All posts by មេគង្គ ប៉ុស្តិ៍

មុនសម្រេចចិត្តកែសុដន់ ត្រូវដឹងពីអ្វីខ្លះ?

September 30, 2015សុខភាពមេគង្គ ប៉ុស្តិ៍

ប្រសិនបើអ្នកកំពុងតែមានគម្រោងធ្វើការវះកាត់កែសុដន់អ្នកត្រូវដឹងថា៖ការកែសុដន់មិនអាចការពារការយារធ្លាក់នៃសុដន់បាននោះទេ ដូច្នេះអ្នកត្រូវការវះកាត់ដើម្បីលើកសុដន់ឡើងបន្ថែមទៀត។
ការកែសុដន់មិនអាចធានាបានថា វានឹងមានរយៈពេលយូរបានពេញមួយជីវិតឡើយ ព្រោះវាអាចនឹងបែក។ ស្ត្រីជាង ២០ ភាគរយ បានវះកាត់យកការកែសុដន់ចេញ នៅក្នុងរយៈពេល ៨ ទៅ ១០ ឆ្នាំ។ សុដន់ដែលបានកែហើយ អាចនឹងមានការផ្លាស់ប្តូរ ក្រោយការវះកាត់ និងកត្តាមួយចំនួន ដូចជា ការឡើងទម្ងន់ ឬស្រកទម្ងន់ ជាដើម ដែលតម្រូវឲ្យត្រូវធ្វើការវះកាត់បន្ថែមទៀត។ ការពិនិត្យសុដន់ អាចនឹងមានភាពស្មុគស្មាញច្រើន។ ដូច្នោះអ្នកអាចនឹងត្រូវការថត MRI ជារៀងរាល់ពីរឆ្នាំម្ដង បើអ្នកកែសុដន់ដោយប្រើស៊ីលីកូន ហើយត្រូវចាប់ផ្ដើមក្នុងរយៈពេល៣ឆ្នាំ បន្ទាប់ពីការវះកាត់។ ការកែសុដន់ អាចប៉ះពាល់ដល់ការបំបៅដោះកូន។ បន្ទាប់ពីកែសុដន់រួច អ្នកត្រូវធ្វើការវះកាត់ ដើម្បីលើកសុដន់ឡើង ឬវះកាត់បន្ថែមផ្សេងទៀត ដើម្បីជួយឲ្យសុដន់មានសោភ័ណភាពល្អ ហើយត្រូវការវះកាត់ម្ដងទៀត ដើម្បីដកយកការកែសុដន់នោះចេញ៕

Tiago ចង់បញ្ចប់អាជីពបាល់ទាត់ជាមួយ Atletico Madrid

September 30, 2015កីឡាមេគង្គ ប៉ុស្តិ៍

ខ្សែបម្រើរបស់ក្លិប Atletico Madrid គឺកីឡាករ Tiago បានចេញមកបញ្ជាក់ថា គាត់ចង់បញ្ចប់អាជីពជាអ្នកទាត់បាល់ជាមួយនឹងក្លិបមួយនេះ។
យោងតាមការចុះផ្សាយរបស់គេហទំព័រ Daily Mail បានឲ្យដឹងថា កីឡាករសញ្ជាតិព័រទុយហ្គាល់វ័យ៣៤ឆ្នាំរូបនេះនឹងផុតកិច្ចសន្យាជាមួយនឹងក្លិប Atletico Madrid នៅបញ្ចប់រដូវកាលនេះ ហើយគាត់ក៏មិនត្រូវបានក្លិបមួយនេះបន្តកិច្ចសន្យាថ្មីអ្វីដែល ប៉ុន្តែខ្សែបម្រើដែលជួយឲ្យក្លិប Atletico Madrid ឈ្នះជើងឯក La Liga BBVA របស់ប្រទេសអេស្ប៉ាញកាលពីឆ្នាំ២០១៣រូបនេះនៅតែទទូចចង់ឲ្យក្លិប មួយនេះផ្ដល់កិច្ចសន្យាថ្មីរូបគាត់។
គួរបញ្ជាក់ថា កីឡាករ Tiago បានចុះហត្ថលេខាលើកិច្ចសន្យាត្រឹមតែរយៈពេល ២ឆ្នាំប៉ុណ្ណោះឲ្យក្លិប Atletico Madrid គិតចាប់តាំងពីឆ្នាំ២០១៤មកម្ល៉េះ ហើយនឹងត្រូវផុតនៅបញ្ចប់រដូវកាលនេះ៕

ក្រុមសតាលីបង់ដោះលែងក្រុមសកម្មប្រយុទ្ធឥស្លាមរាប់រយនាក់ពីពន្ធធនាគារអាហ្វហ្គានីស្ថាន

September 30, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាហ្វហ្គានីស្ថាន៖ក្រុមសកម្មប្រយុទ្ធឥស្លាមរាប់រយនាក់ត្រូវបានក្រុមតាលីបង់ដោះលែង បន្ទាប់បានវាយប្រហារចូលក្នុងពន្ធធនាគារដ៏សំខាន់មួយស្ថិតក្នុងទីក្រុង Kunduzon ភាគខាងជើងប្រទេសអាហ្វហ្គានីស្ថានកាលពីថ្ងៃចន្ទកន្លងទៅនេះ។ នេះបើយោងទីភ្នាក់ងារសារព័ត៌មាន Channel News Asia ចេញផ្សាយកាលពីម្សិលមិញ។
តាមប្រភពពីអ្នកនាំពាក្យបានឲ្យដឹងថា ក្រុមសកម្មជនទាំងនោះប្រដាប់ដោយអាវុធ និងគ្រាប់បែក បានវាយយកជ័យជម្នះលើមន្ត្រីល្បាតការពារសន្តិសុខក្នុងពន្ធធនាគារក្នុងទីក្រុង Kunduzon។ បន្ទាប់ពីហេតុការណ៍នេះកើតឡើង រដ្ឋាភិបាលកំពុងព្យាយាមពង្រឹងសមត្ថភាព ដើម្បីបង្ការកុំឲ្យទីក្រុងទាំងមូលត្រូវធ្លាក់ទៅក្នុងកណ្តាប់ដៃពួកតាលីបង់៕

រុស្ស៊ីនឹងបើកការវាយប្រហារតាមអាកាសលើក្រុមISIS បើមានការអនុញ្ញាតពីUN

September 30, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាមេរិក៖ប្រធានាធិបតីរុស្ស៊ីលោក Vladimir Putin បានថ្លែងថា រុស្ស៊ីនឹងបើកការវាយប្រហារតាមដែនអាកាសប្រសិនបើមានការអនុម័តពីអង្គការសហប្រជាជាតិ ហើយអនុញ្ញាតឲ្យកងកម្លាំងរុស្ស៊ីចូលរួមក្នុងការប្រតិបត្តិការវាយប្រហារលើដែនគោកផងដែរ។នេះបើយោងតាមព័ត៌មាន BBC ចេញផ្សាយនៅរសៀលថ្ងៃទី២៩ ខែកញ្ញា ឆ្នាំ២០១៥។
ទោះជាយ៉ាងណារដ្ឋាភិបាលរុស្ស៊ីបាននឹងកំពុងពិចារណាថា តើត្រូវធ្វើតាមសហរដ្ឋអាមេរិក និងសម្ព័ន្ធមិត្តរបស់សហរដ្ឋអាមេរិក ក្នុងការវាយប្រហារតាមដែនអាកាសប្រឆាំងនឹងក្រុមឧទ្ទាមរដ្ឋឥស្លាម ISIS ឬយ៉ាងណា។ នេះបើតាមការឲ្យដឹងពីប្រធានាធិបតីរុស្ស៊ី លោក Vladimir Putin បន្ទាប់ពីលោកបានបញ្ចប់ជំនួបជាមួយលោក Barack Obama នៅខាងក្រៅកិច្ចប្រជុំកំពូល របស់អង្គការសហប្រជាជាតិ៕

ព្យាបាលជំងឺទឹកនោមផ្អែមដ៏មានប្រសិទ្ធភាពដោយប្រើស្លឹកស្វាយខ្ចី

September 29, 2015ព័ត៌មានថ្មីចុងក្រោយ, សុខភាពមេគង្គ ប៉ុស្តិ៍

សូមណែនាំមិត្តអ្នកអាននូវប្រភេទឧសថមួយមុខដែលងាយរកបាន និងមានប្រសិទ្ធភាពខ្ពស់ក្នុងការព្យាបាលជំងឺទឹកនោមផ្អែម នោះគឺស្លឹកស្វាយខ្ចី។

ទឹកនោមផ្អែមគឺជាជំងឺមួយដែលអាចបណ្ដាលឱ្យអ្នកជំងឺត្រូវប្រឈមនឹងការកាត់ដៃ កាត់ជើង
ដោយសារតែរបួសមិនអាចជាសះស្បើយបាន។ ក្រៅពីថ្នាំសម័យ គេក៏អាចប្រើប្រាស់ថ្នាំបុរាណមួយចំនួន ក្នុង
នោះ ស្លឹកស្វាយខ្ចីគឺជាឱសថដ៏ប្រសើរសម្រាប់ការព្យាបាលជំងឺនេះ។
ការព្យាបាលជំងឺទឹកនោមផ្អែមដោយស្លឹកស្វាយ តែងតែមានសុវត្ថិភាព មិនប៉ះពាល់ដល់សុខ
ភាពរាងកាយ ម្យ៉ាងទៀត អ្នកអាចស្វែងរកឧសថប្រភេទនេះបានដោយងាយ។
យោងតាមពេទ្យបុរាណ ស្លឹកស្វាយ ដែលមានប្រសិទ្ធភាពជួយឱ្យរាងកាយត្រជាក់ និងបញ្ចុះទឹក
នោមនេះ ក៏ត្រូវបានគេប្រើជាថ្នាំព្យាបាលផ្លូវដង្ហើមផ្នែកដូចជា ក្អក រលាកទងសួត។ល។
ជាងនេះ នៅក្នុងស្លឹកស្វាយ ក៏មានផ្ទុកសារជាតិ anthxyanhdin មានប្រយោជន៍ក្នុងការកាត់បន្ថយ
ជាតិស្ករក្នុងឈាមទប់ស្កាត់ការវិវត្តទៅរកភាពអាក្រក់នៅលើភ្នែក និងសរសៃឈាម ដែលអាច
កើតឡើងដោយសារជំងឺទឹកនោមផ្អែម។
ការពិសោធន៍ស្រាវជ្រាវរបស់សាកលវិទ្យាល័យអូស្ដ្រាលី បានបង្ហាញថា សារជាតិមួយចំនួននៅក្នុង
ស្លឹកស្វាយ មានប្រសិទ្ធភាពក្នុងការព្យាលបាលប្រហាក់ប្រហែលទៅនឹងថ្នាំពេទ្យ ដោយវាអាច
ព្យាបាលជំងឺទឹកនោមផ្អែម និងបញ្ចុះខ្លាញ់អាក្រក់ (កូលេស្តេរ៉ូល) ក្នុងឈាម។ ដូច្នេះហើយ គ្រូ
ពេទ្យអឺរ៉ុបមួយចំនួន បានប្រើប្រាស់ស្លឹកស្វាយជាជំនួយក្នុងការព្យាបាលជំងឺទឹកនោមផ្អែម ហើយ
លទ្ធផលបានបង្ហាញថា វាពិតជាមានប្រសិទ្ធភាពគួរឲ្យកត់សម្គាល់។
វិធីប្រើប្រាស់ស្លឹកស្វាយដើម្បីព្យាបាលជំងឺទឹកនោមផ្អែម ៖
ចូរយកស្លឹកស្វាយខ្ចី ៥ស្លឹក ហាត់ជាសរសៃ ដាក់ក្នុងកែវ រួចចាក់ទឹកក្ដៅចូលឱ្យពេញកែវ ហើយ
គ្របទុកមួយយប់។ ព្រឹកឡើង ស្រង់កាកចោលផឹកទឹកស្លឹកស្វាយនោះឱ្យអស់។ មួយថ្ងៃ ហូប
ត្រឹមតែមួយកែវប៉ុណ្ណោះ ។
នៅទីក្រុង ឬតំបន់ដែលមិនសម្បូរស្វាយ អ្នកអាចយកស្លឹកស្វាយទៅហាលក្នុងម្លប់ រហូតដល់
ស្ងួត។ យកស្លឹកស្វាយទាំងនោះ កិនឱ្យទៅជាម្សៅ ទុកសម្រាប់ប្រើប្រាស់។ ចូរលាយម្សៅស្លឹក
ស្វាយកន្លះស្លាបព្រាកាហ្វេ ជាមួយទឹកមួយកែវ ហូបមួយកែវពេលព្រឹក និងមួយកែវពេលល្ងាច។
សូមប្រយ័ត្ន ៖
-ដោយសារតែថ្នាំនេះ ជួយកាត់បន្ថយជាតិស្ករក្នុងឈាមយ៉ាងមានប្រសិទ្ធភាព ដូច្នេះអ្នកមិន
ត្រូវប្រើប្រាស់ឱ្យលើសពីអ្វីដែលបានរៀបរាប់ខាងលើនោះទេ ព្រោះវាអាចធ្វើឱ្យជាតិស្ករក្នុង
ឈាមធ្លាក់ចុះខ្លាំង បង្កគ្រោះថ្នាក់ដល់សុខភាព។
-អ្នកក៏មិនត្រូវផឹកទឹកស្វាយនេះ ជាមួយនឹងថ្នាំពេទ្យនោះដែរ ល្អបំផុតគឺត្រូវផឹកមុន ឬក្រោយថ្នាំ
ពេទ្យ រយៈពេលពី ២ទៅ៣ម៉ោង ដើម្បីមិនប៉ះពាល់ដល់ប្រសិទ្ធភាពថ្នាំ៕

ADB ព្យាករណ៍សេដ្ឋកិច្ចកម្ពុជាឆ្នាំនេះនិងឆ្នាំក្រោយនៅមានភាពវិជ្ជមាន

September 29, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ៖សេដ្ឋកិច្ចរបស់ប្រទេសកម្ពុជា នឹងនៅតែរឹងមាំរហូតដល់ឆ្នាំ ២០១៦ បើទោះបីជាកំណើនទំនងជានឹងមានល្បឿនយឺតតិចតួច ជាងការព្យាករណ៍កាលពីដើមឆ្នាំនេះក៏ដោយ។

នេះបើតាមការចេញផ្សាយរបស់ធនាគារអភិវឌ្ឍន៍អាស៊ី ហៅកាត់ថា ADB នៅថ្ងៃអង្គារទី២២កញ្ញាធនាគារអភិវឌ្ឍន៍អាស៊ីព្យាករណ៍ថា សេដ្ឋកិច្ចប្រទេសកម្ពុជាក្នុង ឆ្នាំ២០១៥និង២០១៦នៅតែមានភាពរឹងមាំបើទោះជាមានការថមថយតិចតួច ដែលទាក់ទងទៅនឹងការថយចុះនូវសក្តានុពលកំណើនសម្រាប់បណ្តាប្រទេស កំពុងអភិវឌ្ឍន៍នៅអាស៊ី និងការងើបឡើងវិញយឺតនៃសេដ្ឋកិច្ចរបស់ប្រទេសឧស្សាហកម្មធំៗ។

នៅក្នុងរបាយការណ៍បច្ចុប្បន្នភាព សេដ្ឋកិច្ចប្រចាំឆ្នាំ ដែលមានចំណងជើងថា«ទស្សនវិស័យ អភិវឌ្ឍន៍ (ADO)២០១៥» ធនាគារអភិវឌ្ឍន៍អាស៊ីព្យាករណ៍ថា កំណើនផលិតផលក្នុងស្រុកសរុប (ផសស) សម្រាប់ប្រទេសកម្ពុជាគឺ៧ភាគរយ សម្រាប់ឆ្នាំ២០១៥ និង៧,២ភាគរយ សម្រាប់ឆ្នាំ២០១៦។

ជាមួយគ្នានេះADB បានរំលឹកពីរបាយការណ៍របស់ខ្លួនកាលពីខែមីនា ដែលបានព្យាករណ៍ថាកំណើនឆ្នាំ២០១៥មាន៧,៣ភាគរយ និងឆ្នាំ២០១៦ មាន៧,៥ភាគរយ។ ក៏ប៉ុន្តែការព្យាករណ៍ពេលនេះ បែរជាថមថយទៅវិញនោះ ADB ពន្យល់ថាជាការឆ្លុះបញ្ចាំងពីការថយចុះ នូវសក្តានុពលកំណើនសម្រាប់ប្រទេសកំពុងអភិវឌ្ឍនៅអាស៊ី និងការងើបឡើងវិញយឺតយ៉ាវនៃសេដ្ឋកិច្ចរបស់ប្រទេសឧស្សាហកម្មធំៗ។

សេដ្ឋកិច្ចវិទូជាន់ខ្ពស់ADBប្រចាំប្រទេសលោក Jan Hansen ឲ្យដឹងថាការពង្រីកឧស្សាហកម្មកាត់ដេរ សំណង់ សេវាកម្មទេសចរណ៍ ហិរញ្ញវត្ថុ និងអចលនទ្រព្យ នៅតែបន្តជម្រុញកំណើនបន្ថែមទៀត។ លើសពីនេះ តម្រូវការក្នុងស្រុកមានការកើនឡើងខ្លាំង។ ការនាំចូលក៏មានកំណើនខ្ពស់។ រីឯការនាំចេញសម្លៀកបំពាក់ និងស្បែកជើងមានការកើនឡើង១១ភាគរយ ថយចុះពី១៤,៥ភាគរយ ក្នុងឆមាសទី១ឆ្នាំ២០១៤។

កំណើនការនាំចេញទំនិញសរុបថយមកនៅ១៤ភាគរយពី១៨,៣ភាគរយ។ កំរិតអតិផរណាប្រចាំឆ្នាំស្ថិតនៅត្រឹម១ភាគរយក្នុងខែឧសភាឆ្នាំ ២០១៥។ ក្រោយមកកំរិតនៃអតិផរណា ត្រូវបានកែសម្រួលមកនៅ១,៣ភាគរយ បន្ទាប់ពីមានការថយចុះនូវចំណាយលើការដឹកជញ្ជូននិងឥន្ធនៈ ក្រោយពេលមានការថយចុះយ៉ាងគំហុកនៃតម្លៃប្រេង៕

ការលាបថ្នាំសក់ប្រឈមនឹងគ្រោះថ្នាក់ចំពោះសុខភាព

September 29, 2015សុខភាពមេគង្គ ប៉ុស្តិ៍

រយៈពេលប៉ុន្មានឆ្នាំចុងក្រោយនេះ មានស្ត្រីជាច្រើនបានចាប់អារម្មណ៍នឹងការប្តូរពណ៌សក់ ដោយការប្រើថ្នាំលាបពណ៌សក់ ដែលផ្សំដោយជាតិគីមី។

តាមការស្រាវជ្រាវជាច្រើន បានបង្ហាញថា ការលាបថ្នាំសក់ គឺអាចនឹងជាមូលហេតុ នៃការបង្កគ្រោះមហន្តរាយផ្សេងៗ ជាច្រើនចំពោះសុខភាព គឺថា កាលបើអ្នកលាបថ្នាំសក់នូវពណ៌កាន់តែដិតដាមខ្លាំងនោះ ការប្រឈមរបស់អ្នក ក៏នឹងកាន់តែកើតមានខ្ពស់ទៅតាមនោះដែរ។ ខាងក្រោមនេះ គឺជាគុណវិបត្តិចំពោះសុខភាព ដែលអ្នកនឹងប្រឈម ក្រោយពីការលាបថ្នាំពណ៌សក់រួច៖

១.មានប្រតិកម្មអាលែហ្សី

ប្រតិកម្មអាលែហ្សី ដែលបណ្តាលមកពីការលាបថ្នាំពណ៌សក់ គឺពិតជាអាក្រក់ ដែលវាអាចនឹងរំខានដល់ អារម្មណ៍របស់អ្នក រហូតដល់ធ្វើអោយអ្នកមិនអាចអត់ទ្រាំបានទៅនឹង គ្រឿងសម្អាងអ្វីផ្សេងទៀតបាន នៅលើស្បែក។ ចូរប្រាកដថាអ្នក បានធ្វើតេស្តសាកល្បងវានៅលើស្បែកជាមុនសិន មុននឹងធ្វើការលាបវា ។

២. ផលរំខានទៅលើភ្នែក និង ស្បែកក្បាល

ប្រភេទថ្នាំគីមីមួយចំនួន ដែលមាននៅក្នុងផលិតផលនៃថ្នាំលាបសក់ អាចនឹងផ្តល់ផលរំខាន និង រោលកន្ទួលរមាស់ក្រហមដល់ស្បែក និង ភ្នែករបស់អ្នកបាន។ ពួកវាក៏អាចនឹង ធ្វើអោយកើតមាននូវអារម្មណ៍ ឈឺចាប់, ផ្សា និង ក្តៅក្រហាយនៅលើស្បែកក្បាលរបស់អ្នកបានផងដែរ។

៣. ទទួលរងនូវផលបំផ្លាញដោយសារតែមានផ្ទុកនូវថ្នាំកំចាត់សត្វល្អិត

ប្រភេទថ្នាំលាបសក់ជាច្រើន តែងមានផ្ទុកនូវសមាសធាតុម្យ៉ាងគឺ Alkylphenol ethosylate (APE) ដែល ត្រូវបានគេរកឃើញផងដែរ នៅក្នុងថ្នាំកំចាត់សត្វល្អិត និង សារធាតុសម្រាប់សម្លាប់មេជីវិតឈ្មោល។ បញ្ហានេះ ក៏អាចនឹងបង្កអោយមាននូវភាពមិនប្រក្រតីចំពោះអ័រម៉ូន នៅក្នុងខ្លួនអ្នកផងដែរ។

៤.កើតមាននូវជំងឺ Non- Hodgkin’s Lymphoma

តាមការសិក្សាស្រាវជ្រាវមួយ បានរកឃើញថា ក្រុមស្ត្រីដែលតែងធ្វើការប្រើ នូវផលិតផលថ្នាំលាបសក់ពេញក្នុងមួយ ជីវិតរបស់ពួកគេ គឺមានការប្រឈមមុខខ្ពស់បំផុតទៅនឹងការវិវត្តន៍ មាននូវជំងឺ Non- Hodgkin’s Lymphoma។ វាគឺជា ប្រភេទនៃជំងឺមហារីកម្យ៉ាង ដែលធ្វើការវាយប្រហារទៅលើ ប្រព័ន្ធទឹករងៃ ដែលជាផ្នែកមួយនៃប្រព័ន្ធភាពសាំរបស់រាងកាយ ។

៥. ជំងឺមហារីកសុដន់

សារធាតុ Para- phenylenediamine (PPED) ដែលមានវត្តមាននៅក្នុង ថ្នាំលាបសក់ភាគច្រើន ត្រូវបានរកឃើញ ថាជាសារធាតុដែលបង្កអោយមានជំងឺមហារីកសុដន់។ ទន្ទឹមនឹងនេះ គេក៏បានរកឃើញនូវភស្តុតាងជាច្រើន ដែលបានបង្ហាញពីទំនាក់ទំនង រវាងថ្នាំលាបសក់ ទៅនឹងជំងឺមហារីកសុដន់។

៦. ជំងឺមហារីកប្លោកនោម និង ជំងឺមហារីកប្រភេទផ្សេងទៀត

តាមការសិក្សា បានបង្ហាញថា អ្នកដែលបានប្រើថ្នាំលាបសក់ជាញឹកញាប់ គឺមានអត្រាប្រឈមខ្ពស់បំផុត ទៅនឹងជំងឺមហារីកប្លោកនោម និង ប្រភេទនៃជំងឺមហារីកផ្សេងៗទៀត ។

៧. ជំងឺមហារីកចំពោះកុមារភាព

ប្រសិនបើស្ត្រីធ្វើការលាបសក់ រយៈពេលខ្លីមុនពេលចាប់ផ្តើមបង្កកំណើត ឬ ខណៈពេលមានផ្ទៃពោះ នោះកូនរបស់ពួកគេ នឹងអាចមានឱកាស កើតមាននូវជំងឺមហារីកបានដល់ទៅ១០ដង៕

ក្រុុមចោរប្រដាប់អាវុធ២នាក់ចូលប្លន់ម្ចាស់ផ្ទះវេរលុយ និងលក់សាច់ឆ្កែ

September 29, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តបាត់ដំបង ៖ចោរប្លន់ប្រដាប់អាវុធមួយក្រុមមានគ្នាពីរនាក់ប្រដាប់ដោយកាំភ្លើង វែងមួយដើមនិងកាំភ្លើងខ្លីមួយដើមបានចូលប្លន់ផ្ទះវេរលុយព្រមទាំង វ៉ៃប្តីមួយស្វ័យកាំភ្លើងបណ្តាលរបួសបែកក្បាល និងប្លន់យកលុយមួយចំនួន ហើយគេចខ្លួនបាត់ដោយសុវត្ថិភាព។ ហេតុការណ៍ប្លន់ប្រដាប់អាវុធនេះ បានកើតឡើង កាលពីម៉ោងជាង៥ល្ងាចថ្ងៃទី២៨ខែកញ្ញាឆ្នាំ២០១៥ នៅភូមិកាឡោមភ្លុក ឃុំព្រៃស្វាយ ស្រុកមោងឫស្សី។

ជនរងគ្រោះម្ចាស់ផ្ទះត្រូវបានគេស្គាល់ឈ្មោះរដ្ឋ ធី (ប្តី) អាយុ៣៥ឆ្នាំ រងរបួសបែកក្បាលខាងក្រោយ និងប្រពន្ធឈ្មោះរ៉ែម ម៉ារ៉ា អាយុ៣៤ឆ្នាំ មុខរបរវេរលុយ និងលក់សាច់ឆ្កែ នៅភូមិ ឃុំខាងលើ។

យោងតាមការរៀបរាប់របស់ម្ចាស់ផ្ទះមុនពេលកើតហេតុ ផ្ទះរបស់គាត់ នៅបើកលក់សាច់ឆ្កែ និងវេរលុយ នៅឡើយ ហើយស្រាប់តែមានមនុស្សចម្លែកពីរនាក់ ដើរចូលមកក្នុងផ្ទះ ដោយមានកាំភ្លើងវែង១ដើម និងខ្លី១ដើម ស្លៀកពាក់ស៊ីវិល ព្រមទាំងពាក់ម៉ាសបិទមុខផង។ ពួកវាបានចាប់ប្តីចង និងវ៉ៃនឹងស្វ័យកាំភ្លើង បណ្តាលឲ្យបែកក្បាលពីក្រោយ ហើយគំរាមប្រពន្ធ ឲ្យប្រមូលលុយមកឲ្យពួកវា បើមិនដូច្នេះទេ វាបាញ់សម្លាប់ប្តីចោល។ ដោយភ័យពេក ប្រពន្ធក៍ប្រមូលលុយកាក់ ដែលលក់បាន ប្រគល់ឲ្យពួកចោរទាំងអស់។ បន្ទាប់ពីប្លន់បានលុយហើយ ពួកវាក៍នាំគ្នាគេចខ្លួន តាមផ្លូវក្រោយ តាមវាលស្រែបាត់ទៅ។

ក្រោយទទួលព័ត៌មានភ្លាម កម្លាំងអាវុធហត្ថ ដែលយាមនៅស្ថានីយប្រេងប្រមាណជាង ២០០ ម៉ែត្រ ពីផ្ទះកើតហេតុ បានដេញតាមក្រុមចោរប្លន់ដោយផ្ទុះអាវុធជាច្រើនគ្រាប់ ប៉ុន្តែពួកចោរមិនបានបាញ់តដៃទេ ហើយរត់ចូលព្រៃបាត់ស្រមោល៕

Manchester United ហាមមិនឲ្យ Victor Valdes ចូលហ្វឹកហាត់ជាមួយក្រុម

September 29, 2015កីឡាមេគង្គ ប៉ុស្តិ៍

អ្នកចាំទីរបស់ក្លិបបិសាចក្រហម Manchester United គឺកីឡាករ Victor Valdes ត្រូវបានគេរាយការណ៍ថា ហាមមិនឲ្យចូលហ្វឹកហាត់ជាមួយនឹងឈុតធំរបស់ក្លិបមួយនេះ។
យោងតាមការចុះផ្សាយរបស់សារព័ត៌មាន The Mirror បានឲ្យដឹងថា គ្រូបង្វឹករបស់ក្លិបបិសាចក្រហម Manchester United លោក Louis van Gaal បានប្រាប់ទៅដល់អ្នកចាំទីសញ្ជាតិអេស្ប៉ាញវ័យ៣៣ឆ្នាំរូបនោះថា គាត់គឺមិនត្រូវបានស្វាគមន៍ឲ្យចូលហ្វឹកហាត់ជាមួយនឹងឈុតធំរបស់ ក្លិបបិសាចក្រហម Manchester United នេះឡើយ ដោយសារតែការងាររបស់ Victor Valdes គឺត្រូវហ្វឹកហាត់ ក៏ដូចជាធ្វើជាអ្នកចាំទីឲ្យយុវជនរបស់ក្លិបបិសាចក្រហម Manchester United តែប៉ុណ្ណោះ។
គួរបញ្ជាក់ថា អ្នកចាំទី Victor Valdes ក៏កំពុងតែមានទំនាក់ទំនងក្នុងការផ្លាស់ទៅកាន់ក្លិបតោខៀវ Chelsea និង Liverpool ផងដែរ បន្ទាប់ពីមិនសូវបានជាប់ជាជម្រើសដំបូងរបស់ក្លិបបិសាចក្រហម Manchester United ចាប់តាំងពីផ្ទេរមកពីក្លិបអ្នកមានបុណ្យ Barcelona៕

ក្រុមឧទ្ទាមតាលីបង់វាយប្រហារភាគខាងជើងអាហ្វហ្គានីស្ថាន

September 29, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាហ្វហ្គានីស្ថាន៖ក្រុមសកម្មប្រយុទ្ធតាលីបង់បានបើកការវាយប្រហារដ៏ខ្លាំងក្លាមួយមកលើរដ្ឋធានីនៃខេត្តភាគខាងជើងឃុនឌូស របស់ប្រទេសអាហ្វហ្គានីស្ថានកាលពីម្សិលមិញ ដោយបានវាយសម្រុក ចូលទៅកាន់ច្រកសំខាន់របស់ទីក្រុង និងបានដុតកម្ទេចចោលអគារ និងកាន់កាប់មន្ទីរ។
ការវាយប្រហារខាងលើគឺជាលើទី២ហើយក្នុងឆ្នាំនេះ ដែលពួកឧទ្ទាមតាលីបង់ ធ្វើការឡោមទ័ពទីក្រុងឃុនឌូស ខណៈក្រុមនគរបាល និងកងទ័ពអាហ្វហ្គានីស្ថានដែលទទួលបានការបណ្ដុះបណ្ដាលពីអង្គការណាតូបានធ្វើសង្គ្រាមជាមួយដោយគ្មានជំនួយពីកងកម្លាំងបរទេសណាមួយឡើយ។
ទោះបីជាយ៉ាងណាក៏ដោយ ចំនួនអ្នកស្លាប់ និងរងរបួសមិនត្រូវបានគេដឹងភ្លាមៗនោះទេ ខណៈដែលប្រជាលពលរដ្ឋរាប់រយនាក់ត្រូវបានជម្លៀសចេញពីផ្ទះសម្បែង។
គួរបញ្ជាក់ថា ការឈ្លានពានដ៏គឃ្លើននេះដែរគឺជាព្រឹត្តិការណ៍ធំមួយ អំឡុងការបះបោររយៈពេលជិត១៤ឆ្នាំកន្លងមកនេះថ្វីត្បិតតែកងកម្លាំងអាហ្វហ្គានីស្ថានបានបណ្ដេញពួកគេចេញពីទឹកដីរបស់ខ្លួនក៏ដោយ៕

កូរ៉េខាងត្បូងអំពាវនាវឲ្យពិភពលោកមានចំណាត់ការលើបញ្ហានុយក្លេអ៊ែរកូរ៉េខាងជើង

September 29, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាមេរិក៖លោកស្រីប្រធានាធិបតីកូរ៉េខាងត្បូង ផាក គុនហេ បាននិយាយថា ដល់ពេលសម្រាប់សហគមន៍អន្តរជាតិផ្ដោតលើដំណោះស្រាយចំពោះការដកហូតអាវុធនុយក្លេអ៊ែររបស់ប្រទេសកូរ៉េខាងជើងហើយ។ លោកស្រីថ្លែងបែបនេះក្នុងកិច្ចប្រជុំអង្គការសហប្រជាជាតិកាលពីថ្ងៃចន្ទ។
លោកបញ្ជាក់ថា ខណៈដែលបញ្ហានុយក្លេអ៊ែររបស់អឺរ៉ុងបានឈានដល់ចំណុចប្រសព្វ ពេលនេះសហគមន៍អន្តរជាតិគួរតែផ្ដោតយកចិត្តទុកដាក់របស់ខ្លួន លើបញ្ហាអាវុធនុយក្លេអ៊ែររបស់ប្រទេសកូរ៉េខាងជើងវិញម្ដង គ្រាដែលបច្ចុប្បន្នវានៅតែជាអាវុធពោពេញដោយការប្រកួតប្រជែង។ លោកស្រីបន្តថា សកម្មភាពថ្មីៗបច្ចុប្បន្ននេះអាចរកឃើញ ពីផលលំបាកសម្រាប់សណ្ដាប់សន្តិសុខនៃបណ្ដាប្រទេសតំបន់អាស៊ីភាគឦសាន ដែលកំពុងនាំឲ្យមានការសង្ស័យក្នុងចំណោមប្រទេសក្នុងតំបន់។
ទោះជាយ៉ាងណាលោកស្រីនៅតែសង្ឃឹមថា សហគមន៍អន្តរជាតិនឹងធ្វើការរួមគ្នាដើម្បីបំពេញបំណងអង្គការសហប្រជាជាតិ ព្រមទាំងប្រជាជនកូរ៉េដែលចង់ឲ្យមានការរួបរួមគ្នា៕

គណៈប្រតិភូនាយករដ្ឋមន្ត្រី ហ៊ុន សែន នឹងនិវត្តមកដល់កម្ពុជាវិញនារសៀលថ្ងៃនេះ

September 29, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ: គណៈ ប្រតិភូនៃប្រមុខរាជរដ្ឋាភិបាលកម្ពុជា ដឹកនាំដោយលោកនាយករដ្ឋមន្ត្រី ហ៊ុន សែន បានបញ្ចប់ជាផ្លូវការក្នុងកិច្ចចូលរួមប្រជុំកំពូលរបស់អង្គការសហប្រជាជាតិនៅសហរដ្ឋអាមេរិក ហើយកំពុងធ្វើដំណើរនិវត្តមកដល់កម្ពុជាវិញនារសៀលថ្ងៃអង្គារនេះ។

តាមសេចក្តីប្រកាសក្នុងហ្វេសប៊ុកផ្លូវការរបស់នាយករដ្ឋមន្ត្រី ហ៊ុន សែន បានឲ្យដឹងថា កិច្ចប្រជុំកំពូលអង្គការសហប្រជាជាតិ (UN) នៅទីក្រុង New York, USA បានបញ្ចប់ប្រកបដោយលទ្ធផលដ៏ត្រចះត្រចង់ ដែលមេដឹកនាំពិភពលោក បានប្តេជ្ញាបន្តជួយគ្នាទៅវិញទៅមក ដើម្បីកាត់បន្ថយភាពក្រីក្រ ព្រមទាំងបានសន្យាក្នុងការគាំទ្រ និងលើកតម្កើងសិទ្ធិស្ត្រី និងផ្តល់ឧិកាសដល់ស្ត្រីចូលរួមក្នុងកិច្ចការសង្គមកាន់តែច្រើនឡើងថែមទៀត។

ហ្វេសប៊ុកដដែល លើកឡើងថា នៅថ្ងៃនេះ ( ថ្ងៃទី២៨កញ្ញា ) លោក នាយករដ្ឋមន្ត្រី ហ៊ុន សែន និងគណៈប្រតិភូជាន់ខ្ពស់ កំពុងធ្វើដំណើរនិវត្តន៍មកកាន់មាតុប្រទេសវិញ ដោយមានការអញ្ជើញជូនដំណើរដោយលោក ទុយ រី ឯកអគ្គរាជទូត តំណាងអចិន្រៃ្តយ៍ប្រចាំ(UN) ព្រមទាំងអស់លោក លោកស្រីឥស្សរៈជនការទូតរបស់កម្ពុជា ជាច្រើនរូបទៀតផង។

លោកនាយករដ្ឋមន្ត្រី និងគណៈប្រតិភូ នឹងអញ្ជើញមកដល់រាជធានីភ្នំពេញ នៅថ្ងៃអង្គារ៍ ទី២៩ ខែកញ្ញា ឆ្នាំ២០១៥ នាពេលរសៀល ( ម៉ោងនៅប្រទេសកម្ពុជា )។

សូមរម្លឹកថា លោកនាយករដ្ឋមន្ត្រី ហ៊ុនសែន បានដឹកនាំគណៈប្រតិភូជាន់ខ្ពស់មួយក្រុម ចាកចេញពីភ្នំពេញ កាលពីព្រឹកថ្ងៃទី២៣កញ្ញា ដើម្បីទៅចូលរួមកិច្ចប្រជុំកំពូលអង្គការសហប្រជាជាតិ នៅ បុរីញូវយ៉ក សហរដ្ឋអាមេរិក។ ក្នុងកិច្ចប្រជុំកំពូលប្រចាំឆ្នាំនាពេលនេះ លោកនាយករដ្ឋមន្ត្រី ហ៊ុនសែន បានឡើងថ្លែងសុន្ទរកថាសំខាន់ៗចំនួនពីរ ក្នុងកិច្ចប្រជុំអង្គការសហប្រជាជាតិ រវាងមេដឹកនាំពិភពលោក ដើម្បីត្រួតពិនិត្យការអភិវឌ្ឍន៍សហវត្សរ៍ និងដាក់ចេញនូវគោលដៅអភិវឌ្ឍន៍ដោយចិរភាព ឆ្នាំ២០៣០ ព្រមទាំងកិច្ចប្រជុំកំពូល “ប្រមុខដឹកនាំពិភពលោក ស្តីពី សមភាពយេនឌ័រ (Gender) និងការលើកកម្ពស់ស្ត្រី ការប្តេជ្ញាចិត្តឆ្ពោះ ទៅរកវិធានការ” ៕

ចាប់អ្នករត់តាក់ស៊ីម្នាក់ពីបទចាប់ រំលោភនារីបរទេសក្បែរស្ពានព្រែកតាខៀវ

September 28, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តក្រចេះ៖ អ្នករត់តាក់ស៊ីប្រភេទរថយន្ត១២កៅអី ម៉ាកសាំយ៉ុង ម្នាក់ត្រូវបានសមត្ថកិច្ចដេញតាមចាប់យោងតាមបណ្តឹងរបស់ស្ត្រីជនជាតិអង់គ្លេសម្នាក់ដែលប្តឹងចោទពីបទចាប់រំលោភសេពសន្ធវៈនៅចំណុចស្ពានព្រែកតាខៀវ ក្នុងស្រុកចិត្របុរី ។

ប្រភពព័ត៌មានពីស្រុកស្នួលបានឲ្យដឹងថា បុរសអ្នកបើកបររថយន្តតាក់ស៊ីម្នាក់ ត្រួវសមត្ថកិច្ចស្រុកឆ្លូងឃាត់ខ្លួន បន្ចាប់ពីធ្វើសកម្មភាពចាប់រំលោភសេពសន្ថវៈលើនារីបរទេសម្នាក់ មិន បានសម្រេច នៅម៉ោង១៥:៣០នាទីល្ងាច ថ្ងៃទី២៧ ខែកញ្ញា ឆ្នាំ២០១៥ នៅចំណុចស្ពានព្រែកតាខៀវ ភូមិបុសលាវ ឃុំបុសលាវ ស្រុកចិត្របុរី ខេត្តក្រចេះ។

អធិការនគរបាលស្រុកឆ្លូងបានប្រាប់ឲ្យដឹងថា ជនសង្ស័យមានឈ្មោះ នឹម ប៊ុនថាន អាយុ២៥ឆ្នាំ ជាអ្នករត់តាក់ស៊ីម៉ាកសាំយ៉ុង១ គ្រឿងពណ៌សំបកឪឡឹក ស្លាកលេខ ភ្នំពេញ 2T-4026 មានទីលំនៅស្រុកកំពង់សៀម ខេត្តកំពង់ចាម ដោយធ្វើសកម្មភាពចាប់រំលោភទៅលើនារីបរទេសម្នាក់ឈ្មោះ ស៊ីយូប៉ែន អូមូលី អាយុ២៤ឆ្នាំ ជនជាតិអង់គ្លេស និងជាអ្នកទេសចរណ៍។

តាមរបាយការណ៍បានឲ្យដឹងថា នៅថ្ងៃកើតហេតុ សង្ស័យបានបើករថយន្តដឹកភ្ញៀវមកពីក្រុងសួង ខេត្តត្បូងឃ្មុំ មកទម្លាក់ចុះនៅស្រុកឆ្លូង ខេត្តក្រចេះ។ ក្រោយពីភ្ញៀវចុះអស់ នៅសល់តែនារីបរទេសម្នាក់នេះ បានបន្តដំណើរដល់ទីរួមខេត្តក្រចេះ។លុះមកដល់ចំណុចកើតហេតុអ្នកបើកបររថយន្តតាក់ស៊ី បានបើករថយន្ដចូលតាមផ្លូវលំមាត់ទន្លេដល់កន្លែងស្ងាត់ក៏ឈប់រថយន្ដរួចចាប់ទាញដៃស្ត្រីរងគ្រោះចុះលើរថយន្ដធ្វើសកម្មភាពចាប់រំលោភសេពសន្ថវៈ តែមិនបានសំរេច ព្រោះមានអ្នកភូមិឃើញនិងចូលជួយទាន់។

ក្រោយពីមកដល់ផ្ទះសំណាក់មួយកន្លែងនៅទីរួមខេត្តក្រចេះនារីបរទេសរូបនោះ បានប្រាប់រឿងនេះ ទៅអ្នកបកប្រែ ហើយក៏មានការប្តឹងមកសមត្ថកិច្ច ទើបឈានដល់ការស្ទាក់ដេញចាប់ខ្លួនបានជនសង្ស័យ។

ក្រោយពីមានការឃាត់ខ្លួនជននេះ សមត្ថកិច្ចបាននាំខ្លួនមកសាកសួរនៅអធិការនគរបាលស្រុកឆ្លូង រួចនិងបញ្ជូនទៅការិយាល័យព្រហ្មទណ្ឌខេត្តដើម្បីចាត់ការតាមនីតិវិធី ៕ដោយ៖រដ្ឋា

ឆ្អែតចិត្តព្រោះប្តីមានស្រី ចង.កខ្លួនឯង និងកូនតូចៗ២នាក់ស្លាប់នៅស្រុកវាល វែង

September 28, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ពោធិ៍សាត់៖ស្ត្រីជនជាតិជងម្នាក់ បានដាច់ចិត្តធ្វើអត្តឃាតដោយចងកខ្លួនឯង រួមនិងកូនតូចៗប្រុសម្នាក់ ស្រីម្នាក់ស្លាប់យ៉ាងអាណោចអាធម៌ក្នុងខ្ទមរបស់ខ្លួន ខណៈបុរសជាប្តីមិនសូវនៅផ្ទះរវល់ទៅដេកជាមួយស្រីកំណាន់ កាលពីវេលាម៉ោង៧និង៣០នាទីព្រឹកថ្ងៃទី២៧ ខែកញ្ញា ២០១៥ ។

ហេតុការណ៍ដ៏រន្ធត់នេះ បានកើតឡើងកាលពីថ្ងៃទី២៧ ខែកញ្ញា វេលាម៉ោង០៧:៣០នាទីព្រឹក នៅភូមិអូរសោម ឃុំអូរសោម ស្រុកវាលវែង ខេត្តពោធិ៍សាត់។មន្ត្រីមានសមត្ថកិច្ច បានអះអាងថា ជាករណីអត្តឃាត មិនមែនជាអំពើឃាតកម្មនោះទេ ។

លោកអធិការនគរបាលស្រុកវាលវែងបានឲ្យដឹងថា ស្ត្រីជាម្ដាយ ឈ្មោះ ទ្រី ឆែក អាយុ៣០ឆ្នាំ ជាជនជាតិជង។ កូនទី១ ឈ្មោះ ផែន ចរិយា ភេទស្រី អាយុ៤ឆ្នាំ និងកូនទី២ ឈ្មោះ ផែន ផាន់ណា ភេទប្រុស អាយុ២ឆ្នាំ។ ចំណែកប្ដីឈ្មោះ នឿន ផែន អាយុ៣១ឆ្នាំ ជាជនជាតិខ្មែរ។

អ្នកភូមិរស់នៅជិតខាងបានបញ្ជាក់ថា កន្លងមកប្ដីប្រពន្ធខាងលើនេះ តែងតែមានការឈ្លោះប្រកែកគ្នាជាញឹកញាប់ ដោយសារបុរសជាប្ដីសប្បាយនឹងការមានស្រីញី ហើយស្ត្រីជាប្រពន្ធនិយាយលែងបាន ។មានម្តងនោះប្រពន្ធឆ្អែតចិត្តខ្លាំងពេក ក៏នាំកូនទាំងពីរវេចបង្វិចចុះចេញពីផ្ទះទៅរស់នៅជាមួយឪពុកម្ដាយរបស់ខ្លួនវិញម្តងមកហើយ។ ពេលនោះប្រពន្ធកូនទៅបាត់ជាងមួយខែ បុរសជាប្ដីក៏ព្យាយាមទៅហៅឲ្យត្រឡប់មកវិញ ប៉ុន្តែនាងមិនព្រមមកទេ។ ប្រហែលមួយសប្ដាហ៍មុននេះបុរសជាប្ដីក៏ទៅតាមហៅម្ដងទៀត ហើយបានប្រមូលសម្លៀកបំពាក់នាងនិងកូនៗត្រឡប់មកវិញមុន ហើយគំរាមថា បើលើកនេះមិនមកទេ គេនឹងតាមមកសម្លាប់មួយពូជ។ឮដូច្នេះស្ត្រីជាប្រពន្ធបាននាំកូនមករស់នៅជាមួយប្ដីវិញជាធម្មតា។

ប្រភពបន្តថា ការរស់នៅជាមួយគ្នាបានប្រហែល១០ថ្ងៃ បុរសជាប្ដីមិនចោលគំនិតចាស់ទេ បានទៅល្អូកល្អឺនជាមួយស្រីកំណាន់ចិត្តរបស់ខ្លួនដដែល ធ្វើឲ្យប្រពន្ធខកចិត្តម្ដងទៀត ហើយប្រហែលជាគាត់ឆ្អែតចិត្តខ្លាំងពេក ទើបគាត់ដាច់ចិត្តធ្វើឃាតកូនតូចៗទាំងពីរដែលគ្នាមិនដឹងអ្វីសោះ និងធ្វើអត្តឃាតខ្លួនជាក្រោយយ៉ាងអាណោចអាធម៌បែបនេះ។

ប្រភពបានបន្តថា នៅយប់កើតហេតុថ្ងៃទី២៦ ខែកញ្ញា ឆ្នាំ២០១៥ គេឃើញបុរសជាប្ដីរកបានសត្វសំពោចមួយក្បាល ហើយគេបាននាំមិត្តភក្តិផឹកស៊ីរហូតស្រវឹងរៀងៗខ្លួន រួចបុរស

ជាប្តីបានគេចទៅដេកជាមួយស្រីស្នេហ៍បន្តទៀតនៅក្នុងឃុំជាមួយគ្នាចោលប្រពន្ធ និងកូននៅផ្ទះស្ថិតក្នុងភូមិកើតហតុខាលើជាមួយគ្នា។លុះដល់ព្រឹកឡើងថ្ងៃទី ២៧ខែកញ្ញា ស្រាប់តែអ្នកភូមិផ្អើលឆោឡោដោយសារប្រទះឃើញទិដ្ឋភាពអត្តឃាតរបស់ស្ត្រី និងកូនៗ២នាក់ បានចង.កឡើងរឹងស្តូកទៅហើយ។

មុនដំបូងម្នាក់ៗមានការសង្ស័យទៅលើប្ដីជាអ្នករៀបចំអំពើឃាតកម្មនេះ ប៉ុន្តែបន្ទាប់ពីធ្វើ កោសល្យវិច្ច័យរួចមកនគរបាលបញ្ជាក់ថា នេះជាករណីអត្តឃាតដែលផ្ដើមឡើងដោយស្ត្រីជាប្រពន្ធផ្ទាល់។

សមត្ថកិច្ចបានសន្និដ្ឋានថា មុនដំបូងស្ត្រីរងគ្រោះបានយកខ្សែទៅចងទ្វារហើយបង្វិលចំណងខ្សែចេញក្រៅ ព្រោះអាចបង្វិលបានដើម្បីបំភាន់ភ្នែកអ្នកស្រុក រួចទើបចង.ក កូនទាំងពីរឲ្យស្លាប់មុនសិន បន្ទាប់មកទើបចង.ក សម្លាប់ខ្លួនឯងជាក្រោយ៕ដោយ៖រដ្ឋា

ផឹកស្រាត្រាំគ្រាប់ស្លែងកំដរបុណ្យនៅវត្តស៊ីធរ ពុលស្លាប់៣នាក់ សន្លប់២នាក់

September 28, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

កណ្តាល៖ យ៉ាងហោចណាស់ មនុស្ស៣នាក់បានស្លាប់ និង២នាក់ទៀតកំពុងជួយសង្គ្រោះបន្ទាន់កាលពីល្ងាចថ្ងៃទី២៧ ខែកញ្ញា ឆ្នាំ២០១៥ ម្សិលមិញនេះ បន្ទាប់ពីពួកគេផឹកស្រាត្រាំគ្រាប់ស្លែង ក្រោយពេលបញ្ចប់ពិធីបុណ្យនៅក្នុងវត្តស៊ីធរ ភូមិស៊ីធរលិច ឃុំស៊ីធរ ស្រុកខ្សាច់កណ្តាល ខេត្តកណ្តាល។

មន្ត្រីនគរបាលស្រុកខ្សាច់កណ្តាលបានប្រាប់ថា ជនរងគ្រោះទាំង៥នាក់រួមមាន៖ ទី១.ឈ្មោះ ជួន អឿន ភេទប្រុស អាយុ៥៦ឆ្នាំ ជនជាតិខ្មែរ មុខរបរកសិករ មានទីលំនៅភូមិគន្ធា ឃុំរំលេច ស្រុកស៊ីធរកណ្តាល ខេត្តព្រៃវែង (សន្លប់)។២.ឈ្មោះ យ៉ិន អូន ភេទប្រុស អាយុ៦០ឆ្នាំ ជនជាតិខ្មែរ មុខរបរកសិករ នៅភូមិផ្លូវរលួស ឃុំជើងភ្នំ ស្រុកបាភ្នំ ខេត្តព្រៃវែង (ស្លាប់)។៣.ឈ្មោះ រួន ភេទប្រុស អាយុ៦០ឆ្នាំ ជនជាតិខ្មែរ មុខរបរកសិករ នៅភូមិឃុំមិនស្គាល់ ស្រុកបាភ្នំ ខេត្តព្រៃវែង (សន្លប់)។៤.ឈ្មោះ ម៉ី លាង ភេទប្រុស អាយុ៦២ឆ្នាំ ជនជាតិខ្មែរ មុខរបរកសិករ នៅភូមិទួលទ្រា ឃុំរំចេច ស្រុកព្រះស្តេច ខេត្តព្រៃវែង(ស្លាប់) និងទី៥.ឈ្មោះ ជា ផាន ភេទប្រុស អាយុ៥៧ឆ្នាំ ជនជាតិខ្មែរ មុខរបរកសិករ នៅភូមិព្រៃបាស្រី ឃុំជយ័កំពក ស្រុកព្រះស្តេច ខេត្តព្រៃវែង(ស្លាប់)។

ប្រភពដដែលបញ្ជាក់ថា កាលពីថ្ងៃទី២៦ ខែកញ្ញា ឆ្នាំ២០១៥ ប្រជាពលរដ្ឋបានមកជួបជុំគ្នាមកធ្វើបុណ្យផ្កា នៅវត្តយ៉ាងច្រើនកុះករ ក្នុងនោះមានអ្នកខ្លះមកពីខេត្តព្រៃវែង ហើយនាំគ្នាស្នាក់ នៅក្នុងវត្តស៊ីធរមួយយប់។ លុះដលថ្ងៃទី២៧ ខែកញ្ញា ឆ្នាំ២០១៥ ម៉ោង០៦:៥៥នាទី ជនរងគ្រោះទាំងនោះ បាននាំគ្នាផឺកស្រា ត្រាំគ្រាប់ស្លែង (ថ្នាំប្រើប្រាស់ផ្ទាល់ខ្លួន) របស់ព្រះសង្ឈ ព្រះនាម សេក ញ៉ាញ់ ព្រះជន្ម៦៩ វស្សា គង់នៅវត្តស៊ីធរ បណ្តាលឲ្យពុលស្លាប់៣នាក់ ពេលបញ្ជូនដល់មន្ទីរពេទ្យ បង្អែកស្រុកពារាំង ខេត្តព្រៃវែង។ដោយសារស្ថានភាពពុលខ្លាំងពេក ជនរងគ្រោះទាំង២នាក់ទៀត ត្រូវបានបញ្ជូនទៅកាន់រាជធានីភ្នំពេញ។

សមត្ថកិច្ចបញ្ជាក់ថា សពជនរងគ្រោះត្រូវបានបញ្ជូនឲ្យក្រុមគ្រួសារដើម្បីនាំយកទៅរៀបចំពិធីបុណ្យតាមប្រពៃណីយ៍ ក្រោយពេលធ្វើកោសល្យវិច្ច័យរួចរាល់៕ដោយ ៖គឹម បញ្ញា