រាជធានីភ្នំពេញ ៖ តាមរបាយការណ៍រយៈពេល១១ខែឆ្នាំ ២០១៧ របស់អនុគណៈកម្មទី២បង្ហាញថា មានគ្រោះថ្នាក់ចរាចរណ៍កើតឡើងចំនួន ៣,២៣៤លើក បណ្តាលអោយស្លាប់ចំនួន១,៦១៧នាក់ និងរងរបួសចំនួន៥១០៧នាក់។
របាយការណ៍ដដែលបញ្ជាក់ថា ប្រៀបធៀបរយៈពេលដូចគ្នានៃឆ្នាំមុន គ្រោះថ្នាក់ថយចំនួន១០៤លើក ស្មើនឹង៣% ស្លាប់កើន៤១នាក់ ស្មើនឹង២.៦% របួសថយចុះ ៨៥៥នាក់ ស្មើនឹង១៤% បង្កឡើងដោយល្មើសល្បឿនកំណត់ ៣៦% មិនគោរពសិទ្ធិ ១៧%, មិនប្រកាន់ស្តាំ ១៣%, វ៉ាជែង១១%, បត់មិនប្រយ័ត្ន១០%, ស្រវឹង១០%, កក្តាយានយន្ត៤%, និងងងុយគេង១% ។ អ្នកស្លាប់ជាអ្នកជិះម៉ូតូមានចំនួន៧៦% (៨៣% មិនពាក់មួក)៕
រាជធានីភ្នំពេញ ៖ អគ្គិសនីកម្ពុជា បានចេញសេចក្តីជូនដំណឹង បញ្ជាក់ពីការផ្អាកផ្គត់ផ្គង់ចរន្តអគ្គិសនី នៅតាមតំបន់មួយចំនួនក្នុងរាជធានីភ្នំពេញ និងខេត្តកណ្តាល ទៅតាមពេលវេលាដែលបានកំណត់ រយៈពេល៤ថ្ងៃ ចាប់ពីថ្ងៃទី០៧ ដល់ថ្ងៃទី១០ ខែធ្នូ ឆ្នាំ២០១៧។
ចំពោះមូលហេតុនៃការផ្អាកផ្គត់ផ្គង់ចរន្តអគ្គិសនីរយៈពេល៤ថ្ងៃនេះ ត្រូវបានអគ្គិសនីកម្ពុជាបញ្ជាក់ថា ដើម្បីអនុវត្តការងារជួសជុល ផ្លាស់ប្តូរ ដំឡើងបរិក្ខារ និងរុះរើគន្លងខ្សែបណ្តាញ បង្កលក្ខណៈដល់ការដ្ឋានពង្រីកផ្លូវ៕
មូស្គូ ៖ ថ្លែងក្នុងវេទិកាមួយក្នុងទីក្រុងមូស្គូ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថា លោកនឹងបន្តឈរឈ្មោះប្រកួតប្រជែងក្នុងការបោះឆ្នោតជ្រើសរើសប្រធានាធិបតីនៅឆ្នាំ២០១៨ទៀត។ នេះបើតាមទីភ្នាក់ងារសារព័ត៌មានចិន ស៊ីនហួរ។
លោក ពូទីន បានសួរទៅកាន់តែអ្នកចូលរួមដែលភាគច្រើនយុវជនថា ពួកគេគាំទ្ររូបលោកសម្រាប់ការបោះឆ្នោតប្រធានាធិបតីនៅខែមីនា ឆ្នាំ២០១៨ ដែរឬទេ? អ្នកចូលរួមទាំងអស់បានឆ្លើយថានឹងគាំទ្ររូបលោកឱ្យបន្តធ្វើជាប្រធានាធិបតីរុស្ស៊ីនៅអាណត្តិក្រោយ។
សូមបញ្ជាក់ថា ការបោះឆ្នោតជ្រើសរើសប្រធានាធិបតីរុស្ស៊ីនឹងត្រូវប្រព្រឹត្តទៅនៅខែមីនា ឆ្នាំ២០១៨ ខាងមុខនេះ ហើយបើតាមការស្ទង់មិតជាច្រើនគេរំពឹងថា លោក វ្ល៉ាឌីមៀ ពូទីន អាចនឹងបន្តជាប់ឆ្នោតជាប្រធានាធិបតីជាមួយអណត្តិទៀត៕
រាជធានីភ្នំពេញ ៖ នៅព្រឹកថ្ងៃទី៦ ខែធ្នូ ឆ្នាំ២០១៧កម្មកររោងចក្រ “ម៉េង ដាហ្វូតវៀ” ដែលមានទីតាំងនៅភូមិចោមចៅ សង្កាត់ចោមចៅទី១ ខណ្ឌពោធិ៍សែនជ័យ ប្រមាណជាង៤០០នាក់បន្តធ្វើកូដកម្ម ដោយបានដើរចេញពីរោងចក្រមកប្រមូលផ្តុំគ្នានៅផ្លូវធំវេងស្រេង ក៏ប៉ុន្តែអត់មានការបិទផ្លូវទេ។
បើតាមកម្មករដែលចូលរួមធ្វើបាតុកម្ម បានឲ្យដឹងថា ពួកគាត់មកធ្វើបាតុកម្មនេះ គឺដើម្បីទាមទារលក្ខខណ្ឌការងារពីថៅកែរោងចក្រចំនួន៣ចំណុច ៖ ១-សូមឲ្យក្រុមហ៊ុនបើកប្រាក់៥% គិតចាប់ពីបើករហូតដល់ឆ្នាំ២០១៨។ ២-សូមឲ្យក្រុមហ៊ុនផ្តល់លុយព្រឹម១៥ដុល្លារក្នុងមួយខែ។ ៣-សូមឲ្យក្រុមហ៊ុនផ្តល់លុយធ្វើ ដំណើរ ឬស្នាក់នៅ១៥ដុល្លារក្នុងមួយខែ។
សូមបញ្ជាក់ថា រោងចក្រ “ម៉េង ដាហ្វូតវៀ” មានកម្មករសរុប៥០០០នាក់៕
រាជធានីភ្នំពេញ ៖ កាលពីថ្ងៃម្សិលមិញនៅស្ថានទូតជប៉ុនបានរៀបចំពិធីចុះហត្ថលេខាសម្រាប់ការផ្តល់ជំនួយឥតសំណង ដោយភាគីជប៉ុនដឹកនាំដោយលោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជា និងភាគីកម្ពុជាតំណាងដោយ៤ស្ថាប័ន។
ជំនួយឥតសំណងទាំងនេះនឹងគាំទ្រដល់គម្រាងអភិវឌ្ឍចំនួន៤ នៅជនបទរបស់កម្ពុជា ក្នុងនោះរួមមាន៖ ទី១ ៖ គម្រោងជួសជុលផ្លូវមួយខ្សែ ក្នុងឃុំរមទម ស្រុករវៀងខេត្តព្រះវិហារ នូវថវិកាចំនួន៨៧,៥៨៧ដុលា្លរ។ ទី២ ៖ សម្រាប់សាងសង់អគារអគារមណ្ឌលសុខភាពគ្រញូងសែនជ័យ ខេត្តក្រចេះ នូវថវិកាចំនួន ៨៩,៦៣២ដុលា្លរ។ ទី៣ ៖ សម្រាប់សាងសង់អគារមណ្ឌលសុខភាពបារ៉ុង ក្នុងស្រុកល្វាឯម ខេត្តកណ្តាល នូវថវិកាចំនួន ៨៤,៩៧២ដុល្លារ និង៤ ៖ គម្រោងបំពាក់ម៉ាស៊ីនកាំរស្មីអ៊ិច និងម៉ាស៊ីនឆ្លុះអេកូ នៅមន្ទីរពេទ្យកុមារអង្គរ ក្នុងខេត្តសៀមរាប នូវថវិកា ៦៧៥៤៥ ដុល្លារ៕
ម៉ូស្គូ ៖ ប្រធានាធិបតីរុស្ស៊ី លោក ពូទីន បានសម្រេចដាក់បញ្ចូលអង្គភាពសារព័ត៌មាន និងក្រុមហ៊ុនប្រតិបត្តិការលើប្រព័ន្ធផ្សព្វផ្សាយរបស់សហរដ្ឋអាមេរិក និងអឺរ៉ុបចំនួន០៩ នៅក្នុងបញ្ជីខ្មៅ «ទីភ្នាក់ងារបរទេស» ដោយសារតែបានប្រព្រឹត្តល្មើសច្បាប់ យោងតាមមាត្រា៦ មានចែងនៅក្នុងច្បាស់ស្តីពីវិស័យសារព័ត៌មាន របស់សហព័ន្ធរុស្ស៊ី។ នេះបើតាមសារព័ត៌មានរុស្ស៊ី RT ។
ការសម្រេចដាក់អង្គភាពសារព័ត៌មាន និងក្រុមហ៊ុនទាំង០៩នេះត្រូវបានរដ្ឋាភិបាលទីក្រុងម៉ូស្គូអះអាងថា ជាការឆ្លើយតបវិញយ៉ាងសាកសមទៅនឹងទង្វើរបស់ទីក្រុងវ៉ាស៊ីនតោន ដែលខ្លួនមិនអាចទទួលយកបាន នោះគឺការដាក់សម្ពាធលើសារព័ត៌មានរុស្ស៊ី Russia Today America (RT) ប្រចាំនៅសហរដ្ឋអាមេរិក។
ក្រុមហ៊ុន និងអង្គភាព ដែលបម្រើការលើប្រព័ន្ធផ្សាយទាំង ០៩ មានចែងក្នុងបញ្ជីខ្មៅនោះរួមមាន៖
១៖ សារព័ត៌មានសំឡេងសហរដ្ឋអាមេរិក (VOA)
២៖ វិទ្យុអឺរ៉ុបសេរី និងវិទ្យុសេរីភាព (RFE/RL)
៣៖ វិទ្យុ Radio Azatliq សាខាប្រទេសរុស្ស៊ី
៤៖ វែបសាយ Kavkaz.Realii
៥៖ វែបសាយ Krym Realii
៦៖ វែបសាយ Sibir Realii
៧៖ ប៉ុស្តិ៍ទូរទស្សន៍ Current Time TV
៨៖ វែបសាយ factograph.info (បណ្តាញវិទ្យុ RFE/RL)
៩៖ គំរោងផ្សព្វផ្សាយ IdelRealii project (បណ្តាញវិទ្យុ RFE/RL)
សូមបញ្ជាក់ថា បញ្ជីខ្មៅមួយសម្រាប់ដាក់អង្គភាពព័ត៌មានណាមួយ ដែលបានប្រព្រឹត្តផ្ទុយនឹងច្បាស់ប្រទេសរុស្ស៊ី ហើយអង្គភាពដែលមានជាប់ឈ្មោះក្នុងនេះ គឺមិនត្រូវបានអនុញ្ញាតឲ្យចូលទៅយកព័ត៌មាន នៅក្នុងរដ្ឋសភាជាតិ និងក្រុមប្រឹក្សាសហព័ន្ធរុស្ស៊ី ដែលជាសភាទាំងពីរជាន់ថ្នាក់ របស់ប្រទេសរុស្ស៊ីនោះឡើយ៕
អូទ្រីស ៖ សារព័ត៌មាន Telegraph ចេញផ្សាយថា ប្រទេសអូទ្រីសបានផ្ដល់ភាពស្របច្បាប់លើអាពាហ៍ពិពាហ៍អ្នកស្រឡាញ់ភេទដូចគ្នាហើយ ដោយតុលាការធម្មនុញ្ញនៃប្រទេសមួយនេះបានសម្រេចអនុញាតឱ្យអ្នកស្រឡាញ់ភេទដូចគ្នា អាចរៀបការជាមួយនឹងគ្នាយ៉ាងយូរនៅឆ្នាំ២០១៩ ខាងមុខនេះ។
តាមរយៈការអនុញ្ញាតឲ្យមានអាពាហ៍ពិពាហ៍អ្នកស្រឡាញ់ភេទដូចគ្នាដោយស្របច្បាប់នេះ បានធ្វើប្រទេសអូទ្រីសក្លាយជាប្រទេសទី១៦នៅក្នុងតំបន់អឺរ៉ុប ស្របគ្នាជាមួយបណ្ដាប្រទេសអឺរ៉ុបផ្សេងទៀត ក្នុងនោះរួមមានទាំង បារាំង អាល្លឺម៉ង់ អង់គ្លេស និងអេស្ប៉ាញដែលសុទ្ធសឹងជាប្រទេសអនុញាតលើអាពាហ៍ពិពាហ៍អ្នកស្រឡាញ់ភេទដូចគ្នានេះ។
សូមបញ្ជាក់ថា ការអ្នកស្រឡាញ់ភេទដូចគ្នានៅក្នុងប្រទេសអូទ្រីសនេះត្រូវបានអនុញាតឱ្យមានទំនាក់ទំនងឯកជនតាំងតែពីឆ្នាំ២០១០ មកម្ល៉េះ៕
ញូដេលី ៖ មន្ត្រីឥណ្ឌាម្នាក់បាននិយាយថា សមាជិកសភាឥណ្ឌាពីររូប គឺលោក Sharad Yadav និងលោក Ali Anwar ត្រូវបានដកតំណែងពីសភាជាន់ខ្ពស់ដោយចោទថា បានចូលរួមក្នុងក្បួនតវ៉ារៀបចំដោយគណបក្សប្រឆាំង ប្រឆាំងនឹង គណបក្សរបស់ខ្លួនឯង។ នេះបើតាមទីភ្នាក់ងារសារព័ត៌មាន Reuters។
យោងតាមមន្ត្រីឥណ្ឌារូបនេះ នៅក្នុងលក្ខខណ្ឌមិនបញ្ចេញឈ្មោះ ការដកសមាជិកភាព នៃសមាជិកសភាខាងលើ កើតមានឡើងបន្ទាប់ពីគណបក្សរបស់អ្នកទាំងពីរ គឺគណបក្ស Janta Dal-United បានដាក់ញ្ញតិមួយទៅកាន់ប្រធានសភាជាន់ខ្ពស់ ដើម្បីស្នើដកតំណែងអ្នកទាំងពីរ ដោយចោទថា បានចូលរួមក្នុងក្បួនតវ៉ារៀបចំដោយគណបក្សប្រឆាំង ប្រឆាំងនឹង គណបក្សរបស់ខ្លួនឯង។
មន្ត្រីរូបនេះដដែល បានគូសបញ្ជាក់ដូច្នេះថា «សមាជិសភាមកពីគណបក្ស Janta Dal-United លោក Sharad Yadav និងលោក Ali Anwar ត្រូវបានដកសមាជិកសភាហើយ រីឯប្រធានសភាជាន់ខ្ពស់ ក៏បានយល់ស្របនឹង Janta Dal-United ដែរថា សមាជិកសភាទាំងពីរនាក់ មានឆន្ទៈបោះបង់ចោលអភ័យឯកសិទ្ធិ តាមរយៈការធ្វើ សកម្មភាពប្រឆាំងនឹងការដឹកនាំ នៃគណបក្សរបស់ខ្លួន ក៏ដូចជាចូលរួមជាមួយនឹងគណបក្សប្រឆាំង»។
សូមជម្រាបថា លោក Sharad Yadav បានជាប់ឆ្នោតជាសមាជិកសភាជាន់ខ្ពស់កាលពីឆ្នាំមុន ហើយអាណត្តិរបស់លោក នឹងត្រូវបញ្ចប់នៅឆ្នាំ២០២២ ខណៈ និងលោក Ali Anwar នឹងផុតអាណត្តិនៅឆ្នាំក្រោយ៕
ខេត្តកណ្តាល ៖ មន្ដ្រីតុលាការជាន់ខ្ពស់ខេត្តកណ្ដាលបានប្រាប់ក្រុមអ្នកសារព័ត៌មានកាលពីល្ងាចម្សិលមិញថា មនុស្សទាំង៦៤នាក់ ដែលចូលលេងសង្វៀនជល់មាន់ដ៏ធំនៅអរិយក្សត្រ ស្រុកល្វាឯមត្រូវបានតុលាការសម្រេចផ្ដន្ទាទោសដាក់ពន្ធនាគាររយៈពេលមួយខែ ប៉ុន្ដែទោសនេះត្រូវបានតុលាការសម្រេចព្យួរ ដូច្នេះត្រូវអនុញ្ញាតឲ្យត្រឡប់ទៅវិញ ទាំងអស់តែម្ដង។
មន្ដ្រីរូបនោះបញ្ជាក់ថា នៅរសៀលថ្ងៃដដែលនេះ ប្រធានតុលាការខេត្តកណ្ដាល លោក ហុក វ៉ាន់ធីណា បានចេញដីកាសម្រេចឲ្យឃុំខ្លួនឈ្មោះ ម៉ាប់ កូនប្រសាលោក ហ៊ុន សាន ដាក់ពន្ធនាគារដែលជាម្ចាស់ទីតាំងសង្វៀនជល់មាន់ដ៏ធំមួយនេះ។ ការសម្រេចនេះបន្ទាប់ពីសវនាការត្រូវបានបញ្ចប់ និងយោងតាមមាត្រា៤ នៃច្បាប់ល្បែងស៊ីសង។
លោកឧត្តមសេនីយ៍ អ៊ាវ ចំរើន ស្នងការខេត្តកណ្តាលបានប្រាប់អ្នកកាសែតថា ដំបូងឡើយមនុស្សជាង១៥០នាក់ ត្រូវបានសមត្ថកិច្ចឃាត់ខ្លួន ជាបណ្តោះ អាសន្ន ប៉ុន្តែដោយអ្នកខ្លះជាជាងសំណង់ ក៏អនុញ្ញាតឲ្យត្រឡប់ទៅវិញ ។ ដូច្នេះនៅសល់តែមនុស្ស៦៤នាក់ប៉ុណ្ណោះ ដែលត្រូវបញ្ជូនទៅតុលាការ ។ ចំណែកវត្ថុតាងដែល ត្រូវបានរឹបអូសវិញ រួមមាន រថយន្តមានចំនួនជិត៦០គ្រឿង ម៉ូតូជាង១០០គ្រឿង ព្រមទាំងមាន់ជល់ជាង១០០ក្បាល៕
ភ្នំពេញ ៖ រដ្ឋសភាគ្រោងប្រកាសសុពលភាពតំណាងរាស្ត្រថ្មី១៦រូបបន្ថែម នៅថ្ងៃទី៧ ធ្នូ នេះ នៅក្នុង កិច្ចប្រជុំពេញអង្គមួយ ហើយរដ្ឋសភាក៏នឹងរៀបចំរចនាសម្ព័ន្ធថ្មីរបស់រដ្ឋសភាឲ្យបានត្រឹមត្រូវ ផង ដែរ មុនពេលចាប់ផ្តើមការងាររបស់ខ្លួនឡើងវិញ។ ក្រោយពេលនេះមួយថ្ងៃ គឺនៅថ្ងៃទី៨ ខែធ្នូ ឆ្នាំ ២០១៧ រដ្ឋសភា នឹងប្រជុំសម្រេចប្រគល់កៅអីអនុប្រធានទី១ និងគណៈកម្មការជំនាញរដ្ឋសភា របស់អតីតគណបក្សសង្គ្រោះជាតិ ដែលនៅទំនេរ ទៅគណបក្សហ្វ៊ុនស៊ិនប៉ិចទាំងអស់ ។ នេះបើយោងតាមការឱ្យដឹងពី អគ្គលេខាធិការ និងជាអ្នកនាំពាក្យរដ្ឋសភា ឯ.ឧ ឡេង ប៉េងឡុង ។
ឯ.ឧ ឡេង ប៉េងឡុង បានបញ្ជាក់ ថា ដើម្បីរៀបចំរចនាសម្ព័ន្ធឲ្យសមស្របទៅនឹងអាសនៈ ក្នុងរដ្ឋសភា ដែលមានតំណាងរាស្ត្រ១២៣រូប ចូលបំពេញការងារជំនួសអតីតគណបក្សសង្គ្រោះជាតិ នោះ រដ្ឋសភានឹងសម្រេចបែងចែកអាសនៈអនុប្រធានទី១ និងគណៈកម្មការជំនាញរបស់អតីតគណបក្សសង្គ្រោះជាតិ ទៅឲ្យគណបក្សហ្វ៊ុនស៊ិនប៉ិច ទាំងអស់។
ឯ.ឧ ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា បានឲ្យដឹងផងដែរថា អ្នកតំណាងរាស្ត្រថ្មី មកពីគណបក្សហ្វ៊ុនស៊ិនប៉ិច គណបក្សសញ្ជាតិកម្ពុជា និងគណបក្សខ្មែរអភិវឌ្ឍន៍សេដ្ឋកិច្ច នឹងទទួលបានតួនាទីជាប្រធាន អនុប្រធាន និងសមាជិកនៃគណៈកម្មការជំនាញទាំង១០ របស់រដ្ឋសភា។ក្នុងនោះ តួនាទីជាប្រធានគណៈកម្មការចំនួន៥ និងអនុប្រធានគណៈកម្មការជំនាញរដ្ឋសភាចំនួន ៥។
សូមជម្រាបថា គណៈកម្មការជំនាញរដ្ឋសភា ៥ ដែលនឹងត្រូវបែងចែកតួនាទី ជាប្រធានគណៈកម្មការ ទៅឲ្យគណបក្សទាំង៣ ដែលទើបទទួលបានអាសនៈនៅរដ្ឋសភា រួមមាន៖១-គណៈ កម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា ២-គណៈកម្មការផែនការ វិនិយោគ កសិកម្ម អភិវឌ្ឈន៍ជនបទ បរិស្ថាន និងធនធានទឹក ៣-គណៈកម្មការអប់រំ យុវ ជន កីឡា ធម្មការ កិច្ចការសាសនា វប្បធម៌ និងទេសចរណ៍ ៤-គណៈកម្មការសុខាភិបាល សង្គម កិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី និង៥-គណៈ កម្មការអង្កេត បោសសម្អាត និងប្រឆាំងអំពើពុករលួយ។ រីឯគណៈកម្មការរដ្ឋសភា ៥ ទៀត ដែលគណបក្សទាំង ៣ ទើបតែទទួលបានអាសនៈថ្មី នៅរដ្ឋសភា គឺជាគណៈកម្មការ ដែលមានប្រធាន មកពីគណបក្សប្រជាជនកម្ពុជា។
ទាក់ទងនឹងអាសនៈគណៈកម្មការជំនាញវិញ គណបក្សហ្វ៊ុនស៊ិនប៉ិច នឹងត្រូវបានតួនាទីជាប្រធានគណៈកម្មការជំនាញទី១, គណៈកម្មការជំនាញទី៣ ,គណៈកម្មការជំនាញទី៧, គណៈកម្ម ការជំនាញទី៨ និងគណៈកម្មការជំនាញទី១0 ព្រមទាំងតួនាទីអនុប្រធានគណៈកម្មការជំនាញចំនួន៥ទៀត របស់អតីតគណបក្សសង្គ្រោះជាតិផងដែរ។
ទោះជាយ៉ាងណាក្តី ឯ.ឧ. ឡេង ប៉េងឡុង មិនបានបញ្ជាក់ថា តើមន្ត្រីគណបក្សហ្វ៊ុនស៊ិនប៉ិចរូបណាដែលនឹងត្រូវបានទទួលនូវតួនាទីជាអនុប្រធានទី១ នៃរដ្ឋសភានោះទេ។ កន្លងមក ប្រធានគណបក្សហ្វ៊ុនស៊ិនប៉ិច សម្ដេចក្រុមព្រះនរោត្តម រណឫទ្ធិ ធ្លាប់ជានាយករដ្ឋមន្ត្រីទី១នៃរាជរដ្ឋា ភិបាល និងជាព្រះប្រធានរដ្ឋសភា ហើយនៅពេលថ្មីៗនេះ ព្រះអង្គធ្លាប់បានបដិសេធទទួលកៅអីអនុប្រធានទី១នេះ តែព្រះអង្គបានបង្ហាញសញ្ញាបើកផ្លូវឲ្យ លោក យូ ហុកគ្រី នឹងក្លាយជាអនុប្រធាន៕
រាជធានីភ្នំពេញ ៖ អ្នកនាំពាក្យនៃតំណាងអយ្យការអមសាលាដំបូងរាជធានីភ្នំពេញ ដែលបញ្ជាក់ប្រាប់ក្រុមអ្នកសារព័ត៌មានកាលពីរសៀលម្សិលមិញថា ចៅក្រមស៊ើបសួរនៃសាលាដំបូងរាជធានីភ្នំពេញបានសម្រេចមិនអនុញ្ញាតឱ្យ លោក រ៉ុង ឈុន រួមទាំងសហជីព និងតំណាងសង្គមស៊ីវិលមួយចំនួនចូលជួបលោក កឹម សុខា អតីតប្រធានគណបក្សសង្គ្រោះជាតិ នៅក្នុងពន្ធនាគារត្រពាំងផ្លុង ខេត្តត្បូងឃ្មុំនោះទេ។
សូមបញ្ជាក់ថា នៅថ្ងៃទី០៥ ខែធ្នូ ឆ្នាំ២០១៧ លោក រ៉ុង ឈុន អតីតសមាជិកគណៈកម្មាធិការរៀបចំការបោះឆ្នោត (គជប) បានដាក់លិខិតទៅសាលាដំបូងរាជធានីភ្នំពេញ ស្នើសុំជួបសួរសុខទុក្ខលោក កឹម សុខា នៅមណ្ឌលអប់រំកែប្រែទី៣ (ពន្ធនាគារត្រពាំងផ្លុង) នៅព្រឹកថ្ងៃទី១០ ខែធ្នូ ឆ្នាំ២០១៧ ខាងមុខនេះ៕
រាជធានីភ្នំពេញ ៖ លោក រ៉ុង ឈុន អតីតសមាជិកគណៈកម្មាធិការរៀប ចំការបោះឆ្នោត (គជប) នៅថ្ងៃទី៥ ខែធ្នូ ឆ្នាំ២០១៧នេះ បានដាក់លិខិតទៅសាលាដំបូងរាជធានីភ្នំពេញ ស្នើសុំជួបសួរសុខទុក្ខ លោក កឹម សុខា នៅគុគត្រពាំងផ្លុងនាថ្ងៃទី១០ ខែធ្នូ ឆ្នាំ២០១៧ វេលាម៉ោង៩៖៣០នាទីព្រឹក ។
គេមិនដឹងថា តើតុលាការនឹងសម្រេចតាមការស្នើសុំរបស់ក្រុមលោក រ៉ុង ឈុន នោះ ឬយ៉ាងណា នោះទេ ខណដែលករណីលោក កឹម សុខា នេះ កន្លងមកសូម្បីតែក្រុមគ្រួសារមិនទាន់អាចចូលសួរសុខទុក្ខបាននៅឡើយ ៕
ភ្នំពេញ ៖ មុខសញ្ញាឆក់តាមផ្លូវកាលពីយប់មិញនៅតាមផ្លូវ២១៧វេងស្រេងត្រូវបានសមត្ថកិច្ចនគរបាលខណ្ឌមានជ័យសហការជាមួយកម្លាំងនគរបាលព្រហ្មទណ្ឌខណ្ឌដង្កោក្របួចបានទាំងចង្កោមកាលពីវេលាម៉ោង១១ និង៥០នាទីថ្ងៃទី៥ ខែធ្នូ ឆ្នាំ២០១៧ នៅខណ្ឌដង្កោ រាជធានីភ្នំពេញ។
ជនសង្ស័យទី១ឈ្មោះ លី ប៊ុនលីម ភេទប្រុស អាយុ១៨ឆ្នាំ មុខរបរមិនពិតប្រាកដស្នាក់នៅភូមិខ្វារសង្កាត់ដង្កោខណ្ខដង្កោ។ ទី២ ឈ្មោះ ចន រី ភេទប្រុស អាយុ២០ឆ្នាំ មុខរបរមិនពិតប្រាកដស្នាក់នៅភូមិឬស្សីសង្កាត់ស្ទឹងមានជ័យ២ និងទី៣ ឈ្មោះ សំ ចាន់មុន្នី ភេទប្រុស អាយុ២៥ឆ្នាំមុខរបរមិនពិតប្រាកដស្នាក់នៅភូមិតាឡីសង្កាត់សង្កោខណ្ខដង្កោ។
ជនរងគ្រោះឈ្មោះ នាង លាងឆេង ភេទស្រី អាយុ២៣ឆ្នាំមុខរបរអ្នកលក់គ្រឿងសំអាងនៅម្តុំធនាគារកាណាឌីយ៉ាកណ្តាលបានប្រាបអោយដឹងថាមុនពេលដែលមានក្រុមក្មេងទំនើងមកធ្វើសកម្មភាពឆក់កាបូបនេះដោយរូបនាងបានជិះម៉ូតូជាមួយនិងប្តីចេញពីកន្លែងលក់ត្រឡប់ទៅផ្ទះវិញនៅឯភូមិថ្មគោលសង្កាត់ចោមចៅខណ្ខពោធិសែនជ័យស្រាប់តែកំពុងតែធ្វើដំណើរនៅតាមផ្លូវ២១៧វេងស្រេងដល់ចំណុចច្រមុះជ្រូកស្ទឹងមានជ័យក៏មានម៉ូតូ៣គ្រឿងជិះមកក្បែរក៏ឆក់កាបូបតែដោយរូបនាងចាប់កាបូបនោះជាប់ធ្វើអោយជនង្ស័យដែលជិះម៉ូតូមួយគ្រឿងបានដួលពេលនោះក៏មានអ្នកធ្វើំណើរតាមផ្លូវជួយដេញចាប់បានម្នាក់ចំណែកបក្សពួកវាផ្សេងទៀតបានរត់គេចខ្លួនអស់ហើយបានប្រគល់អោយសមត្ថកិច្ច។
តាមសម្តីពីសមត្ថកិច្ចបានប្រាប់អោយដឹងថា ដោយមានសាកសួរទៅលើជនសង្ស័យម្នាក់ដែលឃាត់ខ្លួនបានកាលពីយប់ក៏បានដឹងពីគ្នីគ្នាវានៅសម្ងំលាក់ខ្លួនបានបន្តទៅយកនៅខណ្ឌដង្កោបានឃាត់ខ្លួនបាន២នាក់បន្តទៀត ហើយ២នាក់ទៀតបានរត់គេចខ្លួនបាត់ហើយកម្លាំងសមត្ថកិច្ចនឹងបន្តទៅស្រាវជ្រាវរកបក្យពួកវាបន្តទៀត។
បច្ចុប្បន្នជនសង្ស័យទាំង៣នាក់បាននិងកំពុងឃុំខ្លួននៅប៉ុស្តិ៍នគរបាលស្ទឹងមានជ័យ១ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់៕
រាជធានីភ្នំពេញ ៖ សភាបានកំណត់យកថ្ងៃទី០៧ ខែធ្នូ ឆ្នាំ២០១៧ ដើម្បីប្រកាសសុពលភាពរបស់តំណាងរាស្ត្រថ្មី១៦រូប រួមទាំងបោះឆ្នោតផ្តល់សេចក្តីទុកចិត្តលើ អនុប្រធាន-សមាជិកថ្មីរបស់ គណៈកម្មាធិការជាតិរៀបចំការបោះឆ្នោត៣រូបផងដែរ ។
អ្នកនាំពាក្យរដ្ឋសភាលោក ឈាង វុន បានបញ្ជាក់ថា តំណាងរាស្ត្រថ្មី១៦រូប ដែលទទួលស្គាល់ដោយគ.ជ.បនោះរួមមាន ១១រូប មកពី CPP ខណដែលតំណាងរាស្ត្រទាំងនោះបានមកពីការបែងចែកអសនៈ ដោយ គ.ជ.ប និងតំណាងរាស្ត្រថ្មីជំនួសតំណាងរាស្ត្រ CPP ដែលបានលាលែង ។
ចំណែកបេក្ខជនអនុប្រធាន-សមាជិក គ.ជ.បថ្មី៣រូប ដែលត្រូវបោះឆ្នោតផ្តល់សេចក្តីទុកចិត្ត នៅថ្ងៃទី០៧ ខែធ្នូនោះ រួមមាន ១៖ លោក នុត សុខុម មកពីគណបក្សហ្វ៊ុនស៊ិនប៉ិច ២៖ លោក ហ៊ែល សារ៉ាត់ មកពីគណបក្សសញ្ជាតិកម្ពុជា និងទី៣៖ លោក ឌឹម សុវណ្ណារុំ មកពីសាលាក្តីខ្មែរក្រហម ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
