រាជធានីភ្នំពេញ ៖ រយៈពេល៣ថ្ងៃនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ ឆ្នាំនេះ ប្រជាពលរដ្ឋ ប្រមាណ៣,២លាននាក់ កើនឡើងប្រមាណ ១៥% បើប្រៀបធៀបឆ្នាំមុន ។ នេះបើយោងតាមរបាយការណ៍ក្រសួងទេសចរណ៍ រួមទាំងមន្ទីរទេសចរណ៍រាជធានីភ្នំពេញ ។
តាមរបាយការណ៍បានបញ្ជាក់ថា គោលដៅសំខាន់ៗ ដែលទទួលភ្ញៀវទេសចរណ៍ រួមមានតំបន់សៀមរាបអង្គរ ទទួលភ្ញៀវទសចរណ៍ប្រមាណ២៨១.៩៣៩នាក់ កើនឡើងជិត៤០% ក្នុងនោះភ្ញៀវអន្តរជាតិប្រមាណ៣១.៩៣៨នាក់ កើនឡើង០,៣៥% បើប្រៀបធៀបឆ្នាំមុន ។ ចំណែកខេត្តព្រះសីហនុ សរុបភ្ញៀវទេសចរណ៍មានចំនួន ៨៥.០០០នាក់ កើនឡើងជិត ៦% ក្នុងនោះភ្ញៀវអន្តរជាតិ ១១.០៥០នាក់ កើនឡើង១៤,៥០% ខណដែលខេត្តកំពត ទទួលភ្ញៀវ ទេសចរណ៍ប្រមាណ ៧៦.៦៥៨នាក់ កើនឡើង២៩,១៧% ក្នុងនោះភ្ញៀវអន្តរជាតិមានចំនួន ១.៦៨៧ កើនឡើងប្រមាណ៧,២៥% ។
ចំពោះខេត្តភូមិភាគឥសាន ភ្ញៀវទេសចរណ៍ទៅកាន់តំបន់នោះក៏មានការកើនឡើងគួរឲ្យ កត់សម្គាល់ផងដែរ ដូចជា ខេត្តរតនគីរី ទទួលបានភ្ញៀវទេសចរណ៍ ១២.៧៤៤នាក់ កើនឡើង ២៩,០៤% ក្នុងនោះភ្ញៀវអន្តរជាតិចំនួន៣៣១នាក់ កើនឡើង១៥,៣៣% ។ ចំណែកខេត្តមណ្ឌល គីរី ទទួលបានភ្ញៀវទេសចរណ៍ចំនួន១៣.៣៧២នាក់ កើនឡើង២២,៨៣% ក្នុងនោះភ្ញៀវអន្តរជាតិ ចំនួន២៩៦នាក់ កើនឡើងប្រមាណ៣៤,៥៤% ៕
រាជធានីភ្នំពេញ ៖ តាមគម្រោងលោក គី តិច មេធាវីតំណាងដោយ អាណត្តិរបស់សម្តេច ហ៊ុន សែន នឹងចូលបំភ្លឺតុលាការនៅរសៀលថ្ងៃទី០៦ ខែវិច្ឆិកានេះករណីប្តឹងលោក លឺ ឡាយស្រេង អតីតមន្ត្រីជាន់ខ្ពស់ គណបក្សហ្វ៊ុនស៊ិនប៉ិច ដែលប្រមាថ ព្រះចេស្តាព្រះមហាក្សត្រ និងបរិហាកេរ្តិ៍ជាសាធារណៈ ។
សូមបញ្ជាក់ថា តាមបណ្តឹងរបស់សម្តេច ហ៊ុន សែន គឺប្តឹងឲ្យតុលាការផ្តន្ទាទោសលោក លឺ ឡាយស្រេង តាមច្បាប់ និងទាមទារសំណងជំងឺចិត្ត ចំនួន ៥០០លានរៀល ៕
ឥណ្ឌា ៖ ក្រុមគ្រូពេទ្យនៅមហាវិទ្យាល័យវេជ្ជសាស្ត្របានបញ្ជាក់ពីថ្ងៃអាទិត្យថា កូនក្មេងទើបនឹងកើតចំនួន៣០នាក់បានស្លាប់ក្នុងរយៈពេល២ថ្ងៃជាប់ៗគ្នានៅមន្ទីរពេទ្យរដ្ឋមួយកន្លែងនៅរដ្ឋអ៊ូតាប្រាដិសនៅភាគខាងជើងប្រទេសឥណ្ឌា។
លោកសាស្ត្រាចារ្យវេជ្ជបណ្ឌិត ឌីខេ ស្រីវ៉ាស្តាវ៉ា (DK Shrivastava) មកពីមហាវិទ្យាល័យវេជ្ជសាស្ត្របាននិយាយថា កូនក្មេងចំនួន១៥នាក់បានស្លាប់នៅផ្នែកថែទាំទារក ហើយចំនួន១៥នាក់ទៀតបានស្លាប់នៅផ្នែកថែទាំកូនក្មេងនៅមន្ទីរពេទ្យរដ្ឋនៅក្នុងរដ្ឋនេះ។ លោក ស្រីវ៉ាស្តាវ៉ា បានបន្ថែមថា ក្នុងចំណោមក្មេងដែលស្លាប់ទាំងនេះគឺមានក្មេងចំនួន៦នាក់បានស្លាប់ដោយសារជំងឺរលាកស្រោមខួរក្បាល ហើយទារកផ្សេងទៀតបានស្លាប់ដោយសារមូលហេតុមួយចំនួនទៀត។
សូមបញ្ជាក់ថា គ្រោះថ្នាក់នេះបានកើតឡើងរយៈពេល២ខែមកហើយក្រោយពីមានមនុស្សយ៉ាងតិច១០៥នាក់ភាគច្រើនជាទារក និងកូនក្មេងបានស្លាប់នៅមន្ទីរពេទ្យដដែលនេះ ខណៈមន្ទីរពេទ្យនេះគ្មានការផ្គត់ផ្គង់វេជ្ជសាស្ត្រដោយសារគ្មានចំណូលដែលជាហេតុធ្វើឲ្យប្រជាពលរដ្ឋមូលដ្ឋានខឹងសម្បាពីបញ្ហានេះ៕
អាមេរិក ៖ ខ្មាន់កាំភ្លើងដែលបាញ់ប្រហារនៅព្រះវិហារគ្រឹស្តមួយកន្លែង (Sutherland Springs) នៅរដ្ឋតិចសាស់សហរដ្ឋអាមេរិកកាលពីថ្ងៃអាទិត្យត្រូវបានបាញ់សម្លាប់ ក្រោយពីប៉ូលិសបានដេញតាមនៅពេលជនល្មើសបានរត់ចូលទៅក្នុងស្រុកមួយនៅជាប់នឹងតំបន់កើតហេតុនេះ។
មន្ត្រីមូលដ្ឋានបានប្រាប់ប្រព័ន្ធផ្សព្វផ្សាយ CNN ថា មនុស្សយ៉ាងតិច២៦នាក់ត្រូវបានសម្លាប់ ហើយជាង២០នាក់ទៀតបានរងរបួសនៅក្នុងហេតុការណ៍បាញ់ប្រហារនេះ។ ប៉ូលិសបានបញ្ជាក់ថា ស៊ូឌឺឡេនស្ព្រីងគឺជាសហគមន៍មួយដែលមានប្រជាពលរដ្ឋរស់នៅទីនោះប្រហែល៤០០នាក់ ហើយស្ថិតនៅចម្ងាយប្រហែល៤៨គីឡូម៉ែត្រនៅភាគអាគ្នេយ៍នៅទីក្រុងសានអង់តូនីញ៉ូ (San Antonio) រដ្ឋតិចសាស់សហរដ្ឋអាមេរិក។ ប៉ុន្តែគេនៅមិនទាន់ច្បាស់ថា តើជនល្មើសបានស្លាប់ដោយសារប៉ូលិសបាញ់ប្រហារ ឬក៏ស្លាប់ដោយសារការធ្វើអត្តឃាតនោះទេ។
មន្ត្រីប៉ូលិសបាននិយាយថា បុរសម្នាក់បានដើរចូលទៅក្នុងព្រះវិហារមួយកន្លែងនៅតំបន់ស៊ូឌឺឡេនស្ព្រីង ទោះបីយ៉ាងណារហូតមកដល់ពេលនេះគេមិនទាន់ដឹងពីមូលហេតុនៃការបាញ់ប្រហារនេះនៅឡើយទេ ខណៈមន្ត្រីពាក់ព័ន្ធកំពុងធ្វើការស៊ើបអង្កេតនៅឡើយ៕
ភ្នំពេញ ៖ លោក ជា ប៉ូច តំណាងរាស្ត្រម្នាក់របស់គណបក្សសង្គ្រោះជាតិ ត្រូវបានសមត្ថកិច្ចបង្អាក់ ដំណើរជាងមួយម៉ោង មុនពេលអនុញ្ញាតឱ្យបន្តចាកចេញពីកម្ពុជា នៅព្រលានយន្តហោះយន្ត អន្តរ ជាតិភ្នំពេញ។
បើតាមការបញ្ជាក់នៅលើបណ្តាញសង្គម Facebook របស់លោក អេង ឆៃអ៊ាង អនុប្រធានគណបក្សសង្គ្រោះជាតិ ដែលកំពុងនៅឯក្រៅប្រទេសដែរនោះបានឲ្យដឹងថា លោក ជា ប៉ូច តំណាង រាស្ត្រគណបក្សសង្គ្រោះជាតិទី៣ហើយ ដែលអាជ្ញាធរច្រកទ្វារព្រំដែន បង្អាក់ដំណើរមិនឲ្យចាក ចេញ បន្ទាប់ពីលោក ងឹម ញេង និងលោក អ៊ុច សេរីយុទ្ធ។
ការចេញដំណើរទៅក្រៅប្រទេសរបស់លោក ជា ប៉ូច ពេលនេះ ធ្វើឡើងក្រោយពេល លោក សម ង្ស៊ី ធ្វើការអំពាវនាវឲ្យសមាជិកបក្សនេះ ពីថ្នាក់មូលដ្ឋានដល់ថ្នាក់ជាតិ គេចខ្លួនទៅក្រៅប្រទេស ប្រសិនបើទ្រាំនឹងគំនាបមិនបាន។
សូមរំលឹកថា កាលពីថ្ងៃទី៣ វិច្ឆិកា ឆ្នាំ២០១៧ នេះ លោក ជា ប៉ូច ជាអ្នកតំណាងរាស្ត្រ របស់គណបក្សប្រឆាំង បានចេញទៅក្រៅប្រទេសតាមអាកាសយាន្តដ្ឋានអន្តរជាតិភ្នំពេញ។ប៉ុន្តែលោកត្រូវបានសមត្ថកិច្ចនគរបាលព្រលានយន្តហោះអន្តរជាតិភ្នំពេញ បង្អាក់ដំណើររយៈពេលជាងមួយម៉ោង ដើម្បីសាកសួរព័ត៌មានផ្សេងៗហើយរួចរាល់ ទើបអនុញ្ញាតឲ្យចាកចេញពីកម្ពុជា៕
ហាណូយ ៖ ទីភ្នាក់ងារព័ត៌មានចិន ស៊ីនហួរ ចេញផ្សាយថា ព្យុះទីហ្វុងដ៏កំណាចមួយដែលមានឈ្មោះថា ដំរី បានវាយប្រហារភាគកណ្តាលប្រទេសវៀតណាមសម្លាប់មនុស្ស២៧នាក់ ខណៈដែលមនុស្ស ២២នាក់ទៀត នៅក្នុងខេត្ត Khanh Hoa, Phu Yen, Dak Lak និង Binh Dinh កំពុងបាត់ខ្លួន។
អាជ្ញាធរវៀតណាមបានឲ្យដឹងថា ក្រៅពីមនុស្សស្លាប់ និងបាត់ខ្លួនជាច្រើននាក់ នៅក្នុងខេត្តភាគកណ្តាលទាំងបួនខាងលើនេះ នាវាដឹកទំនិញតូច-ធំ និងទូកនេសាទប្រមាណ ២២៨គ្រឿង ក៏ត្រូវបានព្យុះដំរីមួយនេះ បោកពន្លិចទៅក្នុងសមុទ្រដោយរលកធំៗ និងខ្យល់បោកបក់ខ្លាំងក្លាផងដែរ។
ជាមួយគ្នានោះព្យុះនេះក៏បានបំផ្លាញផលដំណាំ ៣០,០០០ហិកតា ត្រូវបានលិចលង់ទៅក្នុងជំនន់ទឹកភ្លៀងយ៉ាងគំហុក ខណៈផ្ទះ ៦២៦ខ្នង បានដួលរលំទាំងស្រុង ឬរងការបំផ្លាញ និងប្រជាជន ៣៣,០០០នាក់ ត្រូវបានជម្លៀស។
គួរបញ្ជាក់ថា សម្រាប់តំបន់ដែលកំពុងទទួលរងគ្រោះធ្ងន់ជាងគេនោះ គឺស្ថិតនៅភាគកណ្តាលប្រទេស៕
អាមេរិក ៖ ទីភ្នាក់ងារសារព័ត៌មាន Reuters បានរាយការណ៍នៅមុននេះបន្តិចថា មានបាញ់ប្រហារករណីដ៏សាហាវមួយទៀតបានកើតឡើងនៅលើទឹកដីសហរដ្ឋអាមេរិក ដោយខ្មាន់កាំភ្លើងបានចូលទៅក្នុងវិហារសាសនាគ្រឹស្តមួយកន្លែង ក្នុងរដ្ឋតិចសាស់ បើកការបាញ់ប្រហារសម្លាប់មនុស្សជាង២០នាក់ និងរបួសជាង២០នាក់ផងដែរ។
ទោះជាយ៉ាងណានៅមិនទាន់មានព័ត៌មានលម្អិតជុំវិញហេតុការន៍ខាងលើនៅឡើយទេ៕
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសផ្ដល់ជូនជនរួមជាតិនាឱកាសព្រះរាជពិធីបុណ្យអុំទូក គឺរាជរដ្ឋាភិបាលបានប្រកាសទិញ ស្ពានឆ្លងកាត់ដៃ សមុទ្រឆ្ពោះទៅកាន់ប្រទេសថៃ នៅខេត្តកោះកុង ពីក្រុមហ៊ុន លី យ៉ុងផាត់ មកគ្រប់គ្រងវិញ ដោយអនុញ្ញាតឲ្យប្រជាពលរដ្ឋធ្វើដំណើរដោយមិនបាច់បង់ប្រាក់ទៀតឡើយ។ នេះជាការបញ្ជាក់របស់ប្រមុខនៃរាជរដ្ឋាភិបាល សម្ដេចតេជោ ហ៊ុន សែន នៅលើទំព័រ Facebook របស់សម្ដេចនាប៉ុន្មាននាទីមុននេះ នាព្រឹកថ្ងៃទី០១ ខែវិច្ឆិកា ឆ្នាំ២០១៧នេះ។
សម្ដេចតេជោ ហ៊ុន សែន បានមានប្រសាសន៍ទៀតថា ការធ្វើដំណើរឆ្លងកាត់ដោយពុំចាំបាច់បង់ប្រាក់ នឹងធ្វើឡើងនៅវេលា ម៉ោង០០៖០០នាទីពាក់កណ្ដាលអធ្រាត្រ ថ្ងៃទី០២ ខែវិច្ឆិកា ឆ្នាំ២០១៧នេះ។
សម្តេចតេជោ ហ៊ុន សែន បានថ្លែងយ៉ាងដូច្នេះថា ដើម្បីសម្រួលដល់បងប្អូនប្រជាពលរដ្ឋ ដែលធ្វើដំណើរនិយាយជារួម និងនិយាយដោយឡែក បងប្អូនប្រជាពលរដ្ឋនៅខេត្តកោះកុង ក្នុងនាមរាជរដ្ឋាភិបាល ខ្ញុំព្រះករុណាខ្ញុំ បានសម្រេចទិញយកត្រឡប់មកវិញ ស្ពានឆ្លងកាត់ដៃសមុទ្រខេត្តកោះកុង ទៅប្រទេសថៃដែលវិនិយោគដោយ ក្រុមហ៊ុន លី យ៉ុងផាត់ ដើម្បីឲ្យបងប្អូនប្រជាពលរដ្ឋធ្វើដំណើរឆ្លងកាត់ ដោយពុំចាំបាច់បង់ថ្លៃ ចាប់ពីម៉ោង០០៖០០នាទី ថ្ងៃទី០២ ខែវិច្ឆិកា ឆ្នាំ២០១៧ ដើម្បីអបអរព្រះរាជពិធីបុណ្យ អុំទូក បណ្តែតប្រទីប និងសំពះព្រះខែ អកអុំបុក។
ចំពោះកិច្ចការដែលនៅសេសសល់ សូមឲ្យក្រសួងសាធារណការ និងដឹកជញ្ជូន ក្រសួងសេដ្ធកិច្ច និងហិរញ្ញវត្ថុ និងសាលាខេត្តកោះកុង ពិភាក្សាជាមួយក្រុមហ៊ុន លី យ៉ុងផាត់ ដោះស្រាយនៅពេលក្រោយ។
ខ្ញុំព្រះករុណា ខ្ញុំសង្ឃឹមថា បងប្អូនប្រជាពលរដ្ឋនឹងទទួលបានផលប្រយោជន៏ពីការសម្រេចនេះ៕
រាជធានីភ្នំពេញ ៖ នារសៀលម្សិលមិញសមត្ថកិច្ចបានសហការចាប់វ៉ៃខ្នោះជនសង្ស័យម្នាក់ ជាប់ពាក់ព័ន្ធករណីរំលោភសេពន្ថវៈ និងវាយប៉ុនប៉ងសម្លាប់ កុមារីរងគ្រោះ អាយុ៩ឆ្នាំម្នាក់ កាលពីវេលាម៉ោង១៩,៣០នាទីថ្ងៃទី៣១ ខែតុលា ឆ្នាំ២០១៧ នៅចំណុចដីឡូតិ៍ ទំនេ ផ្លូវលំ ភូមិ ព្រែកទាល់១ សង្កាត់ ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
សមត្ថកិច្ចបញ្ជាក់ថា ជនសង្ស័យឈ្មោះ ញ៉ នាង ភេទប្រុស អាយុ២២ឆ្នាំ ជនជាតិខ្មែរ មុខរបរ ព្រូឡាន ស្នាក់នៅឃ្លាំងឡានដឹកទំនិញ ផ្លូវលំ ភូមិ ព្រែកទាល់១ សង្កាត់ ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។ ចំណែកកុមារីរងគ្រោះអាយុ៩ឆ្នាំ) ឈ្មោះ ស លហ ភេទស្រី អាយុ៩ឆ្នាំ ជនជាតិខ្មែរ មុខរបរ សិស្ស ស្នានៅសង្កាត់ ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
សមត្ថកិច្ចបានឲ្យដឹងថា ប្រតិបត្តិការនោះយើងដកហូតបានវត្ថុតាង ដែលបន្សល់នៅកន្លែងកើត ហេតុរួមមាន៖ ស្បែកជើងផ្ទាត់ជ័រពណ៌ខ្មៅ ចំនួន១គូ, ស្បែកជើងស៊ក (របស់ក្មេង) ឆ្នូតពណ៌ស លាយខ្មៅ ចំនួនមួយចំហៀង,ខោងជើងខ្លីចំនួន២, ដុំឥដ្ឋប្រឡាក់ឈាមចំនួន២ដុំ, សំបកបាវស៊ីម៉ងតិ៍ ប្រឡាក់ឈាមចំនួន១ និង សម្ភារៈមួយចំនួនទៀត ៕
កូរ៉េខាងជើង ៖ យ៉ាងហោចណាស់មនុស្ស ២០០នាក់ បានបាត់បង់ជីវិត ក្នុងហេតុការណ៍បាក់រលំរូងក្រោមដីនៅទីតាំងនុយក្លេអ៊ែរ Punggye-ri របស់កូរ៉េខាងជើង។ ហេតុការណ៍នេះបានកើតឡើងតាំងថ្ងៃទី១០ ខែតុលាមកម្លេះ ប៉ុន្តែទូរទស្សន៍របស់ជប៉ុន Asahi ទើបតែចេញផ្សាយកាលពីម្សិលមិញនេះ។
គ្រោះមហន្តរាយនេះបានបង្កឱ្យមានការភ័យខ្លាចនៃការលេចធ្លាយវិទ្យុសកម្មដ៏ធំដែលអាចបង្កឱ្យមានគ្រោះមហន្តរាយផ្ទុះនុយក្លេអ៊ែរ ដូចនៅជប៉ុនទៀតផង។
មន្ត្រីកូរ៉េខាងជើងម្នាក់បាននិយាយថាទីភ្នាក់ងារព័ត៌មាន Yonhap របស់កូរ៉េខាងត្បូងថា ការបាក់រលំនេះបានកើតឡើងនៅក្នុងការសាងសង់ផ្លូវក្រោមដីមួយកន្លែង។មន្ត្រីដដែលបានអះអាងថាមនុស្សប្រមាណ១០០នាក់អាចជាប់គាំងក្នុងរូងក្រោមដីខណៈដែលមនុស្ស ១០០នាក់ទៀតបានបាត់បង់ជិវិតនៅក្នុងការដួលរលំជាលើកទីពីរក្នុងអំឡុងពេលប្រតិបត្តិការជួយសង្គ្រោះ។
យោងតាមរបាយការណ៍បានឲ្យដឹងថាឧបទ្ទវហេតុនេះត្រូវបានគេជឿថាត្រូវបានបង្កឡើងដោយការធ្វើតេស្តនុយក្លេអ៊ែរលើកទី ៦របស់លោក លោក គីម ជុងអ៊ុន នាពេលថ្មីៗនេះ ដែលបានធ្វើឲ្យភ្នំដែលជាទីតាំងនុយក្លេអ៊ែរនោះ មិនរឹងមាំដូចមុន ទើបធ្វើឲ្យមានការបាក់រលំយ៉ាងដូច្នេះ៕
ញូវយ៉ក ៖ អាជ្ញាធរអាមេរិកនិយាយថា មនុស្សចំនួន៨នាក់បានស្លាប់ និងមួយចំនួនទៀតរងរបួសនៅហេតុការណ៍រថយន្តមួយគ្រឿងបើកចូលទៅខាងផ្លូវសម្រាប់អ្នកជិះកង់នៅក្នុងបុរីញូវយ៉កសហរដ្ឋអាមេរិកកាលពីរសៀលថ្ងៃអង្គារ ខណៈដែលប៉ូលិសបានចាត់ទុកគ្រោះថ្នាក់នេះថា ជាការវាយប្រហារភេរវកម្ម។
មន្ត្រីប៉ូលិសមូលដ្ឋានបានបញ្ជាក់ប្រាប់ក្រុមអ្នកកាសែតថា អ្នកបើកបរដែលមានអាយុ២៩ឆ្នាំនេះត្រូវបានប៉ូលិសបាញ់ត្រូវពោះ និងបញ្ជូនទៅឃុំខ្លួនក្រោយពីបុរសរូបនេះបានបើករថយន្តបំបុករថយន្តក្រុងរបស់សាលារៀនមួយគ្រឿងនិងបានរត់គេចពីរថយន្តរបស់ខ្លួន។
មន្ត្រីនាំពាក្យក្រសួងមហាផ្ទៃសហរដ្ឋសហរដ្ឋអាមេរិកបានហៅគ្រោះថ្នាក់នេះថា ជាអំពើភេរវកម្មយ៉ាងពិតប្រាកដ ហើយការវាយប្រហារនេះបានធ្វើឲ្យគេនឹកឃើញដល់ការវាយប្រហារស្រដៀងគ្នានេះដែលបានកើតឡើងជាបន្តបន្ទាប់នៅតំបន់អឺរ៉ុបកាលពីឆ្នាំមុន។
លោក អានឌ្រូ គ្យូម៉ូ (Andrew Cuomo) អភិបាលក្រុងញូវយ៉កបាននិយាយថា ជនសង្ស័យទំនងជាធ្វើអំពើនេះតែម្នាក់ឯង ហើយថា អាមេរិកនឹងមិនខ្លាចញញើតចំពោះការវាយប្រហារបែបនេះទេ។
មន្ត្រីប៉ូលិសបានបញ្ជាក់ថា ជនសង្ស័យបានបើករថយន្តចូលទៅផ្លូវសម្រាប់អ្នកជិះកង់នៅតំបន់សេដ្ឋកិច្ចម៉ាន់ហាតាន់ក្រោមកាលពីម៉ោង៣រសៀលថ្ងៃម្សិលមិញ ហើយថា បុរសនេះបានកាន់កាំភ្លើងបាញ់សត្វផងដែរ។
ហើយនៅពេលជនសង្ស័យបានបើករថយន្តបំបុករថយន្តរបស់សាលារៀន វាបានធ្វើឲ្យក្មេងចំនួន២នាក់និងយុវជន២នាក់ទៀតរងរបួស។
មន្ត្រីប៉ូលិសបាននិយាយថា ជនសង្ស័យបានជួលរថយន្តគេជិះ ប៉ុន្តែមិនបានដឹងថា បានជួលពេលណានោះទេ ហើយជនសង្ស័យបានធ្វើដំណើរមកពីប្រទេសអ៊ូសបេគីស្ថានស្ថិតនៅតំបន់អាស៊ីកណ្ដាល ហើយបុរសនេះបានចូលទៅដល់ទឹកដីសហរដ្ឋអាមេរិកនៅឆ្នាំ២០១០។
ក្នុងចំណោមអ្នកស្លាប់ទាំង៨នាក់គឺចំនួន៦នាក់បានស្លាប់នៅកន្លែងកើតហេតុ ហើយចំនួន២នាក់ទៀតស្លាប់នៅមន្ទីរពេទ្យ ហើយការវាយប្រហារនេះក៏បានធ្វើឲ្យមនុស្សយ៉ាងតិច១១នាក់ទៀតរងរបួសផងដែរ៕
រាជធានីភ្នំពេញ ៖ គិតត្រឹមម៉ោង៦ល្ងាចថ្ងៃទី៣០ ខែតុលា ឆ្នាំ២០១៧ មានប្រជាពលរដ្ឋទៅចុះឈ្មោះបានជាង៤៧២,៨៧៩នាក់ហើយបានទៅចុះឈ្មោះបោះឆ្នោតថ្មី ខណៈអ្នកដែលត្រូវលុបឈ្មោះចេញមានចំនួន ១៣,៨៦០នាក់ និងអ្នកខុសកែតម្រូវមានចំនួន ៤,៩១៥នាក់។ នេះបើការបញ្ជាក់ពីគណៈកម្មាធិការជាតិរៀបចំការបោះឆ្នោត (គ.ជ.ប)។
តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង១.៦លាននាក់ ខណៈប្រជាពលរដ្ឋខ្មែរដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩.៨លាននាក់។
សូមបញ្ជាក់ថា ដំណើរការធ្វើបច្ចុប្បន្នភាព បញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧ ចាប់ផ្តើមពីថ្ងៃទី០១ ខែកញ្ញា ដល់ថ្ងៃទី០៩ ខែវិច្ឆិកា ឆ្នាំ២០១៧៕
កូរ៉េខាងជើង ៖ ប្រទេសកូរ៉េខាងជើងបានរិះគន់ចក្រភពអង់គ្លេសចំពោះការចោទប្រកាន់ថា ខ្លួនកំពុងស្ថិតនៅពីក្រោយការវាយប្រហារជំរិតទារប្រាក់តាមអ៊ីនធឺណិតជាសកលមួយដែលវាយប្រហារទៅលើសេវាសុខាភិបាលជាតិហើយហៅការចោទប្រកាន់នេះថាជា “ការប៉ុនប៉ងអាក្រក់” ដើម្បីរឹតបន្តឹងទណ្ឌកម្មអន្តរជាតិបន្ថែមទៀតប្រឆាំងនឹងក្រុងព្យុងយ៉ាង។
យោងតាមរបាយការណ៍របស់រដ្ឋាភិបាលបានឲ្យដឹងថា មួយភាគបីនៃមន្ទីរពេទ្យសាធារណៈរបស់ចក្រភពអង់គ្លេសគឺត្រូវបានរងផលប៉ះពាល់ដោយមេរោគ WannaCry កាលពីខែឧសភា។កុំព្យូទ័ររហូតដល់ទៅ៣០០,០០០គ្រឿងនៅ១៥០ប្រទេសត្រូវបានរងការវាយប្រហារដោយមេរោគ WannaCry ដែលបានរឹបអូសប្រព័ន្ធនិងទាមទារការបង់ប្រាក់ជា Bitcoin ដើម្បីប្រគល់ការគ្រប់គ្រងដល់អ្នកប្រើប្រាស់វិញ។
អ្នកស្រាវជ្រាវមួយចំនួនបានចង្អុលទៅទីក្រុងព្យុងយ៉ាងដោយនិយាយថា កូដដែលប្រើគឺស្រដៀងគ្នានឹងការ Hack កាលពីអតីតកាលដែលស្តីបន្ទោសទៅលើរបបរបស់លោកគីមជុងអ៊ុន។
រដ្ឋមន្ត្រីក្រសួងសន្តិសុខអង់គ្លេសលោក Ben Wallace បានប្រាប់ BBC កាលពីសប្តាហ៍មុនថា ក្រុងឡុងដ៍គឺប្រាកដណាស់ថាកូរ៉េខាងជើងគឺជាអ្នកទទួលខុសត្រូវ។ប៉ុន្តែអ្នកនាំពាក្យសមាគមកូរ៉េ-អឺរ៉ុបរបស់កូរ៉េខាងជើងបានបដិសេធការចោទប្រកាន់នេះហើយបានព្រមានអង់គ្លេសប្រឆាំងនឹងការប៉ាន់ស្មានដោយគ្មានមូលដ្ឋាន។
អ្នកនាំពាក្យបាននិយាយក្នុងសេចក្តីថ្លែងការណ៍មួយដែលផ្សាយដោយភ្នាក់ងារព័ត៌មានកណ្តាលរបស់កូរ៉េខាងជើងកាលពីល្ងាចថ្ងៃចន្ទថា “នេះគឺជាទង្វើហួសពីកម្រិតនៃការអត់ឱនរបស់យើងហើយវាធ្វើឲ្យយើងចោទសួរអំពីគោលបំណងពិតប្រាកដនៅពីក្រោយទង្វើរបស់ចក្រភពអង់គ្លេស”។
អ្នកនាំពាក្យរូបនេះបាននិយាយទៀតថា “សកម្មភាពរបស់រដ្ឋាភិបាលចក្រភពអង់គ្លេសក្នុងការភ្ជាប់កូរ៉េខាងជើងជាមួយនឹងការវាយប្រហារតាមអ៊ីនធឺណិតគឺមិនអាចត្រូវបានបកស្រាយតាមវិធីណាផ្សេងទៀតទេក្រៅពីការប៉ុនប៉ងដ៏អាក្រក់ដើម្បីទាក់ទាញសហគមន៍អន្តរជាតិមិនឲ្យទុកចិត្តកាន់តែខ្លាំងចំពោះកូរ៉េខាងជើង”។
យោងទៅតាមរដ្ឋាភិបាលកូរ៉េខាងត្បូងបានបង្ហាញថា កូរ៉េខាងជើងមានអង្គភាពបណ្តុះបណ្តាលឯកទេសវាយប្រហារតាមអ៊ីនធឺណិតមួយដែលមានសមាជិកចំនួន៦,៨០០នាក់។ វាត្រូវបានគេចោទប្រកាន់ថាបើកការវាយប្រហារបណ្តាញអ៊ីនធឺណិតមានឥទ្ធិពលខ្ពស់រួមទាំងការ Hack ក្រុមហ៊ុន Sony Pictures ក្នុងឆ្នាំ២០១៤ផងដែរ៕
រាជធានីភ្នំពេញ ៖ គណបក្សសញ្ជាតិកម្ពុជាបានចេញសេចក្តីថ្លែងការណ៍មួយដោយ ស្នើ សុំឲ្យតុលាការកំពូលកាត់សេចក្តី សម្រេចរំលាយគណបក្សសង្គ្រោះជាតិឲ្យកាន់ តែឆាប់ជាទីបំផុត ។ គណបក្សសញ្ជាតិកម្ពុជាក៏បានប្រកាសគាំទ្រ ចំពោះចំណាត់ការ រាជរដ្ឋាភិបាលក្នុងចាប់ឃុំខ្លួនលោក កឹម សុខា ដែលបានប្រព្រឹត្តអំពើក្បត់ជាតិ បម្រើបរទេសផងដែរ ៕
បាងកក ៖ ក្រុមមន្ត្រីបាននិយាយកាលពីថ្ងៃអង្គារថា ប្រទេសថៃបានដកហូតលិខិតឆ្លងដែនរបស់នាយករដ្ឋមន្ត្រីដែលត្រូវបណ្តេញចេញគឺលោកស្រីយីងឡាក់ស៊ីណាវ៉ាត្រាដែលមិនទាន់បានចេញជាសាធារណៈចាប់តាំងពីលោកស្រីបានចាកចេញពីប្រទេសកាលពី២ខែកន្លងទៅមុនថ្ងៃវិនិច្ឆ័យនៅក្នុងការជំនុំជម្រះក្តីករណីធ្វេសប្រហែសរបស់លោកស្រី។
អតីតនាយករដ្ឋមន្ត្រីរូបនេះដែលរដ្ឋាភិបាលជាប់ឆ្នោតរបស់ខ្លួនត្រូវបានទម្លាក់នៅក្នុងរដ្ឋប្រហារឆ្នាំ២០១៤គឺត្រូវបានផ្តន្ទាទោសឲ្យជាប់ពន្ធនាគាររយៈពេល៥ឆ្នាំកាលពីខែមុនចំពោះការខកខានមិនបានបញ្ឈប់អំពើពុករលួយនៅក្នុងគោលនយោបាយស្រូវអង្ករ។
សាលក្រមនោះត្រូវបានអ្នកគាំទ្ររបស់លោកស្រីយីងឡាក់រិះគន់ថាជាកិច្ចខិតខំប្រឹងប្រែងរបស់របបយោធាដើម្បីបញ្ជៀសលោកស្រីឲ្យចេញពីឆាកនយោបាយថៃសម្រាប់ផលប្រយោជន៍។
រដ្ឋមន្ត្រីការបរទេសថៃលោក Don Pramudwinai បានប្រាប់អ្នកយកព័ត៌មាននៅទីក្រុងបាងកកកាលពីថ្ងៃអង្គារថា “លិខិតឆ្លងដែនទាំងអស់របស់លោកស្រីយីងឡាក់ត្រូវបានដកហូតនៅពេលនេះ។ យើងមិនដឹងពីកន្លែងលាក់ខ្លួនរបស់នាងទេ មានតែរបាយការណ៍ប៉ុណ្ណោះដែលថានាងស្ថិតនៅចក្រភពអង់គ្លេសប៉ុន្តែមិនច្បាស់ថាតើទីក្រុងមួយណានោះទេ”។
អាជ្ញាធរថៃបាននិយាយថា លោកស្រីយីងឡាក់មានលិខិតឆ្លងដែនថៃចំនួន៤ដែលពីរជារបស់ផ្ទាល់ខ្លួននិងពីរទៀតជារបស់ការទូត។
ទន្ទឹមនោះ អនុប្រធានប៉ូលិសថៃលោក Srivara Ransibrahmanakul បាននិយាយថា អាជ្ញាធរនៅតែកំពុងធ្វើការដើម្បីបញ្ជាក់ពីទីតាំងអតីតនាយករដ្ឋមន្ត្រីរូបនេះខណៈដែលពួកគេស្វែងរកការធ្វើបត្យាប័នរបស់នាង។ ប៉ុន្តែគាត់បាននិយាយថា មិនមានប្រទេសណាមួយបានឆ្លើយតបហើយបាននិយាយថា ពួកគេបានឃើញលោកស្រីយីងឡាក់នោះទេ។
គួរបញ្ជាក់ថា លោកស្រីយីងឡាក់ដែលធ្លាប់មានសកម្មភាពតាមប្រព័ន្ធផ្សព្វផ្សាយសង្គមប៉ុន្តែបានស្ងៀមស្ងាត់ចាប់តាំងពីនាងបានភៀសខ្លួននោះគឺជាបុគ្គលចុងក្រោយបង្អស់មកពីក្រុមគ្រួសារនយោបាយដ៏ខ្លាំងក្លារបស់លោកស្រីដែលបានក្លាយទៅជាជនរងគ្រោះនៃរបបយោធានិងតុលាការរបស់ប្រទេសថៃ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
