អង់ការ៉ា ៖ កាលពីម្សិលមិញប្រធានាធិបតីប្រទេសរុស្ស៊ីលោក វ្ល៉ាឌីមៀ ពូទីន បាននិយាយថា ការទង្វើរបស់សហរដ្ឋអាមេរិកក្នុងការទទួលស្គាល់ទីក្រុងហ្សេរុយសាឡឹមជារដ្ឋធានីរបស់ប្រទេសអ៊ីស្រាអែលនិងការរើស្ថានទូតអាមេរិកទៅទីនោះគឺជាការបង្កឲ្យមានអស្ថិរភាពនៅតំបន់មជ្ឈិមបូព៌ា។
លោក ពូទីន ថ្លែងបែបនេះក្នុងជំនួបជាមួយប្រធានាធិបតីប្រទេសតួកគីគឺលោក រ៉េស៊ីប តាយីបអេដូហ្គាន នៅទីក្រុងអង់ការ៉ាប្រទេសតួកគី។ ទន្ទឹមនោះលោក ពូទីន ក៏បានប្រកាសពីជ័យជម្នះនៅប្រទេសស៊ីរីនៅពេលលោកបានធ្វើដំណើរទៅពិនិត្យមើលមូលដ្ឋានយោធារបស់ប្រទេសរុស្ស៊ីនៅប្រទេសស៊ីរី និងបាននិយាយកោតសរសើរពីតួនាទីរបស់ខ្លួននៅក្នុងជម្លោះនៅប្រទេសស៊ីរីផងដែរ។ ក្រៅពីនេះលោកក៏បានបញ្ជាឲ្យគេដកកងទ័ពរបស់ប្រទេសរុស្ស៊ីមួយផ្នែកចេញពីប្រទេសស៊ីរី។
សូមបញ្ជាក់ថា លោក ពូទីន បានធ្វើដំណើរទៅដល់ទីក្រុងអង់ការ៉ាក្រោយពីបំពេញទស្សនកិច្ចនៅប្រទេសអេហ្ស៊ីប និងប្រទេសស៊ីរីដើម្បីជួបពិភាក្សាជាមួយប្រធានាធិបតីប្រទេសទាំងនេះពាក់ព័ន្ធនឹងកិច្ចការនយោបាយ និងការពង្រឹងទំនាក់ទំនងជាមួយគ្នា៕
រាជធានីភ្នំពេញ ៖ យោងតាមសេចក្តីប្រកាសដែលបានផ្សព្វផ្សាយនៅថ្ងៃនេះ ក្រសួងមហាផ្ទៃ បានធ្វើការព្រមានដល់ជនខិលខូច ដែលបន្លំប្រើឈ្មោះថ្នាក់ដឹកនាំ អគ្គនាយករដ្ឋបាលនៃក្រសួងមហាផ្ទៃ និងលោក រស់ សុផាន់ រដ្ឋលេខាធិការក្រសួងមុខងារសាធារណៈ ដើម្បីរត់ការតែងតាំងមុខតំណែងមន្ត្រី នៅតាមមូលដ្ឋាន ។ ក្រសួងមហាផ្ទៃក៏បានអំពាវនាវផងដែរ កុំឲ្យចាញ់បោកជនខិលខូចទាំងនោះ ។
តាមសេចក្តីប្រកាសរបស់ក្រសួងមហាផ្ទៃបានបញ្ជាក់ថា បច្ចុប្បន្ន អគ្គនាយកដ្ឋានរដ្ឋបាលក្រសួងមហាផ្ទៃ និងក្រសួងមុខងារសាធារណៈ បានដាក់ពាក្យជូនសមត្ថកិច្ចជំនាញ ដើម្បីធ្វើការស្រាវជ្រាវ និងចាប់ជនល្មើសមកផ្តន្ទាទោសតាមច្បាប់។ ទន្ទឹមនោះក្រសួងក៏បានជំរុញឱ្យមន្ត្រីនៅមូលដ្ឋានរាយការណ៍ជាបន្ទាន់ ក្នុងករណីដែលមានការឆរបោកបែបនេះ៕
រាជធានីភ្នំពេញ ៖ ក្រសួងវប្បធម៌ និងវិចិត្រសិល្បៈ នឹងរៀបចំពិធីអបអរសាទរខួបលើកទី២៥ នៃការដាក់បញ្ចូលប្រាសាទអង្គរ ក្នុងបញ្ជីបេតិកភណ្ឌពិភពលោក នៅមុខប្រាសាទអង្គរ ខេត្តសៀមរាប នាថ្ងៃទី១៤ ខែធ្នូ ឆ្នាំ២០១៧ខាងមុខ។ នេះបើយោងតាមសេចក្ដីជូនដំណឹងរបស់អាជ្ញាធរជាតិអប្សរា។
សូមបញ្ជាក់ថា តំបន់អង្គរវត្ត (សម្បត្តិវប្បធម៌រូបី) ត្រូវបានដាក់បញ្ចូលក្នុងបញ្ជីបេតិកភណ្ឌពិភពលោក នៅថ្ងៃទី១៤ ខែធ្នូ ឆ្នាំ១៩៩២ ក្នុងកិច្ចលើកទី១៦ គណៈកម្មការបេតិកភណ្ឌពិភពលោកនៃអង្គការយូណេស្កូ នាទីក្រុងសាន់តាហ្វេ សហរដ្ឋអាមរិក៕
ខេត្តរតនគិរី ៖ នារីវ័យក្មេងម្នាក់បានបាត់បង់ជីវិតភ្លាមៗនៅហ្នឹងកន្លែង បន្ទាប់ពីជិះម៉ូតូលឿនរេចង្កូតធ្លាក់ប្រឡាយ ដែលហេតុការណ៍កើតឡើងកាលពីរសៀលម្សិលមិញតាមផ្លូវលំក្រាលក្រួសក្រហម១ខ្សែ ស្ថិតនៅភូមិកាណាតធំ ឃុំតាឡាវ ស្រុកអណ្តូងមាស។
មន្ត្រីនគរបាលស្រុកអណ្តូងមាសបានឲ្យដឹងថា នារីរងគ្រោះឈ្មោះ ផាន់ ស្រីកា អាយុ២៣ឆ្នាំ ជិះម៉ូតូកែច្នៃម្នាក់ឯង អត់ស្លាកលេខ។ មន្ត្រីនគរបាលបានបញ្ជាក់ថា មូលហេតុនារីរងគ្រោះស្លាប់ គឺជិះម៉ូតូលឿនជ្រុលចង្កូតធ្លាក់ប្រឡាយ បណ្តាលឲ្យម៉ូតូសង្កត់ពីលើស្លាប់ភ្លាមៗតែម្តង។ ក្រោយកើតហេតុត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
ខេត្តប៉ៃលិន ៖ យុវជនម្នាក់បានប្រើប្រាស់គ្រឿងញៀនហួសកម្រិត ក៏បែកគំនិតចងកសម្លាប់ខ្លួនឯង នៅខាងក្រោយផ្ទះ ស្ថិតក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន។
សមត្ថកិច្ចមូលដ្ឋានបានឲ្យដឹងថា ជនរងគ្រោះឈ្មោះ សេត ដួង អាយុ៣៣ឆ្នាំ មូលហេតុដែលបណ្តាលឲ្យជនរងគ្រោះធ្វើអត្តឃាតនេះ មកពីបានប្រើប្រាស់ថ្នាំញៀនហួសកម្រិត និងបែកថ្នាំ។ ក្រោយពីសមត្ថកិច្ចជំនាញធ្វើកោសល្យវិច័យរួច សមត្ថកិច្ចជំនាញបានប្រគល់សាកសពទៅកាន់លោកអាចារ្យ និងស្រាវជ្រាវរកក្រុមគ្រួសារសព ដើម្បីយកទៅធ្វើបុណ្យតាមប្រពៃណីខ្មែរ៕
មូស្គូ ៖ កាលពីម្សិលមិញប្រធានាធិបតីរុស្ស៊ី លោក វ្ល៉ាឌីមៀ ពូទីន បានបង្គាប់ឱ្យដកកងទ័ពរុស្ស៊ីមួយភាគធំចេញពីប្រទេសស៊ីរី នៅអំឡុងពេលបំពេញដំណើរទស្សនកិច្ចដ៏ ភ្ញាក់ផ្អើលមួយទៅកាន់មូលដ្ឋានទ័ព Hmeimim ក្នុងប្រទេសស៊ីរី។ នេះបើតាមសារព័ត៌មាន BBC។
លោក ពូទីន បានលើកឡើងថា «ជិតពីរឆ្នាំមកនេះ កងទ័ពរុស្ស៊ីតាមរយៈកិច្ចសហប្រតិបត្តិការជាមួយកងទ័ពស៊ីរី បានវាយកម្ទេចពួកភេរវករ អន្តរជាតិមួយផ្នែកធំ…ដូច្នេះហើយខ្ញុំសម្រេចចិត្តដកកងទ័ពរុស្ស៊ីមួយភាគធំចេញពីប្រទេសស៊ីរី»។ លោកប្រធានាធិបតីពូទីន បានធ្វើដំណើរទៅដល់មូលដ្ឋានទ័ព Hmeimim កាលពីម្សិលមិញក្រោមការទទួលស្វាគមន៍យ៉ាងកក់ក្ដៅពីប្រធានាធិបតីស៊ីរី លោក បាស្សា អាល់សាដ។
សូមជម្រាប់ថា ដោយមានការជួយជ្រោមជ្រែងពីរុស្ស៊ី កងទ័ពរដ្ឋាភិបាលស៊ីរីបានវាយដណ្ដើមយកទឹកដីពីក្រុម ISIS និងក្រុមប្រឆាំងស៊ីរី មកគ្រប់គ្រងវិញស្ទើតែស្រុង៕
ញូយ៉ក ៖ អភិបាលក្រុងញូយ៉កនិយាយថា មនុស្ស០៤នាក់រងរបួសហេតុការណ៍ផ្ទុះគ្រាប់បែកកែច្នៃនៅក្នុងសង្កាត់ Manhattan ទីក្រុងញូយ៉កកាលពីម្សិលមិញ ខណៈដែលគេអះអាងថា គឺជាការប៉ុនប៉ងវាយប្រហារភេរវកម្ម ។ នេះបើយោងទីភ្នាក់ងារសារព័ត៌មាន Reuters ។
បើតាមអភិបាលក្រុងញូយ៉ក លោក Bill de Blasio ហេតុការណ៍ផ្ទុះមួយបានកើតឡើងនៅម៉ោងប្រមាណជា ៧ និង៣០នាទីព្រឹក ថ្ងៃចន្ទនេះ (ម៉ោងនៅសហរដ្ឋអាមេរិក) នៅឯផ្លូវក្រោមដីមួយកន្លែងភ្ជាប់ពីទីលាន Times Square ទៅកាន់ចំណតរថយន្ដក្រុង Port Authority។ ចំណែកប៉ូលិសនៅក្នុងតំបន់ ក៏បានឱ្យដឹងដែរថា ជនសង្ស័យម្នាក់ឈ្មោះ Akayed Ullah ត្រូវបានចាប់ខ្លួនខណៈមនុស្សបួននាក់ផ្សេងទៀតរួមទាំងជនសង្ស័យបានរងរបួស។
ការវាយប្រហារបំផ្ទុះគ្រាប់បែកនេះ បានកើតឡើងពីរខែប៉ុណ្ណោះ បន្ទាប់ពីបុរសជនជាអ៊ូបេគីស្ថានម្នាក់ បានសម្លាប់មនុស្ស០៨នាក់ ដោយការបើករថយន្ដបំបុក មនុស្សនៅក្នុងទីក្រុងញូយ៉ក ហើយក្រុម ISIS បានចេញមុខទទួលខុសត្រូវ៕
ខេត្តព្រះសីហនុ ៖ តាមព័ត៌មានទទួលបាននៅព្រឹកថ្ងៃទី១១ ខែធ្នូនេះ នគរបាលខេត្តព្រះសីហនុ នឹងបញ្ជូនជនជាតិចិនចំនួន ៣នាក់ ដែលពាក់ព័ន្ធបទឧក្រិដ្ឋជំរិតទារប្រាក់ចំនួន៨០ម៉ឺនដុល្លារ ពីជនជាតិចិនដូចគ្នាទៅតុលាការ ។
គួរម្លឹកថា ការឃាត់ខ្លួនជនជាតិចិនទាំង៣នាក់នោះធ្វើឡើងកាលពីវេលាម៉ោង៦ និង៣០នាទីយប់ ថ្ងៃទី៩ ខែធ្នូ ឆ្នាំ២០១៧ នៅចំណុចផ្ទះជួលមួយកន្លែង ក្នុងបុរីប៊ីអេសអូមួយ ក្នុងក្រុមទី១ ភូមិ៥ សង្កាត់លេខ៤ ក្រុងព្រះសីហនុ ខណដែលករណីនេះ សមត្ថកិច្ចក៏បានរំដោះជនរងគ្រោះដោយសុវត្ថិភាពផងដែរ ។
សមត្ថកិច្ចជំនាញ បានឲ្យដឹងថា ជនសង្ស័យទាំង៣នាក់នោះ ១.ឈ្មោះ ZHENG RONGMAO ភេទប្រុស អាយុ២៦ឆ្នាំ, ២.ឈ្មោះ DAI HONGDA ភេទប្រុស អាយុ២៣ឆ្នាំ និង៣.ឈ្មោះ LIN JINPEI ភេទប្រុស អាយុ២៤ឆ្នាំ។ ចំណែកជនរងគ្រោះឈ្មោះ LI FUJIE ភេទប្រុស អាយុ៤៧ឆ្នាំ ជាពាណិជ្ជករ និងជាជនជាតិចិនដូចគ្នា។ ចំណែកវត្ថុតាងរឹបអូសបាន កាំភ្លើងខ្លី១ដើម ម៉ាកBERITA STOM បង់ចំនួន២ គ្រាប់ចំនួន១០គ្រាប់, កូនកាំប៊ិត១, ខ្សែចងរឹត(ស៊ីល)២ដុំ ទូរស័ព្ទដៃ៦គ្រឿង និងរថយន្តម៉ាកលុច្សស៊ីស១គ្រឿង ៕
ចិន ៖ មន្ត្រីមូលដ្ឋានបាននិយាយថា មនុស្សចំនួន៤នាក់បានស្លាប់ ហើយចំនួន៦នាក់ទៀតបានកប់នៅក្រោមគំនរបែកបាក់ ខណៈមនុស្សម្នាក់ទៀតត្រូវបានជួយសង្គ្រោះក្រោយពីមានការផ្ទុះរោងចក្រគីមីមួយនៅទីក្រុងលៀនយុងហ្គាងនៅខេត្តជាំងស៊ូនៅភាគខាងកើតប្រទេសចិនកាលពីចុងសប្តាហ៍កន្លងទៅនេះ។
មន្ត្រីមូលដ្ឋានភ្លាមៗនោះបានបញ្ជូនក្រុមអ្នកជួយសង្គ្រោះ និងគ្រឿងម៉ាស៊ីនដើម្បីធ្វើការជួយសង្គ្រោះរួមទាំងរថយន្តពន្លត់អគ្គិភ័យចំនួន២០គ្រឿង អ្នកពន្លត់ភ្លើង១៣៥នាក់ រថយន្តសាមុយ១២គ្រឿង បុគ្គលិកពេទ្យចំនួន៥០នាក់ និងគ្រឿងចក្រមួយចំនួនទៀត។
កម្មករម្នាក់ត្រូវបានជួយសង្គ្រោះក្នុងគ្រោះថ្នាក់ដែលបានកើតឡើងកាលពីចុងសប្ដាហ៍មកនេះ ហើយកំពុងទទួលការព្យាបាលនៅមន្ទីរពេទ្យក្បែរកន្លែងកើតហេតុ ហើយប្រតិបត្តិការជួយសង្គ្រោះនេះនឹងបន្តរហូតដល់កម្មករដែលកប់ក្រោមគំនរទាំង៦នាក់នេះត្រូវបានជួយសង្គ្រោះអស់។
មន្ត្រីមូលដ្ឋានបានបញ្ជាក់ថា រោងចក្រនេះបានបញ្ឈប់ការផលិត និងដកគ្រឿងគីមីដែលនៅសល់ប៉ុន្មានទៀតចេញពីរោងចក្រនេះ ហើយគេមិនទាន់ឃើញមានការលេចធ្លាយសារធាតុគីមីនៅឡើយទេ ប៉ុន្តែមូលហេតុនៃគ្រោះថ្នាក់នេះគេមិនទាន់ដឹងច្បាស់នៅឡើយទេ៕
លីបង់ ៖ កាលពីថ្ងៃអាទិត្យក្រុមបាតុករបានធ្វើការតវ៉ានៅជិតស្ថានទូតសហរដ្ឋអាមេរិកនៅប្រទេសលីបង់ប្រឆាំងនឹងការសម្រេចចិត្តរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ ដែលបានទទួលស្គាល់ទីក្រុងហ្សេរុយសាឡឹមថា ជារដ្ឋធានីប្រទេសអ៊ីស្រាអែល។
ក្រុមអ្នកតវ៉ាមួយចំនួនបានគ្រវីទង់ជាតិ ហើយខ្លះទៀតបាននាំគ្នាដុតភ្លើង និងដុតទង់ជាតិសហរដ្ឋអាមេ រិក និងប្រទេសអ៊ីស្រាអែលនៅតាមផ្លូវ និងចោលវត្ថុរឹងទៅលើកងកម្លាំងសន្តិសុខដែលបានបិទផ្លូវសំខាន់ធ្វើដំណើរទៅស្ថានទូតសហរដ្ឋអាមេរិកនៅតំបន់អាវកានៅខាងជើងទីក្រុងបេរូតនៅប្រទេសលីបង់។ ប្រទេសលីបង់ដែលមានជនភៀសខ្លួនប៉ាឡេស្ទីនប្រហែល៤៥ម៉ឺននាក់បានថ្កោលទោសចំពោះការសម្រេចចិត្តរបស់លោក ត្រាំ ហើយកាលពីសប្ដាហ៍មុនប្រធានាធិបតីប្រទេសលីបង់គឺលោក ម៉ៃឃែល អូន បានហៅទង្វើនេះថា ជាការគំរាមកំហែងចំពោះស្ថិរភាពតំបន់។
សូមបញ្ជាក់ថា ការដែលលោក ត្រាំ ទទួលស្គាល់ទីក្រុងហ្សេរុយសាឡឹមជារដ្ឋធានីប្រទេសអ៊ីស្រាអែលបានធ្វើឲ្យពិភពអារ៉ាប់ខឹងសម្បារយ៉ាងខ្លាំងព្រមទាំងធ្វើឲ្យសម្ពន្ធមិត្តបស្ចិមលោកអាក់អន់ចិត្តដោយនិយាយថា វាជាឧបស័គ្គមួយចំពោះកិច្ចប្រឹងប្រែងសន្តិភាព និងអាចបង្កចលាចលបន្ថែមទៀតនៅមជ្ឈិមបូព៌ា៕
អេហ្ស៊ីប ៖ រដ្ឋមន្ត្រីការបរទេសលីបង់ លោក Gebran Bassil បាននិយាយថា សម្ព័ន្ធអារ៉ាប់គួរតែដាក់ទណ្ឌកម្ម ឬសម្ពាធលើសហរដ្ឋអាមេរិកឱ្យលុបចោលការសម្រេចចិត្តចំពោះការទទួលស្គាល់ទីក្រុងហ្សេរុយសាឡឹមជារដ្ឋធានីរបស់អ៊ីស្រាអែល។
លោក Bassil ថ្លែងបែបនេះនៅក្នុងពិធីកិច្ចប្រជុំមួយក្នុងទីក្រុងគែរ ប្រទេសអេហ្ស៊ីប កាលពីថ្ងៃសៅរ៍ ធ្វើឡើងដោយមានសំណើពីប៉ាឡេស្ទីន និងហ្ស៊កដានី បន្ទាប់ពីលោកដូណាល់ ត្រាំ បាន ប្រកាសកាលពីថ្ងៃពុធទទួលស្គាល់ទីក្រុងហ្សេរុយសាឡឹមជារដ្ឋធានីរបស់អ៊ីស្រាអែល ក៏ដូចជាបញ្ជាឱ្យក្រសួងការបរទេសរបស់ខ្លួន ត្រៀមរៀបចំផ្លាស់ប្ដូរស្ថានទូតអាមេរិក ប្រចាំទីក្រុងតែអាវីវ ទៅទីក្រុងហ្សេរុយសាឡឹម បើទោះជាមានការរិះគន់ និងថ្កោលទោសពីអន្តរជាតិក៏ដោយ។ នេះបើតាមសរព័ត៌មាន Russian Today ។
ថ្លែងនៅក្នុងកិច្ចប្រជុំនៃក្រុមរដ្ឋមន្ត្រីការបរទេសសម្ព័ន្ធអារ៉ាប់ កាលពីថ្ងៃសៅរ៍ លោក Gebran Bassil ក៏បានថ្កោលទោសយ៉ាងខ្លាំងផងដែរចំពោះការសម្រេចចិត្តរបស់ ប្រធានាធិបតីអាមេរិក លោក ដូណាល់ ត្រាំ ដោយលោកចាត់ទុកថា វាគឺជាការសម្រេចចិត្តដ៏គ្រោះថ្នាក់ និងមិនអាចទទួលយកបាន។ លោក Bassil បានបញ្ជាក់ថា «វិធានការបឋមគួរតែត្រូវធ្វើឡើងប្រឆាំងនឹងការសម្រេចចិត្តនេះដោយផ្ដើមដំបូងពីការដាក់សម្ពាធការទូត ហើយបន្ទាប់មកគឺសម្ពាធនយោបាយ មុននឹងយើងត្រូវ ចាត់វិធានការដាក់ទណ្ឌកម្មសេដ្ឋកិច្ច និងហិរញ្ញវត្ថុ»៕
រាជធានីភ្នំពេញ ៖ ជាថ្មីម្តងទៀតកម្ពុជាបាសិទ្ធិធ្វើជាម្ចាស់ផ្ទះក្នុងការប្រកួតផ្ដាច់ព្រ័ត្របវរកញ្ញាសកលវិទ្យាល័យពិភពលោកលើកទី២៨ ដែលមកពី៨២ប្រទេសខុសៗគ្នានេះ ក្នុងនោះមាន៨៤រូប ដែលបរវកញ្ញាកម្ពុជា ៣រូប ហើយការប្រលងផ្ដាច់ព្រ័ត្រនឹងប្រព្រឹត្ដទៅ នៅមជ្ឈមណ្ឌលសន្និបាតកោះពេជ្រ នៅថ្ងៃទី២០ធ្នូខាងមុខនេះ។
សូមជម្រាប់ថា វត្ដមានបវរកញ្ញាសាកលវិទ្យាល័យពិភពលោកនេះ បានធ្វើមកដំណើរមកកម្ពុជា រួចជាស្រេចហើយ ចាប់ពីថ្ងៃទី៦ រហូតមកដល់ថ្ងៃទី១០ ខែធ្នូនេះ ដើម្បីត្រៀមខ្លួនការប្រលងផ្ដាច់ព្រ័ត្រ ក្នុងពេលខាងមុខនេះ។
សូមបញ្ជាក់ថា កាលពីខែវិច្ឆិកាកន្លងទៅនេះកម្ពុជាក៏បានទទួលធ្វើជាម្ចាស់ផ្ទះរៀបចំការប្រកួតវគ្គផ្តាច់ព្រ័ត្របវរកញ្ញាពិភពលោក (Miss Global 2017) ដែលមានបវរកញ្ញាមកពីជាង៦០ប្រទេសផងដែរ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
