All posts by មេគង្គ ប៉ុស្តិ៍

ឃាត់ខ្លួនជនសង្ស័យម្នាក់ក្នុងករណីបាញ់រះអ្នកនេសាទនៅស្រុកសំបូរ

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ប្រុញ វិធិន
ខេត្តក្រចេះ៖ជនសង្ស័យម្នាក់ ក្នុងចំណោមបក្ខពួកពីរនាក់ ក្នុងករណីផ្ទុះអាវុធខ្មាន់កាំភ្លើងបាញ់រះជាច្រើនគ្រាប់មកលើអ្នកនេសាទ នៅស្រុកសំបូរ នៅពេលនេះ កម្លាំងនគរបាល បានស្រាវជ្រាវចាប់ឃាត់ខ្លួនបានជនសង្ស័យម្នាក់ហើយ ។
លោកវរសេនីយ៍ត្រី ណយ ស៊ីថាច អធិការរងនគរបាលស្រុកសំបូរ ទទួលយុត្តិធម៌ បានឲ្យដឹងថា ជនសង្ស័យម្នាក់ ត្រូវបានកម្លាំងនគរបាលស្រុក សហការជាមួយកម្លាំងនគរបាលព្រហ្មទណ្ឌខេត្ត ចុះស្រាវជ្រាវ ឃាត់ខ្លួនបានសង្ស័យម្នាក់ ក្នុងអំពើបាញ់ប្រហារមកលើជនរងគ្រោះជាអ្នកនេសាទ ក្រោយពីកើតហេតុបាន២ថ្ងៃកន្លងមកនេះ ។
បើទោះជាបែបណា ក៏នគរបាលមិនទាន់បង្ហាញអត្តសញ្ញាណលើជនសង្ស័យ ក្នុងអំពើបាញ់ប្រហារនេះនៅឡើយទេ ដោយបានបញ្ជាក់ថានគរបាលកំពុងតែសាកសួរ និងស្រាវជ្រាវបន្តនីតិវិធី ។ តែទោះជាយ៉ាងនេះក្តី បើយោងតាមប្រភពពីប្រជាពលរដ្ឋ និងមន្ត្រីឆ្មាំទន្លេនៅភូមិកោះខ្ញែរ បានលួចប្រាប់ឲ្យដឹងថា ជនសង្ស័យដែលត្រូវកម្លាំងនគរបាលជំនាញឃាត់ខ្លួនកាលពីរសៀលថ្ងៃទី២៨ ខែសីហា ម្សិលមិញនេះ គឺមានឈ្មោះ សុខ ថាន ភេទប្រុស អាយុ ៥០ឆ្នាំ រស់នៅភូមិព័ន្ធជា ឃុំអូរគ្រៀង ស្រុកសំបូរ និងជាសមាជិក សហគមន៍នេសាទភូមិពន្ធ័ជានោះផងដែរ ។ ហើយជនសង្ស័យរូបនោះ បានសារភាពថា ខ្លួនមិនមែនជាអ្នកបាញ់ទេ គឺកូនប្រុសខ្លួនជាអ្នកបាញ់ ហើយពេលនេះកូនប្រុសរបស់គាត់ ដែលជាជនដៃដល់បានរត់គេចខ្លួនបាត់មិនដឹងទៅទីណាទេ ។
ប្រជាពលរដ្ឋដែលរស់នៅក្បែរកន្លែងកើតហេតុ បានឲ្យដឹងថា សកម្មភាពបាញ់ប្រហារខាងលើកើតឡើង នៅវេលាម៉ោង ១១ថ្ងៃត្រង់ ថ្ងៃទី ២៦សីហា នៅត្រង់ចំនុចអន្លង់ត្រឡោក ជាប់គ្នានឹងអន្លង់សាកង្កែប ភូមិព័ន្ធជា ឃុំអូរគ្រៀង ស្រុកសំបូរ កណ្តាល ទន្លេមេគង្គ មកលើប្រជាពលរដ្ឋដែលបាននាំគ្នាជិះទូកត្រឡប់ចុះមកពីលើកលបវិញ។
ជនរងគ្រោះដែលរងការ បាញ់ប្រហារពីខ្មាន់កាំភ្លើងមិនស្គាល់មុខឈ្មោះ ឃឹម សុខន ភេទប្រុស អាយុ២៤ឆ្នាំ រស់នៅភូមិកំពង់រទះ ឃុំបឹងចារ ស្រុកសំបូរ។ បានរងរបួសធ្ងន់ត្រង់ចង្កេះ និងក៏ត្រូវបានចាត់បញ្ជុនមកសង្គ្រោះនៅមន្ទីពេទ្យខេត្ត។
បើតាមការបញ្ជាក់ពីពលរដ្ឋដែលរងគ្រោះ និងពលរដ្ឋដែលជួបហេតុការណ៍បានប្រាប់ នគរបាលថា នៅថ្ងៃកើតហេតុ ជនរងនិងអ្នកភូមិពីរនាក់ទៀតបានចេញពីលើកលប ជិះទូកចុះទឹកត្រឡប់មកផ្ទះវិញ ក៏ស្រាប់តែមានជនមិនស្គាល់មុខ២នាក់ ស្លៀកពាក់ស៊ី វិលបានជិះទូកអេវ មួយគ្រឿងមកអែបនិងទូករបស់ជនរងគ្រោះចម្ងាយប្រហែល ១០០ម៉ែត្រ ហើយក៏បាញ់កាំភ្លើងអាការ រះមកលើទូកជនរងគ្រោះចំនួន៧គ្រាប់ បណ្តាលឲ្យត្រូវ របួសម្នាក់។ ភ្លាមៗបន្ទាប់ពីបានបាញ់រួច ទូករបស់ជននោះក៏បានបតឡើងទៅលើវិញ។
ទោះជាយ៉ាងណាក្នុងហេតុការណ៍នេះ ជនរងគ្រោះក៏ដូចជាពលរដ្ឋដែលនៅលើទូក នោះមិនបានស្គាល់អត្តសញ្ញាណជនដៃដល់ទាំងនោះទេ ដោយសារតែទូកនៅឆ្ងាយពីគ្នា ហើយពួកគាត់មានភាពភិតភ័យមិនបានចាប់អារម្មណ៍និងសម្គាល់មនុស្ស តែសំណាងល្អ ដោយសារតែទឹករលក ហើយទឹកហូរខ្លាំងធ្វើឲ្យខ្មាន់កាំភ្លើងបាញ់រះមិនចំគោលដៅច្រើន។
មានការកត់សម្គាល់ថា ការទៅធ្វើនេសាទរបស់ពលរដ្ឋរងគ្រោះ គឺធ្វើនៅក្នុងឡូត៍សហគមនេសាទស្រុកសំបូរ។ ហើយកន្លងក៏ធ្លាប់បានការ បាញ់ប្រហារជាបន្តបន្ទាប់របស់មន្ត្រី សហគមទៅលើទូកនេសាទដែលទៅនេសាទក្នុងតំបន់នោះ និងក៏ឈានឲ្យមានការចាប់ បង្ក្រាបបានទូកនេសាទបានចំនួន២គ្រឿងផងដែរ៕

រឹបអូសមាន់បីសាសន៍រាប់រយក្បាលដែលឈ្មួញលួចនាំចូលក្នុងទីផ្សារខេត្តបាត់ដំបង

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ប៉ែនសុផល
បាត់ដំបង៖មន្ដ្រីជំនាញបសុពេទ្យចុះរឹបអូសសត្វមាន់ពូជបីសាសន៍បានចំនួន៤០០ក្បាលដែលឈ្មួញលួចនាំចូលខុសច្បាប់ចែកចាយនៅក្នុងទីផ្សារខេត្តបាត់ដំបង។
លោក ប៉ែន ស៊ីថា ប្រធានការិយាល័យបសុពេទ្យនៃមន្ទីរកសិកម្មខេត្តបាត់ដំបងបានប្រាប់អោយដឹងថាកាលពីវេលាម៉ោង៣ និង៣០នាទីរំលងអធ្រាត្រថ្ងៃទី២៨ ខែសីហា ឆ្នាំ២០១៦ មន្ដ្រីការិយាល័យជំនាញសហការជាមួយសមត្ថកិច្ចក្រុងបាត់ដំបងបានចុះរឹបអូសសត្វមាន់ដែលឈ្មួញចរាចរខុសច្បាប់ចំនួន៤០ស្ការ ប្រហាក់ប្រហែលមាន់ចំនួន៤០០ក្បាលនៅលើកំណាត់ជាតិលេខ៥ ក្នុងចំនុចភូមិអូរចា សង្កាត់អូរចា ក្រុងនិងខេត្តបាត់ដំបង។
ការចុះរឹបអូសនេះធ្វើឡើងឆ្លើយតបតាមសេចក្ដីរាយការណ៍របស់ប្រជាពលរដ្ឋដែលអះអាងថា មានក្រុមឈ្មួញបានលួចលាក់នាំសត្វមាន់ចេញពីប្រទេសថៃស្ទើរៀងរាល់ថ្ងៃដោយមិនមានច្បាប់អនុញ្ញាត។ ការរឹបអូសបាននេះដែរខណៈដែលឈ្មួញកំពុងដឹកជញ្ជូនតាមរ៉ឺម៉កម៉ូតូក្នុងគោលដៅពីតំបន់ព្រំដែនសំដៅទៅកាន់ទីផ្សារក្នុងក្រុងបាត់ដំបងនៅពេលយប់ មកទល់រសៀលថ្ងៃដដែលនេះនៅមិនទាន់ឃើញមានម្ចាស់មាន់ចូលខ្លួនមកដោះស្រាយនៅឡើយទេដើម្បីអនុវត្តតាមនីតិវិធី។
ទាក់ទងលើវិធានការមន្ដ្រីនៅក្នុងមន្ទីរកសិកម្មខេត្តបាត់ដំបងបានអោយដឹងដែរថា ករណីដូចគ្នានេះធ្លាប់មានកន្លងមកដែរដែលមាន់មានចំនួន១០០ស្កា តែមន្ទីរសម៉ីគ្រាន់តែអោយម្ចាស់ធ្វើកិច្ចសន្យាបញ្ឍប់នាំចូលទៀត មិនយូរប៉ុន្មានឈ្មួញដដែលនេះបានបន្ដរនាំចូលមាន់លួចលាក់ខុសច្បាប់ដដែល ចំណាត់ការមិនរាងចាលនេះមន្ទីរ និងអនុវត្តយកវត្ថុវិភាគទៅពិនិត្យមេរោគនៅក្រសួងកសិកម្ម បន្ទាប់មក និងមានវិធានការតាមផ្លូវច្បាប់។
ប្រជាពលរដ្ឋនៅតំបន់ព្រំដែនបានបង្ហើបអោយដឹងថា៖ សត្វមាន់ទាំងធំនិងកូនមាន់ផងដែរក្នុង១ថ្ងៃរាប់ម៉ឺនក្បាលដែលឈ្មួញបាននាំចូលនៅពេលអាធ្រាតតាមច្រករបៀងបឹងឆ្នាំងក្នុងស្រុកកំរៀងក្រោមរូបភាពផ្សេងៗពីគ្នា ឈ្មួញ១ចំនួនបាននាំចូលដោយត្រូវរូវគ្នាជាមួយសមត្ថកិច្ចនិងជំនាញប្រចាំច្រកបើកភ្លើងខៀវអោយនាំចូលមិនមានច្បាប់អនុញ្ញាតិទាំងស្រុងឈ្មួញទាំងនេះដឹកមាន់មកទំលាក់នៅក្បែរទីប្រជុំជនស្រុកថ្មគោលហើយរំដោះចេញបន្ដរតាមរ៉ឺម៉កម៉ូតូនិងឈ្មួញមួយចំនួននាំចូលដោយជ្រកកោនមានច្បាប់អនុញ្ញាតិ ប៉ុន្ដែការនាំចូលជាក់ស្ដែងលើសពីច្បាប់បានកំណត់ទ្វេគុណ។
ការនាំចូលតាមប្រពៃណីត្រូវរូវគ្នានេះបានធ្វើអោយអ្នកបរិភោគក្នុងស្រុកប្រឈមនិងការឆ្លងជម្ងឺគ្រប់ប្រភេទពិសេសជម្ងឺផ្ដាសាយបក្សី ក្រៅពីនេះបានធ្វើអោយកសិដ្ឋានចិញ្ចឹមមាន់ក្នុងស្រុងត្រូវបាក់ទឹកចិត្តក្នុងការប្រកួតប្រជែងលើទីផ្សារ៕

បើមិនឆ្លើយតបនឹងប្រមូលផ្តុំធ្វើបាតុកម្មប្រឆាំងវៀតណាម

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖បើទោះជាការដង្ហែក្បួនដាក់ញត្តិរបស់ គណបក្សយុវជនកម្ពុជា ដឹកនាំដោយ លោក ពេជ្រ ស្រស់ បានរំសាយហើយក៏ដោយ ប៉ុន្តែប្រធានគណបក្សយុវជន បានព្រមានថា បើសិនមិនមានការឆ្លើយតប ពីស្ថានទូតវៀតណាមក្នុងរយៈពេលមួយខែទេនោះ លោកនឹងគៀកគរ កម្លាំងអ្នកស្នេហាជាតិ ធ្វើបាតុកម្ម ប្រឆាំងនឹងស្ថានទូតវៀតណាម ដោយលោករំពឹងថា បាតុកម្មនោះនឹងមានអ្នកចូលរួមច្រើន ។
គួរម្លឹកថា នៅព្រឹកថ្ងៃច័ន្ទនេះ លោក ពេជ្រ ស្រស់ បានយកញ្ញាត្តិទៅដាក់នៅស្ថានទូតវៀតណាម ប្រចាំរាជធានីភ្នំពេញ ដោយទាមទារឲ្យវៀតណាមបំភ្លឺករណីដែលប្រទេសនេះ បានរំលោភលើព្រំដែនកម្ពុជា ។ ប៉ុន្តែពុំមានមន្ត្រីស្ថានទូតចេញមកទទួលនោះទេ, ផ្ទុយទៅវិញមានអភិបាលរងខ័ណ្ឌចំកាមនម្នាក់ ចេញមុខមកទទួលញាត្តិនោះទៅវិញ។
លោក ពេជ្រ ស្រស់ បានចាត់ទុក ការមិនចេញមុខមកទទួលញត្តិពីសំណាក់ស្ថានទូតវៀតណាម គឺជាការប្រមាថ និងមើលងាយដល់ គណបក្សយុវជន ក៏ដូចជាប្រជាពលរដ្ឋខ្មែរ ។ ដូច្នេះហើយលោកនឹងធ្វើបាតុកម្មប្រឆាំងវៀតណាម ប្រសិនបើពុំមានការបំភ្លឺណាមួយពីស្ថានទូតនោះ ។
គួរបញ្ជាក់ថា ក្នុងញត្តិនោះ មានការទាមទារ៣ចំណុច រួមមាន៖ ទី១. រដ្ឋាភិបាលវៀតណាម ត្រូវចេញសេចក្តីថ្លែងការណ៍មួយជាសាធារណៈ ដើម្បីបញ្ជាក់គោលជំហរខ្លួនឱ្យច្បាស់លាស់ ក្នុងការបញ្ឈប់សកម្មភាពរំលោភ បូរណភាពទឹកដីកម្ពុជា។ ទី២. រដ្ឋាភិបាលវៀតណាម ត្រូវតែរុះរើគ្រប់សំណង់ទាំងឡាយណា ដែលបានសាងសង់នៅតំបន់ហាមឃាត់តាមព្រំដែនកម្ពុជា – វៀតណាម គ្រប់កន្លែង និងលុបស្រះដោយ គ្មានលក្ខខណ្ឌ ទី៣. រដ្ឋាភិបាលប្រទេសវៀតណាម ត្រូវបញ្ឈប់បន្ទាន់ចំពោះសកម្មភាព ប្រើហិង្សាលើប្រជាពលរដ្ឋខ្មែរដែលរស់នៅ តាមបណ្តោយព្រំដែនកម្ពុជា-វៀតណាម ៕

អ្នកបឹងកក់បន្តយុទ្ធនាការថ្ងៃច័ន្ទអាវខ្មៅដោយមិនខ្លាចការចាប់ខ្លួន

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖ពលរដ្ឋសហគមន៍បឹងកក់ប្រហែល៣០នាក់ បានបន្តពាក់អាវខ្មៅ ហើយប្រមូលផ្ដុំគ្នានៅក្នុងសហគមន៍របស់ពួកគេនៅព្រឹកថ្ងៃច័ន្ទនេះ ដើម្បីទាមទារឲ្យដោះលែងសកម្មជនដីធ្លី អ្នកស្រី ទេព វន្នី ដែលត្រូវបានអាជ្ញាធរចាប់ខ្លួនកាលពី ២សប្ដាហ៍មុន រួមទាំងការទាមទារឲ្យដោះលែងមន្ត្រីសិទ្ធិមនុស្ស និងមន្ត្រីរៀបចំការបោះឆ្នោត ដែលកំពុងជាប់ឃុំ នៅពន្ធនាគារព្រៃសរ៕

រួមភេទច្រើនលើកមិនអី ព្រោះតែមិនមានលុយឲ្យ នាងប្តឹងថាចាប់រំលោភ

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តស្ទឹងត្រែង៖សមត្ថកិច្ចបានចាប់ខ្លួនបុរសម្នាក់ពីបទរំលោភសេពសន្ថវៈលើនារីម្នាក់ជាមនុស្សស្គាល់ចិត្តថ្លើមគ្នា ប៉ុន្តែថ្ងៃរួមភេទចុងក្រោយត្រូវបាននាងប្តឹង។ ហេតុការណ៍នេះកើតឡើងកាលពីយប់ថ្ងៃទី២៦ ខែសីហា ឆ្នាំ២០១៦ ស្ថិតនៅចំណុចទួលខ្លាក្រហឹម ក្នុងភូមិសំអាង ឃុំសំអាង ស្រុកថាឡាបរិវ៉ាត់។
បុរសជាប់ចោទបានប្រាប់ថា កន្លងមកខ្លួននឹងនារីរងគ្រោះ គឺជាមនុស្សស្គាល់គ្នា និងធ្លាប់រួមភេទជាមួយគ្នាជាច្រើនលើកមកដែរ ។ តែដោយសារថ្ងៃកើតហេតុ ពុំមានលុយឱ្យនាងចាយ និងទំនាស់សម្តីបន្តិចបន្តួចប៉ុណ្ណោះ ទើបនៅថ្ងៃទី២៧ សីហា នាងដាក់ពាក្យប្តឹងទៅការិយាល័យព្រហ្មទណ្ឌកម្រិតធ្ងន់នៃស្នងការដ្ឋនគរបាលខេត្ត ។
កម្លាំងនគរបាល ក្រោយពីទទួលបណ្តឹងថ្ងៃទី២៨ ក៏ចុះឃាត់ខ្លួនជននោះមកស្នងការដ្ឋានដើម្បីសាកសួរនិងកសាងសំណុំរឿងបញ្ជូនទៅសាលាដំបូងនាព្រឹកថ្ងៃទី២៩សីហានេះ៕

លោក Sam Allardyce កោះហៅ Antonio ចូលក្រុមជម្រើសជាតិ

August 29, 2016កីឡាមេគង្គ ប៉ុស្តិ៍

បាល់ទាត់៖លោក Sam Allardyce អ្នកចាត់ការទូទៅក្រុមជម្រើសជាតិអង់គ្លេសបានកោះហៅ ខ្សែបម្រើស្លាបរបស់ក្រុមញញួរធំ West Ham United គឺកីឡាករ Michail Antonio ឲ្យចូលក្នុងនៅ ក្រុមជម្រើសជាតិ នៅវគ្គជម្រុះលើកដំបូងរបស់ក្រុម។
លោក Allardyce ដែលជាអ្នកស្នងតំណែងរបស់លោក Roy Hodgson ក្រោយការចាកចេញនៅពេលដឹកនាំក្រុមតោកំណាចអង់គ្លេសត្រឹមវគ្គ១៦ក្រុមចុងក្រោយ ក្រោមថ្វីជើងរបស់ ប្រទេសអ៊ីស្លង់ នៃពានរង្វានEuro 2016 ហើយ Allardyce នឹងដឹកនាំក្រុមតោកំណាចអង់គ្លេស ក្នុងវគ្គជម្រុះជាលើកដំបូងនៃពានរង្វាន់ World Cup ជាមួយនឹងប្រទេស ស្លូវ៉ា នៅខែក្រោយនេះ។
Antonio បានបង្ហាញខ្លួនលើកដំបូងដោយបានស៊ុតបាល់បញ្ចូលទីពីរគ្រាប់នៅក្នុងក្របខ័ណ្ឌ Premier League នៅរដូវកាលនេះខណៈដែលខ្សែការពារ Luke Shaw របស់ក្លិប Man Utd បានត្រឡប់មកវិញបន្ទាប់ពីអវត្តមានរយៈពេលមួយឆ្នាំដោយសារបញ្ហារបួស។
Danny Drinkwater,Theo Walcott និង Phil Jagielka គឺត្រូវបានរំលឹកពីការដែល បានខកខានសម្រាប់ Euro 2016 ខណៈដែលអ្នកចាំទី Joe Hart របស់ក្រុម Man City ដែលបានបាត់បង់កន្លែងរបស់គាត់ នៅក្នុងក្រុមនេះ ត្រូវបានដាក់ឈ្មោះក្នុងចំណោមអ្នកចាំទីផងដែរ។
រហូតមកដល់ពេលលោក Allardyce នៅតែស្ងៀមស្ងាត់លើអ្នកដែលនឹងក្លាយជាប្រធានក្រុមរបស់គាត់ប៉ុន្តែខ្សែប្រយុទ្ធ Wayne Rooney នូវតែមានអត្ថភាពជាងគេសម្រាប់តំណែងប្រធានក្រុមនេះ។
Ross Barkley, Jack Wilshere និងកីឡាករ Jermain Defoe សិទ្ធសឹងជាកីឡាករនេះបានស្ថិតក្នុងចំណោមឈ្មោះដែលនឹងចេញសម្រាប់ការប្រកួតដែលនៅក្នុង Trnava នៅថ្ងៃទី ៤ ខែកញ្ញា។
អ្នកចាំទី: Fraser Forster (ក្លិប Southampton), Joe Hart (ក្រុម Manchester City), លោក Tom Heaton (ក្រុម Burnley)
ខ្សែការពារ: Gary Cahill បាន (ក្រុមតោខៀវ Chelsea), លោក Nathaniel Clyne (Liverpool), Phil Jagielka (Everton បាន), Danny Rose (ក្លិប Tottenham Hotspur), Luke Shaw (ក្រុម Manchester United), Chris Smalling (ក្រុម Manchester United), លោក John ថ្ម (ក្រុម Manchester City), Kyle Walker (មាន់ខ្នាយមាស Tottenham Hotspur)
ខ្សែបម្រើ: DELE Alli (ក្លិប Tottenham Hotspur) Michail Antonio (West Ham United), Eric Dier (ក្លិប Tottenham Hotspur), Danny Drinkwater (ក្រុម Leicester), កីឡាករ Henderson (Liverpool), Adam Lallana (Liverpool) Wayne Rooney (ក្រុម Manchester United), កីឡាករ Raheem Sterling (ក្រុម Manchester City), Theo Walcott (ក្រុមកាំភ្លើងធំ Arsenal)
ខ្សែប្រយុទ្ធ: លោក Harry Kane បាន (ក្លិប Tottenham Hotspur), កីឡាករ Daniel Sturridge (Liverpool), លោក Jamie Vardy (ក្រុម Leicester)៕

CNRP បន្តពាក់អាវខ្មៅរាល់ថ្ងៃច័ន្ទទាមទារដោះលែងសកម្មជន

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖មន្ត្រីគណបក្សសង្គ្រោះជាតិ បានបន្តពាក់អាវខ្មៅ រាល់ថ្ងៃច័ន្ទ ដើម្បីទាមទារឲ្យមានការដោះលែងសកម្មជនរបស់ពួកគេ បើទោះបីជាសកម្មភាពពាក់អាវខ្មៅកំពុងប្រឈមរារាំងឬបង្ក្រាបពីសមត្ថកិច្ចឬក៏នាំឲ្យមានការភ័យខ្លាចក៏ដោយ។
នៅថ្ងៃច័ន្ទសប្តាហ៍នេះ តាមរយះ Facebook របស់លោក មុត ចន្ថា មន្ត្រីជាន់ខ្ពស់បក្សប្រឆាំងបានបង្ហាញរូបពាក់អាវខ្មៅ រួមទាំងបានសរសេរនូវពាក្យពេជន៍មួយចំនួនថា « ពួកយើងពាក់អាវខ្មៅ ជារៀងរាល់ថ្ងៃច័ន្ទ ដើម្បីទាមទារឲ្យមានការដោះលែងអ្នកទោសមនសិកាទាំងអស់….បញ្ចប់ការរុកគួននិងការគំរាមកំហែងគ្រប់ប្រភេទ និងការពារអភ័យឯកសិទ្ធិសភារបស់សមាជិករដ្ឋសភា និងព្រឹទ្ធសភាដែលជាអំណាចអធិបតេយ្យទទួលបានពីការបោះឆ្នោតតាមឆន្ទះរបស់ប្រជាពលរដ្ឋខ្មែរ ។
លោក មុត ចន្ថា បានសរសេរបញ្ជាក់ថា ការពាក់អាវខ្មៅជាផ្នែកមួយនៃការសម្តែងមតិដោយសន្តិវិធីនិងអហិង្សាក្នុងទិសដៅជាក់លាក់របស់យើងដូចបានរៀបរាប់ខាងលើ ។
យ៉ាងណាក៏ដោយ មជ្ឈដ្ឋានទូទៅបានហៅការសម្តែងមតិដោយពាក់អាវខ្មៅនោះមិនទទួលបានការគាំទ្រនោះទេ ។ ប៉ុន្តែផ្ទុយទៅវិញការបង្ហាញសញ្ញាអាវខ្មៅធ្វើឲ្យប្រជាពលរដ្ឋមានការភ័យខ្លាចទៅវិញ ខណដែលពួកគាត់បានរម្លឹកទៅដល់អតីតកាល ដែលកម្ពុជាឆ្លងកាត់របបវាលពិឃាតដឹកនាំដោយ ប៉ុល ពត ដែលផ្តើមដោយអាវខ្មៅ ឬឈុតខ្មៅនេះ៕

យកដីកាកោះហៅឲ្យចូលសវនាការទៅបិទមុខផ្ទះលោក កឹម សុខា

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖កម្លាំងសមត្ថកិច្ចខណ្ឌទួលគោក នៅព្រឹកថ្ងៃច័ន្ទនេះ បានយកដីកាថ្មីមួយទៀត ទៅបិទនៅជញ្ជាំងផ្ទះ របស់លោក កឹម សុខា ប្រធានស្តីទីគណបក្សសង្គ្រោះជាតិ ស្ថិតនៅផ្ទះលេខ៩៧ ផ្លូវ៣១៣ សង្កាត់បឹងកក់២ ខណ្ឌទួលគោក ដីកានោះ គឺជាដីកាកោះហៅលោក កឹម សុខា ចូលសវនាការនៅថ្ងៃទី០៩ ខែកញ្ញា វេលាម៉ោង៨៖៣០នាទីព្រឹក ជាកំហិត ដើម្បីឆ្លើយដោះសារនៅក្នុងសវនាការ ទាក់ទងការបដិសេធមិនចូលឆ្លើយបំភ្លឺតាមការកោះហៅរបស់តុលាការនាពេលកន្លងទៅ៕

ប្រធានគណបក្សយុវជនកម្ពុជាដាក់ញត្តិនៅស្ថានទូតវៀតណាម

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖លោក ពេជ្រ ស្រស់ ប្រធានគណបក្សយុវជនកម្ពុជា នៅព្រឹកនេះ បានដាក់ញត្តិ ស្ថានទូតវៀតណាមប្រចាំនៅកម្ពុជា ដើម្បីទាមទារឱ្យរដ្ឋាភិបាលប្រទេសនេះ បញ្ជាក់ជំហរឱ្យច្បាស់ក្នុងការបញ្ឈប់សកម្មភាពរំលោភបំពានកម្ពុជា ។ ប៉ុន្តែរហូតដល់ម៉ោង៩ និង០០ព្រឹក ថ្ងៃទី២៩ ខែសីហា ឆ្នាំ២០១៦នេះ តំណាងស្ថានទូតវៀតណាម បានមិនបានចេញមកទទួលញត្តិរបស់ លោក ពេជ្រ ស្រស់ ប្រធានគណបក្សយុវជនកម្ពុជានោះទេ ប៉ុន្តែអភិបាលរងខណ្ឌចំការមនម្នាក់ បានចេញមុខទទួលជំនួស ហើយសន្យាថា នឹងប្រគល់ជូនឱ្យដល់ដៃស្ថានទូតវៀតណាម ។
ការមិនចេញមុខរបស់មន្ត្រីស្ថានទូតវៀតណាម មកទទួលញ្ញាតិនោះវាហាក់ដូចជា បង្ហាញនូវភាពរើសអើង ឬជាចេតនារបស់ភាគីវៀតណាម មិនចង់ស្រាយបំភ្លឺនូវអ្វីដែលគណបក្ស យុវជនកម្ពុជាបានស្នើឡើង៕

រោងចក្រកៅស៊ូក្រែបនៅស្រុកបកែវត្រូវអគ្គិភ័យឆេះអស់ទាំងស្រុង

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តរតនគិរី៖អគ្គិភ័យបានលេបត្របាក់យករោងចក្រកៅស៊ូក្រែបមួយកន្លែងទាំងកណ្តាលថ្ងៃត្រង់ ប៉ុន្តែទំហំនៃការខូចខាតមិនត្រូវបានម្ចាស់រោងចក្រនោះប្រាប់ឲ្យដឹងនោះឡើយ។ ហេតុការណ៍អគ្គិភ័យនេះ កើតឡើងនៅវេលាម៉ោង១២ និង៣០នាទីរសៀលថ្ងៃទី២៨ ខែសីហា ឆ្នាំ២០១៦ នៅចំណុចរោងចក្រកៅស៊ូក្រែប ស្តិតនៅភូមិសើងឃុំសើងស្រុកបកែវខេត្តរតនគិរី។
បើតាមការបញ្ជក់ពីម្ចាស់រោងចក្រកៅស៊ូក្រែបសូមមិនបញ្ចេញឈ្មោះបានឲ្យដឹងថា មូលហេតុផ្តើមចេញមកពីឡចំហ៊ុយជ័រកៅស៊ូនៅក្បែរនោះ ហើយឆេះរាលដាលដល់កន្លែងផ្សេងរបស់រោងចក្រតូចមួយនេះ។ គ្រោះអគ្គិភ័យនេះបានការអន្តរាគមន៍របស់រថយន្តពន្លត់អគ្គិភ័យរបស់អធិការរដ្ឋាននគបាលស្រុកចំនួន២គ្រឿង និងគោយន្តកែច្នៃដឹកទឹករបស់ប្រជាពលរដ្ឋមួយគ្រឿង។
បើទោះជាយ៉ាងណាម្ចាស់រោងចក្រខាងលើនេះមិនបានប្រាប់ពីអត្តសញ្ញាណរបស់ខ្លួនឡើយនៅពេលដែលអ្នកយកព័ត៌មានទៅសួរនាំនោះ៕

តវ៉ាបិទផ្លូវជាតិលេខ២ទាមទារឲ្យថៅកែរោងចក្រសង់បំណល់

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖កម្មករ-កម្មការិនីរាប់រយនាក់បម្រើការងារក្នុងរោងចក្រផលិតសម្លៀកបំពាក់ ជុងហេ នីតវៀរអេហ្វធីវ៉ាយ នៅព្រឹកថ្ងៃទី២៩ ខែសីហានេះ បានប្រមូលផ្តុំគ្នាតវ៉ានៅមុខរោងចក្រ បិទផ្លូវជាតិលេខ២ ទាមទារឲ្យរោងចក្រ និងស្ថាប័នពាក់ព័ន្ធជួយដោះស្រាយទូទាត់ប្រាក់ពួកគេ។
នៅលើបដាដែលក្រុមកម្មករ-កម្មការិនីកាន់នឹងដៃមានសរសេរថា «សូមឲ្យថៅកែដោះស្រាយ តាមផ្លូវច្បាប់ ស្តីពីការងារ ១-ទូទាត់ប្រាក់ជូនដំណឹង, ២-ទូទាត់ប្រាក់បណ្តេញចេញ, ៣-ទូទាត់ប្រាក់សោហ៊ុយជំងឺចិត្ត, ៤-ប្រាក់បំណាច់ឆ្នាំ, ៥-ប្រាក់ខែចុងក្រោយ, ៦-សងប្រាក់ ៥០ភាគរយដល់កម្មករ ៤៣នាក់ ដែលបានព្រមព្រៀងជាមួយក្រុមប្រឹក្សា អាជ្ញាកណ្តាល»។
គួរបញ្ជាក់ថា នៅរោងចក្រខាងលើនេះ ក្រសួងការងារសម្រេចដាក់លក់ឡៃឡុង សម្ភារៈក្នុងរោងចក្រនេះដើម្បីបើក ប្រាក់ឲ្យកម្មករ ប៉ុន្តែកម្មករមិនព្រមនោះទេ ដោយសារពួកគាត់ យល់ថា ប្រាក់ដែលលក់ឡៃឡុងនោះ មិនអាចសងពួកគាត់គ្រប់ឡើយ៕

កម្ពុជា និងវៀតណាមកំពុងប្រជុំដោះស្រាយបញ្ហាព្រំដែន

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖នៅព្រឹកថ្ងៃនេះ គណៈកម្មការព្រំដែន កម្ពុជា-វៀតណាម បានបើកកិច្ចប្រជុំអំពីកំណត់ទូតពាក់ព័ន្ធនឹងការរំលោភបំពានរបស់ភាគីវៀតណាម នៅតាមតំបន់ព្រំដែនមួយចំនួន របស់កម្ពុជា នៅទីស្តីការ គណៈរដ្ឋមន្ត្រី ។
ក្នុងកិច្ចប្រជុំនេះភាគីកម្ពុជាដឹកនាំ ដោយលោក វ៉ា គឹមហុង និងភាគីវៀតណាមដឹកនាំដោយលោក Le Hia Trung រដ្ឋមន្ត្រីក្រសួងការបរទេសវៀតណាម៕

U-15 កម្ពុជាក្លាយជាម្ចាស់ជើងឯក The Belt and Road Initiative

August 29, 2016កីឡាមេគង្គ ប៉ុស្តិ៍

បាល់ទាត់៖កីឡាករយុវជនថ្នាលអាយុក្រោម១៥ឆ្នាំរបស់សាលាជាតិទន្លេបាទីនៃកម្ពុជាបានក្លាយជាម្ចាស់ជើងឯកប្រចាំព្រឹត្តិការណ៍ U15 Boys Football Tournament 2016 ដែលមានចិនធ្វើម្ចាស់បន្ទាប់ពី U-15 កម្ពុជាបានយកឈ្នះក្រុម U-15 Sduchor No 8 Team របស់ប្រទេសកាហ្សាក់ស្ថាន ដោយលទ្ធផល ៣-២ កាលពីថ្ងៃសៅរ៍ ទី២៧ ខែសីហាក្នុងវគ្គផ្តាច់ព្រ័ត្រ។
៥ប្រកួតនៅទឹកដីចិន មុនឈ្នះជើងឯក ក្រុមយុវជនថ្នាលគោព្រៃកម្ពុជា លេងមិនចាញ់ឡើយ ក្រៅពីឈ្នះ៤ដង និងស្មើ១ដង ដោយមាន វត្តមានកីឡាករលេចធ្លោ សៀង ចន្ធា, ស៊ាន សុភក្រា្ត និង អាត អូនតូច ជាដើម។
បើយោងតាម Facebook Page របស់ FFC បញ្ជាក់ថា ក្រុម U-15 នឹងមកដល់ព្រលាន យន្តហោះអន្តរជាតិភ្នំពេញនាម៉ោង១១ និង៣០នាទីយប់នេះ៕

ការបើកបរលើផ្លូវសាធារណៈលើសល្បឿនកំណត់នៅតែជាការព្រួយបារម្ភ

August 29, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ប៉ែនសុផល
បាត់ដំបង៖កម្លាំងជំនាញនៃការរិយាល័យចរាចរណ៍ផ្លូវគោកខេត្តបាត់ដំបងបានរកឃើញយានយន្ដដែលចរាចរណ៍លើកំណាត់ផ្លូវជាតិលេខ៥៧ បើកបរលើសល្បឿនកំណត់ជាមធ្យមជាង១០០គ្រឿងក្នុង១ថ្ងៃ។
នៅក្នុងការចុះត្រួតពិនិត្យលើគោលដៅផ្លូវលេខ៥៧កាលពីថ្ងៃទី២៧ ខែសីហា ឆ្នាំ២០១៦ លោកវរសេនីយ៍ឯក សាត គឹមសាន្ដ នាយការិយាល័យចរាចរណ៍ផ្លូវគោកនៃស្នងការនគរបាលខេត្តបាត់ដំបងបានអោយដឹងថា ការចុះត្រួតពិនិត្យច្បាប់លើយានយន្ដគ្រប់ប្រភេទតាមគោលដៅឈរជើងនិងគោលដៅចល័តជាការពង្រឹងការគោរពច្បាប់ចរាចរណ៍របស់សាធារណះជនទាំងការប្រើប្រាស់នៅតាមបណ្ដាផ្លូវជាតិក្នុងនិងក្រៅទីប្រជុំជនឈានទៅកាន់ការកាត់បន្ថយអត្រាគ្រោះចរាចរណ៍ដែលកើតមានឡើងគួរអោយព្រួយបារម្ភនាពេលបច្ចុប្បន្ន។
ក្នុងខេត្តបាត់ដំបងការិយាល័យចរាចរណ៍ផ្លូវគោកបានគាត់សំគាល់ឃើញថាមានស្រុកចំនួន៦ដែលប្រឈមការគ្រោះថ្នាក់ខ្លាំងជាងគេក្នុងនោះមានស្រុកសង្កែ បាណន់ ថ្មគោល ស្រុកបវេល រតនះមណ្ឌលនិងស្រុកសំឡូត បណ្ដាលមកពីកត្តាមនុស្សមិនគោរពច្បាប់ចរាចរណ៍ បើកបរមិនគោរពផ្លាកសញ្ញា ផ្លាកល្បឿននិងអ្នកបើកបរមានផ្ទុកសារជាតិគ្រឿងស្រវឹង។
លោកវរសេនីយ៍ឯក សាត គឹមសាន្ដ បន្ដថា រាល់ការចុះត្រួតពិនិត្យតាមគោលដៅសំខាន់ៗកម្លាំងជំនាញត្រួតពិនិត្យល្បឿនយានយន្ដ ពិនិត្យរាល់បទដ្ឋានបច្ចេកទេសផ្សេងៗ សារជាតិស្រវឹង អប់រំ បិទផ្ទាល់ដល់គោយន្ដនូវសន្លឹកចំណាំងផ្លាត។ លោកបញ្ជាក់ថា យុទ្ធនាការដូចគ្នានេះនឹងបន្ដរហូតដល់បណ្ដាស្រុកទាំងអស់ក្នុងខេត្តបាត់ដំបង ដោយឡែកការត្រួតពិនិត្យនៅពេលនេះជាលទ្ធផលមានយានយន្ដបើកបរល្មើសល្បឿនកំណត់ចំនួន១១២គ្រឿង ពិន័យ៨៦គ្រឿង អប់រំម្ចាស់អ្នកបើកបរចំនួន២៦នាក់ និងត្រួតពិនិត្យ បិទសន្លឹកផ្ទាំងចំណាំងផ្លាតលើគោយន្ដបានជិត៥០០គ្រឿង៕

ACU បំពាក់កាមេរ៉ាសុវត្ថិភាពគ្រប់មណ្ឌលកំណែប្រឡងបាក់ឌុប

August 27, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖បើតាមទំព័រ Facebook របស់ក្រសួងអប់រំ យុវជន និងកីឡា បានឲ្យដឹងថា អង្គភាពប្រឆាំងអំពើពុករលួយ ACU បានបំពាក់កាមេរ៉ាសុវត្ថិភាព នៅគ្រប់មណ្ឌលកំណែទាំងអស់ ដើម្បីអង្កេតមើលពីសកម្មភាព របស់លោកគ្រូ អ្នកគ្រូ និងគណៈកម្មាធិការទាំងអស់ ជុំវិញការធ្វើកំណែរបស់បេក្ខជនប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ឆ្នាំ២០១៦។
ប្រភពដដែលបញ្ជាក់ថា សកម្មភាព នៃការបំពាក់កាមេរ៉ាសុវត្ថិភាព ដោយមន្ត្រីអង្គភាពប្រឆាំងអំពើពុករលួយ នៅគ្រប់បន្ទប់កំណែទាំងអស់ និងបន្ទប់គណៈកម្មការកណ្តាល ក្នុងមណ្ឌលកំណែ ដើម្បីត្រៀមរៀបចំ ដំណើរការកំណែ។
គួរបញ្ជាក់ថា លទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០១៦នេះ នឹងត្រូវបិទប្រកាសនៅរាជធានីភ្នំពេញ នៅថ្ងៃទី១៣ ខែកញ្ញា ឆ្នាំ២០១៦ និងបិទប្រកាសនៅតាមបណ្តាខេត្ត នៅថ្ងៃទី១៤ ខែកញ្ញា ឆ្នាំ២០១៦ ខាងមុខនេះផងដែរ៕