ភ្នំពេញ ៖ លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានប្រាប់បណ្តាញព័ត៌មាននៅថ្ងៃទី១៥ ខែមេសា កម្ពុជានឹងរក្សាបាននិរន្តរភាពស្បៀងគ្រប់គ្រាន់ក្នុងអំឡុងពេលនៃការរាតត្បាតជំងឺកូវីដ ១៩ ដែលជាយន្តការមួយត្រូវបានរៀបចំឡើងដោយរដ្ឋាភិបាលក្នុងការរក្សាស្ថិរភាពថ្លៃលើទីផ្សារ។

លោក ស្រី វុឌ្ឍី បន្ថែមថា ក្រសួងបានត្រៀមស្តុកសាច់ជ្រូកប្រមាណ ១៣០តោនក្នុងមួយថ្ងៃសម្រាប់រយៈពេល៣ខែនៃការរីករាលដាលជំងឺកូវីដ១៩ ខណៈលទ្ធភាពក្នុងការផ្គត់ផ្គង់សាច់សត្វក្នុងស្រុកសរុបប្រចាំឆ្នាំមានជាង ២៣៩ពាន់តោន ។ ជាមួយនេះ រាជរដ្ឋាភិបាលនឹងពិភាក្សាការទិញសាច់ជ្រូកស្តុកទុកនេះជាមួយក្រុមហ៊ុននាំចូលសាច់ឲ្យជួយទិញស្តុក ដោយមានការផ្តល់សម្បទានផ្សេងៗដល់ក្រុមហ៊ុន។
សូមជម្រាបថា ក្រសួងកសិកម្ម នឹងផ្តល់ពូជសត្វ ពិសេសពូជមាន់ដែលមានរយៈពេលខ្លីក្នុងការទទួលផលព្រមទាំងផ្តល់ចំណីសត្វដល់អ្នកចិញ្ចឹម ដើម្បីពង្រីកផលិតកម្មសត្វ នៅតមាមូលដ្ឋាន ដើម្បីឆ្លើយតបតការផ្គត់ផ្គង់តម្រូវបន្ទាន់ក្នុងស្រុក៕

កម្ពុជា ៖ រដូវវស្សាឆ្នាំ២០២០ នេះ នឹងចូលមកដល់លឿនជាងឆ្នាំ២០១៩ ដែលជាប្រក្រតីភាពនៅកម្ពុជា រដូវវស្សាតែងចាប់ផ្តើមនៅពាក់កណ្តាលខែឧសភា រៀងរាល់ឆ្នាំ។ នេះបើតាមការព្យាករអាកាសធាតុលើកទី២ របស់ក្រសួងធនធានទឹក និងឧតុនិយម ដែលចេញផ្សាយនៅថ្ងៃនេះ។ Continue reading →

ភ្នំពេញ ៖ លោក ស៊ីន ចាន់សិរីវុត្ថា អគ្គនាយករងបច្ចេកទេស និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានបញ្ជាក់នៅក្នុងសន្និសីទកាសែត នៅទីស្តីការគណៈរដ្ឋមន្ត្រីថា អាកាសព្រលានយន្តហោះភ្នំពេញថ្មី ដែលមានទីតាំងនៅលើទឹកដីខេត្តកណ្តាល និងតាកែវ នៅតែបន្ដដំណើរការសាងសងជាធម្មតា ដែលបច្ចុប្បន្នសម្រេចបានជាង ៣០ភាគរយ។

ក្នុងសន្និសីទសារ ព័ត៌មាន ស្ដីពី «វឌ្ឍនភាព និងទិសដៅការងារបន្ដរបស់ រដ្ឋលេខាធិការដ្ឋានអាកាសចរស៊ីវិល» ដែលរៀបចំដោយអង្គភាព អ្នកនាំពាក្យរាជរដ្ឋាភិបាល នៅទីស្ដីការគណៈរដ្ឋមន្ដ្រី នាព្រឹកថ្ងៃទី១៦ ខែមេសា ឆ្នាំ២០២០នេះ លោកឪ ស៊ីន ចាន់សិរីវុត្ថា បានបញ្ជាក់ថា អាកាសយានដ្ឋានភ្នំពេញថ្មី ដែលជាការវិនិយោគរបស់ក្រុមហ៊ុនចិន នៅតែបន្ដដំណើរការ ប៉ុន្តែល្បឿនយឺតជាងមុន ដោយសារជំនាញការជាជនជាតិចិន មិនទាន់វិលត្រលប់មកវិញនៅឡើយ ដោយសារវីរុសកូវីដ១៩។ មកដល់ពេលនេះ ការសាងសង់ អាកាសយានដ្ឋានភ្នំពេញថ្មីនេះបាន៣០ភាគរយហើយ។

តាមការគ្រោងទុក ដំណាក់កាលទី១ នៃការសាងសង់អាកាសយានដ្ឋានអន្តរជាតិនេះ នឹងត្រូវបញ្ចប់មុនឆ្នាំ២០២២ ហើយនឹងអាចបញ្ចប់ទៅតាមការគ្រោងទុក។ នេះជាការបញ្ជាក់របស់ ក្រុមហ៊ុន OCIC ដែលជាអ្នកមានភាគហ៊ុនធំជាងគេ៕

ព្រលានយន្តហោះភ្នំពេញថ្មី ត្រូវបានបែងចែកជា២ ដំណាក់កាល ធំៗ ក្នុងនោះដំណាក់កាលទី១ ត្រូវបានព្យាករណ៍ថា នៅឆ្នាំ២០៣០ នឹងទទួលបានអ្នកដំណើរ១៣លាននាក់ ហើយដំណាក់កាលទី២ នៅឆ្នាំ២០៥០ នឹងទទួលបានអ្នកដំណើរ៣០លាននាក់។ គួរបញ្ជាក់ថា ព្រលានយន្តហោះថ្មីនេះ ត្រូវបានរាជរដ្ឋាភិបាលបញ្ជាក់ថា នឹងសាងសង់លើផ្ទៃដីទំហំប្រមាណ២,៦០០ហិកតា ដែលជាដីស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងប៉ះតំបន់មួយចំនួន ក្នុងស្រុកបាទី ខេត្តតាកែវ។ គម្រោងវិនិយោគនេះ រាជរដ្ឋាភិបាល កាន់កាប់ភាគហ៊ុន១០ភាគរយ ហើយក្រុមហ៊ុនអនិកជន OCIC របស់អ្នកឧកញ៉ា ពុង ឃាវសែ កាន់កាប់ភាគហ៊ុន៩០ភាគរយ ដោយគ្រោងវិនិយោគទឹកប្រាក់ចំនួន១,៥០០លានដុល្លារអាមេរិក ក្នុងនោះ ទឹកប្រាក់១,១០០លានដុល្លារ ជាកម្ចីពីធនាគារបរទេស និង២៨០លានដុល្លារជារបស់ក្រុមហ៊ុន OCIC និង២៨០លានដុល្លារទៀត ជាដើមទុនចុះបញ្ជី៕

ភ្នំពេញ ៖ បន្ទាប់ពីបានពិនិត្យ និងពិភាក្សារួចមក គណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃសុក្រ ទី១៧ ខែមេសា ឆ្នាំ២០២០ វេលាម៉ោង០៨:០០នាទីព្រឹក ដើម្បីប្រជុំវិសាមញ្ញព្រឹទ្ធសភា នីតិកាល ទី៤ ដោយលើកយកសេចក្តីព្រាងច្បាប់ ស្តីពី ការគ្រប់គ្រងប្រទេសជាតិស្ថិត ក្នុងភាពអាសន្ន មកពិនិត្យនិងឱ្យយោបល់ តាមសំណើររបស់គណៈកម្មការនិតិកម្មនិងយុត្តិធម៌ នៃព្រឹទ្ធសភា និងជាតម្រូវការចាំបាច់ដោយមិនអាចខ្វះបាន ដើម្បីកំណត់អំពីសិទ្ធអំណាចរបស់រាជរដ្ឋាភិបាល ក្នុងការដាក់ចេញនូវវិធានការចាំបាច់នានា។

តាមប្រសសន៍របស់លោក ម៉ម ប៊ុននាង នៅក្រោយកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភានាថ្ងៃទី១៦ ខែមេសានេះ បានឱ្យដឹងថា ច្បាប់នេះបង្កើតឡើង ដើម្បីការពារសន្តិសុខជាតិ ការពារសណ្តាប់ធ្នាប់សាធារណៈ ការពារអាយុជីវិត ការពារសុខភាពប្រជាពលរដ្ឋ ការពារទ្រព្យសម្បត្តិ និងបរិស្ថាន ។ ច្បាប់ ស្តីពី ការគ្រប់គ្រងប្រទេសជាតិស្ថិត ក្នុងភាពអាសន្ន មាន៥ជំពូក និងចែកចេញជា១២មាត្រា។

សេចក្តីព្រាងច្បាប់នេះ ធ្វើឡើងស្របតាមកតិ្តការសញ្ញាអន្តរជាតិ ស្តីពី សិទ្ធពលរដ្ឋ និងសិទ្ធនយោបាយ ស្របទៅតាមស្ថានភាពជាក់ស្តែងរបស់ប្រទេស នៅពេលមានគ្រោះអាសន្នណាមួយកើតឡើង ហើយច្បាប់នេះ ក៏មិនពាក់ព័ន្ធនិងការរើសអើង ពូជសាសន៍ ពណ៌សម្បុរ ភេទ ភាសារ ឬដើមកំណើតសង្គមនោះដែរ៕

ខេត្តសៀមរាប ៖ លោក ហង់ ពៅ អគ្គនាយកអាជ្ញាធរជាតិអប្សរា បានចុះទៅពិនិត្យការរកឃើញបំណែកបដិមាព្រះពុទ្ធជាច្រើនអង្គនៅប្រាសាទអង្គរវត្ត។

បំណែកបដិមាច្រើនអង្គ ត្រូវបានប្រទះឃើញដោយចៃដន្យក្នុងរណ្ដៅដីខាងត្បូងនៃប្រាសាទអង្គរវត្ត។ ក្រុមការងារនៃនាយកដ្ឋានគ្រប់គ្រងទឹក បានជីកដីដើម្បីកប់ទុយោទឹកក្នុងគម្រោងស្រោចស្រពស្មៅជុំវិញបរិវេណប្រាសាទអង្គរ និងជីកប៉ះរណ្ដៅបំណែកបដិមាដែលការសន្និដ្ឋានរបស់បុរាណវិទូ បដិមាទាំងនោះត្រូវបានគេកប់ បំណងដើម្បីថែរក្សា និងគេចពីការលួច។ បច្ចុប្បន្ន អ្នកជំនាញកំពុងធ្វើកំណាយបន្ត និងរំពឹងថាអាចឃើញបដិមាបន្ថែមទៀត៕

ខេត្តបន្ទាយមានជ័យ ៖ គិតត្រឹមថ្ងៃទី១៦ ខែមេសា ឆ្នាំ២០២០នេះ ជាថ្ងៃទី៣ នៃពិធីចូលឆ្នាំប្រពៃណីជាតិ កម្មករនិយោជិតនៅតាមរោងចក្រសហគ្រាសនិងក្រុមហ៊ុននានាក្នុងខេត្តបន្ទាយមានជ័យបានបន្តធ្វើការងារជាធម្មតាក៏ដូចមន្ត្រីរាជការ កងកម្លាំងប្រដាប់អាវុធតាមការណែនាំរបស់រាជរដ្ឋាភិបាលកម្ពុជាដើម្បីចូលរួមប្រយុទ្ធប្រឆាំងទប់ស្កាត់ការរីករាលដាលជំងឺកូវីដ១៩។
ក្នុងឱកាសចុះពិនិត្យខ្សែសង្វាក់ផលិតកម្មរបស់រោងចក្រនៅក្នុងសួនឧស្សាហកម្មក្រុងសិរីសោភ័ណនិងក្រុងប៉ោយប៉ែតនៅថ្ងៃទី១៦ខែមេសាឆ្នាំ២០២០នេះឯកឧត្តម អ៊ុរាត្រី អភិបាលខេត្តបន្ទាយមានជ័យបានថ្លែងកោតសរសើរចំពោះដំណើរខ្សែសង្វាក់ ផលិតកម្មរបស់រោងចក្រទាំងអស់ដែលបានបន្តនិរន្តរភាពក្នុងការងារក្នុងរោងចក្ររបស់ខ្លួនជាប្រចាំ ទោះបីស្ថានភាពបច្ចុប្បន្ននៅលើសកលលោកទទួលរងនូវវិបត្តិជាសកល ដែលបង្កឡើងដោយមេរោគកូវីដ-១៩នេះយ៉ាងណាក៏ដោយ។
ឯកឧត្តមអភិបាលខេត្តបន្ទាយមានជ័យបានបន្តកោតសរសើរចំពោះទឹកចិត្តរបស់កម្មករ កម្មការិនី ដែលបានមកបំពេញការងារជាធម្មតានៅក្នុងរោងចក្រ តាមការណែនាំរបស់រាជរដ្ឋាភិបាលក៏ដូចជាការណែនាំរបស់ក្រសួងសុខាភិបាលដើម្បីចូលរួមទប់ស្កាត់ហានិភ័យនៃការឆ្លងរាលដាលជំងឺកូវីដ-១៩ នៅក្នុងប្រទេសយើង។ ទោះបីយើងមិនបានឈប់សម្រាកក្នុងថ្ងៃបុណ្យចូលឆ្នាំ ប៉ុន្តែក្រុមគ្រួសារ ក៏យើងអាចរៀបចំទទួលទេវតាតាមផ្ទះរៀងៗខ្លួនដូចរៀងរាល់ឆ្នាំផងដែរ។
ឯកឧត្តម ខេង ស៊ុម ប្រធានក្រុមប្រឹក្សាខេត្តបន្ទាយមានជ័យ បានផ្ដាំផ្ញើដល់កម្មករ កម្មការិនីទាំងអស់ ត្រូវចូលរួមថែទាំសុខភាពឱ្យបានល្អ ព្រោះថា ជំងឺឆ្លងថ្មីនេះ វាមានសភាពសាហាវណាស់ តែអាចការពារបាន ដោយអនុវត្តជាប្រចាំ គឺរស់នៅស្អាត ហូបស្អាត ផឹកស្អាត និងអនុវត្តតាមវិធានការណែនាំរបស់ក្រសួងសុខាភិបាល គឺមិនត្រូវជួបជុំគ្នាច្រើន ត្រូវលាងសំអាតដៃនឹងសាប៊ូ ឬអាល់កុល ឱ្យបានញឹកញាប់ បើធ្វើដូចនេះបាន យើងទាំងអស់គ្នា និងក្រុមគ្រួសារ នឹងមិនអាចឆ្លងជំងឺកូវីដ១៩នេះបានឡើយ។
លោក រស់ សារុម ប្រធានមន្ទីរការងារបណ្តុះបណ្តាលវីជ្ជាជីវៈខេត្តបន្ទាយមានជ័យឱ្យដឹងថារោងចក្រទាំង២០កន្លែងនៅក្នុងតំបន់ពិសេសនៃក្រុងប៉ោយប៉ែតនិងក្រុងសិរីសោភ័ណដែលមានកម្មករ កម្មការនីប្រមាណជាង១១៥០០នាក់បាននឺងកំពុងដំណើរការខ្សែសង្វាក់ផលិតកម្មការងារជាធម្មតាក៏ដូចជាសហគ្រាសផ្សេងៗទៀតដែរ៕

ខេត្តបន្ទាយមានជ័យ ៖ ដោយមានការចង្អុលបង្ហាញពីឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងក្រោមការដឹកនាំរបស់ ឯកឧត្ដម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ អាជ្ញាធរគ្រប់បណ្ដា ក្រុង ស្រុក ក្នុងភូមិសាស្ត្រខេត្ត បន្ទាយមានជ័យ ត្រូវយកចិត្តទុកដាក់ដល់ប្រជាពលរដ្ឋ នៅក្នុងមូលដ្ឋាន ខណៈ ប្រទេសកម្ពុជា និង សកលលោក ក្នុងកាលៈទេសៈដ៏លំបាកនៃការរាតត្បាតរបស់វីរុសកូវីដ-១៩ (COVID-១៩) បណ្ដាកងកម្លាំងមានការមមាញឹកក្នុងការបម្រើសុខសុវត្ថិតភាពជូនបងប្អូនប្រជាពលរដ្ឋ។ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នាព្រឹកថ្ងៃទី១៦ ខែមេសា ឆ្នាំ២០២០ លោក ជាម សុខ ប្រធានក្រុមប្រឹក្សាក្រុង លោក លឹម តិចឆេង សមាជិកក្រុមប្រឹក្សាក្រុង និងលោក ហ៊ឹល រ៉ាយ៉ា អភិបាលក្រុងសិរីសោភ័ណ បានដឹកនាំក្រុមការងារ នាំយកសម្ភារៈមួយចំនួនចែកជូនដល់ កងកម្លាំងនគរបាលប៉ុស្តិ៍ទាំង ៧សង្កាត់ ក្នុងក្រុងសិរីសោភ័ណ ដើម្បីជាការចូលរួមគាំទ្រ និងលើកទឹកចិត្ត ក្នុងការអនុវត្តនូវបទបញ្ជារបស់រាជរដ្ឋាភិបាល ធានាអោយបាននូវសុខសុវត្ថិភាពជូនដល់ពលរដ្ឋនៅមូលដ្ឋាន ទូទៅជៀសផុតពីការឆ្លងរីករាលដាលជំងឺកូវីដ-១៩។

នៅក្នុងឱកាសចូលឆ្នាំប្រពៃណីជាតិខ្មែរនេះ លោក ហ៊ឹល រ៉ាយ៉ា អភិបាលក្រុងសិរីសោភ័ណ បានមានប្រសាសន៍លើកឡើងថា៖ក្នុងនាមយើងជាកងកម្លាំងសមត្ថកិច្ច ដោយប្រកាន់ខ្ជាប់នូវវិធានការដែលត្រូវប្រកាន់យកមកអនុវត្តសម្រាប់ទប់ស្កាត់ការចម្លងវីរុសកូវីដ-១៩ ពីបុគ្គលម្នាក់ទៅបុគ្គលម្នាក់ទៀតជាចាំបាច់។ជាពិសេស សូមបងប្អូននៅផ្ទះ កុំធ្វើដំណើរចល័ត (ជាបណ្តោះអាសន្ន) អនុវត្តនូវគម្លាតសុវត្ថិភាពនៅទីកន្លែងមានមនុស្សច្រើន ការជួបជុំ និងសូមរក្សាអនាម័យល្អ ដូចជាឧស្សាហ៍លាងដៃជាមួយសាប៊ូនិងទឹកស្អាត ឬអាល់កុល ឬទឹកជែលលាងដៃឱ្យបានញឹកញាប់ ប្រើប្រាស់ម៉ាស់ខ្ទប់មាត់និងច្រមុះពេលក្អកកណ្តាស់ជាដើម។
បន្ទាប់ពីការចុះពិនិត្យ និងនាំសម្ភារៈទៅចែកជូននគបាលប៉ុស្តិ៍ នៅក្នុងសង្កាត់ទាំង៧រួច ក៏បានផ្ដាំផ្ញើ ដល់កងកម្លាំងទាំងអស់អោយបន្ត ចុះពន្យល់ណែនាំដល់បងប្អូនប្រជាពលរដ្ឋនៅមូលដ្ឋានបន្តទៀត រហូតចប់យុទ្ធនាការនេះ ។
សម្រាប់សម្ភារៈដែលចែកជូន ក្នុងមួយប៉ុស្តិ៍ ទទួលបានអង្ករ៥០គីឡូក្រាម,មី១កេស,ទឹកស៊ីអ៊ីវ០១យួរ ,ទឹកត្រី១យួរ ,និងទឹកសុទ្ធ១០យួរ៕

ភ្នំពេញ ៖ ក្រសួងការបរទេសកម្ពុជា នៅថ្ងៃទី១៥ ខែមេសា ឆ្នាំ២០២០ នេះ បានចេញសេចក្តីប្រកាសបង្ហាញពីលទ្ធផលនៃកិច្ចប្រជុំកំពូលអាស៊ានពិសេស និងកិច្ចប្រជុំកំពូលអាស៊ានបូកបីពិសេស ស្តីពីជំងឺឆ្លងផ្លូវដង្ហើមកូវីដ-១៩ តាមរយៈប្រព័ន្ធវីដេអូ ខនហ្វឺរេន (Video Conference) ។
គួរបញ្ជាក់ថា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា រួមជាមួយនឹងថ្នាក់ដឹកនាំប្រទេសជាសមាជិករបស់អាស៊ាន និងប្រទេសបូកបីផ្សេងទៀត បានចូលរួមកិច្ចប្រជុំកំពូលអាស៊ានពិសេស និងកិច្ចប្រជុំកំពូលអាស៊ានបូកបីពិសេស ស្តីពីកូវីដ-១៩ តាមរយៈប្រព័ន្ធវីដេអូ (Video Conference) នៅថ្ងៃទី១៤ ខែមេសា ឆ្នាំ២០២០។ កិច្ចប្រជុំនេះ ឯកឧត្តម ង្វៀន សួនហ្វុក នាយករដ្ឋមន្ត្រីវៀតណាម ធ្វើជាប្រធានអាស៊ាន ឆ្នាំ២០២០។
សូមអានខ្លឹមសារទាំងស្រុងស្តីពីលទ្ធផលនៃកិច្ចប្រជុំ ដូចខាងក្រោមនេះ ៖ 

ភ្នំពេញ៖ នារីដ៏ស្រស់ស្អាតម្នាក់ត្រូវបានគេប្រទះឃើញដេកដួលសន្លប់ស្តូកស្តឹងបង្កឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ច។ ហេតុការណ៏ភ្ញាក់ផ្អើលខាងលើនេះបានកើតឡើងកាលពីវេលាម៉ោង៨និង៣០នាទីព្រឹកថ្ងៃទី១៦ខែមេសា ឆ្នាំ២០២០ ស្ថិតនៅតាមបណ្តោយផ្លូវ៣០ម៉ែត្រភូមិដំណាក់ធំ៣សង្កាត់ស្ទឹងមានជ័យទី៣ខណ្ឌមានជ័យរាជធានីភ្នំពេញ។
តាមប្រភពព័ត៌មាននៅក្បែកន្លែងកន្លែងកើតហេតុបានឲ្យដឹងថាមុនពេលកើតហេតុគេឃើញបុរសសង្ស័យជាសង្សានារីជនជាតិខាងលើជិះម៉ូតូមួយគ្រឿងម៉ាកស្កុបពីពណ៍សដឹកគ្នាមកអង្គុយនៅចំនុចកើតហេតុខាងលើ ហើយក៏បានឈ្លោះប្រកែកគ្នា មួយសន្ទុះក្រោយមកក៏ឃើញបុរសខាងលើនោះជិះម៉ូតូចេញទៅបាត់តែម្នាក់ឯងដោយបន្សល់ទុកនារីជាសង្សាអង្គុយអោបបង្គោលភ្លើងបន្ទាប់មកស្រាប់នារីដ៏ស្រស់ស្អាតរូបនេះដេកដួលសន្លប់ស្តូកស្តឹងបង្កឲ្យមានការភ្ញាក់ផ្អើលយ៉ាងខ្លាំង។
ស្របពេលនោះកម្លាំងនគរបាលប៉ុស្តិស្ទឹងមានជ័យទី៣កំពុងល្បាតពួនស្ទាក់នៅតាមបណ្តោយផ្លូវ៣០ម៉ែត្រក្បែកន្លែងកើតហេតុក៏បានទំនាក់ទំនងទៅកានមន្ទីរពេទ្យឯកជនសួគា៍ដើម្បីឲ្យដឹកនារីរងគ្រោះខាងលើទៅកាន់មន្ទីរពេទ្យដើម្បីធ្វើការសង្គ្រោះដល់រូបនាង។
រយះពេលជិតមួយម៉ោងមិនទាន់ឃើញរថយន្តសាមុយឯកជនឬមន្ទីរពេទ្យរដ្ឋណាមកដឹកនារីជនជាតិយកទៅធ្វើការសង្គ្រោះនោះទេ
ដោយមន្ទីរពេទ្យឯកជនរុញដាក់ទៅមន្ទីរពេទ្យរដ្ឋ ដោយសារតែចាំរថយន្តសាមុយយូរពេកទើបនារីជនជាតិចិនខាងលើនេះក្រោកឡើងដើររកម៉ូតូកង់៣ជិះទៅកាន់មន្ទីរពេទ្យដោយខ្លួនឯងតែម្តងទៅ ៕

​ខេត្តកណ្តាល ៖ កាលពី​វេលា​ម៉ោង​៦ និង៣០​នាទី​យប់ ថ្ងៃទី​១៥ ខែមេសា ឆ្នាំ​២០២០ មាន​ករណី​ឃាតកម្ម​មួយ​បាន​កើតឡើង​នៅ​ចំណុច​ភូមិ​ចុង​កោះ ឃុំ​កោះ​ឧកញ៉ា​តី ស្រុក​ខ្សាច់កណ្តាល ខេត្តកណ្តាល។ ករណីនេះ​បង្កឡើង​ដោយ​មន្ត្រីនគរបាល​ប៉ុស្តិ៍​បាក់​ខែង បាញ់សម្លាប់​ប្អូនថ្លៃ ព្រោះតែ​រឿង​ប្រចណ្ឌ​ប្រពន្ធ​ជាមួយ​ប្អូនថ្លៃ ។​

​សមត្ថកិច្ច​បញ្ជាក់ថា ជនរងគ្រោះ​ដែល​ស្លាប់​ឈ្មោះ ម៉ៅ ប៊ុនហេង ប្រុស​អាយុ​២៥​ឆ្នាំ​ជនជាតិខ្មែរ មុខរបរ​លក់ដូរ​។ ចំណែក​ជនសង្ស័យ​ឈ្មោះ សែន រ៉ា​នុ​ន ភេទ​ប្រុស អាយុ​៣៥​ឆ្នាំ ជនជាតិខ្មែរ មុខរបរ​មន្ត្រីនគរបាល​ប៉ុស្តិ៍​រដ្ឋបាល​បាក់​ខែង បាន​រត់​គេចខ្លួនបាត់​។

​តាម​មន្ត្រីនគរបាល​ខេត្ត​បាន​ឲ្យ​ដឹងថា នៅពេល​កើតហេតុ ជនសង្ស័យ​មានទំនាស់​ជាមួយ​ប្រពន្ធ​ខ្លួន ឈ្មោះ គង់ សុខ​ជា រហូតដល់​ជនសង្ស័យ​យក​អាវុធខ្លី​ភ្ជង់​ប្រពន្ធ​ខ្លួន ថែមទៀត ។ ទន្ទឹម​នោះ​ជនរងគ្រោះ​ក៏បាន​ចេញមក​ឃាត់​ដោយ​និយាយថា ចាំ​យក​កាំភ្លើង​ភ្ជង់​ប្រពន្ធ​ធ្វើ​អី និយាយ​តែ​ប៉ុ​ណ្តឹ​ង ស្រាប់តែ​ជនសង្ស័យ​ដែលមាន​កំហឹង និង​ភ្លើង​ប្រចណ្ឌ​ផង​នោះ ក៏​បាញ់​សំដៅទៅ​ជនរងគ្រោះ​១​គ្រាប់​ត្រូវ​បំពង់ក បណ្តាល​ឲ្យ​ស្លាប់​នៅ​កន្លែងកើតហេតុ​ភ្លាមៗ តែម្តង ។ ក្រោយមក​ជនសង្ស័យ​បាន​យក​ម៉ូតូ ជា​អ្នកជិតខាង​ជិះ​គេចខ្លួនបាត់​។​

​ប៉ុន្តែ​ប៉ុន្មាន​ម៉ោង​ក្រោយមក​លោកស្នងការ​ខេត្តកណ្តាល​បាន​ដឹកនាំ​កម្លាំង​ចុះ​ទៅដល់​កន្លែងកើតហេតុ ហើយ​បញ្ជា​ឲ្យ​បើក​ការស្រាវជ្រាវ ដើម្បី​តាម​ចាប់ខ្លួន​ជនដៃដល់​ផងដែរ ៕

ភ្នំពេញ ៖ ក្រសួងសុខាភិបាល នៅថ្ងៃទី១៦ ខែមេសា ឆ្នាំ២០២០នេះ បានចេញសេចក្តីប្រកាសថា អ្នកជំងឺកូវីដ១៩ បានជាសះស្បើយថ្មីចំនួន២នាក់បន្ថែមទៀត ធ្វើឲ្យចំនួនអ្នកជាសះស្បើយសរុបកើនឡើងរហូតដល់៩៨នាក់ និងមិនមានករណីឆ្លងថ្មីនោះឡើយ។

ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន២៤នាក់ នៃអ្នកឆ្លងសរុប១២២ នាក់។ បើគិតត្រឹមព្រឹកថ្ងៃទី១៦ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែល ទទួលបានមុននេះបន្តិច។

ករណីជាសះស្បើយមាន០២នាក់រួមមាន ៖ បុរសជនជាតិបារាំងអាយុ៨០ឆ្នាំ ជាភ្ញៀវទេសចរ ដែលសម្រាកព្យាបាល នៅសណ្ឋាគារក្រុងព្រះសីហនុ ហើយត្រូវបានបញ្ជូនមកសម្រាកព្យាបាល បន្តនៅមន្ទីរពេទ្យមិត្តភាពខ្មែរ-សូវៀត។ បច្ចុប្បន្នបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន០២ដង និងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។ បុរសជនជាតិបារាំងអាយុ៦១ឆ្នាំ ដែលបានធ្វើដំណើរមកពីប្រទេសបារាំង និងស្នាក់នៅបណ្ដោះអាសន្នម្ដុំទួលទំពូងរាជធានីភ្នំពេញ បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន០២ដង និងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត៕

ភ្នំពេញ ៖ ក្រសួងសុខាភិបាលបានស្នើក្រសួងការងារ និងបណ្តុះបណ្តាលវិជ្ជាជីវៈសហការជាមួយរោងចក្រ សហគ្រាស និងក្រុមហ៊ុននានាដាក់កម្មករ និយោជិត ដែលទៅស្រុកលេងចូលឆ្នាំរយៈពេល១៤ថ្ងៃ មុនឱ្យពួកគេចូលធ្វើការវិញ ដើម្បីបង្ការការចម្លងជំងឺកូវីដ១៩។

ក្នុងលិខិតលោក ម៉ម ប៊ុនហេង រដ្ឋមន្ត្រីក្រសួងសុខាភិបាល នៅថ្ងៃទី១៥ ខែមេសា ឆ្នាំ២០២០នេះ ផ្ញើជូនរដ្ឋមន្រ្តីក្រសួងការងារបានគូសបញ្ជាក់ថា កម្មករ និយោជិត ដែលត្រឡប់មកពីចូលឆ្នាំវិញ ត្រូវតែដាក់ឱ្យនៅដាច់ដោយឡែកជាចាំបាច់ ហើយត្រូវតាមដានសុខភាពជាប្រចាំ។

លោក ម៉ម ប៊ុនហេង បានគូសបញ្ជាក់ថា វិធានការនេះធ្វើឡើង ដើម្បីកុំឱ្យមានការចម្លងរាតត្បាតជំងឺកូវីដ១៩ ចូលក្នុងសហគមន៍។ ជាពិសេសការធ្វើដំណើរចល័ត​របស់បុគ្គលពីកន្លែងមួយទៅកន្លែងមួយដែលមិនបានគោរពតាមបទបញ្ជារបស់សម្ដេចតេជោនាយករដ្ឋមន្ត្រី នាឱកាសបុណ្យចូលឆ្នាំប្រពៃណីជាតិខ្មែរ ដែលមានការ​សម្រុក​ចេញទៅស្រុកកំណើត។

យោងតាមក្រសួងការងារ បានឱ្យដឹងថា ក្នុងកំលុងពេលបុណ្យចូលឆ្នាំនេះ កម្មករ និយោជិត នៅក្នុងវិស័យវេយណភណ្ឌកាត់ដេរសម្លៀកបំពាក់ ស្បែកជើង និងកាបូប​ជាដើមទូទាំងប្រទេសរហូតដល់ទៅ៩៥ភាគរយ បានគោរពតាមការណែនាំរបស់រាជរដ្ឋាភិបាលនៅធ្វើការងារជាធម្មតាមិនមានឈប់សម្រាកនោះទេ៕