ម៉ានីល៖អាជ្ញាធរហ្វីលីពីននិយាយថា មនុស្ស៨នាក់មានទាំងជនសង្ស័យជាពួកឧទ្ទាមអាប៊ូសាយ៉ាហ្វ៥នាក់ និងមន្ត្រី៣នាក់ត្រូវបានគេសម្លាប់កាលពីម្សិលមិញ បន្ទាប់ពីមានការប៉ះទង្គិចគ្នាជាមួយក្រុមចាប់ជំរិតនៅលើកោះលម្ហែកាយបូហូល។ នេះបើយោងតាមការចុះផ្សាយរបស់ទីភ្នាក់ងារព័ត៌មាន AFP។
អ្នកនាំពាក្យយោធាហ្វីលីពីន លោក អែដហ្កាដ អារ៉េវ៉ាឡូ បាននិយាយថា លោកបានទទួលសេចក្ដីរាយការណ៍ថា សត្រូវ៥នាក់ត្រូវបានសម្លាប់ ហើយរឹបអូសបានកាំភ្លើងយន្ត៤គ្រឿងពីក្រុមឧទ្ទាម។ ប៉ុន្តែ លោកថា មនុស្ស៣នាក់របស់រដ្ឋាភិបាលក៏ត្រូវបានសម្លាប់ផងដែរ ខណៈមន្ត្រី២នាក់ទៀតរងរបួស។ លោកបញ្ជាក់ថា ការប៉ះទង្គិចនេះបានកើតឡើងក្រោយពីស្ថានទូតអាមេរិក និងអូស្ត្រាលី បានព្រមានទៅពលរដ្ឋរបស់ពួកគេនៅសប្ដាហ៍នេះ អំពីការចាប់ជំរិតបង្កឡើងដោយក្រុមភេរវជននៅភាគកណ្ដាលហ្វីលីពីន។
គួរបញ្ជាក់ថា កោះបូហូលគឺជាមរណីយដ្ឋានទេសចរណ៍ដ៏ធំមួយ ជាទីដែលភ្ញៀវទេសចរហែលទឹកប្រលែងលេងជាមួយត្រីឆ្លាមរូបរាងបាឡែន និងជិះទូកកម្សាន្តលើទឹកទន្លេថ្លាដូចកញ្ចក់ ព្រមទាំងឆ្នេរខ្នាច់សចិញ្ចាច៕
រាជធានីភ្នំពេញ៖ក្រសួងពាណិជ្ជកម្មបានចេញផ្សាយតារាងតម្លៃប្រេងឥន្ធនៈដែលត្រូវលក់រាយតាមបណ្តាស្ថានីយប្រេងទូទាំងប្រទេសកម្ពុជា។ ក្រសួងពាណិជ្ជកម្មបានបញ្ជាក់ថា តម្លៃប្រេងឥន្ធនៈដែលត្រូវលក់រាយចាប់ពីថ្ងៃទី១២ ខែមេសា ដល់ថ្ងៃទី២១ ខែមេសា៕ សូមមើលតារាងខាងក្រោម៖
រាជធានីភ្នំពេញ៖លោក ខៀវ សុភ័គ អ្នកនាំពាក្យក្រសួងមហាផ្ទៃបានឲ្យដឹងថា សមត្ថកិច្ចកម្ពុជាកំពុងរៀបចំធ្វើឯកសារស្នើ សុំឲ្យប្រទេសជិតខាងចាប់បញ្ជូនខ្លួនលោក ឈាន ពិសិដ្ឋ បញ្ជូនមកកម្ពុជាវិញ។ យ៉ាងណាក៏ដោយ លោកមិនបានបញ្ជាក់ថា លោក ឈាន ពិសិដ្ឋ កំពុងលាក់ខ្លួននៅប្រទេសណាមួយនោះទេ។
លោក ឈាន ពិសិដ្ឋ នាយរងប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ត្រូវបានក្រសួងមហាផ្ទៃសម្រេចដកតំណែង និងក្របខណ្ឌនគរបាលជាតិ បន្ទាប់ពីបានប្រើប្រាស់អាវុធបាញ់ទៅលើមន្ត្រីដែលធ្វើការជាមួយគ្នាកាលពីសប្តាហ៍មុន។ ទន្ទឹមនោះរដ្ឋមន្ត្រីក្រសួងមហាផ្ទៃក៏បានបញ្ជាឲ្យចាប់បញ្ជូនឈ្មោះ ឈាន ពិសិដ្ឋ នេះទៅតុលាការដើម្បីអនុវត្តន៍ច្បាប់ផងដែរ៕
វ៉ាស៊ីនតោន៖ប្រធានាធិបតីអាមេរិក លោក ដូណាល់ ត្រាំ កាលពីម្សិលមិញបានបញ្ជាក់ថា សហរដ្ឋអាមេរិក បានត្រៀមខ្លួនរួចហើយ ដើម្បីដោះស្រាយជាមួយកូរ៉េខាងជើង ដោយគ្មានចិននៅក្នុងករណីចាំបាច់ ហើយដែលពាក្យនេះលោកក៏ធ្លាប់និយាយដែរ មុននឹងបញ្ជាឱ្យបើកការវាយប្រហារ លើស៊ីរីកាលពីសប្ដាហ៍មុន។ នេះបើតាមការចេញផ្សាយដោយសារព័ត៌មាន Channel News Asia។
លោក ត្រាំ បានសរសេរនៅលើ Twitter ដូច្នេះថា៖ «កូរ៉េខាងជើង កំពុងរករឿងដាក់ខ្លួនឯង (…) បើសិនជាចិនសម្រេចចិត្តថា ព្រមជួយវាគឺរឿងល្អបំផុត ក៏ប៉ុន្តែបើពួកគេ មិនជួយក៏មិនអីដែរ យើងនឹងដោះស្រាយបញ្ហាដោយគ្មានពួកគេ។ ម្យ៉ាងវិញទៀត ខ្ញុំក៏បានពន្យល់ប្រាប់ប្រធានាធិបតីចិនហើយដែរ (លោក ស៊ី ជិនពីង)ថា កិច្ចព្រមព្រៀង ពាណិជ្ជកម្មជាមួយសហរដ្ឋអាមេរិកនឹងល្អប្រសើរសម្រាប់ទីក្រុងប៉េកាំង បើសិនជាព្រមជួយយើងដោះស្រាយបញ្ហាកូរ៉េខាងជើង»។
លោក ដូណាល់ ត្រាំ បានបញ្ជាក់ថា សហរដ្ឋអាមេរិកមិនស្ទាក់ស្ទើរជាដាច់ខាតក្នុងការប្រើប្រាស់កម្លាំងយោធាលើកូរ៉េខាងជើង បើសិនវាចាំបាច់ត្រូវ តែធ្វើវាមែននោះ៕
មហាសង្ក្រាន្តឆ្នាំថ្មី ឆ្នាំរកា នព្វស័ក ពុទ្ធសករាជ២៥៦១ គ្រឹស្ដសករាជ ២០១៧ មហាសករាជ ១៩៣៩ ចុល្លសករាជ១៣៧៩ នឹងចូលមកដល់ នៅរយៈពេលដ៏ខ្លីខាងមុខនេះ ពោលនៅថ្ងៃសុក្រ ៣រោច ខែចេត្រ ត្រូវនឹងថ្ងៃទី១៤ ខែមេសា គ.ស.២០១៧ វេលាម៉ោង០៣៖១២នាទីទៀបភ្លឺ។
សុភមស្តុ ! វរមង្គលាជយាតិរេក
ព្រះពុទ្ធសករាជ ព្រះសាសនា អតិកន្តាកន្លងទៅហើយបាន២៥៦០ ត្រឹមថ្ងៃ១៥កើត ខែពិសាខ លុះដល់ថ្ងៃ១រោច ខែពិសាខ ឆ្នាំរកា នព្វស័កតទៅចូលពុទ្ធសករាជ២៥៦១ ។នឹងគណនាឆ្នាំរកាឥឡូវនេះ សង្ក្រាន្តចូលមកដល់នៅថ្ងៃសុក្រ ៣រោច ខែចេត្រ ត្រូវនឹងថ្ងៃទី១៤ ខែមេសា គ.ស ២០១៧ វេលាម៉ោង០៣និង១២នាទី ។
ពេលនោះព្រះអាទិត្យចេញពីមីនរាសី ទៅឋិតនៅឯមេសរាសីតាមផ្លូវគោវិថី គឺផ្លូវកណ្តាល ទើបមានទេវធីតាមួយព្រះអង្គជាមគ្គនាយិកាព្រះនាម កិមិរាទេវី ជាបុត្រីទី៦នៃកបិលមហាព្រហ្ម ទ្រង់គង់នៅចាតុម្មហារាជិកា ទ្រង់អម្ពរពណ៌សេត លំអនៅព្រះកាណ៌ដោយបុប្ផា ចង្កូរណី អភរណៈកែវបុស្សរាគ័ម ភក្សាហារទ្រង់ចេកណាំវ៉ា ព្រះហស្តស្តាំទ្រង់ព្រះខ័ឌ្ព ព្រះហស្តឆ្វេងទ្រង់ពិណ ទ្រង់គង់ផ្ទំបិទព្រះនេត្រលើខ្នងមហឹង្សា(សត្វក្របី)ជាពាហនៈ រួចនាំអស់ទេវបុត្រ ទេវធីតាទាំងមួយសែនកោដិហោះទៅកាន់គុហាកែវធម្មាលីនាទីភ្នំកៃលាស ខេត្តហិមពា្តជាទីតម្កល់ទុកនូវព្រះសិរសាកបិលមហាព្រហ្ម ដែលតម្កល់លើពានមាសនាំមកដង្ហែប្រទក្សិណភ្នំព្រះសុមេរុរាជតាមផ្លូវព្រះអាទិត្យចរចំនួន៦០នាទី (២៤ម៉ោង) ទើបនាំយកទៅតម្កល់ទុកកន្លែងដើមវិញ ហើយប្រជុំទេវបុត្រ ទេវធីតាទាំងមួយសែនកោដិ ចូលទៅស្រង់ទឹកអានោតត្តមហាស្រះ ដែលមានទឹកហូរចេញពីបំពង់ថ្មកែវ ដែលជាមាត់គោឧសភរាជទាំង៧ត្រជាក់ក្សេមក្សាន្តក្នុងព្រះរាជហប្ញទ័យ ហើយនាំគ្នាចូលទៅសមាទានរក្សាសីលដោយសោមនស្សរីករាយគ្រប់ព្រះអង្គក្នុងភគវតីសភាសាលា ដែលវិស្សកម្មទេបុត្រនិមិត្តថ្វាយដើម្បីបន្ទោបង់អពមង្គលឲ្យជ្រះស្រឡះ ហើយចម្រើននូវសិរីសួស្តី ជ័យមង្គល ជន្មាយុយឺនយូរដល់ទេវតា និងមនុស្សសត្វផងទាំងឡាយតាំងពីឆ្នាំថ្មីចូលមកដល់នេះ បានធូរទូលំទូលាយ សុខក្សេមក្សាន្តតរៀងទៅ ។
ថ្ងៃសុក្រ ៣រោច ខែចេត្រ ត្រូវនឹងថ្ងៃទី១៤ ខែមេសា គ.ស២០១៧ វេលាម៉ោង០៣និង១២នាទី ជាថ្ងៃចូលឆ្នាំរកា នព្វស័ក (ជាវារៈមហាសង្ក្រាន្ត) ។
ថ្ងៃសៅរ៍ ៤រោច ខែចេត្រ ត្រូវនឹងថ្ងៃទី១៥ ខែមេសា គ.ស២០១៧ ជាវារៈវ័នបត ។
ថ្ងៃអាទិត្យ ៥រោច ខែចេត្រ ត្រូវនឹងថ្ងៃទី១៥ ខែមេសា គ.ស២០១៧ នៅវេលាម៉ោង០៦និង៤៦នាទី៤៨វិនាទី ជាវារៈឡើងស័ក គម្រប់ជាសង្ក្រាន្ត៣ថ្ងៃស្រេចបរិបូណ៌ចូលជាសកលឆ្នាំរកា នព្វស័ក ចុល្លសករាជ១៣៧៩ និងមហាសករាជ១៩៣៩តទៅ ។
នៅក្នុងឱកាសសង្ក្រាន្តទាំង៣ថ្ងៃ សូមអស់ប្រជាពលរដ្ឋប្រុសស្រីផងទាំងឡាយរៀបចំពលីការគ្រឿងសក្ការៈបូជាអុជប្រទីបជ្វាលាថ្វាយព្រះរតនត្រ័យ និងទទួលស្វាគមន៍ទេវបុត្រ ទេវធីតាឆ្នាំថ្មី ហើយខំលះបង់ចិត្តអាក្រក់អន្យតិរ្ថីយ៍ជាចិត្តអប្រីយ៍ជាប់ដោយគំនុំគុំកួន ព្យាបាទ ឈ្នានីសដែលមានក្នុងឆ្នាំចាស់ឲ្យជ្រះស្រឡះ តាំងចិត្តប្រព្រឹត្តល្អប្រកបដោយមេត្តា ករុណា មុទិតា ឧបេក្ខា និងបញ្ញា ធ្វើបុណ្យសុន្ទរ៍ទានតាមប្រពៃណី រក្សាសីល៥ឲ្យបានជាប់ជានិច្ច នោះទើបទេវតានឹងឲ្យពរសព្ទសាធុការ លោកអ្នកនឹងមានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ ។
រណ្តាប់ទទួលទេវតា ៖
រណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះមួយសម្រាប់តាំងគ្រឿងពលីការផ្សេងៗ ។ ត្រូវរៀបក្រាលសំពត់ពណ៌ស ហើយរៀបចំនូវគ្រឿងសក្ការៈបូជាទេវតា មានជាអាទិ៍ បាយសី៩ថ្នាក់១គូ បាយសី៧ថ្នាក់១គូ បាយសី៥ថ្នាក់១គូ បាយសី៣ថ្នាក់១គូ បាយសីប៉ាឆាម១គូ ស្លាធម៌១គូ ទឹកអប់១គូ (ទៀន៥ ធូប៥) លាជ៥ ផ្កា៥ ដាក់លើជើងពាន១គូ ចេកនួន ចេកណាំវ៉ា ដាក់លើជើងពាន១គូ ផ្លែឈើ១១មុខ រៀបចំដាក់លើជើងពាន១១គូ ដូងឡៅ១គូ ទឹកស្អាត២កែវ ។ ស្រេចហើយនៅវេលាម៉ោងដែលទេវតាចុះមក ត្រូវជួបប្រជុំក្រុមគ្រួសារដើម្បីថ្វាយបង្គំព្រះ នមស្សការព្រះរតនត្រ័យ សមាទានសីល ហើយតាំងចិត្តឲ្យស្អាតបរិសុទ្ធជ្រះស្រឡះនូវមន្ទិលទាំងពួង តម្កល់ចិត្តរំពឹងគិតទៅលើព្រះពុទ្ធ ព្រះធម៌ ព្រះសង្ឃជាទីពឹង ទីរឮក លុះចប់ពិធីទទួលទេវតា ។
ទំនាយប្រចាំឆ្នាំ ៖
កេណ្ឌព្រះពិរុណសាស្ត្រ ៖ ឆ្នាំនេះភពអង្គារ ជាអធិបតី ដឹកនាំផ្លូវទៅសុំទឹកភ្លៀងពីស្តេចនាគ ហើយបាននាគ៤បង្អុរទឹកភ្លៀងចំនួន៣០០មេ ដែលចែកចេញជា ៖ -ចក្រវាឡ១២០មេ -ព្រៃហិមពាន្ត៩០មេ -មហាសមុទ្រ៦០មេ និងជម្ពូទ្វីបមនុស្សលោកយើងមានចំនួន៣០មេ បណ្តាលឲ្យមានទឹកភ្លៀងដើមឆ្នាំតិច កណ្តាលឆ្នាំភ្លៀងមធ្យម និងចុងឆ្នាំភ្លៀងច្រើន ។
កេណ្ឌធារាទិគុណ ៖ ឆ្នាំនេះមានកេណ្ឌ(៣) ត្រូវត្រង់វាយោធាតុចុះ ទំនាយថា មិនក្តៅ មិនត្រជាក់ មានខ្យល់ព្យុះខ្លាំងៗជាច្រើនអាចកើតហេតុល្អ អាក្រក់អំពីខ្យល់ ។
ទំនាយទឹកទន្លេ ៖ ឆ្នាំនេះទំនាយអំពីទឹកទន្លេមានសំណល់០(សូន្យ) ទំនាយថា ទឹកទន្លេ បឹងបួរ ទឹកជំនន់ដោយទឹកភ្លៀងមានចំនួនច្រើនណាស់ ច្រើនលើសអស់ឆ្នាំទាំងពួង ។
កេណ្ឌធញ្ញាហារ ៖ ឆ្នាំនេះមានកេណ្ឌ(៥) មានឈ្មោះថា វិបត្តិ ទំនាយថា ស្រូវ សំណាប ស្រែចម្ការនឹងកើតមានកិមិជាតិ ដង្កូវ ក្រា សត្វល្អិតបំផ្លាញ និងបានផលពាក់កណ្តាល ខូចខាតអស់ពាក់កណ្តាល ភោជនាហារបានផលជាមធ្យម ។ ស្រុកទេសអាចនឹងមានកល្លិយុគយុទ្ធសង្គ្រាម ។ ប្រជានុរាស្ត្រមានសេចក្តីសុខខ្លះ ទុក្ខខ្លះស្មើគ្នា ។
ទំនាយការធ្វើស្រែ៖ ទំនាយកេណ្ឌការធ្វើស្រែមានសេស(៦)ទំនាយថា ស្រែដីទំនាប និងស្រែដីទួលគ្រប់ទីកន្លែងបានផលល្អដូចគ្នាទាំងពីរយ៉ាង ។
កេណ្ឌព្រឹក្សា ៖ ឆ្នាំនេះត្រូវចំសេស៤ ត្រូវត្រង់ដើមពោធិ៍បាយ ជាស្តេច មានទំនាយថា មនុស្សផងទាំងឡាយនឹងមានកល្លិយុគ ។
កេណ្ឌព្រះអាទិត្យ ៖ ឆ្នាំនេះយានជំនិះរបស់ព្រះអាទិត្យ គឺសត្វដំរី ទំនាយថា ភ្លើងកាចសាហាវ ស្រុកនាមនាគធ្វើយុទ្ធសង្គ្រាមនឹងស្រុកនាមគ្រុឌ និងនាមកណ្តុរ ។
ទំនាយតាមថ្ងៃសង្ក្រាន្ត ៖
ទំនាយថ្ងៃមហាសង្ក្រាន្ត ៖ ថ្ងៃចូលឆ្នាំដែលជាថ្ងៃទី១ ត្រូវនឹងថ្ងៃសុក្រ ទំនាយថា ឆ្នាំនេះស្រូវអង្ករ សណ្តែក ល្ង ផលដំណាំទាំងឡាយបានផលបរិបូណ៌ ទឹកភ្លៀង ព្យុះច្រើន ប៉ុន្តែនឹងចាញ់កូនខ្ចី កូនតូច ។ កើតមានរោគឈឺភ្នែក មនុស្សនឹងស្លាប់ព្រោះជំងឺច្រើន ។
ទំនាយថ្ងៃវ័នបត ៖ ថ្ងៃកណ្តាល ត្រូវនឹងថ្ងៃសៅរ៍ ទំនាយថា ឆ្នាំនេះស្រូវអង្ករ សណ្តែក ល្ង ផលដំណាំ ត្រីសាច់នឹងមានតម្លៃ សាមណៈជីព្រហ្មណ៍នឹងក្តៅក្រហាយចិត្តច្រើនជាអនេក ។
ទំនាយថ្ងៃឡើងស័ក ៖ ថ្ងៃចុងក្រោយត្រូវនឹងថ្ងៃអាទិត្យ ទំនាយថា ឆ្នាំនេះព្រះមហាក្សត្រនឹងរុងរឿងដោយមានតេជានុភាព និងមានជ័យជម្នះលើពពួកសត្រូវគ្រប់ទិសានុទិស ទោះបីប្រទេសធ្លាក់ក្នុងយុទ្ធសង្គ្រាមនឹងបច្ចាមិត្រយ៉ាងណានឹងមានជ័យជម្នះគ្រប់ពេលវេលា ។
(រៀបរៀងដោយឯកឧត្តម អ៊ឹម បុរិន្ទ អគ្គលេខាធិការរងគណៈកម្មាធិការជាតិរៀបចំបុណ្យជាតិ អន្តរជាតិ និងជាគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ)
រាជធានីភ្នំពេញ៖បុរសជនជាតិម្នាក់ត្រូវខ្សែភ្លើងឆក់ស្លាប់ភ្លាមៗនៅនឹងកន្លែង គ្រាដែលតខ្សែភ្លើងម៉ូទ័របូមទឹកទុកលេងពេលចូលឆ្នាំ ដែលហេតុការណ៍នេះកើតឡើងកាលពីវេលាម៉ោង៤ និង១០នាទីល្ងាច ថ្ងៃទី១០ ខែមេសា ឆ្នាំ២០១៧ នៅចំណុចមុខវត្តព្រែកតាគង់ ស្ថិតក្នុងសង្កាត់ព្រែកតាសេក ខណ្ឌជ្រោយចង្វា។
សមត្ថកិច្ចបានឲ្យដឹងថា ជនរងគ្រោះមានឈ្មោះ ចៅ លាប ភេទប្រុស អាយុ៦០ឆ្នាំ ជនជាតិវៀតណាម មុខរបរនេសាទត្រី ស្នាក់នៅភូមិកើតហេតុខាងលើ។ សមត្ថកិច្ចបញ្ជាក់ថា នៅមុនពេលកើតហេតុជនរងគ្រោះបានទៅតខ្សែភ្លើងចេញពីម៉ូទ័រក្នុងផ្ទះចុះទៅបូមទឹកនៅក្នុងទន្លេ ដើម្បីដាក់ក្នុងពៀងក្នុងឲ្យបងប្អូនលេងពេលចូលឆ្នាំ ស្រាប់តែខ្សែភ្លើងដែលតនោះ មានដាច់ ហើយក៏បានឆក់ស្លាប់ដួលទៅក្នុងទឹកតែម្នាក់ឯង។
ក្រោយពីកើតហេតុសមត្ថកិច្ចជំនាញបានចុះទៅដល់ រួចក៏បានធ្វើកោសវិច័យពិនិត្យទៅឃើញថា ជនរងគ្រោះពិតជាឆក់ខ្សែភ្លើងស្លាប់ពិតប្រាកដមែន ហើយក៏បានប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕
វ៉ាស៊ីនតោន៖ប៉ូលិសនៅក្នុងតំបន់បាននិយាយថា គ្រូបង្រៀនម្នាក់ និងក្មេងប្រុសអាយុ០៨ឆ្នាំម្នាក់ស្លាប់បាត់បង់ជីវិត ខណៈក្មេងពីរនាក់ទៀតបានរងរបួសធ្ងន់ បន្ទាប់ពីខ្មាន់កាំភ្លើងម្នាក់បានបើកការបាញ់រះនៅសាលាបឋមសិក្សាមួយកន្លែងស្ថិតនៅក្នុងទីក្រុង San Bernardino នៃរដ្ឋ California។ នេះបើយោងតាម សារព័ត៌មាន Channel News Asia។
ប៉ូលិសបន្តថា បុរសជាខ្មាន់កាំភ្លើងឈ្មោះថា Cedric Anderson មានអាយុ៥៣ឆ្នាំ និងជាអ្នករស់នៅក្នុងតំបន់ ហើយក៏ជាអតីតប្ដីរបស់អ្នកគ្រូម្នាក់ឈ្មោះ Karen Elaine Smith អាយុ៥៣ឆ្នាំ។ ប្រភពដដែលបញ្ជាក់ថា ក្រោយពីធ្វើសកម្មភាពរួច ខ្មាន់កាំភ្លើងក៏បានបាញ់សម្លាប់ផងដែរ។
ទោះបីយ៉ាងណាប៉ូលិសមិនទាន់បានបញ្ជាក់ នៅឡើយទេពីហេតុផលនៃការបាញ់ប្រហារនេះ គ្រាដែលសន្តិសុខក៏បាននិងកំពុងរឹតបន្តឹងសន្តិសុខនៅឯសាលាបឋមសិក្សា North Park Elementary Schoolនេះផងដែរ៕
ខេត្តកណ្តាល៖បុរសម្នាក់សង្ស័យស្រវឹងស្រាទៅដេកលើថ្នល់រថភ្លើង ត្រូវរថភ្លើងកិនដាច់ក្បាលស្លាប់យ៉ាងអាណោចអាធ័ម ដែលហេតុការណ៍នេះកើតឡើងនៅវេលាម៉ោង២ និង៤០នាទីរំលងអធ្រាត្រ ឈានចូលថ្ងៃទី១១ ខែមេសា ឆ្នាំ២០១៧ នៅចំណុចផ្លូវរថភ្លើង ស្ថិតក្នុងភូមិអង្គខ្លើរ ឃុំត្បែង ស្រុកកណ្តាលស្ទឹង ខេត្តកណ្តាល។
ប្រភពពត៌មានពីមិត្តភក្តិរបស់ជនរងគ្រោះបានអោយដឹងថា មុនពេលកើតហេតុ ពួកគេនាំគ្នាហូបស្រា ដល់ពេលស្រវឹង ជនរងគ្រោះក៏ទៅដេកលេងនៅចំណុចកើតហេតុ រហូតដល់ដេកលក់ជ្រុលភ្លេចខ្លួនក៏ត្រូវរថភ្លើងកិនដាច់ក្បាលស្លាប់បែបនេះតែម្តង លុះដល់វេលាម៉ោង៦និង៣០នាទីព្រឹក ថ្ងៃទី១១ ខែមេសា ឆ្នាំ២០១៧ ទើបប្រជាពលរដ្ឋប្រទះឃើញសាកសព។ ប្រភពដដែលបានអោយដឹងដែរថា ជនរងគ្រោះមានឈ្មោះ លី សុខជា ភេទ ប្រុស អាយុ៣៥ឆ្នាំ បច្ចុប្បន្នរស់នៅភូមិត្បូងក្តី ឃុំបារគូ ស្រុកកណ្តាលស្ទឹង ខេត្តកណ្តាល។
ក្រោយកើតហេតុសមត្ថិច្ចមូលដ្ឋានបានចុះទៅពិនិត្យសាកសពនៅកន្លែងកើតហេតុនិងរៀបចំឯកសារប្រគល់សាកសពអោយក្រុមគ្រួសារជនរងគ្រោះយកទៅធ្វើបុណ្យតាមប្រពៃណី៕
រាជធានីភ្នំពេញ៖លោក យ៉ែម បុញ្ញឬទ្ធិ អ្នកនាំពាក្យគណបក្ស សង្គ្រោះជាតិ បានថ្លែងអះអាងថា ស្ដ្រីម្នាក់ ឈ្មោះ សំ សុខា ដែលបានយកទ្រនាប់ជើង គប់រូបសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្ដេចចក្រី ហេង សំរិន ប្រធានរដ្ឋសភា មិនមែនជាសកម្មជនគណបក្សសង្គ្រោះជាតិនេះទេ។
អ្នកនាំពាក្យរូបនោះអះអាងថា គណបក្សសង្គ្រោះជាតិ តែងតែប្រកាសជំហរ ចូលរួមក្នុងការ បោះឆ្នោតដោយសន្ដិវិធី។ លោកបន្តថា លោកមិនបានដឹងរឿងនេះទេ ហើយក៏មិនដែលឃើញឈ្មោះស្ត្រីម្នាក់ ហ្នឹងនៅក្នុងបញ្ជី របស់គណបក្សសង្គ្រោះជាតិទេ៕
ម៉ានីល៖ប្រធានាធិបតីហ្វីលីពីនលោក រ៉ូទ្រីហ្គោ ឌូទើតេ ថ្លែងកាលពីម្សិលមិញថា លោកបានបញ្ជាឲ្យយោធាពង្រឹងការគ្រប់គ្រងតំបន់មានជម្លោះនៅសមុទ្រចិនខាងត្បូងដែលស្ថិតនៅជាកម្មសិទ្ធិរបស់ហ្វីលីពីន ហើយបញ្ជាក់ជាមួយចិនថា មិនបង្កភាពតានតឹងផ្នែកអាវុធនោះទេ។
លោក ឌូទើតេ ថ្លែងថា ហ្វីលីពីនចង់រក្សាសន្តិភាពនិងមិត្តភាពជាមួយចិន ប៉ុន្តែថាប្រទេសរបស់លោកត្រូវការពារដែនអធិបតេយ្យភាពនៅតំបន់មានជម្លោះនៅកោះស្ព្រាតលី ខណៈប្រទេសផ្សេងៗកំពុងដណ្តើមគ្នាកាន់កាប់យកដែនកោះនិងថ្មប៉ប្រះទឹកនៅតំបន់នោះ។ លោក ឌូទើតេ បញ្ជាក់ថា លោកបញ្ជាឲ្យមានការកាន់កាប់លើកោះប្រមាណចំនួន១០ ឬ៩ប៉ុណ្ណោះ ដែលកោះទាំងនោះនៅជិតឆ្នេរដើម្បីពង្រឹងការគ្រប់គ្រងភូមិសាស្ត្រ។
គួរបញ្ជាក់ថា ប្រធានាធិបតីហ្វីលីពីនបានបញ្ជាឲ្យទាហានរបស់លោកទៅគ្រប់គ្រងកន្លែងមានជម្លោះនៅសមុទ្រចិនខាងត្បូង ហើយរូបលោកផ្ទាល់នឹងទៅត្រួតពិនិត្យកន្លែងនៅថ្ងៃបុណ្យឯករាជ្យជាតិនៅក្នុងខែមិថុនាខាងមុខ៕
ខេត្តព្រៃវែង៖ដោយអំណាចតណ្ហាបុរសជាឪពុកបានចាប់រំលោភកូនស្រីបង្កើតខ្លួនឯងជាច្រើនដងចាប់ពីអាយុ១៧ឆ្នាំរហូតមកឥលូវ ម្តាយឈឺចាប់ក្តៅស្ទើរបែកដើមទ្រូងសម្រេចចិត្តសមត្ថកិច្ចចាប់ខ្លួន។ ករណីឃាត់ខ្លួនបុរសខាងលើបានធ្វើឡើងនៅថ្ងៃទី១០ ខែមេសា ឆ្នាំ២០១៧ វេលាម៉ោង១១ និង៣០នាទីដោយទទួលបានពាក្យបណ្តឹងពីឈ្មោះ ឯម អ៊ាន ភេទស្រីអាយុ៤០ឆ្នាំ ត្រូវជាម្តាយបង្កើតរបស់ជនរងគ្រោះ។
ឪពុកល្មោមកាមរូបនេះឈ្មោះ ម៉ៅ នី អាយុ៣៦ឆ្នាំ ចំណែកកូនស្រីរងគ្រោះឈ្មោះ ម.អ អាយុ១៩ឆ្នាំ រស់នៅភូមិ ព្រៃធំឃុំ ស្មោងខាងត្បូង ស្រុកកំចាយមារ ខេត្តព្រៃវែង។
តាមពាក្យបណ្តឹងបានរៀបរាប់ថា ឈ្មោះ ម៉ៅ នី អាយុ៣៦ឆ្នាំត្រូវជាប្តី និងឪពុកបានចាប់រំលោភសេពសន្ថវៈកូនស្រីបង្កើតខ្លួនឯងអស់រយៈពេលជាង២ឆ្នាំចាប់ពី២០១៥ជាច្រើនលើករហូតដល់ថ្ងៃទី០៧ ខែ មេសា ឆ្នាំ២០១៧ជាថ្ងៃចុងក្រោយនៅប្រទេសថៃពេលធ្វើសកម្មភាពម្តងៗតែងតែគំរាមមកកូនកុំឲ្យនិយាយប្រាប់ម្តាយ។
បច្ចុប្បន្នជនសង្ស័យត្រូវបានឃាត់ខ្លួនតាមបញ្ជារបស់លោកព្រះរាជអាជ្ញា និងកសាងសំណុំរឿងចាត់តាមនីតិវិធីច្បាប់៕
រាជធានីភ្នំពេញ៖ក្រសួងមហាផ្ទៃបានឲ្យដឹងថា នឹងបណ្តេញនាយរងប៉ុស្តិ៍ច្រកទ្វារអន្តរជាតិ ប៉ោយប៉ែត លោក ឈាន ពិសិដ្ឋ ពីក្របខណ្ឌមន្ត្រីនគរបាលជាតិ ហើយថានឹងចាប់យកទៅផ្តន្ទាទោសតាមច្បាប់។
លោក ខៀវ សុភ័គ អ្នកនាំពាក្យក្រសួងមហាផ្ទៃ ថ្លែងថា ក្រសួងមហាផ្ទៃកំពុងប្រជុំ និងពិនិត្យមើលឯកសារនិងភស្តុតាងមួយចំនួន ដែលលោក ឈាន ពិសិដ្ឋ បានបាញ់លើលោក សេម មករា កាលពីថ្ងៃទី៩មេសា ។ លោកថា ក្រោយពីប្រជុំ លោក ពិសិដ្ឋ នឹងត្រូវបណ្តេញចេញពីក្របខណ្ឌនគរបាលជាតិ និងស្វែងរកបុគ្គលរូបនោះយកទៅផ្តន្ទាទោសតាមច្បាប់។
យ៉ាងណាក៏ដោយ លោក ខៀវ សុភ័គ បានបង្ហើបថា សមត្ថកិច្ចបានដឹងពីតម្រុយខ្លះៗ ដែលលោក ពិសិដ្ឋ លាក់ខ្លួនខ្លះហើយ ហើយនឹងបើកប្រតិបត្តិការនាំខ្លួនមកផ្តន្ទាទោសតាមច្បាប់៕
ដោយ៖ប៉ែន សុផល
បាត់ដំបង៖ស្ត្រីភវ័យក្មេងម្នាក់ត្រូវបានម្ចាស់ផ្ទះឃើញអង្គុយស្លាប់យ៉ាងអាណោចអាធម៌នៅក្នុងបន្ទប់ផ្ទះជួលសង្ស័យជាករណីខ្យល់គរ។ ហេតុការណ៍គួរអោយភ្ញាក់ផ្អើលខាងលើនេះបានកើតឡើងនៅវេលាម៉ោង២០ និង២០នាទី ថ្ងៃទី៩ ខែមេសា ឆ្នាំ២០១៧ នៅក្នុងបន្ទប់ផ្ទះជួល ស្ថិតត្រង់ចំណុចក្រុមទី៣ ភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង។
សមត្ថកិច្ចនៅមូលដ្ឋានបានប្រាប់ថា៖ជនរងគ្រោះខាងលើមានឈ្មោះ រិន មករា ភេទស្រី អាយុ២៩ឆ្នាំរស់នៅក្រុមទី៣៣ភូមិព្រែកមហាទេព្យ សង្កាត់ ស្វាយប៉ោ ក្រុងបាត់ដំបង។
ក្រោយពេលកើតហេតុសមត្ថកិច្ចនិងក្រុមគ្រូពេទ្យបានចុះទៅដល់ពិនិត្យនិងធ្វើកោសលវិច្ច័យ ឃើញថា ជនរងគ្រោះអាចនិងខ្យល់គហើយរអិលអុកគូថបណ្តាលអោយស្លាប់តែម្តង។
បច្ចុប្បន្នសពជនរងគ្រោះត្រូវបានសមត្ថកិច្ចប្រគល់អោយទៅបងប្អូនក្រុមគ្រួសារយកធ្វើបុណ្យតាមប្រពៃណី៕
ខេត្តកំពង់ចាម៖ករណីក្រុមប្លន់អ្នកលក់មាសអស់ជិត២ម៉ឺនដុល្លារ នៅផ្សារធំថ្មី ក្នុងក្រុងកំពង់ចាម និងប្លន់ជាច្រើនលើកទៀត នៅតាមបណ្ដាខេត្តនោះ ឥឡូវនេះសមត្ថកិច្ច បានតាមប្រមាញ់ចាប់ខ្លួនជនសង្ស័យម្នាក់ទៀត។
សមត្ថកិច្ចបញ្ជាក់ថា ជនសង្ស័យដែលសមត្ថកិច្ចចាប់បានសរុបចំនួន៦នាក់ ទី១-ឈ្មោះ ពៅ សំអឿន ភេទប្រុស អាយុ៣៥ឆ្នាំ នៅភូមិវែង សង្កាត់ពន់សាំង ខ័ណ្ឌព្រែកប្រា រាជធានីភ្នំពេញ, ទី២-ឈ្មោះ សុខ ស៊ីនួន ភេទប្រុស អាយុ៥៧ឆ្នាំ នៅភូមិនាងគង្ហីង សង្កាត់សំបូរមាស ក្រុងកំពង់ចាម, ទី៣-ឈ្មោះ ស្រី សំអឿន ភេទប្រុស អាយុ៤៧ឆ្នាំ នៅភូមិ២៣ សង្កាត់បឹងកក់២ រាជធានីភ្នំពេញ, ទាំង៣នាក់នេះ ចាប់ខ្លួនបាននៅខេត្តសៀមរាប កាលពីថ្ងៃទី១០ ខែកុម្ភៈ ឆ្នាំ២០១៧។ ចំណែកស្រីឈ្មោះ សុខ វណ្ណី ហៅភិន ភេទស្រី អាយុ៤៧ឆ្នាំ ស្នាក់នៅផ្ទះជួលមុខវត្តឈូកវ៉ា សង្កាត់គោករការ ខណ្ឌព្រែកព្នៅ រាជធានីភ្នំពេញ ត្រូវចាប់ខ្លួនបាននៅរាជធានីភ្នំពេញ កាលពីថ្ងៃទី១៤ ខែកុម្ភៈ ឆ្នាំ២០១៧ និងបក្សពួក២នាក់ទៀត ឈ្មោះ សួង អេង ហៅញ ភេទប្រុស អាយុ៤៤ឆ្នាំ នៅឃុំលើកដែក ស្រុកកោះធំ ខេត្តកណ្ដាល និងឈ្មោះ ញែម យី ភេទប្រុស អាយុ៤៧ឆ្នាំ នៅឃុំមហាខ្ញូង ស្រុកកោះសូទិន ខេត្តកំពង់ចាម ចាប់ខ្លួននៅថ្ងៃទី៨ ខែមេសា ឆ្នាំ២០១៧៕
ខេត្តកំពង់ស្ពឺ៖ស្នងការនគរបាលខេត្តកំពង់ស្ពឺ បានអះអាងប្រាប់អ្នកសារព័ត៌មានថា កម្លាំងនគរបាលខេត្តកំពង់ស្ពឺ កំពុងតាមចាប់ស្ត្រីជាសកម្មជនបក្សប្រឆាំង ដែលបានប្រមាថរូបមេដឹកនាំកំពូល របស់គណបក្សប្រជាជនកម្ពុជា ហើយបានបង្ហោះនៅលើបណ្តាញហ្វេសប៊ុក។
ឧត្តមសេនីយ៍ សម សាមួន ស្នងការខេត្តបានអំពាវនាវដល់ប្រជាពលរដ្ឋ ប្រសិនបានឃើញស្ត្រី ដែលប្រមាថថ្នាក់ដឹកនាំខាងលើរូបនោះ សូមជួយឃាត់ខ្លួន ឬរាយការណ៍មកកាន់សមត្ថកិច្ចភ្លាមៗ ដើម្បីសមត្ថកិច្ចនាំខ្លួនស្ត្រីនោះ មកចាត់ការតាមនីតិវិធីនៃច្បាប់។ លោកថា ការតាមចាប់ស្ត្រីរូបនោះគឺ បន្ទាប់ពីតុលាការបង្គាប់ឲ្យស្ត្រី ជាសកម្មជនបក្សប្រឆាំង ចូលខ្លួនមកបំភ្លឺ នៅស្នងការនគរបាលខេត្តកំពង់ស្ពឺស្ត្រីរូបនោះបានគេចខ្លួន។
សូមជម្រាបថា ព្រះរាជអាជ្ញាអមសាលាដំបូងខេត្តកំពង់ស្ពឺ លោក កែវ សុធា បានចេញដីកាកោះហៅ ស្ត្រីសកម្មជនគណបក្សប្រឆាំង ឈ្មោះ សំ សុខា អាយុ៣៨ឆ្នាំ ស្នាក់នៅភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ឲ្យចូលខ្លួនឆ្លើយបំភ្លឺ នៅចំពោះមុខមន្ត្រីនគរបាលយុត្តិធម៌ នៃស្នងការដ្ឋាននគរបាលខេត្តកំពង់ស្ពឺ ឲ្យបានមុនថ្ងៃទី៨ ខែមិថុនា ឆ្នាំ២០១៧ ខាងមុខនេះ ពាក់ព័ន្ធនឹងបទប្រមាថ និងញុះញង់ឲ្យមានការរើសអើង៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
