ខេត្តបន្ទាយមានជ័យ ៖ ចៅក្រមស៊ើបសួរ នៃសាលាដំបូងខេត្តបន្ទាយមានជ័យ កាលពីរសៀល ថ្ងៃទី១៩ ខែមករា ឆ្នាំ២០២០ម្សិលមិញ បានសម្រេចឃុំខ្លួនមន្រ្តីកងរាជអាវុធហត្ថ២នាក់ ដាក់ពន្ធនាគារខេត្តបន្ទាយមានជ័យជាបណ្តោះអាសន្ន ករណីប្រើហិង្សាបណ្តាលឱ្យស្លាប់ដល់ជនសង្ស័យម្នាក់។ នេះបើតាម សេចក្តីប្រកាសព័ត៌មានរបស់សាលាដំបូងខេត្តបន្ទាយមានជ័យ។

មន្រ្តីអាវុធហត្ថ២រូបនេះ មានទី១ ៖ វរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ និងទី២ ៖ អនុសេនីយ៍ទោ ឆយ រដ្ឋនា ជំនួយការការិយាល័យប្រឆាំងគ្រឿងញឿន កងរាជអាវុធហត្ថខេត្តបន្ទាយមានជ័យ ដែលត្រូវបានគណៈកម្មការចំពោះកិច្ចរបស់ កងរាជអាវុធហត្ថលើផ្ទៃប្រទេស សម្រេចឃាត់ខ្លួន បញ្ជូនទៅតុលាការ។

សេចក្តីប្រកាសព័ត៌មានរបស់ សាលាដំបូងខេត្តបន្ទាយមានជ័យ បានឱ្យដឹងថា មន្រ្តីអាវុធហត្ថទាំងពីររូបនេះ ត្រូវបានតុលាការចោទប្រកាន់ពីបទ «ហិង្សាដោយចេតនាមានស្ថានភាពទម្ងន់ទោស និងបទ ហិង្សាដោយចេតនាស្ថានទម្ងន់ទោសដោយសារមរណភាព នៃជនរងគ្រោះ» តាមបញ្ញត្តិនៃមាត្រា២១៨ និងមាត្រា២២៤ នៃក្រមព្រហ្មទណ្ឌកម្ពុជា។

ករណីប្រើប្រាស់ហិង្សាលើជនសង្ស័យរបស់មន្រ្តីអាវុធហត្ថខេត្តបន្ទាយមានជ័យ បានកើតឡើងបន្ទាប់ពីកម្លាំងអាវុធហត្ថ បានឃាត់ខ្លួនប្រជាពលរដ្ឋ៥នាក់ កាលពីថ្ងៃទី២៨ ខែធ្នូ ឆ្នាំ២០១៩ ពាក់ព័ន្ធនឹងករណីរំលោភកាន់កាប់ដីរបស់ឯកជន និងដីរបស់រដ្ឋ។ ប្រជាពលរដ្ឋ៥នាក់នោះ រួមមាន ទី១៖ ឈ្មោះ នូវ នឿន ទី២៖ ឈ្មោះ ហ៊ឹម គិរី ទី៣៖ ឈ្មោះ យិប ម៉ក់ ទី៤៖ ឈ្មោះ អាន រួន និងទី៥៖ ឈ្មោះ ទុយ ស្រស់។ លោកទុយ ស្រស់ ដែលរងការធ្វើទារុណកម្មពីសំណាក់មន្រ្តីកងរាជអាវុធហត្ថខេត្តបន្ទាយមានជ័យ បានស្លាប់បាត់បង់ជីវិតនៅថ្ងៃទី០១ ខែមករា ឆ្នាំ២០២០។

បើតាមការស៊ើបអង្កេតនេះ កងរាជអាវុធហត្ថលើផ្ទៃប្រទេស បានរកឃើញដូចតទៅ ៖

១៖ នាយទាហាននៃកងរាជអាវុធហត្ថចំនួន២នាក់ បានប្រើអំពើហិង្សាដោយវាយជនសង្ស័យពិតប្រាកដមែន។ -វរសេនីយ៍ឯក ស ប៊ុនសឿង អត្តលេខៈ ១៩៧៣៩២ មុខងារៈ មេបញ្ជាការរងកងរាជអាវុធហត្ថខេត្តបន្ទាយមានជ័យ និង-អនុសេនីយ៍ទោ ឆយ រដ្ឋនា អត្តលេខៈ ១៩៧៣៩៩ មុខងារៈ ជំនួយការការិយាល័យប្រឆាំងគ្រឿងញឿន កងរាជអាវុធហត្ថខេត្តបន្ទាយមានជ័យ។

២៖ ការធ្វេសប្រហែសក្នុងការអនុវត្តតួនាទី ភារកិច្ចដោយឃាត់ខ្លួនជនសង្ស័យនៅជាមួយក្រុមក្មេងដែលកំពុងអប់រំបន្សាបគ្រឿងញៀន និងបណ្តោយឱ្យក្មេងទាំងនោះវាយធ្វើបាបជនសង្ស័យ។ ក្រោយពីការបញ្ជូនខ្លួនទៅកាន់ពន្ធនាគារតាមដីកាឃុំខ្លួនបណ្តោះអាសន្នរបស់ចៅក្រមស៊ើបសួរនៃសាលាដំបូងខេត្តបន្ទាយមានជ័យ ជនត្រូវចោទឈ្មោះ ទុយ ស្រស់ បានស្លាប់។

៣៖ ជាវិធានការ នៅថ្ងៃទី១៨ ខែមករា ឆ្នាំ២០២០ មន្ត្រីនគរបាលយុត្តិធម៌នៃគណៈកម្មការចំពោះកិច្ច កងរាជអាវុធហត្ថលើផ្ទៃប្រទេស បានកសាងសំណុំរឿង នាយទាហាននៃកងរាជអាវុធហត្ថខេត្តបន្ទាយមានជ័យ ចំនួន២នាក់ បញ្ជូនទៅសាលាដំបូងខេត្តបន្ទាយមានជ័យ ដើម្បីធ្វើការចោទប្រកាន់តាមច្បាប់៕

ខេត្តមណ្ឌលគិរី ៖ «កូនដំរីព្រៃមួយក្បាលត្រូវបានប្រទះឃើញស្លាប់នៅក្នុងអូរលាវព្រំប្រទល់ រវាងខេត្តរតនគិរី និងខេត្តមណ្ឌលគិរីកាលពីថ្ងៃទី១៥ ខែមករា ឆ្នាំ២០២០ ដោយ មានសភាពស្អុយរលួយ»។ នេះបើតាមការបញ្ជាក់ថា ឯកឧត្តម នេត្រ ភក្ត្រា រដ្ឋលេខាធិការនិងជាមន្ត្រី នាំពាក្យក្រសួងបរិស្ថាន នៅថ្ងៃទី១៧ ខែមករា ឆ្នាំ២០២០។

លោក នេត្រ ភក្រ្តា បានបញ្ជាក់ថា រហូតមកទល់នឹងពេលនេះមិនទាន់ដឹងអំពីមូលដ្ឋានពិត ប្រាកដនៃការស្លាប់របស់កូនដំរីព្រៃនេះនៅឡើយទេ ប៉ុន្តែតាមការ សន្និដ្ឋានជំហានដំបូងកូនដំរីព្រៃនេះ អាចស្លាប់ដោយការលង់ទឹក។ ឯកឧត្តមរដ្ឋលេខាធិការក្រសួងបរិ ស្ថានបានឱ្យដឹងថា ៖ «តាមការពិនិត្យ សាកសពសត្វដំរីនេះ មិនមានស្លាកស្នាមរបួសអ្វីគួរឱ្យកត់សម្គាល់ ដែលអាចសន្និដ្ឋានថា អាចស្លាប់ដោយមូលហេតុអ្វីផ្សេងឡើយ អ្វីដែលកត់សម្គាល់គឺជើងក្រោយរបស់ កូនដំរីនេះបាក់ ដែលសង្ស័យថា អាចត្រូវបានគៀបនឹងល្បាក់ថ្ម ព្រោះអូរលាវមានអន្លង់ជ្រៅៗ និងមានល្បាក់ថ្មច្រើន»។មន្រ្តីឧទ្យានុរក្សនៃឧទ្យានជាតិអូរយ៉ាដាវ ចំនួន៣នាក់បានចុះទៅពិនិត្យផ្ទាល់នៅលើទីតាំង និងបានរកឃើញថា មានកូនដំរីព្រៃ១ក្បាលបានងាប់ក្នុងទឹក។

តាមការសាកសួរពីអ្នកភូមិ បានឱ្យដឹងថា ប្រហែលជាង ១០ ថ្ងៃមុន ប្រជាពលរដ្ឋបានឃើញហ្វូងដំរីប្រមាណពី ២០ ទៅ ៣០ ក្បាល បានហែលឆ្លងអូរលាវចូលមករកចំណី នៅក្នុងឧទ្យានជាតិអូរយ៉ាដាវ ដោយធ្វើការកាច់បំបាក់ ដើមឬស្សីនិងមែកឈើ ហើយបានបន្សល់លាមកជាច្រើន ហើយបន្ទាប់មកក៏បានឆ្លងទៅទឹកដីខេត្ត មណ្ឌលគិរីវិញ។ ក្រោយមកក៏បានប្រទះឃើញកូនដំរីស្លាប់ក្នុងទឹក។ ឯកឧត្តម នេត្រ ភក្ត្រា បានថ្លែងថា ពិតជាគួរឱ្យសោកស្តាយចំពោះការបាត់បង់កូនដំរីព្រៃមួយនេះ។

ឯកឧត្តមបានបន្ថែមថាដោយស្ថានភាពពិបាកក្នុងការដឹកជញ្ជូ ក្រុមការងារពិបាក នឹងយកសពកូនដំរីមករក្សាទុក។ ក្រុមការងារបានសម្រេចអូសសាកសពកូនដំរី មកកប់នៅដីក្បែរមាត់ អូរសិនដើម្បីទុកឱ្យរលួយសាច់ ទើបអាច ប្រមូលឆ្អឹងមកធ្វើជារូបសំណាកជាក្រោយ។

គួរបញ្ជាក់ថា បច្ចុប្បន្ននេះ ប្រទេសកម្ពុជាមានសត្វដំរីព្រៃចំនួនប្រមាណជាង ៥០០ ក្បាលដែលកំពុងតែរស់នៅក្នុងប្រទេសកម្ពុជា នៅក្នុងនោះតាមការសិក្សា សត្វដំរីព្រៃនៅក្នុងដែនជម្រក សត្វព្រៃកែវសីមា មានប្រមាណជាង ១១០ ក្បាល នៅតំបន់ជួរភ្នំក្រវ៉ាញមានចំនួនប្រមាណជិត២០០ក្បាល និងរស់នៅក្នុងតំបន់ការពារធម្មជាតិនានារបស់ប្រទេសកម្ពុជា។ ចំណែកសត្វដំរីស្រុកដែលចិញ្ចឹមដោយអ្នកស្រុកមានចំនួនប្រមាណ៧០ក្បាល។ ប៉ុន្មានទសវត្សចុងក្រោយនេះ ចំនួនសត្វដំរី នៅអាស៊ីអាគ្នេយ៏បានថយចុះច្រើន ដោយសារតែការបរបាញ់ខុសច្បាប់ ការបំផ្លាញជម្រកសត្វដំរី និងជម្លោះរវាងដំរី និងមនុស្សខណៈស្រែចម្ការរបស់បងប្អូនប្រជាពលរដ្ឋមួយចំនួនដាំនៅជាប់នឹងព្រៃហើយពេល ខ្លះដំរីមកស៊ីដំណាំ៕

ខេត្តកំពង់ចាម ៖ ស្រីរងគ្រោះម្នាក់ត្រូវម្តាយមីងបង្កើតរបស់ខ្លួនប្រទះឃើញដេកស្លាប់ដោយមានឈាមពេញរាងកាយ កប់ក្នុងស្លឹកស្វាយចន្ទីរក្នុង ខណះ មីងនិងក្មួយជិះម៉ូតូទៅប្រមូលស្លឹកស្វាយចន្ទីរ។

ប្រភពពត៌មានពីសមត្ថកិច្ចបានអោយដឹងថា នៅថ្ងៃទី១៦ ខែមករា ឆ្នាំ ២០២០វេលាម៉ោង១៦ និង៣០នាទី គរបាលបានទទួលព័ត៌មានពីឈ្មោះ ឃួន ឃឿន ភេទស្រី អាយុ៤៩ឆ្នាំ ជាតិខ្មែរ មានទីលំនៅភូមិដូនទ ឃុំទួលព្រះឃ្លាំង ស្រុកស្ទឹងត្រង់ ខេត្តកំពង់ចាម ជាអ្នកប្រមូលស្លឹកស្វាយចន្ទីនៅចំណុចភ្នំក្រហម ស្ថិតនៅភូមិតាម៉ៅ ឃុំស្រក ឃុំស្រក ស្រុកកំពង់សៀម ខេត្តកំពង់ចាម បានរាយការណ៍ឲ្យដឹងថាក្មួយស្រីរបស់គាត់ត្រូវគេប្លន់សំលាប់យកម៉ូតូនៅកន្លែងកើតហេតុ។

ម្តាយមីងស្រីរងគ្រោះបានបញ្ជាក់ថា កាលពីថ្ងៃទី១៦ ខែមករា ឆ្នាំ ២០២០ វេលាម៉ោង៦ និង៣០នាទី ខ្លួននិងក្មួយស្រីរបស់ខ្លួនឈ្មោះ គាន យ៉េន អាយុ ២៧ឆ្នាំបានជិះម៉ូតូ១គ្រឿងម៉ាកហុងដាC១២៥សេរី ២០១០ ពណ៌ខ្មៅមិនចាំស្លាកលេខ ចេញពីភូមិដូនទ ឃុំសូភាស ស្រុកស្ទឹងត្រង់ខេត្តកំពង់ចាម មកចំការស្វាយចន្ទីនៅចំណុចភ្នំក្រហម ស្ថិតនៅភូមិតាម៉ៅ ឃុំស្រក ស្រុកកំពង់សៀម ខេត្តកំពង់ចាម(កន្លែងកើតហេតុ)ហើយក៏ប្រមូលស្លឹកស្វាយចន្ទីរនៅចំការរៀងៗខ្លួនគឺក្មួយស្រីនៅប្រមូលស្លឹកស្វាយចន្ទីនៅចំការរបស់នាង។ ចំណែកខ្លួនគាត់ជាម្តាយមីងបានទៅចំការស្វាយចន្ទីរបស់ខ្លួនដែលជាប់និងព្រំប្រទល់និងចំការស្វាយចន្ទីរក្មួយស្រីចំងាយប្រមាណ៣០០ម ។ រហូតដល់វេលាម៉ោង១១ថ្ងៃដដែលអ្នកស្រីក៏បានដើរមកចំការស្វាយចន្ទីរបស់ក្មួយស្រីខ្លួនដើម្បីហៅក្មួយស្រីទៅផ្ទះ តែមិនឃើញក្មួយស្រី ខ្លួនក៏ស្រែកហៅ តែមិនឮក្មួយឆ្លើយសោះ គាត់ក៏ដើរត្រឡប់មកចំការរបស់ខ្លួនប្រមូលស្លឹកស្វាយចន្ទីរបន្តទៀត។ លុះរហូតដល់ម៉ោង១៤រសៀល ខ្លួនគាត់ក៏ដើរមកចំការរបស់ក្មួយស្រីម្តងទៀត ក៏មិនឃើញក្មួយស្រី ខ្លួនក៏ដើរកក្មួយនៅក្នុងចំការស្វាយចន្ទីរបស់ក្មួយស្រី ក៏ឃើញឈាមដក់លើដី ខ្លួនក៏ឃើញក្មួយស្រីកំពុងដេកស្លាប់ក្នុងចំការស្វាយចន្ទីរបស់ក្មួយស្រី ដោយត្រូវបានគេ យកស្លឹកស្វាយចន្ទីគ្របពីលើ ។

ប៉ូលិសបានអោយដឹងថាបន្ទាប់ពីទទួលបានព័ត៌មានភ្លាមកម្លាំងសមត្ថកិច្ចបានចាត់វិធានការជាបន្ទាន់ចុះដល់កន្លែងកើតហេតុ ធ្វើការស៊ើបអង្កេតស្រាវជ្រាវ រកអត្តសញ្ញាណជនសង្សយ័និងកសាងសំណុំរឿងតាមនីតវិធី៕

ភ្នំពេញ ៖ ថ្ងៃទី១៤ ខែមករា គឺជាទិវាជំនួបប្រចាំឆ្នាំលើកទី៤ រវាងសម្តេចតេជោ ហ៊ុន សែន ជាមួយក្រុមអ្នកសារព័ត៌មានក្នុងស្រុកចម្រុះនិន្នាការ។ អាចនិយាយបានថា នេះជាលើកទី១ហើយ ដែលនៅក្រោយជំនួបនេះ មានអ្នកសារព័ត៌មានខ្លះបាន បញ្ជាក់ពីបំណងថា គេនឹងមិនទៅចូលរួមទៀតឡើយ បើគ្រាន់តែទៅអង្គុយស្តាប់ប្រសាសន៍របស់សម្តេចតេជោ និងទទួលទានអាហារឆ្ងាញ់មួយពេល ដោយមិនបានសំដែងពីទុក្ខលំបាកក្នុងការបំពេញការងាររបស់អ្នកកាសែតនោះ។

ក្នុងជំនួបដ៏វិសេសវិសាលនេះ ក្រៅពីបានមានប្រសាសន៍វាយតម្លៃខ្ពស់លើការ រីកចំរើនលើវិស័យព័ត៌មានក្នងសម័យបច្ចេកវិទ្យាទំនើបនេះសម្តេចតេជោ ក៏បានស្តីបន្ទោសទៅលើការផ្សាយមួយចំនួនដែលមិនគោរពសិទ្ធិ និងជាព័ត៌មានក្លែងក្លាយ។ ជាមួយនោះដែរ លោក សាន្ត ប៊ុនធឿន ចាងហ្វាងសារព័ត៌មាន សម្លេងស្នេហាជាតិ បានក្លាយជាផ្ទាំងស៊ីបដែលសម្តេចបានបន្ទោសចំៗម្តងហើយម្តងទៀត ពីករណី Live Videos ផ្សាយព័ត៌មានក្នុងពេលខ្លួនកំពុងស្រវឹង ដែលធ្វើអោយ ប៉ះពាល់ដល់សេចក្តីថ្លៃថ្នូរ និងកិត្តិយសរបស់អ្នកដទៃ ក៏ដូចជាប៉ះពាល់ដល់ក្រមសីលធម៌ វិជ្ជាជីវ:អ្នកសារព័ត៌មានផងដែរ។ពិសេស គឺការជេរប្រមាថលើអ្នកចូលទស្សនា Live ខណៈដែលសម្តេចក៏កំពុងទស្សនា Live នោះដែរ។

សូមបញ្ជាក់ថា តាមរយៈហ្វេសប៊ុករបស់ខ្លួន អ្នកកាសែតស្ត្រីពីររូប បានបង្ហាញពីការអាក់អន់ស្រពន់ចិត្តចំពោះការរៀបចំកម្មវិធីជំនួបជាមួយសម្តេចតេជោ ហ៊ុន សែន ដែលមិនបានផ្តល់ឱកាសអោយពួកគេបញ្ចេញមតិរៀបរាប់ពីផល លំបាករបស់អ្នកកាសែតពេលចុះយកព័ត៌មានពិតមកផ្សព្វផ្សាយ ហើយត្រូវរងការគំរាមកំហែងពីអ្នកមានអំណាច ឬអាជ្ញាធរមានសមត្ថកិច្ច។

អ្នកកាសែតស្រីម្នាក់ឈ្មោះ Ly Na និងម្នាក់ទៀតមកពីខេត្តរតនគិរី ចាងហ្វាងគេហទំព័រ ស្លាបប៉ាការអព្យាក្រឹត្យ ក៏បានគាំទ្រតាមការលើកឡើងរបស់គណនី facebook ឈ្មោះ Ly na ដែលបាននិយាយថា ៖ « និយាយតាមត្រង់ បើជំនួបគ្រាន់តែញ៉ាំបាយមានម្ហូបហូរហៀរ ហើយស្តាប់តែប្រសាសន៍ម្ខាងរបស់សម្តេច ខ្ញុំសុំឈប់ចូលរួម។ ខ្ញុំសុំយ៉ាងទទូច បើមានការជួបជុំរវាងអ្នកកាសែត ជាមួយនិងប្រមុខរាជរដ្ឋាភិបាល ឬមន្ត្រីរដ្ឋាភិបាល សំពះសុំស្តាប់ការលំបាករបស់អ្នកការសែត ផង តើលំបាកអ្វី ?។ ទី១. ព័ត៌មានពិតមិនបំភ្លៃ នេះជាចំនុចគោលមួយដ៏ចាំបាច់ តើខ្ញុំក្នុងនាមជាអ្នកព័ត៌មានម្នាក់មានសិទ្ធិគ្រប់គ្រាន់ឬនៅចំពោះវិជ្ជាជីវៈខ្លួនឯង? អាចទេខ្ញុំផ្សាយព័ត៌មានពិត មិនមានបញ្ហាដល់ខ្លួន (មិននិយាយរឿងនយោបាយទេ) និយាយត្រឹមរឿងសង្គមបច្ចុប្បន្ន ។ពេលខ្លះ ក្រុមឈ្មួញត្រូវរ៉ូវជាមួយសមត្ថកិច្ច ប្លន់យកដីរាស្ត្រ អ្នកកាសែតទៅផ្សាយត្រូវមានការរឹតត្បឹត គំរាមកំហែង ឧទាហរណ៍ ករណីនៅខេត្តបន្ទាយមានជ័យ ជាដើម ។

អ្នកកាសែតដដែល បានលើកឡើងថា ឆ្នាំក្រោយខ្ញុំសុំមិនចូលរួមបាយសាមគ្គីជាមួយនាយករដ្ឋមន្ត្រី មិនមែនខ្ញុំប្រឆាំងនឹងការណាត់ជួបជារួមទេ តែមិនបានអោយអ្នកកាសែតបានផ្តល់ព័ត៌មានពីសុខទុក្ខ និងភាពបិទបាំងរបស់មន្ត្រីថ្នាក់ក្រោមទៅរាជរដ្ឋាភិបាល ខ្ញុំសុំមិនចូលរួម បើគ្រាន់តែញ៉ាំបាយ ផឹកស្រា ស្តាប់ប្រសាសន៍សម្តេចតែម្ខាង។ អរគុណសន្តិភាពដែលអោយខ្ញុំមានថ្ងៃនេះ តែខ្ញុំក៏ត្រូវការសន្តិភាពសម្រាប់បងប្អូនអ្នកកាសែតទូទៅដែរ៕

ភ្នំពេញ ៖ បុរស​ម្នាក់​បាន​បាញ់​គូរ​ដណ្តឹង​របស់ខ្លួន ស្លាប់​ពេល​បញ្ជូនទៅ​មន្ទីរពេទ្យ ខណដែល​ហេតុការណ៍​នេះ បានកើត​ឡើង​នៅ​យប់​ថ្ងៃទី​១៦ ខែមករា ឆ្នាំ​២០២០ ដែលមាន​ទីតាំង​ស្ថិតនៅ​បុរី​រំចេក​អូ​ឌឹ​ម តាម​បណ្ដោយ​ផ្លូវលំ BT សង្កាត់​កន្ទោក ខណ្ឌ​កំបូល រាជធានី​ភ្នំពេញ ។ ករណីនេះ​អាច​កើតឡើង​ដោយសារតែ​ភ្លើង​ប្រច័ណ្ឌ។​

​ប្រភពព័ត៌មាន​ពី​កន្លែងកើតហេតុ បាន​ប្រាប់​ឲ្យ​ដឹងថា នៅ​មុនពេល​កើតហេតុ​គេ​បានលឺ​សម្លេង​ស្រែក​ឆោឡោ ហើយ​ឃើញ​បុរស ដែលជា​គូរ​ដណ្តឹង​របស់​នារីរ​ង​គ្រោះ​បាន​បី​នារី​រងគ្រោះ​ដោយ​សភាព​ហូរឈាម​ស្រោច​ពេញ​ខ្លួន​មិនដឹងថា មានរឿង​អ្វី​នោះទេ​។​

​ភ្លាមៗ​នោះ​អ្នកជិតខាង បាន​ជួយ​ដឹក​នារី​រងគ្រោះ​យកទៅ​មន្ទីរពេទ្យ ដើម្បី​សង្គ្រោះ​។ ប៉ុន្តែ​ខណនោះ​អ្នករស់នៅ​ជិតខាង​ក៏​មិនដឹងថា ជនរងគ្រោះ​រងរបួស​ដោយសារ​អ្វី​នោះដែរ ។​

​ប្រភពព័ត៌មាន​បាន​ឲ្យ​ដឹងថា ពេទ្យ​ដឹក​ទៅដល់​មន្ទីរពេទ្យ​ទើបបាន​ដឹងថា ជនរងគ្រោះ​ត្រូវ​គ្រាប់កាំភ្លើង​ជាច្រើន​គ្រាប់ តែ​ជា​អកុសល​ដោយសារ​របួស​ធ្ងន់ធ្ងរ​ពេក នារី​រងគ្រោះ​បាន​ស្លាប់បាត់​បង់ជីវិត​ពេល​បញ្ជូន​ទៅដល់​មន្ទីរពេទ្យ​។ ភ្លាមៗ​បុរស​ដែលជា​សង្សារ ក៏បាន​រត់​គេចខ្លួនបាត់​តែម្តង៕

ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នឹងដឹកនាំគណៈប្រតិភូជាន់ខ្ពស់ក្រសួងមហាផ្ទៃ បំពេញទស្សនកិច្ចការងារ នៅទីក្រុងហូជីមិញ នៃសាធារណរដ្ឋសង្គមនិយមវៀតណាមរយៈពេល៣ថ្ងៃ ចាប់ពីថ្ងៃទី១៧ ដល់១៩ខែមករា ឆ្នាំ២០២០។ នេះបើយោងតាមសេចក្តីប្រកាសព័ត៌មានរបស់ក្រសួងមហាផ្ទៃ។

សេចក្តីប្រកាសព័ត៌មានបានឲ្យដឹងថា ដំណើរទស្សនកិច្ចនេះ ធ្វើឡើងតបតាមការអញ្ជើញរបស់ ឧត្តមសេនីយ៍ឯក តូ ឡឹម រដ្ឋមន្ត្រីក្រសួងនគរបាល នៃសាធារណរដ្ឋសង្គមនិយមវៀតណាម និងដោយបានការអនុញ្ញាតរបស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

ដំណើរទស្សនកិច្ចនេះ គឺជាការបន្តអនុវត្តយន្តការសហប្រតិបត្តិការទ្វេភាគីប្រចាំឆ្នាំ រវាងក្រសួងមហាផ្ទៃ នៃព្រះរាជាណាចក្រកម្ពុជា ជាមួយក្រសួងនគរបាល នៃសាធារណរដ្ឋសង្គមនិយមវៀតណាម។

សេចក្តីប្រកាសបញ្ជាក់ថា សម្តេចក្រឡាហោម ស ខេង នឹងអញ្ជើញធ្វើជាសហប្រធាន ដឹកនាំកិច្ចប្រជុំពិនិត្យវាយតម្លៃលទ្ធផលកិច្ចសហប្រតិបត្តិការឆ្នាំ២០១៩ និងចុះហត្ថលេខា លើផែនការសហប្រតិបត្តិការឆ្នាំ២០២០ សម្រាប់អនុវត្តបន្តក្នុងក្របខ័ណ្ឌនៃកិច្ចសហប្រតិបត្តិការទ្វេភាគី ដោយផ្តោតសំខាន់លើការលើកកម្ពស់តួនាទី និងភារកិច្ចកងកម្លាំងនគរបាល ក្នុងការថែរក្សាសន្តិសុខ សុវត្ថិភាពសង្គម និងសណ្តាប់ធ្នាប់សាធារណៈ៕

ភ្នំពេញ ៖ ជាមោទនភាពថ្មីមួយទៀតសម្រាប់កម្ពុជា ដោយទីក្រុងទេសចរណ៍របស់កម្ពុជាចំនួន ៣ រួមមាន ខណ្ឌដូនពេញ (រាជធានីភ្នំពេញ) ទីក្រុងកំពត និងទីក្រុងតាខ្មៅ បានទទួលជ័យលាភីទីក្រុងទេសចរណ៍ស្អាតអាស៊ាន នៅក្នុងពិធីចែកជ័យលាភីរង្វាន់ទេសចរណ៍អាស៊ាន ដែលបានប្រព្រឹត្តទៅនៅរសៀលថ្ងៃទី១៦ ខែមករា ឆ្នាំ២០២០នេះ នាឱកាសវេទិកាទេសចរណ៍អាស៊ាន ឆ្នាំ២០២០ នៅទីក្រុងបានដាស៊េរីបេហ្គាវ៉ាន់ ប្រទេសព្រុយណេ។

រដ្ឋមន្រ្តីទេសចរណ៍អាស៊ាន បានប្រគល់រង្វាន់ទីក្រុងទេសចរណ៍ស្អាតអាស៊ាន ដល់ទីក្រុងទេសចរណ៍ ចំនួន ២១ នៅក្នុងតំបន់ (មានតារាងទីក្រុងជ័យលាភីភ្ជាប់ជាមួយខាងក្រោម) ដែលមានលក្ខណៈសម្បត្តិគ្រប់គ្រាន់ឆ្លើយតបនឹងសូចនាកររបស់ស្តង់ដារទីក្រុងទេសចរណ៍ស្អាតអាស៊ាន។

ការប្រគល់រង្វាន់នេះធ្វើឡើងដើម្បីពង្រឹងភាពទាក់ទាញ និងបង្កើនភាពប្រកួតប្រជែងរបស់ទីក្រុងទេសចរណ៍អាស៊ាន ក៏ដូចជាពង្រឹងគុណភាពផលិតផល និងសេវាកម្មទេសចរណ៍នៅក្នុងតាមបណ្តាទីក្រុងរបស់អាស៊ាន ស្របតាមផែនការយុទ្ធសាស្រ្តទេសចរណ៍អាស៊ាន ២០១៦-២០២៥ សំដៅធ្វើឲ្យអាស៊ានក្លាយជាគោលដៅទេសចរណ៍ប្រកបដោយគុណភាព និងភាពទាក់ទាញ ផ្តល់ភាពកក់ក្តៅដល់ភ្ញៀវទេសចរ។

ការប្រកួតប្រជែងនេះក៏បានជំរុញដល់ការរៀបចំមជ្ឈដ្ឋានរស់នៅរបស់ប្រជាពលរដ្ឋតាមបណ្តាទីក្រុងនៅក្នុងតំបន់អាស៊ានឲ្យកាន់តែប្រសើរឡើង ព្រមទាំងចូលរួមយ៉ាងមានប្រសិទ្ធភាពដល់ការអភិវឌ្ឍទីក្រុងប្រកបដោយនិរន្តរភាព។

គួរបញ្ជាក់ថា ស្តង់ដារទីក្រុងទេសចរណ៍ស្អាតអាស៊ានត្រូវបានដឹកនាំរៀបចំដោយក្រសួងទេសចរណ៍កម្ពុជា និងគណៈកម្មាធិការជាតិវាយតម្លៃទីក្រុងស្អាត តាំងពីឆ្នាំ ២០១១ ដោយមានការគាំទ្រពីរដ្ឋមន្ត្រីទេសចរណ៍អាស៊ាន ហើយស្តង់ដានេះត្រូវបានអនុម័ត និងដាក់ឲ្យអនុវត្តជាផ្លូវការ កាលពីវេទិកាទេសចរណ៍អាស៊ាន ឆ្នាំ២០១៥។

គណៈកម្មាធិការជាតិវាយតម្លៃទីក្រុងស្អាត បាននឹងកំពុងជំរុញចលនាប្រឡងប្រណាំងទីក្រុងស្អាត ទាំងនៅកម្រិតថ្នាក់ជាតិ និងកម្រិតតំបន់អាស៊ាន សំដៅចូលរួមដល់ការជំរុញការកសាងទីក្រុងឆ្លាតវៃ (Smart City) នៅក្នុងតំបន់អាស៊ាន។ នេះឆ្លុះបញ្ចាំងពីតួនាទី និងការចូលរួមរបស់កម្ពុជាក្នុងតំបន់ ក្រោមការដឹកនាំដ៏ឈ្លាសវៃរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា៕

ខេត្តក្រចេះ ៖ គិតត្រឹមពាក់កណ្តាលខែមករា ឆ្នាំនេះ ពងសត្វកន្ឋាយក្បាលកង្កែប ឬហៅថា ល្មិច ចំនួន១៣សំបុក មានជាង ៤០០ពង ត្រូវបានក្រុមមន្ត្រីអភិរក្សមកពីសហគមន៍នេសាទ រដ្ឋបាលជលផលស្រាវជ្រាវរកឃើញមាននៅតាមបណ្តោយឆ្នេរខ្សាច់នៃកូនកោះតូចធំនៅតំបន់ព្រៃលិចទឹក ក្នុងឃុំចំនួន ៤ របស់ស្រុកសំបូរ ខេត្តក្រចេះ។

សត្វកន្ឋាយក្បាលកង្កែប ឬល្មិច នេះ ត្រូវបានមន្ត្រីអភិរក្សអះអាងថា ជាប្រភេទសត្វជិតផុតពូជ និងបានកត់ត្រាក្នុងបញ្ជីក្រហមរបស់អង្គការអភិរក្ស និងកំពុងទទួលរងការគំរាមកំហែងជាសកលស្ទើរតែផុតពូជ។ នេះជាការរកឃើញថ្មីមួយទៀត ពីក្រុមអ្នកស្រាវជ្រាវទៅលើសំបុក និងពងសត្វកន្ឋាយក្បាលកង្កែប នៅក្នុងខេត្តក្រចេះ។

នាយរងផ្នែករដ្ឋបាលជលផលកាំពី និងជាមន្រ្តីសហការជាមួយ និងអង្គការដៃគូរអភិរក្ស លោក អ៊ូ សុវណ្ណរ៉ា បានថ្លែងប្រាប់ឱ្យដឹង នៅថ្ងៃទី១៦ ខែមករា នេះថា ពងសត្វកន្ឋាយ ក្បាលកង្កែប ឬល្មិចចំនួន ១៣សំបុក ក្នុង១សំបុកមានពងចាប់ពី៣៥ ទៅ ៥០ពង ត្រូវបានក្រុមការងារស្រាវជ្រាវរកឃើញ មាននៅតាមឆ្នេរខ្សាច់នៃកោះតូចៗនៅតំបន់ព្រៃលិចទឹកក្នុងឃុំ ចំនួន ៤ នៅស្រុកសំបូរ ខេត្តក្រចេះ រួមមាន ឃុំខ្សាច់ម្កាក់ ឃុំកំពង់ចាម ឃុំកោះខ្ញែរ និងឃុំវឌ្ឍនៈ។

លោកបានសន្និដ្ឋានថា ពងកូនកន្ឋាយនេះ អាចចាប់ផ្តើមពងកូនតាំងពីដើមរដូវពងកូន ក្នុងចន្លោះពីខែវិច្ឆិកា ឆ្នាំ២០១៩ ដល់ខែមករា ឆ្នាំ២០២០ នេះ។

លោកបានបន្តថា ជាច្រើនឆ្នាំមុនៗពូជកន្ឋាយក្បាលកង្កែប ឬល្មិច នេះ បានរងការគំរាមកំហែង និងការបាត់បង់ដោយសារការធ្វើនេសាទតាមរយៈការរាយសន្ទូច និងការចាប់យកពងដើម្បីទទួលទាន។ តែក្រោយវត្តមាននៃការរកឃើញ ពូជកន្ឋាយទឹកសាបដ៏កម្រនេះ ត្រូវបានរួមគ្នាអភិរក្សយ៉ាងគត់មត់ រួមគ្នាអនុវត្តច្បាប់ស្តីពីជលផលរឹតបន្តឹងការធ្វើនេសាទនៅតំបន់ជីវចម្រុះ។ ការចង់ក្រងជាសហគមន៍ដើម្បីអភិរក្សលើសពីនេះទៅទៀតគឺ មានការលើកទឹកចិត្តដល់សហគមន៍ក៏ដោយមានការគាំទ្រហិរញ្ញវត្ថុពីអង្គការជាដៃគូ នៅពេល ពលរដ្ឋរស់នៅតំបន់គោលដៅពីការប្រទះឃើញសំបុក និងថែទាំសំបុករហូតញាស់បានកូន។ លេីសពីនេះក៏មានការបង្កើតជាមណ្ឌលភ្ញាស់កូន កន្ឋាយមួយកន្លែនៅស្រុកសំបូរ ខេត្តក្រចេះ។

ដោយឡែកក្រុមអ្នកស្រាវជ្រាវនិយាយថា កន្ធាយក្បាលកង្កែបឬល្មិច (ឬឈ្មោះវិទ្យាសាស្ត្រហៅថា Pelochelys cantorii) ត្រូវបានកត់ត្រាក្នុងបញ្ជីក្រហមរបស់ អង្គការអភិរក្សា ថាជាប្រភេទកំពុង ទទួលរងការគំរាមកំហែងជាសកល។ កន្ធាយប្រភេទនេះ ត្រូវបានគេគិតថា បានផុតពូជហើយ នៅតាមដងទន្លេមេគង្គក្នុងប្រទេសកម្ពុជា ក៏ប៉ុន្តែក្នុងឆ្នាំ ២០០៧ វត្តមានកន្ធាយប្រភេទនេះ ត្រូវបានរកឃើញសាជាថ្មីនៅក្នុងដែនទឹកនៃដង ទន្លេមេគង្គក្នុងខេត្តក្រចេះ ដែលជាតំបន់ព្រៃ លិចទឹក និងសម្បូរដោយជីវចម្រុះគ្រប់ប្រភេទសំរាប់ការរស់នៅ និងជាកន្លែងពងកូនរបស់សត្វកន្ឋាយក្បាលកង្កែបនេះ៕

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រី បានជួបពិភាក្សាការងារជាមួយឯកឧត្តម យ៉ាម៉ាម៉ូតុ កូហ្សូ (YAMAMOTO KOZO) សមាជិកសភាមកពីប្រទេសជប៉ុន នៅវិមានសន្តិភាព។ នៅក្នុងជំនួបតំណាងរាស្ត្រជប៉ុន បានបញ្ជាក់ពីបំណងជួយកម្ពុជា លើការអភិវឌ្ឍសេវាទូទាត់ប្រាក់ប្រព័ន្ធទូរស័ព្ទ និងប្លុកឆេន និងពង្រីកបណ្តាញផ្គត់ផ្គង់ទឹកស្អាត។

លោក យ៉ាម៉ាម៉ូតុ កូហ្សូ (YAMAMOTO KOZO) សមាជិកសភាជប៉ុនបានគោរពជម្រាបជូនសម្ដេចតេជោថា ដំណើរទស្សនកិច្ចមកកាន់កម្ពុជានៅពេលនេះ គឺមានគោលដៅពីរ ១.គឺដើម្បីសិក្សាពីសេវាទូទាត់ប្រាក់តាមប្រព័ន្ធទូរសព្ទដៃ និងការអភិវឌ្ឍនប្លុកឆេននៅកម្ពុជា។ បើសិនដាក់ឲ្យដំណើរការអភិវឌ្ឍប្លុកឆេននៅកម្ពុជារួចហើយនោះ កម្ពុជាគឺជាប្រទេសទីមួយហើយ ដែលដាក់ចេញឲ្យប្រើប្រាស់នូវប្រព័ន្ធឌីជីថលទំនើបមួយនេះ។ គោលដៅទី២ គឺឯកឧត្តមមកធ្វើការសិក្សាអំពីបញ្ហាការផ្គត់ផ្គង់ទឹកស្អាតនៅទីក្រុងភ្នំពេញ។ ឯកឧត្តមក៏បានស្នើអនុសាសន៍ដ៏ខ្ពង់ខ្ពស់ពីសម្ដេចតេជោ ហ៊ុន សែន នៅបញ្ហាទាំងពីរខាងលើ។

សម្ដេចតេជោ ហ៊ុន សែន បានលើកទឹកចិត្តឯកឧត្តម មកធ្វើការសិក្សាទៅលើការប្រើប្រាស់ការទូទាត់ប្រាក់តាមប្រព័ន្ធទូរស័ព្ទដៃ និងប្លុកឆេន ដើម្បីឱ្យការទូទាត់តាមប្រព័ន្ធឌីជីថល មានដំណើរការប្រសើរ និងសុក្រឹត្យភាពនៅកម្ពុជា។

ពាក់ព័ន្ធជាមួយនឹងបញ្ហាទឹកស្អាត សម្ដេចតេជោនាយករដ្ឋមន្ត្រីមានប្រសាសន៍ថា កម្ពុជាគឺត្រូវការពង្រីកស្ថានីយទឹកស្អាតឲ្យបានច្រើន ដោយសារតែរាជធានីភ្នំពេញកាន់តែរីកធំឡើងជាលំដាប់ពី៣០០គីឡូម៉ែត្រការ៉េរហូតទៅដល់ប្រជាជាង៦០០គីឡូម៉ែត្រការ៉េ ហើយការអភិវឌ្ឍផ្ទះសម្បែងមានការរីកលូតលាស់ និងឆាប់រហ័សផងដែរ។ រដ្ឋាករទឹកស្វយ័តក្រុងភ្នំពេញ កំពុងទទួលផ្គត់ផ្គង់ទឹកទៅកាន់ក្រុងតាខ្មៅខេត្តកណ្ដាលផងដែរ។

សម្ដេចតេជោបានបញ្ជាក់ថា ការងារពីរដែលត្រូវធ្វើ ទី១. គឺត្រូវពង្រីកនូវសមត្ថភាពការផ្គត់ផ្គង់ទឹកស្អាត ឲ្យដល់ប្រជាពលរដ្ឋប្រើប្រាស់កាន់តែទូលំទូលាយ និង ទី២. គឺធ្វើយ៉ាងណាពង្រីកបណ្ដាញចែកចាយទៅកាន់តំបន់អភិវឌ្ឍន៍ថ្មីៗថែមទៀត៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី បានបំពាក់មេដាយ ជូនលោកជំទាវ OBUCHI Chizuko ដែលភរិយា របស់អតីតីនាយករដ្ឋមន្ត្រីជប៉ុន Obuchi Keizo ដែលបានខិតខំជួយអភិវឌ្ឍកម្ពុជា ពិសេសលើកិច្ចការបោស សំអាតមីន និងយុទ្ធភ័ណ្ឌមិនទាន់ផ្ទុះ។

លោកជំទាវ OBUCHI Chizuko បានមានប្រសាសន៍ថា លោកជំទាវមានការចងចាំយ៉ាងរស់រវើក ពីដំណើរទស្សនកិច្ចរបស់លោកជំទាវ ទៅកាន់ស៊ីម៉ាក់កាលពី២០ឆ្នាំមុន ជាមួយនឹងស្វាមី។ លោកជំទាវបានកត់សម្គាល់ឃើញថាក្នុងដំណើរទស្សនកិច្ចមកកាន់កម្ពុជា លោកជំទាវបានគាត់សំគាល់ថា ព្រះរាជាណាចក្រកម្ពុជា បានទទួលនូវសុខសន្តិភាពយ៉ាងពិតប្រាកដ។ លើសពីនេះទៅទៀតប្រជាជនកម្ពុជាមានទឹកមុខស្រស់ស្រាយនិងរស់រវើក នេះជាជោគជ័យដ៏ពិតប្រាកដរបស់កម្ពុជា។ លោកជំទាវ បានគោរពជូនពរជូនសម្ដេចតេជោ សូមឱ្យមាតាក្មេករបស់សម្ដេចដែលត្រូវជាមាតាបង្កើតរបស់សម្ដេចគតិព្រឹទ្ធបណ្ឌិត ឱ្យជាសះស្បើយពីជម្ងឺនាពេលខាងមុខនេះ។

សម្ដេចតេជោ បានមានប្រសាសន៍ថា ឯកឧត្តម Obuchi បានមកធ្វើទស្សនកិច្ចនៅប្រទេសកម្ពុជាកាលពី២០ឆ្នាំមុន។ ក្នុងទស្សនកិច្ចនោះ ឯកឧត្តម Obuchi និងលោកជំទាវ គឺជាជនជាតិបរទេស ដែលបានធ្វើទស្សនកិច្ចសកម្មភាពដោះមីន នៅមជ្ឈមណ្ឌលស៊ីម៉ាក់ ហើយមានតែឯកឧត្តម Obuchi ទេ ដែលបានយកចិត្តទុកដាក់យ៉ាងខ្លាំងបញ្ហាដោះមីននៅកម្ពុជានេះទៀត។

សម្ដេចតេជោ បញ្ជាក់ថា ឯកឧត្តម Obuchi រាជរដ្ឋាភិបាល និងប្រជាជនជប៉ុន បានជួយដល់ប្រទេសកម្ពុជាឲ្យមានការបោះឆ្នោតក្នុងឆ្នាំ១៩៩៨ បន្ទាប់ពីកម្ពុជាមានជម្លោះដោយប្រដាប់អាវុធនៅឆ្នាំ១៩៩៧។ លើសពីនេះទៅទៀតសម្ដេចតេជោបានបញ្ជាក់ថា ឯកឧត្តម Obuchi ជានាយករដ្ឋមន្ត្រីជប៉ុនទី២ ក្នុងប្រវត្តិសាស្ត្រដែលធ្វើដំណើរមកកាន់ប្រទេសកម្ពុជា ពិសេសការជំរុញឲ្យមានការផ្តល់ថវិកាទ្រទ្រង់ដល់កម្ពុជា ដើម្បីអភិវឌ្ឍសេដ្ឋកិច្ចជាតិ ដែលបានប្រកាសជួយកម្ពុជា ក្នុងដំណើរទស្សនកិច្ចរបស់ឯកឧត្តមនៅពេលនោះ៕

ភ្នំពេញ ៖ ក្រសួងពាណិជ្ជកម្ម បានចេញសេចក្តីជូនដំណឹង ស្តីពីការកំណត់ថ្លៃប្រេងឥន្ធនៈ ត្រូវលក់រាយតាមស្ថានីយចាប់ពីថ្ងៃនេះ ដល់ថ្ងៃទី៣១ ខែមករា ឆ្នាំ២០២០ ដោយសាំងធម្មតាត្រូវលក់តម្លៃ ៣,៧០០រៀលក្នុងមួយលីត្រ និងម៉ាស៊ូតលក់ ក្នុងតម្លៃ ៣,៦០០រៀលក្នុង១លីត្រ៕

សម្រាប់ព័ត៌មានលម្អិត សូមអានសេចក្ដីជូនដំណឹង របស់ក្រសួងពាណិជ្ជកម្មទាំងស្រុង៖

ខេត្តកំពង់ចាម ៖ ភាពមិនប្រក្រតីមួយក្នុងប្រតិបត្តិការបង្ក្រាបទីតាំងបញ្ជល់មាន់មួយកន្លែង បានបើកធ្វើឡើង«ក្រោមការរិះគន់ពេញទំហឹង។ រិះគន់នៅត្រង់ថា អ្នកណាៗក៏ដឹងថា ក្រុមអ្នកញៀនល្បែងតែងប្រមូលផ្តុំជុំគ្នាលែងចាប់ពីពេលថ្ងៃត្រង់រហូតដល់ព្រលប់ ចំណែកសមត្ថកិច្ចរៀបចំ «សេណារីយោ» នាំកម្លាំងចុះទៅបង្ក្រាបនៅពេលព្រឹក ដូច្នេះចាប់បានតែសង្វៀន និងអ្នក បោសសម្អាតថែទាំសង្វៀនប៉ុណ្ណោះ។

សូមជម្រាបថា សមត្ថកិច្ចចំរុះនៅស្រុកព្រៃឈរ បានចុះបង្រ្កាបសង្វៀនបញ្ជល់មាន់ភ្នាល់ដាក់លុយ នៅថ្ងៃទី១៦ ខែមករា ឆ្នាំ២០២០ នៅម៉ោងប្រមាណជាង ៨ព្រឹក  ប៉ូលិសបានអោយដឹងថា កិច្ចប្រតិបត្តិការនេះ ដឹកនាំដោយលោក ឡោ ចាន់លី អភិបាលស្រុកព្រៃឈរ និងលោក គឹម បូរ៉ាឌី អភិបាលរងស្រុក និងចូលរួមសហការដោយកម្លាំងអធិការដ្ឋាននគរបាលស្រុកព្រៃឈរ និងកំលាំងកងរាជអាវុធហត្ថស្រុក ចុះបង្ក្រាប ក្រុមល្បែងស៊ីសង ជល់សត្វមាន់ភ្នាល់ ដាក់លុយ  លួចលាក់នៅចំណុចគុម្ពោតព្រៃលើដីទីទួលកប់ខ្មោច ចុងខាងត្បូងភូមិព្រៃខ្ជាយ ឃុំសំរោង ស្រុកព្រៃឈរ ដែលមានចម្ងាយប្រហែលពីរទៅបីគីឡូម៉ែត្រពីភូមិ។

ប៉ូលិសបានបញ្ជាក់ថា ដោយស្ថានភាពភូមិសាស្រ្តផ្លូវបត់បែនទីវាល និងមានព្រៃល្បះផងនោះ កម្លាំងសមត្ថកិច្ចចូលទៅជិតដល់ តែត្រូវក្រុមនោះមើលឃើញសមត្ថកិច្ច ហើយបានរត់គេចខ្លួនពីកន្លែងលេងអស់បន្សល់វត្ថុតាងរួមមាន ៖ សត្វមាន់ចំនួន២ក្បាល. ស៊ុមក្រុងមាន់ចំនួន៣. ស្បែកជើងស៊ក១គូ. ម៉ូតូ២គ្រឿង ម៉ាកវីវ៉ា និងម៉ាកសេ ១០០កូរ៉េ ព្រមទាំងរោងប្រក់តង់កៅស៊ូ១។

ប៉ូលិសបានបន្តថា តាមការអនុញ្ញាតពីលោកអភិបាលស្រុក គឺបានដុតបំផ្លាញ រោងចោល នៅកន្លែងកើតហេតុ។ ក្រៅពីនេះ ជំនាញបានយកមករក្សាទុកនៅអធិការដ្ឋានដើម្បីស្រាវជ្រាវរកក្រុមអ្នកលេងយកមកចងក្រងសំណុំរឿងតាមនីតិវិធី៕

ភ្នំពេញ ៖ សវនាការក្នុងសំណុំរឿងលោក កឹម សុខា ក្នុងបទសនិ្ទដ្ឋិភាពជាមួយបរទេស ត្រូវបានតុលាការសាលាដំបូងរាជធានីភ្នំពេញ លើកមកជំនុំជម្រះពេញមួយព្រឹកនាថ្ងៃពុធ ទី១៥ ខែមករា នេះ។ អង្គសវនាការពេញនេះ ជាសវនាការជជែកដេញដោលលើភ័ស្តុតាងនៃវីដេអូឃ្លីបមួយរបស់លោក កឹម សុខា ដែលលោកបាននិយាយកាលពីឆ្នាំ២០១៣ គឺជាដើមចមនៃការចោទសួរក្នុងបទក្បត់ជាតិ។

អង្គសវនាការបានចាក់បង្ហាញវីដេអូរបស់លោក កឹម សុខា នៅក្នុងអង្គជំនុំជំរះ។ នៅក្នុងអង្គសវនាការនៅព្រឹកម្សិលម៉ិញ លោក កឹម សុខា បានស្នើទៅអង្គជំនុំជម្រះយក វីដេអូ រយៈពេល១ម៉ោងដែលលោកបាននិយាយកាលពីឆ្នាំ២០១៣ មកចាក់បង្ហាញទាំងស្រុង ដោយលោកអះអាងថា ភស្តុតាងក្នុងការចោទប្រកាន់លោកថា «ក្បត់ជាតិ» ជាវីដេអូកាត់ត។

លោក កឹម សុខា បដិសេធថា វីដេអូ នេះ មិនអាចធ្វើជាភស្តុតាងអង្គហេតុចោទប្រកាន់រូបលោកទេ»។ លោក កឹម សុខា នៅលើហ្វេសប៊ុកផេករបស់លោកនៅថ្ងៃនេះ បានបដិសេធទាំងស្រុងនូវការចោទប្រកាន់មកលើលោក ពីបទសន្ទិដ្ឋិភាពជាមួយបរទេស។ លោកថា លោកមិនបាននាំរដ្ឋបរទេស ឬភ្នាក់ងារបរទេសណាមកប្រទូសរ៉ាយ ឬឈ្លានពាន ព្រះរាជាណាចក្រកម្ពុជាឡើយ។ លោកកឹម សុខា នៅតែទាមទារឲ្យតុលាការទម្លាក់ចោលជាស្ថាពរចំពោះបទចោទមកលើរូបលោក ដើម្បីលោកចូលប្រឡូកក្នុងឆាក នយោបាយពេញលេញ។

លោក គី តិច មេធាវីរាជរដ្ឋាភិបាល និងជាដើមបណ្ដឹងរដ្ឋប្បវេណី ក្នុងសន្និសីទសារព័ត៌មាន ក្រោយបញ្ចប់សវនាការ បានអះអាងថា លោក កឹម សុខា បានទទួលស្គាល់ថា វីដេអូលើសំឡេង រូបរបស់គាត់ពិតប្រាកដមែន»។ លោក គី តិចបញ្ជាក់ថា ក្រុមប្រឹក្សាជំនុំជម្រះបានសម្រេចចាក់ ភ័ស្ដុតាងដែលជាវីដេអូឃ្លឹបសំខាន់ដែលមានប្រសាសន៍របស់ លោក កឹម សុខា ពេលនោះលោក កឹម សុខា បានសម្រេចនៅចំពោះមុខក្រុមប្រឹក្សា នៅក្នុងសវនាការ គឺលោកទទួលស្គាល់សំឡេងរូបរបស់លោកនៅក្នុងឃ្លឹប ដែលក្រុមប្រឹក្សាជំនុំជម្រះបានចាក់ជូនអង្គសវនាការមើល គឺលោកទទួលស្គាល់។

លោក គី តិច បានឲ្យដឹងដែរថា សំណុំរឿងរបស់លោក កឹម សុខាពាក់ព័ន្ធជាមួយប្រទេសចំនួន៩ ក្នុងនោះមានសហភាពអឺរ៉ុប ឥណ្ឌូណេស៊ី យូហ្គោស្លាវី ស៊ែប៊ី អូស្ត្រាលី អាមេរិក កាណាដា តៃវ៉ាន់ និង ឥណ្ឌា។ តែលោក មិនបានបញ្ជាក់ឡើយ ថា តុលាការ នឹងហៅតំណាងប្រទេស អង្គការ និង បុគ្គលនោះ ទៅបំភ្លឺឬយ៉ាងណា។

បើតាមលោកគី តិច តុលាការព្រមទទួលយកភស្តុតាងដែលដាក់លោក កឹម សុខា ជាវីដេអូរយៈពេលជាង១ម៉ោង ប៉ុន្តែតុលាការបានបញ្ជាឲ្យក្រុមមេធាវីរបស់លោក កឹម សុខា ដាក់ឯកសារជាលាយលក្ខណ៍ពាក់ព័ន្ធនឹងវីដេអូជាងមួយម៉ោងនេះ ហើយបញ្ជូនទៅតុលាការឲ្យបានត្រឹមថ្ងៃទី២០ ខែមករា មុននឹងតុលាការសម្រេចថានឹងបញ្ចាំងនៅពេលណា។

សូមជម្រាបផងដែរថា សវនាការលើលោក កឹម សុខា នឹងបន្តនៅថ្ងៃស្អែកទៀតហើយ ក្នុងមួយសប្តាហ៍ តុលាការបើកសវនាការលើលោក កឹម សុខា ពីរថ្ងៃគឺនៅថ្ងៃពុធនិងថ្ងៃព្រហស្បតិ៍។ តាមការគ្រោងទុកតុលាការ គ្រោងប្រើពេល៣ខែក្នុងការបើកសវនាការនេះ៕