ខេត្តក្រចេះ ៖ មនុស្សប្រុសស្រី ចំនួន៨នាក់បានរងរបួសធ្ងន់និងស្រាល ក្នុងហេតុការគ្រោះថ្នាក់ចរាចរណ៍ ដោយរថយន្តធន់ធំ ចំនួន៤គ្រឿង បានបុកបន្តកន្ទុយគ្នា កាលពីម៉ោង១១យប់ថ្ងៃទី១៩ ខែមករា នៅលេីផ្លូវជាតិលេខ៧ ភូមិអូព្រះ ឃុំអូរគ្រៀង ស្រុកសំបូរ ខេត្តក្រចេះ។

ជាមួយនិងករណីគ្រោះថ្នាក់ចរាចរណ៍ រវាងរថយន្តធន់ធំ៤គ្រឿង បុកបន្តកន្ទុយគ្នានេះ បានបណ្តាលឱ្យរថយន្តខ្លះត្រូវក្រឡាប់ផ្ងារជេីង រថយន្តខ្លះត្រូវកៀរគ្នាធ្លាក់ប្រឡាយ និងរថយន្តធន់ធំមួយគ្រឿង ទៀត ត្រូវឆាបឆេះសល់តែគ្រោងឆ្អឹង។

នគរបាលចរាចរណ៍ខេត្តក្រចេះ បានឱ្យដឹងថា ក្រោយ
កើតហេតុភ្លាមៗ ស្នងការនគរបាលខេត្តក្រចេះ លោកឧត្តមសេនីយ៍ទោ លន់ សុផាត បានដឹកនាំរថយន្តពន្លត់អគ្គិភ័យ ចុះអន្តរាគមន៍បាញ់ពន្លត់ទាន់ពេលមិនបណ្តាលឱ្យឆេះរាលដាល ដល់រថយន្ត៣គ្រឿងទៀតនោះទេ។

នគរបាលជំនាញបាននិយាយថា មូលហេតុដែលបង្កគ្រោះថ្នាក់ចរាចរណ៍ គឺផ្តេីមចេញពីរថយន្តធន់ធំ ម៉ាកHINOមួយគ្រឿង មានដឹកដំឡូងមី បានបេីកបរក្នុងល្បឿនលឿង លុះមកដល់ចំនុចផ្លូវកោងខ្លាំង រថយន្តបង្កបា នរ៉េចង្កូតពេញផ្លូវ ហើយខ្ទាតទៅប៉ះរថយន្ត ចំនួន២គ្រឿង ដែលកំពុងបេីកបរច្រាសទិសគ្នា និងបានខ្ទាតទៅប៉ះរថយន្តមួយគ្រឿងទៀត ម៉ាកTOYOTA SINA ដែលកំពុងបេីកបរក្រោយ។ ករណីនេះដែរបានបណ្តាលឱ្យរថយន្តធន់ធំ១គ្រឿងត្រូវភ្លើងឆេះ ហើយមនុស្សប្រុស៨នាក់របួស ក្នុងនោះរបួសធ្ងន់ ៣នាក់។

រថយន្តបង្កទាំងបួនគ្រឿង ត្រូវបាននគរបានជំនាញនាំមករក្សាទុក រងចាំដោះស្រាយនៅពេលក្រោយ។ ហេីយករណីនេះត្រូវបាននគរបាលជំនាញចរាចរណ៍កំណត់ថា ដោយសារភូមិសាស្រ្តន៍ផ្លូវតំបន់នោះកោងខ្លាំង ហើយទំនងអ្នកបើកបររថយន្តបើកងោកផងដែរ៕

ភ្នំពរញ ៖ ស៊ីក្លូ ដែលគេប្រើក្នុងខ្សែភាពយន្តខ្មែររឿង ដើម្បីកូនត្រូវបានផលិតករភាពយន្តប្រកាសដាក់លក់ដេញថ្លៃដើម្បីយកលុយដែលបានមកពីការលក់ស៊ីក្លូនេះបរិច្ចាគជូនមន្ទីរពេទ្យគន្ធបុប្ផា សម្រាប់ទុកជួយសង្គ្រោះជីវិតកុមារកម្ពុជាជាច្រើនដែលកំពុងត្រូវការជំនួយសង្គ្រោះពីមន្ទីរពេទ្យនេះ។
លោកហ៊ុយ យ៉ាឡេង ផលិតករភាពយន្តរឿង ដើម្បីកូន ដែលបានប្រកាសដាក់លក់ស៊ីក្លូ ដែលខ្លួនបានប្រើក្នុងការថតភាពយន្តរឿងនេះ បានអោយដឹងថា ក្រោយពេលថតភាពយន្តខ្មែរ រឿងដើម្បីកូន ចប់រួចរាល់លោកចង់កែប្រែនិងយកស៊ីក្លូ ដែលខ្លួនបានប្រើក្នុងការថតភាពយន្តនោះអោយប្រយោជន៍ លោកក៏បានកែច្នៃ និងលាបពណ៌ស៊ីក្លូនោះទៅជាពណ៌មាស និងដាក់តាំងបង្ហាញ និងប្រកាសលក់ដើម្បីយកលុយជូនទៅមន្ទីរពេទ្យគន្ធបុប្ផា ។
លោកបន្តថា ស៊ីក្លូ ដែលលោកបានប្រកាសលក់នៅពេលនេះ គឺមានតម្លៃ ១លានដុល្លារអាមេរិក ហើយលុយ ១លានដុល្លារអាមេរិកនេះ មិនមែនយកមកទុកប្រើប្រាស់ផ្ទាល់ខ្លួននោះទេ តែលោកនឹងយកលុយនេះ ទៅបរិច្ចាគជូនមន្ទីរពេទ្យគន្ធបុប្ផាដើម្បីអោយមន្ទីរពេទ្យមានលទ្ធភាពក្នុងការដំណើរការមន្ទីរពេទ្យជួយកុមារកម្ពុជាបន្តទៀត ។ លោកថា រហូតមកដល់ពេលនេះលោកមិនទាន់ដែលបានកាន់លុយ១លានដុល្លារនៅឡើយ ហើយលោកក៏មិនទាន់បានជួយអ្វីដល់សង្គមជាតិធំដុំនៅឡើយ ។ ដូច្នេះលោកជឿជាក់ថា នឹងមានសប្បុរសជនទិញស៊ីក្លូនេះទុកជាអនុស្សាវរីយ៍ និងបរិច្ចាគថវិកា ដើម្បីជួយសង្គមជាពិសេសជួយកុមារដែលជាទំពាំងស្នងឬស្ស៊ី នៃប្រទេសកម្ពុជា ។
លោក យ៉ា ឡេង បានអោយដឹងបន្តទៀតថា បើតាមលោកដឹង មន្ទីរពេទ្យគន្ធបុប្ផាត្រូវការថវិកាច្រើនណាស់ ក្នុងមួយឆ្នាំៗ ដើម្បីជួយសង្គ្រោះជីវិតកុមារកម្ពុជា ដែលចូលមកសម្រាក និងព្យាបាលជំងឺនៅក្នុងមន្ទីរពេទ្យនេះ ហើយបើសិនជាមិនមានការជួយជ្រោមជ្រែងពីសប្បុរសជនទាំងក្នុងនិងក្រៅប្រទេសនោះទេ មន្ទីរពេទ្យនេះក៏នឹងមិនមានដំណើរការទៀតដែរ ។
លោកបានបញ្ជាក់ថា ស៊ីក្លូដែលលោកប្រកាសលក់នៅពេលនេះមានអាយុកាលជាង៨០ឆ្នាំមកហើយ ដែលធ្វើឡើងដោយជនជាតិបារាំងមួយរូប ហើយអ្វីលោកធ្វើពេលនេះ លោកក៏ដឹងថានឹងមានការរិះគន់ពីប្រជាពលរដ្ឋខ្មែរ តែយ៉ាងណាក៏លោកនៅតែជំនះធ្វើវា ព្រោះអ្វីដែលលោកធ្វើគឺដើម្បីពលរដ្ឋកម្ពុជា ដើម្បីកុមារកម្ពុជា ៕

ភ្នំពេញ ៖ យោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក ដែលបង្ហាញក្នុងពិធីបូកសរុបលទ្ធផលការងារនាព្រឹកថ្ងៃទី២១ ខែមករា ឆ្នាំ២០២០នេះបានបង្ហាញថា ពេញមួយឆ្នាំ២០១៩ គ្រោះថ្នាក់ចរាចរនៅទូទាំងប្រទេសបានកើតចំនួន៤,១២១លើក សម្លាប់មនុស្ស១,៩៨១នាក់ និងរងរបួស ៦,១៤១នាក់ ដែលគិតជាមធ្យមភាគក្នុងមួយថ្ងៃមានមនុស្សស្លាប់៥.៤នាក់។

របាយការណ៍ដដែលបញ្ជាក់ថា គ្រោះថ្នាក់ចរាចរណ៍នេះកើតឡើងភាគច្រើននៅក្នុងរាជធានីភ្នំពេញ ដែលបណ្តាលឱ្យមនុស្សស្លាប់ ៣៤៨នាក់ តាមពីក្រោយដោយខេត្តព្រះសីហនុ ស្លាប់ ១៤៩នាក់ និងខេត្តកណ្តាលស្លាប់ ១៤៣នាក់ ហើយមូលហេតុដែលបណ្តាលឱ្យមានគ្រោះថ្នាក់ចរាចររួមមាន ការបើកបរលើសល្បឿនកំណត់ ៣៨ភាគរយ, មិនគោរពសិទ្ធិ ២៣ភាគរយ, មិនប្រកាន់ស្តាំ ១៣ភាគរយ, វ៉ាជែង ៩ភាគរយ, ស្រវឹង៥ភាគរយ, កត្តាយានយន្ត ២ភាគរយ និងងងុយដេក ១ភាគរយ។

របាយការណ៍បានគូសបញ្ជាក់ថា អត្រាគ្រោះថ្នាក់ចរាចរណ៍នៅឆ្នាំ២០១៩ កើនឡើង៨៤៥លើក ស្មើនឹង២៦ភាគរយ បើធៀបនឹងឆ្នាំ២០១៨។ ក្នុងនោះអ្នកស្លាប់កើន២២០នាក់ ស្មើនឹង១២ភាគរយ ខណៈអ្នករងរបួសកើន១,៣៧១នាក់ ស្នើនឹងប្រមាណ ២៩ភាគរយ។

របាយការណ៍បានឱ្យដឹងទៀតថា ក្នុងចំណោមអ្នកស្លាប់ដោយសារគ្រោះថ្នាក់ចរាចរនេះ ភាគច្រើនជាអ្នកជិះម៉ូតូ ដែលមានចំនួន ១,៥៤២នាក់ នៃចំនួនអ្នកស្លាប់សរុប ១,៩៨១នាក់ ស្មើនឹង ៧៨ភាគរយ។ ក្នុងនោះមិនពាក់មួកសុវត្ថិភាពមានចំនួន ១,១៨៦នាក់ ស្មើនឹង ៧៧ភាគរយ។ បញ្ហាប្រឈមចំពោះគ្រោះថ្នាក់ចរាចរណ៍នេះ គឺជនរងគ្រោះជាអ្នកជិះម៉ូតូនៅតែមានចំនួនច្រើនរហូតដល់៧៨ភាគរយ, ជនរងគ្រោះជាកម្មករចំនួន៣៤ភាគរយ កសិករ៣៣ភាគរយ សិស្សចំនួន១០ភាគរយ, វ័យនៃជនរងគ្រោះមានក្រោមអាយុ១៧ឆ្នាំ ចំនួន១១ភាគរយ ពីអាយុ១៨ ដល់៤៥ឆ្នាំមានចំនួន៧០ភាគរយ និងអាយុ៤៦ឆ្នាំឡើង មានចំនួន១៩ភាគរយ។

ដោយឡែកបញ្ហាប្រឈមសម្រាប់គ្រោះថ្នាក់ចរាចរណ៍ទៀតនោះ គឺរចនាសម្ព័ន្ធផ្លូវថ្នល់កាន់តែចង្អៀត ដោយសារកំណើនយានយន្ត ដែលមាន ៣៦ភាគរយនៅឆ្នាំ២០១៩, តម្រូវការធ្វើចរាចរណ៍ដឹកជញ្ជូនកាន់តែកើនឡើង កន្លែងខ្លះត្រូវរងការខូចខាត ឬខ្វះស្លាកសញ្ញា, កង្វះការគ្រប់គ្រងទ្រូងផ្លូវ ចិញ្ចើមផ្លូវ និងចំណីផ្លូវ បណ្តាលឱ្យផ្លូវសម្រាប់ធ្វើចរាចរណ៍កាន់តែចង្អៀត, ស្មារតីនៃការគោរពច្បាប់របស់ប្រជាពលរដ្ឋនៅមានកម្រិត នៅតែខ្លាចនគរបាលជាងខ្លាចច្បាប់, សមត្ថភាពមន្ត្រីអនុវត្តច្បាប់នៅមានកម្រិត និងគុណភាពការងារមិនទាន់ឆ្លើយតបតាមសំណូមពរដោយខ្វះមធ្យោបាយឧបករណួសម្ភារៈប្រតិបត្តិការ៕

ភ្នំពេញ ៖ ក្រសួង​ធនធាន​ទឹក និង​ឧតុនិយម បាន​ជូនដំណឹងថា ឥទ្ធិពល​ជ្រលងសម្ពាធខ្ពស់ និង​ខ្យល់​មូសុងឦសាន​ខ្សោយ គ្របដណ្តប់​លើ​កម្ពុជា។ ស្ថានភាព​បែបនេះ ធ្វើឱ្យចាប់ពីថ្ងៃទី២១ ដល់ ២៧ ខែមករា៖

១. តំបន់​ជួរភ្នំ​ដងរែក និង​ខ្ពង់រាបឦសាន ៖

-សីតុណ្ហភាព​អប្បបរមា មានពី ១៩-២២អង្សារសេ

-សីតុណ្ហភាព​អតិបរមា មានពី ២៩-៣១អង្សារសេ

២. តំបន់​វាលទំនាប​កណ្តាល ៖

-សីតុណ្ហភាព​អប្បបរមា មានពី ១៩-២២អង្សារសេ

-សីតុណ្ហភាព​អតិបរមា មានពី ៣២-៣៤អង្សារសេ

៣. តំបន់​មាត់សមុទ្រ ៖

-សីតុណ្ហភាព​អប្បបរមា មានពី ២២-២៤អង្សារសេ

-សីតុណ្ហភាព​អតិបរមា មានពី ៣១-៣៣អង្សារសេ។

ទន្ទឹមនោះ នៅបណ្តាខេត្តមាត់សមុទ្រ​អាច​មានភ្លៀង​ក្នុងកម្រិតតិចតួច៕

ខេត្តក្រចេះ ៖ មនុស្សប្រុសស្រី ចំនួន៨នាក់បានរងរបួសធ្ងន់និងស្រាល ក្នុងហេតុការគ្រោះថ្នាក់ចរាចរណ៍ ដោយរថយន្តធន់ធំ ចំនួន៤គ្រឿង បានបុកបន្តកន្ទុយគ្នា កាលពីម៉ោង១១យប់ថ្ងៃទី១៩ ខែមករា នៅលេីផ្លូវជាតិលេខ៧ ភូមិអូព្រះ ឃុំអូរគ្រៀង ស្រុកសំបូរ ខេត្តក្រចេះ។

ជាមួយនិងករណីគ្រោះថ្នាក់ចរាចរណ៍ រវាងរថយន្តធន់ធំ៤គ្រឿង បុកបន្តកន្ទុយគ្នានេះបានបណ្តាល ឱ្យរថយន្តខ្លះត្រូវក្រឡាប់ផ្ងារជេីង រថយន្តខ្លះត្រូវកៀរគ្នាធ្លាក់ប្រឡាយ និងរថយន្តធន់ធំមួយគ្រឿង ទៀត ត្រូវឆាបឆេះសល់តែគ្រោងឆ្អឹង។

នគរបាលចរាចរណ៍ខេត្តក្រចេះ បានឱ្យដឹងថា ក្រោយកើតហេតុភ្លាមៗ ស្នងការនគរបាលខេត្តក្រចេះ លោកឧត្តមសេនីយ៍ទោ លន់ សុផាត បានដឹកនាំរថយន្តពន្លត់អគ្គិភ័យ ចុះអន្តរាគមន៍បាញ់ពន្លត់ទាន់ពេលមិនបណ្តាលឱ្យឆេះរាលដាល ដល់រថយន្ត៣គ្រឿងទៀតនោះទេ។

នគរបាលជំនាញបាននិយាយថា មូលហេតុដែលបង្កគ្រោះថ្នាក់ចរាចរណ៍ គឺផ្តេីមចេញពីរថយន្តធន់ធំ ម៉ាកHINOមួយគ្រឿង មានដឹកដំឡូងមី បានបេីកបរក្នុងល្បឿនលឿង លុះមកដល់ចំនុចផ្លូវកោងខ្លាំង រថយន្តបង្កបា នរ៉េចង្កូតពេញផ្លូវ ហើយខ្ទាតទៅប៉ះរថយន្ត ចំនួន២គ្រឿង ដែលកំពុងបេីកបរច្រាស ទិសគ្នា និងបានខ្ទាតទៅប៉ះរថយន្តមួយគ្រឿងទៀត ម៉ាកTOYOTA SINA ដែលកំពុងបេីកបរក្រោយ។ ករណីនេះដែរបានបណ្តាលឱ្យរថយន្តធន់ធំ១គ្រឿងត្រូវភ្លើងឆេះ ហើយមនុស្សប្រុស៨នាក់របួស ក្នុងនោះរបួសធ្ងន់ ៣នាក់។

រថយន្តបង្កទាំងបួនគ្រឿងត្រូវបាននគរជំនាញនាំមករក្សាទុករង់ចាំដោះស្រាយនៅពេលក្រោយ។ ហេីយករណីនេះត្រូវបាននគរបាលជំនាញចរាចរណ៍កំណត់ថា ដោយសារភូមិសាស្រ្តន៍ផ្លូវតំបន់នោះកោងខ្លាំង ហើយទំនងអ្នកបើកបររថយន្តបើកងោកផងដែរ៕

បន្ទាយមានជ័យ ៖ ប្រជាពលរដ្ឋដែលរស់នៅក្នុងក្រុងប៉ោយប៉ែតបានធ្វើការរិះគន់ចំៗមកលើមន្ត្រីអាជ្ញាធរមូលដ្ឋាននិងសមត្ថកិច្ចចម្រុះដែលចុះរៀបចំសណ្តាប់ធ្នាប់នៅផ្សារត្រីប៉ោយប៉ែតថា ធ្វើលំៗ អោយតែបាន រួចតែពីដៃ គ្មានប្រសិទ្ធិភាព រៀបរួច ដដែលឡើងវិញនិយាយរួមដូចវែកចក។ការរិះគន់បែបនេះធ្វើឡើងបន្ទាប់ពីមានក្រុមការងារចំរុះរបស់សាលាក្រុងបានចុះធ្វើការរៀបចំសណ្តាប់ធ្នាប់នៅជុំវិញបរិវេណផ្សារត្រី និងដងផ្លូវមួយចំនួនដែលបងប្អូនអាជីវករបានតាំងលក់គ្មានសណ្តាប់ធ្នាប់ ប៉ះពាល់សោភ័ណភាព និងមិនចអាចចរាចរបានដែលការចុះរៀបចំនេះធ្វើឡើងរយៈពេលពីរថ្ងៃគឺថ្ងៃទី១៨ដល់ថ្ងៃទី១៩ ខែមករា ឆ្នាំ២០២០។
សូមបញ្ជាក់ថា ភាពរញ៉េរញ៉ៃនៅក្នុងផ្សារត្រីប៉ោយប៉ែត ដែលបង្កឡើងដោយអាជីវករយកដីផ្លូវធ្វើជាកន្លែងលក់ដូរ អាជ្ញាធរបានចុះរៀចំជាបន្តបន្ទាប់ តែហាក់គ្មានប្រសិទ្ធិភាពសោះ។ សណ្តាប់ធ្នាប់កើតមានតែពេលក្រុមការចុុះរៀប តែពេលដែលក្រុមការងារដកចេញ គឺក្រុមអាជីវករលើកលក់កន្លែងដដែលវិញ។ ភាពអនាធិបតេយ្យដែលបង្កឲ្យបាត់បង់សណ្តាប់ធ្នាប់លើផ្លូវសាធារណៈនេះបង្កឡើង ពីអាជីវករលក់ បន្លែ ត្រី សាច់ ក្រណាត់ សំលៀកបំពាក់ និងសម្ភារមួយចំនួន ដែលម្ចាស់ផ្ទះជួលឲ្យលក់នៅមុខផ្ទះ ចំហៀងផ្ទះជាថ្នូរនឹងការហូតយកកំរ៉ៃប្រចាំថ្ងៃ ឬប្រចាំខែ រួមផ្សំនឹងការចតម៉ូតូ ម៉ូតូកង់បី គ្មានសណ្តាប់ ប៉ះពាល់ដល់បរិស្ថាន បាត់បង់សោភ័ណភាព។
ហើយជាមួយគ្នានេះដែរ សូម្បីតែម្ចាស់ផ្ទះ និងម្ចាស់តូបមួយចំនួន ក៏ដាក់តាំងលក់អីវ៉ាន់របស់ខ្លួនដោយបំពានលើដីផ្លូវសារធារណៈផងដែរ។
ក្រុមអាជីវករទាំងនោះបានឲ្យដឹងថា មូលហេតុដែលដាក់តាំងលក់នៅលើចិញ្ចើមផ្លូវ និងលើផ្លូវនោះ ដោយសារតែគ្មានលុយជួលតូប ហើយអាជីវករខ្លះវិញ លក់ដូរជាលក្ខណៈបន្លែរួមផ្សំដែលប្រមូលបេះបានបន្តិចបន្តួចពីផ្ទះប៉ុណ្ណោះ។
លោក គី សារុន មេភូមិបាលិលេយ្យ១ បានឲ្យដឹងថា ដោយយោងតាមការណែនាំរបស់ចៅសង្កាត់ប៉ោយប៉ែត និងលោក គាត ហ៊ុល អភិបាលក្រុងប៉ោយប៉ែត ការរៀបចំសណ្តាប់ធ្នាប់នៅចំណុចផ្សារត្រីប៉ោយប៉ែត ត្រូវធ្វើជាប្រចាំជានិច្ច ដើម្បីឲ្យមានសណ្តាប់ធ្នាប់របៀបរៀបរយឡើងវិញ នឹងមិនអនុញ្ញាតិអោយមានអាជីវករលក់ដូរណាមួយ មកដាក់អីវ៉ាន់លក់ដូរ នៅលើផ្លូវ ធ្វើឲ្យបាត់បង់សណ្តាប់ធ្នាប់ បានទៀតឡើយ។
ទោះបីជាយ៉ាងណា ភាពរញ៉េរញ៉ៃ ដែលធ្វើឲ្យបាត់បង់សណ្តាប់ធ្នាប់ បង្កឡើងដោយអាជីវករលក់ដូរ ប្រជាពលរដ្ឋដែលឆ្លងកាត់ផ្សារនោះនិយាយថានៅមិនទាន់បានល្អប្រសើរនៅឡើយទេ។ហើយ ការរៀបចំនេះ មិនមែនត្រឹមអភិបាលក្រុងថ្មីលោក គាត ហ៊ុល នេះទេគឺបានចាប់ផ្តើមតាំងពីជំនាន់អភិបាលក្រុងមុនលោក សាន ស៊ានហូ មកម្លេះ ហើយអាជីវករខ្លះក៏ធ្លាប់បានធ្វើកិច្ចសន្យាជាច្រើនដងហើយដែរ តែអាជ្ញាធរនៅតគ្មានអំណាចក្នុងការចាត់ការលើអាជីវករដែលធ្លាប់ធ្វើកិច្ចសន្យាទាំងនោះដែរ។
គេនៅចាំមើលថា លោក លោកគាត ហ៊ុល ដែលឡើងអភិបាលក្រុងថ្មីរយៈពេលជិត១ឆ្នាំមកនេះ មានអំណាចក្នុងការរៀបចំសណ្តាប់ធ្នាប់តាមទីសាធារណៈនេះបានដែរទេ ដើម្បីរៀបចំទីក្រុងជាប់ព្រំដែនមួយនេះអោយមានភាពស្រស់បំព្រង ឈានទៅដណ្តើមផ្ការដួលបីទង ក្នុងការប្រកួតប្រជែងទីក្រុងស្អាតនាពេលខាងមុខនេះ៕

ខេត្តព្រះវិហារ ៖ កាលពីព្រឹកថ្ងៃទី ២០ ខែ មករាឆ្នាំ ២០២០ វេលាម៉ោង ១០ : ១០ នាទី មានកណីអគ្គិភ័យឆាបឆេះ ឡានដឹកប្រេង១ គ្រឿង ម៉ាក ហ៊ីយ៉ាន់ ដាយព៏ណខៀវទម្ងន់ ១តោន (ខូចខាតទាំងស្រុង។

បើតាមសម្តីលោក ឧត្តមសេនីយ៍ទោ សួស សុខ ដា រា ស្នងការខេត្តព្រះវិហារ បានបញ្ជាក់អោយថាះនៅព្រឹកថ្ងៃទី២០/០១/២០២០ វេលាម៉ោង ១០ និង១០នាទី មានករណីអគ្គិភ័យឆេះរថយន្ត ០១ លេីក នៅចំណុចភូមិកំពង់ចម្លង សង្កាត់កំពង់ប្រណាក ក្រុងព្រះវិហារ ខេត្តព្រះវិហារ បណ្ដាលឲ្យខូចខាត ៖ រថយន្តដឹកប្រេង១គ្រឿង ឆេះ ម៉ាក ហុីយ៉ាន់ដាយ ពណ៍ ខៀវ ទម្ងន់ ១តោន(ខូចខាតទាំងស្រុង ) ប្រេងសាំង ចំនួន ៣០ កាន និងប្រេងម៉ាស៊ូត ៣៥កានឮ។ លោកបានបញ្ជាក់ថា មូលហេតុមកពីឆ្លងចរន្តរថយន្ត។

ជនរងគ្រោះឈ្មោះ ផៃ ជឿន ភេទប្រុស អាយុ៣៥ឆ្នាំ មុខរបរ បេីកបរ និងប្រពន្ធឈ្មោះ សួន រដ្ឋា អាយុ ២៨ឆ្នាំ មុខរបរ លក់ដូរ រស់នៅភូមិកេីតហេតុខាងលេី ។

ករណីខាងលេីនេះ កម្លាំងរបស់ស្នងការដ្ឋាននគរបាលខេត្តព្រះវិហារ ទាំងអធិការដ្ឋាននគរបាលក្រុងព្រះវិហារ និងអធិការដ្ឋាននគរបាលស្រុកត្បែងមានជ័យ សរុបចំនួន ១៥០នាក់ និងប្រេីប្រាស់រថយន្តអគ្គិភ័យចំនួន ០២គ្រឿង ប្រេីប្រាស់ទឹកអស់ ០២ ឡាន និងគ្រាប់បាល់ពន្លត់អគ្គិភ័យ ចំនួន ២០គ្រាប់ ដោយចុះជួយអន្តរាគមន៍ទាន់ពេលវេលាមិនបណ្ដាលអោយមនុស្សសត្វរងគ្រោះ និងឆេះរាលដាលដល់ផ្ទះប្រជាពលរដ្ឋឡេីយ ៕

ភ្នំពេញ ៖ ក្រោយមានករណីហិង្សាបង្កដោយសិស្សសាលាជាបន្ដបន្ទាប់ រហូតបណ្ដាលឲ្យសិស្សម្នាក់ស្លាប់ កាលពីពេលកន្លងទៅថ្មីៗនេះ នៅថ្ងៃទី២០ ខែមករា ឆ្នាំ២០២០នេះ ក្រសួងអប់រំ យុវជន និងកីឡា បានចេញសេចក្ដីណែនាំ៧ចំណុច ដើម្បីពង្រឹងការអនុវត្តបទបញ្ជាផ្ទៃក្នុង នៅតាមគ្រឹះស្ថានសិក្សាសាធារណៈ និងឯកជន។

ជាមួយគ្នានេះក្រសួងសង្កេតឃើញថា នៅមានគ្រឹះស្ថានសិក្សាមួយចំនួនតូច មិនទាន់អនុវត្តឲ្យបានពេញលេញ ជាពិសេសការគ្រប់គ្រង់អ្នកសិក្សានៅក្នុងបរិវេណគ្រឹះស្ថានសិក្សា ដោយមិនបានផ្សព្វផ្សាយ និងអនុវត្តបទបញ្ជាផ្ទៃក្នុង របស់គ្រឹះស្ថានសិក្សាឲ្យបានទូលំទូលាយ និងមានការទទួលខុសត្រូវនៅឡើយ ដែលបង្កឲ្យមានអំពើហិង្សា និងបាតុភាពអសកម្មនានាកើតឡើង៕

ខាងក្រោមជាសេចក្តីណែនាំរបស់ក្រសួងអប់រំ ៖

ភ្នំពេញ ៖ យោងតាមលទ្ធផលនៃការអង្កេតតាមដានគុណភាពខ្យល់ពីស្ថានីយត្រួតពិនិត្យគុណភាពខ្យល់នៅទូទាំងប្រទេស ស្ថានភាពគុណភាពខ្យល់នៅរាជធានីភ្នំពេញបានមានគុណភាពល្អប្រសើរឡើងវិញហើយ ដោយប៉ារ៉ាម៉ែត្រ កំហាប់ភាគល្អិតនិចល PM2.5 បានស្ថិតនៅក្រោមកម្រិតស្តង់ដារកំណត់។ ចំណែកស្ថានភាព គុណភាពខ្យល់ នៅតាមបណ្តាខេត្តនានាក៏មានគុណភាពល្អផងដែរ។

ទោះបីយ៉ាងនេះក្តីក្រសួងបានអះអាងថា មន្ត្រីជំនាញក្រសួងបរិស្ថាននៅតែ តាមដានបន្តទៀត លើស្ថានភាពគុណភាពខ្យល់នេះ។ ប្រសិនបើមានអ្វីប្រែប្រួល ក្រសួងបរិស្ថាននឹងជម្រាបជូនដំណឹងភ្លាមៗ៕

ខេត្តកំពង់ចាម ៖ អ្នកដំណើរចំនួន១៣នាក់រងរបួសធ្ងន់និងស្រាលត្រូវបញ្ជូនទៅសង្គ្រោះនៅមន្ទីរពេទ្យក្នុងឧប្បតិហេតុគ្រោះថ្នាក់ចរាចរបង្ករដោយរថយន្តសាំយ៉ុង២គ្រឿងព្រលះគ្នាក្នុងពេលបើកឆ្លងផ្លូវ។ 

ប៉ូលិសបានអោយដឹងថានៅថ្ងៃទី១៩ខែមករាឆ្នាំ២០២០វេលាម៉ោង ១៧លើផ្លូវជាតិលេខ ៦ចំណុចផ្លូវបំបែកខាងកើតភូមិផ្អាវឃុំផ្អាវស្រុកបាធាយខេត្តកំពង់ចាម មានករណីគ្រោះថ្នាក់ចរាចរណ៍កើតឡើងរវាងរថយន្តនិងរថយន្តដោយរថយន្ត១គ្រឿងម៉ាកសាំយ៉ុងពណ៌សពាក់ស្លាកលេខភ្នំពេញ 2z 1200 បើកបរដោយឈ្មោះនូ មុឺយ ភេទប្រុសអាយុ ៧១ឆ្នាំមានទីលំនៅភូមិព្រែកតាគង់សង្កាត់ព្រែកតាសេកខណ្ឌជ្រោយចង្វាររាជធានីភ្នំពេញបានបុករថយន្ត១គ្រឿងទៀតម៉ាក់សាំយ៉ុងពណ៌សពាក់ស្លាកលេខភ្នំពេញ 2J0 580 (អ្នកបើកបររត់បាត់) បានបើកឆ្លងថ្នល់ពីលិចទៅកើត។

លោកអធិការបានបន្តថា ករណីនេះបណ្ដាលឲ្យរបួសមនុស្សចំនួន១៣នាក់ធ្ងន់ ៥នាក់ ស្រាល៨នាក់ (ស្រី៩នាក់ ប្រុស ៤នាក់)គឺ ១៖ ឈ្មោះ នូ មុឺយ ភេទប្រុស អាយុ៧១ នៅភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វា ភ្នំពេញជាអ្នកបើករថយន្ត របួសធ្ងន់ ២៖ ឈ្មោះ យស់ គឹមសៀង ភេទស្រីអាយុ៦៥ឆ្នាំ នៅភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វា ភ្នំពេញ( ស្រាល)៣ ឈ្មោះ សន មករា ភេទស្រីអាយុ៣០ឆ្នាំ នៅភូមិជាមួយគ្នា ធ្ងន់៤៖ ឈ្មោះ ម៉ែន គឹមចេង ភេទស្រីអាយុ៦៥ឆ្នាំ នៅភូមិជាមួយគ្នា(ស្រាល) ៥៖ ឈ្មោះ ស្លា ថូ ភេទស្រី អាយុ៦៨ឆ្នាំ នៅភូមិជាមួយគ្នា ធ្ងន់ ៦ឈ្មោះ យក់ សាខន ភេទស្រី អាយុ៧៨ឆ្នាំ នៅភូមិជាមួយគ្នា ធ្ងន់ ៧៖ ឈ្មោះ សឿង ញិប ភេទស្រីអាយុ៦៨ឆ្នាំ នៅភូមិជាមួយគ្នាធ្ងន់, ៨ ៖ ឈ្មោះ សុិន ផៃ ភេទប្រុស អាយុ៧១ឆ្នាំ នៅភូមិជាមួយគ្នា(ស្រាល)៩ឈ្មោះសៅ ថុន ភេទប្រុសអាយុ៧០ឆ្នាំ នៅភូមិជាមួយគ្នា(ស្រាល)១០.ឈ្មោះស៊ិប វណ្ណនីភេទ ស្រីអាយុ៦៧ឆ្នាំ (ស្រាល)១១.តាំង អេងជី ភេទស្រីអាយុ១៨ឆ្នាំនៅភូមិស្រីរងិត ឃុំចំការក្រោមស្រុកស្ទោង ខេត្តកំពង់ធំ( ស្រាល) ១២.តាំង ហិបភេទ ស្រីអាយុ៣៩នៅភូមិ ជាមួយគ្នា( ស្រាល)១៣ឈ្មោះញ៉េត វុនភេទ ប្រុសអាយុ៤១ឆ្នាំ នៅភូមិជាមួយគ្នា( ស្រាល)។ ប៉ូលិលបានបញ្ជាក់ថាជនរងគ្រោះដោយគ្រោះថ្នាក់ចរាចរនេះត្រូវបានបញ្ជូនទៅសង្រ្គោះនៅមន្ទីរពេទ្យ រីឯរថយន្តទាំង២គ្រឿងត្រូវបានយក មករក្សាទុកនៅអធិការដ្ឋាននគរបាលស្រុកបាធាយដម្បីបំពេញសំណុំឯកសារតាមនីតិវិធី៕

ភ្នំពេញ ៖ រដ្ឋបាលរាជធានីភ្នំពេញ នៅថ្ងៃទី២០ ខែមករា ឆ្នាំ២០២០នេះ បានចេញសេចក្ដីជូនដំណឹងស្ដីពីការរៀបចំសន្ដិសុខ សណ្ដាប់ធ្នាប់ និងរបៀបរៀបរយសាធារណៈ ក្នុងឱកាសបុណ្យចូលឆ្នាំថ្មីប្រពៃណីចិន ដែលនឹងប្រព្រឹត្តទៅចាប់ពីថ្ងៃទី២៤ ដល់ថ្ងៃទី២៧ ខែមករា ឆ្នាំ២០២០។

ក្នុងសេចក្ដីជូនដំណឹងនេះ លោក ឃួង ស្រេង អភិបាលរាជធានីភ្នំពេញ បានដាក់ចេញនូវបម្រាមចំនួន៣ចំណុច ដែលមិនឱ្យប្រជាពលរដ្ឋជាប់សែស្រឡាយចិន ប្រព្រឹត្តនោះឡើយ ក្នុងន័យរក្សាសន្ដិសុខ សណ្ដាប់ធ្នាប់ សាធារណៈ។

បម្រាម ទាំង៣នោះ រួមមាន ៖ ទី១ ៖ មិនឱ្យមានការដុតផាវ កាំជ្រូច ឬបង្កសំឡេងផ្ទុះគ្រប់ប្រភេទ ក្នុងឱកាសពិធីបុណ្យនេះ។ ទី២ ៖ មិនឱ្យលេងល្បែងគ្រប់ប្រភេទ ដែលមានលក្ខណៈស៊ីសង និងទី៣ ៖ រាល់ការហែក្បួនផ្សេងៗ ទាំងបែបសាសនា ឬប្រពៃណីដែលគ្មានការអនុញ្ញាតត្រូវហាមឃាត់៕

ខេត្តសៀមរាប ៖ អ្នកជំនាញបុរាណវិទ្យានៃអាជ្ញាធរជាតិអប្សរាសហការជាមួយសាកលវិទ្យាល័យហាវ៉ៃសហរដ្ឋអាមេរិកធ្វើកំណាយស្រាវជ្រាវបុរាណវិទ្យានៅទួលដូនប៉ុក ដែលមានទីតាំងស្ថិតនៅខាងលិចប្រាសាទវត្តអធ្វា ស្ថិតក្នុងភូមិទ្រាក សង្កាត់/ខេត្តសៀមរាប កាលពីថ្ងៃទី៩ ខែធ្នូ ឆ្នាំ២០១៩ នឹងបញ្ចប់នៅថ្ងៃទី៣១ ខែមករា ឆ្នាំ២០២០។

លោក ទិន ទីណា អនុប្រធានមណ្ឌលអន្តរជាតិស្រាវជ្រាវនិងតម្កល់ឯកសារអង្គរនៃអាជ្ញាធរជាតិអប្សរា បញ្ជាក់ថា ការស្រាវជ្រាវធ្វើឡើងដើម្បីស្វែងរកភូមិបុរាណ ទីសក្ការបូជា និងសម្ភារប្រើប្រាស់នានា ដែលស្ថិតនៅក្រៅរាជធានីអង្គរ ពិសេសនៅជុំវិញខេត្តសៀមរាប។ គំហើញថ្មីៗនេះជាប្រយោជន៍សម្រាប់ការសិក្សាស្រាវជ្រាវ ការយល់ដឹងពីប្រវត្តិសាស្ត្រ ភូមិសាស្ត្រខ្មែរពីអតីតកាលដល់បច្ចុប្បន្ន ព្រមទាំងរួមចំណែកការពារបុរាណដ្ឋានលើតំបន់ដែលកំពុងអភិវឌ្ឍន៍។

លោក ហេង ពិភាល់ បណ្ឌិតបុរាណវិទ្យានៃសាកលវិទ្យាល័យហាវ៉ៃនិងជាប្រធានគម្រោងស្រាវជ្រាវបានឱ្យដឹងថា ក្រុមការងារបានធ្វើកំណាយស្រាវជ្រាវបុរាណវិទ្យាចំនួន៥រណ្តៅ ទំហំ១គុណ២ម៉ែត្រ នៅលើទួលដូនប៉ុកផងនិងនៅលើគោកមនុស្សរស់នៅក្បែរទួលនេះផង។ ជាលទ្ធផល រណ្តៅកំណាយនៅទួលដូនប៉ុកបានរកឃើញគ្រឹះប្រាសាទធ្វើពីថ្មបាយក្រៀមពីខាងក្រោមនិងឥដ្ឋនៅពីខាងលើដែលកប់ក្នុងដីជម្រៅជាង១ម៉ែត្រ ដែលមានសសរពេជ្រពណ៌ផ្កាឈូក២កំណាត់និងគំនរថ្មភក់នៅក្នុងខ្ទមអ្នកតា។ តាមការសន្និដ្ឋាន ប្រាសាទគោកដូនប៉ុកបានកសាងឡើងក្នុងស.វ.ទី១០ មានអាយុប្រហាក់ប្រហែលទៅនឹងប្រាសាទបន្ទាយស្រីនិងប្រាសាទព្រះឥន្ទ្រកោសីយ៍ ដែលជាទីសក្ការៈរបស់មនុស្សនាសម័យនោះ។

លោកបណ្ឌិតបុរាណវិទ្យារូបនេះបន្តថា តាមរយៈលទ្ធផលកំណាយ ប្រាសាទឥដ្ឋនេះដួលរលំនៅរវាងស.វ.ទី១២ឬ១៣ និងលែងជាកន្លែងប្រារព្ធពិធីសាសនាធំដុំទៀតហើយ ពោលគឺនៅត្រឹមតែជាគោកអ្នកតាប៉ុណ្ណោះ។ ការផ្លាស់ប្តូរនេះ ប្រហែលជួនគ្នានឹងការកសាងវត្តអធ្វានាស.វ.ទី១២ ឬទី១៣ដែរ ដោយមនុស្សបានប្តូរទៅគោរពបូជានៅវត្តអធ្វាវិញ។ ក្រៅពីនោះ ទាំងក្នុងរណ្តៅនៅទួលដូនប៉ុកនិងគោកភូមិ ក៏ឃើញមានបំណែកកុលាលភាជន៍ចិនពីស.វ.ទី១២ដល់ទី១៧ និងភាជន៍ខ្មែរផលិតនៅតំបន់នគររាជ ភ្នំគូលែន និងជើងឯកនៅស.វ.ទី១០និង១៣ មានភាជន៍ផុយ ភាជន៍រឹងមានស្រទាប់រលោង និងគ្មានស្រទាប់រលោង រួមទាំងរបស់ប្រើប្រាស់ផ្សេងៗ។

ទាំងនេះបញ្ជាក់ថា ទីតាំងដែលពួកគាត់រស់នៅសព្វថ្ងៃ (ទួលដូនប៉ុក) ជាភូមិចាស់តពីដូនតានិងមានមនុស្សរស់នៅតគ្នាជាង១០០០ឆ្នាំមកហើយ ពោលគឺតាំងពីស.វ.ទី១០ដែលមានសំណង់ប្រាសាទឥដ្ឋចំនួន១ និងមានគោកភូមិនៅជុំវិញប្រាសាទចំនួន៦។ ចំណែកបំណែកកុលាលភាជន៍បង្ហាញឱ្យដឹងថា វត្តមានមនុស្សរស់នៅទួលដូនប៉ុកមានយ៉ាងតិចដល់ស.វ.ទី១៨។

លោក វិទូ ភិរម្យ បុរាណវិទូនៃមជ្ឈមណ្ឌលអន្តរជាតិស្រាវជ្រាវនិងតម្តល់ឯកសារអង្គរនៃអាជ្ញាធរជាតិអប្សរា បានឱ្យដឹងថា តាមរយៈលទ្ធផលកំណាយនៅទួលដូនប៉ុក គឺបានបង្ហាញភស្តុតាងជាច្រើនទាក់ទងនឹងការរៀបចំភូមិកររបស់មនុស្សសម័យបុរាណនៅភាគខាងត្បូងអង្គរ ដែលប្រាសាទគឺជាមជ្ឈមណ្ឌលសំខាន់នៃសហគមន៍មួយ។ ប្រាសាទមានមនុស្សថែរក្សានិងរស់នៅជុំវិញ មានការប្រើប្រាស់សម្ភារផ្សេងៗដែលបម្រើឱ្យជីវភាពប្រចាំថ្ងៃនិងកិច្ចបូជា។ រីឯបំណែកកុលាលភាជន៍អាចឱ្យយើងស្វែងយល់ពីសេដ្ឋកិច្ចនិងការរស់នៅរបស់មនុស្សពីសម័យបុរាណ។ លើសពីនេះ យើងបានដឹងពីចលនាពាណិជ្ជកម្មនិងការប្រើប្រាស់ភាជន៍នាំចូលមកពីស្រុកចិន ដូចជាក្នុងរាជវង្សម៉េងនិងឆេង (តិចតួច) ភាជន៍បៃតងក្នុងរាជវង្សយួននិងសុង រួមទាំងប្រភេទភាជន៍រឹងផលិតក្នុងស្រុកផង។ល។

លោក ភិរម្យ បន្តថា លទ្ធផលទាំងអស់នេះនៅមិនទាន់គ្រប់ជ្រុងជ្រោយនៅឡើយ ត្បិតនៅជាលទ្ធ ផលបឋម ហើយយើងក៏មានគម្រោងស្រាវជ្រាវនាពេលអនាគតដើម្បីស្វែងយល់អំពីទំហំនៃខឿនប្រាសាទដែលយើងឃើញតើវាមានទំហំប៉ុណ្ណា បើប្រៀបធៀបនឹងប្រាសាទផ្សេងៗក្នុងសម័យដំណាលគ្នានោះ? តើនេះជាប្រព័ន្ធនៃការរៀបចំភូមិករនិងប្រាសាទនាស.វ.ទី១០ឬយ៉ាងណា?

បុរាណវិទូខាងលើក៏បានឱ្យដឹងដែរ តាមរយៈកិច្ចសហការជាមួយសាកលវិទ្យាល័យហាវ៉ៃ គឺជាឱកាសដ៏ល្អមួយសម្រាប់ផ្សព្វផ្សាយនិងការពារបុរាណដ្ឋានដែលស្ថិតនៅភាគខាងត្បូងអង្គរ ត្បិតតំបន់នេះសព្វថ្ងៃកំពុងអភិវឌ្ឍន៍ខ្លាំង ហើយតម្រូវការប្រើប្រាស់ដីធ្លីក៏ខ្ពស់ដែលអាចបង្កហានិភ័យខ្ពស់ដល់បុរាណដ្ឋាននៅក្នុងតំបន់នេះដែរ។ ដូច្នេះ តាមរយៈសកម្មភាពនៃការស្រាវជ្រាវតាមបែបបុរាណវិទ្យាមួយនេះ យើងអាចបង្ហាញពន្យល់ប្រជាពលរដ្ឋឱ្យយល់ពីតម្លៃនិងឱ្យចេះស្រឡាញ់ ការពារសម្បត្តិដូនតា កុំឱ្យមានការបំផ្លិចបំផ្លាញ។ លើសពីនេះទៀតអាចផ្សព្វផ្សាយឱ្យពួកគាត់ដឹងថា ទីតាំងបុរាណដ្ឋាននេះត្រូវការពារដោយអាជ្ញាធរជាតិអប្សរានិងយល់ដឹងពីសារៈសំខាន់របស់ទីទួលបុរាណដែលផ្សារភ្ជាប់ទៅនឹងតំបន់អង្គរ ព្រោះអង្គរមិនសំដៅតែលើរាជធានីដែលមានក្រុមប្រាសាទធំៗទាំងនោះតែមួយមុខទេ គឺជាការរួមផ្សំគ្នានៃប្រាសាទ និងភូមិករតូចៗទាំងអស់នេះឯង៕