ្យពិភពលោកទទួលស្គាល់តំបន់ខាងកើតទីក្រុងហ្សេរុយសាឡឹមជារដ្ឋធានីរបស់រដ្ឋប៉ាឡេស្ទីន។
អគ្គលេខាធិការអង្គការនៃកិច្ចសហប្រតិបត្តិការអ៊ីស្លាមបាននិយាយថា សមាជិកដែលបានចូលរួមកិច្ចប្រជុំនៃអង្គការនេះបានព្រមព្រៀងគ្នា១០០ភាគរយដោយបានថ្កោលទោសចំពោះការប្រកាសទទួលស្គាល់របស់លោក ត្រាំ។
ប្រធានាធិបតីប្រទេសតួកគីលោក រ៉េស៊ីប តាយីប អេដូហ្គេន បាននិយាយថា ដំណើរការសន្តិភាពនៅមជ្ឈិមបូព៌ាដឹកនាំដោយសហរដ្ឋអាមេរិកត្រូវបានបញ្ចប់ហើយដោយសារតែទង្វើរបស់លោក ត្រាំ នេះឯង។
លោកបានបញ្ជាក់នៅចុងបញ្ចប់នៃកិច្ចប្រជុំរបស់អង្គការដែលមានសមាជិក៥៧ប្រទេសនេះថា វាដល់ពេលដែលក្រុមដឹកនាំមូស្លីមទាំងអស់ត្រូវពិភាក្សាគ្នាថា តើអ្នកណាជាអ្នកយកតួនាទីរបស់រដ្ឋាភិបាលក្រុងវ៉ាស៊ីនតោន ហើយអ្នកណាជាអ្នកគិតគូរយកបញ្ហានេះទៅពិភាក្សាជាមួយសហប្រជាជាតិ៕
រាជធានីភ្នំពេញ ៖ យោងតាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម បានឲ្យដឹងថា អាកាធាតុនៅប្រទេសកម្ពុជានឹងចុះត្រជាក់ជាលើកទី២ ចាប់ថ្ងៃទី១៩ដល់ថ្ងៃទី២២ ខែធ្នូ ឆ្នាំ២០១៧ ខាងមុខនេះ ដោយសម្ពាធខ្ពស់ពីប្រទេសចិន នឹងរំកិលមកគ្របដណ្ដប់លើជ្រោយឥណ្ឌូចិន។ ក្នុងពេលជាមួយគ្នានេះ ខ្យល់មូសុងព្ឍសានខ្លាំង ក៏បង្កើតឥទ្ធិពលមកលលកម្ពូជា។
លក្ខណៈបែបនេះ និងធ្វើឲ្យសីតុណ្ហភាពអប្បបរមានៅកម្ពុជា ថងចុះខ្លាំង ឯល្បឿនខ្យល់ជំនោរបក់ពីទិសខាងជើង ក៏មានឥទ្ធិពលខ្លាំង ក្នុងមាន ខេត្តឧត្តរមានជ័យ , ព្រះវិហារ, ស្ទឹងត្រែង, រតនគិរី,មណ្ឌលគិរីនិងប៉ែលិន និងមានសីតុណ្ហភាពអប្បរមាមានពី ១៦-១៧ អង្គស្សាសេ៕
ព័ត៌មានលម្អិតសូមអានសេចក្តីប្រកាសរបស់ក្រសួងខាងក្រោមនេះ ៖
រាជធានីភ្នំពេញ ៖ តាមលិខិតអញ្ជើញមេធាវីរបស់សាលាដំបូងរាជធានីភ្នំពេញបានឲ្យដឹងថា នៅព្រឹកថ្ងៃទី១៤ ខែធ្នូ ឆ្នាំ២០១៧នេះ ចៅក្រស៊ើបសួរសាលាដំបូងរាជធានីភ្នំពេញ លោក គី ឫទ្ធី នឹងបន្តសួរចម្លើយលោក កឹម សុខា អតីតប្រធានគណបក្សសង្គ្រោះជាតិដែលកំពុងជាប់ឃុំក្នុងពន្ធនាគារត្រពាំងផ្លុង នៃខេត្តត្បូងឃ្មុំបន្ថែមទៀត ពាក់ព័ន្ធបទល្មើសក្បត់ជាតិ។ លិខិតដដែលបញ្ជាក់ថា ការសាកសួរនេះនឹងធ្វើឡើងនៅបន្ទប់សាកសួរ នៃមណ្ឌលអប់រំកែប្រែទី៣ «ម៣» (ពន្ធនាគារត្រពាំងផ្លុង) ខេត្តត្បូងឃ្មុំ ដែលជាកន្លែងឃុំខ្លួន លោក កឹម សុខា៕
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី១៣ ខែធ្នូ ឆ្នាំ២០១៧នេះ បានចេញសេចក្តីថ្លែងការណ៍ចំនួន៣ចំណុច ឆ្លើយតបទៅនឹងការប្រកាសព្យួរជំនួយរបស់សហគមន៍អឺរ៉ុប មកលើការរៀបចំការបោះឆ្នោតនៅក្នុងប្រទេសកម្ពុជា៕
យ៉េមែន ៖ សារព័ត៌មាន BBC ចេញផ្សាយថា មនុស្សយ៉ាងហោចណាស់៣០នាក់បានស្លាប់បាត់បង់ជីវិត នៅក្នុងការវាយប្រហារផ្លូវអាកាសរបស់ក្រុមចំរុះអារ៉ាប់ដឹកនាំដោយ អារ៉ាប៊ីសាអូឌីតលើពន្ធនាគារមួយកន្លែងនៃក្រុមឧទ្ទាមហ៊ូទី ក្នុងរដ្ឋធានីសាណាអា ប្រទេសយ៉េមែន។
បើតាមប្រព័ន្ធផ្សព្វផ្សាយនៅក្នុងតំបន់ អ្នកស្លាប់ភាគច្រើនជាអ្នកជាប់ឃុំឃាំង នៅឯពន្ធនាគារមួយក្នុងមូលដ្ឋានយោធារបស់ក្រុមឧទ្ទាមហ៊ូទី។ ចំណែកឯឆ្មាំពន្ធនាគារម្នាក់ក៏បានឱ្យដឹងដែរថា ការវាយប្រហារលើកដំបូងបានបំផ្លាញផ្នែកខ្លះនៃពន្ធនាគារ ដោយជំរុញឱ្យអ្នកទោសមួយចំនួនព្យាយាមរត់គេចខ្លួន ខណៈការវាយប្រហារមួយផ្សេងទៀតបានបំផ្លាញអគារមួយស្ទើរតែទាំងស្រុង។
សូមបញ្ជាក់ថា បើតាមអង្គការសហប្រជាជាតិ មនុស្សច្រើនជាង៨,៦៧០នាក់ ត្រូវបានសម្លាប់ និង៤៩,៩៦០នាក់ បានរងរបួសគិតចាប់តាំងពីក្រុមចំរុះអារ៉ាប់ធ្វើអន្តរាគមន៍ យោធាក្នុងប្រទេសយ៉េមែន កាលពីឆ្នាំ២០១៥មក ហើយមនុស្ស២០.៧លាននាក់ កំពុងត្រូវការជំនួយមនុស្សធម៌ជាបន្ទាន់៕
ខេត្តបាត់ដំបង ៖ កម្លាំងចម្រុះនៃស្នងការដ្ឋាននគរបាលខេត្តបាត់ដំបងបានចុះបង្ក្រាបទីតាំងកត់កន្ទុយលេខមួយកន្លែងនៅក្នុងសង្កាត់ស្វាយប៉ោ ក្រុងបាត់ដំបង ខេត្តបាត់ដំបង នៅថ្ងៃទី១២ ខែធ្នូ ឆ្នាំ២០១៧ ដោយបានឃាត់ខ្លួនស្ត្រីជាមេឆ្នោតម្នាក់ រួមនិងវត្ថុតាងមួយចំនួន។
តាមសមត្ថកិច្ចបានឲ្យដឹងថា ស្ត្រីជាមេឆ្នោតដែលឃាត់ខ្លួននោះ ឈ្មោះ សូ ភីរម្យ អាយុ២៣ឆ្នាំ រស់នៅភូមិសំរោងក្នុង ឃុំសំរោងក្នុង ស្រុកឯកភ្នំ មុខរបរលក់សំបុត្ររថយន្តក្រុង នៅផ្សារបឹងឈូក។ ចំណែកវត្ថុតាងដែលដកហូតរួមមាន ៖ ទូរស័ព្ទ iPhone ០៣គ្រឿង ទូរសារ iPaid០១គ្រឿង ប្រាក់រៀល ២លាន ៧៤ម៉ឺនរៀល ប្រាក់ដុល្លារ១៨០ដុល្លារ ប្រាក់បាត១ពាន់បាត ក្រដាសកត់កន្ទុយលេខប្រចាំថ្ងៃ មួយចំនួន។ អ្នកប្រព្រឹត្តិជាមេឆ្នោត រួមទាំងវត្ថុតាងបានរៀបចំសំណុំរឿងបញ្ជូនទៅសាលាដំបូងខេត្តដើម្បីចាត់ការតាមផ្លូវច្បាប់៕
វ៉ាស៊ីងតោន ៖ រដ្ឋមន្ត្រីការបរទេសសហរដ្ឋអាមេរិកលោក រ៉ិក ធីល័រសុន បាននិយាយថា សហរដ្ឋអាមេរិកបានត្រៀមខ្លួនរួចហើយក្នុងការពិភាក្សាជាមួយប្រទេសកូរ៉េខាងជើងនៅពេលណាក៏បានប៉ុន្តែរដ្ឋាភិបាលក្រុងព្យុងយ៉ាងត្រូវតែត្រៀមខ្លួនក្នុងការផ្លាស់ប្ដូរមាគ៌ាទៅរកកម្មវិធីផលិតមីស៊ីល និងនុយក្លេអ៊ែរ។
ទន្ទឹមនេះដែរលោក ធីល័រសុន បាននិយាយក្នុងកិច្ចពិភាក្សាជាមួយក្រុមអ្នកវិភាគក្នុងទីក្រុងវ៉ាស៊ីងតោនសហរដ្ឋអាមេរិកថា ការត្រៀមខ្លួនរបស់យោធាសហរដ្ឋអាមេរិកក្នុងការឆ្លើយតបនឹងការគំរាមកំហែងណាមួយពីប្រទេសកូរ៉េខាងជើងក៏មានលក្ខណៈមួយខ្លាំងផងដែរ។
ពេលនេះកងកម្លាំងប្រដាប់អាវុធសហរដ្ឋអាមេរិកកំពុងទទួលការបញ្ជាឲ្យត្រៀមលក្ខណៈនៅគ្រប់អង្គភាពទាំងអស់។
សូមបញ្ជាក់ថា កន្លងមកនេះលោក ធីល័រសុន ក៏ធ្លាប់បានជជែកជាមួយប្រធានាធិបតីសហរដ្ឋអាមេរិកលោក ដូណាល់ ត្រាំ ពីការប្រើបណ្ដាញទំនាក់ទំនងជាមួយរដ្ឋាភិបាលក្រុងព្យុងយ៉ាងដែរ ប៉ុន្តែលោក ត្រាំ បាននិយាយថា វាគឺជាការចំណាយពេលវេលាឥតប្រយោជន៍៕
ខេត្តរតនគិរី ៖ បុរសជនជាតិវៀតណាមម្នាក់ត្រូវបាននគរបាលស្រុកបកែវ ឃាត់ខ្លួនពាក់ព័ន្ធករណីចោរកម្ម (លួចម៉ាស៊ីនបាញ់ស្មៅ) កាលពីថ្ងៃទី១០ ខែវិច្ឆិកា ឆ្នាំ២០១៧កន្លងទៅ ហើយរត់គេចខ្លួនបាត់។ ការឃាត់ខ្លួននេះធ្វើឡើងកាលពីថ្ងៃចន្ទ ៨រោច ខែមិគសិរ ឆ្នាំរកា ព.ស.២៥៦១ ត្រូវនឹងថ្ងៃទី១១ ខែឆ្នូ ឆ្នាំ២០១៧ វេលាម៉ោង៧ និង៣០នាទីយប់នៅចំណុចភូមិ១ ឃុំឡាមិញ ស្រុកបកែវ។
មន្ត្រីនគរបាលបានឲ្យដឹងថា ជនសង្ស័យដែលឃាត់ខ្លួនឈ្មោះ ឡេ វ៉ាងទុង ភេទប្រុស អាយុ២៤ឆ្នាំ ជនជាតិវៀតណាម។ ចំណែកជនរងគ្រោះឈ្មោះ ភន ផេន ភេទប្រុស អាយុ៣៩ឆ្នាំ ជនជាតិខ្មែរ មានទីលំនៅភូមិឃុំកើតហេតុខាងលើ។ សមត្ថកិច្ចបានបញ្ជាក់ថា ជនសង្ស័យរូបនេះ ត្រូវចាប់ខ្លួនជាប់ពាក់ព័ន្ធករណីចោរកម្ម លួចម៉ាស៊ីនបាញ់ស្មៅចំនួន២គ្រឿង។
ក្រោយឃាត់ខ្លួន ជនសង្ស័យត្រូវបានសមត្ថកិច្ចបញ្ជូនទៅអធិការដ្ឋាននគរបាលស្រុកបរកែវ ដើម្បីកសាងសំណុំរឿង បញ្ជូនបន្តទៅសាលាដំបូងខេត្ត ចាត់ការតាមនីតិវិធី៕
កូរ៉េខាងជើង ៖ មេដឹកនាំប្រទេសកូរ៉េខាងជើងលោក គីម ជុងអ៊ុន បាននិយាយក្នុងមហាសន្និបាតដ៏កម្រមួយនៅក្នុងទីក្រុងព្យុងយ៉ាងថា ប្រទេសកូរ៉េខាងជើងគួរតែបង្កើនការផលិតសព្វាវុធថ្មីៗឲ្យបានច្រើនថែមទៀតដើម្បីឲ្យមានកម្លាំងខ្លាំងជាងប្រទេសជាសត្រូវរបស់ខ្លួន។
ទូរទស្សន៍រដ្ឋនៅប្រទេសកូរ៉េខាងជើង KRT ពីថ្ងៃម្សិលមិញនេះបានបង្ហាញវីដេអូពីលោក ជុងអ៊ុន ព្រមទាំងមន្ត្រីក្រោមឱវាទផ្សេងទៀតកំពុងជួបប្រជុំគ្នានៅសន្នីសីទឧស្សាហកម្មលើកទី៨នៅមជ្ឈមណ្ឌលវប្បធម៌មួយក្នុងទីក្រុងព្យុងយ៉ាង។ ទូរទស្សន៍នេះបាននិយាយថា លោក ជុងអ៊ុន បាននិយាយទៅកាន់សន្និសីទនេះដោយបានសរសើរចំពោះការបាញ់សាកល្បងមីស៊ីលផ្លោងឆ្លងទ្វីបរបស់ប្រទេសកូរ៉េខាងជើងកន្លងទៅថ្មីៗនេះ។ ទន្ទឹមនោះមេដឹកនាំប្រទេសកម្មុយនិស្តមួយនេះក៏បានជំរុញឲ្យបន្តផលិតមីស៊ីលដែលអាចផ្ទុកក្បាលនុយក្លេអ៊ែរដែលមានសមត្ថភាពអាចបាញ់ដល់ទឹកដីសហរដ្ឋអាមេរិកនៅពេលអនាគតផងដែរ។
សូមរម្លឹកថា កាលពីខែមុនប្រទេសកូរ៉េខាងជើងបានបាញ់សាកល្បងនូវអ្វីដែលខ្លួនបានហៅថា ជាមីស៊ីលឆ្លងទ្វីបដ៏ទំនើបបំផុតមួយដោយជោគជ័យដោយគ្មានឈឺក្បាលជាមួយទណ្ឌកម្ម និងការថ្កោលទោសពីសំណាក់ប្រទេសផ្សេងទៀតនៅក្នុងពិភពលោកបន្តិចសោះឡើយ៕
អូទ្រីស ៖ មន្ត្រីអាជ្ញាធរអូទ្រីសបាននិយាយថា មានករណីមួយបានកើតឡើងនៅរោងចក្រផលិតឧស្ម័នធម្មជាតិដ៏សំខាន់មួយនៅជិតព្រំដែនប្រទេសអូទ្រីសជាប់នឹងប្រទេសស្លូវ៉ាគីបណ្ដាលឲ្យមនុស្សម្នាក់ស្លាប់ និងចំនួន១៨នាក់ទៀតបានរងរបួសកាលពីម្សិលមិញ។
ទីភ្នាក់ងារព័ត៌មានមូលដ្ឋានបានរាយការណ៍ថា មន្ត្រីពាក់ព័ន្ធបានបញ្ជូនឧទ្ធម្ភាគចក្រវេជ្ជសាស្ត្រចំនួន២គ្រឿងទៅកន្លែងកើតហេតុ។ មន្ត្រីអាជ្ញាធរបាននិយាយថា គ្រោះថ្នាក់នេះបានកើតឡើងដោយសារបញ្ហាបច្ចេកទេស ប៉ុន្តែមិនបានបញ្ជាក់ច្បាស់ដោយសារមន្ត្រីអាជ្ញាធរកំពុងធ្វើការស៊ើបអង្កេតនៅឡើយ។
សូមបញ្ជាក់ថា រោងចក្រផលិតឧស្ម័នធម្មជាតិនេះគឺជាកន្លែងបង្ហូរឧស្ម័នពីប្រទេសរុស្ស៊ី ប្រទេសន័រវែស និងប្រទេសមួយចំនួនទៀត ហើយរោងចក្រនេះក៏ជាកន្លែងដ៏សំខាន់បំផុតមួយសម្រាប់ផ្គត់ផ្គង់ឧស្ម័ននៅអឺរ៉ុបផងដែរ៕
ខេត្តរតនគិរី ៖ ក្រុមមន្ត្រីក្រសួងបរិស្ថានបានចុះប្រតិបត្តិការទៅតំបន់កន្ទុយនាគ ឃាត់ខ្លួនជនជាតិវៀតណាម៤នាក់ ខណៈពួកគេចូលមកទឹកដីខ្មែរ ត្រង់តំបន់ក្បែរកន្ទុយនាគចំណុចបង្គោលសីមាលេខ១០ ដើម្បីកាប់ឈើ ។
មន្ត្រីម្នាក់បានឲ្យដឹងនៅព្រឹកថ្ងៃទី១១ ខែធ្នូ ឆ្នាំ២០១៧ថា ជនជាតិវៀតណាមទាំង៤នាក់នោះទី១៖ ឈ្មោះ ដន ង៉ុកតន អាយុ២៤ឆ្នាំ ទី២៖ ឈ្មោះ ង៉ូ វ៉ាន់ង៉ុក អាយុ៥៨ឆ្នាំ ទី៣៖ ឈ្មោះ ដាម ឌឹកជុង អាយុ២៥ឆ្នាំ (អ្នកទាំង៣មានទីលំនៅខេត្តកន្ទូម) និងទី៤៖ ឈ្មោះ ចិន ង៉ុកវឹង អាយុ២២ឆ្នាំ មានទីលំនៅខេត្តយ៉ាឡាយ។
បើតាមមន្ត្រីបរិស្ថាន ពេលនាំខ្លួនជនជាតិវៀតណាម៤នាក់នេះ ដោយភ្ជាប់ជាមួយមធ្យោបាយកាប់ និងដឹកជញ្ជូនឈើ តែដោយសារស្ថានភាពផ្លូវមិនអាចយកមកខេត្តបាន ក៏ត្រូវដុតកម្ទេចចោលនៅកន្លែងនោះតែម្តង ។
មានព័ត៌មានមួយទៀតបានឲ្យដឹងថា មុននិងកម្លាំងក្រសួងបរិស្ថានឃាត់ខ្លួនបានជនជាតិវៀតណាម៤នាក់នោះ គឺខាងមន្ត្រីបរិស្ថានខេត្ត ចុះទៅតំបន់នោះមុនដែរ ប៉ុន្តែមិនមានលទ្ធផល ។
លោកឧត្តមសេនីយ៍ត្រី ជា ប៊ុនធឿន ស្នងការរងទទួលបន្ទុកជនអន្តោប្រវេសន៍ បានឲ្យដឹងថា រហូតមកដល់ព្រឹកនេះ ជនជាតិវៀតណាមទាំង៤នាក់ កំពុងឃាត់ខ្លួនបណ្តោះអាសន្ន នៅមន្ទីរបរិស្ថានខេត្តរតនគិរីនៅឡើយ មិនទាន់បញ្ជូនមកនគរបាលជំនាញ នៃស្នងការដ្ឋាននគរបាលខេត្តរតនគិរីនៅឡើយទេ៕
រាជធានីភ្នំពេញ ៖ លោក សៀង សុខ តំណាងអយ្យការអមសាលាដំបូងរាជធានីភ្នំពេញកាលពីថ្ងៃទី១១ ខែធ្នូ ឆ្នាំ២០១៧ម្សិលមិញនេះបានចេញដីការកោះហៅទណ្ឌិត សម រង្ស៊ី អតីតប្រធានអតីតគណបក្សសង្គ្រោះជាតិ ឲ្យចូលខ្លួនទៅបំភ្លឺនៅសាលាដំបូងនៅថ្ងៃទី១១ ខែមករា ឆ្នាំ២០១៨ ខាងមុខនេះ ដើម្បីបំភ្លឺលើសំណុំរឿងញុះញង់កងទ័ពឲ្យបះបោរប្រឆាំងរាជរដ្ឋាភិបាល។
សូមរម្លឹកថា ទណ្ឌិត សម រង្ស៊ី អតីតប្រធានគណបក្សសង្គ្រោះជាតិបានអំពាវនាវឱ្យកងទ័ពបង្វែរកាណុងមកលើ រាជរដ្ឋាភិបាល ហើយបង្គាប់ឱ្យកងទ័ពឈប់គាំទ្រសម្តេចតេជោ ហ៊ុន សែន នៅលើទំព័រ Facebook របស់លោកកាលពីថ្ងៃទី០៥ ខែធ្នូ ឆ្នាំ២០១៧កន្លងទៅនេះ។
កាលពីព្រឹកថ្ងៃទី០៧ ខែធ្នូ ឆ្នាំ២០១៧ លោក វង្ស ភក្តី មេធាវីរបស់អគ្គមេបញ្ជាការ នៃកងយោធពលខេមរភូមិន្ទ បានដាក់ពាក្យប្តឹងទណ្ឌិត សម រង្ស៊ី ទៅកាន់សាលាដំបូងរាជធានីភ្នំពេញ ពាក់ព័ន្ធនឹងករណីញុះញង់កុំឲ្យយោធិនស្តាប់បង្គាប់ថ្នាក់ដឹកនាំស្របច្បាប់ ធ្វើឲ្យខូចទឹកចិត្តកងទ័ព និងប្រមាថថ្នាក់ដឹកនាំកងយោធពលខេមរភូមិន្ទ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
