រាជធានីភ្នំពេញ៖គណៈកម្មាធិការជាតិរៀបចំការបោះឆ្នោត (គ.ជ.ប) បានចេញគោលការណ៍សម្រាប់ប្រព័ន្ធផ្សព្វផ្សាយ មានទូរទស្សន៍ វិទ្យុ សារព័ត៌មាន ដែលចង់លក់ ឬជួលម៉ោងឲ្យគណបក្សនយោបាយផ្សព្វផ្សាយពីគោលនយោបាយ និងកម្មវិធីនយោបាយ អំឡុងពេលឃោសនាបោះឆ្នោត។
សូមអានគោលការណ៍របស់ គ.ជ.ប សម្រាប់ប្រព័ន្ធផ្សព្វផ្សាយ៖
ដោយ៖ប៉ែន សុផល
បាត់ដំបង៖កម្លាំងការិយាល័យប្រឆាំងគ្រឿងញៀនសហការជាមួយកម្លាំងអន្តរាគមន៍ប្រឆាំងបទល្មើសនៃស្នងការដ្ឋាននគរបាលខេត្តបាត់ដំបងបានចុះប្រតិបត្តិការបង្ក្រាបករណីលក់ចែកចាយគ្រឿងញៀនមួយករណីដោយឃាត់ខ្លួនជនសង្ស័យ២នាក់រួមនិងថ្នាំញៀនចំនួន៣ កញ្ចប់ទម្ងន់ស្មើរ៣២,៦៥ក្រាម។
លោក ស៊ាន សុណាល់ នាយការិយាល័យប្រឆាំងគ្រឿងញៀនខេត្តបានប្រាប់អោយដឹងនៅរសៀលថ្ងៃទី១៨ មេសានេះថា៖ក្នុងកិច្ចចុះប្រតិបត្តិការខាងលើនេះបានធ្វើឡើងនៅវេលាម៉ោង១៦-៤០នាទី ថ្ងៃទី១៧ ខែមេសា ឆ្នាំ២០១៧នៅចំណុចក្រុមទី៥ ស្ថិតក្នុងភូមិមោង ឃុំមោង ស្រុកមោងឬស្សី ខេត្តបាត់ដំបង។ លោកបន្តថា ជនសង្ស័យត្រូវបានឃាត់ខ្លួនមាន៖ ទី១ឈ្មោះ ឈួន ជំន្នោ ភេទប្រុស អាយុ២០ឆ្នាំ រស់នៅភូមិពាលញ៉ែក១ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។ ទី២ឈ្មោះ ណូត វណ្ណះ ភេទប្រុស អាយុ២២ឆ្នាំ រស់នៅភូមិមាន់ចែ ឃុំព្រៃញី ស្រុកសំពៅមាស ខេត្តពោធិ៍សាត់។
ចំពោះវត្ថុតាងដកហូតបានរួមមាន៖ ថ្នាំញៀនប្រភេទមេតំហ្វេតាមីន(ម៉ាទឹកកក)ចំនួន៣កញ្ចប់ទម្ងន់៣២,៦៥ក្រាម។ កូនជញ្ជីងសំរាប់ថ្លឹងថ្នាំញៀនចំនួន១។ ទូរស័ព្ទដៃចំនួន១គ្រឿង និងសម្ភារវិចខ្ចប់ថ្នាំញៀនលក់មួយចំនួនទៀត។
ជនសង្ស័យរួមនិងវត្ថុតាងត្រូវបានសមត្ថកិច្ចជំនាញការិយាល័យប្រឆាំងគ្រឿងញៀនកសាងសំណុំរឿងបញ្ជូនទៅតុលាការកាលពីរសៀលថ្ងៃទី១៨ ខែមេសា ឆ្នាំ២០១៧ដើម្បីចាត់ការបន្តទៅតាមនីតិវិធី៕
ខេត្តព្រៃវែង៖ព្រះចៅអធិការវត្ត និងអាជ្ញាធរចាប់ផ្សឹកព្រះសង្ឃមួយអង្គ បន្ទាប់ពីបានធ្វើសកម្មភាពលួងក្មេងស្រីទើបអាយុ៥ឆ្នាំយកទៅរំលោភបានសម្រេចនៅក្នុងព្រះវិហារ កាលពីថ្ងៃទី១៤ ខែមេសា ឆ្នាំ២០១៧វេលាម៉ោង១៥និង៣០នាទីរសៀល នៅចំណុចវត្តជ្រោយមានជ័យ នៅក្នុងព្រះវិហារខាងត្បូងរូបព្រះពុទ្ធ ស្ថិតនៅភូមិព្រែកក្រូច ឃុំព្រែកតាសរ ស្រុកពោធិ៍រៀង ខេត្តព្រៃវែង។
ជនសង្ស័យជាលោកនេនម្នាក់នេះ ឈ្មោះ មឿន លីហឿន អាយុ១៣ឆ្នាំ ស្នាក់នៅវត្តជ្រោយមានជ័យ នៅភូមិព្រែកក្រូច ឃុំព្រែកតាសរ ស្រុកពោធិ៍រៀង ខេត្តព្រៃវែង។
សមត្ថកិច្ចបានឲ្យដឹងថា នៅមុនពេលកើតហេតុក្មេងស្រីរងគ្រោះកំពុងលេងនៅរោងបុណ្យក្នុងវត្ត ហើយជនសង្ស័យបានឱ្យលុយចំនួន៥.០០០រៀលទៅទិញប៉េងប៉ោងយកមកផ្លុំលេង។ នៅពេលទិញប៉េងប៉ោងរួច ដោយមានបំណងចង់រួមភេទក៏ហៅក្មេងឡើងទៅក្នុងព្រះវិហារដែលជាកន្លែងស្ងាត់ រួចក៏ធ្វើសកម្មភាពយកដៃឆ្វេងរបស់ខ្លួនអង្អែលលើប្រដាប់ភេទក្មេងស្រីរងគ្រោះ ហើយភ្លាមៗនោះសង្ឃកំហូចនេះបានសើយស្បង់ជីពរ ដើម្បីចាប់ក្មេងស្រីនោះរំលោភ តែមិនបានសម្រេច ក៏យកចង្អុលដៃរុកបញ្ចូលក្នុងប្រដាប់ភេទក្មេងស្រី បណ្តាលឱ្យរហែកហូរឈាម ខណៈនោះដែលក្មេងស្រីរងគ្រោះឈឺ ក៏បានស្រែកយំ ហើយជនសង្ស័យក៏រត់គេចចេញពីកន្លែងកើតហេតុតែម្តង ។
លោកស្នងការរងបន្តថា ក្រោយពេលកើតហេតុអាជ្ញាធរ និងព្រះសង្ឃបានចាប់ផ្សឹកលោកនេនដែលជាជនសង្ស័យ។ ប៉ុន្តែដោយជនសង្ស័យនៅក្នុងវ័យអនីតិជន ទើបលោកឆ្លងយោបល់ព្រះរាជអាជ្ញាសិនមុននឹងបន្តនីតិវិធី។
ព្រះរាជអាជ្ញាអមសាលាដំបូងខេត្តព្រៃវែង បានប្រាប់អ្នកសារព័ត៌មានថា ក្នុងករណីនេះជនសង្ស័យនៅក្នុងវ័យ១៣ឆ្នាំជាអនីតិជន ហេតុនេះគឺពុំអាចឃុំឃាំងបានទេ គឺគ្រាន់តែធ្វើការអប់រំ ហើយឲ្យមានសេរីភាពវិញ៕
ដោយ៖ប៉ែន សុផល
ខេត្តបាត់ដំបង៖យោងរបាយការណ៍បូកសរុបរបស់ការិយាល័យចរាចរណ៍ខេត្តបាត់ដំបងបានអោយដឹងនៅថ្ងៃទី១៧ ខែមេសា ឆ្នាំ២០១៧នេះថា អំឡុងពិធីបុណ្យចូលឆ្នាំខ្មែររយៈពេល៣ថ្ងៃ ពោលគឺចាប់ពីថ្ងៃទី១៤ដល់ថ្ងៃទី១៦ ខែមេសា មានគ្រោះថ្នាក់ចរាចរណ៍កើតមានចំនួន១៥កណី នៅលើដងផ្លូវសំខាន់ៗជុំវិញខេត្ត ដែលក្នុងនោះបណ្តាលអោយមានមនុស្សស្លាប់ចំនួន១០នាក់ជាបុរស និងអ្នករងរបួសចំនួន១៩នាក់ផ្សេងទៀត។
ប្រភពខាងលើបញ្ជាក់អោយដឹងថា ចំនួនអ្នកស្លាប់ និងអ្នករងរបួសក្នុងអំឡុង៣ថ្ងៃនៃថ្ងៃបុណ្យចូលឆ្នាំ ឆ្នាំ២០១៧នេះមានការកើនឡើងរហូតដល់១០នាក់ធៀបនិងឆ្នាំចាស់អ្នកស្លាប់ត្រឹមតែ២នាក់ប៉ុណ្ណោះ ក្នុងនោះបង្ករមានលើស្រុកបវេល៣លើក ឯកភ្នំ៣លើក ស្រុកថ្មគោល២លើក មោងឬស្សី១លើក សង្កែ១លើក ស្រុកកំរៀង១លើក បាណន់១លើក រុក្ខគីរី១លើក ស្រុកសំឡូត១លើកនិងស្រុកសំពៅលូន១លើកក្នុងនោះដែរមានរថយន្តប្រភេទតូចចំនួន២គ្រឿង ម៉ូតូ២០គ្រឿងរងការខូចខាតធ្ងន់ធ្ងរ។
លោកវរសេនីយ៍ទោ សាត គឹមសាន្ត នាយការិយាល័យចរាចរណ៍ផ្លូវគោកនៃស្នងការនគរបាលខេត្តបាត់ដំបងបានអោយដឹងដែរថា កត្តាដែលបណ្តាលអោយកើតមាននូវការគ្រោះថ្នាក់ច្រើនករណីនេះបណ្តាលមកពីការបើកបរលើសល្បឿនកំណត់ និងប្រជាពលរដ្ឋខ្វះការយល់ដឹងពីច្បាប់ចរាចរណ៍ដោយបត់ឆ្វេង បត់ស្តាំ និងឡើងមកលើដងផងផ្លូវមិនមានការប្រុងប្រយ័ត្ន៕
ខេត្តរតនគិរី៖រថយន្តកែច្នៃមួយគ្រឿង ដឹកឈើសុក្រម បើករត់ចេញឃ្លាំងដំឡូងមីក្រៀម គេចចូលទៅលាក់ក្នុងចំការស្វាយចន្ទី ត្រូវសមត្ថកិច្ចរឹបអូសយកមកប្រគល់ឲ្យជំនាញរដ្ឋបាលព្រៃឈើ។ ហេតុការណ៍បង្ក្រាបនេះធ្វើឡើងដោយកម្លាំងការិយាល័យប្រឆាំងបទល្មើសសេដ្ឋកិច្ចស្នងការរដ្ឋាននគរបាលខេត្ត សហការជាមួយកម្លាំងកងរាជអាវុធហត្ថខេត្តបង្ក្រាបបាននៅវេលាម៉ោង ៩ និង៣០នាទី យប់ថ្ងៃទី១៧ ខែមេសា ឆ្នាំ២០១៧ នៅក្នុងចំការស្វាយចន្ទីមួយកន្លែងស្ថិតក្នុងភូមិ តាអង្គ២ ឃុំតាអង្គ ស្រុកកូនមុំខេត្តរតនគិរី។
សមត្ថកិច្ចបានឲ្យដឹងថា កម្លាំងនគបាលការិយាល័យប្រឆាំងបទល្មើសសេដ្ឋកិច្ច និងកម្លាំងកងរាជអាវុធហត្ថខេត្ត បានរុករកឃើញរថយន្តដឹកឈើនេះ ក្នុងចំការស្វាយចន្ទី ដោយគេបើកយកលាក់ទុកចោល មិនឃើញមានម្ចាស់ បន្ទាប់ពីមានសេចក្ដីរាយការណ៍មកថា មានរថយន្តកែច្នៃ ដឹកឈើចូលឃ្លាំងដំឡូងមីក្រៀម ហើយដឹងថាសភាពការមិនល្អ ក៏បើករត់ចេញពីឃ្លាំងដំឡូង យកទៅលាក់ក្នុងចំការស្វាយចន្ទីនៅក្បែរនោះស្ថិតក្នុងចំណុចខាងលើ។
ហើយឈើនៅលើរថយន្តកែច្នៃ ត្រូវសមត្ថកិច្ចឲ្យដឹងថា ជាប្រភេទឈើសុក្រម មានចំនួន ១៧ដុំ មិនទាន់ដឹងចំនួនម៉ែត្រគូបនោះទេ អាស្រ័យលើជំនាញធ្វើការវាស់វែង ក្រោយពេលសមត្ថកិច្ចប្រគល់ជូន។
ប្រភពបានឲ្យដឹងថា ឃ្លាំងស្តុកដំឡូងមី ដែលរថយន្តកែច្នៃដឹកឈើចូល ហើយបើករត់ចេញវិញនោះ ត្រូវគេសង្ស័យថា ជាកន្លែងដែលរថយន្តយីឌុបចូលដឹកដំឡូង តែងតែលួចបង្កប់ឈើជាយូរមកហើយ ប៉ុន្តែមិនដែលមានអ្នកដឹង ទើបតែនៅពេលយប់ថ្ងៃទី១៧ ខែមេសា ស្រាប់តែត្រូវគេប្រទះឃើញ ហើយរាយការណ៍ជូនសមត្ថកិច្ចទើបមានការបង្ក្រាបនេះឡើង៕
សេអ៊ូល៖តំណាងពិសេសរបស់កូរ៉េខាងជើងប្រចាំអង្គការសហប្រជាជាតិលោក Kim In Ryong បានព្រមានថា សង្គ្រាមនុយក្លេអ៊ែរ អាចនឹងផ្ទុះឡើងគ្រប់ពេលវេលាជាមួយសហរដ្ឋអាមេរិក នៅក្នុងករណីមានការវាយប្រហារណាមួយមកលើកូរ៉េខាងជើង។ នេះបើយោងតាមសារព័ត៌មាន CNN នៅព្រឹកថ្ងៃអង្គារ ទី១៨ ខែមេសា ឆ្នាំ២០១៧នេះ។
ថ្លែងនៅក្នុងសន្និសីទសារព័ត៌មាននៅ UN លោក Kim In Ryong បានចោទប្រកាន់ថា ភាពតានតឹងកើតឡើងដោយសារតែសហរដ្ឋអាមេរិក ដាក់ពង្រាយអាវុធយុទ្ធសាស្ត្រ នៅក្នុងសមយុទ្ធយោធាប្រចាំឆ្នាំជាមួយកូរ៉េខាងត្បូង និងបញ្ជូនកងនាវាចម្បាំងមកក្បែរតំបន់ឧបទ្វីបកូរ៉េ ដែលនេះគឺជាសកម្មភាពមួយត្រៀមឈ្លានពានកូរ៉េខាងជើង ព្រមទាំងធ្វើឱ្យតំបន់ឧបទ្វីបកូរ៉េ ស្ថិតនៅមាត់ជ្រោះនៃសង្គ្រាម។
លោកសង្កត់ធ្ងន់ថា សហរដ្ឋអាមេរិកបានបង្កឱ្យស្ថានភាពបច្ចុប្បន្នប្រែជាគ្រោះថ្នាក់ ហើយសង្គ្រាមនុយក្លេអ៊ែរ អាចនឹងផ្ទុះឡើងគ្រប់ពេលវេលា នៅក្នុងតំបន់ឧបទ្វីកូរ៉េ ដែលនេះនឹងគំរាមកំហែងដល់សន្តិសុខ និងសន្តិភាពពិភពលោកទាំងមូល កូរ៉េខាងជើងបានត្រៀមខ្លួនរួចស្រេចក្នុងការធ្វើសង្គ្រាមតាមដែលសហរដ្ឋអាមេរិកចង់បាន។ លោក Kim បញ្ជាក់ថា កូរ៉េខាងជើង បានផ្ញើលិខិតជាច្រើនដងទៅកាន់អង្គការសហប្រជាជាតិ ដើម្បីថ្កោលទោសចំពោះសកម្មភាពរំលោភបំពាន របស់សហរដ្ឋអាមេរិក ប៉ុន្តែពួកគេមិនបានរវីលរវល់នោះទេ។
គួរបញ្ជាក់ថា ការលើកឡើងរបស់ លោក Kim In Ryong បែបនេះធ្វើឡើងបន្ទាប់ពីអនុប្រធានាធិបតីអាមេរិក លោក Mike Pence បានប្រាប់កូរ៉េខាងជើងត្រង់ៗថា កុំចង់ព្យាយាម សាកល្បងជាមួយការអត់ធ្មត់របស់សហរដ្ឋអាមេរិក ហើយថា ការបាញ់សាកល្បងមីស៊ីលបរាជ័យកាលពីព្រឹកថ្ងៃអាទិត្យពីសំណាក់ទីក្រុងព្យុងយ៉ាងគឺជាចេតនាបង្ករឿងសុទ្ធសាធ៕
ភ្នំពេញ៖នារីម្នាក់ដែលទើបមកពីលេងផ្ទះយាយត្រូវជនសង្ស័យម្នាក់ស្ទាក់វាយប្លន់យកម៉ូតូហើយគេចខ្លួនបាត់ដោយសុវត្តិភាពបង្កការភ្ញាក់ផ្អើលកាលវេលាម៉ោង៨ និង២០នាទីយប់ថ្ងៃទី១៧ ខែមេសា ឆ្នាំ២០១៧ នៅភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះឈ្មោះ ម៉ា ស្រីតាល់ ភេទស្រី អាយុ២១ឆ្នាំ មុខរបរកម្មការិនីរោងចក្រ ស្នាក់នៅភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ។ ម៉ូតូដែលជនសង្ស័យវាយប្លន់នោះម៉ាកzoomerx ពណ៍ខៀវ ពាក់ស្លាកលេខភ្នំពេញ1DO 3339. ។
តាមសំដីជនរងគ្រោះបានអោយដឹងថា នៅមុនពេលកើតហេតុរូបនាងបានជិះម៉ូតូមកពីលេងផ្ទះយាយនៅម្តុំផ្សារទួលទំពូង ខណៈមកដល់ចំណុចកើតហេតុស្រាប់តែមានជនសង្ស័យម្នាក់ដើរមកស្ទាក់មុខហើយវាយបណ្តាលអោយធ្លាក់ពីលើម៉ូតូរួចក៏ដណ្តើមម៉ូតូជិះទៅបាត់គេចខ្លួនបាត់ដោយសុវត្ថិភាព។
ក្រោយពេលកើតហេតុសមត្ថកិច្ចបានចុះទៅដល់ចំណុចកើតហេតុនិងបានត្រឹមដឹកជនរងគ្រោះទៅដាក់ពាក្យបណ្តឹងនៅប៉ុស្តិ៍នគរបាលចោមចៅដើម្បីកំណត់មុខសញ្ញាណ៕
សេអ៊ូល៖អតីតប្រធានាធិបតីកូរ៉េខាងត្បូងលោកស្រី ផាក គឺនហេ និងប្រធានក្រុមហ៊ុន Lotte Group លោក Shin Dong-bin ត្រូវបានក្រុមរដ្ឋអាជ្ញាធរកូរ៉េខាងត្បូងកាលពីម្សិលមិញសម្រចធ្វើការចោទកាន់ជាផ្លូវការលើពីបទប្រព្រឹត្តអំពើពុករលួយ។ នេះបើយោងតាមការសារព័ត៌មាន Channel News Asia។
ក្រុមរដ្ឋអាជ្ញាបានចោទប្រកាន់លោកស្រី ផាក ថា បានផ្សំគំនិតជាមួយមិត្តភក្តិឈ្មោះ ឆយ ស៊ូនស៊ីល ក្នុងការលេបទឹកប្រាក់១៦លានដុល្លារអាមេរិកពីក្រុមហ៊ុន Lotte។ ទន្ទឹមនោះលោកស្រី ផាក ក៏បានទទួលរងការចោទប្រកាន់ទៀតថា បានប្រើប្រាស់អំណាចជាប្រធានាធិបតី កៀបសង្កត់អ្នកជំនួញនានា ឲ្យផ្តល់ជំនួយដល់មូលនិធិសប្បុរសធម៌របស់ ឆយ ស៊ូនស៊ីល ដោយគ្មានមូលដ្ឋាន។
ទោះបីយ៉ាងណាជុំវិញការចោទប្រកាន់ខាងលើក្រុមហ៊ុន Lotte ក៏បានច្រានចោលទាំងអស់ ជាពិសេសគឺទំនាក់ទំនងជាមួយនឹងលោកស្រី ផាក ហើយសូម្បីតែលោកស្រី ផាក ខ្លួនឯង និងលោកស្រី ឆយ ក៏នៅតែបន្តច្រានចោល នូវរាល់ការចោទប្រកាន់ទាំងអស់ផងដែរ៕
ដោយ៖បក្សីចាំក្រុង
សៀមរាប៖គិតមកដល់ត្រឹមថ្ងៃទី១៦ខែមេសាឆ្នាំ២០១៧នេះ សម្រាប់ពិធីបុណ្យចូលឆ្នាំប្រពៃណីជាតិខ្មែរ ប្រជាពលរដ្ឋខ្មែរនៅទូទាំងប្រទេសបន្ទាប់ពីបានសម្រាកពីការងារ និងធ្វើដំណើរដំសាន្តនៅតាមរមណីយដ្ឋាននានា ដោយឡែកនៅឯខេត្តសៀមរាប នៅតាមតំបន់ទេសចរណ៍នានានៅតែមានភ្ញៀវជាតិនិងអន្តរជាតិធ្វើដំណើរកំសាន្ត។
ជាក់ស្តែងនៅឯរមណីយដ្ឋានភ្នំគូលែនក៏មិនខុសពីតំបន់ទេសចរណ៍ដទៃនោះទេ យោងតាមប្រជាពលរដ្ឋបានអោយដឹងថា ក្នុងឱកាសពិធីបុណ្យចូលឆ្នាំថ្មី ប្រពៃណីខ្មែរនាឆ្នាំនេះ ដើម្បីបំរើអារម្មណ៍ ដល់ភ្ញៀវទេសចរ ដែលបានមកកំសាន្តនៅរមណីយដ្ឋានភ្នំគូលែន ខេត្តសៀមរាប សម្រាប់សេវាទំនិញផ្សេងៗ ម្ហូបអាហារ និងគ្រឿងភេសជ្ជៈ គឺបានឡើងថ្លៃ១៥%-២០% ចំពោះបញ្ហាសេវាអនាម័យមិនសូវមានផ្តល់តំរូវការគ្រប់គ្រាន់សម្រាប់ភ្ញៀវទេសចរនៅឡើយទេ។
គួរបញ្ជាក់ផងដែរថា ចរាចរណ៍គឺមានភាពងាយស្រួលធ្វើដំណើរទៅមកសម្រាប់ភ្ញៀវទេសចរ។
ទោះយ៉ាងរមណីយដ្ឋានភ្នំគូលែន ដែលជាកន្លែងប្រវត្តសាស្ត្រនៅតែទាក់ទាញភ្ញៀវទេសចរចូលរួមដំនណើរកំសាន្តជារៀងរាល់ថ្ងៃ៕
កូរ៉េខាងជើង៖អនុរដ្ឋមន្ត្រីការបរទេសកូរ៉េខាងជើងលោក Han Song-Ryol បានថ្លែងថា កូរ៉េខាងជើងនឹងបន្តបាញ់សាកល្បងមីស៊ីល បើទោះបីមានការថ្កោលទោសពីអន្តរជាតិ និងការកើនឡើងនូវភាពតានតឹងផ្នែកយោធាជាមួយសហរដ្ឋអាមេរិកក៏ដោយ។ នេះបើយោងតាមសារព័ត៌មាន BBC។
ក្នុងកិច្ចសម្ភាសន៍ជាមួយ BBC នាទីក្រុងព្យុងយ៉ាង លោក Han Song-Ryol បានថ្លែងដូច្នេះថា «យើងនឹងត្រូវធ្វើការបាញ់សាកល្បងមីស៊ីលបន្ថែមទៀត នៅលើមូលដ្ឋានជាប្រចាំសប្តាហ៍ ប្រចាំខែ និងប្រចាំឆ្នាំ»។ លោកបានបន្តប្រាប់ថា សង្គ្រាមទាំងអស់នឹងចាប់ផ្តើម ប្រសិនបើសហរដ្ឋអាមេរិកធ្វើសកម្មភាពយោធា»។
សូមជំរាបថា នៅក្នុងដំណើរបំពេញទស្សនកិច្ចរបស់អនុប្រធានាធិបតីអាមេរិក លោក Mike Pence ទៅកាន់តំបន់ព្រំដែនគ្មានកងទ័ព DMZ រវាងប្រទេសកូរ៉េទាំងពីរ លោក Mike Pence បានថ្លែងព្រមានចំពោះកូរ៉េខាងជើង «កុំចង់សាកល្បងចំពោះភាពអត់ធ្មត់របស់អាមេរិក ឬក៏កម្លាំងនៃយោធារបស់អាមេរិកឲ្យសោះ!»។ លោកបានបន្តថា សម័យកាលនៃភាព អត់ធ្មត់ជាយុទ្ធសាស្ត្រ បានបញ្ចប់ហើយ, ចិនគួរដាក់សម្ពាធឲ្យធ្ងន់ធ្ងរបំផុតដល់កូរ៉េខាងជើង។
ជាមួយគ្នានេះលោក Pence បានហៅការធ្វើតេស្តមីស៊ីលកូរ៉េខាងជើងថា «ជាការបង្កហេតុ» ហើយវាពិតជាបង្កគ្រោះថ្នាក់ទាំងនៅតំបន់ឧបទ្វីបកូរ៉េ និងសហរដ្ឋអាមេរិកផងដែរ៕
អាឡេប៉ូ៖ក្រុមឃ្លាំមើលសិទ្ធិមនុស្សស៊ីរីបានឲ្យដឹងថា ការបំផ្ទុះរថយន្តអត្តឃាតស្ថិតនៅក្បែររថយន្តក្រុងជាច្រើនគ្រឿង នៅទីក្រុងជាប់ជាយខេត្តអាឡេប៉ូ ដែលទាហានស៊ីរី ទើបតែទទួលបានមកវិញពីពួកឧទ្ទាម បណ្តាលឲ្យមនុស្សស្លាប់១២៦នាក់ ក្នុងនោះភាគច្រើនជាកុមាររហូតដល់៦៨នាក់បានស្លាប់។
ប្រភពដដែលបញ្ជាក់ថា ការវាយប្រហារខាងលើនេះកើតឡើងនៅក្នុងសង្កាត់ Rashidin នៃភាគខាងលិចខេត្តអាឡេប៉ូ ដែលបានកើតឡើងនៅថ្ងៃសៅរ៍ ដែលមានគោលដៅទៅលើប្រជាជនដែលភៀសខ្លួនពីទីក្រុង Fuaa និង Kafraya ដែលរដ្ឋាភិបាលស៊ីរីទទួលកាន់កាប់មកវិញ បន្ទាប់ពីមានការព្រមព្រៀងគ្នាជាមួយពួកឧទ្ទាម។ នេះបើយោងតាមព័ត៌មាន CNN ។
សារព័ត៌មានខាងលើបញ្ជាក់ថា ជនបំផ្ទុះអត្តឃាតម្នាក់បានឱបគ្រាប់បែកចូលទៅក្បួនរថយន្តមួយ ដែលចតនៅក្បែររថយន្តក្រុងដឹកមនុស្សភៀសខ្លួនជាច្រើន រួចក៏បំផ្ទុះខ្លួនឯងឡើងតែម្តង។ ទោះជាយ៉ាងណាចំនួនមនុស្សស្លាប់អាចនឹងបន្តកើនចំនួនថែមទៀត ព្រោះអ្នករងរបួសមានរហូតដល់ទៅរាប់សិបនាក់ទៀតឯណោះ ខណៈដែលរដ្ឋបាលស៊ីរីបានអះអាងថា វាជាទង្វើរបស់ក្រុម ISIS ផងដែរ៕
រាជធានីភ្នំពេញ៖មនុស្ស៥៤នាក់បានស្លាប់ ខណៈ២២៦នាក់ផ្សេងទៀតរងរបួសធ្ងន់ស្រាល ដោយសារគ្រោះថ្នាក់ចរាចរណ៍ទូទាំងប្រទេស ក្នុងរយៈពេល៥ថ្ងៃ អំឡុងបុណ្យចូលឆ្នាំថ្មី ប្រពៃណីជាតិ ចាប់ពីថ្ងៃទី១៣ ដល់១៧ ខែមេសា ឆ្នាំ២០១៧។ នេះបើយោងតាមរបាយការណ៍ផ្លូវការរបស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិ។
របាយការណ៍ដដែលបានឲ្យដឹងថា គ្រោះថ្នាក់ចរាចរណ៍រយៈពេល៥ថ្ងៃ កើតឡើងចំនួន១២១លើក ខូចខាតម៉ូតូ១៤៤គ្រឿង រថយន្តតូច៤៤គ្រឿង រថយន្តធំ៨គ្រឿង និងយានផ្សេងៗ៥គ្រឿង ហើយមូលហេតុដែលនាំឲ្យកើតគ្រោះថ្នាក់ចរាចរណ៍រួមមាន បើកបរល្បឿនលឿន បើកបរស្រវឹង បើកបរជែង មិនប្រកាន់ស្តាំ មិនគោរពសិទ្ធិ បត់គ្រោះថ្នាក់ កត្តាយានយន្ត និងងងុយដេក។
ចំណែកខេត្តដែលកើតគ្រោះថ្នាក់ចរាចរណ៍ច្រើនជាងគេ គឺខេត្តបាត់ដំបង១២លើក ស្លាប់១២នាក់ របួស១៧នាក់, ខេត្តកំពង់ធំ ៩លើក ស្លាប់៧នាក់ របួស២៦នាក់, ភ្នំពេញ ៧លើកស្លាប់៥នាក់ របួស១០នាក់, ស្វាយរៀង១០លើក ស្លាប់៤នាក់ របួស២៣នាក់, ក្រចេះ៩លើក ស្លាប់៣នាក់ របួស១៣នាក់, ខេត្តព្រះវិហារ៧លើក ស្លាប់៣នាក់ របួស១០នាក់, ខេត្តព្រៃវែង ៣លើកស្លាប់៣នាក់ របួស៣នាក់ និងខេត្តព្រះសីហនុ ៣លើកស្លាប់៣នាក់។
ដោយឡែករបាយការណ៍បានបញ្ជាក់ថា នៅថ្ងៃទី១៧ ខែមេសា ឆ្នាំ២០១៧នេះ ដែលជាថ្ងៃបងប្អូនប្រជាពលរដ្ឋសម្រុក តឡប់មកពីស្រុកកំណើតមកបំពេញ ការងារដូចធម្មតាវិញ គ្រោះថ្នាក់ចរាចរណ៍កើតឡើង២៦ករណី ស្លាប់១២នាក់ និង៤៧នាក់រងរបួសធ្ងន់ស្រាល៕
ខេត្តកំពង់ឆ្នាំង៖មន្ត្រីកាំកុងត្រូលខេត្តកំពង់ឆ្នាំងបានដកហូតសសៃគុយទាវ និងសរសៃបាញ់កាញ់សរុបជាង១១គីឡូក្រាមដែលអាជីវករកំពុងដាក់លក់នៅក្នុងផ្សារពង្រ ខេត្តកំពង់ឆ្នាំង យកមកកំទេចចោល ក្រោយពីពិនិត្យឃើញថាមានសារធាតុគីមីហាមឃាត់(បូរ៉ាក់)។ ការរកឃើញនេះគ្រាដែលចុះត្រួតពិនិត្យទំនិញកាលពីថ្ងៃទី១១ ខែមេសា ឆ្នាំ២០១៧ម្សិលមិញនេះ។
លោក យីវ ណារិន ប្រធានសាខាកាំកុងត្រូលខេត្តកំពង់ឆ្នាំងបានអោយដឹងថា ដើម្បីធានាសុវត្ថិភាពចំនីអាហារក្នុងឱកាសបុណ្យចូលឆ្នាំថ្មីនេះ សាខាកាំកុងត្រូលបានសហការគ្នាជាមួយមន្ត្រីពាណិជ្ជកម្មខេត្ត ដើម្បីចុះត្រួតពិនិត្យទំនិញជាច្រើនប្រភេទមានដូចជា បន្លែ ផ្លែឈើ ត្រី សាច់ គ្រប់ប្រភេទនៅក្នុងផ្សារពង្រ និងបានធ្វើការពន្យល់ណែនាំដល់អាជីវករអោយមានការយល់ដឹងនិងមានការប្រុងប្រយ័ត្ន ហើយជៀសវាងការដាក់លក់ទំនិញដែលហួសកាលបរិច្ឆេទប្រើប្រាស់មានដូចជា កំប៉ុងកំពិត ប៉ោង ឬច្រែសស៊ី និងទំនិញគ្រប់ប្រភេទដែលមានសារធាតុគីមីហាឃាត់។
ជាលទ្ធផលនៃការត្រួតពិនិត្យ សមត្ថកិច្ចបានរកឃើញសារធាតុគីមីហាមឃាត់ដែលមាននៅក្នុងសសៃគុយទាវ និងសសៃបាញ់កាញ់ចំនួន១១គីឡូក្រាម ដែលផលិតនិងដាក់លក់ដោយដោយអាជីវករ៣នាក់។ ក្រោយពិនិត្យឃើញសមត្ថកិច្ចកាំកុងត្រូលបានដកហូតយកមកកំទេចចោលនិងអោយអាជីវករពាក់ព័ន្ធធ្វើកិច្ចសន្យាបញ្ឈប់ការផលិតនិងលក់សសៃគុយទាវ និងសសៃបាញ់កាញ់ដែលមានសារធាតុគីមីហាមឃាត់ទាំងនេះទៀត។
គួរបញ្ជាក់ថា សារធាតុបូរ៉ាក់នេះធ្វើអោយប៉ះពាល់ដល់សុខភាពធ្វើអោយមានអការៈក្អួតចង្អោរ ឈឺក្បាល ថប់ដង្ហើម និងប៉ះពាល់ដល់ប្រដាប់រំលាយអាហារជាដើម៕
ខេត្តបន្ទាយមានជ័យ៖នៅម៉ោង៨ និង៣០នាទីយប់ ថ្ងៃទី១១ ខែមេសា ឆ្នាំ២០១៧នេះ មានករណីអគ្គិភ័យបានកើតឡើងនៅក្នុងរោងចក្រផលិត Hard Disk ស្ថិតក្នុងភូមិផ្សារកណ្តាលសង្កាត់ផ្សារកណ្តាល ក្រុងប៉ោយប៉ែត បណ្តាលឲ្យកម្មករ៣នាក់របួស។
ប្រភពពីកន្លែងកើតហេតុបានឲ្យដឹងថា មូលហេតុដែលបណ្ដាឲ្យមានអគ្គិភ័យនេះ ដោយសារតែធ្លាយប្រព័ន្ធបណ្តាញបំពង់ហ្គាស ដែលនៅកៀក និងឡស្លរអាលុយមីញូម។ ក្នុងហេតុការណ៍នេះ ដែលបណ្ដាលឲ្យកម្មករ៣នាក់រងរបួស ក្នុងស្រីម្នាក់ និងខូចខាតឡស្លរអាលុយមីញ៉ូមចំនួន២ផងដែរ។
តែជាយ៉ាងណាក៏ដោយ គ្រោះអគ្គិភ័យនេះ បានរលត់ទៅវិញដោយសារតែមានការជួយអន្ដរាគមន៍ទាន់ពេល ពីកម្លាំងអធិការក្រុងប៉ោយប៉ែត កម្លាំងអាវុធហត្ថក្រុង។
ក្រោយកើតហេតុ ជនរងគ្រោះត្រូវបានសមត្ថកិច្ចបញ្ជូនទៅសង្គ្រោះនៅមន្ទីរពេទ្យ៕
កូរ៉េខាងជើង៖អ្នកនាំពាក្យក្រសួងការបរទេសកូរ៉េខាងជើងថ្លែងតាមទីភ្នាក់ងារព័ត៌មានរដ្ឋកូរ៉េខាងជើង KCNA ថា កូរ៉េខាងជើងបានត្រៀមរួចរាល់ហើយ ក្នុងការធ្វើសង្គ្រាមដែលបង្កឡើងដោយសហរដ្ឋអាមេរិក ហើយលោកចាត់ទុកថា នេះជាគ្រោះថ្នាក់របស់អាមេរិកដែលបានបង្កជម្លោះជាមួយកូរ៉េខាងជើង។ នេះគឺជាការបង្ហាញប្រតិកម្មលើកទីមួយបន្ទាប់ពីមានភាពតានតឹងមួយរយៈកាលចុងក្រោយនេះ។
កូរ៉េខាងជើងបានថ្កោលទោស ចំពោះទីក្រុងវ៉ាស៊ីនតោនដែលបានដាក់ពង្រាយក្រុមនាវាចម្បាំងរបស់អាមេរិក នៅក្នុងឧបទ្វីបកូរ៉េ។ ក្រុមនាវាចម្បាំងរបស់អាមេរិកឈ្មោះ Carl Vinson បានលុបចោលគម្រោងរបស់ខ្លួនធ្វើដំណើរទៅកាន់សមុទ្រអូស្ត្រាលីនៅសប្តាហ៍នេះ ហើយបានដូរទិសដៅទៅកាន់តំបន់ឧបទ្វីបកូរ៉េ ដើម្បីត្រៀមទប់ទល់ការគំរាមកំហែងដែលបង្កឡើងដោយកូរ៉េខាងជើង។
គួរបញ្ជាក់ថា កាលពីថ្មីៗនេះ លោក ត្រាំ បានគំរាមថា នឹងធ្វើសកម្មភាពដោយឯកតោភាគីប្រឆាំងកូរ៉េខាងជើង បើសិនជាចិនមិនអាចដោះស្រាយបញ្ហាដែលកូរ៉េខាងជើងគំរាមកំហែងសន្តិសុខក្នុងតំបន់តាមកម្មវិធីអាវុធនុយក្លេអ៊ែនោះ៕
