រាជធានីភ្នំពេញ៖យោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត គ.ជ.ប បានឲ្យដឹងថា គិតត្រឹមម៉ោង៦ល្ងាចថ្ងៃទី២៥ ខែកញ្ញា ឆ្នាំ២០១៦ មានប្រជាពលរដ្ឋខ្មែរចំនួន ៣,៤១៩,៧៣៣នាក់ហើយបានទៅចុះឈ្មោះបោះឆ្នោត។
គួរបញ្ជាក់ថា ប្រជាពលរដ្ឋដែលមានអាយុ១៨ឆ្នាំឡើង ហើយមានសិទ្ធិ ចុះឈ្មោះបោះឆ្នោត មានចំនួនជាង៩.៦លាននាក់៕
រាជធានីភ្នំពេញ៖ប្រធានគណបក្សសង្គ្រោះជាតិ លោក សម រង្ស៊ី បានបាញ់គណបក្សកាន់អំណាច ជាថ្មីទៀត កាលពីម្សិលមិញ ខណៈលោក កឹម សុខា បានអំពាវនាវឲ្យមហាគ្រួសារខ្មែរ និងអ្នកនយោបាយខ្មែរជួបជុំគ្នាដោះស្រាយបញ្ហាជាតិ។
លោក សម រង្ស៊ី បានថ្លែងថា «ទម្លាប់នៅស្រុកខ្មែរ គឺអ្នកដែលមានតំណែងកាន់តំណែងនោះមួយជីវិត ពីព្រោះឱ្យតែមានខ្សែមានបក្ខពួក នៅក្នុងជួរគណបក្សកាន់អំណាច គឺនៅក្រាញអំណាច តំណែងខ្លះដល់អាយុ៦០-៧០ហើយ នៅតែចង់កាន់តំណែងហ្នឹង ចូលម្ឈូសទៀតក៏មិនដឹងដែរ វាមិនត្រូវទេ, សញ្ញាបត្រក្លែងក្លាយ ដូចមេដឹកនាំយើងមួយចំនួន ទៅទិញសញ្ញាបត្រក្លែងក្លាយ យកមកអួតយកមកបន្លំវាមិនត្រឹមត្រូវ ត្រូវតែឱ្យអ្នកដែលមាន សញ្ញាបត្រពិតប្រាកដ»។
ទាក់ទងការលើកឡើងរបស់លោក សម រង្ស៊ី ថ្មីៗនេះ សម្តេច ហ៊ុន សែន បានលើកថា បញ្ហានយោបាយនៅកម្ពុជា ដោយសម្តេចតេជោ បានលើកឡើងថា សភាពការណ៍កំពុងសភាពស្ងប់ស្ងាត់ ហើយរំពឹងមានភាពស្ងប់ស្ងាត់បែបនេះ។ សម្តេចតេជោថា ការស្ងប់ស្ងាត់បែបនេះមានភាពល្អប្រសើរ ហើយក៏រង់ចាំមើលផងដែរថា ក្នុងរដូវបុណ្យភ្ជុំនេះ«នរណាបាញ់នរណាមុន ។
ចំណែកលោក កឹម សុខា បានសរសេរនៅលើទំព័រ Facebook កាលពីម្សិលមិញថា ខ្ញុំ កឹម សុខា ក្នុងនាមប្រធានស្តីទីគណបក្សសង្គ្រោះជាតិ និងក្នុងនាមខ្ញុំផ្ទាល់ សារជាថ្មីម្តងទៀត ខ្ញុំ សូមបួងសួងឲ្យក្រុម គ្រួសារខ្មែរគ្រប់រូបបានជួបជុំគ្នាដោយសប្បាយរីករាយ និងក៌ សូមឲ្យគ្រួសារនយោបាយ ខ្មែរបានជួបជុំគ្នាដោះស្រាយបញ្ហាជាតិ និងប្រជាពលរដ្ឋខ្មែរជាមួយគ្នាផងដែរ។ ក្នុងឱកាសនេះដែរដើម្បីរក្សាភាពស្ងប់ស្ងាត់ជូនប្រជាពលរដ្ឋខ្មែរ ដែលកំពុងធ្វើបុណ្យទានជូនបុព្វការីជនផងនោះ ខ្ញុំសូមអំពាវនាវជា ថ្មីម្តងទៀត ជាពិសេសដល់ថ្នាក់ដឹកនាំគ្រប់លំដាប់ថ្នាក់ និងសកម្មជនរបស់គណបក្សសង្គ្រោះជាតិ សូមចៀសវាង ការប្រើអំពើហិង្សា ឬពាក្យអសុរស ឬពាក្យវាយប្រហារ គ្នាដែលនាំឲ្យប៊ះពាល់ដល់បរិយាកាស នៃពិធីបុណ្យប្រពៃណីជាតិនេះ និងប៊ះពាល់់ដល់បរិយាកាសនយោបាយយូរអង្វែង ទៅមុខទៀតផង ៕
ដោយ៖បញ្ញា
ភ្នំពេញ៖រថយន្តដឹកដីបុកបងប្អូនជីដូនមួយស្លាប់ម្នាក់និងរបួសធ្ងន់ប៉ើងធ្លាក់ប្រឡាយ ដែលហេតុការណ៍គ្រោះថ្នាក់ចរាចរនេះកើតឡើងនាល្ងាចថ្ងៃទី២៤ ខែកញ្ញា ឆ្នាំ២០១៦ ចំណុចភូមិព្រៃកី សង្កាត់ភ្លើងឆេះរទេះខ័ណ្ឌពោធិ៍សែនជ័យ។
ជនរងគ្រោះត្រូវបានស្គាល់ថាបុរសឈ្មោះនឹមប៊ុនលីអាយុ២៥ឆ្នាំមុខរបរកម្មករសំណង់បានស្លាប់ បច្ចុប្បន្នស្នាក់នៅផ្ទះជួលភូមិព្រៃទាសង្កាត់ចោមចៅខណ្ឌពោធិ៍សែនជ័យនិងមានស្រុកកំណើតនៅឃុំស្នំក្រពើ ភូមិក្រាំងកណ្តាល ស្រុកគងពិសី ខេត្តកំពុងស្ពឺ និងប្អូនស្រីជីដូនមួយរបស់គាត់ឈ្មោះខាត់ចាន់រីអាយុ១៨ឆ្នាំមុខរបរកម្មការិនីរោងចក្របានរបួសធ្ងន់ធ្ងរ។
ប្រភពពីកន្លែងកើតហេតុបានឱ្យដឹងថាគេឃើញបុរសស្ត្រី២នាក់ជាបងប្អូនជីដូនមួយជិះម៉ូតូC125មួយគ្រឿងស្លាលេខភ្នំពេញ1FC-2130ធ្វើដំណើរក្នុងទិសដៅពីជើងទៅត្បូងខណៈមកដល់ចំណុចកើតហេតុស្រាប់តែមានរថយន្តដឹកដី១គ្រឿងបើកក្នុងទិសដីពីត្បូងទៅជើងបញ្ច្រាស់ទិសគ្នាបានវ៉ាជេងរថយន្តមួយគ្រឿងទៀតជ្រុលបុកមួយជនរងគ្រោះបណ្តាលឱ្យស្លាប់បុរសម្នាក់និងស្ត្រីម្នាក់ប៉ើងធ្លាក់ប្រឡាយរងរបួសធ្ងន់។
ក្រោយពេលកើតហេតុអ្នកបើករថយន្តមិនបាននៅទទួលខុសត្រូវទេគឺបានរត់គេចខ្លួនបាត់ស្រមោលដោយទុករថយន្តនៅកន្លែងកើតហេតុ សមត្ថកិច្ចបានធ្វើការវាស់វែងរួច ស្ត្រីរងរបួសធ្ងន់បានសង្គ្រោះបន្ទាន់ សពប្រគល់អោយគ្រួសារធ្វើបុណ្យតាមប្រពៃណី៕
ដោយ៖ប៉ែន សុផល
បាត់ដំបង៖បុរសម្នាក់ជិះម៉ូតូ C 125 ស្របទិសគ្នាពីលិចទៅកើតត្រូវរថយន្តម៉ាកកាមរីពណ៌ទឹកប្រាក់បានបើកបរក្នុងល្បឿនលឿនដោយខ្វះការប្រុងប្រយ័ត្នបានរេចង្កូតទៅបុកពីក្រោយយ៉ាងពេញទំហឹងបណ្តាលឲ្យភាគ្គីខាងជិះម៉ូតូខ្ទាត់ភ្លោងទៅបោកក្បាលនឹងកញ្ចក់ផ្នែកខាងមុខរថយន្តរងរបួសផ្នែកក្បាលធ្ងន់ធ្ងរ ។
តាមការបំភ្លឺពីសមត្ថកិច្ចចរាចរណ៍ផ្លូវគោកនៃការិយាល័យចរាចរណ៍ស្នងការខេត្តបានឲ្យដឹងថា មានគ្រោះថ្នាក់ចរាចរណ៍រថយន្តរវាងម៉ូតូមួយករណីនៅវេលាម៉ោង៧ និង៤០នាទី នៅថ្ងៃទី២៥ កញ្ញា ២០១៦ត្រង់ចំណុចទល់មុខមហាវិទ្យាល័យ UBB ស្ថិតក្នុងភូមិអូរខ្ជាយ សង្កាតព្រែកព្រះស្តេច ស្រុកសង្កែ ខេត្តបាត់ដំបងដោយ មានរថយន្តម៉ាក camry ពណ៌ទឹកប្រាក់ សេរីឆ្នាំ៩៧ ពាក់ស្លាក់លេខ2A.8498 pp បើកបរដោយឈ្មោះ តាន់ ម៉ូរ័ត្ន ប្រុស អាយុ៣៥ ឆ្នាំ រស់នៅភូមិជំជិក ឃុំអន្លង់វិល ស្រុកសង្កែ ខេត្តបាត់ដំបង។ ប្រភពបន្តថា បន្ទាប់ពីហេតុការណ៍បានកើតឡើង សមត្ថកិច្ចចរាចរណ៍ផ្លូវគោកបានចុះ
ដល់កន្លែងកើតហេតុ និងធ្វើគំនូសហេតុបាននាំយកជនរងគ្រោះទៅសង្គ្រោះជីវិត នៅមន្ទីរពេទ្យបង្អែកខេត្ត និងរថយន្តបង្កត្រូវសមត្ថកិច្ចនាំយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋានខេត្តបាត់ដំបងដើម្បីរងចាំម្ចាស់ចូលមកធ្វើការដោះស្រាយតាមផ្លូវច្បាប់នៅពេលក្រោយ៕
ខេត្តកំពង់ធំ៖ក្មេងស្រីម្នាក់បានស្លាប់ភ្លាមៗនៅនឹងកន្លែងយ៉ាងអាណោចអាធ័ម ដោយសាររថយន្តធុនធំមួយគ្រឿងបុក និងកិន ដែលហេតុការណ៍នេះកើតឡើងកាលពីវេលាម៉ោង០៥ និង២០នាទីល្ងាច ថ្ងៃទី២៥ ខែកញ្ញា ឆ្នាំ២០១៦ ស្ថិតនៅផ្លូវលំ ភូមិអាត់ស៊ូ ឃុំប្រាសាទសំបូរ ស្រុកប្រាសាទសំបូរ ខេត្តកំពង់ធំ។
ប្រភពព័ត៌មានបានឲ្យដឹងថា មូលហេតុនៃគ្រោះថ្នាក់ចរាចរណ៍នោះ ដោយសារតែរថយន្ត រថយន្តធុនធំមួយគ្រឿង ពាក់ស្លាកលេខ កំពង់ធំ 3A-1183 បើកបរក្នុងល្បឿនលឿន ទៅបុកកិនក្មេងស្រីម្នាក់ ដែលរត់ឆ្លងផ្លូវ ទើបបណ្ដាលឲ្យស្លាប់ភ្លាមៗ នៅហ្នឹងកន្លែងតែម្តង៕
រាជធានីភ្នំពេញ៖នៅព្រឹកថ្ងៃទី២៦ ខែកញ្ញា ឆ្នាំ២០១៦នេះប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ បានចូលបំភ្លឺជូនតំណាងអយ្យការអមសាលាដំបូងរាជធានីភ្នំពេញលើពាក្យបណ្តឹងព្រះតេជគុណ ប៊ុត ប៊ុនតិញ ពីបទបរិហារកេរ្តិ៍ ។
លោក ម៉ម សូណង់ដូ ធ្លាប់បាននិយាយថា ចំពោះករណីនេះ លោកប្តឹងទាមទារសំណងជំងឺចិត្ត ១ម៉ឺនរៀល ពីព្រះតេជគុណ ប៊ុត ប៊ុនតិញ ហើយលោក ម៉ូម សូណង់ដូ ក៏ចង់សំណូមពរតុលាការជំរុញឲ្យមានការផ្សឹកព្រះតេជគុណ ប៊ុត ប៊ុនតិញ ផងដែរ។
គួរបញ្ជាក់ថា ព្រះតេជគុណ ប៊ុត ប៊ុនតិញ ធ្លាប់មានសង្ឃដីកាថា «លោក ម៉ម សូណង់ដូ បានទៅសុំ លោក សម រង្ស៊ី យកតំណាងរាស្ត្រ២នាក់ ប៉ុន្តែលោក សម រង្ស៊ី ឲ្យតែម្នាក់ បើ អ៊ីចឹង លោក ម៉ម សូណង់ដូ មិនពេញចិត្ត ក៏បង្កើតគណបក្សនឹងមកដើម្បីផ្ចាញ់ផ្ចាល់ ខឹងគេអត់ឲ្យតំណែង»។ នេះបើតាមការរៀបរាប់លិខិតរបស់ លោក ម៉ម សូណង់ដូ ផ្ញើទៅកាន់ព្រះតេជគុណ ប៊ុត ប៊ុនតិញ ដើម្បីបំភ្លឺរឿងនេះកន្លងមក។ ប៉ុន្តែចំពោះរឿងនេះ ព្រះតេជគុណ ប៊ុត ប៊ុនតិញ ពុំបានបំភ្លឺនោះទេ ថែមទទួលទទួលស្គាល់នូវសង្ឃដីការបស់ព្រះអង្គទៀតផង៕
រាជធានីភ្នំពេញ៖នៅព្រឹកថ្ងៃទី២៦ ខែកញ្ញា ឆ្នាំ២០១៦នេះ គណៈកម្មការបច្ចេកទេសត្រីភាគីនឹងបើកការពិភាក្សាអំពីការដំឡើងប្រាក់ឈ្នួលអប្បបរមាដល់កម្មករកាត់ដេរ និងផលិតស្បែកជើង សម្រាប់ឆ្នាំ២០១៧ បន្តទៀតនៅក្រសួងការងារ និងបណ្តុះបណ្តាលវិជ្ជាជីវៈ។
កាលពីថ្ងៃទី១៥ ខែកញ្ញា ឆ្នាំ២០១៦ ភាគីថៅកែរោងចក្រ បានយល់ព្រមដាក់តួលេខថ្មី ១៤៦.៣៧ដុល្លារ។ ចំណែកឯភាគីខាងសហជីពក៏ទម្លាក់តួលេខរបស់ខ្លួនមកនៅត្រឹម ១៧៧.៥៩ដុល្លារផងដែរ។ ប៉ុន្តែទោះជាយ៉ាងណា តួលេខទាំងពីរនេះ នៅមានគម្លាតពីគ្នាឆ្ងាយនៅឡើយ៕
ភ្នំពេញ៖ករណីផ្ទុះអាវុធ២គ្រាប់ទាំងថ្ងៃបណ្តាលអោយបុរសម្នាក់រងរបួសធ្លាយយពីម្ខាងទៅម្ខាងត្រូវបានបញ្ជូនទៅសង្គ្រោះនៅមន្ទីរពេទ្យលោកសង្ឃភ្លាមៗ ដែលហេតុការណ៍នេះកើតឡើងនៅខាងមុខវត្តស្ទឹងមានជ័យ ខណ្ឌមានជ័យ រាជធានីភ្នំពេញ។
ជនរងគ្រោះឈ្មោះ ទូច មករា អាយុ៣០ មុខរបររត់ម៉ូតូឌុប ស្នាក់ផ្ទះជួលមុខវត្តស្ទឹងមានជ័យ។
តាមសំដីអ្នកឃើញហេតុការណ៍នេះប្រាប់អោយដឹងថាមុនពេលមានការផ្ទុះអាវុធនេះគឺមានខ្មាន់កាំភ្លើងមានគ្នា២នាក់ជិះម៉ូតូតាមកៀរម៉ូតូជនរងគ្រោះពីក្រោយដែលជិះគ្នា២នាក់ឲ្យចូលក្នុងវត្តស្ទឹងមានជ័យតែជនសង្ស័យមិនព្រមទៅ រួចធ្វើសកម្មភាពបាញ់ប្រហារ២គ្រាប់បណ្តាលឲ្យធ្លាយពីម្ខាងទៅម្ខាង រងរបួសជាទម្ងន់ ត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ។
គេនៅមិនទាន់ដឹងពីមូលហេតុពិតប្រាកដនៅឡើយទេ ។ ពេលនេះក្រុមជនសង្ស័យបានរត់គេចខ្លួនបាត់ដោយសុវត្ថិភាព៕
ដោយ៖ប៉ែន សុផល
បាត់ដំបង៖នៅល្ងាចម៉ោង៥ និង៣០នាទី ថ្ងៃទី២៣ខែកញ្ញា ឆ្នាំ២០១៦ ស្ថិតក្នុងបវេណផ្សារB 2 B mark (ផ្សា ភូ ប៉ុយ ) មានរៀបចំពិធីតាំង ពិព័រណ៍ថៃ-កម្ពុជា ក្រោមវត្តមានលោក អ៊ុយ រីប្រធានក្រុមប្រឹក្សាខេត្តបាត់ដំបង និងលោក ច័ន្ទ សុផល អភិបាលនៃគណៈអភិបាលខេត្តបាត់ដំបង។
បានរួមដំណើរអមដំណើរដោយលោក សៀងឯម វូនស្ហី អភិបាលនៃគណៈអភិបាលក្រុងបាត់ដំបង រួមទាំងមន្ទីរពាក់ព័ន្ធជុំវិញបានអញ្ជើញចូលរួមក្នុងកម្មវិធីសម្ពោធបើក ពិព័រណ៌ពាណិជ្ជកម្ម ថៃ បាត់ដំបង ចាប់ពីថ្ងៃទី២៣ ដល់ ទី២៧ ខែកញ្ញា ឆ្នាំ២០១៦ដែលមានទីតាំងស្ថិតនៅក្នុងបរិវេណក្នុងផ្សារទំនើប ភូ ប៉ុយ សង្កាត់អូរចារ ក្រុងបាត់ដំបង ។
ដែលមានមុខទំនិញគុណភាពខ្ពស់នាំពីប្រទេសថៃ ដែលមានស្តង់តាំងលក់ពី១២០ទៅ១៣០មកដាក់តាំងលក់ស្របច្បាប់ តភ្ជាប់ក្នុងឱកាសពិធីបុណ្យប្រណាំងទូកងនាឱកាសបុណ្យភ្ជុំបិណជាប្រពៃណីជនជាតិខ្មែរ ដែលធ្លាប់ប្រព្រឹត្តិជាប្រចាំកន្លងមក ។
លោកឧកញ៉ា ភូ ប៉ុយ ជាម្ចាស់ផ្សា B2B mark និងជាប្រធានសភាពាណិជ្ជកម្ម ខេត្តបាត់ដំបង បានមានប្រសាសន៍ ក្នុងពិធីដាក់តាំងពិរពណ៍ ទំនិញពិពណ៍ថៃ-បាត់ដំបងថា លោកត្រូវខិតខំស្វែងរកក្រុមអ្នកវិយោគទីផ្សាបន្ថែមទៀតដើម្បីបង្កើននូវការវិយោគទុនក៍ដូចជាបន្ថែមកំណើនទីផ្សាឲ្យកាន់តែមានប្រសើរទ្វេដង ។
ជាពិសេសក្នុងរដូវបុណ្យភ្ជុំបិណ្ឌនាពេលខាងមុខនេះគឺជាប្រពៃណីខ្មែរតាំងពីបូរាណកាលមក ទើបលោកខិតខំគៀងគរក្រុមអ្នកវិយោគឲ្យចូលមករកទីផ្សារ B2BMark ខេត្តបាត់ដំបងឲ្យបានកោះករថែមទៀត៕
មីយ៉ាន់ម៉ា៖កាលពីថ្ងៃសុក្រ សហភាពអឺរ៉ុបបានកោតសរសើរការរីកចម្រើនលើសិទិ្ធមនុស្សរបស់ប្រទេសមីយ៉ាន់ម៉ានៅក្រោមការដឹកនាំរបស់លោកស្រីអ៊ួងសានស៊ូជី និងបាននិយាយថា ខ្លួននឹងមិនណែនាំឲ្យមានសេចក្តីសម្រេចមួយទេនៅឯអង្គការសហប្រជាជាតិដែលថ្កោលទោសប្រទេសនេះ។
ថ្លែងទៅកាន់ក្រុមភាពជាដៃគូស្តីអំពីប្រទេសមីយ៉ាន់ម៉ានៅឯមហាសន្និបាតអង្គការសហប្រជាជាតិ ប្រធានគោលនយោបាយការបរទេសសហភាពអឺរ៉ុបលោកស្រី Federica Mogherini បានហៅការរីកចម្រើនរបស់លោកស្រីស៊ូជីថាជា “សក្ខីភាពដ៏មានឥទ្ធិពលចំពោះការផ្លាស់ប្តូរមិនគួរឲ្យជឿដែលប្រទេសមីយ៉ាន់ម៉ាកំពុងឆ្លងកាត់”។
លោកស្រីបានថ្លែងថា “រដ្ឋាភិបាលបានចាត់វិធានការច្បាស់លាស់ដើម្បីកែលម្អសិទ្ធិមនុស្សនិងនឹងបានធ្វើឲ្យរឹងប៉ឹងឡើងវិញចំពោះដំណើរការសន្តិភាព។ អ្នកទោសនយោបាយត្រូវបានដោះលែង”។
គួរបញ្ជាក់ថា ជនជាតិរ៉ូហ៊ីងយ៉ាប្រមាណ១២៥,០០០នាក់នៅតែត្រូវបង្ខាំងនៅក្នុងជំរំបណ្តោះអាសន្នបន្ទាប់ពីរលកនៃអំពើហិង្សាសម្លាប់មនុស្សនៅក្នុងឆ្នាំ២០១២រវាងពុទ្ធសាសនិកនិងអ្នកកាន់សាសនាឥស្លាមដែលជាលទ្ធផលបណ្តាលឲ្យមនុស្សជាង១០០នាក់ត្រូវបានសម្លាប់៕
កូរ៉េខាងជើង៖រដ្ឋមន្ត្រីក្រសួងការបរទេសកូរ៉េខាងជើងកាលពីថ្ងៃសុក្របានប្រាប់អង្គការសហប្រជាជាតិថា “ការបន្តនុយក្លេអ៊ែរ” គឺជាវិធីតែមួយគត់របស់ប្រទេសរបស់លោកដើម្បីការពារខ្លួនហើយបានប្តេជ្ញាថានឹងជំរុញកម្លាំងយោធានុយក្លេអ៊ែររបស់ខ្លួនបន្ថែមទៀត។
ថ្លែងទៅកាន់មហាសន្និបាត លោក រី យ៉ុងហូ បាននិយាយថា ប្រទេសរបស់លោកនឹងបន្តចាត់វិធានការដើម្បីពង្រឹងកម្លាំងប្រដាប់អាវុធនុយក្លេអ៊ែរជាតិរបស់ខ្លួនទាំងបរិមាណនិងគុណភាព។
លោកបាននិយាយបែបនេះគឺត្រឹមតែពីរសប្តាហ៍ប៉ុណ្ណោះបន្ទាប់ពីកូរ៉េខាងជើងធ្វើតេស្តនុយក្លេអ៊ែរលើកទីប្រាំនិងមានអានុភាពបំផុតដែលបង្កឲ្យមានការថ្កោលទោសនៅទូទាំងពិភពលោកនិងជំរុញឲ្យក្រុមប្រឹក្សាសន្តិសុខអង្គការសហប្រជាជាតិត្រូវចាប់ផ្តើមការងារលើសេចក្តីសម្រេចដាក់ទណ្ឌកម្មថ្មី។
លោក រី ដែលត្រូវបានតែងតាំងជារដ្ឋមន្ត្រីការបរទេសចាប់តាំងពីខែឧសភាមកបានប្រាប់ក្រុមមេដឹកនាំពិភពលោកដែលកំពុងជួបជុំគ្នាថា “ការបន្តប្រដាប់អាវុធនុយក្លេអ៊ែរគឺជាគោលនយោបាយនៃរដ្ឋរបស់យើង។”
គួរបញ្ជាក់ថា កូរ៉េខាងជើងបានធ្វើការសាកល្បងនុយក្លេអ៊ែរចំនួនពីរលើក និងបាញ់សាកល្បងមីស៊ីលជាង២០គ្រាប់នៅឆ្នាំនេះ។ បន្ទាប់ពីការបំផ្ទុះចុងក្រោយបំផុតនៅថ្ងៃទី៩ខែកញ្ញា ក្រុងព្យុងយ៉ាងបានអះអាងថា ខ្លួនមានសមត្ថភាពដើម្បីបំពាក់ក្បាលគ្រាប់នុយក្លេអ៊ែរលើមីស៊ីល៕
រាជធានីភ្នំពេញ៖យោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោតបានឲ្យដឹងថា គិតត្រឹមម៉ោង ៦ល្ងាចថ្ងៃទី២៣ ខែកញ្ញា ឆ្នាំ២០១៦ម្សិលមិញនេះមានប្រជាពលរដ្ឋខ្មែរចំនួន ៣,១៧០,៨៥៧ នាក់ហើយបានទៅចុះឈ្មោះបោះឆ្នោត៕
ខេត្តប៉ៃលិន៖ជនសង្ស័យម្នាក់ត្រូវបានសមត្ថកិច្ចធ្វើការឃាត់ខ្លួន បន្ទាប់ពីជនរូបនោះបានធ្វើសកម្មភាពចាប់រំលោភក្មេងស្រី អាយុទើបតែ៦ឆ្នាំ រហូតបានសម្រេច។ ហេតុការណ៍ចាប់ខ្លួលនោះធ្វើឡើងកាលពីវេលាម៉ោង ២០ និង០០នាទី ថ្ងៃទី២២ ខែកញ្ញា ឆ្នាំ២០១៦ សង្កាត់អូរតាវ៉ៅ ខេត្តប៉ៃលិន។
ក្មេងស្រីរងគ្រោះមានឈ្មោះ ណ.ស.ន ភេទស្រីអាយុ៦ឆ្នាំ ចំណែកឯជនសង្ស័យ ឈ្មោះ អ៊ូ រឿន ហៅគ្រាល ភេទប្រុសអាយុ៣១ឆ្នាំ មុខរបរកសិករ រស់នៅភូមិសង្កាត់ជាមួយដើមបណ្តឹងខាងលើ។
បន្ទាប់ពីទទួលបានពាក្យបណ្តឹងពាក់ព័ន្ធនឹងករណី រំលោភសេពសន្ថវ:ពីឪពុកក្មេងស្រីរងគ្រោះឈ្មោះ ប៉ិល សំណាង ភេទប្រុស អាយុ៣៤ឆ្នាំ មុខរបរកសិករ ប៉ុស្តិ៍រដ្ឋបាលសង្កាត់អូរតាវ៉ៅ បានធ្វើការឃាត់ខ្លួនជនសង្ស័យ និងបញ្ចូនទៅស្នងការដ្ឋាននគរបាលខេត្តប៉ៃលិន ដើម្បីកសាងសំណុំរឿងបញ្ជូនទៅតុលាការតាមនីតិវិធីច្បាប់៕
រាជធានីភ្នំពេញ៖តំណាងអយ្យការអមសាលាដំបូងរាជធានីភ្នំពេញ នៅព្រឹកថ្ងៃទី២៤ ខែកញ្ញា ឆ្នាំ២០១៦នេះ បានបន្តការសាកសួរលើជនសង្ស័យ៥នាក់បន្ថែម ពាក់ព័ន្ធករណីបំផ្ទុះគ្រាប់បែកនៅលើផ្លូវ១៦៣ សង្កាត់បឹងកេងកងទី៣ ខណ្ឌចំការមន រាជធានីភ្នំពេញម្តងទៀត។
គួរបញ្ជាក់ថា ពីម្សិលមិញតុលាការបានសម្រេចឃុំខ្លួនជនសង្ស័យ៣នាក់ ក្នុងចំណោម៨នាក់ ពាក់ព័ន្ធនឹងបទល្មើស ប៉ុនប៉ងឃាតកម្ម តាមមាត្រា២៧និង១៩៩នៃក្រមព្រហ្មទណ្ឌ។
ជនសង្ស័យ៨នាក់នោះមានជនដៃដល់ មេខ្លោង និងអ្នកផ្សំគំនិតដែលក្នុងនោះក៏មានជនជាតិវៀតណាម៣នាក់ដែរ ដែលត្រូវបានក្រសួងមហាផ្ទៃបង្ហាញមុខនៅព្រឹកម្សិលមិញ មុនពេលបញ្ជូនទៅកាន់តុលាការក្រុងភ្នំពេញ៕
ខេត្តពោធិ៍សាត់៖ស្ត្រីម្នាក់ត្រូវចរន្តអគ្គិសនីឆក់ស្លាប់ភ្លាមៗនៅនឹងកន្លែង គ្រាដែលយកដៃកាន់ស័ង្កសីពេលទៅធ្វើម្ហូបនៅផ្ទះបាយ ដែលហេតុការណ៍នេះកើតឡើងកាលពីវេលាម៉ោង៦ និង៤៥នាទីល្ងាច ថ្ងៃទី២៣ ខែកញ្ញា ឆ្នាំ២០១៦ នៅចំណុចផ្ទះបាយស្ត្រីរងគ្រោះ ស្ថិតក្នុងភូមិវត្តពោធិ៍ទី១ ឃុំអន្លង់វិល ស្រុកកណ្តៀង ខេត្តពោធិ៍សាត់។
អធិការនគរបាលស្រុកកណ្តៀង លោក លីវ សេងហ៊ីម បាននិយាយថា ស្ត្រីវ័យក្មេងដែលឆ្លងចរន្តអគ្គិសនីតាមរយៈស័ង្កសីឆក់ស្លាប់នោះឈ្មោះ ប៉ក់ ហានីរ៉ូស្សា ភេទស្រី អាយុ២៣ឆ្នាំ ជនជាតិខ្មែរ រស់នៅភូមិឃុំកើតហេតុខាងលើ។
លោកអធិការបន្ដថា មុនពេលកើតហេតុ ស្ត្រីរងគ្រោះបានទៅធ្វើម្ហូបនៅផ្ទះបាយ ហើយបានយកដៃកាន់នឹងស័ង្កសី ពេលប៉ះទៅស្រាប់តែឆ្លងចរន្តអគ្គិសនីតាមរយៈស័ង្កសី ឆក់ស្លាប់ភ្លាមៗនៅនឹងកន្លែងកើតហេតុតែម្តង។ ក្រោយពេលកើតហេតុ ក្រុមគ្រួសារក៏បានព្យាយាមបញ្ជូនស្ត្រីរងគ្រោះទៅមណ្ឌលសុខភាព តែជាអកុសលស្ត្រីរងគ្រោះបានស្លាប់បាត់បង់ជីវិតទៅហើយ។
បច្ចុប្បន្នសាកសពស្ត្រីរងគ្រោះ ត្រូវបានសមត្ថកិច្ចប្រគល់ឱ្យក្រុមគ្រួសារ ដើម្បីធ្វើបុណ្យតាមប្រពៃណី៕
