រាជធានីភ្នំពេញ៖កម្លាំងសមត្ថកិច្ចចំរុះ ខ័ណ្ឌមានជ័យ បានចាប់វាយខ្នោះចាស់ទំនើងម្នាក់ ដែលមិនគោរពសមត្ថកិច្ច ប្រើចរិកច្រង៉េងច្រង៉ាង និងថាមិនព្រមឲ្យពិនិត្យជាតិអាល់កុល ខណ:ដែលចាស់ទំនើងរូបនេះ បើករថយន្ត Land Cruiser ពាក់ស្លាកលេខភ្នំពេញ 2AB-7197 ឆ្លងកាត់ប៉ារ៉ាស់ត្រួតពិនិត្យជាតិអាល់កុល ស្ថិតនៅគោលដៅតាមផ្លូវព្រះមុនីរ៉េត មុខផ្សារស្ទឹងមានជ័យថ្មី សង្កាត់ស្ទឹងមានជ័យ ខណ្ឌមានជ័យ នាយប់ថ្ងៃទី៥ ខែឧសភា ឆ្នាំ២០១៦។
សមត្ថកិច្ចអះអាងថា បុរសចាស់ទំនើងរូបនេះបើកបរស្រវឹង ជិះរថយន្ត Landcruiser ធ្វើចរឹកឈ្លើយត្រូវសមត្ថកិច្ចត្រួតពិនិត្យគោលដៅ និងអនុវត្តច្បាប់ចរាចរណ៍ផ្លូវគោកថ្មី របស់អធិការដ្ឋានខណ្ឌមានជ័យ សហការជាមួយកម្លាំងចម្រុះឃាត់ខ្លួនបញ្ជូនទៅស្នងការដ្ឋាននគរបាលរាជធានីភ្នំពេញ។
ពេលដែលបុរសនោះបើកមកដល់ទីតាំងសមត្ថកិច្ចយើងឃាត់ ពេលនោះ ស្រាប់តែគាត់ចុះពីរថយន្ត រួចហើយ យកលុយ៥០ដុល្លារ ដាក់លើតុ ហើយទះតុ ហើយពេលនោះក៏ប៉ះពាក្យសម្តីគ្នា ជាមួយសមត្ថកិច្ច រហូតចាប់វាយខ្នោះតែម្តង។
សមត្ថកិច្ចមិនទាន់ហ៊ានបញ្ចេញអត្តសញ្ញាណបុរសទំនើងនោះនៅឡើយទេ ព្រោះថា អ្នកដែលមានរថយន្តទំនើបជិះហើយក្អេងក្អាងបែបនោះ ប្រាកដជាមិនធម្មតា៕
ស៊ីរី៖មនុស្សយ៉ាងហោចណាស់ ២៨នាក់ ត្រូវបានរាយការណ៍ថា បានបាត់បង់ជីវិត បន្ទាប់ពីមានការវាយប្រហារ តាមអាកាសមួយ ទៅលើជំរុំភៀសខ្លួន មួយកន្លែងដែលស្ថិតនៅ ភាគខាងជើងប្រទេស ស៊ីរីដែលកៀកទៅនឹងព្រំប្រទល់ ជាមួយតួកគី។ នេះបើយោងតាមព័ត៌មានរបស់ BBC។
របាយការណ៍ខ្លះ បាននិយាយថា វាជាការវាងប្រហារពីសំណាក់ យន្តហោះចម្បាំង របស់រដ្ឋាភិបាលស៊ីរី និងខ្លះទៀតនិយាយថា ជាយន្តហោះចម្បាំងរបស់ប្រទេសរុស្សី បើទោះបីជា មិនទាន់មានភាគីណា បានអះអាងច្បាស់លាស់ លើបញ្ហានេះទេ៕
រាជធានីភ្នំពេញ៖លោក ប៉ាន់ ខែមប៊ុនថន នាយកប្រតិបត្តិសម្ព័ន្ធយុវជនស្រឡាញ់សន្តិភាព បានប្រកាសត្រៀមដឹកនាំប្រជាពលរដ្ឋ យុវជន និស្សិតចំនួន៥០០០នាក់ ហែញត្តិគាំទ្រ សកម្មភាពនិងចំណាត់ការរបស់អង្គភាពប្រឆាំងអំពើពុករលួយទៅលើមន្ត្រីសង្គមស៊ីវិល និងមន្ត្រី គជប។
លោក ប៉ាន់ ខែមប៊ុនថន បានប្រាប់អ្នកសារព័ត៌មានថា លោកនឹងដាក់ពាក្យស្នើសុំទៅកាន់សាលារាជធានីភ្នំពេញ ដើម្បីបានសិទ្ធិការហែញតិ្តគាំទ្រ សកម្មភាពរបស់ ACU។
ការត្រៀមកម្លាំងហែញ្ញាត្តិគាំទ្រ ACU នេះធ្វើឡើងបន្ទាប់ពីមានតំណាងប្រជាពលរដ្ឋ យុវជន និងស្ត្រីមួយចំនួន បានប្រកាសថា ពួកគេមានគ្នាប្រមាណ២ពាន់នាក់ នឹងដង្ហែញត្តិទៅអង្គភាពប្រឆាំងអំពើពុករលួយ នៅវេលាម៉ោង៩៖០០ ថ្ងៃទី០៧ ខែឧសភា ឆ្នាំ២០១៦ ដើម្បីទាមទារឱ្យអង្គភាពនេះ បញ្ឈប់ការចោទប្រកាន់លើមន្ត្រី សង្គមស៊ីវិល៕
រាជធានីភ្នំពេញ៖លោក គីម ហ៊ាង ប្រធានសហគម វាយតំម្លៃអចលនវត្ថុកម្ពុជា ថ្លែងប្រាប់អ្នកសារព័ត៌មាន ថា វិស័យដីធ្លីកម្ពុជា ពីឥឡូវដល់១០ឆ្នាំទៅមុខទៀត គឺមិនថយចុះនោះទេ លោកបញ្ជាក់ថា វិស័យដីធ្លីកម្ពុជាពីឥឡូវដល់១០ឆ្នាំ ទៅមុខទៀតគឺមិនថយចុះនោះទេ។ ជាការពិតតំលៃដីធ្លីអាចមិនស្ថិតស្ថេរ នៅក្នុងកំឡុងពេល១០ឆ្នាំ អាចនឹងមាន២ឆ្នាំជួបនឹងបញ្ហា តែមិនមានន័យថា ជាប់គាំងនោះទេ»។
លោក គីម ហ៊ាង បានលើកឡើងថា មានចម្ងល់ និងការព្រួយបារម្ភជាច្រើនចោទសួរថា ក្នុងឆ្នាំ២០១៦ ដីធ្លីអាចជាប់គាំងលក់មិនបាន ឬក៏យ៉ាងណា? ពាក់ព័ន្ធបញ្ហានេះលោកបានឆ្លើយតប និងការព្រួយបារម្ភនេះថា ជាការពិតវាអាចពិបាកក្នុងការលក់ចេញ ប៉ុន្ដែវាមិនមានន័យថា ជាប់គាំងលក់មិនចេញរហូតនោះទេ។ លោកបានលើក ឧទាហរណ៍ថា ប្រសិនបើប្រជាពលរដ្ឋមានដីមួយកន្លែង គាត់ចង់លក់តែក្នុងឆ្នាំ២០១៦ លក់មិនចេញ នេះវាមិនមែនជាបញ្ហាចោទនោះទេ ព្រោះឆ្នាំនេះលក់មិនចេញ អាចបន្ដលក់នៅឆ្នាំ២០១៨ ឬ២០១៩ទៀតបាន ចណែកឯតម្លៃវិញអាចនឹងថ្លៃលើសដើមក៏ថាបាន។
លោក គឹម ហ៊ាង បន្តថា ជារៀងរាល់ឆ្នាំកំណើនប្រជាជន នៅតែងកើតមាតម្រូវការនៃជម្រក ក៏ត្រូវតែកើនឡើងដូចគ្នា មិនមានប្រជាជនណា ដែលមិនត្រូវការជម្រកនោះទេ ដូចច្នេះដីធ្លីនៅតែមានសន្ទុះ។ ជាមួយគ្នានេះ ប្រទេសកម្ពុជា ជាប្រទេសកំពុងអភិវឌ្ឍន៍ ដូច្នេះមានបរទេសជាច្រើន បានមករកស៊ី និងធ្វើជំនួញនៅកម្ពុជា ពួកគេត្រូវការជម្រក ត្រូវការដីសម្រាប់រស់នៅ សម្រាប់សាងសង ដើម្បីវិនិយោគលើផ្នែកអ្វីមួយ ដូច្នេះដីធ្លីនៅតែដើតួននាទីយ៉ាសំខាន់៕
រាជធានីភ្នំពេញ៖ក្រុមតំណាងរាស្ត្រ គណបក្សសង្គ្រោះជាតិ បានចុះហត្ថលេខាលើខិលិតមួយដោយ ស្នើសម្តេចតេជោ ហ៊ុន សែន នាយករដ្ឋមន្ត្រី អនុញ្ញាតឱ្យ លោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ចូលបំភ្លឺផ្ទាល់មាត់នៅរដ្ឋសភា ក្នុងពេលដ៏ខ្លីខាងមុខនេះ ជុំវិញបញ្ហាមួយចំនួនក្នុងការអនុវត្តការងារ។
យោងតាមលិខិតរបស់តំណាងរាស្ត្រ CNRP បញ្ជាក់ថា បញ្ហាដែលក្រុមតំណាងរាស្ត្រ គណបក្សសង្គ្រោះជាតិចង់ឱ្យ លោករដ្ឋមន្ត្រីក្រសួងយុត្តិធម៌បំភ្លឺនោះ រួមមាន ទី១. គោលការណ៍ច្បាប់ និងគោលនយបាយព្រហ្មទណ្ឌរបស់រាជរដ្ឋាភិបាល ពាក់ព័ន្ធនឹងការឃុំខ្លួនជនត្រូវចោទបណ្តោះអាសន្ន។ គោលការណ៍និងការអនុវត្តជាក់ស្តែង អធិការកិច្ចការឃុំខ្លួន។ ទី២ ការប្តឹងបរិហារ និងអំណាចធ្វើអធិបញ្ជារបស់រដ្ឋមន្ត្រីក្រសួងយុត្តិធម៌ និង ទី៣.សំណួរផ្សេងៗមួយចំនួនទៀត៕
បរទេស៖យោងតាមសារព័ត៌មាន Bangkok Post បានផ្សាយថា ប្រទេសឥណ្ឌូណេស៊ី ម៉ាឡេស៊ី និងហ្វីលីពីនគ្រោងនឹងធ្វើការល្បាតរួមគ្នានៅលើដែនទឹករបស់ពួកគេ បន្ទាប់ពីសកម្មភាពចាប់ជំរិតរបស់ក្រុមអ៊ីស្លាមជ្រុលនិយមបានកើនឡើងនាពេលថ្មីៗនេះ។
ថ្លែងក្រោយជំនួបផ្ដួចផ្ដើមដោយប្រទេសឥណ្ឌូណេស៊ី និងមានការចូលរួមពីរដ្ឋមន្ត្រីការបរទេស និងមេបញ្ជាការយោធាលោក Retno Marsudi រដ្ឋមន្ត្រីការបរទេសឥណ្ឌូណេស៊ីបាននិយាយថា ប្រទេសទាំងបីនឹងធ្វើការល្បាតនៅតំបន់ដែនទឹករួម។ ទន្ទឹមនោះប្រទេសទាំងបីក៏បានឯកភាពគ្នាផងដែរទៅលើការបង្កើតប្រព័ន្ធទូរស័ព្ទបន្ទាន់មួយសម្រាប់ទាក់ទងគ្នានៅក្នុងស្ថានការណ៍អាសន្ន ការកែលម្អការសម្របសម្រួលនៅពេលផ្ដល់ជំនួយដល់មនុស្ស និងនាវារងគ្រោះ និងពង្រឹងការចែករំលែកព័ត៌មានចារកម្ម។
គួរបញ្ជាក់ថា កាលពីខែមីនាកន្លងមកនេះ ពួកឧទ្ទាម Abu Sayyaf បានចាប់ជំរិតនាវិកឥណ្ឌូណេស៊ី១០នាក់នៅភាគខាងត្បូងប្រទេសហ្វីលីពីន ហើយទើបតែដោះលែងពួកគេវិញកាលពីសប្ដាហ៍កន្លងមកនេះ៕
ខេត្តបន្ទាយមានជ័យ៖លោក ជុំ សុន្ទរី អ្នកនាំពាក្យក្រសួងការបរទេសខ្មែរ បានថ្លែងថា ស្រី្តខ្មែរដែលជាអាជីវករ នៅផ្សាររុងក្លឿ ស្ថិតនៅស្រុកអារញ្ញ ខេត្តស្រះកែវ ប្រទេសថៃ ដែលត្រូវបានបុរស ជនជាតិថៃ ចាប់ខ្លួនហើយរំលោភ សេពសន្ថវៈ បានទាមទារប្រាក់ ជំងឺចិត្ត ៥សែនបាត។ លោក ជុំ សុន្ទរី បានថ្លែងប្រាប់អ្នកសារព័ត៌មាន ក្រោយបញ្ចប់ កិច្ចជំនួបរវាង លោកទេសរដ្ឋមន្ដ្រី ប្រាក់ សុខុន រដ្ឋមន្ដ្រី ក្រសួងការបរទេស ខ្មែរ និងលោក អ៊ុយហ្គោ អាស្ទូតូ អនុប្រធាន គ្រប់គ្រងទទួល បន្ទុកកិច្ចការអាស៊ី និងប៉ាស៊ីហ្វិក សហភាពអឺរ៉ុប នៅព្រឹកថ្ងៃទី៥ ខែឧសភា ឆ្នាំ២០១៦ថា “រឿងនេះ កំពុងធ្វើការដោះស្រាយគ្នា ដោយខាងសាម៉ីខ្លួន នារីរងគ្រោះ បានទាមទារ ៥សែនបាត ហើយខាងជនល្មើស បានប្រាប់ថា ខ្លួនមិនមានលទ្ធភាព សងទេ ។
ប៉ូលីសប្រាប់ថា បើជនល្មើស មានលទ្ធភាពសង នឹងអាចដោះស្រាយគ្នា ក្រៅផ្លូវការបាន” ។ បើតាមលោកជុំ សន្ទរី ប៉ូលីសថៃ ប្រាប់ថា បើជនល្មើសគ្មានប្រាក់សងទេ នឹងបញ្ជូនសុំណុំរឿងនេះ ទៅតុលាការ។
សូមបញ្ជាក់ថា ស្រី្តរងគ្រោះត្រូវបានបុរសជនជាតិថៃ ពីរនាក់ ចាប់ដាក់ក្នុងរថយន្ត យកទៅបាត់ កាលពីថ្ងៃទី៣ ខែឧសភា ឆ្នាំ២០១៦ ហើយតម្រួតថៃ បានរកឃើញ នៅថ្ងៃ៤ឧសភា។ ស្ត្រីរូបនេះ មានអាយុ២៧ឆ្នាំ មានប្តី និងកូនប្រុសម្នាក់ ជាអ្នកលក់ដូរ នៅក្នុងផ្សាររុងក្លឿ រស់នៅក្នុង ក្រុងសិរីសោភ័ណ ខេត្តបន្ទាយមានជ័យ៕
ម៉ាឡេស៊ី៖យោងតាមសារព័ត៌មាន Channel News Asia បានផ្សាយថា ក្នុងរយៈពេល២០ថ្ងៃទៅ៣ខែខាងមុខទៀត បើមិនមានទឹកភ្លៀងធ្លាក់ទេនោះនឹងបណ្តាលឲ្យខ្វះទឹកសម្រាប់ដំណើរការទំនប់វារីអគ្គិសនីចំនួន៧នៅក្នុងប្រទេសម៉ាឡេស៊ី។
រដ្ឋមន្ត្រីក្រសួងធនធានធម្មជាតិ និងបរិស្ថានរបស់ម៉ាឡេស៊ីថ្លែងថា របាយការណ៍ក្រសួងធនធានធម្មជាតិនិងបរិស្ថានម៉ាឡេស៊ីបញ្ជាក់ថា កម្រិតទឹកធ្លាក់ចុះក្រោម៥០%សម្រាប់លទ្ធភាពទំនប់វារីអគ្គិសនីដំណើរការ ដោយសារបញ្ហារលកកម្តៅ និងលក្ខខណ្ឌស្ងួតខ្លាំង។ លោកបន្តថា ទំនប់កំពុងហួតហែងក្នុងចំណោម៧នោះគឺទំនប់ Bukit Merah កំពុងបង្កការប៉ះពាល់ខ្លាំងដល់ប្រជាពលរដ្ឋនៅក្នុងស្រុក Kerian ពោលគឺកំពុងប្រឈមនឹងការខ្វះខាតទឹកប្រើប្រាស់ និងបង្កបង្កើនផល។ ទន្ទឹមនោះរដ្ឋាភិបាលបានសម្រេចបញ្ឈប់ការផ្គត់ផ្គង់ទឹកសម្រាប់កសិករធ្វើកសិកម្មនៅក្នុងរដ្ឋ Perak ដោយផ្តោតសំខាន់លើទឹកប្រើប្រាស់ប៉ុណ្ណោះ៕
រុស្ស៊ី៖សារព័ត៌មាន RT ចេញផ្សាយនាថ្ងៃទី៥ ខែឧសភា ឆ្នាំ២០១៦នេះដោយដកស្រុងសម្តីមន្ត្រីជាន់ខ្ពស់សន្តិសុខជាតិរុស្ស៊ីថា ក្រុមភេរវករបានរៀបចំផែនការវាយប្រហារដ៏ធំនៅក្នុងទីក្រុងម៉ូស្គូ ចំថ្ងៃ Victory Day ដែលព្រឹត្តិការណ៍ប្រព្រឹត្តឡើងនៅថ្ងៃទី០៩ ខែឧសភា ខាងមុខនេះ។
មន្ត្រី FSB បានអះអាងថា យើងបានរកឃើញនូវឧបករណ៍គ្រឿងផ្ទុះ និងអាវុធជាច្រើននៅក្នុងទីតាំងមួយ ជាមួយនឹងមនុស្សមួយក្រុម ដែលមកពីអាស៊ីកណ្ដាល។
គួរបញ្ជាក់ ថា Victory Day ជាទិវាជ័យជំនះ ដែលសហភាពសូវៀត បានយកឈ្នះលើកពួកណាស៊ី អាល្លឺម៉ង់ (Nazi Germany) ក្នុងអំឡុងពេលបញ្ចប់សង្គ្រាមលោកលើកទី២៕
ប៊ែលហ្ស៊ិក៖ប្រធានភា្នក់ងារសន្តិសុខប្រទេសប៊ែលហ្ស៊ិក លោក Jaak Raes បានថ្លែងថា ក្រុមឧទ្ទាមរដ្ឋឥស្លាម ISIS អាចនឹងបើកការវាយប្រហារភេរវកម្មជាថ្មីម្តងទៀតនៅក្នុងប្រទេសប៊ែលហ្ស៊ិក។ នេះបើតាមសារព័ត៌មានស៊ិនហួ។
លោក Jaak Raes បានបញ្ជាក់ថា ក្រុម ISIS ពេលខ្លះបានធ្វើឲ្យយើងដេកមិនលក់ ហើយនៅក្នុងរយៈពេលយូរ យើងរំពឹងថា យើងអាចទទួលការវាយប្រហារ បន្ថែមទៀត ពីក្រុមភេរវកម្មមួយនេះ។ ទោះជាយ៉ាងណាប្រធានភ្នាក់សន្តិសុខរូបនេះព្រមានប្រឆាំងទៅនឹងការកើនឡើងនៃទង្វើនេះផងដែរ៕
រ៉ង់ហ្គូន៖យ៉ាងហោចណាស់មនុស្ស២៨នាក់បានស្លាប់ និង២៤នាក់ផ្សេងទៀតរងបរួសដោយសារអាកាសធាតុអាក្រក់លាយឡំនឹងខ្យល់កន្ត្រាក់ខ្លាំងវាយប្រហារទីក្រុង Mandalay របស់ប្រទេសមីយ៉ាន់ម៉ា។ នេះបើយោងតាមសារព័ត៌មានស៊ិនហួរផ្សាយថ្ងៃទី៥ ខែឧសភា ឆ្នាំ២០១៦នេះ។
ប្រភពដដែលបញ្ជាក់ថា ទីក្រុង Mandalay ដែលជាទីក្រុងមានប្រជាជនរស់នៅ ច្រើនបំផុតលំដាប់ទីពីរ នៅប្រទេសមីយ៉ាន់ម៉ា។ ជាមួយគ្នានោះគោក្របី ១,៤១០ក្បាលងាប់ និងផ្ទះ ១៣,៣៥២ខ្នងបានទទួលរងការខូចខាត អគារសាលារៀន៦១ខ្នងរងផលប៉ះពាល់ និងតំបន់មួយចំនួនទៀត ផ្ទះ ២,៤២០ខ្នង បានបាក់រលំទាំងស្រុងតែម្តង។ ទន្ទឹមនោះរដ្ឋាភិបាលមីយ៉ាន់ម៉ាបានអះអាងថាអាចស្មើនឹងទឹកប្រាក់ ២,៦លានដុល្លារសហរដ្ឋអាមេរិក៕
ខេត្តព្រះសីហនុ៖កម្លាំងនគរបាលខេត្តព្រះសីហនុបានចាប់ខ្លួនប្តីចិត្តឃោរឃៅម្នាក់ ភ្លាមៗតែម្តង បន្ទាប់ពីបានសម្លាប់ប្រពន្ធខ្លួនឯង ដោយសារតែខឹងប្រពន្ធមិនឲ្យរួមភេទ។ ករណីនេះកើតឡើងនៅវេលាម៉ោង ១២ និង៣០នាទីយប់រំលងអធ្រាត្រថ្ងៃទី ០៥ ខែឧសភា ឆ្នាំ២០១៦ នៅចំណុចភូមិភ្នំតូច ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ។
តាមប្រភពពីសមត្ថកិច្ចបានឲ្យដឹងថា ជនសង្ស័យឈ្មោះ វ៉ើក សាវឿន អាយុ៥៣ឆ្នាំ មុខរបរធ្វើស្រែ មានទីលំនៅកន្លែងកើតហេតុខាងលើ បានប្រើដៃទះកំផ្លៀង និងច្របាច់កជនរងគ្រោះ ឈ្មោះ ណាំ ស្រី ភេទស្រី អាយុ៤៦ឆ្នាំ មុខរបរកម្មកររោងចក្រដែលជាប្រពន្ធបណ្តាលអោយស្លាប់ភ្លាមៗ។ ប្រភពដដែលបញ្ជាក់ថា ដើមហេតុកើតឡើងដោយសារបុរសជាប្តីស្រវឹងស្រា ហើយខឹងប្រពន្ធមិនចូលដេកក្នុងបន្ទប់ជាមួយ ខឹងក៏សម្លាប់ចោលតែម្តង។ បច្ចុប្បន្នជនសង្ស័យត្រូវបានឃុំខ្លួនបណ្តោះអាសន្ននៅអធិការដ្ឋាន ដើម្បីបំពេញសំណុំរឿងបញ្ជូនទៅការិយាល័យជំនាញ៕
សុខភាព៖ក្មេងជំទង់ដែលក្នុងរបបអាហាររបស់គេមានបញ្ចូលភេសជ្ជៈច្រើន និងអាហារដែលមានជាតិស្ករច្រើនបានបង្ហាញពីរោគសញ្ញានៃរាងកាយថា ពួកគេកំពុងប្រឈមនឹងបញ្ហាបេះដូងខ្ពស់។ តាមរយៈការបង្កើនការទទួលទាន កាបូនអ៊ីដ្រាត និងស្ករត្រូវបានបញ្ចូលក្នុងជំងឺសរសៃ ឈាមបេះដូងខ្ពស់ក្នុងចំណោមមនុស្សពេញវ័យ។
ដើម្បីធ្វើតេស្តបញ្ហានេះ អ្នកស្រាវជ្រាវបានធ្វើការសិក្សាទៅលើក្មេងជំទង់ ២,១៥៧នាក់។ ចំនួនមធ្យមនៃការបន្ថែមស្ករទៅលើការបរិភោគក្នុងមួយថ្ងៃ ១១៩ក្រាម (៤៧៦កាឡូរី)។ គេបានរកឃើញថា ក្មេងជំទង់ដែលបានទទួលទានស្ករបន្ថែមលើសពី ៩% ទៅមានកម្រិត កូលេស្តេរ៉ុល LDL ( អាក្រក់) ហើយលើសពី ១០% ទៅមានកម្រិត គ្លីសេរីត បើធៀបទៅនឹងអ្នកដែលទទួលទានស្ករទាប។
បន្ថែមទៅទៀតអ្នកដែលទទួលទានជាតិស្ករច្រើនបានបង្ហាញសញ្ញានៃការទប់ទល់ជាតិ អាំងស៊ុយឡាំង ដែលជាហេតុអាចនាំទៅរកជំងឺទឹកនោមផ្អែម ដែលពាក់ព័ន្ធជាមួយនឹងជំងឺបេះដូង៕
រាជធានីភ្នំពេញ៖ក្រសួងយុត្តិធម៌ និងបក្សប្រឆាំងត្រូវបានគេមើលឃើញថាកំពុងថ្លែងសរដាក់គ្នារឿងចាប់ខ្លួនតំណាងរាស្ត្រនឹងមន្ត្រីសមង្គស៊ីវិលដោយម្ខាងៗអះអាងយកត្រូវរៀងៗខ្លួន។
អ្នកនាំពាក្យក្រសួងយុត្តិធម៌ នៅថ្ងៃនេះ បានសម្តែងការសោកស្តាយចំពោះ សេចក្តីថ្លែងការណ៍ របស់ក្រុមសមាជិកសភា មកពីគណបក្សសង្គ្រោះជាតិ ហើយចាត់ទុកថា សេចក្តីថ្លែងការណ៍នេះ មានចរិតជាការដាក់សម្ពាធទៅលើអំណាចតុលាការ ដែលជាអំណាចឯករាជ្យ ការពារដោយច្បាប់ និងរដ្ឋធម្មនុញ្ញ។
ប្រតិកម្មរបស់អ្នកនាំពាក្យក្រសួងយុត្តិធម៌ បានធ្វើឡើងបន្ទាប់ពី ក្រុមតំណាងរាស្ត្រមកពីគណបក្សសង្គ្រោះជាតិ បានចេញសេចក្តីថ្លែងការណ៍មួយ ដោយចោទប្រកាន់ថា តុលាការបានប្រើអំណាចដោយរំលោភបំពានយ៉ាងធ្ងន់ធ្ងរលើអភ័យឯកសិទ្ធិតំណាងរាស្ត្រ ដែលធានាដោយមាត្រា៨០នៃរដ្ឋធម្មនុញ្ញ ហើយប្រកាសថា តំណាងរាស្ត្ររបស់ខ្លួន ៣រូប ដែលក្នុងនោះរាប់ទាំង លោក កឹម សុខា នឹងមិនចូលខ្លួនតាមការកោះហៅនេះនោះទេ៕
រាជធានីភ្នំពេញ៖នៅរសៀលនេះសាលារាជធានីភ្នំពេញ នឹងកោះហៅតំណាងអ្នកហែញាតិ្តតវ៉ាដើម្បីពិភាក្សា ជុំវិញការស្នើសុំហែញត្តិ ទៅអង្គភាពប្រឆាំងអំពើពុករលួយ។
សូមជម្រាបថាតំណាងប្រជាពលរដ្ឋ យុវជន និងស្ត្រីទាំងនោះ បានប្រកាសថា ពួកគេមានគ្នាប្រមាណ២ពាន់នាក់ នឹងដង្ហែញត្តិទៅអង្គភាពប្រឆាំង អំពើពុករលួយ នៅវេលាម៉ោង ៩៖០០ ថ្ងៃទី០៧ ខែឧសភា ឆ្នាំ២០១៦ ដើម្បីទាមទារឱ្យអង្គភាពនេះ បញ្ឈប់ការចោទប្រកាន់លើមន្ត្រី សង្គមស៊ីវិល៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
