តៃប៉ិ៖ជនជាតិចិនតៃវ៉ាន់ចំនួន៥២នាក់ត្រូវបានប៉ូលិសតួកគីចាប់ខ្លួនដោយសង្ស័យថា ពួកគេទាំងនោះ បានប្រមូលផ្តុំគ្នាជាបណ្តាញ និងដាក់បំពាក់កាមេរ៉ាសម្ងាត់នៅតាមទូ ATM ដើម្បីតាមដានអតិថិជនមកដកលុយ រួចក៏ធ្វើការលួចលេខ សម្ងាត់។ នេះបើយោងតាមការបញ្ជាក់អាជ្ញាធរកោះតៃវ៉ាន់ ។
យោងតាមសារព័ត៌មានស៊ិនហួរបានចេញផ្សាយថា ជនជាតិចិនតៃវ៉ាន់ទាំង៥២នាក់នោះ កំពុងតែស្ថិតនៅក្រោម ការស៊ើបអង្កេត និងសួរចម្លើយនៅឡើយ ទៅលើការចោទប្រកាន់ខាងលើនេះ។
គួរបញ្ជាក់ថាជនជាតិចិនតៃវ៉ាន់ រាប់សិបនាក់ទៅហើយ ត្រូវបានអាជ្ញាធរចាប់ខ្លួនលើបទល្មើសទូរគមនាគមន៍ នៅក្នុងឆ្នាំ២០១៦នេះ នៅបណ្តាប្រទេសមួយចំនួនដូចជា ប្រទេសកេនយ៉ា និងម៉ាឡេស៊ី៕
រាជធានីភ្នំពេញ៖នៅថ្ងៃទី៣១ ខែឧសភា ឆ្នាំ២០១៦ម្សិលមិញនេះមានករណីគ្រោះថ្នាក់ចរាចរណ៍ នៅទូទាំងប្រទេសកើតឡើង១១លើក (យប់៨លើក) បណ្តាលឲ្យមនុស្សស្លាប់៤នាក់ រងរបួសធ្ងន់១១នាក់និងរបួសស្រាល១០នាក់។ នេះបើតាមការចុះផ្សាយរបស់គេហទំព័រអគ្គស្នងការនគរបាលជាតិ។
ប្រភពដដែលបន្តថា នៅក្នុងហេតុការណ៍គ្រោះថ្នាក់ចរាចរណ៍១១លើកនេះ បណ្តាលឲ្យខូចខាតយានយន្ត សរុបចំនួន២៣គ្រឿង រួមមានម៉ូតូចំនួន១៣គ្រឿង, រថយន្តធុនតូច៦, រថយន្តធុនធំ៣គ្រឿង, យានផ្សេងៗ១គ្រឿង។ ប្រភពបញ្ជាក់ថា មូលហេតុដែលបណ្តាលឲ្យ កើតមានករណីគ្រោះថ្នាក់ចរាចរណ៍ រួមមានល្មើសល្បឿន៤លើក, ស្រវឹង២លើក, ប្រជែង២លើក, បត់គ្រោះថ្នាក់២លើក, មិនប្រកាន់ស្តាំ១លើក។ ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍២០នាក់ (យប់១៦នាក់ )។
ជាមួយគ្នានេះម្សិលមិញលទ្ធផលត្រួតពិនិត្យអនុវត្តច្បាប់ចរាចរណ៍ផ្លូវគោកឃើញថា យានយន្តដែលល្មើសសរុបទូទាំងប្រទេសមាន ចំនួន ៣,៦៥៥គ្រឿង ក្នុងនោះបានធ្វើការអប់រំចំនួន ១,៧៦៤គ្រឿង និងពិន័យសរុប ១,៨៩១គ្រឿង៕
រាជធានីភ្នំពេញ៖យោងតាមសេចក្តីជូនដំណឹងរបស់អគ្គិសនីកម្ពុជា (EDC) បានឲ្យដឹងថា ចាប់ពីថ្ងៃទី០៣ ដល់ថ្ងៃទី០៥ ខែមិថុនា ឆ្នាំ២០១៦ខាងមុខនេះ អគ្គិសនីកម្ពុជានឹងផ្អាកផ្គត់ផ្គង់ចរន្ដអគ្គិសនី នៅតំបន់មួយចំនួននៅក្នុងរាជធានីភ្នំពេញ និងខេត្តកណ្ដាល មូលហេតុដើម្បីធ្វើការជួសជុល និងដំឡើងបរិក្ខាអគ្គិសនី៕ សម្រាប់ពេលវេលា និងទីតាំងសូមអានសេចក្ដីជូនដំណឹង របស់អគ្គិសនីកម្ពុជាទាំងស្រុង៖
រាជធានីភ្នំពេញ៖ជនសង្ស័យករណីគ្រឿងញៀន៥នាក់ត្រូវបានកម្លាំងនគរបាលខណ្ឌសែនសុខឃាត់ខ្លួន ជាមួយថ្នាំញៀន២កញ្ចប់ ព្រមទាំងឧបករណ៍សម្រាប់ជក់មួយចំនួនផងដែរ។ ប្រតិបត្តិការចុះបង្ក្រាបករណីគ្រឿងញៀននេះធ្វើឡើងនៅប្លុកបឹងឈូក សង្កាត់ទឹកថ្លា ខណ្ឌសែនសុខ នៅល្ងាចថ្ងៃទី៣១ ខែឧសភា ឆ្នាំ២០១៦។
អធិការនគរបាលខណ្ឌសែនសុខ លោក ម៉ក់ ហុង បានប្រាប់ថា កម្លាំងប៉ុស្តិ៍នគរបាលរដ្ឋបាលទឹកថ្លា រួមជាមួយ កម្លាំងអន្តរាគមន៍ចុះជួយអធិការដ្ឋាន បានចុះបង្ក្រាបទីតាំងគ្រឿងញៀន នៅភូមិត្រពាំងឈូក សង្កាត់ទឹកថ្លា ជាលទ្ធផល យើងឃាត់ខ្លួនបានចំនួន៥នាក់ និងថ្នាំញៀន២កូនថង់តូច។
លោកបញ្ជាក់ថា បច្ចុប្បន្នជនសង្ស័យកំពុងធ្វើការសាកសួរ នៅប៉ុស្តិ៍នគរបាលរដ្ឋបាលទឹកថ្លា ដើម្បីចាត់ការតាមនីតិវិធី៕
រាជធានីភ្នំពេញ៖បុរសម្នាក់ត្រូវយាមធនាគារកម្ពុជាសាធារណៈចាប់វាយទ្រមខ្លួនរួចប្រគល់ឲ្យសមត្ថកិច្ចបន្ទាប់ពីយកដំបងដែកវាយបំបែកទូ ATM ដើម្បីលួចយកលុយ។ ហេតុការណ៍ភ្ញាក់ផ្អើលនេះកើតឡើង នៅយប់ថ្ងៃទី៣១ ខែឧសភា ឆ្នាំ២០១៦ស្ថិតនៅអគារអ៊ែតវូដ ស្ថិតតាមបណ្ដោយមហាវិថីសហព័ន្ធរុស្ស៊ី ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
តាមប្រភពព័ត៌មានបានឲ្យដឹងថា មុនពេកកើតហេតុគេឃើញបុសជាជនសង្ស័យ ដើរតាមផ្លូវ ស្រាប់តែមួយសន្ទុះក្រោយមក ជនសង្ស័យក៏បានចូលទៅក្នុង បន្ទប់ដាក់ទូ ATM រួចយកដំបងដែកវាយបំបែក ក្នុងគោលបំណងដើម្បីយកលុយ។ ប្រភពបន្តថា នៅពេលដែលជនសង្ស័យកំពុងធ្វើសកម្មភាព ស្រាប់សន្ដិសុខដែលយាមនៅទីនោះឃើញ ក៏នាំគ្នាចាប់ជនសង្ស័យវាយម្នាក់មួយដៃមួយ មួយជើង ឡើងទ្រមខ្លួន។
ក្រោយពេលកើតហេតុជនសង្ស័យត្រូវបានកម្លាំង នគរបាលខណ្ឌសែនសុខ យកទៅសាកសួរនៅប៉ុស្តិ៍ទឹកថ្លា ដើម្បីកសាងសំណុំរឿងចាត់ការតាមនីតិវិធីច្បាប់៕
រាជធានីភ្នំពេញ៖បុរសជាជាងដែកម្នាក់ត្រូវចរន្តអគ្គិសនីឆក់សា្លប់ភ្លាមៗនៅនឹងកន្លែង គ្រាដែលចេញពីបន្ទប់ទឹកហើយដើរជាន់លើខ្សែភ្លើងដោយជើងសើម។ ហេតុការណ៍នេះកើតឡើងកាលពីវេលាម៉ោង៥ល្ងាច ថ្ងៃទី៣១ ខែឧសភា ឆ្នាំ២០១៦ ក្នុងផ្ទះថៅកែជាងដែក ស្ថិតនៅតាមផ្លូវលំក្រុមទី៥ ក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
យុវជនរងគ្រោះ ឈ្មោះ ចាន់ ទ្រា អាយុ២៣ឆ្នាំ មុខរបរជាងដែក ស្នាក់នៅផ្ទះជួល ក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ និងមានស្រុកកំណើត នៅក្នុងភូមិក្រាំងលាវ ឃុំក្រាំងលាវ ស្រុករលាប្អៀរ ខេត្តកំពង់ឆ្នាំង។
តាមប្រភពព័ត៌មានបានឲ្យដឹងថា មុនពេលកើតហេតុជនរងគ្រោះបានចូលទៅបត់ជើង នៅក្នុងបន្ទប់ទឹកក្នុងផ្ទះមេជាង របស់ខ្លួន លុះពេលចេញមកវិញ ដោយសារជើងសើម ហើយបានដើរជាន់ខ្សែភ្លើង ដែលរាយនៅលើសាប ដោយការធ្វេសប្រហែសរបស់ម្ចាស់ផ្ទះ មិនលើកឲ្យផុតពីដីឲ្យបានត្រឹមត្រូវ ក៏បានបណ្តាលឲ្យឆ្លងចរន្ត ឆក់ជនរងគ្រោះខាង លើស្លាប់ភ្លាមៗនៅនឹងកន្លែង។ ប៉ុន្តែសាច់ញាតិមិនអស់ចិត្ត នឹកស្មានថាមិនទាន់ស្លាប់ ក៏បានដឹកទៅកាន់ មន្ទីរពេទ្យដើម្បីសង្គ្រោះបន្ទាន់ ប៉ុន្តែពេលទៅដល់ គ្រូពេទ្យបានប្រាប់ថា ជនរងគ្រោះស្លាប់បាត់ទៅហើយ ទើបដឹកត្រឡប់មកផ្ទះវិញ។
បើតាមសមត្ថកិច្ចនិយាយថា ខ្សែភ្លើងនោះអត់មានដាច់រលាត់នោះទេ រឿងអីត្រូវឆក់ទៅកើត ពេលនេះមានការសង្ស័យថា អាចមានដែកប៉ះចំមុខតំណខ្សែភ្លើង ជើងជនរងគ្រោះសើម ដើរជាន់ដែកដែលឆ្លងចរន្តភ្លើង ទើបបណ្ដាលឲ្យឆក់ស្លាប់។ នេះគឺជាធ្វេសប្រហែស របស់ម្ចាស់ផ្ទះដែលជាថៅកែ ខ្សែភ្លើងមិនបានលើកឲ្យផុតពីដីទេ ដាក់រាយប៉ាយនៅលើសាប ហើយក៏មានដែក ស្ថិតនៅទីនោះរញ៉េរញ៉ៃផងដែរ មិនបានរៀបចំឲ្យបានរបៀប ទើបបណ្ដាលឲ្យឆក់ជាងស្លាប់បែបនេះ៕
រាជធានីភ្នំពេញ៖អង្គភាពប្រឆាំងអំពើពុករលួយ (ACU) បានសម្រេចឃាត់ខ្លួន លោកមេធាវី ពេជ្រ រតនា នៅវេលាម៉ោង ៥ល្ងាច ថ្ងៃទី៣១ ខែឧសភា ឆ្នាំ២០១៦ម្សិលមិញបន្ទាប់ពីបាននាំខ្លួនមកស្នាក់ការរបស់ ACU នៅព្រឹកថ្ងៃដដែលនោះ។ នេះបើការបញ្ជាក់ពីប្រធានអង្គភាពប្រឆាំងអំពើងពុករលួយ លោកទេសរដ្ឋមន្ត្រី ឱម យ៉ិនទៀង។
លោកទេសរដ្ឋមន្ត្រីបានអះអាងថា លោកមេធាវី ពេជ្រ រតនា នឹងត្រូវបញ្ជូនទៅតុលាការ ក្រោយការឃាត់ខ្លួនរយៈពេល ៤៨ម៉ោង។ លោកថា លោក ពេជ្រ រតនា មានការពាក់ព័ន្ធនឹងករណីពុករលួយ ប៉ុន្តែលោកមិនទាន់អះអាងថា ស្ថិតនៅក្នុងមាត្រាណាមួយ នៃច្បាប់ប្រឆាំងអំពើពុករលួយ នៅឡើយទេ។
គួរបញ្ជាក់ថា លោកមេធាវី ពេជ្រ រតនា ជាមេធាវីម្នាក់ នៅក្នុងគណៈមេធាវីកម្ពុជា ត្រូវបានសមត្ថកិច្ចអង្គភាពប្រឆាំងអំពើពុករលួយនាំខ្លួន ពីចំណតពហុកីឡដ្ឋានជាតិអូឡាំពិក នៅព្រឹកថ្ងៃទី៣១ ខែឧសភា ឆ្នាំ២០១៦ ភ្លាមៗបន្ទាប់ពីលោក ចេញពីសាលាដំបូងរាជធានីភ្នំពេញ ហើយដើរទៅកាន់រថយន្តរបស់លោក៕
អត្ថបទ៖032 MKP
ខេត្តក្រចេះ៖ កម្លាំងនគរបាលនៃអធិការស្រុកសំបូរ បានចាប់ឃាត់ខ្លួនបរស់ម្នាក់ ដែលជាឪពុកចុង ក្រោយធ្វើសកម្មភាពរំលោភសេពសន្ថវះ លើកូនស្រីចុងរបស់ខ្លួនអាយុ ១៣ឆ្នាំរហូតបានសម្រេច។
ការចាប់ខ្លួនឪពុកចុងដែលរំលោភកូនស្រីអាយុ១៣ឆ្នាំនេះ ធ្វើឡើងកាលព្រឹកថ្ងៃទី៣១ ខែឧសភា ឆ្នាំ២០១៦ នៅចំណុចស្រែល្អក់ ក្នុងភូមិស្រែស្បូវ ស្រុកសំបូរ ខេត្តក្រចេះ។ ក្រោយពេលម្តាយក្មេងស្រីរងគ្រោះប្តឹងរាយការណ៍ទៅសមត្ថកិច្ចនគបាលមូលដ្ឋាន ប៉ុស្តិ៍ក្បាលដំរីរួចមក។
លោអនុសេនីយ៍ ណយ ស៊ីថាច អធិការងនគបាលស្រុកសំបូរទទួបន្ទុកផ្នែយុត្តិធម៌ បានឲ្យដឹងថា ក្រោយពីមានការចង្អុលបង្ហាញពីលោកឧត្តមសេនីយ៍ លន់ សុផាត ស្នងការនគបាលខេត្ត និងលោកឧត្តមសេនីយ៍ អ៊ុំ ភី ស្នងការរង ទទួល យុទ្តិធម៌ កំលាំងនគបាលស្រុកសំបូរ បានចុះអន្តរាគមន៍ចាប់ឃាត់ខ្លួនជនសង្ស័យបានភ្លាមៗ នៅទីតាំងដូចខាងលើ។
យោងតាមពាក្យបណ្តឹង លោកអធិការរងបានបញ្ជាក់ឲ្យដឹងថា ឪពុកចុងដែលរងការចោទប្រកាន់ ហើយត្រូវបានសមត្ថកិច្ចចាប់ឃាត់ខ្លួននោះឈ្មោះ មាស មន អាយុ៤០ឆ្នាំ មានស្រុកកំណើត ភូមិដូនមាស ឃុំសំបូរ ស្រុកសំបូរ ខេត្តក្រចេះ។ ចំណែងឯក្មេងស្រីរងគ្រោះមានឈ្មោះ ន ស រ អាយុ១៣ឆ្នាំ រស់នៅជាមួយគ្នា។
លោក បានបន្តទៀតថា ក្មេងស្រីរងគ្រោះត្រូវបានឪពុកចុងចាប់រំលោភបានសម្រេច កាលពីវេលាម៉ោង ៤ រសៀលថ្ងៃទី២៧ ខែឧសភា កន្លងទៅនេះ នៅក្នុងព្រៃសហគមន៏មួយកន្លែង ក្នុងស្រុកសំបូរ ខណៈដែលឪពុកចុងរូបនោះបបួលនាងចូលព្រៃកាប់អុសយកមកទុកដាំបាយ។
ក្រោយពេលរំលោភរួច ជនសង្ស័យបានគំរាមដល់ក្មេងស្រីរងគ្រោះថា បើហ៊ានប្រាប់រឿងដល់ម្តាយ ឬអ្នកណាផ្សេង គេនឹងសម្លាប់ចោល។
បច្ចុប្បន្នជនសង្ស័យត្រូវបានឃុំខ្លួនបណ្តោះអាសន្ននៅអធិការដ្ឋាននគរបាលស្រុកសំបូរ និងកសាងសំណុំបញ្ជូនទៅកាន់តុលាការខេត្តក្រចេះ ដើម្បីចាត់ការតាមច្បាប់៕
ប៉ាកាំង៖អ្នកនាំពាក្យក្រសួងការបរទេសចិន លោកស្រី ហួ ឈុនយីង បានថ្លែងថា ទូកនេសាទមួយគ្រឿងដែលត្រូវយោធាជើងទឹកឥណ្ឌូណេស៊ីចាប់ឃាត់ទុកកាលថ្ងៃសុក្រសប្តាហ៍មុននោះបានធ្វើប្រតិបត្តិការដោយស្របច្បាប់។ ការលើកឡើងបែបនេះធ្វើឡើងក្នុងសន្និសីទកាសែតមួយនៅទីក្រុងប៉េកាំង។
លោកស្រីបានអះអាងថា អ្នកនេសាទជនជាតិចិនទាំងនោះបាននេសាទតាមធម្មតានៅលើដែនទឹករបស់ចិន ហើយចិនបានបង្ហាញបញ្ហានេះទៅភាគីឥណ្ឌូណេស៊ី។ លោកស្រីបញ្ជាក់ថា នេះគឺជាការផ្ទុះឡើងនូវភាពតានតឹងថ្មីមួយទៀតរវាងប្រទេសទាំងពីរនៅសមុទ្រចិនខាងត្បូង។ នេះបើយោងតាមសារព័ត៌មាន AFP។
អាជ្ញាធរឥណ្ឌូណេស៊ីអះអាងថា ទូកនោះបានចូលនេសាទដោយខុសច្បាប់។ ទូកនេសាទនោះត្រូវបានគេនាំយកទៅច្រាំងសមុទ្រ ហើយក្រុមនាវិកចិន៨នាក់ត្រូវបានអាជ្ញាធរឥណ្ឌូណេស៊ីឃាត់ខ្លួន។
គួរបញ្ជាក់ថា អ្នកនេសាទបរទេសក្នុងចំនួនកាន់តែច្រើនត្រូវបានអាជ្ញាធរឥណ្ឌូណេស៊ីឃាត់ខ្លួន បន្ទាប់ពីក្រុងហ្សាកាតាបានចាប់ផ្ដើមប្រតិបត្តិការបង្ក្រាបដ៏តឹងរ៉ឹងមួយទៅលើការនេសាទខុសច្បាប់ចាប់តាំងពីឆ្នាំ២០១៤មក។ ទូកនេសាទខុសច្បាប់ជាច្រើនត្រូវបានអាជ្ញាធរប្រទេសនេះដុតបំផ្លាញចោល៕
សុខភាព៖ការសិក្សាថ្មីមួយទាក់ទិននឹងការទទួលទានអាហារ និងភាពធាត់បានរកឃើញថា ការទទួលទានអាហារដែលមានកាកសរសៃកម្រិតទាប និងផ្លែឈើតិចនឹងជំរុញឲ្យមានភាពធាត់។
បណ្ឌិត ដេវីស និងសហការី បានអះអាងដូចខាងលើនេះក្រោយពីបានធ្វើការសាកសួរ និងសិក្សាទៅលើមនុស្សធាត់ និងស្គម លើមុខម្ហូបអាហារចំនួន ៦០មុខ វិភាគកម្រិតខ្លាញ់ ក្នុងរាងកាយ និងប៉ាន់ប្រមាណពីការធ្វើលំហាត់ប្រាណរបស់ពួកគេ បូករួមទាំងទម្ងន់ និងអាយុរកឃើញថា មនុស្សចាស់ទម្ងន់ធម្មតា (៥២គីឡូក្រាម) ទទួលទានអាហារដែលមានកាកសរសៃ និងផ្លែឈើក្នុងមួយថ្ងៃៗ ច្រើនជាងអ្នកដែលមានទម្ងន់លើសពី ៥២ គីឡូក្រាម។
បណ្ឌិត ដេវីស បានបញ្ជាក់បន្ថែមថា ការបង្កើនបរិមាណអាហារ ដែលមានកាកសរសៃច្រើន និងផ្លែឈើជាគន្លឹះសំខាន់សម្រាប់អ្នកដែលចង់កំណត់របបអាហារ ឬសម្រកទម្ងន់៕
សិល្បៈ៖តារាកំប្លែងជើងចាស់តា សង់ ស៊ីស ត្រូវបានក្រុមគ្រួសារបញ្ជូនទៅកាន់មន្ទីរពេទ្យភ្លាមៗ ដោយសារឡើងឈាម កម្រើកខ្លួនមិនបានកាលពីព្រឹកថ្ងៃទី៣១ ខែឧសភានេះ។
បើតាមការបញ្ជាក់ពីក្រុមគ្រួសារ នាយ សង់ ស៊ីស ត្រូវបានបញ្ជូនមកកាន់មន្ទីរពេទ្យភ្លាមៗ បន្ទាប់ពីឈាមរបស់លោកបានឡើងរហូតដល់២១។ ក្រុមគ្រួសារបានបញ្ជាក់បន្ថែមថា នាយ សង់ ស៊ីស បានធ្វើទុក្ខខ្លាំងកាលពីវេលាម៉ោង៦ព្រឹក ហើយត្រូវបានក្រុមគ្រួសារដឹកយកមកសង្គ្រោះបន្ទាន់នៅមន្ទីរពេទ្យអង្គរធំ បន្ទប់លេខ២០៨ ជាន់ទី២។
ទោះយ៉ាងណាក៏ដោយក្រោយពីការជួយសង្គ្រោះពីក្រុមគ្រូពេទ្យ មកដល់ពេលនេះអាការះជំងឺនាយ សង់ ស៊ីស បានធូស្រាលបន្តិចហើយ ប៉ុន្តែក្រុមគ្រូពេទ្យបានបន្តឲ្យលោកស្នាក់នៅ ដើម្បីដាមដានជំងឺបន្តទៀត ខណះពេលដែលដៃជើងរបស់លោកមិនទាន់អាចកម្រើកបាននៅឡើយទេ៕
សុខភាព៖អ្នកគួរធ្វើការទទួលទានសារជាតិប្រូតេអ៊ីនឲ្យបានយ៉ាងហោចណាស់ ៥០ក្រាមក្នុងមួយថ្ងៃ។ ដើម្បីទទួលបាននូវ អត្ថប្រយោជន៍ពេញលេញរបស់វា។ ប្រភេទអាហារដែលសំបូរទៅដោយសារជាតិប្រូតេអ៊ីន គឺមានមកពីសត្វមានដូចជា ទឹកដោះគោ ស៊ុត និង សាច់។
ប្រភេទអាហារដែលមានផ្ទុកសារជាតិប្រូតេអ៊ីន ក្នុងបរិមាណខ្ពស់ គឺមានសារៈប្រយោជន៍ក្នុងការរក្សាខ្លួនអ្នកឲ្យមានថាមពល និងធ្វើឲ្យមុខងាររបស់រាងកាយអ្នកមានដំណើរការបានល្អ។ ទោះជាយ៉ាងណាក៏ដោយ ប្រសិនបើអ្នកធ្វើការជ្រើសរើសបរិភោគតែបន្លែ និង ផ្លែឈើ នោះអ្នកអាចបរិភោគ នូវ សណ្តែកខៀវមួយពែងកន្លះ ដែលវាអាចនឹងមានជាតិប្រូតេអ៊ីនស្មើនឹងបន្ទះសាច់ចៀន ១០០ក្រាម។
ប្រភេទអាហារដែលមានផ្ទុក ជាតិប្រូតេអ៊ីន គឺអាចជួយធ្វើឲ្យអ្នកមានអារម្មណ៍ថាឆ្អែតបន្ទាប់ពីទទួលទានអាហារ រួច មានថាមពលពេញមួយថ្ងៃ ហើយវាក៏ផ្តល់អត្ថប្រយោជន៍ផងដែរទៅដល់សាច់ដុំ ការរីកធំធាត់ និង សុខមាលភាពទាំងស្រុងរបស់រាងកាយ។
ប្រភេទអាហារដែលសំបូរ ទៅដោយសារជាតិប្រូតេអ៊ីន សណ្តែកខៀវ ស៊ុត ផលិតផលដែលធ្វើពីជាតិទឹកដោះគោ អាហារសមុទ្រ សាច់បសុបក្សី សណ្តែកសៀង សាច់គោ។ប្រសិនបើអ្នកបានបរិភោគនូវអាហារ ដែលមានផ្ទុកនូវសារជាតិប្រូតេអ៊ីនបន្តិច នោះអ្នកនឹងមានអារម្មណ៍ថា មិនសូវឃ្លាននៅក្នុងពេលថ្ងៃ និង មិនសូវមានចំណង់ញុំាច្រើនជ្រុល ឬ ចង់ទទួល ទានអាហារសម្រន់ច្រើននោះទេ៕
អាមេរិក៖សារព័ត៌មាន AFP បានផ្សាយថា កាលពីម្សិលមិញសេតវិមានបានបិទរយៈពេល៣ម៉ោងបន្ទាប់ពីបុគ្គលម្នាក់បានគ្រវែងចោលដែកមួយដុំទៅលើរបងផ្នែកខាងជើងនៃសេតវិមានក្នុងបរិវេណគេហដ្ឋានប្រធានាធិបតី។
ក្រុមមន្ត្រីនិយាយថា នេះគឺជាវិធានការការពារ ប៉ុន្តែបានរកឃើញថាករណីនេះមិនមែនជាការគំរាមផ្នែកសុវត្ថិភាពនោះឡើយ ហើយសេតវិមានត្រូវបានបើកឲ្យដំណើរការដូចធម្មតាវិញ។ មន្ត្រីដដែលបញ្ជាក់ថា ជាមួយគ្នានោះកម្លាំងសមត្ថកិច្ចបានចាប់ឃាត់ខ្លួនស្ត្រីម្នាក់បន្ទាប់ហេតុការណ៍នេះ។
គួរបញ្ជាក់ថា នៅពេលហេតុការណ៍នេះកើតឡើងប្រធានាធិបតីអាមេរិក លោក បារ៉ាក់ អូបាម៉ា បានចូលរួមទិវា Memorial Day នៅឯទីលានបញ្ចុះសពយោធា Arlington៕
រាជធានីភ្នំពេញ៖លោក សុខ ឥសាន អ្នកនាំពាក្យ CPP បានបដិសេធចំពោះការលើកឡើងរបស់ EU ដោយបញ្ជាក់ថា ស្ថានភាពនយោបាយ កម្ពុជា នាពេលបច្ចុប្បន្ន គឺមានសភាពជាធម្មតាគ្មានអ្វីប្រែប្រួល និងព្រួយបារម្ភឡើយ ។
គួរបញ្ជាក់ថា សហភាពអឺរ៉ុបបានចេញសេចក្តីថ្លែងការណ៍ដោយបានសម្តែងការសោកស្តាយ ចំពោះព្រឹត្តិការណ៍នយោបាយនៅកម្ពុជា និងអំពាវនាវឲ្យមានការជួបចរចាពិភាក្សាដោយសន្តិវិធីឡើងវិញ ដើម្បីបង្កើតបរិយាកាសល្អសម្រាប់ការបោះឆោ្នតនាពេលខាងមុខ៕
ខេត្តពោធិ៍សាត់៖ដោយសារតែមានជម្លោះក្នុងគ្រួសាររហូតមានវិបត្តិផ្លូវចិត្តបុរសម្នាក់ផឹកស្រាជោក ហើយចុះហែលទឹកក្នុងស្ទឹងពោធិ៍សាត់បណ្តលឲ្យលង់ស្លាប់តែម្តង។ ហេតុការណ៍នេះកើតឡងកាលពីវេលាម៉ោង៦ និង៣០នាទីល្ងាច ថ្ងៃទី៣០ ខែឧសភា ឆ្នាំ២០១៦ នៅចំណុចចុងកោះសំពៅមាស ស្ថិតក្នុងភូមិក្បាលហុង ឃុំវាល ស្រុកកណ្តៀង ខេត្តពោធិ៍សាត់។
ជនរងគ្រោះ ឈ្មោះ ហួរ អាយុប្រហែល ៥០ឆ្នាំ ជាអាជីវករលក់ដូរ រស់នៅភូមិក្បាលហុង ឃុំវាល ស្រុកកណ្តៀង ខេត្តពោធិ៍សាត់។
តាមប្រភពបានឲ្យថា ជនរងគ្រោះជានិច្ចជាកាលធ្លាប់មានវិបត្តិក្នុងគ្រួសារ ហើយតែងតែផឹកស៊ីស្រវឹងជោគជាំ ជារៀងរៀងរាល់ថ្ងៃ។ ប្រភពបន្តថា នាថ្ងៃកើតហេតុ ជនរងគ្រោះបានផឹកស៊ីស្រវឹងដូចសព្វមួយដង ហើយបានទាស់មាត់ទាស់សម្តីជាមួយគ្រួសារ រួចក៏ដើរទៅងូតទឹកស្ទឹងពោធិ៍សាត់ ដោយហែលទាំងកម្រោលរហូតដល់ដាច់ខ្យល់ស្លាប់ ក្នុងស្ទឹងតែម្តង។ បច្ចុប្បន្នសាកសព ត្រូវបានក្រុមគ្រួសារ ស្រង់យកទៅធ្វើបុណ្យតាមប្រពៃណី៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
