បើតាមនាយកដ្ឋានប្រយុទ្ធនឹងជំងឺឆ្លង(CDC) អ្នកដំណើរម្នាក់នៅថ្ងៃទី ៩ ខែមីនា ឆ្នាំ២០២ លើជើងហោះហើរលេខ PG 933 មកពី ទីក្រុងបាងកកប្រទេសថៃ បានធ្វើតេស្តរកឃើញវិជ្ជមាននៃជំងឺកូវីដ-១៩ ។ប្រសិនបើអ្នកនៅលើជើងហោះហើរតែមួយខាងលើនេះ ហើយអង្គុយនៅជួរទី 22, 23, 24, 25, ឬ 26 អ្នកត្រូវទាក់ទងទៅក្រសួងសុខាភិបាល មានទូរស័ព្ទទៅលេខ១១៥ដើម្បីមន្ត្រីសុខភាពជួយពិនិត្យសុខភាព៕
សិស្ស និងនិស្សិតគ្រប់កម្រិតនៅទូទាំងកម្ពុជា ត្រូវចូលវិស្សមកាលចាប់ពីពេលនេះរហូតដល់ជូនដំណឹងជាថ្មី 
ភ្នំពេញ ៖ ក្រសួងអប់រំ បានប្រកាសណែនាំបន្ទាន់មួយ ដោយសម្រេចឲ្យសិស្ស និងនិស្សិតគ្រប់កម្រិតសិក្សាទាំងអស់នៅទូទាំងកម្ពុជាឈប់សម្រាកមុនកាលកំណត់វិស្សមកាលចាប់ពីថ្ងៃនេះ រហូតដល់មានការជូនដំណឹងថ្មី។
ការសម្រេចបែបនេះ បានធ្វើឡើងដើម្បីជាវិធានការបង្ការ និងទប់ស្កាត់ជាបន្ទាន់នូវការរីករាលដាលជំងឺ Covid-19 ។ជាមួយនេះ ក៏តម្រូវឲ្យប្រមូលព័ត៌មាននូវរាល់ការធ្វើដំណើរ កម្មវិធីទស្សនកិច្ច កម្មសិក្សា ទៅកាន់្រទេសដែលផ្ទុះជំងឺ Covid-19 ក្នុងអំឡុងពេល១៤ថ្ងៃ មុនថ្ងៃទី១៦ ខែមីនា ឆ្នាំ២០២០។ ប្រសិនបើមាននិស្សិតដែលធ្លាប់ចេញទៅក្រៅប្រទេស ហើយមានការសង្ស័យបញ្ហាសុខភាព អាចទាក់ទងទៅលេខ ១១៥ ដើម្បីពិនិត្យសុខភាព៕
រាជរដ្ឋាភិបាលគម្ពុជា បានអំពាវនាវដល់ពលរដ្ឋកុំធ្វើដំណើរទៅបណ្តាប្រទេសនៅអឺរ៉ុប អាមេរិក និងអ៊ីរ៉ង់ ដើម្បីទប់ស្កាត់ការរីករាលដាលនៃកូវីដ-១៩។
រាជរដ្ឋាភិបាលកម្ពុជាបានដាក់ចេញនូវវិធានការចំនួន៤ចំណុចប្រាប់ពលរដ្ឋខ្មែរទាំងអស់មិនត្រូវធ្វើដំណើរទៅបណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ប្រសិនបើពុំមានការចាំបាច់ដែលខានពុំបាន។ រដ្ឋាភិបាលក៏បានស្នើឱ្យមន្ត្រីរាជការ និងពលរដ្ឋកម្ពុជា ដែលទើបវិលត្រឡប់មកពីបណ្ដាប្រទេសទាំងនេះ ត្រូវដាក់ខ្លួនឱ្យនៅដាច់ដោយឡែកក្នុងរយៈពេល១៤ ថ្ងៃដើម្បីតាមដានសុខភាព។
គិតត្រឹមម៉ោង៩យប់ថ្ងៃទី១៥ ខែមីនា កម្ពុជារកឃើញអ្នកផ្ទុកកូវីដ-១៩ ចំនួន១២ករណី ដែលក្នុងនោះមានជនជាតិខ្មែរ៤នាក់ និងបរទេស៨នាក់៕
អេស្ប៉ាញ ៖ អេស្ប៉ាញដាក់ប្រជាពរដ្ឋរបស់ខ្លួន ៤៧លាននាក់នៅក្រោមការការរឹតត្បិតការធ្វើដំណើរមួយផ្នែកធំកាលពីថ្ងៃទី១៤ ខែមីនា ដែលជាផ្នែកនៃការប្រកាសភាពគ្រាអាសន្នរយៈពេល១៥ថ្ងៃដើម្បីប្រយុទ្ធប្រឆាំងនឹងវីរុសកូរ៉ូណា។
ដោយត្រូវអនុវត្តជាបន្ទាន់ជនជាតិអេស្ប៉ាញទាំងអស់ត្រូវនៅក្នុងផ្ទះ លើកលែងតែការចេញទៅទិញអាហារ ឱសថ និងទៅធ្វើការ ឬទៅមន្ទីរពេទ្យ។ រង្គសាល ភោជនីយដ្ឋាន ហាងទំនិញ ដែលលក់ទំនិញក្រៅពីស្បៀង និងទំនិញប្រើប្រាស់ចាំបាច់ប្រចាំថ្ងៃត្រូវតែបិទ។រាល់ពិធីកម្សាន្តសប្បាយ និងសកម្មភាពកីឡា ក៏ត្រូវតែបិទ រួមមានរោងភាពយន្ត មហោស្រព កន្លែងហែលទឹក និងទីលានប្រកួតកីឡាបាល់។
គិតត្រឹមថ្ងៃអាទិត្យ អេស្ប៉ាញមានអ្នកស្លាប់ដោយវីរុសកូវីដ១៩ចំនួន១៩៣នាក់ និង៦.២៥០នាក់ឆ្លង៕
អង់គ្លេស ៖ រដ្ឋបាលអង់គ្លេស ដាក់ប្បញ្ញត្តិថ្មីមួយ ដោយតម្រូវឲ្យប្រជាជនណាដែលបដិសេធនៅដាច់ដោយឡែកត្រូវប្រឈមជាប់ពន្ធនាគារ ឬរងការផាកពិន័យរហូតដល់ ១.០០០ ផោន (ជាង១.២០០ដុល្លារ)។
បទប្បញ្ញត្តិស្តីពីការការពារសុខភាព (វីរុសកូរ៉ូណា) ឆ្នាំ ២០២០ ដែលបានចេញផ្សាយនៅលើវេបសាយរបស់រដ្ឋាភិបាល និយាយថា អ្នកដែលសង្ស័យឆ្លងវីរុសកូរ៉ូណា អាចត្រូវបានឃាត់ខ្លួនទុករហូតដល់ ១៤ ថ្ងៃនៅក្នុងមន្ទីរពេទ្យដែលមានសុវត្ថិភាព ឬទីតាំងសមរម្យផ្សេងទៀត។
បទប្បញ្ញត្តិនេះ ក៏តម្រូវឲ្យពួកគេក៏ត្រូវប្រាប់ពីប្រវត្តិនៃការធ្វើដំណើររបស់ពួកគេ និងបញ្ជីឈ្មោះអ្នកដែលពួកគេបានជួបថ្មីៗផងដែរ៕
ប៉ោយប៉ែត ៖ ចាប់ពីម៉ោងសូន្យឈានចូលថ្ងៃទី១៨ ខែមីនា ឆ្នាំ២០២០ តទៅ នឹងមិនអនុញ្ញាតឲ្យជនបរទេសមកពី ៥ប្រទេសចូលទឹកដីកម្ពុជា តាមច្រកទ្វារប៉ោយប៉ែត នេះឡើយ ចំណែកជនបរទេសដែលមកពីប្រទេសអ៊ីរ៉ង់ នឹងត្រូវអនុវត្តការហាមឃាត់នៅវេលារំលងអធ្រាត្រឈនចូលថ្ងៃទី១៩ ខែមីនា ឆ្នា២០២០។
លោក ឆោម ភ័ព្វ នាយប៉ុស្តិ៍នគរបាលអន្តោប្រវេសន៍ស្តីទី នៃច្រកទ្វារអន្តរជាតិប៉ោយប៉ែត បានបញ្ជាក់ដូច្នេះថា«នេះជាការអនុវត្តតាមការណែនាំរបស់សេចក្តីណែនាំរបស់រាជរដ្ឋាភិបាល ដើម្បីបង្ការទប់ស្កាតជំងឺឆ្លងកូរ៉ូណាប្រភេទថ្មី Covid-19 ៕
ភ្នំពេញ ៖ ក្រសួងសុខាភិបាល ដាក់ចេញវិធានការណែនាំដល់បុគ្គលដែលត្រូវធ្វើចត្តាឡីស័កក្នុងផ្ទះរយៈពេល១៤ថ្ងៃនៅក្នុងបន្ទប់ដាច់ដោយឡែករួមទាំងអនុវត្តវិធានមួយចំនួនដើម្បីធានាថា ពួកគេពិតជាបានចូលរួមទប់ស្កាត់មិនឲ្យជំងឺកូវីដ-១៩ ឆ្លងរាលដាលទៅកាន់អ្នកដទៃ។
ព័ត៌មានលម្អិតសូមអានសេចក្តីណែនាំរបស់ក្រសួងសុខាភិបាលស្តីពីនីតិវិធីដាក់ខ្លួនឱ្យនៅដាច់ដោយឡែកក្នុងរយៈពេល១៤ថ្ងៃ នៅតាមផ្ទះជាលក្ខណៈបុគ្គល ៕
ក្រសួងប្រកាសឱ្យអ្នកជិះយន្តហោះលេខ PG933 មកពីថៃនៅថ្ងៃទី៩ មីនា មកពិនិត្យសុខភាព
ភ្នំពេញ ៖ រដ្ឋបាលក្រសួងសុខាភិបាលកម្ពុជា នៅថ្ងៃទី១៦ មីនានេះ បានអំពាវនាវឱ្យដំណើរផ្សេងទៀត ដែលធ្វើដំណើរតាមជើងហោះហើរលេខ PG 933 ត្រូវត្រួតពិនិត្យតាមដានសុខភាពរបស់អ្នករយៈពេល១៤ថ្ងៃ ចាប់ពីថ្ងៃដែលជើងហោះហើរចុះចតនៅប្រទេសកម្ពុជា ហើយទាក់ទងក្រសួងសុខាភិបាលដោយទូរស័ព្ទទៅលេខ១១៥ ប្រសិនបើអ្នកមានរោគសញ្ញាណាមួយ។
បើតាមនាយកដ្ឋានប្រយុទ្ធនឹងជំងឺឆ្លង(CDC) អ្នកដំណើរម្នាក់នៅថ្ងៃទី ៩ ខែមីនា ឆ្នាំ២០២ លើជើងហោះហើរលេខ PG 933 មកពី ទីក្រុងបាងកកប្រទេសថៃ បានធ្វើតេស្តរកឃើញវិជ្ជមាននៃជំងឺកូវីដ-១៩ ។ប្រសិនបើអ្នកនៅលើជើងហោះហើរតែមួយខាងលើ
នេះ ហើយអង្គុយនៅជួរទី 22, 23, 24, 25, ឬ 26 អ្នកត្រូវទាក់ទងទៅក្រសួងសុខាភិបាល មានទូរស័ព្ទទៅលេខ១១៥ដើម្បីមន្ត្រីសុខភាពជួយពិនិត្យសុខភាព៕
បន្ទាយមានជ័យ ៖ អនុវត្តតាមបម្រាមរបស់ក្រសួងការបរទេសនិងអគ្គនាយកដ្ឋានអន្តោប្រវេសន៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែតចាប់ពីម៉ោងសូន្យៗនាទីថ្ងៃទី១៧និងថ្ងៃទី១៨ខែមីនា២០២០និងមិនអោយជនបរទេសចំនួន6ប្រទេសចូលកម្ពុជាឡើយ។
លោកវរសេនីយ៍ឯក ឆោម ភ័ព្វ នាយប៉ុស្តិ៍នគរបាលអន្តោប្រវេសន៍ស្តីទីច្រកទ្វារអន្តរជាតិប៉ោយប៉ែតបានអោយដឹងថាដោយអនុវត្តតាមការណែនាំរបស់ឯកឧត្ដម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍និងតាមការបញ្ជារបស់លោកឧត្តមសេនីយ៍ត្រី អុី ចំរើន នាយប៉ុស្តិ៍នគរបាលអន្តោប្រវេសន៍ច្រកទ្វារអន្តោប្រវេសន៍ប៉ោយប៉ែតបានចាត់អោយមានការបិទផ្សាយនៅឈ្មោះប្រទេសចំនួន6ដែលរដ្ឋាភិបាលហាមមិនអោយចូលកម្ពុជាជាសវាងការរាលដាលនៃ ជំងឺវីរុស កូវិដ១៩ (Covid 19) រួមមានអ៉ីតាលី អាល្លឺម៉ង់ អេស្ប៉ាញ បារាំង អាមេរិក និងអ៉ីរ៉ង់ បិទមិនអោយចូលនៅម៉ោង00ថ្ងៃទី១៨។
ក្រៅពីការបិទផ្សាយនៅចំនួនប្រទេសទាំង៦ នគរបាលអន្តោប្រវេសន៍បានបិទផ្សាយតាមគោលដៅជាច្រើននៅវិធានការណ៍ការពារជំងឺវីរុស កូវិដ១៩ (Covid 19) ជាពិសេសការចែកម៉ាសជូនដល់ភ្ញៀវទេសចរណ៍ជាតិនិងអន្តរជាតិដែលឆ្លងកាត់តាមច្រកអន្តរជាតិប៉ោយប៉ែត។
យោងតាមកិច្ចប្រជុំ ផ្សព្វផ្សាយអំពីវិធានការទប់ស្កាត់ ជំងឺវីរុស កូវិដ១៩ (Covid 19) នៅអគ្គនាយកដ្ឋានអន្តោប្រវេសន៍នាព្រឹក ថ្ងៃទី១៦ ខែមីនា ឆ្នាំ២០២០ ក្រោមអធិបតីឯកឧត្ដម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍និងមានការអញ្ជើញចូលរួមពីសំណាក់ ឯកឧត្ដម នាយឧត្តមសេនីយ៍, ឯកឧត្ដម ឧត្ដមសេនីយ៍ឯក, ឯកឧត្ដម ឧត្ដមសេនីយ៍ទោ អគ្គនាយករងអន្តោប្រវេសន៍, ប្រធាននាយកដ្ឋាន, ក្រុមផ្តល់ទិដ្ឋាការ, នាយ-នាយរងប៉ុស្តិ៍ និងមន្រ្ដីពាក់ព័ន្ធមួយចំនួនទៀត។
លោក នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានលើកឡើង នូវបញ្ហាមួយចំនួនមានដូចជា អ្នកដំណើរមកពីប្រទេសទាំង៦ មានប្រទេស អ៉ីតាលី អាល្លឺម៉ង់ អេស្ប៉ាញ បារាំង អាមេរិក និងអ៉ីរ៉ង់ ហាមចូលប្រទេស, ពលរដ្ឋខ្មែរកាន់លិខិតឆ្លងដែនបរទេស នៃប្រទេសទាំង៦ មកពីប្រទេសទាំង៦ ហាមមិនឲ្យចូល, អ្នកការទូត អង្គការក្រៅរដ្ឋាភិបាល (NGO) បរទេស នៃប្រទេសទាំង៦ ដែលមានប័ណ្ណការទូត ពីក្រសួងការបរទេស និងក្រុមគ្រួសារមានប័ណ្ណការទូត និងទិដ្ឋាការ អនុញ្ញាតឲ្យចូល តែត្រូវរក្សាការរស់នៅដាច់ដោយឡែក រយៈពេល ១៤ថ្ងៃ, ពលរដ្ឋខ្មែរកាន់លិខិតឆ្លងដែន មកពីប្រទេសទាំង៦ អនុញ្ញាតឲ្យចូល តែត្រូវណែនាំឲ្យរស់នៅផ្តាច់ខ្លួន រយៈពេល ១៤ថ្ងៃ, ជនបរទេសទាំង ៦សញ្ជាតិ មកពីប្រទេសផ្សេងៗ ដែលគាត់បានស្នាក់នៅលើសពី ១៤ថ្ងៃ ត្រូវមានភស្តុតាងបញ្ជាក់ត្រឹមត្រូវ Stamps ឯកសារបញ្ជាក់ផ្សេងៗ ទើបអនុញ្ញាតឲ្យចូល, ចំពោះ Pilots ដែលមានការហោះហើរ ដល់ប្រទេសនោះហើយ ស្នើឲ្យចូល ត្រូវពិនិត្យចត្តាឡីស័កច្បាស់លាស់ រក្សារយៈពេល ១៤ថ្ងៃ ដូចគ្នា។
ជាមួយគ្នានេះដែរ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានដាក់ចេញ នូវវិធានការត្រួតពិនិត្យលើបញ្ជីឈ្មោះ អ្នកដំណើរតាមផ្លូវអាកាស (Manifest) មកពិនិត្យមុននឹងវាយតម្លៃភ្ញៀវចូល, ត្រួតពិនិត្យ Stamps ចូលប្រទេសនានា ដើម្បីឆែកប្រវត្តិដំណើរ, សំណូមពរឲ្យបង្ហាញ Boarding Pass មុន Last Destination, ត្រូវបំពេញអាស័យដ្ឋាន និងលេខទំនាក់ទំនងឲ្យបានច្បាស់លាស់, ត្រូវធ្វើការសម្ភាសន៍ ត្រូវបង្កើនចំនួនប្រធានគោលដៅ នាយរងប៉ុស្តិ៍តាមវេន, ត្រូវឲ្យគូសសញ្ញា Tick Yes, No ឈ្មោះប្រទេសដែលគាត់រស់នៅ ១៤ថ្ងៃ, ត្រូវមានរបាយការណ៍ជាប់ជាប្រចាំ អំពីបញ្ហា Covid 19, ត្រូវសហការល្អជាមួយ ផ្នែកចត្តាឡីស័ក និងពិនិត្យការយកចិត្តទុកដាក់, ត្រូវមានវិធានការការពារ ការឆ្លងរបស់មន្រ្តី ត្រូវពាក់ស្រោមដៃ និងម៉ាស់៕
ភ្នំពេញ ៖ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា កាលពីឆ្នាំ២០១៩ សមត្ថកិច្ចបង្ក្រាបបទល្មើសគ្រឿងញៀន ចំនួន ៩.៨០៦ករណី និងឃាត់ខ្លួនជនសង្ស័យ ចំនួន ២០.៤៩០នាក់។
ក្នុងសន្និបាតបូកសរុបលទ្ធផលការងារត្រួតពិនិត្យគ្រឿងញៀន ឆ្នាំ២០១៩ និងទិសដៅការងារ ឆ្នាំ២០២០ និងកិច្ចប្រជុំបូកសរុបលទ្ធផល នៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀន ខុសច្បាប់លើកទី៤ នាព្រឹកថ្ងៃទី១៦ ខែមីនា ឆ្នាំ២០២០ នាយឧត្តមសេនីយ៍ កែ គឹមយ៉ាន មានប្រសាសន៍ថា “ក្នុងឆ្នាំ២០១៩ កន្លងមកនេះ សមត្ថកិច្ច អនុវត្តច្បាប់បង្ក្រាបបទល្មើសគ្រឿងញៀន បានចំនួន ៩.៨០៦ករណី (កើនឡើងប្រមាណ២២.៥៤%) ឃាត់ខ្លួនជនសង្ស័យបានចំនួន ២០.៤៩០នាក់ (កើនឡើងប្រមាណ២៤,៥៤%) ចាប់យកគ្រឿងញៀនគ្រប់ប្រភេទបានចំនួន ៧៥០គីឡូក្រាម (កើនឡើងប្រមាណ៣៩,៩៦%)”។
នាយឧត្តមសេនីយ៍ បានបន្ដថា សមត្ថកិច្ច ក៏បានបង្កក និងរឹបអូសនូវអចលន និងចលនវត្ថុជាសម្ភារ និងថវិកាពាក់ព័ន្ធមួយចំនួនទៀត។ ក្នុងនោះ បង្ក្រាបបានករណីធំៗ ចំនួន៦១ករណី ដែលមានជនសង្ស័យចំនួន១៤០នាក់ ជនបរទេស៥៤នាក់ មេក្លោងចំនួន២៧នាក់ និងបណ្ដាញរបស់ពួកវា ១១៣នាក់។
លោកបន្ថែមថា ជាមួយគ្នានេះ តាមរយៈប្រតិបត្តិការដ៏ម៉ឹងម៉ាត់របស់សមត្ថកិច្ចគ្រប់លំដាប់ថ្នាក់ បានទប់ស្កាត់ និងលុបបំបាត់ការជួញដូរ និងប្រើប្រាស់គ្រឿងញៀននៅតាមក្លិបកម្សាន្ដ និងទីតាំងសប្បាយដ្ឋានានា ទូទាំងប្រទេស នៅចុងឆ្នាំ២០១៩កន្លងទៅនេះ។
យោងតាមរបាយការណ៍ស្ដីពីលទ្ធផលការងារត្រួតពិនិត្យគ្រឿងញៀន ឆ្នាំ២០១៩ និងទិសដៅការងារឆ្នាំ២០២០ បានឱ្យដឹងថា ក្នុងឆ្នាំ២០១៩ សម្ភារចាប់យកក្នុងប្រតិបត្តិការបង្ក្រាបបទល្មើសគ្រឿង ញៀន ដែលបានបញ្ជូនទៅសាលាដំបូង រាជធានី-ខេត្ត រួមមាន រថយន្ដ៧២គ្រឿង, ម៉ូតូ២.៦៥៣ គ្រឿង, ទូរស័ព្ទ ៧.០៤១គ្រឿង, ជញ្ជីង ៣៩៨គ្រឿង, អាវុធវែង ១១ដើម, អាវុធខ្លី១១ដើម , ប្រាក់កម្ពុជា ៩៨.៦៨២.៤០០រៀល, ប្រាក់អាមេរិក ១២៨.៨២២ដុល្លារ, ប្រាក់ថៃ ៨១.៥៧០ បាត, ប្រាក់វៀតណាម ១៦.៥៧៨.០០០ដុង, ព្រមទាំងបង្កកផ្ទះល្វែង១កន្លែង និងផ្ទះដីឡូត៍១កន្លែង នៅខេត្តកំពង់ស្ពឺ៕
ភ្នំពេញ ៖ ថ្ងៃទី១៦ ខែមីនា ឆ្នាំ២០២០នេះ លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានអញ្ជើញចូលរួមក្នុងកម្មវិធីសកម្មភាពមីនមនុស្សធម៌នៅកម្ពុជានៅនិវេសនដ្ឋានឯកអគ្គរាជទូតចក្រភពអង់គ្លេសប្រចាំនៅកម្ពុជា។ កម្មវិធីនេះមានការចូលរួមពីប្រតិបត្តិករ HALO Trust MAG និង អង្គការ NPA។
ក្នុងឱកាសនោះ លោកស្រី Tina Redshaw បានមានប្រសាសន៍ថា ចក្រភពអង់គ្លេសនឹងផ្តល់ថវិកាចំនួន៤,៣លានដុល្លារអាមេរិក បន្ថែមជួយដល់កម្មវិធីសកម្មភាពមីនសកលទី២ (GMAP2) ក្នុងរយៈពេល១ឆ្នាំ ដែលបញ្ចប់នៅខែមីនា ឆ្នាំ២០២១មុននឹងចាប់ផ្តើមបន្តកម្មវិធីសកម្មភាពមីនសកលទី៣ ឆ្នាំ២០២១ ។ លោកស្រីឯកអគ្គរាជទូត បានបញ្ជាក់បន្ថែមថា កម្ពុជា និងចក្រភពអង់គ្លេសមានបេសកកម្មរួមគ្នាក្នុងការចូលរួមសង្រ្គោះជីវិតមនុស្សឲ្យរួចផុតពីគ្រោះថ្នាក់ដោយសារមីននៅកម្ពុជា។
ជាការឆ្លើយតប ក្នុងនាមសម្តេចតេជោនាយករដ្ឋមន្ត្រី និងជាប្រធានអាជ្ញាធរមីន លោកទេសរដ្ឋមន្រ្តី លី ធុជ បានអរគុណដល់រាជរដ្ឋាភិបាល និងប្រជាជនចក្រភពអង់គ្លេស ដែលបានចូលរួមជួយដល់ការងារបោសសម្អាតមីនចាប់តាំងពីឆ្នាំ១៩៩២ លើផ្ទៃដីជាង ១២២ គីឡូម៉ែត្រក្រឡា និងរកឃើញគ្រាប់និងយុទ្ធភណ្ឌមិនទាន់ផ្ទុះជិត ៧ ម៉ឺនគ្រាប់។ ទន្ទឹមនោះលោកទេសរដ្ឋមន្រ្តីក៏បានស្នើសុំឲ្យចក្រភពអង់គ្លេស បន្តជួយដល់រាជរដ្ឋាភិបាលកម្ពុជា ក្នុងការអនុវត្តនូវផែនការយុទ្ធសាស្ត្រជាតិសកម្មភាពមីន (២០១៨-២០២៥) ដើម្បីឆ្ពោះទៅរកកម្ពុជាមួយដែលគ្មានគ្រោះថ្នាក់ដោយសារមីន និងគ្មានមីនឆ្នាំ២០២៥៕
ភ្នំពេញ ៖ លោកបណ្ឌិត អ៊ិត សំហេង រដ្ឋមន្រ្តីក្រសួងាការងារ និងបណ្តុះបណ្តាលវិជ្ជាជីវៈបានអនុញ្ញាតឱ្យ លោក លី វេង ប្រធានសហភាពសហជីពការងារខ្មែរ និងសហការីមកពីសហព័ន្ធសហជីពចំនួន៥ទៀត ចូលជួបសម្តែងការគួរសម និងទទួលយកនូវអនុសាសន៍មួយចំនួនពីលោករដ្ឋមន្រ្តី ដើម្បីពង្រឹងការងាររបស់ខ្លួន បន្ថែមទៀតក្នុងការផ្តល់ការការពារ និងលើកកម្ពស់សិទ្ធិបងប្អូនកម្មករនិយោជិត នាព្រឹកថ្ងៃទី១៦ ខែមីនា ឆ្នាំ២០២០ នៅទីស្តីការក្រសួង។
ក្នុងជំនួបនោះ លោក លី វេង បានជម្រាបជូនលោករដ្ឋមន្រ្តី ពីការខិតខំការងារកន្លងមករបស់សហភាពសហជីពការងារខ្មែរ ដែលបានរួមចំណែកក្នុងការគាំទ្រនូវគោលនយោបាយដ៏ត្រឹមត្រូវរបស់រាជរដ្ឋាភិបាល ដែលបានធ្វើឱ្យប្រទេសជាតិបន្តរីកចំរើនលើគ្រប់វិស័យ បងប្អូនកម្មករនិយោជិតទទួលបាននូវឱកាសការងារ ប្រាក់ឈ្នួលកាន់តែប្រសើរ ការពារសិទ្ធិ និងទទួលបាននូវអត្ថប្រយោជន៍ជាច្រើន ជាពិសេសការទទួលបាននូវកិច្ចគាំពារសង្គម។
លោករដ្ឋមន្រ្តី បានកោតសសើរការងារកន្លងមករបស់សហភាពសហជីពនេះ ហើយផ្តល់អនុសាសន៍ឱ្យសហភាពសហជីពនេះ ខិតខំបន្តចូលរួមសកម្មភាពឱ្យកាន់តែផុសផុលថែមទៀត ដើម្បីធ្វើយ៉ាងណាឱ្យការអនុវត្តគោលនយោបាយ ក៏ដូចជាវិធានការណ៍ថ្មីៗរបស់រាជរដ្ឋាភិបាលសម្រេច បានជោគជ័យ ដើម្បីធានានូវដោះស្រាយការងារជូនបងប្អូនកម្មករនិយោជិត រោងចក្រ សហគ្រាស នៅតែអាចបន្តផលិតកម្ម អាជីវកម្ម សិទ្ធិ និងអត្ថប្រយោជន៍របស់បងប្អូនកម្មករនិយោជិតនូវតែធានាបាន។
លោករដ្ឋមន្រ្តី បានស្នើដល់សហភាពសហជីព នេះ ត្រូវចូលរួមទប់ស្កាត់ការអំពើប្រព្រឹត្តខុសនីតិវិធីច្បាប់ ឬសកម្មភាពដែលមានចរិកជាការញោះញុងដើម្បីទាមទារអ្វីមួយដែលខុសពីច្បាប់ ដែលនាំឱ្យមានការខាតបងទាំងបងប្អូនកម្មករនិយោជិត ម្ចាស់រោងចក្រ សហគ្រាស ហើយនិយាយជារួមខាតបង់ដល់ប្រទេសជាតិយើងតែម្តង។ យើងត្រូវរួមគ្នាដើម្បីប្រយោជន៍ជាតិយើង ព្រោះថា បើរោងចក្រ សហគ្រាស គេមិនអាចដំណើរការបានហើយ កុំថាឡើយសហជីពមានសិទ្ធិដើម្បីទាមទារនេះ ទាមទារនោះ សហជីពខ្លួនឯងហ្នឹងក៏ចប់អាជីពដែរ។
ជាមួយគ្នានោះរដ្ឋមន្រ្តី ក៏បានរំលឹកឱ្យសហភាពសហជីព ចូលរួមគាំទ្រ និងអនុវត្តឱ្យមានប្រសិទ្ធភាពខ្ពស់ចំពោះវិធានការណ៍របស់រាជរដ្ឋាភិបាលក្នុងការទប់ស្កាត់ និងបង្ការការរីករាលដាល់នៃជំងឺរាតត្បាតជាសកល កូវិដ-១៩។
សហភាពសហជីការងារខ្មែរ ក៏បានថ្លែងអំណរគុណយ៉ាងជ្រាល់ជ្រៅចំពោះឯកឧត្តមរដ្ឋមន្រ្តី ដែលតែងតែបានគាំទ្រ និងផ្តល់នូវអនុសាសន៍ដល់ដំណើរការងារប្រកបដោយជោគជ័យនាពេលកន្លងមក ហើយបានប្តេជ្ញាខិតខំអនុវត្តនូវរាល់អនុសាសន៍ល្អៗដើម្បីធ្វើយ៉ាងណាអោយការអនុវត្តនូវវិជ្ជាជីវៈក្នុងនាម ជាសហជីពនេះ អាចដើរតួនាទីកាន់តែប្រសើរដល់ការការពារសិទ្ធិ និងផលប្រយោជន៍របស់ប្អូនកម្មករនិយោជិត ចូលរួមឱ្យម្ចាស់ រោងចក្រ សហគ្រាស ទទួលបាននូវផលចំណេញ ហើយក៏ដូចជាចូលរួមក្នុង ការអភិវឌ្ឍប្រទេសជាតិយើង។
សូមបញ្ជក់ថា សហភាពសហជីពការងារខ្មែរ មានសហព័ន្ធសហជីពជាសមាជិកចំនួន៥ និងមានសហជីពមូលដ្ឋានសរុបចំនួន១០២ ហើយមានកម្មករនិយោជិតជាសមាជិកសរុប ចំនួន ២៣ ៣២២នាក់៕
ភ្នំពេញ ៖ ក្រសួងអប់រំ យុវជន និងកីឡា នៅថ្ងៃទី១៦ ខែមីនា ឆ្នាំ២០២០នេះ បានចេញសេក្តីណែនាំបន្ទាន់មួយ ដោយសម្រេចឲ្យសិស្ស និងនិស្សិតគ្រប់កម្រិតសិក្សាទាំងអស់ នៅទូទាំងប្រទេស ឈប់សម្រាកមុនកាលកំណត់ចាប់ពីថ្ងៃនេះ រហូតដល់មានការជូនដំណឹងថ្មី។
ការសម្រេចរបស់ក្រសួងអប់រំនេះធ្វើឡើងដើម្បីជាវិធានការបង្ការ និងទប់ស្កាត់ជាបន្ទាន់នូវការរីករាលដាលជំងឺ Covid-19។
សូមអានសេចក្តីណែនាំរបស់ក្រសួងអប់រំទាំងស្រុង៖
រ៉ូម ៖ អាជ្ញាធរអ៊ីតាលីបានរាយការណ៍ឲ្យដឹងថា ចំនួនមនុស្សស្លាប់សរុបកើនដល់ ១,៨០៩នាក់ និងឆ្លងសរុប ២៤,៧៤៧នាក់ បន្ទាប់ពីពេញមួយថ្ងៃអាទិត្យម្សិលមិញអ្នកជំងឺ COVID-19 សរុប ៣៦៨នាក់បន្ថែមទៀតបានស្លាប់ ខណៈអាជ្ញាធប្រកាសថា គ្រែអ្នកជំងឺ និងគ្រឿងបរិក្ខារពេទ្យសំខាន់ៗផ្សេងទៀត កំពុងប្រឈមមុខភាពខ្វះខាតធ្ងន់ធ្ងរ។ នេះបើតាមការចេញផ្សាយដោយ CNA។
ប្រទេសអ៊ីតាលីមានប្រជាជានរស់នៅជាង ៦០លាននាក់ គឺកំពុងស្ថិតនៅក្នុងការបិទទ្វារនៅឡើយ ដើម្បីប្រយុទ្ធប្រឆាំងនឹងជំងឺរាតត្បាតសកល COVID-19។ សម្រាប់តំបន់ដែលរងគ្រោះខ្លាំងជាងគេគឺ ឡុមបាឌី (Lombardy) ដោយនៅទីនោះមនុស្ស១,២១៨នាក់ ដែលភាគច្រើនជាមនុស្សចាស់ជរា។
អភិបាលទីក្រុង មីឡេន (Milan) ដែលស្ថិតនៅក្នុងតំបន់ខាងលើដែរ គឺលោក អាតធីលីយ៉ូ ហ្វុនថាណា (Attilio Fontana) បានលើកឡើងថា «ពេលនេះទីក្រុងហិរញ្ញវត្ថុរបស់អ៊ីតាលី កំពុងតែរងវិបត្តិធ្ងន់ធ្ងរឡើងៗហើយ។ យើងកំពុងឈានទៅរការខ្វះខាតគ្រែ និងឧបករណ៍ដកដង្ហើមសិប្បនិម្មិត សម្រាប់អ្នកជំងឺ ដែលយើងពិតជាមិនអាចទៅរកនៅទីណាបានទេ»។ បច្ចុប្បន្ននេះ ប្រទេសអ៊ីតាលីកំពុងតែរង់ចាំការនាំចូលគ្រឿងបរិក្ខាពេទ្យ យ៉ាងច្រើនពីបរទេស៕
ខេត្តបាត់ដំបង ៖ លោក ថោង ខុន រដ្ឋមន្រ្តីក្រសួងទេសចរណ៍បានថ្លែងថា ការរៀបចំពិធីបុណ្យទន្លេលើកទី៦ រយៈពេល៣ថ្ងៃ ចាប់ពីថ្ងៃទី១៣-១៥ ខែមីនា ឆ្នាំ២០២០ នៅខេត្តបាត់ដំបង បានប្រព្រឹត្តទៅដោយរលូន និងជោគជ័យយ៉ាងត្រចេះត្រចង់ ដោយមានប្រជាពលរដ្ឋ និងភ្ញៀវទេសចរចូលរួមទស្សនាប្រមាណជិត៣០ម៉ឺននាក់ ខណៈបញ្ហាសន្តិសុខសណ្ដាប់ធ្នាប់ក៏គ្មានអ្វីកើតឡើងគួរឱ្យ កត់សម្គាល់នោះឡើយ។
ក្នុងកម្មវិធីបិទព្រឹត្តិការណ៍បុណ្យទន្លេនារាត្រីថ្ងៃទី១៥ ខែមីនានេះ ក្នុងនោះគេសង្កេតឃើញថ្នាក់ដឹកនាំ មន្ត្រីរាជការ និងប្រជាពលរដ្ឋយ៉ាងច្រើនកុះករបានចូលរួមទស្សនាទស្សនីយភាពសិល្បៈវប្បធម៌ មានល្ខោនរឿងប្រវត្តិភ្នំសំពៅ សិល្បៈរបាំមួយចំនួន ការដើរបង្ហាញម៉ូតអំពីក្រមាខ្មែរ និងការសម្ដែងសៀកកំប្លែងផងដែរ។
ជាមួយគ្នានោះ ប្រជាពលរដ្ឋ និងភ្ញៀវទេសចរក៏បានដើរទស្សនានៅតាមស្ដង់ពិព័រណ៍ ទទួលទានអាហារនៅតាមស្ដង់លក់ម្ហូបអាហារ និងការតាំងបង្ហាញផលិតផលនានានៅក្នុងបរិវេណរៀបចំពិធីបុណ្យ ចំណែកអ្នកមួយចំនួនក៏និយមថតរូបភាពជាមួយក្រុមគ្រួសារ មិត្តភក្តិជាដើម។ ក្រៅពីនេះមានការប្រគំតន្ត្រីចំនួន ២កន្លែងទៀតផងដែរ។
រយៈពេលបីថ្ងៃមកនេះ បុណ្យទន្លេបានទទួលវត្តមានភ្ញៀវទេសចរ និងប្រជាពលរដ្ឋចូលរួមទស្សនាប្រមាណជិត៣០ម៉ឺននាក់ ក្នុងនោះមានភ្ញៀវបរទេសប្រមាណ ១៣០០នាក់ ដោយនៅថ្ងៃទីមួយទទួលបានប្រមាណជាង៣ម៉ឺននាក់ នៅថ្ងៃទីពីរដែលជាថ្ងៃបើកពិធីបុណ្យជាផ្លូវការក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ទទួលបានវត្តមានប្រជាពលរដ្ឋ និងភ្ញៀវទេសចរប្រមាណជាង១០ម៉ឺននាក់ ចំណែកនៅថ្ងៃបិទបញ្ចប់នេះទទួលបានប្រមាណជាង១៦ម៉ឺននាក់ទៀត៕
ភ្នំពេញ ៖ ក្រសួងសុខាភិបាលកម្ពុជា បានចេញសេចក្តីប្រកាសមួយទៀត នៅយប់ថ្ងៃទី១៥ ខែមីនា ឆ្នាំ២០២០នេះ ដោយបញ្ជាក់អំពីករណីវិជ្ជមានវីរុសកូវីដ១៩ ចំនួន៤ករណីទៀត ដោយបានរកឃើញនៅលើខ្លួនជនជាតិខ្មែរឥស្លាមចំនួន២នាក់ បុរសជនជាតិខ្មែរមកពីប្រទេសបារាំងមួយនាក់ និងកូនជនជាតិបារាំងអាយុ ៣៥ឆ្នាំនោះចំនួន ១នាក់ ដែលធ្វើឲ្យចំនួនអ្នកឆ្លងនៅក្នុងប្រទេសកម្ពុជាបានកើនដល់ ១២ នាក់ហើយ។
ខាងក្រោមនេះជាសេចក្តីប្រកាសទាំងស្រុងរបស់ក្រសួងសុខាភិបាលអំពីការរកឃើញករណីឆ្លងកូវីដ ចំនួន ៤ ករណីថ្មីទៀត៖
ភ្នំពេញ ៖ សព្វថ្ងៃនេះជំងឺកូវីដ១៩ កំពុងរាតត្បាតជាសកលពិសេសកំពុងមានភាពធ្ងន់ធ្ងរនៅបណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ដែលនាំឲ្យមានផលប៉ះពាល់ដល់សុខភាពប្រជាពលរដ្ឋទូទៅ។ ដើម្បីទប់ស្កាត់ការរីករាលដាលនេះរាជរដ្ឋាភិបាលដាក់ចេញនូវវិធានការដូចខាងក្រោម ៖
១-ណែនាំដល់ប្រជាពលរដ្ឋទាំងអស់សូមកុំធ្វើដំណើរទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ប្រសិនបើមិនមានការចាំបាច់បំផុតដែលខានពុំបាន។
២-គ្រប់ក្រសួងស្ថាប័នរដ្ឋទាំងអស់ទាំងនៅថ្នាក់ជាតិ និងថ្នាក់ក្រោមជាតិ មិនត្រូវអនុញ្ញាតឲ្យមន្ត្រីរាជការបុគ្គលិកគ្រប់លំដាប់ថ្នាក់ធ្វើដំណើរចូលរួមកិច្ចប្រជុំគ្រប់ប្រភេទទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ឡើយ។
៣-ក្នុងករណីចាំបាច់ខានមិនបានដែលតម្រូវឲ្យមានតំណាងរបស់កម្ពុជាចូលរួមប្រជុំនៅបណ្ដាប្រទេសដូចបញ្ជាក់ខាងលើ ក្រសួងស្ថាប័នពាក់ព័ន្ធនីមួយៗត្រូវធ្វើដំណើរទៅកាន់ក្រសួងការបរទេស និងសហប្រតិបត្តិការអន្តរជាតិ ដើម្បីចាត់តំណាងស្ថានទូតប្រចាំនៅប្រទេសម្ចាស់ផ្ទះនៃការប្រជុំឲ្យចូលរួមជំនួស។
៤-ចំពោះមន្ត្រីរាជការ និងប្រជាពលរដ្ឋកម្ពុជាទាំងឡាយណាដែលទើបវិលត្រឡប់មកពីបណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ត្រូវដាក់ខ្លួនឲ្យនៅដាច់ដោយឡែកក្នុងរយៈពេល១៤ ថ្ងៃគិតចាប់ពីថ្ងៃដែលបានត្រឡប់មកដល់ព្រះរាជាណាចក្រកម្ពុជាវិញ ស្របតាមនីតិវិធីកំណត់ដោយក្រសួងសុខាភិបាល។
ទទួលបានសារាចរណែនាំនេះ គ្រប់ក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ និងសាធារណជនត្រូវចូលរួមអនុវត្តឲ្យមានប្រសិទ្ធភាព និងដោយស្មារតីទទួលខុសត្រូវ។
ខេត្តក្រចេះ ៖ ករណីគ្រោះថ្នាក់ចរាចរណ៍មួយបានកើតឡើងរវាងរថយន្តបុកម៉ូតូចំនួន ២គ្រឿង បណ្តាលបុរសវ័យចំណាស់ម្នាក់បានស្លាប់ និងម្នាក់ទៀតរងរបួសធ្ងន់នៅលើផ្លូវលេខ៣៧៧(ក្រចេះ-ខ្លាស្ទុះ) ត្រង់ចំណុចមុខទីបញ្ជាការកងរាជអាវុធហត្ថខេត្តក្រចេះ ស្ថិតក្នុងភូមិអូរឫស្សី1 សង្កាត់អូរឫស្សី ក្រុងក្រចេះ ខេត្តក្រចេះ កាលពីរសៀល ថ្ងៃទី១៥ ខែមីនា ឆ្នាំ២០២០ នេះ។
លោក ចក់ ផល្លី អធិការរងទទួលផែនចរាចរណ៍ក្រុងក្រចេះ បានប្រាប់ឲ្យដឹងថាមានករណីគ្រោះថ្នាក់កើតឡើងដោយរថយន្តម៉ាកកាមរីឆ្លាមពាក់ស្លាកលេខភ្នំពេញ2Q.8584 អ្នក បើកបរមិនស្គាល់អត្ត សញ្ញាណបានបើកបរពីទិសខាងលិចទៅទិស ខាងកើតដល់ចំណុចខាងលើបានរ៉េចង្កូតបុករះចំនួន០២គ្រឿងបណ្តាលឲមនុស្សពីរនាក់ម្នាក់ស្លាប់និងម្នាក់ទៀតរងរបួសធ្ងន់។
ជនរងគ្រោះទី១ អ្នកបើកបរឈ្មោះ កែវ ស្រីម៉ាច ភេទស្រី អាយុ២១ឆ្នាំ (របួសធ្ងន់)មានទីលំនៅភូមិ1 សង្កាត់រកាក ណ្តាល ក្រុងក្រចេះខេត្តក្រចេះ ។ជនរងគ្រោះទី២ អ្នកបើក បរឈ្មោះ ម៉ម យឿន ភេទប្រុសអាយុ៧៥ឆ្នំា (របានស្លាប់នៅ មន្ទីរពេទ្យខេត្ត) មានទីលំ នៅភូមិស្រែស្តៅសង្កាត់អូរឫ្សី ក្រុងក្រចេះខេត្តក្រចេះ។
សូមបញ្ជាក់ថា រថយន្តត្រូវបានអ្នកបើកបរយកទៅទុកនៅក្នុងយានដ្ឋានជាង លុច ស្ថិតក្នុងភូមិស្រែស្តៅ សង្កាត់អូរឫ ស្សី ក្រុងក្រចេះ ខេត្ត ក្រចេះ ។
ចំណែកសាកសពជនរងគ្រោះត្រូវបាននរគបាលជំនាញប្រគល់ជូនក្រុមគ្រួសារនៃសពយកទៅធ្វើបុណ្យតាមប្រពៃណី ចំណែកអ្នករងរបួសធ្ងន់ ត្រូវបានក្រុមគ្រួសារដឹកយកទៅព្យាបាលនៅពេទ្យខេត្តក្រចេះ។
បច្ចុប្បន្ននេះ រថយន្តបង្កហេតុ និងម៉ូតូចំនួនពីរគ្រឿងបានដឹកយកមករក្សាទុកនៅអធិការដ្ឋាននគរបាលក្រុងក្រចេះ ជាបណ្តោះអាសន្នរង់ចាំការដោះស្រាយតាមនីតិវិធីនៅពេលក្រោយ៕
ភ្នំពេញ ៖ ដើមឆ្នាំ ២០២០ ភ្ញៀវទេសចរអន្តរជាតិដែលមកទស្សនានៅក្នុងប្រទេសកម្ពុជា បានធ្លាក់ចុះរហូតដល់ ៣០,៧ភាគរយធៀបនឹងរយៈពេលដូចគ្នាកាលពីឆ្នាំ២០១៩ ។ ការធ្លាក់ចុះនេះ គឺត្រូវបានគ្រប់គ្នាដឹងហើយថាមកពីជំងឺកូវីដ១៩ ហើយការធ្លាក់ចុះភ្ញៀវនេះដែរ មិនមែនមានតែក្នុងប្រទេសកម្ពុជានោះទេ គឺស្ទើរតែគ្រប់ប្រទេសនៅលើពិភពលោក ដែលបង្កើតអោយមានវិបត្តិសេដ្ឋកិច្ចពិភពលោកផងដែរ ។
យោងតាមប្រសាសន៍សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថ្លែងក្នុងពិធីបុណ្យទន្លេកាលពីល្ងាចថ្ងៃទី១៤ មីនា ២០២០នៅខេត្តបាត់ដំបង ថា នៅដើមឆ្នាំ២០២០ នេះ ភ្ញៀវទេសចរអន្តរជាតិមកកម្ពុជា បានធ្លាក់ចុះប្រមាណជា ៣០,៧% ក្នុងនោះទេសចរចិន បានធ្លាក់ចុះក្នុងរង្វង់ ៤០% ធៀបនឹងរយៈពេលដូចគ្នានៅឆ្នាំ២០១៩ ។តាមទិន្នន័យនេះ បើប្រៀបធៀបជាមួយគោលដៅទេសចរណ៍ក្នុងតំបន់ ប្រទេសជិតខាងកម្ពុជាអត្រានៃការធ្លាក់ចុះចំនួនភ្ញៀវទេសចរអន្តរជាតិមកកម្ពុជា គឺមានកំរិតស្រាលនៅឡើយ។
ក្នុងកាលៈទេសៈ ដែលកម្ពុជាកំពុងទទួលរងនូវវិបត្តិទេសចរណ៍ដែលកើតឡើងដោយសារជំងឺកូវីដ១៩ នេះ រដ្ឋាភិបាលក៏បានដាក់ចេញនូវគោលការណ៍មួយចំនួន ដូចជាមិនយកពន្ធលើផ្ទះសំណាក់ និងសណ្ឋាគារនៅក្នុងខេត្តសៀមរាប ដោយសារតែខេត្តនេះ បានរងផលប៉ះពាល់ច្រើនជាងគេ បើធៀបនឹងតំបន់ទេសចរណ៍នានាក្នុងប្រទេសកម្ពុជា។
លោក តុប សុភ័ក រដ្ឋលេខាធិការក្រសួងទេសចរណ៍ បានមានប្រសាសន៍ថា ក្នុងកាលៈទេសៈនេះ ក្រសួងទេសចរណ៍ មិនព្រងើយកន្តើយនោះទេ គឺក្រសួងបានត្រៀមរៀបចំនូវសកម្មភាពមួយចំនួននៅក្នុងខេត្តសៀមរាប ធ្វើយ៉ាងណាអោយអាជីវកម្មទាំងអស់នៅក្នុងខេត្តសៀមរាប ធានាបាននូវចំនូលបានខ្លះសម្រាប់ផ្គត់ផ្គង់ថ្លៃ បុគ្គលិកមួយផ្នែក និងថ្លៃទឹក ភ្លើងមួយផ្នែកខ្លះ ដើម្បីកុំអោយបាត់ដំណើរការទេសចរណ៍ ។ ក្រៅពីនោះក្រសួងទេសចរណ៍ក៏បានរៀបចំ នូវកម្មវិធីសិក្ខាសាលា និងព្រឹត្តិការណ៍នានា ដោយបានដាក់ផែនការរួចរាល់ហើយ ដើម្បីរៀបចំនៅក្នុងទឹកដីខេត្តសៀមរាប ប៉ុន្តែជាចៃដន្យកម្ពុជាបានរកឃើញករណីឆ្លងកូវីដ១៩លើបុរសជនជាតិខ្មែរមួយរូបនៅក្នុងខេត្តសៀមរាប ហើយរដ្ឋាភិបាលក៏បានប្រកាសបិទសាលារៀននៅក្រុងសៀមរាប ដូច្នេះហើយកម្មវិធីមួយចំនួន ដែលត្រូវធ្វើនៅអំឡុងខែមីនា ក្នុងខេត្តសៀមរាប ក៏ត្រូវផ្អាកដំណើរការសិន និងរង់ចាំមើលស្ថានភាព និងរង់ចាំគោលការណ៍ណែនាំពីរាជរដ្ឋាភិបាលជាថ្មី ។ ក្រៅពីនោះ ព្រឹត្តិការណ៍សំខាន់ៗដូចជាអង្គរសង្ក្រាន នៅខេត្តសៀមរាប ក៏ត្រូវបានរាជរដ្ឋាភិបាលប្រកាសបិទដែរ ។
លោកបន្តថា ចាប់ពីខែមីនា ដល់ដំណាច់ឆ្នាំ ២០២០ ក្រសួងទេសចរណ៍បានរៀបចំ ផែនការរួចហើយសម្រាប់ព្រឹត្តិការណ៍នានា នៅក្នុងខេត្តសៀមរាប បូកទាំងសិក្ខាសាលានានាផងដែរ ហើយក្រសួងនៅតែត្រៀមខ្លួនជានិច្ច ដោយរង់ចាំមើលស្ថានភាពធូរស្រាលពេលណា នឹងចាប់ផ្ដើមដំណើរការពេលនោះ ដើម្បីទាក់ទាញភ្ញៀវទេសចរ មកកាន់សៀមរាបឡើងវិញ ក៏ប៉ុន្តែក្នុងស្ថានភាពបែបនេះក្រសួងក៏មិនអាចរៀបចំបានឡើយ ។
យោងតាមរបាយការណ៍របស់ក្រសួងទេសចរណ៍បានបង្ហាញថា ក្នុងឆ្នាំ ២០១៩ កន្លងទៅនេះ កម្ពុជាទទួលបានទេសចរអន្តរជាតិចំនួន ៦,៦១លាននាក់កើនឡើង ៦,៦ភាគរយ ធៀបនឹងឆ្នាំ២០១៨ ដែលរកចំណូលជាតិបានប្រមាណ ៤.៩១៩លានដុល្លារអាមេរិក កើនឡើង ១២,៤ភាគរយ ធៀបនឹងឆ្នាំ២០១៨ ផ្ដល់ការងារប្រមាណ ៦៣ម៉ឺននាក់ ដោយបានរួមចំណែកក្នុងផលិតក្នុងស្រុកសរុបប្រមាណ ១២,១ភាគរយ។
គួររំលឹកថា ឆ្នាំ ២០១៩ ចំនួនភ្ញៀវទេសចរមកពីប្រទេសទាំង៦ មកដល់កម្ពុជា ៖
១.Italy 40,916នាក់ ២. Spain 45,416 នាក់ ៣. France 164,117 នាក់ ៤. Iran 1,373 នាក់ ៥. Germany 94,371 នាក់ និងទី៦. United Of America 248,863 នាក់
ដែលប្រទេសទាំងនេះ ត្រូវបានផ្អាកចូលកម្ពុជាមួយរយៈ ដើម្បីទប់ស្កាត់ការឆ្លងរាលដាលនៃវីរុសកូរ៉ូណា ៕
ញូវយ៉ក ៖ ដើម្បីបន្ធូរបន្ថយការរីករាលដាលនៃវីរុស COVID-19 នៅទីស្នាក់ការកណ្តាលរបស់អង្គការសហប្រជាជាតិនាទីក្រុង New York លោក Antonio Guterres អគ្គលេខាធិការអង្គការសហប្រជាជាតិ បានប្រាប់ឲ្យបុគ្គលិកទាំងអស់ ឲ្យធ្វើការងារពួកគេពីផ្ទះមក ចាប់ពីថ្ងទី១៦ ខែមីនា រហូតដល់ថ្ងៃទី១២ ខែមេសា ខាងមុខ។
លោក Antonio Guterres អះអាងថា “ការសម្រេចនេះ ដោយផ្អែកលើកិច្ចពិគ្រោះយោបល់ជាមួយនឹងថ្នាក់ដឹកនាំជាន់ខ្ពស់ រួមមានប្រធានវេជ្ជសាស្រ្ត ខ្ញុំបានសម្រេចចិត្តបង្កើតវិធានការនៅទីស្នាក់ការកណ្តាល ដើម្បីបន្ធូរបន្ថយការរីករាលដាលនៃវីរុស COVID-19″ ។
សូមជម្រាបថា ថ្មីៗនេះ ប្រធានាធិបតីអាមេរិច ដូណាល់ ត្រាំ បានប្រកាសដាក់ប្រទេសក្នុងគ្រោះអាសន្ន ដើម្បីប្រយុទ្ធប្រឆាំងនឹងវីរុសកូរ៉ូណា ក្រោយពលរដ្ឋអាមេរិក ចំនួន ៤១នាក់ស្លាប់ និងជាង ១.៧០០នាក់ឆ្លងវីរុសកូវីដ៕
ភ្នំពេញ ៖ ឯកអគ្គរដ្ឋទូតចិន ប្រចាំប្រទេសកម្ពុជា លោក វ៉ាង វិន ធៀន (Wang Wen Tian) នៅព្រឹកថ្ងៃទី១៥ ខែមីនា ឆ្នាំ២០២០ នេះអញ្ជើញបើកសមយុទ្ធនាគមាស ឆ្នាំ២០២០ នៅខេត្តកំពត បានអះអាងថា ចិននឹងបន្ដជួយដល់កម្ពុជា ក្នុងប្រតិបត្តិការការពារទប់ស្កាត់វីរុស កូវីដ-១៩ ខណៈនៅពេលថ្មីៗនេះរដ្ឋាភិបាលចិន បានផ្ដល់សម្ភារៈ បរិក្ខារមួយចំនួនដល់កម្ពុជារួចហើយ ដើម្បីការពារទប់ស្កាត់ វីរុសដ៏កាចសាហាវមួយនេះ។
សូមរំលឹកថា សម្ភារៈដែលភាគីចិន បានផ្ដល់ជូនកម្ពុជានាពេលថ្មីៗនេះ រួមមាន ៖ ថ្នាំសម្រាប់ធ្វើតេស្ដរកវីរុស កូវីដ-១៩ ចំនួន២.០០០ឈុត, អាវពេទ្យសម្រាប់ការពារ ចំនួន៥.០០០កំផ្លេ, ម៉ាសពេទ្យ N95 ចំនួន៥.០០០ម៉ាស និងម៉ាសពេទ្យធម្មតា ចំនួន ២០ម៉ឺនម៉ាស៕
ប៉ារីស ៖ វិបត្តិនៃការរាលដាល នៃ COVID-19 នៅក្នុងប្រទេសបារាំង ចាប់ពីថ្ងៃទី១៥ ខែមីនា តទៅ ហាងលក់ទំនិញ ភោជនីយដ្ឋាន និងកន្លែងកម្សាន្តនានា នឹងបិទជាបណ្តោះអាសន្ន។ លើសពីនេះ នាយករដ្ឋមន្ត្រីបារាំង លោក Edouard Philippe ក៏បានប្រាប់ឲ្យប្រជាជនរបស់ខ្លួនប្រមាណ ៦៧លាននាក់ ឲ្យបន្តស្នាក់នៅផ្ទះផងដែរ ដើម្បីការពារសុវត្ថិភាពពីការរាលដាលនៃ COVID-19 ដ៏កាចសាហាវនេះ។
តាមរយៈសន្និសីទកាសែតមួយ នាយករដ្ឋមន្ត្រីបារាំង លោក Edouard Philippe បានអះអាងថា រដ្ឋាភិបាលគ្មានវិធានការអ្វីផ្សេង ក្រៅពីបិទទីកន្លែងសាធារណៈ កន្លែងកម្សាន្ត នោះទេ បន្ទាប់ពី COVID-19 នៅបារាំងបានកើនដល់ជិត ៤.៥០០ករណី និងអ្នកស្លាប់មាន ៩១ករណី។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី១៥ ខែមីនា៕
ភ្នំពេញ ៖ ក្រសួងអប់រំ យុវជន និងកីឡា ជ្រើសរើសនិស្សិតកម្ពុជាទៅសិក្សាបច្ចេកវិទ្យាសម្រាប់ថ្នាក់បណ្ឌិតនៅវិទ្យាស្ថានបច្ចេកវិទ្យាឥណ្ឌា (IITs) រយៈពេល៥ឆ្នាំ។
សេចក្តីប្រកាសបានបញ្ជាក់ថា ការផ្ដល់ជូននេះ អាហារូបករណ៍នេះ ធ្វើឡើងនៅជាច្រើនប្រទេស រួមទាំងកម្ពុជាផងដែរ ដើម្បីឲ្យនិស្សិតទាំងអស់អាចពង្រឹងសមត្ថភាពផ្នែកបច្ចេកវិទ្យា មានមូលដ្ឋានគ្រឹះត្រឹមដែលអាចបង្កើនទំនាក់ទំនងរវាង កម្ពុជា ឥណ្ឌា រួមទាំងបណ្ដាប្រទេសដែលជាសមាជិកអាស៊ានផងដែរ។
និស្សិតដែលមានចាប់អារម្មណ៍ អាចដាក់ពាក្យតាមរយៈ http://asean.iitd.ac.in ឲ្យបានមុនថ្ងៃទី៣១ ខែមីនា ឆ្នាំ២០២០៕
ភ្នំពេញ ៖ ក្រសួងសុខាភិបាលកម្ពុជាជូនដំណឹងនៅថ្ងៃនេះថា «នាពេលថ្មីៗនេះ ព្រះរាជាណាចក្រកម្ពុជា បានរកឃើញជាបន្តបន្ទាប់នូវវីរុសកូវីដ១៩ លើជនបរទេស មានសញ្ជាតិផ្សេងៗ ដែលតម្រូវឲ្យមានវិធានការការពារទប់ស្កាត់បន្ទាន់នូវ ការចម្លងនាំចូលវីរុសកូវីដ១៩ មកក្នុងប្រទេសកម្ពុជា។ ដូចនេះ ក្រសួងសុខាភិបាល សូមចាត់វិធានការដាក់បម្រាមផ្អាកមិនឲ្យជនបរទេស ដែលមកពីប្រទេសអ៉ីរ៉ង់ចូលមកប្រទេសកម្ពុជា ក្នុងរយៈពេល៣០ថ្ងៃ ដោយត្រូវអនុវត្តចាប់ពីថ្ងៃទី១៨ ខែមីនា ឆ្នាំ២០២០នេះតទៅ បន្ថែមលើប្រទេសអ៉ីតាលី អាល្លឺម៉ង់ អេស្ប៉ាញ បារាំង និងអាមេរិក ដែលចេញប្រកាសថ្ងៃទី១៤ ខែមីនា ឆ្នាំ២០២០រួចមហើយ»។
សូមបញ្ជាក់ថា គិតត្រឹមម៉ោង ៨ព្រឹកថ្ងៃទី១៥ ខែមីនា ឆ្នាំ២០២០ នេះ កម្ពុជាបានរកឃើញកូវីដ១៩ ចំនួន៧ករណីហើយ៕
ក្រសួងសុខាភិបាល បញ្ជាក់ថា ពេលនេះ ក្រុមមន្ត្រីជំនាញសុខភាពកម្ពុជា កំពុងស្វែងរកបងប្អូនខ្មែរឥស្លាម ដែលបានទៅចូលរួមក្នុងពិធីសាសនានៅក្នុងប្រទេសម៉ាឡេស៊ី កាលពីចុងខែកុម្ភៈ ដើម្បីពិនិត្យស្វែងរកមេរោគ កូវីដ.១៩។
លោក លី សុវណ្ណ អ្នកនាំពាក្យក្រសួងសុខាភិបាល ថ្លែងថា យើងមិនទាន់ទទួលព័ត៌មានពីបញ្ហាសុខភាពខ្មែរឥស្លាមទាំងនោះនៅឡើយទេ ហើយយើងកំពុងតាមរកគាត់បន្តទៀត»។
បើតាមការចុះផ្សាយរបស់សារព័ត៌មានបរទេស បង្ហាញថា ក្នុងពិធីបុណ្យសាសនាឈ្មោះ Masjid Sri Petaling នៅម៉ាឡេស៊ី កាលពីខែកុម្ភៈ មានអ្នកចូលរួម ១.៥២០នាក់ មកពី ២៧ប្រទេសផ្សេងគ្នា ក្នុងនោះមានកម្ពុជាចំនួន ៧៩នាក់៕
ភ្នំពេញ ៖ លទ្ធផលជាស្ថានប៉ាស្ទ័រកម្ពុជា នៅម៉ោង ២រសៀលថ្ងៃទី១៥ ខែមីនា ឆ្នាំ២០២០ នេះបង្ហាញថា បុរសជនជាតិបារាំងអាយុ៣៥ឆ្នាំ មានវិជ្ជមានផ្ទុកវីរុស កូវីដ-១៩ ហើយប្រពន្ធ និងកូនរបស់គាត់ តម្រូវឲ្យរង់ចាំលទ្ធផលបន្តទៀត។ បច្ចុប្បន្នបុរសជនជាតិបារាំងអាយុ ៣៥ រូបនោះត្រូវបានដាក់ឲ្យសម្រាកនៅមន្ទីពេទ្យមិត្តភាពខ្មែរ-សូវៀតរួចហើយ។
ក្រសួងសុខាភិបាលកម្ពុជា នៅថ្ងៃទី១៥ ខែមីនា ឆ្នាំ២០២០ នេះ បានប្រកាសអំពីការរកឃើញករណីកូវីដ- ១៩ ចំនួន១ករណីថែមទៀត នៅលើជនជាតិបារាំងម្នាក់ អាយុ៣៥ឆ្នាំ ដែលចេញដំណើរមកពីក្រុងប៉ារីស ចូលមកកម្ពុជា កាលពីថ្ងៃទី១៤ ខែមីនា ឆ្នាំ២០២០ ដោយឆ្លងកាត់ប្រទេសសិង្ហបុរី៕
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃទី១៤ ខែមីនា ឆ្នាំ២០២០ នេះ បានអញ្ជើញចូលជួបសំណេះសំណាល និងផ្តល់អនុសាសន៍ការងារ ជូនដល់មន្ត្រីរាជការ ក្នុងខេត្តប្រមាណជា ២.៣០០នាក់។ ពីធីនេះ បានធ្វើឡើងក្នុងឱកាសដែលសម្តេចអញ្ជើញ ជាអធិបតីបើកពិធីបុណ្យទន្លេលើកទី៦ នៅលើទឹកដីខេត្ត បាត់ដំបង ដែលនឹងប្រាព្ធ ឡើង នៅថ្ងៃទី១៥ ខែមីនា ស្អៃកនេះ។
អភិបាលខេត្តបាត់ដំបង លោក ងួន រតនៈ បានប្រាប់ថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រធានក្រុមការងារថ្នាក់ជាតិ ចុះជួយខេត្ត បាត់ដំបង សមាជិក សមាជិកាក្រុមការ ងារ ព្រមទាំងមន្ត្រីជាន់ខ្ពស់មន្ត្រីរាជរដ្ឋាភិបាល មួយចំនួនទៀត ក៏អញ្ជើញចូលរួមក្នុងកិច្ចសំណេះ សំណាល នេះដែរ។
ក្រៅពីនោះ មន្ត្រីរាជការក្នុងខេត្ត សមាជិកក្រុមប្រឹក្សាខេត្ត សមាជិកក្រុមប្រឹក្សាក្រុង-ស្រុក ទាំង១៤ សមាជិកក្រុមប្រឹក្សាឃុំ-សង្កាត់ទាំង ១០២ ព្រមទាំងនាយកសាលាបឋមសិក្សា នៅទូទាំងខេត្ត ក៏ត្រូវ បាន អញ្ជើញចូលរួមក្នុងកិច្ចសំណេះសំណាលដ៏កម្រនេះផងដែរ៕
