ស៊ីរី៖ក្រុមអង្កេតការណ៍និងអង្គការសហប្រជាជាតិបានឲ្យដឹងថា ក្បួនរថយន្តដឹកជំនួយទៅឲ្យប្រជាជនស៊ីរីនៅក្នុងខេត្តអាឡេប៉ូត្រូវបានរងគ្រោះដោយការវាយប្រហារពីអាកាសដែលបណ្តាលឲ្យមនុស្ស១២នាក់ស្លាប់ប៉ុន្មានម៉ោងបន្ទាប់ពីយោធាស៊ីរីប្រកាសពីការបញ្ចប់បទឈប់បាញ់រយៈពេលមួយសប្តាហ៍។
រថយន្តយ៉ាងហោចណាស់១៨គ្រឿងត្រូវបានបំផ្លាញខណៈដែលក្បួនរថយន្តធ្វើដំណើរទៅតំបន់ពិបាកចូលដល់ Orum al-Kubra ក្នុងខេត្តអាឡេប៉ូដោយក្រុមអង្កេតការណ៍សិទ្ធិមនុស្សស៊ីរីបាននិយាយថា អ្នកស្ម័គ្រចិត្តអឌ្ឍច័ន្ទក្រហមនិងអ្នកបើកបរ១២នាក់បានស្លាប់។
ទោះបីជាយ៉ាងណាក៏ដោយ ក្រុមសង្កេតការណ៍មិនអាចបញ្ជាក់បានទេថាតើយន្តហោះដែលទទួលខុសត្រូវនោះគឺជារបស់ស៊ីរីឬរុស្ស៊ី៕
រាជធានីភ្នំពេញ៖យោងតាមប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត គ.ជ.ប បានឲ្យដឹងថា គិតត្រឹមម៉ោង ៦ល្ងាច ថ្ងៃទី១៩ ខែកញ្ញា ឆ្នាំ២០១៦ មានប្រជាពលរដ្ឋខ្មែរចំនួន ២,៦៩០,៩៧៩នាក់ហើយ បានទៅចុះឈ្មោះបោះឆ្នោត៕
ដោយ៖ប្រុញ វិធិន
ខេត្តក្រចេះ៖នៅរសៀលថ្ងៃទី១៩ ខែកញ្ញា ឆ្នាំ ២០១៦ លោក គង់ សុជាតិ លេខាធិការគណៈកម្មាធិការសាខាកាកបាទក្រហមកម្ពូជា ខេត្តក្រចេះ និងលោក សេង ភីណា អភិបាលរងស្រុកឆ្លូង រួមដំណើរដោយ លោក លោកស្រី ក្រុមប្រតិបត្តិសាខា បាននាំយកអំណោយរបស់ សាខាកាកបាទក្រហមកម្ពុជា ខេត្តក្រចេះ ទៅចែកជូនគ្រួសាររងគ្រោះដោយភ្លើងឆេះផ្ទះចំនួន ៤ គ្រួសារ នៅភូមិហាន់ជ័យទី៣ ឃុំហាន់ជ័យ ស្រុកឆ្លូង ខេត្តក្រចេះ ។
ដោយគ្រួសាររងគ្រោះធ្ងន់ មានចំនួន ២គ្រួសារ ទទួលបាន អង្ករ ៥០ គ.ក្រ, មុង ១, ភួយ ១, ក្រម៉ា ១, សារ៉ុង ១, មី ១ កេះតូច, ត្រីខ ១០ កំប៉ុង, តង់ ១ និង ថវិកា ២០០.០០០ រៀល ។ចំណែកឯ២គ្រួសារទៀតរងគ្រោះស្រាល ទទួលបាន អង្ករ ៣០ គ.ក្រ, មុង ១, ភួយ ១, ក្រម៉ា ១, សារ៉ុង ១, មី ១ កេះតូច, ត្រីខ ១០ កំប៉ុង និង ថវិកា ១០០.០០០ រៀល ។
គួរំលឹកថា ហេតុការគ្រោះអគ្គីភ័យឆេះផ្ទះប្រជាពលរដ្ឋនៅស្រុកឆ្លូងនោះ បានកើតឡើងកាលពីរសៀលថ្ងៃទី១៦ខែសីហាឆ្នាំ២០១៦ថ្មីៗនេះ បណ្តាលឲ្យភ្លើងឆេះផ្ទះ អស់ចំនួន ១ខ្នង សល់តែកាំជណ្តើរ រីឯទ្រព្យសម្បត្តិត្រូវភ្លើងលេបត្របាក់ខ្ទិចម៉ត់ នៅភូមិហាន់ជ័យ១ ឃុំហាន់ជ័យ ស្រុកឆ្លូង ខេត្តក្រចេះ ៕
ដោយ៖ប៉ែន សុផល
បាត់ដំបង៖ងក់លក់មួយភាំងយីឌុបរ៉េចង្កូតធ្លាក់វាលស្រែបង្ករឲ្យមានភ្ញាក់ផ្អើលមួយករណីនៅវេលាម៉ោង ១៦.៣០នាទី ថ្ងៃទី ១៩ ខែកញ្ញា ឆ្នាំ ២០១៦ នៅលើផ្លូវជាតិលេខ ៥៧B ស្ថិតក្នុងភូមិ ប៊ួរ ឃុំ ប៊ួរ ស្រុកសំពៅលូន ខេត្ត បាត់ដំបង ។
ប្រភពដែលនៅជិតនិងកន្លែង កើតហេតុ បានអោយដឹងថា គេឃើញមានរថយន្តប្រភេទយីឌុប ដឹកជ្រូក បើកបរពីកើតទៅលិចស្រុកបវេលទៅសំឡូត ក្នុងល្បឿនលឿនបានរ៉េចង្កូតធ្លាក់ចូលប្រឡាយស្រែ
បង្ករឲ្យភ្ញាក់ផ្អើលនៅជុំវិញកន្លែងកើតហេតុតែម្ដង ។
ករណីគ្រោះថ្នាក់ចរាចរណ៍ ដែលបង្កឡើង ដោយ តៃកុងងងុយដេករថយន្តយីឌុប ដឹកជ្រូកមួយគ្រឿងបានធ្លាក់ប្រឡាយស្រែនេះ មិនបានស្គាល់អត្តសញ្ញាណ ដោយអ្នកបើកបរ ងងុយដេកបានបង្ករឲ្យរេចង្កូតធ្លាក់ផ្លូវនៅចំម្តុំផ្លូវកោងដោយខ្វះការប្រុងប្រយ័ត្ន ក៏បណ្ដាលអោយរេចង្កូតធ្លាក់ចូលទៅក្នុងប្រឡាយស្រែតែម្ដងក្នុងហេតុការណ៍នេះ មិនបាន បង្ករឲ្យមាន គ្រោះថ្នាក់ដល់នណាម្នាក់នោះឡើយ និងមនុស្សជិតខាងនោះដែរ ។
ចំណែកឯម្ចាស់ក្រុមហ៊ុនដឹកជញ្ជូនសត្វជ្រូករស់ នៅពេលកើតហេតុ ភ្លាមៗ គេឃើញមាន រថយន្តមួយគ្រឿងមកទទួលយកសត្វជ្រូក ចេញទៅ ដោយបន្សល់ទុកតែរថយន្ត ដែលជួបឧបត្តិហេតុ គ្រោះថ្នាក់នោះនៅនិង កន្លែងដែលកើតហេតុ ។
លុះដល់ពេលក្រោយមកក៏មានគ្រឿងចក្រ ម៉ៃឃូ កាយដីមកសន្ដោង ទាញយករថយន្តឡើងមកលើផ្លូវ វិញដើម្បីជួយសង្គ្រោះឡើងមកលើផ្លូវថ្នល់វិញដោយសុវត្ថិភាពក្នុងហេតុការណ៍នេះត្រូវបានគ្មានសមត្ថកិច្ចពាក់ព័ន្ធណាបានចុះទៅធ្វើអន្តរាគមន៍នោះឡើយ ៕
ខេត្តកំពង់ធំ៖មនុស្ស៣នាក់ ស្លាប់យ៉ាងអាណោចអាធ័ម និង៤នាក់ទៀតរងរបួសធ្ងន់ក្នុងករណីគ្រោះថ្នាក់ចរាចរណ៍ដ៏រន្ធត់រវាងរថយន្ត២គ្រឿងបុកពេញទំហឹងបណ្តាលឲ្យផ្ទុះឆេះយ៉ាងសន្ធោសន្ធៅ។ ហេតុការណ៍នេះកើតឡើងយប់មិញស្ថិតនៅតាមផ្លូវជាតិលេខ៦ ស្រុកស្ទោង ខេត្តកំពង់ធំ។
មន្ត្រីនគរបាលស្រុកស្ទោង ខេត្តកំពង់ធំ បានឲ្យដឹងថា រថយន្តមួយគ្រឿងម៉ាកទេសចរណ៍ធន់តូច និងមួយគ្រឿងទៀតម៉ាកសាំងយ៉ុងដឹកបន្លែ។ លោកបញ្ជាក់ថា មុនពេលកើតហេតុរថយន្តសាំងយ៉ុងដឹកបន្លែ ធ្វើដំណើរទិសដៅចេញពីកំពង់ធំទៅសៀមរាប លុះដល់ចំណុចឃុំទ្រា ស្រាប់តែទៅបុកជាមួយរថយន្តប្រភេទទេសចរណ៍ធុនតូច បណ្តាលឲ្យផ្ទុះឆេះ ហើយបណ្តាលឲ្យជនរងគ្រោះ៣នាក់ត្រូវឆេះស្លាប់ក្នុងរថយន្ត ខណ:ម្នាក់ទៀតរងរបួសធ្ងន់។ ដោយឡែកអ្នកជិះរថយន្តសាំងយ៉ុងដឹកបន្លែ ៣នាក់ក៏រងរបួសធ្ងន់ផងដែរ។
ទោះយ៉ាងណាក៏ដោយសមត្ថកិច្ចមិនទាន់បញ្ជាក់ពី អត្តសញ្ញាណជនរងគ្រោះនៅឡើយទេ៕
ខេត្តបន្ទាយមានជ័យ៖កម្មករខ្មែរចំនួន៦នាក់ ត្រូវបានកម្លាំងយោធាថៃ សហការជាមួយនឹង ក្រុមតម្រួតថៃតាមប្រមាញ់ នឹងឃាត់ខ្លួនបាន ខណៈដែលពួកគេ កំពុងជិះក្នុងរថយន្ត ដែលដឹកឈើក្រញូង បម្រុងលោតឆ័ត្រមកកាន់ ព្រំដែនកម្ពុជានាខេត្តស្រះកែវ។
យោងតាមរបាយការណ៍របស់ក្រុមតម្រួតថៃ ដែលបានប្រាប់យោធាខ្មែរ បានឲ្យដឹងថា នៅវេលាម៉ោង៣ រសៀល ថ្ងៃទី១៧ ខែកញ្ញា ឆ្នាំ២០១៦ អង្គភាពរបស់ស្ថានីយតម្រួតថៃប្រចាំខេត្ត ប្រាជីនបុរី បានទទួលព័ត៌មានមួយពី សំណាក់ទាហានជួរមុខតាមបន្ទាត់ព្រំដែន ស្តីពីការដឹកឈើក្រញូងរបស់រថយន្ត ចំនួន ៣គ្រឿង ដែលកំពុងបើកបរតាមបណ្តោយ ផ្លូវសុវណ្ណាខន ឆ្ពោះទៅកាន់ខេត្តស្រះកែវ ។
ក្រោយពីទទួលបានព័ត៌មាននេះភ្លាម កម្លាំងបានបោះដៃ ទាក់ទង ទៅកាន់ស្ថានីយ៍តម្រួតខ្លងមី ប្រចាំស្រុកមឿង ខេត្តស្រះកែវ ដើម្បីដាក់បារ៉ាស់ស្កាត់ មិនអោយរថយន្តនេះគេចបាន ព្រមទាំងបានផ្តល់សញ្ញា អោយរថយន្តទាំង ៣គ្រឿងនេះ ឈប់ដើម្បីធ្វើការត្រួតពិនិត្យ នៅត្រង់ចំណុចខាងមុខ មន្ទីរពេទ្យវឌ្ឍនាណាក់ខន ។
ផ្ទុយទៅវិញ គឺមានរថយន្តមួយគ្រឿង ក្នុងចំណោមរថយន្តទាំង ៣គ្រឿងនោះ ម៉ាក Vigo ពណ៌ខ្មៅ ពាក់ស្លាកលេខ បាងកក ៧៣៦៩ បានបើករត់ដោយបានបំពាន ទៅលើបារ៉ាស់ ដែលក្រុមតម្រួតដាក់កាត់ផ្លូវ ធ្វើអោយកង់រថយន្តត្រូវបែកមិនអាចបើកបរទៅមុខទៀតបាន ទើបអ្នកបើកបរដ៏វ័យក្មេង និងទើបតែមានអាយុ ១៨ឆ្នាំ បានបើកទ្វារអោយកម្មករខ្មែរចំនួន៦នាក់ ដែលជិះនៅក្នុងរថយន្ត រត់គេចខ្លួនតែមិនអាចគេខផុតបានទេ គឺត្រូវសមត្ថកិច្ចឃាត់ខ្លួន បានទាំងអស់លើកលែងតែ អ្នកបើកបររថយន្តចំនួន ពីរគ្រឿងដែលឈប់ សំចតត្រឹមត្រូវនោះ បានរត់គេចខ្លួន បាត់ស្រមោល ។
ក្រោយពេលបញ្ចប់កិច្ចប្រតិបត្តិការ ក្រុមតម្រួតបានយកត្រាក់ទ័រ មកអូសយករថយន្ត ដែលបែកកង់ទៅកាន់ស្ថានីយ៍ តម្រួតខេត្តស្រះកែវ ព្រមទាំងបានពិនិត្យឃើញថា រថយន្ត ទាំងនេះមានផ្ទុកឈើគ្រញូង សរុបមានចំនួន ៣៣ កំណាត់ ដោយអ្នកបើកបរវ័យក្មេង រូបនោះបានសារភាពថា ការដឹកឈើគ្រញូងនេះគឺខ្លួនគ្រាន់តែជាអ្នកសុីឈ្នួលបើករថយន្ត អោយថៅកែធំ ដែលជាឈ្មួញឈើតែប៉ុណ្ណោះ គឺបានទទួលកម្រៃក្នុងមួយជើង ១មុឺនបាត ចំណែកកម្មករខ្មែរទាំង៦នាក់ ក៏ជាអ្នកសុីឈ្នួលចូលទៅក្នុង តំបន់ហាមឃាត់ដើម្បីកាប់ឈើ ក្រញូងនោះដែរ ដើម្បីទទួលបានប្រាក់ បន្តិចបន្ទួចគ្រាន់ចិញ្ចឹមជីវិត។
បច្ចុប្បន្នកម្មករខ្មែរទាំង ៦នាក់ ត្រូវបានក្រុមតម្រួតថៃ ប្រគល់ទៅអោយជំនាញ ដើម្បីចាត់វិធានការតាមផ្លូវច្បាប់៕
រាជធានីភ្នំពេញ៖សាលាដំបូងរាជធានីភ្នំពេញនៅព្រឹកថ្ងៃទី១៩ ខែកញ្ញា ឆ្នាំ២០១៦ បានសម្រេចផ្ដន្ទាទោសស្ត្រីបឹងកក់៤នាក់ ដាក់ពន្ធនាគារក្នុងម្នាក់ៗ៦ខែ ដោយគ្មានពិន័យជាប្រាក់ទេ ក្រោមការចោទប្រកាន់ពីបទ «ប្រមាថអ្នករាជការសាធារណៈ និងបទប្រឆាំងនឹងអ្នករាជការសាធារណៈ មានស្ថានទម្ងន់ទោស» តាមមាត្រា ៥០២ និងមាត្រា ៥០៤ នៃក្រមព្រហ្មទណ្ឌ ប្រព្រឹត្តនៅមុខសាលារាជធានីភ្នំំពេញ កាលពីថ្ងៃទី២៨ ខែវិច្ឆិកា ឆ្នាំ២០១១ ។
គួរបញ្ជាក់ថា ស្ត្រីបឹងកក់ទាំង៤នាក់ឈ្មោះ ទេព វន្នី បច្ចុប្បន្នកំពុងជាប់ពន្ធនាគារ និង៣នាក់ទៀតឈ្មោះ បូ ឆវី ឈ្មោះ គង់ ចន្ថា និង ឈ្មោះ ហេង មុំ ។ ប៉ុន្តែពេលសវនាការ ស្ត្រីឈ្មោះ ហេង មុំ ពុំមានវត្តមានទេ ។សំណុំរឿងនេះ គឺសាលារាជធានីភ្នំពេញ ជាដើមបណ្ដឹង៕
រាជធានីភ្នំពេញ៖ចាប់ពីថ្ងៃទី១៩ ដល់ថ្ងៃទី២៥ ខែកញ្ញា ឆ្នាំ ២០១៦នេះ មានភ្លៀងបន្តធ្លាក់រាយប៉ាយស្ទើរទូទាំងប្រទេសពីធម្យមទៅច្រើន។ នេះបើយោងតាមសេចក្តីប្រកាសស្តីពីការព្យាករណ៍អាកាសធាតុ របស់ក្រសួងធនធានទឹក និងឧតុនិយម។
ប្រកាសព័ត៌មានដដែលបញ្ជាក់ថា ចាប់ពីថ្ងៃទី២១ ដល់ថ្ងៃទី២៥ ខែកញ្ញា ឆ្នាំ២០១៦ អាចនឹងមានភ្លៀងធ្លាក់ច្រើនបណ្តាខេត្តមួយចំនួន ដូចជា ខេត្តមណ្ឌលគិរី រតនគិរី ស្ទឹងត្រែង ឧត្តរមានជ័យ សៀមរាប កំពង់ធំ និងខេត្តបន្ទាយមានជ័យ អាចប្រឈមនឹងជំនន់ទឹកភ្លៀង៕ សូមអានសេចក្តីប្រកាសរបស់ក្រសួងធនធានទឹកទាំងស្រុង៖
ខេត្តកណ្តាល៖យុវជនម្នាក់បានសម្រេចចិត្តចងកសម្លាប់ខ្លួននៅខាងមុខផ្ទះបញ្ចប់បញ្ហា ព្រោះតែគ្មាន លុយចូលស្ដីដណ្ដឹងកូនស្រីគេខ្លួនស្រលាញ់ ដែលហេតុការណ៍បង្កការភ្ញាក់ផ្អើលនេះកើតឡើងនៅយប់ថ្ងៃទី១៨ ខែកញ្ញា ឆ្នាំ២០១៦ ស្ថិតក្នុងភូមិតាពៅ ឃុំកោះចិន ស្រុកពញាឮ ខេត្តកណ្តាល។
យុវជនរងគ្រោះឈ្មោះ ឆាំ ធារ៉ា អាយុ ២០ឆ្នាំ មុខរបរកសិករ រស់នៅក្នុងភូមិកើតហេតុ។ ក្រោយពីការពិនិត្យរួចរាល់ សពត្រូវបានប្រគល់ជូនក្រុមគ្រួសារ ដើម្បីយកទៅធ្វើបុណ្យ តាមប្រពៃណី។
ប្រភពពីអ្នកជិតខាងបានបង្ហើបឲ្យដឹងថា យុវជនខាងលើចងកសម្លាប់ខ្លួនដោយសារតូចចិត្តគ្មានលុយដណ្តឹងប្រពន្ធ ព្រោះប៉ុន្មានថ្ងៃមុនពេលស្លាប់នោះ គេធ្លាប់ប្រាប់អ្នកជិតខាងថា គេស្រឡាញ់កូនគេម្នាក់នៅក្នុងភូមិ ប៉ុន្តែមិនដឹងបានលុយពីណាមកដណ្តឹង ដោយសារជីវភាពគ្រួសារក្រីក្រ ដូច្នេះរហូតដល់ជនរងគ្រោះចងកសម្លាប់ខ្លួន ទើបមានការភ្ញាក់ផ្អើលតែម្តងទៅ។
ប្រភពបន្តថា មុនពេលកើតហេតុជនរងគ្រោះ បានដើរចេញបាត់ពីផ្ទះមួយថ្ងៃ មិនដឹងទៅណាដល់ម៉ោងកើតហេតុ ក្រោយពីរាំងភ្លៀងឪពុកជនរងគ្រោះ បានបញ្ចាំងភ្លើងពិល ពីលើផ្ទះស្រាប់តែឃើញកូនចងកសម្លាប់ខ្លួនស្លាប់បាត់ទៅហើយ នៅដើមសង្កែមុខផ្ទះ រួចបានរាយការណ៍ឲ្យនគរបាលចុះមកពិនិត្យសាកសព ភ្លាមនោះដែរកម្លាំងជំនាញ បច្ចេកទេស សហការជាមួយកម្លាំងប៉ុស្តិ៍នគរបាលមូលដ្ឋាន ចុះពិនិត្យសាកសព តាមការសន្និដ្ឋានរបស់គ្រូពេទ្យឃើញថា ជនរងគ្រោះពិតជាស្លាប់ ដោយចងកសម្លាប់ខ្លួន ពិតប្រាកដមែន៕
រាជធានីភ្នំពេញ៖រថយន្តទំនើប១គ្រឿងម៉ាក តាកូម៉ាបោះពួយយ៉ាងលឿនជ្រុលបុករបងស្ថានីយផ្សាយរបស់ទូរទស្សន៍ជាតិកម្ពុជា (ទទក) ពេញទំហឹងបណ្ដាលឲ្យធ្លាយពីម្ខាងទៅម្ខាងរងការខូចខាតធ្ងន់ធ្ងរ។ ហេតុការណ៍នេះកើតឡើងកាលពីវេលាម៉ោង១១យប់ ថ្ងៃទី១៨ ខែកញ្ញា ឆ្នាំ២០១៦ ត្រង់ចំណុចរបងស្ថានីយផ្សាយរបស់ទូរទស្សន៍ជាតិកម្ពុជា ស្ថិតតាមបណ្ដោយផ្លូវលេខ២៧៣ សង្កាត់ទួលសង្កែ ខណ្ឌឫស្សីកែវ ។
តាមប្រភពព័ត៌មានឲ្យដឹងថា មុនពេលកើតហេតុគេឃើញរថយន្តទំនើប១គ្រឿងម៉ាក តាកូម៉ា ពណ៌ស ពាក់ស្លាកលេខ ភ្នំពេញ 2D-3840 បើកបរដោយបុរសម្នាក់មិនស្គាល់ឈ្មោះក្នុងទិសដៅពីជើងទៅត្បូងតាមផ្លួវខាងលើក្នុងល្បឿនលឿនដូចហោះ តែដោយសារម្ចាស់រថយន្តស្រវឹង លុះមកដល់ចំណុចកើតហេតុផ្លូវបត់វាង តែរថយន្តមិនបានបត់វាងខាងឆ្វេងឡើយ គឺទៅត្រង់ធ្វើឲ្យរថយន្តជ្រុលទៅបុករបងស្ថានីយផ្សាយរបស់ទូរទស្សន៍ជាតិកម្ពុជា បណ្ដាលឲ្យធ្លាយរបងម្ខាងទៅម្ខាង។
ក្រោយពេលកើតហេតុ រថយន្តខូចខាតផ្នែកខាងមុខទាំងស្រុង ហើយនៅជាប់ក្នុងរបងខាងលើទៅមុខលែងរួច ចំណែកឯរបងខាងលើវិញគឺខូចខាតយ៉ាងធ្ងន់ធ្ងរ យ៉ាងណាក៏ដោយគេឃើញម្ចាស់រថយន្តបើកទ្វារចេញពីក្នុងរថយន្តបង្កខាងលើទាំងសភាពរងរបួសស្រាលតែប៉ុណ្ណោះ។
ក្រោយមកសមត្ថកិច្ចមូលដ្ឋានបានចុះមកដល់កន្លែងកើតហេតុ ដើម្បីអន្តរាគមន៍ និងឃាត់ខ្លួនបុរសជាអ្នកបើកបររថយន្តខាងលើ ដើម្បីប្រគល់ឲ្យទៅខាងសមត្ថកិច្ចចរាចរណ៍របស់ស្នងការរាជធានីយកទៅធ្វើកំណត់ហេតុ ចំនែកឯរថយន្តក៏ត្រូវបានស្ទូចយកទៅរក្សាទុកនៅស្នងការដ្ឋាននគរបាលរាជធានីភ្នំពេញផងដែរដើម្បីរង់ចាំការដោះស្រាយនៅពេលក្រោយ ៕
រាជធានីភ្នំពេញ៖ឆ្លើយតបការលើកឡើងរបស់មនុស្សមួយចំនួនដែលថា ស្រុកខ្មែរកំពុងមានវិបត្តិនយោបាយធ្ងន់ធ្ងរនោះ សម្តេចនាយករដ្ឋមន្ត្រី ហ៊ុន សែន បានអះអាងជាថ្មីថា ស្រុកខ្មែរអត់មានវិបត្តិនយោបាយនោះទេ ។ សម្តេចបញ្ជាក់ថា កុំយករឿងបុគ្គលមកឡូកឡំនឹងរឿងនយោបាយ ហើយរឿងរ៉ាវកន្លងមកគឺជារឿងរបស់បុគ្គល ដែលធ្វើឲ្យមានកំហុស ហើយត្រូវតុលាការអនុវត្តតាមនិតិវិធីប៉ុណ្ណោះ ។ តុលាការគេមិនដែលចេះតែកាត់ទោស ចេះតែចាប់មនុស្សនោះទេ វាទាល់តែមនុស្សនោះធ្វើឲ្យមានកំហុសឬមានទោស ។ ដូច្នេះអ្នកណាធ្វើខុសមានទោស ទៅទទួលទោសទៅជាប់គុកខ្លួនឯងទៅវាចប់រឿងបាត់ទៅហើយ ។
សម្តេច ហ៊ុន សែន លើកឡើងថា មានអ្នកខ្លះគំរាមថា បើមិនចរចា គេធ្វើបាតុកម្ម ។ ប៉ុន្តែសម្តេចបញ្ជាក់ថា បើចរចាគឺឆ្កែ សុទ្ធតែម្តង , សម្តេចមិនចរចាដាច់ខាត ហើយកន្លែងចរចាគឺមានតែនៅសភាប៉ុណ្ណោះ តែអ្នកឯងបានរត់ចោលសភាខ្លួនឯង ។
សម្តេចព្រមានផងដែរ សូមកុំឲ្យបរទេសលូកដៃចូលកិច្ចការផ្ទៃក្នុងកម្ពុជាឲ្យសោះ ។ ប៉ុន្តែសម្តេចមិនធ្វើដូចប្រធានាធិបតី ហ្វីលីពីននោះទេ ។
សម្តេចថ្លែងថា បើចិត្តសឿងធ្វើបាតុកម្មភ្លាមៗ ទៅ ព្រោះសម្តេចបានចេញបញ្ជារួចហើយ ធ្វើបាតុកម្មកន្លែងណាត្រូវរៀបចំធ្វើកន្លែងនោះ ។ ដូច្នេះសាកមើលទៅ ហើយការលើកឡើងអញ្ចឹងមិនមែនជាការគំរាមនោះទេ តែអ្នកឯងទៅវិញទេ ដែលគំរាមគេមុន៕
រាជធានីភ្នំពេញ៖ប្រមុខរាជរដ្ឋាភិបាលកម្ពុជា សម្តេច ហ៊ុន សែន បានបញ្ជាក់ជាថ្មីថា ឆ្នាំនេះ ត្រូវតែរៀបចំពិធីបុណ្យអុំទូក បើទោះបីជាទឹកតិចក៏ដោយ ។ ការបញ្ជាក់របស់សម្តេចធ្វើឡើងក្នុងឱកាសដែលសម្តេចចូលរួមក្នុងពិធីចែកសញ្ញាប័ត្រដល់និស្សិតសាកលវិទ្យាល័យបញ្ញាជាតិ នាព្រឹកថ្ងៃទី១៨ ខែកញ្ញា ឆ្នាំ២០១៦នេះ ។
សម្តេចបានលើកឡើងថា តាមការព្យាករណ៍ឆ្នាំនេះ ទឹកមានលក្ខណៈល្អជាងឆ្នាំមុន ។ ដូច្នេះត្រូវតែរៀបចំពិធីបុណ្យអុំទូក មិនផ្អាកទៀតនោះទេ ។
នាឱកាសនោះសម្តេចក៏សុំឲ្យរដ្ឋមន្ត្រីក្រសួងអប់រំពិចារណាឡើងវិញ អំពីគោលការណ៍ដែលអនុញ្ញាតិឲ្យសិស្សជាប់បាក់ឌុប និទ្ទេស A,B,C ជាប់ក្របខណ្ឌគ្រូជាស្វ័យប្រវត្តិ ព្រោះកន្លងមកមានសិស្សតវ៉ាច្រើនថា គោលការណ៍នេះ វាអយុត្តធម៌សម្រាប់សិស្សជាប់និទ្ទេស D និង E ដែលចង់ចូលក្របខណ្ឌគ្រូដូចគ្នា ។ ដូច្នេះតើត្រូវរៀបចំឲ្យប្រឡងទាំងអស់គ្នាឬយ៉ាងណា ?៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
