សាណាអា ៖ មនុស្សយ៉ាងហោចណាស់០៦នាក់បានស្លាប់បាត់ជីវិត និងជាច្រើននាក់ទៀតរងរបួស នៅក្នុងការវាយប្រហារតាមផ្លូវអាកាសរបស់ក្រុមចម្រុះអារ៉ាប់ដឹកនាំដោយ អារ៉ាប៊ីសាឌីត លើផ្សារពីរកន្លែងក្នុងប្រទេសយ៉េមែន។ នេះបើយោងតាមសារព័ត៌មានចិន CGTN ។
បើតាមប្រភពពីមន្ទីពេទ្យនៅក្នុងតំបន់និយាយថា ការវាយប្រហារលើកទីមួយគឺមានគោលដៅលើផ្សារ Khalakah ក្នុងស្រុក Nehm ស្ថិតនៅចំងាយ៣០គីឡូម៉ែត្រ ភាគឦសាន នៃរដ្ឋធានីសាណាអា ស្ថិតនៅក្រោមការគ្រប់គ្រប់របស់ក្រុមឧទ្ទាមហ៊ូទី។ ការវាយប្រហារនេះបានផ្ដាច់យកអាយុជីវិតមនុស្ស០៥នាក់ និង២០នាក់ទៀត រងរបួស។ ចំណែកឯការវាយប្រហារតាមផ្លូវអាកាសលើកទី២ គឺបានកើតឡើងនៅឯផ្សារមួយផ្សេងទៀត ស្ថិតនៅក្នុងស្រុក Zabid នៃភាគខាងត្បូងទីក្រុង Hodeidah ដោយបណ្ដាលឱ្យមនុស្សម្នាក់ស្លាប់ និង១៥នាក់រងរបួស។
សូមជម្រាបថា ការវាយប្រហារតាមផ្លូវអាកាសទាំងនេះ កើតឡើងតែ០៦ថ្ងៃប៉ុណ្ណោះ បន្ទាប់ក្រុមឧទ្ទាមហ៊ូទី បានសម្លាប់អតីតប្រធានាធិបតីយ៉េមែន លោក Ali Abdullah Saleh ដែលបានបង្ហាញពីទំនោរចង់ផ្សះផ្សាជាមួយទីក្រុងរីយ៉ាដ៕
រាជធានីភ្នំពេញ ៖ កាលពីវេលាម៉ោង៤ និង៣០នាទីទៀបភ្លឺថ្ងៃទី៩ ខែធ្នូ ឆ្នាំ២០១៧ មានការភ្ញាក់ផ្អើលមនុស្សម្នាមកចោមរោមមើល បន្ទាប់ពីគេប្រទះឃើញមានមនុស្សដេកស្លាប់ ក្នុងរថយន្តព្រូសមួយគ្រឿង នៅមុខក្លឹបកម្សាន្តរ៉ុក ស្ថិតភូមិ១៣ សង្កាត់ទន្លេបាសាក់ ខណ្ឌចំការ រាជធានីភ្នំពេញ។
សមត្ថកិច្ចបានឲ្យដឹងថា ករណីមនុស្សដេកស្លាប់ក្នុងរថយន្តម៉ាកព្រូស ពណ៌ស ពាក់ស្លាកលេខភ្នំពេញ 2AM-2186 ជនរងគ្រោះឈ្មោះ ហេង សីហា ភេទប្រុស អាយុ៣៣ឆ្នាំ ស្នាក់នៅផ្ទះលេខ៤ ផ្លូវជាតិលេខ១ ភូមិព្រែក សង្កាត់ច្បារអំពៅ១ខណ្ឌច្បារអំពៅមុខរបរលក់ដូរ។
បច្ចុប្បន្នសមត្ថកិច្ចកំពុងធ្វើការត្រួតពិនិត្យនៅកន្លែងកើតហេតុ។ ចំណែកសព ត្រូវបានបញ្ជូនទៅវត្តច្បារអំពៅ ដើម្បីគ្រួសារចាត់ចែងធ្វើបុណ្យ៕
ប៉ារីស ៖ រដ្ឋមន្ត្រីការទេសបារាំង លោក Jean-Yves le Drian បាននិយាយថា ការសម្រេចចិត្តរបស់ប្រធានាធិបតីអាមេរិក លោក ដូណាល់ ត្រាំ ទទួលស្គាល់ទីក្រុងហ្សេរុយសាឡឹម ជារដ្ឋធានីរបស់អ៊ីស្រាអែល គឺជាទង្វើផ្ទុយទៅនឹងច្បាប់អន្តរជាតិ ប៉ុន្តែលោកសូមឲ្យគ្រប់គ្នាមានការស្ងប់ស្ងាត់ កុំឲ្យស្ថានការណ៍កាន់តែរីកធំ។ លោកបញ្ជាក់ថា សកម្មភាពប្រឆាំងអ៊ីស្រាអែល ឬគេស្គាល់ថា intifada អាចនឹងបង្កជា ហានិភ័យនៅលើទឹកដីប៉ាឡេស្ទីន។ នេះបើយោងតាមសារព័ត៌មានបារាំង Le Figaro។
លោក Jean-Yves le Drian ថ្លែងបែបនេះនៅក្នុងកិច្ចសម្ភាសន៍ជាមួយវិទ្យុបារាំង France inter តែប៉ុន្មានថ្ងៃប៉ុណ្ណោះមុនទីក្រុងប៉ារីស ត្រូវទទួលស្វាគមន៍ដំណើរទស្សន កិច្ចរបស់នាយករដ្ឋមន្ត្រីអ៊ីស្រាអែល លោក Benyamin Netanyahou នៅថ្ងៃអាទិត្យនេះ។
រដ្ឋមន្ត្រីការបទេសបារាំងរូបនេះបានបញ្ជាក់ថា «ការសម្រេចចិត្ត របស់លោក ដូណាល់ ត្រាំ គឺជាទង្វើផ្ទុយទៅនឹងច្បាប់អន្តរជាតិ ហើយយើងជំទាស់នឹងការសម្រេចិត្តបែបនេះ… ប៉ុន្តែយើងនៅតែអំពាវនាវឱ្យមានការរក្សាភាពស្ងៀមស្ងាត់»។
សូមបញ្ជាក់ថា ប្រធានាធិបតីអាមេរិក លោក ដូណាល់ ត្រាំ កាលពីថ្ងៃពុធកន្លងទៅបានប្រកាសទទួលស្គាល់ទីក្រុងហ្សេរុយសាឡឹម ជារដ្ឋធានីរបស់អ៊ីស្រាអែល ហើយក៏បាន បញ្ជាឱ្យក្រសួងការបរទេសអាមេរិក ត្រៀមរៀបចំផ្លាស់ប្ដូរស្ថានទូតអាមេរិកពីទីក្រុងតែលអាវីវ ទៅកាន់ទីក្រុងហ្សេរុយសាឡឹមផងដែរ៕
ប៉ាគីស្ថាន ៖ មន្ត្រីប៉ូលិសប៉ាគីស្ថានម្នាក់បាននិយាយថា មនុស្សយ៉ាងតិច១៤នាក់បានបាត់បង់ជីវិត និង៣០នាក់ផ្សេងទៀតកំពុងបាត់ខ្លួន នៅពេលដែលទូកមួយគ្រឿងដឹកអ្នកធម្មយាត្រាសាសនាជាច្រើននាក់បានលិចនៅក្បែរកោះមួយស្ថិតក្នុងសមុទ្រអារ៉ាប់។
មន្ត្រីរូបនោះបន្តថា ទូកមួយគ្រឿងនោះបានលិចកាលពីថ្ងៃព្រហស្បតិ៍នៅក្បែរទីក្រុងថាតតា (Thatta) ដែលមានចម្ងាយប្រហែល១រយគីឡូម៉ែត្រពីភាគខាងកើតទីក្រុងការ៉ាជី (Karachi) ប្រទេសប៉ាគីស្ថាន។មន្ត្រីដដែលបញ្ជាក់ថា អ្នកធម្មយាត្រាសាសនាទាំងនោះកំពុងធ្វើដំណើរតាមទូកមួយគ្រឿងដែលដឹកមនុស្សលើសចំណុះឆ្ពោះទៅកាន់កន្លែងគោរពបូជាមួយដែលស្ថិតនៅលើកោះមួយកន្លែង ហើយភ្លាមៗនោះស្រាប់តែទូកនោះបានលិចតែម្តង៕
ខេត្តក្រចេះ ៖ កងកម្លាំងអាវុធហត្ថខេត្តក្រចេះនិងបញ្ជូនជនសង្ស័យ04នាក់ពាក់ព័ន្ធករណីជួញដូរនិងរក្សាទុកនៅសារសារធាតុញៀនហើយវត្ថុតាងមួយចំនួនធំទៅកាន់តុលាការនៅព្រឹកស្អែក ថ្ងៃទី០៩ខែធ្នូ ឆ្នាំ២០១៧នេះ។
លោកឡុង យឹង ប្រធានមន្ទីរយុត្តិធម៌កងរាជអាវុធហត្ថខេត្តក្រចេះបានបញ្ជាក់តាមទូរស័ព្ទកាលពីព្រឹក ថ្ងៃទី០០៨ខែធ្នូឆ្នាំ២០១៧ឱ្យដឹងថាកងរាជអាវុធហត្ថក្រុងក្រចេះបានចុះប្រតិបត្តិការបង្ក្រាបនិងឃាត់ខ្លួនបានជនសង្ស័យចំនួន០៤នាក់ដែលមាន០២ទីតាំងបង្ក្រាបក្នុងថ្ងៃតែមួយកាលពីថ្ងៃទី០៧ខែធ្នូ ឆ្នាំ២០១៧។ ទីតាំង១ នៅចំណុចសណ្ឋាគាររីវឺដូហ្វីនស្ថិតក្នុងភូមិអូរឬស្សី១ សង្កាត់អូរឬស្សីក្រុងក្រចេះខេត្តក្រចេះកាលពីល្ងាចវេលាម៉ោងជាង០៥ថ្ងៃទី០៧ខែធ្នូឆ្នាំ២០១៧។ គឺឃាត់ខ្លួនជនសង្ស័យបានចំនួន០៣នាក់ស្រីចំនួន០២នាក់មានឈ្មោះ១\ គង់ ម៉ានិតភេទ ស្រីអាយុ២៣ឆ្នាំរស់នៅក្នុងភូមិស្រែស្តៅសង្កាត់អូរឬស្សីក្រុងក្រចេះខេត្តក្រចេះ២\ឈ្មោះរស់ ចាន់ធី អាយុ២៧ឆ្នាំរស់នៅក្នុងភូមិបារាយណ៍ ឃុំតាឡោតស្រុកបារាយណ៏ ខេត្តកំពង់ធំ៣\ឈ្មោះ ម៉ុល ពុទ្ធារះអាយុ២០ឆ្នាំរស់នៅក្នុងភូមិអូរឬស្សី១សង្កាត់អូរឬស្សីក្រុងក្រចេះ ។ ក្នុងនោះរឹបអូសបានវត្ថុតាងមានម្សៅក្រាមពណ៌ចំនួន០២កញ្ចប់តូច ធំនិងសម្ភារប្រើប្រាស់គ្រឿងញៀនមួយចំនួនធំ ។ ទីតាំងទី២ស្ថិតនៅចំណុចភូមិកន្ទ្រីង សង្កាត់អូរឬស្សីក្រុងក្រចេះខេត្តក្រចេះកាលពីយប់វេលាម៉ោងជាង០៧ថ្ងៃទី០៧ខែធ្នូឆ្នាំ២០១៧នេះធ្វើការឃាត់ខ្លួនជនសង្ស័យ១ម្នាក់ ។មាន ឈ្មោះ តេង រេង ភេទប្រុសរស់នៅក្នុងភូមិស្រែស្តៅ សង្កាត់អូរឬស្សីក្រុងក្រចេះខេត្តក្រចេះ។ចាប់បានវត្ថុតារួមមានម្សៅក្រាមពណ៍(ម៉ាទឹកកក)ចំនួន១កញ្ចប់តូចសារធាតុញៀន ទូរស័ព្ទ១គ្រឿងនឹងប្រាក់រៀលចំនួន៣៥០០៛ ។
លោក ផាត សុភ័ក្រវាសនា មេបញ្ជាការកងរាជអាវុធហត្ថក្រុងក្រចេះ បានឲ្យដឹងថាប្រតិបត្តិការបង្ក្រាបនេះដោយមានការសម្របសម្រួលពីលោក ជា សុភ័ក្រព្រះរាជអាជ្ញារងអមសាលាដំបូងខេត្តក្រចេះទើបឈានដល់ការឃាត់ខ្លួនជនសង្ស័យចំនួន០៤នាក់នៅចំណុចកើតហេតុខាងលើ។
លោកឡុង យឹង ប្រធានមន្ទីរយុត្តិធម៌កងរាជអាវុធហត្ថខេត្តបានបន្តទៀតថា បច្ចុប្បន្នជនសង្ស័យចំនួន០៤នាក់និងវត្ថុតាងខាងលើត្រូវបានឃាត់ខ្លួនបណ្ដោះអាសន្ននៅបញ្ជាការកងរាជអាវុធហត្ថខេត្តក្រចេះនឹងកំពុងកសាងសំណុំរឿងបញ្ជូនជនសង្ស័យទៅកាន់សាលាដំបូងខេត្តនៅព្រឹកស្អែកថ្ងៃទី០៩ខែធ្នូឆ្នាំ២០១៧ដើម្បីចាត់វិធានការតាមនីតិវិធីច្បាប់បន្ត៕
អាមេរិក ៖ ទីភ្នាក់ងារសារព័ត៌មានចិន ស៊ីនហួរ បានរាយការណ៍ថា មនុស្ស០៣នាក់បានស្លាប់បាត់ជីវិត ក្នុងនោះមានសិស្សសាលាពីរនាក់ និងខ្មាន់កាំភ្លើងម្នាក់ នៅក្នុងហេតុការណ៍បាញ់ប្រហារក្នុងសាលារៀនមួយកន្លែងស្ថិតនៅ ភាគពាយ័ព្យនៃរដ្ឋញូមិចស៊ីកូ (New Mexico) សហរដ្ឋអាមេរិក។
ប៉ូលិសបាននិយាយថា ហេតុការណ៍បាញ់ប្រហារខាងលើបានកើតឡើងកាលពីម៉ោង៨ និង០០នាទីព្រឹកថ្ងៃព្រហស្បតិ៍ (ម៉ោងនៅវ៉ាស៊ីនតោន) នៅឯសាលាឈ្មោះ Aztec High School ក្នុងតំបន់ អាសតិច (Aztec) ដែលស្ថិតនៅចំងាយ២៩០គីឡូម៉ែត្រ ពីភាគពាយ័ព្យរដ្ឋ New Mexico។ ទោះបីយ៉ាងណាប៉ូលិសមិនបានបញ្ជាក់ពីអត្តសញ្ញាណជនសង្ស័យឡើយ ដោយគ្រាន់តែថា ខ្មាន់កាំភ្លើងគឺជាបុរសម្នាក់។
ជុំវិញខាងលើនេះប៉ូលិសនៅកំពុងតែបន្តការស៊ើបអង្កេត និងជំរុញឱ្យអ្នកបានឃើញហេតុការណ៍ផ្ទាល់ភ្នែក រាយការណ៍ដល់ប៉ូលិសបន្ថែមទៀត៕
ខេត្តតាកែវ ៖ កម្លាំងនគរបាលស្រុកគិរីវង់ដឹកនាំដោយលោកវរសេនីយ៍ឯក យុគ សារ៉ាត់ អធិការស្រុកបន្ទាប់ពីមានការបញ្ជាពីសំណាក់ឧត្តមសេនីយ៍ទោ សុខ សំណាង ស្នងការនគរបាលខេត្ត បានដឹកនាំកម្លាំងចុះបង្ក្រាបកញ្ឆាក្រៀមជាង២០គីឡូបម្រុងដឹកឆ្លងដែនទៅវៀតណាម និងឃាត់ខ្លួនជនសង្ស័យម្នាក់។ ប្រតិបត្តិការនេះធ្វើឡើងកាលពីវេលាម៉ោង៧ និង៣០នាទីយប់ថ្ងៃទី០៧ ខែធ្នូ ឆ្នាំ២០១៧ នៅចំណុចភូមិចំបកទឹម ឃុំគិរីចុងកោះ ស្រុកគិរីវង់ ខេត្តតាកែវ។
បើតាមលោកអធិការស្រុកគិរីវង់បានឲ្យដឹងថា ជនសង្ស័យឈ្មោះ អោក ធិនដាវីន ភេទប្រុស អាយុ១៧ឆ្នាំ ទីលំនៅភូមិជ្រោយ ឃុំព្រះបាទជាន់ជុំ ស្រុកគិរីវង់។ ចំណែកបក្សពួកម្នាក់ទៀងបានរត់គេចខ្លួន។ លោកបន្តថា មុននឹងឈានដល់ឃាត់ខ្លួនជនសង្ស័យម្នាក់ ដំបូងឡើយជនសង្ស័យមានគ្នា២នាក់ ជិះម៉ូតូ១គ្រឿងម៉ាក YAMAHA TAURUS ពណ៌ខ្មៅ គ្មានស្លាកលេខ ដោយដឹកកញ្ឆាក្រៀមចំនួន២៤គីឡូក្រាម បម្រុងនាំចេញទៅប្រទេសវៀតណាម។
ទោះបីយ៉ាងណាលោកអធិការបញ្ជាក់ថា បច្ចុប្បន្នកម្លាំងជំនាញកំពុងស្រាវជ្រាវស្វែងរកមេខ្លោងធំ ដើម្បីយកមកផ្តន្ទាទោសតាមច្បាប់៕
ខេត្តព្រះវិហារ ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងបណ្តាលឲ្យប្តីប្រពន្ធ និងកូន ស្លាប់ និងរបួសធ្ងន់ ខណៈកំពុងជិះម៉ូតូដឹកគ្នាត្រឡប់មកទិញម្ហូបនៅផ្សារ ទៅផ្ទះវិញមិនប្រយ័ត្នបុកគោ ។ ករណីនេះកើតឡើងកាលពីរសៀលថ្ងៃទី៧ ខែធ្នូ ឆ្នាំ២០១៧ ស្ថិតតាមបណ្តោយផ្លូវជាតិលេខ៦៩ ពីរង្វល់មូលផ្សារស្រអែមឆ្ពោះទៅកាន់តំបន់ប្រាសាទព្រះវិហារចន្លោះបង្គោលគីឡូម៉ែត្រលេខ២២៥-២២៦ ស្ថិតក្នុងភូមិសាស្ត្រ ភូមិធម្មជាតិ ឃុំស្រឯម ស្រុកជាំក្សាន្ត ខេតព្រះវិហារ។
បុរសជាប្តីឈ្មោះ ក្រូច ទ្រូ អាយុ៤៩ឆ្នាំ មុខរបរកសិករ ប្រពន្ធឈ្មោះ ប៉ែន ចន្ថា អាយុ៤៣ឆ្នាំ មុខរបរកសិករ និងកូនឈ្មោះ វង្ស ធារ៉ា អាយុ១៩ឆ្នាំ រងរបួសធ្ងន់ ជនរងគ្រោះទាំង៣ រស់នៅភូមិតេជោបុសស្បូវ ឃុំស្រឯម ស្រុកជាំក្សាន្ត ខេត្តព្រះវិហារ។
បើតាមនាយប៉ុស្តិ៍នគរបាលឃុំស្រឯម លោកអនុសេនីយ៍ឯក ហ៊ុយ សុផុន បានឲ្យដឹងថា មុនពេលកើត បុរស និងស្ត្រី រួមនិងកូនម្នាក់ផងនោះ បានជិះម៉ូតូម៉ាកវេវ ពណ៌ខ្មៅ គ្មានស្លាកលេខ ឌុបគ្នាត្រឡប់មកពីផ្សារ មកដល់ចំណុចកើតហេតុ ក៏បុកគោពេញទំហឹង បណ្តាលឲ្យប្តីប្រពន្ធ និងកូនបោកក្បាលនៅលើដងផ្លូវ រងរបួសធ្ងន់។ លោកបន្តថា ក្រោយកើតហេតុជនរងគ្រោះត្រូវបានរថយន្តសង្គ្រោះមន្ទីរពេទ្យបង្អែកសម្តេច ជា ស៊ីម ស្រះក្តុលដឹកយកមកសង្គ្រោះភ្លាមៗ តែអកុសលដោយសាររបួសធ្ងន់ធ្ងរពេក ក្រោយបញ្ជូនមកដល់មន្ទីរពេទ្យ ក៏ស្លាប់ទាំងពីរនាក់ប្តីប្រពន្ធ ដោយឡែកកូនរងរបួសធ្ងន់។
ក្រោយពិនិត្យសាកសពរួច សមត្ថកិច្ចបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕
លីបង់ ៖ មេដឹកនាំហេសប៊ូឡាកំពុងអំពាវនាវឲ្យប្រជាជាតិមូស្លីម និងតំបន់អារ៉ាប់ទាំងអស់រួមគ្នាដាក់សម្ពាធទៅលើសហរដ្ឋអាមេរិកដើម្បីឲ្យកែប្រែការសម្រេចចិត្តរបស់ខ្លួនក្នុងការទទួលស្គាល់ទីក្រុងហ្សេរុយសាឡឹមថា ជាទីក្រុងរបស់ប្រទេសអ៊ីស្រាអែល។
លោក ហាស្សាន ណាស្រាឡា មេដឹកនាំក្រុមហេសប៊ូឡាបាននិយាយពីព្រហស្បតិ៍ថា រាល់កិច្ចចរចានៅតំបន់មជ្ឈិមបូព៌ាទាំងអស់ត្រូវតែបញ្ឈប់ ហើយថា ការប្រកាសរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ នេះគឺជាការឈ្លានពានរបស់អាមេរិកទៅលើប្រជាពលរដ្ឋប៉ាឡេស្ទីន។
លោក ណាស្រាឡា បាននិយាយតាមទូរទស្សន៍ថា លោកមិនបានគំរាមធ្វើសកម្មភាពយោធាទេ ប៉ុន្តែលោកគ្រាន់តែគាំការអំពាវនាវរបស់ពលរដ្ឋប៉ាឡេស្ទីនសុំឲ្យមានការក្រោកឈរជាថ្មីម្ដងទៀតដើម្បីប្រឆាំងនឹងទង្វើរបស់សហរដ្ឋអាមេរិក។
សូមបញ្ជាក់ថា ក្រុមហេសប៊ូឡាគឺជាក្រុមសកម្មប្រយុទ្ធនៅប្រទេសលីបង់ ហើយក្រុមនេះគឺជាក្រុមយោធាឈានមុខគេមួយដែលបានគំរាមកំហែងប្រទេសអ៊ីស្រាអែលកាលពីឆ្នាំ២០០០ក្រុមនេះបានបង្ខំឲ្យប្រទេសអ៊ីស្រាអែលចេញពីផ្នែកខាងត្បូងប្រទេសលីបង់ ហើយឆ្នាំ២០០៦ក្រុមនេះក៏បានធ្វើសង្គ្រាមជាមួយប្រទេសអ៊ីស្រាអែលផងដែរ៕
អាមេរិក ៖ សហរដ្ឋអាមេរិកកំពុងពិចារណាដាក់ទណ្ឌសេដ្ឋកិច្ចជាថ្មីម្ដងទៀតទៅលើមេដឹកនាំយោធាមួយនៅប្រទេសមីយ៉ាន់ម៉ា និងក្រុមហ៊ុនមួយចំនួនទៀតដែលមានទំនាក់ទំនងជាមួយមេដឹកនាំទាំងនេះដោយសារវិបត្តិរ៉ូហ៊ីងយ៉ានៅរដ្ឋរ៉ាក់ឃីននៅភាគខាងជើងប្រទេសក្នុងតំបន់អាស៊ានមួយនេះ ខណៈដែលកំពុងពិភាក្សាជាមួយបង់ក្លាដែសពិភាក្សាពីការបញ្ជូនជនភៀសខ្លួនរ៉ូហ៊ីងយ៉ាត្រឡប់ទៅប្រទេសមីយ៉ាន់ម៉ាវិញនោះ។
មន្ត្រីជំនាញបាននិយាយថា បើសិនសហរដ្ឋអាមេរិកដាក់ទណ្ឌកម្មជាថ្មីទៅលើប្រទេសមីយ៉ាន់ម៉ាមែន វាអាចធ្វើឲ្យខាតប្រយោជន៍និងរារាំងដល់អន្តរកាលរបស់ប្រទេសនេះដែលកំពុងងាកចេញពីរបបសឹកយោធាជាច្រើនទសវត្សរ៍មកហើយឆ្ពោះទៅរករបបលទ្ធិប្រជាធិបតេយ្យ។ មន្ត្រីជំនាញលោក ហ័រស៊ី បាននិយាយថា ទណ្ឌកម្មទាំងនេះនឹងមិនទំនងជាប៉ះពាល់ខ្លាំងទៅលើគោលនយោបាយនៅប្រទេសមីយ៉ាន់ម៉ាទេ ខណៈប្រទេសនេះទើបតែបានរួចផុតពីទណ្ឌកម្មបានប៉ុន្មានឆ្នាំនេះដែលគេបានដាក់ទណ្ឌកម្មរយៈពេលជាច្រើនទសវត្សរ៍មកហើយ៕
ម៉ានីល ៖ យោធាហ្វីលីពីនស្នើសុំប្រធានាធិបតី លោក រ៉ូឌ្រីហ្គោ ឌូតឺតេ ពន្យារច្បាប់អាជ្ញាសឹកនៅខេត្តមីដាណាវ ភាគខាងត្បូងប្រទេសថែមមួយឆ្នាំទៀត គិតចាប់តាំងពីដើមខែធ្នូនេះតទៅ បន្ទាប់ពីពួកឧទ្ទាម គាំទ្រ ISIS ភាគត្បូង បានបើកការវាយប្រហារមកលើកងកម្លាំងយោធារបស់រដ្ឋាភិបាលហ្វីលីពីនជាថ្មី។ នេះបើតាម ទីភ្នាក់ងារព័ត៌មានចិន ស៊ីនហួរ។
ការទាមទារបែបនេះធ្វើឡើងទៅកាន់ប្រធានាធិបតីហ្វីលីពីន លោក រ៉ូឌ្រីហ្គោក ឌូតឺតេ និងត្រូវបានមន្ត្រីយោធា បង្ហើបឲ្យដឹងនៅថ្ងៃព្រហស្បតិ៍ម្សិលមិញ ដោយរង់ចាំតែការសម្រេចចុងក្រោយ ពីលោកប្រធានាធិបតីប៉ុណ្ណោះ។ ប្រការនេះបានកើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីពួកឧទ្ទាមភាគត្បូង បានបើកការវាយប្រហារមកលើកងកម្លាំងយោធារបស់រដ្ឋាភិបាលហ្វីលីពីនជាថ្មី ហើយក៏កើតចេញជាការប្រយុទ្ធតបតគ្នាជាច្រើនលើក នាំឲ្យមនុស្សស្លាប់ជាច្រើននាក់បន្ថែមទៀត នៅលើប្រជុំកោះភាគខាងត្បូងនោះ។
សូមបញ្ជាក់ថា ការប្រកាសបន្តប្រើច្បាប់អាជ្ញាសឹកមួយឆ្នាំទៀតនេះ គឺបានកើតមានរយៈពេល៥០ថ្ងៃ ក្រោយពីការប្រការជោគជ័យ លើសង្គ្រាមរំដោះទីក្រុងម៉ារ៉ាវី កាលពីថ្ងៃទី២៧ ខែតុលា ឆ្នាំ២០១៧បន្ទាប់ពីរយៈពេល១៤៨ថ្ងៃ នៃសង្គ្រាមដ៏ក្តៅគគុកនៅភាគខាងត្បូងហ្វីលីពីន បានអូសបន្លាយដែលជាហេតុបង្កឲ្យមនុស្សរាប់រយនាក់បាត់បង់ជីវិត រួមមានទាំងយោធា ជនស៊ីវិល និងក្រុមឧទ្ទាមគាំទ្រ ISIS៕
ខេត្តកំពង់ស្ពឺ ៖ តាមសេចក្តីរាយការណ៍បានឲ្យដឹងថា នៅព្រឹកព្រលឹមថ្ងៃទី០៨ ខែធ្នូ ឆ្នាំ២០១៧នេះ មានករណីគ្រោះថ្នាក់ចរាចរណ៍មួយកើតឡើង ដោយរថយន្តដឹកកម្មករ-កម្មការិនី ធ្វើការរោងចក្រមួយគ្រឿង បានបើកបរក្នុងល្បឿនលឿន ក៏បែកកង់រេចង្កូតក្រឡាប់ធ្លាក់ផ្លូវ។ ករណីនេះកើតឡើងនៅម៉ោង០៦ និង២០នាទី ថ្ងៃទី០៨ ខែធ្នូ ឆ្នាំ២០១៧ ស្ថិតក្នុងភូមិអណ្តូងច្រុះ ឃុំស្នំក្រពើ ស្រុកគងពិសី ខេត្តកំពង់ស្ពឺ។
សេចក្តីរាយការណ៍ដដែលបញ្ជាក់ថា ក្នុងករណីខាងលើនេះបានបណ្តាលឲ្យស្លាប់កម្មការិនីម្នាក់ និងកម្មការិនី១៦នាក់ផ្សេងទៀត របួសធ្ងន់ស្រាល កំពុងបញ្ជូនទៅសង្គ្រោះនៅមន្ទីរពេទ្យ៕
ហ្សាការតា ៖ ទីភ្នាក់ងារសារព័ត៌មានចិន ស៊ីនហួរ ចេញផ្សាយថា ស្ថានទូតអាមេរិកប្រចាំប្រទេសឥណ្ឌូណេស៊ីបានចេញផ្សាយសារព្រមានពីសន្តិសុខ សម្រាប់ពលរដ្ឋរបស់ខ្លួនដែលកំពុងស្ថិត ឬរស់នៅក្នុងប្រទេសក្នុងតំបន់អាស៊ីអាគ្នេយ៍មួយនេះឲ្យប្រយ័ត្នពីសុវត្ថិភាពផ្ទាល់ខ្លួន។
ការចេញសារព្រមាននេះធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ ប្រកាសទទួលស្គាល់ទីក្រុងហ្សេរុយសាឡឹម ជារដ្ឋធានីរបស់អ៊ីស្រាអែល និងក្រោយពីប្រធានាធិបតីឥណ្ឌូណេស៊ី លោក ចូកូ វីដូដូ ប្រកាសថ្កោលទោសខ្លាំងៗ លើការសម្រេចចិត្តបែបនេះ និងអំពាវនាវឱ្យសហរដ្ឋអាមេរិកពិចារណាឡើងវិញ។
នៅក្នុងសេចក្ដីថ្លែងការណ៍ ស្ថានទូតអាមេរិកក៏បានព្រមានដែរថា ការទទួលស្គាល់នេះអាចនឹងជំរុញឱ្យមានការតវ៉ា ដែលអាចនឹងផ្ទុះទៅជាអំពើហិង្សា។ សេចក្ដីថ្លែងការណ៍ដដែលបញ្ជាក់ថា «ស្ថានទូតអាមេរិកប្រចាំទីក្រុងហ្សាការតា សូមរំលឹកដល់ពលរដ្ឋអាមេរិក ពីភាពចាំបាច់នៃការប្រុងប្រយ័ត្ន និងស្វែងយល់ពីសន្តិសុខផ្ទាល់ខ្លួន ដោយត្រូវនៅឱ្យឆ្ងាយពីការតវ៉ា ស្ដាប់តាមការណែនាំពីអាជ្ញាធរនៅក្នុងតំបន់ ព្រមទាំងតាមដានការវិវត្តន៍ព័ត៌មាន ឱ្យបានដិតដល់»៕
រាជធានីភ្នំពេញ ៖ ចាប់ពីថ្ងៃទី០៨ រហូតដល់ថ្ងៃទី១៤ ខែធ្នូ ឆ្នាំ២០១៧ សីតុណ្ហភាពនឹងធ្លាក់ចុះខ្លាំង នៅបណ្ដាខេត្តមួយចំនួន និងជាពិសេសតាមបន្ទាត់ព្រំដែន (តំបន់ជួរភ្នំដងរែក)។ នេះបើយោងតាមសេចក្តីប្រកាសព័ត៌មានរបស់ក្រសួងធនធានទឹក និងឧតុនិយម។
ក្រសួងធនធានទឹកបានបញ្ជាក់ថា ខេត្តដែលត្រូវសីតុណ្ហភាពអប្បបរមា នឹងធ្លាក់ចុះខ្លាំងរួមមាន៖ ខេត្តរតនគិរី មណ្ឌលគិរី ស្ទឹងត្រែង ព្រះវិហារ ឧត្ដរមានជ័យ និងខេត្តប៉ៃលិន សីតុណ្ហភាពអប្បបរមានឹងចុះមកនៅក្នុងរង្វង់ពី ១៦-១៨ អង្សាសេ និងបណ្ដារាជធានី-ខេត្ត ដទៃទៀត សីតុណ្ហភាពអប្បបរមា នឹងចុះមកនៅក្នុងរង្វង់ពី១៩-២១ អង្សាសេ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
